សង្គម និងសេដ្ឋកិច្ច - La Reine Media

ការបង្ហាញវត្តមានជាថ្មីរបស់អតីតបវរកញ្ញា Miss Universe បានធ្វើឲ្យមហាជនភ្ញាក់ផ្អើល…

តាមរយៈសារព័ត៌មាន Teenee បានឱ្យដឹងថា អ្នកលេងបណ្ដាញសង្គមអ៊ីនស្តាក្រាម មានការភ្ញាក់ផ្អើលយ៉ាងខ្លាំងចំពោះបវរកញ្ញា Miss Universe 2015 ដែលបានបាត់មុខមួយរយៈ ហើយថ្មីៗនេះនាងបានបង្ហាញវត្តមានសាជាថ្មីតាមរយៈការបង្ហាញម៉ូដដែលធ្វើឱ្យមជ្ឈដ្ឋានមហាជនមានការងឿងឆ្ងល់យ៉ាងខ្លាំង និងមើលនាងសឹងតែមិនស្គាល់ ព្រោះថា នាងមានសម្រស់ស្អាត ហើយក្មេងជាងកាលពីពេលដែលនាងប្រកួតបវរកញ្ញាទៅទៀត។

បវរកញ្ញារូបនេះមានឈ្មោះថា Alonzo Wurtzbach ជាបវរកញ្ញាឯកប្រចាំប្រទេស ហ្វ៊ីលីពីន ឆ្នាំ2015 ហើយគួររំឭកផងដែរថា កាលពីពេលប្រកួតនៅវគ្គផ្តាច់ព្រ័ត្រនោះ នាង និងបរវកញ្ញា Columbia ដែលមានឈ្មោះថា Ariadna Gutierrez មានការខកចិត្តយ៉ាងខ្លាំងចំពោះពិធីករដែលបានប្រកាសលទ្ធផលខុសឈ្មោះ ហើយមួយភ្លែតក្រោយមកគណៈកម្មការបានដកហូតមកុដពីបវរកញ្ញា Columbia មកប្រគល់ឱ្យបវរកញ្ញាប្រទេស ហ្វ៊ីលីពីនដែលជារូបនាងវិញ ធ្វើឱ្យពិភពលោករិះគន់កម្មវិធីនេះយ៉ាងខ្លាំងក្លានៅពេលនោះ។

គួរបញ្ជាក់ផងដែរ បច្ចុប្បន្នភាពរបស់បវរកញ្ញាហ្វ៊ីលីពីនរូបនេះគឺមានសម្ផស្សស្បែកមុខ ដងខ្លួនកាន់តែស្រស់ស្អាត និងមើលទៅក្មេងជាងកាលពីពេលដែលនាងកំពុងប្រកួត Miss Universe ទៅទៀត តែនាងមិនបានបញ្ជាក់បន្ថែមពីអ្វីទាំងអស់ នាងគ្រាន់បានចេញមុខមកថតបង្ហាញម៉ូដឱ្យទស្សនាវដ្តីល្បីឈ្មោះមួយរបស់ហ្វ៊ីលីពីនប៉ុណ្ណោះ។

ដើម្បីឱ្យកាន់តែជាក់ច្បាស់សូមទស្សនារូបភាពរបស់បវរកញ្ញាឯកប្រចាំប្រទេសហ្វ៊ីលីពីនឆ្នាំ2015 ខាងក្រោមនេះ៖

August 16, 2017

តភាគ…រឿង សុវណ្ណ មករា និងចន ច័ន្ទលក្ខិណា

ប៉ុន្មានថ្ងៃនេះតារាសម្ដែងជើងចាស់ទាំងពីររូបគឺលោក សុវណ្ណ មករា និងអ្នកនាង ចន ច័ន្ទលក្ខិណា បានធ្វើឱ្យមហាជនចាប់អារម្មណ៍ជាខ្លាំងចំពោះការសរសេរសារឌឺដងគ្នាក្នុងបណ្ដាញសង្គមហ្វេសប៊ុក ក្រោយពីអ្នកទាំងពីរបានបោះពាក្យសំដីចាក់ដោតគ្នាទៅវិញទៅមកឈឺៗដល់កម្រិតខ្លាំង ធ្វើឱ្យគេគិតថា បញ្ហានោះមិនងាយនឹងបញ្ចប់ទេ ហើយក៏ដូចនឹងអ្វីដែលគេបានគិតមែន ពោលគឺអ្នកទាំងពីរនៅតែបន្ដការឌឺដងដាក់គ្នាដដែល។

