Category: សង្គម និងសេដ្ឋកិច្ច

ភ្នំពេញ៖ ក្រសួងឧស្សាហកម្ម និងសិប្បកម្មបានអនុញ្ញាតឱ្យក្រុមហ៊ុនចិន China Energy Engineering Corporation Limited សិក្សាលើសមិទ្ធលទ្ធភាពក្នុងការទាញយកផលប្រយោជន៍ ពីទឹកធ្លាក់ចេញពីវារីអគ្គិសនីភ្នំកំចាយ ខេត្តកំពតដើម្បីផលិតជាទឹកស្អាតមានគុណភាពសម្រាប់ផ្គត់ផ្គង់ចែកចាយដល់ប្រជាជនរស់នៅក្នុងខេត្តចំនួនពីរ គឺខេត្តកំពត និងខេត្តកែប ។

ដើម្បីពន្លឿនបញ្ហានេះ នៅព្រឹកថ្ងៃទី16 ខែកក្កដា ឆ្នាំ2017 ឯកឧត្តម ចម ប្រសិទ្ធ ទេសរដ្ឋមន្ត្រីបានដឹកនាំគណៈប្រតិភូបច្ចេកទេសរបស់ក្រសួង និងតំណាងអាជ្ញាធរខេត្តទៅពិនិត្យមើលទីតាំងជាក់ស្តែងនៅអតីតព្រលានយន្តហោះខេត្តកំពត និងខេត្តកែបដែលជាដីកម្មសិទ្ធិរបស់រដ្ឋ ដើម្បីកាត់មួយចំណែកបង្កើតរោងចក្រផលិតទឹកស្អាត និងបង្កើតមជ្ឈមណ្ឌលបណ្តុះបណ្តាលលើវិស័យទឹកស្អាត ពីព្រោះភាគីកម្ពុជាទទួលបន្ទុកស្វែងរកទីតាំងសម្រាប់បង្កើតរោងចក្រផលិតទឹកស្អាតក្នុងខេត្តទាំងពីរខាងលើ។

ឯកឧត្តមបញ្ជាក់ថា ការផ្តល់អាជ្ញាប័ណ្ណដល់ក្រុមហ៊ុនចិនខាងលើ គឺជាការផ្តួចផ្តើមគំនិតដាក់ចេញនូវចក្ខុវិស័យវែងឆ្ងាយក្នុងការអភិវឌ្ឍ សេដ្ឋកិច្ច សង្គម និងជំរុញវិស័យទេសចរណ៍ ក៏ដូចជាវិស័យសេវាកម្មឱ្យមានភាពកាន់តែទាក់ទាញសម្រាប់បណ្តាខេត្តនៅជាប់តំបន់ឆ្នេរសមុទ្រ ដែលគម្រោងនេះមានការគាំទ្រពីប្រមុខរាជរដ្ឋាភិបាល។

ប្រជាពលរដ្ឋរស់នៅខេត្តកែប និងខេត្តកំពត បានសម្តែងការសាទរចំពោះគម្រោងខាងលើ នឹងរំពឹងថា នឹងបានប្រើប្រាស់ទឹកស្អាតដែលផ្គត់ផ្គត់ដោយក្រុមហ៊ុនចិនខាងលើនេះ និងប្រព័ន្ធទឹកស្អាតទាំងនោះនឹងទៅដល់លំនៅដ្ឋានពួកគាត់ទាំងនៅទីប្រជុំជន និងជនបទដាច់ស្រយាលនាពេលឆាប់ៗនេះមិនខាន៕

មួយរយៈចុងក្រោយនេះតារាសិល្បៈពហុជំនាញកញ្ញា ផាណា ម៉ុច ហាក់មានយីអ៊ុនឡើងខ្លាំងបើធៀបទៅនឹងឆ្នាំចាស់ ដោយគេអាចមើលឃើញបានតាមរយៈឱកាសនៃការសម្ដែងភាពយន្ដ និងការច្រៀងតាមការប្រគំតន្រ្ដីជាច្រើន។

ថ្លែងនៅក្នុងឱកាសថ្ងៃខួបកំណើតគម្រប់អាយុ24ឆ្នាំ កញ្ញា ផាណា ម៉ុច បញ្ជាក់ប្រាប់ថា ទោះបី ជានាងមិនមែនជាតារាចម្រៀងមានប្រជាប្រិយភាព និងមានកេរ្ដិ៍ឈ្មោះបោះសំឡេងដូចតារាលំដាប់ជួរមុខក៏ដោយ ក៏នាងអាចមានលទ្ធភាពរកប្រាក់ចំណូលបានច្រើនគួរសមដែរ។ នាងបន្ដថា ចូលមកដល់ឆ្នាំ2017 នាងមានយីអ៊ុនខ្ពស់ ដោយសារទទួលបានការងារច្រើន មានទាំងការងារសម្ដែង ពិសេសការប្រគំតន្រ្ដីនៅតាមបណ្ដាខេត្ដជាច្រើនដែលជាប្រភពចំណូលមួយដ៏ធំ។

