Category: សង្គម និងសេដ្ឋកិច្ច

ភ្នំពេញ៖ ក្នុងគោលដៅបញ្ឈប់ការនាំចូល ក៏ដូចជាផ្តល់ការងារជូនពលរដ្ឋខ្មែរឱ្យបានកាន់តែច្រើនផងដែរនោះ ក្រុមហ៊ុនធំៗចំនួនពីររបស់ខ្មែរ និងថៃបានចាប់ដៃគ្នាបោះទុនវិនិយោគប្រមាណជា 262លានដុល្លារអាមេរិកដើម្បីបង្កើតរោងចក្រស៊ីម៉ងត៍ដ៏ធំមួយនៅស្រុកទូកមាស ក្នុងខេត្តកំពតដែលជាខេត្តមានសក្តានុពលសម្បូរទៅដោយវត្ថុធាតុដើម។

លោកឧកញ៉ា លាង ម៉េង ប្រធានក្រុមអគ្គនាយកក្រុមហ៊ុន ជីប ម៉ុង គ្រុប មានប្រសាសន៍ថា ដើម្បីកាត់បន្ថយការនាំចូលស៊ីម៉ងត៍ពីក្រៅប្រទេសឱ្យបានជាអតិបរមា ក្រុមហ៊ុនបានសម្រេចសហការជាមួយក្រុមហ៊ុន Siam City Cement Public Limited របស់ថៃដែលជាក្រុមហ៊ុនផលិតស៊ីម៉ងត៍ម៉ាកអូដ្ឋ ស៊ីម៉ងត៍ម៉ាកឥន្រ្ទីពេជ្រ ដោយបានបោះទុនវិនិយោគរួមគ្នាក្នុងទឹកប្រាក់ប្រមាណជា 262លានដុល្លារ សម្រាប់បង្កើតរោងចក្រនៅកម្ពុជាជាមួយនឹងការរចនាសម្បកវេចខ្ចប់បែបថ្មីបង្ហាញពីសក្តានុពលនៃគុណភាពរឹងមាំ និងអត្តសញ្ញាណរបស់ជាតិ។

ក្រោមទុនវិនិយោគ 262លានដុល្លារ ក្រុមហ៊ុន ជីប ម៉ុង អ៊ិនស៊ី បានច្របាច់បញ្ចូលគ្នានូវចំណេះ ជំនាញ និងបទពិសោធរបស់ក្រុមហ៊ុនទាំងពីរដែលមានជំនាញបច្ចេកទេសផ្នែកឧស្សាហកម្មផលិតស៊ីម៉ងត៍រយៈពេលជាង50ឆ្នាំមកហើយ។
ការសហការជាមួយគ្នានេះត្រូវបានផ្តួចផ្តើមដើម្បីឆ្លើយតបទៅនឹងការអភិវឌ្ឍយ៉ាងឆាប់រហ័សរបស់ប្រទេសកម្ពុជា ជាពិសេសការរីកចម្រើនយ៉ាងខ្លាំងនៃវិស័យសំណង់នៅក្នុងប្រទេសកម្ពុជាក្នុងរយៈពេលប៉ុន្មានឆ្នាំកន្លងទៅនេះ។

លោកឧកញ៉ាបានមានប្រសាសន៍ដូច្នេះថា «គោលបំណងយើងគឺគាំទ្រការអភិវឌ្ឍប្រទេសកម្ពុជាឱ្យមានស្ថិរភាព។
ក្រៅពីចង់ជួយកាត់បន្ថយការនាំចូលស៊ីម៉ងត៍ពីបរទេសមកកាន់កម្ពុជាហើយ យើងចង់បង្ហាញថា យើងអាចមានសមត្ថភាពផលិតផលិតផលខ្លួនឯងបាន និងបង្ហាញពិភពលោកថា យើងមានសមត្ថភាពផលិតស៊ីម៉ងត៍ដែលមានគុណភាពខ្ពស់ស្របតាមស្តង់ដារអន្តរជាតិផងដែរ ដែលនេះជាចំណុចសំខាន់មួយបង្ហាញពីការរីកចម្រើនកម្រិតថ្មីមួយទៀតរបស់ជាតិយើង ដោយសារកម្ពុជាមានធនធានធម្មជាតិដ៏ល្អសម្រាប់ធ្វើជាវត្ថុធាតុដើមក្នុងការផលិត»។

