Category: សង្គម និងសេដ្ឋកិច្ច

ភ្នំពេញៈ រដ្ឋាភិបាលកម្ពុជាតាមរយៈក្រសួងមហាផ្ទៃកំពុងស្នើសុំដល់សម្តេចអគ្គមហាសេនាបតីតេជោហ៊ុន សែន នាយករដ្ឋមន្រ្តីកម្ពុជាដើម្បីពង្រីកច្រកទ្វារជ្រៃធំឱ្យទៅជាច្រកទ្វារព្រំដែនអន្តរជាតិក្នុងការជំរុញការគ្រប់គ្រងឲ្យកាន់តែប្រសើរឡើង។

អភិបាលនៃគណៈអភិបាលខេត្តកណ្តាលលោក ម៉ៅ ភិរុន បានថ្លែងលើកឡើងនៅក្នុងកិច្ចប្រជុំរវាងអាជ្ញាធរពាក់ព័ន្ធនៅច្រកទ្វារជ្រៃធំកាលពីថ្ងៃម្សិលមិញនេះថា នាពេលកន្លងមកអាជ្ញាធរខេត្តកណ្តាល និងខេត្តអំាងយ៉ាង ប្រទេសវៀតណាម បានអនុវត្តការចុះកិច្ចព្រមព្រៀងរួចមកហើយនៅលើចំណុចជាច្រើនដើម្បីដាក់បញ្ជូលជាធរមាននៃការដាក់ឲ្យប្រើប្រាស់ស្ពាន កំពង់ដ និងជាថ្ងៃដាក់ឲ្យដំណើរការនៃច្រកទ្វារព្រំដែនជ្រៃធំនេះផងដែរ។

លោកបន្តថា ទន្ទឹមនឹងការដាក់ឲ្យប្រើប្រាស់ស្ពាន កំពង់ដ និងច្រកទ្វារព្រំដែនជ្រៃធំនេះ គឺភាគីកម្ពុជាឈានទៅបិទច្រករបៀងនៅតាមព្រំដែនទាំងអស់តាមការឯកភាពរវាងភាគីវៀតណាម និងកម្ពុជា ក៏ដូចជាឯកភាពអនុវត្តតាមគោលការណ៍របស់រាជរដ្ឋាភិបាលយើងផងដែរ។

លោកបន្តថា មន្រ្តីជាន់ខ្ពស់ក្រសួងមហាផ្ទៃបានចុះហត្ថលេខារួចមកហើយ ដើម្បីស្នើសុំទៅដល់សម្តេចតេជោហ៊ុន សែនក្នុងការសុំដំឡើងកម្រិតច្រកទ្វារជ្រៃធំខ្នាតាំងយូឲ្យក្លាយទៅជាច្រកទ្វារព្រំដែនអន្តរជាតិដើម្បីបង្កើតទីតាំងចំនួន2 កន្លែងរួមគ្នាមាន ច្រកទ្វារព្រំដែនផ្លូវគោក និងច្រកទ្វារព្រំដែនផ្លូវទឹកដើម្បីបង្កលក្ខណៈងាយស្រួលតាមច្រកទ្វារព្រំដែន ក្នុងនោះគឺកំណត់យកនៅច្រកទ្វារព្រំដែនផ្លូវគោក ស្ថិតនៅក្នុងភូមិជ្រៃធំ ឃុំសំពៅពូន ឆ្លងកាត់ស្ពានជ្រៃធំ ទល់មុខច្រកទ្វារព្រំដែនឡុងប៊ិនដោយមានទីតាំងចម្ងាយ 300ម៉ែត្រពីគល់ស្ពានជ្រៃធំ។ ចំណែកច្រកទ្វារព្រំដែនផ្លូវទឹក ស្ថិតនៅចុងផ្លូវ21ក្នុងភូមិជ្រៃធំ ឃុំសំពៅពូន ឆ្លងកាត់ទន្លេបាសាក់ និងព្រែកជ្រៃធំទល់មុខព្រំដែនឡុងប៊ិនប្រទេសវៀតណាមផងដែរ៕

ភ្នំពេញៈ ក្រុមហ៊ុនយក្សមួយរបស់ប្រទេសម៉ាឡេស៊ីឈ្មោះ SURIYA PADU DEVELOPMENT SDN.BHD ដែលមានមូលដ្ឋាននៅប្រទេសម៉ាឡេស៊ីគ្រោងបោះទុន250លានដុល្លារអាមេរិកដើម្បីបង្កើតមជ្ឈមណ្ឌលពាណិជ្ជកម្មអ៊ិស្លាមដំបូងគេនៅកម្ពុជា។

លោក Dato Mohammad Kassim អគ្គនាយកក្រុមហ៊ុន SURIYA PADU DEVELOPMENT SDN.BHD បានបញ្ជាក់ពីព័ត៌មានដ៏ល្អនេះនៅក្នុងជំនួបជាមួយឯកឧត្តម អូស្មាន់ ហាស្សាន់ រដ្ឋមន្រ្តីប្រតិភូអមនាយករដ្ឋមន្រ្តីនាព្រឹកថ្ងៃទី2 សីហានេះថា ក្រុមហ៊ុនរបស់លោកទើបបានសម្រេចវិនិយោគគម្រោងពាណិជ្ជកម្មទំហំជាង100លានដុល្លាអាមេរិកនៅប្រទេសប្រ៊ុយណេ និងកំពុងតែមានចំណាប់អារម្មណ៍យ៉ាងខ្លាំងជាមួយនឹងការដាក់ទុនវិនិយោគនៅកម្ពុជាក្នុងគម្រោងមួយដែលមានឈ្មោះថា មជ្ឈមណ្ឌលពាណិជ្ជកម្មអ៊ិស្លាមកម្ពុជា (CITC) ដែលតាមការគ្រោងនឹងត្រូវចំណាយទឹកប្រាក់250លានដុល្លាអាមេរិក។

