Category: សង្គម និងសេដ្ឋកិច្ច

  • នវានុវត្តន៍ ជាវិធីសាស្រ្តល្អបំផុតសម្រាប់ដឹកនាំក្រុមហ៊ុនឱ្យទទួលបានជោគជ័យ

    នវានុវត្តន៍ ជាវិធីសាស្រ្តល្អបំផុតសម្រាប់ដឹកនាំក្រុមហ៊ុនឱ្យទទួលបានជោគជ័យ

    នវានុត្តន៍ ដែលមានន័យថាជាគំនិតច្នៃប្រឌិត ឬការបង្កើតអ្វីដែលថ្មី គឺជាវិធីសាស្រ្តដែលល្អបំផុតសម្រាប់ធ្វើឱ្យមនុស្សគ្រប់គ្នា ឬអង្គភាពក្រុមហ៊ុនមួយទទួលបានជោគជ័យ។ នេះជាការលើកឡើងរបស់លោក Gabriel Helmy ប្រធាននាយកប្រតិបតិ្តនៃក្រុមហ៊ុន The Capacity Specialist ប្រចាំនៅក្នុងប្រទេសកម្ពុជា។

    លោកបានលើកឡើងពីគំរូរបស់ Steve Jobs ស្ថាបនិកក្រុមហ៊ុន Apple ដែលផលិតកុំព្យូរទ័រយួរដៃដំបូងគេ និងផលិតស្មាតហ្វូនម៉ាក iPhone ល្បីទូទាំងពិភពលោកផងនោះ ធ្លាប់បាននិយាយថា «នវានុវត្តន៍ឬគំនិតបង្កើតថ្មីគឺជាវិធីសាស្រ្តល្អបំផុតសម្រាប់ឱ្យក្រុមហ៊ុនទទួលបានជោគជ័យ»។ លោកបន្តថា នវានុវត្តន៍អាចត្រូវបានគេប្រើក្នុងគោលដៅ សម្រាប់ពង្រឹងគុណភាពផលិតផល សេវាកម្ម ដំណើរការអាជីវកម្មដើម្បីជួយឱ្យក្រុមហ៊ុនដើរឆ្ពោះទៅមុខក្នុងការប្រកួតប្រជែងជាមួយក្រុមហ៊ុនដទៃ និងបង្កើនប្រាក់ចំណេញរបស់ខ្លួន។ តែយ៉ាងណាក៏ដោយលោក Helmy ក៏បានបញ្ជាក់ផងដែរថា ការបង្កើតថ្មីក៏អាចបន្សល់ទុកនូវបញ្ហាជាច្រើនសម្រាប់ក្រុមហ៊ុនផងដែរ បើយើងបង្កើតអ្វីថ្មីមួយដោយមិនបានគិតឱ្យគ្រប់ជ្រុងជ្រោយ។

    លោក ស៊ីវ ស្រេង គ្រូបណ្តុះបណ្តាលនៃវិទ្យាស្ថានសិក្សាដើម្បីជោគជ័យ បានគាំទ្រទៅនឹងគំនិតបង្កើតថ្មី ថាពិតជាធ្វើឱ្យមនុស្ស និងក្រុមហ៊ុនទទួលបានជោគជ័យពិតប្រាកដមែន។ លោកបន្តថា លោក Steve Jobs បានរកឃើញ និងបង្កើតក្រុមហ៊ុន Apple ដំបូងគេ ហើយគ្មានអ្នកណាម្នាក់ជឿថា ក្រុមហ៊ុននេះមានភាពល្បីល្បាញទូទាំងពិភពលោកមកទល់បច្ចុប្បន្នដូច្នេះឡើយខណៈដែលក្រុមហ៊ុនត្រូវបានបង្កើតឡើងថ្មីនៅពេលដែលលោករៀនមិនទាន់ចប់មហាវិទ្យាល័យផងនោះ។ អ្វីដែលធ្វើឱ្យលោក Steve Jobs ជោគជ័យនោះគឺគាត់បានផលិតកុំព្យូទ័រយួរដៃ និងទូរស័ព្ទម៉ាក iPhone យកទៅឱ្យមនុស្សដែលមានឥទ្ធិពល ឬមេដឹកនាំប្រទេសប្រើប្រាស់ជាមុន បន្ទាប់មកផលិតផលទាំងពីររបស់គាត់ត្រូវបានគាំទ្រលើទីផ្សារខ្លាំងជាងគេនៅទូទាំងពិភពលោក។

    គួររំលឹកថា ទ្រឹស្តីនៃពាក្យ«នវានុវត្តន៍»ត្រូវបានបង្កើតឡើងដោយលោក Natalie Turner ជាស្ថាបនិក និងជានាយកប្រតិបត្តិក្រុមហ៊ុន Entheo Networks, a global leadership innovation company។ ការបង្កើតទ្រឹស្តីនេះគឺដើម្បីផ្តល់នូវវិធីសាស្រ្តសមស្របសម្រាប់បុគ្គល និងអង្គភាពក្រុមហ៊ុនទូទៅ សម្រាប់វាស់កម្រិតនៃការរៀបចំបុគ្គលិកលក្ខណៈ ជំនាញ សមត្ថភាព នៅក្នុងវប្បធម៌មួយដើម្បីជួយអភិវឌ្ឍគំនិតបង្កើតថ្មី៕

  • ចំនួនអ្នកប្រើ Facebook កើនដល់ 2ពាន់លាននាក់

    ចំនួនអ្នកប្រើ Facebook កើនដល់ 2ពាន់លាននាក់

    ចំនួនអ្នកប្រើប្រាស់បណ្ដាញសង្គម Facebook បានកើនឡើងដល់ 2ពាន់លាននាក់ហើយ គិតត្រឹមចុងខែមិថុនា ឆ្នាំ2017 ខណៈដែលមានមនុស្ស 1.3 ពាន់លាននាក់បានប្រើប្រាស់ Facebook រាល់ថ្ងៃ។

