សង្គម និងសេដ្ឋកិច្ច - La Reine Media

ក្លិបអង់គ្លេសចំណាយអស់1.4ពាន់លានផោនលើការទិញចូលកីឡាករថ្មី

ក្លិបកីឡាបាល់ទាត់របស់អង់គ្លេសបានជះប្រាក់នៅថ្ងៃចុងក្រោយនៃការបើកទីផ្សារដោះដូរកីឡាកររហូតដល់ទៅ210លានផោន (ស្មើនឹង272លានដុល្លារអាមេរិក) និងបានធ្វើឲ្យការចំណាយសរុបកើនរហូតដល់ទៅ1.4ពាន់លានផោន ខណៈដែលក្របខ័ណ្ឌ Premier League បានបញ្ចេញសាច់ដុំផ្នែកហិរញ្ញវត្ថុរបស់ខ្លួនម្តងទៀត។

តួលេខពីក្រុមហ៊ុន Sports Business Group របស់អង្គភាព Deloitte បានបង្ហាញថា ការចំណាយសរុបកើនច្រើនរហូតដល់ទៅ23ភាគរយ បើធៀបទៅនឹងកំណត់ត្រាដែលត្រូវបានបង្កើតឡើងកាលពីរដូវកាលក្តៅមុន។ ការចំណាយនោះនឹងមានចំនួនកាន់តែខ្ពស់ជាងនេះទៅទៀត ប្រសិនបើការផ្ទេរជាច្រើនផ្សេងទៀតបានទទួលជោគជ័យដូចការរំពឹងទុក កាលពីថ្ងៃព្រហស្បតិ៍។ បើទោះបីបានចំណាយប្រាក់ជាច្រើនក៏ដោយ ប៉ុន្តែ ក្លិបស្ថិតក្នុងក្របខ័ណ្ឌ Premier League មិនមានការខាតបង់អ្វីឡើយ ក្រោយពីទទួលបានប្រាក់ចំណូលដ៏ច្រើនសន្ធឹកសន្ធាប់ពីការលក់សិទ្ធិផ្សាយការប្រកួត។

លោក Dan Jones ដែលជាដៃគូក្នុងក្រុមហ៊ុន Sports Business Group របស់ Deloitte បានឲ្យដឹងថា៖ «នៅពេលដែលយើងបានធ្វើការវិភាគទៅលើប្រាក់ចំណូលដែលប្រមូលបានពីការលក់សិទ្ធិផ្សាយការប្រកួត ពាណិជ្ជកម្មផ្សេងៗ និងចំណូលពីការលក់សំបុត្រ ក្លិបរបស់ក្របខ័ណ្ឌ Premier League កំពុងតែចំណាយប្រាក់ក្នុងកម្រិតយ៉ាងល្អមួយ»។

លោក Jones បានបន្ថែមទៀតថា៖ «សម្រាប់រយៈពេល15ឆ្នាំចុងក្រោយនេះ ការចំណាយសរុបប្រចាំឆ្នាំ នៅតែស្ថិតក្នុងកម្រិតចន្លោះពី1/5 និង1/3 នៃប្រាក់ចំណូលសរុបរបស់ពួកគេ»។ បើផ្អែកទៅលើការប៉ាន់ប្រមាណទៅលើប្រាក់ចំណូលសម្រាប់ក្លិបទាំង20របស់ក្របខ័ណ្ឌ Premier League នៅរដូវកាលនេះ ការចំណាយប្រាក់1.4ពាន់លានផោន ទៅលើការទិញចូលកីឡាករថ្មី បង្ហាញពីចំនួនមធ្យមនៃការកើនឡើងប្រាក់ចំណូលចំនួន31ភាគរយ ក្នុងមួយក្លិប៕

