Category: សង្គម និងសេដ្ឋកិច្ច

ក្រោយពីក្រុមហ៊ុនបច្ចេកវិទ្យាទូរស័ព្ទជាច្រើនចាប់ផ្ដើមមានស្មាតហ្វូនស្ទើរតែគ្មានគែមអេក្រង់ និង Home Button ចេញនៅលើផ្នែកខាងមុខរួចមកនោះ ថ្មីៗនេះមានព័ត៌មានបែកធ្លាយមកថា Sony ក៏កំពុងត្រៀមនឹងបង្ហាញសមិទ្ធផលថ្មីមួយនៅក្នុងព្រឹត្តិការណ៍តាំងពិព័រណ៍ IFA នៅចុងឆ្នាំនេះ ដែលវាប្លែកពីទូរស័ព្ទជំនាន់មុនៗ ហើយអាចឱ្យអ្នកគាំទ្រមានការភ្ញាក់ផ្អើលខ្លាំងទៀតផង។
យោងតាមបណ្តាញសង្គមដ៏ធំបំផុតរបស់ចិន Weibo បានចុះផ្សាយថា ក្រុមហ៊ុនបច្ចេកវិទ្យាជប៉ុននេះ កំពុងត្រៀមបង្ហាញស្មាតហ្វូនស៊េរីថ្មីមួយដែលស្ទើរតែគ្មាន Bezel-Less អេក្រង់ទំហំ 6 អ៊ីញប្រភេទ LCD ជាមួយនឹងកម្រិត Aspect Ratio 18:9 នៅក្នុងព្រឹត្តិការណ៍តាំងពិព័រណ៍ IFA ចុងឆ្នាំនេះ។

Sony ក៏ធ្លាប់មានស្មាតហ្វូនមានគែមឆ្វេង/ស្ដាំ ស្ដើងជាច្រើនម៉ូដែលមកហើយដែរ ដែលរួមមាន Xperia XZ Premium, Xzs, XA1 និង XA1 Ultra គ្រាន់តែស្មាតហ្វូនទាំងនេះ នៅមានសល់គែមនៅផ្នែកលើ និងផ្នែកក្រោមច្រើនប៉ុណ្ណោះ។ យ៉ាងណាមិញ ប្រសិនបើព័ត៌មានខាងលើក្លាយជាការពិតមែន Sony នឹងក្លាយជាក្រុមហ៊ុនថ្មីមួយទៀតបន្ទាប់ពី Xiaomi និង Sharp ដែលប្រកាសចេញស្មាតហ្វូន និងអេក្រង់គ្មានគែមដ៏ស្ដើងគួរឱ្យចាប់អារម្មណ៍សម្រាប់សម័យបច្ចេកវិទ្យាក្នុងឆ្នាំ 2017 នេះមិនខាន៕

ក្រោយពីតារាសិល្បៈមានបទពិសោធក្រាស់ក្រែលអ្នកនាង សាត រស្មី ប្រាប់ថា នាងកំពុងមានស្នេហាជាមួយបុរសអាណិកជនរស់នៅអាមេរិក និងមានការលើកឡើងថា មិនយូរប៉ុន្មានទេនាងនឹងចូលរោងការជាក់ជាមិនខាន។

អ្នកនាងសាត រស្មី ធ្លាប់បានបង្ហើបថា នាងមានបុរសម្នាក់កំពុងតែស្រឡាញ់ និងយល់ចិត្ដនាងខ្លាំងណាស់។ ទោះបីជានាងបានបង្ហាញពីអារម្មណ៍ស្រឡាញ់ និងយល់ចិត្ដទៅលើបុរសម្នាក់នោះវិញក៏ដោយ ក៏នាងបានបញ្ជាក់ដែរថា បច្ចុប្បន្ននាងពុំទាន់បានគិតដល់រឿងរៀបការទេ ព្រោះនាង និងសង្សារមានការយល់ចិត្ដគ្នាទៅហើយ ដូច្នេះទុកពេលវេលាឱ្យនៅយូរបន្ដិចសិនក៏មិនថ្វីដែរ ដោយបច្ចុប្បន្ននាងកំពុងតែគិតពីការងារសិល្បៈ។

នាងបន្ដថា នាងចង់ធ្វើការងារសិល្បៈឱ្យរីកចម្រើនជាមុនសិន ទើបគិតរឿងមង្គលការ ព្រោះនាងមិនខ្វាយខ្វល់អ្វីទៀតឡើយ ដោយសារតែនាង និងគេបានជឿជាក់លើគ្នាជាខ្លាំង ពិសេសសង្សារនាងបានដឹងរឿងអតីតកាលរបស់នាងអស់ហើយ ហើយបុរសម្នាក់នេះក៏មិនដែលប្រកាន់អ្វីដែរ។

