សង្គម និងសេដ្ឋកិច្ច - La Reine Media

Lukaku បំពេញចិត្តលោក Mourinho នៅថ្ងៃបង្ហាញខ្លួនជាលើកដំបូងឲ្យ Man Utd

ខ្សែប្រយុទ្ធ Romelu Lukaku បានឆ្លើយតបចំពោះការទាមទាររបស់លោក Jose Mourinho ដែលថា រូបគេគួរតែក្លាយជាអ្នកដឹកនាំរបស់ក្រុម Manchester United នោះតាមរយៈការស៊ុតបាល់បញ្ចូលទី2គ្រាប់នៅថ្ងៃនៃការបង្ហាញខ្លួនក្នុងក្របខ័ណ្ឌ Premier League ជាលើកដំបូងរបស់គេក្នុងនាមជាកីឡាកររបស់ក្រុមបិសាចក្រហម ខណៈដែលពួកគេបានផ្តួលក្រុម West Ham United យ៉ាងចាស់ដៃក្នុងលទ្ធផល 4-០ នៅកីឡដ្ឋាន Old Trafford កាលពីថ្ងៃអាទិត្យ។

Lukaku បានរកគ្រាប់បាល់បើកឆាកនៅនាទីទី33 មុនពេលបន្ថែមការនាំមុខឱ្យក្រុម Man Unitedមួយគ្រាប់ទៀតនៅនាទីទី8នៃតង់ទី2។ ការរកគ្រាប់បាល់ស៊ុតបញ្ចូលទីបន្ថែមទៀតពីសំណាក់ខ្សែប្រយុទ្ធ Anthony Martial និងខ្សែបម្រើ Paul Pogba នៅនាទីទី87 និង9០ បានជួយឲ្យក្រុមរបស់លោក Mourinho ឡើងទៅឈរនៅលើកំពូលតារាង ដោយសារតែមានគ្រាប់បាល់ច្រើនជាងគេ។ បន្ទាប់មក Lukaku ដែលបានផ្ទេរមកពីក្លិប Everton ក្នុងតម្លៃខ្លួន75លានផោន (ស្មើនឹង96លានដុល្លារអាមេរិក) នោះបានប្រកាសថា រូបគេកំពុងតែឆ្លើយតបទៅនឹងការទទួលខុសត្រូវ និងបន្ទុកផ្សេងៗដែលលោក Mourinho បានដាក់លើស្មារបស់គេ។ ខ្សែប្រយុទ្ធវ័យ24ឆ្នាំរូបនេះបានឲ្យដឹងថា៖ «អ្នកចាត់ការទូទៅចង់ឲ្យខ្ញុំក្លាយជាអ្នកដឹកនាំម្នាក់សម្រាប់ក្រុមនេះ និងបង្កើតភាពអស្ចារ្យឲ្យបានច្រើនតាមដែលខ្ញុំអាច»។ Lukaku បានប្រាប់បន្តថា៖ «យើងបានធ្វើការងារដ៏លំបាកក្នុងពេលហ្វឹកហាត់ ហើយវាទទួលបានផលតបស្នងមកវិញ។ នៅពេលដែលអ្នកលេងឲ្យក្រុម Manchester United អ្នកមានការងារមួយក្នុងការធ្វើ ហើយការងាររបស់ខ្ញុំគឺការរកគ្រាប់បាល់បញ្ចូលទីឲ្យបានច្រើនបំផុត»។

Lukaku បានបន្ថែមទៀតថា៖ «វាគឺជាពាក្យសន្យា អ្នកគាំទ្រចង់ឃើញការប្រកួតបាល់ទាត់ដ៏គួរឲ្យទាក់ទាញ ហើយយើងត្រូវតែរក្សា និងធ្វើឲ្យបានល្អប្រសើរបែបនោះ។ ពួកគេនឹងរីករាយនៅថ្ងៃនេះ។ នេះវាគ្រាន់តែជាការចាប់ផ្តើមប៉ុណ្ណោះ។ យើងត្រូវតែរក្សាការធ្វើការតាមគម្រោងរបស់អ្នកចាត់ការទូទៅ»៕

ប្រភពពី៖ The Guardian

August 14, 2017

សុវណ្ណ មករា លេងឈឺៗដាក់ ហេង ឡុង និងចន ច័ន្ទលក្ខិណា

ថ្មីៗនេះអតីតតារាសម្ដែងល្បីឈ្មោះ សុវណ្ណ មករា បានវាយប្រហារលោក ហេង ឡុង និងអ្នកនាង ចន ចន័្ទលក្ខិណា ឈឺៗតែម្ដង។ ពាក្យឌឺដងគ្នាតាមរយៈបណ្ដាញសង្គមនេះបានធ្វើឱ្យមហាជនកំពុងមានការចាប់អារម្មណ៍ និងចង់ដឹងជាខ្លាំងថា តើរឿងហេតុនោះវានឹងទៅជាយ៉ាងណា?។

លោក សុវណ្ណ មករា បានសរសេរថា៖ «ឡុងអើយឡុង បើឡុងឯងជាមនុស្សប្រុសពិតមែន ត្រូវហ៊ានទទួលស្គាល់នូវអ្វីដែលឡុងឯង Share and Post កាលពីលើកទី1 កុំ Edit ច្រើនពេក ឬក៏ឡុងឯងយកចនច័ន្ទមកធ្វើជាខែលបិទបាំងភាពជាប្រុស និងមុខរបររបស់ឡុងឯង? ហើយរឿងមួយទៀតគឺរឿងប្រាក់មូលនិធិសិល្បៈ កុំថាគេមិនដឹងឲ្យសោះ កុំឱ្យលេចឮថា កិបកេងយកប្រាក់មូលិនិធិសិល្បៈទៅប្រើប្រាស់រឿងបំណុលផ្ទាល់ខ្លួនឱ្យសោះ ខ្ញុំគ្រាន់តែបារម្ភជំនួសក្នុងន័យមិត្តភាពប៉ុណ្ណោះSic »

