Category: សង្គម និងសេដ្ឋកិច្ច

ភ្នំពេញៈ អ្នកវិនិយោគដ៏ជោគជ័យម្នាក់ក្នុងវិស័យអចលនទ្រព្យបានបង្ហាញពីវិធីសាស្រ្តទទួលបានជោគជ័យក្នុងការវិនិយោគលើវិស័យអចលនទ្រព្យនៅកម្ពុជា ដែលអាចធ្វើឲ្យលោកអ្នកក្លាយជាអ្នកមានបាន។

លោកឧកញ៉ា សៀ រិទ្ធី អគ្គនាយកក្រុមហ៊ុន World Bridge Land Groupបានថ្លែងក្នុងវេទិកាតុមូលស្តីពី “វិស័យលំនៅដ្ឋាន ខុនដូ និងតំបន់សេដ្ឋកិច្ចពិសេសកាលពីថ្ងៃម្សិលមិញថា ចាប់តាំងពីឆ្នាំ1993 លោកបានចាប់ផ្តើមវិនិយោគទិញ-លក់ដីធ្លី ដោយសារលោកមើលឃើញថា ពេលអង្គការសហប្រជាជាតិចូលមករៀបចំការបោះឆ្នោតប្រទេសរបស់យើងនឹងដើរទៅមុខ ពេលមានជីវភាពល្អ មនុស្សយើងត្រូវការផ្ទះរស់នៅ ទោះបីជាទៅដល់ណាក៏មនុស្ស និងសត្វត្រូវការជម្រកដូចគ្នាដែរ។

លោកបន្តថា “វិនិយោគលើដីធ្លីត្រូវគិតពីធនធានរបស់យើង មិនមែនមានធនធាន10 យើងវិនិយោគដល់15នោះទេ ព្រោះវានឹងធ្វើឲ្យយើងជួបវិបត្តិហិរញ្ញវត្ថុ បើសិនជាកើតមានវិបត្តិសេដ្ឋកិច្ចពិភពលោក”។

តើការទិញដីត្រូវពិនិត្យមើលចំណុចអ្វីខ្លះ? លោកសៀ រិទ្ធីបានពន្យល់ថា ដីនៅក្នុងពេលបច្ចុប្បន្ននេះក៏មិនទាន់ឡើងថ្លៃខ្ពស់ពេកដែរ ដូចនេះបើយើងមានធនធានច្រើនយើងវិនិយោគដីនៅក្នុងក្រុង តែបើមានលុយតិចយើងវិនិយោគនៅតំបន់ជាយក្រុង ប៉ុន្តែត្រូវពិនិត្យលើចំណុចចំនួនបីជាសំខាន់ ទី1 ទិញដីកុំឲ្យមានជម្លោះ ទី2 យើងមើលពីចរន្តរីកចម្រើននៅតំបន់នោះគួបផ្សំនឹងទិសដៅអភិវឌ្ឍន៍របស់រដ្ឋាភិបាល និងទី3 បដិវត្តន៍ដីគឺការទិញដី ឧទាហរណ៍លោកជំទាវ លឹម ឈីវហូ វិនិយោគនៅតំបន់មួយមានទំហំដី 350ហិកតា យើងត្រូវធ្វើការវិនិយោគនៅកន្លែងនោះដែរ តែត្រូវទទួលព័ត៌មានឱ្យបានមុនគេ ព្រោះបើដំណឹងនៃការអភិវឌ្ឍនោះ ឬគម្រោងនោះត្រូវបានអភិវឌ្ឍរួចហើយទើបយើងដឹងជាក្រោយ នោះគឺយើងអស់ឱកាសហើយ។
លោកបន្តថា “ត្រូវរកដៃគូល្អវិនិយោគជាមួយគ្នា កុំធ្វើម្នាក់ឯងគឺយើងអាចធ្វើមានបានៗហើយ”៕

