សង្គម និងសេដ្ឋកិច្ច - La Reine Media

Kane រំភើបពេលប៉ះ Real ខណៈ Spurs នឹងត្រូវជួប Bale ក្នុង Champions League

ក្រុមមាន់ខ្នាយមាស Tottenham នឹងត្រូវជួបក្រុមម្ចាស់ការពារតំណែងជើងឯក Real Madrid ក្នុងវគ្គចែកពូលនៃក្របខ័ណ្ឌ Champions League ក្រោយពីការចាប់ឆ្នោតមួយដែលត្រូវបានរៀបចំឡើងក្នុងប្រទេសម៉ូណាកូ កាលពីថ្ងៃព្រហស្បតិ៍កន្លងទៅ។

ក្រុម Spurs ត្រូវបានចាប់ឆ្នោតឲ្យស្ថិតក្នុងពូល H រួមជាមួយនឹងក្រុមយក្ស Real Madrid របស់អេស្ប៉ាញ ក្រុម Borussia Dortmund របស់អាល្លឺម៉ង់ និងក្រុម Apoel របស់ប្រទេសស៊ើប។ ការចាប់ឆ្នោតនេះ ក៏ធ្វើឲ្យ Tottenham ដែលជារងជើងឯកក្របខ័ណ្ឌ Premier League ត្រូវប៉ះជាមួយនឹងអតីតតារាឆ្នើមរបស់ខ្លួន Gareth Bale ដែលបានចាកចេញពីក្លិប Spurs ទៅកាន់ Real ក្នុងតម្លៃខ្លួនជាកំណត់ត្រាពិភពលោកកាលពីឆ្នាំ2013 ហើយ Bale នឹងត្រូវជួបជាមួយនឹងអតីតក្រុមរបស់គេជាលើកទី1ដែរ។ ដោយឡែក ក្រុមម្ចាស់ជើងឯករបស់ស្កុតលែនដ៍Celtic ស្ថិតក្នុងពូលដ៏តានតឹងមួយ ខណៈដែលពួកគេនឹងត្រូវជួបជាមួយនឹងក្រុម Bayern Munich, Paris St-Germain និង Anderlecht។

ក្រុម Chelsea ដែលជាម្ចាស់ជើងឯកក្របខ័ណ្ឌ Premier League ត្រូវបានចាប់ឆ្នោតឲ្យស្ថិតក្នុងពូលជាមួយនឹងក្រុម Atletico Madrid, Roma និង Qarabag ក្នុងពូល C ហើយក្រុម Manchester United ដែលជាម្ចាស់ជើងឯកក្របខ័ណ្ឌ EuropaLeague នឹងត្រូវប៉ះជាមួយនឹងក្រុម Benfica, Basel និង CSKA Moscow ក្នុងពូល A។ ខ្សែប្រយុទ្ធ Harry Kane របស់ Tottenham បានឲ្យដឹងថា៖ «វាជាការចាប់ឆ្នោតដ៏អស្ចារ្យមួយ។ អ្នកនឹងរំពឹងទុកពីការលេងជាមួយនឹងក្រុមខ្លាំងបំផុតនៅអឺរ៉ុបក្នុងក្របខ័ណ្ឌ Champions League ហើយវាពិតជារំភើបខ្លាំងណាស់សម្រាប់យើង។ យើងសម្លឹងឆ្ពោះទៅកាន់ការប្រកួតនេះ។ យើងចង់សាកល្បងខ្លួនយើងជាមួយនឹងក្រុមខ្លាំងបំផុត ហើយ Real Madrid គឺជាក្រុមខ្លាំងបំផុតនៅពេលនេះ»។ ការប្រកួតជុំបើកឆាកនឹងប្រព្រឹត្តទៅនៅថ្ងៃទី12 និងទី13 ខែកញ្ញា៕

ការចាប់ឆ្នោតកាលពីថ្ងៃព្រហស្បតិ៍ៈ
ពូល B
Bayern Munich, PSG, Anderlecht, Celtic

ពូល C
Chelsea, Atletico Madrid, Roma, Qarabag

ពូល D
Juventus, Barcelona, Olympiakos, Sporting Lisbon

ពូក E
Spartak Moscow, Sevilla, Liverpool, Maribor

ពូល F
Shakhtar Donetsk, Manchester City, Napoli, Feyenoord

ពូល G
Monaco, Porto, Besiktas, RB Leipzig

ពូល H
Real Madrid, Borussia Dortmund, Tottenham, APOEL

ប្រភពពី៖ BBC

August 25, 2017

វ៉ាន់ នីឡា ធ្វើឱ្យអ្នកគាំទ្រភ័យអរ និងលេបទឹកមាត់ក្អឿកៗ

ថ្មីៗនេះកញ្ញា វ៉ាន់ នីឡា បានធ្វើឱ្យអ្នកគាំទ្ររបស់ខ្លួនពិសេសមហាជននិយមលេងបណ្ដាញសង្គមហាក់មានអារម្មណ៍ព្រឺព្រួចភ័យអរជាមួយវីដេអូឃ្លីបដែលបានបង្ហោះពីសកម្មភាពនាងនៅពេលស្លៀកពាក់ឈុតរ៉ូបកូនក្រមុំ។

តើអ្វីទៅដែលធ្វើឱ្យមហាជនព្រឺព្រួចនោះ? គ្រាដែលវីដេអូឃ្លីបរបស់កញ្ញា វ៉ាន់ នីឡា តារាកំប្លែងប្រចាំស្ថានីយទូរទស្សន៍ CTN ត្រូវបានបង្ហោះខណៈនាងថតស្ប៉តឱ្យសម្អាងការមួយក្នុងសម្លៀកបំពាក់រ៉ូបកូនក្រមុំ គេមើលសឹងតែមិនស្គាល់ថាជារូបនាងផង ព្រោះនៅពេលនាងតុបតែងខ្លួនក្នុងឈុតកូនក្រមុំ រូបសម្ផស្សរបស់នាងពិតជាស្រស់ស្អាតខ្លាំងណាស់។

