Category: សង្គម និងសេដ្ឋកិច្ច

ភ្នំពេញ៖ ដើម្បីចូលរួមកែលម្អហេដ្ឋារចនាសម្ព័ន្ធ បម្រើដល់វិស័យដឹកជញ្ជូនឱ្យកាន់តែប្រសើរឡើង រដ្ឋាភិបាលជប៉ុនគ្រោងនឹងផ្តល់ជំនួយឥតសំណងសម្រាប់គម្រោងចំនួន2 នៅកម្ពុជា គឺគម្រោងធ្វើឱ្យល្អប្រសើរឡើងវិញនូវការការពារទឹកជំនន់ និងគម្រោងអភិវឌ្ឍន៍ចំណតកំពង់ផែកុងតឺន័រថ្មីរបស់កំពង់ផែស្វយ័តព្រះសីហនុ។

សេចក្តីជូនដំណឹងរបស់ក្រសួងការបរទេសឱ្យដឹងថា ការផ្តល់ជំនួយឥតសំណងនូវទឹកប្រាក់ចំនួន 244លានដុល្លារនេះនឹងធ្វើឡើងក្នុងអំឡុងពេលដែលប្រមុខរដ្ឋាភិបាលកម្ពុជា សម្តេចនាយករដ្ឋមន្ត្រី ហ៊ុន សែន ដឹកនាំប្រតិភូធ្វើទស្សនកិច្ចនៅប្រទេសជប៉ុនចាប់ពីថ្ងៃទី6 ដល់ថ្ងៃទី 9 ខែសីហា ឆ្នាំ2017នេះ។ ក្នុងអំឡុងពេលនៃទស្សនកិច្ចនេះនឹងមានជំនួបកំពូលជាមួយលោក ស៊ីនហ្សូ អាបេ នាយករដ្ឋមន្ត្រីជប៉ុន ហើយនឹងប្រកាសរួមគ្នាក្រោយនាយករដ្ឋមន្ត្រីទាំងពីររូបធ្វើជាអធិបតីក្នុងពិធីចុះហត្ថលេខាលើឯកសារចំនួន2ស្តីពីជំនួយឥតសំណងនេះ។

បើតាមសេចក្តីជូនដំណឹងដដែលថា ឯកសារទាំង2 ដែលនឹងត្រូវចុះហត្ថលេខានោះគឺ ទី1 ការចុះហត្ថលេខាលើការផ្តល់ជំនួយប្រមាណ35លានដុល្លារដើម្បីអនុវត្ត «គម្រោងធ្វើឱ្យប្រសើរឡើងវិញនូវការការពារទឹកជំនន់ក្នុងរាជធានីភ្នំពេញក្នុងដំណាក់កាលទី4» និងទី2 គឺការចុះហត្ថលេខាលើការផ្តល់ជំនួយ 209 លានដុល្លារសម្រាប់ «គម្រោងអភិវឌ្ឍន៍ចំណតផែកុងតឺន័រថ្មីរបស់កំពង់ផែស្វយ័តក្រុងព្រះសីហនុ»។

ជំនួយនេះត្រូវបានគេមើលឃើញថា ធ្វើឡើងដើម្បីធ្វើការអភិវឌ្ឍឱ្យប្រសើរឡើងលើវិស័យហេដ្ឋារចនាសម្ព័ន្ធបម្រើដល់ការដឹកជញ្ជូនទំនិញចេញចូលក្នុង និងក្រៅប្រទេស ខណៈដែលវិនិយោគិនបរទេស ពិសេសវិនិយោគិនជប៉ុនកំពុងសម្លឹងឃើញសក្តានុពលនៃការវិនិយោគនៅកម្ពុជា៕

បច្ចុប្បន្នពេលនឹកដល់ពិធីករប្រុសចេះនិយាយភាសាអង់គ្លេសគេតែងនឹកដល់ VJ តាប៊ុយ ប៉ុន្ដែគេហាក់មើលរំលងទៅលើសមត្ថភាពលោក អៀង វិច្ឆ័យ ជាពិធីករនៅប្រចាំស្ថានីយ៍ទូរទស្សន៍បាយ័នគ្រាដែលលោកប្រើប្រាស់ភាសាអង់គ្លេសក្នុងការនិយាយ និងបកប្រែបានយ៉ាងស្ទាត់ជំនាញដែរនោះ។

