សង្គម និងសេដ្ឋកិច្ច - La Reine Media

Ronaldo រងពិន័យព្យួរ 5ប្រកួត ក្រោយពីបានរុញខ្នងអាជ្ញាកណ្តាល

ខ្សែប្រយុទ្ធ Cristiano Ronaldo បានរងនូវការពិន័យព្យួរចំនួន5ប្រកួត ដោយសារតែបានរុញខ្នងអាជ្ញាកណ្តាលលោក De Burgos Bengoetxea ក្នុងអំឡុងពេលប្រកួតដែលក្រុម Real Madrid ដណ្តើមបានជ័យជម្នះក្នុងលទ្ធផល 3-1 លើក្រុម Barcelona ក្នុងការប្រកួតពាន Super Cup របស់អេស្ប៉ាញជើងទី1 កាលពីថ្ងៃអាទិត្យ។

ខ្សែប្រយុទ្ធរូបនេះបានរុញខ្នងអាជ្ញាកណ្តាលរូបនោះ ក្រោយពីរូបគេបានទទួលការពិន័យកាតលឿងជាលើកទី2 នៅក្នុងការប្រកួតនោះ។ Ronaldo បានរងពិន័យកាតលឿងលើកទីមួយសម្រាប់ការដោះដាវរបស់គេដើម្បីអបអរការរកគ្រាប់បាល់បញ្ចូលទី និងបានទទួលការពិន័យកាតលឿងមួយទៀតជាលើកទី2 សម្រាប់ការធ្វើពុតជាដួលនៅតំបន់ការពាររបស់ក្រុម Barcelona ក្រោមសម្ពាធរបស់ខ្សែការពារ Samuel Umtiti។ ក្រោមច្បាប់មាត្រាទី96របស់សហព័ន្ធកីឡាបាល់ទាត់អេស្ប៉ាញ កីឡាកររូបណាដែលចាប់ឱប អង្រួន និងរុញអាជ្ញាកណ្តាល អាចនឹងត្រូវរងពិន័យព្យួរពី4 ទៅ12ប្រកួត។ សេចក្តីថ្លែងការណ៍មួយដែលត្រូវបានចេញផ្សាយកាលពីថ្ងៃចន្ទដោយសហព័ន្ធកីឡាបាល់ទាត់អេស្ប៉ាញហៅកាត់ថា RFEF បានឲ្យដឹងថា៖ «ករណីទី1 កីឡាករ Cristiano Ronaldo របស់ក្លិប Real Madrid នឹងត្រូវជាប់ពិន័យព្យួរមួយប្រកួត ក្រោយពីទទួលបានកាតលឿង2 ដោយកាតលឿងទី1សម្រាប់ការដោះអាវរបស់គេក្នុងពេលអបអរការរកគ្រាប់បាល់បានរបស់គេ និងទី2 សម្រាប់ការធ្វើពុតជាដួល។ ក្លិបនេះត្រូវរងពិន័យជាទឹកប្រាក់350អឺរ៉ូ ហើយកីឡាកររូបនេះក៏នឹងត្រូវពិន័យ800អឺរ៉ូ ផងដែរ»។ RFEF បានបន្ថែមទៀតថា៖ «ករណីទី2 Cristiano Ronaldo ត្រូវជាប់ពិន័យព្យួរសម្រាប់ការប្រកួត4លើកផ្សេងទៀតចំពោះការប្រព្រឹត្តល្មើសនឹងវិន័យមាត្រាទី96 ដោយក្លិបត្រូវរងពិន័យជាទឹកប្រាក់1,400អឺរ៉ូ និង3,005អឺរ៉ូសម្រាប់កីឡាករ»៕

https://www.youtube.com/watch?v=mqxx1-EmKSE

នេះជាតារាងការប្រកួតដែលអវត្តមាន Cristiano Ronaldo

Barcelona (h) – Spanish Super Cup – 16 August

Deportivo La Coruna (a) – La Liga – 20 August

Valencia (h) – La Liga – 27 August

Levante (h) – La Liga – 9 September

Real Sociedad (a) La Liga – 17 September

ប្រភពពី៖ Sky Sport

August 15, 2017

ពិតជារំភើបណាស់! កម្មវិធីស្វែងរកតាមការបញ្ជាដោយសំឡេងជាភាសាខ្មែររបស់ Google អាចប្រើបានហើយ

ពិតជារំភើប និងមានមោទនភាពណាស់សម្រាប់ប្រជាពលរដ្ឋខ្មែរ ដោយពេលនេះក្រុមហ៊ុន Google បានសម្រេចដាក់បញ្ចូលភាសាខ្មែរទៅក្នុងកម្មវិធីស្វែងរកជាសំឡេង ( Google Voice Search ) ជាផ្លូវការហើយកាលពីថ្ងៃព្រហស្បតិ៍សប្ដាហ៍មុន ខណៈកន្លងមកយើងអាចប្រើបានតែជាភាសាអង់គ្លេស និងភាសាមួយចំនួនទៀតប៉ុណ្ណោះ។

ការដាក់បញ្ចូលនេះ ដើម្បីសម្រួលដល់ការស្វែងរកឱ្យកាន់តែងាយស្រលជាងមុន ដែលវានឹងបន្ថែមល្បឿនដល់អ្នកប្រើប្រាស់បានកាន់តែលឿនជាងមុន 3 ដង ជាពិសេសសម្រាប់អ្នកដែលពិបាកក្នុងវាយអក្ស អាចធ្វើបានដោយគ្រាន់តែចុចលើរូប Microphone ប៉ុណ្ណោះ។ មុខងារមួយនេះ ប្រិយមិត្តអាចប្រើបានលើក្ដារចុចចំនួន 2 របស់ Google គឺ Google’s keyboard និង Gboard។