តែអ្វីដែលពិសេសនោះគឺ នៅពេលអ្នកកាន់ទូរស័ព្ទថតចុះឡើងដើរក្រឡឹងជុំវិញខ្លួននាងនោះបានធ្វើឱ្យអ្នកកំពុងតែទស្សនាភ័យអរៗក្នុងអារម្មណ៍ និងបុកពោះជំនួសនាង ព្រោះម្នាក់ៗគិតថា ប្រសិនបើនាងហ៊ានធ្វើប្រហែសតែបន្ដិច ច្បាស់ជាលេចចេញកន្លែងសំខាន់ឱ្យគេឯងឃើញមិនខាន ហើយក្នុងគ្រានោះទៀតសោត មើលទៅរូបនាងផ្ទាល់ក៏ហាក់ដូចជាពុំបានដឹងខ្លួនឡើយថា ប្រសិនបើនាងប្រហែសតែបន្តិច អ្នកមើលច្បាស់ជាបះសក់ និងលេបទឹកមាត់ក្អឿកមិនខាន៕

August 25, 2017

មន្ត្រីជាន់ខ្ពស់៖ កម្ពុជាកំពុងក្លាយទៅជាប្រទេសមានប្រាក់ចំណូលធុនកណ្តាល

ភ្នំពេញៈ មន្ត្រីជាន់ខ្ពស់ក្រសួងឧស្សាហកម្មបានថ្លែងថា កម្ពុជានឹងប្រែក្លាយទៅជាប្រទេសសេដ្ឋកិច្ចមួយដែលមានប្រាក់ចំណូលធុនកណ្តាល ដោយពឹងផ្អែកលើការអភិវឌ្ឍវិស័យឧស្សាហកម្ម កសិកម្ម ដែលជាកម្លាំងជំរុញកំណើនសេដ្ឋកិច្ចដ៏សំខាន់។

រដ្ឋលេខាធិការក្រសួងឧស្សាហកម្ម និងសិប្បកម្មលោក សាត សាមី បានថ្លែងលើកឡើងនៅក្នុងពិធីសម្ពោធពិព័រណ៍ឧស្សាហកម្មគ្រឿងយន្តកម្ពុជា-អន្តរជាតិឆ្នាំ2017 និងពិព័រណ៍ឧស្សាហកម្មសម្លៀកបំពាក់ និងវាយនភណ្ឌកម្ពុជា-អន្តរជាតិឆ្នាំ2017នាព្រឹកថ្ងៃទី25 ខែសីហានេះថា វិស័យឧស្សាហកម្មបានដើរតួយ៉ាងសំខាន់នៅក្នុងការជំរុញកំណើនសេដ្ឋកិច្ចជាតិ ក្នុងនោះរាជរដ្ឋាភិបាលកម្ពុជាបានអនុម័តនយោបាយអភិវឌ្ឍន៍វិស័យឧស្សាហកម្មកម្ពុជាសម្រាប់ឆ្នាំ2015-2025 យោងតាមទស្សនវិស័យឆ្នាំ2030 និងយុទ្ធសាស្ត្រចតុកោណដំណាក់កាលទី3 ក្នុងការប្រែក្លាយកម្ពុជាឲ្យក្លាយទៅជាប្រទេសសេដ្ឋកិច្ចមួយដែលមានប្រាក់ចំណូលធុនកណ្តាលដោយសង្កត់ធ្ងន់លើតួនាទីឧស្សាហកម្មជាកម្លាំងជំរុញកំណើនសេដ្ឋកិច្ចដ៏សំខាន់មួយនៅពេលអនាគត។

លោកបានបន្តទៀតថា សម្រាប់គោលបំណងរបស់ព្រិត្តិការណ៍តាំងពិព័រណ៍នេះ គឺជាការជំរុញអភិវឌ្ឍន៍វិស័យឧស្សាហកម្ម និងការវិនិយោគបរទេសនៅកម្ពុជា ជាពិសេសដើម្បីជំរុញសកម្មភាពនាំចេញ និងនាំចូល ហើយក្នុងពេលជាមួយគ្នានេះដែរ គឺជាការបង្កើតឱកាសសម្រាប់បណ្តាឧស្សាហករក្នុងការលើកកម្ពស់គ្រឿងឧបករណ៍ បរិក្ខារ ការស្វែងរកកិច្ចសហប្រតិបត្តិការគ្នា និងកាលានុវត្តន៍ធុរកិច្ចថ្មីៗ ក្នុងនោះកម្ពុជាត្រូវការធ្វើពិពិធកម្មលើសកម្មភាពសេដ្ឋកិច្ច និងជំរុញការនាំចេញឲ្យបានសម្រេចកំណើនសេដ្ឋកិច្ចខ្ពស់ប្រកបដោយនិរន្តរភាព និងការអភិវឌ្ឍផលិតផលបន្ថែមទៀតលើតម្លៃឲ្យកាន់តែខ្ពស់៕

