Category: សង្គម និងសេដ្ឋកិច្ច

ភ្នំពេញ – កម្មវិធីសនិ្នបាត និងពិព័រណ៍អចលនវត្ថុកម្ពុជារៀបចំឡើងដោយសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានចាប់ផ្ដើមបើកដំណើរការជាផ្លូវការហើយ។ ពិធីនេះនឹងប្រព្រឹត្ដទៅរយៈពេលបីថ្ងៃ គឺចាប់ពីថ្ងៃទី23-25 ខែមិថុនា ឆ្នាំ2017 នៅសណ្ឋាគារសូហ្វីតែល ភូគីត្រា។

លោកជំទាវ ងួន សុខា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានលើកឡើងថា ការរៀបចំឱ្យមានកម្មវិធីសនិ្នបាត និងពិព័រណ៍អចលនវត្ថុកម្ពុជា ពិតជាមានសារៈសំខាន់ខ្លាំងណាស់សម្រាប់អ្នកធ្វើធុរកិច្ចលើវិស័យនេះ។ ម្យ៉ាងវាក៏ជាភ័ស្ដុតាងយ៉ាងជាក់ច្បាស់មួយដែលឆ្លុះបញ្ចាំងឱ្យឃើញពីសក្ដានុពល និងការរីកចម្រើនលើវិស័យអចលនទ្រព្យនៅកម្ពុជា។

រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបន្ដថា ប្រសិនបើសម្លឹងមើលតាមបណ្ដាប្រទេសក្នុងតំបន់អាស៊ាន យើងឃើញថា កម្ពុជាហាក់នៅមានឱកាសច្រើនជាងគេក្នុងការវិនិយោគលើវិស័យអចលនទ្រព្យ ដូច្នេះវាក៏ជាកាលានុវត្ដភាពសម្រាប់អ្នកវិនិយោគទាំងក្នុងស្រុក និងក្រៅស្រុកអាចជួបគ្នាដោយផ្ទាល់ដើម្បីជជែកពីបញ្ហាធុរកិច្ច។ ម្យ៉ាងក៏ផ្ដល់ឱកាសដល់អ្នកជំនាញដែលប្រកបអាជីវកម្មលើ វិស័យនេះដើម្បីពង្រឹង ពង្រីក សមត្ថភាពឱ្យស្របទៅតាមតម្រូវការទីផ្សារនៅក្នុងតំបន់ដែរ។

ក្នុងកម្មវិធីសនិ្នបាត និងពិព័រណ៍អចលនវត្ថុកម្ពុជា គេសង្កេតឃើញថា មានការចូលរួមពីសំណាក់អ្នកជំនាញ និងភ្នាក់ងារអចលនវត្ថុ និងម្ចាស់គម្រោងអភិវឌ្ឍន៍ជាច្រើន។ ពិសេសក៏មានការចូលរួមពីវាគ្មិនជាតិ និងអន្ដរជាតិអញ្ជើញមកពីប្រទេសក្នុងតំបន់អាស៊ាន ដែលមានបទពិសោធជាច្រើនឆ្នាំបានមកចែករំលែកបទពិសោធអំពីស្ថានភាពដីធ្លី និងអចលនទ្រព្យជាលក្ខណៈសកលផងដែរ។

លោក គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានបញ្ជាក់ថា ការរៀបចំកម្មវិធីសនិ្នបាត និងពិព័រណ៍អចលនវត្ថុកម្ពុជាធ្វើឡើងក្នុងគោលបំណងផ្សារភ្ជាប់ទំនាក់ទំនងរវាងសមាគមនៅប្រទេសកម្ពុជា ជាមួយសមាគមអចលនទ្រព្យនៅក្រៅប្រទេស ដូចជាប្រទេសថៃ វៀតណាម សិង្ហបុរី ម៉ាឡេស៊ី ហ្វីលីពីន និងភូមា ជាដើម។

