សង្គម និងសេដ្ឋកិច្ច - La Reine Media

Nokia 8 ៖ ថាភ្លោះ ភ្លោះមែន!

ក្រោយពីវិលរកមិត្តចាស់ដែលបានបែកគ្នាអស់រយៈពេលជាច្រើនឆ្នាំមក Nokia បានធ្វើឱ្យពិភពស្មាតហ្វូនមានការភ្ញាក់ផ្អើលឡើងវិញ បន្ទាប់ពីវត្តមានទូរស័ព្ទ Nokia 8 បំពាក់នូវកាមេរ៉ាភ្លោះត្រូវបានបង្ហាញខ្លួនជាផ្លូវការកាលពីថ្ងៃម្សិលមិញហើយ។ រូបរាង និងសមត្ថភាពរបស់ស្មាតហ្វូននេះ វាដូចទៅនឹងអ្វីដែលព័ត៌មានចចាមអារ៉ាមបានចុះផ្សាយស្ទើរគ្មានខុស។

ការឈានជំហានថ្មីនេះ Nokia 8 ត្រូវបានបំពាក់នូវបច្ចេកវិទ្យាកាមេរ៉ា LensCarl Zeiss optic ពីក្រុមហ៊ុន Carl Zeiss AG របស់អាល្លឺម៉ង់ ក្រោយពីចាប់ដៃគ្នាម្ដងទៀតកាលពីខែមុន។ ស្មាតហ្វូននេះមានអេក្រង់ទំហំ 5.3 អ៊ីញ ប្រភេទ IPS LCD2.5D Gorilla Glass 5អាចបង្ហាញរូបភាពដល់កម្រិត QHD ដោយមានគែមអេក្រង់កោងបន្តិច និងមានតួខ្លួនផលិតពីអាលុយមីញ៉ូម 6000 series រឹងដូច Nokia 6 ដែរ។

ចំពោះកាមេរ៉ារបស់វា Nokia បានឱ្យដឹងថា វាអាចថតរូបបានច្បាស់ទាំងខាងមុខ និងខាងក្រោយ ដោយខាងក្រោយមានទំហំ 13MP ទាំង 2 គ្រាប់ ដោយមួយជាប្រភេទពណ៌ មួយទៀតជាMonochrome1.12µm pixels f/2.0 Aperture។ កាមេរ៉ានេះក៏មានប្រើបច្ចេកវិទ្យាទប់លំនឹងនៅពេលថត optical image stabilization (OIS) និង Laser autofocus ។ ក្នុងនោះវាក៏មានមុខងារពិសេស អាច Livestream វីដេអូផ្ទាល់ចូលក្នុងYouTube និង Facebook ពីកាមេរ៉ាមុខក្រោយក្នុងពេលតែមួយដែលក្រុមហ៊ុនហៅថា Dual-Sight ។

Nokia ក៏បានបន្ថែមមុខងារថតសំឡេងថ្មី OZO អាចថតបានទំហំ 360 ឌឺក្រេ ប្រភេទ Surround ច្បាស់ល្អលើសបច្ចេកវិទ្យា Stereo ហើយមួយទៀតទូរស័ព្ទនេះក៏មានសមត្ថភាពអាចថតវីដេអូដល់កម្រិត 4K បាន។ ដោយឡែកសមត្ថភាពម៉ាស៊ីន Nokia 8 ប្រើនូវបន្ទះឈីប Snapdragon 835 ទំហំផ្ទុក 64GB និងដំណើរការដោយប្រព័ន្ធAndroid 7.1 ចេញពីប្រអប់ ប៉ុន្តែវាអាច Update ទៅ Android O ពេលវាដាក់ចេញជាផ្លូវការ។ ចំពោះតម្លៃស្មាតហ្វូននេះត្រូវបានក្រុមហ៊ុនបង្ហើបថា មានតម្លៃប្រមាណ 600 អឺរ៉ូ ប្រហែលនឹង 700 ដុល្លារ ដោយត្រៀមដាក់លក់នៅក្នុងខែកញ្ញាខាងមុននេះ៕

August 17, 2017

ឱកាសរបស់ក្រុមហ៊ុនកម្ពុជាបានមកដល់ហើយ ដើម្បីឈានទៅក្លាយជាអ្នកជំនាញរៀបចំព្រឹត្ដិការណ៍ធំៗ

ដើម្បីបង្កើនទំហំពាណិជ្ជកម្មទ្វេភាគីរវាងប្រទេសកម្ពុជា និងថៃ នាពេលកន្លងមកប្រទេសថៃបានប្រឹងប្រែងបង្កើនសកម្មភាពជាច្រើនពាក់ព័ន្ធនឹងការធ្វើពាណិជ្ជកម្មរួមគ្នា។ ថ្មីៗនេះតំណាងពាណិជ្ជកម្មនៃស្ថានឯកអគ្គរាជទូតថៃបានបញ្ជាក់ថា បច្ចុប្បន្នក្រុមហ៊ុនរៀបចំព្រឹត្ដិការណ៍ធំៗនៅប្រទេសថៃ (events Organizer) កំពុងមានចំណាប់អារម្មណ៍ក្នុងការធ្វើកិច្ចសហការជាមួយក្រុមហ៊ុននៅកម្ពុជាជាខ្លាំង។

