Category: សង្គម និងសេដ្ឋកិច្ច

ភ្នំពេញៈ រដ្ឋមន្រ្តីក្រសួងកសិកម្មបានថ្លែងថា ទិន្នផលស្រូវឆ្នាំនេះនឹងកើនឡើងលើសពី 10លានតោន ធៀបនឹងទិន្នផលដែលប្រមូលបានកាលពីឆ្នាំមុនតែប្រមាណជាង 9លានតោន។

លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទបានថ្លែងឲ្យដឹងកាលពីចុងសប្តាហ៍មុនថា ទិន្នផលស្រូវឆ្នាំនេះនឹងសម្រេចបានជាង10លានតោន ដោយសារទិន្នផលកើនឡើង និងការប្រើប្រាស់គ្រឿងចក្រពីប្រជាពលរដ្ឋបានកើនឡើងខ្ពស់ផងដែរ ពិសេសក្រសួងបាន និងកំពុងដាក់ចេញពូជស្រូវថ្មីគឺ ខា14 ខា15 និងខា16 ជាពូជស្រូវដែលទើបស្រាវជ្រាវរកឃើញដែលធន់នឹងជំងឺ និងធាតុអាកាស ពិសេសទទួលបានទិន្នផលច្រើន។

លោកបន្តថា “ការដាក់ចេញនូវគោលនយោបាយចាស់ និងសកម្មភាពថ្មីដោយសម្តេចតេជោ ហ៊ុន សែន កាលពីដើមឆ្នាំ2013 បានធ្វើឲ្យផ្ទៃដីកសិកម្មកើនឡើង ហើយការផលិតផលិតផលកសិកម្មក៏បានកើនឡើងខ្ពស់ដែរ រាប់ទាំងស្រូវ ដំឡូងមី ពោត និងកៅស៊ូជាដើម”។ លោកបន្តទៀតថា “ការកើនឡើងនូវផលិតផលកសិកម្មទាំងនេះបានធ្វើឲ្យលើសតម្រូវការទីផ្សារ ពិសេសការបញ្ជាទិញពីប្រទេសជិតខាងមានកម្រិតបានធ្វើឲ្យទិន្នផលកសិកម្មជាប់គាំង និងធ្លាក់ចុះតម្លៃដែលជាបញ្ហាមួយរបស់កសិករ”។

លោក វេង សាខុន បានបន្តថា ប្រទេសថៃ និងវៀតណាមជាទីផ្សារធំរបស់យើង ពួកគេមិនបានគិតថា ផលិតផលកសិកម្មរបស់យើងកើនឡើងខ្លាំងដូច្នេះឡើយ ទើបធ្វើឲ្យសមត្ថភាពទទួលយករបស់ពួកគេមានកម្រិតដែលធ្វើឲ្យទិន្នផលរបស់ពួកគេមិនអាចឆ្លើយតបបាននឹងការកើនឡើងយ៉ាងគំហុកនូវទិន្នផលកសិកម្មរបស់កម្ពុជា៕

ថ្មីៗនេះស្ថានីយ៍ទូរទស្សន៍ប៉ុស្តិ៍លេខ 3 បានចេញមកអះអាងហើយថា រឿងភាគទូរទស្សន៍ដ៏ល្បីល្បាញប្រចាំឆ្នាំ គឺរឿង ណាឃី វគ្គ 2 គឺមាន Yaya និង Nadech គ្រងតំណែងជាតួឯកក្នុងរឿងនេះ ក្រោមស្នាដៃដឹកនាំសម្ដែងរឿងដោយ លោក អហ្វ ផុងផាត់ វ៉ាត់ឈីរ៉ាក់បានចុងដដែល។

បន្ទាប់ពីព័ត៌មានពាក់ព័ន្ធនឹងរឿងតារាឯកក្នុងរឿង ណាឃី វគ្គ 2នេះត្រូវបានទម្លាយចេញមក បានធ្វើឱ្យអ្នកគាំទ្រទាំងឡាយនឹកស្មានមិនដល់ឡើយថា បានទៅលើតារាឯកប្រុសស្រីដូចជា Yaya និង Nadech នេះ តែគេទាំងពីរនាក់សុទ្ធតែជាតារាវ័យក្មេង និងមានសមត្ថភាពសម្ដែងកម្រិតកំពូល ហើយល្បីល្បាញដូចគ្នា និងដែលធ្លាប់ឡើងទទួលពានរង្វាន់រឿងភាគលេចធ្លោប្រចាំឆ្នាំជាច្រើនរង្វាន់រួចមកហើយ ព្រមទាំងធ្វើឱ្យអ្នកគាំទ្រមួយចំនួនទស្សន៍ទាយខុសទៀតផងថា ជាតារាឯកស្រី ផេនខេក។

