សង្គម និងសេដ្ឋកិច្ច - La Reine Media

អ្នកវិនិយោគខាងសំណង់ត្រូវប្រុងប្រយ័ត្នឱ្យខ្លាំង ចំពោះការសាងសង់អគារខ្ពស់ៗក្នុងរាជធានីភ្នំពេញ

ភ្នំពេញ – ដោយថ្មីៗនេះនៅទីក្រុងភ្នំពេញទទួលបានបទពិសោធនៃការបាក់ដីនៅត្រង់ចំណុចការដ្ឋានសាងសង់គម្រោងដ៏ធំមួយមកពីប្រទេសកូរ៉េឈ្មោះថា ប៊ូយ៉ុង ដែលស្ទើរតែបង្កឱ្យមានបញ្ហាដល់វិថីសហព័ន្ធរុស្សីប្រសិនគ្មានការទប់ស្កាត់ទាន់ពេលវេលាទេនោះ។ អភិបាលរាជធានីភ្នំពេញបានអំពាវនាវដល់អ្នកវិនិយោគ និងក្រុមហ៊ុនម៉ៅការសាងសង់ទាំងអស់ឱ្យបង្កើនការប្រុងប្រយ័ត្នខ្ពស់ និងសិក្សាឱ្យបានច្បាស់លាស់ដើម្បីបញ្ចៀសនូវហានិភ័យដែលអាចនឹងប៉ះពាល់ដល់ប្រជាពលរដ្ឋរស់នៅជុំវិញសំណង់អគារ និងម្ចាស់គម្រោងផ្ទាល់។

ឯកឧត្ដម ឃួង ស្រេង អភិបាលរាជធានី បានបញ្ជាក់ពីបទពិសោធដែលលោកធ្លាប់ជួបប្រទះកន្លងមកថា នៅពេលខ្ញុំនៅជាអភិបាលរងតែងជួបប្រទះជារឿយៗនូវបញ្ហា និងទទួលបានពាក្យបណ្ដឹងពីប្រជាពលរដ្ឋរស់នៅជិតខាងនៃខុនដូ និងសំណង់អគារខ្ពស់ៗនៅក្នុងរាជធានីភ្នំពេញ។ ពិសេសក្នុងខណ្ឌទាំង4ក្នុងទីក្រុងគ្រាដែលពួកគាត់រស់នៅជិតនោះជួបនឹងបញ្ហាប៉ះពាល់ និងខូចខាតដល់ទ្រព្យសម្បិត្ដដោយសារតែក្រុមហ៊ុនមិនបានសិក្សាឱ្យបានច្បាស់លាស់ពីសណ្ឋានដី ព្រោះភាគច្រើនទីតាំងនៅក្នុងខណ្ឌទាំង4នោះជាអតីតដីបឹងដែលត្រូវបានចាក់បំពេញដោយដីខ្សាច់។ ឯកឧត្ដមឃួង ស្រេង បានបញ្ជាក់ថា៖«ខ្ញុំសូមអំពាវនាវដល់បងប្អូនប្រជាពលរដ្ឋ និងម្ចាស់គម្រោងវិនិយោគសូមសិក្សាឱ្យបានច្បាស់លាស់នឹងបង្កើនការប្រុងប្រយ័ត្នឱ្យបានហ្មត់ចត់មុននឹងធ្វើការជីកដីសាងសង់សំណង់របស់ខ្លួន។ ភាគច្រើនអគារខ្ពស់ៗ ឬខុនដូទាំងនោះត្រូវជីកដីចុះទៅក្រោមធ្វើចំណតរថយន្តក្រោមដី ដូច្នេះមុននឹងធ្វើចំណតទាំងនោះត្រូវតែមានបច្ចេកទេសទប់ស្កាត់កុំឱ្យមានការហូរច្រោះបាក់ដី ធ្វើយ៉ាងណាកុំឱ្យបង្កគ្រោះថា្នក់ដល់ប្រជាពលរដ្ឋជិតខាងដែលអាចនឹងកើតជាទំនាស់ ព្រោះនៅពេលមានទំនាស់វានឹងធ្វើឱ្យពួកគាត់ខាតពេលវេលា ខាតថវិកាព្រោះសំណង់នោះនឹងត្រូវផ្អាកជាបណ្តោះអាសន្ន»។

ជាងនេះទៅទៀតឯកឧត្ដមក៏បានសង្កត់ធ្ងន់ដល់ក្រុមហ៊ុនដែលទទួលម៉ៅការសាងសង់ត្រូវសិក្សាពីសណ្ឋានដីឱ្យបានច្បាស់លាស់ថា នៅក្នុងរាជធានីដីមួយផ្នែកធំជាដីបូមខ្សាច់ចាក់បំពេញមិនមែនជាដីឥដ្ឋ ឬដីគោកមានតាំងយូរយារមកនោះទេ។

ពាក់ព័ន្ធនឹងការស្រុតបាក់ដីនេះ ឯកឧត្ដមអភិបាលរាជធានីភ្នំពេញបានលើកឡើងថា យើងនឹងសិក្សាមើលនៅពេលក្រោយទៅលើគម្រោងអគារប៊ូយ៉ុងនោះថា តើបានអនុវត្ដទៅតាមបទដ្ឋានដែលក្រសួងបានដាក់ឱ្យអនុវត្ដដែរឬទេ? ប៉ុន្ដែបញ្ហាចំពោះមុខ រដ្ឋបាលសាលារាជធានីភ្នំពេញនឹងចុះពិនិត្យផ្ទាល់ដើម្បីទប់ស្កាត់នូវការបាក់ដីបន្ដទៀតដែលវាអាចនឹងបង្កឱ្យកាន់តែធ្ងន់ធ្ងរឡើង រហូតដល់អាចបណ្ដាលឱ្យបាក់ដាច់ដល់ផ្លូវសហព័ន្ធរុស្សីជាវិថីស្នូល និងសំខាន់បំផុតសម្រាប់ភ្ញៀវជាតិ និងអន្ដរជាតិតែងធ្វើដំណើរទៅមកជាប្រចាំ។

ឯកឧត្ដមបន្ដថា៖ «ដោយសារតែគិតគូរលើបញ្ហាបាក់ដីនេះហើយ ទើបយើងខ្ញុំចុះមកដល់ការដ្ឋានដើម្បីឱ្យគាត់បន្ថែមគ្រឿងចក្រ និងបង្កើនការចាក់ដីទប់ជើងទេរ ព្រោះបើយើងធ្វើកិច្ចការនេះមិនទាន់ពេលវេលាទេនោះ បញ្ហាធំនឹងអាចកើតមានឡើង ព្រោះផ្លូវនេះជាផ្លូវដ៏សំខាន់ និងជាផ្លូវអន្តរជាតិមួយសម្រាប់រាជធានីភ្នំពេញ»៕