លោកបានបន្ថែមថា៖« អ្វីដែលខ្ញុំចង់បានគឺការធ្វើអាជីវកម្មឆ្លងដែន។ ពីមុនមកមានជនបរទេសជាច្រើនគាត់មករកស៊ីលក់ដីធ្លីនៅប្រទេសយើង ទោះយ៉ាងណាយើងមិនអាចហាមឃាត់បានទេ ព្រោះតែសេដ្ឋកិច្ចទីផ្សារសេរី តែខ្ញុំសួរខ្លួនឯងថា ចុះហេតុអ្វីបានជាយើងមិនអាចទៅរកស៊ីលក់ដីធ្លីនៅស្រុកក្រៅបាន? ដូច្នេះបើគេមានសិទ្ធិមករកស៊ីលក់ដីធ្លីនៅស្រុកយើង យើងក៏មានសិទ្ធិទៅរកស៊ីលក់ដីធ្លីនៅឯប្រទេសរបស់គេបានដែរ។ អ៊ីចឹងគោលបំណងធំរបស់ខ្ញុំគឺចង់បំបាត់ព្រំដែនអាជីវកម្មផ្នែកដីធ្លី»។

លោកបន្ដថា ការលើកឡើងបែបនេះក្នុងអត្ថន័យចង់ឱ្យសមាជិកសមាគមនៅក្នុងប្រទេសកម្ពុជាបង្កើនទំនាក់ទំនងឱ្យទូលំទូលាយជាមួយសមាជិកសមាគមដីធ្លីនៅបរទេស ពោលបើគេស្គាល់យើង យើងត្រូវតែស្គាល់គេ។ ឧទាហរណ៍ថា បើខ្មែរយើងចង់ទិញផ្ទះនៅប្រទេសសិង្ហបុរី តើយើងត្រូវទាក់ទងទៅនរណា? ជាក់ស្ដែងតាមរយៈកម្មវិធីនេះប្រធានសមាគមអចលនទ្រព្យនៅប្រទេសសិង្ហបុរី គាត់មកកាន់ប្រទេសយើង ដូច្នេះយើងអាចទំនាក់ទំនងទូរស័ព្ទសួរគាត់ដើម្បីសុំការណែនាំពីគាត់ថា គួរតែទាក់ទងទៅក្រុមហ៊ុនណាដែលមានកេរ្ដិ៍ឈ្មោះល្អអាចទុកចិត្ដបាន? ជាដើម៕

ភ្នំពេញ៖ ប្រធានគ្រឹះស្ថានមីក្រូហិរញ្ញវត្ថុ លោកឧកញ៉ា ហួត អៀងតុង មានប្រសាសន៍ថា នៅសប្តាហ៍ក្រោយនេះ គ្រឹះស្ថានមីក្រូហិរញ្ញវត្ថុ និងគ្រឹះស្ថានធនាគារ នឹងដាក់សំណើរួមគ្នាមួយទៅក្រសួងសេដ្ឋកិច្ច និងហិរញ្ញវត្ថុ រួមទាំងអគ្គនាយកដ្ឋានពន្ធដារដើម្បីពិភាក្សាការងារជុំវិញការដាក់ឱ្យជាប់ពន្ធអាករ (VAT) 10% ទៅលើអតិថិជន។

លោកឧកញ៉ា ហួត អៀងតុង ដែលជាប្រធានគ្រឹះស្ថានមីក្រូហិរញ្ញវត្ថុហត្ថាកសិករដែរនោះមានប្រសាសន៍ថា ការដាក់ឱ្យជាប់ពន្ធអាក រ(VAT)10% ទៅលើអតិថិជនដែលប្រើសេវាកម្មរបស់ធនាគារ ឬគ្រឹះស្ថានមីក្រូហិរញ្ញវត្ថុនេះ គឺជាការដាក់បន្ទុកបន្ថែមទៅលើពលរដ្ឋដោយពួកគាត់ជួបការលំបាកក្នុងការទទួលយក និងអនុវត្តបានភ្លាមៗ។

