Category: សង្គម និងសេដ្ឋកិច្ច

យុវជនជាអ្នកបន្តវេនលើគ្រប់វិស័យក្នុងសង្គមហើយស្ថានភាពយុជននាពេលបច្ចុប្បន្នបានឆ្លុះបញ្ចាំងពីអនាគតរបស់សង្គមទាំងមូល។

លោកសាស្ត្រាចារ្យសំអាង សមព្រឹទ្ធបុរសនៃមហាវិទ្យាល័យសិល្បៈអក្សរសាស្ត្រ និងមនុស្សសាស្ត្រនៃសាកលវិទ្យាល័យបញ្ញាសាស្ត្រកម្ពុជាបានថ្លែងនៅក្នុងសិក្ខាសាលាស្តីពីកីឡាស្នេហា និងការអប់រំនៅសតវត្សរ៍ទី21ថា យុវជននាពេលបច្ចុប្បន្នបានដើរតួនាទីយ៉ាងសំខាន់ក្នុងកិច្ចអភិវឌ្ឍសហគមន៍វប្បធម៌ជាពិសេសតួនាទី និងកាតព្វកិច្ចរបស់យុវជនខ្មែរក្នុងការជំរុញលើវិស័យកីឡាការងារស្ម័គ្រចិត្តការស្វែងយល់ពីសុភមង្គលគ្រួសារ និងការអភិវឌ្ឍខ្លួនការកសាងឧត្តមភាពសេចក្តីថ្លៃថ្នូរនៅក្នុងសង្គម និងការផ្សព្វផ្សាយបន្តឱ្យបានទូលំទូលាយទៅកាន់យុវវ័យដទៃទៀតដើម្បីបង្កើនគុណភាពធនធានមនុស្សនៅកម្ពុជា។

លោកសាស្ត្រាចារ្យ សំអាង សម បានមានប្រសាសន៍ថា៖ «ជាមោទនភាពរបស់យើងដែលយើងឃើញថាយុវជនខ្មែរមានភាពទទួលខុសត្រូវខ្ពស់ដោយយុវវ័យដឹកនាំយុវវ័យខ្លួនឯងយុវវ័យដោះស្រាយបញ្ហាយុវវ័យដោយខ្លួនឯងយុវវ័យបង្រៀនយុវវ័យគ្នាឯង និងយុវវ័យចូលរួមយ៉ាងសកម្មជាចំណែកមួយក្នុងការអភិវឌ្ឍសង្គម»។

លោកសាស្ត្រាចារ្យបានបន្ថែមទៀតថា ការងារសំខាន់ និងមានន័យដែលយុវវ័យបានធ្វើនាពេលបច្ចុប្បន្ននេះជាសក្ខីភាពគួរឱ្យកត់សម្គាល់ និងសរសើរដែលយុវជនយុវនារីមានគំរូល្អធ្វើជាមគ្គុទេសក៍ក្នុងការចូលរួមអភិវឌ្ឍសង្គមវប្បធម៌ជាតិឱ្យរីកច្រើនទៅអនាគតប្រកបដោយឆន្ទៈនិងសមត្ថភាពខ្ពស់។

ចំណុចនេះបង្ហាញថា យុវវ័យជំរុញកម្លាំងចិត្តពង្រឹងសមត្ថភាព និងបទពិសោធបង្កើតបណ្តាញស្ម័គ្រចិត្តជួយឈឺឆ្អាលដល់អ្នកដទៃស្គាល់តួនាទីរបស់ខ្លួន និងកាតព្វកិច្ចរបស់ខ្លួនលើសពីការគិតពីប្រយោជន៍ផ្ទាល់ខ្លួនដោយគិតពីប្រយោជន៍នៃការកសាងធនធានមនុស្សប្រកបដោយការបំផុសគំនិតដល់អ្នកឯទៀតជំរុញទឹកចិត្តដាស់តឿនដាស់ស្មារតីជាពិសេសយុវជនយុវនារីខ្មែរឱ្យចាប់អារម្មណ៍និងយកចិត្តទុកដាក់ចំពោះការសិក្សារៀនសូត្រ និងកិច្ចការរបស់សហគមន៍យើងផងដែរ។