ថ្មីៗនេះពិធីការិនី ហ៊ិន ច័ន្ទនិរ័ត្ន បានធ្វើឱ្យហ្វ៊ែនៗរបស់នាងជាច្រើនមានការភ្ញាក់ផ្អើលគ្រាដែលនាងបានពន្លះបុរសម្នាក់តាមរយៈពាក្យសម្តីអសុរោះមួយចំនួន។ មិនតែប៉ុណ្ណោះនាងថែមទាំងបានព្រមានដល់បុរសម្នាក់នោះថា អាចនឹងមានការចាត់ការតាមផ្លូវច្បាប់ទៀតផង។

នេះជាលើកទីមួយហើយដែលគេឃើញតារាសម្ដែង និងពិធីការិនីមានសម្តីស្រទន់ រូបនេះបានបង្ហាញនូវអារម្មណ៍ខឹងយ៉ាងខ្លាំងទៅកាន់អ្នកគាំទ្រខ្លួនតាមរយៈការប្រើពាក្យពេចន៍ថា៖«ចង់ព្រុស ព្រុសទៀតទៅ ព្រោះចេះតែព្រុសអត់សូវដឹងអី» ការប្រើពាក្យសម្តីធ្ងន់ៗបែបនេះគឺគ្រាដែលអ្នកគាំទ្ររបស់នាងបានបង្ហោះរូបដ៏ស្រស់ស្អាតរបស់នាងជាមួយនឹងសំណេរ៖ «ហ៊ានទាយម៉ូដែលទូរស័ព្ទអត់?”។

បើទោះជាកញ្ញា ហ៊ិន ច័ន្ទនិរ័ត្ន មិនបានប្រាប់ពីមូលហេតុឱ្យបានជាក់ច្បាស់ថា ហេតុអ្វីបានជានាងខឹងបុរសម្នាក់នោះក៏ដោយ ក៏នាងបានប្រាប់ថា មកពីបុរសម្នាក់នៅប្រើសម្តីមិនសមរម្យដាក់នាងមុន ដូច្នេះនាងក៏ប្រើពាក្យសម្ដីតបទៅវិញពោលគឺ «បើតម្ពក់មិនទៅ ព្នៅក៏មិនមកដែរ»។ ទាំងនេះជាពាក្យប៉ុន្មានម៉ាត់ដែលនាងបានបកស្រាយទៅកាន់អ្នកគាំទ្រហ្វេសប៊ុកដទៃ។ លើសពីនេះនាងបានបញ្ជាក់ថា បើសិនបុគ្គលម្នាក់នោះនៅតែព្យាយាមបំផុសបំផុល និងញុះញង់បរិហារកេរិ័្ដនាងទៀត នាងនឹងចាត់ការតាមផ្លូវច្បាប់។

មានការលើកជាចម្ងល់ពីសំណាក់មហាជនថា តើការនិយាយរបស់បុរសម្នាក់នោះមានការជ្រុលជ្រួសលើនាងបែបណាបានជានាងខឹងអីយ៉ាងហ្នឹង?។ ជាមួយគ្នានោះគេក៏ឃើញបុរសម្នាក់នោះសរសេរថា «គ្រាន់តែShare សួរថតដោយកាមេរ៉ាម៉ាកអីសោះ ខុសដែរមែន???» បន្ថែមលើនេះក៏បានសរសេរទៀតថា៖«បងប្អូនប្រុងប្រយ័ត្ន កុំចេះតែ Share ណា! ប្រយ័ត្នគេថាយើងចង់មានរឿង ឬចេះដឹងរឿងគេ!!!»។