លោកថា ការដាក់ឱ្យអនុវត្តភ្លាមៗនេះអតិថិជនមិនបានយល់ច្បាស់ទៅលើការបង់ពន្ធអាករបន្ថែម (VAT) ក្នុងការប្រើប្រាស់សេវាធនាគារដែលជាបន្ទុកបន្ថែមរបស់ពួកគាត់ «វាហាក់ដូចជាអនុវត្តលឿនពេក ដូច្នេះយើងចង់ពិភាក្សារកច្រកចេញណាមួយដែលជាដំណោះស្រាយ ហើយបើតាមការចង់បានយើងចង់ឱ្យក្រសួងក៏ដូចជាអគ្គនាយកដ្ឋានពន្ធដារពន្យាពេលក្នុងការអនុវត្តសម្រាប់ឱ្យគ្រឹះស្ថានមីក្រូហិរញ្ញវត្ថុ និងធនាគារមានពេលជូនដំណឹងទៅដល់អតិថិជន និងធ្វើកិច្ចការរដ្ឋបាលផ្សេងៗនៅក្នុងអង្គភាពនីមួយៗ»។

គួររំលឹកថាក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី25 ឧសភា បានចេញប្រកាសមួយបញ្ជាក់ពីការអនុវត្តអាករលើតម្លៃបន្ថែម (VAT) ដែលបានកំណត់ថាសេវាហិរញ្ញវត្ថុដែលមិនជាប់ VAT ជាសេវាហិរញ្ញវត្ថុមូលដ្ឋានដែលកំណត់តែប្រតិបត្តិការទទួលប្រាក់បញ្ញើ និងផ្តល់ឥណទាន ប៉ុន្តែមិនរួមបញ្ចូលកម្រៃសេវាផ្សេងៗទៀតនោះទេ។ សេវាដែលជាប់កាតព្វកិច្ចបង់ពន្ធលើតម្លៃបន្ថែម10ភាគរយ ឧទាហរណ៍រួមមានកម្រៃលើសេវាផ្ទេរប្រាក់ កម្រៃសេវាវាយតម្លៃលើការទទួលកម្ចី ឬ សេវាផ្នែកច្បាប់ សេវាថែទាំគណនេយ្យជាដើម រួមទាំងសេវាជាច្រើនផ្សេងៗទៀត។

អ្នកជំនាញធនាគារបានប៉ាន់ប្រមាណថាចំណូលសរុបរបស់គ្រឹះស្ថានហិរញ្ញវត្ថុ រួមមានធនាគារ និងមីក្រូហិរញ្ញវត្ថុក្នុងមួយឆ្នាំគ្រឹះស្ថានទាំងពីរអាចរកបានពីកម្រៃសេវា និងសោហ៊ុយបូកបញ្ចូលគ្នាមានប្រមាណ 300លានដុល្លារដែលមានន័យថា រដ្ឋាភិបាលអាចប្រមូលអាករពីសេវាទាំងនេះប្រមាណ 30លានដុល្លារ ក្នុងមួយឆ្នាំដែល 30លានដុល្លារ គឺទទួលបានពីអតិថិជនជាអ្នកប្រើប្រាស់សេវាកម្មហិរញ្ញវត្ថុ ដូចជាកម្រៃលើសេវាផ្ទេរប្រាក់ កម្រៃសេវាវាយតម្លៃលើការទទួលកម្ចី ឬ សេវាផ្នែកច្បាប់ សេវាថែទាំគណនេយ្យជាដើម រួមទាំងសេវាជាច្រើនផ្សេងៗទៀត៕

ការដឹកនាំ​មនុស្ស​មិនមែនជា​រឿង​ងាយស្រួល​ប៉ុន្មាន​នោះទេ។ តើ​ដើម្បី​ក្លាយជា​មេដឹកនាំ​ដ៏​អស្ចារ្យ​ត្រូវធ្វើ​ដូចម្ដេចខ្លះ? ដើម្បី​ក្លាយជា​មេដឹកនាំ​ល្អ​អ្នក​ត្រូវតែ​អនុវត្ត​ចំណុច​ខាងក្រោម​នេះ៖

