បញ្ហាសុខភាពស្ត្រីជារឿងសំខាន់ខ្លាំងណាស់ ព្រោះរាងកាយស្ត្រីមានភាពស្មុគ្រស្មាញច្រើន និងអាចបង្កជាជំងឺផ្សេងៗបានយ៉ាងងាយបំផុត។ ហេតុនេះហើយ ទើបបានជាការមើលថែទាំសុខភាពគឺជារឿងដ៏ចាំបាច់បំផុតដែលស្ត្រីគ្រប់រូបត្រូវតែធ្វើឱ្យបានជាប្រចាំ និងដោយប្រុងប្រយ័ត្នបំផុត។ សម្រាប់ស្ត្រី ជំងឺអាចកើតឡើងភ្លាមៗដោយនឹកស្មានមិនដល់ ឬជារឿងដែលខ្លួនតែងតែធ្វើជាញឹកញាប់ តែមិនសូវបានប្រយ័ត្នប្រយែង និងចាប់អារម្មណ៍ ដែលអាចបណ្ដាលឱ្យកើតជាបញ្ហាធ្ងន់ធ្ងរបាននៅថ្ងៃអនាគត។ ដូច្នេះ ឡារ៉ែន សូមណែនាំឱ្យអ្នកបានដឹងពីបញ្ហាសុខភាពមួយចំនួនដូចតទៅ ដែលស្ត្រីទាំងឡាយ ត្រូវប្រយ័ត្នឱ្យបានខ្ពស់បំផុត ដូចជា៖
1/ សុខភាពការបន្ទោបង់មិនប្រក្រតីជាធម្មតា
ស្ត្រីមានពោះវៀនវែងជាងបុរស ដូច្នេះហើយទើបបណ្ដាលឱ្យកើតមានបញ្ហាច្រើនពេលបន្ទោបង់ដោយស្ត្រីមួយចំនួនមានអាការទល់លាមកជាញឹកញាប់រហូតក្លាយជាទម្លាប់នោះ នាងក៏គិតថានេះជាធម្មតារបស់មនុស្សម្នាក់ៗ ដោយមិនដឹងថា នេះជាជំងឺមួយប្រភេទឡើយ។ ហើយមូលហេតុដែលការបន្ទោបង់មានភាពមិនប្រក្រតីជួនកាលក៏អាចបណ្ដាលមកពីភាពតានតឹងក្នុងអារម្មណ៍ដែរ ព្រោះតែពេលណាមានភាពតានតឹងធុញថប់នោះ ដំណើរនៃការប្រព្រឹត្តរបស់រាងកាយក៏នឹងខុសប្រក្រតីទៅតាមនោះដូចគ្នា។ ហើយបើសម្រាប់ស្ត្រីទាំងឡាយណាដែលបន្ទោបង់ចេញមកមានលាយឈាមមកជាមួយ សូមដឹងចុះថា វាមិនមែនជារឿងធម្មតាឡើយ ព្រោះវាអាចជាសញ្ញានៃជំងឺអ្វីមួយ ដែលអ្នកត្រូវតែទៅពិនិត្យមើលឱ្យបានដឹងថា តើកើតមានអ្វីក្នុងរាងកាយអ្នកឱ្យពិតប្រាកដ។ ដែលវិធីដែលអាចកែបញ្ហាសុខភាពការបន្ទោបង់បានគឺ ធ្វើយ៉ាងនាគួរទទួលទានបន្លែផ្លែឈើឱ្យបានគ្រប់ពេលគួរបន្ថែមអាហារពពួកកាកសរសៃបន្លែផ្លែឈើចូលទៅក្នុងអាហារគ្រប់ពេលដែលអ្នកទទួលទាន ញ៉ាំទឹកឱ្យបានច្រើនពី1-2កែវក្រោយពេលភ្ញាក់ពីដំណេក និងព្យាយាមហ្វឹកហាត់ខ្លួនឯងឱ្យបន្ទោបង់យ៉ាងទៀងទាត់បំផុត។
2/ មានអាការហត់នឿយ ល្វើយអស់កម្លាំង និងឆាប់ហត់