ក្រៅតែពីភាសាខ្មែរ ក៏មាន 30 ភាសាទៀតដែរដែលត្រូវបានដាក់ឱ្យប្រើ ក្នុងនោះរួមមាន Amharic (Ethiopia), Armenian (Armenia), Azerbaijani (Azerbaijani), Bengali (Bangladesh, India), English (Ghana, Kenya, Nigeria, Tanzania), Georgian (Georgia), Gujarati (India), Javanese (Indonesia), Kannada (India), Lao (Laos), Latvian (Latvia), Malayalam (India), Marathi (India), Nepali (Nepal), Sinhala (Sri Lanka), Sundanese (Indonesia), Swahili (Tanzania, Kenya), Tamil (India, Singapore, Sri Lanka, Malaysia), Telugu (India) និង Urdu (Pakistan, India) ជាដើម។ល។ ក្នុងនោះ បើគិតជាសរុបក្រុមហ៊ុន Google បានដាក់មុខងារនេះឱ្យប្រើបានចំនួន 119 ភាសាហើយទូទាំងពិភពលោក។

ដូច្នេះតោះ! យើងសាកល្បងប្រើទាំងអស់គ្នាទៅមើល៍ ថាតើវាងាយស្រួលប្រើកម្រិតណា?៕

August 15, 2017

លោក សោម សម្បត្តិ៖ មនុស្សត្រូវការសន្សំ4យ៉ាងដើម្បីមានសុភមង្គល

មានសុភមង្គលក្នុងជីវិត ជារឿងដែលមនុស្សគ្រប់គ្នាចង់បាន តែមនុស្សជាច្រើនមិនអាចរកឃើញសុភមង្គលបានទាំងក្នុងជីវិត សិក្សា ការងារ អាជីវកម្ម និងជីវិតគ្រួសារ។ តាមពិតទៅ សុភមង្គល មិនមែនសម្រាប់ស្វែងរកនោះទេ គឺវាទាមទារឱ្យខ្លួនយើងម្នាក់ៗត្រូវបង្កើតវាដោយខ្លួនឯង ហើយការរៀបចំខ្លួនឱ្យមានសុភមង្គលក៏ត្រូវមានវិធីសាស្ត្រឆ្លាតវៃមួយចំនួនសម្រាប់អនុវត្ត។

អគ្គនាយកក្រុមហ៊ុនថ្នាំពណ៌ជាតិ Cam-Paint លោក សោម សម្បត្តិ បានថ្លែងនៅក្នុងសិក្ខាសាលាស្តីពី «អាថ៌កំបាំងកសាងគ្រួសារដ៏មានសុភមង្គល» ថា សុភមង្គល ជាភាសាអង់គ្លេសថា Happiness គឺមានន័យថាលើពីការសប្បាយ។ មនុស្សគ្រប់គ្នាសុទ្ធតែមានបំណងចង់បានសុភមង្គល ហើយសុទ្ធតែអាចបង្កើតសុភមង្គលបានសម្រាប់ខ្លួនឯង គ្រាន់តែមិនទាន់ដឹងពីវិធីដើម្បីទទួលបានសុភមង្គលតែប៉ុណ្ណោះ។ ដើម្បីទទួលបានសុភមង្គលក្នុងជីវិត យើងត្រូវសន្សំ 4 យ៉ាង គឺសន្សំចំណេះដឹង សន្សំពេលវេលា សន្សំសុខភាព និងសន្សំលុយ។

លោក សោម សម្បត្តិ បាននិយាយថា៖ «ចំណេះដឹងសំខាន់ណាស់សម្រាប់មនុស្ស ព្រោះថាជីវិតអាចជោគជ័យទៅបានលុះត្រាតែយើងមានចំណេះសម្រាប់ដោះស្រាយបញ្ហា មានចំណេះដឹងសម្រាប់ប្រើប្រាស់ក្នុងជីវិត និងក្នុងសង្គម»។

សហគ្រិនជោគជ័យខាងលើបានលើកឡើងផងដែរថា ចំណេះដឹងគឺមិនប្រាកដថាត្រូវរៀនតែក្នុងសាលានោះទេ យើងអាចស្វែងរកចំណេះដឹងបានពីគ្រប់មជ្ឈដ្ឋានទាំងក្នុងវិស័យការងារ និងពីផ្នែកផ្សេងៗទៀតក្នុងការរស់នៅ។ ទន្ទឹមនឹងនេះ ពេលវេលាក៏សំខាន់ណាស់ដែរសម្រាប់មនុស្ស ព្រោះថាបើយើងមិនចេះគ្រប់គ្រងពេលវេលាឱ្យបានល្អទេនោះ យើងនឹងចាយជីវិតចោលដោយមិនបានធ្វើរឿងដែលមានប្រយោជន៍សម្រាប់ជីវិតនោះទេ។ ការគ្រប់គ្រងពេលវេលាបានល្អ វាអាចធ្វើឱ្យយើងទទួលបានការអភិវឌ្ឍក្នុងពេលដ៏សមប្រកប ដែលវារុញច្រានឱ្យជីវិតទទួលបានជោគជ័យរួមទាំងមានសុភមង្គលក្នុងគ្រួសារថែមទៀតផង។

