Category: សង្គម និងសេដ្ឋកិច្ច

ជំនាញបច្ចេកទេស ឬឧស្សាហកម្មពាក់កណ្ដាលស្វ័យប្រវត្ដិកម្មកំពុងមានទីផ្សារធំនៅកម្ពុជា
ភ្នំពេញ – ខណៈកម្ពុជាជាប្រទេសកំពុងតែអភិវឌ្ឍន៍ដែលត្រូវការចាំបាច់នូវកម្លាំងពលកម្ម និងធនធានមនុស្សដែលមានជំនាញផ្នែកបច្ចេកទេសនោះ ត្រូវបានមន្រ្ដីជំនាញបញ្ជាក់ថា ទីផ្សារការងារនៅកម្ពុជានៅមានឱកាសធំទូលាយលើផ្នែកឧស្សាហកម្មពាក់កណ្ដាលស្វ័យប្រវត្ដិកម្មនៅឡើយ។
លោក ថង សាម៉ុន អនុប្រធាននាយកដ្ឋានទីផ្សារការងារ នៃក្រសួងការងារបណ្ដុះបណ្ដាលវិជ្ជាជីវៈបានលើកឡើងថា បច្ចុប្បន្នប្រទេសកម្ពុជាត្រូវបានមើលឃើញថា ផ្នែកឧស្សាហកម្មបច្ចេកទេស និងឧស្សាហកម្មពាក់កណ្ដាលស្វ័យប្រវត្ដិកម្មត្រូវបានក្រុមហ៊ុនជាច្រើនចាប់អារម្មណ៍ និងមកធ្វើការវិនិយោគជាបន្ដបន្ទាប់ ដូចជាការដំឡើង និងផលិតគ្រឿងផ្គុំអគ្គិសនី ឬគ្រឿងបន្លាស់រថយន្ដជាដើម។ ទន្ទឹមនឹងការអភិវឌ្ឍនេះ វិស័យពាក់កណ្ដាលស្វ័យប្រវត្ដិកម្មក៏មានសាលាបច្ចេកទេសជាច្រើនកំពុងតែប្រឹងប្រែងសិក្សាស្រាវជ្រាវ រិះរកមុខវិជ្ជា ឬជំនាញ ដើម្បីធ្វើបច្ចុប្បន្នភាពនៃបច្ចេកទេសទាំងនោះឱ្យស្របទៅតាមទីផ្សារការងារដែលកំពុងតែត្រូវការ។
អនុប្រធាននាយកដ្ឋានទីផ្សារការងារបន្ដថា៖ «បច្ចុប្បន្នលោកមើលឃើញថា និស្សិតបានងាកមកចាប់អារម្មណ៍សិក្សាលើជំនាញបច្ចេកទេសនេះជាច្រើន ដោយសារតែឱកាសទីផ្សារការងារនៅមានកម្រិតធំទូលាយសម្រាប់ពួកគាត់ ដូច្នេះយើងអាចនិយាយបានថា ក្រោយពីពួកគាត់បញ្ចប់ការសិក្សា ពួកគាត់នឹងមានឱកាសទទួលបានការងារយ៉ាងងាយស្រួល»។
លោក ថង សាម៉ុន បានបន្ថែមថា ក្រៅពីការសម្រេចចិត្ដរបស់និស្សិតហើយនោះ ក្រសួងក៏បានធ្វើការណែនាំបន្ថែម ដោយតម្រង់ទិសមុខវិជ្ជាជីវៈ ឬជំនាញណាមួយដែលតម្រូវការទីផ្សារការងារកំពុងតែត្រូវការខ្លាំងនាពេលបច្ចុប្បន្ន ខណៈកម្ពុជាកំពុងតែខ្វះខាតធនធានមនុស្សច្រើនលើជំនាញបច្ចេកទេស។
លោកបន្ដថា កន្លងមកមាននិស្សិតជាច្រើនបានចាប់អារម្មណ៍ការសិក្សាផ្នែកគ្រប់គ្រង ឬគណនេយ្យជាដើម ដោយសារតែពួកគាត់ពុំបានដឹងព័ត៌មានគ្រប់ជ្រុងជ្រោយពីការសិក្សាជំនាញបច្ចេកទេស ដែលធ្វើឱ្យពួកគាត់ជ្រើសយកមុខជំនាញសិក្សាពុំសូវសមស្របទៅនឹងទីផ្សារការងារ ឬចប់ហើយពិបាករកការងារធ្វើជាដើម។
ជាមួយគ្នានេះ លោកសង្កត់ធ្ងន់ថា៖ «ប្រសិនបើប្រទេសកម្ពុជាសម្បូរទៅដោយធនធានមនុស្សលើជំនាញបច្ចេកទេស វាក៏ជាសារមួយសម្រាប់អ្នកវិនិយោគផងដែរ ព្រោះការវិនិយោគនៅប្រទេសណាមួយ ពួកគេតែងតែគិត និងសម្លឹងមើលលើកម្លាំងពលកម្មថា តើមានគ្រប់គ្រាន់ហើយឬនៅ?។ អ៊ីចឹងនៅពេលយើងមានកម្លាំងពលកម្មគ្រប់គ្រាន់ គ្រប់ជំនាញ គ្រប់តម្រូវការដែលគេត្រូវការ គេនឹងមកវិនិយោគនៅប្រទេសយើងច្រើនជាមិនខាន»៕
July 18, 2017
ទង្វើ 5យ៉ាងនេះ អាចធ្វើកូនឱ្យរបស់អ្នកគេងយំយប់
លោកឪពុកអ្នកម្តាយតែងតែមានសេចក្តីសុខនៅពេលបានឃើញកូនៗសើចសប្បាយ និងមានស្នាមញញឹម តែនោះក៏មិនបានមានន័យថា ពួកគេនឹងមានសេចក្តីសុខរហូតនោះដែរ។ សាកល្បងសង្កេតមើលនៅពេលយប់ទៅមើលថា តើកូនតូចមានលបគេងយំឬទេ? ព្រោះអារម្មណ៍របស់ពួកគេពិតជាឆាប់ញាប់ញ័ររញ្ជួយ ហើយមិនដឹងនឹងសម្តែងចេញមកយ៉ាងណា ទើបបានត្រឹមតែលួចយំហ្នឹងឯង។ បើសិនកើតមានសំណួរថា ហេតុអីបានកូនៗរបស់អ្នកត្រូវលបគេងយំនោះ? សូមសាកល្បងមកមើលពីមូលហេតុទៅមើលថា តើវាមកពី 5ទង្វើរបស់លោកឪពុក និងអ្នកម្តាយដូចដែល ឡារ៉ែន បាននាំមកជម្រាបជូននៅថ្ងៃនេះឬក៏អត់?
