Category: សង្គម និងសេដ្ឋកិច្ច

ក្លិបយក្សជប៉ុន FC Tokyo ខ្ចីជើងខ្សែបម្រើឆ្នើមពីក្លិប Bangkok United របស់ថៃ
ក្លិបយក្សរបស់ជប៉ុន FC Tokyo បានចុះហត្ថលេខាជាមួយនឹងខ្សែបម្រើដ៏ឆ្នើមអន្តរជាតិថៃ Jakkit Wachpirom ពីក្លិប Bangkok United ក្នុងលក្ខខណ្ឌខ្ចីជើងរហូតដល់បញ្ចប់រដូវកាលនេះ។ នេះបើយោងតាមការប្រកាសរបស់ក្លិបស្ថិតក្នុងក្របខ័ណ្ឌកំពូល J-League មួយនេះ កាលពីថ្ងៃពុធ។ Jakkit វ័យ20ឆ្នាំ បានលេងឲ្យក្រុមជម្រើសជាតិថៃអាយុក្រោម23ឆ្នាំ និងបានស្ថិតជាសមាជិករបស់ក្រុមជម្រើសជាតិថៃដែលបានបញ្ចប់ក្នុងចំណាត់ថ្នាក់លេខ2ក្នុងព្រឹត្តិការណ៍ Asian Under-19 Championship កាលពីឆ្នាំមុន។ Jakkit គឺជាកីឡាករថៃទី2ដែលបានចូលរួមជាមួយនឹងក្របខ័ណ្ឌកំពូលជប៉ុន J-League ក្រោយពីខ្សែបម្រើដ៏ឆ្នើម Chanathip Songkrasin បានផ្ទេរទៅកាន់ក្លិប Consadole Sapporo។ កីឡាករ Jakkit បានឲ្យដឹងថា៖ «ខ្ញុំពិតជារីករាយណាស់ក្នុងការមានឱកាសទៅលេងនៅក្រៅប្រទេសនៅឯក្លិបល្បីដូចជា FC Tokyo នេះ។ ខ្ញុំនឹងខិតខំព្យាយាមឲ្យអស់ពីសមត្ថភាពតាមដែលខ្ញុំអាចធ្វើបាន និងព្យាយាមដណ្តើមលទ្ធផលឲ្យបានល្អបំផុត»។ ស្របពេលជាមួយគ្នានេះ ក្លិប FC Tokyo ក៏បានបញ្ជាក់ផងដែរថា ពួកគេបានចុះហត្ថលេខាជាមួយនឹងខ្សែបម្រើ Lipe Veloso ដែលជាអតីតកីឡាកររបស់ក្លិបប្រេស៊ីល Palmeiras និងខ្សែការពារអន្តរជាតិកូរ៉េខាងត្បូង Jang Hyun-soo ពីក្លិប Guangzhou R&F។ Jang ធ្លាប់បានលេងឲ្យក្លិប FC Tokyo ពីររដូវកាលមុនពេលផ្ទេរទៅកាន់ក្លិប Guangzhou កាលពីឆ្នាំ2014៕
ប្រភពពី៖ Bangkok Post
July 13, 2017
ប្រព័ន្ធសេវា 2G ផ្ដើមត្រូវបានគេបំភ្លេចចោល…
ប្រព័ន្ធសេវា 2G ដែលមានកំណើតតាំងពីឆ្នាំ1991 របស់ប្រទេសហ្វាំងឡង់ ចាប់ផ្ដើមត្រូវបានក្រុមហ៊ុនបណ្ដាញទូរស័ព្ទចល័តជាច្រើនទូទាំងពិភពលោក ជាពិសេសតំបនអាស៊ីបោះបង់ចោលបណ្ដើរៗហើយ គិតត្រឹមឆ្នាំ 2017 ខណៈប្រព័ន្ធបណ្ដាញបំពាក់បច្ចេកវិទ្យាថ្មីដូចជា 4G LTE និង 5G ក្លាយជាតម្រូវការដ៏មិនអាចខ្វះបានរបស់អ្នកប្រើប្រាស់។