ទោះបីជានាងមិនទាន់ឈានដល់ថ្ងៃមង្គលការក៏ដោយ ប៉ុន្ដែត្រូវបាននាងបញ្ជាក់ប្រាប់ថា ទៅអនាគតប្រសិនរៀបការរួចហើយ នាងនឹងធ្វើអ្វីៗជាច្រើនទៅតាមបំណងរបស់ស្វាមីនាង ពោលគឺនាងអាចនឹងបោះបង់ចោលសិល្បៈក៏អាចថាបាន  ប្រសិនបើជាសំណូមពរពីស្វាមី ប៉ុន្ដែពេលនេះនាងនឹងប្រឹងប្រែងឆក់យកប្រជាប្រិយភាពឱ្យបានខ្លាំងជាមុនសិន។

កាលពីដើមឆ្នាំនេះបានលេចចេញនូវព័ត៌មានផ្ទាល់ខ្លួនរបស់អ្នកនាងសាត រស្មី  ដែលធ្វើឱ្យគេបានដឹងថា នាងជាអតីតភរិយារបស់លោក ជៀស ស្រួច ជាកីឡាករប្រដាល់ដ៏ល្បីក្នុងអំឡុងឆ្នាំ2005។ នៅគ្រានោះនាងក៏ពុំបានប្រកែកអ្វីដែរ ប៉ុន្ដែនាងគ្រាន់តែបញ្ជាក់ថា នាង និងអតីតស្វាមីបានចែកផ្លូវគ្នាចប់សព្វគ្រប់អស់ហើយ៕

ការអប់រំជាផ្នែកមួយយ៉ាងសំខាន់ក្នុងការអភិវឌ្ឍប្រទេស ហើយនៅកម្ពុជាប្រព័ន្ធអប់រំបានក្លាយជាផ្នែកមួយដ៏សំខាន់ដែលគ្រប់ភាគីទាំងអស់ក្នុងសង្គមកំពុងយកចិត្តទុកដាក់។
ទោះបីជាមានការកែទម្រង់ ហើយភាពវិជ្ជមានក៏កំពុងកើនឡើងពីមួយថ្ងៃទៅមួយថ្ងៃសម្រាប់វិស័យអប់រំនៅកម្ពុជាយ៉ាងណាក៏ដោយ តែវិសមភាពនៃការផ្តល់ឱ្យនូវចំណេះដឹង ជាពិសេសនៅតាមតំបន់ជនបទក៏នៅតែមានបញ្ហាប្រឈមជាច្រើនដែលធ្វើឱ្យវាក្លាយជាឧបសគ្គដែលរាំងស្ទះដល់ដំណើរការនៃការកសាងធនធានមនុស្ស។
អង្គការ UNICEF បានបង្ហាញក្នុងបណ្តាញសង្គមផ្លូវការរបស់ខ្លួនថា ប្រព័ន្ធអប់រំនៅកម្ពុជា ជាពិសេសគុណភាពអប់រំនៅមានកម្រិត ដែលជាមូលហេតុនាំឱ្យមានការរៀនត្រួតថ្នាក់ និងការបោះបង់ចោលការសិក្សានៅមានអត្រាខ្ពស់នៅឡើយ។
តែទោះជាយ៉ាងណាក៏ដោយក្រសួងអប់រំ ដោយមានការគាំទ្រពីសហភាពអឺរ៉ុប និងទីភ្នាក់ងារស៊ុយអែតដើម្បីអភិវឌ្ឍន៍អន្តរជាតិ រួមជាមួយអង្គការ UNICEF បានបង្កើតគម្រោងមួយឈ្មោះថា មូលនិធិភាពជាដៃគូសម្រាប់អភិវឌ្ឍសមត្ថភាពវិស័យអប់រំ ដើម្បីដោះស្រាយបញ្ហាទាំងអស់ខាងលើនោះ។
យោងតាម ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងនៅក្នុងសន្និបាតបូកសរុបការងារក្រសួងអប់រំថា បច្ចុប្បន្នការបោះបង់ការសិក្សានៅថ្នាក់បឋមសិក្សាមានការថយចុះ តែសម្រាប់សិស្សនៅកម្រិតមធ្យមសិក្សា គឺនៅមានចំនួនច្រើននៅឡើយ ព្រោះពួកគេស្ថិតក្នុងវ័យដែលត្រូវចេញទៅរកប្រាក់ចំណូលជួយគ្រួសារ៕