បន្ទាប់ពីមានការលើកឡើងបែបនេះអ្នកនាង ចន ច័ន្ទលក្ខិណា ជាប្រធានសមាគមសិល្បៈខ្មែរក្នុងអាណត្ដិថ្មី ហាក់មានអារម្មណ៍មិនសូវស្រួលបានលេបខាយពាក្យសំដីទៅកាន់លោក សុវណ្ណ មករា ដែលគេមើលឃើញថា ពាក្យទាំងនោះហាក់បំណងនិយាយដៀមដាមដល់តារាសម្ដែងនោះថា ជាអ្នកបោកប្រាស់បងប្អូនជីដូនមួយរបស់នាង។

ទោះយ៉ាងណាលោក សុវណ្ណ មករា ក៏មិនបាននៅស្ងៀមដែរ ដោយបានបន្ថែមទៅទៀតថា៖ «អ្នកនាងចនច័ន្ទ អើយ អ្នកនាងចនចន្ទ័ តើត្រង់ណាទៅដែលថា ខ្ញុំបោកបងប្អូនជីដូនមួយរបស់អ្នកនាង ចនច័ន្ទឯងហ្នឹង? ទំនេរៗ មិនព្រមគិតមើលពីការងារសមាគមទេ ឥឡូវធុំក្លិនមិនស្រួលហើយឮថា លុយរៃអង្គាសរបស់សមាគមលើកមុនហ្នឹង បាត់អស់រលីងហើយឥឡូវហ្នឹង»។ ជាមួយនេះដែរក៏មានសារថ្មីបន្ដថា៖ «ផ្ដាំទៅចនច័ន្ទបន្តិច ដែលអ្នកឯងថា ខ្ញុំបោកបងប្អូនជីដូនមួយរបស់អ្នកឯងហ្នឹង ការពិតគាត់គឺជាអតីតភរិយារបស់ខ្ញុំដែលនៅប្រទេសហ្វាំងឡង់ ហើយមានតែគាត់ទេដែលដឹងច្បាស់ អ្នកឯងអាចសួរគាត់បាន ឮហើយឬនៅលោកស្រីប្រធានជាទីរាប់អាននៃខ្ញុំអើយ? ហើយរឿងមួយទៀតដែលលោកស្រីប្រធានចោទថា ខ្ញុំដើរបោកស្រីៗហ្នឹង បើលោកស្រីប្រធានមានពេលទំនេរ សូមអញ្ជើញពួកគាត់ទាំងអស់នោះមកជួបបន្តិចមើល តើមានអ្នកណាខ្លះ? ព្រោះខ្លួនខ្ញុំផ្ទាល់ ក៏មិនបានដឹងដែរ? ម្យ៉ាងវិញទៀត ខ្ញុំមិនដែលចង់ប៉ះពាល់លោកស្រីប្រធានឯងហ្នឹងទេ ខ្ញុំគ្រាន់តែចង់តបតជាមួយនឹងប្រុសកំពូលស្នេហ៏របស់លោកស្រីប្រធានតែប៉ុណ្ណឹងឯង ហើយជួយបកស្រាយប្រាប់ពីចម្ងល់ដែលខ្ញុំ និងអ្នកគ្រប់គ្នាសួររឿងប្រាក់មូលនិធិសិល្បៈដែលចាយវាយខុសទិសដៅនោះផងលោកស្រីប្រធាន????»

សង្រ្គាមពាក្យសំដីរវាងអតីតតារាសម្ដែងមានប្រជាប្រិយភាព និងលោកស្រីប្រធានសមាគមដែលបានកើតឡើងនេះ មិនទាន់មាននរណាហ៊ានកាត់សេចក្ដីថា អ្នកណាត្រូវ ឬអ្នកណាខុសនោះទេ?។ ផ្ទុយទៅវិញសាធារណជនជាច្រើនគ្រាន់តែចង់ដឹងថា តើការលើកឡើងខាងលើរបស់លោក សុវណ្ណ មករា វាអាចជាការពិតដែរឬទេ? ទោះជាយ៉ាងណាយើងមិនហ៊ានសន្និដ្ឋានថា បែបណានៅឡើយ យើងបានត្រឹមតែរង់ចាំមើលថា តើលោកហេង ឡុង ឬក៏អ្នកនាង ចន ច័ន្ទលក្ខិណានឹងមានប្រតិកម្មបែបណាខ្លះចំពោះការលើកឡើងនេះ ព្រោះវាអាចជះឥទ្ធិពលមិនល្អដល់ប្រជាប្រិយភាព និងកេរ្ដិ៍ឈ្មោះរបស់ខ្លួន៕

August 14, 2017

Neymar បង្កើតភាពអស្ចារ្យនៅថ្ងៃបង្ហាញខ្លួនលើកដំបូងឲ្យ PSG

ខ្សែប្រយុទ្ធ Neymar មិនបានខ្ជះខ្ជាយពេលវេលាក្នុងការបង្កើតភាពអស្ចារ្យភ្លាមៗនៅលើទីលានសម្រាប់ក្រុម Paris Saint-Germain ឡើយ ក្រោយពីរូបគេបានរកគ្រាប់បាល់បញ្ចូលទីក្នុងពេលក្រុមខ្លួនទទួលជ័យជម្នះ 3-0 នៅលើទឹកដីក្រុម Guingamp កាលពីថ្ងៃអាទិត្យ និងបានបញ្ជាក់ថា រូបគេមានអារម្មណ៍ថា ហាក់មានភាពរស់រវើកជាងមុន។

