Category: សង្គម និងសេដ្ឋកិច្ច

នៅពេលដែលក្មេងធ្វើខុស ភាគច្រើនពួកគេ​តែងតែ​គេចវេស ឬ​តែងតែ​ភ័យខ្លាចខ្លាំងពីការដាក់ទោសរបស់​មនុស្សធំ។ ទម្លាប់បែបនេះបានធ្វើឱ្យ​ក្មេងតូច​ក្លាយជាមនុស្សដែលមិនមានការទទួលខុសត្រូវនៅថ្ងៃអនាគតហើយ​ថែមទាំងអាចធ្វើឱ្យ​ពួកគេក្លាយជាមនុស្សខុសម្តងហើយម្តងទៀតដដែលៗ។

ទាក់ទងទៅនឹងបញ្ហានេះ មានអ្នកស្រាវជ្រាវមួយចំនួន ជាពិសេសអ្នកអប់រំបានផ្តល់ជាដំបូន្មានថាអាណាព្យាបាលគួរស្វែងរក​ដំណោះស្រាយ ឬផ្តល់ឱកាសសម្រាប់ការកែខ្លួន និង​លើកទឹកចិត្តចំពោះ​ការទទួលកំហុសរបស់ក្មេងៗ។

1. កុមារ​នឹងមិនខ្លាចប្រសិនបើ​មនុស្សធំផ្តល់ឱកាសឱ្យ
កុមារ​នឹងលែងក្លាយជាមនុស្សដែល​គេចវេសពីបញ្ហាទៀតហើយ ប្រសិន​បើ​មនុស្សធំផ្តល់ឱកាសឱ្យពួកគេដើម្បីកែខ្លួនព្រោះកុមារភាគច្រើនដែលចូលចិត្តការគេចវេសពីកំហុសដោយសារតែពួកគេភ័យខ្លាចការដាក់ទោស និងការប្រើកំហឹងព្រមានពួកគេពីសំណាក់មនុស្សធំ។ ម្យ៉ាងវិញទៀត ក្មេងក៏ដូចជាមនុស្សធំទូទៅដែរគ្មានអ្នកណាម្នាក់ចង់ធ្វើខុសនោះទេគ្រាន់តែពេលខ្លះក្មេងធ្វើខុសដោយសារមិនយល់ពីហេតុផល​នៃសកម្មភាព ឬដឹងមិនដល់នូវអ្វីដែលពួកគេកំពុងធ្វើថាអាចនឹងជះផលអវិជ្ជមានដល់ពួកគេឬអត់ប៉ុណ្ណោះ។ នៅពេលដែលមនុស្សធំ ផ្តល់ឱកាសដល់ពួកគេ ក្មេងតូច​នឹងព្យាយាម​បង្ហាញយ៉ាងស្មោះត្រង់ថាគេពិតជាធ្វើនូវសកម្មភាពដែលខុសនោះមែន ដើម្បីទទួលបានឱកាសសម្រាប់ការកែខ្លួន។

2. ក្មេងនឹង​ក្លាហានប្រសិនបើ​មានការលើកទឹកចិត្តនៅពេលដែលគេធ្វើត្រូវ
កូនក្មេង​ គឺជាវ័យដែលចង់បានភាពសំខាន់ ហើយចង់ធ្វើអ្វីឱ្យមនុស្សធំសរសើរតែមនុស្សធំភាគច្រើនតែងតែ​មើលរំលងក្មេងៗត្រង់ចំណុចហ្នឹង។ នៅពេល​ដែលក្មេងធ្វើខុសមនុស្សធំ​ព្យាយាម​ចាប់កំហុស តែនៅពេលដែលគេធ្វើត្រូវ បែរជាមិនមានការយកចិត្តទុកដាក់ការកោតសរសើរ ឬការលើកទឹកចិត្តឱ្យក្មេងខំបន្តសកម្មភាពល្អៗនោះទៀត ឬ​លើកសរសើរចំពោះការកែកំហុសរបស់ក្មេងទៅវិញ។

សកម្មភាព​បែបនេះអាចធ្វើឱ្យក្មេង​នៅតែព្យាយាមធ្វើខុសព្រោះគេយល់ថា​ទោះបីជាធ្វើត្រូវក៏គ្មានបានផលចំណេញអ្វីដល់គេដែរព្រោះពួកគេនៅតែគ្មានភាពសំខាន់ក្នុងភ្នែកមនុស្សធំ។ តែប្រសិនបើ​មនុស្សធំចេះលើកទឹកចិត្តវិញពួកគេនឹងព្យាយាមធ្វើគ្រប់បែបយ៉ាងដើម្បីបង្ហាញថា​​ ពួកគេជាមនុស្សល្អហើយមានសេចក្តីក្លាហានក្នុងការ​ប្រឈមជាមួយនឹងបញ្ហានានាទៀតផង៕