កន្លងមកគេធ្លាប់ឃើញលោក អៀង វិច្ឆ័យ បង្ហាញវត្ដមាននៅក្នុងកម្មវិធីនៃការប្រគំតន្រ្ដី ឬកម្មវិធីថ្នាក់ជាតិនានាក្នុងឋានៈជាពិធីករដែលប្រើប្រាស់តែខេមរៈភាសាប៉ុណ្ណោះ។ ហេតុនេះហើយទើបធ្វើឱ្យទស្សនិកជនដែលធ្លាប់ស្គាល់លោកមានការភ្ញាក់ផ្អើលជាមួយតារាសម្ដែង និងពិធីកររូបនេះជាខ្លាំងនៅពេលគេបានដឹងពីសមត្ថភាពរបស់លោកថា លោកអាចប្រើប្រាស់ភាសាអង់គ្លេសបានយ៉ាងល្អដែរនោះ។

លោក អៀង វិច្ឆ័យ បានបញ្ជាក់ប្រាប់ថា លោកចេះនិយាយភាសាអង់គ្លេសយូរណាស់មកហើយ តាំងពីលោកនៅជាពិធីករប្រចាំនៅស្ថានីយទូរទស្សន៍ប៉ុស្ដិ៍លេខ3មកម្លេះ។ គ្រាន់តែលោកមិនទាន់មានឱកាសបានធ្វើការងារពាក់ព័ន្ធនឹងភាសាអង់គ្លេសតែប៉ុណ្ណោះ។ ពិសេសបណ្ដាក្រុមហ៊ុននានា ក៏មិនបានដឹងថា លោកអាចប្រើប្រាស់ភាសាអង់គ្លេសបានដែរ។ ក្រោយពីមានក្រុមហ៊ុនមួយចំនួនបានដឹងថា លោកអាចនិយាយភាសាអង់គ្លេស និងបកប្រែភាសាបានទើបលោកចាប់ផ្ដើមមានទីផ្សារការងារជាបន្ដបន្ទាប់តែម្តង។

លោកបញ្ជាក់ថា៖«កាលពីដំបូងខ្ញុំរៀនភាសាអង់គ្លេសមិនបានគិតអ្វីវែងឆ្ងាយទេ គ្រាន់តែសង្ឃឹមថា នៅពេលចេះភាសាអង់គ្លេសវានឹងងាយស្រួលរកការងារធ្វើធម្មតាៗតែប៉ុណ្ណោះ។ តែពេលខ្ញុំ ចាប់អាជីពជាពិធីករទើបខ្ញុំដឹងថា ភាសាអង់គ្លេសពិតជាមានសារៈសំខាន់ខ្លាំងណាស់ក្នុងការទំនាក់ទំនង និងបង្កើតទីផ្សារការងារសម្រាប់ខ្លួនឯង»។

ខណៈកម្ពុជាបានពង្រីកពាណិជ្ជកម្មជាមួយក្រុមហ៊ុនបទេសជាច្រើន លោក អៀង វិច្ឆ័យ បានលើកឡើងថា ចំពោះភាសាអង់គ្លេសវាពិតជាសំខាន់ណាស់ ក្រៅពីភាសាជាតិយើងគួរតែចេះភាសាបទេសមួយទៀត មិនថាតែភាសាអង់គ្លេស ឬភាសាណាទេ។ ឱ្យតែចេះប្រាកដយើងនឹងងាយស្រួលរកងារធ្វើខ្លាំងណាស់៕

ភ្នំពេញៈ ជីវិតមិននៅមួយកន្លែងទេ ការរីកចម្រើននៃបច្ចេកវិទ្យា នឹងចូលរួមផ្លាស់ប្តូររបៀបនៃការរស់នៅ ដែលធ្វើឲ្យអគារសហកម្មសិទ្ធិនានានឹងទទួលបានផលប្រយោជន៍ពីបដិវត្តន៍ឧស្សាហកម្មនេះ។