តាមរយៈការឌឺដងពាក្យសំដីដាក់គ្នាទៅវិញទៅមករវាងលោក សុវណ្ណ មករា និងអ្នកនាង ចន ច័ន្ទលក្ខិណា គេសង្កេតឃើញថា អ្នកទាំងពីរច្រើនតែលើកយកបញ្ហាផ្ទាល់ខ្លួនរបស់គូជម្លោះមកលាតត្រដាងឱ្យមហាជនបានដឹង ធ្វើឱ្យមហាជនមានការចាប់អារមុ្មណ៍យា់ងខ្លាំង។ ចំពោះរឿងផ្ទាល់ខ្លួនលោក សុវណ្ណ មករា ក៏មានមហាជនជាច្រើនចាប់អារម្មណ៍ចង់ដឹងពីការពិតច្រើនដែរ ប៉ុន្ដែអ្វីដែលគេចាប់អារម្មណ៍ខ្លាំងបំផុតនោះ គឺការលើកឡើងរបស់លោក សុវណ្ណ មករា ពាក់ព័ន្ធនឹងកញ្ចប់ថវិកាសមាគមរបស់អ្នកនាង ចន ច័ន្ទលក្ខិណា ដែលលោកតែងតែលើកឡើងតាមរយៈពាក្យឌឺដងជារឿយៗថា ជាការពិតឬមិនមែន?។

តទៅនេះជាសារដែលលោក សុវណ្ណ មករា បានសរសេរកាលពីប៉ុន្មានថ្ងៃមុន ៖ «ឡុងអើយឡុង បើឡុងឯងជាមនុស្សប្រុសពិតមែន ត្រូវហ៊ានទទួលស្គាល់នូវអ្វីដែលឡុងឯង Share and Post កាលពីលើកទី1 កុំ Editeច្រើនពេក ឬក៏ឡុងឯងយកចនចន្ទ័មកធ្វើជាខែលបិទបាំងភាពជាកូនប្រុស និងមុខរបររបស់ឡុងឯង? ហើយរឿងមួយទៀតគឺរឿងប្រាក់មូលនិធិសិល្បៈ កុំថាគេមិនដឹងឲ្យសោះ កុំឱ្យលេចឮថា កិបកេងយកប្រាក់មូលនិធិសិល្បៈទៅប្រើប្រាស់រឿងបំណុលផ្ទាល់ខ្លួនឱ្យសោះណា៎ ខ្ញុំគ្រាន់តែបារម្ភជំនួសក្នុងន័យមិត្តភាពប៉ុណ្ណោះ Sic» ។

ថ្មីៗនេះលោកបានដាក់មកទៀតថា ៖ «ចាន់អើយចាន់ ហេតុអីក៏អ្នកក្លាយទៅជាចាន់ដែលមិនចេះប្រកុយ? បើអ៊ីចឹងប្រុសណាក៏ចង់បានចាន់មកថើបដែរ ដោយសារចាន់មិនដែលចេះប្រកុយបើអ៊ីចឹងមែននោះ ចាន់មិនប្រកុយប្រហែលជាគូព្រេងនឹងចៅចាក់ស្មុគដែលមានឈ្មោះថា ឡុង សារ័ត្ន ហើយមើលទៅ? ខ្ញុំសុំសួរបងប្អូនមួយថា ហេតុអ្វីរាល់ពេលដែលលោកស្រីប្រធានស្អីគេហ្នឹង post ដៀលហើយនិងជេរ ខ្ញុំមើលមិនដែលឃើញសោះ ឮតែគេប្រាប់ ហើយបើមិនជឿ គេបើកឱ្យយើងមើល ចរិតលោកស្រីប្រធាន អីក៏ធូរថ្លៃម្ល៉េះ? វ៉ៃគេហើយរត់ទៅដេកធ្វើមិនដឹង បើលេងកុំខឹងបើខឹងកុំលេង សូមផ្ដាំទៅលោកប្រុសតូចដែលជាប្រុសស្នេហ៍របស់លោកស្រីប្រធានផង ថាមានគេនោះទទូចប្រាប់ខ្ញុំថា សូមឱ្យប្រុសតូចរបស់លោកស្រីប្រធាន ហើយនិងលោកស្រីប្រធាននោះជួយបកស្រាយរឿងប្រាក់សមាគមដែលបានបាត់អស់នោះផង ខ្ញុំនិយាយមែនទែន អត់មានពេលទំនេរឯណាមកនិយាយលេង ដូចប្រុសតូចរបស់លោកស្រីប្រធានទេ»។

ទោះជាយ៉ាងណាមហាជនទាំងអស់មិនចង់ឃើញនូវសកម្មភាពបែបនេះទេ ព្រោះគេចាត់ទុកថា វាជាទង្វើដែលមិនល្អបំផុត និងអសីលធម៌បំផុតក្នុងការប្រើពាក្យពេចន៍អាក្រក់ៗសរសេរដៀមដាមគ្នាប្រៀបដូចជាមនុស្សមិនបានរៀនសូត្របែបនេះសម្រាប់អ្នកសិល្បៈស្រករក្រោយនោះ៕

