សង្គម និងសេដ្ឋកិច្ច - La Reine Media

ខៀវ សានសាណា ចេញមុខប្រតិកម្មរាល់ព័ត៌មានរបស់បងប្រុស

នៅថ្ងៃទី28 ខែសីហា ឆ្នាំ2017 អ្នកនាង ខៀវ សានសាណា បានចេញសារដែលបង្ហាញពីអារម្មណ៍ពិតរបស់ខ្លួន ខណៈដែលមានសារព័ត៌មានក្នុងស្រុកជាច្រើនបានចេញផ្សាយពី ហេតុការណ៍ឃាតកម្ម និងធ្វើអត្តឃាតរបស់បងប្រុសខ្លួន គឺ លោក ខៀវ កូណែល នៅលើបណ្ដាញសង្គម Facebook កាលពីប៉ុន្មានម៉ោងមុននេះបន្ដិច។

តាមរយៈពាក្យពេចន៍ជាភាសាអង់គ្លេសប៉ុន្មានឃ្លា ដែលមានន័យជាខេមរភាសាថា “ខ្ញុំមានសំណូមពរតែមួយគត់ អង្វរចំពោះអ្នកសារព័ត៌មាននានា សូមមេត្តាកុំសរសេរអ្វីមួយដែលអ្នកគ្មានភ័ស្តុតាងនោះ។ សូមទុករឿងនេះឲ្យប៉ូលិសបំពេញតាមកាតព្វកិច្ចរបស់ពួកគាត់ក្នុងការស៊ើបអង្កេតជាមុនចុះ។ សូមអរគុណសម្រាប់ការយោគយល់ និងសូមជួយនាងខ្ញុំផង ដើម្បីឲ្យបងប្រុសនាងខ្ញុំធ្វើដំណើរទៅកាន់សុគតិភព។ ខ្ញុំស្រឡាញ់គាត់ខ្លាំងណាស់ ហើយខ្ញុំមិនដឹងថា ត្រូវប្រឈមមុខនឹងបញ្ហានេះដោយរបៀបណាទេ។ សូមទៅកាន់សុគតិភពចុះ បងប្រុសជាទីស្រឡាញ់បំផុតរបស់ប្អូន…”

យ៉ាងណាមិញ ជំនួសមុខឱ្យបុគ្គលិកសារព័ត៌មាន ឡារ៉ែន ទាំងអស់គ្នាក៏សូមចូលរួមរំលែកទុក្ខដល់ក្រុមគ្រួសារលោក ខៀវ កូឡា និងអ្នកនាង ខៀវ សានសាណា ចំពោះវិញ្ញាណក្ខន្ធលោក ខៀវ កូណែល និងអ្នកនាង យេង លក្ខិណា ដែលបានទទួលមរណភាពនៅរាត្រីថ្ងៃទី27 ខែសីហា ឆ្នាំ2017៕

August 28, 2017

ទឹកប្រាក់វិនិយោគកម្ពុជានាំចេញទៅអង់គ្លេសមានច្រើនជាងអង់គ្លេសនាំចូលកម្ពុជា

ភ្នំពេញ៖ ថ្លែងនៅក្នុងពិធីសម្ពោធជាផ្លូវការនៃប្រភេទរថយន្តប្រណីតទី4 របស់ក្រុមហ៊ុន Jaguar Land Rover គឺរថយន្ត Range Rover Velar ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មបានឱ្យដឹងថា ទំហំពាណិជ្ជកម្មរវាងកម្ពុជា និងចក្រភពអង់គ្លេសរក្សាបាននូវទំហំមួយដ៏គួរឱ្យកត់សម្គាល់ គឺនៅក្នុងរង្វង់ប្រមាណ 800 លានដុល្លារអាមេរិកនៅក្នុងឆ្នាំ2016 កន្លងទៅ។

ឯកឧត្តមបានបន្តថា នៅក្នុងទំហំទឹកប្រាក់ប្រមាណ 800 លានដុល្លារអាមេរិកនេះ កម្ពុជាបាននាំចេញនូវផលិតផលប្រភេទកសិកម្ម និងវាយនភណ្ឌទៅកាន់ចក្រភពអង់គ្លេស នូវទឹកប្រាក់ប្រមាណ 767 លានដុល្លារ និងបាននាំចូលមកវិញនូវផលិតផលអេឡិចត្រូនិក និងមុខទំនិញផ្សេងទៀតក្នុងទំហំទឹកប្រាក់ប្រមាណ 35 លានដុល្លារ។

