Category: សង្គម និងសេដ្ឋកិច្ច

ខណៈមានផលិតកម្មជាច្រើនបាននិងកំពុងសាងស្នាដៃខ្លួនដើម្បីទាញយកទីផ្សារភាពយន្ដសម្រាប់ចាក់បញ្ចាំងនៅតាមស្ថានីយទូរទស្សន៍ ផលិតកម្មចក្រវាឡិ៍ពេជ្រ បច្ចុប្បន្នក៏កំពុងសម្រុកផលិតភាពយន្ដភាគដ៏មានគុណភាពជាច្រើនដើម្បីផ្គត់ផ្គង់នៅក្នុងទីផ្សារមួយនេះដែរ។

អ្នកស្រី ថុង ស៊ីវទៀង ចាងហ្វាងផលិតកម្មចក្រវាឡិ៍ពេជ្របានលើកឡើងថា ដ្បិតតែស្ថានភាពទីផ្សារភាពយន្ដខ្មែរបច្ចុប្បន្ននៅតូចចង្អៀត និងគុណភាពនៅមានកម្រិតនៅឡើយ ទើបមានផលិតកម្មជាច្រើនបាន និងកំពុងតែធ្វើការលើបញ្ហានេះ ក្នុងនោះផលិតកម្មរបស់លោកស្រីក៏កំពុងតែប្រឹងប្រែងផលិតខ្សែភាពយន្ដដោយផ្ដោតលើគុណភាពខ្លាំងដែរ។ លោកស្រីបន្ដថា៖ «ខ្ញុំដឹងថាគុណភាពភាពយន្ដរបស់យើងហាក់នៅមានកម្រិតនៅឡើយ ប៉ុន្ដែខ្ញុំសប្បាយចិត្ដខណៈមានផលិតករជាច្រើនរួមទាំងរូបខ្ញុំផងកំពុងតែប្រឹងប្រែងពង្រឹងគុណភាពនៃសមិទ្ធផលរបស់ខ្លួនបន្ថែមទៀត ពោលគឺយើងធ្វើដើម្បីបុព្វហេតុតែមួយ គឺមុខមាត់ប្រទេសជាតិយើង»។

ចាងហ្វាងផលិតកម្មរូបនេះបានទទួលស្គាល់ថា ការផលិតភាពយន្ដគ្មានគុណភាពនេះហើយដែលនាំឱ្យការផលិតរបស់ផលិតកម្មលោកស្រីកាលពីប៉ុន្មានឆ្នាំមុនពិបាករកទីផ្សារ។ ផ្ទុយទៅវិញបច្ចុប្បន្នលោកស្រីបានបំពាក់បន្ថែមសម្ភារទំនើបៗក្នុងការផលិត និងប្រមូលធនធានមនុស្សបានច្រើនទាំងតារាសម្ដែង អ្នកនិពន្ធ និងអ្នកដឹកនាំរឿង ដែលជំរុញឱ្យការផលិតរបស់លោកស្រីកាន់តែមានទីផ្សារល្អឡើង។

ជាក់ស្ដែងស្ទើរតែគ្រប់រឿងភាគដែលផលិតដោយផលិតកម្មចក្រវាឡិ៍ពេជ្រត្រូវបានយកទៅចាក់បញ្ចាំងលើកញ្ចក់ទូរទស្សន៍ប៉ុស្ដិ៍លេខ5 ដូចជា«ស្ទឹងស្នេហា» «ស្នេហ៍បញ្ច្រាសទិស» និង«លេខាថ្មី»ជាដើម។