លោកអគ្គនាយកក្រុមហ៊ុនបន្តថា ទំហំទឹកប្រាក់ដែលធំបែបនេះ ក្រុមហ៊ុនមានដៃគូម្ចាស់ភាគហ៊ុនដ៏ធំមួយ គឺមូលនិធិព្រះចៅហ្វៃសាល់ ប្រទេសអារ៉ាប៊ីសាអ៊ូឌីត (KFF) ហើយកត្តាដែលញ៉ាំងឲ្យលោកមានគម្រោងវិនិយោគក្នុងទម្រង់ជាមជ្ឈមណ្ឌលពាណិជ្ជកម្មបែបអ៊ិស្លាមមានវត្តមាននៅកម្ពុជា ព្រោះលោកមើលឃើញពីសម្ទុះនៃការរីកចម្រើនសេដ្ឋកិច្ចនៅកម្ពុជា និងសក្តាពុលសេដ្ឋកិច្ចឧស្សាហកម្មនៅកម្ពុជាជាសមាជិកប្រទេសអាស៊ានមួយដែលកំពុងវិវឌ្ឍទៅរកការឈោងចាប់ឧស្សាហកម្មហាឡាលដើម្បីប្រកួតប្រជែងនៅលើទីផ្សាក្នុងតំបន់ និងអន្តរជាតិផងដែរ។

លោកបន្តឲ្យដឹងថា គម្រោងវិនិយោគនេះគឺផ្តោតសំខាន់ទៅលើឧស្សាហកម្មហាឡាល សណ្ឋាគារនិងទេសចរណ៍ សុខាភិបាល អប់រំ និងផ្សារទំនើបជាដើម។  ឯកឧត្ដម អូស្មាន់ ហាស្សាន់ ក្នុងនាមជាសមាជិករាជរដ្ឋាភិបាលកម្ពុជាបានសម្តែងការអបអរសាទរ និងរីករាយចំពោះគម្រោងដ៍ធំរបស់ម៉ាឡេស៊ីនេះ ហើយឯកឧត្ដមក៏បានត្រៀមខ្លួនសហការជានិច្ចរាល់តម្រូវការចាំបាច់ដែលអាចធ្វើទៅបានដើម្បីលើកកម្ពស់ឱកាស និងកំណើនសេដ្ឋកិច្ចប្រទេសទាំងពីរឱ្យកាន់តែប្រសើរឡើងថែមទៀត។ ឯកឧត្ដមក៏បានបង្ហាញពីសក្តានុពលទាំងឡាយដែលជាឱកាសវិនិយោគនៅកម្ពុជាជូនដល់ភាគីម៉ាឡេស៊ីដើម្បីសម្រេចយកចំណុចចាប់ផ្តើមណាមួយដែលជាវិស័យអាទិភាព ហើយចាប់ផ្តើមអនុវត្តជាជំហានដំបូងតែម្តង៕

ប៉ុន្មានឆ្នាំចុងក្រោយនេះ ការប្រឡងមធ្យមសិក្សាទុតិយភូមិ ត្រូវបានក្រសួងអប់រំ យុវជន និងកីឡា បានធ្វើកំណែទម្រង់ និងបង្កើនការយកចិត្តទុកដាក់ខ្ពស់ចំពោះការគ្រប់គ្រងភាពមិនប្រក្រតីនានា។ នៅក្នុងដំណើរការនៃការប្រឡងនោះ ក្រសួងអប់រំតែងតែធ្វើការបកស្រាយ និងណែនាំដល់សិស្ស រួមទាំងភាគីពាក់ព័ន្ធទាំងអស់ឱ្យបានយល់ពីចំណុចដែលគួរចៀសវាង ដើម្បីជាជំនួយស្មារតីដល់សិស្ស កុំឱ្យថ្លោះធ្លោយ ឬធ្វើខុសប្រការទាំងនេះ។