ប្រភពពី៖ Eurosport

September 2, 2017

សិស្សភាគច្រើនមិនចូលចិត្តរៀនបច្ចេកទេស ទោះអាជីពនេះមានប្រាក់ខែច្រើនក៏ដោយ

ប៉ុន្មានឆ្នាំចុងក្រោយនេះ គ្រប់សមាសភាពក្នុងសង្គមសុទ្ធតែបានមើលឃើញថា សិស្សកម្ពុជាភាគច្រើនមិនសូវចូលចិត្តសិក្សាផ្នែកបច្ចេកទេស ឬការងារទាំងឡាយណាដែលស្ថិតនៅខាងក្រៅការិយាល័យនោះទេ តែអ្វីដែលពួកគេចូលចិត្តនោះគឺការងារដែលនៅក្នុងបន្ទប់ម៉ាស៊ីនត្រជាក់។

ពាក់ព័ន្ធនឹងបញ្ហានេះ លោក ងួន ប៊ុននិត អគ្គនាយកក្រុមហ៊ុនធនធានមនុស្ស Idea plus បានលើកឡើងថា យុវជនកម្ពុជាប្រហែលជាច្រើនជាង 50% ចូលចិត្តសិក្សាលើជំនាញដែលធ្វើការក្នុងបន្ទប់ម៉ាស៊ីនត្រជាក់ ខណៈមាននិស្សិតតិចតួចបំផុតរៀនផ្នែកជំនាញបច្ចេកទេស។

លោកបានបញ្ជាក់ផងដែរថា តាមពិតទៅការងារជំនាញបច្ចេកទេសជាការងារដែលមានប្រាក់ខែច្រើន ហើយមានទីផ្សារការងារទូលាយណាស់ តែសិស្ស និស្សិត នៅប្រទេសយើងមិនទាន់សូវបានដឹងពីព័ត៌មាននេះ ហើយមានអ្នកខ្លះទៀតមិនដឹងថារៀនបច្ចេកទេសហើយ គេធ្វើអ្វីខ្លះ ដែលជាហេតុធ្វើឱ្យពួកគាត់សម្រេចចិត្តរៀនលើមុខវិជ្ជាទាំងឡាយណាដែលមានមនុស្សរៀនច្រើន ហើយរៀនតាមគេ។

លោក ងួន ប៊ុននិត បាននិយាយថា៖ «ការជ្រើសរើសសិក្សាជំនាញដែលត្រូវធ្វើការងារក្នុងបន្ទប់ម៉ាស៊ីនត្រជាក់ច្រើនអាចធ្វើឱ្យប៉ះពាល់ដល់ការវិនិយោគនៅក្នុងប្រទេសខ្លះដែរ ព្រោះអ្នកវិនិយោគបរទេស នៅពេលដែលបោះទុនរកស៊ីនៅកម្ពុជា គេត្រូវការច្រើនជាងគេគឺអ្នកបច្ចេកទេស តែយើងបែរជាខ្វះ ហើយសម្រាប់អ្នកធ្វើការនៅការិយាល័យ មានតម្រូវការតិច បែរជាយើងសម្បូរទៅវិញ»។

ប្រធានក្រុមហ៊ុនផ្នែកធនធានមនុស្សខាងលើបានលើកឡើងផងដែរថា នៅពេលដែលយើងខ្វះកម្លាំងពលកម្មជំនាញដើម្បីផ្គត់ផ្គង់ទីផ្សារការងារដែលអ្នកវិនិយោគត្រូវការ អ្នករកស៊ី គេអាចនឹងមិនចង់មកបណ្តាក់ទុនដែលជាហេតុធ្វើឱ្យប្រទេសយើងខាតបង់ច្រើន។ ជាដំណោះស្រាយសម្រាប់បញ្ហានេះ លោកបានបង្ហាញថា យើងគួរមានការតម្រង់ទិស និងការផ្សព្វផ្សាយព័ត៌មានឱ្យកាន់តែទូលំទូលាយទៅដល់គ្រប់សមាសភាពក្នុងសង្គម ជាពិសេសគឺសិស្សវិទ្យាល័យ ដើម្បីឱ្យគាត់បានយល់ពីស្ថានភាពជាក់ស្តែងនៃតម្រូវការការងារក្នុងប្រទេសរបស់យើង៕