យោងតាមសារព័ត៌មានចិន ឆាយណាប៉ុស្តិ៍ បានរាយការណ៍ថា ប្រតិបត្តិករផ្តល់បណ្តាញ និងសេវាទូរស័ព្ទចំនួន 3 រួមមាន Chunghwa Telecom, Taiwan Mobile & Far EasTone បានបិទមិនឱ្យដំណើរការបណ្តាញ និងសេវា 2G របស់ខ្លួន បើទោះបីជាមានការបដិសេធមិនទទួលយកពីសំណាក់អតិថិជនរបស់ខ្លួនជិត 90,000 នាក់ ស្មើនឹង ០.3% ក្នុងចំណោម 31 លាននៃអតិថិជនសរុបរបស់ប្រទេសនេះក៏ដោយ។ នៅក្នុងខែធ្នូ ឆ្នាំ2016 ក្រុមហ៊ុនតែលស្រ្តា ដែលជាប្រតិបត្តិករទូរស័ព្ទដ៏ធំបំផុតរបស់ប្រទេសអូស្រ្តាលីក៏បានបិទដំណើរការបណ្តាញសេវានេះដែរ ក្រោយពីបានដាក់ឱ្យដំណើរការអស់រយៈពេលជាង 23 ឆ្នាំរួចមក។ ចំណែកក្រុមហ៊ុន Optus របស់ស៊ីងតែល ដែលជាគូប្រកួតរបស់ក្រុមហ៊ុនតែលស្រ្តាក៏បានបញ្ឈប់ការផ្តល់បណ្តាញសេវានេះផងដែរនៅក្នុងខែមេសា ឆ្នាំ 2017 ស្របពេលក្រុមហ៊ុន Vodafone របស់ប្រទេសអូស្រ្តាលីមានគម្រោងលុបចោល GSM ដ៏សំខាន់របស់ខ្លួនត្រឹមខែកញ្ញាខាងមុខនេះ។
ទន្ទឹមនឹងនេះដែរ ក្រុមហ៊ុនចំនួន 3 របស់ប្រទេសសិង្ហបុរីក៏បានបញ្ឈប់ការផ្តល់បណ្តាញសេវា 2G នេះផងដែរកាលពីខែមេសាកន្លងទៅ បន្ទាប់ពីការបិទដំណើរការនៃសេវានេះក្នុងរយៈពេល 3 សប្តាហ៍។
ក្នុងនោះ ក្រុមហ៊ុន NTT Codomo របស់ប្រទេសជប៉ុនបានក្លាយជាក្រុមហ៊ុនដែលបានបិទបណ្តាញសេវានេះមុនគេបង្អស់ក្នុងឆ្នាំ 2011។ ទង្វើរបស់ក្រុមហ៊ុននាំមុខគេក្នុងទីផ្សារទូរគមនាគមន៍ជប៉ុនបានធ្វើឱ្យក្រុមហ៊ុនដទៃទៀតរបស់ប្រទេសជប៉ុនបន្តបិទដំណើរការភ្លាមៗផងដែរ សល់តែក្រុមហ៊ុន Softbank ដែលនៅបន្តបម្រើប្រព័ន្ធទូរស័ព្ទដៃផ្ទាល់ខ្លួនហៅថា PHS- Personal Handy-Phone System (ស្តង់ដារជប៉ុន) 2G ដល់អតិថិជនជិត 3 លាននាក់របស់ខ្លួនចាប់តាំងពីការទិញក្រុមហ៊ុន Willcom នៅក្នុងឆ្នាំ 2010។ ស្របពេលដែលបណ្ដាញសេវា 4G LTE បានបើកដំណើរការ ក្រុមហ៊ុនកូរ៉េខាងត្បូង KT ក៏បានបិទសេវានេះដូចគ្នា កាលពីដើមឆ្នាំ 2012៕
July 13, 2017
ហ្អា៎ា!? ហាងបាយសាច់ជ្រូកអាំងរបស់ VJ អាណូ មានអ្នកចង់ទិញ Franchise?
