Category: សង្គម និងសេដ្ឋកិច្ច

ភ្នំពេញ – តាមការព្យាកររបស់អ្នកជំនាញលើផ្នែកអចលនវត្ថុជាច្រើនបានបញ្ជាក់ថា នាពេលអនាគតឆាប់ៗខាងមុខនេះ ការអភិវឌ្ឍបែបធម្មជាតិដែលកាន់តែខិតទៅជិតតំបន់មាត់បឹង និងទន្លេនឹងមានការផុលផុសធ្វើឱ្យតម្លៃអចលនទ្រព្យនៅទីនោះនឹងឡើងថ្លៃខ្ពស់។

លោក ច្រឹក សុខនីម អគ្គនាយកក្រុមហ៊ុន Century 21Mekong បានលើកឡើងថា កម្ពុជាមានការអភិវឌ្ឍលើវិស័យអចលនទ្រព្យលឿនគួរឱ្យកត់សម្គាល់ ប៉ុន្ដែកម្ពុជាហាក់ដូចជាដើរបញ្ច្រស់ទៅនឹងប្រទេសអភិវឌ្ឍន៍មួយចំនួន ព្រោះគេមើលឃើញថា វិស័យនេះចាប់ផ្ដើមអភិវឌ្ឍចេញពីតំបន់ឧស្សាហកម្ម ពោលគឺតម្លៃដីនៅតាមតំបន់ឧស្សាហកម្មមួយចំនួន និងនៅតំបន់សេដ្ឋកិច្ចពិសេសមានការកើនឡើងខ្ពស់ដោយសារតែសម្បូរទៅដោយរោងចក្រ សហគ្រាសធំៗ។

អគ្គនាយកក្រុមហ៊ុន Century 21Mekong បានបញ្ជាក់ថា៖ «មូលហេតុតម្លៃដីនៅតំបន់ឧស្សាហកម្ម ឬតំបន់សេដ្ឋកិច្ចពិសេសមានតម្លៃខ្ពស់ ព្រោះនៅទីនោះមានមនុស្សទៅរស់នៅភាគច្រើនជាកម្មករដែលអ្នកអភិវឌ្ឍន៍ទៅទីនោះច្រើនតែសង់ផ្ទះជួលសម្រាប់កម្មករស្នាក់នៅជាដើម និងអ្នកខ្លះទៅរស់នៅដើម្បីធ្វើការលក់ដូរ ដែលធ្វើឱ្យមានលំហូរសេដ្ឋកិច្ចល្អ។ ទោះជាយ៉ាងណាគេមើលឃើញថា វាជាការវិនិយោគរយៈពេលខ្លី»។

ទោះយ៉ាងណាលោក សុខនីម បញ្ជាក់ថា បច្ចុប្បន្នអ្នកវិនិយោគនៅក្នុងស្រុកចាប់ផ្ដើមយល់កាន់ច្បាស់ពីអត្ថប្រយោជន៍ការអភិវឌ្ឍបែបធម្មជាតិហើយ ដូច្នេះហើយទើបយើងឃើញថា មានគម្រោងធំៗជាច្រើនចាប់ផ្ដើមងាកទៅរកការអភិវឌ្ឍនៅតំបន់ជាប់មាត់បឹង ឬទន្លេវិញម្តង ដូចជាគម្រោងអ័រគីដេវីឡា និងគម្រោងរបស់ក្រុមហ៊ុន OCIC ជាដើម បានចូលទៅដល់ក្នុងតំបន់ជ្រោយចង្វាហើយ ព្រោះអ្នកវិនិយោគទាំងនោះមានទស្សនវិស័យវែងឆ្ងាយក្នុងការវិនិយោគរយៈពេលយូរដោយពួកគាត់ជឿថា ទៅអនាគតគម្រោងក៏ដូចជាអចលនទ្រព្យ នឹងមានការឡើងថ្លៃខ្លាំង។ ជាមួយគ្នានេះលោកសង្កត់ធ្ងន់ថា៖ «កាលពីមុនប្រជាជនយើងរស់នៅឱ្យតែបានៗ មិនប្រកាន់អ្វីច្រើនទេ លុះសេដ្ឋកិច្ចគ្រួសារដើរល្អមានលុយច្រើនហើយ គាត់ចាប់ផ្ដើមគិតពីការរស់នៅប្រកបដោយផាសុកភាព និងភាពស្ងប់សុខដែលចំណុចទាំងនេះវាកើតចេញពីការអភិវឌ្ឍបែបធម្មជាតិនៅជិតមាត់បឹង ឬជិតមាត់ទន្លេនេះឯង»។