ខ្សែប្រយុទ្ធអន្តរជាតិប្រេស៊ីលរូបនេះ ត្រូវបានដាក់ឲ្យចូលលេងក្នុងជម្រើសទាំង11នាក់ដំបូង ដោយលោកគ្រូបង្វឹក Unai Emery សម្រាប់ការប្រកួតនៅទីក្រុង Brittany ក្នុងរយៈពេល2ថ្ងៃ ក្រោយពីបានទទួលលិខិតឲ្យធ្វើការងារសម្រាប់ការផ្ទេរក្នុងតម្លៃខ្លួនជាកំណត់ត្រាពិភពលោករបស់គេក្នុងទឹកប្រាក់ចំនួន 222លានអឺរ៉ូ (ស្មើនឹង261លានដុល្លារអាមេរិក) ពីក្លិប Barcelona រួចមក។ តារាឆ្នើមវ័យ 25ឆ្នាំរូបនេះដែលស្ថិតក្នុងសម្លៀកបំពាក់ពណ៌លឿងរបស់ក្រុម PSG នោះបានលេងក្នុងតួនាទីដ៏សំខាន់ក្នុងពេលកីឡាករ Jordan Ikoko បានធ្វើឲ្យបាល់ចូលទីខ្លួនឯងនៅដើមតង់ទី2។

បន្ទាប់មក រូបគេបានជួយឲ្យខ្សែប្រយុទ្ធ Edinson Cavani រកបានគ្រាប់បាល់ទី2សម្រាប់ក្រុមខ្លួន តាមរយៈការអូសបាល់ផុតខ្សែការពាររបស់ក្រុម Guingamp រួចបញ្ជូនបាល់បញ្ចូលទីយ៉ាងល្អមុនពេលបំពេញជ័យជម្នះដ៏កក់ក្តៅមួយសម្រាប់ក្រុមថ្មីរបស់ខ្លួនជាមួយនឹងគ្រាប់បាល់ទី3នៃក្រុមរបស់គេនៅជិតបញ្ចប់ការប្រកួត ខណៈដែល PSG បានកត់ត្រាជ័យជម្នះ2លើកពីការប្រកួតទាំង2លើកដំបូងរបស់ពួកគេក្នុងក្របខ័ណ្ឌរបស់បារាំង។ Neymar បានប្រាប់អ្នកយកព័ត៌មានថា៖ «មនុស្សជាច្រើនគិតថា ការចាកចេញពីក្លិប Barca នឹងធ្វើឲ្យស្លាប់ ប៉ុន្តែមិនមែនទេ វាផ្ទុយស្រឡះពីការគិតបែបនោះ។ ខ្ញុំមានភាពរស់រវើកជាងមុន។ ខ្ញុំអាចលេង ហើយខ្ញុំពិតជារីករាយណាស់។ កីឡាបាល់ទាត់មានលក្ខណៈដូចគ្នា ប៉ុន្តែមានតែប្រទេស ទីក្រុង និងក្រុមនេះប៉ុណ្ណោះដែលអាចផ្លាស់ប្តូរ»៕

ប្រភពពី៖ Sky Sport

August 14, 2017

កុំចោលសម្បកស៊ុតមាន់ ទុកបោកសម្លៀកបំពាក់បានសស្អាតដូចទិញថ្មី

តើលោកអ្នកដឹងដែរឬទេថា សម្បកស៊ុតមាន់មានអត្ថប្រយោជន៍អ្វីខ្លះ? ចាប់ពីថ្ងៃនេះទៅ សូមកុំបោះចោលសម្បកស៊ុតមាន់ឱ្យសោះ ព្រោះថាសម្បកស៊ុតអាចយកទៅច្នៃធ្វើជាម្សៅបោកសម្លៀកបំពាក់បានស្អាត ជាពិសេសគឺ សម្លៀកបំពាក់ដែលមានព័ណ៌សស្អាត ឱ្យមានសភាពភ្លឺរលាងដូចទិញថ្មីអ៊ីចឹង។ គន្លឹះល្អៗបែបនេះ គេហទំព័រ ឡារ៉ែន មិនអាចដឹងតែម្នាក់ឯងបានទេ តែនឹងជម្រាបជូនប្រិយមិត្តអ្នកអានឱ្យបានដឹងទាំងអស់គ្នាផងដែរ។

សម្បកស៊ុតមាន់ យើងអាចច្នៃជំនួសម្សៅសាប៊ូបោកខោអាវបាន ដោយវីធីរំលីងស៊ុតមាន់ឱ្យស្ងួតដើម្បីឱ្យចេញនូវសារធាតុ Calcium hydroxide ហើយបុកឱ្យម៉ដ្ឋ រួចលាយជាមួយទឹក បន្ទាប់មកប្រើជំនួសសាប៊ូម្សៅបោកខោអាវបានតាមធម្មតា ជាវិធីសាស្ត្រមួយដែលជួយសន្សំសំចៃថវិកាបានមួយចំណែកផងដែរ។

វិធីធ្វើ៖ យកសម្បកស៊ុតមាន់ដែលអ្នកបកហើយ 10-20 សម្បកទៅរំលីងនៅលើកម្តៅភ្លើងក្តៅឧណ្ហៗ រហូតដល់សម្បកស៊ុតទាំងនោះឡើងស្ងួត នឹងស្រួយផុយងាយស្រួលបុក បន្ទាប់មកបុកសម្បកស៊ុតរំលីងរួចនោះឱ្យម៉ដ្ឋក្លាយជាម្សៅ រួចដួសដាក់ក្រឡទុកប្រើសម្រាប់បោកសម្លៀកបំពាក់នៅថ្ងៃក្រោយទៀត៕

August 13, 2017

SME ថៃកំពុងតែចាប់អារម្មណ៍លើទីផ្សារនៅកម្ពុជាយ៉ាងខ្លាំង

ភ្នំពេញ- ខណៈមានក្រុមហ៊ុនធំៗជាច្រើនមកពីប្រទេសថៃកំពុងដំណើរការធ្វើពាណិជ្ជកម្មនៅក្នុងប្រទេសកម្ពុជា សហគ្រាសខ្នាតតូច -មធ្យម (SME)នៃប្រទេសថៃកំពុងតែចាប់អារម្មណ៍យ៉ាងខ្លាំងលើទីផ្សារមួយនេះ។

