Category: សង្គម និងសេដ្ឋកិច្ច

  • Chevrolet ណែនាំរថយន្តថ្មី 2 ម៉ូដែល បំពាក់បច្ចេកវិទ្យាទំនើបៗសម្រាប់ទីផ្សារកម្ពុជា

    Chevrolet ណែនាំរថយន្តថ្មី 2 ម៉ូដែល បំពាក់បច្ចេកវិទ្យាទំនើបៗសម្រាប់ទីផ្សារកម្ពុជា

    ដើម្បីបន្ថែមភាពសម្បូរបែបក្នុងទីផ្សាររថយន្តកម្ពុជា ក្រុមហ៊ុន Chevrolet បានធ្វើការណែនាំនូវរថយន្តស៊េរីថ្មីចំនួន 2 ម៉ូដែលគឺ Chevrolet Cruze និង Chevrolet Malibu បំពាក់ដោយម៉ាស៊ីនប្រភេទ Turbo ជំនាន់ថ្មីមានសមត្ថភាពខ្លាំង សន្សំសំចៃខ្ពស់ និងសំឡេងស្ងាត់ល្អ ក្នុងពេលបើកបរ។

    លោក ប៉ែន ពិសិដ្ឋ នាយកគ្រប់គ្រងទូទៅនៃក្រុមហ៊ុន United Auto Trading Co.,Ltd ដែលជាក្រុមហ៊ុននាំចូលផ្តាច់មុខនូវរថយន្តម៉ាក Chevrolet ប្រចាំព្រះរាជាណាចក្រកម្ពុជាបានឱ្យដឹងថា ក្រុមហ៊ុនលោកសូមណែនាំនូវប្រភេទរថយន្តទំនើបខ្នាតតូច 2 ម៉ូដែលគឺ Chevrolet Cruze និង Malibu ដែលមានបច្ចេកវិទ្យាខ្ពស់ទំនើប និងទាន់សម័យ ឆ្នាំ 2017 សម្រាប់បន្ថែមជាជម្រើសដល់អតិថិជន។ រថយន្តទាំង 2 សុទ្ធតែបានបំពាក់ដោយប្រព័ន្ធបច្ចេកវិទ្យាកម្សាន្តApple CarPlay & Android Auto គួបផ្សំនឹងផ្នែកខាងក្នុងធំទូលាយផ្តល់នូវផាសុកភាព។

    សម្រាប់រថយន្ត Cruze មានប្រើនូវបច្ចេកវិទ្យាម៉ាស៊ីន 1.4 លីត្រ Turbocharged Direct Injection ជំនាន់ថ្មីផ្តល់នូវកម្លាំងសេះរហូតទៅដល់ 150bhp ដោយប្រើប្រអប់លេខអូតូ 6លេខ ជួយកាត់បន្ថយការប្រើប្រាស់សាំងមកនៅត្រឹមតែ 6.5 លីត្រប៉ុណ្ណោះក្នុង 100km ព្រមទាំងបច្ចេកវិទ្យា STOP/START ក្នុងការជួយកាត់បន្ថយការប្រើប្រាស់សាំងសម្រាប់បើកបរក្នុងទីក្រុង។ តួរថយន្តត្រូវបានសម្រួលទម្ងន់ចេញប្រហែល 110kg ដែលនឹងធ្វើឱ្យម៉ាស៊ីនកាន់តែខ្លាំង និងស្ទុះជាងមុនដោយអាចបង្កើនលឿនចាប់ពី 0 ទៅ 100 Kmh (0-100kmh) ប្រើពេលត្រឹមតែ 8 វិនាទីប៉ុណ្ណោះ។

    រថយន្ត Chevrolet Cruze មានបំពាក់នូវប្រព័ន្ធបច្ចេកវិទ្យាសុវត្ថិភាពដែលអាចការពារអ្នកបើកបរ និងអ្នករួមដំណើរពីការប៉ះទង្គិចនៅពេលមានគ្រោះថ្នាក់ជាច្រើនដូចជា:

    – Adaptive Cruise Control: ប្រព័ន្ធរក្សាគម្លាតសុវត្ថិភាព និងកំណត់ល្បឿនថេរពេលកំពុងបើកបរ។
    – Side Blind Spot Alert : មុខងារផ្តល់សញ្ញានៅពេលមានការជែងវ៉ាពីចំហៀង។
    – Lane Keep Assist : ប្រព័ន្ធគ្រប់គ្រងរថយន្តបើកបរមិនឱ្យខុសគន្លងផ្លូវ។
    – Lane Departure Warning : ប្រព័ន្ធផ្តល់ដំណឹងពេលរថយន្តរត់ខុសគន្លងផ្លូវ។
    – Forward Collision Alert with Following Distance Indicator: ប្រព័ន្ធផ្តល់ដំណឹងពេលមានឧបសគ្គនៅខាងមុខ ជាសំឡេងជាមួយនឹងភ្លើងសញ្ញា។


    ដោយឡែក រថយន្ត Chevrolet Malibu ជារថយន្តជំនាន់ថ្មីមានប្រវែងវែងជាងមុន 60mm ជាមួយនឹងការបង្កើតបន្ថែមនៅប្រវែងចន្លោះពីភ្លៅមុខទៅភ្លៅខាងក្រោយប្រវែង93mm បើធៀបទៅនឹងរថយន្តម៉ូដែលនេះកាលពីជំនាន់មុន។
    ការបង្កើតថ្មីនេះបានធ្វើឱ្យរថយន្តនេះវែងជាងគេ និងទូលាយជាងគេបង្អស់ក្នុងប្រភេទរថយន្តធុនមធ្យម ហើយស្រាលជាងមុន 130Kg ដែលធ្វើឱ្យរថយន្ដនេះកាន់តែសន្សំសំចៃប្រេងសាំង និងប្រតិបត្តិការម៉ាស៊ីនកាន់តែមានប្រសិទ្ធខ្ពស់។