ក្រៅពីនេះ សុខភាព ក៏ជារឿងចម្បងមួយដែរសម្រាប់សុភមង្គល។ បើសុខភាពមិនរឹងមាំ យើងក៏គ្មានកម្លាំងឯណាទៅយកឈ្នះបញ្ហានានានោះទេ ហើយបើយើងមិនអាចឈ្នះលើអាជីវកម្ម ឬមិនអាចឈ្នះលើការតាំងចិត្តរបស់យើងនោះទេ យើងក៏មិនអាចទទួលបានសុភមង្គលនោះដែរ។ អ្វីដែលសំខាន់គឺរក្សាសុខភាពឱ្យបានល្អសម្រាប់អភិវឌ្ឍលើវិស័យការងារ និងផ្តល់ភាពកក់ក្តៅដល់ក្រុមគ្រួសារ។ ចំណុចសំខាន់ចុងក្រោយ គឺំមនុស្សគ្រប់គ្នាត្រូវសន្សំថវិកា ធ្វើយ៉ាងណាឱ្យមានភាពរឹងមាំផ្នែកហិរញ្ញវត្ថុ។ ជាការពិតណាស់លុយមិនមែនជាធាតុគ្រប់យ៉ាងរបស់សុភមង្គលនោះទេ តែការគ្រប់គ្រងហិរញ្ញវត្ថុបានល្អ គឺជាធាតុសំខាន់មួយដើម្បីកសាងសុភមង្គល។ លោកបានបញ្ជាក់ផងដែរថា អ្នកមានគេទប់លុយមុននឹងចាយ មិនមែនចាយលុយហើយបានរកវិធីទប់តាមក្រោយនោះទេ៕

August 15, 2017

Tottenham បើកការពិភាក្សាជាមួយ Ajax ជុំវិញការផ្ទេរ Sanchez ក្នុងតម្លៃខ្លួន40លានអឺរ៉ូ

ក្លិប Tottenham បានបើកការពិភាក្សាជាមួយនឹងក្លិប Ajax ជុំវិញការផ្ទេរ Davinson Sanchez ខណៈដែលលោក Mauricio Pochettino ពោរពេញដោយការជឿជាក់ក្នុងការចុះហត្ថលេខាជាមួយនឹងរូបគេ ក្រោយពីខ្សែការពារអន្តរជាតិកូឡុំប៊ីរូបនេះ បានបញ្ជាក់ប្រាប់ក្លិបហូឡង់របស់គេថា គេចង់ផ្ទេរទៅកាន់ក្លិប Spurs។

ក្រោយពីបានលក់ខ្សែការពារ Kyle Walker ទៅឲ្យក្លិប Manchester City ក្នុងតម្លៃខ្លួនមួយដែលអាចនឹងកើនដល់ 50លានផោន (ស្មើនឹង 64.8លានដុល្លារអាមេរិក) លោក Pochettino បានស្វែងរកកីឡាករដែលត្រូវជំនួសក្នុងក្រុមរបស់លោក និងបានកំណត់យកកីឡាករវ័យ 21ឆ្នាំរូបនេះ ជាកីឡាករដ៏ស័ក្តិសមក្នុងការចាប់ដៃគូជាមួយនឹង Toby Alderweireld និង Jan Vertonghen ក្នុងតំបន់ការពារទាំង3។ កាលពីចុងសប្តាហ៍មុន ក្លិប Tottenham បានរៀបចំការពិភាក្សាតំណាក់កាលទី1ជាមួយនឹងក្លិប Ajax ដែលបានទិញ Sanchez ពីក្លិប Atletico Nacional របស់កូឡុំប៊ីក្នុងតម្លៃខ្លួន 5លានអឺរ៉ូ កាលពីរដូវក្តៅមុន បើទោះបីជាក្លិបរបស់ហូឡង់មួយនេះបានបញ្ជាក់ថា រូបគេមិនមែនសម្រាប់លក់ក៏ដោយ។ ប៉ុន្តែ ទោះបីជាយ៉ាងណា ស្របពេលដែល Sanchez ត្រូវបានគេយល់ឃើញថា បានស្ថិតក្នុងការចាប់អារម្មណ៍ពីសំណាក់លោក Pochettino ក្រោយពីជួបរដូវកាលដ៏ជោគជ័យមួយនៅឯក្លិប Ajax ក្រោយពីបានជួយឲ្យក្រុមរបស់ខ្លួនឈានទៅដល់វគ្គផ្តាច់ព្រ័ត្រនៃក្របខ័ណ្ឌ Europa League ប្រភពជិតដិតជាមួយនឹងកីឡាកររូបនេះ បានទទួលស្គាល់ថា រូបគេពិតជាចង់ផ្ទេរទៅកាន់ក្លិប Spurs បើទោះបីទទួលបានការចាប់អារម្មណ៍ពី Chelsea ក៏ដោយ។

មន្ត្រីរបស់ Tottenham ត្រូវបានគេជឿជាក់ថា បានធ្វើដំណើរទៅកាន់ទីក្រុង Amsterdam កាលពីថ្ងៃចន្ទ ដើម្បីបន្តធ្វើការចរចាផ្សេងៗ ខណៈដែល Ajax ចង់បានតម្លៃខ្លួន40លានអឺរ៉ូ (ស្មើនឹង 47លានដុល្លារអាមេរិក) ដោយសារតែ Sanchez នៅជាប់កិច្ចសន្យារយៈពេល 4ឆ្នាំទៀត៕

ប្រភពពី៖ The Guardian

August 15, 2017

កម្ពុជា និងបង់ក្លាដែសឈានដល់ការព្រមព្រៀងនាំអង្ករចេញក្នុងតំណាក់កាលទី1

ភ្នំពេញ៖ នៅដើមសប្តាហ៍នេះ គណៈប្រតិភូក្រសួងពាណិជ្ជកម្មដែលមានក្រុមហ៊ុនហ្គ្រីនត្រេដ ជាសេនាធិការ និងសហការជាមួយសហព័ន្ធស្រូវអង្ករកម្ពុជាបានអញ្ជើញទៅប្រទេសបង់ក្លាដែសដើម្បីធ្វើការពិភាក្សាលម្អិតស្តីពីការធ្វើពាណិជ្ជកម្មអង្ករជាមួយគណៈប្រតិភូអន្តរក្រសួងនៃសាធារណរដ្ឋប្រជាមានិតបង់ក្លាដែស។

