Category: សង្គម និងសេដ្ឋកិច្ច

ក្រុមហ៊ុន Disney នៅតែបន្ដពុះពារស្វែងរកតារាសម្ដែងជាតួអង្គ Aladdin
ក្រុមហ៊ុនផលិតភាពយន្តតុក្កតា Disney នៅតែបន្ដពុះពារស្វែងរកតារាសម្ដែងជាតួអង្គ Aladdin នៅក្នុងខ្សែភាពយន្ដរឿងព្រេងនិទាន Aladdin ដែលផលិតសាជាថ្មីមិនមែនតុក្កតា។
ក្រុមការងារ Studio និង អ្នកដឹកនាំរឿងលោក Guy Ritchie បានពន្យារការចាប់ផ្តើមថតបន្ទាប់ពីបានធ្វើតេស្ដសាកល្បងតួសម្ដែងអស់ជាង 100 ដងមកហើយ នៅតែបរាជ័យក្នុងការស្វែងរកតារាសម្ដែងដែលមានអត្តចរិតដូចតួអង្គ Aladdin ល្អឥតខ្ចោះ ព្រមទាំងជាក្មេងកំព្រាដែលមានភាពឆ្លាតវៃផងដែរ នេះបើតាមការចេញផ្សាយរបស់សារព័ត៌មាន The Hollywood Reporter។
គួរបញ្ជាក់ផងដែរថា ក្រុមការងារ Studio មានគម្រោងនាំតារាប្រុសមួយរូបដែលគេជឿជាក់ថាអាចសម្ដែងបាន ព្រមទាំងអាចច្រៀង និងបង្ហាញទស្សនីយភាពរស់រវើកតាមរយៈកាយវិការរបស់គេមកធ្វើតេស្តសាកល្បងក្នុងការងារធំមួយនេះដោយសារបុរសម្នាក់នោះមានប្រភពមកពីតំបន់មជ្ឈិមបូព៌ា និងមានខ្សែលោហិតជាជនជាតិឥណ្ឌាទៀតផង តែប្រភពព័ត៌មានផ្ទៃក្នុងមួយបាននិយាយថា ក្រុមការងារ Studio បានចាប់អារម្មណ៍ទៅលើតារាពីររូបដែលមានវ័យ 27 ឆ្នាំដូចគ្នាគឺ Dev Patel និង Riz Ahmed ក៏ប៉ុន្ដែពួកគេមើលទៅទំនងជាតារាទើបតែរះថ្មីតែប៉ុណ្ណោះ។
អ្នកដឹកនាំការធ្វើតេស្ដតួសម្ដែង Randi Hiller បានបញ្ចេញតារាងធ្វើតេស្ដតួសម្ដែងដែលបានបរាជ័យក្នុងការងារនេះកន្លងមកដែលមានតារាសម្ដែងរហូតដល់ទៅ 2000 រូបឯណោះដែលបានធ្លាក់ពីការសម្ដែងជាតួអង្គ Jasmine និង Aladdinនេះ ហើយក្ដីបារម្ភចុងក្រោយរបស់ក្រុមហ៊ុនគឺ ការផលិតខ្សែភាពយន្តនេះជិតដល់ពេលវេលាដែលបានកំណត់ទុកហើយ គឺចុងខែកក្កដានេះឯង ដូច្នេះការបរាជ័យក្នុងការជ្រើសរើសតួសម្ដែងអាចនឹងធ្វើឱ្យក្រុមហ៊ុន Disney ជួបនឹងហានិភ័យធំមួយ៕
July 12, 2017
ក្រុមហ៊ុនកូនខ្មែរដំបូងបង្អស់ដែលលក់ (Franchise) ឱ្យបរទេសបើកធ្វើអាជីវកម្មបន្ត
ភ្នំពេញ៖ បច្ចុប្បន្នគេសង្កេតឃើញថា នៅលើទីផ្សារក្នុងប្រទេសកម្ពុជា មានក្រុមហ៊ុនមួយចំនួនជាឈ្មោះដែលទិញ Franchise ពីបរទេសយកមកធ្វើអាជីវកម្មបន្តដើម្បីស្វែងរកការគាំទ្រពីអតិថិជន។ ប៉ុន្តែយ៉ាងណាមិញកូនខ្មែរមួយរូបបានបង្កើតក្រុមហ៊ុនប្រកបដោយគុណភាពខ្ពស់រួមនឹងសេវាកម្មល្អផងនោះបានធ្វើឱ្យបរទេសចាប់អារម្មណ៍ ហើយទិញ (Franchise) យកទៅបើកធ្វើអាជីវកម្មបន្តនៅប្រទេសរបស់ខ្លួន។
លោក សួរ ឌែនី ម្ចាស់ហាង Car Lover ដែលមានទីតាំងនៅលើផ្លូវលេខ122 ខាងក្រោយហាងនំបុ័ង (Tous Les Jour) ដែលផ្តល់សេវាកម្មខាងផ្នែកឡើងស៊េរីរថយន្ត ដាក់គជ់ក្នុងចង្កៀងរថយន្តឱ្យថ្មី និងភ្លឺ ក៏ដូចជាផ្គត់ផ្គង់គ្រឿងបន្លាស់ឡានជាច្រើនទៀតបានឱ្យដឹងថា កាលពីចុងសប្តាហ៍មុននេះលោកបានចុះកិច្ចសន្យាលក់ Franchise ឱ្យទៅវិនិយោគិនវៀតណាមដើម្បីយកទៅធ្វើអាជីវកម្មបន្តនៅប្រទេសរបស់គេ។ សហគ្រិនវ័យក្មេងរូបនេះបន្តថា អ្វីដែលធ្វើឱ្យវិនិយោគិនបរទេសសម្រេចចិត្តទិញ Franchise ពីក្រុមហ៊ុនរបស់លោកយកទៅធ្វើអាជីវកម្មបន្តនេះគឺដោយសារ តែក្រុមហ៊ុនរបស់លោកផ្គត់ផ្គង់សម្ភារជាគ្រឿងបន្លាស់រថយន្តប្រកបដោយគុណភាពខ្ពស់នាំចូលពីក្រុមហ៊ុនដើមដែលមានមូលដ្ឋាននៅប្រទេសចិន អាមេរិក ជប៉ុន អាល្លឺម៉ង់ និងសហគមន៍អឺរ៉ុបជាដើម។