លើសពីនោះទៀត វត្តមានរបស់ប្រភេទរថយន្តប្រណីតថ្មីនេះក្នុងព្រះរាជាណាចក្រកម្ពុជា ជាសក្ខីភាពនៃការអភិវឌ្ឍរបស់កម្ពុជា និងការជឿទុកចិត្តពេញទំហឹងរបស់វិនិយោគិន និងពាណិជ្ជករទៅលើស្ថេរភាពសេដ្ឋកិច្ច-សង្គមរបស់កម្ពុជាក្រោមការដឹកនាំរបស់រាជរដ្ឋាភិបាល។ ម្យ៉ាងវិញទៀត ការនាំចូលនូវរថយន្តថ្មីមួយនេះបានឆ្លុះបញ្ចាំងពីវឌ្ឍនភាពសេដ្ឋកិច្ច និងជីវភាពដ៏ប្រសើររបស់ប្រជាជនកម្ពុជា ដែលទទួលបានក្រោមការខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការរក្សាបាននូវកំណើនសេដ្ឋកិច្ច គិតជាមធ្យម 7% ក្នុងមួយឆ្នាំ ក្នុងរយៈពេល 2 ទសវត្សរ៍ចុងក្រោយ៕

August 28, 2017

បវរកញ្ញាវៀតណាម Tuong Linh ឡើងកូដខ្លាំង ខ្ពស់ដោយសារតែសម្រស់ Brand Face

បវរកញ្ញាវៀតណាម Tuong Linh មានវ័យ 23 ឆ្នាំ នាងជាកូនពៅនៅក្នុងក្រុមគ្រួសារដែលរស់នៅក្នុងខេត្ត Phu Yen ប្រទេសវៀតណាម ហើយម្ដាយរបស់នាងមានឈ្មោះថា Luong Van Chanh ជាគ្រូបង្រៀនផ្នែកអក្សរសិល្ប៍មានឈ្មោះល្បីម្នាក់ ដែលធ្លាប់ទទួលបានពានរង្វាន់ក្នុងការបង្រៀនពីកម្មវិធី Vietnam Aviation Academy។ នេះបើតាមសារព័ត៌មាន kenh14.vn។

រហូតដល់ថ្ងៃទី27 ខែសីហាម្សិលមិញ បវរកញ្ញារូបនេះបានចូលរួមប្រកួតកម្មវិធី The Face Vietnam 2017 ហើយបានទទួលជ័យជម្នះពានរង្វាន់លេខ1 ដោយសារតែទម្រង់មុខរបស់នាងស្រស់ស្អាតដាច់គេ និងមាននាមជា “Brand Face” ព្រមទាំងជាតំណាងនារីវៀតណាមទៅប្រកួត Miss Intercontinental 2017 នៅប្រទេសឥណ្ឌាផងដែរ។

គួរបញ្ជាក់ផងដែរថា Tuong Linh បានឡើងកូដខ្លាំង និងមានភាពទាក់ទាញបំផុតដែលធ្វើឱ្យពិភពលោកបានចាប់អារម្មណ៍ពីសម្រស់ដ៏ល្អឯករបស់នាង។ នាងមានកម្ពស់ 170 សង់ទីម៉ែត្រ មានទំហំទាំងបីគឺ 83-58-89 និងអាចនិយាយភាសាអង់គ្លេសបានយ៉ាងស្ទាត់ជំនាញទៀតផង៕

August 28, 2017

អ្នកជំនាញ៖ ការធ្វើអាជីវកម្មតាមគ្នាធ្វើឲ្យបាត់ប្រសិទ្ធភាពសេដ្ឋកិច្ច

ភ្នំពេញៈ ស្របពេលអាជីវកម្មនៅកម្ពុជាភាគច្រើនជាអាជីវកម្មធ្វើឡើងតាមគ្នានោះបានធ្វើឲ្យអ្នកជំនាញមានការព្រួយបារម្ភ និងចាត់ទុកថាការធ្វើអាជីវកម្មបែបនេះនឹងធ្វើឲ្យបាត់ប្រសិទ្ធភាពសេដ្ឋកិច្ច។

លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting បានថ្លែងឲ្យដឹងតាមទូរស័ព្ទនាព្រឹកថ្ងៃទី28 សីហានេះថា ការធ្វើអាជីវកម្មនៅកម្ពុជាភាគច្រើនធ្វើតាមគ្នា ដោយសារសហគ្រិននានាខ្វះគំនិតច្នៃប្រឌិត ហើយមិនផ្តោតលើគុណភាព និងសេវាកម្មនោះឡើយ ពួកគេផ្តោតលើតម្លៃជាជាងគុណភាព និងសេវាកម្មដែលធ្វើឲ្យពួកគេឈឺចាប់ទាំងអស់គ្នា។ លោកបន្តថា ពេលដំណើរការបាន6ខែ ទៅ1ឆ្នាំ ពួកគេមើលឃើញភាពរើបឡើងនៃអាជីវកម្មរបស់ពួកគេ ប៉ុន្តែដៃគូប្រកួតប្រជែងថ្មីបានមកដល់ដោយសារពួកគេធ្វើតាមគ្នា។