មិនមែនធ្វើការវិនិយោគដើម្បីស្វែងរកប្រាក់ចំណេញតែមួយមុខនោះទេ ប៉ុន្តែក្រុមហ៊ុនបានគិតគូរពីផលប៉ះពាល់បរិដ្ឋានឱ្យបានតិចបំផុតតាមដែលអាចធ្វើទៅបានស្របតាមបទដ្ឋានស្តង់ដារអង្គការអន្តរជាតិ ដោយមានការបញ្ចេញឧស្ម័នកាបូនទាបបំផុត។ ក្រៅពីនោះក្រុមហ៊ុនក៏នឹងផ្តល់ការងារដល់ពលរដ្ឋខ្មែរ ពិសេសក្រុមហ៊ុនមានអ្នកជំនាញមកពីក្រៅប្រទេសដើម្បីចែករំលែកចំណេះដឹងដល់ប្រជាពលរដ្ឋខ្មែរឱ្យកាន់តែមានចំណេះប្រសើរឡើងលើជំនាញបច្ចេកទេសផលិតស៊ីម៉ងត៍ក៏ដូចជាការផ្តល់ប្រាក់បៀវត្សរ៍ខ្ពស់ជាងរោងចក្រនានានៅក្នុងប្រទេសកម្ពុជាតាមរយៈការបណ្តុះបណ្តាលក្រុមការងារ ផ្នែកផលិត ផ្នែកទីផ្សារ ផ្នែកលក់ រួមទាំងក្រុមការងារផ្សេងៗដើម្បីបំពេញតាមតម្រូវការទូទៅរបស់ទីផ្សារកម្ពុជា ហើយលើសពីនេះក្រុមហ៊ុននឹងអភិវឌ្ឍតំបន់នោះឱ្យក្លាយជាតំបន់ទាក់ទាញបម្រើផលប្រយោជន៍រួមដល់ប្រជាពលរដ្ឋនៅក្នុងមូលដ្ឋានទៀតផង។

លោក Aidan Lynam នាយកប្រតិបត្តិនៃក្រុមហ៊ុនជីបម៉ុង អ៊ិនស៊ី ស៊ីមេន ខបភើរេសិន មានប្រសាសន៍ថា ក្រុមហ៊ុនមិនត្រឹមតែផ្គត់ផ្គង់ទីផ្សារក្នុងស្រុកនោះទេ ប៉ុន្តែនឹងពង្រីកការនាំចេញទៅកាន់ប្រទេសក្រៅក្នុងតំបន់ថែមទៀត ដោយផ្អែកលើគុណភាពនៃការផលិតចេញពីវត្ថុធាតុដើមដែលមានគុណភាពនៅក្នុងស្រុកទូកមាស ខេត្តកំពតដែលរោងចក្រនេះនឹងចាប់ផ្តើមដំណើរការនៅខែវិច្ឆិកា ចុងឆ្នាំ2017នេះ។ លោកអះអាងដូច្នេះថា «អ្នកទាំងអស់គ្នាសុទ្ឋតែចង់បាននូវផលិតផលដែលអតិថិជនប្រើប្រាស់ដោយសុវត្ថិភាព និងជឿទុកចិត្ត ពួកគេបានធ្វើការសម្រេចចិត្តដ៏ត្រឹមត្រូវក្នុងការជ្រើសរើសស៊ីម៉ងត៍របស់យើងខ្ញុំ»។ ក្រុមហ៊ុននេះកំពុងតែមានភាពជិតស្និទ្ឋជាងមុនជាមួយនឹងដៃគូពាណិជ្ជកម្ម និងអតិថិជនរបស់ខ្លួនជាមួយស្លាកយីហោស៊ីម៉ងត៍អូដ្នថ្មីនេះជាជំហានដំបូងដើម្បីសម្រេចគោលដៅរួមគ្នា។

