សង្គម និងសេដ្ឋកិច្ច - La Reine Media

វៀតណាមចំអកឱ្យ Ariana Grande ថា ជាកំពូលនារីបោកគ្រាប់បែក

បន្ទាប់ពីព័ត៌មានជាច្រើនដែលពាក់ព័ន្ធនឹងការបោកគ្រាប់បែក (បោកប្រាស់) ក្នុងកម្មវិធីប្រគំតន្ត្រីរបស់នាង Ariana Grande លេចឮឡើង អ្នកសារព័ត៌មានរៀតណាមបានសរុបព្រឹត្តិការណ៍របស់នាងឡើងវិញ ដោយរៀបរាប់ពីការប្រគំតន្ត្រីទេសចរណ៍ជុំវិញពិភពលោក ដែលធ្វើឱ្យអ្នកគាំទ្រខកចិត្តចំពោះរូបនាង រហូតដល់មានទស្សនាវដ្តីមួយចេញផ្សាយក្រោមចំណងជើងធំៗថា Dangerous Woman Tour ឬកំពូលនារីបោកគ្រាប់បែកទៀតផង។

1.ការបោកគ្រាប់បែកនៅទីក្រុង Manchester ប្រទេសអង់គ្លេស (មួយនេះបោកគ្រាប់បែកមែនទែន)
នៅក្នុងទីក្រុង Manchester City កាលពីល្ងាចថ្ងៃច័ន្ទ ទី22 ខែឧសភា កន្លងទៅនេះ មានហេតុការណ៍បោកគ្រាប់បែក(មែនទែន) បានកើតឡើងនៅក្នុងការប្រគំតន្ត្រីរបស់តារាចម្រៀងស្រីរូបនេះ ដែលធ្វើឱ្យមនុស្សស្លាប់ 22 នាក់ និង 50 នាក់រងរបួស។

2.បោកគ្រាប់បែកអ្នកគាំទ្រនៅកូរ៉េ
នៅថ្ងៃទី14 ខែសីហា ឆ្នាំ2017 តារាចម្រៀងស្រីរូបស្រស់ម្នាក់នេះ ត្រូវធ្វើដំណើរទៅកាន់ប្រទេសកូរ៉េខាងត្បូងមុនមួយថ្ងៃដើម្បីចូលរួមសម្ដែងក្នុងការប្រគំតន្ត្រីទេសចរណ៍នៅថ្ងៃទី15 ។ នាងបានកុហក និងបោកប្រាស់អ្នកគាំទ្រកូរ៉េឱ្យទិញសំបុត្រ VIP ជាច្រើនសន្លឹកដែលមានតម្លៃថ្លៃៗ តែផ្ទុយទៅវិញនាងមកសម្ដែងមិនបានគ្រប់ Show និងថែមទាំងប្រញាប់ចាកចេញទៅវិញ ដោយរំសាយការប្រគំតន្ត្រីនោះនៅក្នុងបរិវេណ Gimpo Airport ទាំងកណ្តាលទី ។

3.បោកគ្រាប់បែកជនជាតិវៀតណាម 5 ម៉ោងមុនសម្ដែង
នៅថ្ងៃទី23 ខែសីហា ឆ្នាំ2017 មុនពេលចាប់ផ្ដើមការប្រគំតន្ត្រីរបស់នាងនៅប្រទេសវៀតណាម តារាចម្រៀងស្រីរូបនេះបានសរសេរបង្ហោះនៅលើបណ្ដាញសង្គម អ៊ីនស្តាក្រាមរបស់ខ្លួនថា សូមរំសាយការប្រគំតន្ត្រី ដោយមូលហេតុរបស់នាងគឺ សុខភាពមិនល្អ។ អ្នកគាំទ្រវៀតណាមបានរិះគន់នាងថា មិនត្រឹមតែបំផ្លាញទឹកចិត្តអ្នកគាំទ្រវៀតណាម និងជនបរទេសដែលបានជិះយន្ដហោះមកមើលប៉ុណ្ណោះទេ តែនៅបោកគ្រាប់បែកដាក់តារាវៀតណាមល្បីៗដ៏ទៃទៀតជាច្រើន ដែលត្រូវចូលរួមច្រៀងក្នុងកម្មវិធីនេះទៀតផង។

4.លុបចោលការប្រគំតន្ត្រីនៅតាមបណ្ដាប្រទេសនានា ដោយមូលហេតុមានបញ្ហាសុខភាព
Ariana បានលុបចោលកម្មវិធីខនសឺតម្តងហើយម្តងទៀតនៅក្នុងប្រទេសព័រទុយហ្គាល់ ទីក្រុងឡុងដ៍ ប្រទេសស្វ៊ីស ប្រទេសម៉ិកស៊ិក ចំនួនពីរដង ដោយសំអាងលើមូលហេតុជាច្រើន រួមមានបញ្ហាសុខភាព និងបញ្ហាផ្លូវចិត្តបន្ទាប់ពីកើតហេតុការណ៍បំផ្ទុះគ្រាប់បែកនៅទីក្រុង Manchester៕