    ទិន្នន័យចំនួនអ្នកប្រើប្រាស់នេះ ត្រូវបានលោក Mark Zuckerberg សហស្ថាបនិក និងជានាយកប្រតិបត្តិនៃបណ្ដាញសង្គមដ៏ធំ Facebook បានប្រកាសលើគណនីផ្ទាល់ខ្លួនលោកថា (Updated with 2 billion people. The world is a little brighter now) ដោយលោកចង់បង្ហាញថា ចំនួនគណនី Facebook បានកើនដល់ 2 ពាន់លានគណនីហើយ ដែលធ្វើឱ្យពិភពលោកយើងនេះកាន់តែមានពន្លឺខ្លាំងជាងមុន ដោយមនុស្សលោកអាចធ្វើការទំនាក់ទំនងគ្នាកាន់តែងាយស្រួលជាងមុនហើយនៅទូទាំងពិភពលោក។

    ចំនួនមួយនេះបានធ្វើឱ្យ Facebook ក្លាយជាបណ្ដាញសង្គមដែលធំជាងគេបំផុតក្នុងពេលបច្ចុប្បន្ន ខណៈកម្មវិធី YouTube មានចំនួនគណនីអ្នកប្រើ 1.5 ពាន់លាននាក់ កម្មវិធី WeChat មានចំនួន 889 លាននាក់កម្មវិធី Twitter មានចំនួន 328 លាននាក់ និង Snapchat មានប្រហែល 255 លាននាក់។ ក្នុងនោះបើនិយាយពីចំនួនទាញយកទៅប្រើ ក្រៅពី YouTube ហើយ មានតែកម្មវិធីមកពីក្រុមហ៊ុន Facebook មួយប៉ុណ្ណោះ ដែលមានចំនួនអ្នកទាញយកមកដំឡើងលើស្មាតហ្វូន និងថេបប្លេត រាប់បញ្ចូលទាំងកម្មវិធី WhatsApp និង Facebook Messenger មានចំនួនលើសពី 1.2 ពាន់លានដងឯណោះ។

    ភាពរីកចម្រើនរបស់ Facebook នៅទសវត្សរ៍ចុងក្រោយនេះបានមកពីប្រទេសកំពុងអភិវឌ្ឍន៍ ដែលមានចំនួនអ្នកប្រើប្រាស់ថ្មីៗ ទើបរៀនប្រើ ឬទើបចាប់ផ្ដើមមានទូរស័ព្ទទំនើប រួមនិងទើបមានបណ្ដាញអ៊ីនធើណេតប្រើនឹងគេ។
    ក្រៅពីអ្វីខាងលើនេះហើយក្រុមហ៊ុនថែមទាំងបានបង្កើនប្រសិទ្ធភាពឥតឈប់ឈរនូវកម្មវិធីរបស់ខ្លួនសម្រាប់ស្មាតហ្វូន Android តម្លៃថោក និងការតភ្ជាប់បណ្តាញដែលខ្សោយទៀតផង៕

  • Ricky ទោះជាសិល្បៈរកលុយបានច្រើន ក៏ខ្ញុំមិនចោលក្លិបប្រដាល់ដែរ

    Ricky ទោះជាសិល្បៈរកលុយបានច្រើន ក៏ខ្ញុំមិនចោលក្លិបប្រដាល់ដែរ

    Ricky បច្ចុប្បន្នកំពុងតែទទួលបានការគាំទ្រយ៉ាងខ្លាំងក្នុងនាមជាពិធីករនៅក្នុងកម្មវិធីប្រគំតន្រ្ដីនៃស្ថានីយទូរទស្សន៍អាស៊ីអាគ្នេយ៍។ ទោះជាលោកកំពុងតែរវល់ជាមួយការងារសិល្បៈខ្លាំងក៏ដោយ ក៏តារាសិល្បៈមានដើមកំណើតពីកីឡាប្រដាល់តាមជាយដែនម្នាក់នេះ មិនព្រមបោះបង់ចោលសិល្បៈក្បាច់គុនប្រដាល់ដែរ។

    រំឭកដល់បទ «ផ្ញើសង្សារផង» ជាបទដែលពេញនិយមក្នុងរង្វង់មួយឆ្នាំមុន យុវវ័យជាច្រើនប្រាកដជានៅចាំមុខលោក Ricky ជាមិនខាន។ ពិសេសមុនពេលលោកចូលប្រឡូកក្នុងវិស័យសិល្បៈ លោកធ្លាប់ធ្វើជាគ្រូបង្វឹកក្នុងក្លឹបប្រដាល់ «ខ្លារខិនមានរិទ្ធ»។ ពាក្យថា “ពេលវេលាជាមាសប្រាក់” វាពិតជាស័ក្កិសមណាស់សម្រាប់ជីវិតសិល្បៈរបស់ Ricky នៅពេលនេះ តែទោះជាយ៉ាងនេះក្ដី  ក៏លោកនៅតែចំណាយពេលជាមួយសិស្សប្រដាល់របស់ខ្លួនជាច្រើននាក់ដោយមិនព្រមបោះបង់ចោលពួកគេឡើយ។
    លោក Ricky បានប្រាប់ថា បច្ចុប្បន្នលោកជាពិធីករប្រចាំកម្មវិធីនៃការប្រគំតន្រ្ដីរបស់ស្ថានីយទូរទស្សន៍អាស៊ីអាគ្នេយ៍ ជាកម្មវិធីទទួលបានការគាំទ្រខ្លាំងពីអ្នកទស្សនា។    លោកបន្តថា ប្រសិនបើមានពេលគ្រប់គ្រាន់លោកនឹងអាចទទួលបានការងារច្រើនពីស្ថានីយទូរទស្សន៍បន្ថែមទៀត។

    ទោះយ៉ាងណាពិធីកររូបនេះបានបញ្ជាក់ថា សព្វថ្ងៃលោកស្ទើរតែគ្មានពេលវេលាសម្រាកទេ ព្រោះក្រៅពីការងារជាមួយស្ថានីយទូរទស្សន៍ហើយ លោកទទួលការងារជាពិធីករខាងក្រៅបន្ថែមទៀត។ ក្រៅពីនេះលោកត្រូវចំណាយពេលជាច្រើននៅជាមួយក្លឹបប្រដាល់របស់ខ្លួន។

