Category: សង្គម និងសេដ្ឋកិច្ច

ប៉ុន្មានថ្ងៃមុននេះកញ្ញា ពេជ្រ អាវីហ្សា បានធ្វើឱ្យមិត្ដភ័ក្ដិក្នុងសិល្បៈ ក៏ដូចជាអ្នកគាំទ្រនាងជា ច្រើនមានការភ្ញាក់ផ្អើល គ្រាដែលនាងត្រូវចូលមន្ទីរពេទ្យសង្គ្រោះបន្ទាន់ទាំងយប់ដើម្បីធ្វើការវះកាត់ និងបច្ចុប្បន្ន នាងបានធូរស្បើយពីជំងឺនោះហើយ តែទោះយ៉ាងណានាងក៏បានសម្ដែងនូវការហួសចិត្ដបន្ទាប់ពីនាងជួបនឹងបញ្ហាជាប់ៗគ្នាបែបនេះ។

ចូលមកដល់ឆ្នាំ2017 នេះគេសង្កេតឃើញថា តារាសម្ដែងសាច់សខ្ចីដូចបណ្ដូលចេកដែលធ្លាប់តែមានហុងស៊ុយ និងទទួលបានការគាំទ្រក្នុងវិស័យសិល្បៈ ស្រាប់តែត្រូវមកកើតរឿងជាប់ៗគ្នាដែលសូម្បីតែសាមីខ្លួនក៏មានការហួសចិត្ដនឹងខ្សែជីវិតខ្លួនដែរ។ គេនៅចាំបានថា មុនពេលកញ្ញា ពេជ្រ អាវីហ្សា ត្រូវចូលមន្ទីរពេទ្យវះកាត់ពោះវៀនដុះខ្នែងនេះ នាងធ្លាប់បានធ្វើខួបកំណើតដើម្បីលាងជម្រះ ភាពអពមង្គលចង្រៃទាំងឡាយចេញពីជីវិតនាង តែក្រោយពីពិធីនោះចប់រួចរាល់មិនទាន់ទាំងបានមួយខែស្រួលបួលផង ស្រាប់តែនាងត្រូវជួបបញ្ហាចូលពេទ្យទាំងយប់តែម្តង។

ជួបកញ្ញា ពេជ្រ អាវីហ្សា តាមរយៈទូរស័ព្ទ នាងបញ្ជាក់ថា កន្លងមកនាងពុំធ្លាប់មានជំងឺប្រចាំកាយអ្វីឡើយ សូម្បីតែរូបនាងផ្ទាល់ក៏មិននឹកស្មានថា នឹងកើតមានជំងឺដែលធ្វើឱ្យនាងឈឺចុកចាប់ពេញខ្លួនភ្លាមៗដូច្នេះឡើយ។ នាងបន្ដថា តាមនាងដឹងព័ត៌មានខ្លះៗពីគ្រូពេទ្យថា វាជាជំងឺសាមញ្ញដែលនរណាៗក៏អាចកើតបានដែរ តែនៅពេលអាការធ្វើទុក្ខខ្លាំងបណ្ដាលឱ្យចុកពោះខ្លាំងណាស់ និងបើបញ្ជូនទៅពេទ្យមិនទាន់ទេ ប្រហែលនឹងអាចជួបគ្រោះថ្នាក់ធ្ងន់ធ្ងរ ឬក៏អាចនឹងជួបគ្រោះថ្នាក់ដល់ជីវិតបានទៀតផង។

ជាមួយគ្នានេះកញ្ញា ពេជ្រ អាវីហ្សា បានដកដង្ហើមធំសម្ដែងនូវការហួសចិត្ដបន្ទាប់ពីនាងបានជួបរឿងហេតុមិនល្អម្ដងហើយម្ដងទៀតក្នុងជីវិតបែបនេះ។ អ្វីដែលនាងស្ដាយនោះគឺ ក្រោយពេលនាងវះកាត់ហើយ ត្រូវការពេលវេលាយូរទៀតក្នុងការសម្រាកថែទាំសុខភាព ព្រោះនាងត្រូវការពេលវេលាឆាប់ៗក្នុងការសាងកេរ្ដិ៍ឈ្មោះក្នុងសិល្បៈឡើងវិញបន្ទាប់ពីជួបបញ្ហាឥតឈប់ឈររួចមក។