August 18, 2017

ឯកឧត្តម ម៉ៅ ភិរុណ៖ បេក្ខជនប្រឡងជោគជ័យត្រូវការកត្តាធំៗចំនួន4យ៉ាង

ការប្រឡងមធ្យមសិក្សានាប៉ុន្មានឆ្នាំចុងក្រោយនេះ ជាព្រឹត្តិការណ៍មួយដែលធ្វើឱ្យមនុស្សគ្រប់គ្នានៅកម្ពុជាយកចិត្តទុកដាក់ និងចាប់អារម្មណ៍។ ក្នុងនោះក៏មានអភិបាលខេត្តជាច្រើនខេត្តចាប់ផ្តើមរៀបចំពិធីផ្តល់បទពិសោធ និងលើកទឹកចិត្តឱ្យសិស្សនៅក្នុងខេត្តដែលលោកគ្រប់គ្រងខិតខំប្រឡងឱ្យបានជាប់និទ្ទេសល្អៗច្រើនជាងខេត្តដទៃនៅកម្ពុជា។

ឯកឧត្តមបណ្ឌិត ម៉ៅ ភិរុណ អភិបាលខេត្តកណ្តាលបានលើកឡើងនៅក្នុងកម្មវិធីសំណេះសំណាលជាមួយនឹងសិស្សានុសិស្សត្រៀមប្រឡងបាក់ឌុបនៅក្រុងតាខ្មៅថា សិស្សានុសិស្សជាផ្នែកមួយយ៉ាងសំខាន់ក្នុងរបស់សង្គម ដែលពួកគេជាអ្នកបន្តវេន និងជាធនធានដែលសង្គមត្រូវការដើម្បីដឹកនាំនាវាសង្គមនាថ្ងៃអនាគតឱ្យឆ្ពោះទៅរកវឌ្ឍភាព។ នៅប៉ុន្មានថ្ងៃទៀតនេះសិស្សថ្នាក់ទី 12 នឹងត្រូវប្រឡងមធ្យមសិក្សាទុតិយភូមិ ហេតុនេះសិស្សានុសិស្សត្រូវត្រៀមខ្លួន និងខិតខំឱ្យអស់ពីលទ្ធភាពដើម្បីឆ្លងកាត់ដំណាក់កាលដ៏មានតម្លៃមួយនេះ។

ឯកឧត្តម ម៉ៅ ភិរុណ បានមានប្រសាសន៍ថា៖ «បេក្ខជនដែលប្រឡងប្រកបដោយភាពជោគជ័យ គឺអាស្រ័យលើការចូលរួមយ៉ាងពីកត្តាសំខាន់ៗចំនួន4 គឺ កត្តាគ្រូ កត្តាសិស្ស កត្តាសង្គម និងកត្តាប្រព័ន្ធអប់រំ»។

ឯកឧត្តម ម៉ៅ ភិរុណ បានលើកឡើងផងដែរថា កត្តាសំខាន់ទាំង4 នេះមានតួនាទីសំខាន់ក្នុងការបណ្តុះបណ្តាលដល់យុវជន ដើម្បីស្ថាបនាប្រទេសឱ្យរីកចម្រើនដូចបណ្តាប្រទេសនានាក្នុងសកលលោក។ ក្នុងនោះ លោកគ្រូអ្នកគ្រូក៏មានតួនាទីសំខាន់ណាស់ក្នុងការបណ្តុះបណ្តាលសិស្សឱ្យមានសមត្ថភាពខ្ពស់ និងប្រកបដោយការទទួលខុសត្រូវខ្ពស់។

ចំពោះសិស្សខ្លួនឯងវិញក៏ត្រូវខិតខំរៀនសូត្រ និងរំលឹកមេរៀនឱ្យបានល្អដើម្បីត្រៀមប្រឡងយកសញ្ញាបត្រដែលនឹងចូលមកដល់នាថ្ងៃទី21 ខែសីហា ឆ្នាំ2017 ដោយប្រកាន់យកទិសស្លោកថា «អ្នកចេះគឺជាប់» និងចងចាំផងដែរថា «ផ្លូវទៅកាន់ភាពជោគជ័យគឺគ្មានដានជើងមនុស្សខ្ជិលនោះទេ»៕

August 18, 2017

កម្ពុជាត្រៀមបំបែកកំណត់ត្រាពិភពលោក តាមរយៈការបង្កើនចំនួនសហគ្រិនវ័យក្មេង

កម្ពុជាកំពុងត្រៀមខ្លួនបំបែកកំណត់ត្រាពិភពលោកតាមរយៈការបង្កើនចំនួនសហគ្រិនក្នុងយុទ្ធនាការរៀនធ្វើជំនួញ ឬ #GoBusiness17 ដែលរៀបចំឡើងដោយក្រសួងអប់រំ យុវជន និងកីឡា។

កម្មវីធីរៀនធ្វើជំនួញនេះ ជាយុទ្ធនាការលើកកម្ពស់ការយល់ដឹងរបស់យុវជនដែលមានអាយុចាប់ពី 15ឆ្នាំ ដល់ 29ឆ្នាំ ចំនួន 3000នាក់ ឱ្យចូលរួមវគ្គបណ្តុះបណ្តាលសហគ្រិនភាព ជំរុញកិច្ចសហការ និងការសម្របសម្រួលរវាងវិស័យនានាដើម្បីគាំទ្រដល់សហគ្រិនវ័យក្មេង និងដើម្បីត្រៀមជាផ្លូវការដើម្បីបំបែកកំណត់ត្រាពិភពលោក Guinness។