August 25, 2017

កម្ពុជាស្នើឱ្យអាមេរិក គោរពការសន្យាក្នុងការអនុគ្រោះពន្ធក្រោមក្របខ័ណ្ឌ WTO

ភ្នំពេញ៖ ក្នុងកិច្ចជំនួបពិភាក្សាការងារជាមួយលោកស្រី Marta Prado នាយិកាកិច្ចការអាស៊ីអាគ្នេយ៍ និងប៉ាស៊ីហ្វិកតំណាងពាណិជ្ជកម្មសហរដ្ឋអាមេរិក អមដោយលោកស្រី Desiree GANZ នាយិកាផ្នែកការងារតំណាងពាណិជ្ជកម្មសហរដ្ឋអាមេរិក លោក Scott Schlossberg មន្ត្រីនយោបាយសេដ្ឋកិច្ច និងលោក David Sequeira មន្ត្រីសេដ្ឋកិច្ច និងពាណិជ្ជកម្មរបស់ស្ថានទូតសហរដ្ឋអាមេរិកប្រចាំនៅកម្ពុជា ឯកឧត្តម ឱក ប៊ុង រដ្ឋលេខាធិការក្រសួងពាណិជ្ជកម្ម បានស្នើឱ្យសហរដ្ឋអាមេរិកបំពេញកាតព្វកិច្ចដែលខ្លួនបានសន្យាក្នុងនាមជាប្រទេសអភិវឌ្ឍន៍ថា នឹងផ្តល់ជូនកម្ពុជា និងប្រទេសអភិវឌ្ឍន៍តិចតួចដទៃទៀតនូវការអនុគ្រោះពន្ធក្រោមក្របខ័ណ្ឌអង្គការពាណិជ្ជកម្មពិភពលោក (WTO)។

ក្នុងជំនួបនេះឯកឧត្តមរដ្ឋលេខាធិការបានលើកឡើងថា យោងតាមស្មារតីនៃសេចក្តីប្រកាសរួមរបស់សន្និសីទថ្នាក់រដ្ឋមន្ត្រីនៅទីក្រុងហុងកុង រដ្ឋាភិបាលសហរដ្ឋអាមេរិកបានសន្យាថា នឹងផ្តល់ឱ្យប្រទេសអភិវឌ្ឍន៍តិចតួច (ក្នុងនោះរួមមានកម្ពុជា) នូវការអនុគ្រោះពន្ធនាំចូលទៅកាន់ទីផ្សារសហរដ្ឋអាមេរិកឱ្យបានយ៉ាងតិច 97% ក្នុងលក្ខខណ្ឌពន្ធគយសេរី-កូតាសេរី (GSP-DFQF) របស់អង្គការពាណិជ្ជកម្មពិភពលោក។ ប៉ុន្តែគិតមកត្រឹមឆ្នាំ2017នេះ ប្រទេសដែលជាដៃគូពាណិជ្ជកម្មធំបំផុតទី2របស់កម្ពុជាមួយនេះបានផ្តល់នូវការអនុគ្រោះពន្ធត្រឹមតែ 82,6%តែប៉ុណ្ណោះ។ ឯកឧត្តមរដ្ឋលេខាធិការបានបន្តថា ប្រទេសអភិវឌ្ឍន៍មួយចំនួនធំបានបំពេញកាតព្វកិច្ចត្រឹមត្រូវទៅតាមការសន្យារបស់ពួកគេរួចរាល់ហើយ ក្នុងនោះមានប្រទេសអូស្ត្រាលី នូវែលហ្សេឡង់ ន័រវេស៍ និងស្វ៊ីស បានផ្តល់នូវការអនុគ្រោះពន្ធចំនួន 100% សហគមន៍អឺរ៉ុបបានផ្តល់ចំនួន 99% ក្រោមក្របខ័ណ្ឌ EBA (Everything But Arms) កាណាដា 98,6% ជប៉ុន 97,9% ហើយចិនបានផ្តល់ 97%។

ឯកឧត្តមរដ្ឋលេខាធិការបានបន្ថែមថា មុខទំនិញដែលសហរដ្ឋអាមេរិកបានផ្តល់ឱ្យកម្ពុជាក្នុងរង្វង់ 82,6% នោះ មិនមានផលិតផលសក្តានុពលសំខាន់ៗណាដែលកម្ពុជាអាចផលិត និងនាំចេញទៅកាន់ទីផ្សារសហរដ្ឋអាមេរិកក្នុងនាមជាប្រទេសក្រីក្រនោះទេ ពោលគឺផលិតផលសក្តានុពលទាំងនោះសុទ្ធតែជាប់កាតព្វកិច្ចបង់ពន្ធដូចបណ្តាប្រទេសអភិវឌ្ឍន៍នានាដទៃទៀត ដែលមានសេដ្ឋកិច្ចរីកចម្រើនជាងកម្ពុជាដែរ។ ក្នុងនាមក្រសួង ឯកឧត្តមរដ្ឋលេខាធិការបានស្នើឱ្យសហរដ្ឋអាមេរិកដាក់បញ្ចូលមុខទំនិញសំខាន់ៗរបស់កម្ពុជា រួមមាន ខោអាវ និងផលិតផលផ្សេងទៀតដែលស្ថិតនៅក្នុងលេខកូដ 338, 339, 347, 348, 647, 648, 334, 634, 638, 639, 335និង635ឱ្យស្ថិតក្នុងប្រព័ន្ធអនុគ្រោះពន្ធ ដើម្បីធានាថា កម្ពុជានឹងទទួលបានអត្ថប្រយោជន៍ពិតប្រាកដពីការនាំចេញទៅកាន់សហរដ្ឋអាមេរិក។

ជាការឆ្លើយតបលោកស្រី Marta Prado បានស្នើឱ្យភាគីកម្ពុជាពិនិត្យឡើងវិញនូវមុខទំនិញដែលកម្ពុជាទទួលបានការអនុគ្រោះពន្ធពីសហរដ្ឋអាមេរិក ស្របពេលដែលអាមេរិកបាននិងកំពុងប្រកាសឱ្យបណ្តាប្រទេសដែលនឹងត្រូវទទួលផលក្រោមច្បាប់របស់ខ្លួនពិនិត្យឡើងវិញនូវប្រព័ន្ធអនុគ្រោះពន្ធ (GSP) សម្រាប់ឆ្នាំ2017។ ភាគីសហរដ្ឋអាមេរិកបានស្នើឱ្យក្រសួងពាណិជ្ជកម្មចូលរួមពិនិត្យបន្ថែមលើសេចក្តីព្រាងច្បាប់ស្តីអំពីប្រាក់ឈ្នួលអប្បបរមា និងសេចក្តីព្រាងច្បាប់ស្តីអំពីការដោះស្រាយវិវាទដែលស្ថិតក្រោមដែនសមត្ថកិច្ចរបស់ក្រសួងការងារ និងបណ្តុះបណ្តាលវិជ្ជាជីវៈ។