    Ricky បញ្ជាក់ថា៖ «ខ្ញុំមិនអាចចោលក្លិបខ្ញុំបានទេ ទោះជាខ្ញុំរវល់ខ្លាំងក៏ដោយ ក៏ខ្ញុំនៅតែចំណាយពេលជាមួយវាដែរ  ព្រោះខ្ញុំដឹងថាកូនសិស្សខ្ញុំម្នាក់ៗពួកគាត់ស្រឡាញ់អាជីពនេះខ្លាំងណាស់»។លោកបន្ដថា ក្នុងមួយថ្ងៃលោកចំណាយពេលបង្ហាត់ក្បាច់ប្រដាល់ដល់សិស្សចំនួនពីរវេន គឺព្រឹក 2ម៉ោង  និងល្ងាច 2ម៉ោង។

    តារាសិល្បៈរូបនេះបញ្ជាក់ថា ទោះជាលោកមិនទទួលបានថវិកាពីការបង្ហាត់ ហើយមានពេលខ្លះលោកថែមទាំងត្រូវចំណាយថវិកាផ្ទាល់ខ្លួនក្នុងការចាយវាយសម្រាប់សិស្សខ្លះក៏ដោយ  ប៉ុន្ដែក្លិបប្រដាល់នេះបានធ្វើឱ្យលោកសប្បាយចិត្ដជាខ្លាំង ព្រោះលោកបានបង្កើតធនធានកីឡាករជាច្រើនបញ្ចូលទៅក្នុងទីផ្សារក្បាច់គុនប្រដាល់។  អ្វីពិសេសជាងនេះគឺលោកអាចប្រើពេលបង្វឹកសិស្សជាពេលហាត់ប្រាណផ្ទាល់ខ្លួនផងដែរ។

    គួរបញ្ជាក់ថា អតីតអ្នកប្រដាល់រូបនេះបានក្លាយជាអ្នកសិល្បៈដែលទទួលបានភាពជោគជ័យរហូតមកដល់ថ្ងៃនេះ ដោយសារតែមានចំណុចល្អ2យ៉ាងគឺ  ទី1ការស្រឡាញ់ និងការតាំងចិត្ដ ទី2ការទទួលបានបទពិសោធក្នុងការងារសិល្បៈ និងដំបូន្មានល្អៗពីលោក BIG៕

  • ទូរស័ព្ទ Galaxy S8 Plus ចេញពណ៌ថ្មី តម្លៃក្បែរ 1ពាន់ដុល្លារ

    ទូរស័ព្ទ Galaxy S8 Plus ចេញពណ៌ថ្មី តម្លៃក្បែរ 1ពាន់ដុល្លារ

    តាមគេហទំព័រ Samsung បានឱ្យដឹងថា ខ្លួនកំពុងត្រៀមបង្ហាញស្មាតហ្វូនពណ៌ផ្កាឈូកស្រស់ (Rose Pink) មួយទៀតសម្រាប់ទូរស័ព្ទម៉ូដែល Galaxy S8 Plus នៅខែក្រោយនេះសម្រាប់ទីផ្សារកោះតៃវ៉ាន់ ក្នុងតម្លៃប្រមាណជា 920 ដុល្លារអាមេរិក។

    ពណ៌ថ្មីនេះនឹងមានលក់ក្នុងរយៈពេលកំណត់មួយ តែមិនបានបញ្ជាក់អំពីចំនួនដែល S8 Plus ពណ៌ថ្មីនេះនឹងត្រូវបញ្ចេញលក់លើទីផ្សារនោះទេ។ ក្នុងនោះ Samsung ក៏បានបន្ថែមពណ៌ថ្មីៗទៀតចំពោះម៉ូដែលទាំង 2 ដូចជាពណ៌ Ice Lake Blue, Smoked Purple Grey និង Quickstand Gold ក្នុងទីផ្សារដដែលនេះ។

    ដោយឡែកចំពោះលក្ខណសម្បត្តិរបស់ទូរស័ព្ទ Galaxy S8 Plus ពណ៌ផ្កាឈូកស្រស់នេះ គឺមិនមានអ្វីខុសប្លែកគ្នាពីទូរស័ព្ទពណ៌ផ្សេងដែល Samsung ធ្លាប់ដាក់លក់មកនោះទេ ពោលគឺនៅប្រើអេក្រង់ទំហំ 6.2 អ៊ីញកម្រិត Quad HD 2560×1440 ភិកសេល ជាអេក្រង់ពេញកោង បំពាក់បន្ទះឈីបប្រភេទ Exynos 8895 ប្រើឈីប Exynos 8895 octa-core, កាមេរ៉ាក្រោយទំហំ 12MP និងខាងមុខទំហំ 8MP កម្លាំងថ្ម 3500mAh និងដំណើរការដោយប្រព័ន្ធប្រតិបត្តិការ Android 7.0 ដដែល៕