    រថយន្ដនេះត្រូវបានបំពាក់មកជាមួយភ្លើងបំភ្លឺពេលថ្ងៃប្រភេទអំពូល LED (Day Time Running) ជាមួយនឹងស្ដុបខាងក្រោយថ្មី LED ប្រភេទ High Mounted ( CHMSL) ដែលមានអាយុកាលវែង និងមានប្រតិបត្តិការយ៉ាងល្អ។ រថយន្ដ Malibu បំពាក់មកជាមួយម៉ាស៊ីនថ្មីសន្លាង 2.0 លីត្រ ជាប្រភេទម៉ាស៊ីនTurbo មានកម្លាំង 250 សេះ និងកម្លាំង 350 ញីវតុនម៉ែត្រ។ ម៉ាស៊ីនថ្មីនេះត្រូវបានធ្វើការជាមួយប្រព័ន្ធត្រួតពិនិត្យប្រអប់លេខ ដោយប្រព័ន្ធអេឡិចត្រូនិកដែលផ្ដល់លទ្ធភាពឱ្យប្រអប់លេខប្រតិបត្តិការបានល្អ៕

  • គ្រូបង្វឹកថ្មី ៖ Crystal Palace មានបំណេងលេងដូចក្រុម Ajax

    គ្រូបង្វឹកថ្មី ៖ Crystal Palace មានបំណេងលេងដូចក្រុម Ajax

    លោក Frank de Boer ដែលជាអ្នកចាត់ការទូទៅថ្មីរបស់ក្លិប Crystal Palace បានបញ្ជាក់ថា លោកចង់ឲ្យក្រុមរបស់លោកធ្វើការគ្រប់គ្រងលើគូប្រកួតរបស់ខ្លួនក្នុងទម្រង់លេងដូចជាក្រុម Ajax ជាក្លិបដែលលោកបានកសាងកេរិ៍្តឈ្មោះរបស់លោក។

    លោក De Boer បានចុះហត្ថលេខាលើកុងត្រារយៈពេល 3ឆ្នាំនៅឯកីឡដ្ឋាន Selhurst Park និងត្រូវបានផ្តល់ការងារដោយលោក Steve Parish ដែលជាប្រធានក្លិប ឲ្យធ្វើការផ្លាស់ប្តូរពីក្រុមមួយដែលបានត្រឹមតែអាចប្រជែងគេចផុតពីតំបន់កាត់ចោល ទៅជា «ក្រុមដ៏រឹងមាំមួយក្នុងក្របខ័ណ្ឌ Premier League»។

    អតីតខ្សែការពារអន្តរជាតិហូឡង់រូបនេះ ដែលបានឈ្នះពានជាច្រើនទាំងក្នុងនាមជាកីឡាករ និងអ្នកចាត់ការទូទៅនៅឯក្លិប Ajax នោះ នឹងចូលជំនួសកន្លែងរបស់លោក Sam Allardyce ដែលបានលាលែងពីតំណែងរបស់លោកកាលពីខែមុន។ ក្នុងពេលបង្ហាញមុខទៅកាន់ក្លិបថ្មីរបស់ខ្លួន លោក De Boer បានឲ្យដឹងថា៖ «ខ្ញុំចង់បានក្រុមមួយដែលអ្នកគាំទ្ររំភើបក្នុងការមកទស្សនាការប្រកួតរបស់យើង ដើម្បីមើលក្រុមមួយដែលចង់ឈ្នះ និងចង់ប្រយុទ្ធរាល់នាទីទាំងអស់»។ លោក De Boer នឹងក្លាយជាអ្នកចាត់ការទូទៅទី 7របស់ក្លិប Crystal Palace បើគិតចាប់តាំងពីលោក Parish បានទិញក្លិបនេះកាលពីឆ្នាំ 2010 និងជាគ្រូបង្វឹកមិនជាប់សញ្ជាតិអង់គ្លេសដំបូងគេក្នុងការដឹកនាំក្រុមនេះក្នុងចំណោមគ្រូបង្វឹកទាំង7។

    លោក De Boer បានបញ្ជាក់បន្ថែមថា៖ «គោលបំណងរបស់ខ្ញុំ គឺការធ្វើឲ្យយើងក្លាយជាក្រុមដ៏រឹងមាំមួយក្នុងក្របខ័ណ្ឌ Premier League មិនមែនត្រដាបត្រដួសក្នុងតំបន់កាត់ចោលឡើយ។ នោះគឺជាគោលដៅដ៏សំខាន់របស់យើង ហើយប្រសិនបើយើងសម្រេចបានសមិទ្ធផលកាន់តែច្រើន នោះវានឹងក្លាយជារឿងដ៏ល្អ»៕
    ប្រភពពី៖ The Guardian

     

