Category: សង្គម និងសេដ្ឋកិច្ច

វិធីងាយៗ 5យ៉ាងកាត់បន្ថយអាការឈឺធ្មេញ
នៅពេលឈឺធ្មេញ ពិតប្រាកដណាស់ច្បាស់ជាមានភាពវេទនាយ៉ាងខ្លាំង ព្រោះភាគច្រើននៅពេលដែលឈឺធ្មេញហើយ គឺនូវមានផលប៉ះពាល់ដល់ការឈឺពេញបរិវេណក្បាលថែមទៀត។ ដូច្នេះហើយទើបថ្ងៃនេះ ឡារ៉ែន បានពាំនាំនូវវិធីងាយ 5យ៉ាងក្នុងការបំបាត់អាការឈឺធ្មេញយ៉ាងមានប្រសិទ្ធភាពមកជូនមិត្តអ្នកអានទាំងអស់ ហើយធានាថាអាចជួយព្យាបាលអាការឈឺចាប់បានយ៉ាងប្រសើរ តើមានវិធីអ្វីខ្លះ? សូមអានទាំងអស់គ្នា។
1/ ចៀសវាងរបស់ដែលធ្វើឱ្យឈឺធ្មេញ
នៅពេលមានអាការឈឺធ្មេញ អ្នកគួរជៀសវាងទទួលទានរបស់មួយចំនួនដែលជាមូលហេតុ ឬជាអាហារដែលបណ្ដាលឱ្យមានអាការឈឺធ្មេញខ្លាំងឡើង ឧទាហរណ៍ដូចជា អាហារ និងភេសជ្ជៈដែលក្ដៅខ្លាំង ត្រជាក់ខ្លាំង មានរសជាតិប្រៃខ្លាំង ផ្អែមខ្លាំង និងជូរខ្លាំងជាដើម។
2/ លេបថ្នាំបំបាត់ការឈឺចាប់
ថ្នាំបំបាត់ការឈឺចាប់ ជាថ្នាំដែលបន្ថយការឈឺចាប់បានយ៉ាងល្អប្រសើរ មិនថាតែឈឺក្បាល ឬឈឺធ្មេញនោះទេ ដោយជាដំបូងអ្នកគួរតែសាកល្បងលេបថ្នាំ Paracetamol 500 mg ជាមុនសិន។ ប្រសិនបើអាការឈឺធ្មេញខ្លាំងមែនទែន អ្នកគួរតែប្ដូរថ្នាំបំបាត់ការឈឺចាប់ណាដែលមានឥទ្ធិពលខ្លាំងបន្ដិច ឬអាចលេបថ្នាំសម្រាប់បំបាត់
អាការឈឺធ្មេញតែម្ដងក៏បានដែរ ក៏ប៉ុន្ដែត្រូវប្រយ័ត្នចំពោះការលេបថ្នាំឱ្យមែនទែន ព្រោះថ្នាំប្រភេទខ្លះអាចហុចផលប៉ះពាល់ដល់សុខភាពរបស់អ្នកបានដូចគ្នា។
3/ ស្អំទឹកកក
ការម៉ាស្សា ឬស្អំទឹកកក អាចជួយបន្ថយអាការឈឺធ្មេញបានយ៉ាងប្រសើរ ដោយយកក្រណាត់ស្អាតស្ដើង ជ្រលក់ជាមួយទឹកកកមកស្អំនៅត្រង់បរិវេណដែលឈឺចាប់ ដែលការធ្វើបែបនេះនឹងជួយបំបាត់អាការរលាកអញ្ចញធ្មេញបានយ៉ាងមានប្រសិទ្ធភាព និងហុចផលឱ្យអាការឈឺចាប់ថយចុះមួយកម្រិត។
4/ ចៀសវាងការប៉ះទង្កិចត្រង់បរិវេណធ្មេញឈឺ
ព្រោះវាកាន់តែមានអាការឈឺចាប់ខ្លាំងនៅពេលដែលមានវត្ថុអ្វីមួយមកប៉ះទង្កិចជាមួយធ្មេញដែលកំពុងឈឺ ឬប្រើអណ្ដាតទៅប៉ះ ក៏មានភាពឈឺចាប់ទ្វេឡើងដែរ ទាំងនេះហើយទើបអ្នកគួរតែធ្វើយ៉ាងណាកុំឱ្យមានវត្ថុអ្វីមកប៉ះទង្គិចជាមួយធ្មេញដែលកំពុងឈឺ។
5/ យកកាកអាហារដែលជាប់នឹងប្រហោងធ្មេញ
ចេញហេតុផលដែលបង្កឱ្យកើតមានការឈឺធ្មេញ ក៏ដោយសារតែមានកាកសំណល់អាហារមួយចំនួនជាប់នឹងធ្មេញដែរ ដូច្នេះអ្នកគួរតែធ្វើការសម្អាតធ្មេញ និងព្យាយាមយកកាកអាហារដែលនៅជាប់នឹងធ្មេញរបស់អ្នកចេញឱ្យអស់ ដោយប្រើថ្នាំដុសធ្មេញដុសសម្អាតធ្មេញ ឬឆ្កឹះកាកអាហារចេញមកដោយប្រើអំបោសក៏បាន ប៉ុន្ដែអ្នកមិនត្រូវប្រើឈើចាក់ធ្មេញ ដើម្បីឆ្កឹះកាកអាហារចេញនោះទេ ព្រោះវាមានគ្រោះថ្នាក់ដល់អញ្ចញធ្មេញ និងអាចឆ្លងមេរោគបានថែមទៀតផង៕
August 9, 2017
គម្រោងលំនៅឋាននៅជិតផ្សារទំនើប Aeon 2 កំពុងរីកលូតលាស់ខ្លាំង
ខណៈដែលផ្សារទំនើបរបស់ជប៉ុន អ៊ីអន (Aeon) ទី2 និងផ្សារម៉ាក្រូរបស់ថៃ (Makro Cambodia) គ្រោងនឹងបើកដំណើរការអាជីវកម្មរបស់ខ្លួនក្នុងពេលឆាប់ៗខាងមុខនេះ គេសង្កេតឃើញមានគម្រោងអភិវឌ្ឍន៍លំនៅឋានជាច្រើនបានលេចឡើងជាបន្តបន្ទាប់នៅក្នុងតំបន់ក្បែរៗនោះ។