គួរបញ្ជាក់ដែរថា វិស័យសំណង់ និងហេដ្ឋារចនាសម្ព័ន្ធគឺជាកត្តាសំខាន់មួយដែលត្រូវការចាំបាច់សម្រាប់ការអភិវឌ្ឍសេដ្ឋកិច្ច។ យោងតាមរបាយការណ៍របស់ក្រសួងដែនដី នគរូបនីយកម្ម និងសំណង់បង្ហាញថា ទុនវិនិយោគ និងវិស័យសំណង់លំនៅដ្ឋានក្នុងឆ្នាំ2016 កន្លងមកមានប្រមាណជា 5.580លានដុល្លារអាមេរិក។ និងក្នុងរយៈពេល 5ខែដើមឆ្នាំ2017នេះ ទុនវិនិយោគវិស័យសំណង់មានប្រមាណជា 4.362លានដុល្លារ បើធៀបនឹងរយៈពេលដូចគ្នានៅឆ្នាំ2016 គឺមានកំណើនប្រមាណជា 20% និងបង្កើតការងារជូនប្រជាពលរដ្ឋប្រមាណជា 20ម៉ឺននាក់ក្នុងមួយថ្ងៃ៕

បទ «ក្រហម» បច្ចុប្បន្នកំពុងទទួលបានការចាប់អារម្មណ៍ពីយុវវ័យជាច្រើន បទនេះគេឃើញមានតារាសម្ដែងស្រីពីរដួងបានបញ្ចេញកាយវិការសម្ដែងមានភាពទាក់ទាញយ៉ាងខ្លាំងក្នុងនោះ ក៏មានកញ្ញាណាងហ្វាម្នាក់ដែរដែលគេបានមើលឃើញពីទេពកោសល្យរបស់នាង។

បើទោះជាកញ្ញា ណាងហ្វា ទើបតែទទួលបានការគាំទ្រពីយុវវ័យក្នុងបទ «ក្រហម» ក៏ពិតមែន ប៉ុន្ដែនាងមិនមែនជាតារាដែលទើបចាប់អាជីពសិល្បៈថ្មីថ្មោងនោះទេ ពោលគឺនាងបានចូលប្រឡូកក្នុងវិថីសិល្បៈជាយូរមកហើយ។

កញ្ញាណាងហ្វា បានប្រាប់ថា នាងជាតារាសម្ដែងយូរមកហើយ បទពិសោធក្នុងការសម្ដែងក៏មានស្រាប់ដែរ ដូច្នេះការសម្ដែងក្នុងបទនេះពុំមានការលំបាកច្រើនសម្រាប់នាងទេ។ បើទោះជានាងជាតារាសម្ដែងបាត់មុខមួយរយៈធំក្ដី តែមុនពេលនាងទទួលយកការសម្ដែងក្នុងបទនេះ នាងមានក្ដីរំពឹងជាស្រេចថា នាងនឹងអាចទទួលបានការគាំទ្រពីមហាជន។

មានពាក្យសរសើរជាច្រើន ក៏ដូចជាមានការលើកឡើងពីមជ្ឈដ្ឋានខាងក្រៅដែរថា ក្នុងបទ «ក្រហម» កញ្ញាណាងហ្វាបានបញ្ចេញទេពកោសល្យសម្ដែងយ៉ាងខ្លាំង ពិសេសកាយវិការរាំដ៏សិចស៊ីរបស់នាងបង្អួតទៅអ្នកទស្សនា ដើម្បីទទួលបានចំណាប់អារម្មណ៍ ហើយជាជាក់ស្ដែងនាងធ្វើបានពិតមែន។ ទោះយ៉ាងណាណាងហ្វាបានបញ្ជាក់ថា៖ «ការពិតទៅបទនេះពុំមានអ្វីសិចស៊ីច្រើនទេ គ្រាន់តែទាមទារឱ្យយើងយល់ពីបទចម្រៀង និងដាក់អារម្មណ៍សម្ដែងបន្ដិចប៉ុណ្ណោះ។ កាលពីពេលមុនខ្ញុំក៏ជាតារាម្នាក់អ្នកនិយមស្លៀកសិចស៊ីដែរ ដូច្នេះខ្ញុំគិតថា សម្ដែងប៉ុណ្ណឹងមិនទាន់សិចស៊ីពេកទេ»។