September 2, 2017

រកឃើញបវរកញ្ញា Miss Cambodia 2017 ហើយ យប់មិញនេះ

ឆ្លងកាត់វគ្គជម្រុះជាច្រើនវគ្គ អស់រយៈពេលជាច្រើនខែ នៅទីបញ្ចប់វេទិកាជ្រើសរើសបេក្ខនារីសម្រស់ឯកប្រចាំកម្ពុជា ប្រចាំឆ្នាំ2017 Miss Cambodia 2017ត្រូវបានបញ្ចប់ហើយកាលពីរាត្រីថ្ងៃទី1 ខែកញ្ញា ឆ្នាំ2017 នៅក្នុងបរិវេណសាលប្រជុំសណ្ឋាគារ Naga World ដោយក្នុងចំណោមបេក្ខនារី 5 រូបដែលត្រូវបានជ្រើសរើសក្នុងវគ្គផ្តាច់ព្រ័ត្រនោះ បេក្ខនារីដែលជាប់ចំណាត់ថ្នាក់លេខ1គឺបេក្ខនារីពាក់ស្លាកលេខ 10 មានវាសនាទទួលបានមកុដមកគ្រង ដែលមានឈ្មោះ កញ្ញា រឿន ណាត អាយុ 18 ឆ្នាំ មកពីខេត្តកំពង់ចាម។

ក្រោយពីបានគ្រងមកុដរួច កញ្ញា រឿន ណាត បានថ្លែងទាំងអារម្មណ៍ដ៏រំភើបថា “នាងខ្ញុំពិតជាមានអារម្មណ៍រំភើបខ្លាំងណាស់ ព្រោះមិននឹកស្មានថា ខ្លួនឯងមានឱកាសបានគ្រងមកុដកញ្ញាឯកកម្ពុជាសម្រាប់ឆ្នាំ2017នេះឡើយ”។

ទាំងអារម្មណ៍ត្រេកអរ លាយឡំជាមួយទឹកនេត្រាបន្ដិចបន្ដួចផងនោះ កញ្ញាក៏បានថ្លែងបញ្ជាក់បន្ថែមថា “ចំពោះការប្រឡងបវរកញ្ញាគឺជាក្ដីស្រមៃមួយរបស់នាងខ្ញុំតាំងពីនៅតូច។ ពេលនេះនាងខ្ញុំបានសម្រេចក្ដីស្រមៃហើយ ដូច្នេះនាងខ្ញុំនឹងយកអ្វីដែលនាងខ្ញុំទទួលបាននៅថ្ងៃនេះទៅបង្ហាញលើឆាកអន្តរជាតិដើម្បីឲ្យពិភពលោកបានស្គាល់ពីវប្បធម៌ប្រពៃណីដ៏ល្អផូរផង់របស់កម្ពុជា”។

គួរបញ្ជាក់ផងដែរថា ការប្រឡងកញ្ញាឯកកម្ពុជាសម្រាប់ឆ្នាំ2017 នេះពិតជាទទួលបានការដាក់ពិន្ទុយ៉ាងសុក្រឹតពីគណៈកម្មការ និងច្បាស់លាស់ណាស់ទម្រាំរកឃើញម្ចាស់ជយលាភីលេខ1នេះ៕

September 2, 2017

តើអាមេរិកនាំអ្វីខ្លះមកកម្ពុជា ហើយកម្ពុជានាំទំនិញអ្វីទៅអាមេរិកវិញ?

ភ្នំពេញ៖ រយៈពេល 6ខែដើមឆ្នាំ2017នេះ ទំហំពាណិជ្ជកម្មរវាងកម្ពុជា និងអាមេរិកមានទឹកប្រាក់ 1,546លានដុល្លារ ក្នុងនោះកម្ពុជានាំចេញទៅអាមេរិកមានទឹកប្រាក់សរុបជាង 1,362លានដុល្លារ។ ខណៈពាណិជ្ជកម្មទ្វេភាគីរវាងកម្ពុជា និងសហរដ្ឋអាមេរិកមានតម្លៃប្រមាណជា 3.2ពាន់លានដុល្លារកាលពីឆ្នាំ2016។ តើទំនិញដោះដូររវាងកម្ពុជា និងអាមេរិកមានអ្វីខ្លះ?