1) រៀបចំខ្លួន​ដើម្បី​ឈ្នះ
សមាជិក​របស់​ក្រុមការងារ​ថ្មី ត្រូវការ​យល់ថា ពួកគេ​ស័ក្តិសម​នឹង​មុន​តំណែង​ណាមួយ​ក្នុង​ស្ថាប័ន។ ការងារ​របស់​មេដឹកនាំ មិន​ត្រឹមតែ​ពន្យល់​នូវ​ការរំពឹងទុក​ពី​ការងារ​ពួកគេ​នោះទេ ប៉ុន្តែ​ថែម​ទៀង​ស្វែងយល់ថា តើ​ពួកគេ​នឹង​រីកចម្រើន​លូតលាស់ និង​សម្រេច​គោលដៅ​បាន​ដោយ​របៀប​ណា​ផងដែរ។

2) ចូរ​កែតម្រូវ​កំហុសភ្លាមៗ
កុំ​ទុក​បញ្ហា​ចោល​ដោយ​មិនបាន​ដោះស្រាយ។ ប្រសិនបើ​បុគ្គលិក​ណា​ម្នាក់​កំពុងតែ​ឃ្លាតឆ្ងាយ​ពី​គោលដៅ​របស់​ក្រុម ចូរ​ណែនាំ និង​កែតម្រូវ​នៅ​បញ្ហា​ដែល​ពួកគេ​កំពុង​តែមាន។ ការ​មាន​បញ្ហា​ហើយ​ឆាប់​ចាប់ផ្ដើម​រក​វិធី​ក្នុងកា​ដោះស្រាយ និង​ជួយ​ឱ្យ​សមាជិក​ក្រុម និង​ក្រុម​ទាំងមូល​អាចធ្វើ​ការ​បាន​យ៉ាង​ល្អ និង​រីកចម្រើន​ដើម្បី​សម្រេច​គោលដៅ​រួមទាំង​មូល។

3) ជំរុញ​លើទឹក​ចិត្ត​ក្នុងការ​ទំនាក់ទំនង
ក្រុម​របស់​អ្នកត្រូវការ​កា​ដើរតួរ​យ៉ាងសំខាន់​ក្នុងការ​ដំណើរ​នៃរ​សម្រេចចិត្ត។ នេះ​មានន័យថា​អ្នក​មិនអាច​ចាក់សោ​ទុកចោល​ក្នុង​ការិយាល័យ​ធ្វើការ​របស់​អ្នក​នោះទេ។ ចូរ​លើកទឹកចិត្ត​ក្រុម​របស់​អ្នក​ឱ្យមាន​អារម្មណ៍ល្អ​ជាមួយនឹង​អ្នក​ក្នុងការ​ទំនាក់ទំនង និង​ស្មោះត្រង់​ជាមួយនឹង​អ្នក​ដើម្បី​ចែក​រំ​លេក​គំនិត​យោបល់​ជាមួយនឹង​អ្នក​ក្នុង​ការធ្វើការងារ​អ្វីមួយ។

4) ចូរ​ផ្ដល់​រង្វាន់​ទៅដល់​ភាពជោគជ័យ និង​ជំរុញ​លើកទឹកចិត្ត​ដល់​ភាពបរាជ័យ
ចូរ​ចាត់ទុក​មនុស្ស​ឱ្យ​ស្មើភាព​គ្នា។ រាល់​មនុស្ស​ដែល​ស្ថិតនៅក្រោម​ការគ្រប់គ្រង​របស់​អ្នក អ្នក​ត្រូវតែមាន​ភាព​យុទ្ធ​ធម៌​សម្រាប់​ពួកគេ​ក្នុងកា​បំពេញការងារ។ ចូរ​ផ្ដល់​រង្វាន់​ទៅ​ក្រុម ឬក៏​បុគ្គល​ណា​ដែល​បាន​បំពេញ​ការទទួលបាន​នៅ​ភាពជោគជ័យ និង​ជំរុញ​លើកទឹកចិត្ត​ដល់​បុគ្គល​ណា​ដែល​បរាជ័យ​ឱ្យធ្វើ​ការឱ្យ​បានល្អ​បន្ថែមទៀត៕