ក្រៅពីផ្តល់ជូននូវគ្រឿងបន្លាស់គុណភាពហើយ ហាងរបស់លោកក៏មានជាងបម្រើសេវាកម្មប្តូរគ្រឿងបន្លាស់ប្រកបដោយជំនាញខ្ពស់ ដែលសុទ្ធតែធ្លាប់បានទៅផ្លាស់ប្តូរបទពិសោធ ក៏ដូចជាបានទៅសិក្សាជំនាញផ្ទាល់ពីក្រុមហ៊ុនដើម ជាពិសេសប្រទេសថៃ និងប្រទេសចិនដែលធ្វើឱ្យអតិថិជនមានជំនឿទុកចិត្ត ហើយមកទទួលយកសេវាកម្មក្នុងហាងរបស់លោកមានចំនួនកាន់តែច្រើនឡើងៗពីមួយខែទៅមួយខែ។
លោកមានប្រសាសន៍ថា «ការដាក់គជ់ចង្កៀងនេះគឺដើម្បីឱ្យចង្កៀងស្អាត បំភ្លឺផ្លូវពេលយប់បានច្បាស់ល្អ ហើយការកែចង្កៀងនេះសុទ្ធតែធ្វើឡើងទៅតាមស្តង់ដារលក្ខណៈបច្ចេកទេសដែលក្រសួងបានកំណត់ដើម្បីធានាសុវត្ថិភាពខ្លួនឯង និងអ្នកដទៃ»។
លោកថា ហាងរបស់លោកបានចាប់ដំណើរការតាំងពីឆ្នាំ2013មក ដោយសារតែលោកសង្កេតឃើញថា ការផ្គត់ផ្គង់គ្រឿងបន្លាស់រថយន្តនៅក្នុងទីក្រុងកាលណោះភាគច្រើនមិនសូវមានគុណភាពស្តង់ដារគួរឱ្យទុកចិត្តបាននោះទេ ហើយតម្លៃក៏គ្មានការកំណត់ច្បាស់លាស់នោះដែរ គឺអាស្រ័យទៅលើការកាត់ថ្លៃតាមមាត់របស់ម្ចាស់ហាងនីមួយៗ។
ដោយឃើញបញ្ហាអសកម្មនេះលោកបានសម្រេចចិត្តនាំចូលគ្រឿងបន្លាស់រថយន្តលក្ខណៈស្តង់ដារដែលមានតម្លៃសមរម្យ និងមានការធានារយៈពេលជូនអតិថិជនទើបធ្វើឱ្យអតិថិជនមានការគាំទ្រកាន់តែច្រើនឡើងៗ មិនថាតែប្រជាជនខ្មែរទេសូម្បីតែប្រជាជនដែលនិយមលេងឡាននៅប្រទេសជិតខាងក៏មកទទួលសេវាឡើងស៊េរី និងដាក់គជ់ចង្កៀងនេះដែរ។
លោកបញ្ជាក់ថា ក្នុងនាមជាកូនខ្មែរ ការធ្វើអាជីវកម្មមួយគឺមិនមែនសំដៅតែទៅលើប្រាក់ចំណេញមួយមុខនោះទេ ប៉ុន្តែត្រូវគិតពីកិត្តិយសកេរ្តិ៍ឈ្មោះក្រុមហ៊ុនដែលបង្កើតឡើងដោយកូនខ្មែរដើម្បីឱ្យបរទេសបានឃើញថា កូនខ្មែរយើងក៏មានសមត្ថភាពមិនចាញ់បរទេសនោះដែរ ទើបមានការគាំទ្រពីអតិថិជនកាន់តែច្រើនឡើងៗ រហួតមានក្រុមហ៊ុនបរទេសទិញFranchiseយកទៅធ្វើអាជីវកម្មបន្តដូច្នេះ៕
July 12, 2017
បញ្ញា សិទ្ធិ ក្រោយពីបាត់មុខយូរ ចង់ស្ដារដើមឡើងវិញ
លោក បញ្ញា សិទ្ធិ ដែលធ្លាប់តែឡើងបង្ហាញវត្ដមានតាមកញ្ចក់ស្ថានីយទូរទស្សន៍ក្នុងនាមជាតារាចម្រៀង ពិធីករនៅក្នុងកម្មវិធីនានាបានបាត់មុខមួយរយៈធំ ធ្វើឱ្យមហាជនមួយចំនួនស្ទើរតែភ្លេចមុខលោកទៅហើយនោះ ស្រាប់តែថ្មីៗនេះលោកបានបង្ហាញវត្ដមានសាជាថ្មីដោយអះអាងថា លោកនឹងស្រង់ដើមវិញហើយ។
ការពិតលោក បញ្ញា សិទ្ធិ មិនបានឈប់សម្រាក ឬមានបំណងផ្អាកពីការងារសិល្បៈឡើយ ពោលគឺមួយរយៈចុងក្រោយនេះលោកឧស្សាហ៍មានឱកាសបានចេញសម្ដែងនៅក្រៅប្រទេស ខណៈប្រជាជនខ្មែររស់នៅឯនាយសមុទ្រក៏អន្ទះសារង់ចាំចង់ឃើញវត្ដមានលោកដោយផ្ទាល់ដែរ។ ក្រោយពីត្រឡប់មកកាន់ប្រទេសកំណើតវិញ លោកហាក់ដឹងថា ការអវត្ដមាននៅលើទីផ្សារសិល្បៈមួយរយៈនេះ ពិតជាបានធ្វើឱ្យលោកបាត់ប្រជាប្រិយភាពខ្លះមែនសម្រាប់ទីផ្សារក្នុងស្រុក។
លោក បញ្ញា សិទ្ធិ បានបញ្ជាក់ថា បន្ទាប់ពីត្រឡប់មកពីសម្ដែងនៅក្រៅប្រទេសលោកប្រហែលជាផ្អាកចេញទៅបរទេសមួយរយៈ ព្រោះលោកចង់ពង្រឹងទីផ្សារក្នុងស្រុកឱ្យមានសម្ទុះគាំទ្រដូចមុនសិន ស្របពេលដែលទីផ្សារក្នុងស្រុកក៏អាចរកប្រាក់ចំណូលបានច្រើនផងដែរ។ ជាមួយគ្នានេះលោកក៏នឹងបន្ដថតខ្សែភាពយន្ដទៅតាមអ្វីដែលបានគ្រោងទុក ខណៈលោកទទួលបានតំណែងតួឯកប្រុសប្រមាណជា 2ទៅ3រឿង។