1.ឱ្យកូនៗឃើញព័ត៌មានដ៏គួរឱ្យស្រងេះស្រងោចអាណោចអធម្ម
ក្មេងដែលទើបតែបើកភ្នែកមើលពិភពលោកត្រឹមតែប៉ុន្មានឆ្នាំ សភាពជុំវិញខ្លួនរបស់គេក៏មានតែឪពុកម្តាយ និងនៅឯសាលារៀនប៉ុណ្ណោះ កូនតូចនៅមិនទាន់មានបទពិសោធអាក្រក់ដោយត្រង់នៅឡើយទេ ដូច្នេះអាណាព្យាបាលគួរចៀសវាងឱ្យពួកគេមើលព័ត៌មានបែបអវិជ្ជមាន ដូចជា ព័ត៌មានឧក្រិដ្ឋកម្ម ព័ត៌មានគ្រោះថ្នាក់ចរាចរណ៍ជាដើម ដែលវាជាការបង្ហាញរូបភាពឱ្យក្មេងៗចងចាំ និងបង្កឱ្យកើតក្តីភ័យខ្លាច ហុចផលប៉ះពាល់ដល់ផ្លូវចិត្ត រហូតមិនហ៊ាននិយាយចេញ មក និងលួចលាក់ទុកទៅពួនយំតែម្នាក់ឯងយ៉ាងស្ងាត់ៗ ដូច្នេះរឿងដែលឪពុកម្តាយគួរធ្វើគឺ ការពារកូនតូចៗរបស់អ្នក ផ្តល់សេចក្តី ស្រឡាញ់ ភាពកក់ក្តៅ និងព្យាយាមចៀសវាងកុំឱ្យកូនតូចឃើញព័ត៌មានអាក្រក់ទាំងនោះ។
2.ឪពុកយកម្តាយឈ្លោះប្រកែកគ្នា
ការឈ្លោះគ្នាគឺជារឿងរបស់ឪពុកម្តាយក៏ពិតមែន តែកុំភ្លេចថា លោកអ្នកនៅមានច្រវាក់មាសចងចិត្តតូចមួយដែលអាចបានឮសំឡេងស្រែកជេរគ្នារំលងបន្ទប់នោះ។ មិនថាអ្នកទាំងពីរនឹងជួបបញ្ហា ឬទាស់ចិត្តអ្វីគ្នាក៏ដោយ គួរនិយាយគ្នាដោយហេតុផល និងចៀសវាងកុំឱ្យកូនតូចឃើញទង្វើហ្នឹង ព្រោះវាគឺអំពើហិង្សានៅក្នុងផ្ទះ។ ក្មេងៗនឹងមានសម្ពាធក្នុងចិត្ត និងលួចទៅយំ ព្រោះពួកគេមិនអាចយល់បានថា កើតរឿងអ្វីឡើងចំពោះអ្នកទាំងពីរឡើយ។
3. វាយកូនៗដោយអំពើហិង្សា
ការវាយដំមិនមែនជាវិធីកែបញ្ហាដែលល្អឡើយ លោកឪពុកអ្នកម្តាយគួរតែនិយាយជាមួយកូនដោយពាក្យសម្តីសុភាព និងបញ្ជាក់ប្រាប់ពីហេតុផល ឬបើក្មេងៗត្រូវទទួលទណ្ឌកម្ម ក៏គួរតែរកមើលវិធីផ្សេងណាដែលមិនមែនជាការវាយដំពួកគេយ៉ាងខ្លាំងក្លាវិញ ព្រោះគ្រប់ពេលដែលអ្នកវាយវាត់ទៅលើសាច់ដ៏ស្តើងខ្ចីរបស់កូនតូចនោះ ក្រៅពីពួកគេនឹងឈឺចាប់ខាងរាងកាយហើយ នៅសាងស្នាមដំបៅក្នុងដួងចិត្តរបស់ពួកគេទៀតផង។
4.ហៅកូនៗដោយពាក្យអសុរោះ
សាកល្បងសួរខ្លួនឯងទៅមើលថា តើចូលចិត្តឱ្យអ្នកដទៃហៅខ្លួនឯងដោយឈ្មោះចំអកឡកលើយ ឬពាក្យអសុរោះឬទេ?បើមិនចូលចិត្ត… ក្មេងៗក៏ដូចគ្នាដែរ ពួកគេមិនចូលចិត្តឱ្យហៅដោយឈ្មោះដែលឆ្លុះបញ្ចាំងទៅក្នុងផ្លូវដែលមើលងាយ ដូចជា អាភ្លើ អាខូចនោះឡើយ ព្រោះកូនតូចៗនឹងមានអារម្មណ៍ថា ខ្លួនឯងគ្មានមានតម្លៃ គួរឱ្យអស់សង្ឃឹម កើតជាចំណុចអន់នៅក្នុងដួងចិត្ត និងអាចលាក់ទុកទៅគេងយំតែម្នាក់ឯងបាន។
5.ឪពុកម្តាយសម្រេចចិត្តលែងលះគ្នា
ចំណុចចុងក្រោយនេះ ជារឿងដែលធ្វើបាបដួងចិត្តកូនតូចខ្លាំងបំផុត បើឪពុកម្តាយសម្រេចចិត្តលែងលះ និងគិតថាកូនតូចមិនជាអ្វីទេនោះ សូមប្រាប់ទៅចុះថា លោកអ្នកគិតខុសយ៉ាងធ្ងន់ធ្ងរខ្លាំងណាស់ដែលបញ្ហានេះនឹងក្លាយជាចំណុចមួយនៅក្នុងដួងចិត្តរបស់ក្មេង ព្រោះកុំភ្លេចថា កូនតូចត្រូវបានចិញ្ចឹមថែទាំមកដោយអ្នកទាំងពីរនាក់ ដូច្នេះទាំងឪពុក និងម្តាយប្រៀបដូចជា ទឹក និងខ្យល់អាកាសដែលធ្វើឱ្យកូនតូចរស់នៅតទៅទៀតបាន។ អ្នកទាំងពីរគឺ សេចក្តីសុខ និងជាគ្រួសារដែលមានគ្រប់ បើខ្វះខាងណាម្នាក់ទៅនោះ ប្រាកដណាស់ថា ក្មេងៗនឹងត្រូវនឹក និងដង្ហោយរក ហើយថែមទាំងលាក់ទុកភាពសោកសៅនៅក្នុងខ្លួនទៀតផង។
លោកឪពុកអ្នកម្តាយសាកល្បងសង្កេតស្តាប់សំឡេងរបស់កូនៗនៅពេលយប់ទៅមើលថា តើកូនតូចមានលួចយំឬទេ? បើបានឮសូរសំឡេងអណ្តឺតអណ្តក់នោះ បង្ហាញថា លោកអ្នកកំពុងធ្វើបាបដួងចិត្តកូនៗដូច5ចំណុចខាងលើនេះដោយមិនដឹងខ្លួនក៏អាចថាបានដែរ។ សាកល្បងបែរមកនិយាយពន្យល់គ្នា ដើម្បីឱ្យកូនតូចមានអារម្មណ៍ថាមានសុវត្ថិភាព និងគេងលក់យ៉ាងមានសេចក្តីសុខរហូតតទៅប្រសើរជាង៕
July 18, 2017
ដំណឹងល្អសម្រាប់និស្សិត! ក្រសួងផ្តល់កម្ចីសម្រាប់ការសិក្សាថ្នាក់មហាវិទ្យាល័យ