លោក ច្រឹក សុខនីម បន្ដថា ទៅអនាគតការអភិវឌ្ឍតាមបែបធម្មជាតិមិនមែនកើតឡើងតែក្នុងតំបន់ជ្រោយចង្វាមួយទេ ពោលគឺតំបន់ណាដែលជាប់ទៅនឹងបឹងទន្លេ នឹងត្រូវមានការអភិវឌ្ឍដូចគ្នាដែលធ្វើឱ្យតម្លៃដីមានការកើនឡើងខ្ពស់កប់ពពកជាក់ជាមិនខាន។ អ្វីដែលធ្វើឱ្យលោកហ៊ានអះអាងបែបនេះ ព្រោះយោងតាមបទពិសោធនៃប្រទេសអភិវឌ្ឍន៍ធំៗមួយចំនួនដូចជា ប្រទេសអាមេរិកដែលលោកបានទៅដល់ជាដើម។ ក្នុងនោះលោកបញ្ជាក់ថា៖ «យើងអាចមើលឃើញនៅក្នុងប្រទេសអភិវឌ្ឍន៍ដូចជា អាមេរិក តម្លៃផ្ទះជាប់ទន្លេ បឹង ព្រៃភ្នំមានតម្លៃថ្លៃណាស់ កន្លែងខ្លះមានតម្លៃដល់ទៅរាប់លានដុល្លារ ព្រោះការរស់នៅក្នុងតំបន់បែបនេះវាធ្វើឱ្យអ្នករស់នៅមានសុខភាពល្អ ទាំងរាងកាយ និងប្រាជ្ញាស្មារតី ពិសេសការរស់នៅតំបន់នេះអាចធ្វើឱ្យអ្នករស់នៅកាត់បន្ថយភាពស្មុគស្មាញពីការងារបានច្រើន»។

ដោយឡែកលោកឧកញ៉ា នួន រិទ្ធី អគ្គនាយកក្រុមហ៊ុន KFA បានទទួលស្គាល់ថា តំបន់អភិវឌ្ឍន៍ជាប់មាត់ទន្លេ ពិសេសតំបន់ជ្រោយចង្វាជាតំបន់ដែលមានសក្ដានុពលខ្លាំងក្នុងការអភិវឌ្ឍទាំងទៅលើគម្រោងលំនៅឋាន និងខុនដូសម្រាប់ពេលបច្ចុប្បន្ន និងទៅអនាគត។

អគ្គនាយកក្រុមហ៊ុន KFA បញ្ជាក់ថា៖ «មូលហេតុតំបន់ជាប់មាត់ទន្លេ ពិសេសតំបន់ជ្រោយចង្វាមានសក្ដានុពលសម្រាប់ការអភិវឌ្ឍ និងការរស់នៅ ព្រោះតំបន់នោះមានហេដ្ឋារចនាសម្ព័ន្ធល្អទៅហើយ វាក៏ជាតំបន់ដែលមានហុងស៊ុយល្អ មានទាំងទន្លេ ខ្យល់អាកាសត្រជាក់ដែលជាអំណោយផលដល់អ្នករស់នៅទីនោះអាចទទួលយកបានការរស់នៅបែបធម្មជាតិ ប្រកបដោយផាសុកភាព និងភាពសប្បាយរីករាយក្នុងសង្គមគ្រួសារ»៕