របាយការណ៍ស្ថានទូតអាមេរិកប្រចាំនៅកម្ពុជាឱ្យដឹងថា កម្ពុជានាំទំនិញទៅអាមេរិកមានតម្លៃសរុប 2.8ពាន់លានដុល្លា ដែលរួមមានសម្លៀកបំពាក់ ស្បែកជើង ប្លាស្ទិក និងផលិតផលស្បែករួមនឹងផលិតផលកសិកម្មដែលមានទឹកប្រាក់ 23លានដុល្លា ដូចជាផ្លែឈើ បន្លែ អង្ករ និងផលិតផលដទៃទៀត។

ចំណែកទំនិញនាំចេញរបស់អាមេរិកមានតម្លៃសរុប 361 លានដុល្លា រួមមានរថយន្ត គ្រឿងម៉ាស៊ីន អាហារសំណល់សម្រាប់យកទៅកែច្នៃ ចំណីសត្វ សម្លៀកបំពាក់ធ្វើពីរោមសត្វ និងវាយនភណ្ឌមិនមែនតម្បាញជាដើម។

ប្រទេសកម្ពុជា និងសហរដ្ឋអាមេរិកមានទំនាក់ទំនងពាណិជ្ជកម្មកាន់តែរឹងមាំ ខណៈកាលពីថ្ងៃសុក្រម្សិលមិញ លោកឯកអគ្គរដ្ឋទូតអាមេរិកប្រចាំនៅកម្ពុជាបានរៀបចំពិធីមួយដើម្បីឱ្យសមាជិកសំខាន់ៗនៃអ្នកជំនួញនៅក្នុងប្រទេសកម្ពុជាបានជួបជាមួយលោកMichael Newbill អនុប្រធានទូតអាមេរិកថ្មី និងលោក David Sequeira មន្ត្រីទូតទទួលបន្ទុកផ្នែកសេដ្ឋកិច្ចដែលទើបនឹងមកដល់ប្រទេសកម្ពុជា។

អ្វីដែលគេចាប់អារម្មណ៍គឺ សហគ្រិនអាមេរិកគ្រោងបើកហាងលក់ម៉ូតូម៉ាកHarley-Davidson ដែលជាម៉ាកសញ្ញាដើមនៅអាមេរិកមកលក់រាយដំបូងនៅភ្នំពេញ ហើយគ្រោងបើកនៅចុងឆ្នាំនេះ ដែលមានតម្លៃនៅលើទីផ្សារក្រៅប្រទេសប្រហែល12,000ដុល្លារក្នុងមួយគ្រឿង៕

September 2, 2017

ដឹងតម្លៃ និងថ្ងៃដាក់ឱ្យ Pre-Order ទូរស័ព្ទ Galaxy Note 8 នៅកម្ពុជាហើយ!

ក្រោយបង្ហាញខ្លួនបានជាងមួយសប្ដាហ៍ទូរស័ព្ទ Galaxy Note 8 ត្រូវបានក្រុមហ៊ុន Samsung ប្រចាំកម្ពុជា ប្រកាសពីតម្លៃ និងថ្ងៃដាក់ឱ្យធ្វើការ Pre-Order ហើយកាលពីព្រឹកថ្ងៃទី1 ខែកញ្ញា ឆ្នាំ2017 ម្សិលមិញនេះ។