លោកស្រីថុង ស៊ីវទៀង បញ្ជាក់ថាទោះបីជាផលិតកម្មចក្រវាឡិ៍ពេជ្រ បានឈានទៅដល់កិច្ចសហការជាមួយស្ថានីយ៍ទូរទស្សន៍ប៉ុស្ដិ៍លេខ5 ជាទីផ្សារចែកចាយមួយដ៏ធំក៏ដោយ ក៏លោកស្រីពុំទាន់ចាត់ទុកថាជាជោគជ័យធំសម្រាប់ផលិតកម្មលោកស្រីដែរ ព្រោះឆន្ទៈរបស់លោកស្រីចង់ធ្វើឱ្យបានភាពយន្ដដែលកាន់តែមានគុណភាពជាលក្ខណៈស្ដង់ដារ អាចបញ្ចូលទៅកាន់ទីផ្សារនៃប្រទេសជិតខាងបាន។ ជាមួយនឹងផែនការ និងការតាំងចិត្ដ លោកស្រីថុង ស៊ីវទៀង បានប្រាប់ថា៖ «ទៅអនាគតប្រសិនបើភាពយន្ដខ្មែរយើងមានទីផ្សារធំ ខ្ញុំមិនខ្លាចក្នុងការចំណាយទុនបន្ថែមដើម្បីធ្វើឱ្យភាពយន្ដកាន់តែមានគុណភាពល្អនោះឡើយ ព្រោះខ្ញុំជឿថាមិនមែនមានតែខ្ញុំទេដែលចង់ផលិតភាពយន្ដកម្រិតស្ដង់ដារអន្ដរជាតិនោះ»៕

ការដាំត្រសក់លក់ជាមុខរបររបស់កសិករដែលមានជាយូរលង់មកហើយ តែដោយសារកង្វះបច្ចេកទេស ទើបកសិករភាគច្រើនមិនសូវទម្លាប់ដាំធ្វើជាអាជីវកម្មនោះទេ បានត្រឹមតែដាំទុកទទួលទានក្នុងក្រុមគ្រួសា​រប៉ុណ្ណោះ។ ប៉ុន្តែសម្រាប់បច្ចេកទេសថ្មីនេះ អាចជួយឱ្យកសិករដាំត្រសក់បានផលយ៉ាងមិននឹកស្មានដល់ ពោលគឺមានដីត្រឹមតែ 20អា តែគាត់អាចបេះផ្លែលក់បានមួយថ្ងៃដល់ទៅជិត 100ដុល្លារឯណោះ។

កសិករគំរូគឺ អុំស្រី ផ្លុង សុភាព ដែលដាំត្រសក់ចំណារនៅក្នុងភូមិពន្លឺ ឃុំជម្រះពេន ស្រុកសំរោង ខេត្តតាកែវមានប្រសាសន៍ថា ដើមឡើយគ្រួសារគាត់ និងគ្រួសារអ្នកភូមិដទៃទៀតមិនចាប់អារម្មណ៍ដាំត្រសក់តាមបែបបច្ចេកវិទ្យាថ្មីនេះទេ ទើបតែរយៈពេលប៉ុន្មានឆ្នាំកន្លងទៅនេះ មានអ្នកជំនាញអង្គការក្រៅរដ្ឋាភិបាលចុះមកបង្រៀនកសិករដោយផ្ទាល់ដល់ក្នុងភូមិ ហើយកសិករភាគច្រើនមិនបានចាប់អារម្មណ៍លើគម្រោងដាំត្រសក់នេះទេ តែក៏មានគ្រួសារអ្នកភូមិមួយចំនួនទទួលយកគម្រោងនេះដែរ។ ដូចជាគ្រួសារអុំស្រីជាដើម ដោយសារមានទឹកត្រពាំងនៅខាងក្រោយផ្ទះស្រាប់ ក៏ចាប់ផ្តើមដាំត្រសក់ចំណារនេះតាមការណែនាំរបស់អ្នកបច្ចេកទេសរបស់អង្គការខាងលើ ហើយអ្វីដែលពួកគាត់នឹកស្មានមិនដល់នោះគឺ វាឆាប់ឱ្យផ្លែមែនទែន ដាំតែ 25ថ្ងៃ វាក៏ចេញផ្កា និងផ្លែតែម្តង។ នៅលើផ្ទៃដី20អា វាឱ្យផលក្នុងមួយថ្ងៃពីជាង 200គីឡូក្រាមទៅជាង 300គីឡូក្រាម និងត្រូវបេះវាព្រឹកល្ងាច ហើយនៅពេលណាដែលត្រសក់បានថ្លៃខ្ពស់ អាចលក់បាន 1,200 ទៅ 1,300រៀលក្នុងមួយគីឡូក្រាម តែបើត្រសក់ធ្លាក់ថ្លៃវិញ លក់បានចន្លោះពី 800ទៅ 900រៀលតែប៉ុណ្ណោះ។ គាត់ថាត្រសក់អោយផល ចាប់ពីពេលបេះរហូតដល់អស់ផ្លែទៅវិញមានរយៈពេល 1ខែ ឬលើសពីនេះ។