ភ្នំពេញ៖ នៅព្រឹកថ្ងៃទី17 ខែកក្កដា ឆ្នាំ2017 ក្រសួងទេសចរណ៍បានរៀបចំសិក្ខាសាលាពិគ្រោះយោបល់លើសេចក្តីព្រាងចុងក្រោយគោលការណ៍ណែនាំស្តីពីកម្ចីសម្រាប់និស្សិតក្នុងវិស័យទេសចរណ៍នៅទីស្នាក់ការគណៈកម្មាធិការជាតិអូឡាំពិកកម្ពុជាដើម្បីផ្តល់ឱកាសដល់និស្សិតក្រីក្រឱ្យមានលទ្ធភាពបន្តការសិក្សាថ្នាក់មហាវិទ្យាល័យក្នុងវិស័យទេសចរណ៍។
ឯកឧត្តម ណេប សាមុត អគ្គនាយកគ្រប់គ្រងឧស្សាហកម្មទេសចរណ៍មានប្រសាសន៍ថាសិក្ខាសាលានេះរៀបចំឡើងដើម្បីពិគ្រោះយោបល់ចុងក្រោយលើគោលការណ៍ណែនាំស្តីពីកម្ចីសម្រាប់និស្សិតក្នុងវិស័យទេសចរណ៍ដែលនឹងត្រូវបានប្រើប្រាស់ជាមូលដា្ននលើកទឹកចិត្តដល់អ្នកផ្តល់កម្ចីនិស្សិតទាំងអស់ រៀបចំឱ្យមានគម្រោងកម្ចីសម្រាប់និស្សិតក្នុងវិស័យទេសចរណ៍ជាមួយនឹងការផ្តល់លក្ខខណ្ឌកម្ចីមួយដែលមានលក្ខណៈសមស្របដល់បុគ្គលិក សិស្ស និស្សិត និងក្រុមគ្រួសារអាចមានលទ្ធភាពខ្ចីបាន និងជាជំនួយក្នុងការតម្រង់ទិសដល់បុគ្គលិក សិស្ស និស្សិត និងក្រុមគ្រួសារដែលមានបំណង និងចាប់អារម្មណ៍លើកម្ចីសម្រាប់និស្សិតក្នុងវិស័យទេសចរណ៍។
អង្គសិក្ខាសាលាបានពិភាក្សា និងឈានដល់ការឯកភាពរួមគ្នាលើចំណុចមួយចំនួន ដូចជាៈ
1. អង្គសិក្ខាសាលាបានគាំទ្រលើការរៀបចំគោលការណ៍ណែនាំស្តីពីការផ្តល់កម្ចីសម្រាប់និស្សិតក្នុងវិស័យទេសចរណ៍ និងបានឯកភាពជំរុញរៀបចំឱ្យមានគម្រោងកម្ចីនិស្សិតសម្រាប់វិស័យទេសចរណ៍ឱ្យបានឆាប់ ដោយរាល់គម្រោងកម្ចីសម្រាប់និស្សិតក្នុងវិស័យទេសចរណ៍ទាំងអស់ត្រូវមានការកំណត់រយៈពេលខ្ចីឱ្យបានច្បាស់លាស់ ទាំងក្នុងរយៈពេលខ្លី មធ្យម និងវែង។ ត្រូវធ្វើអធិការកិច្ចឱ្យបានទៀងទាត់ ត្រូវបកស្រាយពន្យល់ឱ្យបានច្បាស់ពីលក្ខខណ្ឌតម្រូវផ្សេងៗទាក់ទងទៅនឹងកម្ចីសម្រាប់និស្សិតក្នុងវិស័យទេសចរណ៍ សំដៅឱ្យមានការផ្តល់ព័ត៌មានច្បាស់លាស់ប្រកបដោយគុណភាព តម្លាភាព និងសុចរិតភាពដល់អ្នកស្នើសុំកម្ចីដែលជានិស្សិត។ ត្រូវមានការជំរុញឃោសនាផ្សព្វផ្សាយកម្ចីសម្រាប់និស្សិតក្នុងវិស័យទេសចរណ៍ឱ្យបានទូលំទូលាយ ត្រូវជំរុញ និងអភិវឌ្ឍឱ្យមានការផ្តល់កម្ចីដល់និស្សិតជាមួយនឹងការប្រាក់ទាបសម្រាប់និស្សិតក្នុងវិស័យទេសចរណ៍ និងត្រូវរៀបចំឱ្យមានបញ្ជីរាយនាមអ្នកផ្តល់កម្ចីសម្រាប់និស្សិតក្នុងវិស័យទេសចរណ៍ និងត្រូវរៀបចំឱ្យមានការលើកទឹកចិត្តដល់អ្នកផ្តល់កម្ចីសម្រាប់និស្សិតក្នុងវិស័យទេសចរណ៍តាមរយៈការផ្តល់ “ពានរង្វាន់អ្នកផ្តល់ និងអ្នកធានាកម្ចីនិស្សិតឆ្នើមប្រចាំឆ្នាំ”។
2.អង្គសិក្ខាសាលាបានកត់សម្គាល់ជាយុទ្ធសាស្រ្តកម្ចីសិក្សាក្នុងជំនាញទេសចរណ៍ មាន 12 ប្រភេទ រួមមានកម្ចីផ្តល់ដោយគ្រឹះស្ថានហិរញវត្ថុផ្តល់ប្រាក់កម្ចី និងហិរញ្ញវត្ថុទ្រទ្រង់ការសិក្សា ដែលមានលក្ខណៈជាកម្ចីដែលផ្តល់ដោយផ្ទាល់ពីក្រុមហ៊ុនប្រតិបត្តិករទេសចរណ៍ ធុរកិច្ចក្នុងវិស័យទេសចរណ៍។
3.អង្គសិក្ខាសាលាបានឯកភាពឱ្យមានការកំណត់លក្ខណៈសម្បត្តិ និងតួនាទីសម្រាប់អ្នកផ្តល់កម្ចី ដោយតម្រូវឱ្យបំពេញតាមលក្ខខណ្ឌ និងបានកត់សម្គាល់ពីតួនាទីរបស់អ្នកស្នើសុំកម្ចី ដោយត្រូវពិនិត្យមើលឱ្យបានប្រុងប្រយ័ត្នបំផុតលើអត្រាការប្រាក់ សោហ៊ុយផ្សេងៗ និងលក្ខខណ្ឌទូទាត់សងសម្រាប់កម្ចីដើម្បីធានាបានថា ការជ្រើសរើសកម្ចីសម្រាប់សិក្សាសមស្របទៅនឹងលទ្ធភាព និងតម្រូវការរបស់ខ្លួន។
4.អង្គសិក្ខាសាលាបានឯកភាព និងគាំទ្រលើយន្តការស្ថាប័នសម្រាប់ធានាដល់ការដំណើរការសម្របសម្រួល និងជំរុញការអនុវត្តគោលការណ៍ស្តីពីកម្ចីសម្រាប់និស្សិតក្នុងវិស័យទេសចរណ៍ ដោយបានអបអរសាទរ និងឯកភាពលើការបង្កើតក្រុមការងារជំរុញការអនុវត្តគម្រោងកម្ចីសម្រាប់និស្សិតក្នុងវិស័យទេសចរណ៍ដែលក្រសួងទេសចរណ៍បានបង្កើតឡើង ជាពិសេសគាំទ្រលើការរៀបចំឱ្យមានកិច្ចព្រមព្រៀងស្តីពីការជំរុញ គាំទ្រ និងធានាលើកម្ចីសម្រាប់និស្សិតក្នុងវិស័យទេសចរណ៍តាមរយៈការព្រមព្រៀងរវាងក្រសួងទេសចរណ៍ គ្រឹះស្ថានហិរញ្ញវត្ថុផ្តល់កម្ចីនិស្សិត គ្រឹះស្ថានអប់រំ និងបណ្តុះបណ្តាលជំនាញទេសចរណ៍ និងបដិសណ្ឋារកិច្ច សមាគមទេសចរណ៍ ដែលជាតំណាងប្រតិបត្តិករទេសចរណ៍ និងធុរកិច្ចក្នុងវិស័យទេសចរណ៍ និងសហព័ន្ធសហភាពយុវជនកម្ពុជា។