គួររំឭកផងដែរថា ជំនួបពិភាក្សាលើកនេះគឺជាការពិភាក្សាការងារបន្តក្រោយពីកម្ពុជាបានដឹកនាំប្រតិភូទៅកាន់សហរដ្ឋអាមេរិកដើម្បីចូលរួមកិច្ចប្រជុំក្រុមប្រឹក្សាចម្រុះស្តីពីក្របខ័ណ្ឌកិច្ចព្រមព្រៀងពាណិជ្ជកម្ម និងវិនិយោគលើកទី4 នៅរដ្ឋធានីវ៉ាស៊ីនតោនកាលពីពេលកន្លងទៅថ្មីៗនេះ។ នៅក្នុងកិច្ចប្រជុំខាងលើ កម្ពុជា-អាមេរិកបានឯកភាពគ្នាបង្កើតឱ្យមានក្រុមការងារជំនាញតូចៗ ដើម្បីពន្លឿនការអនុវត្តកិច្ចព្រមព្រៀង TIFA នេះ៕

August 25, 2017

គ្រូបង្រៀន «សាលារៀនជំនាន់ថ្មី NGS» ទទួលបានកុំព្យូទ័រ Google Chromebooks ក្នុងការបង្រៀន

សាលារៀនជំនាន់ថ្មី (NGS) ដែលស្ថិតក្នុងបរិវេណវិទ្យាល័យស៊ីសុវត្ថិ រាជធានីភ្នំពេញត្រូវបានបំពាក់សុទ្ធតែកុំព្យូទ័រ Google Chromebooks សម្រាប់គ្រូបង្រៀនដើម្បីផ្ដល់លទ្ធភាពដល់ការបង្រៀនឱ្យកាន់តែមានប្រសិទ្ធភាពដល់សិស្សានុសិស្ស។

ការដាក់ឱ្យប្រើប្រាស់កុំព្យូទ័រថ្មីនេះ ធ្វើឡើងរវាងក្រុមហ៊ុន MYTEB សហការជាមួយនឹងអង្គការ KAPE និងក្រសួងអប់រំយុវជន និងកីឡា (MoEYS) ក្នុងការដាក់សាកល្បងឱ្យប្រើប្រាស់កុំព្យូទ័រ Google Chromebooks សម្រាប់គ្រូបង្រៀននៅក្នុងសាលារៀនជំនាន់ថ្មី NGS។ គម្រោងកម្មវិធីរបស់សាលារៀន NGS មានគោលដៅក្នុងការបង្កើតសាលារៀនដែលជួយរៀបចំយុវជនកម្ពុជាដើម្បីធ្វើការប្រកួតប្រជែងនៅក្នុងសតវត្សរ៍ទី 21 តាមរយៈការពង្រឹងទៅលើការសិក្សារៀនសូត្រនៅក្នុងមុខវិជ្ជាជាច្រើនរបស់ STEM។

ឆាប់ៗនេះ គ្រូបង្រៀនជាច្រើននៅសាលារៀនជំនាន់ថ្មី (NGS) ទូទាំងប្រទេសនឹងមានឱកាសបានប្រើប្រាស់កុំព្យូទ័រ HP Chromebook 11 ក្នុងការបង្រៀនហើយ។ កុំព្យូទ័រ HP Chromebook 11 នឹងផ្តល់ឱ្យពួកគេនូវវិធីសាស្ត្រថ្មីមួយទៀតក្នុងការបង្រៀន និងការរៀនសូត្រដោយបញ្ចូលនូវដំណោះស្រាយពីប្រភពដ៏មានប្រយោជន៍ជាច្រើនដែលជួយឱ្យការសិក្សា និងការសហការរបស់ពួកគេកាន់តែប្រសើរឡើងតាមរយៈការប្រើប្រាស់សេវាកម្ម Cloud ។

កុំព្យូទ័រ HP Chromebook 11 ដំណើរការភ្លាមៗ (Instant Boot) មិនរង់ចាំចំណាយពេលយូរក្នុងការបើកដំណើរការ មានការការពារពីមេរោគបាន 100% មានការទាញយកកម្មវិធីសម្រាប់សិក្សារាប់ពាន់ចេញពី Chrome Web Store ឥតគិតថ្លៃ និងការប្រើប្រាស់សេវាកម្ម Cloud Storage ឥតដែនកំណត់សម្រាប់សាលារៀន។ នេះហើយជាហេតុផលដែលកុំព្យូទ័រ Google Chromebooks ត្រូវបានជ្រើសរើសប្រើប្រាស់នៅក្នុងសាលារៀនច្រើនជាង 50% នៅក្នុងទឹកដីសហរដ្ឋអាមេរិក។

គួររំឭកដែរថា៖ សាលារៀនជំនាន់ថ្មីត្រូវបានបង្កើតឡើងក្រោយពីមានការចុះកិច្ចព្រមព្រៀងរវាងក្រសួងអប់រំ យុវជន និងកីឡា ជាមួយនឹងអង្គការសកម្មភាពសម្រាប់បឋមសិក្សានៅកម្ពុជា (KAPE) កាលថ្ងៃទី1 ខែតុលា ឆ្នាំ 2015 ក្រោមអធិបតីភាពឯកឧត្តមបណ្ឌិត ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងលោក សៅ វណ្ណា នាយកប្រតិបត្តិអង្គការ KAPE ។