លោក ឈន់ សកល ប្រធានគ្រប់គ្រងទូទៅនៃគម្រោងលំនៅឋានបុរី ថៃ ឈុនគ្រី បានឱ្យដឹងថា ដោយសារការលក់លំនៅឋានក្នុងគម្រោងទី6 របស់ក្រុមហ៊ុនមានសន្ទុះលឿនលើសពីការគ្រោងទុករហូតដល់ជាង70% ទើបក្រុមហ៊ុនសម្រេចបើកលក់គម្រោងទី7 របស់ខ្លួនជាបន្តទៀត ដែលគម្រោងនេះមានទីតាំងស្ថិតនៅជិតផ្សារទំនើប Aeon 2 និងផ្សារ Makro តែម្តង។
បើតាមលោក សកល គ្រប់លំនៅឋានទាំងអស់របស់ក្រុមហ៊ុន គឺសុទ្ធតែត្រូវបានសិក្សាយ៉ាងលម្អិតទាំងផ្នែកគុណភាព សោភណភាព និងតម្លៃសមស្របតាមទំហំបច្ចេកទេស។ ហេតុនេះទើបមានអតិថិជនទិញច្រើនលើសពីការគ្រោងទុក ដែលតម្រូវឱ្យក្រុមហ៊ុនបញ្ចេញគម្រោង ឌី អូលេន ស៊ីធី ដំណាក់កាលទី2នេះ មុនការគ្រោងទុក។
ប្រធានគ្រប់គ្រងទូទៅនៃគម្រោង ខាងលើបាននិយាយថា៖“សម្រាប់គម្រោងដំណាក់កាលទី2 នេះក្រុមហ៊ុនបានបញ្ចេញផ្ទះលក់សរុបចំនួន 52ខ្នង ក្នុងទុនវិនិយោគចំនួន6លានដុល្លារ។ គម្រោងថ្មីនេះមានផ្ទះចំនួន2ប្រភេទ គឺ ស្សបហៅ និងមីនីវីឡាដែលមានទំហំធំទូលាយ និងមានតម្លៃចាប់ពីជាង 9ម៉ឺនដុល្លារឡើងទៅ”។
អ្នកស្រី អ៊ឹង ឆេងគីម ដែលជាអតិថិជនម្នាក់របស់បុរី ថៃ ឈុនគ្រី បាននិយាយថា៖ “ខ្ញុំមកទិញផ្ទះមួយក្នុងគម្រោងនេះដើម្បីទុកលក់យកប្រាក់ចំណេញ ព្រោះសម្រាប់អតិថិជនដែលមកទិញមុននឹងទទួលបានការបញ្ចុះតម្លៃពិសេស”។ អ្នកស្រី បានប្រាប់ទៀតថា អ្វីដែលធ្វើឱ្យអ្នកស្រីសម្រេចចិត្តទិញផ្ទះនៅទីនោះ ព្រោះវាជាទីតាំងល្អ បើទោះជានៅជាយក្រុងបន្តិចក្តី ប៉ុន្តែទីនោះមានបរិស្ថានខ្យល់អាកាសល្អ ពិសេសមានផ្សារទំនើបធំៗចំនួន2 កំពុងតែសាងសង់ត្រៀមបើកដំណើរការ។
លោក ទ្រី ម៉េងអាន អនុប្រធានគម្រោងបុរីវិមានភ្នំពេញ បានទទួលស្គាល់ថា គម្រោងដីធ្លី វីឡាផ្ទះល្វែង នៅតំបន់ក្បែរផ្សារទំនើបអ៊ីអន ទី2 ពិតជាមានការកើនឡើងខ្ពស់គួរឱ្យកត់សម្គាល់ ដោយគម្រោងផ្ទះវីឡារបស់បុរីវិមានភ្នំពេញ ដែលស្ថិតនៅខាងជើងផ្សារអ៊ីអនទី2 ប្រមាណជាង1គីឡូម៉ែត្រ គ្រាន់តែប្រកាសលក់មិនទាន់បានមួយឆ្នាំផង ត្រូវអតិថិជនទិញស្ទើអស់ដោយនៅសល់ប្រមាណ2% ប៉ុណ្ណោះ។ អ្វីដែលធ្វើឱ្យអតិថិជនគាំទ្រគម្រោងរបស់លោកខ្លាំង គឺដោយសារទី1 ជាតំបន់ប្រជុំជនថ្មីនៅជិតគម្រោងផ្សារទំនើបៗ មានបរិយាកាសល្អ ចំណែកគុណភាពសំណង់ និងសេវាកម្មសន្តិសុខក៏ល្អផងដែរ។
ក្រុមអ្នកជំនាញផ្នែកអចលនទ្រព្យសុទ្ធតែបានអះអាងថា បច្ចុប្បន្ននេះសកម្មភាពនៃការសាងសង់លំនៅឋាន ខុនដូ និងអគារពាណិជ្ជកម្មពិតជាកំពុងកើតមានច្រើនមែនក្នុងតំបន់នោះ តែទោះបីយ៉ាងណាពួកគេបញ្ជាក់ថា ការអភិវឌ្ឍហេដ្ឋារចនាសម្ព័ន្ធដូចជាផ្លូវថ្នល់ និងប្រព័ន្ធលូបង្ហូរទឹកហាក់មានភាពតូចចង្អៀតនៅឡើយ៕
August 9, 2017
វិធីបំបាត់មុន និងស្នាមលើផ្ទៃមុខ
មុន និងស្នាមដែលបន្សល់ទុកក្រោយកើតមុនគឺជាក្តីកង្វល់របស់នារីៗ ប៉ុន្តែសម្រាប់លេខនេះ ឡារ៉ែន ចង់ធ្វើឱ្យការព្រួយបារម្ភចំពោះបញ្ហានេះបាត់ពីផ្នត់គំនិតរបស់នារីៗទាំងអស់។ ដូច្នេះទស្សនាវដ្តីយើងចង់សុំឱ្យលោកអ្នកសាកល្បងវិធីសាស្ត្រនៃការបំបាត់ស្នាមមួយចំនួនដូចខាងក្រោម៖