លោក ង៉ែត សូទ្រី អនុប្រធានរដ្ឋបាលសាលាស្រុកសំរោង និងជាប្រធានគម្រោងអភិវឌ្ឍន៍កសិកម្ម និងជំរុញកំណើនសេដ្ឋកិច្ចរបស់អង្គការ IDE ដែលបានចុះទៅបង្រៀនកសិករមានប្រសាសន៍ឱ្យដឹងពីបច្ចេកទេសដាំដុះនេះថា បើសិនជាកសិករថែទាំវាបានល្អ ត្រឹមរយៈពេល 25ថ្ងៃ​ វានឹងឱ្យផលបណ្តើរៗហើយ និងអាចបេះបានរហូតដល់1ខែ ឬជាង1ខែទើបវាអស់ទៅវិញ រួចកសិករគ្រាន់តែកាត់ដើមចោលហើយ ក៏អាចដាំវាជាលើកទី 2បានទៀតតែម្តង។

ចំពោះបច្ចេកទេសដាំដុះ គាត់ត្រូវយកគ្រាប់ពូជឈ្មោះ ហាភីស៊ី (នាំចូលពីប្រទេសថៃ តាមយៈអង្គការហាភីស៊ី) ទៅហាលថ្ងៃ15នាទីដើម្បីដាស់ដំណេក និងយកទៅបណ្តុះនៅក្នុងត្រេ (ឧបករណ៍បណ្តុះគ្រាប់ដំណាំ) រយៈពេលប្រហែល 1សប្តាហ៍ ត្រសក់នឹងចាប់ផ្តើមដុះចេញស្លឹកមួយឬពីរ។

លោកបន្តថា មុននឹងយកកូនត្រសក់ទៅដាក់ដាំ កសិករត្រូវភ្ជួរដីហាលចោលរយៈពេលមួយសប្តាហ៍ទើបលើកជារង ហើយឆូតចំកណ្តាលរងដើម្បីបាចកំបោរ-សដើម្បីសម្លាប់មេរោគ និងការពារសត្វល្អិតនៅក្នុងដី ពេលបាចហើយយើងភ្ជួរដីលុបកំបោរ-សនោះទៅវិញ ទើបគេយកផ្ទាំងកៅស៊ូមកគ្របពីលើរងនីមួយៗកុំឱ្យស្មៅដុះ និងដើម្បីរក្សាសំណើមឱ្យបានយូរ រួចហើយគេចោះរន្ធកៅស៊ូយកឬស្សីមកដោតដើម្បីចងសំណាញ់ឱ្យត្រសក់វាវារឡើង (មាននៅក្នុងរូប) រួចទើបរាយទុយោដើម្បីងាយស្រួលបន្តក់ទឹកតាមគល់នីមួយៗ។ ពេលរៀបចំកសិដ្ឋានរួចហើយ គេយកកូនត្រសក់មកដាក់ដាំតាមចន្លោះកៅស៊ូនោះ ហើយបន្តក់ទឹកជាប្រចាំមួយថ្ងៃ 2ដង នោះត្រសក់នឹងដុះលូតលាស់ល្អ តែបើមិនសូវល្អគេអាចយកជីអ៊ុយរ៉េមួយស្លាបព្រាទៅដាក់ជិតកន្លែងបូមទឹកដើម្បីឱ្យម៉ាស៊ីនបូមទឹក បូមទឹកដែលមានជីទៅស្រោចស្រពនៅតាមគល់ដើមត្រសក់នីមួយៗ។