  • Pacquiao ស្រេកឃ្លានសងសឹក Mayweather ក្រោយប៉ះ Horn ចុងសប្តាហ៍នេះ

    Pacquiao ស្រេកឃ្លានសងសឹក Mayweather ក្រោយប៉ះ Horn ចុងសប្តាហ៍នេះ

    គ្រូបង្វឹករបស់កីឡាករ Manny Pacquiao បានបញ្ជាក់ថា តារាប្រដាល់ដ៏ឆ្នើមរបស់ហ្វីលីពីនរូបនេះ កំពុងតែស្ថិតក្នុងស្ថានភាពត្រូវការឈ្នះជាដាច់ខាតនៅពេលរូបគេត្រូវការពារខ្សែក្រវាត់ពិភពលោករបស់គេជាមួយនឹងកីឡាករអូស្ត្រាលី Jeff Horn នៅចុងសប្តាហ៍នេះ ដើម្បីទទួលបានឱកាសក្នុងការប្រកួតសងសឹកជាមួយនឹងកីឡាករអាមេរិក Floyd Mayweather។ នៅមុនពេលការប្រកួតរវាង Pacquiao (ឈ្នះ 59លើក ចាញ់ 6លើក និងស្មើ 2លើក) និង Horn ដែលជាអតីតគ្រូបង្រៀន (ឈ្នះ 16លើក មិនដែលចាញ់ និងស្មើ1លើក) លោក Freddie Roach គ្រូបង្វឹករបស់ Pacquiao បានបញ្ជាក់ថា ការប្រកួតនាពេលខាងមុខនេះពិតជាសំខាន់ណាស់ ដោយសារតែវាអាចនឹងកំណត់ថា តើម្ចាស់ខ្សែក្រវាត់ពិភពលោក11សម័យកាលរូបនេះ នឹងទទួលបានឱកាសក្នុងការប្រកួតសងសឹកជាមួយនឹង Mayweather ឬយ៉ាងណា?។

    លោក Roach បានប្រាប់ទូរទស្សន៍ ESPN កាលពីថ្ងៃអង្គារថា៖ «Manny ស្ថិតក្នុងស្ថានភាពដែលត្រូវការឈ្នះជាដាច់ខាត។ រូបគេចង់បានការប្រកួតសងសឹកជាមួយនឹង Mayweather តែដើម្បីជួបជាមួយនឹង Mayweather អ្នកត្រូវតែធ្វើឲ្យបានល្អពេលប្រកួតជាមួយនឹងគូប្រកួតម្នាក់នេះជាមុនសិន ហើយអ្នកត្រូវតែផ្តល់នូវការប្រកួតមួយដ៏គួរឲ្យទាក់ទាញទៀតផង។ ប្រសិនបើរូបគេត្រដាបត្រដួសក្នុងការប្រកួតនេះ វាអាចនឹងបញ្ចប់ក្តីសុបិននោះទាំងស្រុង»។
    បើទោះបីជា Pacquiao ពិតជាស្រេកឃ្លានក្នុងការទទួលបានការប្រកួតសងសឹក ក្រោយពីចាញ់ក្នុងការប្រកួតដ៏ល្បីល្បាញដែលមានឈ្មោះថា ការប្រកួតប្រចាំសតវត្សរ៍ កាលពីខែឧសភា ឆ្នាំ2015 ក៏ដោយ ក៏រូបគេមិនអនុញ្ញាតឲ្យការរំពឹងទុកពីការបានប្រកួតសងសឹកនោះមករំខានដល់ការត្រៀមលក្ខណៈរបស់គេសម្រាប់ការប្រកួតនៅចុងសប្តាហ៍នេះឡើយ។ Pacquiao បានឲ្យដឹងថា៖ «ប្រសិនបើមានឱកាស ហេតុអ្វីបានមិនអាចទៅរួច? ខ្ញុំពិតជាចង់ប្រកួតសងសឹកណាស់។ ប៉ុន្តែខ្ញុំត្រូវផ្តោតទៅលើការប្រកួតមួយនេះជាមុនសិន។ យើងមិនអាចមើលស្រាលទៅលើ Horn ដោយគិតពីការប្រកួតផ្សេងបានឡើយ។ ការប្រកួតនេះមិនទាន់បានបញ្ចប់នៅឡើយទេ»។

    ការប្រកួតដណ្តើមខ្សែក្រវាត់ WBO ទម្ងន់66.9គីឡូក្រាមនេះ នឹងចាប់ផ្តើមនៅម៉ោង11:30 (ម៉ោងក្នុងស្រុក) នាថ្ងៃសៅរ៍នេះ នៅលើសង្វៀន Suncorp Stadium ប្រទេសអូស្ត្រាលី៕
    ប្រភពពី៖ ESPN

  • កសិកម្ម ជាមុខវិជ្ជាសំខាន់មួយដែលគួរជំរុញនៅកម្ពុជា

    កសិកម្ម ជាមុខវិជ្ជាសំខាន់មួយដែលគួរជំរុញនៅកម្ពុជា

    កម្ពុជា ជាប្រទេសដែលមានប្រជាជនភាគច្រើនប្រកបរបរកសិកម្ម តែពេលកន្លងមកមុខរបរមួយនេះបែរជាមិនសូវសម្បូរអ្នកជំនាញទៅវិញ ដោយសារតែនិស្សិតនៅកម្ពុជាមិនសូវជ្រើសរើសយកមុខវិជ្ជាកសិកម្មធ្វើជាអាជីពប្រចាំជីវិតឡើយ។

    ថ្មីៗនេះដោយសារតែកង្វះអ្នកជំនាញផ្នែកកសិកម្ម បានធ្វើឱ្យកសិផលនៅកម្ពុជាមិនអាចឆ្លើយតបទៅនឹងតម្រូវការទីផ្សារបាន ដែលបណ្តាលឱ្យផលិតផលកសិកម្មជាច្រើនត្រូវហូរចូលពីបរទេសមកកាន់ទីផ្សារនានានៅក្នុងប្រទេស។ ដើម្បីឆ្លើយតបជាមួយនឹងបញ្ហាទាំងអស់នេះ មានពាណិជ្ជករមួយចំនួនចាប់ផ្តើមមើលឃើញពីសក្តានុពលនៃវិស័យកសិកម្ម ហើយបានចាប់ផ្តើមងាកមកធ្វើការវិនិយោគលើការដាំបន្លែ និងចិញ្ចឹមសត្វក្នុងស្រុកដើម្បីផ្គត់ផ្គង់ទៅកាន់ផ្សារទំនើបនានាដែលធ្វើឱ្យពួកគេទទួលបានប្រាក់ចំណេញយ៉ាងច្រើនជាមួយនឹងឱកាសការងារសម្រាប់ប្រជាជនខ្មែរជាច្រើនរូបផ្សេងទៀតផង។