ប៉េងប៉ោះ៖ សម្បូរទៅដោយវីតាមីន A និង C ដែលអាចជួយចិញ្ចឹម និងកម្ចាត់មុន ព្រមទាំងស្លាកស្នាមចោលយ៉ាងមានប្រសិទ្ធភាព។ ដោយគ្រាន់តែយកចំណិតប៉េងប៉ោះមកបិទពីលើទីតាំងដែលមានមុន ឬស្នាមរយៈពេល20-30នាទី រួចសឹមសម្អាតចេញដោយទឹកស្អាតជាការស្រេច។
ពោត៖ វាហាក់ខុសប្លែកពីវិធីមុនៗ ប៉ុន្តែអ្នកដឹងទេថា ពោតសម្បូរទៅដោយវីតាមីនA ដែលស្បែកត្រូវការ ដើម្បីរក្សាសំណើម ការពារភាពយារធ្លាក់ និងការកើតមុន។ ដំបូងអ្នកត្រូវសម្អាតផ្ទៃមុខរបស់អ្នកឱ្យស្អាត រួចជ្រើសរើសយកផ្លែពោតខ្ចីណាដែលនៅស្រស់ យកមកត្រដុសលើផ្ទៃមុខ រយៈពេល15-20នាទី ទើបជម្រះចេញឱ្យស្អាតដោយទឹកស្អាត។
ផ្នែកសនៃស៊ុត៖ វាជាសារធាតុផ្សំដ៏សំខាន់ក្នុងការថែរក្សា និងបន្ថែមភាពភ្លឺថ្លាដល់ស្បែកមុខ។ ផ្នែកសនៃស៊ុតក៏អាចកម្ចាត់មុន និងស្លាកស្នាមចេញពីផ្ទៃមុខផងដែរ។ ម៉ាសបិទមុខផលិតពីផ្នែកពណ៌សនៃស៊ុតគឺជាម៉ាសប្រភេទងាយៗ តែអាចសម្រួលដល់បញ្ហាផ្ទៃមុខយ៉ាងមានប្រសិទ្ធភាព។
តែ៖ ប្រសិនបើអ្នកចូលចិត្តទទួលទានទឹកតែ (តែខ្មៅ) សូមកុំបោះចោលកាកតែឱ្យសោះ ព្រោះថាកាកតែនៅអាចផ្តល់នូវគុណសម្បត្តិមួយទៀតគឺជួយថែរក្សាសម្រស់ស្បែកមុខរបស់អ្នក។ ដោយគ្រាន់តែសម្អាតផ្ទៃមុខរបស់អ្នកឱ្យស្អាតរួចយកកាកតែមកបំពោកលើផ្ទៃមុខ ឬកន្លែងដែលមានមុន ឬស្នាមមុន ទុកចោលប្រហែលជា 15នាទី រួចសម្អាតចេញឱ្យស្អាតជាការស្រេច។ អនុវត្តតាមវិធីណាមួយខាងលើឱ្យបាន2-3 ដងក្នុងមួយសប្តាហ៍ ហើយមិនយូរនោះទេអ្នកពិតជាបានឃើញពីលទ្ធផលជាមិនខាន។ សូមចាំថា ការព្យាបាលដោយវិធីនេះគឺត្រូវចំណាយពេលវេលាយូរបន្តិច ប៉ុន្តែប្រសិនបើអ្នកចង់ប្រញាប់ទទួលបានលទ្ធផលនោះ លោកអ្នកក៏អាចជ្រើស
ប្រើផលិតផលជំនួយក៏បាន ដូចជាប្រភេទថ្នាំបំបាត់ស្លាកស្នាមជាដើម៕
August 9, 2017
PTT ផ្តោតការវិនិយោគលើវិស័យប្រេងកាត និងឧស្ម័ននៅប្រទេសកម្ពុជា
ក្រសួងរ៉ែ និងថាមពល បានចាប់ដៃគូជាមួយក្រុមហ៊ុនប្រេងកាតជាតិរបស់ប្រទេសថៃ PTT ក្នុងកិច្ចខិតខំដើម្បីឈានទៅរកការធ្វើអាជីវកម្មរ៉ែប្រេងកាត និងឧស្ម័នក្នុងដែនសមុទ្រកម្ពុជា។
ចំណងកិច្ចសហប្រតិបត្តិការថ្មីនេះត្រូវបានធ្វើឡើងតាមរយៈអនុស្សរណៈយោគយល់គ្នាមួយដែលបានចុះហត្ថលេខា កាលពីថ្ងៃទី01 ខែសីហា ឆ្នាំ2017 រវាងអគ្គនាយកដ្ឋានប្រេងកាតនៃក្រសួងរ៉ែ និងថាមពល ជាមួយក្រុមហ៊ុនប្រេងកាតជាតិរបស់ប្រទេសថៃ PTT នាឱកាសត ដែលគណៈប្រតិភូនៃក្រសួងរ៉ែ និងថាមពល របស់កម្ពុជាបានទៅចូលរួមក្នុងកិច្ចប្រជុំស្តីពីវិស័យរ៉ែក្នុងតំបន់អាស៊ាននៅប្រទេសថៃ។
អនុស្សរណៈយោគយល់គ្នានេះនឹងពង្រឹងការអភិវឌ្ឍ និងចំណេះដឹងរបស់ប្រទេសកម្ពុជាក្នុងវិស័យប្រេងកាត គឺចាប់តាំងពីការស្វែងរក ចម្រាញ់ សុវត្ថិភាពក្នុងការដឹកជញ្ជូន និងការលក់ដូរ។ នេះបើតាមមន្ត្រីជាន់ខ្ពស់ក្រសួងរ៉ែ និងថាមពល។