ជាបណ្តាំផ្ញើលោកសាស្ត្រាចារ្យសំអាង សមបានមានប្រសាសន៍ថា យុវជនយុវនារីខ្មែរត្រូវមានសតិសម្បជញ្ញៈស្មារតីថែរក្សាបន្តវេនជាទំពាំងស្នងឫស្សីខិតខំសិក្សារៀនសូត្រពីវប្បធម៌អរិយធម៌ជាតិរបស់ខ្លួនដើម្បីឱ្យយល់កាន់់តែច្បាស់អំពីតម្លៃសារៈសំខាន់ភាពសម្បូរបែបនៃសម្បត្តិបេតិកភណ្ឌរបស់ជាតិដែលមានបង្កប់នូវអត្តសញ្ញាណជាតិដ៏រឹងមាំក្នុងការចូលរួមអភិវឌ្ឍសង្គម។ យុវវ័យជាកតាលិករយ៉ាងសំខាន់បំផុតដើម្បីការផ្លាស់ប្តូរ និងប្រកាន់ខ្ជាប់នៅក្នុងខ្លួនឱ្យមានវិន័យក្នុងគំនិតការតស៊ូស្វិតស្វាញហើយ និងសេចក្តីព្យាយាមដើម្បីឆ្ពោះទៅរកឧត្តមភាពនៃជីវិត៕

អំពើហិង្សាជារឿងរសើបមួយក្នុងសង្គមកម្ពុជា ហើយតាមការស្រាវជ្រាវបានរកឃើញថា អំពើហិង្សាក្នុងគ្រួសារភាគច្រើនតែងតែកើតមានលើស្ត្រី។

នៅក្នុងពិធីចុះហត្ថលេខាលើប្រកាសរួមស្តីពីក្របប្រតិបត្តិប្រព័ន្ធផ្សព្វផ្សាយសម្រាប់ការរាយការណ៍ព័ត៌មានពីអំពើហិង្សាស្ត្រី លោកជំទាវ អ៊ឹង គន្ថាផាវី បានលើកឡើងថា ដើម្បីទប់ស្កាត់អំពើហិង្សា គឺត្រូវការឱ្យមានការចូលរួមពីគ្រប់សមាសភាព រួមទាំងប្រព័ន្ធផ្សព្វផ្សាយព័ត៌មានទៀតផងដើម្បីអប់រំដល់សង្គម។  លោកជំទាវរដ្ឋមន្ត្រី បានមានប្រសាសន៍ថា៖ «អ្នកដែលប្រព្រឹត្តអំពើហិង្សាសាហាវ ច្រើនតែជាអ្នកដែលមិនទទួលបានការអប់រំខ្ពស់»។

បន្ថែមពីលើនេះផងដែរ លោកជំទាវបានបញ្ជាក់ថា ការរាយការណ៍ព័ត៌មានកន្លងរបស់អ្នករាយការណ៍ព័ត៌មានមួយចំនួនពាក់ព័ន្ធនឹងការប្រើអំពើហិង្សាចំពោះស្ត្រីនៅមានភាពអវិជ្ជមានទាក់ទងទៅនឹងអំពើហិង្សាលើស្ត្រី ជាពិសេសកង្វះការចូលរួមអប់រំសីលធម៌ក្នុងសង្គម។ លោកជំទាវបានស្នើសុំឱ្យមានការរួមគ្នាលុបបំបាត់វប្បធម៌ហិង្សា និងបង្កើតសីលធម៌ល្អទុកឱ្យអ្នកជំនាន់ក្រោយរក្សាបន្តពីយើងទាំងអស់គ្នា៕

ភ្នំពេញៈ មន្រ្តីជាន់ខ្ពស់ក្រសួងការងារបានស្នើសុំភាគីថៃជួយផ្តល់សេវាគាំពារ និងសង្រ្គោះពលករកម្ពុជាដែលត្រូវបានគេជួញដូរទៅកាន់ប្រទេសថៃ។