លោកបន្តថា “ពេលនិយាយពីការខិតខំ រដ្ឋាភិបាលបានលើកទឹកចិត្តសហគ្រិនថ្មីៗច្រើន ប៉ុន្តែរដ្ឋាភិបាលគួរបង្កើតវិទ្យាស្ថានស្រាវជ្រាវមួយដើម្បីរិះរកគំនិតអាជីវកម្មថ្មី។ លោកបន្តថា “បើទោះបីជាកម្មវិធីសិក្សានៅតាមមហាវិទ្យាល័យមួយចំនួនបានបញ្ចូលភាពជាសហគ្រិនក្តី តែវាមិនមានលក្ខណៈស៊ីជម្រៅនោះឡើយ ហើយវាជាគំនិតរបស់គេ។

លោក ង៉ែត ជូ បានបន្តថា ការធ្វើអាជីវកម្មថ្មីៗក៏ជាការបង្កើតនូវពិពិធកម្មសេដ្ឋកិច្ចផងដែរ ហើយធ្វើឲ្យអាជីវកម្មប្រាសចាកហានិភ័យ ផ្ទុយទៅវិញការធ្វើអាជីវកម្មតាមគ្នាធ្វើឲ្យបាត់ប្រសិទ្ធភាពសេដ្ឋកិច្ចផងដែរ។ ឧទាហរណ៍ក្នុងភូមិមួយមានប្រជាជន200គ្រួសារកាលពី5ឆ្នាំមុន ហើយមានស្ថាប័នមីក្រូហិរញ្ញវត្ថុ5ទៅ6ស្ថាប័នប៉ុណ្ណោះ ប៉ុន្តែ5ឆ្នាំក្រោយ ចំនួនប្រជាជនឡើងដល់250គ្រួសារតែស្ថាប័នមីក្រូហិរញ្ញវត្ថុនៅភូមិដដែលនោះបានកើនឡើងពី40ទៅ50ស្ថាប័ន វាប្រៀបដូចមាននំតូចមួយហើយចែកគ្នាហូបច្រើននាក់ សួរថាតើអ្នកហូបទទួលបានចំណែកប៉ុន្មាន?។

អគ្គនាយកក្រុមហ៊ុន VTRUST GROUP លោក គុយ វ៉ាត បានថ្លែងឲ្យដឹងផងដែរថា ការធ្វើអាជីវកម្មតាមគ្នាមិនមាននិរន្តរភាពនោះទេ ប៉ុន្តែនិន្នាការនេះបានកើតមាននៅកម្ពុជាជាយូរមកហើយធ្វើឲ្យម្ចាស់អាជីវកម្មដែលធ្វើតាមគេ និងគ្មានជំនាញបទពិសោធច្បាស់លាស់ទាំងនោះប្រឈមមុខនឹងការបរាជ័យ។លោកបន្តថា ឧទាហរណ៍នៅទីក្រុងភ្នំពេញមានហាងកាហ្វេច្រើនដែលជាការធ្វើតាមគ្នាពីមួយទៅមួយ ប៉ុន្តែហាងកាហ្វេមួយចំនួនក៏បានបិទទ្វារដោយសារការធ្វើតាមគ្នានេះដែរ។

លោកបន្តថា ជាក់ស្តែងយើងអាចក្រឡេកមើលភោជនីយដ្ឋាននៅតាមផ្លូវជាតិលេខ6A ពេលសម្ពោធស្ពានជ្រោយចង្វារដំបូងៗមានភោជនីយដ្ឋានរាប់រយនៅតំបន់នោះ ប៉ុន្តែពេលនេះមានភោជនីយដ្ឋានប៉ុន្មានដែលនៅសល់?៕

August 28, 2017

គម្រោងបង្កើតសាលាជំនាញដីធ្លីនៅកម្ពុជានៅមិនទាន់មានភាពច្បាស់លាស់

ភ្នំពេញ៖ វិស័យអចលនទ្រព្យនៅកម្ពុជា នៅតែមានសកម្មភាពរឹងមាំនៅឡើយ បើទោះបីកម្ពុជាត្រៀមរៀបចំបោះឆ្នោតជាតិនៅឆ្នាំ2018ខាងមុខក៏ដោយ ហើយដើម្បីឱ្យវិស័យនេះ កាន់តែរឹងមាំ សមាគមអចលនទ្រព្យកម្ពុជាមានគម្រោងនឹងបង្កើតសាលាជំនាញដីធ្លីនេះឡើង ប៉ុន្តែនៅមិនទាន់មានភាពច្បាស់លាស់នៅឡើយ។

លោកបណ្ឌិត គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានផ្តល់បទសម្ភាសពីប្រទេសម៉ាឡេស៊ីមកថា បើមិនមានការប្រែប្រួលទេនោះ គម្រោងបង្កើតសាលាជំនាញដីធ្លីនឹងប្រព្រឹត្តទៅនៅដើមឆ្នាំ2018ខាងមុខនេះហើយ។ ប៉ុន្តែទោះយ៉ាងណា លុះត្រាតែមានការចូលរួមគាំទ្រពីសមាជិកនៅក្នុងសមាគមដែលមានចំនួនសរុប102ក្រុមហ៊ុននោះដែរ។