សកម្មភាពដែលនឹងធ្វើនៅក្នុងយុទ្ធនាការរៀនធ្វើជំនួញ ឬ#GoBusiness17 នេះមាន 4ចំណុចសំខាន់ៗដូចជា សកម្មភាពទី1 គឺការប៉ុនប៉ងជាផ្លូវការដើម្បីបំបែកកំណត់ត្រាពិភពលោក Guinness ស្តីពីសិក្ខាសាលាធុរកិច្ចជាក់ស្តែងដ៏ធំបំផុត។ ទី2 គឺកិច្ចប្រជុំតុមូលស្តីពីភាពជាសហគ្រិន ដែលមានការចូលរួមពីមន្ត្រីរដ្ឋាភិបាល អង្គការជាតិ អន្តរជាតិ អង្គការដែលជាដៃគូ អ្នកផ្តល់សេវាអប់រំ សហគ្រិនជោគជ័យ និងភាគីពាក់ព័ន្ធដទៃទៀត។ ទី3 គឺវីដេអូប្រកាសពីសេវាកម្មសាធារណៈដើម្បីលើកកម្ពស់ឱកាសសម្រាប់យុវជនក្នុងការទទួលបាននូវការបណ្តុះបណ្តាល និងការគាំទ្រអំពីសហគ្រិនភាព និងទី4 គឺការផ្សព្វផ្សាយតាមប្រព័ន្ធផ្សព្វផ្សាយសង្គមដល់យុវជន និងការលើកកម្ពស់ភាពជាអ្នកដឹកនាំរបស់យុវជន ត្រូវបានរៀបចំឡើងដើម្បីបង្ហាត់យុវជនអភិវឌ្ឍសមត្ថភាព និងការយល់ដឹងពីសហគ្រិនភាព។

រដ្ឋមន្ត្រីក្រសួងអប់រំ យុវជន និងកីឡា ឯកឧត្តម ហង់ ជួនណារ៉ុន បានលើកឡើងថា យុទ្ធនាការនេះ អាចនឹងបង្កើតបទពិសោធរៀនសូត្ររបស់យុវជនកម្ពុជាដោយអភិវឌ្ឍគំនិត និងជំនាញដែលចាំបាច់ក្នុងការប្រែក្លាយគំនិតអាជីវកម្មទៅជាការវិនិយោគផ្នែកពាណិជ្ជកម្មមួយពិតប្រាកដសម្រាប់ការបង្កើតការងារដោយ ខ្លួនឯង។

ឯកឧត្តម ហង់ ជួនណារ៉ុន មានប្រសាសន៍ថា៖ «តាមរយៈការបណ្តុះបណ្តាលសហគ្រិនភាពនេះ យុវជនអាចបង្កើនជំនាញទន់ ហើយជួយពួកគេឱ្យត្រៀមខ្លួនសម្រាប់ទីផ្សារការងារ ឬការបង្កើតការងារដោយខ្លួនឯងបន្ទាប់ពីបញ្ចប់ការសិក្សា។ ជារឿងសំខាន់ដែលយុវជនមានស្មារតីយល់ដឹងពីសហគ្រិនភាព និងភាពជាអ្នកដឹកនាំក្នុងការអភិវឌ្ឍប្រទេសជាតិ»។

គម្រោងមួយនេះមានការគាំទ្រពីអង្គការអន្តរជាតិផ្នែកការងារ (ILO) រួមជាមួយនឹងដៃគូសហការនានាជាច្រើនទៀត៕

August 18, 2017

ស្ថាប័នមួយនៅចក្រភពអង់គ្លេសថា ល្បឿន 4G របស់ Cellcard លឿនជាងល្បឿន 4G របស់ពិភពលោក

ស្ថាប័នអន្តរជាតិ OpenSignal ដែលមានជំនាញលើការធ្វើតេស្តល្បឿនអ៊ីនធើណេតមានមូលដ្ឋាននៅចក្រភពអង់គ្លេសបានចេញរបាយការណ៍មួយថា ល្បឿនអ៊ីនធើណេត 4G LTE របស់ក្រុមហ៊ុន Cellcard មានល្បឿនលឿនជាងអ៊ីនធើណេត 4G LTE ដែលកំពុងប្រើលើពិភពលោកទៅទៀត ក្រោយពីស្ថាប័នមួយនេះបានធ្វើការសិក្សាអស់រយៈពេល 3 ខែនៅកម្ពុជា។

តាមរបាយការណ៍ដែលបានចុះផ្សាយកាលពីពេលថ្មីៗនេះបានបង្ហាញថា Cellcard បានជាប់លេខមួយក្នុងចំណោមក្រុមហ៊ុនបណ្ដាញទូរស័ព្ទចល័តធំៗក្នុងប្រទេសជាមួយនឹងល្បឿនដោនឡូត 4G LTE របស់ខ្លួនមានល្បឿនជាមធ្យមដល់ទៅ 19.7 Mbps លឿនជាងគេ 2ដងបើប្រៀបធៀបជាមួយលទ្ធផលនៃការធ្វើតេស្ដដូចគ្នារបស់ក្រុមហ៊ុន Smart Axiata។ លើសពីនេះទៅទៀត OpenSignal បានបន្ថែមថា ល្បឿននៃការដោនឡូតរបស់ Cellcard មានល្បឿនលឿនជាងល្បឿនដោនឡូត 4G LTE របស់ពិភពលោកទៅទៀត ដែលជាមធ្យមមានល្បឿនត្រឹមតែ16.2 Mbps ប៉ុណ្ណោះ។

របាយការណ៍ខាងលើនេះ ត្រូវបានឱ្យដឹងក្រោយពីស្ថាប័នអន្តរជាតិមួយនេះធ្វើការសិក្សាចាប់ពីថ្ងៃទី1 ខែមេសា ដល់ថ្ងៃទី30 ខែមិថុនា ឆ្នាំ2017កន្លងទៅ លើក្រុមហ៊ុនចំនួន 3 គឺ Cellcard, Metfone និង Smart Axiata។ ក្នុងនោះ ក្រៅពីល្បឿនអ៊ីនធើណេត4G LTE ហើយ សេវាគ្របដណ្តប់ 4GLTE របស់ Cellcard ក៏មានភាពទូលំទូលាយផងដែរ ដោយទទួលបានពិន្ទុខ្ពស់ជាង 70% ធ្វើឱ្យអតិថិជនខ្លួនអាចភ្ជាប់ទៅសេវា 4G បានញឹកញាប់ និងលឿនជាងមុន។ ការវាស់ស្ទង់លើវិសាលភាពនៃបណ្តាញសេវារបស់ OpenSignal នេះធ្វើឡើងដោយវាស់ស្ទង់លើចំនួនដងនៃការចូលទៅប្រើបណ្តាញសេវា។ តាមរយៈការធ្វើតេស្តនេះ អ្នកប្រើប្រាស់អាចចូលប្រើសេវា 4G បានរហូតដល់ 7ដង ក្នុងចំណោម10ដង៕