ក្លិបទូកក្តោង Everton បានបំពេញការចុះហត្ថលេខាជាមួយនឹងខ្សែការពារអន្តរជាតិអង់គ្លេស Michael Keane ពីក្លិប Burnley ក្នុងតម្លៃខ្លួនមួយដែលអាចនឹងកើនដល់ចំនួន30លានផោន (ស្មើនឹង38.8លានដុល្លារអាមេរិក)។
Keane វ័យ24ឆ្នាំ បានផ្ទេរទៅកាន់កីឡដ្ឋាន Goodison Park ក្រោយពីបានយល់ព្រមចុះហត្ថលេខារយៈពេល5ឆ្នាំ។ ខ្សែការពារអង់គ្លេសរូបនេះ គឺជាកីឡាករចំណូលថ្មីទី5របស់ក្លិប Everton នារដូវក្តៅនេះ ខណៈដែលខ្សែប្រយុទ្ធ Sandro Ramirez របស់ក្លិប Malalga ក៏បានចូលរួមមួយនឹងក្រុមទូក ក្តោងនេះផងដែរ ក្នុងតម្លៃខ្លួន5.2លានផោន។ ការចុះហត្ថលេខាជាមួយនឹងកីឡាករថ្មីទាំងនោះ ធ្វើឲ្យ Everton ចំណាយប្រាក់ក្នុងពេលបើកទីផ្សារដោះដូរកីឡាករមកទល់ពេលនេះ មានចំនួនច្រើនជាង90លានផោនហើយ ក្នុងនោះរាប់បញ្ចូលទាំងការនាំយកអ្នកចាំទី Jordan Pickford ក្នុងតម្លៃខ្លួន30លានផោនផងដែរ។ លោក Ronald Koeman គ្រូបង្វឹករបស់ក្លិប Everton បានឲ្យដឹងថា៖ «Michael មានកម្រិតលេងដ៏ខ្ពស់ក្នុងចំណោមកីឡាករដែលយើងចង់នាំយកមកកាន់ Everton នៅរដូវក្តៅនេះ ហើយខ្ញុំពិតជារីករាយណាស់ដែលរូបគេស្ថិតនៅទីនេះ»។ Kean បានបញ្ជាក់ថា ការពិភាក្សាជាមួយនឹងគ្រូបង្វឹករបស់ Everton គឺលោក Ronald Koeman ដែលធ្លាប់បានលេងឲ្យក្លិប Barcelona ក្នុងតំណែងខ្សែការពារដូចគ្នាដែរនោះ បានធ្វើឲ្យរូបគេមានការជឿជាក់ក្នុងការចូលរួម។
ខ្សែការពាររូបនេះបានឲ្យដឹងថា៖ «អ្នកតែងតែចង់លេងឲ្យអ្នកចាត់ការទូទៅម្នាក់ដែលជឿជាក់លើរូបអ្នក។ ខ្ញុំចង់ទៅកន្លែងណាដែលខ្ញុំបានស្ថិតក្រោមការចង់បានដោយបុគ្គលិក កីឡាករ និងអ្នកគាំទ្រ»៕
ប្រភពពី៖ BBC

ក្លិប West Bromwich Albion បានបំពេញការចុះហត្ថលេខាជាមួយនឹងខ្សែប្រយុទ្ធអន្តរជាតិអង់គ្លេស Jay Rodriguez មកពីក្លិប Southampton ជាផ្លូវការក្នុងតម្លៃខ្លួន12លានផោន (ស្មើនឹង15.5លានដុល្លារអាមេរិក)។
ខ្សែប្រយុទ្ធវ័យ27ឆ្នាំរូបនេះ បានជួបភាពត្រដាបត្រដួសដោយសារតែរបួសក្នុងពេលចំណាយពេល5ឆ្នាំរបស់គេនៅឯក្លិប Southampton ដោយបានស៊ុតបាល់បញ្ចូលទី32គ្រាប់ ក្នុងការបង្ហាញខ្លួន126លើក។ រដូវកាលដ៏ជោគជ័យរបស់គេ គឺនៅក្នុងឆ្នាំ2013-2014 ដែលនៅពេលនោះរូបគេបានស៊ុតបាល់បញ្ចូលទី15គ្រាប់ក្នុងការប្រកួតក្របខ័ណ្ឌ Premier League និងបានធ្វើឲ្យគេបង្ហាញខ្លួនក្នុងក្រុមជម្រើសជាតិអង់គ្លេសជាលើកដំបូងទៀតផង។ Rodriguez ដែលស្ថិតក្នុងគោលដៅរបស់លោក Tony Pulis ដែលជាគ្រូបង្វឹកយូរមកហើយនោះ បានឲ្យដឹងថា៖ «ក្រោយពីស្ទើរតែអវត្តមានទាំងស្រុងអស់រយៈពេល2រដូវកាល ខ្ញុំពិតជាស្រេកឃ្លានក្នុងការមកទីនេះខ្លាំងណាស់»។ ខ្សែប្រយុទ្ធរូបនេះបានបន្ថែមទៀតថា៖ «រឿងដ៏សំខាន់បំផុតសម្រាប់រាល់កីឡាករទាំងអស់ គឺការត្រូវការពីក្លិបផ្សេង ហើយលោក Tony Pulis និង West Brom បានបញ្ជាក់យ៉ាងច្បាស់ពីកម្រិតដែលពួកគេចង់ឲ្យខ្ញុំចូលរួមជាមួយ។ នោះគឺជាភាពអស្ចារ្យសម្រាប់កីឡាករបាល់ទាត់ទាំងអស់»។
Rodriguez បានអវត្តមានក្នុងរដូវកាលឆ្នាំ2014-2015ទាំងមូល ក្រោយពីរបួសជង្គង់យ៉ាងធ្ងន់ធ្ងរ ហើយបន្ទាប់មកបានរងរបួសកជើងកាលពីខែវិច្ឆិកា ឆ្នាំ2015 ដោយបានបង្ហាញខ្លួនត្រឹមតែ16លើកប៉ុណ្ណោះនៅរដូវកាលនោះនៅមុនពេលស៊ុតបាល់បញ្ចូលទីបាន6គ្រាប់ក្នុងការបង្ហាញខ្លួន34លើកកាលពីរដូវកាលមុន៕
ប្រភពព័ត៌មាន៖ BBC