កញ្ញា ផាណា ម៉ុច ទទួលស្គាល់ថា បច្ចុប្បន្នការងារសិល្បៈនាងមិនទាន់ទទួលបានភាពជោគជ័យទាំងស្រុងទេ ប៉ុន្ដែនាងសប្បាយចិត្ដចំពោះអ្វីដែលកំពុងតែមាន។ នាងបន្ថែមថា៖ «ចូលសិល្បៈដំបូង ខ្ញុំពុំដែលរំពឹងថា អាជីពនេះអាចរកប្រាក់ចំណូលបានច្រើនទេ ផ្ទុយទៅវិញក្រោយពីការខំប្រឹងប្រែងរយៈពេលប៉ុន្មានឆ្នាំមកនេះ ខ្ញុំអាចរកប្រាក់សម្រាប់គ្រប់គ្រងលើការចំណាយផ្ទាល់ខ្លួនបានស្រួលហើយ និងអាចយកមកផ្គត់ផ្គង់ដល់គ្រួសារបានផងដែរ»។

បើទោះជាពិធីខួបកំណើតរបស់កញ្ញា ផាណា ម៉ុច បានរៀបចំនៅផ្ទះមានទ្រង់ទ្រាយតូចល្មមក៏ដោយ ប៉ុន្ដែក៏គេសង្កេតឃើញមានការចូលរួមពីសំណាក់តារាសិល្បៈជាច្រើនរូបដែរ។ ពិធីនេះត្រូវបានគេដឹងថា នាងធ្វើឡើងដើម្បីអបអរជាមួយនឹងភាពរីកចម្រើននៅក្នុងអាជីពសិល្បៈរបស់ខ្លួន ក៏ដូចជាសុំសិរីសួស្ដីដើម្បីបន្ដការងារទាំងនេះទៅអនាគតផងដែរ។

តារាសម្ដែងរូបនេះលើកឡើងថា៖ «មនុស្សយើងពិតជាមានមហិច្ឆតាមែន នៅពេលខ្លួនមិនទាន់មានសោះ ប្រាថ្នាចង់បានអ្វីមួយត្រឹមតិចតួចប៉ុណ្ណោះ លុះពេលមានអ្វីដែលខ្លួនធ្លាប់ចង់បានហើយ កាន់តែចង់បានបន្ថែមទៀត។ ដូច្នេះទោះបីជាបច្ចុប្បន្នខ្ញុំអាចរកប្រាក់ចំណូលបានច្រើនក៏ពិតមែន ប៉ុន្ដែខ្ញុំនៅតែបន្ដការប្រឹងប្រែងធ្វើការងារឱ្យកាន់តែទទួលបានភាពជោគជ័យបន្ថែមទៀត»។

ទន្ទឹមនឹងការរកប្រាក់ចំណូលបានច្រើនជាមួយនឹងការបង្ហាញភាពហ៊ឺហា ក៏មានអ្នកធ្លាប់លើកឡើងដែរថា នាងប្រហែលជាលេងផ្លូវកាត់ជាមិនខាន ទើបជីវភាពឆាប់ធូរធារយ៉ាងនេះ។ ទោះយ៉ាងណា ផាណា ម៉ុច បានប្រាប់ថា៖ « ខ្ញុំចូលប្រឡូកក្នុងអាជីពសិល្បៈមិនដែលមានបំណងទៅពាក់ព័ន្ធនឹងរឿងមានគេចិញ្ចឹម ឬមិនចិញ្ចឹមនោះទេ គឺខ្ញុំប្រឹងប្រែងដោយសមត្ថភាពខ្លួនឯង ដូច្នេះអ្វីដែលខ្ញុំមានសព្វថ្ងៃនេះ គឺកើតចេញពីញើសឈាម និងការខំប្រឹងប្រែងរបស់ខ្ញុំសុទ្ធសាធ មិនមែនខ្ញុំលេងផ្លូវកាត់ដូចគេលើកឡើងនោះឡើយ»។ គួរបញ្ជាក់ថា បច្ចុប្បន្នកញ្ញា ផាណា ម៉ុច អាចរកប្រាក់ចំណូលពីការងារសិល្បៈ បូករួមនឹងជំនួញបន្ដិចបន្ដួចនៅខាងក្រៅផងនោះ នាងអាចទទួលបានប្រាក់ជាមធ្យមរង្វង់3ពាន់ដុល្លារក្នុងមួយខែ៕