កញ្ញាពេជ្រ អាវីហ្សា បញ្ជាក់ថា៖«សំណាងហើយដែលខ្ញុំពុំបានជាប់កុងត្រាជាមួយក្រុមហ៊ុនឬផលិតកម្មណាមួយ មិនដូច្នោះទេច្បាស់នៅជាប់ការងារគេពេញហ្នឹង និងមិនដឹងថាត្រូវដោះស្រាយរបៀបណាទេ»៕

ភ្នំពេញ៖ រដ្ឋមន្រ្តីក្រសួងទេសចរណ៍ឯកឧត្តម ថោង ខុន បានឯកភាពលើសេចក្តីព្រាងផែនការយុទ្ធសាស្ត្រអភិវឌ្ឍន៍ធនធានមនុស្សក្នុងវិស័យទេសចរណ៍ក្នុងគោលបំណងបណ្តុះបណ្តាលធនធានមនុស្សឱ្យបានប្រមាណ 5ម៉ឺននាក់ក្នុងមួយឆ្នាំ ដើម្បីបម្រើក្នុងវិស័យទេសចរណ៍ឱ្យបានគ្រប់គ្រាន់។

ឯកឧត្តមបានលើកឡើងថា ក្រសួងបានដាក់ចេញនូវយន្តការចម្បងតាមរយៈការបង្កើតមូលនិធិអភិវឌ្ឍន៍ទេសចរណ៍ និងនីតិវិធីចាត់ចែងប្រើប្រាស់មូលនិធិ កម្មវិធីកម្ចីនិស្សិតដែលជាឱកាសផ្តល់លទ្ធភាពដល់និស្សិតក្រីក្រអាចទទួលបានការអប់រំវិជ្ជាជីវៈជំនាញ និងប្រព័ន្ធធានាការងារជូននិស្សិតតាមរយៈកិច្ចសហប្រតិបត្តិការត្រីភាគីរវាងសាលា មូលដ្ឋានអាជីវកម្មសណ្ឋាគារ និងគ្រឹះស្ថានហិរញ្ញវត្ថុ ដើម្បីគាំទ្រលើផែនការយុទ្ធសាស្ត្រអភិវឌ្ឍន៍ធនធានមនុស្សក្នុងវិស័យទេសចរណ៍ឆ្នាំ 2017 – 2025 ដែលត្រូវបានរៀបចំឡើងដោយបានធ្វើការសិក្សាយោងលើគោលនយោបាយជាតិមុខរបរ និងការងារឆ្នាំ2015 – 2025 និងផែនការយុទ្ធសាស្ត្រអភិវឌ្ឍន៍ទេសចរណ៍អាស៊ាន2016 – 2025 ព្រោះថាយន្តការនេះត្រូវបានយកមកអនុវត្តក្នុងវិស័យទេសចរណ៍ដោយសារអាជីវកម្មទេសចរណ៍មានលក្ខណៈប្រមូលផ្តុំច្រើន ហើយវិស័យទេសចរណ៍មានលក្ខណៈជាប្រព័ន្ធទៀតផង។

នៅក្នុងកិច្ចប្រជុំថ្នាក់ដឹកនាំក្រសួងទេសចរណ៍ដែលដឹកនាំដោយឯកឧត្តម ថោង ខុន នៅព្រឹកថ្ងៃទី27 ខែមិថុនា ឆ្នាំ2017 បានឯកភាពគាំទ្រលើសេចក្តីព្រាងផែនការយុទ្ធសាស្ត្រអភិវឌ្ឍន៍ធនធានមនុស្សក្នុងវិស័យទេសចរណ៍ក្នុងគោលបំណងបណ្តុះបណ្តាលធនធានមនុស្សឱ្យបានប្រមាណ5ម៉ឺននាក់បន្ថែមក្នុងមួយឆ្នាំ ដោយកំណត់ចក្ខុវិស័យច្បាស់លាស់ក្នុងឆ្នាំ2025 កម្ពុជានឹងមានអ្នកជំនាញទេសចរណ៍ប្រមាណ30ម៉ឺននាក់ដែលមានសមត្ថភាពខ្ពស់ ប្រកបដោយភាពច្នៃប្រឌិត និងគំនិតបង្កើតថ្មីដើម្បីបម្រើការងារទាំងក្នុង និងក្រៅតំបន់អាស៊ានក្នុងការចូលរួមពង្រឹងឧត្តមភាពប្រកួតប្រជែង និងបង្កើនមូលធនមនុស្សក្នុងវិស័យទេសចរណ៍កម្ពុជាស្របតាមតម្រូវការនៃការអភិវឌ្ឍសេដ្ឋកិច្ច សង្គម និងទិផ្សារការងារ។

