ការដឹកបញ្ជូនទំនិញរវាងកម្ពុជាជាមួយអន្តរជាតិមានច្រើនលើសលប់ជាសម្លៀកបំពាក់ និងផលិតផលកសិកម្ម ដែលមធ្យោបាយដឹកជញ្ជូននោះគឺប្រើប្រាស់ផ្លូវទឹកយ៉ាងហោចណាស់85%នៃការដឹកជញ្ជូនសរុប។
លោក ស៊ិន ចន្ធី ប្រធានសមាគមភ្នាក់ងារបញ្ជូនទំនិញកម្ពុជា បាននិយាយថា រហូតមកដល់ពេលនេះការបញ្ជូនទំនិញខ្នាតធំរបស់កម្ពុជាទៅកាន់ទីផ្សារអន្តរជាតិគ្មានមធ្យោបាយណាផ្សេងក្រៅពីបញ្ជូនតាមកប៉ាល់នោះទេ ព្រោះ ការដឹកជញ្ជូនតាមផ្លូវទឹកមានតម្លៃថោកជាងការដឹកជញ្ជូនតាមមធ្យោបាយផ្សេងៗឆ្ងាយណាស់។ លោកអះអាងថា ការបញ្ជូនទំនិញតាមយន្តហោះ ត្រូវគេប្រើតាមរដូវកាលនិងផលិតផលចាំបាច់ខ្លះតែប៉ុណ្ណោះ ដូចជាពេលនេះនៅអឺរ៉ុបជិតដល់ពេលវិស្សមកាល ហើយទំនិញមួយចំនួនដើម្បីបញ្ជូនទៅដល់ទីផ្សារបានឆាប់គឺត្រូវប្រើយន្តហោះ ដោយសារការបញ្ជូនតាមកប៉ាលសមុទ្រត្រូវប្រើពេល1ខែទើបទៅដល់គោលដៅ។
លោកបានឱ្យដឹងទៀតថា ទំនិញដែលគេនិយមបញ្ជូនតាមយន្តហោះមានសម្លៀកបំពាក់ថ្លៃៗ របស់របរមានតម្លៃផ្សេងៗទៀត តែចំពោះអង្ករដែលជាទំនិញនាំចេញសំខាន់មួយរបស់កម្ពុជានោះ គេមិនបានប្រើយន្តហោះសម្រាប់ការដឹកជញ្ជូនទេ។ លោកលើកឧទាហរណ៍ថា ទំនិញទម្ងន់10តោនក្នុងមួយកុងទីន័រដឹកដល់ទីផ្សារអាមេរិកអស់ថ្លៃសេវា 3,000ដុល្លារតាមកប៉ាល់ តែបើដឹកតាមយន្តហោះអាចអស់លើស3ម៉ឺនដុល្លារ។
លោកថ្លែងថា៖ “រហូតមកដល់ពេលនេះ យើងមិនទាន់មានមធ្យោបាយអ្វីថ្មី និងមានប្រសិទ្ធភាពក្នុងការបញ្ជូនទំនិញដែលធានាទាំងតម្លៃ និងសុវត្ថិភាពធៀបនឹងការដឹកជញ្ជូនតាមកប៉ាល់នោះទេ។ យើងដឹងពីគម្រោងតភ្ជាប់របស់ប្រទេសចិនទាក់ទងនឹងហេដ្ឋារចនាសម្ព័ន្ធក្នុងតំបន់ភ្ជាប់ទៅអឺរ៉ុប តែនេះវាជាជម្រើសមួយស្ថិតនៅឆ្ងាយនៅឡើយ”។