August 25, 2017

កុមារកម្ពុជាជិត 10% មិនចេះអានអក្សរ

វាជាស្ថានភាពវិជ្ជមានមួយដែលការអប់រំនៅទីជនបទនាពេលបច្ចុប្បន្ននេះមានភាពប្រសើរឡើង បើប្រៀបធៀបជាមួយនឹងការអប់រំប៉ុន្មានឆ្នាំមុន តែវិសមភាពនៃការអប់រំនៅតែជាក្តីកង្វល់នៅឡើយសម្រាប់កម្ពុជា ជាពិសេសកុមារនៅជនបទ។

យោងតាមរបាយការណ៍របស់អង្គការ UNICEF ប្រចាំនៅកម្ពុជាបានលើកឡើងថា កុមារ 1នាក់ នៅក្នុងចំណោម 5នាក់ មកពីគ្រួសារក្រីក្របំផុតមិនបានចូលរៀនបឋមសិក្សា ហើយទន្ទឹមនឹងនេះដែរ គេស្រាវជ្រាវឃើញថា មានកុមារកម្ពុជាជិត 10% មិនចេះអាន និងសរសេរអក្សរ។ កុមារដែលមិនចេះអាន និងសរសេរអក្សរទាំងអស់នោះ គឺខកខានឱកាសក្នុងការទទួលបានចំណេះដឹង និងការរៀនសូត្រ ក៏ដូចជាឱកាសភ្លឹថ្លានៅក្នុងជីវិត។

UNICEF បានបញ្ជាក់ផងដែរថា ក្នុងចំណោមកុមារដែលស្ថិតក្នុងភាពអនក្ខរកម្ម ទាំងអស់នោះ កុមារពិការក៏ជាអ្នកងាយរងគ្រោះមួយប្រភេទដែលមិនទទួលបានការអប់រំ។ កុមារកម្ពុជាជាង 30% ដែលមានអយុចាប់ពី 15ឆ្នាំ ដល់ 19ឆ្នាំដែលមានពិការភាព គឺជាអនក្ខរជន និងមិនបានចូលរៀន៕

August 25, 2017

នារីៗហាមរំលង! វិធីសម្អាតស្បែកមុខជាមួយចេកទុំ

ផ្លែចេកទុំ មានសារធាតុរំអិលដើម្បីជួយឱ្យស្បែកមានភាពរលោងស្រស់ស្អាត និងមានវីតាមីន អំបិលរ៉ែ ប្រូតេអ៊ីនជាច្រើនប្រភេទ ដែលមានគុណប្រយោជន៍ដល់ស្បែក ការពារស្បែក បំបាត់ស្នាមជ្រួញ និងព្យាបាលស្នាមសន្លាក។ ថ្ងៃនេះ គេហទំព័រ ឡារ៉ែន បានដកស្រង់នូវវិធីសាស្ត្រថ្មីក្នុងការសម្អាតស្បែកមុខ ឱ្យមានសំណើម ភ្លឺរលោង និងម៉ដ្ឋខៃមកជម្រាបជូនដូចខាងក្រោម។

គ្រឿងផ្សំចាំបាច់៖

ផ្លែចេកទុំ លាងទឹកឱ្យស្អាត ហើយបកសម្បកចេញ រួចយកសាច់វាទៅកិន ឬក្រឡុកឱ្យម៉ដ្ឋ។

វិធីធ្វើ៖

វិធីទី1៖ ប្រើចេកណាំវ៉ាទុំ1ផ្លែ ទឹកឃ្មុំ1ស្លាបព្រាកាហ្វេ រូបមន្តនេះសម្រាប់អ្នកស្បែកស្ងួត ។ ហើយអាចបន្ថែមទឹកក្រូចឆ្មារ 1 ស្លាបព្រាកាហ្វេ សម្រាប់អ្នកស្បែកមានជាតិខ្លាញ់ច្រើន។ ផ្សំគ្រឿងទាំងអស់បញ្ជូលគ្នាឱ្យសព្វ រួចលាបនៅលើស្បែកមុខរយៈពេល 15-20នាទី ទើបលាងចេញដោយទឹកស្អាត។

វិធីទី2៖ យកចេកណាំវ៉ាទុំ1ផ្លែ លាយជាមួយប្រេងអូលីវ1ស្លាបព្រាកាហ្វេ លាយចូលគ្នាឱ្យសព្វ រួចលាបនៅលើស្បែកមុខ ទុកចោលរយៈពេល 15-20 នាទី ទើបលាងជម្រះដោយទឹកស្អាត ឬសាប៊ូលាងមុខបាន។

វិធីទី3៖ យកចេកណាំវ៉ាទុំបកសម្បក ហើយកិនឱ្យម៉ដ្ឋ បន្ទាប់មកយកមកលាបនៅលើស្បែកមុខទុករយៈពេល 15-20 នាទីទើបលាងទឹកចេញ៕

August 25, 2017

អ្វីជាអត្ថប្រយោជន៏នៃការប្រើប្រាស់ម៉ាស៊ីនបោកគក់ LG ?