ក្រោយពី VJ អាណូ បង្កើតអាជីវកម្មលក់បាយសាច់ជ្រូកអាំងអស់រយៈពេល 6ខែកន្លងមក បច្ចុប្បន្ននាងទទួលបានអតិថិជនច្រើនដែលជាមធ្យមនាងលក់បានប្រមាណ 350 ប្រអប់ក្នុងមួយថ្ងៃតាមរយៈការកុម្ម៉ង់ទិញតាមទូរស័ព្ទ។ ស្របពេលជាមួយគ្នានេះដែរ នាងបានប្រាប់ថា ហាងបាយដែលមានឈ្មោះថា «Christian បាយសាច់ជ្រូកអាំងពិសេស» នេះកំពុងតែមានអ្នកចង់ទិញ Franchise។
កញ្ញា សួន ភក្ដី ហៅ VJ អាណូ បានលើកឡើងថា បន្ទាប់ពីនាងទទួលបានយោបល់ពីមិត្ដភ័ក្ដិជាច្រើនបង្ខំឱ្យនាងរៀបចំបើកអាជីវកម្មហាងលក់បាយរួចមក នាងក៏បានដាក់ឈ្មោះហាងថា «Christian បាយសាច់ជ្រូកអាំងពិសេស» និងបានសុំចុះបញ្ជីនៅក្រសួងពាណិជ្ជកម្មរួចជាស្រេចទៀតផង។ នាងបន្ដថា ការធ្វើដូច្នេះព្រោះនាងចង់រៀបចំឱ្យអាជីកម្មរបស់ខ្លួនដំណើរការមានលក្ខណៈត្រឹមត្រូវតាមច្បាប់ ចៀសវាងការចម្លងឈ្មោះពាណិជ្ជកម្មមួយនេះ គ្រាដែលនាងរំពឹងថា មុខរបរមួយនេះនឹងមានភាពរីកចម្រើនទៅអនាគត។
VJ អាណូ បានប្រាប់ទៀតថា បន្ទាប់ពីដំណើរការបានកន្លះឆ្នាំ ឃើញថាមានលក្ខណៈល្អប្រសើរដូចនាងរំពឹងទុកមែន ទើបធ្វើឱ្យនាងឈានទៅពង្រីកសាខាមួយទៀតនៅខេត្ដសៀមរាប ជាពិសេសបាយសាច់ជ្រូកប្រឡាក់របស់នាងក៏មានអ្នកមានមុខមាត់ក្នុងសង្គម និងឧកញ៉ាមួយចំនួនធ្លាប់បានទទួលសេវាកម្មពីហាងរបស់នាងផងដែរ។ VJ អាណូ ប្រាប់ទៀតថា៖ «ដោយសារតែមានសាខានៅខេត្ដសៀមរាបនេះហើយ ទើបខ្ញុំត្រូវចំណាយពេលចុងសប្ដាហ៍រៀងរាល់ថ្ងៃសៅរ៍ អាទិត្យ ជិះយន្ដហោះទៅមើលការងារនៅទីនោះ»។
ពិធីការិនី និងតារាសម្ដែងរូបនេះបញ្ជាក់ថា បន្ទាប់ពីមានការសរសើរពីរសជាតិសាច់ប្រឡាក់ឆ្ងាញ់ តាមរយៈការប្រើរូបមន្ដប្រឡាក់សាច់ផ្ទាល់ខ្លួនរបស់នាងដែលទម្លាប់ធ្វើក្នុងគ្រួសារគួបផ្សំជាមួយ និងសេវាកម្មផ្ដល់ទៅឱ្យភ្ញៀវបានល្អផងនោះ ក៏មានអ្នកចង់ទិញ Franchise ឬរូបមន្ដនៃការប្រឡាក់សាច់នោះ។
តែទោះជាយ៉ាងណានាងមានអារម្មណ៍ស្ទាក់ស្ទើរមិនចង់លក់ទេ ខណៈនាងកំពុងតែមានបំណងចង់ពង្រីកសាខារបស់ខ្លួនមួយទៀតនៅក្នុងផ្សារសុវណ្ណា ទីក្រុងភ្នំពេញ៕
July 13, 2017
Horn ស្នើឲ្យមានការប្រកួតសងសឹកជាមួយ Pacquiao ដើម្បីបញ្ចប់ជម្លោះ
កីឡាករប្រដាល់ Jeff Horn របស់អូស្ត្រាលី ជឿជាក់ថា រូបគេពិតជាបានទទួលជ័យជម្នះលើកីឡាករជើងចាស់ Manny Pacquiao យ៉ាងស័ក្តិសមប្រាកដមែន ខណៈដែលរូបគេក៏បានស្វាគមន៍ទៅលើលទ្ធផលនៃការត្រួតពិនិត្យឡើងវិញនៃការផ្តល់ពិន្ទុពីការប្រកួតរបស់គេកាលពីដើមខែនេះពីសំណាក់ WBO ផងដែរ។