ខាងក្រោមនេះជាប្រការដែលបេក្ខជនមិនត្រូវអនុវត្តក្នុងដំណើរការសំណេរនៃការប្រឡងសញ្ញាបត្រមធ្យមសិក្សាទុតិយភូមិ៖
1.មិនត្រូវមកដល់មណ្ឌលប្រឡងក្រោយជួងទី2
2.មិនត្រូវស្លៀកពាក់ឯកសណ្ឋានកងប្រដាប់អាវុធចូលក្នុងមណ្ឌលប្រឡង
3.មិនត្រូវយកសៀវភៅ និងសំណៅគ្រប់រូបភាពចូលក្នុងមណ្ឌលប្រឡង
4.មិនត្រូវយកចូលក្នុងមណ្ឌលប្រឡង ឬបន្ទប់ប្រឡងនូវអាវុធជាតិផ្ទុះ ទូរស័ព្ទដៃ ឧបករណ៍អេឡិចត្រូនិកគ្រប់ប្រភេទសៀវភៅសំណៅឯកសារ ប្រដាប់គិតលេខ នាឡិកាដៃដែលមានប្រដាប់គិតលេខ កាតាបកាបូបយួរដៃ ថង់សម្ពៀត កញ្ចប់ផ្សេងៗ និងទឹកលុបពណ៌ស
5.មិនត្រូវចូលក្នុងបន្ទប់ប្រឡងមុនពេលអនុរក្សហៅឈ្មោះ
6.មិនត្រូវប្រើពាក្យសំដីអាកប្បកិរិយាមិនសមរម្យក្នុងមណ្ឌលប្រឡង ឬបង្កជម្លោះនៅក្នុងមណ្ឌលប្រឡងឬក្នុងបន្ទប់ប្រឡងដោយគំរាមកំហែងលើបេក្ខជនដទៃ
7.មិនត្រូវបដិសេធ ប្រឆាំងតបត ឬបង្កបាតុភាពដោយពាក្យសំដី ដោយកាយវិការចំពោះការត្រួតពិនិត្យរបស់អ្នកមានសមត្ថកិច្ច ឬមេប្រយោគក្នុងការពិនិត្យស្រាវជ្រាវ រើរកសំណៅឯកសារ និងសម្ភារផ្សេងៗដែលត្រូវហាមឃាត់មិនឱ្យយកចូលក្នុងមណ្ឌលប្រឡង
8.មិនត្រូវធ្វើចម្លើយវិញ្ញាសានៅលើសន្លឹកកិច្ចការណាដែលគ្មានហត្ថលេខារបស់អនុរក្ស
9.មិនត្រូវចម្លងប្រធានវិញ្ញាសាចូលក្នុងក្រដាសដទៃ និងមិនត្រូវបោះប្រធានវិញ្ញាសាចេញក្រៅបន្ទប់ប្រឡងឡើយ
10.មិនត្រូវងើបឈរ ងាកឆ្វេងស្ដាំ អើតឈ្ងោកទៅមុខ បែរទៅក្រោយ ឬដើរចេញពីកន្លែងអង្គុយដោយគ្មានការអនុញ្ញាតពីអនុរក្ស។ មិនត្រូវសរសេរកិច្ចការហើយអានខ្លាំងៗឮដល់អ្នកជិតខាង ឬឆក់អូសទាញយកសន្លឹកកិច្ចការរបស់អ្នកដទៃដាក់ពីមុខ ឬដាក់ពីក្រោមសន្លឹកកិច្ចការរបស់ខ្លួនឡើយ
11.មិនត្រូវប្ដូរគ្នានូវសន្លឹកកិច្ចការ ឬក្រដាសព្រាង ឬផ្ទៀងផ្ទាត់ចម្លើយ ឬចម្លងគ្នា និងមិនត្រូវដាក់សន្លឹកកិច្ចការឆ្ងាយពីមុខរបស់ខ្លួនបង្កឱ្យអ្នកដទៃមើល ឬអូសឆក់យកបាន
12.មិនត្រូវធ្វើសញ្ញាសម្គាល់លើសន្លឹកកិច្ចការដើម្បីធ្វើឱ្យសម្គាល់អាគតដ្ឋានរបស់ខ្លួនដូចជាសរសេរអក្សរប្លែកពីតួអក្សរទាំងអស់ក្នុងកិច្ចការធ្វើសញ្ញាផ្សេងៗ ឬគូសបន្ទាត់ខុសប្រក្រតី ឬលុបនឹងទឹកស ឬសរសេររំលងបន្ទាត់ជាដើម
13.មិនត្រូវលាក់ ឬហែកសន្លឹកកិច្ចការរបស់ខ្លួន និងមិនត្រូវហែក ឬលាក់សន្លឹកកិច្ចការអ្នកដទៃ
14.មិនត្រូវបំផ្លាញ ឬធ្វើឱ្យខូចខាតសម្ភារនៅក្នុងបន្ទប់ប្រឡង ដូចជាដោះទ្វារបង្អួច ធ្វើឱ្យរបើកជញ្ជាំងក្ដារធ្វើឱ្យបាក់បែកតុកៅអី ឬក្ដារខៀនជាដើម
15.មិនត្រូវឱ្យអ្នកដទៃប្រឡងជំនួស ឬសរសេរបំពេញបន្ថែមលើសន្លឹកកិច្ចការរបស់ខ្លួនជាដាច់ខាត
16.មិនត្រូវប្រើពាក្យសំដី និងអាកប្បកិរិយាដែលនាំឱ្យខូចសណ្ដាប់ធ្នាប់របៀបរៀបរយនៃការប្រឡង ឬប៉ះពាល់ដល់កិត្តិយសរបស់មេប្រយោគ។

ដើម្បីចៀសវាងកំហុស ឬបញ្ហានានាដែលពាក់ព័ន្ធដល់លទ្ធផលនៃការប្រឡងសូមសិស្សានុសិស្សទាំងអស់ស្វែងយល់ និងបង្កើនការប្រុងប្រយ័ត្ន៕

ខៀវ ប៊ុនលាភ ដែលទស្សនិកជនធ្លាប់បានឃើញការសម្ដែងតាមរយៈរឿងជាច្រើនពិសេស រឿង «រនាំងវណ្ណៈ» នោះ ថ្មីៗនេះលោកប្រាប់ថា លោកនឹងបង្ហាញវត្ដមានក្នុងអាជីពជាតារាចម្រៀងព្រមជាមួយបទថ្មីដំបូងគេផងដែរ។