តារាសម្ដែងរូបនេះបន្ដថា ក្រៅពីនេះលោកក៏គ្រោងនឹងចេញបទ Original Song របស់ខ្លួនក្នុងរង្វង់1សប្ដាហ៍ខាងមុខនេះ បន្ទាប់ពីលោកបានប្រើពេលផលិតវាអស់រយៈពេលយូរគួរសមហើយ។ បទចម្រៀងនោះមានចំនួនពីរបទ មួយបទជាប្រភេទមនោសញ្ចេតនា មួយបទទៀតជាប្រភេទបទញាក់។ ជាមួយគ្នានេះដែរ លោក បញ្ញា សិទ្ធិ បានបញ្ជាក់ថា៖«ការផលិតបទចម្រៀងរបស់ខ្ញុំ គឺបានការផ្ដល់យោបល់ពីបងប្រុសម្នាក់មានងារជាឯកឧត្ដម ហើយខ្ញុំជឿជាក់ថា បទចម្រៀងទាំងពីរបទនេះនឹងទទួលបានការគាំទ្រជាមិនខាន ពីព្រោះបទទាំងនេះ គឺជាស្នាដៃនិពន្ធរបស់អ្នកនិពន្ធដ៏ល្បីឈ្មោះមួយរូបផងដែរ»។
គួរបញ្ជាក់ថា មុនពេលលោកចេញទៅសម្ដែងនៅក្រៅប្រទេសលោកបានរៀបចំពិធីខួបកំណើតគម្រប់ខួប27ឆ្នាំ ដែលបានធ្វើឡើងកាលពីថ្ងៃទី9 ខែមិថុនា ឆ្នាំ2016 នាភោជនីយដ្ឋានវីហ្រេ្វន ផ្សារបឹងត្របែកដើម្បីសុំសេចក្ដីសុខ និងភាពរីកចម្រើនក្នុងវិថីសិល្បៈរបស់លោក។ គ្រានោះមានការចូលរួមពីតារាល្បីៗជាច្រើន ដូចជាអ្នកនាងលី ម៉ារីណា, អ្នកនាងប៉ែន សុផានី, អ្នកនាងយក់ ថិតរដ្ឋា និងស្វាមី, កុល ដាវី, សុខរក្សា, ថន លក្ខិណា, តូតា, គង់ វង្សយ៉ាទី, ឌួង ហ្សូរីម៉ា ,សូដា នីតា, យ៉ែម សំអូន, សាយ សៀរ៉ា, អេឡិច ហ្សូរ៉ា, អ៊ឹម ជីវ៉ា, លោកកុយ ស៊ីឌឿន, លោកខេន វណ្ណាថាត់, ម៉ាដូណា, រ៉ូលីន, សាន សុម៉ាលី, នៅ ស៊ីនឿន, សុផាលីនដា, កញ្ញាអ៊ីវ៉ា, កញ្ញាឯក សុវណ្ណារ័ត្ន, លី ច័ន្ទសីហា, ផាន់ ម៉ូនីកា និងស្វាមី, ញឹម ចាន់ថន, បូនីតាដាដេណា ព្រមទាំងតារាកិត្តិយសជាច្រើនទៀតផងដែរ៕
July 12, 2017
Jennifer Lopez ព្យាយាមអាក្រាតកាយ និងមិនបិទបាំងកេរ្ដ៍ខ្មាសក្នុងវីដេអូចម្រៀងថ្មី
Jennifer Lopez ទើបតែបញ្ចេញវីដេអូចម្រៀងរបស់នាងនាពេលថ្មីៗនេះ ដែលមានចំណងជើងថា Ni Tú Ni Yoជាអាល់ប៊ុមចម្រៀងទោលរបស់នាង។ បទចម្រៀងនេះ ត្រូវបានច្រៀងរួមគ្នាជាមួយតារាចម្រៀងអេស្ប៉ាញដែលមានឈ្មោះថា Gente de Zona ហើយជាបទចម្រៀងដំបូងបង្អស់ដែលតារាស្រី Jennifer Lopez ច្រៀងជាភាសាអេស៉្បាញនៅក្នុងអាល់ប៊ុមចម្រៀងរបស់នាង។
តារាចម្រៀងវ័យ 47 រូបនេះបានចាប់ផ្ដើមបំផ្ទុះការលក់វីដេអូចម្រៀងរបស់ខ្លួន ខណៈដែលនាងកំពុងតែមានទំនាក់ទំនងស្នេហាជាមួយ Alex Rodriguez ដែលនេះទំនងជាគោលគំនិតមួយក្នុងការទាក់ទាញទស្សនិកជនឱ្យលង់ស្នេហ៍នាង និងការលក់ដាច់ឱ្យបានច្រើន តាមរយៈការថតវីដេអូចម្រៀងអាក្រាតកាយនៅក្នុងព្រៃ ហើយនាងថែមទាំងព្យាយាមមិនបិទបាំងកេរ្តិ៍ខ្មាសរបស់នាង ដោយគ្រាន់តែទាញស្លឹកឈើតូចមួយមកបិទបាំងបន្តិចប៉ុណ្ណោះ។
គួរបញ្ជាក់ផងដែរថា វីដេអូចម្រៀងនេះ ត្រូវបានថតនៅលើទឹកដី Isla Morada រដ្ឋ Florida កាលពីអំឡុងខែមិថុនា កន្លងទៅនេះ ក្រោមស្នាដៃដឺកនាំសម្ដែងដោយ Emil Nava ហើយបានបង្ហោះជាផ្លូវការលើបណ្ដាញសង្គម Youtube កាលពីថ្ងៃម្សិលមិញនេះឯង ដែលរហូតមកដល់ម៉ោងនេះមានអ្នកចូលទស្សនាបាន 1 លាន 7 សែននាក់ជាងហើយ៕
July 12, 2017
ចុម! បើ Microsoft ធ្វើអ៊ីចឹង អ្នកប្រើស្រុកខ្មែរមិនចប់ទៅហើយទេឬ?