គម្រោង “សាលារៀនជំនាន់ថ្មី” ជាគម្រោងពិសេសដើម្បីណែនាំពីគោលការណ៍ អភិបាលកិច្ចដ៏មានប្រសិទ្ធភាព ដែលត្រូវបានប្រើប្រាស់នៅក្នុងវិស័យឯកជនទៅដល់ប្រព័ន្ធសាលារៀនសាធារណៈ ដោយប្រើប្រាស់គម្រោងការគ្រប់គ្រងបែបជាដៃគូរវាងគ្រឹះស្ថានសិក្សាសាធារណៈ និងឯកជន ដើម្បីរក្សានិរន្តរភាព បរិស្ថានសាលាកុមារមេត្រី ដែលមានគុណភាពខ្ពស់សម្រាប់សិស្សានុសិស្សនៅតាមជនបទ និងជុំវិញរាជធានីភ្នំពេញ៕

August 25, 2017

Mayweather នឹងទទួលបានតម្លៃខ្លួនច្រើនជាង McGregor ពីរដង ពេលប៉ះគ្នាថ្ងៃសៅរ៍នេះ

រយៈពេល2ឆ្នាំ ក្រោយពីការចូលនិវត្តន៍ពីកីឡាប្រដាល់ កីឡាករ Floyd Mayweather នឹងត្រូវវិលទមកកាន់សង្វៀនប្រកួតវិញនៅថ្ងៃសៅរ៍នេះ (ត្រូវនឹងព្រឹកថ្ងៃអាទិត្យនៅកម្ពុជា) ដើម្បីបង្កើតប្រវត្តិសាស្ត្រ និងទទួលបានប្រាក់តម្លៃខ្លួនដ៏ច្រើនសន្ធឹកសន្ធាប់ម្តងទៀត។

អតីតម្ចាស់ខ្សែក្រវាត់ពិភពលោកទម្ងន់ 66.7គីឡូក្រាមវ័យ 40ឆ្នាំរូបនេះ នឹងក្លាយជាកីឡាករប្រដាល់ដំបូងគេក្នុងប្រវត្តិសាស្ត្រ ក្នុងការកត់ត្រាជ័យជម្នះដល់ទៅ 50លើក ប្រសិនបើរូបគេអាចយកឈ្នះលើអ្នកប្រយុទ្ធក្បាច់គុនចម្រុះ Conor McGregor ដែលធ្វើការប្រកួតប្រដាល់អាជីពជាលើកទី1របស់គេ។ បើទោះបីជាប្រកួតក្នុងប្រភេទកីឡាផ្សេងគ្នាក៏ដោយ ប៉ុន្តែកីឡាករទាំងពីរនឹងត្រូវប្រកួតគ្នាក្រោមច្បាប់កីឡាប្រដាល់អាជីពរយៈពេល12ទឹកនៅថ្ងៃសៅរ៍នេះ ខណៈដែល McGregor សញ្ជាតិអៀរឡង់ ត្រូវបានគេរំពឹងទុកថា ជាកីឡាករមានក្តីសង្ឃឹមតិចណាស់ក្នុងការឈ្នះការប្រកួតនេះ។ ប៉ុន្តែ ទោះបីជាយ៉ាងណា ម្ចាស់ខ្សែក្រវាត់ពីរសម័យកាលរបស់ស្ថាប័នរៀបចំការប្រកួតយុទ្ធគុនចម្រុះ UFC របស់អាមេរិករូបនេះ បានបញ្ជាក់ក្នុងសន្និសីទសារព័ត៌មានកាលពីថ្ងៃពុធថា រូបគេនឹងបំបាក់ឆ្អឹងរបស់ Mayweather ហើយនិងបញ្ចប់ការប្រកួតនៅត្រឹមទឹកទី1 ឬទឹកទី2ប៉ុណ្ណោះ។

McGregor វ័យ 29ឆ្នាំ មានកំណត់ត្រាឈ្នះក្នុងការប្រកួតវាយដាក់ទ្រុងចំនួន21លើក ចាញ់ 3លើក ក្នងនោះផ្តួលដៃគូឲ្យសន្លប់18លើក។ ជាមួយគ្នានេះដែរ មានមតិជាច្រើនទៅលើតម្លៃខ្លួនរបស់កីឡាករទាំងពីរសម្រាប់ការប្រកួតនៅព្រឹកថ្ងៃអាទិត្យនេះ ប៉ុន្តែ បើយោងទៅតាមការព្យាករនានា Mayweather អាចនឹងទទួលបានតម្លៃខ្លួន 200លានដុល្លារអាមេរិក ខណៈដែល McGregor នឹងទទួលបាន 100លានដុល្លារអាមេរិក៕

ប្រភពពី៖ ESPN

August 25, 2017

សុវណ្ណ មករា បន្ដសំណួរចាក់ដោតបេះដូងគូជម្លោះទៀតហើយ

ក្រោយលោក ហេង ឡុង បានដាក់ពាក្យបណ្ដឹងទៅលើលោកសុវណ្ណ មករា ពីបទបរិហាកេរ្ដិ៍ និងនៅមិនទាន់មានចំណាត់ការណាមួយពីសមត្ថកិច្ចនោះ ស្រាប់តែថ្មីៗនេះលោកសុវណ្ណ មករា បានសរសេរសារចាក់ដោតបេះដូងលោក ហេង ឡុង ទៀតហើយ។