ក្នុងជំនួបជាមួយលោក អាឌុល សែងស៊ីកែវ រដ្ឋមន្ត្រីក្រសួងអភិវឌ្ឍន៍សង្គមថៃកាលពីថ្ងៃម្សិលមិញ លោកអ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈបានស្នើទៅកាន់ភាគីថៃលើចំណុចមិនប្រក្រតីមួយចំនួនផងដែរ ក្នុងនោះគឺរឿងពលករដែលត្រូវបាននាំចូលទៅធ្វើការនៅប្រទេសថៃខុសច្បាប់ គឺជាជនរងគ្រោះដែលត្រូវបានគេជួញដូរដែលគួរតែមានការគាំពារ ជួយសង្រ្គោះ និងផ្តល់សេវា។ នេះជាចំណុចដែលភាគីទាំងពីរគួរនាំគ្នាដោះស្រាយ។ មួយវិញទៀត រដ្ឋមន្រ្តីក្រសួងការងារកម្ពុជាក៏បានលើកឡើងពីប្រពន្ធ និងកូនដែលទៅជាមួយពលករខ្មែរយើងនោះផងដែរ ដែលគួរតែមានការគាំពារ ផ្តល់សេវាកម្មផ្សេងៗ អប់រំ និងសេវាសុខាភិបាលដល់ពួកគេ។

លោករដ្ឋមន្រ្តីក្រសួងការងារក៏បានលើកពីគម្រោងដែលចង់ឲ្យភាគីថៃបង្កើតឱ្យមានជាមជ្ឈមណ្ឌលគាំពារពលករមួយសម្រាប់ទទួលយកពលករដែលជាជនរងគ្រោះដោយការជួញដូរដើម្បីធ្វើការប្រឹក្សាណែនាំដល់ពួកគេកុំឱ្យចាញ់បោកមេខ្យល់ទៀត ហើយភាគីថៃអាចបញ្ជូនពួកគេមកវិញតាមរយៈមជ្ឈមណ្ឌលនេះ។

ជាការឆ្លើយតបលោក អាឌុល សែងស៊ីកែវ រដ្ឋមន្ត្រីក្រសួងអភិវឌ្ឍសង្គមថៃបានទទួលយក និងឯកភាពនឹងការលើកឡើងរបស់ភាគីកម្ពុជា ហើយលោកនឹងបន្តឆន្ទៈអនុវត្តខ្លឹមសារក្នុងអនុស្សរណៈដែលបានចុះកិច្ចព្រមព្រៀងគ្នាកន្លងមក។ ជាក់ស្តែងថ្មីៗនេះភាគីថៃបានដោះស្រាយបញ្ហាជួញដូរមនុស្សបានជាង100ករណី ហើយរឹបអូសទ្រព្យសម្បត្តិបានជាង790លានបាត និងកាត់ទោសឱ្យជាប់គុកលើមន្ត្រី និងអ្នកនយោបាយរបស់ខ្លួនដែលបានប្រព្រឹត្តបទល្មើសនេះប្រមាណជា130នាក់ផងដែរ។

ពលករកម្ពុជាដែលបម្រើការងារនៅក្នុងប្រទេសថៃបច្ចុប្បន្នមានប្រមាណជា 1,050,000 នាក់ ក្នុងនោះជាង70ម៉ឺននាក់មានភាពស្របច្បាប់ហើយ និងប្រមាណ30ម៉ឺននាក់ទៀតមិនទាន់មានភាពស្របច្បាប់នៅឡើយ។ ហើយថ្មីៗនេះ រដ្ឋាភិបាលថៃបានធ្វើការកែទម្រង់ច្បាប់ថ្មីដើម្បីគ្រប់គ្រងពលករបរទេសដែលមានភាពតឹងរ៉ឹងជាមុន ហើយធ្វើការផាកពិន័យធ្ងន់ធ្ងរជាងមុនចំពោះនិយោជក។ ភាគីថៃក៏បានចេញសេចក្តីប្រកាសឱ្យមានការពន្យាពេលក្នុងការអនុវត្តច្បាប់នេះ៦ខែដែលឯកឧត្តមមើលឃើញថា
នេះជាឱកាសមួយសម្រាប់ប្រទេសទាំងពីររួមគ្នាដោះស្រាយបញ្ហាពលករទេសន្តរប្រវេសន៍ សំដៅបង្កើតភាពស្របច្បាប់ និងការការពារសិទ្ធិ ព្រមទាំងការរំលោភបំពានផ្សេងៗ៕