ក្រោយពីកញ្ញា នីតា វរវង្ស ទទួលបានប្រជាប្រិយភាពប្រមាណពីរឆ្នាំជាប់គ្នាមានអ្នកគាំទ្ររបស់នាងជាច្រើនបានសរសើរនាងថា ទើបតែចាប់អាជីពសម្ដែងមិនទាន់បានប៉ុន្មានផងក៏មានកេរ្ដិ៍ឈ្មោះល្បីក្នុងសិល្បៈប្រដំប្រសងនឹងរៀមច្បងទៅហើយ។

ពាក់ព័ន្ធនឹងប្រជាប្រិយភាពក្នុងសិល្បៈនេះ គេតែងតែលើកឡើងថា លុះត្រាតែតារាសម្ដែងនោះមានហុងស៊ុយខ្លាំងទើបឆាប់ល្បី។ ផ្ទុយទៅវិញតារាសម្ដែងស្រីស្រស់វ័យក្មេងនីតា វរវង្ស បានបញ្ជាក់ថា ទោះជានាងកំពុងតែមានកេរ្ដិ៍ឈ្មោះបោះសំឡេងក្នុងសិល្បៈពិតមែន ប៉ុន្ដែមួយរយៈចុងក្រោយនេះនាងជួបបញ្ហាមិនចេះដាច់សោះ។

កញ្ញា នីតា វរវង្ស បញ្ជាក់ថា មូលហេតុដែលនាងលើកយកបញ្ហានេះមកនិយាយក៏ព្រោះតែរយៈពេលពីរខែចុងក្រោយនេះ នាងចេះតែមានរឿងមិនចេះចប់សោះ អស់ពីមួយចូលមួយ។ នាងបន្ដថា បញ្ហាកើតមានឡើងនោះគ្មានអ្វីធំដុំទេ គ្រាន់តែធ្វើឱ្យនាងមានអារម្មណ៍ស្មុគស្មាញ ព្រោះគ្រាដែលនាងកំពុងតែមានអារម្មណ៍មិនល្អជាមួយរឿងផ្ទាល់ខ្លួនមួយចំនួននោះ ពេលបើករថយន្ដទៅបំពេញការងារក៏ស្រាប់តែរថយន្តខូច និងអស់ពីរថយន្ដខូច ក៏ស្រាប់តែទៅបើករថយន្ដប៉ះគេត្រូវសងលុយការខូចខាតគេទៀត។

តារាសម្ដែងរូបនេះបញ្ជាក់ថា នាងមិនដឹងថា មកពីឆុងឆ្នាំ ឬយីអ៊ុនធ្លាក់ ឬគ្មានហុងស៊ុយ ឬយ៉ាងណានោះទេ? ប៉ុន្ដែក្រោយពីកើតរឿងហេតុមិនល្អទាំងនោះហើយ នាងបានទៅវត្ដដើម្បីនិមន្ដព្រះសង្ឃប្រោះព្រំសុំសិរីសួស្ដី។ វរវង្ស ប្រាប់បន្ដទៀតថា៖ «មិនមែនខ្ញុំជឿងប់ងល់លើអបិយជំនឿពេកទេ ប៉ុន្ដែជឿខ្លះក៏ល្អដែរ ព្រោះនៅពេលខ្ញុំកើតអារម្មណ៍ស្មុគស្មាញក្នុងចិត្ដ និងកើតរឿងជាបន្ដបន្ទាប់នោះ ខ្ញុំមិនដឹងជាទៅរកអ្វីមកដោះស្រាយទេ តែក្រោយពីបានស្រោចទឹកប្រោះព្រំរួចហើយ ក៏រាងធូរស្រឡះក្នុងចិត្ដតែម្ដង លែងមានអារម្មណ៍ធុញថប់ក្នុងចិត្ដអស់រលីង។ នេះប្រហែលជាដូចពាក្យគេថា អាគមផ្សំអាយ៉ូសហើយមើលទៅ»៕

ភ្នំពេញ៖ ក្នុងគោលបំណងកាត់បន្ថយផលប៉ះពាល់ដល់ជីវភាពរស់នៅប្រចាំថ្ងៃរបស់ពលរដ្ឋ ក្រសួងពាណិជ្ជកម្មបានបង្កើតក្រុមការងារពិសេសមួយ ដើម្បីឃ្លាំមើលស្ថានភាព និងសន្ទស្សន៍តម្លៃមុខទំនិញចាំបាច់ៗដែលបម្រើឱ្យជីវភាពប្រចាំថ្ងៃ។

ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានមានប្រសាសន៍ថា ក្រុមការងារនេះបង្កើតឡើងមានភារកិច្ចមួយចំនួនដូចជា សិក្សា និងចងក្រងឯកសារទាក់ទងនឹងស្ថានភាពផលិតកម្ម ថ្លៃដើម សមត្ថភាពផ្គត់ផ្គង់ការប្រើប្រាស់ និងសន្ទស្សន៍តម្លៃនៃមុខទំនិញអាទិភាពដូចជា ស្រូវ-អង្ករ សាច់ត្រី សាច់មាន់ សាច់ជ្រូក ប្រេងសាំងធម្មតា និងម៉ាស៊ូត និងដំឡូងមី ជាដើម។ល ។