ផែនការយុទ្ធសាស្ត្រអភិវឌ្ឍន៍ធនធានមនុស្សក្នុងវិស័យទេសចរណ៍នេះផ្តោតសំខាន់ទាំងការបណ្តុះបណ្តាលធនធានមនុស្ស ទាំងជំនាញវិជ្ជាជីវៈទេសចរណ៍ និងមន្ត្រីជំនាញមន្ទីរទេសចរណ៍គ្រប់រាជធានី-ខេត្ត ដោយមន្ទីរទេសចរណ៍ត្រូវបង្កើតផែនការការងារបណ្តុះបណ្តាល គ្រប់គ្រង និងតាមដានការអនុវត្តដោយផ្ទាល់តាមរាជធានី-ខេត្តរបស់ខ្លួន ដោយមានរចនាសម្ព័ន្ធគ្រូបង្គោល និងកម្មវិធីសិក្សាច្បាស់លាស់ និងការសម្របសម្រួលពីថ្នាក់ជាតិដើម្បីរួមគ្នាអភិវឌ្ឍធនធានមនុស្សជំនាញស្របតាមទិសដៅយុទ្ធសាស្ត្របន្តពង្រឹងការអនុវត្តកិច្ចព្រមព្រៀងទទួលស្គាល់គ្នាទៅវិញទៅមកលើអ្នកជំនាញទេសចរណ៍អាស៊ាន អភិវឌ្ឍ និងពង្រឹងជំនាញវិជ្ជាជីវៈទេសចរណ៍តាមស្តង់ដារជាតិ និងតម្រូវការនៃការអភិវឌ្ឍវិស័យទេសចរណ៍កម្ពុជា និងពង្រឹងសមត្ថភាពស្ថាប័ន មន្ត្រីជំនាញ និងភាពជាដៃគូរដ្ឋ ឯកជនតាមរយៈការអប់រំ បណ្តុះបណ្តាល តាមជំនាញដែលមានការងារធ្វើស្រាប់ និងបណ្តុះបណ្តាលអ្នកធ្វើការថ្មី។

ជាមួយគ្នានេះ ក្រសួងក៏បានជំរុញឱ្យថ្នាក់ដឹកនាំ និងមន្ត្រីជំនាញពន្លឿនអនុវត្តគម្រោងសាងសង់សាលាវិជ្ជាជីវៈទេសចរណ៍ក្រោមគម្រោងកម្ចីពីទីភ្នាក់ងារអភិវឌ្ឍន៍បារាំងឱ្យបានឆាប់រហ័ស ដើម្បីរួមចំណែកអនុវត្តផែនការយុទ្ធសាស្ត្រអភិវឌ្ឍន៍ធនធានមនុស្សក្នុងវិស័យទេសចរណ៍នេះឱ្យសម្រេចបានប្រសិទ្ធភាពខ្ពស់ ឆ្លើយតបទៅនឹងនិន្នាការរីកចម្រើនយ៉ាងឆាប់រហ័សនៃវិស័យទេសចរណ៍កម្ពុជា ដោយធានាគុណភាពសេវាកម្មទេសចរណ៍ និងផ្តល់ភាពកក់ក្តៅដល់ភ្ញៀវទេសចរ។

យោងតាមរបាយការណ៍របស់អង្គការទេសចរណ៍ពិភពលោក និងក្រុមប្រឹក្សាទេសចរណ៍ និងធ្វើដំណើរពិភពលោកឆ្នាំ2016 បានរាយការណ៍ថា ពិភពលោកទទួលបានទេសចរប្រមាណ1,235លាននាក់ បង្កើតការងារដោយផ្ទាល់ និងប្រយោលបានសរុបប្រមាណ 290លាននាក់ ខណៈដែលវិស័យទេសចរណ៍ និងការធ្វើដំណើរកម្ពុជាបានបង្កើតការងារដោយផ្ទាល់ និងប្រយោលសរុបប្រមាណ 2,3លាននាក់ ស្មើនឹង 27%នៃការងារសរុប ក្នុងនោះការងារផ្ទាល់មានប្រមាណ 1,2លាននាក់ ស្មើនឹង 14%នៃការងារសរុបដែលការងារផ្ទាល់ក្នុងវិស័យទេសចរណ៍មានប្រមាណជា 62ម៉ឺននាក់៕