លោក ជីរ៉ាវុឍ សុវណ្ណអាត អគ្គទីប្រឹក្សាពាណិជ្ជកម្មនៃស្ថានឯកអគ្គរាជទូតថៃប្រចាំនៅកម្ពុជា បានបញ្ជាក់ថាដោយផ្អែកទៅលើការអភិវឌ្ឍនៅប្រទេសកម្ពុជាដែលមានការរីកចម្រើនខ្លាំង គួបផ្សំនឹងការរក្សាបាននូវកំណើនសេដ្ឋកិច្ចជារៀងរាល់ឆ្នាំ បានធ្វើឱ្យពាណិជ្ជករថៃក៏ដូចជាក្រុមហ៊ុនធំៗជាច្រើនមានការចាប់អារម្មណ៍លើទីផ្សារកម្ពុជាយ៉ាងខ្លាំង។ លោកបន្ដថា ក្រៅពីមានក្រុមហ៊ុនពាណិជ្ជកម្មផ្នែកសំណង់ សម្ភារប្រើប្រាស់ក្នុងផ្ទះ ម្ហូបអាហារ និងក្រុមហ៊ុនពាក់ព័ន្ធនិងការផលិតភាពយន្ដជាដើមបានមកធ្វើកិច្ចសហការគ្នាជាមួយក្រុមហ៊ុននៅប្រទេសកម្ពុជាហើយ បច្ចុប្បន្នក៏មានក្រុមហ៊ុនដែលមានអាយុកាលចំណាស់ៗនៅប្រទេសថៃមានជំនាញលើការងាររៀបចំកម្មវិធីព្រឹត្ដិការណ៍ធំៗ (events Organizer)ជាច្រើនចាប់អារម្មណ៍ចង់សហការជាមួយនឹងក្រុមហ៊ុននៅកម្ពុជា។

អគ្គទីប្រឹក្សាពាណិជ្ជកម្មនៃស្ថានឯកអគ្គរាជទូតថៃ បន្ថែមថា បច្ចុប្បន្នមានក្រុមហ៊ុននៅបណ្ដាប្រទេសរីកចម្រើនមួយចំនួននៅក្នុងតំបន់កំពុងតែមានការចាប់អារម្មណ៍លើផ្នែកនេះ ពិសេសពួកគេក៏កំពុងតែមានសក្ដានុពលនៅក្នុងតំបន់ផងដែរ ដូចជាប្រទេសសិង្ហបុរី ម៉ាឡេស៊ី ជាដើម។ ដូច្នេះលោកមានជំនឿថា ប្រសិនបើក្រុមហ៊ុននៅកម្ពុជា និងក្រុមហ៊ុនមកពីប្រទេសថៃរួមសហការគ្នាលើការងារនេះ នឹងអាចជំរុញឱ្យប្រទេសទាំងពីរមានសក្ដានុពលលើផ្នែករៀបចំព្រឹត្ដិការណ៍ធំៗ ដូចបណ្ដាប្រទេសទាំងនោះដែរ។

លោក ជីរ៉ាវុឍ សុវណ្ណអាត សង្កត់ធ្ងន់ថា៖«តាមរយៈកិច្ចសហការនេះក្រៅពីបានធ្វើឱ្យក្រុមហ៊ុននៅកម្ពុជាមានដំណើរការល្អលើការរៀបចំព្រឹត្ដិការណ៍ធំៗឈានទៅក្លាយជាក្រុមហ៊ុនជំនាញ និងមានសក្ដានុពលខ្លាំងហើយ យុវជនកម្ពុជាក៏មានឱកាសបានរៀនសូត្រពីបទពិសោធជាច្រើនពីដៃគូមកពីប្រទេសថៃផងដែរ ព្រោះក្រុមហ៊ុនទាំងនោះមានបទពិសោធមិនតិចជាង50ឆ្នាំទេ ពោលចាប់តាំងពីប្រទេសថៃបើកទីផ្សារសេរីមកម្ល៉េះ ម្យ៉ាងពួកគេក៏មានគំនិតច្នៃបង្កើតថ្មី(Creative)ច្រើនដែរ ។ ខ្ញុំសង្ឃឹមថា តាមរយៈកិច្ចសហការនាពេលអនាគត ក្រុមហ៊ុនថៃនឹងផ្ដល់ការអប់រំ ឬក៏អាចបញ្ជូនយុវជនកម្ពុជាទៅសិក្សានៅប្រទេសថៃផ្ទាល់តែម្ដង លើផ្នែកជំនាញមួយចំនួនពាក់ព័ន្ធនឹងការងារនេះដើម្បីបង្កើនសមត្ថភាពក្នុងការបំពេញកិច្ចការងារឱ្យមានប្រសិទ្ធភាព»។

គួរបញ្ជាក់ថា នៅខែវិច្ឆិកា ឆ្នាំ2017ខាងមុខ ក្រុមហ៊ុនមានបទពិសោធលើការងាររៀបចំព្រឹត្ដិការណ៍ធំៗប្រមាណ20ក្រុមហ៊ុននឹងមកដល់ប្រទេសកម្ពុជា ដើម្បីស្វែងរកដៃគូសហការគ្នាជាមួយក្រុមហ៊ុននៅកម្ពុជា។ កម្មវិធីនេះនឹងត្រូវរៀបចំឡើងដោយតំណាងពាណិជ្ជកម្មនៃស្ថានទូតថៃ ប្រចាំនៅកម្ពុជាផងដែរ៕