លោកបញ្ជាក់ថា សម្រាប់កសិករគឺ រៀបចំកសិដ្ឋានតែម្តង អាចដាំបានច្រើនដងអាស្រ័យលើការថែទាំរបស់គាត់ ប៉ុន្តែយកល្អគេត្រូវដាំដំណាំឆ្លាស់គ្នា ដើម្បីរក្សាដីឱ្យនៅមានជីជាតិបានយូរ។ សម្រាប់គម្រោងដាំត្រសក់នេះកសិករមិនបាច់បារម្ភពីកង្វះទីផ្សារទេ បើសិនមិនមានម៉ូយមកទិញ អង្គការនឹងមកទិញយកដោយឱ្យតម្លៃមិនទាបជាងទីផ្សារឡើយ៕

ក្រុម​អ្នកជំនាញ​ខាង​អនាម័យ​ចំណីអាហារ​អន្តរជាតិ បានធ្វើ​ការណែនាំ​ឱ្យធ្វើ​កា​រលាង​សម្អាត​បន្លែ ផ្លែឈើ​មុននឹង​នាំយកទៅ​ធ្វើជា​ម្ហូបអាហារ​ដោយ​វិធី​បែបងាយៗ និង​សន្សំសំចៃ​គឺ ត្រាំ​ទឹក​ទុកចោល 10 – 15 នាទី រួចហើយ​លាង​សម្អាត​ដោយ​ទឹក​ហូរ (បើកទឹក​ពី​ក្បាល​ចំពួយ​ដើម្បី​លាង) រយៈពេល 2 នាទី នឹង​ជួយ​កាត់បន្ថយ​សារធាតុ​គីមី ដែល​នៅជាប់​សេសសល់​លើ​បន្លែ​ផ្លែឈើ​ទាំង​នោះបាន​ច្រើន​ដល់​ទៅ 92 % ឯណោះ។

ចំណុច​ណែនាំ​ក្នុងការ​ជ្រើសរើស​ទិញ​បន្លែស្រស់​ដែល​ស្អាត និង​សុវត្ថិភាព មាន​ដូចតទៅ…

1 . ជ្រើសរើស​ទិញ​បន្លែស្រស់​ដែល​ស្អាត គ្មាន​ជាប់​ស្នាម​កំណ​កដី ឬ​ស្នាម-សៗរបស់​សារធាតុ​ថ្នាំ​កម្ចាត់​សត្វល្អិត ឬ​ក្លិនឈួល​ខុស​ប្រក្រតី និង​ជ្រើស​រើសយក​បន្លែស្រស់​ណា​ដែលមាន​ស្នាម​ខាំ​ស៊ី​របស់​ដង្កូវ និង​សត្វល្អិត។

2 . ជ្រើសរើស​ញ៉ាំ​បន្លែ ផ្លែឈើ​តាម​រដូវ​កាល ដោយសារតែ​បន្លែ​ផ្លែឈើ​ដែល​ដាំ​បាន​តាម​រដូវ​កាល​មានឱកាស​រីកលូតលាស់​បានល្អ​ជាង​ក្រៅ​រដូវ​កាល ដែល​ធ្វើឱ្យ​មិនសូវមាន​ការប្រើ​សារធាតុ​គីមី និង​ជី​ប៉ុន្មាន​ឡើយ។

3 . ជ្រើសរើស​បរិភោគ​បន្លែ​ដែល​ដាំ​ក្នុងភូមិ ដូចជា ម្ជុល​ភ្នំ ស្លឹក​ព្រិច ស្លឹករ​ងាង ត្រួយ​រាំង ត្រួយ​បន្លែ​ផ្អែម ស្លឹក​ញ ត្រួយ​ក​ន្ទុំ​ទេស ត្រួយ​អង្គារ​ដី ឬ​បន្លែ​ដែល​អាច​ដាំ​បាន​ដោយ​ខ្លួនឯងងាយ។