លោកស្រី ជីរ៉ាណាន់ វង្សមង្គល តំណាងពាណិជ្ជកម្មថៃ ប្រចាំខេត្ដសៀមរាប បានបញ្ជាក់នៅក្នុងឱកាសសន្និសីទកាសែតនាព្រឹកមិញថា បន្ទាប់ពីការធ្វើពាណិជ្ជកម្មរបស់ក្រុមហ៊ុនថៃជាច្រើនតាមរយៈការនាំយកនូវផលិតផលថៃដែលមានគុណភាពមកចែកចាយនៅក្នុងទីផ្សារកម្ពុជាទទួលបានជោគជ័យរហូតមានការនិយាយតៗគ្នាថា កម្ពុជាមានការគាំទ្រខ្លាំងទៅលើផលិតផលរបស់ប្រទេសថៃមកនោះ បានធ្វើឱ្យ SME នៃប្រទេសថៃកំពុងតែមានបំណងមកធ្វើពាណិជ្ជកម្មនៅក្នុងប្រទេសកម្ពុជាតាមរយៈការស្វែងរកដៃគូពាណិជ្ជកម្មផងដែរ។

តំណាងពាណិជ្ជកម្មថៃប្រចាំខេត្ដសៀមរាបបានបន្តថា ទាំងអស់នេះហើយដែលជាដើមចមបង្កើតឱ្យមានការរៀបចំធ្វើពិព័រណ៍ផលិតផលថៃ2017 ជាលើកទី2 នៅថ្ងៃ17-20 សីហាខាងមុខនៅមជ្ឈមណ្ឌលកោះពេជ្រឡើង ព្រោះមានសំណូមពរពីម្ចាស់ SME ដែលមានជាង200ក្រុមហ៊ុនស្នើសុំឱ្យយើងខ្ញុំរៀបចំពិព័រណ៍ជាលក្ខណៈឯកជនឡើង ដើម្បីផ្ដល់ឱកាសដល់ពួកគាត់ក្នុងការផ្សព្វផ្សាយផលិតផលពីតាមបណ្ដាខេត្ដដែលមានសក្ដានុពលមកពីប្រទេសថៃ។

ពិព័រណ៍ផលិតផលថៃ ឬThailand Products Expo 2017លើកទី2នេះមានការចូលរួមពីក្រុមហ៊ុនចំនួន200 និងមាន250ស្ដង់ ក្នុងនោះមានទំនិញដែលត្រូវបានរៀបចំចំនួន100ស្ដង់មកពីខេត្ដ Chanthaburi ក្រៅពីនេះមានការចូលរួមពីក្រុមហ៊ុននានាមកពីបណ្ដាខេត្ដជាច្រើនដទៃទៀតនៃប្រទេសថៃ។ ផលិតផលទាំងនោះមានដូចជា សម្ភារគ្រឿងសំណង់ គ្រឿងបន្លាស់ម៉ាស៊ីន អាហារ និងភេសជ្ជៈ សម្លៀកបំពាក់ និងវាយនភណ្ឌ សុខភាព និងសម្ផស្ស សម្ភារប្រើប្រាស់ក្នុងផ្ទះ និងសម្ភារផ្ទះបាយ វត្ថុអនុស្សាវរីយ៍ និងតុបតែងផ្ទះ និងទំនិញOTOP របស់ថៃជាច្រើនទៀត។

លោកស្រី ជីរ៉ាណាន់ វង្សមង្គល បញ្ជាក់ថា៖ «បច្ចុប្បន្នមិនមែនមានតែខេត្ដ Chanthaburi ទេដែលមានការចាប់អារម្មណ៍មកធ្វើពាណិជ្ជកម្មនៅក្នុងប្រទេសកម្ពុជា គឺមានខេត្ដដែលមានសក្ដានុពលជាច្រើនទៀតនៅតាមព្រំដែននៃប្រទេសកម្ពុជា និងខេត្ដឆ្ងាយៗពីព្រំដែន ដូចជាខេត្ដ រ៉ាក់យ៉ង ត្រាត ស៊ីសាកេត ជាដើមពួកគាត់សុទ្ធតែមានបំណងចង់មកចាប់ដៃគូពាណិជ្ជកម្មនៅក្នុងប្រទេសកម្ពុជា។ ពោលគឺពួកគាត់មានការតាំងចិត្ដខ្ពស់រហូតមានក្រុមហ៊ុនខ្លះមកធ្វើពិព័រណ៍នៅកម្ពុជា5ដងទើបចាប់បានដៃគូពាណិជ្ជកម្ម»។

តំណាងពាណិជ្ជកម្មថៃ ប្រចាំខេត្តសៀមរាប បន្ដថា បើទោះជាការតាំងពិព័រណ៍នេះត្រូវបានធ្វើជាលក្ខណៈឯកជនក៏ដោយប៉ុន្ដែទំនិញដែលនាំចូលមកសុទ្ធតែជាទំនិញមានគុណភាព និងត្រូវបានត្រួតពិនិត្យដោយក្រសួងពាណិជ្ជកម្ម និងឧស្សាហកម្មថៃទាំងអស់ ពិសេសនៅក្នុងប្រទេសកម្ពុជាក៏មានគណៈកម្មការត្រួតពិនិត្យលើគុណភាពមុននឹងឱ្យដាក់តាំងបង្ហាញដើម្បីផ្សព្វផ្សាយផងដែរ៕

August 12, 2017

តួស្រីក្នុងបទ «Despacito» តាមពិតគឺជាអតីត…អីចឹងបានជាស្អាតម្ល៉េះ!

«Despacito» ជាបទចម្រៀងដែលកំពុងល្បីល្បាញទូទាំងពិភពលោកនាពេលបច្ចុប្បន្ននេះ ដែលបទនេះ បកស្រាយជាភាសាអេស្ប៉ាញ និងច្រៀនដោយតារាចម្រៀងប្រុស Luis Fonsi និង Daddy Yankee ជាពិសេសគឺបទនេះបានជាប់ចំណាត់ថ្នាក់លេខរៀងកំពូលនៅក្នុងតារាង Billboard។

អ្វីដែលគេចាប់អារម្មណ៍ទៅលើបទចម្រៀងនេះគឺ តួស្រី ដែលមានរាងសិចស៊ី តូចច្រឡឹង ស្រស់ស្អាត និងទាក់ទាញ រហូតដល់ក្រុមអ្នកលេងបណ្ដាញសង្គមតើជាចម្ងល់ និងចង់ដឹងថា នាងគឺជានរណាគេ?