ភ្នំពេញ៖ លំហូរវិនិយោគផ្ទាល់ពីបរទេស(ថៅកែរោងចក្រ)ទៅក្នុងវិស័យកាត់ដេរបានធ្លាក់ចុះប្រមាណជា30% ក្នុងឆមាសទី1 ឆ្នាំ2017នេះ បើធៀបនឹងការធ្លាក់ចុះក្នុងរយៈពេលដូចគ្នាក្នុងឆ្នាំ2016ដែលមានត្រឹម5%ប៉ុណ្ណោះ។ នេះបើតាមរបាយការណ៍របស់ធនាគារជាតិនៃកម្ពុជាចំពោះវិស័យកាត់ដេរ។

របាយការណ៍បានបង្ហាញថា ការនាំចេញសម្លៀកបំពាក់ពីកម្ពុជាទៅកាន់ទីផ្សារអឺរ៉ុបប្រចាំឆមាសទី1 ឆ្នាំ2017បានធ្លាក់ចុះមកនៅត្រឹម4% ខណៈដែលឆមាសទី1 ឆ្នាំ 2016 កន្លងទៅ ការនាំចេញមានកំណើនដល់ទៅ 9% ឯណោះ។ ក្នុងនោះការនាំចេញទៅកាន់ទីផ្សារអាមេរិកធ្លាក់ចុះប្រមាណជា 2.3% ប៉ុន្តែកំណើនការនាំចេញទៅកាន់ប្រទេសអង់គ្លេស កាណាដា និងជប៉ុន នៅមានភាពល្អប្រសើរជាងមុនបន្តិច។

ការធ្លាក់ចុះនេះបណ្តាលមកពីកត្តាមួយចំនួនដូចជា 1.ការកើនឡើងនៃការប្រកួតប្រជែងនាំសម្លៀកបំពាក់ចេញពីប្រទេសនៅក្នុងតំបន់ ជាពិសេសប្រទេសវៀតណាម មីយ៉ាន់ម៉ា គួបផ្សំនឹងកត្តាខាងក្នុងដូចជាការដំឡើងប្រាក់ឈ្នួលអប្បបរមា(ប្រាក់ឈ្នួលខ្ពស់)ដែលធ្វើឱ្យតម្លៃដើមផលិតកើនឡើងជាដើម និង 2. ការថយចុះនៃភាពទាក់ទាញវិនិយោគក្នុងវិស័យនេះ ដោយសារកម្ពុជានឹងលែងទទួលបានការអនុគ្រោះពន្ធពីសហភាពអឺរ៉ុបក្នុងរយៈពេល3ឆ្នាំជាប់ៗគ្នាខាងមុខ បន្ទាប់ពីប្រទេសកម្ពុជាក្លាយជាប្រទេសមានប្រាក់ចំណូលមធ្យមកម្រិតទាប។ ក្នុងឆមាសទី1នេះការនាំចេញសម្លៀកបំពាក់មានសមាមាត្រ 67% នៃការនាំចេញក្រោមប្រព័ន្ធអនុគ្រោះ ថយចុះពី 74% និង28%រៀងគ្នា ខណៈដែលសមាមាត្រនាំចេញទៅកាន់ទីផ្សារជប៉ុនមានកំណើនទ្វេដងក្នុងរយៈពេល2ឆ្នាំចុងក្រោយរហូតដល់ 14% នៃការនាំចេញសរុបក្នុងវិស័យនេះ។