តាមប្រភពពីទំព័រ Facebook ផ្លូវការនៃក្រុមហ៊ុន Samsung កម្ពុជាឱ្យដឹងថា ត្រកូល Galaxy Note 8 នេះ អតិថិជនអាចធ្វើការកុម្ម៉ង់ទិញទុកជាមុន (Pre-Order) ចាប់ថ្ងៃទី4 ដល់ទី22 ខែកញ្ញា ជាមួយនឹងតម្លៃត្រឹមតែ 919ដុល្លារប៉ុណ្ណោះ ជាមួយនឹងពណ៌ខ្មៅ និងពណ៌មាស។ ការបញ្ជាទិញនេះទៀតសោត ក្រុមហ៊ុននឹងមានផ្ដល់ជូននូវកាស Samsung U-Flex មួយដោយឥតគិតថ្លៃ ជាមួយនឹងគម្រោងស្មាតធំហ្មង! ព្រមទាំងលេខពិសេសចំនួន 1 ផងដែរ។

សម្រាប់តម្លៃនេះ ត្រូវបានគេមើលឃើញថា រៀងទាបជាងទីផ្សារបរទេសបន្តិច ខណៈនៅអាមេរិកមានតម្លៃប្រមាណ930 ដុល្លារឡើងទៅ ដោយអ្នកប្រើប្រាស់អាចចូលទៅធ្វើការ Pre-Order ដោយផ្ទាល់នៅលើគេហទំព័រ Samsung.com ដោយតម្លៃអាចប្រែប្រួលតាមកញ្ជប់សេវា។ ជាមួយគ្នានេះដែរ ក្នុងបទសម្ភាសមួយនៅទីក្រុងប៊ែរឡាំង ប្រទេសអាល្លឺម៉ង ប្រធានអាជីវកម្មទូរស័ព្ទចល័តរបស់ Samsung Electronics លោក DJ Koh ធ្លាប់បាននិយាយថា វាពិបាករក្សាតម្លៃទូរស័ព្ទថ្មីនេះឱ្យទាបជាង 1លានវ៉ុន (887 ដុល្លារ) ណាស់ ព្រោះស្មាតហ្វូនមួយនេះត្រូវបានបង្កើតឡើងមានលក្ខណសម្បត្តិសម្បូរបែបខ្លាំងណាស់។

ចំពោះទូរស័ព្ទ Galaxy Note 8 នេះប្រើនូវអេក្រង់ Super AMOLED កម្រិត QHD+ និងគាំទ្រ Mobile HDR Premium ហើយមានមុខងារ Always on Display និង Screen off memos ។ កាមេរ៉ាក្រោយរបស់វាមាន 2 គ្រាប់ទំហំ 12MP ដូចគ្នា មួយជាកម្រិត f/1.7 សម្រាប់ Lens ធម្មតា និងមួយទៀតកម្រិត f/2.4 សម្រាប់ Telephoto lensហើយក៏មានបំពាក់នូវបច្ចេកវិទ្យា Optical Stabilization ដូចគ្នា។ ស្មាតហ្វូននេះមាន RAM ទំហំ 6GB ដំណើរការដោយប្រព័ន្ធ Android 7.0 Nougat និងមានថាមពលថ្ម 3300mAh។

ក្រុមហ៊ុនបានបញ្ជាក់បន្ថែមទៀតថា ក្រោយពេល Pre-Order បានបញ្ចប់ អតិថិជនអាចទទួលបានទូរស័ព្ទ Galaxy Note 8 នៅថ្ងៃទី 29 ចុងខែកញ្ញានៅតាមហាងដែលបានបញ្ជាទិញ ហើយចំពោះអ្នកនៅតាមខេត្តអាចទទួលបាននៅក្រោយគ្នាមួយថ្ងៃ៕