ប៉ុន្តែ ទោះបីជាយ៉ាងណា កីឡាករមិនស្គាល់ចាញ់រូបនេះនៅតែជឿជាក់ថា មានតែការប្រកួតសងសឹកជាមួយនឹងតារាប្រដាល់របស់ហ្វីលីពីនរូបនេះប៉ុណ្ណោះ ទើបអាចដោះស្រាយភាពចម្រូងចម្រាសផ្សេងៗបាន។ Horn បានកត់ត្រាជ័យជម្នះដោយពិន្ទុជាឯកច្ឆន្ទក្នុងការប្រកួត12ទឹកដ៏មិននឹកស្មានដល់លើកីឡាករ Pacquiao ក្នុងទីក្រុង Brisbane កាលពីថ្ងៃទី2 ខែកក្កដា ប៉ុន្តែលទ្ធផលនេះបានធ្វើឲ្យមានការតវ៉ា និងការរិះគន់យ៉ាងខ្លាំងក្លាក្នុងប្រទេសហ្វីលីពីន។
ស្ថាប័ន WBO បានបង្កើតក្រុមប្រឹក្សាឯករាជ្យមួយ និងចៅក្រមអនាមិកដើម្បីទស្សនាការប្រកួតនេះដោយគ្មានសំឡេង និងដើម្បីកាត់សេចក្តីថា តើកីឡាកររូបណាឈ្នះក្នុងទឹកនីមួយៗ?។ កាលពីថ្ងៃអង្គារ ស្ថាប័ននេះបានបញ្ជាក់ថា ចៅក្រមបានរកឃើញថា Horn បានទទួលជ័យជម្នះ7ទឹក ហើយ Pacquiao ឈ្នះត្រឹមតែ5ទឹកប៉ុណ្ណោះ។ Horn វ័យ29ឆ្នាំ បានប្រាប់អ្នកយកព័ត៌មានក្នុងទីក្រុង Los Angeles ថា រូបគេបានស្វាគមន៍ចំពោះការត្រួតពិនិត្យឡើងវិញរបស់ស្ថាប័ន WBO បើទោះបីរូបគេមានភាពច្បាស់លាស់ក្នុងចិត្តរបស់គេថា គេពិតជាបានទទួលជ័យជម្នះក៏ដោយ។
ទោះបីជាយ៉ាងណា អតីតគ្រូបង្រៀនរូបនេះជឿជាក់ថា មានតែការប្រកួតសងសឹកប៉ុណ្ណោះទើបអាចដោះស្រាយបញ្ហាចម្រូងចម្រាស់ផ្សេងៗបាន។ កីឡាកររូបនេះបានបន្ថែមទៀតថា៖ «ខ្ញុំជឿថា មធ្យោបាយដ៏ល្អក្នុងការដោះស្រាយបញ្ហានេះបាន គឺការប្រកួតសងសឹក។ ខ្ញុំគិតថា ខ្ញុំនឹងធ្វើបានកាន់តែល្អឡើងទៀតក្នុងការប្រកួតលើកទី2»។ ប៉ុន្តែ ក្រុមការងាររបស់ Pacquiao បានចោទប្រកាន់ថា អាជ្ញាកណ្តាល បានអនុញ្ញាតឲ្យ Horn ប្រើប្រាស់ស្នៀតប្រយុទ្ធដែលខុសពីច្បាប់កីឡា។
ក្រោយពីការត្រួតពិនិត្យឡើងវិញរបស់ WBO កីឡាករ Pacquiao បានឲ្យដឹងក្នុងសេចក្តីថ្លែងការណ៍មួយកាលពីល្ងាចថ្ងៃអង្គារថា៖ «យើងបានឃើញការកាត់សេចក្តីដ៏អន់បំផុត កាលពីមុនដោយចៅក្រមជាអ្នកគ្រប់គ្រងលើលទ្ធផលផ្សេងៗ។ គ្មានអ្វីដែលធ្វើឲ្យខ្ញុំភ្ញាក់ផ្អើលឡើយ។ សូមឲ្យអ្នកគាំទ្រកាត់សេចក្តីដោយខ្លួនឯងចុះ។ មនុស្សជាច្រើនបានឃើញអ្វីដែលបានកើតឡើង»៕
ប្រភពពី៖ ESPN
July 13, 2017
ការនាំចូលរថយន្តថ្មីកើនឡើង ខណៈរថយន្តជជុះថយចុះ
ភ្នំពេញៈ ដំណាច់ឆមាសទី1ឆ្នាំនេះ និន្នាការនៃការនាំចូលរថយន្តថ្មីបានកើនឡើង ខណៈការនាំចូលរថយន្តជជុះបានថយចុះ ដោយសារតែនិន្នាការប្រើប្រាស់រថយន្តថ្មីកើនឡើង។