  • Traore ចេញពីក្លិប Chelsea ចូល Lyon ក្រោយពីយល់ព្រមលើតម្លៃខ្លួនជិត 9លានផោន

    Traore ចេញពីក្លិប Chelsea ចូល Lyon ក្រោយពីយល់ព្រមលើតម្លៃខ្លួនជិត 9លានផោន

    ខ្សែប្រយុទ្ធ Bertrand Traore បានចូលរួមជាមួយនឹងក្លិប Lyon ដោយចេញពីក្លិប Chelsea។ នេះបើយោងទៅតាមការប្រកាសរបស់ក្លិបទាំងពីរ។  ខ្សែប្រយុទ្ធអន្តរជាតិបួគីណាហ្វាសូវ័យ 21ឆ្នាំរូបនេះ បានចំណាយពេលប៉ុន្មានរដូវកាលចុងក្រោយនេះក្នុងនាមជាកីឡាករកម្ចីរបស់ក្លិបហូឡង់ Vitesse Arnhem និង Ajax Amsterdam ហើយបច្ចុប្បន្នរូបគេនឹងផ្ទេរទៅកាន់ប្រទេសបារាំង ក្នុងកិច្ចសន្យាមួយដែលនឹងបន្តរហូតដល់ឆ្នាំ 2022។

    Lyon បានសរសេរនៅលើបណ្តាញសង្គម Twitter ថា៖ «វាជាផ្លូវការហើយ ខណៈដែល Bertrand Traore ក្លាយជាកីឡាកររបស់ក្លិប Lyonnais»។ ការផ្ទេរនេះមានតម្លៃខ្លួន 10លានអឺរ៉ូ (ស្មើនឹង 11.2លានដុល្លារអាមេរិក ឬស្មើ 8.8លានផោន) ហើយរូបគេបានចុះហត្ថលេខារយៈពេល 5ឆ្នាំ។

    ប្រភពព័ត៌មានជាច្រើនបានចេញផ្សាយថា តម្លៃខ្លួននេះ ក៏មានរាប់បញ្ចូលទាំងលក្ខខណ្ឌក្នុងពេលលក់កីឡាកររូបនេះបន្ត និងប្រាក់ឧត្ថម្ភផ្សេងៗទៀតផងដែរ។ ក្នុងសន្និសីទសារព័ត៌មានមួយដែលត្រូវបានរៀបចំឡើងដោយ Lyon ដើម្បីប្រកាសពីការចុះហត្ថលេខាជាមួយនឹង Traore លោក Jean-Michel Aulas ប្រធានក្លិប Lyon និងលោកគ្រូបង្វឹក Bruno Genesio បានធ្វើការពិភាក្សាលើបញ្ហាជាច្រើន។ Aulas ដែលត្រូវបានដក់ស្រង់សម្តីដោយកាសែត L’Equipe នោះ បាននិយាយពីផលលំបាកផ្នែកបច្ចេកទេស ក្នុងនោះរាប់បញ្ចូលទាំងបញ្ហាដោះដូរកីឡាករផងដែរ។

    ក្រោយពីបានបំពេញការផ្ទេររបស់គេរួចរាល់ Traore បានប្រាប់ទូរទស្សន៍ OLTV ថា៖ «ខ្ញុំពិតជារីករាយណាស់ក្នុងការមកទីនេះ ក្នុងការក្លាយជាកីឡាកររបស់ក្លិប Lyonnais។ Lyon តែងតែជាក្លិបដ៏គួរឲ្យចាប់អារម្មណ៍មួយ ដោយមានកីឡាករឆ្នើមៗ និងមានប្រវត្តិដ៏អស្ចារ្យ។ វាជាកិត្តិយសមួយសម្រាប់ខ្ញុំក្នុងការមកនៅទីនេះ»៕


    ប្រភពពី៖ The Guardian

  • គង់ វង្សយ៉ាទី ស្ទើរអស់ព្រលឹងដោយសារជនអនាមិកធ្វើបាប

    គង់ វង្សយ៉ាទី ស្ទើរអស់ព្រលឹងដោយសារជនអនាមិកធ្វើបាប

    ថ្មីៗនេះកញ្ញា គង់ វង្សយ៉ាទី ពិធីការិនីពោរពេញដោយស្នាមញញឹម និងធ្លាប់តែរួសរាយទៅកាន់អ្នកគាំទ្ររបស់ខ្លួនបានសម្ដែងនូវអារម្មណ៍ភ័យខ្លាចយ៉ាងខ្លាំងបន្ទាប់ពីមានជនអនាមិកបានយកគណនីហ្វេសប៊ុករបស់នាងទៅចែករំលែកសារនយោបាយ។

    កញ្ញា គង់ វង្សយ៉ាទី បានបង្ហាញពីអារម្មណ៍ភ័យខ្លាចដោយនិយាយថា កាលពី2ថ្ងៃមុនគ្រាន់តែបើកមើល ក្រោយពេលភ្ញាក់ពីគេងភ្លាម នាងមានអារម្មណ៍ភ័យភ្លែតឡើងតែម្តង ដោយសារគណនីហ្វេសប៊ុករបស់នាងត្រូវបានគេហ៊ែកយកទៅប្រើដើម្បីចែករំលែកសារនយោបាយធ្វើឱ្យប៉ះពាល់ដល់កិត្ដិយសថា្នក់ដឹកនាំ។

    ពិធីការិនីរូបនេះ និយាយបន្ដថា៖«បងអើយ! គ្រាន់តែភ្ញាក់ឡើងភ្លាមឃើញអ៊ីចឹង ខ្ញុំភ័យសឹងតែស្លុតអារម្មណ៍ និយាយទៅភ្លាមនោះអស់ព្រលឹងរលីង ដោយសារតែគេលួចយកគណនីខ្ញុំទៅលេងនយោបាយ ប៉ះពាល់ដល់ថ្នាក់ដឹកនាំ។ បន្ទាប់ពីកើតបញ្ហានេះឡើង ខ្ញុំក៏បង្កើតគណនីថ្មីមួយ បង្ហោះវីដេអូឃ្លីប ដើម្បីធ្វើការបកស្រាយទៅកាន់សាធារណជនភ្លាម។ ពិសេសបងៗដែលជាមន្រ្ដីរាជការធ្លាប់រាប់អានខ្ញុំឱ្យគាត់បានយល់»។