September 2, 2017

អាល្លឺម៉ង់ ខិតកាន់តែកៀកទៅ World Cup ខណៈអង់គ្លេសឈ្នះម៉ាល់ត៍

ខ្សែការពារ Mats Hummels បានជួយឲ្យក្រុមបាល់ទាត់ជម្រើសជាតិអាល្លឺម៉ង់ ស្ថិតយ៉ាងប្រកៀកក្នុងការឈ្នះកៅអីទៅលេងក្នុងព្រឹត្តិការណ៍ World Cup ឆ្នាំ2018 កាលពីថ្ងៃសុក្រ តាមរយៈការរកគ្រាប់បាល់ឈ្នះនៅពេលចុងម៉ោងក្នុងការប្រកួតជាមួយនឹងក្រុមបាល់ទាត់ជម្រើសជាតិសាធារណរដ្ឋឆែក ស្របពេលដែលខ្សែប្រយុទ្ធ Harry Kane បានស៊ុតបាល់បញ្ចូលទី2គ្រាប់ដើម្បីជួយឲ្យក្រុមជម្រើសជាតិអង់គ្លេស យកឈ្នះលើក្រុមម៉ាល់ត៍ ក្នុងលទ្ធផល 4-។

ខ្សែប្រយុទ្ធ Timo Werner របស់ក្លិប RB Leipzig បានរកគ្រាប់បាល់បំប៉ោងសំណាញ់ទី ក្រោយពីលេងបានត្រឹមតែរយៈពេល4នាទីសម្រាប់ក្រុមម្ចាស់ជើងឯកពិភពលោក អាល្លឺម៉ង់ ក្នុងទីក្រុង Prague ប៉ុន្តែ គ្រាប់បាល់តាមស្មើរបស់កីឡាករ Vladimir Darida បានផ្តល់ការជឿជាក់ឡើងវិញសម្រាប់ក្រុមម្ចាស់ផ្ទះ។ ក្រុមរបស់លោក Joachim Loew បានកត់ត្រាជ័យជម្នះជាលើកទី7ពីការប្រកួតទាំង7លើកក្នុងពូល C ខណៈដែល Hummels បានតែតបាល់បញ្ចូលទីយ៉ាងល្អ ក្រោយពីការទាត់បាល់ឆ្លងពីសំណាក់ Toni Kroos នៅនាទីទី88 ដើម្បីជួយឲ្យក្រុមខ្លួនទទួលជ័យជម្នះ 2-1 និងធ្វើឲ្យក្រុមអាល្លឺម៉ង់ត្រូវការត្រឹមតែ4ពិន្ទុប៉ុណ្ណោះពីការប្រកួត3លើកចុងក្រោយរបស់ពួកគេ។

លោក Loew បានឲ្យដឹងថា៖ «យើងមិនអាចរីករាយជាមួយនឹងកម្រិតដែលយើងបានលេងនេះឡើយ។ យើងត្រូវការសំណាងជាច្រើននៅថ្ងៃនេះ ហើយប្រសិនបើ Mat មិនបានគ្រាប់បាល់បញ្ចូលទីតាមរយៈការតែតបាល់ដ៏អស្ចារ្យទេនោះ យើងច្បាស់ជាទទួលបានលទ្ធផលស្មើមិនខាន»។ ក្រុមជម្រើសជាតិអាល្លឺម៉ង់ នឹងឈ្នះកៅអីទៅកាន់ប្រទេសរុស្ស៊ីនៅថ្ងៃន្ទខាងមុខនេះ ប្រសិនបើពួកគេផ្តួលក្រុមជម្រើសជាតិន័រវែស ក្នុងផ្ទះខ្លួនឯង និងក្រុមជម្រើសជាតិអៀរឡង់ខាងជើង មិនអាចយកឈ្នះពេលជួបក្រុមជម្រើសជាតិឆែក នៅទីក្រុង Belfast៕

ប្រភពពី៖ Sport24

September 2, 2017

មណ្ឌលទេសចរណ៍ទឹកចម្រុះពណ៌ 5កន្លែង ដែលស្អាតបំផុតលើពិភពលោក

អាចរាប់បានថា ជាមណ្ឌលទេសចរណ៍ទឹកដ៏អស្ចារ្យបំផុត ដែលកំពុងរង់ចាំឱ្យអ្នកទេសចរទូទាំងពិភពលោកបានទៅទស្សនា និងនែបនិត្យជាមួយនឹងបរិយាកាសធម្មជាតិដ៏ស្អាតអស្ចារ្យដែលបានឃើញហើយនឹងធ្វើឱ្យជញ្ជក់មាត់គ្រប់ៗគ្នាមិនខាន។