    ពាក់ព័ន្ធនឹងបញ្ហានេះ ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានថ្លែងនៅក្នុងសិក្ខាសាលាពិគ្រោះយោបល់លើសេចក្តីព្រាងកម្មវិធីសិក្សាថ្នាក់បរិញ្ញាបត្រ និងបរិញ្ញាបត្ររងរបស់វិទ្យាស្ថានបច្ចេកវិទ្យាកំពង់ស្ពឺថា ប្រទេសកម្ពុជាកំពុងខ្វះខាតអ្នកជំនាញ និងកម្លាំងពលកម្មលើវិស័យកសិកម្ម តែសម្បូរផ្នែកសេវាកម្ម ដែលធ្វើឱ្យធនធានមនុស្សលើវិស័យកសិកម្មរបស់យើងមិនអាចឆ្លើយតបបានជាមួយតម្រូវការការងារផ្នែកវិទ្យាសាស្រ្តកសិកម្មនៅក្នុងស្រុក។

    ឯកឧត្តមរដ្ឋមន្ត្រីក៏បានជំរុញផងដែរឱ្យគ្រឹះស្ថានសិក្សាទាំងអស់ គួរពង្រីកការបណ្តុះបណ្តាលជំនាញកសិកម្ម និងបច្ចេកវិទ្យាដល់និស្សិតរបស់ខ្លួនដើម្បីបំពេញតម្រូវការក្នុងស្រុក ក៏ដូចជាការអភិវឌ្ឍលទ្ធភាពផ្នែកកសិកម្ម និងកសិឧស្សាហកម្មនៅក្នុងប្រទេសដើម្បីទាក់ទាញការវិនិយោគបន្ថែមទៀតផងដែរ៕

  • អង់គ្លេស ចាញ់អាល្លឺម៉ង់ដោយប៉េណាល់ទី ខណៈអេស្ប៉ាញបំបាក់អ៊ីតាលីយ៉ាងចាស់ដៃ

    អង់គ្លេស ចាញ់អាល្លឺម៉ង់ដោយប៉េណាល់ទី ខណៈអេស្ប៉ាញបំបាក់អ៊ីតាលីយ៉ាងចាស់ដៃ

    ការខកចិត្តស្រដៀងគ្នាមួយបានកើតឡើងម្តងទៀត ខណៈដែលក្រុមបាល់ទាត់ជម្រើសជាតិអង់គ្លេសអាយុក្រោម 21ឆ្នាំ បានធ្លាក់ចេញពីយុទ្ធនាការ European U21 Championship វគ្គពាក់កណ្តាល់ផ្តាច់ព្រ័ត្រកាលពីថ្ងៃអង្គារម្សិលមិញ ក្រោមស្នាដៃក្រុមជម្រើសជាតិអាល្លឺម៉ង់ ក្រោយពីចាញ់ដោយការស៊ុតបាល់ប៉េណាល់ទីក្នុងលទ្ធផល 4-3។

    ក្រោយពីការប្រកួតដ៏ស្វិតស្វាញ និងរំភើបបានបញ្ចប់ក្នុងលទ្ធផលស្មើ 2-2 ដែលអាល្លឺម៉ង់បានបង្កើតឲ្យមានឱកាសស៊ុតបញ្ចូលទីជាច្រើននោះ ក្រុមជម្រើសជាតិអង់គ្លេសដែលធ្លាប់ជួបការខកចិត្តក្នុងព្រឹត្តិការណ៍ World Cup ឆ្នាំ1990 និង Euro ឆ្នាំ1996 ក្រោមស្នាដៃអាល្លឺម៉ង់រួចមកហើយនោះ បានជួបនូវការខកចិត្តម្តងទៀតក្នុងការស៊ុតបាល់ប៉េណាល់កាត់សេចក្តី។ កីឡាករ Nathan Redmond និង Tammy Abraham សុទ្ធសឹងបានស៊ុតបាល់មិនចូលទី ខណៈដែលអ្នកចាំទី Julian Pollersbeck បានសង្គ្រោះបាល់យ៉ាងងាយស្រួលពីការស៊ុតស្រាលៗរបស់ក្រុមអង់គ្លេស ដើម្បីជួយឲ្យក្រុមជម្រើសជាតិអាល្លឺម៉ង់របស់ខ្លួនឈានទៅប្រកួតវគ្គផ្តាច់ព្រ័ត្រនៃព្រឹត្តិការណ៍ Euro Under-21។

    អាល្លឺម៉ង់ បានធ្វើការគ្រប់គ្រងស្ទើរតែទាំងស្រុង ខណៈដែលអង់គ្លេសបានផ្តោតតែលើតំបន់ការពារក្រោយពីរកបានគ្រាប់បាល់បញ្ចូលទីរបស់ពួកគេរួច។ ក្រុមអង់គ្លេសរបស់លោក Aidy Boothroyd មានឱកាសគ្រប់គ្រងបាល់ត្រឹមតែ 13លើកប៉ុណ្ណោះ ហើយអាល្លឺម៉ង់មានឱកាសស៊ុតបាល់សំដៅទីដល់ទៅ 38លើក។ លោក Boothroyd គ្រូបង្វឹករបស់ក្រុមយុវជនអង់គ្លេសអាយុក្រោម 21ឆ្នាំ បានឲ្យដឹងថា៖ «យើងពិតជាខកចិត្តខ្លាំងណាស់។
    វាពិតជារឿងដ៏គួរឲ្យសោកស្តាយមួយចំពោះការចាញ់ដោយការស៊ុតបាល់ប៉េណាល់ទី ក្រោយពីមានភាពប្រកៀកប្រកិតគ្នាបែបនេះ។ យើងបានខិតខំព្យាយាមយ៉ាងខ្លាំងមុននឹងឈានមកកាន់យុទ្ធនាការនេះ ហើយកីឡាករជាច្រើនបានប្រឹងអស់ពីសមត្ថភាពរបស់ពួកគេ»។