លោកឧកញ៉ា នួន រិទ្ធី អគ្គនាយកក្រុមហ៊ុន Khmer Foundation Appraisalបានមើលឃើញពីនិន្នាការនៃការរស់នៅតាមអគារសហកម្មសិទ្ធិកើនឡើង ហើយលោកក៏បានវិនិយោគអាផាតមិនKFAដែរនោះបានថ្លែងឲ្យដឹងតាមទូរស័ព្ទនាព្រឹកថ្ងៃទី4 សីហានេះថា ការស្នាក់នៅតាមខុនដូ និងអាផាតមិនជាការសន្សំសំចៃពេលវេលា និងការចំណាយលើការធ្វើដំណើរ ព្រោះនៅពេលទីក្រុងកាន់តែធំ មនុស្សរស់នៅកាន់តែច្រើន ចរាចរណ៍កាន់តែចង្អៀតកកស្ទះ មនុស្សនឹងផ្លាស់ប្តូរផ្នត់គំនិតរបស់ពួកគេជាមួយនឹងភាពកាន់តែមមាញឹកក្នុងជីវិត ហើយពេលនោះបច្ចេកវិទ្យានឹងជួយសម្រួលដល់ការរស់នៅរបស់ពួកគេ។

លោកបន្តថា “ខុនដូ ឬអាផាតមិនមានទីតាំងនៅជិតសាលារៀន មន្ទីរពេទ្យ ភោជនីយដ្ឋាន ហាងកាហ្វេជាសេវាកម្មដែលផ្តល់ភាពងាយស្រួលសម្រាប់ការរស់នៅ”។ លោកបន្តថា “បដិវត្តន៍បច្ចេកវិទ្យាក៏ជួយមនុស្សបានច្រើនផងដែរ ដោយពួកគេអាចកុម្ម៉ង់អាហារ ទំនិញ និងសេវាកម្មដទៃទៀតតាមរយៈទូរស័ព្ទដៃបាន”។

វាជាអ្វីដែលគេហៅថា Express Service ដែលមានការរីកចម្រើននៅប្រទេសជឿនលឿនដូចជានៅប្រទេសកូរ៉េ សិង្ហបុរី និងប្រទេសរីកចម្រើនដទៃទៀត ហើយកម្ពុជាបាន និងកំពុងដើរតាមលំអាននេះសម្រាប់ការរស់នៅដោយភ្ជាប់ជាមួយនឹងបច្ចេកវិទ្យាដែលផ្តល់ឲ្យគុណភាពជីវិតកាន់តែប្រសើរឡើង។ នេះបើតាមឧកញ៉ានួន រិទ្ធី។

លោក សុវណ្ណ ដារា នាយកគ្រប់គ្រងទូទៅនៃក្រុមហ៊ុន GO –X បានថ្លែងថា កាលពី5ឬ10ឆ្នាំមុន បច្ចេកវិទ្យាមិនទាន់មានការរីកចម្រើននៅកម្ពុជាទេ ប៉ុន្តែពេលនេះអ្វីៗទាំងនោះកំពុងដំណើរការ និងចូលមកក្នុងជីវិតប្រជាជនកម្ពុជា ពិសេសយុវជនវ័យក្មេងដែលចូលចិត្តជីវិតបែបស៊ីវិល័យ។ លោកបន្តថា បច្ចេកវិទ្យាអាចភ្ជាប់ជាមួយទូរស័ព្ទដែលផ្តល់ឲ្យអ្នកប្រើប្រាស់មានភាពងាយស្រួលក្នុងការទទួលបានជីវិតកាន់តែប្រសើរឡើង និងបង្កើតការងារផងដែរ។

លោកបន្តថា “ឥឡូវនេះប្រជាជនអាចហៅម៉ូតូឌុប រ៉ឺម៉កកង់3 និងតាក់ស៊ីតាមទូរស័ព្ទដៃដោយគ្រាន់តែចូលកម្មវិធីណាមួយប៉ុណ្ណោះ”។ លោកបន្តថា “បច្ចេកវិទ្យាមិនត្រឹមតែជួយធ្វើឲ្យគុណភាពជីវិតប្រសើរឡើងនោះទេ តែក៏ចូលរួមបង្កើតការងារផងដែរ”។

