Category: សង្គម និងសេដ្ឋកិច្ច

កម្ពុជាខាតបង់ថវិកា200លានដុល្លារក្នុងមួយឆ្នាំដោយសារការជួសជុលផ្លូវ
ភ្នំពេញ៖ យ៉ាងហោចណាស់ទឹកប្រាក់ប្រមាណជា 200 លានដុល្លារត្រូវបានរដ្ឋាភិបាលចំណាយលើការសាងសង់ និងជួសជុលផ្លូវខូចនៅទូទាំងប្រទេសកម្ពុជាដែលភាគច្រើនផ្លូវខូចទាំងនេះបណ្តាលមកពីរថយន្តធុនធំដឹកលើសទម្ងន់ ហើយអាជ្ញាធរមូលដ្ឋានមិនបានចាត់វិធានការទប់ស្កាត់។
ឯកឧត្តមទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូនបានថ្លែងក្នុងពិធីសម្ពោធមជ្ឈមណ្ឌលត្រួតពិនិត្យបច្ចេកទេសយានយន្តសាខាសែនសុខ កាលពីសប្តាហ៍មុននេះឱ្យដឹងថា រាជរដ្ឋាភិបាលក្នុងមួយឆ្នាំៗបានចំណាយថវិការដ្ឋប្រមាណ200លានដុល្លារ សហរដ្ឋអាមេរិកដើម្បីស្ថាបនា និងជួសជុសផ្លូវឡើងវិញ ក្រោយពីផ្លូវទាំងនោះភាគច្រើនត្រូវបានខូចខាត និងបំផ្លាញដោយសារក្រុមហ៊ុនឈ្មូញគ្រាក់ៗដឹកជញ្ជូនទំនិញលើសទម្ងន់កំណត់។
ករណីនេះឯកឧត្តមបានស្នើទៅដល់មន្រ្តីមានសមត្ថកិច្ចរួមនឹងអាជ្ញាធរពាក់ព័ន្ធ ពិសេសមន្រ្តីប្រចាំការនៅស្ថានីយជញ្ជីងថ្លឹងរថយន្តនៅគ្រប់បណ្តាផ្លូវជាតិទាំងអស់ត្រូវយកចិត្តទុកដាក់ទប់ស្កាត់អំពើអសកម្មទាំងនេះដើម្បីកុំឱ្យឈ្មួញដឹកទំនិញលើសទម្ងន់បង្កការខូចខាតផ្លូវបណ្តាលឱ្យខាតបង់ថវិការដ្ឋច្រើនសន្ធឹកសន្ធាប់បែបនេះទៀត។ ហើយឯកឧត្តមក៏បានអំពាវនាវផងដែរ ទៅដល់ឈ្មួញដឹកទំនិញចេញចូលក្នុងប្រទេស ធ្វើយ៉ាងណាកុំដឹកលើសទម្ងន់ និងត្រូវចូលរួមថែរក្សាផ្លូវដើម្បីទុកប្រើប្រាស់ឱ្យបានយូរអង្វែង ចៀសវាងក្រសួងចំណាយលុយច្រើនសន្ធឹកសន្ធាប់ជារៀងរាល់ឆ្នាំដូច្នេះទៀត៕

July 31, 2017
អៀង លីនដា៖ យុវជនឆ្នើម គឺជាអ្នកដែលមានគំនិតផ្តួចផ្តើមសម្រាប់អ្វីដែលថ្មី
សង្គម និងយុវជនប្រៀបបានទៅនឹងបេះដូង និងសរសៃឈាមដែលតភ្ជាប់គ្នាឥតដាច់ក្នុងការទ្រទ្រង់ដំណើរការនៃការអភិវឌ្ឍសង្គមជាតិឱ្យមានភាពល្អប្រសើរឡើង។ ភាពជាយុវជនឆ្នើមមានសារៈសំខាន់មិនអាចកាត់ថ្លៃបានសម្រាប់សង្គម ព្រោះគុណភាពនៃធនធានមនុស្ស គឺប្រៀបបានទៅនឹងទ្រព្យសម្បត្តិមហាសាលដែលអាចប្រើប្រាស់បានដោយមិនចេះរីងស្ងួត។ កាលណាប្រទេសជាតិមួយមានភាពសម្បូរបែបទៅលើយុវជនឆ្នើមនោះពិតជាធ្វើឱ្យសង្គមជាតិមានកម្លាំងស្នូលប្រកបទៅដោយគុណភាពខ្ពស់ក្នុងការផលិតនូវសមិទ្ធផលគំនិតយ៉ាងសម្បូរបែបក្នុងការជំរុញដល់សង្គមឱ្យមានការរីកចម្រើនលើគ្រប់វិស័យ។