August 16, 2017

ខំរៀនគំហុកពេក មិនមែនជាវិធីសាស្រ្តល្អសម្រាប់អ្នកត្រៀមប្រឡងបាក់ឌុបទេ

នៅសល់តែមួយសប្តាហ៍ទៀតប៉ុណ្ណោះ ការប្រឡងបាក់ឌុបនឹងចូលមកដល់ សិស្សទាំងអស់នៅទូទាំងប្រទេសដែលត្រៀមខ្លួនប្រឡងកំពុងមមាញឺកក្នុងការសម្រុកអានសៀវភៅ ឬមើលមេរៀនបើទោះបីជាការមើលបែបនេះពិបាកចងចាំល្អក៏ដោយ។

ដើម្បីជួយសម្រួលដល់ការត្រៀមប្រឡងបាក់ឌុបដែលសល់រយៈពេលខ្លីបំផុតនេះ សិស្សពូកែមួយចំនួនបានរួមគ្នាចែករំលែកបទពិសោធជីវិតរបស់ខ្លួនដើម្បីជួយជាវិធីសាស្ត្រជំរុញឱ្យសិស្សនៅកម្ពុជាអាចប្រឡងបានល្អ។

លោក ចេង បូរិទ្ធ អតីតសិស្សពូកែទូទាំងប្រទេសផ្នែករូបវិទ្យាបានលើកឡើងថា ចំពោះស្ថានភាពកៀកថ្ងៃប្រឡងខ្លាំង ឬសល់តែ 2 ឬ 3 ថ្ងៃមុនពេលប្រឡងយើងគួរកំណត់កាលវិភាគរំឭកមេរៀនឱ្យបានច្បាស់ដើម្បីបញ្ជាក់ប្រាប់ខ្លួនឯងថា កុំបារម្ភ ហើយកុំភ័យ ព្រោះមេរៀននឹងត្រូវរំឭកទាំងអស់តាមលំដាប់លំដោយ។ បន្ទាប់មកចាប់ផ្តើមសង្ខេបមេរៀនដោយការគូស Mind Maps (គំនូសសង្ខេបខ្លីៗ) ព្រោះនៅពេលដែលយើងបានឃើញគំនូសតភ្ជាប់ហេតុផលនៃមេរៀនជាប់ៗគ្នាគឺធ្វើឱ្យខួរក្បាលឆាប់យល់ និងចំណេញពេលវេលាច្រើន។ បន្ទាប់ពីបង្កើត Mind Maps ហើយយើងអាចធ្វើលំហាត់ប្រាណងាយៗដែលមិនប៉ះពាល់ដល់សុខភាពដូចជាការហែលទឹក ជិះកង់ ឬសមាធិដើម្បីឱ្យអារម្មណ៍ស្ងប់ល្អ និងសម្រាកឱ្យបានល្អដើម្បីយកថាមពលប្រឡងនៅថ្ងៃប្រឡងជាក់ស្តែង។

ស្រដៀងគ្នានេះដែរ អតីតសិស្សពូកែនិទ្ទេស B+ លោក នាង កុសល បានប្រាប់ថា ការប្រឡងបាក់ឌុបជារឿងសំខាន់ ហេតុនេះវិធីសាស្ត្រដែលអាចធ្វើទៅបានគឺ សិស្សគួរប្រជុំគ្នាដើម្បីជជែកពីចំណុចដែលមិនទាន់ច្បាស់លាស់នៅក្នុងមេរៀននីមួយៗ។ ការជជែកគ្នានេះ អាចធ្វើឱ្យសិស្សងាយចងចាំផងដែរ ក្នុងករណីដែលពេលវេលាកៀកខ្លាំង ព្រោះថាគាត់អាចអាន មើល ស្តាប់ និងពិភាក្សាក្នុងពេលតែមួយ។ ម្យ៉ាងវិញទៀត បន្ទាប់ពីជជែកពិភាក្សា ហើយយល់ពីចំណុចសំខាន់ៗហើយ ពួកគេគួរសរសេរទុកជាសេចក្តីសង្ខេបដាក់ក្នុងក្រដាសព្រាងដើម្បីគ្រប់គ្រងមេរៀនឱ្យបានល្អ ហើយក៏ដើម្បីបង្កើនទំនុកចិត្តខ្លួនឯងដែរថា យើងអាចគ្រប់គ្រងស្ថានការណ៍បានមុនពេលប្រឡង៕