អ្នកប្រើប្រាស់នៅស្រុកខ្មែរយើង ក៏ដូចជាពិភពលោកដែរ គឺអាចនឹងខកចិត្តខ្លាំង ជាមួយនឹងដំណឹងស្ដីពីការប្រកាសឈប់អភិវឌ្ឍកម្មវិធី និងផ្នែកគាំទ្រដល់ប្រព័ន្ធប្រតិបត្តិការ Windows Phone 8.1សម្រាប់ទូរស័ព្ទដៃ ពីក្រុមហ៊ុន Microsoft កាលពីថ្ងៃម្សិលមិញ។
Microsoft បានប្រកាសឱ្យដឹងថាចាប់ពីថ្ងៃទី11 ខែកក្កដា ឆ្នាំ2017 តទៅ ក្រុមហ៊ុននឹងសម្រេចឈប់គាំទ្រដល់ប្រព័ន្ធប្រតិបត្តិការក្នុងជំនាន់ 8.1 ផ្នែកទូរស័ព្ទដៃហើយ ដោយខ្លួននឹងផ្ដោតសំខាន់ទៅលើតែប្រព័ន្ធWindows 10 Mobile តែមួយគត់ប៉ុណ្ណោះ។ ដូច្នេះ សម្រាប់អតិថិជនដែលមានប្រើប្រាស់ទូរស័ព្ទដៃ ក្រុមហ៊ុនតម្រូវឱ្យធ្វើការ Update ទៅជំនាន់ក្រោយ។
នេះមានន័យថា ក្រុមហ៊ុនកំពុងតែលេងនៅលើផ្លូវតែមួយដូចនឹងក្រុមហ៊ុន Apple ដែលក្រោយពីចេញ iOS ថ្មីម្ដងៗ គឺត្រូវកាត់ទូរស័ព្ទម៉ូដែលចាស់ចោល ព្រោះគ្មានលទ្ធភាពអាចដំឡើងទៅជំនាន់ថ្មីបាន (សមត្ថភាព Ram និង CPU មិនគ្រប់តម្រូវការ) ហើយការប្រកាសរបស់ Microsoft ក៏នឹងធ្វើឱ្យទូរស័ព្ទក្លាយជាឧបករណ៍អេឡិចត្រូនិកហួសជំនាន់ (Out of date) ប្រើបានតែកម្មវិធីហ្គេមដែលមានស្រាប់ ឬជំនាន់ទាបៗជាដើមប៉ុណ្ណោះ។
តាមរបាយការណ៍មួយបានឱ្យដឹងថា ក្នុងចំណោមស្មាតហ្វូនប្រើប្រាស់ Windows Phone ទាំងអស់ ចំនួនជាង 70% នៅមិនទាន់ Update ហើយអ្នកប្រើប្រាស់កម្ពុជាក៏មានមិនតិចដែរ ដែលកំពុងប្រើឧបករណ៍អេឡិចត្រូនិកដំណើរការដោយប្រព័ន្ធWindows Phone 8.1នេះ។ ដូច្នេះ សម្រាប់អ្នកប្រើប្រាស់ខ្មែរយើងដែលកំពុងប្រើផលិតផលដំណើរការដោយប្រព័ន្ធខាងលើ អាចសាកចូលទៅពិនិត្យមើលក្នុង Setting ក្រែងលោឧបករណ៍ខ្លួនអាច Update ទៅជំនាន់ថ្មីសម្រាប់ទូរស័ព្ទបាន៕
July 12, 2017
សារព័ត៌មាន មានឥទ្ធិពលអ្វីខ្លះចំពោះវិស័យអប់រំ?