    យ៉ាទីបន្ដថា ក្រោយពីបានប្រាប់ពួកគាត់រួចរាល់ហើយ នាងក៏បានធូរចិត្ដឡើងវិញ ព្រោះអ្នកទាំងនោះបានយល់អំពីនាង ដោយសារតែរយៈពេល5ឆ្នាំកន្លងមកនេះ ពោលគឺចាប់តាំងពីនាងចូលសិល្បៈមក នាងពុំដែលប្រឡូកប្រឡាក់នឹងរឿងនយោបាយទេ។ នាងបញ្ជាក់ថា៖«និយាយតាមត្រង់ ខ្ញុំមិនមែនមានទ្រព្យសម្បតិ្ដសម្បូរហូរហៀរអីទេ តែខ្ញុំនៅក្នុងវិថីសិល្បៈនេះមានសេចក្ដីសុខណាស់។ ខ្ញុំជាជំហរគ្រួសារ ដូច្នេះខ្ញុំមិនចង់ពាក់ព័ន្ធរឿងនយោបាយអ្វីឡើយ។ ម្យ៉ាងម៉ាក់របស់ខ្ញុំហាមដាច់ខាត គឺគាត់ឱ្យធ្វើតែការងារសិល្បៈ និងការងារជួយសង្គមតែប៉ុណ្ណោះ»។

    តារាសិល្បៈរូបនេះបានរៀបរាប់បន្ដថា ក្រោយពីបានបកស្រាយឱ្យសាធារណជនបានយល់ហើយ អារម្មណ៍របស់នាងហាក់ដូចជាបានដកបន្លាចេញពីដើមទ្រូងដូច្នេះដែរ។ អ្វីដែលនាងសោកស្ដាយគឺគណនីដែលនាងខំលេងរយៈពេល5ឆ្នាំមកនេះមានអ្នក Like &Share ច្រើននោះ ត្រូវបានបាត់បង់៕

    https://www.youtube.com/watch?v=8G60PZwqCa4

  • ចង់​ពង្រីក​អាជីវកម្ម ត្រូវស្វែងយល់ទៅលើចំណុចទាំងនេះជាមុនសិន

    ចង់​ពង្រីក​អាជីវកម្ម ត្រូវស្វែងយល់ទៅលើចំណុចទាំងនេះជាមុនសិន

    គ្រប់ម្ចាស់អាជីវកម្មទាំងអស់ គឺសុទ្ធសឹងតែមានបំណងចង់ពង្រីកអាជីវកម្មរបស់ខ្លួន ដើម្បីបង្កើនប្រាក់ចំណូល ប៉ុន្តែ​ពួកគាត់មិនបានដឹងថា ដើម្បីពង្រីកអាជីវកម្មមួយបាន​ តើត្រូវ​ធ្វើ​ដូចម្ដេចខ្លះ? ខាងក្រោមនេះគឺជាការណែនាំរបស់អ្នកជំនាញ​ និងមានបទពិសោធន៍មួយចំនួន ដល់ម្ចាស់អាជីវកម្ម​ដើម្បីជាគំនិតក្នុងការពង្រីកអាជីវកម្ម៖

    សហការគ្នា៖ មាន​ពាក្យ​មួយ​ឃ្លា​ដែល​អ្នកជំនួញ​នាពេល​បច្ចុប្បន្ន​ឧស្សាហ៍​និយាយ គឺ​គេ​ឈប់​ប្រជែង​គ្នា​យើង តែ​គេ​បែរមក​សហការគ្នា​វិញ។ ការសហការ​គ្នា គឺជា​វិធីសាស្ត្រ​មួយ​ក្នុង​ការនាំ​ជំនាញ និង​បទពិសោធន៍​នៃ​អាជីវកម្ម​របស់​អ្នក​ចូលគ្នា​ជាមួយនឹង​អាជីវកម្ម​មួយ​ផ្សេងទៀត ដើម្បី​បំពេញបន្ថែម​ឲ្យ​គ្នា ពោលគឺ​រីកចម្រើន​ទាំង​ព្រម។

    បើក​ទីតាំង​ថ្មី ឬ​ពង្រីក​សាខា៖ ប្រសិនបើ​អ្នក​បាន​បង្កើត​អាជីវកម្ម​មួយ​ជោគជ័យ​នៅក្នុង​ទីតាំង​ណាមួយ​ហើយ អ្នក​គួរ​ជ្រើសរើស​ទីតាំង​មួយទៀត​សម្រាប់​ការពង្រីក​មុខ​របប ប៉ុន្តែ​អ្នក​អាចធ្វើ​បែបនេះ​បាន លុះត្រាតែ​អ្នកមាន​ដើមទុន និង​លទ្ធភាព​ក្នុងការ​ពង្រីក។

    ផ្ដល់​សិទ្ធិ​អាជីវកម្ម (Franchises)៖ ចំណុច​នេះ​វា​ខុសពី​ការពង្រីក​សាខា។ ការផ្ដល់​សិទ្ធិ​អាជីវកម្ម​គឺជា​យុទ្ធសាស្ត្រ​មួយ​ដែល​ល្អ​បំផុត ក្នុងការ​ពង្រីក​អាជីវកម្ម។ មិន​ត្រឹមតែ​បាន​ពង្រីក​នូវ​អាជីវកម្ម​ប៉ុណ្ណោះ​ទេ សូម្បីតែ​ស្លាក​សញ្ញា​យីហោ​របស់​អ្នក​ក៏ត្រូវ​បាន​ពង្រីក​ដូចគ្នា។