ភ្នំពេញៈ ស្រ្តីជើងខ្លាំងក្នុងវិស័យជំនួញនៅកម្ពុជាបានចាប់ផ្តើមមុខជំនួញតាំងពីដើមទសវត្សរ៍ទី90 ដែលពេលនោះគេស្គាល់គាត់ត្រឹមតែជាថៅកែស្រីម្នាក់ប៉ុណ្ណោះ ប៉ុន្តែពេលនេះលោកជំទាវមានក្រុមហ៊ុនមិនតិចជាង 20ឡើយនៅក្នុងដៃរហូតមកទល់ពេលនេះ។

លោកជំទាវឧកញ៉ា លឹម ឈីវហូ ជាអគ្គនាយិកាក្រុមហ៊ុនជាច្រើន រួមមានតំបន់សេដ្ឋកិច្ចពិសេសភ្នំពេញ មជ្ឈមណ្ឌលពាណិជ្ជកម្មអ៊ែតវូដ កំពង់ផែស្ទឹងហាវ តំបន់សេដ្ឋកិច្ចពិសេសប៉ោយប៉ែត និងក្រុមហ៊ុននាំចូលស្រាល្បីៗនៅកម្ពុជាជាច្រើនទៀត។

តើលោកអ្នកចង់ធ្វើជាអ្នកមានឬទេ? លោកជំទាវលឹម ឈីវហូបានផ្តល់ជាដំបូន្មានថា ដើម្បីសម្រេចបានអ្វីមួយយើងត្រូវលើកទិសដៅនាពេលអនាគតថា តើខ្លួនឯងចង់បានអ្វី? ឪពុកម្តាយចែកចំណេះដឹងឱ្យ តែអាចមិនចែកទ្រព្យសម្បត្តិឱ្យទេ ដូច្នេះពេលចង់បើកក្រុមហ៊ុនអ្វីមួយយើងត្រូវធ្វើការឲ្យគេដើម្បីយកបទពិសោធសិន។ លោកជំទាវបន្តថា ពេលនេះផ្ទះកំពុងមានឱ្យបង់រំលស់ ពេលប្អូនៗបានទទួលប្រាក់ខែ កុំចង់ដើរលេងហ៊ឺហារច្រើនពេក សូមទិញផ្ទះបង់រំលស់ ដោយអត់ធ្មត់ គឺរយៈពេល5 ឬ10ឆ្នាំក្រោយប្អូននឹងមានលុយដុំកាន់នៅក្នុងដៃអាចទិញដីទុក ឬអាចបើកក្រុមហ៊ុនរកស៊ីពីតូចរហូតដល់ធំបាន។

លោកជំទាវបានបន្តថា ពេលនេះធនាគារក៏មានផ្តល់ឥណទានផងដែរ ហេតុនេះត្រូវរៀនដើម្បីយកចំណេះសិន ហើយត្រូវសួរខ្លួនឯងថា តើទិសដៅអនាគតចង់បានអ្វី? បន្ទាប់មកសម្រួចឆន្ទៈរបស់ខ្លួនទៅតាមនោះ។ លោកជំទាវបន្តថា ពេលយើងមានប្រាក់ខែ 200ដុល្លារ ឬ500ដុល្លារ ឬ1,000ដុល្លារ តើយើងមានតួនាទីជាអ្វី? ប្រាក់ខែទទួលបានអាស្រ័យលើសមត្ថភាពរបស់យើងទាំងអស់គ្នា។