លោក សេង វឹង អគ្គនាយកផ្នែកបច្ចេកទេសយានយន្តនៃក្រុមហ៊ុន RMA Asia បានថ្លែងឲ្យដឹងតាមទូរស័ព្ទនារសៀលថ្ងៃទី12 កក្កដាម្សិលមិញថា ទីផ្សាររថយន្តរបស់ក្រុមហ៊ុនខ្លះបានថយចុះ ប៉ុន្តែក្រុមហ៊ុនរបស់លោកនៅតែទទួលបានកំណើននៃការលក់ដដែល ដោយសារតែប្រព័ន្ធបញ្ជា និងប្រើប្រាស់ក្នុងរថយន្តទំនើបពិសេសទទួលបានទំនុកចិត្តពីអតិថិជន ។ លោកបន្តថា និន្នាការប្រើប្រាស់រថយន្តថ្មី បាននិងកំពុងកើនឡើង ដោយយោងតាមតួលេខនាំចូលរថយន្តបានបង្ហាញថា ការនាំរថយន្តថ្មីចូលបានកើនពី13ដល់19ភាគរយ និងនាំចូលរថយន្តជជុះបានថយពី89 មកនៅត្រឹម83ភាគរយ។
លោកបន្តថា “ការលក់រថយន្តរបស់ក្រុមហ៊ុនបានកើនឡើងចន្លោះពី20 ទៅ30ភាគរយ នៅដំណាច់ឆមាសទី1ឆ្នាំនេះធៀបរយៈពេលដូចគ្នាកាលពីឆ្នាំមុន ហើយរថយន្តលក់ដាច់ភាគច្រើនជាប្រភេទរថយន្ត Pick Up ដែលជារថយន្តមានបំពាក់សេវាកម្ម និងប្រព័ន្ធបញ្ជាទំនើប និងមានការពេញនិយមពីអ្នកប្រើប្រាស់។
កញ្ញា ស៊ឹង សុផារី អ្នកនាំពាក្យក្រសួងពាណិជ្ជកម្មបានថ្លែងថា និន្នាការប្រើប្រាស់រថយន្តថ្មីពិតជាកើនឡើងមែន ហើយជាគោលនយោបាយ រដ្ឋាភិបាលលើកទឹកចិត្តឲ្យប្រជាពលរដ្ឋប្រើប្រាស់រថយន្តថ្មីផងដែរ ប៉ុន្តែទីផ្សាររថយន្តមួយទឹកក៏នៅតែរក្សាបានកំណើនផងដែរ ដោយសារជីវភាពប្រជាពលរដ្ឋដែលមានកម្រិតមធ្យមច្រើន និងដោយសារអាចទិញរថយន្តបង់រំលស់បានផងនោះ ទើបប្រជាជនមួយចំនួនបានទិញរថយន្តថ្មីប្រើប្រាស់ផងដែរ។
កញ្ញាបន្តថា “កម្រិតកំណើននៃការលក់រថយន្តថ្មី វាអាស្រ័យលើកម្លាំងទិញរបស់ប្រជាពលរដ្ឋ ប៉ុន្តែប៉ុន្មានឆ្នាំមកនេះអ្នកមានជីវភាពធូរធារបានកើនឡើង ដែលធ្វើឲ្យទីផ្សាររថយន្តថ្មីមានកំណើនផងដែរ៕
July 13, 2017
ក្រសួងលើកទឹកចិត្តឱ្យគ្រប់សហគ្រាសពង្រឹងគុណភាពដើម្បីជ្រៀតចូលទីផ្សារបរទេស
ភ្នំពេញ៖ ថ្លែងក្នុងពិធីសម្ពោធពិព័រណ៍ពាណិជ្ជកម្ម និងទេសចរណ៍ឥណ្ឌូនេស៊ីលើកទី11 ឆ្នាំ2017 ដែលប្រារព្ធធ្វើនៅមជ្ឈមណ្ឌល និងសន្និសីទកោះពេជ្រ ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មបានជំរុញឱ្យសហគ្រាសធុនតូច និងមធ្យមកម្ពុជាទាំងអស់ត្រូវពង្រឹងសមត្ថភាពដើម្បីជ្រៀតចូលទីផ្សារបរទេសក្នុងយុគសម័យសមាហរណកម្មអាស៊ាននេះ។