ស្ត្រីដែលមានអាយុចាប់ពី 25ឆ្នាំឡើងទៅ សុខភាពនឹងចុះខ្សោយមិនដូចកាលពីអាយុ10-20ឡើយ។ កាលពីនៅពេញវ័យទោះជាទៅជប់លៀងមួយយប់ទើសភ្លឺ ក៏ព្រឹកឡើងអាចក្រោកទៅធ្វើការបានធម្មតាដែរ តែដល់ពេលមានអាយុចាប់ពី25-30ឆ្នាំឡើងទៅ គឺមិនអាចដូចមុនទៀតឡើយ។ រាងកាយឆាប់នឿយហត់ញ៉ាំស្រាឆាប់ស្រវឹង ឬគេងមិនចង់ក្រោកជាដើមគឺសុទ្ធតែជាសញ្ញាដែលបញ្ជាក់ថា សុខភាពអ្នកកំពុងតែធ្លាក់ខ្សោយទាំងអស់។ ដូច្នេះអ្នកត្រូវចាប់ផ្តើមយកចិត្តទុកដាក់ចំពោះសុខភាពអ្នកឱ្យបានមែនទែន ដោយត្រូវតែចាប់ផ្ដើមថែទាំសុខភាពអ្នកបានល្អបំផុត។ ហើយវិធីដែលអាចកែបញ្ហាសុខភាពដែលហត់នឿយ ល្វើយអស់កម្លាំង និងឆាប់ហត់របស់អ្នកបានគឺ ត្រូវកាត់បន្ថយការញ៉ាំភេសជ្ជៈដែលមានជាតិអាល់កុលចម្រើន ដោយងាកមកហាត់ប្រាណបែបយ៉ូហ្គា
វិញម្តង ព្រោះវាអាចជួយឱ្យរាងកាយរបស់អ្នកលែងសូវឆាប់ហត់នឿយ និងជួយឱ្យសាច់និងស្បែករបស់អ្នកស្អាតភ្លឺរលោង ជាពិសេសនោះគឺ ត្រូវគេងឱ្យបានគ្រប់គ្រាន់ ដោយមិនមែនផ្ដោតលើការគេងឱ្យបានច្រើនម៉ោងនោះទេ តែគឺត្រូវចូលគេងឱ្យបានទៀងទាត់ និងដឹងពីពេលវេលាគេងដែលមានប្រយោជន៍ ព្រោះពេលដែល Growth Hormone ផលិតបានល្អនោះគឺនៅចម្លោះពីម៉ោង10យប់ដល់11យប់។
3/ រដូវមកមិនទៀង
ការមករដូវប្រចាំខែរបស់អ្នក គឺអាចឱ្យអ្នកដឹងបានថា អ័រម៉ូនរបស់អ្នកល្អ ឬមិនល្អ។ ការទទួលទានអាហារមិនល្អ ភាពតានតឹងក្នុងអារម្មណ៍ នឹងធ្វើឱ្យអ័រម៉ូនបាត់បង់តុល្យភាព បន្ទាប់មកក៏បណ្ដាលឱ្យរដូវមកមិនទៀង និងមុខ ឬពេលមកមានការឈឺពោះខ្លាំងស្ទើរតែទ្រាំមិនបាន ឯទម្ងន់ខ្លួនក៏ចាប់ផ្ដើមកើនឡើង ហើយកើតមុន ដែលទាំងអស់នេះ គឺជាសញ្ញាបញ្ជាក់ថាអ័រម៉ូនរបស់អ្នកកំពុងតែប្រែប្រួលខុសប្រក្រតី។ វិធីកែខៃដ៏ល្អបំផុតចំពោះបញ្ហានេះ គឺត្រូវចេះសង្កេតតាមដានមើល រួចទៅជួបលោកគ្រូពេទ្យ ដើម្បីពិនិត្យព្យាបាល និងសុំការណែនាំ។ តែការឈឺចាប់ពេលមករដូវ គឺជារឿងធម្មតាទេសម្រាប់ស្ត្រីទូទៅ ដូច្នេះវិធីដែលល្អ គឺគួរកុំទទួលទានទឹកដែលត្រជាក់ ឬបើឈឺពោះខ្លាំងជាប្រចាំនោះ សូមទទួលទានខ្លាញ់ត្រី ព្រោះខ្លាញ់ត្រីអាចជួយកាត់បន្ថយការឈឺបាន។