ក្រោយពីកិច្ចពិភាក្សាបានបញ្ចប់ ប្រទេសបង់ក្លាដែសបានយល់ព្រមទទួលទិញអង្ករចំនួន 10% ក្នុងបរិមាណចំនួន 250,000តោន ចាប់ពីថ្ងៃចុះហត្ថលេខាលើកិច្ចសន្យាទិញដូរនេះក្រោមទិដ្ឋភាពរវាងរដ្ឋាភិបាល និងរដ្ឋាភិបាលដើម្បីពង្រីកការនាំចេញអង្ករទៅបរទេសក៏ដូចជាអនុវត្តនូវគោលនយោបាយនាំចេញអង្កររបស់រាជរដ្ឋាភិបាលឱ្យបាន1លានតោន។

គួររំឭកដែរថា កាលពីថ្ងៃទី2 ខែសីហា ឆ្នាំ2017 កន្លងទៅនេះ រាជរដ្ឋាភិបាលកម្ពុជាតាមរយៈក្រសួងពាណិជ្ជកម្ ដែលជាសេនាធិការបានចុះអនុស្សរណៈយោគយល់ជាមួយរដ្ឋាភិបាលបង់ក្លាដែសលើការលក់អង្ករចំនួន1លានតោនក្នុងរយៈពេល 5ឆ្នាំ (2017-2022) ក្នុងគោលបំណងធ្វើពិពិធកម្មទំហំពាណិជ្ជកម្ម និងជំរុញកំណើនសេដ្ឋកិច្ច ពិសេសធានាបាននូវស្ថិរភាពវិស័យស្រូវ-អង្ករក៏ដូចជាប្រសិទ្ធភាពនៃការអនុវត្តគោលនយោបាយនាំចេញអង្ករឱ្យបាន1លានតោនក្នុងមួយឆ្នាំរបស់រាជរដ្ឋាភិបាល៕

August 15, 2017

ទីផ្សារភាគហ៊ុន «ទីកន្លែងសម្រាប់ស្វែងរកដើមទុន និងវិនិយោគ»

ទីផ្សារភាគហ៊ុនគឺជាទីកន្លែងជួញដូរភាគហ៊ុន ឬប្រព័ន្ធដែលផ្ដល់មធ្យោបាយនៃការធ្វើសំណើលក់ ផ្ទេរ ទិញ-លក់ភាគហ៊ុន ដែលក្រុមហ៊ុនបោះផ្សាយ បានបោះផ្សាយលក់ជាសាធារណៈ។ ភាគហ៊ុន ត្រូវបានជួញដូរដោយការដេញថ្លៃ។ តម្លៃរបស់ភាគហ៊ុនត្រូវបានកំណត់ដោយយន្តការទីផ្សារ ពោលគឺការផ្គត់ផ្គង់ និងតម្រូវការក្នុងទីផ្សារ។ ទីផ្សារភាគហ៊ុន គឺជាសមាសភាគដ៏សំខាន់នៃសេដ្ឋកិច្ចទីផ្សារសេរីដោយវាអនុញ្ញាតឱ្យក្រុមហ៊ុនទទួលបាននូវមូលធនបន្ថែមដោយលក់ចំណែកនៃភាពជាម្ចាស់នៅក្នុងក្រុមហ៊ុនទៅឱ្យវិនិយោគិន។ ទីផ្សារភាគហ៊ុនអាចធ្វើឱ្យចំនួនទឹកប្រាក់បន្តិចបន្តួចក្នុងពេលបច្ចុប្បន្នកើនចំនួនក្នុងពេលអនាគត ពោលគឺអាចធ្វើឱ្យវិនិយោគិនក្លាយជាអ្នកមានទ្រព្យសម្បត្តិ និងមិនចាំបាច់ទទួលយកការប្រឈមក្នុងការចាប់ផ្ដើមអាជីវកម្ម ដោយគ្រាន់តែធ្វើការវិនិយោគជាមួយភាគហ៊ុន។

ទីផ្សារភាគហ៊ុនអនុញ្ញាតឱ្យវិនិយោគិនចូលរួមដាក់ទុនរកស៊ីជាមួយក្រុមហ៊ុន តាមរយៈភាគហ៊ុនដែលខ្លួនកាន់កាប់។ នៅពេលដែលក្រុមហ៊ុនទទួលបានប្រាក់ចំណេញ វិនិយោគិននឹងទទួលបានចំណែកនៃប្រាក់ចំណេញ តាមរយៈការទទួលភាគលាភដែលក្រុមហ៊ុនបែងចែកជូន។ វិនិយោគិនក៏អាចធ្វើការលក់ភាគហ៊ុននៅពេលដែលភាគហ៊ុនឡើងថ្លៃដើម្បីទទួលបានប្រាក់ចំណេញ/ចំណេញមូលធន។ វិនិយោគិនក៏អាចប្រឈមនឹងការខាតបង់ប្រាក់នៅពេលកាន់កាប់ភាគហ៊ុនដែលកំពុងធ្លាក់ថ្លៃ។