ឯកឧត្តមបានផ្ដាំផ្ញើទៅសហគ្រាសធុនតូច និងមធ្យមកម្ពុជា និងលើកទឹកចិត្តឲ្យសហគ្រាសកម្ពុជាទាំងអស់ប្រឹងប្រែងអភិវឌ្ឍខ្លួនឯងដើម្បីមានសមត្ថភាពគ្រប់គ្រាន់ក្នុងការចូលរួមពិព័រណ៍ផលិតផលស្រដៀងគ្នានៅបរទេសដើម្បីជ្រៀតចូល និងធ្វើពិពិធកម្មទីផ្សារផលិតផលកម្ពុជា។ ឯកឧត្តមសង្កត់ធ្ងន់ថា ការអភិវឌ្ឍសហគ្រាសធុនតូច និងមធ្យមនឹងផ្ដល់អត្ថប្រយោជន៍រួមមកលើឧត្តមភាពរបស់ប្រជាជនកម្ពុជា ដោយសារសហគ្រាសធុនតូច និងមធ្យមជាចលករដ៏ខ្លាំងក្លាក្នុងការផ្តល់ការងារដល់ពលរដ្ឋខ្មែរ និងលើកកម្ពស់សេដ្ឋកិច្ចជាតិកម្ពុជា។
ក្នុងយុទ្ធសាស្រ្តជួយជំរុញ និងលើកកម្ពស់ផលិតផលក្នុងស្រុកឱ្យមានការទទួលស្គាល់ និងចូលរួមប្រើប្រាស់ឱ្យកាន់តែទូលំទូលាយនៅទូទាំងប្រទេស ក្រសួងពាណិជ្ជកម្មនឹងរៀបចំពិព័រណ៍ពាណិជ្ជកម្មផលិតផលខ្មែរដែលមានគុណភាពខ្ពស់ មានសុវត្ថិភាពសម្រាប់អ្នកប្រើប្រាស់ និងមានការវេចខ្ចប់បានល្អប្រសើរត្រឹមត្រូវ អនុលោមតាមស្តង់ដារផលិតកម្មនៅទូទាំងប្រទេសមកដាក់តាំងបង្ហាញដើម្បីស្វែងរកការគាំទ្របន្ត ដែលការតាំងពិព័រណ៍នេះនឹងធ្វើឡើងនៅថ្ងៃទី26-29 ខែតុលា ឆ្នាំ2017 ខាងមុខ នៅមជ្ឈមណ្ឌលវិមានសុភមង្គលក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ៕
July 12, 2017
Song Joong Ki និង Song HyeKyo រៀបចំពិធីភ្ជាប់ពាក្យយ៉ាងស្ងាត់ៗ
សារព័ត៌មានកម្សាន្តល្បីឈ្មោះរបស់កូរ៉េមួយបានចេញផ្សាយថា តារាសម្ដែងប្រុស Song Joong Ki និងគូស្នេហ៍ Song HyeKyo បានរៀបចំពិធីភ្ជាប់ពាក្យយ៉ាងស្ងាត់ៗមួយនៅក្នុងភោជនីយដ្ឋានជប៉ុនដែលមានការជ្រោមជ្រែងពីមិត្តភ័ក្ដិ និងបុគ្គលិករួមក្រុមហ៊ុនរបស់ពួកគេ។
ប្រភពព័ត៌មានដែលបានទម្លាយចេញនោះ គឺបុគ្គលិករបស់ភោជនីយដ្ឋានជប៉ុនមួយនោះដែលបានអះអាងថា គូស្នេហ៍ដ៏ផ្អែមល្ហែមមួយគូនេះបានរៀបចំពិធីភ្ជាប់ពាក្យដ៏ធំមួយ តែស្ងាត់ស្ងៀមបំផុតនៅទីនោះ។ “មានភ្ញៀវចូលរួមប្រហែលជា 30 នាក់ប៉ុណ្ណោះដែលសុទ្ធតែជាបុគ្គលិកក្រុមហ៊ុន ហើយពួកគេបានរៀបចំពិធីភ្ជាប់ពាក្យនៅក្នុងពិធីជប់លៀងនោះតែម្ដង” បុគ្គលិករបស់ភោជនីយដ្ឋានជប៉ុនមួយនោះបញ្ជាក់បន្ថែម។
គូស្នេហ៍មួយគូនេះបានក្លាយជាទីចាប់អារម្មណ៍ចង់ដឹង ចង់ឮរបស់ប្រិយមិត្តទស្សនិកជនជាច្រើននាក់ ហើយពូកគេប្រៀបដូចជាបុប្ផាដែលកំពុងក្រពុំពេញសម្រស់មានក្លិនក្រអូបក្នុងការទាក់ទាញអ្នកគាំទ្រឱ្យកាន់តែស្រឡាញ់ពួកគេខ្លាំងឡើងដូច្នោះដែរ។ បុគ្គលិករបស់ភោជនីយដ្ឋានជប៉ុននោះ ក៏បានបន្ថែមទៀតផងដែរថា “នៅពេលដែលតួប្រុសជូនបាច់ផ្កាទៅគូស្នេហ៍ អ្នករាល់គ្នាហាក់បីដូចជារំភើប និងចូលរួមសប្បាយរីករាយជំនួសតួស្រីទៀតផង។ វ៉ាវ….ពិតជារូមែនទិកមែន!”៕
July 12, 2017
កម្ពុជាមានក្រុមហ៊ុនតំណាង Apple ជាផ្លូវការហើយ!!!