ទីបំផុត នៅថ្ងៃទី6 ខែសីហា 2017 នៅលើបណ្ដាញសង្គមអ៊ីនស្ដាក្រាមរបស់ស្ថានីយ៍ទូរទស្សន៍ប៉ុស្តិ៍លេខ 3 ក៏បានបង្ហោះថា “តារាដែលនឹងគ្រងតំណែងជាតួឯកក្នុងរឿង ណាឃី វគ្គ 2 គឺ Yaya និង Nadech មិនមែនតារាឯកស្រី នាងតែវ ទេ “៕

ភ្នំពេញ៖ និន្នាការនៃការទទួលទានកាហ្វេនាសម័យកាលបច្ចុប្បន្ន ភាគច្រើនត្រូវបានគេងាកទៅរកកាហ្វេមានឈ្មោះល្បីដែលនាំ Franchise មកពីបរទេស។ ប៉ុន្តែដោយសារចង់លើកកម្ពស់ផលិតផលខ្មែរ និងចង់ផ្តល់កាហ្វេមានរសជាតិឈ្ងុញឆ្ងាញ់មិនចាញ់កាហ្វេក្នុងហាងទំនើបៗ ជូនកូនខ្មែរឱ្យបានទទួលទានគ្រប់ៗគ្នានោះ កូនខ្មែរម្នាក់បានសម្រេចចិត្តទិញម៉ាស៊ីនកិនកាហ្វេទំនើប និងគ្រាប់កាហ្វេល្អមកកិនលក់លើចិញ្ចើមផ្លូវ ហើយត្រូវបានអ្នកនិយមទទួលទានកាហ្វេតម្រង់ជួរគ្នាទិញឥតដាច់ជារៀងរាល់ថ្ងៃ។

បើគេធ្វើដំណើរតាមផ្លូវ57 កែង370 ខាងជើងផ្សារបឹងកងកងនោះ គេនឹងឃើញមានមនុស្សម្នាឈរជុំៗតម្រង់ជួរចាំទិញកាហ្វេយ៉ាងច្រើនកុះករ ហើយបើឃើញមួយភ្លែតស្មានតែមានអ្វីកើតឡើង ប៉ុន្តែទីនោះហើយគឺកន្លែងលក់កាហ្វេ បូតា (Bota Coffee) ដែលគេឃើញអ្នកលក់3-4នាក់កំពុងញាប់ដៃញាប់ជើងកិនកាហ្វេលក់ជូនអតិថិជន។

ឆ្លៀតពេលទំនេរដៃបន្តិច អ្នកនាង ធាម នារតី ម្ចាស់ហាងកាហ្វេបូតាលក់លើចិញ្ចើមផ្លូវខាងលើបានឆ្លៀតពេលសម្ភាសថា «ពិតជាមានមនុស្សច្រើនមែនបង ចាប់តាំងពីពេលបើកលក់ម៉ោង7.00នាទីព្រឹក គឺភ្ញៀវចាប់ផ្តើមមកបណ្តើរៗហើយ ហើយចន្លោះត្រឹមតែម៉ោង8.00ទៅម៉ោង9.00នាទីឡើងទៅ គឺភ្ញៀវមកកាន់តែច្រើនឡើងៗកិនកាហ្វេលក់សឹងមិនទាន់ឱ្យភ្ញៀវ ពេលខ្លះភ្ញៀវគាត់ប្រញាប់ មិនអាចរង់ចាំបានគាត់ក៏ជិះហួសទៅ រហូតដល់ទំនេរពីការងារទើបមកទិញវិញ ឬកុម្ម៉ង់ឱ្យយកទៅឱ្យតាមក្រោយក៏មាន»។