ទីផ្សារភាគហ៊ុនត្រូវបានចែកចេញជាពីរផ្នែកសំខាន់ៗគឺទីផ្សារដំបូង និងទីផ្សារបន្ទាប់។ ទីផ្សារដំបូង គឺជាដំណាក់កាលដែលភាគហ៊ុនត្រូវបានបោះផ្សាយ និងលក់ជាលើកដំបូងតាមរយៈការធ្វើសំណើទិញ ឬដំណើរការដេញថ្លៃដោយមានការជួយសម្រួលពីក្រុមហ៊ុនធានាទិញមូលបត្រ។ ទីផ្សារបន្ទាប់ គឺជាដំណាក់កាលដែលភាគហ៊ុនត្រូវបានជួញដូរក្នុងចំណោមវិនិយោគិននៅក្នុងទីផ្សារភាគហ៊ុន។

ភាគហ៊ុន ត្រូវបានជួញដូរនៅក្នុងទីផ្សារភាគហ៊ុនជាច្រើន។ ជាក់ស្ដែង នៅសហរដ្ឋអាមេរិកមានទីផ្សារភាគហ៊ុនធំ២ គឺ ទីផ្សារភាគហ៊ុនញូវយ៉ក (The New York Stock Exchange) ដែលត្រូវបានបង្កើតឡើងក្នុងឆ្នាំ១៧៩២ និងទីផ្សារភាគហ៊ុន Nasdaq ដែលត្រូវបានបង្កើតឡើងក្នុងឆ្នាំ១៩៧។ សព្វថ្ងៃនេះ ការជួញដូរភាគហ៊ុនភាគច្រើនត្រូវបានធ្វើប្រតិបត្តិការដោយប្រព័ន្ធអេឡិចត្រូនិច និងសូម្បីតែការរក្សាទុកភាគហ៊ុនទៀតសោត គឺក្នុងទម្រង់អេឡិចត្រូនិចស្ទើរទាំងអស់ ពុំមែនជាទម្រង់រឹងដោយប្រើក្រដាសនោះទេ។

នៅក្នុងពេលបច្ចុប្បន្ននេះ ប្រទេសកម្ពុជាយើងក៏មានផ្សារភាគហ៊ុនមួយផងដែរ ដែលមានឈ្មោះជាផ្លូវការថា ក្រុមហ៊ុនផ្សារមូលបត្រកម្ពុជា (Cambodia Securities Exchange) ដែលត្រូវបានបង្កើតឡើងនៅថ្ងៃទី១១ ខែកក្កដា ឆ្នាំ២០១១ ដោយមានការរួមទុនរវាងរាជរដ្ឋាភិបាលកម្ពុជា និងក្រុមហ៊ុនផ្សារមូលបត្រកូរ៉េ ដែលជាប្រតិបត្តិករទីផ្សារមូលបត្រដ៏ល្បីល្បាញនៅសាធារណរដ្ឋកូរ៉េ៕

អត្ថបទ៖ ណង សេរីវុធ, មន្ត្រីជំនាញនៃការិយាល័យស្រាវជ្រាវ និងអភិវឌ្ឍន៍ទីផ្សារមូលបត្រគណៈកម្មការមូលបត្រកម្ពុជា

ប្រភពរូបភាព៖ Ryan Lawler, www.orlandosentinel.com

August 15, 2017

Chelsea ទាមទារឲ្យ Costa វិលមកក្លិបវិញ និងត្រៀមសម្រាប់ក្រុមជម្រើសដំបូង

ក្លិបតោខៀវ Chelsea បានធ្វើការឆ្លើយតបប្រកបដោយការគោរពទៅកាន់ការអះអាងដែលថាមិនមានភាពយុត្តិធម៌របស់ Diego Costa តាមរយៈការទាមទារឲ្យខ្សែប្រយុទ្ធរូបនេះវិលមកកាន់ទីលានហ្វឹកហាត់វិញ និងធ្វើឲ្យខ្លួនឯងរឹងមាំគ្រប់គ្រាន់សម្រាប់ជម្រើសដំបូងរបស់ក្រុម។

ក្រុមម្ចាស់ជើងឯករបស់ក្របខ័ណ្ឌ Premier League មួយនេះត្រូវបានបង្ខំឲ្យធ្វើការឆ្លើយតប ក្រោយពី Costa បានផ្តល់នូវបទសម្ភាសមួយពីប្រទេសកំណើតរបស់គេ ប្រេស៊ីល ដោយរូបគេបានអះអាងថា Chelsea បានចាត់ទុករូបគេដូចជា«ឧក្រិដ្ឋជន»ម្នាក់អ៊ីចឹង ជុំវិញការបង្ហាញពីបំណងរបស់គេក្នុងការចាកចេញពីក្លិបនៅរដូវកាលនេះ។ វាត្រូវបានគេយល់ឃើញថា Chelsea បានធ្វើការស្នើដល់កីឡាកររូបនេះចំនួន4លើកដើម្បីពិនិត្យថា តើរូបគេចង់រក្សាទំនាក់ទំនងផ្សេងៗដែលបានស្ថិតក្នុងស្ថានភាពជូរចត់យ៉ាងខ្លាំង នៅមុនពេលការសម្ភាសរបស់គេកាលពីចុងសប្តាហ៍នេះ ឬយ៉ាងណា? សំណើទីមួយគឺការស្នើសុំដោយត្រង់ៗថា រូបគេគួរតែវិលមកកាន់ក្លិបវិញ។ សំណើទី2 បានបញ្ជាក់ថា រូបគេគួរតែធ្វើរបាយការណ៍សម្រាប់ការហ្វឹកហាត់។ ទី3 រូបគេគួរតែធ្វើឲ្យខ្លួនឯងរឹងមាំគ្រប់គ្រាន់ឡើងសម្រាប់ការប្រកួត និងទី4 គឺរូបគេគួរតែធ្វើឲ្យខ្លួនឯងត្រៀមលក្ខណៈរួចរាល់សម្រាប់ការជ្រើសរើសក្នុងជម្រើសដំបូងរបស់ក្រុម។