ជារួមអង្គសិក្ខាសាលាទាំងមូលសូមសម្តែងនូវការកោតសរសើរចំពោះការគិតគូរខ្ពស់របស់ក្រសួងទេសចរណ៍ក្នុងការជំរុញ និងសម្របសម្រួលឱ្យមានគម្រោងផ្តល់ប្រាក់កម្ចីដល់និស្សិតក្នុងវិស័យទេសចរណ៍ដែលនឹងចូលរួមចំណែកដល់ការកសាងធនធានអ្នកជំនាញក្នុងឧស្សាហកម្មទេសចរណ៍ដែលត្រូវការប្រមាណជាង 15 ម៉ឺន នាក់ក្នុងឆ្នាំ និងអរគុណយ៉ាងជ្រាលជ្រៅបំផុតចំពោះក្រសួងទេសចរណ៍ដែលបានខិតខំប្រឹងប្រែងយកអស់ស្មារតី កម្លាំងកាយចិត្ត មិនខ្លាចនឿយហត់ប្រកបដោយឆន្ទៈនយោបាយមោះមុតដើម្បីបុព្វហេតុអភិវឌ្ឍន៍ទេសចរណ៍ប្រកបដោយនិរន្តរភាព និងការទទួលខុសត្រូវដោយបាននាំមកនូវការអភិវឌ្ឍសេដ្ឋកិច្ច សង្គម បរិស្ថាន ការបង្កើតការងារ ការកាត់បន្ថយភាពក្រីក្រ និងការចូលរួមចំណែកដល់ការអភិវឌ្ឍសេដ្ឋកិច្ចបៃតងនៅកម្ពុជា ដោយឈរលើទស្សនទានជំរុញកំណើន និងនិរន្តរភាព។
គួរកត់សម្គាល់ថា រយៈពេល 5 ខែដើមឆ្នាំ2017នេះ កម្ពុជាទទួលបានភ្ញៀវទេសចរប្រមាណ 2,284,631 នាក់ កើនឡើងប្រមាណ 12.5% ធៀបនឹងរយៈពេលដូចគ្នាក្នុងឆ្នាំ2016។ តាមការព្យាករនៅឆ្នាំ2121 កម្ពុជានឹងអាចទទួលបានភ្ញៀវទេសចរអន្តរជាតិប្រមាណ 7លាននាក់ ជាមួយនឹងចំណូលសរុបប្រមាណ 5ពាន់លានដុល្លា និងបង្កើតការងារដោយផ្ទាល់ប្រមាណជិត 1លាននាក់៕
July 17, 2017
សួនឧស្សាហកម្មកសិកម្មធំបំផុតមួយ គ្រោងបង្កើតឡើងនៅកម្ពុជា
ភ្នំពេញៈ សួនឧស្សាហកម្មកសិកម្មដំណាំស្រូវធំបំផុតមួយ បាននិងកំពុងរៀបចំបង្កើតឡើងដើម្បីផលិតស្រូវដែលមានគុណភាពតម្រូវទៅនឹងទីផ្សារនាំចេញទៅកាន់ប្រទេសចិន តាមរយៈការវិនិយោគរួមគ្នារវាងអ្នកវិនិយោគក្នុងស្រុក និងអ្នកវិនិយោគមកពីប្រទេសចិន។
នាយកគ្រប់គ្រងជាន់ខ្ពស់ផ្នែកក្សេត្រសាស្រ្តក្រុមហ៊ុនហ្គោហុង នៃខេត្តក្វាងស៊ី ប្រទេសចិន លោក លី ផៃលីនបានលើកឡើងនៅក្នុងការចុះទស្សនកិច្ចនៅក្រុមហ៊ុនអេង ឌីប៉ូអភិវឌ្ឍន៍ ស្ថិតនៅក្នុងឃុំកំពង់អុស ស្រុកពញាឮ ខេត្តកណ្តាល កាលពីថ្ងៃម្សិលមិញថា ក្នុងការចាប់ផ្តើមដំបូងនៅកម្ពុជា ក្រុមហ៊ុនហ្គោហុងគឺជាអ្នកប្រមូលទិញស្រូវដើម្បីនាំទៅលក់នៅទីផ្សារប្រទេសចិន ប៉ុន្តែសម្រាប់គោលការណ៍នេះមិនសូវទទួលបានជោគជ័យនោះឡើយ ដូចនេះក្រុមហ៊ុនបានសម្រេចចិត្តរកទីតាំងណាមួយឲ្យបានជាក់លាក់ ដើម្បីផលិតស្រូវដែលមានគុណភាព ជាពិសេសជាស្រូវដែលមានពូជសុទ្ធល្អដើម្បីជំរុញការនាំចេញឲ្យកាន់តែប្រសើរឡើង ក្នុងនោះក្រុមហ៊ុនហ្គោហុងបានសិក្សានៅក្នុងខេត្តដែលមានសក្តានុពលដំណាំស្រូវមួយចំនួន ប៉ុន្តែពុំមានគម្រោងណាមួយបានបង្ហាញពីភាពវិជ្ជមានល្អជាងក្រុមហ៊ុនអេង ឌីប៉ូអភិវឌ្ឍន៍នេះឡើយ ក្នុងការផលិតស្រូវតម្រូវទីផ្សារនាំចេញ។
លោកបន្តថា ក្រោយពីបានធ្វើកិច្ចសហប្រតិបត្តិការក្នុងការផ្លាស់ប្តូរបទពិសោធ និងបច្ចេកទេសគ្នាទៅវិញទៅមក ហើយ បច្ចុប្បន្នក្រុមហ៊ុនទាំងពីរកំពុងលើកគម្រោងរបស់ខ្លួនដ៏ធំបំផុតមួយ ដើម្បីបង្កើតសួនឧស្សាហកម្មកសិកម្មដំណាំស្រូវនៅកម្ពុជាជាទិសដៅស្វែងរកភាពជោគជ័យឲ្យកាន់តែល្អប្រសើរ ដែលជាផលប្រយោជន៍រួមរបស់ក្រុមហ៊ុនទាំងពីរ ជាពិសេសការផ្តល់ផលប្រយោជន៍រវាងប្រទេសទាំងពីរផងដែរ។
លោក តាំង សុខឃី ជំនួយការក្រុមហ៊ុន អេង ឌីប៉ូអភិវឌ្ឍន៍ បានថ្លែងលើកឡើងថា មុននឹងក្រុមហ៊ុនហ្គោហុងនៃខេត្តក្វាងស៊ី ប្រទេសចិនបានចាប់ដៃគូជាមួយក្រុមហ៊ុនអេង ឌីប៉ូអភិឌ្ឍន៍ ក្រុមហ៊ុនមួយនេះបានសិក្សាជាច្រើនឆ្នាំ ទើបសម្រេចចិត្តថា មានតែក្រុមហ៊ុនអេង ឌីប៉ូអភិវឌ្ឍន៍តែមួយគត់ដែលមានចង្វាក់ផលិតកម្មតម្រូវទៅនឹងទីផ្សារប្រទេសចិនបាន ព្រោះបច្ចុប្បន្នក្រុមហ៊ុនអេង ឌីប៉ូអភិវឌ្ឍន៍កំពុងចាប់ផ្តើមនៅក្នុងគម្រោងជំហានទី2។