    ចូលទៅក្នុង​ទីផ្សារថ្មី៖ អាជីវកម្ម​របស់​អ្នកនឹង​រីកចម្រើន​បាន​នោះទេ បើសិនជា​អ្នក​មិន​ហ៊ាន​ក្នុងការ​ហក់​ចូល​ទីផ្សារ​ថ្មី ឬ​ចាប់យក​អតិថិជន​ថ្មី។ ទីកន្លែង​ដដែល អតិថិជន​ដដែល…គឺ​អាជីវកម្ម​មិន​រីកចម្រើន​ទេ ព្រោះថា​អ្នក​ស្គាល់​ផលិតផល ឬ​សេវាកម្ម​របស់​អ្នក​នៅតែ​ដដែល។

    ការនាំចេញ៖ ចូរ​ស្វែងយល់​អំពី​ឱកាស​នៃ​ការនាំចេញ។ នៅពេល​អ្នក​យល់​ពី​វិធីសាស្ត្រ​ក្នុងការ​នាំចេញ​ផលិតផល ឬ​សេវាកម្ម​ហើយ​នោះ មានន័យថា​អ្នក​ចាប់ផ្ដើម​មានឱកាស​ក្នុងការ​ពង្រីក​អាជីវកម្ម​ទៅ​ក្រៅ​ស្រុក។

    ចែកចាយ​តាម​អន​ឡាញ៖ វិធីសាស្ត្រ​ថ្មី និង​ពេញនិយម​នាពេល​បច្ចុប្បន្ន​គឺ​ការពង្រីក​អាជីវកម្ម​តាម​ប្រព័ន្ធ​អន​ឡាញ។ អ្នក​អាច​ផ្សព្វផ្សាយ​សេវាកម្ម ឬ​ផលិតផល​របស់​អ្នក​បាន​ដោយ​ងាយស្រួល និង​គ្រប់​ទីកន្លែង ហើយ​សេវាកម្ម និង​ផលិតផល​របស់​អ្នកនឹង​ងាយស្រួល​ទៅ​ដល់ដៃ​អតិថិជន​គោលដៅ​ផងដែរ។

    ទិញ​អា​ជី​កម្ម​មួយ​ផ្សេងទៀត៖ នៅ​អ៊ឺរ៉ុប ក្រុមហ៊ុនធំៗជាច្រើន​គឺ​តែងតែ​ប្រើ​វិធីសាស្ត្រ​មួយ​នេះ ដើម្បី​ពង្រីក​អាជីវកម្ម ព្រោះ​គេ​មិន​ចង់​ចំណាយពេល​ដើម្បី​បង្កើត​សេវាកម្ម ឬ​ផលិតផល ម្យ៉ាងទៀត​យុទ្ធសាស្ត្រ​ទិញយក​អាជីវកម្ម​ពី​គេ​គឺជា​យុទ្ធសាស្ត្រឈ្នះៗទាំងសងខាង ព្រោះ​ការទិញ​នោះ​មិនមែន​ទិញ​ដាច់​នោះទេ គឺ​គ្រាន់តែ​ទិញ​ដើម្បី​បន្ថែម និង​ពង្រីក​អាជីវកម្ម៕

  • តើ​ការ​ស្រេកទឹក​បណ្ដាលមកពី​ហេតុអ្វី?​

    តើ​ការ​ស្រេកទឹក​បណ្ដាលមកពី​ហេតុអ្វី?​

    គ្រប់គ្នា​បានដឹងហើយថា ក្នុង​មួយថ្ងៃ ត្រូវ​ទទួលទាន​ទឹក​យ៉ាងហោចណាស់​ឱ្យ​បាន2លីត្រ ឬ​ច្រើនជាង​នេះ ដោយ​ការទទួល​ទឹក​ត្រូវធ្វើឡើង​នៅមុន ឬ​ក្រោយ​ពេលបាយ និង​មួយវិញទៀត​នៅ​ពេក​ស្រេកទឹក ប៉ុន្តែ​លោកអ្នក​មាន​ដឹង​ទេ​ថា ហេតុអ្វី​បានជា​មនុស្ស​ស្រេក​ទឹក?

    ខាងក្រោម​នេះ​គឺជា​បំណង​ស្រាយ​របស់​អ្នក​វិទ្យា និង​សាស្ត្រាចារ្យ៖
    អារម្មណ៍ស្រេកទឹក​ គឺគ្រាន់តែ​ជា​វិធីនៃ​រាងកាយ​ក្នុងការ​ប្រាប់​យើងឱ្យបន្ថែម​សារធាតុ​រាវតែប៉ុណ្ណោះ ប៉ុន្តែ​មូលហេតុ ដែល​នាំ​ឱ្យមានការ​ស្រេកទឹក គឺ​បង្កឡើង​ដោយ​ការផ្លាស់ប្តូរ​សារធាតុ ដែលមាន​នៅក្នុង​អំបិល​នៃឈាម​របស់​យើង។ យើង​អាច​ដឹងបាន​ថា មាន​អំបិល និង​ទឹក​មួយចំនួន​នៅ​ក្នុ​ឈាម​របស់​យើង នៅ​ពែ​លដែល​វា​មានការ​ផ្លាស់ប្តូរ​ដោយមាន​អំបិល​កាន់តែច្រើនឡើងៗ ទាក់ទង​នឹង​ទឹក​នៅក្នុង​ឈាម​របស់​យើង ការ​ស្រេកទឹក​ក៏បាន​កើតឡើង។