គួរកត់សម្គាល់ថា ស្ថិតក្នុងស្ថានភាពដែលសេដ្ឋកិច្ចពិភពលោកកំពុងងើបឡើង ការនាំចេញវិស័យកាត់ដេរនៃប្រទេសជិតខាងបានកើនឡើងខ្ពស់ដូចជា កំណើននៃការនាំចេញសម្លៀកបំពាក់របស់ប្រទេសវៀតណាមកើនឡើងខ្ពស់រហូតដល់ 11.2% ជាពិសេសការនាំចេញទៅកាន់ទីផ្សារសហរដ្ឋអាមេរិកដែលជាទីផ្សារធំជាងគេរបស់វៀតណាម ខណៈដែលការនាំចេញរបស់កម្ពុជាមានកំណើនយឺតជាងមុន ដោយសមាមាត្រនៃការនាំចេញរបស់កម្ពុជាទៅកាន់ទីផ្សារសហរដ្ឋអាមេរិកបានថយចុះជាបន្តបន្ទាប់ចាប់ពីឆ្នាំ 2011 មក៕

កាលពីរាត្រីថ្ងៃទី26 ខែកក្កដា ឆ្នាំ2017 នៅបរិវេណរោងភាពយន្ដទំនើប Major Cineplex ក្នុងផ្សារទំនើប AEON មានរៀបចំកម្មវិធីអបអរ និងបើកសម្ពោធការចាក់បញ្ជាំងរឿង “វិកលចរិត” ព្រមៗគ្នា3ប្រទេស រួមមាន កម្ពុជា ថៃ ឡាវ ហើយអ្វីដែលកាន់តែពិសេសទៅទៀតនេះគឺ ចំណូលដែលបានពីការចាក់បញ្ជាំងរឿងនេះក្នុងទាំង3ប្រទេសនោះនឹងត្រូវដក 1 ដុល្លារពីតម្លៃសំបុត្រកុន1សន្លឹកដើម្បីយកទៅបរិចា្ចគដល់កុមារកំព្រា និងកុមារបាត់បង់សតិបញ្ញានៅកម្ពុជាផងដែរ។

ព្រឹត្តិការណ៍ដែលនឹកស្មានមិនដល់នៅរាត្រីថ្ងៃនោះបានធ្វើឱ្យអ្នកទស្សនា និងអ្នកគាំទ្រដែលស្រឡាញ់​វិស័យភាពយន្ដ ព្រមទាំងទស្សនិកជនដែលបានមកចូលរួមក្នុងកម្មវិធីសម្ពោធរឿង “វិកលចរិត” ទាំងក្នុង និងក្រៅកម្រាលព្រំក្រហមបានព្រឺសម្បុររំភើប និងចេញទឹកភ្នែករលីងរលោង ខណៈដែលប្អូនៗកុមារកំព្រាដែលមកពីមណ្ឌុលកុមារកំព្រាលោកតា ហ្វ៊ុយ សូ ចេញមកសម្ដែងនូវចម្រៀងមួយបទដែលមានចំណងជើងថា “ជីវិតក្មេងកំព្រា”​ អមទៅដោយពន្លឺភ្លើងទៀនដែលបង្ហាញពីភាពកក់ក្ដៅឡើងវិញ ព្រោះកន្លងមកធ្លាប់តែរស់នៅក្នុងភាពឯកា កណ្ដោចកណ្ដែង ជាហេតុធ្វើឱ្យមានកម្លាំងជំរុញទឹកចិត្ត និងជំពប់អារម្មណ៍ទស្សនិកជនដែលបានចូលរួមទាំងអស់ឱ្យទប់ទឹកភ្នែកស្ទើរតែមិនបាន។

ក្នុងនោះដែរលោក មាតុចក្រ ឬ ហ៊ុយ យ៉ាឡេង បានប្រាប់អ្នកយកព័ត៌មានគេហទំព័រ ឡារ៉ែនថា គោលគំនិតដែលលោកបាននឹកឃើញយកទស្សនីយភាពពន្លឺភ្លើងទៀនដែលសម្ដែងដោយកុមារកំព្រាទាំងអស់នេះមកជូន ក៏ព្រោះតែលោកចង់បង្ហាញអំពីស្មារតីរួបរួមគ្នា សាមគ្គីភាពគ្នាដែលផ្ដល់នូវភាពកក់ក្ដៅទៅកាន់កុមារកំព្រាកម្ពុជាទាំងអស់ឱ្យទស្សនិកជនបានដឺង ព្រមទាំងមកទស្សនារឿងនេះទាំងអស់គ្នាទោះជាអ្នកខ្លះធ្លាប់បានទស្សនាហើយ និងមិនទាន់ហើយក្ដី ព្រោះថា ការទស្សនាម្ដង ស្មើនឹងបានរួមចំណែកបរិច្ចាគ 1 ដុល្លារទៅកាន់កុមារកំព្រា និងកុមារបាត់បង់សតិបញ្ញាទាំងអស់ដែលជាជនជាតិខ្មែរយើង។