យោងតាមការសិក្សារបស់ក្រុមហ៊ុន Urban Living Solution បានរកឃើញថា ចំនួនប្រជាពលរដ្ឋរស់នៅរាជធានីភ្នំពេញនឹងកើនដល់ជាង4លាននាក់នៅឆ្នាំ2030ដែលពេលនោះបច្ចេកវិទ្យាកាន់តែរីកចម្រើន ការកកស្ទះចរាចរណ៍កាន់តែខ្លាំង មនុស្សនឹងផ្លាស់ប្តូរផ្នត់គំនិតរបស់ពួកគេ ពិសេសយុវជនសម័យថ្មីនឹងសម្រេចចិត្តរស់នៅខុនដូកាន់តែច្រើន។

លោក ងួន ឆាយលាង អគ្គនាយកក្រុមហ៊ុន Ratanaka Realty បានថ្លែងថា បច្ចេកវិទ្យាថ្មីៗកាន់តែមានការរីកចម្រើននៅកម្ពុជាវានឹងផ្តល់ឲ្យមនុស្សរស់នៅកាន់តែប្រសើរតាមរយៈការប្រើប្រាស់សេវាកម្មនានា ដោយទាញយកផលប្រយោជន៍ពីបច្ចេកវិទ្យាជាជាងប្រើប្រាស់សេវាកម្មតាមបែបប្រពៃណី។ លោកបន្តថា នៅពេលបច្ចេកវិទ្យាកាន់តែរីកចម្រើន មនុស្សនឹងប្រមូលផ្តុំរស់នៅក្នុងទីក្រុងដែលមានសេវាកម្មគ្រប់បែបយ៉ាងជាជាងចេញទៅរស់នៅជាយក្រុងដែលមិនទាន់មានហេដ្ឋារចនាសម្ព័ន្ធរីកចម្រើន។

លោកបន្តថា “បច្ចុប្បន្នជម្រើសយុវជនវ័យក្មេងគឺ ខុនដូបន្ទាប់ពីរៀបការរួចពួកគេទិញខុនដូរស់នៅក្នុងលក្ខណៈជាគ្រួសារតូចមួយរបស់ពួកគេជាជាងរស់នៅជាមួយឪពុកម្តាយ ហើយវាមានទីតាំងនៅជិតកន្លែងធ្វើការងាររបស់ពួកគេទៀតផង”។

អ្នកវិនិយោគខុនដូ L Resident លោក ទុយ ប៊ុន បានថ្លែងថា ខុនដូរបស់លោកបានផ្តោតលើអ្នកមានជីវភាពមធ្យម និងគ្រួសារថ្មីថ្មោង។ ជាលទ្ធផលអ្នកទិញខុនដូក្នុងគម្រោងលំនៅដ្ឋានអឹលកម្ពុជា ភ្នំពេញ ភាគច្រើនមានអាយុ 35ឆ្នាំឡើង ពួកគេជាគូស្វាមីភរិយាថ្មីថ្មោងផងដែរ៕

គ្រប់អ្នកអានមិនអាចក្លាយជាអ្នកដឹកនាំ ឬបុគ្គលជោគជ័យនោះទេ តែ​គ្រប់បុគ្គលដែលមានដំណើរជីវិតល្អប្រសើរ ឬអ្នកដឹកនាំសុទ្ធតែជាអ្នកអាន។ គ្មានមនុស្សណាម្នាក់​អាចចៀសផុតពីការអានបាននោះទេ ព្រោះ​មនុស្សកើតមក​ត្រូវឆ្លងកាត់ការសិក្សារៀនសូត្រ ទោះក្នុងសាលាក្តី ក្រៅសាលាក្តី ការអាន​ជារឿងចាំបាច់​មួយដើម្បីទទួលយកចំណេះដឹង និងបទពិសោធជីវិតពីមនុស្សដែលធ្លាប់ឆ្លងកាត់រឿងរ៉ាវជាច្រើនដើម្បីទទួលបានឧត្តមភាព។