សារព័ត៌មាន ត្រូវបានគេចាត់ទុកថា ជាផ្នែកមួយនៃសង្គម ហើយមានប្រទេសខ្លះចាត់ទុកសារព័ត៌មានថាជាអំណាចទី4 នៃប្រទេសថែមទៀតផង ព្រោះសារព័ត៌មានជាផ្នែកមួយក្នុងការកសាងសមត្ថភាពនៃគំនិតរបស់ប្រជាជន និងជាសំឡេងរបស់ប្រជាជននៅក្នុងប្រទេសថែមទៀតផង។
ពាក់ព័ន្ធនឹងបញ្ហានេះគណៈកម្មការក្លិបអ្នកកាសែតកម្ពុជាលោក ឆាយ សុផល បានលើកឡើងថា សារព័ត៌មាន មានឥទ្ធិពលលើវិស័យជាច្រើននៅក្នុងសង្គម ជាពិសេសវិស័យអប់រំ។ តាមរយៈព័ត៌មានគ្រប់ភាគីក្នុងសង្គមនឹងឃើញពីភាពវិជ្ជមាន និងអិវជ្ជមាន ឬចំណុចខ្វះខាតនានាដែលត្រូវកែតម្រួវ។ កញ្ចក់សង្គមមួយនេះក៏ជាផ្នែកមួយមិនអាចខ្វះបានផងដែរចំពោះការអភិវឌ្ឍវិស័យអប់រំ ព្រោះបញ្ហាផ្សេងៗដែលកើតចេញពីការផលិតរបស់អ្នកសារព័ត៌មាន អាចនឹងក្លាយជាចំណុចសំខាន់សម្រាប់ការស្វែងយល់របស់អ្នកជំនាញលើការអភិវឌ្ឍផ្នែកសិក្សាធិការ។

អ្នកជំនាញសារព័ត៌មានខាងលើបានបង្ហាញផងដែរថា បញ្ហាសម្ភារ បញ្ហាគ្រូ និងបញ្ហាប្រឈមនានាដែលអ្នកសារព័ត៌មានបានសរសេរអាចនឹងធ្វើឱ្យមានការកែប្រែ ឬបញ្ចេញសំឡេងឱ្យកាន់តែខ្លាំងដើម្បីបង្កើនការយកចិត្តទុកដាក់ដល់សាលានានានៅទូទាំងប្រទេស។ សម្រាប់ការសិក្សាជាទូទៅវិញ អ្នកសារព័ត៌មានក៏បានសរសេរអត្ថបទចំណេះដឹងជាប្រភេទបទយកការណ៍ ឬសម្ភាសដើម្បីអប់រំច្រើនដល់ប្រជាជនដែលអាចធ្វើឱ្យមានការផ្លាស់ប្តូរ និងអភិវឌ្ឍសមត្ថភាពឱ្យកាន់តែប្រសើរឡើង។
លោក ឆាយ សុផល បាននិយាយថា៖ «ព័ត៌មានអប់រំ ដែលបង្ហាញពីការសិក្សាស្រាវជ្រាវ និងការបង្កើតគំនិតថ្មីៗ អាចធ្វើឱ្យប្រជាជននៅក្នុងប្រទេសទទួលបាននូវចំណេះដឹងថ្មីៗដើម្បីជាមូលដ្ឋានក្នុងការអភិវឌ្ឍការគិតដើម្បីបង្កើតសកម្មភាពជាវិជ្ជមាននៅក្នុងសង្គម។ ចាប់ផ្តើមពីការអភិវឌ្ឍគុណភាពរបស់ប្រជាជនប្រទេសជាតិក៏នឹងរីកចម្រើនតាមនោះដែរ»។
ស្រដៀងគ្នានេះដែរ លោក ឈាវ ណាក់ ទីប្រឹក្សាជាន់ខ្ពស់នៃវិទ្យាស្ថានតស៊ូមតិ និងគោលនយោបាយ បានថ្លែងថា ព័ត៌មានពិតជាមានសារៈសំខាន់ណាស់សម្រាប់សង្គមជាពិសេស គឺលើការអប់រំប្រជាជននៅក្នុងប្រទេស។ វាអាចជួយតម្រង់ទិសដល់បុគ្គលគ្រប់ផ្នែកដើម្បីពង្រឹងប្រព័ន្ធអប់រំឱ្យស្ថិតក្នុងគន្លងត្រឹមត្រូវ មានតម្លាភាព គណនេយ្យភាព និងប្រសិទ្ធភាពខ្ពស់។
លោក ឈាវ ណាក់ បានបន្តទៀតថា៖ “ព័ត៌មាននឹងធ្វើឱ្យការអប់រំទូទៅមានការចូលរួមចំណែកកាន់តែសកម្ម មានភាពប្រកួតប្រជែង មានការកំណត់ទិសដៅច្បាស់លាស់ និងមានការសម្រេចចិត្តត្រឹមត្រូវ ជាពិសេសទស្សនៈវិស័យវែងឆ្ងាយសម្រាប់ការអប់រំ»។
អ្នកជំនាញខាងលើបានលើកឡើងផងដែរថា ព័ត៌មានជាផ្នែកមួយយ៉ាងសំខាន់ក្នុងការអប់រំប្រជាជនឱ្យបានយល់ដឹងពីការប្រែប្រួលនៃដំណើររបស់សង្គម ហើយត្រៀមខ្លួនឱ្យស្របទៅតាមស្ថានភាពរបស់សង្គម។ ក្រៅពីនេះការចូលរួមចំណែកពីសារព័ត៌មាន អាចនឹងបង្កភាពងាយស្រួលដល់ក្រសួងអប់រំ ដើម្បីស្វែងយល់ពីស្ថានភាពទូទៅរបស់ប្រជាជន និងសិស្សានុសិស្សដែលកំពុងសិក្សាផងដែរ៕
July 12, 2017
Man Uted ស្ថិតកាន់តែកៀកក្នុងការផ្ទេរ Perisic ចេញពីក្លិប Inter