កញ្ញាណាងហ្វាបានបន្ដថា ដោយសារតែរូបរាងអំណោយផលទៅលើការសម្ដែងផ្នែកសិចស៊ី ទើបធ្វើឱ្យនាងតែងតែទទួលបានតំណែងជាតួអង្គបែបសិចស៊ីច្រើន។ ដូចជារឿង«ជីវិតនាងរចនា»ក៏ត្រូវអ្នកដឹកនាំរឿងតម្រូវឱ្យសម្ដែងជាតួអង្គអ្នកមានវ័យក្មេងចូលចិត្ដលេងល្បែងស្នេហាដែរ។

ទោះយ៉ាងណា តារាសម្ដែងរូបនេះពុំបានព្រួយបារម្ភពីការវាយតម្លៃរបស់មហាជនទៅលើចរិតឫកពារបស់នាងនោះទេ ដោយនាងបញ្ជាក់ថា៖ «ខ្ញុំមិនដែលខ្វល់ពីការនិយាយអ្វីឡើយ ព្រោះវាជាសិល្បៈ។ ពិសេសរឿងផ្ទាល់ខ្លួន ខ្ញុំមិនដែលគិតខ្លាចពេលគេឃើញការសម្ដែងរបស់ខ្ញុំ គិតថាខ្ញុំមានចរិតខាងក្រៅដូចនឹងការសម្ដែង ឬគ្មានអ្នកស្រឡាញ់នោះទេ គឺខ្ញុំអត់ខ្វល់ទេ ព្រោះសព្វថ្ងៃក៏មានអ្នកស្រឡាញ់ច្រើនដែរ ផ្ទុយទៅវិញ គឺរូបខ្ញុំទេដែលជាអ្នកមិនចង់គិតពីរឿងនេះ ព្រោះខ្ញុំចង់ទុកពេលវេលារកស៊ី និងប្រឡូកការងារសិល្បៈឱ្យទទួលបានភាពល្បីល្បាញជាមុនសិនទើបប្រសើរជាង»៕

ជើងហោះហើរ​ដ៏​ខ្លី​បំផុត​ក្នុង​ពិភពលោក​នោះ​គឺ ការហោះហើរ​រវាង​កោះ Westray និង​កោះ Papa Westray ដែល​ស្ថិតនៅ​ប៉ែក​ខាងជើង​របស់​ប្រទេស​ស្កុ​តលែ​ន​ដ៍ ដែលមាន​រយៈ​ចម្ងាយ​ឆ្ងាយ​ពីគ្នា​ប្រមាណ 2,7គីឡូម៉ែត្រ​ប៉ុណ្ណោះ តែដោយសារ​វា​ជា​តំបន់​ឆកសមុទ្រ តូចចង្អៀត និង​ហាក់ដូចជា​មានទឹក​រាក់ និង​ពោរពេញ​ទៅដោយ​ផ្កាថ្មធំៗ និង​ថ្ម​មុត​ស្រួច​ទាំងផ្ទាំងៗផង​នោះ ជាហេតុ​ធ្វើឱ្យ​ពិបាក​ក្នុង​ការឆ្លង​ដោយ​ការ​ជិះទូក។

មូលហេតុ​ខាងលើ​នេះហើយ ទើបត្រូវ​ឆ្លងទៅ​រកគ្នា ទៅវិញទៅមក ដោយ​ការ​ជិះ​យន្តហោះ​ជំនួស​វិញ និង​ត្រូវ​ចំណាយពេល​ធ្វើដំណើរ​ត្រឹមតែ 47វិនាទី​ប៉ុណ្ណោះ (សូមបញ្ជាក់​ម្តងទៀត ត្រឹមតែ 47វិនាទី​ប៉ុណ្ណោះ) សម្រាប់​ថ្ងៃ​ដែល​ផ្ទៃមេឃ និង​ធាតុអាកាស​ល្អ និង​អាច​ត្រូវ​ចំណាយ​ពេលវេលា​កើនឡើង​ទៅជា 2នាទី ក្នុងករណី​ដែល​ផ្ទៃមេឃ​មាន​ភ្លៀង​ព្យុះ​ធ្លាក់។