ខាងក្រោមនេះជាសារដែលនាងកញ្ញា ហ៊ិន ច័ន្ទនិរ័ត្ន សរសេរទៅកាន់ប្រិយមិត្ដរបស់នាង ៖
«នាងខ្ញុំ ហ៊ិន ច័ន្ទនិរ័ត្ន សុំធ្វើការបកស្រាយលើព័ត៌មានដែលនាងខ្ញុំបានប្រើពាក្យសម្តីមិនសមរម្យទៅលើអ្នកគាំទ្រម្នាក់។ មូលហេតុរឿងមានហេតុ និងផល បើតម្ពក់មិនទៅ ផ្លែព្នៅក៏មិនមកដែរ ក្នុងនាមលោកជាមនុស្សប្រុសម្នាក់ដែលប្រើពាក្យមិនសមរម្យមកលើនាងខ្ញុំជានារីទន់ខ្សោយ ដែលលោកបាន post មើលងាយ និងប្រមាថជាទីបំផុតមកដល់រូបនាងខ្ញុំ។ ចង់សួរថា តើលោកមានបំណងអ្វីឱ្យប្រាកដ..? ខណៈពេលដែលនាងខ្ញុំមិនបានជេរ ឬប្រមាថលើរូបលោកសូម្បីតែបន្តិច…ប៉ុន្តែលោកបានផ្សព្វផ្សាយ ព័ត៌មានបំផុសបំផុល និងបង្ខូចកេរ្តិ៍ឈ្មោះរបស់នាងខ្ញុំ ដោយប្រកាន់ជំហរថា ខ្លួនឯងធ្វើទង្វើត្រឹមត្រូវ ស្របពេលដែលកំពុងតែមានគោលបំណងអ្វីមកលើរូបថតនាងខ្ញុំ ដូច្នេះបងប្អូនអាចធ្វើការពិចារណា លើទង្វើរបស់គាត់ ដោយនាងខ្ញុំមិនទាន់បានបកស្រាយអ្វីទាំងអស់»៕

ចម្ងល់ដែលបងប្អូនឆ្ងល់ នាងខ្ញុំសូមធ្វើការបកស្រាយត្រឹមតែប៉ុណ្ណឹង ចំពោះរឿងនេះនាងខ្ញុំក៏សូមបញ្ចប់ត្រឹមពេលនេះដែល , បើសិនបុគ្គលម្នាក់នោះនៅតែព្យាយាម បំផុសបំផុល នឹង ញុះញង់ បរិហាកេរ្តិ៏ឈ្មោះនាងខ្ញុំទៀត … នាងខ្ញុំ នឹង ចាត់វិធានការតាមផ្លូវច្បាប់។ »៕

តារាចម្រៀងជើងចាស់នៅក្នុងអំឡុងទសវត្សរ៍ទី90 គឺលោក នូ ស៊ឹប កំពុងធ្លាក់ខ្លួនឈឺជាទម្ងន់ ព្រមទាំងខ្វះខាតថវិកាក្នុងការព្យាបាលជំងឺ និងកំពុងសម្រាកនៅក្នុងបន្ទប់ជួលនៅម្ដុំភូមិចំរើនផល សង្កាត់បឹងទំពុន ខណ្ឌមានជ័យ រាជធានីភ្នំពេញ ជាមួយក្មួយ និងចៅ។

លោក នូ ស៊ឹប បានរៀបរាប់ប្រាប់សារព័តមានកាលពីពេលកន្លងទៅថា លោកមានជំងឺលើសឈាម និងមានដុះដុំសាច់ ហើយធ្វើទុក្ខខ្លាំងនៅពេលដែលសម្ពាធឈាមឡើង និងត្រូវផឹកថ្នាំព្យាបាលតាមវេជ្ជបញ្ជា។ លោកបន្ដថា អាការបានធូរស្បើយត្រឹមតែ10 នាទីប៉ុណ្ណោះ ហើយនឹងធ្វើទុក្ខឡើងវិញនៅពេលអស់ជាតិថ្នាំ មិនតែប៉ុណ្ណោះ លោកត្រូវទៅជួបពេទ្យហើយចាក់ថ្នាំព្យាបាលជំងឺ និងថ្នាំបន្ថែមកម្លាំងជារៀងរាល់ថ្ងៃទៀតផង។ រីឯការងារសិល្បៈវិញនោះ លោកបានបន្ដថា អស់រយៈពេលមួយឆ្នាំជាងហើយដែលលោកគ្មានការងារធ្វើ និងគ្មាននរណាហៅលោកច្រៀងឡើយ គឺសម្ងំនៅក្នុងតែបន្ទប់ជួល ហើយរង់ចាំក្មួយយកអាហារមកឱ្យលោកតែប៉ុណ្ណោះ។