ប្រភព៖ https://goo.gl/uR22rY

August 18, 2017

លោក Vitorino ទទួលស្គាល់ថា កម្ពុជា U23 ត្រូវការបទពិសោធបន្ថែមទៀត

លោក Leonard Vitorino គ្រូបង្វឹកនៃក្រុមបាល់ទាត់ជម្រើសជាតិកម្ពុជាអាយុក្រោម23ឆ្នាំ បានទទួលស្គាល់ថា ក្រុមយុវជនរបស់លោកត្រូវការបទពិសោធបន្ថែម និងទទួលការអភិវឌ្ឍបន្ថែមទៀត ក្រោយពីពួកគេបានចាញ់ក្រុមជម្រើសជាតិវៀតណាមអាយុក្រោម23ឆ្នាំយ៉ាងធ្ងន់ធ្ងរក្នុងលទ្ធផល 4-1 ក្នុងការប្រកួតជុំទី2នៃពូល B ក្នុងព្រឹត្តិការណ៍ស៊ីហ្គេមលើកទី29 ក្នុងទីក្រុងគូឡាឡាំពួ ប្រទេសម៉ាឡេស៊ី កាលពីល្ងាចថ្ងៃម្សិលមិញ។ ប៉ុន្តែទោះបីជាយ៉ាងណា គ្រូបង្វឹកសញ្ជាតិប្រេស៊ីលរូបនេះនៅតែជឿជាក់ថា ក្រុមរបស់លោកនឹងមានការអភិវឌ្ឍកាន់តែល្អប្រសើរក្នុងពេលអនាគត។

ក្នុងសន្និសីទសារព័ត៌មានមួយបន្ទាប់ពីបញ្ចប់ការប្រកួត លោក Vitorino បាននិយាយថា៖ «យើងចាប់ផ្តើមយ៉ាងរឹងមាំ និងបានបង្កើតឱកាសមួយចំនួនក្នុងតង់ទី1។ ពិតណាស់ ក្រោយពីយើងបានដេញតាមពីក្រោយ 1-០ យើងបានព្យាយាមធ្វើការវាយបកវិញ»។ គ្រូបង្វឹករូបនេះបានបន្តថា៖ «ប៉ុន្តែ យើងមិនអាចរកគ្រាប់បាល់បញ្ចូលទីបានឡើយ និងរបូតគ្រាប់បាល់ជាច្រើន។ ហេតុនេះ មានន័យថា យើងត្រូវការបទពិសោធបន្ថែមជាច្រើនទៀត ប៉ុន្តែខ្ញុំនៅតែជឿជាក់ថា កម្ពុជាអាចធ្វើការអភិវឌ្ឍទៅមុខបាន»។

ក្រុមជម្រើសជាតិកម្ពុជា U23 បានការពារយ៉ាងរឹងមាំក្នុងតង់ទី1 មុននឹងបណ្តោយឲ្យមានគ្រាប់បាល់ចូលទីរបស់ខ្លួននៅពេលជិតបញ្ចប់តង់ ហើយអ្វីដែលគួរឲ្យចាប់អារម្មណ៍នោះគឺថា កម្ពុជាបានបណ្តោយឲ្យមានគ្រាប់បាល់បញ្ចូលទីដល់ទៅ3គ្រាប់ក្នុងចន្លោះពេលត្រឹមតែ10នាទីប៉ុណ្ណោះក្នុងតង់ទី2។ ក្រោយមក នេន សុធារ័ត្ន បានក្លាយជាកីឡាករដំបូងគេដែលរកបានគ្រាប់បាល់បញ្ចូលទីសម្រាប់ក្រុមកម្ពុជាក្នុងយុទ្ធនាការស៊ីហ្គេមនេះ ក្រោយពីបានស៊ុតបាល់ពិន័យ11ម៉ែត្រចូលទីយ៉ាងខ្លាំង បន្ទាប់ពីកីឡាករនៃក្រុមវៀតណាមបានធ្វើឲ្យបាល់ប៉ះដៃក្នុងប្រអប់គ្រោះថ្នាក់។ លទ្ធផលនេះ ធ្វើឲ្យកម្ពុជា ចាញ់2លើកពីការប្រកួតទាំង2លើកដំបូងរបស់ខ្លួន ខណៈដែលវៀតណាមឈ្នះទាំង2ជើង និងបានស៊ុតបាល់បញ្ចូលទី4គ្រាប់ដូចគ្នា៕

August 18, 2017

ប្រញាប់ទៅទិញយកមកញ៉ាំភ្លាម! ព្រោះវាអាចការពារជំងឺបានច្រើនមុខ

ផ្លែប៊័រ នៅកម្ពុជាយើងមានដាំនៅក្នុងខេត្តមណ្ឌលគិរី និងរតនគិរី ហើយជាទូទៅសាច់ និងគ្រាប់របស់វាមានគុណប្រយោជន៍ច្រើនចំពោះសុខភាពរាងកាយ និងសម្រស់។ មិនថាចំពោះបុរស ឬនារីឡើយ គ្រាន់តែអ្នកទទួលទានផ្លែប៊័រ ក្នុងមួយថ្ងៃ តែមួយផ្លែ នោះអ្នកអាចចៀសផុតពីជំងឺ 5 ប្រភេទដោយមិនដឹងខ្លួន ព្រោះថា នៅក្នុងផ្លែប៊័រមាននូវសារធាតុវីតាមីន និងធាតុដែកជាង20ប្រភេទដូចជា វីតាមីន K វីតាមីន C អាស៊ីត Pantothenic ប៉ូតាស្យូម វិតាមីន B6 វីតាមីន E ជាដើម។

ចង់ដឹងថា តើការទទួលទានផ្លែប៊័រជួយការពារជំងឺអ្វីខ្លះ? សូមអានអត្តបទខាងក្រោមនេះ៖

1.កាត់បន្ថយហានិភ័យនៃជំងឺបេះដូង

Avocados ឬខ្មែយើងហៅថា ផ្លែប៊័រ ត្រូវបានអ្នកស្រាវជ្រាវអះអាងថា មានផលវិជ្ជមានចំពោះប្រព័ន្ធសរសៃឈាមបេះដូងរបស់យើង។ វាមានផ្ទុកនូវសារធាតុជាច្រើនដូចជា សារធាតុចិញ្ចឹម ប៉ូតាស្យូម និងលូទីន ព្រមទាំងមានសារធាតុប្រឆាំងអុកស៊ីតកម្មដូចជា Carotenoids និងPhenols ជាដើម។