អគ្គនាយកនៃអគ្គនាយកដ្ឋានប្រេងកាត និងជាអ្នកនាំពាក្យក្រសួងរ៉ែ និងថាមពល ឯកឧត្តម ជៀប សួរ បាននិយាយថា អនុស្សរណៈនេះបានធ្វើឡើងដោយអនុវត្តតាមខ្លឹមសារក្នុងក្របខណ្ឌកិច្ចសហប្រតិបត្តិការរួមដែលបណ្តាប្រទេសជាសមាជិកអាស៊ានបានបង្កើតឡើងរួមគ្នានូវក្របខណ្ឌវិស័យថាមពលនិងមានគោលបំណងសំខាន់ក្នុងកិច្ចសហប្រតិបត្តិការផ្លាស់ប្តូរបទពិសោធន៍ ការវិនិយោគ ការកសាងសមត្ថភាពបច្ចេកទេស ក្នុងវិស័យប្រេងកាត និងឧស្ម័ន ក្នុងតំបន់អាស៊ានទាំងមូល។
ឯកឧត្តម បានលើកឡើងថា នៅក្នុងក្របខណ្ឌនោះប្រទេសនីមួយៗតែងតែមានកិច្ចសហប្រតិបត្តិការទ្វេភាគីដោយឡែករៀងៗខ្លួនទៅតាមវិស័យ និងតាមតម្រូវការជាក់ស្តែង។ ក្រសួងមានមូលហេតុពីរសំខាន់សម្រាប់កសាងកិច្ចសហប្រតិបត្តិការជាមួយភាគីថៃ ពិសេសជាមួយក្រុមហ៊ុនជាតិថៃលើវិស័យប្រេងកាត។
ឯកឧត្តម ជៀប សួរ បញ្ជាក់ថា៖“មានមូលហេតុចម្បងពីរគឺ ទី1 ឧស្សាហកម្មប្រេងកាត និងឧស្ម័នរបស់ប្រទេសថៃគឺមានភាពចាស់ទុំជាយូរមកហើយពិសេសផ្នែកក្រោមដី (Downstream) និងទី2 ភាគីថៃមានចំណាប់អារម្មណ៍ចំពោះការដាក់ទុនវិនិយោគមកកម្ពុជាក្នុងវិស័យប្រេងកាត និងឧស្ម័ននេះដែរ”។
ឯកឧត្តម បានបន្ថែមថា៖“ការចុះអនុស្សារណៈនេះជាការបើកផ្លូវដើម្បីពង្រឹងកិច្ចសហប្រតិបត្តិការលើផ្នែកបច្ចេកទេសរវាងភាគីទាំងពីរ ទាំងការផ្លាស់ប្តូរបទពិសោធន៍ ការកសាងសមត្ថភាព បច្ចេកទេសជំនាញ ពាក់ព័ន្ធការគ្រប់គ្រងវិស័យប្រេងកាត និងឧស្ម័នផ្នែកខាងក្រោម។ វាក៏ជាការបើកឱកាសឱ្យមានការវិនិយោគទាំងភាគីកម្ពុជា និងភាគីថៃទៅលើវិស័យប្រេងកាត និងឧស្ម័ននេះទាំងនៅកម្ពុជា និងនៅប្រទេសថៃផងដែរ។
លោក បិន មនីមាលា នាយករងទទួលបន្ទុកកិច្ចការសាជីវកម្មប្រចាំក្រុមហ៊ុន PTT (Cambodia) Limited បានបដិសេធក្នុងការផ្តល់សេចក្តីអត្ថាធិប្បាយណាមួយ ដោយបានបង្វែរសំណួរនានាទៅកាន់ថ្នាក់ដឹកនាំក្រសួងរ៉ែ និងថាមពល។
ក្នុងរយៈពេលប៉ុន្មានឆ្នាំចុងក្រោយនេះ ក្រុមហ៊ុន PTT Plc ដែលជាក្រុមហ៊ុនប្រេង និងឧស្ម័នរដ្ឋរបស់ប្រទេសថៃ និងជាក្រុមហ៊ុនផ្គត់ផ្គង់ប្រេងនាំមុខមួយនៅកម្ពុជា បានពង្រីកអាជីវកម្មរបស់ខ្លួនយ៉ាងធំសម្បើមនៅកម្ពុជា ដោយពង្រីកការវិនិយោគ និងការផ្គត់ផ្គង់ប្រេងសាំង និងឧស្ម័ន តាមរយៈការបង្កើនស្ថានីយលក់ពីចំនួន20កន្លែងដល់65កន្លែង៕
August 9, 2017
Southampton ចុះហត្ថលេខាជាមួយ Lemina ក្នុងតម្លៃខ្លួន18លានផោន
ក្លិប Southampton បានបំបែកកំណត់ត្រានៃការផ្ទេររបស់ពួកគេដើម្បីបំពេញការចុះហត្ថលេខាជាមួយនឹងខ្សែបម្រើ Mario Lemina របស់ក្លិប Juventus ក្នុងតម្លៃខ្លួន18លានផោន (ស្មើនឹង23.36លានដុល្លារអាមេរិក)។ ជាមួយគ្នានេះដែរ Southampton ក៏បានរក្សាជំហររបស់ខ្លួនថា ខ្សែការពារ Virgil van Dijk នឹងមិនត្រូវបានលក់ចេញឡើយ។