យោងតាមការចុះផ្សាយរបស់ Daily Mail បានឲ្យដឹងថា នាង Zuleyka Rivera គឺជាអតីតបវរកញ្ញា Miss Universe 2006 ជនជាតិព័រតូរីកូ មានវ័យ 29 ឆ្នាំ។ នៅឆ្នាំ 2006 នាងមានអាយុ 18ឆ្នាំ បានឈ្នះការប្រកួតបវរកញ្ញា Miss Universe Puerto ក៏ប៉ុន្ដែនាងបានក្លាយខ្លួនជាតារាបង្ហាញម៉ូដ ដែលមានសម្រស់ស្រស់ស្អាតជាងគេនៅក្នុងតំបន់អាមេរិកឡាទីនតាំងពីនាងមានវ័យ 14 ឆ្នាំមកម្ល៉េះ។

ចាប់តាំងពីនាងបានពាក់ម្កុដ Miss Universe 2006 មក នាងបានបាត់មុខពីសិល្បៈអស់រយៈពេលជាច្រើនឆ្នាំ រហូតមកដល់ឆ្នាំ 2013 នាងក៏បានចូលរួមប្រកួតកម្មវិធីប្រឡងរាំ Mira Quien Baila ហើយទទួលបានពានរង្វាន់ពីស្ថានីយ៍ទូរទស្សន៍ផងដែរ ក៏ប៉ុន្ដែនាងមិនត្រូវបានគេចាប់អារម្មណ៍ និងកត់សម្គាល់ថា ជាបវរកញ្ញាឡើយ។ លុះមកដល់ថ្ងៃទី12 ខែមករា ឆ្នាំ2017 នាងក៏បានបង្ហាញមុខជាថ្មីម្ដងទៀតនៅក្នុងបទចម្រៀងអេស្ប៉ាញខាងលើនេះ ទើបនាងត្រូវបានជនជាតិអេស្ប៉ាញស្គាល់អត្តសញ្ញាណច្បាស់តែម្តង។

គួរបញ្ជាក់ផងដែរថា តារាស្រីរូបនេះបានបញ្ចប់ការសិក្សានៅសាលា New York Acting School ហើយកំពុងមានអាជីពជាតារាសម្ដែងនៅក្នុងប្រទេសម៉ិកស៊ិកូ៕

August 12, 2017

បើត្រូវការកុំព្យូទ័រខ្លាំង អាមួយនេះអាចជាជម្រើសល្អរបស់អ្នក

សម្រាប់ប្រិយមិត្តដែលកំពុងសម្លឹងរកមើលកុំព្យូទ័រយួរដៃថ្មីមួយដែលមានសមត្ថភាពខ្លាំង រូបរាងស្អាតសមរម្យដើម្បីបំពេញការងារផ្នែកឌីហ្សាញ លេងហ្គេមធំៗ រួមទាំងការងារផ្សេងៗទៀតផងនោះ ថ្ងៃនេះឡារ៉ែនសូមណែនាំនូវកុំព្យូទ័រមួយរបស់ MSI ដែលមានអេក្រង់ទំហំ 17.3 អ៊ីញ និងប្រើ CPU ជំនាន់ទី7th មកបង្ហាញជូន។

កុំព្យូទ័រមួយនេះមានឈ្មោះថា MSI GE73VR 7RF RAIDER ដែលវាត្រូវបានក្រុមហ៊ុនបង្កើតឡើងសម្រាប់ Gamer ជាពិសេស ដោយវាត្រូវបានរចនារូបរាងឡើងដោយភាពស៊ីវីល័យ និងរឹងមាំជាមួយនឹងអេក្រង់ទំហំ17.3 អ៊ីញ UHD (3840×2160), IPS level panel, 100% Adobe RGB ដែលវាត្រូវបានផលិតឡើងយ៉ាងពិសេសបំផុតសម្រាប់បំពេញតាមតម្រូវការរបស់អ្នកដែលចូលចិត្តការលេងហ្គេមនៅលើកុំព្យួទ័រផ្ទាល់តែម្តង ធានាបាននូវក្រាហ្វិកច្បាស់ និងឌីហ្សាញ ព្រោះវាត្រូវបានបំពាក់នូវបច្ចេកវិទ្យាអេក្រង់ 4K ទ្រទ្រង់ជាមួយផលិតផល VR ងាយស្រួលក្នុងការលេងហ្គេមជាមួយគ្នាបានយ៉ាងរលូនតែម្តង។

កុំព្យួទ័រនេះបំពាក់នូវ CPU ជំនាន់ទីប្រាំពីរ 7th Gen. Intel® Core™ i7 processor, Ram DDR4-2400, 2 Slots, Max 32GB, Hard Disk ប្រភេទ M.2 SSD Combo (NVMe PCIe Gen3 / SATA)2 HDD1x 2.5″ SATA HDD, បន្ទះឈីបប្រភេទ Intel® HM175, អង្គក្រាហ្វិក Latest GeForce® GTX 1070 8GB GDDR5 ដែលជួយធ្វើឱ្យការប្រើប្រាស់បានគ្រប់កិច្ចការតែម្តង ពិសេសគឺសម្រាប់ការដំណើរហ្គេមបានយ៉ាងល្អគ្មានទាស់ចិត្តឡើយ និងបំពាក់ដោយថ្ម 6-Cell , 51 Whr។

ក្រៅពីនេះវាក៏មានប្រើនូវបច្ចេកវិទ្យា Cooler Boost 4 Technology, Nahimic 2 Sound Technology , Audio Boost 2 enhancing, True Color Technolog, Matrix Display supporting 4K ជាមួយនឹង Keyboard ប្រភេទ Per-Key RGB បញ្ចេញពន្លឺគ្រប់ពណ៌ និងទ្រទ្រង់ជាមួយនឹងប្រព័ន្ធប្រតិបត្តិការ Windows 10 Pro/Home៕