2.ជួយគ្រប់គ្រងទម្ងន់

ការទទួលទានផ្លែប៊័រ ពិតជាជួយអ្នកឱ្យស្រកទម្ងន់បាន គ្រាន់តែទទួលទានផ្លែប៊័រពាក់កណ្តាលផ្លែ បន្ទាប់ពីអាហារថ្ងៃត្រង់ អ្នកដែលលើសទម្ងន់ ឬធាត់ជ្រុលនឹងទទួលបានការស្រកគីឡូជាទីគាប់ចិត្តមិនខាន មិនតែប៉ុណ្ណោះវាថែមទាំងជួយគ្រប់គ្រងការឃ្លានអាហារខុសពេលបានផងដែរ។

3.ការពារជំងឺទឹកនោមផ្អែម

ផ្លែប៊័រ ជួយក្នុងការគ្រប់គ្រងកម្រិតជាតិស្ករនៅក្នុងឈាម ហើយវាជួយកាត់បន្ថយហានិភ័យនៃការកើតជំងឺទឹកនោមផ្អែមបានផងដែរ។ នេះគឺជាគុណសម្បត្តិមួយក្នុងចំណោមគុណសម្បត្តិល្អចំពោះសុខភាពរបស់អ្នក ដែលអ្នកត្រូវទទួលទានផ្លែប៊័រជារៀងរាល់ថ្ងៃ។

4.ប្រឆាំងការរលាក

វាជួយក្នុងការការពារ និងប្រឆាំងនឹងការរលាកគ្រប់ប្រភេទ ព្រោះវាមានផ្ទុកជាតិអាស៊ីត Oleic ដែលជាខ្លាញ់ម្យ៉ាងហៅថា Monounsaturated ដែលមានលក្ខណៈសម្បត្តិល្អក្នុងការផ្សះមុខរបួស និងព្យាបាលអាការរលាក។

5.ការពារភ្នែក

ផ្លែប៊័រមានផ្ទុកសារជាតិចិញ្ចឹម Lutein និង Zeaxanthin ដែលអាចជួយប្រឆាំងនឹងជំងឺមហារីកភ្នែក មធ្យោបាយតែមួយគត់ដើម្បីទទួលបានសារធាតុចិញ្ចឹមទាំង2នេះនៅក្នុងរាងកាយរបស់យើងនិងការពារសុខភាពភ្នែករបស់យើង គឺត្រូវទទួលទានផ្លែប៊័រឱ្យបានច្រើន៕

August 18, 2017

ស៊ែរចែកគ្នាជាបន្ទាន់! គ្រោះថ្នាក់របស់ផ្សែងធូបដែលយើងមិនដឹងរហូតមក

តើធូបជាវត្ថុមានគ្រោះថ្នាក់ឬទេ? ការដុតធូបជាទំនៀមទម្លាប់ប្រចាំថ្ងៃមួយដែលប្រជាជនខ្មែរនិយមធ្វើក្នុងពេលសែនព្រេន បន់ស្រន់ដូនតា ឬក្នុងពិធីសាសនាផ្សេងៗ ហើយវាក៏ជាចំណែកមួយនៃជីវិតរបស់យើងផងដែរ។ ក្លិនក្រអូបរបស់ផ្សែងធូប មានបញ្ហាអាក្រក់ចំពោះសុខភាពរបស់យើង បើយើងមិនបានប្រយ័ត្ន ហើយស្រូបវាចូលទៅក្នុងខ្លួន។ សព្វថ្ងៃនេះមិនត្រឹមតែផ្សែងធូបប៉ុណ្ណោះទេដែលបំពុលជីវិតមនុស្សនោះ គឺនៅមានផ្សែងពុលដែលចេញពីតំបន់ឧស្សាហកម្មផ្សេង និងផ្សែងពីរថយន្ដក៏ដូចគ្នាដែរ។

ដូច្នោះហើយ ថ្ងៃនេះគេហទំព័រឡារ៉ែន នឹងជម្រាបជូននូវផលប៉ះពាល់របស់ផ្សែងធូបចំពោះសុខភាពដែលយើងគួរតែប្រុងប្រយ័ត្ន។

1.កើតជំងឺមហារីក

អ្នកស្រាវជ្រាវបានអះអាងថា ផ្សែងធូបមានសារធាតុពុលម្យ៉ាងដែលបណ្ដាលឱ្យរាងកាយមនុស្សកើតជំងឺមហារីក ដូចជា ឧស្ម័នបង់ហ្ស៊ែន កាបូនអ៊ីត្រាត និង អ៊ីដ្រូកាបូនប៉ួលីអារូម៉ាទិក ជាតិពុលរបស់វាគឺស្ថិតនៅលើប្រភេទឈើដែលគេយកមកធ្វើជាធូប ហើយមានគ្រោះថ្នាក់នៅពេលដែលយើងដុតវា។

2.ខូចស្បែក និងភ្នែក

ផ្សែងធូបអាចបណ្ដាលឱ្យស្បែក និងភ្នែករបស់យើងរលាកក្រហាយ ហើយមានគ្រោះថ្នាក់ដល់កុមារ និងស្ត្រីមានផ្ទៃពោះ ដែលធ្វើឱ្យមានអារម្មណ៍ថា រមាស់នៅលើស្បែក។

3.ប្រតិកម្មជាមួយអ្នកកើតជំងឺហឺត

សម្រាប់អ្នកកើតជំងឺហឺតដែលបានស្រូបផ្សែងធូបចូលទៅក្នុងរាងកាយអាចមានផលប៉ះពាល់ និងគ្រោះថ្នាក់បំផុត ព្រោះវាអាចមានប្រតិកម្មនៅក្នុងបំពង់ខ្យល់បាន។

4.គ្រោះថ្នាក់ប្រព័ន្ធដង្ហើម

ក៏ដូចគ្នាដែរ ការស្រូបផ្សែងធូបចូលទៅក្នុងខ្លួន មនុស្សទូទៅអាចកើតជំងឺមហារីកក្នុងប្រព័ន្ធដង្ហើមក្នុងកម្រិតណានោះ គឺវាអាស្រ័យទៅលើប្រភេទនៃធូបនោះ។

5.កើតជំងឺសួតប្រភេទ COPD

សារធាតុកាបូនម៉ូណុកស៊ីត ស៊ុលផួឌីអុកស៊ីត និងសារធាតុម្ស៉ាងដែលហៅថា Formaldehyde ជាសារធាតុដែលបង្កគ្រោះថ្នាក់ដល់រាងកាយ ហើយបណ្ដាលឱ្យកើតជំងឺមហារីកសួត ជំងឺសួតប្រភេទ COPD ជំងឺហឺត ជំងឺរលាកផ្លូវដង្ហើមជាដើម៕