បទពិសោធជីវិត និងមេរៀនប្រកបដោយគុណតម្លៃជាច្រើនរបស់មនុស្ស​តែងតែត្រូវបានគេចងក្រងទុក​សម្រាប់​ធ្វើជា​ក្បួនច្បាប់សម្រាប់ការពិចារណា ឬសម្រាប់ទុកជាទុននៃគំនិតសម្រាប់មនុស្សជំនាន់ក្រោយ។ ហេតុនេះ ការអានអាចធ្វើឱ្យមនុស្សទទួលបាននូវ​មេរៀនជាច្រើនដែលគ្មានបង្រៀននៅក្នុងសាលា ហើយក៏ទទួលបាននូវ​ផ្នត់គំនិតរាប់មិនអស់ដើម្បីយកទៅអភិវឌ្ឍ​រាល់សកម្មភាព និងការគិតរបស់ខ្លួន​ដើម្បីក្លាយជាមនុស្សប្រកបដោយសក្តានុពលម្នាក់។

ពាក់ព័ន្ធនឹងបញ្ហានេះ លោក គីម ដារ៉ា ស្ថាបនិកគ្រឹះស្ថានអប់រំ Start Up Cambodia បានលើកឡើងថា មនុស្សដែលស្ថិតក្នុងភាពក្រីក្រភាគច្រើនបន្ទោសសង្គម បន្ទោសព្រេងវាសនា តែមិនព្រម​សិក្សាពីបុគ្គលជោគជ័យដែលគេធ្វើ។ បុគ្គលជោគជ័យ​តែងតែស្វែងរកគំនិតជាមុន ហើយខិតខំប្រឹងប្រែង​ពុះពារគ្រប់ឧបសគ្គ​ដើម្បីឱ្យគំនិតរបស់គេបានសម្រេច។

លោក គីម ដារ៉ា បាននិយាយថា៖ «មុននឹងបន្ទោសចំណុចក្រៅខ្លួននានា សូមគិតខ្លួនឯងទៅវិញមើលថា ខ្លួនអ្នកបានធ្វើអ្វីខ្លះហើយ? បើសូម្បីតែសៀវភៅមួយក្បាលមិនហ៊ានចំណាយលុយទិញ មិនទាំងចំណាយពេលអាន យើងនឹងមិនអាចប្រមូលផ្តុំគំនិតដើម្បីអភិវឌ្ឍខ្លួនឯងបាននោះទេ»។

លោកដារ៉ា បានបញ្ជាក់ថា ភាពជោគជ័យគឺចាប់ផ្តើមចេញពីខ្លួនឯង សូមឈប់បន្ទោសសង្គម ឈប់បន្ទោសវាសនា ហើយចាប់ផ្តើមពង្រឹងសមត្ថភាពរបស់ខ្លួនឯងតាមរយៈការអានពីឥលូវនេះដើម្បីបង្កើនសមត្ថភាពពីខាងក្នុងដើម្បីទទួលបានជោគជ័យក្នុងជីវិត។

បើតាម​លោក ដារ៉ា ការទទួលយកគំនិតពិតជាមានសារៈសំខាន់ខ្លាំងណាស់សម្រាប់ជីវិត ព្រោះថាការបន្តរៀនពីបទពិសោធល្អៗពីក្នុងសៀវភៅ​អាចជាពន្លឺយ៉ាងត្រចះត្រចង់ដើម្បីធ្វើឱ្យ​មនុស្សគ្រប់គ្នាអាចរកផ្លូវល្អសម្រាប់ខ្លួនឯងបាន ហើយ​ភាពជោគជ័យក្នុងជីវិតគឺកើតឡើងពីខ្លួនឯង។ គ្មានមជ្ឈដ្ឋានខាងក្រៅណាអាច​ជួយយើងបានទេប្រសិនបើយើងមិនព្យាយាមជួយខ្លួនឯងតាមរយៈការចាប់ផ្តើមខិតខំយ៉ាងអស់លទ្ធភាពដើម្បី​ទទួលយកគំនិត​ និងវីធីសាស្ត្រ​ល្អៗដាក់ក្នុងគំនិត៕