Category: សង្គម និងសេដ្ឋកិច្ច

«វប្បធម៌រលត់ ជាតិរលាយ វប្បធម៌ពណ្ណរាយ ជាតិថ្កើងថ្កាន» ជាឃ្លាដែលបុព្វបុរសខ្មែរយើង ចង់បង្ហាញពីតម្លៃរបស់វប្បធម៌ដែលមានតម្លៃមិនអាចកាត់ថ្លៃបានសម្រាប់សង្គមជាតិ។ ជាស្ថានភាពជាក់ស្តែងគេសង្កេតឃើញថា យុវជនកម្ពុជានាពេលបច្ចុប្បន្ននេះ ចាប់ផ្តើមមានការចាប់អារម្មណ៍លើស្ថានការណ៍នានាដែលពាក់ព័ន្ធនឹងបញ្ហាវប្បធម៌ហើយ តែសកម្មភាពទាំងអស់នោះហាក់មានភាពសកម្មបានតែក្នុងរយៈពេលខ្លីប៉ុណ្ណោះ។

ទីប្រឹក្សាក្រសួងវប្បធម៌ និងវិចិត្រសិល្បៈ និងជាសាស្រ្តាចារ្យ ឯកឧត្តម ព្រឿង ឈៀង បានលើកឡើងនៅក្នុងការជជែកពិភាក្សារបស់កម្មវិធី The Perspectives Cambodia ថា វប្បធម៌ពិតជាមានតម្លៃខ្លាំងណាស់សម្រាប់សង្គមមួយ ឬអាចនិយាយបានថា វប្បធម៌ជាព្រលឹងនៃជាតិសាសន៍មួយដែលប្រជាជនគ្រប់រូប ជាពិសេសយុវជនត្រូវព្យាយាមស្វែងយល់ឱ្យច្បាស់។ មានយុវជនមួយចំនួនធំមិនទាន់ស្គាល់ច្បាស់ពីគ្រឹះនៃវប្បធម៌ខ្លួនឯងនៅឡើយទេ។ ពួកគេមិនទាន់ស្គាល់ពីប្រវត្តិ លក្ខណៈពិសេស និងចំណុចលម្អិតនៃទម្រង់សិល្បៈ ក៏ដូចជាផ្នែកសំខាន់ផ្សេងៗទៀតនៃវប្បធម៌ខ្មែរនៅឡើយទេ ដែលជាហេតុធ្វើឱ្យពួកគេធ្វើសកម្មភាពដើម្បីវប្បធម៌តែក្នុងរយៈពេលខ្លីប៉ុណ្ណោះ។

ឯកឧត្តម ព្រឿង ឈៀង បានមានប្រសាសន៍ថា៖ «យុវជនបច្ចុប្បន្នគួរព្យាយាមស្វែងយល់ពីគ្រឹះនៃវប្បធម៌របស់ជាតិខ្លួនជាមុនសិន មុននឹងធ្វើការអភិវឌ្ឍមរតកវប្បធម៌ និងធ្វើសកម្មភាពវប្បធម៌នានាដើម្បីសង្គមរបស់យើង»។

ព្រឹទ្ធាចារ្យផ្នែកវប្បធម៌ខាងលើបានលើកឡើងផងដែរថា យើងត្រូវស្គាល់ខ្លួនឯងឱ្យច្បាស់ ហើយធ្វើការគាំទ្រវប្បធម៌ជាតិខ្លួនឯងឱ្យបានខ្ជាប់ខ្ជួន ជាជាងការផ្អើលតាមស្ថានការណ៍ដែលកើតមានឡើង ដូចជាការឃើញបណ្តាប្រទេសនានាដាក់ទម្រង់សិល្បៈដែលស្រដៀងខ្មែរចូលក្នុងបេតិកភណ្ឌពិភពលោក យើងមានការភ្ញាក់ផ្អើលតាម តែយើងមិនព្រមស្វែងយល់ពីចំណុចលម្អិតនៃទម្រង់សិល្បៈខ្លួនឯង និងមិនសូវគាំទ្រ៕

ភ្នំពេញៈ ក្រសួងចំនួន3 និងដៃគូអភិវឌ្ឍន៍នានានឹងជួបប្រជុំគ្នាជាលើកដំបូង ដើម្បីពិនិត្យមើលបញ្ហាប្រឈម និងរៀបចំផែនការយុទ្ធសាស្រ្តថ្មីសម្រាប់អភិវឌ្ឈវិស័យកសិកម្ម ខណៈកម្លាំងពលកម្មក្នុងវិស័យនេះបានធ្លាក់ចុះ និងរឿងតម្លៃកំពុងចោទជាបញ្ហា។

រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទលោក វេង សាខុន បានថ្លែងឲ្យដឹងតាមទូរស័ព្ទនាព្រឹកថ្ងៃទី30 មិថុនានេះថា ក្រសួងសេដ្ឋកិច្ច និងហិរញ្ញវត្ថុ ក្រសួងកសិកម្ម និងក្រសួងពាណិជ្ជកម្មព្រមទាំងដៃគូអភិវឌ្ឍន៍នឹងជួបប្រជុំគ្នា ដើម្បីប្រមើលមើលយុទ្ធសាស្រ្តថ្មី ដើម្បីអភិវឌ្ឍវិស័យកសិកម្ម។ កិច្ចប្រជុំនេះធ្វើឡើងក្រោមប្រធានបទ គន្លងថ្មីនៃកំណើនកសិកម្មនៅប្រទេសកម្ពុជា។ ឯកឧត្តមបន្តថា កិច្ចប្រជុំនេះនឹងផ្តោតលើផែនការអភិវឌ្ឍន៍វិស័យកសិកម្មរយៈពេលវែង យុទ្ធសាស្រ្ត និងការរៀបចំផែនការថវិកាយ៉ាងដូចម្តេចដើម្បីជួយវិស័យនេះ។ កិច្ចប្រជុំដ៏មានសារៈសំខាន់នេះនឹងធ្វើឡើងនៅថ្ងៃទី4 ខែកក្កដាខាងមុខនេះ នៅទីស្តីការក្រសួងសេដ្ឋកិច្ច និងហិរញ្ញវត្ថុ។

លោករដ្ឋមន្រ្តីបានបន្តថា ដើម្បីអភិវឌ្ឍវិស័យនេះ តើយើងគួរបញ្ចូលបច្ចេកវិទ្យាបែបណាដើម្បីជួយកសិករ ដោយសារកម្លាំងពលកម្មក្នុងវិស័យនេះបានថយចុះមកក្នុងរង្វង់ 40ភាគរយនៅឆ្នាំ2017 ហើយនឹងថយមកនៅត្រឹម 29ភាគរយក្នុងឆ្នាំ2030។ នេះជាបញ្ហាប្រឈម គឺកម្លាំងពលកម្មធ្លាក់ចុះ តែយើងត្រូវធ្វើយ៉ាងណាឲ្យចំណូលមានការកើនឡើង ហេតុនេះយើងត្រូវបញ្ចូលបច្ចេកវិទ្យាក្នុងវិស័យនេះ និងចូលរួមជាមួយភាគីពាក់ព័ន្ធទាំងអស់ ព្រមទាំងពិនិត្យមើលបញ្ហាមួយចំនួន ដូចជាកសិករមានដីតិច ធ្វើយ៉ាងណាឲ្យគាត់អាចរស់បាន បង្កើតកសិដ្ឋានដើម្បីកំណើនវិស័យនេះ និងជំរុញការនាំចេញ ភាពប្រទាក់ក្រឡារវាងវិស័យឯកជន ដើម្បីបង្កើនទិន្នផល និងអាចនាំចេញបាន។

សេដ្ឋវិទូកម្ពុជាលោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា ការអភិវឌ្ឍវិស័យកសិកម្ម យើងត្រូវតែវិភាគ និងគិតពិចារណាឲ្យមានភាពស៊ីជម្រៅថា ត្រូវធ្វើបែបណាទើបអាចអភិវឌ្ឍវិស័យនេះបាន ប៉ុន្តែវិស័យនេះមានភាពចម្រុះដែលមានទាំងបច្ចេកវិទ្យា ការដឹកជញ្ជូន ទីផ្សារ និងបញ្ហាដទៃទៀតដែលទាមទារឱ្យភាគីពាក់ព័ន្ធចូលរួមដោះស្រាយ។