August 18, 2017

ប្រយោជន៍នៃការលាបប្រេង លើផ្ចិត និងក្បាលពោះ

ផ្ចិតរបស់មនុស្សយើងគឺជាកូនសោដ៏សំខាន់មួយក្នុងការទ្រទ្រង់ផ្នែកមួយចំនួននៃរាងកាយឱ្យដំណើរការទៅបានយ៉ាងល្អ ហើយនេះគឺជាហេតុផលដែលអ្នកគួរតែយកចិត្តទុកដាក់ចំពោះរន្ធផ្ចិត និងក្បាលពោះរបស់អ្នកឱ្យបានច្រើន ដូចដែលអ្នកធ្វើចំពោះផ្នែកផ្សេងៗនៃរាងកាយរបស់អ្នកដែរ។ មួយក្នុងចំណោមវិធីជាច្រើនក្នុងការថែរក្សាវាគឺ លាបប្រេងធម្មជាតិឱ្យក្បាលពោះ និងរន្ធផ្ចិតរបស់អ្នកឱ្យបានទៀងទាត់។

ផ្តល់សំណើមដល់ស្បែករដូវរងាស្បែកងាយនឹងទទួលរងនូវការខ្វះជាតិទឹកដែលធ្វើឱ្យស្បែកស្ងួត ស្រអាប់គ្មានជីវជាតិ ប៉ុន្តែការយកប្រេងបន្តិចមកម៉ាស្សាលើផ្ចិត និងបរិវេណជុំវិញនោះ ក៏ត្រូវបានទុកថាជាការផ្តល់សំណើមដល់ស្បែកផងដែរ។ ប្រេងដែលអ្នកអាចយកមកប្រើដើម្បីលាបនេះមានដូចជា ប្រេងអូលីវ និងប្រេងដូងជាដើម។ គ្រាន់តែបន្តក់ប្រេងនេះ3-4ដំណក់លើបាតដៃ ហើយយកវាទៅលាបលើក្បាលពោះ និងផ្ចិតឱ្យបានទៀងទាត់ ហើយប្រសិទ្ធភាពនឹងបង្ហាញឱ្យអ្នកឃើញក្រោយពេលងូតទឹកសម្អាតខ្លួនរួច។

កម្ចាត់ធូលីអ្នកណាទៅដឹង ជួនកាលធូលីដីដែលអ្នកខំសម្អាតយ៉ាងស្អាតពីខាងលើអាចមកជាប់នៅត្រង់រន្ធផ្ចិតរបស់អ្នកក៏ថាបានដែរ ដូច្នេះហើយបានជាវាទាមទាឱ្យអ្នកធ្វើការសម្អាតបរិវេណត្រង់នេះឱ្យបានល្អ ជាពិសេសដើម្បីឱ្យប្រាកដក្នុងចិត្តថា រាងកាយរបស់អ្នកពិតជាមានអនាម័យគ្រប់កន្លែងពិតមែន។ ដើម្បីសម្អាតរន្ធផ្ចិតរបស់អ្នកឱ្យបានត្រឹមត្រូវ អ្នកត្រូវយកប្រេងគ្រាប់ទំពាំងបាយជូរ, ផ្កាឈូករ័ត្ន ឬប្រេងចូចូបា (មួយណាក៏បាន) មកបន្តក់លើសំឡីមួយដុំតូច រួចជូតសម្អាតផ្ចិតថ្នមៗជាការស្រេច។ ប្រេងទាំងអស់នេះមានប្រសិទ្ធភាពក្នុងការជួយធ្វើឱ្យក្អែល ឬធូលីដែលតោងជាប់ក្នុងរន្ធផ្ចិតមានសភាពទន់ជាងមុន និងងាយស្រួលក្នុងការសម្អាត។

កាត់បន្ថយការឈឺចាប់ពេលមានរដូវការឈឺចាប់ក្នុងអំឡុងពេលមានរដូវអាចជាការឈឺចាប់ដ៏អាក្រក់បំផុតមួយ ដែលអាចធ្វើឱ្យរំខានដល់ការងារប្រចាំថ្ងៃរបស់អ្នក ព្រោះក្នុងសភាពបែបនេះអ្នកពិតជាមិនចង់ធ្វើអ្វីក្រៅពីសម្រាកនោះឡើយ។ ដូច្នេះដើម្បីបន្ថូរបន្ថយការឈឺចាប់ក្នុងពេលវេលាដ៏គួរឱ្យធុញថប់នេះ សូមសាកល្បងយកប្រេងណាមួយក្នុងចំណោមប្រេងមួយចំនួនដូចជា ប្រេងជីអង្កាម, ប្រេង Clary Sage, ប្រេងស្រល់ចិន ឬប្រេងខ្ញីជាដើម មកម៉ាស្សាថ្នមៗជុំវិញក្បាលពោះ និងត្រង់ផ្ចិត ដើម្បីបន្ធូរបន្ថយការឈឺចាប់។

ព្យាបាលអាការឈឺពោះប្រសិនបើអ្នកមានបញ្ហាឈឺពោះ ហើយមិនចង់ទទួលទានថ្នាំពេទ្យនោះ អ្នកអាចសាកល្បងជាមួយនឹងការលាបប្រេងលើរន្ធផ្ចិតវិញ ដើម្បីកាត់បន្ថយការឈឺចាប់។ ការព្យាបាលនេះស័ក្តិសមជាមួយនឹងអាការឈឺពោះដែលបណ្តាលមកពីការពុលអាហារ អាហារមិនរំលាយ និងអាការរាករួសជាដើម។ ប្រេងដែលអ្នកត្រូវយកមកប្រើក្នុងស្ថានភាពបែបនេះគឺ ប្រេងខ្ញី និងប្រេងជីអង្កាម ប៉ុន្តែមុននឹងប្រើ សូមលាយវាជាមួយប្រេងបន្លែបន្តិចដូចជា ប្រេងអាល់ម៉ុន ឬប្រេងអូលីវជាដើម។