និយាយពីម៉ាស៊ីនបោកខោអាវ ប្រិយមិត្តមួយចំនួនប្រាកដជាយល់ថា ជាការខ្ជះខ្ជាយប្រាក់កាស ព្រោះបោកគក់មិនសូវស្អាត ហើយធ្វើឱ្យខូចសម្លៀកបំពាក់ទៀត។ ប៉ុន្តែវាមិនមែនដូច្នោះទេ ប្រសិនបើលោកអ្នកធ្វើការជ្រើសរើស និងដឹងពីមុខងារសំខាន់ៗដែលមានបំពាក់ក្នុងម៉ាស៊ីនបោកគក់ទាំងនោះ។

ជាមួយគ្នានេះដែរ ក្រុមការងារនៃគេហទំព័រ ឡារ៉ែន សូមណែនាំនូវម៉ាស៊ីនបោកគក់ LG មួយម៉ូដែល ដែលវានឹងជួយឱ្យការងារបោកគក់របស់លោកអ្នក ជាពិសេសបងៗស្រីមេផ្ទះបានប្រសើរជាងមុន ដោយសារម៉ាស៊ីននេះត្រូវបានភ្ជាប់មកជាមួយនូវមុខងារដ៏ពិសេស និងមានផលប្រយោជន៏ជាច្រើនដូចជា កាត់បន្ថយពេលវេលា សន្សំសំចៃទឹក និងភ្លើងបានច្រើន។ ជាមួយបច្ចេកវិទ្យាថ្មី LG TurboWash អាចសន្សំសំចៃពេលវេលាបានដល់ទៅ 20 នាទីព្រមជាមួយដំណើរការបោកគក់ស្ងាត់ល្អ ខុសពីការបោកគក់ធម្មតាដែលចំណាយពេលយូរ និងអាចសម្អាតបានតែស្នាមប្រឡាក់ស្រាលៗមួយចំនួនតែប៉ុណ្ណោះ។

បច្ចេកវិទ្យា TrueSteam ជាមុខងារប្រើប្រាស់ចំហាយទឹក 100 % ដែលប្រសើរជាងការប្រើប្រាស់សារធាតុគីមីដើម្បីបន្ទន់សាច់ក្រណាត់ដែលល្អសម្រាប់កុមារ និងអ្នកមានបញ្ហាស្បែក។ កាន់តែពិសេសទៅទៀតនោះ គឺមានកម្លាំងចំហាយទឹកពីម៉ាស៊ីនដែលធ្វើការដូចឆ្នាំងអ៊ុតខោអាវ ដើម្បីកាត់បន្ថយស្នាមជ្រីវជ្រួញ និងក្លិនផ្អូមបានក្នុងរយៈពេល 20 នាទី។ TrueSteam ក៏បានបន្ថែមនូវមុខងារ Allergy Care ជាបច្ចេកវិទ្យាដែលប្រើប្រាស់កម្លាំងចំហាយទឹកមានកម្ដៅដល់ទៅ 100 អង្សាC ធ្វើការកម្ចាត់សារធាតុរមាស់ និងប្រតិកម្មលើស្បែកបាន 99.9%៕

August 24, 2017

និស្សិតសាកលវិទ្យាល័យកសិកម្មនឹងទទួលបានអាហារូបករណ៍ដាំបន្លែក្នុងបន្ទប់

ភ្នំពេញ៖ លោក Tomonori KIMURA ស្ថាបនិក និងជានាយកប្រតិបត្តិនៃក្រុមហ៊ុន Asian Gateway Corporationបានថ្លែងថា ក្រុមហ៊ុននឹងផ្តល់អាហារូបករណ៍ដល់និស្សិតសាកលវិទ្យាល័យភូមិន្ទកសិកម្មស្តីពីគម្រោងជលវប្បកម្ម គឺការដាំបន្លែក្នុងទឹកនៅក្នុងបន្ទប់(Hydroponic Farm) ដែលជាបច្ចេកវិទ្យាថ្មីចុងក្រោយបំផុត។

នៅក្នុងជំនួបពិភាក្សាជាមួយឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក Tomonori KIMURA មានប្រសាសន៍ថា គោលបំណងរបស់គម្រោងខាងលើៈ