4 . មិន​បរិភោគ​តែ​បន្លែ​ប្រភេទ​ណាមួយ​ជាប្រចាំ តែ​គួរ​បរិភោគ​ឱ្យបាន​ច្រើនយ៉ាង​ផ្លាស់ប្តូរ​គ្នា ដើម្បី​ទទួលបាន​ប្រយោជន៍​គ្រប់​ខាង​ផ្នែក​ភោជនាហារ និង​ចៀសវាង​ការទទួល​សារធាតុពុល។

ទាំងអស់នេះ បើ​មិន​ប្រាកដ​ក្នុង​ចិត្ត​ថា បន្លែស្រស់ និង​ផ្លែឈើ​ដែល​ទិញ​មក​បរិភោគ​នោះ​មាន​សុវត្ថិភាព​ពីសារ​ធាតុគីមី​ឬក៏​អត់​នោះ? វិធី​លាង​សម្អាត​យ៉ាង​ត្រឹមត្រូវ​បែបងាយៗ និង​មាន​ប្រសិទ្ធភាព​នោះ គឺ​ការដាក់​ត្រាំ​ទឹក​ទុកចោល 10 – 15 នាទី រួចហើយ​លាង​ដោយ​ទឹក​ហូរ​រយៈពេល 2 នាទី​ទៀត។ វិធី​នេះ​ទទួលបាន​ការអះអាង​ដោយ​លទ្ធផល​នៃ​ការស្រាវជ្រាវ​របស់​ក្រុម​អ្នកជំនាញ​ខាង​សុវត្ថិភាព​នៃ​ផលិតផល​កសិកម្ម​ថា អាច​លាងជម្រះ​សារធាតុ​គីមី និង​ជាតិ​ថ្នាំ​សម្លាប់​សត្វល្អិត​ដែល​នៅ​សេ​សល់​ជាប់​នឹង​បន្លែ ផ្លែឈើ​ស្រស់​ទាំង​នោះបាន​ច្រើន​ដល់​ទៅ 92 % ឯណោះ៕

នាពេលបច្ចុប្បន្ន មាននិស្សិតជាច្រើន​រអ៊ូថា​ ខ្វះការងារធ្វើ ឬមិនអាចស្វែងរក​ការងារឱ្យត្រូវជំនាញបាន ខណៈ​និស្សិតមួយចំនួន​ទៀត​កំពុង​តែស្ថិតក្នុងស្ថានភាពប្រទាញប្រទង់​ដែលមាន​ស្ថាប័នជាច្រើន​សុទ្ធតែ​ទាក់ទង​ចង់ឱ្យគាត់​ទៅជួយ​។ ស្ថានភាពជាក់ស្តែងទាំងនេះ បង្ហាញឱ្យឃើញពីគម្លាត​សមត្ថភាព​ និងការ​ស្វែងរក​ឱកាស​​ការងាររបស់​ប្រជាជន​នៅកម្ពុជា។

ខាងក្រោមនេះ ជា​វិធីមួយចំនួន​ដើម្បីកុំឱ្យខកចិត្តក្រោយពេល​បញ្ចប់ការសិក្សា​ថ្នាក់មហាវិទ្យាល័យ៖

1.ធ្វើការងារហាត់ការ​ និងការងារស្ម័គ្រចិត្ត

មនុស្សមួយចំនួន​គិតថា ការងារស្ម័គ្រចិត្ត​ជារឿងដែលមិនមានប្រយោជន៍ ព្រោះវាមិនមែនជាការងារជាប់​លាប់ ហើយបានប្រាក់កម្រៃដើម្បី​ឆ្លើយតបជាមួយ​នឹងកម្លាំងពលកម្មតិចតួច តែតាមពិត ការងារ​ស្ម័គ្រចិត្ត​ជាឈ្នាន់ដ៏សំខាន់មួយ​ដើម្បី​ឆ្ពោះទៅរក​ភាពជាអ្នកស្ទាត់ជំនាញ​ក្នុងការងារសំខាន់ៗជាច្រើន។ នៅគ្រប់​ប្រកាស​ជ្រើសរើសបុគ្គលិក​សុទ្ធតែ​មានដាក់ថា ត្រូវការមនុស្ស​​ដែលមានបទពិសោធយ៉ាងតិចបំផុត 1ឆ្នាំ​។ ត្រង់ចំណុចនេះឯង ដែលនិស្សិត​ដែលធ្លាប់បានធ្វើការងារហាត់ការមានប្រៀប និងអាច​ដាក់​ពាក្យ​ប្រកប​ដោយ​​ទំនុកចិត្ត​ជាមួយនឹងបទពិសោធ​ដែលខ្លួនបានមកពីការងារហាត់ការ និង​ស្ម័គ្រចិត្តនៅតាម​ស្ថាប័ន​នានានោះ។