រឿង​ប្រើ​ពាក្យសំដី​ជាមួយ​គូស្នេហ៍​គឺជា រឿង​សំខាន់​ខ្លាំងណាស់ ព្រោះ​គូ​ស្វាមីភរិយា​ដែល​ឈ្លោះ​គ្នា ច្រើនតែ​កើតចេញពី​ពាក្យសំដី​ហ្នឹងឯង តើ​វា​នឹង​ល្អ​ដែរ​ទេ បើសិនជា​យើង​មាន​ពាក្យសំដី​ដែល​ល្អពីរោះៗ ដែល​សាង​សម្ពន្ធភាព​ឱ្យ​កាន់តែ​រឹងមាំ​ឡើង​នោះ? ចូរ​នាំគ្នា​ហ្វឹកហាត់​ឱ្យ​ធ្លាប់មាត់ នោះ​ជីវិត​ស្នេហ៍​របស់​អ្នកនឹង​មិនមាន​ថ្ងៃ​មាន​បញ្ហា​ដោយសារ​ពាក្យសំដី​ឡើយ។ ដូច្នេះ​សូម​សាក​ល្បងមើល​ប្រយោគ​ដែល​គួរ​និយាយ​ជាមួយ​មនុស្ស​ដែល​យើង​ស្រឡាញ់ ដែល ឡា​រ៉ែ​ន លើក​យកមក​ណែនាំ​ក្នុង​លេខ​នេះ​ម្តង​មើល។

1. បង / អូន នៅត្រង់​នេះ​ណា៎!
ពាក្យសំដីធម្មតាៗដែល​អាច​បង្ហាញ​បាន​ថា​អ្នក​នឹងមិន​ព្រម​លែងដៃ​ពី​គេ(ឬ​នាង) យ៉ាងពិត​ប្រាកដ មិន​ថា​មាន​បញ្ហា​អ្វី​កើតឡើង​នោះឡើយ។ បើ​អ្នក​មិនដឹងថា​នឹង​និយាយ​អ្វី​នៅពេលដែល​គេ (ឬ​នាង) មាន​បញ្ហា​នឿយហត់​នោះ សុំឱ្យ​និយាយ​ពាក្យ​នេះ​សិន​ទៅ ធានាថា​អ្នក​ស្តាប់​នឹងមាន​អារម្មណ៍​សប្បាយចិត្ត​ឡើងវិញ​មិន​ខាន។

2. បង / អូន មាន​អ្វីល្អៗជាង​បង / អូន ខ្លួនឯង​គិត​ទៅទៀត
ពាក្យសំដី​ដែល​សាង​កម្លាំង​ចិត្តបាន​យ៉ាង​ល្អ គឺ​ការជឿជាក់​លើ​មនុស្ស​ដែល​យើង​ស្រឡាញ់ បែប​នេះឯង​ត្រឹមតែ​ប៉ុណ្ណឹង​ក៏​នឹងធ្វើ​ឱ្យ​ផ្កា​រីក​ស្គុះស្គាយ​នៅក្នុង​ចិត្ត​អ្នក​ស្តាប់ និង​ត្រៀម​ជាស្រេច​ក្នុងការ​ក្រោក​ឡើង​ធ្វើ​អ្វី តាម​ក្តី​ស្រមៃ​របស់ខ្លួន​បាន​បាត់ទៅហើយ។