សម្រាប់គម្រោងជំហានទី2 ដែលកំពុងសហការមួយក្រុមហ៊ុនហ្គោហុងនេះបានចាប់ផ្តើមហើយ នៅលើទំហំផ្ទៃដីប្រមាណជាង 2ម៉ឺនហិកតា ក្នុងគម្រោងផលិតស្រូវក្រអូបធម្មជាតិដើម្បីនាំចេញទៅកាន់ទីផ្សារចិនស្របតាមស្តង់ដារអន្តរជាតិមួយ ជាពិសេសស្របទៅនឹងគោលនយោបាយរបស់រាជរដ្ឋាភិបាលកម្ពុជាដែលមានសម្តេចតេជោ ហ៊ុន សែន ជានាយករដ្ឋមន្រ្តី៕
July 17, 2017
លោក គីម ដារ៉ា បង្ហាញវិធីសាស្រ្តជាប់អាហារូបករណ៍ផ្នែកវិទ្យាសាស្រ្តពិតនៅបរទេស
សិស្សវិទ្យាល័យភាគច្រើនសុទ្ធតែបានស្គាល់លោក គីម ដារ៉ា អតីតនិស្សិតអាហារូបករណ៍វិស្វករនៃប្រទេសជប៉ុន និងជាស្ថាបនិកគ្រឹះស្ថានអប់រំ Start Up Cambodia ដែលជាកន្លែងបណ្តុះបណ្តាលសិស្សធម្មតាឱ្យក្លាយជាសិស្សពូកែផ្នែកវិទ្យាសាស្រ្តពិត និងភាគច្រើនមានសមត្ថភាពប្រឡងជាប់ទៅសិក្សានៅក្រៅប្រទេសថែមទៀតផង។
ចាប់ផ្តើមពីសិស្សពូកែ និងលេចធ្លោម្នាក់នៅវិទ្យាស្ថានបច្ចេកវិទ្យាកម្ពុជា (សាលាតិចណូ) លោក គីម ដារ៉ា បានប្រឡងជាប់អាហារូបករណ៍នៅប្រទេសជប៉ុន និងជាប់អាហារូបករណ៍សំខាន់ៗមួយចំនួនទៀត មុននឹងត្រឡប់មកកម្ពុជាដើម្បីធ្វើជាអ្នកបណ្តុះបណ្តាលគណិតវិទ្យា រូបវិទ្យា និងគីមីវិទ្យា ប្រកបដោយទេពកោសល្យ និងប្រសិទ្ធភាពខ្ពស់។ តាមរយៈបណ្តាញសង្គម និងវីដេអូក្នុង You Tube អ្នកជំនាញផ្នែកវិទ្យាសាស្រ្តរូបនេះបានបង្រៀនយុវជនកម្ពុជាជាច្រើនឱ្យមានលទ្ធភាពក្នុងការកសាងសមត្ថភាពផ្នែកវិទ្យាសាស្រ្តពិតរួមទាំងជំរុញឱ្យយុវជនកម្ពុជាច្រើនជាង 20នាក់ឱ្យទទួលបានអាហារូបករណ៍ទៅសិក្សានៅបរទេស។ ក្នុងនោះជាបទពិសោធ ឬអាចហៅបានថា ជាជោគជ័យក្នុងការផ្តល់យោបល់សម្រាប់អាហារូបករណ៍ លោកដារ៉ា បានជួយឱ្យនិស្សិតយ៉ាងហោចណាស់ 54នាក់ក្នុងចំណោម56នាក់ ឱ្យជាប់ទៅសិក្សានៅប្រទេសជប៉ុន។
លោក គីម ដារ៉ា បាននិយាយថា៖ «មុននឹងជាប់អាហារូបករណ៍ទៅសិក្សានៅក្រៅប្រទេស លុះត្រាតែយើងដឹងមានបំណងពិតប្រាកដ ហើយដឹងច្បាស់ថា យើងចង់បានអ្វីឱ្យពិតប្រាកដ ចៀសវាងទៅដល់ក្រៅប្រទេសហើយត្រូវត្រឡប់មកស្រុកខ្មែរវិញដោយគ្មានសញ្ញាបត្រ»។
លោកបានបញ្ជាក់ថា ការកំណត់គោលដៅឱ្យបានច្បាស់លាស់អាចជួយឱ្យយើងមានចិត្តសម្រាប់ត្រៀម និងមានកម្លាំងចិត្តដើម្បីធ្វើការស្រាវជ្រាវដោយមិននឿយហត់។ ការរៀនដើម្បីទទួលបានអាហារូបករណ៍គឺទាមទារឱ្យចេះជ្រើសរើសឯកសារ និងមុខវិជ្ជាឱ្យស្របនឹងចំណុចសំខាន់ៗដែលគេត្រូវការ ហើយក៏ទាមទារឱ្យមានការតាំងចិត្តខ្ពស់ផងដែរ។
ដើម្បីស្គាល់លំហាត់ប្រឡងជាប់អាហារូបករណ៍ទៅក្រៅប្រទេសយើងគួរស្វែងរកវិញ្ញាសាចាស់ៗ ឬសៀវភៅដែលភាគច្រើនមានលំហាត់ដែលប្រឡងចេញដើម្បីស្វែងរកចំណុចប្រសព្វដើម្បីកំណត់ថា លំហាត់ណាតែងតែចេញប្រឡង។ ចំណុចប្រសព្វត្រង់ចំណុចនេះគឺសំដៅលើភាពដូចគ្នា ឬភាពមិនដែលខានលើវិញ្ញាសាច្រើនឆ្នាំជាប់ៗគ្នា។ នៅពេលដែលយើងច្បាស់ថាលំហាត់ណាខ្លះជាលំហាត់ដែលស្ទើរតែចេញ ១០០% ហើយ យើងត្រូវព្យាយាមដោះស្រាយលំហាត់នោះឱ្យច្បាស់ដូចបាតដៃ នោះយើងនឹងអាចមានទំនុកចិត្តខ្ពស់ថា អាចជាប់នៅពេលប្រឡង។
ម្យ៉ាងវិញទៀត ភាសាអង់គ្លេសក៏ជាធាតុមួយយ៉ាងសំខាន់ផងដែរក្នុងប្រឡងអាហារូបករណ៍ទៅក្រៅប្រទេស។ លោកដារ៉ា បានបញ្ជាក់ថា ការសិក្សាភាសាអង់គ្លេស គួររៀនឱ្យចំចំណុច គឺមិនមែនរៀនតាមបែបទូទៅ ដែលត្រូវចំណាយពេលដល់ទៅ 4 ឆ្នាំ ដើម្បីទទួលបានសញ្ញាបត្រមួយនោះទេ យើងត្រូវរៀនតែចំណុចណាដែលមានសារៈសំខាន់សម្រាប់ការប្រឡងតែប៉ុណ្ណោះ។ ភាគច្រើននិស្សិតដែលចង់ប្រឡងគួររៀនតាមសៀវភៅ ឬវិញ្ញាសាដែលពាក់ព័ន្ធនឹងជំនាញដែលចង់ប្រឡង។