ពេញ​មួយ​រយៈពេល​នៃ​ការ​ពពោះ ស្ត្រី​មានគភ៌​តែងតែមាន​អាការ​របស់​អ្នកមាន​ផ្ទៃពោះ​កើតឡើង​ជានិច្ច​ មិនថាតែ​អាការ​ចាញ់កូន អាការ​ឈឺពោះ​ធ្ងន់​កន្តុក​ទៅ​ក្រោម ឈឺ​ខ្នង ឬ​ឈឺ​បត់ជើងតូច​ញឹកញាប់​ជាដើម។ អាការ​ទាំងនោះ​អាច​សាង​ក្តីកង្វល់​ចិត្ត​ដល់​ស្ត្រី​មានគភ៌​ឱ្យមាន​អារម្មណ៍​មួម៉ៅ​ជា​ញឹកញាប់ តែ​នៅពេល​ថ្ងៃ​ប្រសូត​មកដល់ ស្ត្រី​មានគភ៌​អាច​នឹងមាន​អារម្មណ៍​នឹក​កង្វល់​ឡើង​ទ្វេដង​ទៅទៀត​ជាមួយនឹង​ការត្រៀមខ្លួន ដើម្បី​ទប់ទល់​នៅពេល​ប្រសូត។ ថ្ងៃនេះ ឡា​រ៉ែ​ន មាន​ពាក្យ​ណែនាំខ្លះៗដើម្បី​ជួយ​ឱ្យ​ស្ត្រី​មានគភ៌​កាត់បន្ថយ​សភាវ​វិតក្ក​កង្វល់​បាន​ដូចតទៅ។

ទប់​ទល់នឹង​ការឈឺចាប់
សម្រាប់​ស្ត្រី​មានគភ៌​កូនតូច​លើកដំបូង ក្រោយពី​ឆ្លង​ផុត​អាការ​អ្នកមាន​ផ្ទៃពោះផ្សេងៗរួចមក នៅពេល​ជិត​ដល់​ថ្ងៃ​ប្រសូត ស្ត្រី​មានគភ៌​ច្បាស់ជាមាន​ក្តីកង្វល់​ជាមួយនឹង​រឿង​ការឈឺចាប់​ពេលប្រសូត​ជា​រឿង​ធម្មតា ហេតុនេះ ឡា​រ៉ែ​ន សូម​ណែនាំ​ថា ចូរ​ប្រឹក្សា​ជាមួយ​គ្រូពេទ្យ ដើម្បី​ទប់ទល់​នឹង​ការឈឺចាប់​ទាំងនោះ។ ទាំងអស់នោះ​គឺ​ដើម្បីឱ្យ​រូបអ្នក​បានទទួល​នូវ​ពាក្យ​ណែនាំ​ដែល​ល្អ​បំផុត​ក្នុងការ​ត្រៀមខ្លួន ត្រៀម​ចិត្ត​ក្នុង​ថ្ងៃ​ប្រសូត​បាន​យ៉ាងពេញទំហឹង។ ជាមួយគ្នានេះដែរ ស្ត្រី​មានគភ៌​ដែលជិត​ប្រសូត​គួរ​គិតតែ​រឿង​ដែល​វិជ្ជមានល្អៗ ដោយ​អាច​នឹង​គិតថា ទោះជា​ឈឺចាប់​ប៉ុនណាតែ​នៅពេលដែល​អ្នក​បានឃើញ​មុខ​កូន​សម្លាញ់​ដែល​ទើប​ប្រសូត​ចេញមក អ្នក​នឹងមាន​ស្នាមញញឹម​ដ៏​ស្រស់ស្រាយ​ភ្លាម​មិន​ខាន ព្រោះ​ជីវិត​របស់​អ្នកកំពុងតែ​បានទទួល​នូវ​កាដូ​ដ៏​មានតម្លៃ​បំផុត​មួយ​ហើយ។ ចំណុច​នេះ​ច្បាស់​ជា​ធ្វើឱ្យ​ខ្លួន​អ្នកមាន​អារម្មណ៍ល្អ​ប្រសើរឡើង ធូរស្រាល បាត់អស់​ក្តីកង្វល់​លើ​រឿង​ឈឺចាប់​នៅពេល​ប្រសូត និង​ញញឹមឡើង​តែម្នាក់ឯង​មិន​ខាន។