វាមិនខុសពីអ្វីដែលមហាជនបានលើកឡើងនោះទេ ដើម្បីបញ្ចប់រឿងរ៉ាវទាំងឡាយ ឬធ្វើឱ្យលោក សុវណ្ណ មករា លែងហ៊ានសួរនាំពីរឿងនេះមានតែលោកហេង ឡុង ឬអ្នកនាងចន ច័ន្ទលក្ខិណា បង្ហាញភ័ស្ដុតាងដែលអាចបញ្ជាក់ពីការចំណាយថវិកាដែលបានមកពីការប្រមូលមូលនិធិរាត្រីកតញ្ញូដោយតម្លាភាពទេ ទើបវាចប់រឿង ព្រោះចាប់តាំងពីផ្ទុះរឿងឡើងមក ស្ទើរតែរាល់លើកលោកសុវណ្ណ មករា សរសេរសារមិនដែលចោលសំណួរដែលសួរពីរឿងលុយនោះទេ។

ទោះយ៉ាងណាអ្នកទាំងពីរ (ហេង ឡុង និងចន ច័ន្ទលក្ខិណា)អាចធ្វើតាមរយៈបណ្ដាញសង្គម ឬធ្វើសន្និសីទកាសែតក៏បាន ដើម្បីឱ្យអ្នកសារព័ត៌មានក្នុងស្រុកជួយធ្វើការផ្សព្វផ្សាយបន្ថែមទៀតឱ្យមហាជនលែងមានការយល់ច្រឡំ។ ដូច្នេះ សួរថា តើលោកហេង ឡុង និងអ្នកនាង ចន ច័ន្ទលក្ខិណា ពេញចិត្ដបញ្ចប់រឿងនេះដែរឬទេ? ឬក៏អ្នកទាំងពីរមានវិធីអ្វីផ្សេងដើម្បីបញ្ចប់រឿងនេះ? យ៉ាងណាមហាជននឹងរងចាំមើលបន្ដទៀត។

តទៅនេះជាសារដែលលោកសុវណ្ណ មករា សរសេរបន្ថែមទៀត៖ «ល្មមឆ្លើយបាននៅពូថាតើប្រាក់ដែលបានមកពីមូលនិធិរាត្រី កតញ្ញូ ដែលធ្វើនៅអូតែលសុខា មានចំនួនទឹកប្រាក់ដូចជាប្រហែល សាមសិបប្រាំម៉ឺនដុល្លារសហរដ្ឋ អាមេរិក នោះ តើសល់ប៉ុន្មាន អីប៉ុន្មាន? តើប្រើការទៅលើអីខ្លះ? អូភ្លេច! រឿងដែលលោកប្ដឹងនោះ ក៏ប្ដឹងទៅ តែខ្ញុំនៅប្រកាន់គោលការណ៍ដដែល បើចាញ់ក្ដីសុំសងតាមគោលការណ៍បក្សរបស់អ្នកឯងដែលធ្លាប់ជ្រកកោន កាលគ្រានៅក្រ។ ទោះឈ្នះ ឬចាញ់មិនសំខាន់ទេ តែអ្វីដែលសំខាន់នោះគឺសូមមេត្តាឆ្លើយមក តើនៅសល់ប៉ុន្មាន? ហើយចាយទៅលើអីខ្លះ? បើឃើញតែចែកជូន លោកអ៊ុំ ពូមីង ដូចជា ម្នាក់ៗបើគិតជាប្រាក់ដុល្លារទៅប្រហែល 200$ ទៅ300$ ដុល្លារតែប៉ុណ្ណោះ»៕

August 25, 2017

Dembele ត្រៀមផ្ទេរទៅ Barcelona ខណៈ Dortmund យល់ព្រមលើតម្លៃខ្លួន150លានអឺរ៉ូ

ក្លិបយក្ស Barcelona បានឈានដល់ការព្រមព្រៀងគ្នាមួយជាមួយនឹងក្លិប Borussia Dortmund ក្នុងតម្លៃខ្លួន150លានអឺរ៉ូ (ស្មើនឹង177លានដុល្លារអាមេរិក) សម្រាប់ខ្សែបម្រើស្លាប Ousmane Dembele។ នេះបើយោងទៅតាមប្រភពព័ត៌មានជាច្រើន បើទោះបីប្រធានប្រតិបត្តិរបស់ក្លិបអាល្លឺម៉ង់មួយនេះ បានបដីសេធក្នុងការប្រកាសពីការផ្ទេរនេះក៏ដោយ។

ការផ្ទេរដុលក្នុងទឹកប្រាក់120លានអឺរ៉ូនេះ ត្រូវបានចេញផ្សាយដោយកាសែត BeIN Sports កាលពីថ្ងៃព្រហស្បតិ៍ ហើយកាសែតបារាំង L’Equipe កាសែតអាល្លឺម៉ង់ Bild និងអ្នកយកព័ត៌មានសញ្ជាតិអេស្ប៉ាញ សុទ្ធតែបានបញ្ជាក់ថា ការផ្ទេរនេះនឹងមានតម្លៃខ្លួនសរុប150លានអឺរ៉ូ បើបូកទាំងប្រាក់ឧបត្ថម្ភផ្សេងៗចំនួន30លានអឺរ៉ូទៀតផងនោះ។ ប៉ុន្តែ ទោះបីជាយ៉ាងណា លោក Hans-Joachim Watzke ប្រធានប្រតិបត្តិរបស់ក្លិប Dortmund បានបញ្ជាក់ថា ក្លិបនេះនឹងមិនធ្វើការបកស្រាយទៅលើស្ថានភាពរបស់ Dembele មុនពេលការចាប់ឆ្នោតសម្រាប់ក្របខ័ណ្ឌ Champions League ក្នុងទីក្រុងម៉ូណាកូ កាលពីថ្ងៃព្រហស្បតិ៍នេះទេ។