August 12, 2017

ក្រុមហ៊ុនកសិកម្មកូនខ្មែរដំបូង ទទួលបានវិញ្ញាបនបត្រស្តង់ដារគុណភាពពីអឺរ៉ុប

ភ្នំពេញ៖ ក្រុមហ៊ុនសហករណ៍សរីរាង្គខ្មែរដែលជាក្រុមហ៊ុនកសិកម្មមួយនៅក្នុងប្រទេសកម្ពុជា បានទទួលវិញ្ញាបនបត្របញ្ជាក់គុណភាពកសិកម្មសរីរាង្គស្តង់ដារសហគមន៍អ៊ឺរ៉ុបដែលជានេះជាវិញ្ញាបនបត្រដំបូងគេបង្អស់របស់កម្ពុជាសម្រាប់ដំណាំចម្ការបន្លែផ្លែឈើ។

ស្ថាបនិកក្រុមហ៊ុនសហករណ៍សរីរាង្គខ្មែរ លោក អៀង សុធារ៉ា មានប្រសាសន៍ថា ដោយមើលឃើញថា បញ្ហាបន្លែផ្លែឈើមានជាតិគីមីជាបញ្ហាដែលប្រជាពលរដ្ឋខ្មែរ កំពុងប្រឈមចំពោះបញ្ហាសុខភាពទៅថ្ងៃអនាគតនោះ ក្នុងនាមលោកជាស្ថាបនិកក្រុមហ៊ុនខាងលើបានរួមចំណែកក្នុងការលើកកម្ពស់ធ្វើកសិកម្មបែបសរីរាង្គ។ លោកបន្តថា ក្រុមហ៊ុនលោកបានចំណាយធនធាន និងពេលវេលាច្រើនឆ្នាំក្នុងការស្នើសុំវិញ្ញាបនបត្រសរីរាង្គស្តង់ដារអឺរ៉ុបនេះដើម្បីបង្កើនទំនុកចិត្តអតិថិជន។ វិញ្ញាបនបត្រសរីរាង្គស្តង់ដារអឺរ៉ុបនេះត្រូវបានផ្តល់ទៅលើបន្លែ និងផ្លែឈើចំនួន58ប្រភេទក្នុងកសិដ្ឋាន2កន្លែងរបស់ក្រុមហ៊ុនសហករណ៍សរីរាង្គខ្មែរ គឺកសិដ្ឋានរមណីយដ្ឋានពិកនិកតាមបណ្តោយផ្លូវជាតិលេខ 4 ក្នុងខេត្តព្រះសីហនុ និងកសិដ្ឋាន Eco-Agri Farm ស្ថិតក្នុងស្រុកស្រែអំបិល ខេត្តកោះកុង។

លោក អៀង សុធារ៉ា អះអាងថា ដើម្បីជំរុញការធ្វើកសិកម្មសរីរាង្គ ក្រុមហ៊ុនលោកនឹងបន្តធ្វើការផ្សព្វផ្សាយ បណ្តុះបណ្តាល និងជំរុញការអនុវត្តកសិកម្មសរីរាង្គតាមបែបកិច្ចសន្យាជាមួយកសិករផ្ទាល់។ លោកថា ការទទួលបានវិញ្ញាបនបត្រសរីរាង្គស្តង់ដាអឺរ៉ុបនេះ នឹងជួយលើកកម្ពស់សេដ្ឋកិច្ចគ្រួសារកសិករ ព្រមទាំងរួមចំណែកថែរក្សាសុខភាពប្រជាពលរដ្ឋកម្ពុជាទៀតផង។

លោក គ្រី សុជាតិ ប្រធានផ្នែកអភិវឌ្ឍន៍អាជីវកម្មនៅក្រុមហ៊ុន Control Union ដែលជាស្ថាបនិកវាយតម្លៃ និងចេញវិញ្ញាបនបត្រសរីរាង្គខាងលើមានប្រសាសន៍ថា មុននឹងផ្តល់វិញ្ញាបនបត្រសរីរាង្គស្តង់ដារអឺរ៉ុបទៅឱ្យក្រុមហ៊ុនសហករណ៍សរីរាង្គខ្មែរ ក្រុមហ៊ុនលោកបានត្រួតពិនិត្យវាយតម្លៃ និងឆ្លងកាត់បែបបទសំខាន់ៗជាច្រើនដំណាក់កាល ទាំងការវាយតម្លៃរៀបចំឯកសារនៅក្រុមហ៊ុន និងនៅកសិដ្ឋានផ្ទាល់។

លោក ទែន រ៉ា ទីប្រឹក្សាបច្ចេកទេសស្តង់ដារអង្គការអាល្លឺម៉ង់ GIZ ដែលបានចូលរួមជួយគាំទ្រក្រុមហ៊ុនសហករណ៍សរីរាង្គខ្មែរដើម្បីទទួលបានវិញ្ញាបនបត្រស្តង់ដាសរីរាង្គនេះ បានឱ្យដឹងថា GIZ មានគម្រោងមួយដែលធ្វើការលើស្តង់ដាពាណិជ្ជកម្មស្បៀងអាហារក្នុងតំបន់អាស៊ីអាគ្នេយ៍។ គម្រោងនេះអនុវត្តនៅក្នុងប្រទេសចំនួន5ក្នុងតំបន់អាស៊ីរួមទាំងកម្ពុជាផងដែរ។