លោកជំទាវបន្តថា “បើយើងមានភាពស្មោះត្រង់ មានការខិតខំប្រឹងប្រែង យើងអាចជោគជ័យទាំងអស់គ្នាបានហើយ”។ លោកជំទាវបន្តថា “បើយើងមានប្រាក់ខែ1,000ដុល្លារ ប្រពន្ធសន្សំបន្តិច ប្តីសន្សំបន្តិច យើងអាចសន្សំបាន 500ដុល្លារក្នុងមួយខែ។ យើងអាចសល់លុយ និងយកទៅទិញដី ឬផ្ទះបង់រំលស់ យើងអាចបានលុយទាំងដុំ និងអាចធ្វើអ្នកមានបានហើយ៕

អស់រយៈពេល 6ឆ្នាំហើយដែលតារាសម្ដែង ហែម មុន្នីរិទ្ធ ហៅ អេនឌ្រូ ចាប់យកអាជីពសិល្បៈ។ ទោះជាការគាំទ្រពីមហាជនមកលើរូបលោកនៅមានកម្រិតក៏ដោយ ក៏លោកបញ្ជាក់ថា បច្ចុប្បន្នលោកពេញចិត្ដជាខ្លាំងជាមួយការងាររបស់ខ្លួន ខណៈលោកបានក្លាយជាតារាចម្រៀងប្រចាំនៅផលិតកម្ម BN។ លោក អេនឌ្រូ ត្រូវបានទស្សនិកជនស្គាល់តាមរយៈកម្មវិធីជាច្រើននៃស្ថានីយទូរទស្សន៍ប៉ុស្ដិ៍លេខ9។ នៅមិនយូរប៉ុនា្មនទេមហាជននឹងបានស្ដាប់បទមនោសញ្ចេតនារបស់លោកតាមរយៈផលិតកម្ម BN មិនខាន។

ជាមួយគ្នានេះលោក អេនឌ្រូ បានបញ្ជាក់ថា ក្រោយពីចូលប្រឡូកការងារជាតារាសម្ដែង និងពិធីករនៃស្ថានីយទូរទស្សន៍អស់រយៈពេល 6ឆ្នាំមក បច្ចុប្បន្នលោកងាកមកចាប់យកអាជីពថ្មីមួយទៀតជាតារាចម្រៀង។ លោកបន្ដថា៖ «ការពិតខ្ញុំចេះច្រៀងយូរហើយ ហើយក៏ធ្លាប់ប៉ងចង់ក្លាយជាតារាចម្រៀងដែរ ប៉ុន្ដែខ្ញុំគ្មានមានឱកាសបញ្ចេញសមត្ថភាពខ្លួនឯង ទើបតែពេលខ្ញុំឃើញ BN ជាផលិតកម្មបង្កើតបទOriginal Song ខ្ញុំក៏ឆក់យកឱកាសនោះតែម្ដង»។

បទចម្រៀងដែលលោក អេនឌ្រូ ត្រៀមចេញនៅលើទីផ្សារនៅអំឡុងខែសីហាខាងមុខនេះមានចំនួនពីរបទជាប្រភេទបទមនោសញ្ចេតនាបែបស្រុកស្រែ ក្នុងនោះក៏មានទាំង MV ផងដែរ។

អេនឌ្រូ បានបញ្ជាក់ពីមូលហេតុដែលលោកងាកទៅចាប់អាជីពចម្រៀងគ្រាដែលកំពុងតែមានការរវល់ជាមួយការងារច្រើននោះថា ដោយសារវាអាចផ្ដល់ប្រយោជន៍ដល់លោកច្រើនសម្រាប់ការងារជាពិធីករដូចរូបលោក។ លោកបន្ដថា៖ « នៅពេលបងប្អូនទស្សនិកជនត្រូវការខ្ញុំចូលរួមក្នុងកម្មវិធីគាត់ខ្ញុំអាចរៀបជាកញ្ចប់ជូនបានដូចជា ការធ្វើជាពិធីករដែលអាចបកប្រែភាសាអង់គ្លេស និងបារាំងបាន ពិសេសថែមទាំងអាចច្រៀងបានទៀតផង»។

រំលឹកដល់ប្រជាប្រិយភាពក្នុងសិល្បៈត្រូវបានលោកអេនឌ្រូប្រាប់ថា លោកមិនដែលអន់ចិត្ដ ឬខ្វាយខ្វល់អ្វីទេ ផ្ទុយទៅវិញលោកសប្បាយចិត្ដនឹងអ្វីដែលខ្លួនកំពុងតែមាន ព្រោះសព្វថ្ងៃនេះលោកធ្វើការងារនៅក្នុងធនាគារឯកជនមួយ និងរវល់ស្ទើររកពេលដកឃ្លាពុំបានផង មានពេលតិចតួចណាស់សម្រាប់សិល្បៈ ដូច្នេះអ្វីដែលលោកទទួលបាននេះវាសមល្មម ឬក៏អាចថាលើសបន្ដិចផង បើធៀបទៅនឹងការចំណាយពេលរបស់លោក៕