ទី1.គឺធ្វើការណែនាំបច្ចេកវិទ្យាថ្មីអំពីការដាំបន្លែក្នុងទឹកក្នុងបន្ទប់ដល់និស្សិត កសិករ និងវិស័យឯកជនដើម្បីពង្រីកការអភិវឌ្ឍបច្ចេកវិទ្យានេះបន្ថែមទៀតឱ្យឆ្លើយតបទៅនឹងតម្រូវការក្នុងស្រុកនាពេលបច្ចុប្បន្ន។

ទី2.សិក្សាស្រាវជ្រាវពីតម្រូវការនៅលើទីផ្សារបន្លែដែលផលិតដោយប្រព័ន្ធដាំបន្លែក្នុងទឹកនេះ។

ទី3.អភិវឌ្ឍធនធានមនុស្សសម្រាប់និស្សិតឱ្យយល់ដឹងពីបច្ចេកវិទ្យាធ្វើយ៉ាងណាជំរុញផលិតកម្មបន្លែឱ្យមានការអភិវឌ្ឍប្រកបដោយនិរន្តរភាព

និងទី4.សិក្សាពីលទ្ធភាពអាចប្រើប្រាស់សម្ភារក្នុងស្រុកមួយចំនួនដែលជួយកាត់បន្ថយថ្លៃដើមក្នុងការផលិតបន្លែតាមរបៀបបច្ចេកវិទ្យាថ្មីនេះ។

លោកបានបន្ថែមទៀតថា គម្រោងនេះនឹងមិនប្រើសារធាតុគីមី ផលិតផលិតផលសុវត្ថិភាព កាត់បន្ថយថ្លៃដើម ផលិតផ្គត់ផ្គង់ដល់អតិថិជនដែលមានចំណូលមធ្យម ហើយអនាគតនឹងផ្ទេរបច្ចេកវិទ្យានេះឱ្យដល់ក្រុមហ៊ុនក្នុងស្រុកជាពិសេសនិស្សិតជំនាន់ក្រោយ។

ឯកឧត្តម វេង សាខុន រដ្ឋមន្ត្រីក្រសួងកសិកម្មបានថ្លែងសាទរ ហើយមានប្រសាសន៍ថា ប្រជាជនកម្ពុជាជាពិសេសប្រជាពលរដ្ឋដែលរស់នៅក្នុងរាជធានីភ្នំពេញបាននិងកំពុងមានចំណាប់អារម្មណ៍ខ្ពស់ពីបញ្ហាសុខភាពទាក់ទងទៅនឹងការបរិភោគចំណីអាហារ ជាពិសេសបន្លែ និងផ្លែឈើ។ ឯកឧត្តមក៏បានថ្លែងគាំទ្រ និងលើកទឹកចិត្តដល់គម្រោងជលវប្បកម្មនេះ ហើយសង្ឃឹមថា គម្រោងនេះនឹងទទួលបានជោគជ័យ និងអាចពង្រីកបច្ចេកវិទ្យានេះទៅដល់បណ្តាខេត្ត-ក្រុងមួយចំនួននាពេលអនាគត។ ម្យ៉ាងវិញទៀតគម្រោងនេះអាចផ្ទេរបច្ចេកវិទ្យាដល់និស្សិត និងក្រុមហ៊ុនផលិតបន្លែសុវត្ថិភាពក្នុងស្រុកដើម្បីផលិតបន្លែឱ្យបានគ្រប់គ្រាន់តាមតម្រូវការទីផ្សារដើម្បីកាត់បន្ថយការនាំចូល។

សូមជម្រាបជូនថា បច្ចេកវិទ្យានេះគឺជាការដាំដុះបន្លែក្នុងបន្ទប់ដោយប្រើប្រព័ន្ធថាមពលពន្លឺព្រះអាទិត្យ អាចគ្រប់គ្រងសីតុណ្ហភាព សំណើម មិនរណបនឹងធម្មជាតិដូចជាភ្លៀងច្រើន រាំងស្ងួត សត្វល្អិត ឬជំងឺបំផ្លាញទ្បើយ ៕

August 24, 2017

Recky ផលិតបទ«កប់កាលៀន» ដើម្បីសាកល្បងវិជ្ជាគុន

ក្រោយទទួលបានប្រជាប្រិយភាពក្នុងការងារពិធីករក្នុងកម្មវិធីប្រគំតន្រី្ដ AD នៃស្ថានីយទូរទស្សន៍អាស៊ីអាគ្នេយ៍ Recky បានបញ្ជាក់ប្រាប់ថា នៅសប្ដាហ៍ក្រោយនេះលោកនឹងចេញបទថ្មីរបស់ខ្លួនប្រភេទ Original Song មានចំណងជើងថា «កប់កាលៀន»។