August 17, 2017

ក្រសួងចំនួន4 រួមគ្នាដោះស្រាយបញ្ហាទីផ្សារផលិតផលខ្មែរ

ភ្នំពេញៈ ក្រសួងចំនួន4 បានបើកសិក្ខាសាលារួមគ្នាដើម្បីដោះស្រាយបញ្ហាទីផ្សារកសិផល និងផលិតផលខ្មែរដែលផលិតក្នុងស្រុកដើម្បីជំរុញការនាំចេញ ក្នុងនោះរដ្ឋមន្ត្រីពាណិជ្ជកម្មបានជំរុញឲ្យវិស័យឯកជនធ្វើការរួមគ្នាដើម្បីដោះស្រាយបញ្ហានេះផង។

ក្រសួងទាំង4 នោះរួមមាន ក្រសួងពាណិជ្ជកម្ម ក្រសួងកសិកម្ម រុក្ខាប្រមាញ់ និងនេសាទ ក្រសួងឧស្សាហកម្ម និងសិប្បកម្ម និងក្រសួងទេសចរណ៍។

ថ្លែងក្នុងពិធីបើកសិក្ខាសាលានាព្រឹកថ្ងៃទី១៧ សីហានេះ រដ្ឋមន្ត្រីពាណិជ្ជកម្មលោក ប៉ាន សូរស័ក្តិ បានស្នើសុំឲ្យវិស័យឯកជនរួមគ្នាដោះស្រាយបញ្ហាទីផ្សារផលិតផលរបស់ពួកគេដើម្បីជំរុញការនាំចេញរបស់កម្ពុជា និងបានជំរុញឲ្យតំណាងវិស័យឯកជនធ្វើការពិភាក្សា និងផ្លាស់ប្តូរយោបល់គ្នាដើម្បីលើកជាសំណូមពរផ្សេងៗមកកាន់គណៈអធិបតីដើម្បីធ្វើការដោះស្រាយតាមការសមស្រប។

ឯកឧត្កមបានបន្តថា នេះជាលើកទី2ហើយដែលក្រសួងពាណិជ្ជកម្មបានសហការជាមួយក្រសួងឧស្សាហកម្ម និងសិប្បកម្ម ក្រសួងកសិកម្ម រុក្ខាប្រមាញ់ និងនេសាទ និងក្រសួងទេសចរណ៍ធ្វើការរៀបចំសិក្ខាសាលានេះឡើងដើម្បីកំណត់នូវបញ្ហាប្រឈម និងដាក់ចេញនូវវិធានការឆ្លើយតបនានាសំដៅលើកកម្ពស់ចង្វាក់ផលិតកម្ម និងជំរុញការធ្វើពិពិធកម្មទីផ្សារសម្រាប់ផលិតផលខ្មែរ។

រដ្ឋមន្ត្រីក្រសួងពាណិជ្ជកម្មក៏បានលើកយកកំណើនសេដ្ឋកិច្ចរបស់កម្ពុជា ដែលសម្រេចបានជាមធ្យម7ភាគរយក្នុងរយៈពេល2ទសវត្សរ៍ចុងក្រោយ និងការប្តេជ្ញាចិត្តរបស់ក្រសួងពាណិជ្ជកម្មក្នុងការបន្តស្វែងរកទីផ្សារជូនសហគ្រាសធុនតូច និងធម្យមនៅកម្ពុជា។ លើសពីនេះឯកឧត្តមរដ្ឋមន្ត្រីក៏បានបង្ហាញជំហរគាំទ្រ ចំពោះការចាប់ដៃគូធុរកិច្ចរវាងម្ចាស់ផលិតផល និងអ្នកទទួលទិញនៅក្នុងសិក្ខាសាលាដែលជាវឌ្ឍនភាពថ្មីមួយទៀតសម្រាប់លើកកម្ពស់កិត្យានុភាពរបស់ផលិតផលខ្មែរ៕

August 17, 2017

ធ្លាយរឿង Seungri លួចមានទំនាក់ទំនងស្នេហ៍ជាមួយតារាស្រីហ្វីលីពីន

តាមរយៈសារព័ត៌មានកម្សាន្ដរបស់ប្រទេសថៃ Teenee ដែលចេញផ្សាយនៅថ្ងៃនេះថា ជាព័ត៌មានមួយដែលកំពុងល្បីពេញប្រទេសកូរ៉េខាងត្បូងដែលតារាចម្រៀងប្រុស លោក Lee Seung Hyun ឬ Seungri សមាជិកចម្រៀងក្រុម Big Bang កំពុងលួចមានទំនាក់ទំនងស្នេហាជាមួយតារាបង្ហាញម៉ូដស្រីល្បីឈ្មោះមួយរូបរបស់ប្រទេសហ្វីលីពីនយ៉ាងស្ងាត់ៗនៅលើទឹកដីកោះបាលី។

សារព័ត៌មានខាងលើបានឱ្យដឹងបន្ដទៀតថា នៅក្នុងពិធីជប់លៀងដ៏ធំមួយនៅលើទឹកដីកោះបាលី ប្រទេសឥណ្ឌូនេស៊ី តារាបង្ហាញម៉ូដស្រីជនជាតិហ្វីលីពីន នាង Ellen Adarna បានអង្គុយក្បែរតារាចម្រៀងប្រុស Seungri យ៉ាងស្និទ្ធស្នាលផ្អែមល្ហែម និងនែបនិត្យរហូតដល់សាច់ប៉ះសាច់ទៀតផង។