ការផ្តល់វិញ្ញាបនបត្របញ្ជាក់គុណភាពស្តង់ដារខាងលើ ដោយយោងផងដែរទៅលើក្រុមហ៊ុនដែលបានចូលរួមលើកកម្ពស់ការបរិភោគបន្លែ និងផ្លែឈើសរីរាង្គជូនដល់ប្រជាពលរដ្ឋក្នុងតម្លៃសមរម្យ។ ក្រៅពីនេះក្រុមហ៊ុនក៏បានផ្តល់ជាសម្ភារបច្ចេកទេស និងចំណេះដឹងសំខាន់ៗជាច្រើនដល់បណ្តាកសិករនៅតាមបណ្តាខេត្តនានាដើម្បីអាចមានលទ្ធភាពដាំដំណាំបានដោយខ្លួនឯង។ លើសពីនេះការអនុវត្តនូវការដាំដុះបែបសរីរាង្គនេះ គឺវាជួយថែរក្សាបរិស្ថានឱ្យមាននិរន្តរភាពផងដែរ។

គួរបញ្ជាក់ថា បន្លែផ្លែឈើសរីរាង្គ និងបន្លែផ្លែឈើធម្មជាតិមានរសជាតិ និងវីតាមីនមិនដូចគ្នានោះទេ ហើយការដាំដុះ និងថែទាំវិញក៏មិនដូចគ្នាដែរ។ ការដាំដុះបែបសរីរាង្គគឺជាការដាំដុះមួយដែលអ្នកបច្ចេកទេសត្រូវត្រួតពិនិត្យទាំងទីតាំងដីដែលត្រូវដាំដុះ ការដាក់ជីសរីរាង្គ និងថ្នាំពុលសរីរាង្គជាដើម។ ដូច្នេះហើយទើបធ្វើឱ្យបន្លែផ្លែឈើសរីរាង្គមានរសជាតិ និងសារធាតុចិញ្ចឹមច្រើនជាងបន្លែផ្លែឈើធម្មជាតិ។ រីឯការដាំដុះតាមបែបធម្មជាតិវិញ គឺពុំមានការគិតគូរពីទីតាំងដែលត្រូវបានដាំដុះនោះទេ ពោលគឺដូចជាការដាំដំណាំនៅក្បែរផ្ទះដោយដាំពឹងផ្អែកទៅលើដីនោះមានជីវជាតិស្រាប់ដោយមិនចាំបាច់ដាក់ជីអ្វីបន្ថែមនោះទេ គ្រាន់តែដាក់លាមកសត្វ និងកាកសំណល់ផ្សេងៗតែប៉ុណ្ណោះ៕

August 12, 2017

មានដីទំនេរកុំទុកចោល ដាំឫស្សីពីងពង់ក៍អាចកាប់លក់រកចំណូលចូលគ្រួសារបានដែរ

ភ្នំពេញ៖ បើគេ ធ្វើដំណើរកាត់តាមផ្លូវជាតិឆ្ពោះទៅបណ្តាខេត្តផ្សេងៗមិនថាខេត្តណាមួយនោះទេនៅក្នុងប្រទេសកម្ពុជា យើងសង្កេតឃើញថា កសិករតែងទុកដីឱ្យទំនេរចោលរាប់សិបហិកតា និងរាប់មិនអស់ ដោយមិនបានយកដីទាំងនោះទៅដាំដំណាំកសិកម្មអ្វីឱ្យកើតជាប្រយោជន៍ដល់គ្រួសារឡើយ តែបែជានាំគ្នាធ្វើចំណាកស្រុករកការងារធ្វើនៅទីឆ្ងាយៗវិញ។

ងាកទៅមើលជីវភាពកសិកររស់នៅភូមិដូង ស្រុករមាសហែក ខេត្តស្វាយរៀងដែលជាភូមិមានព្រំប្រទល់ជាប់នឹងប្រទេសវៀតណាមឯណោះវិញ ពួកគាត់មិនបានទុកដីឱ្យ នៅទំនេរចោលទេ គឺពួកគាត់តែងនាំគ្នាដាំឫស្សីពីងពង់ ហើយអាចកាប់លក់ទទួលបានប្រាក់ចំណូលធូរធារទៀតផងនៅពេលប្រមូលផលលក់ទៅឱ្យឈ្មួញមកពីប្រទេសវៀតណាមម្តង។

កសិករថា ឫស្សីពីងពង់ជាប្រភេទឫស្សីដែលរឹងមាំ អាចធន់នឹងអាកាសធាតុ មិនងាយពុកផុយដែលគេតែងយកទៅច្នៃធ្វើជាគ្រឿងសង្ហារិម ធ្វើជាសម្ភារប្រើប្រាស់ផ្សេងៗ ឬច្នៃធ្វើជាម៉ូដហាងឱ្យស្អាតៗបង្កើនសម្រស់ហាងទាក់ទាញអតិថិជនទៀតផង។ ដោយសារតែមានតម្រូវការបែបនេះ ទើបសព្វថ្ងៃប្រជាពលរដ្ឋដែលមានដើមឫស្សីពីងពង់មានចិត្តសប្បាយរីករាយខ្លាំង និងធ្វើឱ្យជីវភាពបានធូរធារមួយកម្រិតឡើងទៀតដោយសារមានឈ្មួញវៀតណាមឡើងមកទិញដល់ភូមិឃុំរបស់ពួកគាត់តែម្តង ។

ឫស្សីពីងពង់ប្រភេទនេះត្រូវបានប្រជាពលរដ្ឋខ្លះដើរប្រមូលទិញពីភូមិមួយទៅភូមិមួយ ក្នុងស្រុករមាសហែកយកមកលក់បន្តឱ្យឈ្មួញវៀតណាម ហើយឈ្មួញដឹកយកទៅលក់បន្តទៀតនៅឯប្រទេសវៀតណាម ដោយឫស្សីដើមជាប្រភេទលេខ1មានតម្លៃ 5000រៀល លេខ2បានតម្លៃ4000ពាន់រៀល និងប្រភេទលេខ3 លក់បាន1500ទៅ2500រៀលក្នុងមួយដើម។