លោក Recky បញ្ជាក់ថា កន្លងមកលោកធ្លាប់បានផលិតបទចម្រៀងច្រើនដែរ ប៉ុន្ដែជាប្រភេទមនោសញ្ចេតនា ហើយមូលហេតុដែលលោកប្ដូរស្ទីលនៃការច្រៀងទៅជាប្រភេទបទញាក់ និងមាន Rap វិញផងនោះ ព្រោះលោកចង់សាកល្បងសមត្ថភាពនៃការច្រៀង Rap របស់ខ្លួនដែលធ្លាប់ចេះជាយូរមកហើយផង។ ម្យ៉ាងចាត់ទុកថា ជាការបើកឱកាសផ្លាស់ប្ដូរបទពិសោធថ្មីរបស់លោកដើម្បីឈានទៅក្លាយជាតារាចម្រៀង Rap ផងដែរ។

នៅក្នុងអត្ថន័យបទចម្រៀង «កប់កាលៀន» អ្នកនិពន្ធបានលើកឡើងក្នុងន័យរិះគន់ចំៗទៅលើនារីខ្មែរបច្ចុប្បន្នដែលនិយមស្លៀកខ្លីកប់ក្រលៀនហួសហេតុដែលអាចធ្វើឱ្យប៉ះពាល់ដល់ប្រពៃណីខ្មែរដែលពីដើមមកមិនដែលមានដូច្នេះ។ បទនេះត្រូវបានសម្ដែងដោយតារាស្រី 3ដួង មានកញ្ញាម៉ានិច កញ្ញា Lita កញ្ញា ណាមហ្វា។ និពន្ធទំនុកច្រៀងដោយលោកសួន សេបញ្ញា និងបទភ្លេងដោយ DJ វ៉ូច។

ជាមួយនឹងបទចម្រៀងមួយនេះត្រូវបានលោក Recky បញ្ជាក់ថា៖ «បើទោះជាខ្ញុំធ្លាប់ចេញបទចម្រៀងទទួលបានការគាំទ្រច្រើនក៏ដោយ តែខ្ញុំក៏មិនទាន់ប្រាកដក្នុងចិត្ដថានឹងទទួលបានការគាំទ្រច្រើនដែរព្រោះជាបទពិសោធថ្មីរបស់ខ្ញុំ។ ម្យ៉ាងអត្ថន័យរបស់បទនេះបានរិះគន់ចំៗទៅលើស្ដ្រីខ្មែរដែលនិយមស្លៀកខ្លីហួសហេតុពេក ដូច្នេះពួកគាត់អាចនឹងមិនសប្បាយចិត្ដជាមួយបទនេះក៏អាចថាបានដែរ»។

លោក Recky បានបញ្ជាក់ថា ក្នុងស្នាដៃថ្មីដែលនឹងចេញនាសប្ដាហ៍ក្រោយនេះ លោកក៏បានត្រៀមចិត្ដទទួលយករាល់ការរិះគន់ក្នុងន័យស្ថាបនាពីមហាជនរួចហើយដែរដើម្បីយកមកអភិវឌ្ឍខ្លួនបន្ថែមទៀត ខណៈដែលលោកគ្រោងនឹងចេញបទថ្មីជាបន្ដបន្ទាប់៕

August 24, 2017

ក្រសួងពាណិជ្ជកម្មព្រមានចាត់វិធានការលើទំនិញក្លែងម៉ាកសញ្ញា

ភ្នំពេញ៖ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានថ្លែងដោយព្រមានចាត់វិធានការទៅលើទំនិញបន្លំម៉ាកសញ្ញាទាំងឡាយណាដែលចរាចរលក់នៅលើទីផ្សារនាំឱ្យប៉ះពាល់ដល់ទំនិញដើមរបស់ក្រុមហ៊ុន និងប៉ះពាល់ដល់ការអនុវត្តច្បាប់កម្មសិទិ្ធបញ្ញានៅកម្ពុជា។

ការព្រមានខាងលើធ្វើឡើងនៅពេលឯកឧត្តមអនុញ្ញាតឱ្យលោក ដូយ កុនចា (Doy Concha) នាយកក្រុមហ៊ុនយូនីលីវើប្រចាំប្រទេសកម្ពុជា និងសហការីចូលជួបពិភាក្សាដើម្បីស្វែងរកកិច្ចសហប្រតិបត្តិការប្រយុទ្ធប្រឆាំងនឹងផលិតផលក្លែងបន្លំម៉ាកសញ្ញាក្នុងការពង្រឹងច្បាប់កម្មសិទ្ធិបញ្ញាឱ្យកាន់តែមានប្រសិទ្ធភាពខ្ពស់។