គួរបញ្ជាក់ផងដែរថា ព័ត៌មាននេះកំពុងតែផ្ទុះឡើង និងធ្វើឱ្យភ្ញាក់ផ្អើលពេញក្នុងបណ្ដាញពិភពសិល្បៈកូរ៉េ ដែលរហូតមកទល់ពេលនេះនៅមិនទាន់មានតំណាង ឬ អ្នកគ្រប់គ្រងតារានៅក្នុងផលិតកម្ម YG Entertaiment ណាមួយចេញមកបំភ្លឺអំពីរឿងនេះនៅឡើយទេ៕

August 17, 2017

Paris Hilton រងគ្រោះ ព្រោះលេចធ្លាយវីដេអូសិចរបស់ខ្លួន

ថ្មីៗនេះអតីតតារាចម្រៀងស្រីស៊េរីចាស់ល្បីឈ្មោះម្នាក់ Paris Hilton បានផ្ដល់បទសម្ភាសជាមួយទស្សនាវដ្តី Marie Claire ដោយនាងបានរៀបរាប់ពីអារម្មណ៍ពិតរបស់ខ្លួន អំពីការលេចធ្លាយនូវវីដេអូសិចរបស់នាង ដែលមានចំណងជើងថា “One Night In Paris” ឬយប់មួយនៅក្នុងទីក្រុងប៉ារីស កាលពីឆ្នាំ 2014។

វីដេអូសិចទាំងមូលបានបង្ហាញពីភាពស្រស់ស្អាតរបស់សណ្ឋាគារ Hilton Hotel Group ជាទីកន្លែងដែលនាងជួបនឹងភាពអាម៉ាស និងសោកស្ដាយខ្លាំងបំផុតនៅក្នុងឆាកជីវិត ហើយវីដេអូនេះផងដែរត្រូវបានថតដោយអតីតសង្សាររបស់នាងឈ្មោះ Rick Salomon នៅទីក្រុងប៉ារីសដែលបានបញ្ចេញខ្សែវីដេអូរបស់នាងដោយគ្មានការអនុញ្ញាតអំពីនាងឡើយ។

Paris Hilton បានបន្ដប្រាប់ទស្សនាវដ្ដី Marie Claire ថា “ជាការពិតណាស់ ខ្ញុំឈឺចាប់ខ្លាំងណាស់ដោយសារតែមួយជីវិតនេះ ខ្ញុំស្រឡាញ់ជីវិតដូចជាម្ចាស់ក្សត្រី Diana ដែលពោរពេញទៅដោយភាពស្រស់ស្អាត និងមានរាងស្វែលស្អាតជាងស្ត្រីដ៏ទៃ ហើយទទួលបានពរជ័យគ្រប់ក្តីប្រាថ្នាទាំងអស់។ ខ្ញុំគួរតែមានជីវិតបែបនោះ ប៉ុន្តែដោយសារតែវីដេអូនោះ ទើបខ្ញុំត្រូវបានគេវិនិច្ឆ័យ និងនិយាយដើមក្នុងផ្លូវអាក្រក់ជាមួយមិត្តប្រុសរបស់ខ្ញុំ”។

គួរបញ្ជាក់ផងដែរថា រឿងអាស្រូវដ៏គួរឱ្យអាម៉ាសនេះ បានរីកសាយភាយពេញពិភពលោក ដែលជាហេតុបណ្ដាលឱ្យនាងក្លាយជាមនុស្សស្រីម្នាក់បាត់បង់ការងារ និងអាជីពដែលខ្លួនស្រឡាញ់ ។ Paris Hilton បានបញ្ជាក់ប្រាប់ថា “បើគ្មានវីដេអូសិចនោះទេ ម្លេះខ្ញុំបានក្លាយទៅជាម្ចាស់ក្សត្រី Diana បាត់ទៅហើយ”៕

August 17, 2017

ទៀតហើយ! អាហារដែលយើងញ៉ាំរាល់ព្រឹកត្រូវបានរកឃើញថា មានផ្ទុកសារធាតុគីមីខ្ពស់

ភ្នំពេញ៖ កាលពីសប្តាហ៍កន្លងទៅនេះ គេហទំព័រកាសែតឡារ៉ែន បានចេញផ្សាយជាបន្តបន្ទាប់អំពីអាហារ និងបន្លែផ្សេងៗដែលផ្ទុកសារធាតុគីមីដែលនាំឱ្យប៉ះពាល់ដល់សុខភាព ឥឡូវនេះស្រាប់តែមន្ត្រីជំនាញកាំកុងត្រូលបានរកឃើញមានសារធាតុគីមីខ្ពស់នៅលើអាហារដែលយើងញុំារាល់ព្រឹកទៀតហើយ និងបានហាមឃាត់មិនឱ្យចរាចរលក់នៅលើទីផ្សារជាបន្តទៀតផង។