August 16, 2017

សេវាបដិសណ្ឋារកិច្ចនៅកម្ពុជា មានភាពប្រសើរជាងប្រទេសមួយចំនួនក្នុងអាស៊ាន

ភ្នំពេញៈ ទន្ទឹមនឹងការកើនឡើងនូវភាពប្រកួតប្រជែង និងការបង្កើនគុណភាពអាជីវកម្មបានធ្វើឲ្យសេវាកម្មបដិសណ្ឋារកិច្ចនៅក្នុងផ្នែកសណ្ឋាគារនៅកម្ពុជាមានភាពល្អប្រសើរជាងបណ្តាប្រទេសមួយចំនួននៅក្នុងតំបន់អាស៊ាន។

លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជាបានថ្លែងឲ្យដឹងតាមទូរស័ព្ទនាព្រឹកថ្ងៃទី16 សីហានេះថា សេវាបដិសណ្ឋារកិច្ចរបស់កម្ពុជាកាន់តែមានភាពល្អប្រសើរឡើង និងកំពុងនាំមុខបណ្តាប្រទេសមួយចំនួនក្នុងតំបន់អាស៊ានដោយសារភាពរួសរាយរាក់ទាក់ បដិសណ្ឋារកិច្ចផ្សេងៗល្អ បរិយាកាសជុំវិញល្អ និងការរៀបចំរចនាតុបតែងលម្អសណ្ឋាគារកាន់តែមានភាពទាក់ទាញ។ លោកបន្តថា ទោះជាយ៉ាងណាវិស័យនេះកំពុងមានភាពប្រកួតប្រជែងគ្នាកាន់តែខ្លាំង និងជាការប្រកួតប្រជែងយ៉ាងគ្មានតម្លាភាពដោយសារម្ចាស់សណ្ឋាគារធំៗមួយចំនួនបានលក់បញ្ចុះតម្លៃបន្ទប់របស់ខ្លួន។

លោកបន្តថា “ក្រសួងទេសចរណ៍គួរពង្រឹងក្រមសីលធម៌វិជ្ជាជីវៈលើម្ចាស់សណ្ឋាគារទាំងនោះ ពិសេសគួរមានការពង្រឹងបទដ្ឋានការងារដើម្បីធ្វើយ៉ាងណាឲ្យការប្រមូលពន្ធចូលថវិកាជាតិបានច្រើនជាងមុន។ លោកបន្តថា “ទោះជាកំណើនភ្ញៀវទេសចរបន្តកើនឡើងក្តី ប៉ុន្តែការប្រកួតប្រជែងក៏កើនឡើងដែរ ដោយសារមានចំនួនសណ្ឋាគារថ្មីៗជាច្រើនបានដាក់ដំណើរការ។

លោក លូ ម៉េង សហប្រធានក្រុមការងារឯកជនផ្នែកវិស័យទេសចរណ៍បានយល់ស្របនឹងការលើកឡើងខាងលើ ដោយលោកធ្លាប់បានថ្លែងថា វិស័យបដិសណ្ឋារកិច្ចនៅក្នុងវិស័យសណ្ឋាគារ និងម្ហូបអាហារនានាកាន់តែមានភាពល្អប្រសើរឡើងនៅកម្ពុជា ហើយគុណភាពសេវាកម្ម និងបដិសណ្ឋារកិច្ចនេះកម្ពុជាពិតជាមានការនាំមុខលើបណ្តាប្រទេសមួយចំនួនក្នុងតំបន់អាស៊ានមែន។ លោកបន្តថា ប្រសិនជានិយាយពីវិស័យម្ហូបអាហារវិញ យើងមានសេវាកម្មសម្បូរបែបដែលភ្ញៀវអាចកុម្ម៉ង់ម្ហូបអាហារប្លែកមុខផ្សេងៗគ្នាពិសាបានរហូតដល់មួយសប្តាហ៍ឯណោះ៕

August 16, 2017

មិនមែនតែអាជីវករតូចតាចទេ សូម្បីសណ្ឋាគារលំដាប់ផ្កាយក៏មិនលើកលែងដែរ

ភ្នំពេញ៖ មិនមែនតែក្នុងខណ្ឌច្បារអំពៅប៉ុណ្ណោះទេ ងាកមកខណ្ឌដូនពេញឯណេះវិញ ក្រុមការងារជំនាញខណ្ឌកាលពីម្សិលមិញនេះ បានចុះរៀបចំសណ្តាប់ធ្នាប់តាមដងផ្លូវសាធារណៈ ដោយបានវាយកម្ទេចសំណង់រឹងសង់រំលោភចំណីផ្លូវរបស់សណ្ឋាគារប៉ាស៊ីហ្វិកក្នុងសង្កាត់ផ្សារថ្មីទី2។