ក្លិបបិសាចក្រហម Manchester United កំពុងតែស្ថិតយ៉ាងប្រកៀកក្នុងការចុះហត្ថលេខាជាមួយនឹងខ្សែប្រយុទ្ធ Ivan Perisic។ នេះបើយោងទៅតាមកាសែត The Independent។
ក្លិបបិសាចក្រហមមួយនេះបានធ្វើការងារទាក់ទងនឹងការផ្ទេរ Perisic ពីក្លិប Inter Milan អស់រយៈពេលជាច្រើនខែមកហើយ ហើយបច្ចុប្បន្ន អ្វីៗហាក់កំពុងតែមានភាពច្បាស់លាស់ និងមានដំណើរការទៅមុខហើយ។ ក្លិប Inter របស់ក្របខ័ណ្ឌ Serie A បានដាក់តម្លៃខ្លួន 50លានផោន (ស្មើនឹង 64លានដុល្លារអាមេរិក) សម្រាប់ខ្សែប្រយុទ្ធដ៏ឆ្នើមរូបនេះ ប៉ុន្តែក្រុម Man United ដែលជាម្ចាស់ជើងឯកក្របខ័ណ្ឌ Europa League នៅតែជឿជាក់ថា ពួកគេអាចនាំយក Perisic វ័យ28ឆ្នាំក្នុងតម្លៃខ្លួនតិចជាងនេះបាន ពោលគឺច្រើនជាង 45លានផោន។
វាត្រូវបានគេផ្សព្វផ្សាយថា ខ្សែប្រយុទ្ធអន្តរជាតិក្រូអាស៊ីរូបនេះ បានយល់ព្រមទៅលើលក្ខខណ្ឌផ្ទាល់ខ្លួនរួចជាស្រេចហើយ ជាមួយក្លិប Man United។ Man United បានបញ្ជាក់ថា ពួកគេជឿជាក់ថា ការផ្ទេរនេះអាចនឹងត្រូវបំពេញជាផ្លូវការ និងថា ក្លិបរបស់អង់គ្លេសមួយនេះកំពុងតែសម្លឹងរកការឆ្លើយតបទៅនឹងការទាមទាររបស់ក្លិប Inter ក្នុងរយៈពេលខាងមុខនេះ ដើម្បីធានាថា Perisic នឹងបានផ្ទេរទៅកាន់កីឡដ្ឋាន Old Trafford នៅរដូវកាលក្រោយ។ លោក Luciano Spalletti ដែលជាអ្នកចាត់ការទូទៅរបស់ក្លិប Inter ចង់ឲ្យកីឡាកររូបនេះបន្តនៅ ប៉ុន្តែ Perisic ពិតជាចង់ផ្ទេរទៅកាន់កីឡដ្ឋាន Old Trafford។
លោក Jose Mourinho ចង់ធ្វើការពង្រឹងតំបន់ប្រយុទ្ធរបស់លោកជាមួយនឹងខ្សែប្រយុទ្ធវ័យ 28ឆ្នាំរូបនេះ ដែលនឹងត្រូវរ៉ាប់រងក្នុងតំបន់ប្រយុទ្ធយ៉ាងល្អ។ អ្នកចាត់ការទូទៅរបស់ក្លិប Man United រូបនេះ នៅតែមិនមានភាពច្បាស់លាស់ទៅលើសមត្ថភាពរបស់កីឡាករ Anthony Martial, Henrikh Mkhitaryan និង Jesse Lingard៕
ប្រភពពី៖ Daily Mail
July 12, 2017
ខុនដូចំនួន 7,000 យូនីតទៀត នឹងដាក់ចូលទីផ្សារក្នុងឆ្នាំនេះ
ភ្នំពេញៈ ខុនដូចំនួន 7,000យូនីតទៀត នឹងដាក់ចូលទីផ្សារនៅឆ្នាំនេះ ខណៈការលក់ស្ថិតនៅក្នុងភាពមិនច្បាស់លាស់នៅឡើយ។
អ្នកនាង អាន សុធីតា នាយិកាក្រុមហ៊ុន CBRE Cambodia បានថ្លែងឲ្យដឹងតាមទូរស័ព្ទនាព្រឹកថ្ងៃទី12 កក្កដានេះថា តាមការព្យាករចំនួនខុនដូផ្គត់ផ្គង់ចូលទីផ្សារនឹងកើនដល់ 7,000យូនីតបន្ថែមទៀត ដែលធ្វើឲ្យចំនួនខុនដូផ្គត់ផ្គង់ចូលទីផ្សារសរុបកើនដល់ប្រមាណ 12,000យូនីត គិតត្រឹមដំណាច់ឆ្នាំ2017នេះ។ អ្នកនាងបន្តថា ការលក់នៅតែដំណើការសម្រាប់ខុនដូដែលផ្តោតលើប្រជាជនមានជីវភាពមធ្យម ប៉ុន្តែខុនដូដែលមានតម្លៃថ្លៃផ្តោតលើប្រជាជនមានជីវភាពធូរធារខ្លាំងមានការលក់យឺតបន្តិច។