លោក ដូយ កុនចា នាយកក្រុមហ៊ុនយូនីលីវើមានប្រសាសន៍រាយការណ៍ថា ក្រុមហ៊ុនយូនីលីវើ បានធ្វើប្រតិបត្តិការធុរកិច្ចនៅកម្ពុជារយៈពេលជាង 21ឆ្នាំមកហើយ ដោយសារតែមានការគាំទ្រពីអតិថិជន និងរដ្ឋាភិបាល។ បច្ចុប្បន្នក្រុមហ៊ុនមានបុគ្គលិកបម្រើការជិត2,000នាក់ ហើយគ្រោងនឹងនាំយកផលិតផលថ្មីៗទៀតចូលមកកាន់ទីផ្សារកម្ពុជា ប៉ុន្តែក្រុមហ៊ុនកំពុងប្រឈមជាមួយផលិតផលយូនីលីវើនាំចូលដោយខុសច្បាប់ដែលកំពុងចរាចរលក់ក្នុងតម្លៃទាបជាងផលិតផលក្រុមហ៊ុនដល់ទៅ20% ហើយអាចបណ្តាលឱ្យប៉ះពាល់សុខភាពអ្នកប្រើប្រាស់ទៀតផង។

ជាការឆ្លើយតប ឯកឧត្តម ប៉ាន សូរស័ក្តិ បានសាទរជាមួយវឌ្ឍនភាពក្រុមហ៊ុនរបស់យូនីលីវើ និងបានបង្ហាញការគាំទ្រចំពោះប្រតិបត្តិការធុរកិច្ចរបស់ក្រុមហ៊ុននៅកម្ពុជា។ ឯកឧត្តមរដ្ឋមន្ត្រី បានផ្តល់អនុសាសន៍ដល់អគ្គនាយកដ្ឋានកាំកុងត្រូលឱ្យធ្វើការពិនិត្យលើករណីផលិតផលយូនីលីវើក្លែងក្លាយនៅលើទីផ្សារ និងបានសំណូមពរដល់លោក ដូយ និងសហការី សហការផ្តល់ព័ត៌មានជូនភ្នាក់ងារកាំកុងត្រូលដែលជាសេនាធិការរបស់ក្រសួងពាណិជ្ជកម្មដែលមានភារកិច្ចត្រួតពិនិត្យទំនិញនីហរ័ណ-អាហរ័ណ និងបង្ក្រាបការក្លែងបន្លំ។ បន្ថែមលើសពីនេះ ឯកឧត្តមរដ្ឋមន្ត្រីក៏បានសំណូមពរដល់ក្រុមហ៊ុនយូនីលីវើឱ្យពិចារណាយកគំរូតាមភាពជោគជ័យរបស់ក្រុមហ៊ុនមួយចំនួនដោយប្រើប្រាស់ខេមរភាសាលើផលិតផលទាំងអស់ដើម្បីធ្វើឱ្យមានភាពខុសគ្នាជាមួយផលិតផលនាំចូលខុសច្បាប់ ដើម្បីមន្ត្រីកាំកុងត្រូលនឹងអាចធ្វើការដកហូតផលិតផលទាំងអស់នោះនៅតាមទីផ្សារនានាបាន៕

August 24, 2017

តើកម្ពុជានឹងទទួលបានភាគលាភដូចម្តេចពីការបូមប្រេងនៅប្លុក A

ភ្នំពេញៈ មានប្រជាពលរដ្ឋកម្ពុជាជាច្រើនបានចាប់អារម្មណ៍ និងចង់ដឹងពីផលប្រយោជន៍ដែលកម្ពុជានឹងទទួលបានពីភាគលាភពីអណ្តូងប្រេងនៅតំបន់ប្លុកAរបស់កម្ពុជាដែលបានចុះហត្ថលេខារវាងក្រសួងរ៉ែ និងថាមពលជាមួយក្រុមហ៊ុន KRISENERGY កាលពីថ្ងៃម្សិលមិញ។

យោងតាមលក្ខខណ្ឌនៃកិច្ចព្រមព្រៀងសម្រាប់ការអភិវឌ្ឍតំបន់ប្រេងកាតប្លុក A របស់ក្រុមហ៊ុន KRISENERGY កម្ពុជានឹងទទួលបានអត្ថប្រយោជន៍ពីការអភិវឌ្ឍជាច្រើន រួមមានអត្រាកម្រៃសួយសារ ពន្ធលើប្រាក់ចំណូល ពន្ធលើប្រាក់ចំណូលលើសកម្រិត ពន្ធលើការនាំចេញ ថ្លៃជួលផ្ទៃដីប្រចាំឆ្នាំ ជាពិសេសរាជរដ្ឋាភិបាលទទួលបានភាគហ៊ុន5ភាគរយពីគម្រោងអភិវឌ្ឍន៍នេះផងដែរ។