តាមស្ថានភាពសុខភាពនាពេលបច្ចុប្បន្ននេះ តារាចម្រៀងជើងចាស់ខាងលើបានបញ្ជាក់ទៀតថា លោកមិនអាចធ្វើការឡើងច្រៀងតាមការប្រគំតន្ត្រីធំៗ ឬឡើងឆាកនៅក្នុងរយៈពេលយូរៗបានទេ លោកបានត្រឹមតែថតសំឡេងជូនផលិតកម្មដែលលោកធ្លាប់ស្គាល់គ្នាប៉ុណ្ណោះ ដូច្នោះហើយដោយមានភាពខ្វះខាតខ្លាំង ទើបបានជាលោក នូ ស៊ឹប សូមអំពាវនាវដល់សប្បុរសជនទាំងឡាយ មេត្តាជួយឧបត្ថម្ភលោកជាថវិកាខ្លះដើម្បីសម្រួលក្នុងការព្យាបាលជំងឺ និងជីវភាពរស់នៅប្រចាំថ្ងៃផង។

ជាចុងក្រោយ តារាវ័យ 70ឆ្នាំរូបនេះបានថ្លែងអំណរគុណដល់សប្បុរសជនទាំងឡាយ ទាំងក្នុងស្រុក និងក្រៅស្រុកដែលបានជូនថវិកាខ្លះកន្លងមកជួយដល់លោក ហើយព្រមទាំងពោលថា លោកវ័យចំណាស់នេះហើយ គឺពិបាកក្នុងការស្វែងរកការងារធ្វើណាស់ ប៉ុន្ដែមានតែសប្បុរសជននេះហើយដែលជាអ្នកមានគុណរបស់លោក៕

ការស្រឡាញ់គ្នា ការបាននៅក្បែរគ្នាយ៉ាងផ្អែមល្ហែមក្នុងរយៈពេលមួយថ្ងៃតាមរយៈខ្សែជីវិតមួយដែលធ្លាប់រួមសុខទុក្ខជាមួយគ្នា តែត្រូវប្ដូរផ្លាស់ទាំងស្រុងសឹងតែនឹកស្មានមិនដល់ និងបានបន្សល់ទុកនូវអនុស្សាវរីយ៍ដក់ជាប់នៅក្នុងកែវភ្នែករបស់សុ គន្ធ និសា។ កញ្ញាបានរៀបរាប់ថា ការបែកគ្នាបែបនេះគឺអូនមិនអាចទទួលយកបានឡើយ ហេតុអ្វីក៏ចាកចេញទៅ មិនបានលា មិនបានប្រាប់គ្នាមួយម៉ាត់សោះបែបនេះ ដោយកញ្ញាបានបញ្ជាក់ពីអារម្មណ៍ដែលឈឺចាប់ពោរពេញទៅដោយមនោសញ្ចេតនាសោកសៅធ្វើឱ្យអ្នកស្ដាប់លង់អារម្មណ៍តាមស្នេហាព្រាត់ប្រាសមួយនេះតាមរយៈបទ «អស់ពេលថ្ងៃស្អែក»។

ការប្រមូលផ្ដុំនូវអារម្មណ៍ស្នេហាមួយដ៏ជ្រាលជ្រៅមិនមែនជារឿងងាយស្រួលក្នុងការតាក់តែងចេញជាបទចម្រៀងឡើយ ដូច្នោះហើយទើបអ្នកនិពន្ធបទ “អស់ពេលថ្ងៃស្អែក” បានសរសេរប្រាប់ពីបទពិសោធស្នេហ៍បាក់បែកមួយដែលបានបាត់បង់ និងគ្មានថ្ងៃបានវិលត្រឡប់មកវិញ ដែលទោះជាថ្ងៃម្សិលមិញបានបន្សល់នូវអតីតកាលផ្អែមល្ហែមក៏ដោយ ក៏ថ្ងៃស្អែកមិនដូចថ្ងៃម្សិលមិញដែរ ហើយបទនេះដែរត្រូវបានសម្រួលតន្ត្រីដោយលោកមាសសុគន្ធ ហៅ អួយ របស់ផលិតកម្មរស្មីហង្សមាស។