Lemina បានទទួលការត្រួតពិនិត្យសុខភាព និងបានបំពេញលក្ខខណ្ឌផ្ទាល់ខ្លួនផ្សេងៗនៅឯ Southampton ក្នុងកិច្ចសន្យារយៈពេល5ឆ្នាំ ក្រោយពីរូបគេក៏ស្ថិតក្នុងគោលដៅរបស់ក្លិប Leicester City, Stoke City, Watford និង Arsenal ផងដែរ។ កីឡាករវ័យ23ឆ្នាំរូបនេះ គឺជាសមាជិករបស់ក្រុម Juventus ដែលបានឈ្នះពានក្របខ័ណ្ឌ Serie A និងពាន Coppa Italia ចំនួន2លើក ហើយរូបគេក៏បានចូលលេងក្នុងក្របខ័ណ្ឌ Champions League វគ្គផ្តាច់ព្រ័ត្រ កាលពីខែមិថុនា ពេលប្រកួតជាមួយនឹងក្រុម Real Madrid ផងដែរ។ រូបគេបានផ្ទេរទៅកាន់ក្លិប Juventus ក្នុងតម្លៃខ្លួន7.5លានផោនដោយចេញពីក្លិប Marseille កាលពីឆ្នាំ2015 និងបានស្ថិតក្រោមការអង្កេតរបស់ក្លិប Arsenal ប៉ុន្តែ មិនទទួលបានសំណើដេញថ្លៃឡើយ។ លោក Les Reed អនុប្រធានក្លិប Southampton បានឲ្យដឹងថា៖ «Mario គឺជាកីឡាករដ៏មានទេពកោសល្យអស្ចារ្យម្នាក់ដែលបានសម្រេចសមិទ្ធផលដ៏អស្ចារ្យមួយរួចស្រេចហើយក្នុងអាជីពរបស់គេ តាមរយៈការឈ្នះពានជាច្រើន និងបានទទួលបទពិសោធនៃការលេងក្នុងយុទ្ធនាការធំៗបំផុតជាច្រើនក្នុងពិភពកីឡាបាល់ទាត់»។
ក្រោយពីបំពេញការផ្ទេររបស់ខ្លួនរួចហើយ Lemina បាននិយាយថា៖ «ខ្ញុំពិតជារីករាយណាស់ក្នុងការបានចុះហត្ថលេខាជាមួយនឹង Southampton។ ខ្ញុំគិតថា វាជាគម្រោងដែលបានទាក់ទាញដល់ខ្ញុំបំផុត ហើយជាការសម្រេចចិត្តមួយដែលក្រុមគ្រួសាររបស់ខ្ញុំគាំទ្រ។ ខ្ញុំពិតជារីករាយណាស់ក្នុងការមកទីនេះ»៕
ប្រភពពី៖ The Telegraph
August 9, 2017
Isco ជួយឲ្យ Real ផ្តួល Man United ដើម្បីលើកពាន Super Cup
គ្រាប់បាល់ស៊ុតបញ្ចូលទីយ៉ាងល្អពីសំណាក់តារាឆ្នើម Isco បានបង្កើតឲ្យមានការប្រែប្រួល ខណៈដែលក្រុម Real Madrid បានសង្គ្រោះការវាយបកយ៉ាងខ្លាំងក្លារបស់ក្រុម Manchester United ដើម្បីកត់ត្រាជ័យជម្នះក្នុងលទ្ធផល 2-1 និងដើម្បីលើកពាន UEFA Super Cup ក្នុងរដ្ឋធានី Skopje របស់ប្រទេសម៉ាសេដ្វាន កាលពីថ្ងៃអង្គារ។
ខ្សែបម្រើ Casemiro បានជួយឲ្យក្រុមម្ចាស់ជើងឯកក្របខ័ណ្ឌកំពូលអឺរ៉ុបរកបានគ្រាប់បាល់នាំមុខមុននៅនាទីទី24 នៅរាត្រីនៃការប្រកួតក្នុងទីក្រុង Skopje ហើយ Isco បានបន្ថែមការនាំមុខរបស់ក្រុមខ្លួន ក្រោយពីចាប់ផ្តើមលេងបាន7នាទីក្នុងតង់ទី2 បន្ទាប់ពីការឱ្យបាល់ស៊ីយ៉ាងចង្វាក់គ្នាដ៏ល្អជាមួយនឹង Gareth Bale។
ប៉ុន្តែខ្សែប្រយុទ្ធអន្តរជាតិបែលហ្ស៊ិក Romelu Lukaku បានវាយបកមួយគ្រាប់វិញនៅនាទីទី56 ដើម្បីអបអរការបង្ហាញខ្លួនជាផ្លូវការជាលើកទី1របស់គេសម្រាប់ក្រុម Man United ជាមួយនឹងគ្រាប់បាល់ស៊ុតបញ្ចូលទី1គ្រាប់ មុននឹងឈានដល់ការប្រកួតបើករដូវកាលនៃក្របខ័ណ្ឌ Premier League នៅចុងសប្តាហ៍នេះ។
ជាមួយនឹងជ័យជម្នះនេះ ក្រុម Real របស់លោក Zinedine Zidane បានឈ្នះពាននេះជាលើកទី2ជាប់ៗគ្នារបស់ពួកគេ និងជាលើកទី8ហើយបើសរុបទាំងអស់។ វាជាលើកទី8ហើយក្នុងរយៈពេល9ឆ្នាំដែលក្លិបរបស់អេស្ប៉ាញបានឈ្នះពាន Super Cupនេះ។ ទោះបីជាយ៉ាងណា លោក Jose Mourinho បានពេញចិត្តទៅនឹងទម្រង់លេងរបស់ក្រុមលោក បើទោះបីពួកគេទទួលបរាជ័យក៏ដោយ។ គ្រូបង្វឹកនៃក្រុម Man United រូបនេះបានឲ្យដឹងថា៖ «យើងបានរកឃើញរបៀបលេងមួយដើម្បីធ្វើឲ្យមានការប្រែប្រួលក្នុងតង់ទី2 ធ្វើឲ្យពួកគេទទួលបានកម្រិតបាល់ទាត់ដែលពួកគេចង់បាន ហើយខ្ញុំពិតជាពេញចិត្តចំពោះការបញ្ចេញប្រតិកម្មរបស់យើង»។