ជាមួយនឹងការវិវឌ្ឍខ្លួនទៅជាតារាចម្រៀងត្រូវបានលោក ខៀវ ប៊ុនលាភ បញ្ជាក់ថា បើទោះជាលោកមិនមែនជាតារាសម្ដែងមានឈ្មោះបោះសំឡេងខ្លាំងក្លាក៏ពិតមែន ប៉ុន្ដែក្រោយពីសម្ដែងអស់រយៈពេលច្រើនឆ្នាំមក លោកក៏ទទួលបានការគាំទ្រច្រើនពីមហាជនដែរ។ ដូច្នេះទើបធ្វើឱ្យលោកមានគំនិតចង់អភិវឌ្ឍខ្លួនបន្ថែមទៀត ខណៈសមត្ថភាពនៃការច្រៀងរបស់លោកក៏អាចឈានទៅប្រដំប្រសងនឹងតារាចម្រៀងមួយចំនួនដែរ។ លោកបញ្ជាក់ថា៖ «បច្ចុប្បន្នខ្ញុំក៏រវល់ជាមួយអាជីពសម្ដែងច្រើន ក្រោយពីបានថតបញ្ចប់រឿងជាច្រើនមក ថ្មីៗនេះខ្ញុំទទួលបាន4រឿងបន្ថែមទៀតអាចនឹងធ្វើឱ្យខ្ញុំពិបាកបែងចែកពេលវេលាបន្តិច តែដោយសារតែស្រឡាញ់ និងចង់សាកល្បងសមត្ថភាពរបស់ខ្លួនផងនោះ ទើបខ្ញុំសម្រេចចិត្ដចាប់យកអាជីពចម្រៀងមួយទៀត»។

តារាសម្ដែងរូបនេះបន្ដថា ប្រសិនបើគ្មានការតាំងចិត្ដទេ លោកក៏មិនតស៊ូជាមួយអាជីពចម្រៀងដែរ ព្រោះការងារសម្ដែងធ្វើឱ្យលោកមានការនឿយហត់ខ្លាំងទៅហើយ តែយ៉ាងណាក៏លោកត្រូវតែចំណាយពេលធ្វើការហ្វឹកហាត់សំឡេង និងក្បាច់រាំជាច្រើនទៀតដែរ។ ជាមួយនឹងការខំប្រឹងប្រែងនេះលោកអះអាងថា៖ «នៅពាក់កណ្ដាលខែសីហាឆ្នាំនេះ លោកនឹងចេញបទចម្រៀងមួយបទមានចំណងជើងថា «ពុកខ្ញុំពិធីករ» បទនេះនិពន្ធឡើងដើម្បីឧទ្ទិសដល់វិញ្ញាណក្ខ័ន្ធបងប្រុសអ៉ិត សេដ្ឋា បន្ទាប់ពីមានព្រឹត្ដិការណ៍កើតឡើងជាច្រើនជុំវិញការស្លាប់របស់គាត់ដែលវាបានដក់នៅក្នុងអារម្មណ៍ខ្ញុំ។ ក្នុងនោះយើងបានលើកពីវីរភាពនៃការងាររបស់គាត់ពិសេសការប្រឹងប្រែងបីបាច់ថែរក្សាក្រុមគ្រួសារទាំងមូល»។

លោក ខៀវ ប៊ុនលាភ បានសម្ដែងនូវក្ដីរំពឹងថា បទនេះនឹងទទួលបានការគាំទ្រច្រើន ខណៈប្រជាជនកម្ពុជាជាច្រើន ពិសេសតារាសិល្បៈទាំងអស់ហាក់មិនទាន់បំភ្លេចឈ្មោះលោកអ៊ិត សេដ្ឋា ចេញពីក្នុងចិត្ដរបស់ពួកគាត់នៅឡើយ។ គួរបញ្ជាក់ថា ខៀវ ប៊ុនលាភ ជាតារាសម្ដែងមានភាពអត់ធ្មត់ជាមួយនឹងការសម្ដែងជាខ្លាំង ខណៈលោកមកពីខេត្ដចូលប្រឡូកសិល្បៈទាំងមានការខ្វះខាតជីវភាពជាខ្លាំងក៏ដោយ។

លោកបញ្ជាក់ថា៖ «អ្វីដែលមានសព្វថ្ងៃនេះគឺកើតចេញពីការផ្ដល់កម្លាំងចិត្ដរបស់ម្ដាយខ្ញុំដែលតែងតែជំរុញថា ប្រសិនបើកូនចង់ធ្វើអ្វីមួយកូនត្រូវតែជឿជាក់ និងដើរទៅមុខដោយពុំចាំបាច់ភ័យខ្លាចជាមួយអ្វីទេ ខណៈដែលគាត់ត្រឹមតែជាស្រ្ដីម្នាក់លក់ចេកចៀនចិញ្ចឹមកូនតែប៉ុណ្ណោះ។ ពាក្យសំដីទាំងនេះហើយដែលធ្វើឱ្យខ្ញុំអាចដើរមកដល់ចំណុចដូចសព្វថ្ងៃនេះ»៕

https://www.youtube.com/watch?v=5Hq1Udl7zO0

ម៉ូតូកង់3 ប្រើប្រាស់ថាមពលអគ្គិសនីមានរាងតូចច្រឡឹង អាចជិះបានគ្នា 3 នាក់រួមទាំងអ្នកបើកបរ ដែលល្បីពេញបណ្ដាញ Facebook កាលពីពេលកន្លងមកនេះត្រូវបានហាងលក់ម៉ូតូមួយនៅម្ដុំផ្សារទួលទំពូងបញ្ជាក់ឱ្យដឹងថា នឹងត្រៀមនាំចូលមកក្នុងទីផ្សារកម្ពុជា យើងនៅសប្ដាហ៍ក្រោយនេះហើយ។