លោកថា ដើម្បីឱ្យគម្រោងនេះមានភាពច្បាស់លាស់ នៅដើមខែកញ្ញាឆាប់ៗខាងមុខនេះ លោកនឹងកោះហៅសមាជិកសមាគមទាំងអស់មកចូលរួមប្រជុំផ្លាស់ប្តូរយោបល់ដើម្បីស្វែងរកការគាំទ្រ។ លោក គីម ហ៊ាង បន្តថា «គម្រោងនេះនៅមិនទាន់ច្បាស់នៅឡើយ លុះត្រាតែមានការប្រជុំដែលមានការចូលរួម និងគាំទ្រច្រើនពីសមាជិកសមាគមដែរ មានន័យថា បើសមាជិកគាំទ្រច្រើន គម្រោងបង្កើតសាលានេះនឹងដំណើរការនៅដើមឆ្នាំ2018 តែបើមិនមានការគាំទ្រទេគម្រោងនេះក៍មិនអាចទៅរួចដែរ»។

យ៉ាងណាក៍ដោយ សម្រាប់កញ្ចប់ថវិកាហាក់ដូចជាមិនមានការលំបាកនោះទេ ដើម្បីមានលទ្ធភាពបង្កើតវិទ្យាស្ថាននេះឡើង ដោយគ្រោងចំណាយត្រឹមតែជាង10ម៉ឺនដុល្លារប៉ុណ្ណោះ គឺសម្រាប់តែប្រធានក្រុមហ៊ុនចំនួន2ឬ3ក្រុមហ៊ុននឹងអាចបង្កើតបានហើយ តែបើសិនមិនមានសំឡេងគាំទ្រភាគច្រើនពីសមាជិកទាំង102ក្រុមហ៊ុនទេ នឹងមិនអាចដំណើរការបានឡើយ។

ចំពោះផែនការបង្កើតសាលានេះ នៅដំណាក់កាលដំបូង សមាគមអ្នកវាយតម្លៃអចលនទ្រព្យ នឹងជួលគ្រូជំនាញមកពីសាកលវិទ្យាល័យ UTM ប្រទេសម៉ាឡេស៊ី និងគ្រូជំនាញនៅប្រទេសសិង្ហបុរីដែលជាគ្រូជំនាញមានការទទួលស្គាល់លើឆាកអន្តរជាតិមកបណ្តុះបណ្តាលគ្រូបង្គោល ដែលជាប្រធានក្រុមហ៊ុន មានសញ្ញាបត្របណ្ឌិត ឬអនុបណ្ឌិតដែលមានបទពិសោធផ្នែកដីធ្លីច្រើនឆ្នាំ។ ហើយនៅពេលបណ្តុះបណ្តាលគ្រូបង្គោលបានហើយ សមាគមនឹងបង្កើតវិទ្យាស្ថានជំនាញដីធ្លីនេះឡើងដើម្បីទទួលសិស្សចូលរៀន ដែលមានវគ្គបណ្តុះបណ្តាលខ្លី3ខែ ឬ6ខែ និងថ្នាក់បរិញ្ញាបត្ររងជាដើម។ លោក គីម ហ៊ាង បញ្ជាក់ថា សិស្សដែលចូលរៀនដំណាក់កាលដំបូងនេះ ភាគច្រើនជាអ្នកដែលកំពុងបម្រើការងារក្នុងវិស័យអចលនទ្រព្យនៅកម្ពុជា។

ចំពោះទស្សនវិស័យនៃការបង្កើតសាលាជំនាញដីធ្លីនេះឡើង លោកគឹម ហ៊ាង បញ្ជាក់ដូច្នេះថា «ដើម្បីបង្កើតព្រមទាំងបង្កើនចំនួនភ្នាក់ងារអចលនទ្រព្យ និងអ្នកវាយតម្លៃអចលនទ្រព្យ ដែលសមត្ថភាព និងមានក្រមសីលធម៌វិជ្ជាជីវៈល្អក្នុងការជួយជំរុញឱ្យឧស្សាហកម្មអចលនទ្រព្យនៅកម្ពុជាឈានដល់កម្រិតមួយទៀត ពិសេសដើម្បីបង្កើនចំនួនអ្នកវិនិយោគទុនដែលត្រឹមត្រូវឱ្យបានច្រើន នោះមានការងារច្រើនណាស់ដែលត្រូវធ្វើ ហើយអ្វីដែលត្រូវចាប់ផ្តើមមុនគេជាអាទិភាព គឺការអប់រំ! បើឥឡូវមិនមែនជាពេលត្រូវបើកសាលារៀនដីធ្លីនៅកម្ពុជា តើពេលណា? »៕