3. សុំទោស​ណា៎!
បើ​អ្នក​ដឹងខ្លួន​ថា​ខុស កុំ​បណ្តោយឱ្យ​បញ្ហា​វា​រលាយបាត់​ទៅដោយ​ខ្លួនឯង​ដោយ​គ្មាន​អ្នក ណា​និយាយ​ពាក្យ​ថា​សុំទោស​ឱ្យសោះ​ពាក្យខ្លីៗមួយ​នេះ​មាន​ថាមពល​ខ្លាំងក្លា​ខ្លាំងណាស់​អ្នកខ្លះ​គ្រាន់តែ​បានឮ​ពាក្យ​ថា​សុំទោស​ដួងចិត្ត​របស់គេ​ក៏​ទន់​ត្រជាក់​ភ្លាម​បាត់ទៅហើយ ដូច្នេះ​ចូរ​និយាយ​វា​ចេញមក​វា​គ្មាន​ទៅ​ខាតបង់​អ្វី​ទេ។

4. បង / អូន បារម្ភ​ណា៎!
បើ​សង្កេតឃើញថា គេ (ឬ​នាង) មាន​បញ្ហា​មានរឿង​ពិបាកចិត្ត​ឬ​កំពុង​ជួបនឹង​បញ្ហា​អ្វីមួយ​នោះ ប្រយោគ​ដែល​គួរ​និយាយ​ជាមួយ​គូស្នេហ៍​របស់​អ្នកនោះ​គឺ “បង / អូន​បារម្ភ​ណា” តែ​ប៉ុណ្ណឹង​នឹង​ធ្វើឱ្យ​គូស្នេហ៍ របស់​អ្នក​រំភើបចិត្ត​បាត់ទៅហើយ ដែល​សំខាន់​នោះ​វា​ថែមទាំង​ជា​ពាក្យសំដី​ដែល​ធ្វើឱ្យ​អ្នក​ស្តាប់​ចង់​ទម្លាយ​បញ្ហា​ប្រាប់​យើង​កាន់តែខ្លាំង​ឡើង​ទៀតផង។

5. មាន​អ្វី​អាចឱ្យ​បង / អូន​ជួយ​បាន ទេ?
កុំ​បណ្តោយឱ្យ​បញ្ហា​របស់​គូស្នេហ៍ ក្លាយជា​បញ្ហា​របស់គេ (ឬ​នាង) តែម្នាក់ឯង​អី គ្រាន់តែ​សួរ​គេ​យ៉ាងងាយៗថា​មាន​អ្វី​អាច​ឱ្យជួយ​បាន​ទ ប៉ុណ្ណឹង​ក៏​ប្រៀបដូចជា​ទឹក​ដ៏​ត្រជាក់​មក​ស្រោចស្រប់​លើ​បេះដូង​មនុស្ស​ដែល​កំពុង​តានតឹង​ក្នុង​អារម្មណ៍​ឱ្យ​ស្រស់ថ្លា​ឡើងវិញ​បាន​ទៅហើយ។

6. ខឹង​តើ.. តែ​មិន​ចង់​បាត់បង់​បង / អូន​ទេ!
ជាមួយ​សម្ពន្ធភាព​ស្នេហ៍ យ៉ាងណាៗក៏ត្រូវ​តែមាន​ថ្ងៃ​ដែល​អ្នក​ឈ្លោះ​គ្នា​ដែរ តែ​បើសិនជា​អ្នក​ប្រាប់​ទៅ​គេ (ឬ​នាង) ថា​អ្នក​ខឹង តែ​នៅតែ​ស្រឡាញ់ តែ​ប៉ុណ្ណឹង​ក៏​នឹង​ធ្វើឱ្យ​អ្នក​បានឮ​ធូរស្រាល​ក្នុង​ចិត្ត​ឬ​ត្រៀម​ជាស្រេច​ក្នុងការ​ចាប់ដៃ​កែខៃ​បញ្ហា​ជាមួយគ្នា​បាត់ទៅហើយ។