អ្វីដែលធ្វើឱ្យកាហ្វេតាមដងផ្លូវមួយនេះ ត្រូវបានអតិថិជនគាំទ្រច្រើនដូច្នេះ គឺដោយសារតែរសជាតិ និងក្លិនដ៍ឈ្ងុញឆ្ងាញ់នៃរសជាតិគ្រាប់កាហ្វេកិនឱ្យភ្ញៀវភ្លាមៗ មិនដូចកាហ្វេដែលគេកិនទុកយូរនោះទេ ឬកាហ្វេដែលមានសារធាតុគីមីមួយចំនួនដែលនិយមរុញលក់តាមរទេះនៅតាមដងផ្លូវផ្សេងៗ។ អ្នកនាង នារតី បន្តថា កាលដែលបើកលក់ដំបូងនោះហាក់មិនទាន់មានអ្នកស្គាល់ច្រើនភ្លាមនោះទេ គឺលក់ដាច់មួយៗទេ ប៉ុន្តែបន្ទាប់ពីសម្រិតសម្រាំងកែច្នៃរសជាតិបន្តិចម្តងៗទៅតាមការចង់បានរបស់អតិថិជនធ្វើឱ្យភ្ញៀវស្គាល់តៗគ្នាកាន់តែច្រើនឡើងៗហើយមកទិញច្រើនជារៀងរាល់ថ្ងៃមិនចាញ់កាហ្វេនាំចូលពីបរទេសនោះឡើយ។ គ្រាប់កាហ្វេដែលយកមកកិនលក់នេះ គឺជាកាហ្វេមណ្ឌលគិរី និងកាហ្វេរបស់កសិករនៅខេត្តស្ទឹងត្រែង លាយជាមួយនឹងគ្រាប់កាហ្វេឡាវផងដែរទើបធ្វើឱ្យរសជាតិកាហ្វេខ្មែរយើងមិនចាញ់រសជាតិកាហ្វេប្រ៊ែនដ៍នាំចូលពីក្រៅប្រទេសនោះទេ។

អ្នកនាងនារតីបន្តដូច្នេះថា «អ្វីដែលខ្ញុំមកកិនកាហ្វេលក់នេះ គឺចង់ផ្តល់ជូនអ្នកដែលមានប្រាក់ខែល្មមអាចមានលទ្ធភាពហូបកាហ្វេឆ្ងាញ់ដូចកាហ្វេហាងធំៗដែរ ដោយលក់ក្នុងតម្លៃសមរម្យត្រឹមតែ1ដុល្លារ មិនដូចកាហ្វេបរទេសក្នុងហាងទំនើបៗចាប់ពីជាង 2ដុល្លារឡើងទៅ បើសិនអ្នកមានប្រាក់ខែ500ដុល្លារក៏គាត់មិនអាចមានលទ្ធភាពហូបបានរាល់ថ្ងៃនោះដែរ»។ តាមពិតទៅការលក់តាមដងផ្លូវនេះ គឺដើម្បីកុំឱ្យមានការចំណាយច្រើន ចំណាយថ្លៃជួលហាងទំនើបធ្វើកន្លែងដេគ័រហាងល្អៗ ប្រសិនបើយើងចំណាយថ្លៃដើមច្រើន ក៏យើងលក់ថ្លៃទៅតាមនោះដែរមិនអាចលក់បានធូរថ្លៃដូច្នេះទេ។

អតិថិជនដែលទៅទិញកាហ្វេនៅទីនោះ មានគ្រប់វ័យ រាប់ទាំងពីសិស្សសាលា មនុស្សចាស់ វ័យកណ្តាល ប៉ុន្តែភាគច្រើនគឺជាអ្នកធ្វើការដោយគាត់មកទិញជាក្រុមការងារ អង្គុយជជែកគ្នាលេងពីនេះពីនោះ ជជែកការងាររបស់គាត់ លើសពីនេះអ្នកធ្វើការជាមន្រ្តីទូត ក៍គាត់មកកុម្ម៉ង់ទិញច្រើនដែរ ដោយកុម្ម៉ង់យកទៅកន្លែងគាត់ម្តងចាប់ពី5កែវទៅដល់10កែវក៏មាន។ ប៉ុន្តែមិនមែនសុទ្ធតែទទួលទានកាហ្វេទាំងអស់គ្នាទេ អ្នកខ្លះកុម្ម៉ង់កាហ្វេ អ្នកខ្លះកុម្ម៉ង់ផ្លែឈើក្រឡុក ដូចជាប៊័រក្រឡុក ទៀបក្រឡុក និងសូដាប៉ាស្យុងជាដើម។ល និងល។