តាមការបញ្ជាក់ពីម្ចាស់ហាងលក់ម៉ូតូ “បាយ័ន” បានប្រាប់អ្នកយកព័ត៌មានគេហទំព័រ ឡារ៉ែន តាមទូរស័ព្ទឱ្យដឹងថា ហាងលោកនឹងនាំចូលម៉ូតូប្រភេទនេះសម្រាប់ទីផ្សារខ្មែរយើងនៅសប្ដាហ៍ក្រោយនេះ។ លោកបន្តថា ម៉ូតូកង់បីនេះត្រូវបាននាំចូលពីប្រទេសចិន ដោយវាប្រើប្រាស់ភ្លើងអគ្គិសនី អាចសាកថ្មប្រើដូចទូរស័ព្ទ ឬកុំព្យូទ័រដូច្នោះដែរ។ ក្នុងនោះ វាអាចឱ្យយើងជិះបានគ្នា 3 នាក់ក្នុងរយៈចម្ងាយបានពី 50 ទៅ 60 គីឡូម៉ែត្រក្រោយពេលសាកអាគុយពេញម្ដងៗ។

លោកថ្លែងថា៖«ឥឡូវនេះ វាបានមកដល់1គ្រឿងហើយ សម្រាប់ឱ្យអតិថិជនសាកល្បង និងមកមើលផ្ទាល់ ប៉ុន្តែចំពោះថ្ងៃចេញលក់ជាផ្លូវការ ម៉ូតូនេះនឹងមកដល់ខ្មែរយើងនៅថ្ងៃទី10 ខែសីហា ខាងមុខនេះឯង»។

សម្រាប់ការមកដល់ទីផ្សារកម្ពុជា ម៉ូតូកង់3 ខាងលើនឹងត្រូវដាក់លក់ក្នុងតម្លៃប្រមាណជា 2,950 ដុល្លារ ដែលក្នុងពេលនេះ ប្រិយមិត្តអាចទៅមើលផ្ទាល់ដល់ហាង បាយ័ន ក្រោយទូតចិន៕

ក្រសួង​សេដ្ឋកិច្ច និង​ហិរញ្ញវត្ថុ និង​ធនាគារ​អភិវឌ្ឍន៍​ជនបទ​ បាន​ប្រកាស​កែប្រែ​លក្ខខណ្ឌ​ខ្លះ​ក្នុង​ការ​បើក​ផ្លូវ​ឱ្យ​រោង​ម៉ាស៊ីន និង​អ្នក​ទិញ​ស្រូវ​មាន​លទ្ធភាព​ទទួល​បាន​កម្ចី​បន្ថែម​សម្រាប់​ទិញ​ស្រូវ​សែនក្រអូប​ដើម្បី​រួម​ចំណែក​ក្នុង​ការ​ទប់​ស្កាត់​តម្លៃ​ស្រូវ​មិនឱ្យ​ធ្លាក់​ចុះ​​ខ្លាំង ខណៈ​ដែល​ការ​ប្រមូល​ផល​ស្រូវ​សែនក្រអូប​កាន់​តែ​ជិត​មមាញឹក​ខ្លាំង​។

ឯកឧត្តម​ទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ បាន​សរសេរ​លិខិត​មួយ​ទៅ​កាន់​សហព័ន្ធ​ស្រូវ​អង្ករ​កម្ពុជា​ថា រាជ​រដ្ឋាភិបាល​បាន​ទម្លាក់​កញ្ចប់​ថវិកា​ពិសេស​ចំនួន​ 20​លាន​ដុល្លារ និង​បូក​រួម​ថវិកា​បដិភាគ​របស់​រាជ​រដ្ឋាភិបាល​ចំនួន​ 7លាន​ដុល្លារ​ផ្សេង​ទៀត​សម្រាប់​ផ្តល់​ប្រាក់​កម្ចី​ដល់​រោង​ម៉ាស៊ីន និង​ក្រុម​អ្នក​ទិញ​ស្រូវ​សម្រាប់​ទិញ​ស្រូវ​នៅ​រដូវ​ប្រមូល​ផល​ខាងមុខនេះ។