លោក ចាប ឌីណា នាយករងរដ្ឋបាលខណ្ឌដូនពេញដែលបានដឹកនាំមន្ត្រីក្រោមឱវាទចុះពិនិត្យ និងរុះរើសំណង់សង់រំលោភចំណីផ្លូវខាងលើ និងបានណែនាំដល់ថ្នាក់គ្រប់គ្រងសណ្ឋាគារ កុំឱ្យសង់សំណង់រំលោភចំណីថ្នល់សាធារណៈដូច្នេះទៀត ចៀសវាងកុំឱ្យបង្កផលប៉ះពាល់ផ្សេងៗដល់សាធារណជនដែលធ្វើដំណើរតាមដងផ្លូវសាធារណៈ។ ចំណែកគណៈគ្រប់គ្រងសណ្ឋាគារក៍បានឯកភាពចូលរួមវាយសំណង់រំលោភលើចំណីថ្នល់ខាងលើនោះចោលដែរ។

គួររំឭកដែរថា កាលពីថ្ងៃទី9 ខែសីហា ឆ្នាំ2017សាលារាជធានីបានណែនាំឱ្យខណ្ឌទាំង12 ក្នុងរាជធានីភ្នំពេញត្រូវរៀបចំសណ្ដាប់ធ្នាប់សាធារណៈតាមដងផ្លូវដែលជាកត្តាសំខាន់ក្នុងការដោះស្រាយបញ្ហាចរាចរណ៍ លើកកម្ពស់កិត្តិយសជាតិ និងកាត់បន្ថយឱ្យបាននូវភាពអនាធិបតេយ្យតាមដងផ្លូវ។ ដើម្បីឱ្យសណ្ដាប់ធ្នាប់តាមដងផ្លូវ និងចរាចរណ៍បានល្អប្រសើរនេះ សាលារាជធានីបានអំពាវនាវដល់បងប្អូនប្រជាពលរដ្ឋ គណៈបញ្ជាការគ្រប់ខណ្ឌ និងកងកម្លាំងមានសមត្ថកិច្ច ត្រូវចូលរួមអនុវត្តតាមសេចក្ដីណែនាំខាងក្រោមនេះឱ្យមានប្រសិទ្ធភាពខ្ពស់បំផុត៕

មានវីដេអូ

August 16, 2017

Everton យល់ព្រមលើតម្លៃខ្លួន45លានផោនដើម្បីផ្ទេរ Sigurdsson ពី Swansea

ក្លិបទូកក្តោង Everton បានយល់ព្រមលើការផ្ទេរមួយដើម្បីចុះហត្ថលេខាជាមួយនឹងខ្សែបម្រើ Gylfi Sigurdsson ពីក្លិប Swansea City ក្នុងតម្លៃខ្លួនប្រមាណជា 45លានផោន (ស្មើនឹង 58លានដុល្លារអាមេរិក)។

ខ្សែបម្រើអន្តរជាតិអ៊ីស្លង់រូបនេះ បានស៊ុតបាល់បញ្ចូលទី 9គ្រាប់ និងជួយឲ្យមិត្តរួមក្រុមរកបាន13គ្រាប់ផ្សេងទៀតកាលពីរដូវកាលមុនដើម្បីជួយឲ្យក្រុម Swansea គេចផុតពីតំបន់កាត់ចោល។ Sigurdsson វ័យ27ឆ្នាំ នឹងទទួលការពិនិត្យសុខភាពនៅកីឡដ្ឋាន Goodison Park នាថ្ងៃពុធនេះ។

Sigurdsson នឹងក្លាយជាកីឡាករដែលមានតម្លៃខ្លួនខ្ពស់ជាងគេបំផុតរបស់ Everton តាមរយៈការបំបែកកំណត់ត្រាផ្ទេរក្នុងទឹកប្រាក់ 31.8លានផោនដែល Everton បានចំណាយទៅឲ្យក្លិប Chelsea ដើម្បីទិញខ្សែប្រយុទ្ធ Romelu Lukaku កាលពីឆ្នាំ2014។ ក្លិប Swansea បានស្នើសុំតម្លៃខ្លួន50លានផោនសម្រាប់ Sigurdsson កាលពីខែកក្កដា ក្រោយពីបានច្រានចោលសំណើមួយដែលមានតម្លៃជាទឹកប្រាក់40លានផោន ពីក្លិប Leicester។ បន្ទាប់មក ក្លិបរបស់វេលស៍មួយនេះ បានច្រានចោលសំណើក្នុងទឹកប្រាក់ដូចគ្នានេះពីក្លិប Everton ដែលបានចាប់អារម្មណ៍ទៅលើតារាឆ្នើមអន្តរជាតិអ៊ីស្លង់រូបនេះ អស់រយៈពេលច្រើនជាង1ឆ្នាំមកហើយ។