August 28, 2017

សារ៉ាយ សក្ខណា និង DJ អាណូ កំពុងស្ថិតនៅក្នុងតំណែងតួឯកនៅ CTN

Red Picture ជាផលិតកម្មដែលទទួលបានភាពជោគជ័យយ៉ាងខ្លាំងក្នុងការផលិតរឿងជាច្រើន ដូចជារឿង «ភូមិអត់មនុស្ស» «ទង់ព្រលឹង» និង «ផ្ទះសសរកណ្ដាល» ជាដើម។ បច្ចុប្បន្នផលិតកម្មមួយនេះបានពង្រីកសក្ដានុពលកាន់តែខ្លាំងបន្ថែមទៀត តាមរយៈការសហការជាមួយ CTN , KONGCHAK Picture W&H Investment Holding Co.,Ltd,Black magic design។

ក្នុងឱកាសសន្និសីទកាសែតស្ដីពីកិច្ចសហប្រតិបត្ដិការរវាង Red Picture និងស្ថាប័នទាំង4 ត្រូវបានលោក ឌៀប សុវណ្ណរ៉ា ចាងហ្វាងលិតកម្ម Red Picture លើកឡើងថា ក្នុងកិច្ចសហប្រតិបត្ដិការនេះផលិតកម្មលោកគ្រោងនឹងផលិតរឿងភាគឱ្យស្ថានីយទូរទស្សន៍ CTN ចំនួន 4រឿងក្នុងមួយឆ្នាំ ដូច្នេះផលិតកម្មរបស់លោកត្រូវការតារាសម្ដែងជាច្រើន។ ម្យ៉ាងទៀត ក្រៅពីខ្សែភាពយន្ដភាគឱ្យស្ថានីយទូរទស្សន៍ CTN ហើយនោះ Red ក៏ផលិតខ្សែភាពយន្ដដុំខ្នាតធំផងដែរ។

លោកបន្ដថា ជំហានដំបូងក្នុងការផលិតភាពយន្ដភាគ Red Picture បានសម្លឹងឃើញតារានៅក្នុងចិត្ដដើម្បីយកមកធ្វើជាតួឯករួចហើយ គឺទី1 អ្នកនាងសារ៉ាយ សក្ខណា ទី2 DJ អាណូ។លោកអះអាងថា អ្នកទាំងពីរសុទ្ធតែជាតារាសម្ដែងមានបទពិសោធ និងមានសមត្ថភាពដែលលោកគិតថា ស័ក្កិសមទៅនឹងសាច់រឿងដែលលោកគ្រោងនឹងផលិតនាពេលខាងមុខ។

ទោះជាយ៉ាងណាលោក ឌៀប សុវណ្ណារ៉ា បានបញ្ជាក់ថា ពាក់ព័ន្ធជាមួយនឹង DJ អាណូយើងគ្រាន់តែបានបង្ហើបដំណឹងនេះទៅដល់គាត់ប៉ុណ្នោះ ប៉ុន្ដែកិច្ចការលម្អិតយើងត្រូវជជែកគ្នាបន្ថែមទៀតដើម្បីឈានទៅដល់ការធ្វើកុងត្រាតែម្ដង។

ដោយឡែកអ្នកនាង សារ៉ាយ សក្ខណា ទើបត្រឡប់មកពីអាមេរិកបានបញ្ជាក់ថា នាងមកស្រុកកំណើតក្នុងគោលបំណង2 ទីមួយមកលេងក្រុមគ្រួសារ ទីពីរមកធ្វើការងារដោយនាងបានទទួលការងារពីផលិតកម្ម Red Picture។ នាងបន្ដថា នាងមិនទាន់ដឹងថា នឹងចេញថតនៅពេលណានោះទេ ប៉ុន្ដែនាងអះអាងថា ក្នុងរឿងថ្មីរបស់CTN នាងទទួលបានតំណែងជាតួស្រីហើយ៕

August 28, 2017

ការឱ្យពិន្ទុបាក់ឌុបឆ្នាំនេះតឹងតែងជាងរាល់ឆ្នាំ

ដើម្បីធានាដល់ភាពសុក្រឹតក្នុងការប្រឡងបាក់ឌុបឆ្នាំនេះ ក្រសួងអប់រំ យុវជន និងកីឡា បានធ្វើការតាមដានការអនុវត្ត និងនីតិវិធីតាំងពីដើមរហូតមកដល់ដំណាក់កាលកែវិញ្ញាសា និងអាចបន្តរហូតដល់ការប្រកាសលទ្ធផល នៅថ្ងៃទី12 ខែកញ្ញា សម្រាប់មណ្ឌលនៅភ្នំពេញ និងខេត្តកណ្តាល និងនៅថ្ងៃទី13 ខែកញ្ញា សម្រាប់មណ្ឌលប្រឡងនៅតាមខេត្ត។