ជ្រើស​រើសយក​វិធី​ប្រសូត​ដែល​ល្អ​បំផុត
ការ​ប្រសូត​បុត្រ​តាមបែប​ធម្មជាតិ ឬ​ប្រសូត​ដោយ​ខ្លួនឯង គឺជា​វិធី​ប្រសូត​ដែល​ល្អ​បំផុត ហើយ​រាងកាយ​ថែមទាំង​អាច​រឹងប៉ឹង​មាំមួន​ឡើងវិញ​បានឆាប់រហ័ស​ទៀតផង តែ​សម្រាប់​រាងកាយ​របស់​ស្ត្រីម្នាក់ៗក៏​អាច​នឹងមាន​ភាព​ត្រៀម​ជាស្រេច​ក្នុងការប្រសូត​ខុសប្លែក​ពីគ្នា​ដែរ។ ស្ត្រី​ណា​ដែល​រាងកាយ​មាន​សភាវ​ខុស​ប្រក្រតី គ្រូពេទ្យ​អាច​នឹង​ប្រើ​វិធី​ការ​វះ​ប្រសូត តែបើ​ស្ត្រី​មានគភ៌​ណា​មាន​សុខភាព​រាងកាយ​រឹងប៉ឹង​ល្អ​ទាំង​កាយ និង​ចិត្ត ក៏​ស័ក្តិសមនឹង​ការ​ប្រសូត​ដោយ​វិធី​ធម្មជាតិ​ខ្លាំង​បំផុត។ តែ​យ៉ាងណាក៏ដោយ ស្ត្រី​មានគភ៌​កូន​ដំបូង សូមកុំ​ភ្លេច​ប្រឹក្សា​ជាមួយ​គ្រូពេទ្យ​រឿង​វិធី​ការ​ប្រសូត​ដែល​ស័ក្តិសម​នឹង​ខ្លួនឯង​ផង។

ពេល​តាំង​គភ៌​ចូរ​ឧស្សាហ៍​ជួប​គ្រូពេទ្យ​តាម​ការ​ណាត់​គ្រប់ពេល
ក្នុងអំឡុងពេល​នៃ​ការតាំង​គភ៌ គ្រូពេទ្យ​តែងតែ​ណាត់ជួប ​ដើម្បី​ពិនិត្យ​រាងកាយ និង​គភ៌​យ៉ាង​ជាប់លាប់ ព្រោះ​បើសិន​ជាមាន​អ្វី​ខុស​ប្រក្រតី គ្រូពេទ្យ​នឹង​បាន​ទប់​ទប់​ព្យាបាល​យ៉ាង​ទាន់ពេលវេលា ហើយ​ការ​ឧស្សាហ៍​ទៅ​ជួប​គ្រូពេទ្យ​តាម​ការ​ណាត់​គ្រប់ពេល​ថែមទាំង​មាន​លទ្ធផល​ល្អ​ក្នុង​ការជួយកាត់បន្ថយ​ស្ថានការណ៍​ប្រថុយប្រថាន ដែល​អាច​កើតមាន​ក្នុងពេល​ប្រសូត​បាន​ច្រើន​ទៀតផង។

ដោយសារ​ការ​បានផ្តល់​កំណើ​ត​កូនតូច​ជាទី​ស្រឡាញ់​នេះ​អាច​រាប់បាន​ថា ជាការ​ទទួលបាន​កាដូ​ដ៏​សែន​មានតម្លៃ​មួយ​ដែល​ព្រះជាម្ចាស់​ប្រទាន​មកឱ្យ និង​សម្រាប់​អ្នក​ម្តាយ​ថ្មោងថ្មី​ថែមទាំង​រឹត​តែមាន​អារម្មណ៍​ថា នេះ​គឺជា​វត្ថុ​ដ៏​មានតម្លៃ​សម្រាប់​ជីវិត​ខ្លាំង​បំផុត​ផង​នោះ ដូច្នេះ​ការធ្វើ​ចិត្តឱ្យសប្បាយៗ បន្ធូរ​អារម្មណ៍ មិន​ធុញថប់​តានតឹង និង​សម្លឹង​ពិភពលោក​ក្នុងន័យ​វិជ្ជមាន​ជានិច្ច គួបផ្សំ​នឹង​ការ​បើ​មាន​កង្វល់​រឿង​ការឈឺចាប់​ហើយ​ប្រឹក្សា​ជាមួយ​គ្រូពេទ្យ គឺជា​រឿង​មួយ​ដែលស្ត្រី​មានគភ៌​គ្រប់រូប​ត្រូវធ្វើ ដើម្បីឱ្យ​រូបអ្នក​បាន​សប្បាយចិត្ត និង​ទទួលបាន​ការមើល​ថែទាំ​ពី​គ្រូពេទ្យ​ខណៈពេល​ប្រសូត​យ៉ាង​ល្អ​ទៀតផង។

