ភ្នំពេញ – ដើម្បីឆ្លើយតបទៅនឹងតម្រូវការក៏ដូចជាប្រយោជន៍រួមសម្រាប់ប្រជាជនរស់នៅក្នុងក្រុងភ្នំពេញទៅលើការប្រើប្រាស់ផ្លូវថ្នល់ ថ្មីៗនេះរដ្ឋបាលសាលារាជធានីភ្នំពេញ បានដាក់ចេញនូវវិធានការក្តៅដើម្បីរៀបចំសណ្ដាប់ធ្នាប់សាធារណៈ និងដោះស្រាយបញ្ហាចរាចរណ៍។
ឈានចូលមកដល់ដើមខែសីហា ឆ្នាំ2017នេះ គេមើលឃើញថា រដ្ឋបាលរាជធានីភ្នំពេញបានដាក់ចេញនូវសេចក្តីណែនាំ និងវិធានក្ដៅស្ដីពីការដោះស្រាយបញ្ហាចរាចរណ៍ និងការរៀបចំសណ្ដាប់ធ្នាប់តាមដងផ្លូវនៅក្នុងភូមិសាស្ត្ររាជធានីភ្នំពេញ តាមរយៈការរៀបចំសណ្ដាប់ធ្នាប់សាធារណៈតាមដងផ្លូវ ដើម្បីកាត់បន្ថយការកកស្ទះ លើកកម្ពស់កិត្តិយសជាតិ និងកាត់បន្ថយបាននូវភាពអនាធិបតេយ្យតាមដងផ្លូវ ធ្វើយ៉ាងណាឱ្យការធ្វើដំណើរតាមដងផ្លូកាន់តែមានភាពល្អប្រសើរឡើង។
រដ្ឋបាលសាលារាជធានីភ្នំពេញ បានប្រកាសពីការជ្រើសយកផ្លូវសំខាន់ៗចំនួន11ខ្សែ ក្នុងរាជធានីភ្នំពេញ ធ្វើជាអាទិភាពគំរូ សម្រាប់អនុវត្តវិធានការដោះស្រាយចរាចរណ៍ និងរៀបចំសណ្តាប់ធ្នាប់សាធារណៈ មុននឹងបន្តអនុវត្តចំពោះបណ្តាទីតាំងផ្សេងៗទៀត។ ក្នុងនោះមាន មហាវិថីសហពន្ធ័រុស្ស៊ី ,មហាវិថីព្រះមុនីវង្ស , មហាវិថីកម្ពុជាក្រោម , មហាវិថីម៉ៅសេទុង , មហាវិថីព្រះសីហនុ និងមហាវិថីនេរុហ៍ , មហាវិថីព្រះនរោត្តម , មហាវិថីសម្តេចមុនីរ៉េត , ផ្លូវឧកញ៉ាទេពផន , មហាវិថីហ្សាលដឺហ្គោល ,មហាវិថីយោធពលខេមរភូមិន្ទ (ផ្លូវ271) និងផ្លូវឧកញ៉ាឃ្លាំងមឿង (ផ្លូវលេខ70) និងចុងក្រោយតីរវិថីព្រះស៊ីសុវត្ថិ។ ដោយការអនុវត្ដនោះត្រូវផ្ដោតលើគោលដៅសំខាន់3 គឺប្រជាពលរដ្ឋ និងម្ចាស់អាជិវកម្ម ការចូលរួមសហការពីគណៈបញ្ជាការខណ្ឌទាំង12 និងស្នងការដ្ឋាននគរបាល និងបញ្ជាការដ្ឋានកងរាជអាវុធហត្ថរាជធានីភ្នំពេញ។