ខ្សែប្រយុទ្ធអន្តរជាតិប្រេស៊ីលវ័យ28ឆ្នាំរូបនេះបានធ្លាក់ចូលក្នុងជម្លោះជាមួយនឹងគ្រូបង្វឹករបស់ Chelsea គឺលោក Antonio Conte ចាប់តាំងពីដើមឆ្នាំនេះមកម្ល៉េះ ដែលនៅពេលនោះរូបគេបានរងនូវការស្តីបន្ទោសចំពោះជម្លោះជាមួយនឹងគ្រូបង្វឹកផ្នែករឹងមាំលោក Julio Tous។

ក្រោយពីជួបពេលវេលាដ៏ខកចិត្តនៅពាក់កាលរដូវកាលមុន លោក Conte បានប្រាប់កីឡាកររូបនេះថា រូបគេគឺជាចំនួនដែលលើសក្នុងក្រុមរបស់លោកតាមរយៈការផ្ញើសារមួយ ហើយបន្ទាប់មក Costa ក៏បាននិយាយពីបញ្ហានេះជាសាធារណៈតែម្តង៕

ប្រភពពី៖ The Guardian

August 15, 2017

ធនាគារអភិវឌ្ឍន៍ជនបទរំពឹងថា ឆ្នាំនេះនឹងគ្មានហានិភ័យលើបញ្ហាស្រូវ អង្ករ

ភ្នំពេញ – ដើម្បីទប់ស្កាត់ហានិភ័យនារដូវប្រមូលផលស្រូវក្នុងឆ្នាំនេះ ធនាគារអភិវឌ្ឍន៍ជនបទគ្រោងនឹងស្នើសុំកញ្ចប់ឥណទានពិសេសក្នុងរង្វង់ទឹកប្រាក់23លានដុល្លារបន្ថែមទៀតទៅរាជរដ្ឋាភិបាលដើម្បីប្រតិបត្ដិការការងារនេះ ខណៈគេមើលឃើញថា កំណើននៃក្រុមហ៊ុនស្នើសុំកម្ចីឥណទាននឹងមានការកើតឡើងក្នុងឆ្នាំនេះ។

ឯកឧត្ដម កៅ ថាច អគ្គនាយកធនាគារអភិវឌ្ឍន៍ជនបទបញ្ជាក់ថា ក្នុងឆ្នាំនេះយើងរំពឹងថា មានក្រុមហ៊ុនរោងម៉ាស៊ីនកិនស្រូវដែលអាចនឹងប្រើប្រាស់ឥណទានពិសេសនេះកើនឡើងច្រើនជាងឆ្នាំមុន ដូច្នេះធនាគារអភិវឌ្ឍន៍ជនបទនឹងធ្វើការស្នើសុំកញ្ចប់ឥណទានពិសេសទៅរាជរដ្ឋាភិបាលដើម្បីរៀបចំ និងទប់ស្កាត់ជាមុននូវហានិភ័យដែលអាចកើតឡើង។ ឯកឧត្ដមបន្ដថា៖ «បច្ចុប្បន្នយើងបានត្រៀមហេដ្ឋារចនាសម្ព័ន្ធ និងឡសម្ងួតជាបណ្ដើរៗហើយ ដែលឡសម្ងួតអាចនឹងហើយរួចរាល់នៅដំណាច់ខែសីហា និងអាចមានសមត្ថភាពសម្ងួតបានក្នុងរង្វង់3ពាន់តោនក្នុងមួយថ្ងៃ ដូច្នេះយើងសង្ឃឹមថា ឆ្នាំនេះវានឹងមិនមានបញ្ហាអ្វីកើតឡើងទេពាក់ព័ន្ធនឹងស្រូវអង្ករ។ ពិសេសបញ្ហាធំយើងបានរៀបចំហេដ្ឋារចនាសម្ព័ន្ធជាខ្សែបណ្ដាញដើម្បីទប់ស្កាត់កុំឱ្យឈ្មួញកណ្ដាលចុះទៅក្រឡុកទីផ្សារ»។

អគ្គនាយកធនាគារអភិវឌ្ឍន៍ជនបទបន្ថែមថា ក្រៅពីការងារទាំងនេះ យើងក៏បានធ្វើការងារជាមួយអភិបាលស្រុក និងឃុំមួយចំនួនដែលបានចូលរួមបម្រើប្រជាពលរដ្ឋក្នុងការកំណត់ទីតាំង និងតម្លៃស្រូវសម្រាប់លក់នៅទីតាំងនោះតែម្ដង។ ករណីដល់ពេលយប់ដែលគ្មានឈ្មួញចុះទិញបន្ដទៀតធនាគារស្រូវនឹងប្រមូលទិញយកមកដាក់ក្នុងឡសម្ងួតភ្លាម។

កន្លងមកមានការលើកឡើងថា មានការរើសអើងចំពោះការផ្ដល់ឥណទានពិសេសនេះ ប៉ុន្ដែរឿងនេះត្រូវបានឯកឧត្ដមអគ្កនាយកបញ្ជាក់ថា យើងបានប្រកាសហើយថា ការផ្ដល់ឥណទាននេះត្រូវធ្វើឡើងដោយមិនរើសមុខទេ គឺឥណទានត្រូវបានផ្ដល់ទៅឱ្យអ្នកដែលបានបំពេញតាមគុណវឌ្ឍិគោលនយោបាយឥណទាន និងគោលនយោបាយរបស់រាជរដ្ឋាភិបាល។ ពោលគឺយើងចង់ផ្ដល់ឥណទានពិសេសនេះទៅដល់កសិករដែលធ្វើការងារប្រមូលផ្ដុំគ្នាជាសហគមន៍ និងក្រុមហ៊ុនផ្គត់ផ្គង់ពូជ ថ្នាំ និងជី ព្រមទាំងរោងម៉ាស៊ីនទិញស្រូវអង្ករពីកសិករ និងអ្នកទិញស្រូវអង្ករពីរោងម៉ាស៊ីនកិនស្រូវវិញផងដែរ។