គួរបញ្ជាក់ផងដែរថា អ្នកដឹកនាំរឿងរូបនេះបានបញ្ជាក់ហើយបញ្ជាក់ទៀតថា នេះអាចចាត់ទុកថា ជាប្រវត្តិសាស្ត្រដំបូងបង្អស់របស់កម្ពុជាហើយដែលកុនរបស់កូនចៅខ្មែរយើងបានដាក់បញ្ជាំងដល់ទៅ 3 ប្រទេសរួមគ្នា និងបានចូលរួមបរិច្ចាគថវិកាពី 3 ប្រទេស កម្ពុជា ថៃ ឡាវ ទៅដល់មន្ទីរពេទ្យកុមាជាតិ និងកុមារកំព្រានៅក្នុងប្រទេសកម្ពុជា ព្រោះថា ទម្រាំតែទទួលបានការយល់ព្រមឱ្យចាក់បញ្ជាំងនៅស្រុកគេ គឺមានការឆ្លងកាត់ការសម្រិតសម្រាំងជាច្រើនដំណាក់កាល។

ដូច្នេះជាចុងក្រោយនេះ កូនខ្មែរ និងជាអ្នកដឹកនាំរឿងរូបនេះមានក្ដីរំពឹង និងសង្ឃឹមថា កូនខ្មែរដែលស្រឡាញ់កុនខ្មែរ និងសិល្បៈវប្បធម៌ខ្មែរទាំងអស់នឹងទៅជួយគាំទ្រលើកស្ទួយខ្សែភាពយន្ដខ្មែរមួយនេះដែលការចូលទស្សនារបស់អ្នកគឺ ស្មើនឹងការជួយសង្គមជាតិដោយបានបរិច្ចាគទៅដល់ប្អូនៗកុមារដែលកំពុងរង់ចាំជំនួយពីអ្នកទាំងអស់គ្នាជាទស្សនិកជន៕

ភ្នំពេញៈ ការផ្តល់ឥណទានរបស់គ្រឹះស្ថានមីក្រូហិរញ្ញវត្ថុនានានៅតែរក្សាបានកំណើនល្អប្រសើរ ជាក់ស្តែងគ្រឹះស្ថានមីក្រូហិរញ្ញវត្ថុអម្រឹតសម្រេចបានកំណើន11ភាគរយក្នុងដំណាច់ឆមាសទី1ឆ្នាំនេះធៀបរយៈពេលដូចគ្នាកាលពីឆ្នាំមុន។

អគ្គនាយកគ្រឹះស្ថានមីក្រូហិរញ្ញវត្ថុអម្រឹត លោក ជា ផល្លារិន បានថ្លែងឲ្យដឹងតាមទូរស័ព្ទនាព្រឹកថ្ងៃទី27 កក្កដានេះថា ស្ថានភាពនៃឥណទានរបស់យើងនៅឆ្នាំនេះនៅតែរក្សាបានកំណើនល្អ ដោយទំហំទឹកប្រាក់បានកើនពី594លានដុល្លារកាលពីដំណាច់ឆ្នាំមុនដល់630លានដុល្លារនៅដំណាច់ត្រីមាសទី2ឆ្នាំនេះ ស្មើនឹងកំណើន11ភាគរយ និងប្រាក់បញ្ញើបានកើនពី283លានដុល្លារកាលពីដំណាច់ឆ្នាំមុនមកដល់330លានដុល្លារនៅដំណាច់ឆមាសទី1ឆ្នាំនេះ។