តាមរយៈការអនុវត្ដនេះសាលារាជធានីភ្នំពេញ បានស្នើឱ្យបងប្អូនប្រជាពលរដ្ឋ គណៈបញ្ជាការគ្រប់ខណ្ឌ និងកងកម្លាំងមានសមត្ថកិច្ចចូលរួមអនុវត្តតាមសេចក្ដីណែនាំរបស់រដ្ឋបាលសាលារាជធានីភ្នំពេញឲ្យមានប្រសិទ្ធភាពខ្ពស់បំផុត។ ក្នុងនោះរដ្ឋបាលសាលារាជធានីភ្នំពេញបានកំណត់គោលដៅជាច្រើនប្រភេទដូចជាម្ចាស់លំនៅដ្ឋាន ម្ចាស់អាជីវកម្មដ្ឋាន មន្ទីពេទ្យ សាលារៀន វិស័យឯកជន អគារសាធារណៈ ម្ចាស់លំនៅដ្ឋាន និងអ្នកប្រើប្រាស់ផ្លូវថ្នល់ ដែលត្រូវអនុវត្ត មាន 5ចំណុច៖
1/ ហាមចតយានយន្តគ្រប់ប្រភេទលើទ្រូងផ្លូវ
2/ ហាមដាច់ខាតមិនឲ្យម្ចាស់ការដ្ឋានសំណង់គ្រប់ប្រភេទ ធ្វើការហ៊ុមព័ទ្ធការដ្ឋានលើចិញ្ចើមផ្លូវ លើសពី1/3 (មួយភាគបី) ឬប្រើប្រាស់ទ្រូងផ្លូវដើម្បីទុកសម្ភារសំណង់របស់ខ្លួន ដូចជា ដែក ខ្សាច់ ក្រួស ថ្ម ជាដើម។
3/ រថយន្តដឹកទំនិញធំៗ រថយន្តកុងតឺន័រ រថយន្តបាញ់បេតុង និងរថយន្តក្រឡុកស៊ីម៉ង់ត៍ ត្រូវចេញចូល គោរពតាមការណែនាំរបស់រដ្ឋបាលសាលារាជធានីភ្នំពេញ និងចៀសវាងការប្រើប្រាស់ទ្រូងផ្លូវក្នុងការលើកដាក់ ផ្ទេរទំនិញ និងបាញ់បេតុង។ ក្នុងករណីចៀសវាងមិនបាន ត្រូវអនុវត្តការលើកដាក់ទំនិញ និងការបាញ់បេតុងចាប់ពីម៉ោង 9យប់រហូតដល់ម៉ោង 6ព្រឹក។
4/ ការរៀបចំសម្ភារ ទំនិញ ម៉ូតូ និងរថយន្តដាក់តាំងលក់ អាចប្រើប្រាស់ចំណែកចិញ្ចើមផ្លូវបានត្រឹម1ភាគ3 ជាលក្ខណៈបណ្តោះអាសន្នតែប៉ុណ្ណោះ ដោយទុក 2ភាគ3 សម្រាប់ថ្មើរជើង និងបម្រើឱ្យការងារសណ្តាប់ធ្នាប់ និងចរាចរណ៍។
5/ រាល់ការប្រើប្រាស់ចិញ្ចើមផ្លូវធ្វើជាទីតាំងផ្ញើកង់ ម៉ូតូមិនត្រូវឱ្យលើសពី 1ភាគ3 ឡើយ។
ជាមួយគ្នានេះរដ្ឋបាលសាលារាជធានីភ្នំពេញក៏បានណែនាំដល់បញ្ជាការឯកភាពរដ្ឋបាលខណ្ឌទាំង12ឱ្យត្រូវតែអនុវត្តតាមមាន 5ចំណុច ៖
1/ ត្រូវចុះធ្វើការអប់រំណែនាំដល់ប្រជាពលរដ្ឋដែលបាន និងកំពុងប្រើប្រាស់ទ្រូងផ្លូវ និងចិញ្ចើមផ្លូវដោយរំលោភបំពាន ដោយប្រើប្រាស់វិធីសាស្ត្រទន់ភ្លន់តែម៉ឺងម៉ាត់ ឱ្យចូលរួមអនុវត្តតាមស្មារតីនៃសេចក្តីណែនាំនេះ។ ក្នុងករណីនៅតែមិនអនុវត្តតាមការណែនាំនេះ មន្ត្រីអនុវត្តន៍ត្រូវធ្វើកំណត់ហេតុ និងចាត់វិធានការតាមផ្លូវច្បាប់ជាធរមាន។