    មាន​ផ្នែក​មួយ​នៃ​ខួរក្បាល​របស់​យើង ដែល​គេ​ហៅថា «មជ្ឈមណ្ឌល​ស្រេកទឹក»។ វា​បានធ្វើការ​ឆ្លើ​តប​ជាមួយ​នឹង​អំបិល​មួយចំនួន​នៅក្នុង​ឈាម​របស់​យើង។ នៅពេល​ផ្លាស់ប្តូ វា​បា​នប​ញ្ចួ​ន​ដំណឹង​ត្រឡប់​ទៅរក​បំពង់ក។ ដំណឹង​ទាំងនេះ​ធ្វើដំណើរ ទៅកាន់​ខួរក្បាល ហើយ​វា​បូក​បញ្ចូល​នូវ​អារម្មណ៍​បែបនេះ​ដែល​ធ្វើ​ឱ្យ​យើងនិយាយថា​ស្រេកទឹក៕

  • រដ្ឋមន្ត្រីក្រសួងអប់រំ ចង់ឃើញក្មេងខ្មែរចេះគ្រប់គ្រងហិរញ្ញវត្ថុ

    រដ្ឋមន្ត្រីក្រសួងអប់រំ ចង់ឃើញក្មេងខ្មែរចេះគ្រប់គ្រងហិរញ្ញវត្ថុ

    ការចេះគ្រប់គ្រងហិរញ្ញវត្ថុ គឺជាផ្នែកទន់យ៉ាងសំខាន់មួយសម្រាប់មនុស្សគ្រប់គ្នា ហើយវាក៏ជាផ្នែកមួយដែលជំរុញឱ្យមនុស្សទទួលបានជោគជ័យក្នុងជីវិតផងដែរ។ ពាក់ព័ន្ធនឹងបញ្ហានេះ សាលារដ្ឋ រួមទាំងឯកជនមួយចំនួនបានចាប់ផ្តើមបញ្ចូលមុខវិជ្ជាគ្រប់គ្រងហិរញ្ញវត្ថុនេះ ដើម្បីឱ្យសិស្សអាចរៀនសូត្របានយ៉ាងទូលំទូលាយ។

    ឯកឧត្តម ហង់ ជួនណារ៉ុន រដ្ឋមន្ត្រីក្រសួង អប់រំ យុវជន និងកីឡា បានលើកឡើងថា ក្រសួងអប់រំ ចង់ឃើញសិស្សកម្ពុជាមានសមត្ថភាពគ្រប់គ្រាន់លើជំនាញទន់ឱ្យបានច្រើន ដើម្បីឱ្យអនាគតធនធានមនុស្សរបស់យើង មានភាពរឹងមាំសម្រាប់ការឆ្លើយតបគ្រប់តម្រូវការរបស់សង្គម។ ការបណ្តុះបណ្តាលផ្នែកជំនាញទន់ និងការហ្វឹកហាត់ផ្នែកសហគ្រិនភាព ជាផ្នែកមួយដែលក្រសួងអប់រំ យុវជន និងកីឡា កំពុងយកចិត្តទុកដាក់ ហើយដាក់សាកល្បងឱ្យគ្រូគាត់បណ្តុះបណ្តាល។

    ឯកឧត្តម ហង់ ជួនណារ៉ុន បានមានប្រសាសន៍ថា៖ «ខ្ញុំគិតថាការដែលបណ្តុះបណ្តាលផ្នែកហិរញ្ញវត្ថុនេះ គឺត្រូវការការចូលរួមពីស្ថាប័ននានា ទាំងវិស័យឯកជន និងអង្គការសង្គមស៊ីវិលជាដើម ដើម្បីរួមចំណែកជាមួយស្ថាប័នរដ្ឋបណ្តុះបណ្តាលដល់សិស្សនៅកម្ពុជា»។

    គួរបញ្ជាក់ថា កម្មវិធីបណ្តុះបណ្តាលផ្នែកហិរញ្ញវត្ថុនេះ នៅប្រទេសមួយចំនួនត្រូវបានគេដាក់បញ្ចូលតាំងពីកម្រិតបឋមសិក្សាមកម្ល៉េះ ហើយកម្ពុជាក៏មានគម្រោងជាច្រើនដើម្បីបណ្តុះបណ្តាលកុមារកម្ពុជាផងដែរលើផ្នែកសំខាន់មួយនេះ៕

  • Sky Tree អះអាងពីភាពរឹងមាំរបស់ខ្លួនក្រោយមានការគាំទ្រពីធនាគារក្រៅស្រុកចំនួន6

    Sky Tree អះអាងពីភាពរឹងមាំរបស់ខ្លួនក្រោយមានការគាំទ្រពីធនាគារក្រៅស្រុកចំនួន6

    ភ្នំពេញ – បន្ទាប់ពីសង្កេតឃើញសកម្មភាពនៃទីផ្សារគម្រោងខុនដូកំពុងតែមានដំណើរការយឺត គួបផ្សំនឹងស្ថានភាពនយោបាយផងនោះ បានធ្វើឱ្យមានការលើកឡើងថា មានគម្រោងខ្លះអាចនឹងបន្ធូរដៃក្នុងការសាងសង់ ចំណែកគម្រោងខ្លះទៀតអាចឈានទៅដល់ការផ្អាកការសាងសង់តែម្ដងក៏មាន។ ជាមួយគ្នានេះម្ចាស់គម្រោងអភិវឌ្ឍន៍ Sky Treeបានលើកឡើងថា ទោះយ៉ាងណាគម្រោងរបស់លោកនៅតែបន្ដពន្លឿនការសាងសង់ឱ្យទាន់ផែនការដដែល។