លោកបន្តថា កម្រិតនៃឥណទានរបស់យើងមិនមានបញ្ហានោះទេទោះបីជាដ្ឋាភិបាលកំណត់ពិដានការប្រាក់ក្តី ប៉ុន្តែយ៉ាងណាក៏ដោយសម្រាប់ស្ថាប័នរបស់លោកមិនប្រឈមមុខនឹងកង្វះទុនសម្រាប់ធ្វើប្រតិបត្តិការនោះទេ។

លោក ជា ផល្លារិន បានបន្តថា “ទោះជាមានបញ្ហាខ្លះក្តី ប៉ុន្តែយើងអាចយកប្រាក់ចំណេញពីផ្នែកផ្សេងទៀតមកប៉ះប៉ូវបាន ហើយយើងកំពុងពង្រឹងបុគ្គលិករបស់យើងឲ្យកាន់តែមានសមត្ថភាពដើម្បីធ្វើឲ្យប្រាកដថា ឥណទានដែលយើងបានបញ្ចេញទៅជាឥណទានមានគុណភាព។ សម្រាប់អម្រឹតមិនមានបញ្ហាទេ ប្រសិនជាស្ថិតក្នុងស្ថានភាពដូចសព្វថ្ងៃនេះ”៕

ក្រោយពីជួបគ្នាសងសឹកចំនួន 2 លើក រវាងក្រុមតារាសម្ដែងក្នុងផលិតកម្មមហាហង្ស និង ក្រុមកីឡាករបាល់ទាត់បុរីរិទ្ធិដែលទទួលបានលទ្ធផលស្មើគ្នាទាំងពីរលើករួចមក កាលពីថ្ងៃទី26 ខែកក្កដាកន្លងទៅនេះក្រុមទាំងពីរនេះបានជួបគ្នាជាលើកទី3 ដោយក្រុមតារាសម្តែងរបស់ផលិតកម្មមហាហង្សបានទទួលជ័យជម្នះក្នុងលទ្ធផលទទួល 4 – 3 ដែលធ្វើឱ្យលោក អ៉ិន សុភិន លោតកញ្ជ្រោលដោយក្តីត្រេកអរយ៉ាងខ្លាំងក្រោយពេលបញ្ចប់ការប្រកួត។

វាពិតជាគួរឱ្យចាប់អារម្មណ៍ជាខ្លាំងក្នុងការប្រកួតពេញរយៈពេល 90នាទីនៅលើទីលានពហុកីឡដ្ឋានវេស្ទើននៅម្ដុំទួលគោកដែលកីឡាករទាំងអស់បានប្រឹងបញ្ចេញសមត្ថភាពរៀងៗខ្លួនខណៈក្រុមទាំងពីរនេះជួបធ្វើការសងសឹកគ្នា។

លោក អ៉ិន សុភិន ជាអ្នកដឹកនាំក្រុមតំណាងឱ្យផលិតកម្មមហាហង្ស ដែលត្រូវគេឃើញលោតកញ្ជ្រោលសម្ដែងនូវអារម្មណ៍រីករាយជាខ្លាំងគ្រាដែលក្រុមរបស់លោកយកឈ្នះលើក្រុមបុរីរិទ្ធិ 1គ្រាប់នៅតង់ទីពីរបានថ្លែងប្រាប់ដោយក្តីរំភើបថា លោកបានរៀបចំក្រុមតារាសម្ដែងត្រៀមចូលរួមប្រកួតបាល់ទាត់លើកនេះប្រមាណជា 3 ខែមកហើយ។