ជាមួយគ្នានេះឯកឧត្ដមក៏បានប្រកាសដែរថា អ្នកដែលមិនទាន់ទទួលបានឥណទានពិសេសនេះ ក៏គួរតែមកសាកល្បង ព្រោះមានលក្ខខណ្ឌងាយៗក្នុងការទទួលបាន ឬក៏អាចទូរស័ព្ទទំនាក់ទំនងមកធនាគារផ្ទាល់ នឹងមានមន្ដ្រីឥណទានចុះទៅដល់រោងម៉ាស៊ីនកិនស្រូវរបស់លោកអ្នកដើម្បីបំពេញពាក្យស្នើសុំកម្ចីឥណទានពិសេសនោះនៅនឹងកន្លែងតែម្ដង។

គួរបញ្ជាក់ថា កាលពីឆ្នាំ2016មានរោងម៉ាស៊ីនកិនស្រូវក្នុងរង្វង់7ក្រុមហ៊ុន បានមកដាក់ពាក្យ ស្នើសុំលើកម្ចីឥណទានពិសេស ដោយគ្រាន់តែមានស្រូវជាវត្ថុធានាបញ្ចាំតែប៉ុណ្ណោះ៕

August 15, 2017

កុំចោលគ្រាប់ផ្លែប៊័រឱ្យសោះ ព្រោះវាមានប្រយោជន៍ចំពោះស្បែកមុខ

ផ្លែប៊័រ មិនត្រឹមតែការពារជាតិខ្លាញ់ប៉ុណ្ណោះទេ វាជួយជួសជុលស្បែកស្ងួត ស្បែកមិនល្អឱ្យមានសំណើមឡើងវិញ ហើយនៅក្នុងផ្លែប៊័រសម្បូរទៅដោយ វីតាមីន B ជាតិដែក លីពីត និងកាកសរសៃ មិនតែប៉ុណ្ណោះគ្រាប់របស់វាក៏មានផ្ទុកសារធាតុចិញ្ចឹមជាច្រើនដែលយើងគ្រប់គ្នានឹកស្មានមិនដល់ផងដែរ។

នេះគឺជាការពិត គ្រាប់ផ្លែប៊័រមានតួនាទីយ៉ាងសំខាន់ក្នុងការថែរក្សាស្បែក និងបំបាត់ស្នាមអុចខ្មៅនៅលើផ្ទៃមុខបាន និងវាថែមទាំងមានប្រសិទ្ធភាពការពារស្បែកពេលនៅក្រោមកម្តៅព្រះអាទិត្យខ្លាំងជាងក្រែមការពារកំដៅថ្ងៃ SPF 15+ ទៅទៀត ហើយជួយឱ្យស្បែកមិនទទួលរងការខូចខាតដោយសារកម្ដៅព្រះអាទិត្យទៀតផង។ ថ្ងៃនេះ គេហទំព័រ ឡារ៉ែន សូមចែកជូននូវវិធីសាស្ត្រសម្អាតស្បែកមុខជាមួយគ្រាប់ផ្លែប៊័រ ដូចខាងក្រោម។

វត្ថុត្រូវត្រៀម៖
-គ្រាប់ផ្លែប៊័រ1គ្រាប់
-ទឹកសម្អាតមុខប្រភេទ Deep Cleaning
-ក្រដាស់សើម

វិធីធ្វើ៖
-លាងផ្លែគ្រាប់ប៊័រជាមួយទឹកស្អាត រួចចិតជាចំណិតៗ ដាក់ក្រឡុកក្នុងម៉ាស៊ីនឱ្យម៉ដ្ឋ រួចទុកមួយអន្លើ
-លាយគ្រាប់ប៊័រក្រឡុករួចជាមួយនឹងទឹកសម្អាតមុខ Deep Cleaning ឱ្យខាប់សមល្មម។
-ម៉ាស្សាថ្មមៗនៅលើស្បែកមុខ ទុកឱ្យស្ងួត រួចសឹមយកក្រដាសសើមជូតចេញ។
-នោះអ្នកនឹងសង្កេតឃើញនៅលើក្រដាសមានស្នាម និងកម្ទេចធូលីដីនៅលើផ្ទៃមុខបានយ៉ាងច្បាស់
-រួចហើយស្បែកមុខរបស់អ្នកនឹងឡើងស រលោងស្អាត និងមានសំណើមជាងមុន៕

August 15, 2017

ទើបតែដឹងថា ត្រកួន មិនមែនគ្រាន់តែជាបន្លែប៉ុណ្ណោះទេ តែជាឱសថបុរាណដ៏ពូកែទៀតផង

ត្រកួន ជាបន្លែពេញនិយមមួយប្រភេទ ដែលប្រជាជនខ្មែរនិយមយើងយកមកចម្អិនច្នៃជាម្ហូបអាហារបានជាច្រើនមុខ និងក្រៅពីធ្លាប់តែដឹងថា វាជាបន្លែនោះ ត្រកួនក៏ជាឱសថបុរាណមួយប្រភេទអាចព្យាបាលជំងឺជាច្រើនមុខដែលយើងមិនធ្លាប់ដឹងពីមុនមកទៀតផង។ គុណប្រយោជន៍របស់ត្រកួនមានដូចខាងក្រោមនេះ៖