ព្យាបាលរបួសក្លាយផ្ចិតគឺជាទីតាំងមួយដែលងាយនឹងកខ្វក់ខ្លាំងណាស់ នោះមានន័យថា វាជាទីតាំងដ៏ល្អបំផុតសម្រាប់មេរោគផ្សេងៗដើម្បីលាក់ខ្លួន។ សម្រាប់អ្នកដែលមានបញ្ហារបួសក្លាយម្តុំផ្ចិតចាំបាច់ត្រូវព្យាបាលឱ្យបានត្រឹមត្រូវ ហើយក្នុងនោះការលាបប្រេងក៏ជាវិធីមួយដែរ។ ប្រេងដូចជា ប្រេង Mustard, ប្រេងដូង និងប្រេងស្លឹកប្រេងខ្យល់អាចជួយការពារមិនឱ្យមានការចម្លងរោគបាន។ អ្នកគួរលាបប្រេងណាមួយក៏បានក្នុងចំណោមប្រេងទាំង3ប្រភេទនេះនៅលើផ្ចិត2ដងក្នុងមួយថ្ងៃរហូតដល់របួសក្លាយនោះជាស្បះស្បើយ។

ត្រូវប្រាកដក្នុងចិត្តថា អ្នកបានប្រើប្រេងដែលត្រឹមត្រូវ ដើម្បីទទួលបានលទ្ធផលជាទីគាប់ចិត្ត តែសូមចាំថា ប្រេងមួយចំនួនអាចនឹងខ្លាំងបន្តិចរហូតធ្វើស្បែកប្រតិកម្មបាន ដូច្នេះយកល្អគួរតែសាកល្បងកន្លែងផ្សេងជាមុនសិន សឹមយកមកលាបនៅលើផ្ចិតរបស់អ្នក៕

August 17, 2017

តូតា អួតថា មួយតួខ្លួននាងហ្ស៊ីនពីធម្មជាតិទាំងអស់

គិតពីពេលវេលានៃការចូលប្រឡូកក្នុងអាជីពសិល្បៈរបស់កញ្ញា ម៉ាក សែនសូនីតា ហៅ (តូតា) គឺមានរយៈពេលជិត10ហើយ។ ការងារសិល្បៈក៏មានការវិវឌ្ឍរីកចម្រើនជាខ្លាំងដែរ ប៉ុន្ដែសម្រស់នាងនៅតែអាចរក្សាបានភាពស្រស់ស្អាតដូចពេលចូលសិល្បៈដំបូងៗដដែល។

មានមហាជនជាច្រើនបានលើកសរសើរមិនដាច់ពីមាត់ពីរូបសម្រស់ សាច់ឈាមរបស់នាងដែលនៅតែមានភាពស្រស់ស្អាត តែទោះយ៉ាងណាក៏មានអ្នកលើកឡើងថា កុំទៅឆ្ងល់! នាងល្បីឈ្មោះប៉ុណ្ណឹងហើយ ច្បាស់ជាទៅរកមជ្ឈមណ្ឌលថែសម្ផស្សដើម្បីជួយនាងមិនខាន ដូច្នេះមិនមែនជាសម្រស់ពីធម្មជាតិ 100%ទេ។

ជាមួយគ្នានេះកញ្ញា តូតា បានអះអាងថា រូបសម្រស់នាងពេញមួយតួខ្លួនគឺជាអំណោយពីធម្មជាតិសុទ្ធសាធដោយពុំមានការកែប្រែអ្វីទាំងអស់។នាងបន្ថែមថា៖”កាលពីខ្ញុំចូលសិល្បៈដំបូងក៏ធ្លាប់មានចេតនាចង់កែសម្ផស្សខ្លះដែរ ប៉ុន្ដែម៉ាក់ពុំសប្បាយចិត្ដឡើយចំពោះការធ្វើបែបនេះ ដ្បិតអីគាត់យល់ឃើញថា ខ្ញុំស្អាតស្រាប់ហើយ ដូច្នេះគាត់មិនចង់ឱ្យពាក់ព័ន្ធលើការកែសម្រស់ទេ។ ដូចបងដឹងស្រាប់ហើយ កន្លងមកគាត់ធ្លាប់ប្រាប់ថា បើខ្ញុំហ៊ានតែកែសម្រស់គាត់កាត់កាលខ្ញុំចោលតែម្តង (សើច) ទោះបីជាគាត់និយាយលេង តែខ្ញុំខ្លួនឯងក៏លែងចង់កែសម្ផស្សអ្វីដែរ។ សម្រស់ធម្មជាតិបែបនេះក៏ម្យ៉ាងដែរ។

រយៈពេលជិត10ឆ្នាំមកនេះ យើងជឿថា មានទស្សនិកជនជាច្រើនប្រាកដជាស្គាល់ និងចាំមុខកញ្ញា តូតា បានយ៉ាងច្បាស់ ព្រោះចាប់តាំងពីនាងចូលសិល្បៈរហូតមកដល់ពេលនេះ សម្រស់របស់នាងហាក់ពុំមានប្រែប្រួលអ្វីឡើយ។

នាងបញ្ជាក់ថា រាល់ពេលនាងចេញថតម្ដងៗក៏មានការព្រួយបារម្ភនឹងកម្តៅថ្ងៃដែរ ប៉ុន្ដែនាងបានជ្រើសរើសប្រើផលិតផលមួយចំនួនមកការពារស្បែកដៃជើងធ្វើយ៉ាងណាកុំឱ្យមានការទទួលរងពីកម្ដៅថ្ងៃខ្លាំងពេក។

តារាញញឹមថ្ពាល់ខួចរូបនេះបញ្ជាក់ថា៖”បើទោះជាមានសម្រស់ពីធម្មជាតិក៏ដោយ ក៏ខ្ញុំគិតទៅលើការថែទាំខ្លាំងដែរ តែខ្ញុំជ្រើសរើសវិធីបែបធម្មជាតិ ដូចជាស្ទីម លាបឡេការពារកម្ដៅថ្ងៃ ឬឡេជំនួយស្បែកបន្ដិចបន្ដួចប៉ុណ្ណោះ។ ទាល់តែមានការថែទាំទើបសម្រស់ពីធម្មជាតិអាចនៅគង់វង្សបានល្អ។ នាងបន្ដថា នាងនឹងអាចកែសម្ផស្សខ្លះពេលមានអាយុច្រើន ឬមានស្វាមី ព្រោះពេលនោះវានឹងអាចបណ្ដាលឱ្យបាត់បង់សម្រស់ពីធម្មជាតិខ្លះ ព្រោះនាងយល់ថា សម្រស់ជាចំណុចទាក់ទាញខ្លាំងសម្រាប់នារី ប្រសិនសម្រស់ត្រូវបានបាត់បង់កន្លែងណាមួយយើងគួរតែចេះកែច្នៃឱ្យវាវិវត្ដមករកភាពស្រស់ស្អាតវិញ៕