ជាវិធីសាស្រ្តល្អមួយទៀតដើម្បីងាយធ្វើលំហាត់ យើងអាចមើលខ្នាត ប្រសិនបើមិនយល់ច្បាស់ពីភាសា។ លោកថា ពេលខ្លះលោកក៏មិនយល់ពីភាសាដូចគ្នា លើលំហាត់មួយចំនួន តែនៅពេលដែលលោកមើលលើខ្នាត លោកអាចយល់បានថា ប្រធានលំហាត់គេចង់បានអ្វី បន្ទាប់មកលោកក៏ដោះស្រាយលំហាត់នោះ៕
July 17, 2017
ទារកដែលកើតពីម្តាយខ្វះជាតិអ៊ីយ៉ូដប្រឈមនឹងការបាត់បង់ IQ 13ពិន្ទុ
បញ្ហាមាតា និងទារកជារឿងសំខាន់មួយដែលសង្គមកម្ពុជាយើងបច្ចុប្បន្នគួរយកចិត្តទុកដាក់ឱ្យបានខ្លាំងបំផុត ព្រោះថានៅពេលដែលទារកកើតមកមានគុណភាពជីវិតមិនល្អ អនាគតនៃប្រទេសទាំងមូលក៏នឹងប្រឈមនឹងបញ្ហានាថ្ងៃអនាគតផងដែរ។
តាមរយៈការស្រាវជ្រាវមួយដោយរដ្ឋាភិបាលកម្ពុជាបានបង្ហាញឱ្យឃើញថា ក្នុងចំណោមអំបិលជាច្រើនប្រភេទនៅកម្ពុជា មានតែ1មុខប៉ុណ្ណោះដែលមានជាតិអ៊ីយ៉ូដគ្រប់គ្រាន់។
បញ្ហាកង្វះជាតិអ៊ីយ៉ូដនេះបានក្លាយជាកង្វល់មួយសម្រាប់វិស័យសុខភាពសាធារណៈ ហើយវាក៏ជះឥទ្ធិពលមិនល្អដល់អនាគតនៃវិស័យអប់រំរបស់កម្ពុជាផងដែរ ព្រោះតាមរយៈការបង្ហាញរបស់អង្គការ UNICEF ប្រចាំនៅកម្ពុជាបានឱ្យដឹងថា ទារកដែលកើតពីម្តាយខ្វះជាតិអ៊ីយ៉ូដ ប្រឈមនឹងការបាត់បង់ IQ ចំនួនដល់ទៅ 13 ពិន្ទុ។
គួរបញ្ជាក់ថា IQ (Intelligence Quality) ជាផ្នែកមួយនៃការវាស់ពីភាពវៃឆ្លាតរបស់មនុស្ស ហើយនៅពេលដែលមនុស្សមានពិន្ទុ IQ ខ្ពស់ ពួកគេនឹងមានសមត្ថភាព និងភាពច្នៃប្រឌិតខ្លាំង តែប្រសិនបើពិន្ទុ IQ របស់គេទាបវិញ គេនឹងពិបាកទទួលយកការអប់រំ ឬចំណេះដឹង ដែលយើងអាចហៅបានថាជាមនុស្សអសកម្ម មិនសូវមានការចងចាំបានល្អ៕
July 17, 2017
តារាចម្រៀងថៃ 7 ដួង ល្បីដោយសារបទនិពន្ធថ្មីដោយខ្លួនឯង
បើនិយាយពីរឿងចម្រៀង តន្រ្តី ដែលមានការប្រកួតប្រជែងក្នុងការតាក់តែងនិពន្ធថ្មី ទំនុកភ្លេងថ្មីដោយអ្នកច្រៀងខ្លួនឯង និងរៀបរាប់សាច់រឿងនៅក្នុងបទចម្រៀងដែលធ្វើឱ្យអ្នកស្ដាប់មានការទាក់ចិត្តដិតអារម្មណ៍ និងមានការគាំទ្រច្រើននោះ វាជារឿងមួយដែលពិបាកនឹងធ្វើបានណាស់ទម្រាំតែទទួលបានភាពជោគជ័យ តែដោយឡែកមានតារាថៃចំនួន 7 ដួង ដែលបានបញ្ចេញបទចម្រៀងរបស់ខ្លួនមួយបទដំបូងហើយ ទទួលបានគាំទ្រពីសំណាក់អ្នកស្តាប់ជាច្រើនដោយសារស្នាដៃរបស់គេខ្លួនឯងផ្ទាល់។ បើចង់ដឹងថា តើមានតារាចម្រៀងណាខ្លះនោះ សូមទស្សនារូបភាព និងប្រវត្តិខ្លះៗខាងក្រោមនេះ ៖
1.ឡាំយ៉ៃ ហៃថងខាំ

ចាប់ផ្ដើមពីតារាដំបូងគេដែលជាម្ចាស់បទ “ผู้สาวขาเลาะ ” ( ភូសាវខាឡក់) ច្រៀងដោយ ឡាំយ៉ៃ ហៃថងខាំ។ នាងទទួលបានការគាំទ្រ និងល្បីល្បាញខ្លាំងបំផុត ដែលពីដំបូងឡើយ នាងបានត្រឹមតែបង្ហោះចម្រៀងដែលខ្លួនឯងនិពន្ធនៅលើបណ្ដាញសង្គមតែប៉ុណ្ណោះ តែបច្ចុប្បន្ននេះនាងបានចូលច្រៀងនៅក្នុងផលិតកម្មធំមួយ ព្រមទាំងបានបញ្ចេញបទដែលនិពន្ធដោយខ្លួនឯងថ្មីៗ2 ទៀតដែលកំពុងមានការគាំទ្រយ៉ាងឥតឈប់ឈរ។ គួរបញ្ជាក់ថា តារាស្រីរូបនេះនិយមនូវការស្លៀកពាក់បែបសិចស៊ី និងមានសំឡេងពីរោះតាមបែបចម្រៀង លូកធុង (បទមនោសញ្ចេតនាស្រុកស្រែ)។
2. យីងលី ស្រ៊ីជុមផុន

ជាបទចម្រៀងរបស់នាងដែលល្បីល្បាញបំផុត មានអ្នកចូលទស្សនាច្រើនជាងគេប្រចាំឆ្នាំ2015 គឺបទ “ขอใจเธอแลกเบอร์โทร ” (ខចៃធឺលែកប៊ើថូ) ជាបទចម្រៀងដែលនិពន្ធដោយរូបនាងខ្លួនឯង ដែលពេញនិយមបំផុតពេញមួយឆ្នាំតែម្ដង ហើយដោយសារបទនេះដែរ បានធ្វើឱ្យតារាស្រីរូបនេះកើបលុយជាច្រើន និងបានទិញផ្ទះនៅ ព្រមទាំងជួយទំនុកបម្រុងឪពុកម្ដាយឱ្យបានរស់នៅស្រួលទៀតផង។
3.ជេននីហ្វ៊ើរ ឃីម