នៅពេលត្រូវបានចោទសួរពីការចេញផ្សាយរបស់កាសែត L’Equipe លោក Watzke បានឲ្យដឹងថា៖ «ខ្ញុំមិនអាចធ្វើការអះអាងបានទេ។ យើងនឹងមិនធ្វើការបកស្រាយអ្វីឡើយ»។ ប៉ុន្តែ ទោះបីជាយ៉ាងណា វាត្រូវបានគេយល់ឃើញថា ក្រោយពីក្លិប Barcelona ដែលកំពុងតែពិចារណាទៅលើការដាក់សំណើដេញថ្លៃជាលើកទី4សម្រាប់ខ្សែបម្រើ Philippe Coutinho របស់ក្លិប Liverpoolហើយនោះ មន្ត្រីរបស់ក្លិបយក្សអេស្ប៉ាញមួយនេះបានជ្រើសរើសយកការចាប់អារម្មណ៍ទៅលើ Dembele វ័យ20ឆ្នាំ ជំនួសវិញ ខណៈដែលការផ្ទេរនេះត្រូវបានឈានដល់កាលពីថ្ងៃព្រហស្បតិ៍។ អ្នកនាំពាក្យម្នាក់របស់ក្លិប Barcelona បានបញ្ជាក់ប្រាប់កាសែត Mundo Deportivo ការចរចាផ្សេងៗ បានដំណើរការយ៉ាងល្អ និងបានបន្ថែមថា ការព្រមព្រៀងគ្នាជាគោលការណ៍ត្រូវបានឈានដល់ ខណៈដែល Barca ត្រូវបានរំពឹងទុកថា នឹងប្រកាសពីការផ្ទេរនេះនៅចុងសប្តាហ៍នេះ៕

ប្រភពពី៖ ESPN

August 25, 2017

អូហូ!! ខាត់ សុឃីម ចំណាស់ហ្នឹងហើយទទួលបានតម្លៃខ្លួន10ម៉ឺនដុល្លារទៀត

ព័ត៌មានផ្លូវការពីក្រុមហ៊ុនទឹកសុទ្ធ ដឺផ្លាទីនីម ព្រីមៀមវ័ធធើ (The Platinum Premium Water) បាន បញ្ជាក់ថា អ្នកនាង ខាត់ សុឃីម ទើបតែចុះហត្ថលេខាលើកិច្ចសន្យាធ្វើជា Brand Ambassador ឱ្យផលិតផលមួយនេះ ផ្ដាច់មុខពេញរយៈពេល5ឆ្នាំ។

វាក្លាយជារឿងធម្មតាទៅហើយសម្រាប់តារាកម្ពុជាដែលមានឱកាសបានក្លាយជា Brand Ambassador ឱ្យផលិតផលនេះផលិតផលនោះ ប៉ុន្ដែលោកអ្នកពិតជាភ្ញាក់ផ្អើលមិនខាននៅពេលដឹងពីតម្លៃខ្លួនរបស់តារាស្រីរូបនេះ។

តាមការបង្ហើបព័ត៌មានមកឱ្យដឹងថា តារាចាស់វស្សារូបនេះស៊ីថ្លៃរហូតដល់ក្នុងរង្វង់10ម៉ឺនដុល្លារ។ ជាតម្លៃស្ប៉តពាណិជ្ជកម្មមិនធម្មតាមួយ ដែលគេកម្របានឃើញតារាសិល្បៈណាទទួលបានណាស់។ សឹងតែអាចនិយាយបានថា តារាស្រីក្មេងល្បីៗនៅក្នុងប្រទេសកម្ពុជាពុំទាន់មាននរណាទទួលបានឡើយក្រៅពីលោកព្រាប សុវត្ថិ និងអ្នកនាង ឱក សុគន្ធកញ្ញា។

អ្នកនាង ខាត់ សុឃីម ប្រាប់ថា កន្លងមកមិនដែលមានផលិតផលណាមួយជ្រើសយកអ្នកនាងធ្វើជាតំណាងផ្ដាច់មុខ ឬហៅថា Brand Ambassador តំណាងផលិតផលរហូតដល់5ឆ្នាំនោះទេ។នាងបញ្ជាក់ថា នាងមានការភ្ញាក់ផ្អើលមែនទែននៅពេលក្រុមហ៊ុនទឹកសុទ្ធ The Platinum Premium Water ជ្រើសយកនាងឱ្យធ្វើកុងត្រា ដែលគ្រាន់តែបានឮតម្លៃក្នុងការងារនេះភ្លាម ក៏អរស្ទើរនិយាយលែងចេញទៅហើយ ដោយអ្នកនាងបានចាត់ទុកថា ទទួលបានទាំងកិត្តិយស ទាំងតម្លៃខ្លួនខ្ពស់មិនធម្មតាទៀត។

ទោះបីជាគ្មានការបង្ហើបប្រាប់ពីតម្លៃខ្លួនពិតប្រាកដសម្រាប់ការងារដែលបានកុងត្រាផ្ដាច់មុខក្នុងរយៈពេល5ឆ្នាំក្ដី ប៉ុន្តែយោងតាមប្រភពចេញពីតំណាងក្រុមហ៊ុនបានអះអាងថា អ្នកនាងនឹងទទួលបានតម្លៃខ្លួនរហូតដល់10ម៉ឺនដុល្លារ ដោយថវិកាដែលអ្នកនាងទទួលបាននោះគឺក្រុមហ៊ុននឹងប្រគល់ឱ្យផ្ដាច់ ដោយមិនឱ្យជាដំណាក់ៗនោះឡើយ។ ទោះយ៉ាងណាអ្នកនាងខាត់ សុឃីម ក៏ពុំបានបដិសេធពីតួលេខនៃចំនួនប្រាក់តម្លៃខ្លួននោះដែរ៕

ក្នុងអំឡុង5ឆ្នាំនេះ អ្នកនាង ខាត់ សុឃីម ត្រូវបង្ហាញមុខថតហ្វិក្ស៍ និងថតស្ប៉តឱ្យក្រុមហ៊ុនរៀងរាល់3ខែម្ដង និងសកម្មភាពការងារណាដែលមិនមានចែងក្នុងកិច្ចសន្យា ហើយតម្រូវឱ្យអ្នកនាងធ្វើ គឺអ្នកនាងនឹងត្រូវទទួលបានកម្រៃបន្ថែម៕