នៅក្នុងដំណើរការនៃការឱ្យពិន្ទុសិស្សប្រឡងបាក់ឌុបនៅឆ្នាំនេះ ជាទូទៅមានស្ថានភាពប្រសើរ និងតឹងតែង ព្រោះក្រសួងបានឃ្លាំមើល និងតាមដាន ការកែដោយសហការជាមួយនឹងអង្គភាពប្រឆាំងអំពើពុករលួយ រួមជាមួយភាគីពាក់ព័ន្ធជាច្រើនទៀត។

ជាក់ស្តែង ឯកឧត្តម ហង់ ជួនណារ៉ុន ក៏បានចុះទៅពិនិត្យដោយផ្ទាល់នៅតាមមណ្ឌលកំណែនានា ដែលថ្ងៃទី27 ម្សិលមិញនេះ រដ្ឋមន្ត្រីក្រសួងអប់រំ ក៏បានចុះទៅពិនិត្យការធ្វើកំណែនៅមណ្ឌលកំណែជាស៊ីមបឹងកេងកង សម្រាប់កំណែមុខវិជ្ជាភូមិវិទ្យាជាដើម។ ស្របពេលជាមួយគ្នានេះ អង្គភាពប្រឆាំងអំពើពុករលួយក៏បានដាក់អ្នកសង្កេតការណ៍សកម្មភាព នៃដំណើរការកំណែសន្លឹកកិច្ចការបេក្ខជន ដោយពួកគាត់បានប្រើប្រាស់កាមេរ៉ាសុវត្ថិភាពដើម្បីឃ្លាំមើល និងអាចថតទុកជាភស្តុតាងសម្រាប់ភាពមិនប្រក្រតីនានាផងដែរ៕

August 28, 2017

Liverpool លត់ Arsenal ចាស់ដៃ ខណៈ Morata ជួយឲ្យ Chelsea ផ្តួល Everton

ខ្សែប្រយុទ្ធ Roberto Firmino, Sadio Mane និង Mohamed Salah របស់ក្រុមហង្សក្រហម Liverpool បានហែកក្រុម Arsenal ជាចម្រៀកៗ ខណៈដែលក្រុមរបស់លោក Arsene Wenger បានរងបរាជ័យយ៉ាងអាម៉ាសក្នុងលទ្ធផល 4-០ នៅកីឡដ្ឋាន Anfield កាលពីថ្ងៃអាទិត្យ។

តារាឆ្នើមទាំង3សុទ្ធសឹងបានរកគ្រាប់បាល់បំប៉ោងសំណាញ់ទីដើម្បីធ្វើឲ្យក្រុម Arsenal រងបរាជ័យជាលើកទី2ជាប់ៗគ្នាក្រោយពីចាញ់ក្រុម Stoke ក្នុងលទ្ធផល 1-០ ខណៈដែលការចាញ់ទាំងពីរលើកនេះបានធ្វើឲ្យពួកគេដេញតាមពីក្រោយក្រុមកំពុងនាំមុខ Manchester United ចំនួន6ពិន្ទុនៅលើតារាងក្របខ័ណ្ឌ Premier League ដោយស្ថិតក្នុងចំណាត់ថ្នាក់លេខ16។ ក្រុម Liverpool បានឡើងទៅឈរក្នុងចំណាត់ថ្នាក់លេខ2 ដោយដេញតាមពីក្រោយក្រុម Man United ចំនួន2ពិន្ទុ និងនាំមុខ1ពិន្ទុពីលើក្រុមម្ចាស់ការពារតំណែងជើងឯក Chelsea ដែលមានកត់ត្រាជ័យជម្នះជាលើកទី2ក្នុងលទ្ធផល 2-០ លើក្រុម Everton។ លោក Jurgen Klopp អ្នកចាត់ការទូទៅរបស់ក្រុម Liverpool បានឲ្យដឹងថា៖ «យើងពិតជាមានការរៀបចំបានល្អ។ ប្រសិនបើយើងផ្តល់ពេលវេលា និងឱកាសឲ្យក្រុម Arsrenal អ្នកនឹងចាញ់ នៅមុនពេលការប្រកួតនេះចាប់ផ្តើម ហេតុនេះ ខ្ញុំគិតថា ពួកគេមិនអាចធ្វើអ្វីបានច្រើនតាមដែលពួកគេចង់ឡើយ។ កីឡាករពិតជាលេងបានល្អមែន ពីព្រោះពួកគេពិតជាព្យាយាមណាស់»។ ដោយឡែក លោក Wenger បានប្រាប់ទូរទស្សន៍ Sky Sports ថា៖ «ប្រសិនបើមនុស្សមួយចំនួនមានអារម្មណ៍ថា ខ្ញុំគឺជាបញ្ហា នោះខ្ញុំពិតជាសុំទោសដែលខ្ញុំគឺជាបញ្ហា។ ប៉ុន្តែ យើងចង់ឲ្យអ្នកគាំទ្ររបស់យើងស្ថិតនៅជាមួយនឹងយើងក្នុងពេលបាត់បង់ទម្រង់លេងបែបនេះ»។