ជាតារាចម្រៀងដែលឆ្លងកាត់ការប្រឡងចម្រៀង និងនិពន្ធចម្រៀងបានមួយបទទទួលបានការគាំទ្រតែម្តង ហើយចម្រៀងរបស់នាងត្រូវបានយកទៅធ្វើជាចម្រៀងក្នុងខ្សែភាពយន្ដខ្នាតធំដែលមានចំណងជើងថា “คิดถึงเธอทุกที ” ( ឃិតធឹងធើធុកធី) មានន័យជាភាសាខ្មែរថា “នឹកបងគ្រប់ទីកន្លែង”។ បន្ទាប់មកទៀតគេសង្កេតឃើញថា តារាស្រីរូបនេះ ហាក់ដូចជាស្ងាត់ការនិពន្ធបទចម្រៀង និងងាកមកច្រៀងបទបរទេសច្រើនជាងបទថៃទៅវិញ។
4. ប៉ើន ប្រាថុមរ៉ាត

ជាតារាចម្រៀងដែលមានសមត្ថភាពតាក់តែងនិពន្ធទំនុកច្រៀង បទភ្លង លេងឧបករណ៍តន្រ្តី និងសមត្ថភាពជាច្រើនទៀត ដែលធ្វើឱ្យលោកចាប់ផ្តើមទទួលបានភាពល្បីល្បាញ និងគាំទ្រចេញពីការបង្ហោះឃ្លិបវីដេអូចម្រៀងនៅលើបណ្ដាញសង្គម Facebook រហូតដល់ក្លាយជាតារា Net Idol ដែលមានអ្នកគាំទ្រទស្សនា 100 លានវីយូ ( Views ) ដែលបទរបស់លោកមានចំណងជើងថា “อ้ายมีเหตุผล”( អាយមីហេតផុន) មានន័យថា “បងមានហេតុផល” នៅក្នុងផលិតកម្ម RSiam។
5.ចាក់ នុងផានី

មានមនុស្សជាច្រើនធ្លាប់ស្គាល់នាងថាជា ចាក់ អាស្យាម ជាតារាចម្រៀងសិចស៊ី និងមានក្បាច់រាំស្រើបស្រាលបំផុត ក៏ប៉ុន្ដែនាងត្រូវបានអ្នកគាំទ្រស្គាល់ដំបូងបង្អស់តាមរយៈបទចម្រៀងរបស់តារាកំប្លែង នាយ ជែត ដែលកាលនោះនាងគ្រាន់តែជា Dancer នៅក្នុងវីដេអូចម្រៀងតែប៉ុណ្ណោះ។
6.កង ហួយរ៉ៃ

ជាតារាចម្រៀងដែលល្បីល្បាញតាមរយៈបណ្ដាញសង្គម YouTube ដែលដំបូងឡើយលោកបានបង្ហោះបទចម្រៀងតែងនិពន្ធថ្មីដោយខ្លួនឯងរបស់លោក ដែលមានចំណងជើងថា ” ไสว่าสิบ่ถิ่มกัน ” (សៃវ៉ាស៊ិ-បធីមកាន់) ដែលខ្មែរយើងបានយកមកច្រៀងដែរ និងដាក់ចំណងជើងថា “ស៊ីបានចេះតែស៊ីទៅ” ហ្នឹងឯង។ តារាចម្រៀងវ័យ 27 ឆ្នាំរូបនេះមានសមត្ថភាពខាងផ្នែកសិល្បៈលើជំនាញជាច្រើន ហើយថ្មីៗនេះលោកបានសម្ដែងរឿងភាគទូរទស្សន៍ផងដែរ។
7.ប៉េក ផាលិតហ្សូក

តារាចម្រៀងរូបនេះ ជាតារាចម្រៀងនិពន្ធបទភ្លេង និងច្រៀងដោយខ្លួនឯងផ្ទាល់ មានស្នាមញញឹមស្រស់សង្ហា ហើយលោកត្រូវបានគេចាប់អារម្មណ៍ខ្លាំងបំផុតនៅពេលដែលចូលទៅប្រឡងក្នុងកម្មវិធី The Mask Singer ហើយលោកក៏បានយកបទចម្រៀងដែលលោកនិពន្ធទៅប្រឡងផងដែរ ដែលបទនោះមានចំណងជើងថា “Love On Top” និងបទ “Versace on The Floor”៕
July 17, 2017
ទស្សនាវដ្តី Vogue ចេញមុខសុំទោសចំពោះការមិនពេញចិត្តគម្របរូបគូស្នេហ៍ Zayn Malik និង Gigi Hadid
បន្ទាប់ពីមានការផ្ទុះកំហឺង និងមតិរិះគន់ជាច្រើនទៅលើទស្សនាវដ្តី Vogue ដែលបានជ្រើសរើសយករូបថតគូស្នេហ៍ល្បីឈ្មោះ Zayn Malik និង Gigi Hadid មកដាក់លើគម្របទស្សនាវដ្តីលេខថ្មីរួចមកនោះ ថ្មីៗនេះខាងទស្សនាវដ្តីបានចេញមុខសុំទោសចំពោះការរិះគន់ខ្លាំងៗទៅលើ Gender fluidity លំហូរយេនឌ័រភេទឆ្លាស់ផ្សំ (ភេទឆ្លាស់ផ្សំជាភេទដែលមិនអាចកំណត់ប្រាកដប្រជាបាន ព្រោះអាចរៀបការជាមួយប្រុសក៏បាន ស្រីក៏បាន) ដែលខាងទស្សនាវដ្តីបានធ្វើការផ្លាស់ប្ដូរសម្លៀកបំពាក់របស់អ្នកទាំងពីរក្នុងរូបលើគម្របទស្សនាវដ្តីប្រចាំខែកក្កដានេះ។
គេសង្កេតឃើញថា ខាងទស្សនាវដ្តីបានប្ដូរសម្លៀកបំពាក់ក្នុងការថតរូបដាក់លើគម្រប ដោយប្ដូរឱ្យ Gigi Hadidស្លៀកសម្លៀកបំពាក់របស់ Zayn Malik ហើយលោក Zayn Malik ក៏ប្តូរឱ្យស្លៀកសម្លៀកបំពាក់របស់ Gigi វិញ ដើម្បីបានបង្ហាញពីភាពផ្អែមល្ហែមរបស់គូស្នេហ៍មួយគូនេះ ។ យ៉ាងណាមិញ ខាងទស្សនាវដ្តី Vogue បានសុំទោសចំពោះរឿងនេះថា “សុំទោសចំពោះរឿង Gender fluidity (លំហូរយេនឌ័រ ) តែយើងគិតថា Zayn Malik និង Gigi Hadid ជាផ្នែកមួយរបស់មនុស្សជំនាន់ថ្មី ដែលមានភាពផ្អែមល្ហែម ព្រមទាំងជាក្រុម Gender fluidity ផងដែរ”។
គួរបញ្ជាក់ផងដែរថា ចំពោះបញ្ហា Gender fluidity នេះ មានអ្នកគាំទ្រម្នាក់បានចេញមកពន្យល់ទៅខាងទស្សនាវដ្តីវិញថា “ខ្ញុំគិតថា Vogue នៅតែមិនយល់ពី Gender fluidity គឺជាអ្វី? ការដែលប្រើសម្លៀកបំពាក់របស់សង្សារនាង (Gigi) មិនបានមានន័យថា អ្នកគឺជាលំហូរយេនឌ័រ នោះទេ ហើយ Vogue គឺច្បាស់ជាធ្លាក់ពី 100 មកនៅ 0 វិញក្នុងពេលឆាប់ៗនេះមិនខាន” ៕