    រហូតមកដល់ពេលនេះគម្រោងអភិវឌ្ឍន៍ Sky Tree Condominium បានសាងសង់ឡើងដល់ជាន់ទី3 និងគ្រោងចូលដល់ជាន់ទី4 ហើយ លើសពីនេះក៏កំពុងតែជំរុញល្បឿននៃការសាងសង់ទាំងយប់ទាំងថ្ងៃដើម្បីធ្វើឱ្យទាន់ទៅតាមផែនការដែលបានសន្យាជាមួយអតិថិជន។

    លោក Scott Wu ម្ចាស់គម្រោងអភិវឌ្ឍន៍ Sky Tree Condominium នៃក្រុមហ៊ុន J&L Property បានលើកឡើងថា បើទោះជាមានការលើកឡើងជាច្រើនពីស្ថានភាពមិនសូវល្អនៃការអភិវឌ្ឍគម្រោងនានាក៏ដោយ ក៏គម្រោងអភិវឌ្ឍន៍ Sky Tree របស់លោកនៅតែបន្ដការអភិវឌ្ឍប្រកបដោយនិរន្ដរភាពដដែល។ លោកបន្ដថា បច្ចុប្បន្នយើងកំពុងតែជំរុញឱ្យមានការសាងសង់ទាំងយប់ទាំងថ្ងៃ និងថែមទាំងរក្សាបាននូវគុណភាពដើម្បីធ្វើយ៉ាងណាឱ្យសំណង់អាចបញ្ចប់ទៅតាមផែនការ។

    ម្ចាស់គម្រោងអភិវឌ្ឍន៍ Sky Tree Condominium នៃក្រុមហ៊ុន J&L Propertyបញ្ជាក់ថា៖”មូលហេតុដែលយើងហ៊ានអះអាងថា គម្រោង Sky Tree នឹងបញ្ចប់ទៅតាមផែនការនៅឆ្នាំ2019នោះ គឺដោយសារតែយើងមានទុនវិនិយោគគ្រប់គ្រាន់ យើងពុំបានយកលុយរបស់អតិថិជនមកធ្វើការវិនិយោគឡើយ។ អ្វីដែលកាន់តែពិសេសជាងនេះគឺ យើងទទួលបានការសហការពីធនាគារធំៗចំនួន6ដែលមានទីតាំងនៅក្នុងប្រទេសតៃវ៉ាន់។ ទាំងនេះគឺជាចំណុចខ្លាំងរបស់យើងដើម្បីបង្ហាញទៅដល់អតិថិជនឱ្យកាន់តែមានទំនុកចិត្ដ តាមរយៈការអភិវឌ្ឍរបស់ពួកយើងថា ពុំមានការបារម្ភអំពីទុនវិនិយោគទេ”។

    ធនាគារ6 ដែលបានធ្វើកិច្ចសហការជាមួយនឹងគម្រោង Sky Tree Condominiumមានដូចជា Taiwan  Cooperate bank, Land bank, Bank of Taiwan, Taiwan business bank និង Bank of Panhsin ព្រមទាំង Sunny bank។

    លោកScott Wuបញ្ជាក់ថា៖«មូលហេតុធនាគារទាំងនោះបង្កើតកិច្ចសហការជាមួយយើងព្រោះគ្រួសារWuរបស់ខ្ញុំជាគ្រួសារមានកិត្ដិយស កេរ្ដិ៍ឈ្មោះ និងភាពស្មោះត្រង់ក្នុងមុខជំនួញ។ ជាងនេះទៅទៀតគឺ គេសម្លឹងឃើញទីតាំងនៃការវិនិយោគរបស់ក្រុមហ៊ុនយើងល្អ ព្រមទាំងយុទ្ធសាស្រ្ដនៃការលក់របស់យើងខ្លាំង គួបផ្សំនឹងតម្លៃសមរម្យផងដែរ ទើបគេសម្រេចចិត្ដសហការ»។

    Sky Tree Condominium ត្រូវបានអភិវឌ្ឍដោយក្រុមហ៊ុន J&L Development Company មានបទពិសោធក្នុងស្រុកជាង20ឆ្នាំ រួមជាមួយដៃគូយុទ្ធសាស្ត្រក្រុមហ៊ុន MCC CORPORATION ដ៏ល្បីឈ្មោះលំដាប់ពិភពលោកនៅទីក្រុងប៉េកាំង។ គម្រោងនេះបានសាងសង់នៅក្នុងឆ្នាំ2016 លើផ្ទៃដីសរុប 8,248ម៉ែត្រការ៉េ និងផ្ទៃអគារសរុប142,402ម៉ែត្រការ៉េ និងត្រូវបញ្ចប់ការសាងសង់នៅចុងខែមករា ឆ្នាំ2019  ។

    គម្រោងនេះមានទីតាំងនៅក្នុងខណ្ឌឫស្សីកែវ ជាទីតាំងល្អស្ថិតនៅក្បែរសាកលវិទ្យាល័យរដ្ឋ និងសាលាអន្តរជាតិ ផ្សារ TK Mall ផ្សារ Aeon Mall 2 សណ្ឋាគារ Raffles លំដាប់ថ្នាក់ផ្កាយប្រាំ។ ទន្ទឹមនឹងនេះលោកអ្នកអាចធ្វើដំណើរទៅព្រលានយន្តហោះដោយចំណាយពេលត្រឹមតែ 15 នាទី និងទៅកន្លែងវាយកូនហ្គោលត្រឹមតែ 10នាទីប៉ុណ្ណោះ៕