សិក្ខាសាលា «គន្លឹះកសាងខ្លួនដើម្បីក្លាយជាយុវជនឆ្នើមសតវត្សរ៍ទី21» សម្រាប់ឆ្នាំ 2017 នេះជាវេទិកាមួយដែលជំរុញឱ្យយុវជនកម្ពុជាកាន់តែមានគំនិតអភិវឌ្ឍន៍ឆ្ពោះទៅរកភាពជាបុគ្គលដែលមានតម្លៃពិតប្រាកដសម្រាប់សង្គម។

វេទិកាដ៏មានសារៈសំខាន់នេះ ត្រូវបានរៀបចំឡើងដោយក្រុម «យុវជនស្ម័គ្រចិត្តដើម្បីការអភិវឌ្ឍសង្គម (YVSD)» ដោយគោលបំណងសំខាន់នៃវេទិកានេះគឺ ការបង្ហាញនូវយុទ្ធសាស្រ្តក្នុងការកំណត់គោលដៅជីវិត ការទំនាក់ទំនងជាមួយនឹងមជ្ឈដ្ឋានខាងក្រៅដែលនាំឱ្យទទួលបានលទ្ធផលល្អក្នុងការចាប់យកឱកាសទាំងការសិក្សា និងការងារឱ្យសមស្របនឹងសមត្ថភាពដែលខ្លួនមាន និងលទ្ធភាពនៃការទទួលបានព័ត៌មានពីគ្រប់មជ្ឈដ្ឋាន។

ទីប្រឹក្សាគម្រោងស្តីពីគន្លឹះកសាងខ្លួនដើម្បីក្លាយជាយុវជនឆ្នើមសតវត្សរ៍ទី21 លោក តង់ រតនា បានលើកឡើងថា ការចែករំលែកពិតជាមានសារៈសំខាន់ខ្លាំងណាស់សម្រាប់សង្គម។ ការបង្កើតព្រឹត្តិការណ៍នេះឡើង គឺយើងបានផ្តល់ឱកាសឱ្យវាគ្មិននានាចែករំលែកបទពិសោធរបស់ខ្លួនទៅកាន់យុវជនប្រមាណជាជាង 500នាក់ដែលមកពីគ្រឹះស្ថានសិក្សាផ្សេងៗគ្នា និងជាការផ្តល់ឱកាសដល់យុវជនកម្ពុជាទទួលយកបទពិសោធជីវិត ក៏ដូចជាចំណេះដឹងពីបុគ្គលឆ្នើមដើម្បីយកទៅអភិវឌ្ឍខ្លួនឯង។

គួរបញ្ជាក់ថា វាគ្មិនសំខាន់ៗដែលបានចូលរួមធ្វើបទបង្ហាញនៅក្នុងកម្មវិធីនេះមានដូចជា កញ្ញា អ៊ុង ច័ន្ទសោភា ផលិតករ និងជាពិធីការិនីព័ត៌មាននៃទូរទស្សន៍ CNC & CTN លោក ហ៊ុយ សម្បត្តិ ស្ថាបនិក Youth Force 2030 in Cambodia និងលោក ជា ធីរិទ្ធ និពន្ធនាយករងនៃសារព័ត៌មានថ្មីៗ៕

ភ្នំពេញៈ ប្រទេសចិនបានវិនិយោគទឹកប្រាក់ច្រើនជាងគេនៅកម្ពុជា ដែលមានទំហំរហូតដល់10ពាន់លានដុល្លារកាលពីឆ្នាំមុន ជាទំហំវិនិយោគមួយដែលផ្សារភ្ជាប់ទំនាក់ទំនង និងជាដៃគូកិច្ចសហប្រតិបត្តិការគ្រប់ជ្រុងជ្រោយនៅកម្ពុជា។