July 17, 2017
ប្រឡងបាក់ឌុបឆ្នាំនេះក្រសួងត្រៀមចាយលុយជាង 15ពាន់លានរៀល
ពីមួយឆ្នាំទៅមួយឆ្នាំ ក្រសួងអប់រំ យុវជន និងកីឡា បានព្យាយាមបង្កើនសមត្ថភាព និងលទ្ធភាពរៀបចំការប្រឡងមធ្យមសិក្សាទុតិយភូមិ ឱ្យកាន់តែមានលក្ខណៈសុក្រឹតឡើង។
នៅក្នុងសន្និសីទកាសែតស្តីពីការរៀបចំប្រឡងមធ្យមសិក្សាទុតិយភូមិចំណេះទូទៅ និងបំពេញវិជ្ជា ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា ក្រសួងគ្រោងរៀបចំថវិកាប្រមាណ 15,500លានរៀល ដែលគិតជាដុល្លារគឺប្រមាណ 3.5លានដុល្លារ។
ក្នុងនោះឯកឧត្តម រដ្ឋមន្ត្រីបានបញ្ជាក់ផងដែរពីការរំពឹងទុករបស់ក្រសួងថា គុណភាពសិស្សឆ្នាំនេះនឹងអាចល្អជាងមុន ហើយពិន្ទុមធ្យមភាគសិស្សក៏អាចប្រសើរជាងមុនផងដែរ ព្រោះក្រសួងបានរៀបចំយន្តការល្អៗ ជាច្រើនដើម្បីជួយបណ្តុះបណ្តាលសមត្ថភាពរបស់សិស្សឱ្យកាន់តែប្រសើរឡើង។ នៅក្នុងកម្មវិធីសិក្សា ក្រសួងបានរៀបចំកែសម្រួលវិធីបង្រៀនលើមុខវិជ្ជាវិទ្យាសាស្រ្តពិត រៀបចំមេរៀនសម្រាប់ការតែងសេចក្តី បង្កើតក្លិបសិក្សា និងបង្កើនចំនួនគ្រូបង្រៀនស្ម័គ្រចិត្តដើម្បីជួយឱ្យសិស្សនៅថ្នាក់វិទ្យាល័យមានឱកាសស្មើគ្នាដើម្បីទទួលបានចំណេះដឹងត្រៀមប្រឡងដែលមានលក្ខណៈច្បាស់លាស់ និងតឹងរ៉ឹង។
ការបញ្ជាក់ថា នៅឆ្នាំដំបូងនៃការធ្វើកំណែទម្រង់ប្រព័ន្ធអប់រំមានសិស្សប្រមាណជាង 40% ដែលបានប្រឡងជាប់បាក់ឌុបទាំងលើកទី1 (25%) និងលើកទី2 (17%) ចំណែកឯការប្រឡងនៅឆ្នាំទី2 មានសិស្សជាប់បាក់ឌុបចំនួនជាង 52% និងឆ្នាំទី3 មានសិស្សជាប់បាក់ឌុបប្រមាណជាង 62% ដែលចំនួននេះធ្វើឱ្យក្រសួងអាចរំពឹងទុកថានឹងមានចំនួនសិស្សកាន់តែកើនឡើងដែលបានជាប់បាក់ឌុបដោយការខិតខំ និងប្រើប្រាស់សមត្ថភាពពិតប្រាកដ៕
July 17, 2017
Lenovo ចេញគំរូកុំព្យូទ័រអាចមូរបត់បាន
ក្រុមហ៊ុនបច្ចេកវិទ្យារបស់ចិន Lenovo បានបង្ហើបពីគម្រោងកុំព្យូទ័រសម្រាប់ថ្ងៃអនាគតដែលអាចមូរបត់បានប្រភេទ 2 in 1 បំពាក់អេក្រង់ Touchscreen មានគែម និងកម្រាស់ស្ដើង និងបំពាក់ដោយបច្ចេកវិទ្យាឆ្លាតវៃជាច្រើនទៀត។
កុំព្យូទ័រមួយនេះត្រូវបានក្រុមហ៊ុនឱ្យដឹងថា វាស្ថិតក្នុងត្រកូល ThinkPad អាចបត់បាន 360 ដឺក្រេលើអេក្រង់ Touch ប្រភេទOLEDPanel ។ កុំព្យូទ័រនាពេលអនាគតនេះនឹងអាចធ្វើការបញ្ជាដោយប្រើសំឡេង និងការប្រើខ្មៅដៃសម្រាប់គូរវាសលើវាបាន ពេលយើងចង់បញ្ជាឱ្យធ្វើអ្វីមួយ។ ចំពោះការរចនារូបបែបនេះ Lenovo មិនបានភ្ជាប់ជាមួយ Touchpad ដោយគ្រាន់តែមាននូវប៊ូតុងចុច Mouse ឆ្វេង/ស្ដាំតែប៉ុណ្ណោះ ហើយរន្ធ Ethernet, USB និងរន្ធ HDMI ក៏អាចនឹងគ្មានដែរ។
យ៉ាងណាមិញក្រុមហ៊ុនមិនបានបង្ហើបប្រាប់ពីលក្ខណៈសម្បត្តិរបស់កុំព្យូទ័រមួយនេះលម្អិតបន្ថែមទេ ប៉ុន្តែលោក Teismann នាយករងជាន់ខ្ពស់នៃក្រុមហ៊ុន Lenovo បានបញ្ជាក់ថា ខ្លួននឹងបញ្ចេញនូវកុំព្យូទ័រ ThinkPad ប្រភេទ Special edition នៅក្នុងខែធ្នូ ចុងឆ្នាំនេះ ដើម្បីអបអរខួប 25 ឆ្នាំ នៃការបង្កើតម៉ាក ThinkPad ហើយកុំព្យូទ័រថ្មីនោះនឹងអាចមានបញ្ចូលនូវលក្ខណៈពិសេសមួយចំនួននៃកុំព្យូទ័រដែលគ្រោងសម្រាប់ថ្ងៃអនាគតនោះដែរ។
គួររំឭកដែរថា ក្រុមហ៊ុន Lenovo ត្រូវបានបង្កើតឡើងនៅទីក្រុងប៉េកាំងក្នុងឆ្នាំ 1984 ជាក្រុមហ៊ុន Legend និងត្រូវបានដាក់បញ្ចូលទៅក្នុងទីផ្សារសេរីនៃទីក្រុងហុងកុងក្នុងឆ្នាំ 1988។ ក្នុងនោះ Lenovo បានទិញអាជីវកម្មកុំព្យូទ័រយួរដៃពីក្រុមហ៊ុន IBM នៅក្នុងឆ្នាំ 2005 ហើយបានយល់ព្រមទទួលយកអាជីវកម្មម៉ាស៊ីន Server នៅឆ្នាំ 2014៕
July 17, 2017