យ៉ាងណាក៏ដោយ បើ​នរណា​គិត​ចង់​ធ្វើដំណើរ​ឆ្លង​កោះ​ដោយ​ជើងហោះហើរ​មួយ​នេះ ប្រហែលជា​ត្រូវ​ពិនិត្យមើល​កាលវិភាគ​ការហោះហើរ​ឱ្យបាន​ច្បាស់​បន្តិច​ហើយ ព្រោះ​ទោះ​វា​ជា​ជើងហោះហើរ​តែមួយគត់​ដែល​បម្រើ​សេវាកម្ម​នៅក្នុង​តំបន់​នេះ​មក​តាំងពី​ឆ្នាំ1960 មែន តែ​ក៏​ហោះហើរ​ដឹក​អ្នកដំណើរ​ត្រឹមតែ 2-3ជើង​ប៉ុណ្ណោះ​ក្នុង​មួយ​សប្តាហ៍៕

ភ្នំពេញៈ ប្រទេសសិង្ហបុរីតាមរយៈវិទ្យាស្ថានអប់រំបច្ចេកទេស ហៅកាត់ ITEបានជួយពង្រឹងធនធានមនុស្សផ្នែកបច្ចេកទេសវិជ្ជាជីវៈនៅកម្ពុជា តាមរយៈការជួយបណ្តុះបណ្តាលគ្រូបង្គោលនៅក្រសួងការងារ និងបណ្តុះបណ្តាលវិជ្ជាជីវៈ។

លោក ឡៅ ហ៊ីម អគ្គនាយកនៃអគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈនៃក្រសួងការងារ និងបណ្តុះបណ្តាលវិជ្ជាជីវៈបានមានប្រសាសន៍ឲ្យដឹងបន្ទាប់ពីបញ្ចប់សិក្ខាសាលាលើការបណ្តុះបណ្តាលគ្រូបង្គោលថា សិក្ខាសាលាថ្ងៃនេះនឹងធ្វើឲ្យគ្រូបច្ចេកទេសមានឱកាសទទួលបានចំណេះដឹងបន្ថែម ការដកស្រង់បទពិសោធ ការសិក្សាស្វែងយល់ពីបច្ចេកទេស និងបច្ចេកវិទ្យាថ្មីៗនៅក្នុងវិស័យបច្ចេកទេសតាមរយៈការបង្រៀន ការធ្វើបទបង្ហាញ និងការយកចិត្តទុកដាក់រៀនសូត្រពីសំណាក់លោកគ្រូអ្នកគ្រូដែលជាសិក្ខាកាម។

ឯកឧត្តមលើកឡើងថា នេះជាផ្នែកមួយនៃការរួមចំណែកអភិវឌ្ឍធនធានមនុស្ស ជាពិសេសគឺការកសាងសមត្ថភាពគ្រូបច្ចេកទេសដែលកំពុងបម្រើការងារនៅក្នុងវិស័យអប់រំបណ្តុះបណ្តាលបច្ចេកទេស និងវិជ្ជាជីវៈដើម្បីទទួលបានការរីកចម្រើននូវចំណេះដឹង ជំនាញ និងបទពិសោធដែលពាក់ព័ន្ធនឹងជំនាញឯកទេសក្នុងគោលបំណងរួមចំណែកដល់ការលើកកម្ពស់គុណភាព និងប្រសិទ្ធភាពការបណ្តុះបណ្តាលក្នុងវិស័យបណ្តុះបណ្តាលបច្ចេកទេស និងវិជ្ជាជីវៈ ឬហៅថា ធីវ៉េត។

យោងតាមរបាយការណ៍របស់ប្រធាននាយកដ្ឋានគ្រប់គ្រងគ្រឹះស្ថានសិក្សានៃក្រសួងការងារបានឲ្យដឹងថា ផ្អែកលើកិច្ចសហប្រតិបត្តិការផ្នែកអប់រំបណ្តុះបណ្តាលបច្ចេកទេស និងវិជ្ជាជីវៈរយៈពេល2ឆ្នាំ 2017-2018 រវាងក្រសួងការងារ និងបណ្តុះបណ្តាលវិជ្ជាជីវៈ ជាមួយនឹងវិទ្យាស្ថានអប់រំបច្ចេកទេសនៃប្រទេសសិង្ហបុរី គឺត្រូវបណ្តុះបណ្តាលគ្រូបច្ចេកទេសកម្ពុជាចំនួន80រូបលើមុខជំនាញចំនួន3ដូចជា ព័តមានវិទ្យា អាយស៊ីធី បច្ចេកវិទ្យាអេឡិចត្រូនិក និងបច្ចេកវិទ្យារថយន្ត ដែលចំណុះនាយកដ្ឋានគ្រប់គ្រង គ្រឹះស្ថានសិក្សានៃក្រសួងការងារ៕