2/ ត្រូវណែនាំដល់ម្ចាស់ទីតាំងភោជនីយដ្ឋាន និងម្ចាស់ទីតាំងអាជីវកម្មនានាឱ្យគោរពតាមខ្លឹមសារនៃសេចក្តីណែនាំនេះ ក្នុងករណីពុំព្រមអនុវត្តតាមអាជ្ញាធរខណ្ឌត្រូវសហការជាមួយកម្លាំងមានសមត្ថកិច្ច និងជំនាញពាក់ព័ន្ធធ្វើការផាកពិន័យតាមច្បាប់ និងអាចឈានទៅបិទទីតាំងអាជីវកម្ម។
3/ ត្រូវធ្វើការណែនាំ និងធ្វើកំណត់ហេតុឱ្យបានត្រឹមត្រូវជាមួយម្ចាស់ការដ្ឋានដែលរំលោភបំពានទ្រូងផ្លូវ និងចិញ្ចើមផ្លូវ ក្នុងករណីមិនរាងចាលត្រូវផ្អាកការដ្ឋាននោះភ្លាម។
4/ ត្រូវចុះល្បាត និងឃ្លាំមើលជាប្រចាំចំពោះរថយន្តដឹកទំនិញធំៗ រថយន្តកុងតឺន័រ រថយន្តបាញ់បេតុង និងរថយន្តក្រទ្បុកស៊ីម៉ង់ត៍ និងត្រូវមានវិធានការឱ្យបានម៉ឺងម៉ាត់ក្នុងករណីការចេញចូលរាជធានីភ្នំពេញខុសពីសេចក្តីណែនាំរបស់រដ្ឋបាលសាលារាជធានីភ្នំពេញ។
5/ ត្រូវអនុវត្តការងារតាមការណែនាំខាងលើនេះឱ្យបានត្រឹមត្រូវហ្មត់ចត់ និងទន់ភ្លន់ និងត្រូវរាយការណ៍ប្រចាំសប្តាហ៍អំពីលទ្ធផលនៃការងារនេះមកគណៈបញ្ជាការឯកភាពរដ្ឋបាលសាលារាជធានីភ្នំពេញឱ្យបានទៀងទាត់ និងទាន់ពេលវេលា។
សម្រាប់ស្នងការដ្ឋាននគរបាល និងបញ្ជាការដ្ឋានកងរាជអាវុធហត្ថរាជធានីភ្នំពេញដែលត្រូវអនុវត្ត គឺមាន 2ចំណុច៖
1/ បន្ថែមកម្លាំងនគរបាលចរាចរណ៍ដោះស្រាយបញ្ហាចរាចរណ៍តាមគោលដៅដែលមានការកកស្ទះនៅចន្លោះម៉ោងមមាញឹកគឺម៉ោង7 និង30នាទី ដល់ម៉ោង8 និង30នាទី ម៉ោង11 និង30នាទីដល់ម៉ោង12 និង30នាទី និងម៉ោង17និង០០នាទីដល់ម៉ោង17និង3០នាទី។
2/ រៀបចំរថយន្តស្ទូចដើម្បីសហការជាមួយគណៈបញ្ជាការឯកភាពរដ្ឋបាលខណ្ឌទាំង12ដើម្បីអនុវត្តវិធានការច្បាប់។
រដ្ឋបាលសាលារាជធានីភ្នំពេញបានសង្កត់ធ្ងន់ថា បន្ទាប់ពីដាក់ចេញសេចក្តីណែនាំ គឺប្រជាពលរដ្ឋ គ្រឹៈស្ថានឯកជន ស្ថាប័នសាធារណៈ និងអ្នកប្រើប្រាស់ផ្លូវថ្នល់ទាំងអស់មានរយៈពេល 2សប្តាហ៍ដើម្បីធ្វើការសម្រួល និងរៀបចំទីតាំងរបស់ខ្លួនឱ្យស្របតាមការណែនាំ ហើយគ្រប់ភាគីពាក់ព័ន្ធត្រូវអនុវត្តសេចក្តីណែនាំនេះឱ្យមានប្រសិទ្ធភាពប្រកបដោយស្មារតីទទួលខុសត្រូវ៕