នៅពេលសួរថា តើមួយថ្លៃលក់បានប៉ុន្មានកែវ? អ្នកនាងហាក់ស្ទាក់ស្ទើរក្នុងការឆ្លើយប្រាប់ ប៉ុន្តែថា ចាប់ពី100កែវឡើងទៅ។ ចុះបើមួយកែវតម្លៃមួយដុល្លារ មួយថ្ងៃគិតត្រឹមតែ100កែវ ក៍100ដុល្លារផងដែរ។ចំណាយផ្សេងៗថ្លៃជួលបុគ្គលិកលក់អស់ពាក់កណ្តាល ក៍នៅសល់ពាក់កណ្តាលដែរ ដែលចំណូលអ្នកធ្វើការក្នុងអូហ្វីសម៉ាស៊ីនត្រជាក់មួយចំនួនសុំខ្មាស។ ដោយសារមានអ្នកគាំទ្រច្រើនដូចនេះ ម្ចាស់ហាងកាហ្វេបូតានេះ គ្រោងនឹងបើកកន្លែងលក់មួយទៀតក្នុងពេលឆាប់ៗនេះ នៅម្តុំសាលារៀនសន្ធរម៉ុក៕

ភ្នំពេញ៖ ដើម្បីបង្កភាពងាយស្រួលដល់វិនិយោគិន ក៍ដូចជាអ្នកទេសចរក្នុងការធ្វើដំណើរទៅមករវាងប្រទេសទាំងពីរ ឥឡូវនេះចិនបានឯកភាពគ្នាជំរុញការតភ្ជាប់ជើងហោះហើរត្រង់ និងទៀងទាត់ពីក្រុងស៊ីអាន ខេត្តសាន់ស៊ីមកកាន់កម្ពុជា និងបានគាំទ្រគម្រោងវិនិយោគផលិតផលទេសចរណ៍នានារបស់អ្នកវិនិយោគខេត្តសាន់ស៊ីនៅលើទឹកដីកម្ពុជាផងដែរ។

កិច្ចព្រមព្រៀងនេះបានធ្វើឡើងក្នុងជំនួបរវាងឯកឧត្តម ថោង ខុន រដ្ឋមន្ត្រីក្រសួងទេសចរណ៍ក្នុងកិច្ចពិភាក្សាការងារជាមួយលោក Hu Heping អភិបាលខេត្តសាន់ស៊ីនៃសាធាណរដ្ឋប្រជាមានិតចិនលើគម្រោងវិនិយោគផលិតផលទេសចរណ៍នានារបស់អ្នកវិនិយោគខេត្តសាន់ស៊ីនៅលើទឹកដីកម្ពុជា។ កម្ពុជាក៏មានបំណងចង់បង្កើតឱ្យមានការរៀបចំជាស្ថានតំណាង ឬការិយាល័យទេសចរណ៍កម្ពុជាប្រចាំខេត្តសាន់ស៊ីដើម្បីជំរុញការផ្សព្វផ្សាយ និងសម្រួលដល់ភ្ញៀវទេសចរទាំងពីរប្រទេសដែលចង់ទៅមកទស្សនាកម្ពុជា និងចិន។

លោកអភិបាលខេត្តបានគាំទ្រ និងឯកភាពជំរុញឱ្យមានការហោះហើរត្រង់ និងទៀងទាត់ ដែលបច្ចុប្បន្នទើបតែមានការហោះហើរជាលក្ខណៈ Charter flight ប៉ុណ្ណោះ។ ព្រមជាមួយគ្នានោះដែរ លោកអភិបាលខេត្តក៏បានស្នើឱ្យក្រសួងទេសចរណ៍កម្ពុជា ជួយគាំទ្រគម្រោងវិនិយោគផលិតផលទេសចរណ៍នានាពីខេត្តសាន់ស៊ីមកកម្ពុជាផងដែរ។

ជាមួយគ្នានេះ ឯកឧត្តមរដ្ឋមន្ត្រី ថោង ខុន បានគូសបញ្ជាក់ពីការគាំទ្រ និងចូលរួមជានិច្ចរបស់កម្ពុជាចំពោះយុទ្ធសាស្ត្រ «ខ្សែក្រវាត់ និងវិថី» ដែលជាក្របខ័ណ្ឌនយោបាយឈ្នះ-ឈ្នះរបស់រដ្ឋាភិបាលចិនគ្របដណ្តប់លើកិច្ចសហប្រតិបត្តិការសេដ្ឋកិច្ចផ្លូវសូត្រ និងកិច្ចសហប្រតិបត្តិការផ្លូវសូត្រសមុទ្រសតវត្សរ៍ទី21។ លោកបានរៀបរាប់អំពីការីកចម្រើនរបស់វិស័យទេសចរណ៍កម្ពុជា ក្នុងនោះបានគូសបង្ហាញពីការត្រៀមដ៏ល្អរបស់កម្ពុជា ក្នុងកាទទួលទេសចរចិន (China-Ready) ទៀតផង៕