អ្នកនាងបន្តថា “វាមិនមានអ្វីគួរឲ្យបារម្ភនោះទេ បើទោះជាមានការបារម្ភពីការផ្គត់ផ្គង់លើសតម្រូវការក្តី ប៉ុន្តែទីផ្សារជាក់ស្តែងមិនមានបញ្ហានោះទេ”។ អ្នកនាងបន្តថា “យើងពិតជាមានការលំបាកក្នុងការប្រមូលទិន្នន័យពីការលក់ ដោយសារគម្រោងខុនដូនីមួយៗ មិនបង្ហាញពីតម្លាភាពនៃការលក់របស់ពួកគេនោះទេ”។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកគីម ហ៊ាងបានថ្លែងថា ការទិញខុនដូសម្រាប់វិនិយោគមិនសូវមានច្រើននោះទេ ដោយសារមិនសូវមានភាពចំណេញ និងពិបាកលក់ចេញ ប៉ុន្តែតម្លៃដីធ្លី និងផ្ទះនៅតាមបុរីនានាបានបន្តកើនឡើង និងមានតម្រូវការច្រើន។ លោកបន្តថា ការវិនិយោគខុនដូច្រើន មិនមានបញ្ហាក្នុងទីផ្សារនោះទេ វាអាស្រ័យលើពេលវេលាប៉ុណ្ណោះ៕
July 12, 2017
ខ្សែបម្រើដ៏មានឥទ្ធិពល Douglas Costa របស់ Bayern បំពេញការផ្ទេរទៅ Juventus
ខ្សែបម្រើដ៏មានឥទ្ធិពល Douglas Costa បានបំពេញការផ្ទេររបស់គេទៅកាន់ក្លិបយក្សអ៊ីតាលី Juventus របស់ក្របខ័ណ្ឌ Serie A ក្រោយពីធ្វើដំណើរទៅដល់ទីក្រុង Turin នៅថ្ងៃពុធនេះ។
រូបភាពវីដេអូនៃការទៅដល់របស់ខ្សែបម្រើស្លាប Costa ក្នុងទីក្រុង Turin ត្រូវបានចាក់បង្ហាញនៅលើគណនី Twitter របស់ក្លិប Juventus។ នេះបើយោងទៅតាមកាសែត MailOnline ដែលបាននិយាយថា ខ្សែបម្រើអន្តរជាតិប្រេស៊ីល Costa នឹងចុះហត្ថលេខាជាមួយនឹងក្លិប Juventus ដោយមកពីក្លិប Bayern Munich ក្នុងកិច្ចព្រមព្រៀងខ្ចីជើងជាមុនសិនក្នុងតម្លៃជាទឹកប្រាក់5លានផោន ប៉ុន្តែ តម្លៃខ្លួននេះអាចនឹងកើនដល់35លានផោន (ស្មើនឹង45លានដុល្លារអាមេរិក) ប្រសិនបើការផ្ទេរនេះ ក្លាយជាការផ្ទេរជាអចិន្ត្រៃយ៍។
ការផ្ទេរនេះនឹងបញ្ចប់រយៈពេល2ឆ្នាំនៅឯកីឡដ្ឋាន Allianz Arena សម្រាប់ Costa ក្រោយពីផ្ទេរមកពីក្លិប Shakhtar Donetsk ទៅកាន់ក្លិប Bayern ក្នុងតម្លៃខ្លួន21លានផោន កាលពីខែកក្កដា ឆ្នាំ2015កន្លងមក។ មុននេះបន្តិច លោក Karl-Heinz Rummenigge ដែលជាប្រធានក្លិប Bayern បានបញ្ជាក់ថា ក្លិបទាំងពីរកំពុងតែស្ថិតក្នុងការពិភាក្សាគ្នាជាផ្លូវការអំពីការផ្ទេររបស់ Costa។
លោក Rummenigge បានឲ្យដឹងថា៖ «យើងកំពុងតែស្ថិតក្នុងដំណាក់កាលនៃការចរចាគ្នា ហើយខ្ញុំអាចនិយាយថា វាមានចំណុចវិជ្ជមានជាច្រើន និងជាក់លាក់ ប៉ុន្តែ ខ្ញុំមិនអាចនិយាយថា ការផ្ទេរនេះត្រូវបានបំពេញនៅថ្ងៃនេះឡើយ»។
Costa ត្រូវបានចាត់ទុកថាជាកីឡាករលើសពីតម្រូវការនៅឯក្លិប Bayern ក្រោយពីក្លិបយក្សអាល្លឺម៉ង់មួយនេះបានយល់ព្រមចុះហត្ថលេខាជាមួយនឹងខ្សែបម្រើប្រយុទ្ធ James Rodriguez របស់ក្លិប Real Madrid ក្នុងលក្ខខណ្ឌខ្ចីជើង2ឆ្នាំ៕
ប្រភពពី៖ ESPN
July 12, 2017
អត្ថប្រយោជន៍ 8យ៉ាង បានមកពីការឆាប់ក្រោកពីដំណេក
ខាងក្រោមនេះគឺជាគុណសម្បត្តិទាំង ៨យ៉ាងដែលបានមកពីការឆាប់ក្រោកពីដំណេក៖
1.ជួយឲ្យអ្នករក្សាបាននូវភាពវិជ្ជមាន
មនុស្សម្នាក់ អាចនឹងរក្សានូវ ភាពជាវិជ្ជមានរបស់គេបាន ពេញមួយថ្ងៃប្រសិនបើគេ បានក្រោកពី ដំណេកនៅក្នុងពេលព្រឹកព្រលឹម។ អាកប្បកិរិយាជាទូទៅ នឹងមានការផ្លាស់ប្តូរ ហើយវានឹងបង្កើតនូវអារម្មណ៍ នៃភាពស្រស់ស្រាយមួយ។ ដោយការឆាប់ ក្រោកពីដំណេកនោះ អ្នកនឹងអាច បន្តស្ថិតនៅ មានកម្លាំងចិត្តជានិច្ច។វានឹងជួយធ្វើឲ្យ យើងម្នាក់ៗ អាចរក្សាបានូវអារម្មណ៍ ធូរស្រាលបានពេញមួយ ថ្ងៃ ។
2. បង្កើននូវកម្រិតនៃទំនុកចិត្តលើខ្លួនឯង