កញ្ញា អៀង លីនដា គ្រូបង្វឹកនៃកម្មវិធី The Perspectives Cambodia និងជាម្ចាស់ពានរង្វាន់អ្នកបន្តវេនរដូវកាលទី3 នៃវិទ្យាស្ថានសាធាណរដ្ឋអន្តរជាតិ(IRI) បានបង្ហាញថា ភាពជាយុវជនឆ្នើមត្រូវតែជាមនុស្សដែលរឹងមាំហើយហ៊ានធ្វើការសម្រេចចិត្តសម្រាប់ជាគំរូដល់អ្នកដទៃ។ លក្ខណៈពិសេសមួយទៀតសម្រាប់យុវជនឆ្នើម គឺមានគំនិតផ្តួចផ្តើមសម្រាប់អ្វីដែលថ្មី ហើយមានប្រយោជន៍សម្រាប់អភិវឌ្ឍដូចជាការលើកទឹកចិត្តឱ្យស្ត្រីចូលរួមនៅក្នុងវិស័យដឹកនាំ ឬផ្លាស់ប្តូរការគិតអវិជ្ជមានសម្រាប់មនុស្សនៅជុំវិញខ្លួនជាដើម។ សម្រាប់យុវជនជាពិសេសស្ត្រីកម្ពុជាត្រូវតែហ៊ានធ្វើអ្វីដែលខ្លួនគិតថាអាចធ្វើបានបើទោះបីជាមានបុគ្គលខ្លះគិតថាមិនអាចធ្វើបានក៏ដោយអ្វីដែលសំខាន់គឺចាប់ផ្តើមសម្រេចវាឱ្យបានដោយភាពជឿជាក់លើខ្លួនឯង។
កញ្ញា លីនដា បានបង្ហាញថា៖ «ខ្ញុំធ្លាប់ត្រូវគេរិះគន់ថាជាក្មេងស្រីដែលមានមាឌល្អិតហើយទាបគ្មានក្រុមហ៊ុនណាគេជ្រើសរើសឱ្យធ្វើការនោះទេកុំថាឡើយស្រមៃចង់ក្លាយជាមេដឹកនាំ តែខ្ញុំនៅតែជម្នះគំនិតទាំងអស់នោះដោយការខិតខំប្រឹងប្រែង ហើយបង្ហាញពីលទ្ធផលវិជ្ជមានជាក់ស្តែងទៅកាន់មនុស្សគ្រប់គ្នា»។
ម្ចាស់ពានរង្វាន់ និងជាអ្នកជំនាញនិយាយសាធារណៈខាងលើ បានលើកឡើងផងដែរថាការដែលកញ្ញា ចូលរួមក្នុងសកម្មភាពសង្គម និងគ្រប់គ្រងគម្រោងមួយចំនួនគឺដើម្បីបង្ហាញឱ្យឃើញពីភាពវិជ្ជមានមួយសម្រាប់ស្ត្រីកម្ពុជា ថាទោះបីជាក្នុងកាលៈទេសៈណាក៏ដោយ ការមានទំនុកចិត្តលើខ្លួនឯង ហើយចាប់ផ្តើមធ្វើនូវអ្វីដែលថ្មីប្រកបដោយភាពត្រឹមត្រូវនឹងអាចធ្វើឱ្យយើងទទួលបានជោគជ័យទាំងក្នុងការសិក្សា និងការងារ៕

July 31, 2017
ណត្ថិយា អះអាងថា លុយទិញខុនដូបានមកពីមុខរបររបស់នាង
កញ្ញា ណត្ថិយា មានមហាជនជាច្រើនស្គាល់នាងតាមរយៈការសម្ដែងកាយវិការក្នុងបទចម្រៀង «សន្សំលុយចងដៃអូន» និងបទ «រាំតាមពូ» ដែលជាការបកស្រាយរបស់លោក ខេមរៈ សិរីមន្ដ។ ថ្មីៗនេះបានលេចឮដំណឹងថា ក្រោយពីបានចូលប្រឡូកសិល្បៈមួយប្រាវមក នាងអាចមានលទ្ធភាពទិញខុនដូ នៅម្ដុំផ្សារបឹងត្របែកបានហើយ។