7. មនុស្ស​យើង​សុទ្ធតែ​ធ្លាប់ធ្វើ​ខុស​ទាំងអស់
ដូចគ្នា​នោះដែរ បើ​គូស្នេហ៍​របស់​អ្នកមាន​អារម្មណ៍ តានតឹង​ធុញថប់​ពី​កំហុសឆ្គង​រឿង​ការងារ រឿងផ្សេងៗក្នុង​ជីវិត​ប្រចាំថ្ងៃ នោះ​អ្នក​ត្រូវតែ​និយាយ​ឱ្យ​អារម្មណ៍​គេ​ត្រជាក់​វិញ​និង​កែសម្រួល​ទស្សនៈ​របស់គេ (ឬ​នាង) ថា មនុស្ស​គ្រប់រូប​លើ​ពិភពលោក​នេះ​សុទ្ធតែ​ធ្លាប់ធ្វើ​ខុស​ទាំង​អស់ហ្នឹង ហើយ​អ្នក​ត្រៀម​ជាស្រេច​ក្នុងការ​អត់​ទោស​ឱ្យគេ (ឬ​នាង) ដូចគ្នា​នឹង​គេ(ឬ​នាង)ក៏​គួរតែ​អត់​ទោស​ឱ្យ​ខ្លួនឯង​ដែរ៕

មិន​ពិបាក​ប៉ុន្មាន​ទេ ប្រសិនបើ​អ្នក​ចង់ដឹងថា ពេជ្រ​ណាមួយ​សុ​ទ្ឋ ឬ​ក្លែងក្លាយ ដោយ​អ្នក​ត្រូវ​លាប ទឹក​មឹក​ពណ៌​ខ្មៅ​ទៅលើ​ពេជ្រ ប្រសិនបើ មាន​ភាព​រអិល​ចេញ​អស់​គ្មាន​ពណ៌ ជាប់​នៅលើ​ពេជ្រ នោះ​ប​ញ្ផា​ក់ថា ជា​ពេជ្រ​សុ​ទ្ឋ​ពិតប្រាកដ ។ ផ្ទុយទៅវិញ ប្រសិនបើ​មាន​ចំនុច​ខ្មៅ ប្រឡាក់​ត្រង់​កន្លែង​លាប​ពណ៌​នោះ គ្រាប់ពេជ្រ​នោះ ជា​គ្រាប់ពេជ្រ​ក្លែងក្លាយ​ហើយ ៕

ការអប់រំ ជាគ្រឹះសំខាន់សម្រាប់វិស័យធនធានមនុស្សនៅកម្ពុជា ហើយវាក៏ជាផ្នែកមួយយ៉ាងសំខាន់ផងដែរដែលអាណាព្យាបាលគ្រប់រូបត្រូវយកចិត្តទុកដាក់ ព្រោះមានតែការអប់រំទេ ទើបអាចធ្វើឱ្យអនាគតរបស់កូនៗពួកគាត់មានភាពល្អប្រសើរ។

អ្នកគ្រប់គ្រងទូទៅរបស់ធនាគារហ្វីលីព លោក ហាន់ ប៉េង តាន់ បានមានប្រសាសន៍ថាធនាគារហ្វីលីពបានសម្រេចចិត្តរៀបចំ “ពិព័រណ៍ស្ដីពីការអប់រំ” ក្នុងចុងសប្ដាហ៍នៅកោះពេជ្រេនាពេលនេះ ដោយសារតែពួកយើងជឿជាក់យ៉ាងមុតមាំថា ការអប់រំគឺជាមូលដ្ឋានគ្រឹះសំខាន់សំរាប់ប្រជាពលរដ្ឋគ្រប់រូប។ តាមរយៈការអប់រំមានគុណភាពល្អ ធ្វើអោយប្រជាពលរដ្ឋទទួលបានការងារល្អ ប្រាក់បៀវត្សខ្ពស់ និងមានបរិបទការរស់នៅខ្ពស់ ព្រមទាំងចូលរួមចំណែកក្នុងការស្ថាបនាសង្គមអោយមានភាពល្អប្រសើរ និងការរីកចំរើនរបស់ប្រទេសជាតិ។