ក្នុង​លិខិត​ដែលបាន​ចុះ​ថ្ងៃទី25 ខែកក្កដា ឆ្នាំ2017 បាន​លើក​ឡើង​ពី​ការ​ស្នើ​ទៅ​ធនាគារ​អភិវឌ្ឍន៍​ជនបទ​ក្នុង​ការ​​កែ​សម្រួល​លក្ខខណ្ឌ​ដើម្បី​ទទួល​បាន​កម្ចី​បន្ថែម ដោយ​យោង​ទៅ​លើ​ស្ថានភាព​ជាក់ស្តែង​នៃ​រោង​ម៉ាស៊ីន និង​ការ​ខ្វះ​ខាត​អចលន​ទ្រព្យ​សម្រាប់​ដាក់​បញ្ចាំ​ជា​ថ្នូរ​នឹង​ការ​ទទួល​បាន​កម្ចី​បន្ថែម។ លក្ខខណ្ឌ​ដែល​បាន​កែ​សម្រួល​គោល​ការណ៍​ផ្តល់​ឥណទាន​នោះ គឺ​ម្ចាស់​រោង​ម៉ាស៊ីន និង​ក្រុម​អ្នក​ទិញ​ស្រូវ អាច​យក​ស្រូវ​នាងខុន​ដែល​ស្តុក​ទុក​ក្នុង​​ឃ្លាំង​របស់​ខ្លួន​ច្រើន​នោះ យក​ទៅ​ធ្វើ​ជា​ទ្រព្យ​បញ្ចាំ​។

ថ្មីៗនេះ​ ​ធនាគារ​អភិវឌ្ឍន៍​ជនបទ បាន​បញ្ជាក់​ថា ម្ចាស់​រោង​ម៉ាស៊ីន និង​ក្រុម​អ្នក​ទិញ​ស្រូវ​បានមក​​ដាក់​ពាក្យ​ទទួល​យក​កម្ចី​សម្រាប់​ទិញស្រូវ​សែន​ក្រអូប​ដែល​ចាប់​ផ្តើម​ប្រមូល​ផល​ជា​បណ្តើរៗ​ហើយ​ ជា​ពិសេស​​​នោះគឺ​​ធនាគារ​អភិវឌ្ឍន៍​ជនបទ បាន​កែសម្រួល​លក្ខខណ្ឌ​ក្នុង​ការ​ទទួល​កម្ចី​បន្ថែម ដោយ​យក​ស្រូវ​នាងខុន​ក្នុង​ឃ្លាំង​របស់​ខ្លួន​សម្រាប់​ធ្វើ​ជា​ទ្រព្យ​បញ្ចាំ​តែ​ប៉ុណ្ណោះ។

មន្ត្រី​ធនាគារ​អភិវឌ្ឍន៍​ជនបទ បាន​អះអាង​ថា ខ្លួន​នឹង​ទម្លាក់​កម្ចី​ដល់​រោង​ម៉ាស៊ីន និង​អ្នក​ទិញ​ស្រូវ​ក្នុង​រយៈ​​ពេល​ត្រឹម​តែ​ពីរ​ថ្ងៃ បើសិន​បំពេញ​លក្ខខណ្ឌ​គ្រប់​គ្រាន់​ស្រប​តាម​គោលការណ៍​ឥណទាន​ដែល​អនុម័ត​ដោយ​ក្រុម​ប្រឹក្សា​ភិបាល​របស់​ធនាគារ​អភិវឌ្ឍន៍​ជនបទ។

ជាមួយ​ការ​កែប្រែ​លក្ខខណ្ឌ​ថ្មី​នេះ ម្ចាស់​រោង​ម៉ាស៊ីន​មួយ​ចំនួន​បាន​សាទរ​ចំពោះ​ការ​ទទួល​បាន​កម្ចី​បន្ថែម​សម្រាប់​ទិញ​ស្រូវ​សែន​ក្រអូប​នៅ​ពេល​ប្រមូល​ផល​នេះ។

លោក ហេង ផេង អនុ​ប្រធាន​សហព័ន្ធ​ស្រូវ​អង្ករ​កម្ពុជា ដែល​​ជា​ម្ចាស់​រោង​ម៉ាស៊ីន និង​ក្រុមហ៊ុន​ថ្មគោល រ៉ាយ នៅ​ខេត្ត​បាត់ដំបង បាន​អះអាង​ថា ការ​កែ​សម្រួល​លក្ខខណ្ឌ​នេះ​ពិត​ជា​ល្អ​សម្រាប់​រោង​ម៉ាស៊ីន ព្រោះ​រោង​ម៉ាស៊ីន​ដែល​មិន​មាន​ស្រូវ​សែន​ក្រអូប​ក្នុង​ស្តុក ​គាត់​អាច​យក​ស្រូវ​នាងខុន​ទៅ​ដាក់​ជា​ទ្រព្យ​ធានា​ដើម្បី​បាន​ទុន​បន្ថែម​ទៀត។

ទោះ​បី​ជា​យ៉ាង​ណា លោក ហេង ផេង នឹង​មិន​ស្វែងរក​ទុន​ពី​ធនាគារ​អភិវឌ្ឍន៍​ជនបទ​ក្នុង​រដូវ​កាល​នេះ​ទេ ព្រោះ​លោក​បាន​បម្រុង​ទុន​មួយ​ចំនួន​ដោយ​ប្រើប្រាស់​កម្ចី​ពី​ធនាគារ​ពាណិជ្ជ​សម្រាប់​ការ​ប្រមូល​ទិញ​ស្រូវ​សែន​ក្រអូប​​នៅ​ពេល​ខាង​មុខ​នេះ។