ក្រៅពីនេះ កម្លាំងចិត្ត​ពី​មនុស្ស​ជុំវិញខ្លួន​ក៏​ជារឿង​សំខាន់បំផុត​ដែរ ស្វាមី និង​អ្នក​ឯទៀត​ក្នុង​គ្រួសារ​គួរតែ​ផ្តល់​កម្លាំងចិត្ត​ដល់​ស្ត្រី​មានគភ៌​ក្នុង​ថ្ងៃ​ប្រសូត​ឱ្យបាន​ច្រើន​បំផុត នៅពេល​ស្ត្រី​មានគភ៌សប្បាយ​ចិត្តខ្លាំង​ឡើង វា​ច្បាស់​ជា​កាត់បន្ថយ​សភាវ​ភ័យខ្លាច​ក្នុង​ថ្ងៃ​ប្រសូត​បាន​ច្រើន​តាម​នោះដែរ​មិន​ខាន៕

ភ្នំពេញ៖ ដើម្បីកាត់បន្ថយការកកស្ទះ និងខកពេលធ្វើដំណើរឡើងយន្តហោះ ក្រសួងសាធារណការ និងដឹកជញ្ជូនបានសហការជាមួយក្រុមហ៊ុន Royal Railway Co,. LTD កំពុងសាងសង់ផ្លូវរថភ្លើងថ្មីខ្នាតតូចមួយតភ្ជាប់ពីស្ថានីយរថភ្លើងក្នុងរាជធានីភ្នំពេញទៅព្រលានយន្តហោះអន្តរជាតិភ្នំពេញ។

ឯកឧត្តមទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូនបានថ្លែងឱ្យដឹងថា ផ្លូវរថភ្លើងកំពុងត្រូវបានសាង់សង់ជាបណ្តើរៗហើយ តែធ្វើតែពេលយប់ ហើយអាចនឹងចប់រួចរាល់ និងដាក់ឱ្យដំណើរការនៅក្នុងខែមេសា ឆ្នាំ2018ខាងមុខ។ ផ្លូវរថភ្លើងមួយខ្សែថ្មីនេះនឹងត្រូវសាងសង់ឡើងចំកណ្តាលទ្រូងផ្លូវនៃមហាវិថីសហព័ន្ធរុស្ស៊ី ដែលអាចអនុញ្ញាតឱ្យរថយន្ត និងម៉ូតូធ្វើចរាចរណ៍នៅលើផ្លូវនោះបានដូចធម្មតា និងមិនប៉ះពាល់លំនៅដ្ឋានប្រជាពលរដ្ឋឡើយ។

ឯកឧត្តមបានគូសបញ្ជាក់ថា ក្រៅពីភ្ញៀវដែលត្រូវឡើងយន្តហោះហើយ ប្រជាពលរដ្ឋដែលចង់ធ្វើដំណើរទៅមកពីព្រលានយន្តហោះអន្តរជាតិភ្នំពេញមកកាន់រាជធានីភ្នំពេញក៏អាចជិះរថភ្លើងនេះបានដែរ ដោយចំណាយពេលពី20 ទៅ25នាទីដែលមានបំពាក់ម៉ាស៊ីនត្រជាក់ផ្តល់ផាសុកភាពជូនអ្នកដំណើរទៀតផង។

គួរបញ្ជាក់ថាបច្ចុប្បន្នក្រុមហ៊ុន Royal Railway Co,. LTD ដែលជាសម្ព័ន្ធក្រុមហ៊ុន Royal Group របស់អ្នកឧកញ៉ា គិត ម៉េង បានបញ្ជាទិញរថភ្លើងខ្នាតតូចចំនួន4គ្រឿងពីប្រទេសម៉ិចស៊ីក ដែលអាចដឹកអ្នកដំណើរមួយជើងបានប្រមាណជា 100នាក់។ ឯកឧត្តម ស៊ុន ចាន់ថុល បញ្ជាក់ថា ក្រុមហ៊ុននេះនឹងដឹកអ្នកដំណើររយៈពេល1ខែដំបូង ដោយមិនយកប្រាក់ដើម្បីជាចំណងដៃនៅថ្ងៃសម្ពោធដាក់ដំណើរការ៕