2.ពង្រឹងជំនាញទំនាក់ទំនង

មនុស្ស​ដែលមានសមត្ថភាព ហើយមាន​ការងារល្អ ឬអាជីវកម្ម​ជោគជ័យបន្ទាប់ពី​បញ្ចប់ការសិក្សា​នៅថ្នាក់​មហាវិទ្យាល័យ មិនមែនសុទ្ធតែ​ជាអ្នក​ដែល​រៀនបានលេខ1គ្រប់គ្នានោះទេ តែ​ពួកគេសុទ្ធតែមាន​លក្ខណសម្បត្តិ​​មួយដូចគ្នា គឺមានទំនាក់ទំនងល្អ។ ដូចដែលបានបង្ហាញនៅក្នុងចំណុចខាងលើហើយថា និស្សិត​គួរតែធ្វើការ​ងារហាត់ការ ឬការងារស្ម័គ្រចិត្តដែលត្រូវនឹងជំនាញរបស់ខ្លួន ព្រោះគុណសម្បត្តិ​របស់​វា​អាចធ្វើឱ្យ​ពួកគេ​ទទួលបានទាំងបទពិសោធ និងទំនាក់ទំនង​ល្អជាមួយនឹងស្ថាប័នការងារ។ នៅពេលដែល​ពួក​គេ​មានទំនាក់ទំនងល្អជាមួយសិស្សច្បង​ដែល​កំពុងប្រកបវិជ្ជាជីវៈដូចដែលគេកំពុងសិក្សា និង​មាន​ទំនាក់​ទំនងល្អជាមួយនឹងអ្នកគ្រប់គ្រងស្ថាប័ននានានោះ ពួកគេនឹងមានឱកាសខ្ពស់បំផុត​ដើម្បីទទួលបាន​ការងារដែលខ្លួនពេញចិត្ត។

3.ធ្វើការងារទីផ្សារខ្លួនឯង

ការសិក្សានៅកម្រិតមហាវិទ្យាល័យប្រៀបបានទៅនឹង​ការកសាងផលិតផល​នៃ​គំនិតសម្រាប់​ខ្លួនឯងដូច្នោះ​ដែរ ហេតុនេះផលិតផល​ដែលខ្លួន​បាន​បង្កើតឡើងនោះ​ត្រូវតែ​យកទៅដាក់បង្ហាញនៅក្នុងទីផ្សារការងារ។ ប្រសិនបើ​ពួកគេ​គ្មាន​ប្រវត្តិល្អ និងគ្មាន​វិធីសាស្រ្តក្នុងការបង្ហាញខ្លួនបានល្អទៅកាន់សង្គមទេនោះ ពួកគេ​អាចនឹង​ពិបាក​ទទួលបានការងារល្អ។ វិធីល្អសម្រាប់​ការ​បង្ហាញខ្លួនឯងគឺមានច្រើន ដូចជាការសរសេរ​ហើយបង្ហាញគំនិតដែលមានប្រយោជន៍ទាំងអស់នោះក្នុងបណ្តាញសង្គម ការ​បង្កើតក្រុមការងារ​ដើម្បីធ្វើ​កិច្ចការសង្គម រួមទាំង​ការបង្កើតក្រុម​ដើម្បី​ចែករំលែក​ចំណេះដឹង​ទៅកាន់យុវជនដូចគ្នា​ដើម្បីឱ្យគ្រប់ភាគី ជាពិសេស​អ្នកគ្រប់គ្រងស្ថាប័ននានា​បានឃើញ ហើយចាប់អារម្មណ៍​សម្រាប់ឱកាសការងារ៕