លោក Mourinho បានបន្ថែមទៀតថា៖ «យើងមានឱកាសដ៏ធំមួយក្នុងការរកគ្រាប់បាល់បញ្ចូលទី ក្រោយពីពួកគេបាននាំមុខ 2-0 ហើយក្រោយពីការប្រកួតស្ថិតក្នុងលទ្ធផល 2-1 Rashford មានឱកាសលេងមួយទល់នឹងមួយជាមួយអ្នកចាំទីតែធ្វើមិនបានសម្រេច។ យើងបានប្រយុទ្ធរហូតដល់វិនាទីចុងក្រោយ ហើយការធ្វើបានបែបនេះ ខ្ញុំគិតថា វាពិតជាអស្ចារ្យណាស់»៕
ប្រភពពី៖ Sky Sport
August 9, 2017
សំរាមអាចកែច្នៃធ្វើជាជី និងថាមពលអគ្គីសនី ដូច្នេះកម្ពុជានឹងអស់ក្តីបារម្ភចំពោះរឿងនេះ
ភ្នំពេញ – សំរាមត្រូវបានគេចាត់ទុកថា ជាប្រធានបទក្ដៅមួយបន្ទាប់ពីបញ្ហាកកស្ទះចរាចរណ៍ និងស្ទះទឹកលូ ដែលអាចបង្កបញ្ហាដល់សង្គមកម្ពុជាទាំងមូល ។ បច្ចុប្បន្ន រាជរដ្ឋាភិបាលកម្ពុជាបាន និងកំពុងយកចិត្ដទុកដាក់ជាខ្លាំងក្នុងការរកដំណោះស្រាយលើបញ្ហាមួយនេះ។
ក្នុងដំណើរទស្សនកិច្ចរយៈពេល4ថ្ងៃនៅប្រទេសជប៉ុននាព្រឹកថ្ងៃទី8 ខែសីហា ឆ្នាំ2017 សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងគណៈប្រតិភូបានអញ្ជើញទៅទស្សនកិច្ចនៅរោងចក្រកែច្នៃសំរាម SHIN-KOTO INCINERATION PLANT ដែលគ្រប់គ្រងដោយ “អាជ្ញាធរសម្អាតទីក្រុងតូក្យូ” ដែលត្រូវបានទទួលការស្វាគមន៍យ៉ាងកក់ក្តៅដោយប្រធានអាជ្ញាធរលោក តៃជីរ៉ូ នីហ្សីកាវ៉ា។
នាឱកាសនោះសម្តេចតេជោនាយករដ្ឋមន្រ្តីបានស្នើឱ្យភាគីជប៉ុនសិក្សាជាមួយអ្នកជំនាញកម្ពុជាអំពីការកែច្នៃសំរាមនៅទីក្រុងភ្នំពេញ គ្រាដែលសំរាមកំពុងតែក្លាយជាចំណុចក្ដៅគគុក និងជាចំណុចចម្បងធំទីពីរបន្ទាប់ពីបញ្ហាកកស្ទះចរាចរណ៍នៅក្នុងរាជធានីភ្នំពេញ។
គួរបញ្ជាក់ថា អគាររោងចក្រកែច្នៃសំរាមនេះមានកម្ពស់6ជាន់ បំពាក់ដោយម៉ាស៊ីនកិនកម្ទេចសំរាម ហើយបែងចែកទៅតាមប្រភេទសំរាមនីមួយៗដែលផលិតចេញជាវត្ថុសម្រាប់ប្រើប្រាស់បានឡើងវិញ។ កាកសំណល់មួយចំនួនគឺយកទៅធ្វើជី និងបំប្លែងទៅជាថាមពលអគ្គីសនីសម្រាប់ប្រើប្រាស់ផងដែរ។ ដូច្នេះកម្ពុជាបច្ចុប្បន្នកំពុងតែត្រូវការរោងចក្របែបនេះជាចាំបាច់ដើម្បីកែច្នៃសំរាមដែលដឹកចេញទៅគរនៅជាយក្រុង។
តាមរយៈការស្នើសុំពីសំណាក់ថា្នក់ដឹកនាំរបស់កម្ពុជាទៅកាន់ភាគីជប៉ុន គេរំពឹងថា កម្ពុជានឹងអាចទទួលបានអគារកែច្នៃសំរាមបែបនោះក្នុងពេលឆាប់ៗ ដើម្បីធ្វើការកែច្នៃសំរាមនៅក្នុងទីក្រុងភ្នំពេញក៏ដូចជាប្រទេសកម្ពុជាទាំងមូល ដែលគេមើលឃើញថា វានឹងបានផ្ដល់ប្រយោជន៍ជាច្រើនដល់ប្រជាជនកម្ពុជាទាំងការរស់នៅប្រកបដោយផាសុកភាព ព្រមទាំងធ្វើឱ្យទីក្រុងភ្នំពេញកាន់តែមានភាពស្រស់បំព្រងថែមទៀត។ ទោះយ៉ាងណា គេក៏ត្រូវការការចូលរួមយល់ដឹងពីប្រជាជនកម្ពុជាផងដែរទៅលើការវេចខ្ចប់កាកសំណល់ ឬសំរាមទុកដាក់ឱ្យបានល្អ ទៅតាមចំណាត់ថ្នាក់នៃសំរាមបន្ទាប់ពីការប្រើប្រាស់រួច។
ទីភ្នាក់ងារសហប្រតិបត្តិការអន្តរជាតិជប៉ុន (JICA) បានរកឃើញថា ទីលានចាក់សំរាមក្នុងខណ្ឌដង្កោនឹងពេញនៅឆ្នាំ2020 ខណៈគម្រោងរណ្តៅសំរាមដ៏ធំមួយទៀតត្រូវបានគេរំពឹងថា អាចផ្ទុកសំរាមពេញនៅឆ្នាំ2033។ JICA បានអះអាងទៀតថា ក្នុងមួយថ្ងៃភ្នំពេញមានសំរាមចន្លោះពី1,850ដល់1,900តោន៕