    ស្របពេលជាមួយគ្នានេះដែរ រវាងអេស្ប៉ាញ និងអ៊ីតាលី ខ្សែបម្រើ Saul Niguez របស់ក្លិប Atletico Madrid បានស៊ុតបាល់បញ្ចូលទី3គ្រាប់ ខណៈដែលក្រុមជម្រើសជាតិអេស្ប៉ាញអាយុក្រោម21ឆ្នាំ បានផ្តួលក្រុមជម្រើសជាតិអ៊ីតាលីយ៉ាងចាស់ដៃក្នុងលទ្ធផល 3-1 ក្នុងការប្រកួតគូទី2នៃវគ្គពាក់កណ្តាលផ្តាច់ព្រ័ត្រ កាលពីថ្ងៃអង្គារកន្លងមកនេះដែរ។
    ហេតុនេះធ្វើឱ្យអាល្លឺម៉ង់នឹងត្រូវប៉ះជាមួយក្រុមជម្រើសជាតិអេស្ប៉ាញក្នុងវគ្គផ្តាច់ព្រ័ត្រក្នុងទីក្រុង Krakow ប្រទេសប៉ូឡូញនៅថ្ងៃសុក្រខាងមុខនេះ៕

    ប្រភពព័ត៌មាន៖ The Sun

     

  • ចំណុច​ហាម​ធ្វើ​នៅពេល​កើតមុន​

    ចំណុច​ហាម​ធ្វើ​នៅពេល​កើតមុន​

    មុន នរណាៗក៏​មិន​ចង់​កើត​ដែរ យើង​នាំគ្នា​រិះរក​វិធី​គ្រប់យ៉ាង​មក​ថែទាំ​ស្បែក ដើម្បី​កុំឱ្យ​កើតមុន តែបើ​កើតមុន​ឡើង​ហើយ​នោះ​ប្រហែលជា​កែកុន​អី​មិនបាន​ច្រើន​ប៉ុន្មានទេ មានតែ​ប្រញាប់​ព្យាបាល​ឱ្យ​វា​ឆាប់​បាត់​ពីលើ​ផ្ទៃមុខ​របស់​អ្នក​ឱ្យបាន​លឿន​បំផុត​ប៉ុណ្ណោះ។ ថ្ងៃនេះ ឡា​រ៉ែ​ន មាន​ដំបូន្មានល្អៗក្នុងការ​ព្យាបាល​មុន​មក​ជម្រាបជូន​មិត្តអ្នកអាន​ក្នុង​ប្រធានបទ “រឿង 6យ៉ាង​ដែល​អ្នក​មិនគួរ​ធ្វើជា​ដាច់ខាត​ពេល​កើតមុន” ដើម្បី​ជួយ​ឱ្យ​មុន​ឆាប់​បាត់​ទៅវិញ ព្រោះ​មាន​ទង្វើ​ខ្លះ អ្នក​គិតថា​ជាការ​ព្យាបាល​មុន តែ​បែរជា​ហុច​ផលប៉ះពាល់​ដល់​រាងកាយ​របស់​អ្នក​ទៅវិញ​ក៏មានដែរ។

    1. ជក់បារី

    ក្រៅពី​នាំឱ្យ​កើត​មហារីក​សួត រោគ​បេះដូង និង​ធ្វើឱ្យ​ស្បែក​ឆាប់​ចាស់​ជ្រីវជ្រួញ​ហើយ​នោះ ការជក់បារី​នៅ​ធ្វើឱ្យ​សរសៃឈាមតូចៗនៅក្រោម​ស្បែក​បង្រួញ​ខ្លួន ធ្វើឱ្យ​អុក​ស៊ី​ហ្សែ​៊​ន​ដែលមាន​តួនាទី​ចិញ្ចឹម​កោសិកា​ស្បែក​ដែល​ត្រូវ​ដឹកជញ្ជូន​តាម​សរសៃឈាមតូចៗទាំងនោះ​ត្រូវ​ថយចុះ​ធ្វើឱ្យ​ស្បែក​របស់​អ្នកទទួល​នូវ​សារធាតុ​អាហារ​មិន​គ្រប់គ្រាន់ ជាហេតុ​ធ្វើឱ្យ​ស្បែក​ឡើង​ស្រអាប់​ខ្មៅ ឆាប់​ចាស់​ជ្រីវជ្រួញ​យារ នាំឱ្យ​មុន​មិន​ងាយ​ជា​បាត់​ទៅវិញ​នោះទេ គឺ​ពិតជា​អាក្រក់​ខ្លាំងណាស់។

    2. ប្រើ​ថ្នាំ​ដែលមាន​ចំណែក​ផ្សំ​របស់ ស្ទៀ​រ៉​យ​ដ៍ (Steroid)

    ក្នុងអំឡុង​ពេលដែល​កើតមុន​អ្នក​គួរ​ឈប់​ប្រើ​ថ្នាំលាប​ទាំងឡាយណា​ដែលមាន​ចំណែក​ផ្សំ​របស់​សារធាតុ​ស្ទៀ​រ៉​យ​ដ៍​ព្រោះ​អាច​នឹង​ធ្វើឱ្យ​ការកើត​មុន​របស់​អ្នក​រឹតតែ​យ៉ាប់យ៉ឺន និង​អូស​បន្លាយពេល​កាន់តែ​យូរ​ឡើង។ ទោះជា​ថ្នាំ​ដែលមាន​សារធាតុ ស្ទៀ​រ៉​យ​ដ៍ ធ្វើឱ្យ​មុន​ដែល​កំពុង​ក្លាយ​ឆាប់​ជា​ល្អ​ក៏ពិតមែន តែ​ការពិត​វិញ វា​មិនបាន​កែប​ញ្ហា​ដើមហេតុ​នៃ​ការ​កើតមុន​នោះទេ ដូច្នេះ​មុន​ដែលមាន​នៅលើ​ផ្ទៃមុខ​របស់​អ្នកនឹង​កើតឡើង​ទៀត​ជា​បន្តបន្ទាប់ ហើយ​សភាព​ស្បែក​ដែល​បាន​ប្រើ​សារធាតុ ស្ទៀ​រ៉​យ​ដ៍ ច្រើនដង​ហើយ​នោះ នឹង​រឹតតែ​យ៉ាប់យ៉ឺន​ឡើងជា​បន្តបន្ទាប់។