ចំណែកអ្នកភូមិបាត្រាស់នៅក្នុងស្រុករមាសហែកដែរនោះបានឱ្យដឹងទៀតថា ឫស្សីពីងពង់នេះគេយកទៅធ្វើជាគ្រឿងសង្ហារិមមានតុ កៅអី និងធ្វើផ្ទះសំបែងទៀតផង។ ហើយបើពុំមានការដាំឡើងវិញទេ ច្បាស់ជាឫស្សីប្រភេទពីងពង់នេះនឹងបាត់ពូជបន្តិចម្តងៗ និងអាចឈានទៅដល់ការបាត់បង់ទាំងស្រុងទៀតផង ព្រោះឈ្មួញវៀតណាមមានតម្រូវការច្រើនដើម្បីយកទៅផ្គត់ផ្គង់ទីផ្សារនៅឯប្រទេសរបស់គេ។ ពលរដ្ឋខាងលើបានប្រាប់ទៀតថា ឫស្សីពីងពង់នេះបើដាំវា គឺមានរយៈពេលយូរទម្រាំបានផល គឺដាំតាមធម្មជាតិ ចន្លោះពី4ទៅ6ឆ្នាំឯណោះទើបកាប់វាយកផលបាន តែមិនពិបាកថែរក្សាស្រោចទឹកបោចស្មៅនោះទេ គ្រាន់តែដាំហើយទុកចោល ឬស្សីអាចល្អទៅតាមសណ្ឋានដី ក្នុងមួយគុម្ពជួនកាលមានចំនួនជាង100ដើមឯណោះ។

ដោយឡែកចំពោះឈ្មួញកណ្តាលវិញក៏បានធ្វើការជំរុញដល់ប្រជាពលរដ្ឋសូមឱ្យបង្កើនការដាំឫស្សីពីងពង់នេះឱ្យបានច្រើនបន្ថែមទៀតដើម្បីលើកកម្ពស់ជីវភាពរស់នៅ ព្រោះឫស្សីពីងពង់នេះមានទីផ្សារដោយមានតម្លៃសមរម្យដែលអាចទទួលយកបាន និងរួមចំណែកកាត់បន្ថយភាពក្រីក្របានមួយកម្រិតផងដែរ វាជាជាងទុកដីឱ្យនៅទំនេរចោលឥតប្រយោជន៍៕

August 12, 2017

ទៅលេងសៀមរាបលែងបារម្ភថា អត់អីជិះទៀតហើយ បើស្គាល់កន្លែងជួលកង់អគ្គិសនីមួយនេះ

សម្រាប់អ្នកដែលចង់ទៅលេងខេត្តសៀមរាបនឹងអស់បារម្ភពីរឿងថា ពិបាករកកន្លែងជួលយានជំនិះសម្រាប់ជិះកម្សាន្តជិតៗក្នុងតំបន់ប្រាសាទបុរាណនានាទៀតហើយ ព្រោះពេលនេះ លោកអ្នកអាចរកជួលកង់អគ្គិសនីជិះបានយ៉ាងងាយស្រួលជាមួយនឹងតម្លៃសមរម្យ និងលក្ខខណ្ឌដ៏ងាយបំផុត។

ម្ចាស់ហាង Ovelocity e-Bike Rental បានបញ្ជាក់ប្រាប់តាមទូរស័ព្ទឱ្យដឹងថា សម្រាប់លោកអ្នកដែលមកលេងខេត្តសៀមរាបហើយចង់ជួលកង់ជិះកម្សាន្តជុំវិញខេត្ត អាចមករកសេវាជួលកង់អគ្គិសនីជិះយ៉ាងស្រួលនៅទីនេះបានជាមួយនឹងតម្លៃធូរថ្លៃ ងាយស្រួល និងមិនពិបាកកក់លុយអ្វីទាំងអស់។ លោកបន្ដថា ចំពោះសេវាខាងលោកមានគិតជាម៉ោងដោយត្រឹមមួយម៉ោង3ដុល្លារ 6ម៉ោងតម្លៃ 8ដុល្លារ 24ម៉ោងឬមួយថ្ងៃតម្លៃ10ដុល្លារ និងការជួលជិះជាលក្ខណៈក្រុមការងារមានតម្លៃចាប់ពី 30ដុល្លារឡើងទៅ។

ម្ចាស់ហាងខាងលើបញ្ជាក់ថា៖ «ពីមុន អ្នកមកលេងសៀមរាបភាគច្រើនពិបាករកកន្លែងជួលកង់ម៉ូតូជិះណាស់ អ៊ីចឹងហើយបានជាខ្ញុំសម្រេចបើកសេវាកម្មមួយនេះឡើង ដោយមិនចាំបាច់កក់លុយ ឬបញ្ចាំរបស់អ្វីទេ ត្រឹមតែទុកអត្តសញ្ញណប័ណ្ណ ឬលិខិតឆ្លងដែនជាការស្រេច»។

លោកបន្ថែមឱ្យដឹងទៀតថា កង់អគ្គិសនីអាចជិះបានពី30 ទៅ 45Km ក្រោយពេលសាកពេញម្ដងៗ ហេតុនេះភ្ញៀវ ឬអ្នកមកលេងតំបន់ប្រាសាទបុរាណ ទៅអង្គរវត្ត អង្គរធំ បារាយណ៍ខាងកើត និងជិះត្រឡប់មកហាងវិញដោយគ្មានអ្វីគួរឱ្យបារម្ភទេជាមួយនឹងល្បឿន 25Km/h ។ មួយវិញទៀត ខាងហាងក៏បានបង្កើតមានស្ថានីយសម្រាប់សាកបញ្ចូលថាមពលថ្មជាច្រើនកន្លែងនៅក្នុងខេត្តសៀមរាបដោយឥតថ្លៃទៀតផង។ សម្រាប់កង់អាគុយប្រើប្រាស់ថាមពលអគ្គិសនីនេះត្រូវបាននាំចូលពីប្រទេសចិនដោយប្រិយមិត្តអាចជួលម្នាក់ឯង ឬជាក្រុមបាន ខណៈហាងមានកង់រហូតដល់70គ្រឿងឯណោះសម្រាប់ឱ្យជួល៕

August 12, 2017

Category: សង្គម និងសេដ្ឋកិច្ច