1/ Plitvice Lake ប្រទេសក្រូអាត

ជាមណ្ឌលទេសចរណ៍ដ៏ល្បីល្បាញបំផុតរបស់ប្រទេស ក្រូអាត ដែលឧត្តមសម្បូរទៅដោយភាពស្រស់ស្អាតរបស់ធម្មជាតិ ភាពស្រស់ថ្លាខៀវខ្ចីរបស់ធម្មជាតិ ភាពត្រជាក់ស្រស់បស់របស់ព្រៃព្រឹក្សា និងភាពត្រជាក់ស្រើបនៃទឹកបឹងទន្លេសាប Plitvice Lake។ គឺជាបឹងមួយក្នុងចំណោមបឹងទន្លេសាបទាំង16ដែលត្រូវបានតភ្ជាប់គ្នាដោយទឹកជ្រោះធ្លាក់ដ៏ស្រស់ស្អាតជាច្រើនរហូតកើតចេញជាបឹងទន្លេសាបដែលឧត្តមសម្បូរទៅដោយធម្មជាតិដែលទាមទារឱ្យអ្នកទេសចរទៅនែបនិត្យផ្តិតយករូបភាពដ៏ស្រស់ស្អាតទាំងនេះ។

2/ Halong Bay or Bay of Descending Dragons ប្រទេសវៀតណាម

ប្រហែលជាមិនចាំបាច់អធិប្បាយអ្វីច្រើនទេសម្រាប់ ហាឡុង បេយ៍ ប្រទេសវៀតណាមនេះ ព្រោះអាចរាប់បានថា ជាមណ្ឌលទេសចរណ៍ខាងទឹកបែបធម្មជាតិមួយទៀតដ៏ស្រស់ស្អាតបំផុត ដែលធ្លាប់ទទួលអ្នកទេសចរអស់ជាច្រើនលាននាក់មកហើយ។ ជាមួយនឹងដំណើរទេសចរណ៍បែបអនុរក្សធម្មជាតិ និងនែបនិត្យជាមួយនឹងភាពស្រស់ស្អាតរបស់បណ្តាកោះតូចធំជាង1,600កោះដែលពោរពេញទៅដោយដើមឈើ និងព្រៃស្រោង ព្រមទាំងបានរៀនយល់ដឹងពីវិថីជីវិតរបស់អ្នករស់នៅទីនោះយ៉ាងស្ងប់សុខ និងងាយស្រួលផងដែរ។

3/ Wuhua Hai, Five-Flower Lake ប្រទេសចិន

ទន្លេសាប វូហួ ហៃ ឬទន្លេសាបនៃបុប្ផាទាំងប្រាំ គឺជាទន្លេសាបមួយក្នុងចំណោមទន្លេសាបដែលស្រស់ស្អាតលំដាប់ជួរមុខគេរបស់ឧទ្យាន ជីវ ចូ កូវ៍ ដោយសារតែមានទឹកដែលថ្លាហួសវិស័យរហូតដល់អាចមើលឃើញបាតបឹងបាន និងពណ៌របស់ទឹកថែមទាំងស្រស់ស្អាតរហូតក្លាយជាទីពេញនិយមសម្រាប់ប្រជាជនចិននាំគ្នាចូលមកថតរូបមុនរៀបការទុកជាអានុស្សាវរីយ៍ទៀតផង។ បឹងទន្លេសាបមួយនេះមានជម្រៅដល់ទៅ5ម៉ែត្រ នឹងមានផ្ទៃក្រឡាដល់ទៅ9ម៉ឺនម៉ែត្រការ៉េ។ ចំណែកឯប្រភពរបស់ឈ្មោះដែលគេនាំគ្នាហៅថា បុប្ផាទាំងប្រាំនោះគឺ ព្រោះតែដុំកករ រុក្ខជាតិ និងថ្មកំបោរដែលស្ថិតនៅក្រោមទឹកនោះមានពណ៌ចម្រុះហ្នឹងឯង។