August 17, 2017

សហគ្រាសខ្នាតតូច និងមធ្យមកំពុងបារម្ភពីកង្វះទីផ្សារលក់ផលិតផល

ភ្នំពេញ៖ ស្របពេលដែលផលិតផលបរទេសត្រូវបាននាំចូលមកលក់នៅលើទីផ្សារកម្ពុជា យ៉ាងច្រើនពីមួយឆ្នាំទៅមួយឆ្នាំនោះ វាបានបង្កជាក្តីបារម្ភសម្រាប់សហគ្រាសខ្នាតតូច និងមធ្យមនៅកម្ពុជាអំពីការលក់ផលិតផលក្នុងស្រុករបស់ខ្លួនមិនសូវមានការគាំទ្រពីអតិថិជន។

លោកឧកញ៉ា តែ តាំងប៉ ប្រធានសហគ្រាសខ្នាតតូច និងមធ្យមនៅកម្ពុជាមានប្រសាសន៍នៅក្នុងសិក្ខាសាលាស្តីពីកិច្ចពិគ្រោះយោបល់រវាងអ្នកផលិត និងផ្គត់ផ្គង់ផលិតផលខ្មែរជាមួយអ្នកប្រើប្រាស់ និងអ្នកចែកចាយបន្តដែលរៀបចំឡើងដោយក្រសួងពាក់ព័ន្ធចំនួន4កាលពីព្រឹកថ្ងៃទី17 ខែសីហា ឆ្នាំ2017 នេះឱ្យដឹងថា បច្ចប្បន្នផលិតផលក្រៅស្រុកបានសម្រុកចូលមកលក់យ៉ាងច្រើននៅលើទីផ្សារកម្ពុជា ដូចជាការនាំចូលសម្ភារប្រើប្រាស់ពីប្រទេសថៃមាន ពូក ខ្នើយ សម្លៀកបំពាក់ជាដើម បានចរាចរគ្រប់ទិសទីតាមរយៈការធ្វើពិព័រណ៍ពាណិជ្ជកម្មទៅតាមខេត្តឆ្ងាយ បានធ្វើឱ្យប្រជាពលរដ្ឋខ្មែរងាកទៅប្រើប្រាស់វត្ថុនាំចូលទាំងនោះ ហើយមិនសូវមានការគាំទ្រផលិតផលក្នុងស្រុកប៉ុន្មានឡើយដោយសារមានការប្រកួតប្រជែងផ្នែកតម្លៃ។ លោកឧកញ៉ាបន្តថា ចំពោះទីផ្សារនៅតាមទីប្រជុំជន ដូចជានៅតាមផ្សារទំនើប តាមស្តារ៍ម៉ាតតូចៗវិញផលិតផលក្នុងស្រុកក៏ពិបាកជ្រៀតចូលដូចគ្នាដែរ ដោយសារមានផលិតផលបរទេសច្រើន ហើយអតិថិជននៅក្នុងប្រទេសក៏និយមប្រើប្រាស់សម្ភារនាំចូលពីក្រៅប្រទេសទាំងនោះដែរ។

លោកឧកញ៉ា ហាក់ សុវណ្ណា ប្រធានក្រុមប្រឹក្សាភិបាលនៃសម្ព័ន្ធអ្នកនាំចេញកសិផលផ្លែឈើកម្ពុជាមានប្រសាសន៍ដោយសម្តែងក្តីបារម្ភថា ខណៈដែលកសិករផលិតបានហើយគ្មានទីផ្សារសម្រាប់លក់ចេញ ពិសេសផ្លែស្វាយមកទល់បច្ចុប្បន្នទាំងកំពុងប្រមូលផល និងមិនទាន់ប្រមូលមានសរុបប្រមាណជា1លានហិកតា ហើយកាលពីពេលថ្មីៗកន្លងមកនេះស្វាយបានធ្លាក់ថ្លៃយ៉ាងគំហុក ដោយសារតែមិនសូវមានឈ្មួញពីក្រៅប្រទេសមកទិញ។ លោកថា បច្ចុប្បន្នទោះជាមានក្រុមហ៊ុនកែច្នៃផ្លែស្វាយធ្វើជាដំណាប់ក៍ដោយ តែមិនអាចទិញទិន្នផលផ្លែស្វាយមកកែច្នៃទាំងអស់នោះបានទេ ដូច្នេះលោកចង់ស្នើដ្ឋាភិបាលឱ្យជួយស្វែងរកទីផ្សារក្រៅប្រទេសសម្រាប់លក់ផ្លែស្វាយនេះផង។

ឆ្លើយតបនឹងក្តីបារម្ភរបស់វិស័យឯកជន ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ក៏បានលើកឡើងពីកំណើនសេដ្ឋកិច្ចរបស់កម្ពុជាដែលសម្រេចបានជាមធ្យម 7% ក្នុងរយៈពេល 2ទសវត្សរ៍ចុងក្រោយ ហើយក្រសួងពាណិជ្ជកម្មបានប្តេជ្ញាចិត្តក្នុងការបន្តស្វែងរកទីផ្សារជូនសហគ្រាសធុនតូច និងធម្យមនៅកម្ពុជា។ លើសពីនេះឯកឧត្តមរដ្ឋមន្ត្រីក៏បានបង្ហាញជំហរគាំទ្រចំពោះការចាប់ដៃគូធុរកិច្ចរវាងម្ចាស់ផលិតផល និងអ្នកទទួលទិញនៅក្នុងសិក្ខាសាលា ដែលជាវឌ្ឍនភាពថ្មីមួយទៀតសម្រាប់លើកកម្ពស់កិត្យានុភាពផលិតផលកម្ពុជា។

សូមបញ្ជាក់ថា តាមរយៈសិក្ខាសាលាពិគ្រោះយោបល់លើកទី1ដែលបានរៀបចំដោយជោគជ័យកាលពីឆ្នាំមុន បញ្ហាប្រឈមជាច្រើនពាក់ព័ន្ធនឹងការជំរុញផលិតផលកម្ពុជាចូលទីផ្សារក្នុង និងក្រៅប្រទេសត្រូវបានដោះស្រាយបានមួយកម្រិតហើយ។ ដោយឡែកសិក្ខាសាលាឆ្នាំនេះក៏រំពឹងថា នឹងអាចស្វែងរកដំណោះស្រាយកាន់តែច្រើនថែមទៀតដើម្បីជួយសម្រួលដល់ការអភិវឌ្ឍវិស័យឯកជន និងការធ្វើពិពិធកម្មវិស័យនាំចេញរបស់កម្ពុជា៕

August 17, 2017

Category: សង្គម និងសេដ្ឋកិច្ច