Spurs នឹងទទួលបានប្រាក់ចំណេញចំនួន10ភាគរយពីលក្ខខណ្ឌនៃការលក់ចេញទៅថ្ងៃអនាគត ក្រោយពីបានលក់ Sigudsson ទៅឲ្យក្លិប Swansea ក្នុងការព្រមព្រៀងគ្នាមួយដើម្បីធ្វើឲ្យពួកគេអាចនាំយកខ្សែការពារ Ben Davies និងអ្នកចាំទី Michel Vorm ទៅកាន់កីឡដ្ឋាន White Hart Lane៕
ប្រភពព័ត៌មាន៖ BBC

August 16, 2017

អ្នកសង្កេតការណ៍ប្រឡងបាក់ឌុបមិនមែនតួឯក ជាអ្នកដែលតួឯកត្រូវការ

អ្នកសង្កេតការណ៍ប្រឡងមធ្យមសិក្សាទុតិយភូមិ ជាបុគ្គលសំខាន់ដែលមិនអាចខ្វះបានក្នុងដំណើរការនៃការប្រឡងទាំងមូល ព្រោះថា គាត់មានតួនាទីជាអ្នកឃ្លាំមើល ប្រមូលព័ត៌មាន និងធានាពីភាពច្បាស់លាស់ត្រឹមត្រូវរបស់គ្រប់ភាគីទាំងអស់ក្នុងការប្រឡង។

នៅឆ្នាំនេះ មានអ្នកសង្កេតការណ៍ប្រមាណជិត 5000 នាក់ មកពីបណ្តាស្ថាប័នរដ្ឋ អង្គការសង្គមស៊ីវិល និងវិស័យឯកជនក្នុងប្រទេសកម្ពុជា ដែលបានត្រៀមឃ្លាំមើលការប្រឡងនៅទូទាំងប្រទេសដែលនឹងធ្វើឡើងនៅថ្ងៃទី 21-22 ខែសីហា ឆ្នាំ2017។

ឯកឧត្តមទេសរដ្ឋមន្ត្រី ឱម យិនទៀង ប្រធានអង្គភាពប្រឆាំងអំពើពុករលួយបានលើកឡើងថា កន្លងមកយើងបានបើកវគ្គបណ្តុះបណ្តាលអ្នកសង្កេតការណ៍ប្រមាណជាង 4000នាក់ ដើម្បីឱ្យពួកគាត់យល់ដឹងអំពីការងារ និងតួនាទីរបស់អ្នកសង្កេតការណ៍ ក្នុងសម័យប្រឡងបាក់ឌុបខាងមុខ។

ឯកឧត្តម ឱម យិនទៀង បាននិយាយថា៖ «តួនាទីរបស់អ្នកសង្កេតការណ៍គឺមិនមែនជាតួឯកនោះទេ តួឯកគឺក្រសួងអប់រំ និងអនុរក្សឯណោះទេ ប៉ុន្តែគេមិនអាចខ្វះយើងបានដែរ»។

ប្រធានអង្គភាពប្រឆាំងអំពើពុករលួយក៏បាន ស្នើសុំឱ្យអ្នកសង្កេតការណ៍ទាំងអស់រាយការណ៍តាមវិជ្ជាជីវៈនូវគ្រប់ព័ត៌មាន ដើម្បីឆ្លុះបញ្ចាំងដល់សង្គមឱ្យឃើញពីភាពត្រឹមត្រូវក្នុងមណ្ឌលប្រឡងដែលខ្លួនទទួលខុសត្រូវរៀងៗខ្លួន។ តួនាទីរបស់អ្នកសង្កេតការណ៍គឺ ជាអ្នកប្រមូលភស្តុតាងនានាដែលកើតឡើងក្នុងមណ្ឌលប្រឡង តែគ្មានសិទ្ធដកហូតសម្ភារពីបេក្ខជនប្រឡងឡើយ គឺមានសិទ្ធិត្រឹមតែថតរូប និងរាយការណ៍ព័ត៌មានពីអនុរក្ស និងបេក្ខជនប្រឡងណាដែលបំពានច្បាប់៕

August 16, 2017

កម្ពុជា ចាញ់ថ្ងៃបើកឆាកស៊ីហ្គេម ខណៈវៀតណាមបំបាក់ទីម័រចាស់ដៃ

ក្រុមបាល់ទាត់ជម្រើសជាតិកម្ពុជា អាយុក្រោម 23ឆ្នាំ បានជួបការខកចិត្តក្នុងការប្រកួតថ្ងៃបើកឆាកនៃព្រឹត្តិការណ៍ស៊ីហ្គេម ឆ្នាំ2017 ក្រោយពីពួកគេបានរងបរាជ័យក្នុងលទ្ធផល 2-0 ក្រោមស្នាដៃក្រុមជម្រើសជាតិហ្វីលីពីន ក្នុងការប្រកួតក្នុងពូល B នៅទីក្រុងគូឡាឡាំពួ ប្រទេសម៉ាឡេស៊ី កាលពីល្ងាចថ្ងៃអង្គារ ម្សិលមិញ។ ស្របពេលជាមួយគ្នានេះដែរ ក្រុមបាល់ទាត់ជម្រើសជាតិវៀតណាមអាយុក្រោម23ឆ្នាំ បានចាប់ផ្តើមយ៉ាងល្អតាមរយៈការផ្តួលក្រុមជម្រើសជាតិទីម័រក្នុងលទ្ធផល 4-0 ក្នុងការប្រកួតពូល B ដូចគ្នានេះដែរ។