ភ្នំពេញៈ វិស័យឯកជន បាននិងកំពុងចូលរួមកាន់តែសកម្មឡើងក្នុងគោលនយោបាយទេសចរម្នាក់ដើមឈើមួយដើម ជាផ្នែកមួយនៃការលើកកម្ពស់បរិស្ថាន និងទេសចរណ៍។

លោកហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា បានថ្លែងក្នុងពិធីចូលរួមដាំកូនឈើនៅក្នុងសាលាបឋមសិក្សាភូមិថ្មី សង្កាត់សាមគ្គី ក្រុងស្ទឹងត្រែងកាលពីព្រឹកថ្ងៃម្សិលមិញថា ក្រុមហ៊ុនរបស់លោក ក៏ដូចជាសមាគមដែរ គឺតែងតែផ្សារភ្ជាប់នឹងការងារសង្គម តាមរយៈកម្មវិធីលើកកម្ពស់បរិស្ថាន និងដាំដើមឈើ។ ជាក់ស្តែងថ្ងៃនេះ លោក និងក្រុមការងារបានចុះមកដាំដើមឈើគ្រញូងនៅសាលាបឋមសិក្សាភូមិថ្មីចំនួនជាង 100ដើមដើម្បីធ្វើយ៉ាងណាឲ្យប្រជាពលរដ្ឋ សិស្សានុសិស្សបានស្គាល់ឈើគ្រញូងដ៏មានតម្លៃ និងចូលរួមថែរក្សាបរិស្ថានទាំងអស់គ្នា។

លោកបន្តថា “បរិស្ថានជាជីវិតរបស់យើងទាំងអស់គ្នា ហេតុនេះការចូលរួមដាំកូនឈើ និងសម្អាតបរិស្ថានជាការងាររបស់យើងទាំងអស់គ្នា ហើយការងារនេះផ្តើមចេញពីយើងម្នាក់ៗ”។ លោកបន្តថា “នេះជាសកម្មភាពមួយចូលរួមក្នុងគោលនយោបាយរបស់ក្រសួងទេសចរណ៍ គឺទេសចរម្នាក់ដើមឈើមួយដើម”។

លោក អែល អូន នាយកសាលាបឋមសិក្សាភូមិថ្មីបានមានប្រសាសន៍ឲ្យដឹងថា បរិស្ថានជាអាយុជីវិតរបស់កុមារ និងមនុស្សទូទៅ ព្រោះបើបរិស្ថានមិនស្អាត នាំឲ្យមានបញ្ហាសុខភាព និងបង្កជាជំងឺមួយចំនួនដល់ប្រជាពលរដ្ឋរស់នៅក្នុងសហគមន៍នោះ ដូចជាមេរោគគ្រុនចាញ់ មេរោគគ្រុនឈាមជាដើម។ លោកបន្តថា ការដាំដើមឈើនេះ ជាការឆ្លើយតបតាមអ្វីដែលសាលាត្រូវការជាយូរមកហើយ ប៉ុន្តែសាលាមិនទាន់មានលទ្ធភាពដាំ ហេតុនេះការនាំយកកូនឈើគ្រញូងមកដាំនាពេលនេះ ជាការប្រពៃណាស់សម្រាប់សាលា និងសហគមន៍ទាំងមូល។

ក្រសួងទេសចរណ៍ជាច្រើនឆ្នាំមកនេះបានដាក់ចេញគោលនយោបាយមួយចំនួន ដើម្បីលើកកម្ពស់បរិស្ថានដូចជា ចលនាប្រឡងប្រណាំងទីក្រុងស្អាត រមណីយដ្ឋានស្អាត សេវាល្អ គោលនយោបាយទេសចរម្នាក់ដើមឈើមួយដើមជាដើម៕

ភ្នំពេញ – ស្របពេលកម្ពុជាមានកង្វះខាតធនធានមនុស្ស និងបច្ចេកទេសក្នុងការដាំដុះ និងការកែច្នៃកសិផល ក្រុមហ៊ុនចិនមានមូលដ្ឋាននៅខេត្ដ Guangxi ដែលមានជំនាញលើផ្នែកកសិកម្ម បានចំណាយថវិកាក្រោមជំនួយរបស់រដ្ឋាភិបាលចិន ដើម្បីធ្វើការបណ្ដុះបណ្ដាលបច្ចេកទេសទាំងនោះដល់កសិករកម្ពុជា និងមន្រី្ដជំនាញចំនួន8ខេត្ដ។