លើសពីនេះក្រុមការងារនេះបង្កើតឡើងដើម្បីតាមដានពិនិត្យឃ្លាំមើល ស្ថានភាពប្រែប្រួលនៃផលិតកម្ម ស្ថានភាពចរាចរណ៍ទំនិញលើទីផ្សារ និងដាក់ចេញនូវវិធានការចាំបាច់ ដើម្បីទ្រទ្រង់ផលិតកម្ម និងតម្លៃទំនិញលើទីផ្សារប្រចាំថ្ងៃ។

ឯកឧត្តមរដ្ឋមន្ត្រី បានណែនាំក្រុមការងារឱ្យរៀបចំតារាងតាមដាន និងឃ្លាំមើលស្ថានភាព និងសន្ទស្សន៍ថ្លៃទំនិញឲ្យបានជាប្រចាំ ដើម្បីសិក្សាពីបញ្ហាផលិតកម្ម និងតម្លៃ ឬបញ្ហានានាផ្សេងទៀត សំដៅទៅដល់ការរៀបចំកិច្ចអន្តរាគមន៍ជាលក្ខណៈប្រព័ន្ធ សម្រាប់កាត់បន្ថយផលប៉ះពាល់ដល់ជីវភាពរបស់ប្រជាជន៕

ភ្នំពេញៈ ក្រុមការងារឯកជនផ្នែកវិស័យទេសចរណ៍ បានស្នើរដ្ឋាភិបាលកុំឲ្យមានការសាងសង់ស្ថានីយប្រេងនៅតាមបណ្តាកោះនានា ពិសេសកោះរ៉ុង ដើម្បីធ្វើយ៉ាងណាកុំឲ្យមានការបំពុលបរិស្ថាន និងធនធានធម្មជាតិនៅក្នុងតំបន់ទាំងនោះ។

លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា បានថ្លែងឲ្យដឹងតាមទូរស័ព្ទកាលពីម្សិលមិញថា ការសាងសង់ស្ថានីយប្រេងនឹងធ្វើឲ្យប៉ះពាល់ដល់ជីវចម្រុះ និងបរិស្ថាននៅលើកោះ ព្រោះពេលមានរថយន្តបើកបរច្រើននឹងធ្វើឲ្យខូចបរិស្ថាន ហេតុនេះនៅតាមបណ្តាកោះនានាគួរមានត្រឹមតែម៉ូតូ ឬរថយន្តអគ្គិសនី គឺជាការប្រសើរបំផុត។ លោកបន្តថា នៅពេលមានការបំពុលបរិស្ថាន វានឹងបំផ្លាញអ្វីៗទាំងអស់ ហើយយើងនឹងបាត់បង់ទាំងអស់ ប្រសិនជាយើងមិនយកចិត្តទុកដាក់ពីឥឡូវនេះទៅទេនោះ។

លោក ហូ វណ្ឌី បានបន្តថា ការបំពុលទឹកតាមរយៈការបង្ហូរកាកសំណល់ ចូលប្រភពទឹក ការបោះចោលថង់ផ្លាស្ទិក និងសំរាមនៅតាមតំបន់ឆ្នេរ និងលើឆ្នេរជាការបំផ្លាញវិស័យទេសចរណ៍ដ៏ខ្លាំងសម្បើម ហេតុនេះសូមបងប្អូនប្រជាពលរដ្ឋ និងអាជ្ញាធរមូលដ្ឋានជួយយកចិត្តទុកដាក់ចំពោះបញ្ហានេះផង។

សហប្រធានក្រុមការងារឯកជនផ្នែកវិស័យទេសចរណ៍លោក លូ ម៉េង បានបន្ថែមថា សំរាម និងការបំពុលបរិស្ថានជាបញ្ហារបស់យើងទាំងអស់គ្នាដែលទាមទារឲ្យមានការចូលរួមពីប្រជាពលរដ្ឋទាំងអស់គ្នា ដើម្បីលើកកម្ពស់បរិស្ថាន និងទីក្រុងឲ្យបានស្អាត ព្រោះសំរាមជាសត្រូវរបស់ទេសចរណ៍ដែលភ្ញៀវទេសចរមកពីប្រទេសមួយចំនួនពួកគេមានការខ្លាចរអា មិនចង់មកកាន់ប្រទេសដែលមានការបំពុលបរិស្ថាន និងការបោះចោលសំរាមពាសវាលពាសកាលនោះទេ។

លោកបន្តថា “សូមចាប់ផ្តើមឥឡូវនេះពីយើងទាំងអស់គ្នា កុំបោះសំរាម ឬថង់ផ្លាស្ទិកចោលពាសវាលពាសកាល ដើម្បីធ្វើឲ្យប្រទេសយើងស្អាត និងទីក្រុងរបស់យើងគ្មានសំរាម”៕