ការរកឃើញនេះបានកើតឡើងនៅព្រឹកថ្ងៃទី16 ខែសីហា ឆ្នាំ2017ម្សិលមិញនេះបន្ទាប់រថយន្តពិសោធចល័តរបស់អគ្គនាយកដ្ឋានកាំកុងត្រូលបានចុះទៅត្រួតពិនិត្យទំនិញ បន្លែ ផ្លែឈើនៅក្នុងផ្សារតាកែវ ដោយបានធ្វើការដកហូតបន្លែផ្លែឈើជាគំរូចំនួន56គំរូសម្រាប់យកទៅពិសោធក្នុងរថយន្តចល័ត។ ជាលទ្ធផលក្រោយពីបានធ្វើតេស្តពិសោធលើបន្លែផ្លែឈើ និងសសៃគុយទាវរួចហើយនោះ មន្ត្រីជំនាញកាំកុងត្រូលបានរកឃើញនូវសំណល់ថ្នាំកសិកម្មនៅលើស្លឹកជីររណា និងសារធាតុប៉ូរ៉ាក់លើសរសៃគុយទាវបាញ់កាញ់។ ទំនិញដែលរកឃើញនូវសារធាតុគីមីហាមឃាត់ និងសំណល់ថ្នាំកសិកម្មនេះ មន្ត្រីជំនាញកាំកុងត្រូលបានចាត់វិធានការដោយហាមលែងឱ្យចរាចរលក់លើទីផ្សារតទៅទៀតទេ ព្រោះវាធ្វើឱ្យប៉ះពាល់ដល់សុខភាពមនុស្សយ៉ាងធ្ងន់ធ្ងរ។

នៅក្នុងយុទ្ធនាការត្រួតពិនិត្យទំនិញ បន្លែ ផ្លែឈើដោយរថយន្តពិសោធចល័តរបស់កាំកុងត្រូលនេះ បានធ្វើឡើងក្រោមការដឹកនាំ និងចូលរួមដោយលោក ខាន់ សុខា អភិបាលរងខេត្ត លោក ប៉ោ លាងគង់ ប្រធានសាខាកាំកុងត្រូលខេត្ត សហការជាមួយនឹងមន្ទីរពាណិជ្ជកម្មខេត្ត និងមន្ត្រីនគរបាលប្រចាំការនៅផ្សារតាកែវ។

គួរបញ្ជាក់ថា ម្សៅប៉ូរ៉ាក់ត្រូវបានគេដាក់ក្នុងប្រហុក ផ្អក ណែម ជើងមាន់ ឬសរសៃគុយទាវដើម្បីឱ្យសាច់វាស ស្វិត និងរក្សាទុកបានយូរ ប៉ុន្តែសារធាតុទាំងនេះជាសារធាតុគីមី ធ្វើឱ្យប៉ះពាល់ដល់សុខភាពអ្នកបរិភោគយ៉ាងខ្លាំងទើបមានការហាមប្រាមមិនឱ្យចរាចរលក់នៅលើទីផ្សារជាដាច់ខាត៕

August 17, 2017

Real Madrid ផ្តល់ភាពអាម៉ាសដល់ Barcelona ដើម្បីលើកពាន Super Cup

ខ្សែប្រយុទ្ធ Marco Asensio បានបង្ហាញឲ្យឃើញពីមូលហេតុដែលរូបគេកំពុងតែស្ថិតក្នុងការចាប់អារម្មណ៍យ៉ាងខ្លាំងពីសំណាក់ក្លិបកំពូលៗនៅអឺរ៉ុប ក្រោយពីរូបគេបានស៊ុតបាល់បញ្ចូលទី1គ្រាប់ ក្នុងពេលក្រុម Real Madrid បានបំបាក់ក្រុមជើងខ្លាំង Barcelona 2 – ០ ដើម្បីលើកពាន Super Cup របស់អេស្ប៉ាញ កាលពីថ្ងៃពុធ។

ក្រោយពីបានកត់ត្រាជ័យជម្នះក្នុងលទ្ធផល 3-1 ពីការប្រកួតជើងទី1 រួចមក Real បានបង្ហាញពីភាពច្បាស់លាស់នៃការលើកពានបើករដូវកាលនេះ ក្រោយពីលេងបានត្រឹមតែ4នាទី ខណៈដែលតារាឆ្នើម Asensio វ័យ21ឆ្នាំ បានស៊ុតបាល់បញ្ចូលទីយ៉ាងល្អខណៈពេលដែលមិត្តរួមក្រុមរបស់គេ បានរត់ទៅកាន់តំបន់ប្រយុទ្ធយឺតពេលបន្តិចនោះ Asensio បានស៊ុតបាល់ពីចម្ងាយចូលក្នុងទីរបស់អ្នកចាំទី Marc-Andre ter Stegen នៃក្រុម Barcelona តែម្តង។

ខ្សែប្រយុទ្ធ Karim Benzema បានបន្ថែមគ្រាប់បាល់1គ្រាប់ទៀតដើម្បីបំពេញការទទួលជ័យជម្នះរបស់ក្រុមខ្លួនតែម្តង ខណៈដែលលោក Ernesto Valverde គ្រូបង្វឹករបស់ក្រុម Barcelona បានគិតទុករួចស្រេចទៅហើយថា នឹងត្រូវប្រឈមមុខនឹងការងារដ៏លំបាកមួយក្នុងការប្រជែងជាមួយនឹង Real Marid ដើម្បីឈ្នះពាននៅរដូវកាលនេះ។ Real Madrid បានចាប់ផ្តើមយ៉ាងល្អឥតខ្ចោះ ហើយពួកគេបានគ្រប់គ្រងស្ថានការណ៍បានទាំងស្រុងក្នុងតង់ទី1 មុននឹងរងសម្ពាធវិញក្នុងតង់ទី2។