    3. ទទួលទាន​ថ្នាំ​សម្លាប់​មេរោគ

    ការទទួល​ទាន​ថ្នាំ​សម្លាប់​មេរោគ​ជាប្រចាំ ដើម្បី​ព្យាបាល​អាការ​កើតមុន មិនមែនជា​មធ្យោបាយ​ដែល​ល្អ​នោះទេ ព្រោះ​វា​នឹង​ហុច​ផល​មិនល្អ​ដល់​ស្បែក និង​សភា​ពនៃ​ការកើត​មុន​នៅលើ​ផ្ទៃមុខ​របស់​អ្នក​ឱ្យមាន​រយ:ពេល​កាន់តែ​យូរ ហើយ​ថែមទាំង​បំផ្លាញ​ប្រព័ន្ធ​ផ្នែក​ខាង ក្នុងនៃ​រាងកាយ​របស់​អ្នក​ថែម​ទៀតផង។  ដោយសារតែ​ថ្នាំ​សម្លាប់​មេរោគ​ខ្លះ​ដូចជា តេ​ត្រា​ស៊ី​ឃ្លី​ន (Tetracycline) មិនអាច​ញែក​មេរោគ​ដែល​ល្អ ឬ​អាក្រក់​ចេញពី​គ្នា​បាន​នោះទេ ដូច្នេះ​ធ្វើឱ្យ​បាក់តេរី​ដែល​ល្អ​ក៏ត្រូវ​បំផ្លាញ​អស់​ដែរ រួមទាំង​បាក់តេរី​ដែលមាន​នៅក្នុង​ប្រព័ន្ធ​រំលាយ​អាហារ​ក៏ត្រូវ​កម្ចាត់​ចោល​ដែរ ធ្វើឱ្យ​ផ្សិត និង​ប៉ារ៉ាស៊ីត​ដែល​បង្កប់​នៅក្នុងរាងកាយ​ចេញមក​រុក​គួ​ន​ប្រព័ន្ធ​ការងារ​ផ្ទៃក្នុង ជាពិសេស​ប្រព័ន្ធ​សំខាន់​មួយ​គឺ ថ្លើម ដែលមាន​តួនាទី​ទទួលខុសត្រូវ​ក្នុង​កម្មវិធី​ព្យាបាល​ខ្លួនឯង​របស់​កោសិកា​ស្បែក​ទៀតផង។

    4. កោរ​រោម​លើ​ផ្ទៃមុខ ដោយ​កាំបិត​កោរ​ដែលមាន​ផ្លែ​ច្រើន​ជាន់

    កាំបិត​កោរ​ប្រភេទ​មាន​ផ្លែ​ច្រើន​ជាន់ (3-4ជាន់) មានគុណ​សម្បត្តិ​ល្អ គឺ​កោរ​បាន​រលីង​ស្អាត តែ​វា​ក្លាយជា​គុណវិបត្តិ​ចំពោះ​ស្បែក​ដែល​កើតមុន​ទៅវិញ ជាពិសេស​មុន​ដែល​កំពុង​ទុំ ឬ​ជិត​ក្លាយ ព្រោះ​វា​នឹង​កកិត​លើ​ស្បែក​ធ្វើឱ្យ​ស្បែក​មុខ​កាន់តែ​ឡើង​ក្រហម ឬ​ក្លាយជា​ដំបៅ​តែម្តង។ បើ​ត្រូវការ​កោរ​រោម​មុខ​ក្នុងអំឡុងពេល​កើតមុន​នោះ ចូរ​ជ្រើសរើស​ប្រើ​កាំបិត​កោរ​ដែលមាន​ផ្លែ​តែមួយ​ជាការ​ប្រសើរ​បំផុត។

    5. ច្របាច់ កេះ អេះ និង​ញេច

    មិន​ថា​យ៉ាងណាក៏ដោយ ក៏​មិនត្រូវ​ច្របាច់ កេះ អេះ ញេច ឬ​ប៉ះពាល់​កន្លែង​ដែល​កើតមុន​ជាដាច់ខាត ទោះជា​អ្នកមាន​អារម្មណ៍​ថា វា​គួរឱ្យ​ចង់​ញេច ឬ​ញេច​ហើយ​ប្រហែលជា​ឆាប់​ជា​យ៉ាងណាក៏ដោយ ព្រោះ​វា​អាច​ប្រថុយ​នឹង​ការធ្វើឱ្យ​ស្បែក​នៅ​ម្តុំ​នោះ​រលាក​ក្លាយ​រឹតតែ​ធំ​ឡើងនិង​ស៊ី​ជ្រៅ​ទៅក្នុង​សាច់​មុខ​ថែម​ទៀតផង។ វិធី​ដែល​ល្អ​គឺ​ទុក​ដៃ​នៅ​ឱ្យ​ស្ងៀម ហើយ​ទុកឱ្យ​គ្រូពេទ្យ​ព្យាបាល​មុន​ឱ្យ​វិញ​ទើប​ប្រសើរ​ជាង។