អតីតប្រធានក្រុមក្លិប Chelsea និងក្រុមបាល់ទាត់ជម្រើសជាតិអង់គ្លេស John Terry បានចូលរួមជាមួយនឹងក្លិប Aston Villa របស់ក្របខ័ណ្ឌ Championship ក្នុងកិច្ចសន្យារយៈពេលមួយឆ្នាំ។ នេះបើយោងទៅតាមការប្រកាសរបស់ក្លិបកាលពីថ្ងៃចន្ទ នៅលើគេហទំព័ររបស់ពួកគេ។
Terry បានប្រាប់គេហទំព័ររបស់ Aston Villa ថា៖ «ខ្ញុំពិតជារីករាយណាស់ក្នុងការចូលរួមជាមួយនឹង Aston Villa។ វាជាក្លិបមួយដែលខ្ញុំបានកោតសរសើរអស់រយៈពេលជាច្រើនឆ្នាំមកហើយ»។ Terry បានប្រាប់បន្តថា៖ «វាមានហេដ្ឋរចនាសម្ព័ន្ធដ៏អស្ចារ្យនៅ Bodymoor Heath ខណៈដែល Villa Park ជាកីឡដ្ឋានមួយក្នុងចំណោមកីឡដ្ឋានដ៏ស្រស់ស្អាតបំផុតក្នុងប្រទេសនេះ ហើយវាមានកីឡាករឆ្នើមៗជាច្រើននៅទីនេះ រួមជាមួយនឹងអ្នកចាត់ការទូទៅប្រកបដោយបទពិសោធ និងជោគជ័យដូចជាលោក Steve Bruce»។ ខ្សែការពារវ័យ36ឆ្នាំរូបនេះបានបន្ថែមទៀតថា៖ «ខ្ញុំពិតជាចង់ចាប់ផ្តើមលេងនៅពេលនេះ និងសម្លឹងឆ្ពោះទៅកាន់ការជួយដល់ក្រុមនេះឲ្យសម្រេចបាននូវសមិទ្ធផលដ៏ពិសេសក្នុងរដូវកាលនេះ»។ Terry បានក្លាយជាកីឡាករមិនជាប់កិច្ចសន្យាលេងឲ្យក្លិបណាទាំងអស់កាលពីចុងសប្តាហ៍មុន ក្រោយពីបានចំណាយពេលអស់22ឆ្នាំនៅឯកីឡដ្ឋាន Stamford Bridge ជាកន្លែងដែលរូបគេបានលេងក្នុងអាជីពទាំងមូលរបស់គេក្នុងក្របខ័ណ្ឌ Premier League។

រូបគេបានធ្វើការបង្ហាញខ្លួនជាលើកចុងក្រោយរបស់គេសម្រាប់ក្រុមម្ចាស់ជើងឯក Chelsea កាលពីខែឧសភា មុននឹងត្រូវបានប្តូរចេញនៅនាទីទី26ក្នុងការប្រកួតនោះ ដើម្បីស្របទៅតាមលេខអាវរបស់គេ។ ប៉ុន្តែ បើទោះបីមានការចាប់អារម្មណ៍ពីសំណាក់ក្លិប West Bromwich Albion, Stoke City និង Bournemouth ក៏ដោយ ប៉ុន្តែ Terry ត្រូវបានបញ្ចុះបញ្ចូលឲ្យទៅលេងក្នុងក្របខ័ណ្ឌលំដាប់ទី២ដោយលោក Bruce គ្រូបង្វឹករបស់ Aston Villa៕
ប្រភពពី៖ BBC