ស្របពេលជាមួយគ្នានេះ Tottenham Hotspurs កំពុងតែដេញតាមពីក្រោយក្រុមកំពូលតារាងចំនួន5ពិន្ទុ ក្រោយពីពួកគេបានបញ្ចប់ក្នុងលទ្ធផលស្មើ 1-1 ជាមួយនឹងក្រុម Burnley៕

ប្រភពពី៖ Sport24

August 28, 2017

Mayweather ផ្តួលអ្នកគុនចម្រុះ McGregor សន្លប់ទឹកទី10យ៉ាងងាយស្រួល

កីឡាករប្រដាល់ Floyd Mayweather បានផ្តួលតារាប្រយុទ្ធក្នុងក្បាច់គុនចម្រុះ Conor McGregor សញ្ជាតិអៀរឡង់ ឲ្យសន្លប់ដោយបច្ចេកទេសនៅទឹកទី10 ក្នុងការប្រកួតដែលផ្តល់តម្លៃខ្លួនដ៏ខ្ពស់កាលពីថ្ងៃសៅរ៍ (ត្រូវនឹងព្រឹកថ្ងៃអាទិត្យនៅកម្ពុជា) ដើម្បីរក្សាកំណត់ត្រាឈ្នះយ៉ាងល្អឥតខ្ចោះរបស់គេ។

Mayweather ដែលបានចាកចេញពីការចូលនិវត្តន៍រយៈពេល2ឆ្នាំរបស់គេក្នុងវ័យ40ឆ្នាំសម្រាប់ការប្រកួតនេះ បានធ្វើឲ្យកំណត់ត្រាឈ្នះរបស់គេកើនដល់50លើក មិនដែលចាញ់ដើម្បីឡើងទៅឈរពីលើអតីតម្ចាស់ខ្សែក្រវាត់ពិភពលោក Rocky Marciano ដែលមានកំណត់ត្រាឈ្នះ49លើក មិនដែលចាញ់ ឬស្មើ។ McGregor ដែលជាម្ចាស់ខ្សែក្រវាត់ក្នុងយុទ្ធគុនចម្រុះ (MMA) និងបានធ្វើការបង្ហាញខ្លួនក្នុងការប្រកួតប្រដាល់អាជីពជាលើកទី1របស់គេនោះ មិនបានបង្កើតឲ្យមានការភ្ញាក់ផ្អើលដ៏អស្ចារ្យមួយក្នុងប្រវត្តិសាស្ត្រនៃកីឡាប្រយុទ្ធឡើយ ប៉ុន្តែបានធ្វើឲ្យការប្រកួតនេះបញ្ចប់ក្នុងលទ្ធផលដែលលើសពីការព្យាកររបស់អ្នកជំនាញភាគច្រើន។ ការប្រកួតនេះ បានបញ្ចប់នៅពេលដែល McGregor បានរងនូវការវាយឲ្យថយទៅជាប់នឹងខ្សែរេញ2លើក និងត្រូវបាន Mayweather វាយចំគោលដៅយ៉ាងល្អចំនួន2ដៃ។

McGregor បានចាប់ផ្តើមយ៉ាងល្អក្នុងការប្រកួតនេះ តាមរយៈការចាប់ផ្តើមវាយសម្រុកទៅលើដៃគូភ្លាមៗ ប៉ុន្តែ ចាប់ពីទឹកទី4ឡើងទៅ Mayweather បានធ្វើការគ្រប់គ្រងលើដៃគូរបស់ខ្លួនទាំងស្រុង។ ក្រោយពីការប្រកួតដ៏កក្រើកនេះ កីឡាករមិនស្គាល់ចាញ់របស់អាមេរិករូបនេះបានបញ្ជាក់ថា រូបគេនឹងមិនបង្ហាញខ្លួននៅលើសង្វៀនប្រកួតម្តងទៀតឡើយ ខណៈដែលរូបគេនឹងធ្វើដំណើរឆ្ពោះទៅកាន់ការចូលនិវត្តន៍ជាអចិន្ត្រៃយ៍។ Mayweather បានបញ្ជាក់ថា៖ «ពិតណាស់ នេះគឺជារាត្រីនៃការប្រកួតចុងក្រោយរបស់ខ្ញុំហើយ។ រាត្រីនេះ គឺជាការប្រកួតចុងក្រោយរបស់ខ្ញុំ។ នៅរាត្រីនេះ ខ្ញុំបានជ្រើសរើសយកដៃគូរាំដ៏ត្រឹមត្រូវដើម្បីរាំជាមួយហើយ។ Conor គឺជាម្ចាស់ជើងឯកដ៏ខ្លាំងម្នាក់»។