កញ្ញា ទៀង ម៉ីលិ ត្រូវបានគេចាត់ទុកថា ជាតារាសិល្បៈមួយរូបកំពុងមានមហិច្ឆតាក្នុងអាជីពសិល្បៈ   ខណៈមហាជនទើបតែបានឃើញនាងសម្ដែងក្នុងរឿង «អូនជាកែវភ្នែកបង» ដែលបានចាក់បញ្ចាំងនៅលើកញ្ចក់ទូរទស្សន៍ប៉ុស្ដិ៍លេខ9  ស្រាប់តែថ្មីៗនេះនាងបានបង្ហាញខ្លួនក្នុងនាមជាតារាចម្រៀងក្នុងក្រុម Girls Girls បន្ថែមទៀត។

បើតាមការឱ្យដឹង កញ្ញាទៀង ម៉ីលិ ហៅ ជេស៊ី បានប្រាប់ថា ក្រុមតារាចម្រៀងGirls Girls មានសមាជិកស្រីបួននាក់ ដែលមានកញ្ញាព្រះកាយច័ន្ទ ជាប្រធានក្រុម។ នាងបន្ដថា ក្រុមចម្រៀងនេះបានបង្កើតឡើងជាច្រើនខែមកហើយ និងព្រោះតែសម្ងំបង្កើតបទ Original Song និងក្បាច់រាំល្អៗសម្រាប់បម្រើដល់អារម្មណ៍មហាជននោះ  ទើបតម្រូវឱ្យពួកគេសម្រេចចិត្ដឡើងបង្ហាញសមត្ថភាពលើឆាកតន្រ្ដីកាលពីពេលថ្មីៗនេះ។

ជេស៊ី បញ្ជាក់ថា មូលហេតុដែលនាងចង់ងាកមកចាប់អាជីពចម្រៀង គឺដោយសារតែនាងមើលឃើញថា អាជីពចម្រៀងមានឱកាសទទួលបានភាពល្បីល្បាញឆាប់ជាងការសម្ដែង។ ម្យ៉ាងបច្ចុប្បន្នតារាចម្រៀងស្រីដែលបង្កើតជាក្រុមហាក់មានកម្រិតតិចតួចនៅឡើយ  ដូច្នេះធ្វើឱ្យក្រុមនាងមានក្ដីរំពឹងច្រើនក្នុងការទាញយកប្រជាប្រិយភាពពីមហាជន។ នាង ប្រាប់ទៀតថា ខណៈដែលក្រុមចម្រៀងនាងឡើងសម្ដែងសមត្ថភាពលើឆាកប្រគំតន្រ្ដីតាមស្ថានីយទូរទស្សន៍ទើបតែបានចំនួន3កន្លែង មាន MYTV  CTN និង SEA TV នោះ ក៏ស្រាប់តែទទួលបានការចាប់អារម្មណ៍ពីបណ្ដាអ្នករៀបចំកម្មវិធីប្រគំតន្រ្ដីធំៗរបស់ក្រុមហ៊ុនទាំងនោះភ្លាមតែម្តង។ តែទោះយ៉ាងណាក្រុមរបស់នាងពុំទាន់សម្រេចចិត្ដទទួលយកការងារមួយណានៅឡើយ។

ជេស៊ី បញ្ជាក់ថា៖ «មូលហេតុដែលយើងពុំទាន់ទទួលការងារទាំងនោះ ព្រោះតែយើងចង់បង្កើតបទថ្មីៗ និងក្បាច់រាំឱ្យបានច្រើនជាងនេះបន្ដិចទៀត និងជាពិសេសយើងត្រូវការពង្រឹងសមត្ថភាពឱ្យកាន់តែខ្លាំងបន្ថែមទៀត ដើម្បីឱ្យពេលចេញទៅ គឺទទួលបានការគាំទ្រច្រើនតែម្តង ជាជាងប្រញាប់បានបង្ហាញខ្លួនទៅតាមបណ្ដាខេត្ដនានាមែន ប៉ុន្ដែទទួលបានការរិះគន់មកវិញ»។
ទោះជាយ៉ាងណាតារាចម្រៀងរូបនេះបញ្ជាក់ថា ទោះបីជានាងស្រឡាញ់អាជីពសម្ដែងខ្លាំងក៏ដោយ ប៉ុន្ដែបើការច្រៀងមានភាពមមាញឹកខ្លាំង នាងអាចនឹងឈានទៅដល់ការផ្អាកអាជីពសម្ដែងទុកមួយអន្លើសិនក៏អាចថាបានដែរ៕