ក្រោយពីទទួលបានប្រជាប្រិយភាពមួយប្រាវរួចមក ស្រាប់តែបាត់មុខនាងឈឹង។ ធ្វើឱ្យអ្នកគាំទ្រនាងគិតថា នាងទំនងជាបោះបង់ចោលសិល្បៈទៅចាប់យកអាជីវកម្មថ្មីតាមរយៈការបើកហាងសាឡនពេញទំហឹងហើយមើលទៅ តែផ្ទុយទៅវិញមិនត្រឹមតែនាងមិនបោះបង់ចោលអាជីពសិល្បៈប៉ុណ្ណោះទេ ថែមទាំងមានដំណឹងល្អជាមួយការទិញខុនដូទៀតផង។
ជាមួយនឹងដំណឹងរីករាយនេះមានអ្នកគាំទ្រនាងជាច្រើនបានសរសើរពីសមត្ថភាពរបស់នាង ដ្បិតអីនាងទើបតែចូលប្រឡូកសិល្បៈបានមួយប្រាវសោះ តែអាចមានលទ្ធភាពទិញខុនដូរស់នៅបាត់ទៅហើយ។
កញ្ញា ណត្ថិយាបានលើកឡើងថា សូមអ្នកគាំទ្រនាងទាំងអស់កុំមានការយល់ច្រឡំឱ្យសោះទៅលើការទិញខុនដូនេះ ព្រោះវាជាលុយរបស់នាងសុទ្ធសាធ។ នាងបញ្ជាក់ថា៖ «ខ្ញុំទិញវាក្នុងតម្លៃជាង10ម៉ឺនដុល្លារ ហើយលុយទិញខុនដូនេះជាលុយដែលបានមកពីការរកស៊ីធ្វើការរបស់ខ្ញុំនាពេលកន្លងមក។ ពេលសម្រេចចិត្ដទិញខុនដូ ខ្ញុំបានគិតគូរវែងឆ្ងាយណាស់ ដោយសារទីតាំងនៅចំកណ្ដាលក្រុង ដូច្នេះខ្ញុំមិនបាច់ជួលកន្លែងបើកហាងលក់ផលិតផលអ្វីទេ ខ្ញុំយកកន្លែងរស់នៅធ្វើជាការិយាល័យសម្រាប់ដាក់លក់ផលិតផលតែម្ដង»។
ជាមួយនឹងការដកខ្លួនមួយរយៈនោះនាងប្រាប់ថា នាងមិនបានឈប់ពីការងារសិល្បៈទេ គ្រាន់តែមួយរយៈមុននាងរវល់រៀបចំរបររកស៊ីឱ្យមានដំណើរការល្អសិន ដូច្នេះហើយទើបនាងរយាលពុំបានចេញមុខក្នុងសិល្បៈ។ នាងបញ្ជាក់ថា៖ «ហាងសាឡនរបស់ខ្ញុំបានផ្អាកដំណើរការទៅហើយ ដោយសារតែខ្ញុំគ្មានពេលមើលការខុសត្រូវ ព្រោះខ្ញុំរស់នៅភ្នំពេញតែម្នាក់ឯង រីឯបងប្អូនរស់នៅឯខេត្ដបាត់ដំបងទាំងអស់ ចង់ឱ្យពួកគាត់ជួយក៏មិនកើត ដូច្នេះទើបខ្ញុំសម្រេចបិទហាងសាឡននៅភ្នំពេញនេះចោល ហើយទៅបើកហាងលក់បុកល្ហុងនៅឯខេត្ដបាត់ដំបងវិញ»។
តារាសម្ដែងរូបនេះបន្ដថា ទោះបីជានាងបិទហាងសាឡនពិតមែន ប៉ុន្ដែមុខរបរលក់ផលិតផលថែរក្សាសម្ផស្សដែលបានដំណើរការជាយូរមកហើយនោះ នាងនៅតែបន្ដលក់តាមរយៈ Online ដោយនាងពុំបានបោះបង់ចោលទេ។ រីឯហាងបុកល្ហុង ដែលចំណាយទុនជិតមួយម៉ឺនដុល្លារសម្រាប់ដំណើរការនោះ នាងត្រូវទុកឱ្យបងស្រីរបស់នាងជាអ្នកមើលការខុសត្រូវជំនួស៕

July 31, 2017
អាថ៌កំបាំងរូបមន្ដពិសេស ធ្វើឱ្យសក់ភ្លឺរលោងតាមបែបធម្មជាតិ
ជឿថា នារីគ្រប់រូបប្រហែលជាចង់បានសរសៃសក់រឹងមាំ មិនបែកចុង ព្រមទាំងទន់ភ្លឺរលោង និងមិនជំពាក់គ្នាមិនខាន ថ្ងៃនេះគេហទំព័រ ឡារ៉េន សូមពាំនាំនូវវិធីសាស្ត្រអាថ៌កំបាំងនៃការថែរក្សាសរសៃសក់ឱ្យមើលទៅមានសុខភាពល្អ ភ្លឺរលោងដោយផលិតផលធម្មជាតិមកជម្រាបជូន។