លោកបានអះអាងថា ក្រុមទាំងពីរជួបប្រកួតគ្នា 2លើកមកហើយ ដោយទទួលបានលទ្ធផលស្មើគ្នាទាំង 2 លើក ដោយលើកទី 1ទទួលបានលទ្ធផល 1ស្មើ ទើបធ្វើឱ្យក្រុមទាំង 2 មិនអស់ចិត្ត និងបានសុំជួបសងសឹកជាលើកទី 2 ហើយលទ្ធផលនៅតែរក្សាការស្មើដូចមុនដដែល គឺ 2ទល់នឹង2 អ៊ីចឹងហើយទើបធ្វើឱ្យក្រុមបុរីរិទ្ធិរឹតតែមិនអស់ចិត្ត ហើយសុំប្រកួតសងសឹកជាថ្មីម្ដងទៀត ដោយកំណត់យកថ្ងៃទី26 ខែកក្កដា នេះឯង។

ចាងហ្វាងផលិតកម្មរូបនេះបញ្ជាក់ថា ទោះបីជាទទួលបានលទ្ធផល 4ទល់នឹង 3ក៏ដោយ តែខ្ញុំចាត់ទុកថា ជាមោទនភាពរបស់ក្រុមយើង ព្រោះក្រុមបុរីរិទ្ធិជាក្រុមមួយដែលខ្លាំង យើងអាចដឹងសមត្ថភាពពួកគាត់តាមរយៈការប្រកួតកន្លងមក។ ម្យ៉ាងលទ្ធផលនេះយើងទទួលបានមកដោយការខំប្រឹងប្រែង និងការប្រកួតដ៏ស្វិតស្វាញបំផុត»។ លោកបន្ដថា ជ័យជម្នះនេះនឹងធ្វើឱ្យក្រុមរបស់លោកកាន់តែមានមុខមាត់ក្នុងការត្រៀមប្រកួតមិត្តភាពជាមួយក្រុមផ្សេងៗដែលត្រូវបានបង្កើតឡើងដោយក្រុមហ៊ុន និងសហគ្រាសដូចគ្នា បន្ទាប់ពីបានយកឈ្នះលើក្រុមសប្បាយដែលជាក្រុមល្អមួយផងដែរ។

ការប្រកួតនាថ្ងៃទី26 កក្កដា ម្សិលមិញនេះមានកីឡាករចូលប្រកួត ដូចជាលោក អ៉ិន សុភិន លោក ភឹម តារាវិបុល លោកហេង នរៈកក្កដា លោកហ៊ូ ប៉ូសេង លោកជា សុវណ្ណនរាហ៍ និង លោកប៉ែន តុលា ជាដើម ដោយក្រៅពីនោះក៏មានតារាសិល្បៈច្រើននាក់ទៀតចូលរួមទស្សនា និងលើកទឹកចិត្តផងដែរ។

លោក អ៉ិន សុភិន បញ្ជាក់ថា៖ «ទោះបីជាមានការសងសឹកគ្នាដើម្បីយកជ័យជម្នះដែលជាកិត្ដិយសរបស់ក្រុមក៏ដោយ ប៉ុន្ដែការបង្កើតក្រុមកីឡានេះ ខ្ញុំធ្វើឡើងដើម្បីជំរុញទឹកចិត្ដយុវជនឱ្យចូលរួមលេងកីឡាដើម្បីសុខភាពតែប៉ុណ្ណោះ»។ លោកបន្ដថា ក្រៅពីទេពកោសល្យ និងរូបសម្រស់ហើយ កាយសម្បទា និងសុខភាពល្អក៏ជាកត្តាសំខាន់ដែលជំរុញឱ្យតារាសិល្បៈទទួលបានប្រជាប្រិយភាពខ្លាំងដែរ។

ដូច្នេះក្នុងនាមលោកជាថ្នាក់ដឹកនាំផលិតកម្មមួយរូបលោកត្រូវតែពង្រឹងសមត្ថភាព និងជំរុញតារាសម្ដែងទាំងអស់ឱ្យចេះថែរក្សាសម្រស់ឱ្យបានស្រស់ស្អាត សង្ហា និងជាពិសេសមានសុខភាពល្អ៕