August 25, 2017

ជំនាញបច្ចេកទេស ជាអាជីពដែលកម្ពុជាកំពុងត្រូវការ

ក្រាយពេលបញ្ចប់ការសិក្សាថ្នាក់វិទ្យាល័យសិស្សជាច្រើនកំពុងព្រួយបារម្ភ និងពិបាកសម្រេចចិត្តក្នុងការជ្រើសរើសជំនាញសិក្សានៅមហាវិទ្យាល័យហើយក៏មិនទាន់ដឹងច្បាស់នៅឡើយថាកម្ពុជាកំពុងត្រូវការធនធានមនុស្សផ្នែកណាខ្លះហើយអាជីពណាខ្លះដែលកំពុងមានទីផ្សារ។

ពាក់ព័ន្ធនឹងបញ្ហានេះរដ្ឋមន្ត្រីក្រសួងអប់រំយុវជន និងកីឡាឯកឧត្តមហង់ជួនណារ៉ុនបានលើកឡើងថាធនធានមនុស្សនៅកម្ពុជាមិនទាន់ឆ្លើយតបទៅនឹងតម្រូវការនៃទីផ្សារការងារទាំងស្រុងនៅឡើយទេនាពេលបច្ចុប្បន្ននេះដោយសារតែសិស្សនិស្សិតដែលបានបញ្ចប់ការសិក្សារាប់ម៉ឺននាក់ពុំសូវមានសមត្ថភាព និងគុណភាពគ្រប់គ្រាន់ដើម្បីចូលបម្រើការងារជាពិសេសគឺមិនទាន់មានជំនាញទន់។ ម្យ៉ាងវិញទៀតសិស្សភាគច្រើនចូលចិត្តសិក្សាផ្នែកគ្រប់គ្រងធុរកិច្ចហើយមិនសូវចាប់យកអាជីពបច្ចេកទេសដើម្បីសិក្សានោះឡើយ។

ឯកឧត្តមហង់ ជួនណារ៉ុនបានមានប្រសាសន៍ថា៖ «ដើម្បីដោះស្រាយបញ្ហាប្រឈមមួយចំនួនក្រសួងអប់រំយុវជន និងកីឡានឹងពង្រឹងវិស័យអប់រំតាមរយៈការបង្កើនអភិបាលកិច្ចល្អក្នុងវិស័យអប់រំពង្រឹងគុណភាពគ្រឹះស្ថានសិក្សាបណ្តុះបណ្តាលគ្រូបង្រៀន និងបង្កើនគម្រោងដើម្បីជំរុញឬអប់រំសិស្សឱ្យជ្រើសរើសជំនាញស្របទៅនឹងតម្រូវការនៃទីផ្សារជាពិសេសគឺជំរុញឱ្យសិស្សសិក្សាផ្នែកបច្ចេកទេសឱ្យបានច្រើន»។

បង្ហាញលើចំណុចដូចគ្នានេះឯកឧត្តមពេជ សុភ័នរដ្ឋលេខាធិការក្រសួងការងារបានលើកឡើងថា កម្ពុជាកំពុងប្រឈមនឹងបញ្ហាខ្វះពលកម្ម និងអ្នកជំនាញផ្នែកបច្ចេកទេស។ ការកើនឡើងនូវភាពមិនស៊ីចង្វាក់គ្នារវាងការផ្គត់ផ្គង់ និងតម្រូវការជំនាញនេះបណ្តាលមកពីការបណ្តុះបណ្តាលនៅកម្រិតទូទៅ និងកម្រិតបណ្តុះបណ្តាលបច្ចេកទេស និងវិជ្ជាជីវៈមិនទាន់ឆ្លើយតបទៅនឹងតម្រូវការទីផ្សារទាំងបរិមាណ និងគុណភាព។

ឯកឧត្តមមានប្រសាសន៍ថា៖«តាមការព្យាករសមាហរណកម្មសេដ្ឋកិច្ចអាស៊ានអាចនឹងមានការកើនឡើងច្រើននូវតម្រូវការពលកម្មជំនាញជាពិសេសក្នុងវិស័យសំណង់ និងកសិកម្មបើទោះបីជាមានការបើកឱ្យមានលំហូរពលកម្មដោយសេរីនូវពលកម្មជំនាញមួយចំនួនដូចជាវិស្វកម្មគិលានុបដ្ឋាកសេវាវាស់ស្ទង់វិជ្ជាពេទ្យទន្តពេទ្យសេវាកម្មគណនេយ្យ និងអ្នកឯកទេសទេសចរណ៍ជាដើម»។

ឯកឧត្តមពេជ សុភ័នបានបន្ថែមទៀតថា តាមរយៈការយកចិត្តទុកដាក់លើការធ្វើកំណែទម្រង់របស់រាជរដ្ឋាភិបាលកម្ពុជាបានធ្វើឱ្យអ្នកវិនិយោគចាប់អារម្មណ៍មកបណ្តាក់ទុនរកស៊ីនៅកម្ពុជាក្នុងវិស័យមួយចំនួនដូចជាគ្រឿងយន្ត និងមេកានិកអេឡិចត្រូនិកកសិឧស្សាហកម្ម និងការវិនិយោគដែលមានតម្លៃខ្ពស់បន្ថែមលើការវិនិយោគលើឧស្សាហកម្មដែលមានស្រាប់ដើម្បីផ្តល់ឱកាសការងារកាន់តែប្រសើរជូនប្រជាពលរដ្ឋនិងធានាបាននូវការអភិវឌ្ឍសង្គម និងសេដ្ឋកិច្ច៕

August 25, 2017

Category: សង្គម និងសេដ្ឋកិច្ច