លោក ភូ វាសនា ម្ចាស់​រោង​ម៉ាស៊ីន អ៊ឹង វណ្ណម៉ៅនៅ​ខេត្ត​បាត់ដំបង ចាត់​ទុក​ការ​កែ​សម្រួល​លក្ខខណ្ឌ​ថ្មី​នេះ​ស្រប​ទៅ​នឹង​ស្ថានភាព​ជាក់​ស្តែង​របស់​រោង​ម៉ាស៊ីន ព្រម​ទាំង​បង្ក​លក្ខណៈ​ឱ្យ​រោង​ម៉ាស៊ីន​ទទួល​បាន​កម្ចី​បន្ថែម​សម្រាប់​បង្កើន​ការ​ទិញ​ស្រូវ។

លោក​បញ្ជាក់​ថា​៖“រោង​ម៉ាស៊ីន​ជា​ច្រើន​មាន​ស្រូវ​នាងខុន​ក្នុង​ឃ្លាំង ហើយ​ទុន​របស់​គេ​នៅ​ស្រូវ​នេះ​មួយ​ផ្នែក​ធំ ចឹង​ទេ​បើ​គាត់​ត្រូវ​ការ​ទុន​បន្ថែម​គាត់​ចាំបាច់​ត្រូវ​ប្រើ​ប្រាស់​ស្រូវ​នាងខុន​សម្រាប់​ជា​ទុន​បង្វិល”។ តាម​លោក ហេង ផេង នៅ​ដើមខែ​សីហា​នេះ តម្លៃ​ស្រូវ​នៅតែមាន​តម្លៃ​ប្រសើរ​ព្រោះ​ ស្រូវ​សែន​ក្រអូប​នៅ​មិថុនា មាន​តម្រូវការ​ខ្ពស់​សម្រាប់​ប្រើប្រាស់​ក្នុង​ស្រុក ហើយ​នៅ​គ្រប់​បណ្តា​រោង​ម៉ាស៊ីន មាន​តិចតួច​ណាស់​សម្រាប់​ប្រភេទ​ស្រូវ​នេះ។

បើយោង​តាម​សម្រង់​​តម្លៃ​ស្រូវ​របស់​សហព័ន្ធ​ស្រូវ​អង្ករ​កម្ពុជា បច្ចុប្បន្ន​នេះតម្លៃ​ស្រូវ​សែន​ក្រអូប​លក់​នៅ​តាម​ស្រែ​មាន​តម្លៃ​1,010​រៀល​ក្នុង​មួយ​គីឡូក្រាម។ តម្លៃ​នេះ​ប្រសើរ​ជាង​ពីរដង​បើ​ធៀប​នឹង​តម្លៃ​កាលពី​ពាក់​កណ្តាល​ខែ​កញ្ញា ​ឆ្នាំ2016 ពេល​ដែល​ប្រជា​កសិករ​ចេញ​តវ៉ា​ជា​លើក​ដំបូង​នៅ​ខេត្ត​បាត់ដំបង៕

ព្រះពុទ្ធសាសនាជាផ្នែកមួយយ៉ាងសំខាន់ដែលបានចាក់ឫសយ៉ាងជ្រៅនៅក្នុងសង្គម វប្បធម៌ និងផ្នត់គំនិតរបស់ប្រជាជនខ្មែរ។ ប្រព័ន្ធច្បាប់ បវេណី ទំនៀមទម្លាប់ ទស្សនទានក្នុងការដោះស្រាយបញ្ហា រួមទាំងគំនិតនានានៃក្បួនច្បាប់សំខាន់ៗរបស់កម្ពុជាសុទ្ធតែមាននូវផ្នត់គំនិតរបស់ព្រះពុទ្ធសាសនា ដែលបានផ្តល់គុណតម្លៃប្រកបដោយពុទ្ធិសម្រាប់អប់រំមនុស្ស។

បើគ្រាន់តែមើលនឹងភ្នែកធម្មតាយើងឃើញថាព្រះពុទ្ធសាសនាគ្រាន់តែជាផ្នែកមួយនៃសង្គមដែលអប់រំមនុស្សតាមវិធីធម្មតា តែបើយើងពិចារណាឱ្យបានដឹតដល់យើងនឹងឃើញថា ស្ទើរគ្រប់ផ្នែកនៃសង្គមសុទ្ធតែមានចំណែក ឬមានគ្រឹះមកពី ទស្សនទានព្រះពុទ្ធសាសនា។ ដំបូន្មាន និងវីធីសាស្រ្តដែលដកស្រង់ចេញពីវិស័យពុទ្ធចក្រ ត្រូវបានគេយកមកប្រើប្រាស់នៅក្នុងវិស័យអាណាចក្រដោយផ្ទាល់ និងដោយប្រយោលដើម្បីអភិវឌ្ឍសង្គមប្រកបដោយសុចរិតភាព និងសន្តិភាព។

សាស្រ្តាចារ្យ ព្រើន សុវង្ស ជាព្រឹទ្ធបុរសរង ពុទ្ធិកមហាវិទ្យាល័យវិទ្យាសាស្ត្រអប់រំ និងព័ត៌មានវិទ្យា ទទួលបន្ទុកដេប៉ាតឺម៉ត់ថ្នាក់ឆ្នាំសិក្សាមូលដ្ឋាន នៃពុទ្ធិកសាកលវិទ្យាល័យព្រះសីហនុរាជ បានលើកឡើងថា តាំងពីប្រវត្តិសាស្រ្តមកព្រះពុទ្ធសាសនាបានដើរតួនាទីយ៉ាងសំខាន់នៅក្នុងសង្គមដូចជាការរក្សាអក្សរសាស្រ្តឱ្យបានគង់វង្ស ការកសាងធនធានមនុស្សប្រកបដោយគុណភាព និងភាពស្មោះត្រង់ និងការបង្កើតគំនិតសន្តិភាពផ្នែកផ្លូវចិត្តដល់បុគ្គលទូទៅ រួមទាំងមានទស្សនទានអប់រំដល់អ្នកគ្រប់គ្រងដឹកនាំថែមទៀតផង។