បន្ទាប់ពីមានលក់ក្នុងទីផ្សារអស់រយៈពេលជាច្រើនឆ្នាំមក កម្ពុជាចាប់ផ្ដើមមានក្រុមហ៊ុនតំណាងចែកចាយផ្លូវការពីក្រុមហ៊ុន Apple Inc ហើយ ដែលកន្លងមកទីផ្សារមួយនេះមានតែក្រុមហ៊ុនទទួលសិទ្ធិលក់រាយស្របច្បាប់ដូចជា iOne ឬ Smart តែប៉ុណ្ណោះ។
អ្នកតំណាងចែកចាយថ្មីនេះ មានឈ្មោះថា Falcon Tech Co, LTD ដែលក្រុមហ៊ុនមួយនេះនឹងក្លាយខ្លួនជាក្រុមហ៊ុនគ្រប់គ្រងការចែកចាយនៅទូទាំងប្រទេសកម្ពុជា គ្របដណ្ដប់ទៅលើក្រុមហ៊ុនមានសិទ្ធិលក់រាយស្របច្បាប់ដូចជា iOne, Smart ហាងនីកា ហាងអប្សរា និង Futureworld Cambodia ព្រមទាំងក្រុមហ៊ុនមួយចំនួនទៀតក្នុងការលក់បន្ត។ ក្នុងនោះហាងលក់រាយតូចៗជាច្រើនក៏នឹងមានលក់ផលិតផលទាំងអស់ពីAppleសុទ្ធ100% ជាមួយនឹងការធានាជូនពេញ1ឆ្នាំ ដោយយកចេញពីក្រុមហ៊ុនខាងលើដូចគ្នា។
ក្រុមហ៊ុន Falcon Tech នឹងដើរតួជាភ្នែកច្រមុះរបស់ Apple ក្នុងការគ្រប់គ្រងទីផ្សារ ជាមួយនឹងការនាំមកនូវផលិតផល Apple ថ្មីៗ ចេញពីរោងចក្រផ្ទាល់ផងដែរ។ តាមសេចក្ដីបញ្ជាក់របស់ Falcon Tech ក្រុមហ៊ុននេះនឹងធ្វើការនាំចូលទូរស័ព្ទ iPhone, iPad, Apple Watch, កុំព្យូទ័រ MacBook, និង Accessories ជាច្រើនទៀតរបស់ក្រុមហ៊ុន Apple៕
July 12, 2017
តារាម៉ូដែល Jessica Hart អះអាងថា កំពុងមានស្នេហាជាមួយមហាសេដ្ឋីបារាំង
តារាម៉ូដែលល្បីឈ្មោះ Jessica Hart បានចេញមកអះអាងថា នាងកំពុងមានសេ្នហាជាមួយនឹងមហាសេដ្ឋីបារាំងមួយរូបមានឈ្មោះថា Stavros Niarchos III។ នេះបើតាមការចេញផ្សាយរបស់សារព័ត៌មាន Daily Mail Australia នៅព្រឹកថ្ងៃពុធនេះ ដែលបានឱ្យដឹងថា តារាម៉ូដែលស្រីវ័យ 31 ឆ្នាំរូបនេះបានប្រាប់ពីអារម្មណ៍ពិតរបស់នាងថា តាំងពីដើមមក នាងមិនដែលមានសេចក្ដីសុខដូចពេលដែលបានទាក់ទងជាមួយកំលោះមហាសេដ្ឋីបារាំងនៅក្នុងគ្រានេះឡើយ។