August 9, 2017
Aum Pachrapa ទទួលពានរង្វាន់ តារាស្រីនាំមុខគេជាច្រើនឆ្នាំ
ត្រឡប់មកវិញជាថ្មីម្ដងទៀតជាមួយនឹងកម្មវិធីប្រកាសពានរង្វាន់កិត្តិយសសម្រាប់សិល្បៈថៃ ដែលមានឈ្មោះថា “มายามหาชน MAYA AWARDS 2017” ដែលលទ្ធផលសម្រេចទទួលបានពីការបោះឆ្នោតដោយប្រជាជនថៃទូទាំងប្រទេស និងនៅឆ្នាំនេះ ពិធីនេះត្រូវបានប្រារព្ធរៀបចំឡើងនៅក្នុងបរិវេណ Crystal Grand Ball Room ក្នុងទីក្រុង បាងកក។
ពិតជាមិនធម្មតាមែន ព្រោះមានតារាថៃជាច្រើនដួងទាំងជំនាន់ថ្មី ជំនាន់ចាស់បានចូលរួមយ៉ាងច្រើនកុះករ ហើយដើរបង្ហាញខ្លួននៅលើកម្រាលព្រំពណ៌ក្រហមដ៏អស្ចារ្យ។ ដោយឡែក តារាស្រីដែលទទួលបានពានរង្វាន់ជាច្រើនឆ្នាំ ហើយជាតារាស្រីលំដាប់ជួរមុខគេ និងមានតម្លៃខ្លួនខ្ពស់ជាងគេបំផុតនោះ គឺនាង អាំ ផាត់ឆារ៉ាផា (Aum Pachrapa)បានគ្រងតំណែងពានរង្វាន់ តារាស្រីនាំមុខគេក្នុងកម្មវិធី MAYA AWARDS 2017 នេះ។
គួរបញ្ជាក់ផងដែរថា ដំបូងឡើយទស្សនិកជនគ្រប់គ្នាបានគិតទុកជាមុនថា នៅក្នុងឆ្នាំនេះពានរង្វាន់សម្រាប់កំពូលតារាលេខមួយ គឺត្រូវបានទៅលើតារាឯកស្រី កុប ស៊ុវៈណាន់ (ផ្កាយព្រឹក) ប៉ុន្ដែលទ្ធផលបោះឆ្នោតពីប្រជាជនថៃទាំងអស់ បានសម្រេចបោះឆ្នោតឱ្យតារាស្រី Aum Pachrapa ឈ្នះក្នុងការប្រកួត ព្រមទាំងបានក្លាយជាកំពូលតារាលំដាប់ទី 1 ជាច្រើនឆ្នាំផងដែរ។
សូមទស្សនារូបភាពតារាថៃទាំងឡាយនៅក្នុងកម្មវិធីទាំងមូល ព្រមទាំងតារាស្រី Aum Pachrapa ខាងក្រោមនេះ៕
August 9, 2017
BIC ជាអ្នកភ្ញាស់បណ្តុំសហគ្រាសធុនតូច និងមធ្យមនៅកម្ពុជាឱ្យមានភាពរឹងមាំ
ភ្នំពេញ៖ ក្រសួងឧស្សាហកម្ម និងសិប្បកម្មបានសហការជាមួយសមាគមសហគ្រិនវ័យក្មេងកម្ពុជា សមាគមសហគ្រិនស្ត្រីកម្ពុជា សភាពាណិជ្ជកម្មកម្ពុជា និងអង្គការគំនិតផ្តួចផ្តើមអាជីវកម្មមេគង្គ(MBI)បង្កើតមជ្ឈមណ្ឌលព័ត៌មានអាជីវកម្ម(BIC) ពង្រឹងដល់ឧស្សាហកម្មខ្នាតតូច និងមធ្យមនៅកម្ពុជាឱ្យកាន់តែរឹងមាំ។
កម្មវិធីនេះទទួលបានការឧបត្ថម្ភពីធនាគារអភិវឌ្ឍន៍អាស៊ី(ADB), ជំនួយអូស្ត្រាលី WEG ,GMT , CAM-ASEAN ,LG,Manulife និងAdvanced Glory Logistic ដែលជួយជំរុញឱ្យមជ្ឈមណ្ឌលព័ត៌មានអាជីវកម្ម(BIC)ដំណើរការទៅប្រកបដោយជោគជ័យ។
ឯកឧត្តមទេសរដ្ឋមន្ត្រី ចម ប្រសិទ្ធ រដ្ឋមន្រ្តីក្រសួងឧស្សាហកម្ម និងសិប្បកម្ម បានលើកឡើងពីអត្ថប្រយោជន៍នៃការបង្កើត BIC ដោយបានសង្កត់ធ្ងន់ថា៖ BIC យើងអាចចាត់ទុកថាជាអ្នក ភ្ញាស់បណ្តុំសហគ្រាសធុនតូច និងមធ្យមឱ្យមានភាពរឹងមាំ និងមានលក្ខណៈប្រកួតប្រជែង ហើយក៏បានរួមចំណែកក្នុងការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា 2015-2025ផងដែរ។