លោក ហាន់ ប៉េង តាន់ បានមានប្រសាសន៍ថា៖ «គោលបំណងរបស់យើងក្នុងការបង្កើត ពិព័រណ៌ស្តីអំពីការអប់រំ នេះឡើង ដើម្បីជួយដល់មាតាបិតា និងអណាព្យាបាលរបស់កុមារ ឲ្យដឹងអំពីតំរូវការរបស់ក្មេង និង ការណែនាំអប់រំ ដល់កុមារ ដើម្បី់ក្លាយជាអ្នកទទួលបានជោគជ័យ»។

លោកបានបន្តថា យើងក៍មានគោលបំណងផងដែរ ចំពោះការអប់រំដល់កុមារ ក្រុមយុវជន និង មនុស្សពេញវ័យយល់ដឹងអំពីចំណេះដឹងហិរញ្ញវត្ថុដោយនិយាយពីការយុទ្ធសាស្រ្តគ្រប់គ្រងហិញ្ញវត្ថុ បង្កើតទម្លាប់ការសន្សំ និងដឹងពីសារៈសំខាន់គោលដៅផែនការសំរាប់ជីវិត។ ធនាគារហ្វីលីព សូមជំរាបជូនដល់ មាតាបិតា អាណាព្យាបាល អំពីសារៈសំខាន់នៃការសន្សំតាំងពីអាយុវ័យក្មេង ដើម្បីអោយមានសេរីភាពផ្នែកហរិញ្ញវត្ថុ នាពេលអនាគត។

ក្នុងនោះឯកឧត្តម ហង់ ជួនណារ៉ុន រដ្ឋមន្ត្រី នៃក្រសួងអប់រំ យុវជន និងកីឡា បានលើកឡើងថា ការបង្កើតកម្មវិធីនេះគឺ ឆ្លើយតបជាមួយនឹងគោលការណ៍របស់ក្រសួងអប់រំ ដែលព្យាយាមជំរុញឱ្យកុមារមានចំណេះដឹងខ្ពស់ ទាំងជំនាញរឹង និងជំនាញទន់ ដែលក្នុងនោះការគ្រប់គ្រងហិរញ្ញវត្ថុក៏មានសារៈសំខាន់មួយផងដែរដែលក្រសួងខិតខំបណ្តុះបណ្តាល។

គួរបញ្ជាក់ថា កម្មវិធីនេះ នឹងប្រព្រឹត្តឡើង រយៈពេល 2ថ្ងៃ គឺចាប់ពីថ្ងៃទី24 ដល់ថ្ងៃទី25 ខែមិថុនា ឆ្នាំ2017 ចាប់ពីម៉ោង8ព្រឹកដល់ម៉ោង7យប់ នៅសាលតាំងពិព័រណ៍កោះពេជ្រ អគារ អាយ (I) ។ ពិព័រណ៍ស្តីពីការអប់រំនេះ បានរៀបចំសិក្ខាសាលាសំខាន់ៗជាច្រើនវគ្គរយៈពេលពីរថ្ងៃដ៏មានអត្ថប្រយោជន៍ដែលមានប្រធានបទដូចជា 1.យុទ្ធសាស្រ្តជួយឱ្យកូនលោកអ្នកចេះកំណត់ភាពជោគជ័យ 2.សារៈសំខាន់នៃការយល់ដឹងផ្នែកហិរញ្ញវត្ថុសម្រាប់កុមារ 3.ធ្វើខ្លួនឱ្យទទួលបានជោគជ័យក្នុងអំឡុងពេលសិក្សា 4.ការៀបចំគម្រោងហិរញ្ញវត្ថុសំរាប់បុគ្គល និងអាជីវកម្ម៕