កីឡាករអាមេរិករូបនេះ ក៏នឹងត្រូវទទួលបានប្រាក់តម្លៃខ្លួនប្រមាណជា200លានដុល្លារអាមេរិកផងដែរ ដើម្បីធ្វើឲ្យចំណូលសរុបក្នុងអាជីពរបស់គេមានចំនួន1ពាន់លានដុល្លារអាមេរិក។ ស្របពេលជាមួយគ្នានេះ McGregor ដែលជាតារាប្រដាល់ក្បាច់គុនចម្រុះក្នុងស្ថាប័ន Ultimate Fighting Championship នោះត្រូវបានរំពឹងទុកថា ទទួលបានតម្លៃខ្លួន100លានដុល្លារអាមេរិក៕

ប្រភពពី៖ ESPN

August 28, 2017

រឿងរ៉ាវខ្លះៗពាក់ព័ន្ធនឹងការបាញ់សម្លាប់ភរិយា រួចធ្វើអត្តឃាតរបស់បងប្រុស ខៀវ សានសាណា និងមុនថ្ងៃកើតហេតុ

បន្ទាប់ពីកើតហេតុការណ៍បាញ់សម្លាប់ខ្លួនឯងរបស់លោក ខៀវ កូណែល ត្រូវជាបងប្រុសពិធីការិនី ខៀវ សានសាណា កាលពីយប់មិញ ដែលជាអំពើឃាតកម្ម និងអត្តឃាតដ៏រន្ធត់រួចមក មហាជនបាននៅតែបន្ដសង្ស័យថា បញ្ហាដែលបានកើតឡើងនេះ បណ្ដាលមកពីភ្លើងប្រចណ្ឌ ឬមានជម្លោះនៅក្នុងក្រុមគ្រួសារ?

យ៉ាងណាមិញ ភាពផ្អែមល្ហែមរបស់ភរិយាដែលមានចំពោះស្វាមី ត្រូវបានបញ្ចេញឱ្យសាធារណជនបានដឹងតាមបណ្ដាញសង្គម Facebook បើយោងតាម Facebook Page ដែលមានឈ្មោះថា «KonelLeakena» ជាឈ្មោះផ្សំរវាងលោក និងភរិយាបានសរសេរបង្ហោះថា “មនុស្សប្រុសកើតមកសម្រាប់តែលួង់ មិនមែនសម្រាប់ង៉ក់ងរនោះទេ ព្រោះព្រះជាម្ចាស់បានបង្កើតមនុស្សប្រុសមកឲ្យមានដុះសាច់លើសហើយ… មិនអាចមានអ្វីត្រូវលើសមនុស្សស្រីបានទៀតទេ…លួងរហូតទៅ! សំណព្វ 70 80 90…100 and My Only One!”។ ចំណែកឯ Facebook Page ស្ត្រីជាភរិយា ដែលមានFacebook ឈ្មោះថា «LeakhenaYeng» បានសរសេរយ៉ាងដូច្នេះថា “មានមនុស្សតិចបំផុតដែលអាចអត់ធ្មត់នឹងភាពឆេវឆាវគ្មានហេតុផលរបស់យើងបាន តែមានមនុស្សតែម្នាក់ប៉ុណ្ណោះ ដែលក្រៅពីអ្នកមានគុណយើងដែលព្រមអភ័យអនុគ្រោះ ចំពោះកំហុសគ្រប់យ៉ាងរបស់យើង ព្រោះម្នាក់នោះជាមនុស្ស ដែលស្រឡាញ់យើងខ្លាំងជាងជីវិតរបស់គេ”។

គួររំឭកផងដែរថា នៅថ្ងៃទី8 ខែសីហា កន្លងទៅនេះអ្នកនាង យេង លក្ខណា បានបង្ហោះរូបភាពប៉ុន្មានសន្លឹកនៅលើទឹកដី ខេត្តសៀមរាប ដែលបានរៀបរាប់ថា “ស្នេហាក៏ដូចជាផ្ទៃមេឃ ទោះបីថា ផ្កាយស្រស់ស្អាតប៉ុនណា តែបើគេចូលចិត្តព្រះចន្ទ័ គេក៏មិនទៅសម្លឹងមើលផ្កាយដែរ”។ ប្រភពមិនបញ្ចេញឈ្មោះបានអះអាងថា ឃាតកម្មខាងលើនេះ ច្បាស់ជាបណ្ដាលមកពីភ្លើងប្រចណ្ឌយ៉ាងជាក់ច្បាស់។

គួរបញ្ជាក់ផងដែរថា បើតាមព័ត៌មានក្នុងស្រុកបានឱ្យដឹងថា អ្នកនាង យេង លក្ខណា មានវ័យ 40 ឆ្នាំ និង ខៀវ កូណែល មានវ័យ 33 ឆ្នាំ បានរៀបអាពាហ័ពិពាហ៍ជាមួយគ្នាអស់រយៈពេលជាង3 ខែហើយ ចាប់តាំងពីថ្ងៃទី8 ខែឧសភា ឆ្នាំ 2017 រហូតមកដល់ថ្ងៃនេះ៕

August 28, 2017

Category: សង្គម និងសេដ្ឋកិច្ច