    6. ទទួលទាន​វីតាមីន A ច្រើន​ជ្រុល​ពេក

    វីតាមីន A ពី​ប្រភព​ធម្មជាតិ​ដូចជា នៅក្នុង​បន្លែ​ផ្លែឈើផ្សេងៗនោះ មាន​ចំណែក​ជួយ​ក្នុង​កម្មវិធី​ព្យាបាល​ខ្លួនឯង​របស់​ស្បែក​បាន​យ៉ាង​ល្អប្រសើរ តែបើ​វីតាមីន A តាមរយ:ការទទួល​ទាន​អាហារ​បំប៉ន ដែល​ទទួលទាន​ត្រឹម​តែមួយ​គ្រាប់​ក៏​ផ្តល់នូវ​បរិមាណ​វីតាមីន A ដ៏​ច្រើន​នោះ បែរជា​ទៅ​បំផ្លាញ​ប្រព័ន្ធ​ធ្វើ​ការងារ​របស់​ថ្លើម និង​ហុចផលប៉ះពាល់​ដល់​សុខភាព​ទៅវិញ ដូច្នេះ​ទោះជា​ដឹងថា វីតាមីន A ល្អ​ចំពោះ​ស្បែក​ក៏ដោយ ក៏​មិនចាំបាច់​ត្រូវ​សង្កត់ធ្ងន់​ទៅលើ​ការ​ទទួលទាន​ថ្នាំ​វីតាមីន A បំប៉ន​នៅក្នុង​អំឡុងពេល​កើតមុន​នោះដែរ។

    នាំគ្នា​ព្យាបាល​មុន​យ៉ាង​ត្រឹមត្រូវ​តាម​វិធីសាស្ត្រ​ដ៏​ល្អ ដោយ​ការ​នឹក​ដល់​ចំណុច​ហាមឃាត់​ទាំង 6យ៉ាង​ខាងលើនេះ​ជាប់​ជានិច្ច នឹងធ្វើ​ឱ្យ​មុន​ឆាប់​ជា  ហើយ​ស្បែក​មុខ​របស់​អ្នក​ក៏​ស្រស់ស្អាត​បានយូរ​ថែម​ទៀតផង៕

  • ហេតុអ្វី​បាន​ត្រី​ងាប់​ត្រូវ​អណ្តែត​ផ្ងារពោះ​ឡើងលើ?​

    ហេតុអ្វី​បាន​ត្រី​ងាប់​ត្រូវ​អណ្តែត​ផ្ងារពោះ​ឡើងលើ?​

    សម្រាប់​មនុស្ស​មួយចំនួន​ប្រហែលជា​ចាប់អារម្មណ៍ និង​មួយចំនួនទៀត​មិន​ចាប់អារម្មណ៍​នោះទេ ទៅលើ​មូលហេតុ​ដែលនាំឱ្យ​ត្រី​នៅពេល​ងាប់​អណ្ដែត​ផ្ងារពោះ​ឡើងលើ។

    យោងតាម​ការបកស្រាយ​របស់​អ្នក​អ្នកវិទ្យាសាស្ត្រ​បាន​ឲ្យ​ដឹងថា ដោយសារ​រូបរាង​របស់​ត្រី​មាន​សាច់​ក្រាស់​នៅ​ផ្នែក​ខាងលើ និង​ផ្នែក​ខាងក្រោម​ជា​សាច់​ស្តើង ហើយ​ខាងក្នុង​គឺ​ប្រអប់​ពោះ ពេល​ត្រី​ងាប់​ទៅ អវយវៈ​ផ្ទៃក្នុង​ស្អុយរលួយ ហើយ​បញ្ចេញ​ជា​ហ្គាស​ចេញមក​ពេញ​ណែន​នៅក្នុង​ពោះ ទើប​ធ្វើឱ្យ​ខ្លួន​ត្រី​ក្រឡាប់​មក​អណ្តែត​ផ្ងារពោះ​ហ្នឹងឯង៕

  • Apple Watch ក្ដាប់បាន 53% នៃទីផ្សារសកល

    Apple Watch ក្ដាប់បាន 53% នៃទីផ្សារសកល

    ទោះបីជាក្រុមហ៊ុន Apple មិនទាន់បានបញ្ចេញនាឡិកាឆ្លាតវៃជំនាន់ថ្មីបន្ថែមទៀតក៏ដោយ ប៉ុន្តែនាឡិកាជំនាន់មុនរបស់ក្រុមហ៊ុនមួយនេះត្រូវបានគេបង្ហាញថា បានក្ដាប់ចំណែកទីផ្សារសកលបាន 53% ហើយកាលពីត្រីមាសទី 1 ក្នុងឆ្នាំ2017 នេះ។

    តាមរយៈទិន្នន័យអំពីចំណែកទីផ្សារសរុបនៃបណ្ដានាឡិកាឆ្លាតវៃ (Smartwatch) មកពីក្រុមហ៊ុនបច្ចេកវិទ្យាធំៗលើពិភពលោកដែលចេញផ្សាយដោយបណ្ដាញព័ត៌មាន CNBC បានឱ្យដឹងថា តួលេខនៃចំណែកទីផ្សារក្នុងត្រីមាសទី 1 នៅទូទាំងពិភពលោកគឺ នាឡិកា Samsung Gear S3 ឈរនៅលេខរៀងទី 2 ដោយបានផ្តូលក្រុមហ៊ុន Fitbit ហើយបានជំរុញឱ្យក្រុមហ៊ុនបច្ចេកវិទ្យារបស់កូរ៉េខាងត្បូងដ៏ធំមួយនេះទទួលបានចំណែកទីផ្សារ 12.8% ខណៈដែលផលិតផលតាមដានសុខភាព Fitness bands មកពីក្រុមហ៊ុន Fitbit ទទួលបានចំណែកទីផ្សារតិចជាងតែបន្តិចបន្តួចប៉ុណ្ណោះគឺ 12.2%។

    ដោយឡែកនាឡិកា Apple Watch បានគ្រងតំណែងជើងឯកជាមួយនឹងចំណែកទីផ្សារខ្ពស់ជាងគេរហូតដល់ទៅ 53% នៃទីផ្សារនាឡិកាឆ្លាតវៃពិភពលោក។ ចំណែកទីផ្សារដ៏ច្រើនលើសលុបមួយនេះ គឺដោយសារតែ Apple Watch មានរូបរាងស្អាតដ៏គួរឱ្យទាក់ទាញ និងពិសេសគឺវៃឆ្លាតដែលសម្រួលទៅដល់ការរស់នៅប្រចាំថ្ងៃរបស់មនុស្សទូទៅហ្នឹងឯង៕