– ស្លឹកគ្រៃ គឺជាបន្លែឱសថបុរាណបែបធម្មជាតិ ដែលមាននៅក្នុងផ្ទះបាយរបស់នារីយើងសឹងតែគ្រប់គ្នា ហើយស្លឹកគ្រៃមានប្រយោជន៍ល្អដល់សរសៃសក់យ៉ាងមិននឹកស្មានដល់ទៀតផង។ គុណសម្បត្តិរបស់វា គឺជួយបំប៉នសរសៃសក់ ការពារសក់បែកចុង ការពារមិនឱ្យសក់ជ្រុះដែលនាំឱ្យសក់ស្តើង ជួយឱ្យសក់ទន់ភ្លឺរលោង ស្រស់ស្អាតបែបធម្មជាតិ ដោយសារតែស្លឹកគ្រៃមានសារធាតុចិញ្ចឹម និងសារៈសំខាន់គឺ វីតាមីន C វីតាមីន A និងមានសារធាតុផ្សំនៅក្នុងប្រេងក្រអូបសម្រាប់ម៉ាស្សា ដូចជា ជាតិមេនថល និងកាបូនCitrus ជាដើម។
វិធីធ្វើ៖
1.យកដើមស្លឹកគ្រៃ(ទាំងគល់ទាំងស្លឹក)មកលាងឱ្យស្អាតចំនួន 3 ដើម។
2.យកមកបុកឱ្យល្អិត រួចពូតយកតែទឹក។
3.បន្ទាប់ពីកក់សក់ស្អាតរួចហើយ យកទឹកស្លឹកគ្រៃមកកក់សក់ឱ្យសព្វ ហើយប្រើដៃម៉ាស្សាលើស្បែកក្បាលថ្នមៗ និងទុករយៈពេល 10 នាទី រួចសឹមលាងទឹកចេញ។

វិធីសាស្ត្រនេះ ឡារ៉ែនសូមណែនាំឱ្យធ្វើជាប្រចាំរៀងរាល់ពេលកក់សក់ប្រមាណជា 2 -3 ខែ នោះអ្នកនឹងសង្កេតឃើញថា សក់របស់អ្នកនឹងឡើងទន់ភ្លឺរលោង ហើយរឹងមាំ និងស្រស់ស្អាតបែបធម្មជាតិទ្វេឡើងៗមិនខាន៕

July 31, 2017
ក្រុមហ៊ុនផ្ដល់សេវាអ៊ិនធើណេតចំនួន 3 ត្រូវបាន(ន.ទ.ក)លុបអាជ្ញាប័ណ្ណ
ក្រុមហ៊ុនចំនួន 3 ត្រូវបាននិយតករទូរគមនាគមន៍កម្ពុជា (ន.ទ.ក)លុបអាជ្ញាប័ណ្ណប្រតិបត្ដិការផ្ដល់សេវាទូរគមនាគមន៍ក្នុងទីផ្សារកម្ពុជា ខណៈក្រុមហ៊ុនទាំងនោះធ្វើខុសនឹងលក្ខន្តិកៈបុគ្គលិក និងបទបញ្ជាផ្ទៃក្នុង។
ន.ទ.ក បានធ្វើសេចក្ដីសម្រេចស្ដីពីការលុបចោលអាជ្ញាប័ណ្ណដែលបានផ្តល់ជូនក្រុមហ៊ុនចំនួន3 រួមមាន៖ លុបអាជ្ញាប័ណ្ណប្រតិបត្ដិការផ្ដល់សេវាទូរគមនាគមន៍តាមប្រព័ន្ធ VSAT ចុះថ្ងៃទី19 ខែមីនា ឆ្នាំ2015 ដែលបានផ្ដល់ជូនក្រុមហ៊ុន Acumen Cambodia Co., Ltd. និងក្រុមហ៊ុន E-Cloud Co., Ltd ប្រតិបត្ដិការផ្ដល់សេវាអ៊ិនធើណេត(ISP) និងអាជ្ញាប័ណ្ណប្រតិបតិ្ដការសេវាសំឡេងតាមរយៈពិធីការអ៊ិនធើណេត(VoIP) ចុះថ្ងៃទី27 ខែមេសា ឆ្នាំ2015 ហើយចុងក្រោយគេ គឺសម្រេចលុបអាជ្ញាប័ណ្ណប្រតិបត្ដិការផ្ដល់សេវាអ៊ិនធើណេត(ISP) និងអាជ្ញាប័ណ្ណប្រតិបតិ្ដការសេវាសំឡេងតាមរយៈពិធីការអ៊ិនធើណេត (VoIP) ចុះថ្ងៃទី02 ខែតុលា ឆ្នាំ2006 ដែលបានផ្ដល់ជូនក្រុមហ៊ុន G-Tell (Cambodia) Investment Group Co., Ltd. (MEGA)។ និយតករទូរគមនាគមន៍កម្ពុជា មិនបានបញ្ជាក់បន្ថែមពីផ្សេងទៀតទេ អំពីដំណើរការនៃរឿងរ៉ាវដែលរហូតឈានដល់ការលុបអាជ្ញាប័ណ្ណប្រតិបត្ដិការទាំងនេះ៕