ក្រុម Barcelona បានព្យាយាមវាយបកវិញតាមរយៈការវាយសម្រុកយ៉ាងខ្លាំងក្នុងតង់ទី2 ប៉ុន្តែ មិនអាចរកគ្រាប់បាល់បានឡើយ ខណៈដែល Lionel Messi និង Luis Suarez សុទ្ធសឹងបានស៊ុតបាល់ទៅប៉ះនឹងរបាទីទាំងអស់។ ការទទួលជ័យជម្នះនេះបានបន្តធ្វើឲ្យក្រុម Real ទទួលជោគជ័យក្រោមការដឹកនាំរបស់លោក Zinedine Zidane ខណៈដែលក្រុមម្ចាស់ជើងឯកអឺរ៉ុបមួយនេះ បច្ចុប្បន្នបានឈ្នះពានចំនួន៧ ក្នុងរយៈពេល20ខែ ក្រោមការដឹកនាំរបស់លោក Zidane៕

ប្រភពពី៖ The Sun

August 17, 2017

Matuidi ពិនិត្យសុខភាពជាមួយ Juventus មុននឹងបំពេញការផ្ទេរពីក្លិប PSG

ខ្សែបម្រើអន្តរជាតិបារាំង Blaise Matuidi កំពុងតែស្ថិតលើផ្លូវឆ្ពោះទៅកាន់ការបំពេញការផ្ទេរជាផ្លូវការទៅកាន់ក្លិប Juventus ដែលបានយល់ព្រមចំណាយប្រាក់ទៅឲ្យក្លិប Paris Saint-Germain ក្នុងទឹកប្រាក់ប្រមាណជា20លានអឺរ៉ូ (ស្មើនឹង23.5លានដុល្លារអាមេរិក) បូករួមទាំងប្រាក់ឧបត្ថម្ភផ្សេងៗទៀត ក្រោយពីទទួលបានការត្រួតពិនិត្យសុខភាពកាលពីថ្ងៃពុធ។ Matuidi ដែលបានឈ្នះពានក្របខ័ណ្ឌលីក4លើកជាប់ៗគ្នាជាមួយនឹងក្រុម PSG នោះ ត្រូវបានស្វាគមន៍ដោយអ្នកគាំទ្រជាច្រើននាក់ក្នុងពេលរូបគេធ្វើដំណើរទៅដល់អាកាសយានដ្ឋាន Caselle ក្នុងទីក្រុង Torino កាលពីថ្ងៃពុធមុនពេលទទួលការត្រួតពិនិត្យសុខភាព។

រូបគេត្រូវបានរំពឹងទុកថា នឹងចុះហត្ថលេខាលើកុងត្រាមួយដែលនឹងធ្វើឲ្យខ្សែបម្រើវ័យ30ឆ្នាំរូបនេះទទួលបានចំណូល3.5លានអឺរ៉ូ (ស្មើនឹង4.1លានដុល្លារអាមេរិក) ក្នុងមួយរដូវកាលនេះ។ នេះបើយោងទៅតាមការចេញផ្សាយរបស់គេហទំព័រ Gazzetta dello Sport។ ខ្សែបម្រើដ៏មានឥទ្ធិពលដែលជំនាញខាងគ្រប់គ្រងបាល់យ៉ាងរឹងមាំ និងមានសមត្ថភាពក្នុងការបញ្ជូនបាល់យ៉ាងល្អឱ្យទៅដៃគូរូបនេះ បានក្លាយជាគោលដៅរបស់ក្លិប Juventus ជាយូរមកហើយ។ Juventus បានប្រកាសពីការផ្ទេរនេះតាមរយៈការបង្ហោះរូបថតមួយនៅលើគេហទំព័ររបស់ពួកគេ ដែលបង្ហាញពី Matuidi កំពុងតែសើចពេលធ្វើដំណើរដល់កន្លែងពិនិត្យសុខភាព។

កីឡាកររូបនេះនឹងក្លាយជាកីឡាករចំណូលថ្មីទី9របស់ Juventus នៅរដូវក្តៅនេះ ក្រោយពីការនាំយកកីឡាករ Douglas Costa (Bayern Munich), Mattia Di Sciglio (AC Milan), Federico Bernardeschi (Fiorentina) និងអ្នកចាំទី Wojciech Szczesny (Roma)៕

ប្រភពពី៖ Sport24

August 17, 2017

ក្រុមហ៊ុនរថយន្តអាមេរិកបង្ហាញភាពជោគជ័យនៃការលក់រថយន្ត Pickup នៅតំបន់អាស៊ីប៉ាស៊ីហ្វិក

ក្រុមហ៊ុនផលិតរថយន្តដ៏ធំរបស់សហរដ្ឋអាមេរិក Ford បានបង្ហាញភាពជោគជ័យនៃការនាំចេញរថយន្តទៅលក់នៅទីផ្សារក្នុងតំបន់អាស៊ីប៉ាស៊ីហ្វិក ចាប់ពីពាក់កណ្ដាលឆ្នាំ 2017 ថាបានកើនឡើង 21% ប្រៀបធៀបនឹងឆ្នាំ 2016។