ក្រុមបាល់ទាត់ជម្រើសជាតិកម្ពុជា និងហ្វីលីពីន បានបង្ហាញពីទម្រង់លេងយ៉ាងរឹងមាំ ពិសេសក្នុងតំបន់ការពារ ខណៈដែលមិនមានក្រុមណាអាចរកគ្រាប់បាល់បញ្ចូលទីបានឡើយក្នុងការប្រកួតនៅតង់ទី1។ ប៉ុន្តែ ទោះបីជាយ៉ាងណា ក្រុមជម្រើសជាតិហ្វីលីពីន បានរកគ្រាប់បាល់នាំមុខមួយគ្រាប់ភ្លាមៗ ក្រោយពីលេងបានរយៈពេល6នាទី ក្នុងតង់ទី2 មុននឹងបន្ថែមគ្រាប់បាល់មួយគ្រាប់ទៀតនៅនាទីទី82។ ការខកចិត្តផ្សេងៗទៀតសម្រាប់កម្ពុជា បានកើតឡើងកាន់តែធំ ក្រោយពីខ្សែការពារជុំ ភីសា បានរងពិន័យកាតក្រហមនៅនាទីទី88។ ប៉ុន្តែ ទោះបីជាយ៉ាងណា ក្រុមជម្រើសជាតិកម្ពុជា នៅសល់ការប្រកួតដល់ទៅ3លើកទៀតក្នុងពូលនេះ ដោយចាប់ផ្តើមតាមរយៈការធ្វើដំណើរទៅជួបក្រុមខ្លាំងវៀតណាម នៅថ្ងៃព្រហស្បតិ៍ ស្អែកនេះ ចាប់ពីម៉ោង3រសៀលតទៅ។

ក្នុងការប្រកួតកាលពីថ្ងៃម្សិលមិញក្នុងពូលដូចគ្នានេះផងដែរ ក្រុមជម្រើសជាតិឥណ្ឌូនេស៊ី បានធ្វើការវាយបកដើម្បីតាមស្មើក្នុងលទ្ធផល 1-1 ពេលប្រកួតជាមួយនឹងក្រុមម្ចាស់ការពារតំណែងជើងឯក ថៃ៕

August 16, 2017

ស្លឹកមន ឱសថបុរាណបំបាត់អាការឈឺករ៉ាំរ៉ៃ ហើមក រលាកបំពង់ក ដ៏ស័ក្ដិសិទ្ធ

យើងធ្លាប់ដឹង និងស្គាល់ពីគុណប្រយោជន៍របស់ស្លឹកមនដែលអាចព្យាបាលជំងឺគ្រុនពោះវៀន ឈឺក្រពះ និងជួយព្យាបាលជំងឺលើសឈាមផងដែរ ប៉ុន្ដែបន្ថែមពីនោះទៀត ដើមរបស់វាក៏មានគុណសម្បត្តិជាច្រើនក្នុងការព្យាបាលអាការជំងឺបានដូចគ្នាដែរ។ ថ្ងៃនេះគេហទំព័រ ឡារ៉ែន សូមពាំនាំនូវអត្ថបទដែលនិយាយអំពីគុណប្រយោជន៍របស់ដើម និងមែកដើមមនក្នុងការព្យាបាលអាការឈឺករ៉ាំរ៉ៃ ហើមក រលាកបំពង់ក ឧស្សាហ៍រមួលក្រពើ ឈឺកដៃ កជើង សន្លាក់ ដ៏ស័ក្ដិសិទ្ធ មកជូនប្រិយមិត្តបានជ្រាប។

ការដាំដើមមនដើម្បីបេះស្លឹកយកទៅប្រើប្រាស់ចាំបាច់ត្រូវកាត់មែករបស់វា ដើម្បីឱ្យមានភាពងាយស្រួលក្នុងការបេះស្លឹកចេញ ប្រសិនបើអ្នកមិនបានដឹងពីគុណប្រយោជន៍របស់មែកមននេះទេ អ្នកប្រាកដជាបោះវាចោល ឬធ្វើជាអុសដុតមិនខាន។ ដូច្នោះមែកមនអាចប្រើប្រាស់ជាឱសថបុរាណដែលអ្នកអាចដាំជាមួយទឹកញ៉ាំបានដើម្បីរក្សាសុខភាពរបស់អ្នក។