លោក លី អាន ទីប្រឹក្សាផ្នែកសេដ្ឋកិច្ច ពាណិជ្ជកម្មអមស្ថានទូតចិនប្រចាំកម្ពុជា បានថ្លែងនៅក្នុង វេទិកាកិច្ចសហប្រតិបត្តិការសេដ្ឋកិច្ច និងជំនួញពាណិជ្ជកម្មកម្ពុជា-ចិន ខេត្តសាតុងកាលពីម្សិលមិញថា ដោយមានការអភិវឌ្ឍគ្រប់ជ្រុងជ្រោយ និងមានភាពជាដៃគូយ៉ាងសំខាន់នោះ ជាក់ស្តែងនៅឆ្នាំ 2016កន្លងមក ទំហំពាណិជ្ជកម្មទេ្វភាគីកម្ពុជា-ចិនមានចំនួនជាង 47ពាន់លានដុល្លាអាមេរិក កើនឡើង 7.4ភាគរយ គឺជាអត្រាកំណើនឈរក្នុងលំដាប់ថ្នាក់ទី1 នៅក្នុងចំណោមប្រទេសជាសមាជិកអាស៊ានទាំង10។ ក្នុងនោះបើតាមស្ថិតិភាគីកម្ពុជាគិតត្រឹមចុងឆ្នាំ2016 ចិនបានចុះកិច្ចព្រមព្រៀងវិនិយោគទុននៅកម្ពុជា មានចំនួនជាង 1ម៉ឺនលានដុល្លារអាមេរិក គឺស្មើនឹង 34.3ភាគរយនៃការវិនិយោគទុននៅកម្ពុជា ដោយបានចាត់ទុកកម្ពុជាជាប្រទេសដែលមានសក្តានុពលបំផុតក្នុងការធ្វើពាណិជ្ជកម្មទី1 និងជាប្រភពវិនិយោគទុនទី1ផងដែរ ។

លោកបន្តថា “កម្ពុជាជាប្រទេសដែលកំពុងអភិវឌ្ឍន៍លើគ្រប់វិស័យ និងជាប្រទេសដែលមានសក្តានុពលបំផុត បច្ចុប្បន្នប្រទេសចិនបានចាត់ទុកកម្ពុជាជាដៃគូយ៉ាងសំខាន់ក្នុងការធ្វើពាណិជ្ជកម្មទី1 និងជាប្រភពវិនិយោគទុនទី1 នៅកម្ពុជាផងដែរ”។

លោក លី អាន បានបន្តទៀតថា បច្ចុប្បន្នប្រទេសទាំងពីរកំពុងទទួលបានសមិទ្ធផលយ៉ាងសកម្ម នៅក្នុងកិច្ចសហប្រតិបត្តិការវិនិយោគមួយដ៏មានតម្លៃបំផុត ដែលបានបម្រើផលប្រយោជន៍ដល់សង្គមមួយកំពុងមានការអភិវឌ្ឍយ៉ាងខ្លំាង ដូចជាវិស័យថាមពលអគ្គិសនី កសិកម្ម ការអភិវឌ្ឍវិស័យទេសចរណ៍ តំបន់សេដ្ឋកិច្ចពិសេស និងទូរគមនាគមន៍ជាដើម ។

លោកហោ ដារិទ្ធ អនុរដ្ឋលេខាធិការក្រសួងផែនការ ក៏បានថ្លែងនូវការសាទរចំពោះសមាគមអភិវឌ្ឍសេដ្ឋកិច្ចខេត្តសានតុងនៅកម្ពុជាដែលជាផ្នែកមួយក្នុងការចូលរួមចំណែកអភិវឌ្ឍ និងជាការជួយ ជំរុញបង្កើនដល់សេដ្ឋកិច្ចកម្ពុជាផងដែរ ដែលធ្វើឲ្យកម្ពុជាទទួលផលវិជ្ជមានជាច្រើនមកដល់ពេលបច្ចុប្បន្ន។ ដើម្បីជាផ្លូវតម្រង់ទិសក្នុងការអភិវឌ្ឍកាន់តែប្រសើរនោះ ក្រសួងផែនការកំពុងរៀបចំផែនទីបង្ហាញផ្លូវភោគសាស្រ្តដែលជាការងារកាន់តែប្រសើរដល់អ្នកវិនិយោគគ្រប់ៗគ្នាផងដែរ៕