BIC ក៍បានចូលរួមលើកកម្ពស់ប្រសិទ្ធភាព និងតម្លាភាពនៃការអនុវត្តច្បាប់ និងលិខិតបទដ្ឋានគតិយុត្តនានាពាក់ព័ន្ធ និងសហគ្រាសឯកជន។ ម៉្យាង BIC មិនមែនគ្រាន់ជាបណ្តុំព័ត៌មានអាជីវកម្មទេតែបានផ្តល់ជូននូវសេវាកម្មដូចជា៖ ការផ្តល់នូវការប្រឹក្សាផ្នែកហិរញវត្ថុ និងប្រព័ន្ធទិន្នន័យផ្តល់ការប្រឹក្សាលើដំណើរការអាជីវកម្ម និងភាពអនុលោមសម្រាប់ SMEs ដោយផ្តល់នូវសេវាផ្នែកពាណិជ្ជកម្ម និងជំនាញការសម្រាប់ពិភាក្សាការងារពាក់ព័ន្ធ និងSMEs។
ក្រៅពីនោះឯកឧត្តមទេសរដ្ឋមន្ត្រីបានបន្ថែមចំណុចជាគន្លឹះមួយចំនួនទៀត ធ្វើយ៉ាងណាជួយជ្រោមជ្រែងឱ្យ SMEs អាចរស់ដោយខ្លួនឯងបាន ហើយគួរដាក់បញ្ចូលចំណេះដឹងផ្សេងៗ ទាក់ទងនឹងផែនការអាជីវកម្ម ជំនាញទីផ្សារ ព័ត៌មានទីផ្សារ និងបញ្ជីប្រព័ន្ធគណនេយ្យជាដើម៕
August 9, 2017
CIMB ប្រកាសផ្តល់កម្ចីទិញផ្ទះក្នុងអត្រាការប្រាក់7.99%រួមនឹងការផ្តល់ជូនធានារ៉ាប់រងបន្ថែមទៀត
ភ្នំពេញ៖ ជាលើកដំបូងនៅក្នុងប្រទេសកម្ពុជា សម្រាប់អតិថិជនមានបំណងខ្ចីប្រាក់ពីធនាគារCIMBក្នុងការទិញផ្ទះដោយផ្តល់ជូនអត្រាការប្រាក់ត្រឹមតែ7.99% ប៉ុណ្ណោះក្នុងរយៈពេលមួយឆ្នាំ និងមានបន្ថែមជូនធានារ៉ាប់រងក្នុងទំហំទឹកប្រាក់50.000ដុល្លារដោយមិនគិតប្រាក់ថែមទៀត ដើម្បីពេលបាត់បង់មេគ្រួសារហើយ មិនបាត់បង់ដំបូលផ្ទះសម្រាប់អ្នកជាទីស្រលាញ់ក្នុងគ្រួសារថែមទៀត។
លោកស្រី ហេង ធីតា នាយិកាហិរញ្ញវត្ថុបុគ្គលរបស់ធនាគារ CIMB មានប្រសាសន៍ថា តាមរយៈផលិតផល HomePro សម្រាប់ផ្តល់ប្រាក់កម្ចីទិញផ្ទះនេះ អតិថិជនអាចទទួលបានផ្ទះក្នុងក្តីស្រមៃរួមទាំងសេវាធានារ៉ាប់រងអាយុជីវិតពីក្រុមហ៊ុន Manulife Cambodia ទៀតផង «គ្រួសាររបស់អ្នកទទួលឥណទាន នឹងទទួលបានកញ្ចប់ធានារ៉ាប់រងរហូតដល់ 50.000ដុល្លារអាមេរិក សម្រាប់ជួយកាត់បន្ថយប្រាក់កម្ចីរបស់ពួកគេ ក្នុងករណីមានគ្រោះថ្នាក់អ្វីមួយកើតឡើងជាយថាហេតុរហូតដល់មរណៈ ឬពិការទាំងស្រុងប្រកបការងារលែងបាន»។
ផ្អែកតាមការសិក្សានៅលើទីផ្សាបច្ចុប្បន្ន កញ្ចប់ធានារ៉ាប់រងអាយុជីវិត 50,000ដុល្លារអាមេរិក ក្នុងមួយឆ្នាំ ឬស្មើនឹង5,000ដុល្លារអាមេរិក ក្នុងរយៈពេល10ឆ្នាំ សម្រាប់អ្នកស្នើសុំដែលស្ថិតក្នុងវ័យកណ្តាល។ ហើយធនាគារCIMB ជឿជាក់ថា ផលិតផល HomePro នឹងទទួលបានការគាំទ្រយ៉ាងកក់ក្តៅពីសំណាក់អតិថិជននៅលើទីផ្សារប្រទេសកម្ពុជា ដោយមិនមែនត្រឹមតែជាផលិតផលឥណទានគេហដ្ឋានប៉ុណ្ណោះទេ តែវាថែមទាំងផ្តល់នូវគុណតម្លៃកាន់តែអស្ចារ្យ ទៅដល់អ្នកទទួលឥណទាន និងមនុស្សជាទីស្រឡាញ់ទៀតផង»។
ថ្លែងក្នុងពិធីចុះហត្ថលេខា រវាង CIMB និង Manulife Cambodia លោក ពន្លឺ តុលា នាយកគ្រប់គ្រងភាពជាដៃគូចែកចាយនៃក្រុមហ៊ុន មេនូ ឡាយហ្វ៍ ខេមបូឌា មានប្រសាសន៍ថា នេះជាគំនិតច្នៃប្រឌិតថ្មីបំផុតរបស់ធនាគារនៅកម្ពុជា។ ហើយថា CIMB ជាដៃគូដំបូងបង្អស់ដែលបានទិញធានារ៉ាប់រងពីក្រុមហ៊ុន Manulife Cambodia ដើម្បីផ្តល់ជូនទៅដល់អតិថិជនក្នុងការការពាររយៈពេល10ឆ្នាំ។
គួរបញ្ជាក់ថា ការផ្តល់សេវាធានារ៉ាប់រងអាយុជីវិតពីកម្មវិធីកម្ចីទិញផ្ទះ(HomePro)នេះ មានអត្រាការប្រាក់ 7,99% ក្នុងមួយឆ្នាំ ដែលមានទំហំធំរហូតដល់80% និងរយៈពេលឥណទានវែងរហូតដល់20ឆ្នាំ៕
August 9, 2017