ចង់ដឹងថា តើសុគន្ធ និសាដាក់មនោសញ្ជេតនាដល់កម្រិតណានោះ សូមមកស្ដាប់ទាំងអស់គ្នាដូចខាងក្រោមនេះ៖

https://www.youtube.com/watch?v=lQIiXc686lM

ការជ្រើសរើសជំនាញសិក្សាត្រឹមត្រូវជារឿងមួយដែលសំខាន់សម្រាប់និស្សិតម្នាក់ៗ និងសង្គមទាំងមូល ព្រោះនៅពេលដែលសង្គមជាតិសម្បូរដោយមនុស្សមានសមត្ថភាព ឬជំនាញច្បាស់លាស់ នៅពេលនោះគ្រប់វិស័យនឹងមានការរីកចម្រើន។

ដើម្បីផ្តល់ជូននូវព័ត៌មានស្តីពីអាជីពការងារនានាដល់សិស្សានុសិស្សនៅកម្ពុជា សមាគមអតីតនិស្សិតអាហារូបករណ៍ Fulbright បានរៀបចំពិព័រណ៍ជំនាញ និងការសិក្សា ឆ្នាំ 2017 ដោយមានការចូលរួមពីគ្រប់សមាសភាពពាក់ព័ន្ធ។

ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានថ្លែងនៅក្នុងពិព័រណ៍ជំនាញ និងការសិក្សាថា ការសិក្សារបស់មនុស្សនាពេលបច្ចុប្បន្ននេះ គឺមានសារៈសំខាន់ណាស់សម្រាប់ការរស់នៅ ហើយជំនាញទាំងអស់នោះចាំបាច់ត្រូវតែឆ្លើយតបជាមួយនឹងបញ្ហានានាដែលកំពុងកើតឡើង ឬជាប្រភពនៃចំណេះដឹងដើម្បីដោះស្រាយបញ្ហាមនុស្ស។

ឯកឧត្តម ហង់ ជួនណារ៉ុន មានប្រសាសន៍ថា៖ «យុវជនកម្ពុជា គួររៀនស្គាល់ជំនាញឱ្យបានច្បាស់ ហើយព្យាយាមប្រើប្រាស់ចំណេះដឹងដែលមាននោះឱ្យអស់លទ្ធភាពដើម្បីដោះស្រាយបញ្ហានានាដែលកើតមានឡើងនៅក្នុងការរស់នៅ និងក្នុងសង្គម»។
នៅក្នុងពិព័រណ៍ជំនាញ និងការសិក្សាឆ្នាំ 2017 នេះក៏មានការចូលរួមផងដែរពី ឯកឧត្តម William A. Heidt ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា និងអ្នកជំនាញជាច្រើនទៀតដែលបានចែករំលែកបទពិសោធលើប្រធានបទមួយចំនួនដូចជា ការជ្រើសរើសជំនាញសិក្សា កម្រងសំណួរដើម្បីស្គាល់ខ្លួនឯង កិច្ចពិភាក្សាពីមុខជំនាញសិក្សា និងការសិក្សាតាមអេឡិចត្រូនិក ដើម្បីទាញយកអត្ថប្រយោជន៍ពីប្រព័ន្ធអ៊ីនធើណេត ដើម្បីអភិវឌ្ឍជំនាញ ជាដើម។ល៕

ក្រុមហ៊ុនម៉ូតូរបស់ជប៉ុន បានចាត់ទុកថា តំបន់អូរឫស្សីជាទីផ្សារល្អទី2 បន្ទាប់ពីតំបន់រោងកុនគីរីរម្យ ដែលក្រុមហ៊ុនចង់ដណ្តើមយក ដើម្បីបន្តយុទ្ធសាស្រ្ដវាយលុកទីផ្សារម៉ូតូនៅកម្ពុជា តាមរយៈការដាក់ចេញនូវស៊េរីម៉ូតូថ្មីៗ បំពាក់បច្ចេកវិទ្យាខ្ពស់។