លោក Kelvin Tang នាយកប្រតិបត្តិក្រុមហ៊ុន KRISENERGY Ltd បានថ្លែងលើកឡើងនៅក្នុងពិធីចុះហត្ថលេខាលើកិច្ចព្រមព្រៀងកាលពីម្សិលមិញថា ការអភិវឌ្ឍអណ្តូងប្រេងប្លុកAនេះនឹងក្លាយជាព្រឹត្តិការណ៍ប្រវត្តិសាស្ត្រមួយសម្រាប់សេដ្ឋកិច្ច និងប្រជាជនកម្ពុជាក៏ដូចជាសម្រាប់ក្រុមហ៊ុន KRSIENERGY ផងដែរ។ ពាក់ព័ន្ធនឹងការអភិវឌ្ឍដំបូងក្នុងដំណាក់កាល1A រួមមានតំបន់ក្បាលអណ្តូងដែលបញ្ជាពីចម្ងាយមួយសម្រាប់ទ្រទ្រង់ដល់អណ្តូងបូមប្រេងចំនួន24នឹងអាចធ្វើការបូមបាន3ម៉ឺនបារ៉ែលក្នុងមួយថ្ងៃទៅកាន់នាវាផលិតមួយដែលធ្វើប្រព្រឹត្តកម្មប្រេង និងញែកយកឧស្ម័ន ប្រេង និងទឹកចេញពីគ្នា ។

លោកបន្តថា ភាគលាភដែលបែងចែករវាងក្រុមហ៊ុន និងរដ្ឋាភិបាលសម្រាប់ការអភិវឌ្ឍអណ្តូងប្រេងកាតសម្រាប់ប្លុកA កម្ពុជានឹងទទួលបានកម្រៃលើសួយសារ12.5ភាគរយនៃផលិតកម្ម ពន្ធលើប្រាក់ចំណូល 25ភាគរយ សម្រាប់រយៈពេល5ឆ្នាំដំបូង រាប់ចាប់ពីឆ្នាំដំបូងដែលមានចំណូលជាប់ពន្ធ និង30ភាគរយសម្រាប់ឆ្នាំបន្តបន្ទាប់។ ក្នុងនោះចំពោះពន្ធលើប្រាក់ចំណូលលើសកម្រិត និងប្រសិនបើមានប្រាក់ចំណូលលើសកម្រិតនោះ ពន្ធប្រាក់ចំណូលលើសកម្រិតនឹងត្រូវអនុវត្តបន្ថែមលើប្រាក់ចំណូលលើអត្រាកំណើនតាមថ្នាក់ចាប់ពី10ភាគរយទៅ30ភាគរយផងដែរ ។

ចំណែកពន្ធលើការនាំចេញក៏បានកំណត់ក្នុងចំនួន2ភាគរយ ថ្លៃជួលផ្ទៃដីប្រចាំឆ្នាំ500ដុល្លារក្នុង1គីឡូម៉ែត្រការ៉េ គឺចាប់គិតពីថ្ងៃចូលជាធរមាន រួមជាមួយរាជរដ្ឋាភិបាលនឹងទទួលបានភាគហ៊ុន5ភាគរយក្នុងការចូលរួមអភិឌ្ឍន៍នោះផងដែរ។

ទាក់ទិននឹងការអភិវឌ្ឍនេះលោក Kelvin Tang បានថ្លែងឲ្យដឹងថា ក្រុមហ៊ុនទទួលបានការវិនិយោគលើទំហំផ្ទៃដីធ្វើអាជីវកម្មទំហំ3,083គីឡូម៉ែត្រការ៉េ ក្នុងនោះរាជរដ្ឋាភិបាលកម្ពុជាបានផ្តល់អាជ្ញាប័ណ្ណអនុញ្ញាតឲ្យធ្វើអាជីវកម្មមានរយៈពេល25ឆ្នាំ គឺចាប់គិតពីថ្ងៃចេញអាជ្ញាប័ណ្ណអនុញ្ញាតផលិតកម្មដំបូងនេះតទៅ៕

August 24, 2017

ទោសមិនឈ្នះទាល់…ទោះមានការរឹតបន្តឹងក៏សិស្សប្រឡងបាក់ឌុបនៅតែហ៊ានល្មើស

នេះជាឆ្នាំទី4 ហើយនៃកំណែទម្រង់ប្រព័ន្ធអប់រំ ដែលក្រសួងបានរឹតបន្តឹងការប្រឡងមធ្យមសិក្សាទុតិយភូមិ ។ មុនថ្ងៃប្រឡងក្រសួងអប់រំ យុវជន និងកីឡា បានធ្វើការផ្សព្វផ្សាយជាច្រើនពីទោសកំហុស ដែលចំណុចខ្លះអាចឈានដល់ការពិន័យឱ្យធ្លាក់ដោយស្វ័យប្រវត្តិ ហើយខ្លះទៀតឈានដល់ការប្តឹងទៅតុលាការថែមទៀតផង តែរហូតមកដល់ឆ្នាំនេះ យើងឃើញថាបេក្ខជនមួយចំនួនតូចដែលមិនបានខិតខំប្រឹងប្រែងឱ្យអស់ពីសមត្ថភាពពីដើមឆ្នាំ នៅតែហ៊ានប្រថុយដោយការលួចចម្លងចម្លើយ លួចដូរលេខតុ លួចលាក់ទូរស័ព្ទចូលមណ្ឌលប្រឡងនិងប្រព្រឹត្តកំហុសផ្សេងទៀត។