ភ្នំពេញៈ មន្រ្តីជាន់ខ្ពស់ក្រសួងទេសចរណ៍បានឲ្យដឹងថា រយៈពេល 5ខែដើមឆ្នាំនេះ កម្ពុជាទទួលបានភ្ញៀវទេសចរចំនួន 2.3លាននាក់ កើនឡើង 12ភាគរយធៀបរយៈពេលដូចគ្នាកាលពីឆ្នាំមុន។

លោក ថោង ខុន រដ្ឋមន្រ្តីក្រសួងទេសចរណ៍បានថ្លែងឲ្យដឹងតាមទូរស័ព្ទនាព្រឹកថ្ងៃទី6 កក្កដានេះថា ក្នុងចំណោមប្រទេសទាំង10 ដែលមានភ្ញៀវទេសចរមកទស្សនាច្រើនជាងគេ មានប្រទេសខ្លះធ្លាក់ចុះ ប្រទេសខ្លះកើនឡើង ប៉ុន្តែភ្ញៀវទេសចរមកពីប្រទេសចិន និងអឺរ៉ុបកើនឡើង ហើយភ្ញៀវទេសចរវៀតណាមបានធ្លាក់មកនៅចំណាត់ថ្នាក់ទី2 បន្ទាប់ពីជាប់ចំណាត់ថ្នាក់លេខ 1ជាច្រើនឆ្នាំ។ លោកបន្តថា នៅឆ្នាំនេះកម្ពុជាទទួលបានអាកាសចរណ៍ថ្មីៗដែលបានភ្ជាប់ជើងហោះហើរត្រង់មកម្ពុជា និងមានក្រុមហ៊ុនអាកាសចរណ៍ថ្មីៗជាច្រើនទៀតកំពុងត្រៀមហោះមកកាន់កម្ពុជា។

ជាក់ស្តែងនៅដើមឆ្នាំនេះ មានក្រុមហ៊ុនអាកាសចរណ៍ជាច្រើនដូចជា Air Asia, Amirate Airline, Malindo Airline និងក្រុមហ៊ុនអាកាសចរណ៍ចិនមួយចំនួនទៀតបានហោះមកកម្ពុជា។

រដ្ឋមន្រ្តីក្រសួងទេសចរណ៍បានបន្តថា “ការមកដល់របស់អាកាសចរណ៍កាន់តែច្រើន គឺកាន់តែល្អសម្រាប់កម្ពុជា ព្រោះការមកដល់របស់អាកាសចរណ៍ថ្មីៗជាការនាំមកនូវភាពរីកចម្រើនសម្រាប់កម្ពុជា”។

ប្រធានសហព័ន្ធទេសចរណ៍កម្ពុជាលោក ធួន ស៊ីណាន បានថ្លែងថា លោកយល់ស្របនឹងកំណើនដែលបញ្ចេញដោយក្រសួងទេសចរណ៍នេះ ដោយសារការមកដល់របស់ភ្ញៀវទេសចរចិនពិតជាមានកំណើនខ្ពស់ និងកំណើនភ្ញៀវមកពីបណ្តាប្រទេសដទៃទៀតផងដែរ ប៉ុន្តែកំណើនភ្ញៀវអឺរ៉ុប លោកមិនសូវមានសុទិដ្ឋិនិយមប៉ុន្មានទេ។ លោកបន្តថា មានការលើកឡើងពីក្រុមហ៊ុនទេសចរណ៍ និងសណ្ឋាគារថា មានការបាត់បង់ភ្ញៀវ ប៉ុន្តែលោកយល់ថា វាមិនមានអ្វីប្លែកទេ ព្រោះបាត់ពីក្រុមហ៊ុនមួយអាចទៅកើននៅក្រុមហ៊ុនមួយទៀត៕