លោកឧកញ៉ា គង់ នួន អគ្គនាយកក្រុមហ៊ុន គង់ នួន គ្រុប ដែលជាក្រុមហ៊ុនទទួលបានសិទ្ធិផ្តាច់មុខនាំចូល និងចែកចាយម៉ូតូ Yamaha នៅក្នុងប្រទេសកម្ពុជាពីប្រទេសជប៉ុន បានមានប្រសាសន៍អំពីទីផ្សារម៉ូតូនៅទីក្រុងភ្នំពេញថា តំបន់អូរឫស្សីជាទីផ្សារល្អ ដែលក្រុមហ៊ុនចង់ដណ្តើមយកបន្ថែមទៀតបន្ទាប់តំបន់រោងកុនគីរីរម្យ តាមរយៈការចាប់ដៃគូជាមួយនឹងតំណាងចែកចាយដែលមានបទពិសោធក្នុងវិស័យនេះជាង 30ឆ្នាំមកហើយធ្វើជាតំណាងចែកចាយម៉ូតូ Yamaha ដូចហាង អ៊ីវ ភីរុណ ជាដើម។

លោកឧកញ៉ា ថ្លែងថា៖«តំបន់ក្បែររោងកុនគីរីរម្យជាទីផ្សារធំមួយ ខណៈតំបន់អូរឫស្សីជាទីផ្សារល្អទី 2 ដែលខាង Yamaha កំពុងធ្វើការវាយយក»។
ក្រោយពីអវត្តមានជាច្រើនឆ្នាំនៃប្រភេទម៉ូតូម៉ូដែល Yamaha នៅក្នុងតំបន់អូរឫស្សី ដែលជាតំបន់លក់-ទិញម៉ូតូគ្រប់ម៉ូដែល គ្រប់ធុនមួយនៅក្នុងក្រុងភ្នំពេញ ឥឡូវនេះ Yamaha បាននឹងកំពុងពង្រីកវិសាលភាពរបស់ខ្លួនឡើងវិញហើយ។ យុទ្ធសាស្រ្ដរបស់ក្រុមហ៊ុនមិនអាចដំណើរការទៅមុខល្អបានទេ ប្រសិនបើគ្មានការសហការពីតំណាងចែកចាយតាមតំបន់សំខាន់ៗទាំងនោះ។

លោកឧកញ៉ាបានបញ្ជាក់ថា «តាមរយៈបទពិសោធរបស់ខ្ញុំ និងយុទ្ធសាស្រ្តថ្មីរបស់ Yamaha ក្រោមការគ្រប់គ្រងរបស់ខ្ញុំផ្ទាល់ ខ្ញុំមានជំនឿចិត្តយ៉ាងមុតមាំថា គ្រប់ដៃគូអាជីវកម្មទាំងអស់ និងតំណាងចែកចាយរបស់Yamaha គ្រប់ប្រភេទនឹងទទួលបាននូវអត្ថប្រយោជន៍ និងភាគលាភគួរជាទីគាប់ចិត្ត ខ្ញុំ និងសហការី នឹងខិតខំស្វែងរកគ្រប់វិធីសាស្រ្ត ដើម្បីឆ្លើយតបទៅនឹងសេចក្តីត្រូវការរបស់ដៃគូអាជីវកម្មរបស់យើង ព្រមជាមួយនឹងតម្រូវការទីផ្សារបច្ចុប្បន្ន និងទៅថ្ងៃអនាគតផងដែរ។ ថ្ងៃនេះ គឺជាចំណុចចាប់ផ្តើមមួយដ៏ល្អបំផុត ដែលបង្ហាញអំពីភាពជាដៃគូយូរអង្វែងរវាងក្រុមហ៊ុន និងតំណាងចែកចាយថ្មី អ៊ីវ ភិរុណ»៕