នៅឆ្នាំ 2017 នេះបេក្ខជនដែលបានប្រព្រឹត្តកំហុសមានចំនួន 13ករណី ក្នុងនោះករណីដកហូតទូរស័ព្ទដៃ 6ករណី ប្តូរលេខតុអង្គុយមាន1ករណី លួចចម្លងសំណៅឯកសារ1ករណី លួចប្រើម៉ាស៊ីនគិតលេខ1ករណី ប្រឡងជំនួស1ករណី និងលួចប្តូរលេខតុ1ករណី។

ខាងក្រោមនេះជាកម្រងរូបភាពមួយចំនួនដែលពាក់ព័ន្ធនឹងបញ្ហានានានៅក្នុងការប្រឡងបាក់ឌុបឆ្នាំ 2017 នេះ៖

August 24, 2017

គោលនយោបាយលើកទឹកចិត្តក្រុមហ៊ុនសាងសង់ផ្ទះតម្លៃទាបជិតបញ្ចប់ហើយ

ភ្នំពេញៈ គោលនយោបាយរបស់រដ្ឋាភិបាលក្នុងការលើកទឹកចិត្តក្រុមហ៊ុនឯកជននានាដែលធ្វើការអភិវឌ្ឍលំនៅដ្ឋានសាធារណៈមានតម្លៃសមរម្យនោះជិតបញ្ចប់ហើយ និងរង់ចាំតែការអនុម័តពីទីស្តីការគណៈរដ្ឋមន្ត្រីប៉ុណ្ណោះ។

លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់បានថ្លែងថា គោលនយោបាយនេះបានបញ្ចប់កិច្ចពិភាក្សាក្រុមការងារបច្ចេកទេសហើយ និងកំពុងរង់ចាំដាក់ឆ្លងកិច្ចប្រជុំពេញអង្គរបស់គណៈរដ្ឋមន្ត្រីដើម្បីពិនិត្យ និងសម្រេច។ លោកបន្តថា តាមរយៈគោលនយោបាយនេះរដ្ឋាភិបាលនឹងជួយតភ្ជាប់ហេដ្ឋារចនាសម្ព័ន្ធដូចជាប្រព័ន្ធផ្លូវ ប្រព័ន្ធទឹក ប្រព័ន្ធភ្លើង និងការលើកទឹកចិត្តផ្នែកពន្ធមួយចំនួនទៀតដើម្បីលើកទឹកចិត្តក្រុមហ៊ុនឯកជន ដែលបានចូលរួមអភិវឌ្ឍលំនៅដ្ឋានសាធារណៈមានតម្លៃសមរម្យសម្រាប់លក់ជូនប្រជាពលរដ្ឋ។

លោកបន្តថា “រហូតមកទល់ពេលនេះមានក្រុមហ៊ុនចំនួន2ហើយដែលបាននិងកំពុងរៀបចំវិនិយោគសាងសង់លំនៅដ្ឋានមានតម្លៃសមរម្យគឺក្រុមហ៊ុនWorld Bridge Land Group និងក្រុមហ៊ុន BM ដែលជាកម្មសិទ្ធិរបស់លោកឧកញ៉ា ប៊ុន ជេស្ឋ ស្ថិតនៅតំបន់ព្រែកតាទែន ជាយក្រុងភ្នំពេញ។

ឆ្លើយតបនឹងសញ្ញាវិជ្ជមាននេះ កាលពីថ្ងៃម្សិលមិញក្រុមហ៊ុន World Bridge Land Group ដែលបានចាប់ដៃគូជាមួយអ្នកវិនិយោគមកពីប្រទេសសិង្ហបុរីដើម្បីអភិវឌ្ឍលំនៅដ្ឋានដំបូងគេនៅកម្ពុជាស្ថិតនៅភាគខាងត្បូងក្រុងតាខ្មៅបានប្រកាសឲ្យអតិថិជនដែលបានចុះឈ្មោះទិញគម្រោងលំនៅដ្ឋានរបស់ក្រុមហ៊ុននេះរៀបចំឯកសារពាក់ព័ន្ធដើម្បីត្រួតពិនិត្យ និងអនុម័តមុនពេលពួកគេអាចទិញលំនៅដ្ឋានសាធារណៈដែលមានតម្លៃទាបនោះបាន។

លំនៅដ្ឋានសាធារណៈរបស់ក្រុមហ៊ុន World Bridge Land Group ផ្តោតលើមន្ត្រីរាជការ កងកម្លាំងប្រដាប់អាវុធ កម្មករ កម្មការិនី និងប្រជាពលរដ្ឋទូទៅដែលមានប្រាក់ចំណូលទាបជាង500ដុល្លារក្នុងមួយខែ៕

August 24, 2017

Category: សង្គម និងសេដ្ឋកិច្ច