ជាមួយលោកLU ZHUOMING Liaison officer of CAPROC នៃក្រុមហ៊ុន Guangxi Forword Agricultural Technology International Cooperation Co.,Ltd បានប្រាប់ថា គម្រោង CAPROC បានដំណើរការនៅកម្ពុជា តាំងពីឆ្នាំ2015 មកម្ល៉េះក្រោមជំនួយរបស់រដ្ឋាភិបាលចិន កម្មវិធីនេះមានរយៈ3ឆ្នាំ។ ក្នុងឆ្នាំទី1 យើងបានបណ្ដុះបណ្ដាលអ្នកបច្ចេកទេស និងមន្រ្ដីជំនាញសរុប1,265នាក់ តាមផែនការរយៈពេលបីឆ្នាំនេះ យើងនឹងបណ្ដុះបណ្ដាលឱ្យបាន 4,000នាក់ជាកសិករជំនាញដែលអាចមានសមត្ថភាព និងជំនាញក្នុងដាំដុះ ព្រមទាំងបច្ចេកទេសវេចខ្ចប់កសិផលក្រោយពេលប្រមូលផលរួច។

ក្រុមហ៊ុន Forword បានចុះបញ្ជីនៅខេត្ដ Guangxi ប្រទេសចិនតាំងពីឆ្នាំ2008 និងបានចុះបញ្ជីនៅក្នុងប្រទេសកម្ពុជានៅក្នុងឆ្នាំ 2009។ CAPROC (China- Cambodia Agriculture Promotion Center) «មជ្ឈមណ្ឌលផ្សព្វផ្សាយ និងលើកកម្ពស់វិស័យកសិកម្មកម្ពុជា-ចិន» ដែលត្រូវចាយថវិកាក្រោមជំនួយរបស់រដ្ឋាភិបាលចិនក្នុងរង្វង់ទឹកប្រាក់ 6 លានដុល្លារអាមេរិក ដើម្បីធ្វើកិច្ចសហប្រតិបត្ដិការរវាងចិន និងកម្ពុជាទៅលើគម្រោងកសិកម្ម។

Liaison officer of CAPROC នៃក្រុមហ៊ុន Forword បញ្ជាក់ថា មូលហេតុដែលរដ្ឋាភិបាលចិន ក៏ដូចជាក្រុមហ៊ុនរបស់លោករៀបចំឱ្យមានគម្រោងCAPROC ព្រោះសម្លឹងឃើញថា កម្ពុជាជាប្រទេសមានស្ថិរភាពនយោបាយល្អ ដែលជាឱកាសទាក់ទាញអ្នកវិនិយោគឱ្យមកបណ្ដាក់ទុននៅទីនេះ។

ពិសេសដោយយើងជាក្រុមហ៊ុនវិនិយោគលើវិស័យកសិកម្មស្រាប់ដូច្នេះទើបសម្រេចបង្កើតការិយាល័យនៅក្នុងប្រទេសកម្ពុជាតែម្ដង។ លើសពីនេះកម្ពុជាមានគុណសម្បត្ដិល្អច្រើនដូចជា សណ្ឋានដីល្អ ដីមានជីវជាតិ និងគុណភាពខ្ពស់ ពុំទាន់ត្រូវបានបំពុលពីកាកសំណល់ឧស្សាហកម្ម តម្លៃពលកម្មក៏មិនសូវថ្លៃផង។ មួយវិញទៀតយើងមើលឃើញថា ទំហំដីសម្រាប់ធ្វើកសិកម្មក្នុងកម្ពុជានៅមានភាពទូលាយ កត្តាទាំងនេះហើយដែលនាំឱ្យយើងគិតថា កម្ពុជានៅមានឱកាសក្នុងការពង្រីកសក្ដានុពលកសិកម្មរបស់ខ្លួនបន្ដទៀតបាន។

លោកបញ្ជាក់ថា បន្ទាប់ពីបញ្ចប់គម្រោង CAPROC ក្រមហ៊ុនមានគម្រោងបង្កើតវិទ្យាស្ថានបណ្ដុះបណ្ដាលវិជ្ជាជីវៈបច្ចេកទេសកសិកម្ម និងគ្រឿងចក្រផ្សេងផងដែរ ធ្វើយ៉ាងណាដើម្បីពង្រីកសកម្មភាពការងារទាំងនេះឱ្យកាន់តែមានភាពទូលំទូលាយ ដើម្បីផ្ដល់ចំណេះជំនាញដល់ប្រជាជនខ្មែរដែលមានចិត្ដស្រឡាញ់វិស័យកសិកម្ម៕