វិធីដាំទឹកថ្នាំមន៖

យកមែកមនដែលហាលស្ងួត 20-30 ក្រាម ស្លឹកមន 2-3 សន្លឹកមកដាំជាមួយទឹកស្អាតឱ្យពុះ រួចអាចពិសាបានទាំងក្ដៅ និងត្រជាក់។

ទឹកមែកមននេះ អ្នកអាចដាំពិសារាល់ថ្ងៃបាន ហើយជាពិសេស សម្រាប់អ្នកដែលមានអាការឈឺចុកចង្កេះ ក៏អាចពិសាបានដែរ និងមានប្រសិទ្ធភាពបំផុត៕

August 16, 2017

វ៉ាន់ នីឡា ឈ្នះក្ដីលើជម្លោះគូស្នេហ៍បង្ហោះរូបអាក្រាតកាយ ជាមួយនឹងសំណង 200លានរៀល

កញ្ញាសុខ ចិន្ដា ហៅ វ៉ាន់ នីឡា និងត្រូវជាប្អូនស្រីរបស់លោកសុខ ជំនោ ត្រូវបានតុលាការកាត់ក្ដីឲ្យនាងឈ្នះ នៅក្នុងជម្លោះជាមួយគូស្នេហ៍។

បន្ទាប់ពីផ្ទុះរូបភាពអាក្រាតកាយនៅតាមបណ្ដាញសង្គមអនឡាញ វ៉ាន់ នីឡា បានដាក់ពាក្យបណ្ដឹងទៅកាន់តុលាការ ដើម្បីស្វែងរកយុត្តិធម៌ ខណៈដែលមហាជនជាច្រើនបានសម្ដែងក្ដីបារម្ភថា វ៉ាន់ នីឡា ទំនងជាមិនអាចឈ្នះរឿងក្ដីនោះទេ ព្រោះខាងក្រុមគ្រួសាររបស់គូស្នេហ៍នាង ជាគ្រួសារមួយដែលមានឥទ្ធិពលគួរសម ជាពិសេសគឺ តុលាការបានអូសបន្លាយពេលយ៉ាងយូរ ដោយគ្មានដំណោះស្រាយអ្វី។

ថ្មីៗនេះនាង បានសរសរសារនៅក្នុងបណ្ដាគណីហ្វេសប៊ុកផ្ទាល់ខ្លួនថា សារទរនូវជ័យជំនះរបស់ខ្លួន ដែលតុលាការនៃសាលាដំបូងបានសម្រេចឱ្យនាងឈ្នះក្ដី លើចុងចោទជាគូស្នេហ៍ខ្លួន ដើម្បីជាការជួសសងនូវភាពអាម៉ាស់ដែលនាងទទួលកន្លងមក។ ទោះជាយ៉ាងណាគេមិនដឹងថា គូរស្នេហ៍នាងព្រមទទួលយកការសម្រេចពីចៅក្រមនៃសាលាដំបូងត្រឹមប៉ុណ្ណឹង ឬក៏ត្រូវធ្វើការប្ដឹងឧទ្ធរណ៍ទៅទៀត?

សារដែលនាងសរសេរនៅក្នុងបណ្ដាញសង្គម៖ «Hello everyone this is good news ! តុលាការបានប្រកាសសាលក្រមរួចហើយ នៅសាលាដំបូងរាជធានីភ្នំពេញ។ 1-ផ្តន្ទាទោសគុយសិទ្ធិសក្តិចំនួន1ឆ្នាំ , 2-សំណងជំងឺចិត្ត 200លានរៀល។ នាងខ្ញុំសូមអរគុណបងប្អូនប្រជាពលរដ្ឋខ្មែរទាំងក្នុង និងក្រៅប្រទេស។ អរគុណសមាគមមិត្តសិល្បៈស្ម័គ្រចិត្តជួយសង្គម ក្រុមគ្រួសារតារាកម្ពុជា លោកមេធាវី បូរ៉ា និងលោកធាវីសុខចាន់ ក៏ដូចជាបងប្អូនសិល្បករដែលបានផ្តិតមេដៃលើញត្តិចំនួន 600នាក់ជាង តាមរយៈលោកជំទាវរដ្ឋមន្ត្រីក្រសួងវប្បធម៌ ដើម្បីជំរុញចំណាត់ការរបស់ក្រសួងមហាផ្ទៃ។ នាងខ្ញុំសូមថ្លែងអំណរគុណមែនទែន។នាងខ្ញុំនឹងផ្តល់ព័ត៌មានកលម្អិតនាពេលបន្តិចទៀតនេះ»៕

August 15, 2017

Category: សង្គម និងសេដ្ឋកិច្ច