មនុស្សដែល ក្រោកពីដំណេកយឺតយ៉ាវ ជារឿយៗ តែងប្រឈមនឹងបញ្ហា នៃការមានទំនុកចិត្តទាប លើខ្លួនឯង។ ប៉ុន្តែការ ឆាប់ក្រោកពីដំណេកអាច ធ្វើឲ្យមនុស្សម្នាក់បង្កើន កម្រិតនៃទំនុកចិត្តលើខ្លួនឯងបានទៅវិញ ។ អ្នកនឹងទទួលបាននូវ អារម្មណ៍នៃការពេញចិត្ត និងមានភាពរីករាយ ប្រសិនបើអ្នក បានក្រោកពីគេងនៅក្នុងពេលព្រឹកព្រលឹម។
3. បង្កើននូវផលិតផលការងាររបស់អ្នក
អារម្មណ៍នៃភាពស្រស់ស្រាយ នៅក្នុងពេលព្រឹក នឹងធ្វើឲ្យអ្នកធ្វើការបាន យ៉ាងសកម្មនៅក្នុងពេល ថ្ងៃ។ ដោយការក្រោកពីដំណេក នៅក្នុងពេលព្រឹក នឹងអាចធ្វើឲ្យមនុស្សម្នាក់ បង្កើនបាននូវ ផលិតផលការងារ បានជាទីគាប់ចិត្ត។អារម្មណ៍នៃភាពស្រស់ស្រាយ នឹងធ្វើឲ្យអ្នកបង្កើតបាននូវ គំនិតថ្មីៗ ជាច្រើន ដូច្នេះហើយវានឹងអាច ជះឥទ្ធិពលទៅលើសមិទ្ធិផលការងារបស់អ្នក។
4. ស្វែងរកឃើញការពិតពីខ្លួនអ្នក
មនុស្សម្នាក់ ដែលបានក្រោកពី ព្រឹកព្រលឹមជារឿយៗ តែងតែអាចស្វែងរកឃើញ នូវផ្លូវនៃការឆ្ពោះទៅ កាន់ការស្វែងរកការ ពិតរបស់ខ្លួនឯង។ ការតាំងសមាធិ និង ការហាត់យូហ្គានៅក្នុងពេលព្រឹកព្រលឹម អាចជួយធ្វើឲ្យអ្នក មានរាងកាយ និងអារម្មណ៍ធូរស្រាល បានពេញមួយថ្ងៃ ។ មនុស្សម្នាក់ នឹងអាច ទទួលបាននូវតុល្យភាពនៃផ្លូវចិត្តដ៏ត្រឹមត្រូវមួយ ដោយការបន់ស្រន់នៅក្នុងពេលព្រឹកព្រលឹម ។ វានឹងជួយធ្វើឲ្យផ្លូវចិត្តរបស់យើងម្នាក់ៗ បានស្ងប់សុខល្អ។
5.កាត់បន្ថយការមានស្ត្រេស
ការចូលគេងយឺតយ៉ាវ និង ការក្រភ្ញាក់ពីដំណេកអាច នឹងបណ្តាលឲ្យខ្លួនអ្នកមានស្ត្រេស ដោយសារតែរាងកាយអ្នក មិនមានតុល្យភាពត្រឹមត្រូវមួយ។ ដោយការក្រោកពីដំណេក នៅក្នុងពេលព្រឹក ព្រលឹម នោះវានឹងជួយ ឲ្យយើងកាត់បន្ថយបាន នូវស្ត្រេសបានចេញពី រាងកាយ និង ផ្លូវចិត្ត។ កាលបើផ្លូវចិត្តរបស់យើងស្រស់ស្រាយ នោះមនុស្សម្នាក់ក៏នឹងទទួលបាននូវ ភាពស្រស់ថ្លា ជាជាងការមានស្ត្រេសផ្ទុកទុក នៅក្នុងខ្លួនទៀតនោះដែរ។
6. មានពេលក្នុងការសម្រាក
ប្រសិនបើមនុស្សម្នាក់ បានក្រោកពីព្រឹក នោះគេនឹងអាចធ្វើអ្វីៗបាន ដូចជាការគ្រោងទុក។ ការកំណត់ទុក នូវរឿងរ៉ាវចាំបាច់ដែល ត្រូវធ្វើមុនគេ ជាប្រចាំថ្ងៃ នឹងផ្តល់ពេលឲ្យអ្នក មានពេលវេលាបាន សម្រាកគ្រប់គ្រាន់ បន្ថែមទៀត។ នៅក្នុងពេលទំនេរនោះ ពួកគេអាច ធ្វើនូវកិច្ចការដែលជា ចំណង់ចំណូលចិត្តរបស់ពួកគេដូចចា សរសេរកំណត់ហេតុ ឬ គូររូបជាដើម។
7. បង្កើនកម្រិតនៃការប្រមូលផ្តុំអារម្មណ៍
ដោយការក្រោកពីដំណេក នៅក្នុងពេលព្រឹក នោះយើងម្នាក់ៗ នឹងអាចធ្វើឲ្យថាមពល នៃការចងចាំ របស់យើងប្រសើរឡើង។ អ្នកដែលតែងតែក្រោកពីព្រឹក ក៏នឹងអាចធ្វើការប្រមូលផ្តុំអារម្មណ៍បានល្អប្រសើរ ជាង អ្នកដែលមិនបានក្រោកពីព្រឹកនោះដែរ។
8. ជួយធ្វើឲ្យអ្នកមានសុខភាពល្អ
វាជាការពិតមួយ ដែលថា មនុស្សដែលឆាប់ចូលគេង និង ឆាប់ក្រោកពីព្រឹកគឺតែងតែមានស្ថានភាព រូបរាងកាយ និង សុខភាពមាំទាំជាងអ្នកដែលមិនបានធ្វើដូចនេះ ។ ដោយគ្រាន់តែការ ឆាប់ក្រោកពី ដំណេកវានឹងធ្វើឲ្យអ្នករក្សាបាននូវទម្លាប់ ដ៏ល្អមួយចំពោះសុខ៕
July 12, 2017