  • កម្ពុជាត្រៀមជួបបេឡារុសក្នុងការពង្រឹងកិច្ចសហការពាណិជ្ជកម្មទ្វេភាគី

    កម្ពុជាត្រៀមជួបបេឡារុសក្នុងការពង្រឹងកិច្ចសហការពាណិជ្ជកម្មទ្វេភាគី

    ភ្នំពេញ៖ ក្រសួងពាណិជ្ជកម្មកម្ពុជា បានរៀបចំកិច្ចប្រជុំដែលមានការចូលរួមពីតំណាងក្រសួង-ស្ថាប័នពាក់ព័ន្ធដើម្បីត្រៀមកិច្ចប្រជុំលើកទី2នៃគណៈកម្មាធិការចម្រុះស្តីពីកិច្ចសហប្រតិបត្តិការពាណិជ្ជកម្ម និងសេដ្ឋកិច្ចរវាងកម្ពុជា និងបេឡារុស ដែលនឹងប្រារព្ធឡើងនៅថ្ងៃទី29 – 30ខែមិថុនា ឆ្នាំ2017 នាទីក្រុងមីនស្ក៍ នៃសាធារណរដ្ឋបេឡារុស។

    លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្មមានប្រសាសន៍ថា កិច្ចប្រជុំនេះធ្វើឡើងដើម្បីពិភាក្សា និងប្រមូលធាតុចូលលើសេចក្តីព្រាងរបៀបវារៈ និងកំណត់ហេតុរួមផ្តល់ដោយភាគីបេឡារុសសម្រាប់ជំនួបទ្វេភាគីខាងលើនៅប្រទេសបេឡារុសនាពេលខាងមុខ។

     

    សាធារណរដ្ឋបេឡារុសស្ថិតនៅទី្វបអឺរ៉ុបខាងកើត ដែលមានព្រំប្រទល់ជាប់នឹងប្រទេសចំនួន5រួមមាន រុស្ស៊ី និងប៉ូឡូញជាដើម ហើយជាសមាជិកនៃសហភាពសេដ្ឋកិច្ចអឺរ៉ុប-អាស៊ី ដែលបច្ចុប្បន្នកម្ពុជាបាននិងកំពុងរៀបចំកិច្ចព្រមព្រៀងពាណិជ្ជកម្មសេរីជាមួយ។

    គួរកត់សម្គាល់ថា វិស័យឧស្សាហកម្ម និងសេវាកម្ម បានចូលរួមចំណែកប្រមាណ 40ភាគរយក្នុងផលិតផលជាតិសរុប ហើយពាណិជ្ជកម្មជាសារវន្តរួមមានរ៉ែ គីមី និងគ្រឿងយន្ត៕

     

  • ទស្សនាបទថៃថតក្នុងទឹកដីកំពង់ត្រាច ខេត្តកំពត ប្រទេសកម្ពុជា

    ទស្សនាបទថៃថតក្នុងទឹកដីកំពង់ត្រាច ខេត្តកំពត ប្រទេសកម្ពុជា

    អ្នកដឹកនាំសម្ដែងបទចម្រៀងដែលមានចំណងជើងថា “สวรรค์พราก” (សាវ៉ាន់ផ្រាក ) ជាបទចម្រៀងប្រចាំរឿងភាគ “นางฟ้าอสูร” (ណាងហ្វាអាស៊ូន) មានន័យជាភាសាខ្មែរយើងថា “ទេពធីតាអសុរកាយ” បានមកផ្ដិតយកទេសភាពធម្មជាតិពណ៌ខៀវខ្ចីស្រស់បំព្រងនៅលើទឹកដីរមណីយដ្ឋានស្រុកកំពង់ត្រាច ខេត្តកំពត ប្រទេសកម្ពុជាយើង។

    បទនេះដែរជាបទចម្រៀងក្នុងសាច់រឿងរបស់ស្ថានីយទូរទស្សន៍ប៉ុស្ដិ៍លេខ 3 ថៃ ដែលច្រៀងដោយលោក កង ហួយរ៉ៃ(ម្ចាស់បទ សៃវ៉ាស៊ិ-បធិមកាន់ ដែលលោកអ្នកធ្លាប់បានស្ដាប់ និងសា្គល់តាមរយៈបទ ស៊ីបានចេះតែស៊ីទៅ ហ្នឹងឯង)។ គួរបញ្ជាក់ផងដែរថា បទដែលប្រកបទៅដោយមនោសញ្ចេតនាដ៏ឈឺចាប់មួយនេះ បាននិយាយរៀបរាប់អំពីអារម្មណ៍សោកសៅ របស់បុរសម្នាក់ដែលត្រូវសង្សារក្បត់ចិត្តទៅមានបុរសថ្មី ដោយបន្សល់ទុកនូវការឈឺចាប់ដដែលៗ និងបានញាំញីបេះដូងរបស់គេយ៉ាងខ្លាំង។ រហូតដល់ថ្ងៃមួយនោះនាងបានត្រឡប់មកវិញ តែជាដង្ហើមចុងក្រោយរបស់នាងទៅហើយ ទើបត្រូវធ្វើឱ្យបុរសម្នាក់នោះខូចចិត្តសោកស្តាយកាន់តែខ្លាំងជាថ្មីម្តងទៀត៕

    សូមទស្សនាវីដេអូចម្រៀងខាងក្រោមនេះ ៖