តាមរបាយការណ៍ដែលចេញដោយក្រុមហ៊ុន Ford បានឱ្យដឹងថា តួលេខនៃការលក់របស់រថយន្ត Ford Ranger បានកើនឡើងរហូតដល់ 21% ធៀបទៅបើប្រៀបនឹងឆ្នាំ 2016 នៃទីផ្សារប្រទេសអូស្ត្រាលី នូវែលសេឡង់ ហ្វីលីពីន តៃវ៉ាន់ ថៃ និងវៀតណាម។ ដោយក្នុងនោះ រថយន្តនេះជាប់ចំណាត់ថ្នាក់ជារថយន្តលក់ដាច់បំផុតនៅ វៀតណាម តៃវ៉ាន់ កម្ពុជា ញូដេលីដូនី និងនូវែលសេឡង់។

តាមការបញ្ជាក់របស់លោក Mark Ovenden អនុប្រធានផ្នែកលក់ ទីផ្សារ និងសេវាកម្ម ប្រចាំតំបន់អាស៊ីប៉ាស៊ីហ្វិក បាននិយាយថា៖ តម្រូវការអតិថិជនចំពោះរថយន្ត Ford Ranger បានបន្តកើនឡើងជានិច្ច ព្រោះពួកគេចង់បានរថយន្តដែល អាចប្រើបានសម្រាប់ការងារនិងការកម្សាន្ត ផងដែរ។ មួយវិញទៀត ដោយសាររថយន្ត Ford Ranger បំពាក់ដោយបច្ចេកវិទ្យាឆ្លាតវៃលើសរថយន្ត Pickup ដទៃទាំងការរចនារូបរាងថ្មី សន្សំសំចៃប្រេង និងផ្ដល់ផាសុកភាពខ្ពស់ ទាំងនេះជាអ្វីដែលអតិថិជនចង់បាន ហើយយើងក៏រំពឹងថា អត្រាការលក់នឹងបន្តកើនឡើងនាឆ្នាំបន្ទាប់ៗទៀតដែរ។

ប្រទេសអូស្ត្រាលីបាននាំមុខគេក្នុងការលក់រថយន្ត Ford Ranger នៅក្នុងតំបន់អាស៊ីប៉ាស៊ីហ្វិកដោយការលក់ក្នុងឆមាសទីមួយនៃឆ្នាំនេះបានកើនឡើងជិត 19% រក្សាភាពជាអ្នកនាំមុខគេនៅក្នុងទីផ្សាររថយន្ត Pickup ។ នៅនូវែលសេឡង់ រថយន្ត Ford Ranger ជារថយន្តលក់ដាច់បំផុត ដែលចំនួននៃការលក់នេះបានកើនឡើងដល់ទៅ 24% ក្នុងពាក់កណ្ដាលឆ្នាំ 2017។

រីឯនៅប្រទេសថៃវិញចំនួនរថយន្ត Ford Ranger ដែលចរាចរលើផ្លូវសព្វដថ្ងៃបានកើនឡើងយ៉ាងសន្ធឹក។ បើយើងងាកមកមើលចំនួននៃការលក់វិញបានកើនឡើងរហូតដល់ 51% និងមានចំណែកទីផ្សារ 11,7 %។ នៅប្រទេសហ្វីលីពីនការលក់រថយន្ត Ford Ranger បានកើនឡើងជិត 16% និងមានចំណែក 25% នៃទីផ្សាររថយន្ត Pickup ទាំងមូល។ រថយន្ត Ford Ranger បន្តនាំមុខគេផ្នែករថយន្ត Pickup នៅប្រទេសវៀតណាមរយៈពេល 4 ឆ្នាំជាប់គ្នា ដោយការលក់ពីពាក់កណ្ដាលឆ្នាំ 2017 មានកំណើន 2% និងមានចំណែកទីផ្សារ 57% ក្នុងទីផ្សាររថយន្ត Pickup ទាំងមូល។

នៅតៃវ៉ាន់ Ford Ranger បានរក្សាភាពនាំមុខនៅក្នុងទីផ្សាររថយន្ត Pickup ជាមួយនឹងការលក់កើនឡើង 29% ពីមួយឆ្នាំទៅមួយឆ្នាំ ដោយសារតែតម្រូវការអតិថិជនកើនឡើងជាលំដាប់។ ក្រុមហ៊ុន Ford Ranger ក៏បានរក្សាតំណែងជារថយន្ត Pickup លក់ដាច់បំផុតនៅក្នុងទីផ្សារកំពុងរីកចម្រើនផ្សេងៗដូចជាប្រទេសកម្ពុជានិងទីញូកាលីដូនៀជាដើម៕

August 17, 2017

លោក Vitorino៖ កម្ពុជា U23 នឹងទទួលបានបទពិសោធកាន់តែច្រើនពេលប៉ះវៀតណាមថ្ងៃនេះ

លោក Leonardo Vitorino ជឿជាក់ថា ក្រុមបាល់ទាត់ជម្រើសជាតិកម្ពុជាអាយុក្រោម23ឆ្នាំ នឹងបង្ហាញពីទម្រង់លេងកាន់តែល្អប្រសើរ និងទទួលបានបទពិសោធកាន់តែច្រើន នៅពេលដែលពួកគេប្រកួតជាមួយនឹងក្រុមជើងខ្លាំងវៀតណាមអាយុក្រោម23 ក្នុងការប្រកួតជុំទី2នៃពូល B ក្នុងព្រឹត្តិការណ៍ស៊ីហ្គេម នាទីក្រុងគូឡាឡាំពួ ប្រទេសម៉ាឡេស៊ី នៅរសៀលថ្ងៃនេះ។