4/ ស្បែកជ្រីវជ្រួញ
នៅពេលអាយុកាន់តែច្រើន ការផលិតខលឡាជេនក៏នឹងថយចុះទៅតាមនោះដែរ។ បើអ្នកសង្កេតមើលឱ្យបានដិតដល់ មិនថាជាស្បែកមុខ ឬស្បែកត្រង់កន្លែងណាទៀតទេអ្នកនឹងឃើញថា ស្បែកប្រែប្រួល ដោយចាប់ផ្ដើមស្ងួត យារ លែងហាប់ណែនដូចមុន និងមានសភាពជ្រីវជ្រួញ ហើយបើក្រចករបស់អ្នកឆែប ឬងាយនឹងកើតមានស្នាមនោះ គឺជាសញ្ញាបង្ហាញឱ្យឃើញថា ប្រូតេអ៊ីន ឬសារធាតុរ៉ែក្នុងខ្លួនអ្នកកំពុងបាត់បង់។ ចំពោះបញ្ហាស្បែក វិធីកែខៃដ៏ប្រសើរបំផុត គឺសូមលាបក្រែមដែលមានគុណភាពល្អឱ្យបានជាប្រចាំ ព្រោះការធ្វើបែបនេះ នឹងធ្វើឱ្យស្បែករបស់អ្នកមានសំណើមទោះជាអ្នកចេញក្រៅត្រូវខ្យល់ ឬក៏នៅតែក្នុងបន្ទប់ម៉ាស៊ីនត្រជាក់ក៏ដោយ ជាពិសេសនោះគឺអាចជួយការពារពីការត្រូវកាំរស្មីយូវីរបស់ព្រះអាទិត្យដែលចូលមកបំផ្លាញស្បែក និងខូលឡាជេនក្នុងស្បែករបស់អ្នកបាន។
5/ មានអារម្មណ៍ថា ខួរក្បាលស្ពឹកស្រពន់
Brain Aging គឺជាអាការស្ពឹកស្រពន់របស់ខួរក្បាល កាលបើមានវាហើយខួរក្បាលនឹងស្ពឹកស្រពន់ គិតអ្វីមិនសូវចេញ ការចងចាំធ្លាក់ចុះ និងមិនស្រឡះល្អឡើយ តែមិនមែនមានន័យថា អ្នកកើត អាល់ហ្សៃមើរ៍ នោះទេ គឺបណ្ដាលមកពីអ្នកបានធ្វើឱ្យតុល្យភាពនៃប្រព័ន្ធសរសៃឈាមមិនស្មើគ្នា និងទទួលទានសារជាតិចិញ្ចឹមខួរក្បាលមិនគ្រប់គ្រាន់នោះឯង ដូចជា អាស៊ីត អាមីណូ ឬវីតាមីនជាដើម ម្យ៉ាងទៀតអាចបណ្ដាលមកពីអ្នកប្រើប្រាស់ខួរក្បាលមិនបានត្រឹមត្រូវ។ វិធីកែបញ្ហានេះគឺ ធ្វើយ៉ាងណាត្រូវបន្ថែមសារជាតិចិញ្ចឹមខួរក្បាលឱ្យបានច្រើនបំផុត ដូចជា ទទួលទានអាហារដែលមានអត្ថប្រយោជន៍ចំពោះសុខភាពនារី ដូចជា ប៉ិកួយ (មានលក្ខណៈដូចជា ចាហួយខ្មៅ) អាស៊ីតអាមីណូផ្សេងៗ និងប្រើប្រាស់ ឬហ្វឹកហាត់ខួរក្បាលឱ្យបានត្រឹមត្រូវ ដូចជា ហាត់គិតលេខ រៀនគិតវិភាគទស្សនៈ និងរៀនតែងនិពន្ធជាដើម៕