July 31, 2017
ចិត្តសាស្ត្រទំនាក់ទំនង បង្កើនគុណភាពជីវិតរបស់ប្រជាជនខ្មែរ
គ្មានមនុស្សណាម្នាក់អាចរស់នៅតែម្នាក់ឯងបានទេនៅលើលោកយើងនេះ ហេតុនេះមនុស្សកើតមកជាមួយនឹងទំនាក់ទំនង តាំងពីដើមរហូតមកដល់បច្ចុប្បន្ន។ ទំនាក់ទំនងមានសារៈសំខាន់ណាស់ ព្រោះប្រសិនបើមនុស្សបង្កើតទំនាក់ទំនងល្អ វានឹងផ្តល់ផលវិជ្ជមានមកដល់ខ្លួនយើងយ៉ាងច្រើន ដូចជាសុភមង្គលក្នុងគ្រួសារ ភាពជោគជ័យក្នុងការងារ អាជីវកម្ម និងក្នុងសង្គម តែប្រសិនបើយើងមិនមានការប្រុងប្រយ័ត្ន ហើយបណ្តោយឱ្យគ្រប់ទំនាក់ទំនងកើតឡើងដោយភាពមិនល្អវិញ វានឹងអាចបំផ្លាញជីវិតរបស់យើងឱ្យជួបវិបត្តិម្តងហើយម្តងទៀតជាក់ជាមិនខាន។
ដោយមើលឃើញពីគុណសម្បត្តិនៃការទំនាក់ទំនងនេះហើយ ទើបក្រុមយុវជនមួយដែលមានឈ្មោះថា Daily Plus បានបង្កើតកម្មវិធីបណ្តុះបណ្តាលមួយដែលមានឈ្មោះថា «ចិត្តសាស្រ្តទំនាក់ទំនង» ដើម្បីជាទុននៃការពិចារណា ក៏ដូចជាចំណេះដឹងសម្រាប់ប្រជាជនកម្ពុជាឱ្យបង្កើតទំនាក់ទំនងកាន់តែល្អឡើង។
លោក ពេជ្រ វិសាល ស្ថាបនិករបស់ Daily Plus បានលើកឡើងថា កម្មវិធីបណ្តុះបណ្តាលស្តីពី «ចិត្តសាស្ត្រទំនាក់ទំនង» ត្រូវបានបង្កើតឡើងក្នុងគោលបំណងផ្តល់ឱកាសឱ្យយុវជន អាចអភិវឌ្ឍខ្លួនឯងលើផ្នែកទំនាក់ទំនងដើម្បីឈានទៅដល់ភាពជាបុគ្គលដែលពោរពេញទៅដោយសមត្ថភាពសម្រាប់ចូលរួមចំណែកជួយដល់សង្គមរបស់យើងទាំងអស់គ្នា។
លោក វិសាល បានលើកឡើងថា៖ «តាមរយៈសិក្ខាសាលានេះ យុវជននឹងមានសមត្ថភាពក្នុងការទំនាក់ទំនងតាមរយៈការទទួលយកចំណេះដឹង គន្លឹះសំខាន់ៗ និងបទពិសោធតាមរយៈគ្រូបង្វឹកដែលមានជំនាញ និងជោគជ័យក្នុងអាជីវកម្ម»។
វាគ្មិនដែលបានចូលរួមក្នុងវេទិកាយ៉ាងមានសារៈសំខាន់នេះ មានដូចជាលោកឧកញ៉ា ជា ដែន អគ្គនាយកក្រុមហ៊ុនសម្ព័ន្ធ វ៉ាន់ សុភី គ្រុប លោកឧកញ៉ា តាំង ណាំស្រ៊ុន អគ្គនាយកក្រុមហ៊ុន ហង្សនាគ និងលោក កែវ ឡង់ឌី នាយកអភិវឌ្ឍអាជីវកម្មនៃក្រុមហ៊ុន Baby Outlet Cambodia៕
July 31, 2017