ក្រុមជម្រើសជាតិកម្ពុជា U23 បានជួបការខកចិត្តនៅថ្ងៃប្រកួតបើកឆាកនៃពូល B កាលពីថ្ងៃអង្គារ ក្រោយពីបានរងបរាជ័យក្នុងលទ្ធផល 2-០ ក្រោមស្នាដៃក្រុមជម្រើសជាតិហ្វីលីពីន U23 និងបានបាត់បង់ខ្សែការពារម្នាក់គឺឆោម ភីសា ដោយសារតែការទទួលការពិន័យកាតក្រហមនៅពេលជិតបញ្ចប់ការប្រកួត។ ប៉ុន្តែ បន្ទាប់ពីការប្រកួតនេះ លោក Vitorino បានមើលឃើញថា ក្រុមរបស់លោកនៅខ្វះបទពិសោធក្នុងពេលលេងក្រៅទឹកដី ក៏ដូចជាបានខ្ជះខ្ជាយឱកាសជាច្រើន ពិសេសក្នុងតង់ទី2។

គ្រូបង្វឹកសញ្ជាតិប្រេស៊ីលរូបនេះបានឲ្យដឹងថា៖ «យើងបានធ្វើឲ្យបាត់បង់បាល់ជាច្រើនក្នុងតង់ទី1ពិសេសនៅតំបន់បម្រើ។ ក្នុងការប្រកួតតង់ទី2 យើងលេងបានល្អប្រសើរ និងបានបង្កើតឱកាសនៅមុខទីគូប្រកួតជាច្រើនដង តែធ្វើមិនបានសម្រេច។ ក្រុមយុវជនរបស់យើងក៏នៅខ្វះបទពិសោធផងដែរ»។ ដោយឡែក ក្រុមបាល់ទាត់ជម្រើសជាតិវៀតណាម U23 ដែលជាគូប្រកួតរបស់កម្ពុជានៅថ្ងៃនេះ បានចាប់ផ្តើមយ៉ាងល្អ តាមរយៈការផ្តួលក្រុមជម្រើសជាតិទីម័រ យ៉ាងចាស់ដៃក្នុងលទ្ធផល 4-0 ក្នុងការប្រកួតក្នុងពូលដូចគ្នានេះ។

វៀតណាម គឺជាក្រុមមួយក្នុងចំណោមក្រុមដែលត្រូវបានរំពឹងទុកថា នឹងឆ្លងផុតវគ្គចែកពូលទៅកាន់វគ្គពាក់កណ្តាលផ្តាច់ព្រ័ត្រ ស្របពេលដែលលោក Vitorino ក៏ទទួលស្គាល់ពីភាពខ្លាំងរបស់គូប្រកួតដែលជាប្រទេសជិតខាងរបស់កម្ពុជាមួយនេះផងដែរ។ លោកបានឲ្យដឹងថា៖ «វៀតណាម គឺជាក្រុមដ៏ខ្លាំងមួយប្រចាំយុទ្ធនាការនេះ។ ពួកគេមានកម្រិតនៃការលេងបាល់ទាត់យ៉ាងល្អ និងប្រជុំដោយកីឡាករឆ្នើមៗជាច្រើន»។ ប៉ុន្តែ ទោះបីជាយ៉ាងណា គ្រូបង្វឹករូបនេះជឿជាក់ថា ក្រុមកម្ពុជា U23 នឹងបង្ហាញពីទម្រង់លេងបានល្អប្រសើរជាងការប្រកួតលើកទី1។ លោក Vitorino បាននិយាយថា៖ «ជាការរំពឹងទុក ខ្ញុំជឿជាក់ថា ក្រុមរបស់ខ្ញុំ នឹងបន្តធ្វើឲ្យបានល្អប្រសើរជាងមុន ទាំងទម្រង់លេងជាក្រុម និងជាបុគ្គលិក។ ជាមួយនឹងការមានបទពិសោធតិចតួចក្នុងដៃ ការប្រកួតថ្ងៃនេះ នឹងផ្តល់ឲ្យក្រុមយុវជនកម្ពុជាទទួលបានបទពិសោធកាន់តែច្រើន»។ ក្នុងការប្រកួតក្នុងពូលតែមួយនាថ្ងៃនេះផងដែរ ក្រុមជម្រើសជាតិឥណ្ឌូនេស៊ី នឹងត្រូវប៉ះជាមួយនឹងហ្វីលីពីន ខណៈដែលជើងខ្លាំងថៃ ប្រកួតជាមួយនឹងក្រុមជម្រើសជាតិទីម័រ៕

កម្មវិធីប្រកួតថ្ងៃនេះ
Vietnam U23 Vs Cambodia U23 ម៉ោង 3 រសៀល
Indonesia U23 Vs Philippines U23 ម៉ោង 7:45 យប់
Thailand U23 Vs East Timor U23 ម៉ោង 7:45 យប់

August 17, 2017

Category: សង្គម និងសេដ្ឋកិច្ច