ប្រធានសមាគមភ្នាក់ងារបញ្ជូនទំនិញកម្ពុជាក៏សង្កេតឃើញផងដែរថា សម្រាប់ការដឹកបញ្ជូនទំនិញតាមយន្តហោះក៏មានការរីកចម្រើនដែរសម្រាប់កម្ពុជានាពេលបច្ចុប្បន្ន ដោយសារមានក្រុមហ៊ុនដឹកជញ្ជូនទំនិញសុទ្ធប្រមាណ3ក្រុមហ៊ុនកំពុងផ្តល់សេវានេះនៅកម្ពុជា។ កន្លងមកក្រសួងសាធារណការ និងដឹកជញ្ជូន ធ្លាប់បានជួបពិភាក្សាគ្នាជាមួយផ្នែកឯកជន ដោយមានសមាគមភ្នាក់ងារបញ្ជូនទំនិញកម្ពុជា សមាគមដឹកជញ្ជូនទំនិញផ្លូវគោកកម្ពុជា និងសមាគមដឹកជញ្ជូនអ្នកដំណើរផ្លូវគោកកម្ពុជា ដើម្បីស្វែងរកដំណោះស្រាយលើបញ្ហាដឹកជញ្ជូនដែលគេចោទប្រកាន់ថា មានតម្លៃខ្ពស់ជាប្រទេសជិតខាង ដែលនាំទៅដល់ការបាត់បង់ភាពប្រកួតប្រជែងជាមួយបណ្តាប្រទេសក្នុងតំបន់។ សម្រាប់ការដឹកបញ្ជូនទំនិញពីកម្ពុជាទៅកាន់ទីផ្សារអន្តរជាតិ ទំនិញភាគច្រើនលើសលប់ត្រូវឆ្លងកាត់កំពង់ផែក្រុងព្រះសីហនុ។
កាលពីឆ្នាំ2016 កន្លងទៅកំពង់ផែសមុទ្រមួយនេះទទួលបានទំនិញឆ្លងកាត់សរុបទាំងចេញទាំងចូលចំនួន 400,187 TU ដោយកើនឡើង2.15% បើធៀបនឹងរយៈពេលដូចគ្នាក្នុងឆ្នាំ2015 ហើយទំនិញឆ្លងកាត់កំពង់ផែស្វយ័តរាជធានីភ្នំពេញ មានចំនួន151,781 TU កើនឡើង4.8% ធៀបនឹងឆ្នាំ2015។ទំនិញនាំចូលឆ្លងកាត់កំពង់ផែទាំងពីររបស់កម្ពុជា មានភាគច្រើនជាសម្ភារសំណង់ សម្លៀកបំពាក់ អាហារ និងភេសជ្ជៈ រីឯផលិតផលនាំចេញ មានសម្លៀកបំពាក់ ស្បែកជើង អង្ករ និងផលិតផលកសិកម្មផ្សេងៗទៀត។
អ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិល បានអះអាងថាស្ថានភាពដឹកជញ្ជូនតាមផ្លូវអាកាសអាចនឹងប្រែប្រួលច្រើននៅពេលអនាគត។ អាកាសយានដ្ឋានអន្តរជាតិកងកេង ដែលស្ថិតក្នុងខេត្តព្រះសីហនុ នឹងទទួលបានកំណើនខ្ពស់សម្រាប់រយៈពេល10-20ឆ្នាំខាងមុខ។
ឯកឧត្តម ស៊ីន ចាន់សិរីវុត្ថា អគ្គនាយករងបច្ចេកទេសនៃរដ្ឋលេខាធិការដ្ឋានអាកាសចរស៊ីវិលធ្លាប់បានលើកឡើងថា ការសិក្សាមួយបានបង្ហាញថា ក្នុងរយៈពេល10ឆ្នាំទៅ20ឆ្នាំខាងមុខ មានតែអាកាសយានដ្ឋានខេត្តព្រះសីហនុទេ ដែលធំជាងគេ និងមានសក្តានុពលជាងគេ។ ផ្អែកតាមគោលនយោបាយទេសចរណ៍រាជរដ្ឋាភិបាលកម្ពុជា បានដាក់ចេញនូវប៉ូលអភិវឌ្ឍន៍ទេសចរណ៍សំខាន់ៗចំនួន4 គឺទី1 ភ្នំពេញ ទី2 សៀមរាប ទី3 តំបន់មាត់សមុទ្រ និងទី4 គឺតំបន់ឦសាន្ត៕