ស្ថានីយទូរទស្សន៍ប៉ុស្ដិ៍លេខ5 អបអរភាពជោគជ័យរបស់ខ្លួនក្រោយពីថតបញ្ចប់រឿងចំនួន2
បន្ទាប់ពីស្ថានីយទូរទស្សន៍ប៉ុស្ដិ៍លេខ 5 បានផលិតរឿងភាគចំនួន2រឿង គឺរឿង «ចម្ការលាក់ស្នេហ៍» និងរឿង «ជីវិតនាងរចនា» ចប់ជាស្ថាពរហើយនោះ កាលពីថ្ងៃទី29 ខែកក្កដា កន្លងទៅអ្នកគ្រប់គ្រងនៃស្ថានីយទូរទស្សន៍ក៏ដូចជាអ្នកគ្រប់គ្រងការផលិតទាំងអស់បានរៀបចំពិធីជប់លៀងលើកទឹកចិត្ដដល់តារាសម្ដែងគ្រប់ៗគ្នា។
ក្នុងពិធីនេះគេឃើញសង្កេតឃើញថា ក្រុមតារាសម្ដែងនៅក្នុងរឿងទាំងពីរដែលចូលរួមញ៉ាំអាហារនៅភោជនីយដ្ឋានទន្លេបាសាក់ បានសម្ដែងអារម្មណ៍សប្បាយរីករាយជាខ្លាំង ដើម្បីជាការអបអរដល់ភាពជោគជ័យរបស់ពួកគេក្រោយបញ្ចប់ការងារសម្ដែងទាំងស្រុង។
មានតារាសម្ដែងជាច្រើនបានលើកឡើងស្រដៀងគ្នាថា គេកម្រឃើញស្ថានីយទូរទស្សន៍ណាដែលចំណាយលុយយ៉ាងសន្ធឹកសន្ធាប់ដើម្បីរៀបចំពិធីជប់លៀងបែបនេះណាស់។ ជាមួយគ្នានេះដែរពួកគេចាត់ទុកថា វាជាការលើកទឹកចិត្ដដល់ក្រុមការងារផលិតដើម្បីឱ្យពួកគេប្រឹងប្រែងធ្វើការងារនៅរឿងក្រោយៗជាបន្ដបន្ទាប់ទៀតឱ្យបានកាន់តែល្អខ្លាំងបន្ថែមទៀត៕

July 31, 2017
Matic ពិនិត្យសុខភាព មុននឹងផ្ទេរពីក្លិប Chelsea ទៅ Man United
ក្លិបបិសាចក្រហម Manchester United កំពុងតែស្ថិតយ៉ាងប្រកៀកក្នុងការចុះហត្ថលេខាជាមួយនឹង Nemanja Matic ពីក្លិបតោខៀវ Chelsea សម្រាប់តម្លៃខ្លួន40លានផោន (ស្មើនឹង52.53លានដុល្លារអាមេរិក) ក្រោយពីខ្សែបម្រើអន្តរជាតិស៊ែប៊ីរូបនេះបានត្រួតពិនិត្យសុខភាពកាលពីថ្ងៃអាទិត្យរួចមក។ Matic វ័យ28ឆ្នាំ នឹងក្លាយជាកីឡាករចំណូលថ្មីទី3របស់ក្លិប Man United នៅរដូវក្តៅនេះ ក្រោយពីការនាំយកខ្សែការពារ Victor Lindelof ពីក្លិប Benfica ក្នុងតម្លៃខ្លួន31លានផោន និងខ្សែប្រយុទ្ធ Romelu Lukaku ពីក្លិប Everton ក្នុងតម្លៃខ្លួន75លានផោន។ នៅមុនពេលដណ្តើមបានជ័យជម្នះក្នុងលទ្ធផល 3-0 លើក្រុម Valerenga ក្នុងការប្រកួតមិត្តភាពមុនបើករដូវកាលរបស់ពួកគេកាលពីថ្ងៃអាទិត្យ លោក Jose Mourinho អ្នកចាត់ការទូទៅរបស់ Man United បានឲ្យដឹងថា៖ «យើងកំពុងតែរង់ចាំនូវព័ត៌មានផ្សេងៗ។ Matic ពិតជាចង់ផ្ទេរខ្លាំងណាស់។ ខ្ញុំគិតថា យើងមានឱកាសមួយ។ លេខ31 គឺជាលេខដែលនៅទំនេរ»។ ការផ្ទេរនេះ មានន័យថា វាគឺជាលើកទី2ហើយដែលលោក Mourinho បានទិញ Matic ក្រោយពីការនាំយករូបគេពីក្លិប Benfica ទៅកាន់ក្លិប Chelsea ។ Chelsea បានចំណាយប្រាក់21លានផោន កាលពីខែមករា ឆ្នាំ2014 ទៅឱ្យក្លិប Benfica ដើម្បីចុះហត្ថលេខាជាមួយនឹង Matic ជាលើកទី2 នៅឯកីឡដ្ឋាន Stamford Bridge។ Matic មានតម្លៃខ្លួនតិចជាង5លានផោនប៉ុណ្ណោះកាលពីខែមករា ឆ្នាំ2011 នៅពេលដែលរូបគេបានចាកចេញពីក្លិប Chelsea ទៅកាន់ប្រទេសព័រទុយហ្គាល់ ដើម្បីបើកផ្លូវឲ្យខ្សែការពារ David Luiz ទៅកាន់ក្រុមតោខៀវ។
ខ្សែបម្រើរូបនេះបានស៊ុតបាល់បញ្ចូលទី1គ្រាប់ក្នុងការបង្ហាញខ្លួនក្នុងក្របខ័ណ្ឌ Premier League ចំនួន35លើក អំឡុងពេលរដូវកាលឈ្នះពានឆ្នាំ2016-2017 របស់ Chelsea ប៉ុន្តែ ក៏បានស៊ុតបាល់បញ្ចូលទីដ៏សំខាន់ផងដែរ ក្នុងពេលក្រុមខ្លួនទទួលជ័យជម្នះ ក្នុងការប្រកួតពាន FA Cup វគ្គពាក់កណ្តាលផ្តាច់ព្រ័ត្រ លើក្រុម Tottenham កាលពីខែមេសា៕
ប្រភពពី៖ BBC

July 31, 2017
ប្រាក់ចំណេញរបស់ធនាគារអេស៊ីលីដាធ្លាក់ចុះជិត10ភាគរយក្នុងឆមាសទី1
ភ្នំពេញៈ ប្រាក់ចំណេញសុទ្ធរបស់ធនាគារអេស៊ីលីដា ភីអឹលស៊ីបានធ្លាក់ចុះជិត10ភាគរយ ក្នុងដំណាច់ឆមាសទី1ឆ្នាំនេះធៀបរយៈពេលដូចគ្នាកាលពីឆ្នាំមុន។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអឹលស៊ី ដែលជាធនាគារធំជាងគេនៅកម្ពុជាបានថ្លែងឲ្យដឹងតាមទូរស័ព្ទនាព្រឹកថ្ងៃទី31 កក្កដានេះថា កាលពីឆមាសទី1ឆ្នាំមុន ប្រាក់ចំណេញសុទ្ធរបស់ធនាគារអេស៊ីលីដាសម្រេចបានទំហំទឹកប្រាក់59.4លានដុល្លារ ប៉ុន្តែឆ្នាំនេះយើងទទួលបានប្រាក់ចំណេញត្រឹមតែ53.3លានដុល្លារប៉ុណ្ណោះ គឺផលចំណេញបានធ្លាក់ចុះជិត10ភាគរយ។
លោកបន្តថា “ការថយចុះនូវប្រាក់ចំណេញនេះ គឺដោយសារទំហំឥណទានរបស់យើងមិនមានកំណើនខ្ពស់ គឺសម្រេចបានត្រឹម0.73ភាគរយប៉ុណ្ណោះ ធៀបរយៈពេលដូចគ្នាកាលពីឆ្នាំមុន”។ លោកបន្តថា “ការលក់ឥណទានមិនដាច់ និងការថមថយនូវតម្លៃផលិតផលកសិកម្ម ជាផ្នែកសំខាន់នៃការថមថយចុះនូវប្រាក់ចំណេញ និងទំហំឥណទាន”។
លោក អ៊ិន ចាន់នី បានបន្តថា ជាមួយនឹងការថយចុះនេះ ធនាគារកំពុងគិតគូរផ្លាស់ប្តូរយុទ្ធសាស្រ្តទីផ្សាររបស់ខ្លួនដើម្បីសម្រេចបានកំណើនឡើងវិញ ព្រោះពីមុនយើងផ្តោតលើកសិកម្មច្រើន។ ធនាគារនឹងផ្លាស់ប្តូរយុទ្ធសាស្រ្តទីផ្សារជារឿងចាំបាច់ ប៉ុន្តែមិនមែនជាការថយចេញពីវិស័យកសិកម្មនោះទេ។