លោកសាស្រ្តាចារ្យ ព្រើន សុវង្ស បានមានប្រសាសន៍ថា៖ «ព្រះពុទ្ធសាសនាបានដើរតួនាទីយ៉ាងសំខាន់លើផ្នែកសេដ្ឋកិច្ច និងសន្តិភាព»។

លោកសាស្រ្តាចារ្យបានបន្ថែមទៀតថា ការអប់រំតាមបែបពុទ្ធចក្រ និងអាណាចក្រត្រូវតែដើរទន្ទឹមគ្នា ព្រោះថាគោលដៅនៃការអប់រំមនុស្សលើគ្រប់ផ្នែកគឺការកសាងអំពើល្អ និងកិច្ចអភិវឌ្ឍសង្គមដូចគ្នា។ លក្ខណៈពិសេសនៃផ្នត់គំនិតអប់រំតាមបែបព្រះពុទ្ធសាសនាគឺ ការកសាងសុចរិតភាពក្នុងការធ្វើអាជីវកម្ម ការធ្វើការងារ រួមទាំងការអនុវត្តនូវសកម្មភាពនានាក្នុងសង្គម។

វិធីសំខាន់ៗដែលព្រះពុទ្ធសាសនាបង្រៀនមនុស្សគឺឱ្យអនុវត្តផ្លូវកណ្តាល ឱ្យរកស៊ីដោយសុចរិតភាព ឱ្យមានការខិតខំដោយត្រឹមត្រូវ មានការប្រកួតប្រជែងប្រកបដោយភាពស្មោះត្រង់ រួមទាំងវិធីសំខាន់ៗជាច្រើនផ្សេងទៀតដែលអាចរុញច្រានឱ្យបរិស្ថាននៃការធ្វើជំនួញ ឬជួយដល់វិស័យសេដ្ឋកិច្ចឱ្យកាន់តែមានភាពល្អប្រសើរ ក្នុងបរិស្ថានដ៏ល្អមួយ។ ក្រៅពីនេះ កត្តាមួយចំនួនដែលមានចែងក្នុងព្រះពុទ្ធសាសនា ក៏ស្របនឹងច្បាប់របស់កម្ពុជាផងដែរ នៅពេលដែលមនុស្សគោរពបានតាមទស្សនទានព្រះពុទ្ធសាសនា គាត់ក៏មិនបោកបញ្ឆោតដៃគូអាជីវកម្មរបស់ខ្លួន មិនប្រព្រឹត្តសកម្មភាពដែលក្បត់ទំនុកចិត្ត ឬមិនធ្វើការប្រកួតប្រជែងដោយមិនស្មោះត្រង់ដែលអាចជួយឱ្យគាត់ចេញផុតពីការផ្តន្ទាទោសនៃច្បាប់របស់រដ្ឋដូចគ្នា។

លើសពីនេះទៅទៀត បុគ្គលដែលបានទទួលការអប់រំពីទស្សទានព្រះពុទ្ធសាសនាភាគច្រើនជាមនុស្សដែលមានចរិយាធម៌ត្រឹមត្រូវទាំងកាយ វាចា និងចិត្ត ក្នុងផ្លូវល្អមួយប្រកបដោយសន្តិភាព។ ដូចដែលគ្រប់គ្នាសុទ្ធតែបានដឹងហើយថា កម្ពុជាត្រូវការការអភិវឌ្ឍប្រកបដោយស្ថិរភាព ហេតុនេះការអប់រំតាមបែបព្រះពុទ្ធសាសនាគឺមានសារៈសំខាន់ខ្លាំងណាស់សម្រាប់ការចូលរួមចំណែកសម្រេចបាននូវចំណុចសំខាន់ទាំងអស់នេះ។

អ្នកដែលទទួលបានការអប់រំតាមបែបព្រះពុទ្ធសាសនា មានសីល សមាធិ និងបញ្ញាល្អ ជាអ្នកដែលមានគំនិតរួមទាំងសកម្មភាពល្អក្នុងការរក្សានូវស្ថិរភាព និងសន្តិភាព ព្រោះពួកគាត់ជាអ្នកដែលអប់រំខ្លួនតាមរយៈសីលធម៌ និងគុណធម៌ជាគោល។ ពួកគាត់មានវិធីសាស្រ្តល្អក្នុងការរំលត់អធិករណ៍ ហើយមានឆន្ទៈក្នុងការដោះស្រាយបញ្ហានានាក្នុងការរស់នៅប្រកបដោយសន្តិវិធី ដែលគំរូល្អទាំងអស់នេះអាចរុញច្រានឱ្យសង្គមទាំងមូលមានការស្រឡាញ់គ្នា ស្វែងយល់ពីគ្នា ហើយជួយគ្នាដើម្បីអភិវឌ្ឍប្រកបដោយភាពស្ងប់សុខ ទាំងក្នុងជីវិតឯកជន និងសង្គម៕