1.កាពារជំងឺហើមពោះ ៖ ត្រកួនជាប្រភពរបស់ជាតិកាកសរសៃច្រើនបំផុត វាមានប្រសិទ្ធភាពជាថ្នាំរលាយកាកសំណល់ឱ្យទន់ៗ ជួយឱ្យការបញ្ចេញលាមកមកខាងក្រៅងាយស្រួល។ វាជួយការពារ និងព្យាបាលជំងឺទល់លាមក ហើមពោះ និងជួយកាត់បន្ថយហានិភ័យនៃការកើតជំងឺឫសដូងបាតបាន ពោលគឺការទទួលទានបន្លែត្រកួនជាប្រចាំថ្ងៃ នឹងជួយសម្អាតរាល់កាកសំណល់ និងជាតិពុលដែលធ្លាក់ទៅក្នុងពោះវៀនតូចឱ្យចេញមកក្រៅ ហើយជួយស្រូបយកសារធាតុចិញ្ចឹមដល់រាងកាយល្អប្រសើរផងដែរ។

2.ជំនួយភ្នែក ៖ ជាបន្លែដែលមានវីតាមីន Aច្រើន ជំនួយដល់ភ្នែក និងប្រស្រីភ្នែក ហើយមានគុណសម្បត្តិជួយដល់ប្រព័ន្ធប្រសាទ ធ្វើឱ្យយើងមានអារម្មណ៍ស្រស់ស្រាយ បំបាត់ភាពនឿយហត់ និងងាយគេងលក់ស្រួល។

3.សម្រួលដំណេក ៖ ក្នុងត្រកួនក៏មាននូវសារធាតុ Selenium និងស័ង្កសី ដែលជួយសម្រាលផ្នែកប្រព័ន្ធប្រសាទ ហើយធ្វើឱ្យអ្នកឆាប់គេងលក់បានស្រួល។

4.ជំនួយគ្រាប់ឈាម ៖ មានសារធាតុដែក ជាសារធាតុចិញ្ចឹមដែលមានសារៈសំខាន់ចំពោះប្រព័ន្ធឈាម និងចលនាឈាមរត់ វាជួយបង្កើតអេម៉ូក្លូប៊ីននៅក្នុងឈាម ទើបអាចការពារជំងឺខ្វះឈាម និងជំងឺស្លេកស្លាំងបានទៀតផង។

5.ជួយលាងជាតិពុលនៅក្នុងខ្លួន ៖ ត្រកួនក៏នៅមានគុណប្រយោជន៍ក្នុងការជួយលាងសារជាតិពុលនៅក្នុងរាងកាយដូចជា ថ្លើមជាដើម ជួយការពារកោសិកាមិនឱ្យត្រូវបានបំផ្លាញ និងជួយការពារថ្លើមទៀតផង។

6.បន្ថយជាតិស្ករនៅក្នុងឈាម ៖ បច្ចុប្បន្ននេះមានការស្រាវជ្រាវរកឃើញថា ត្រកួនមានសារធាតុស្រដៀងនឹង Insulin ដែលមានសមត្ថភាពបន្ថយជាតិស្ករនៅក្នុងឈាម និងជួយបន្ថយការស្រូបយកសារធាតុចិញ្ចឹមរបស់គ្លុយកូសនៃរាងកាយបាន អ្នកជំងឺទឹកនោមផ្អែម គួរតែទទួលទានបន្លែត្រកួនជាប្រចាំ។

7.ជួយសម្រកទម្ងន់ ៖ ជាប្រភេទបន្លែពណ៌បៃតងដែលជាអាហារសម្រកទម្ងន់បានលទ្ធផលល្អគាប់ចិត្ត វាមានបរិមាណកាកសរសៃច្រើន មានកាល់ឡូរីទាប ទទួលទានហើយងាយឆ្អែត និងឆ្អែតបានយូរ។

8.បញ្ជុះជាតិកូឡេស្តេរ៉ូល ៖ អាហារកាកសរសៃ និងវីតាមីនដែលមាននៅក្នុងត្រកួន ជាផ្នែកមួយដែលសំខាន់បំផុតក្នុងការបន្ថយកូឡេស្តេរ៉ូល និង ទ្រីគ្លីសេរីដ (ខ្លាញ់អាក្រក់) ក្នុងរាងកាយបាន ទើបវាបានហុចផលល្អសម្រាប់ប្រព័ន្ធសរសៃឈាម និងបេះដូង។

9.ការពារជំងឺបេះដូង និងសរសៃឈាម ៖ ត្រកួនមានវីតាមីន A, វីតាមីន C ,Beta និង Carotene ដែលជួយប្រឆាំងអុកស៊ីតកម្ម ហើយការពារកោសិកា ជួយកាត់បន្ថយកូឡេស្តេរ៉ូល ការពារការកើតជំងឺបេះដូង គាំងបេះដូង និងជំងឺដាច់សរសៃឈាមខួរក្បាល។ ក្រៅពីនោះ វាមានសារធាតុដែកដែលមានសារៈសំខាន់ដើម្បីបង្កើតឈាមក្រហម និងមានម៉ាញ៉េស្យូមជួយបន្ថយសម្ពាធឈាមដែលការពារមិនឱ្យកើតជំងឺបេះដូងបានទៀតផង។

10.ការពារជម្ងឺមហារីក៖ នៅក្នុងត្រកួនមានសារធាតុចិញ្ចឹមជាង 13 ប្រភេទ ដែលវាប្រឆាំងអុកស៊ីតកម្ម និងការពារកោសិកាមិនឱ្យកើតជំងឺមហារីក ជាពិសេសជំងឺមហារីកពោះវៀនធំ ក្រពះ ស្បែក និងមហារីកសុដន់ ជាដើម៕

August 15, 2017

Category: សង្គម និងសេដ្ឋកិច្ច