“ចា៎! ពិតមែនហើយ នាងខ្ញុំសូមអះអាងថា ទំនាក់ទំនងស្នេហាមួយនេះបានកើតចេញពីទំនាក់ទំនងមិត្តភាពមួយ ដែល Jessica នាងមិនធ្លាប់ទទួលបានសេចក្ដីសុខពីមុនមកដូចពេលនេះឡើយ” នេះបើតាមសម្ដីមិត្តជិតស្និទ្ធរបស់តារាម៉ូដែល Jessica។ គូស្នេហ៍មួយគូនេះមានទំនាក់ទំនងស្នេហ៍អស់រយៈពេលប៉ុន្មានឆ្នាំមកហើយ ពួកគេក៏ជិតឈានទៅដល់ដំណាក់កាលភ្ជាប់ពាក្យផងដែរ។ កាលពីឆ្នាំ 2014 មានដំណឹងចចាមអារ៉ាមមកថា ការចំណេញក្នុងមុខជំនួញរបស់មហាសេដ្ឋីកំលោះរូបនេះ គឺជាពរជ័យនៃការរៀបអាពាហ៍ពិពាហ៍របស់ពួកគេនាថ្ងៃអនាគត ក៏ប៉ុន្ដែអស់រយៈពេលជាង 3 ឆ្នាំមកហើយនៅមិនទាន់មិនដំណឹងពីរឿងរៀបការនៅឡើយទេ។
បើទោះបីជាយ៉ាងណាក៏ដោយ ការទស្សន៍ទាយពីពិធីរៀបមង្គលការរបស់តារាម៉ូដែលស្រី Jessica Hart និងកំលោះមហាសេដ្ឋីបារាំង Stavros Niarchos III កាលពីខែមេសាកន្លងទៅនេះបានបរាជ័យម្ដងរួចមកហើយ ព្រោះតែមានសារព័ត៌មានមួយបានចេញផ្សាយថា តារាស្រីរូបនេះកំពុងខូចចិត្តដោយសារតែការបែកបាក់ស្នេហាជាមួយសង្សារនាង ហើយនាងបានបំផ្លាញវត្ថុអនុស្សារីយជាច្រើនចោលទៀតផង ក៏ប៉ុន្ដែនៅពេលដែលទំនាក់ទំនងស្នេហានេះបានបើកចំហជាសាធារណៈ នាងក៏ចេញមុខមកប្រកាសថា ខ្លួនសប្បាយចិត្តបំផុតនៅពេលទាក់ទងជាមួយ Stavros Niarchos III៕
July 12, 2017
UNDP បើកការប្រឡងវីដេអូស្តីពីការប្រែប្រួលអាកាសធាតុ
កម្មវិធីអភិវឌ្ឍន៍សហប្រជាជាតិ (UNDP) បានបើកការប្រកួតប្រជែងផលិតវីដេអូខ្លីដើម្បីជ្រើសរើសយកយុវជនពីររូបដើម្បីទៅចូលរួមក្នុងកិច្ចប្រជុំ COP23 និងដំណើរកម្សាន្តនៅប្រទេសអាល្លឺម៉ង់។
បេក្ខជនដែលអាចដាក់ពាក្យប្រកួតបានលុះត្រាតែមានអាយុចាប់ពី18ឆ្នាំ ដល់ 30ឆ្នាំ ដោយប្រធានបទគឺនិយាយពីការប្រែប្រួលអាកាសធាតុ។ នៅក្នុងភាពលម្អិតនៃវីដេអូបេក្ខជនអាចបញ្ជូលនូវផ្នែកសំខាន់ៗ ដូចជាដំណោះស្រាយ ឬគំនិតសម្រាប់ដោះស្រាយបញ្ហាបរិស្ថាន ដោយការអភិវឌ្ឍតំបន់ជនបទ ឬសហគមន៍ប្រកបដោយនិរន្តរភាព។ បំផុសគំនិតឱ្យចូលរួមគ្នាដើម្បីមានការប្រើប្រាស់ថាមពលស្អាត ការដឹកជញ្ជូនស្អាត ការដាំដើមឈើនៅក្នុងសហគមន៍ និងវិធីជាច្រើនទៀតដែលកាត់បន្ថយដល់ការបំពុលបរិស្ថាន ឬដែលអាចប៉ះពាល់ដល់បម្រែបម្រួលអាកាសធាតុ។
ថ្ងៃផុតកំណត់នៃការដាក់ពាក្យគឺ ថ្ងៃទី18 ខែសីហា ឆ្នាំ2017 ដោយបេក្ខជនអាចដាក់ពាក្យតាមតំណនៅក្នុងព័ត៌មាននេះ https://bit.ly/2tLCPA0៕
July 12, 2017