ការថមថយចុះនៃឥណទានរបស់អេស៊ីលីដាមិនឆ្លុះបញ្ចាំងពីវិស័យនេះទាំងមូលនោះទេ ព្រោះយោងតាមរបាយការណ៍របស់ធនាគារជាតិនៃកម្ពុជាបានបង្ហាញថា កម្រិតឥណទានទូទាំងវិស័យនេះ សម្រេចបានកំណើន18ភាគរយក្នុងឆមាសទី1ឆ្នាំនេះ ធៀបរយៈពេលដូចគ្នាកាលពីឆ្នាំមុន៕

July 31, 2017
Pique ជួយឲ្យ Barcelona ផ្តួល Real ដើម្បីលើកពាន International Champions Cup
ខ្សែការពារ Gerard Pique បានរកគ្រាប់បាល់ឈ្នះឲ្យក្រុម Barcelona ក្នុងពេលប្រកួតជាមួយនឹងក្រុម Real Madrid កាលពីព្រឹកថ្ងៃអាទិត្យម្សិលមិញ(ម៉ោងនៅកម្ពុជា) ខណៈការប្រកួតដែលមានឈ្មោះថា El Clasico នៅលើទឹកដីនៃរដ្ឋ Miami នេះបានផ្តល់នូវការរំភើបយ៉ាងខ្លាំង។
ខ្សែការពារអន្តរជាតិអេស្ប៉ាញរូបនេះបានរកគ្រាប់បាល់បំប៉ោងសំណាញ់ទីពីការស៊ុតបាល់ពិន័យ Free-kick របស់ Neymar នៅនាទីទី50 ដើម្បីជួយឲ្យក្រុមខ្លួនទទួលជ័យជម្នះ 3-2 លើក្រុម Real Madrid នៅមុខអ្នកទស្សនាសរុបចំនួន66,014នាក់នៅឯកីឡដ្ឋាន Hard Rock។ ខ្សែប្រយុទ្ធ Lionel Messi ដែលបានបង្ហាញពីទម្រង់លេងយ៉ាងល្អឥតខ្ចោះក្នុងរយៈពេលនៃការលេង64នាទីរបស់គេនោះ បានរកគ្រាប់បាល់បើកឆាក ក្រោយពីលេងបានរយៈពេលត្រឹមតែ3នាទី ហើយបន្ទាប់ពីនោះខ្សែបម្រើ Ivan Rakitic បានបន្ថែមគ្រាប់បាល់ទី2ភ្លាមៗដែរ បន្ទាប់ពីខ្សែការពាររបស់ក្រុម Real Madrid ហាក់ស្ថិតក្នុងសភាពទន់ខ្សោយ។ ប៉ុន្តែ ក្រុមរបស់លោក Zinedine Zidane បានស្តារមុខមាត់ឡើងវិញភ្លាមៗ និងនៅជិតបញ្ចប់ការប្រកួតនៃតង់ទី1 គ្រាប់បាល់ស៊ុតបញ្ចូលទីរបស់កីឡាករ Mateo Kovacic និង Marco Asensio បានជួយឲ្យក្រុមស្តេចឈុតសមួយនេះ តាមស្មើវិញតែម្តង។ ទោះបីជាយ៉ាងណា Pique បានរកគ្រាប់បាល់កាត់សេចក្តី ដើម្បីជួយឲ្យក្រុម Barcelona ឈ្នះពានពីការប្រកួតមិត្តភាពមុនបើករដូវកាលមួយនេះតែម្តង។ លទ្ធផលនៃការប្រកួតមិត្តភាពមុនបើករដូវកាលនេះ មិនជះឥទ្ធិពលទៅលើកំណត់ត្រាជារួមនៃការប្រកួតដែលឈ្មោះថា El Clasico ឡើយរវាងក្រុមទាំងពីរនេះ ខណៈដែល Real Madrid បានកត់ត្រាជ័យជម្នះសរុប93លើក ហើយ Barcelona ឈ្នះ91លើក៕
ប្រភពពី៖ BBC
July 31, 2017