លោកបណ្ឌិតបានបន្តថា “អ្វីដែលត្រូវធ្វើ គឺពិនិត្យ និងអនុវត្តជាក់ស្តែង ដើម្បីឲ្យចេញជាលទ្ធផល ហេតុនេះការចូលរួមពីភាគីពាក់ព័ន្ធមានសារៈសំខាន់ណាស់ ដើម្បីអភិវឌ្ឍវិស័យនេះប្រកបដោយនិរន្តរភាព”។ លោកបន្តថា “អ្វីដែលត្រូវធ្វើមិនមែនតែក្រសួងកសិកម្មមួយទេ តែត្រូវការវិស័យជាច្រើនចូលរួម ហើយបញ្ហាកសិកម្មគឺយើងខ្វះបច្ចេកវិទ្យា ខ្វះទីផ្សារ ហេតុនេះការអភិវឌ្ឍវិស័យនេះសំខាន់ណាស់ ដើម្បីទប់ស្កាត់ការចំណាកស្រុកទៅក្រៅប្រទេស និងលំហូរប្រជាជនចូលទីក្រុង”៕

ទស្សនិកជនប្រាកដជានៅចាំតួឯកស្រីក្នុងរឿង «សង្រ្គាមបេះដូង» គឺកញ្ញា ឡាយ សម្ផស្ស ដែល សម្ដែងជាតួស្រីកម្សត់ ព្រោះតែត្រូវបានឪពុកម្ដាយបង្ខំឱ្យនាងរៀបការជាមួយបុរសម្នាក់ដែលខ្លួនមិនស្រឡាញ់ បណ្ដាលឱ្យជីវិតអាពាហ៍ពិពាហ៍គ្មានសេចក្ដីសុខ។ តាមរយៈរឿងនេះក៏មានការលើកឡើង ថា ដោយសារនាងមិនយកតម្លៃខ្លួនក្នុងការសម្ដែង ទើបផលិតកម្មសម្រេចជ្រើសយកនាងធ្វើជាតួឯកស្រី។

ជាមួយឱកាសម្ដែងជាតួឯកស្រីនៅក្នុងរឿង «សង្រ្គាមបេះដូង» នេះ ត្រូវបានកញ្ញា ឡាយ សម្ផស្ស បញ្ជាក់ប្រាប់ថា វាមិនដូចអ្វីដែលគេបានលើកឡើងនោះទេ នាងចាត់ទុកថាការនិយាយបែបនេះ ជាការបង្ហាញអារម្មណ៍មិនសប្បាយចិត្ដចំពោះភាពរីកចម្រើនរបស់នាងតែប៉ុណ្ណោះ។ នាងបន្ដថា មុនពេលដែលនាងជាប់តំណែងជាតួឯកស្រីនេះ គឺត្រូវឆ្លងកាត់ការធ្វើតេស្ដជាមួយក្រុមការងារផលិតកម្ម ខ្មែរមេគង្គ ចំនួនបីដងឯណោះ។ ឡាយ សម្ផស្ស បញ្ជាក់ថា៖ «ចាប់តាំងពីខ្ញុំចូលប្រឡូកសិល្បៈរយៈពេលជិត 5ឆ្នាំមក ទើបតែលើកទីមួយហើយ ដែលផលិតកម្មខ្មែរមេគង្គហ៊ានឱ្យតម្លៃខ្លួននៃការសម្ដែងខ្ពស់ជាងគេ។ ដូច្នេះខ្ញុំមិនដល់ថ្នាក់ថា ដើម្បីបានតំណែងតួឯក សុខចិត្ដថតអត់យកលុយនោះទេ ព្រោះតួឯក ឬតួរងវាមិនជាបញ្ហាចោទសម្រាប់ខ្ញុំឡើយ »។

ទោះជាតំណែងតួឯកនៅក្នុងរឿង «សង្គ្រាមបេះដូង» របស់កញ្ញាឡាយ សម្ផស្ស ទទួលរងការរិះគន់ក៏ដោយ ក៏ត្រូវបាននាងប្រាប់ថា រឿងនេះបានជួយជំរុញឱ្យនាងមានប្រជាប្រិយភាពកាន់តែខ្លាំងជាងមុនបន្ថែមទៀត ព្រោះក្រោយពីរឿងនេះបញ្ចប់ការចាក់បញ្ចាំងនៅស្ថានីយទូរទស្សន៍PNN នាងចាប់ផ្ដើមទទួលបានការងារច្រើន។ ជាងនេះវាក៏បានជួយដល់អាជីពជាពិធីការិនីរបស់នាងឱ្យកាន់តែទទួលបានប្រជាប្រិយភាព និងតម្លៃខ្លួនខ្ពស់ជាងមុនថែមទៀតផង៕