4/ Cano Cristales, River of Five Colors ប្រទេសកូឡុំប៊ី

បើបានទៅលេងកម្សាន្តនៅទីនោះក្នុងអំឡុងពេលដែលមានទឹកច្រើន ភ្ញៀវទេសចរច្បាស់ជាត្រូវនឹកចម្លែកចិត្តមិនខានថា តើហេតុអីបានទីនេះមានឈ្មោះថា ទន្លេ 5ពណ៌ ទាំងដែលវាមានតែពណ៌បៃតងចាស់មួយដូចទន្លេទូទៅដែរនោះ តែឈប់សិន… បើសិនលោកអ្នកបានទៅលេងក្នុងអំឡុងខែកញ្ញា និងខែវិច្ឆិកាដែលមានទឹកតិច ឬរដូវប្រាំងវិញនោះ ក៏នឹងបានដឹងថា ហេតុអីបានមានដល់ទៅ 5ពណ៌? ព្រោះថា ពណ៌ទាំងអស់នោះ គឺរុក្ខជាតិដែលដុះនៅក្រោមទឹកដែលមានឈ្មោះថា Macarenia clavigera ដែលនឹងប្តូរទៅជាពណ៌ក្រហម និងពណ៌ផ្កាឈូក ចៃដន្យជួបនឹងពណ៌ដ៏ស្រស់ស្អាតរបស់ដីខ្សាច់ដែលមានពណ៌លឿង និងពណ៌បៃតង ហើយផ្ទៃទឹកក្នុងទន្លេក៏មានពណ៌ផ្ទៃមេឃដ៏ស្អាតផងនោះ ទើបមានឈ្មោះថាជា ទន្លេ 5ពណ៌បែបនេះ។

5/ Abraham Lake in Alberta ប្រទេសកាណាដា

ភាពស្រស់ស្អាតដ៏គួរឱ្យនឹកចម្លែកចិត្តដែលដូចជាត្រូវបានសាងឡើងដោយកុំព្យូទ័រក្រាហ្វិកខ្លាំងជាងជាស្នាដៃរបស់ធម្មជាតិ តែមិនមែនទេ… នេះគឺជាទន្លេ អាប្រាហាំ នៃប្រទេសកាណាដា នារដូវរងា។ គឺជាបាតុភូតធម្មជាតិដ៏គួរឱ្យនឹកស្ងើច នៅពេលដែលពពុះខ្យល់រាប់លានដុំដែលនៅឯបាតទន្លេអណ្តែតឡើងមកនៅពេលធាតុអាកាសរងាខ្លាំង។ ពពុះខ្យល់ទាំងអស់នេះ ជាហ្កាសដែលកើតឡើងពីបាក់តេរីដែលរលាយពីកម្ទេចរុក្ខជាតិនៅឯបាតទន្លេហ្នឹងឯង៕

September 2, 2017

ការទទួលខោអាវរោងចក្រមកកាត់ព្រុយក៏អាចរកចំណូលចិញ្ចឹមគ្រួសារបានដែរ

ភ្នំពេញ៖ រោងចក្រសហគ្រាសនៅតាមមូលដ្ឋានមិនត្រឹមតែជួយបង្កើនការងារ និងប្រាក់ចំណូលដល់កម្មករនោះទេ ប៉ុន្តែថែមទាំងជួយកាត់បន្ថយនូវការធ្វើចំណាកស្រុក និងផ្តល់ការងារដល់ស្ត្រីមេផ្ទះ និងមនុស្សចាស់មួយចំនួនឱ្យអាចរកចំណូលបានគួរសមទៀតផង។

ក្រៅអំពីការងារដាំស្លមើលថែកូនចៅនៅផ្ទះហើយនោះ ស្ត្រីមេផ្ទះ និងចាស់ៗនៅក្នុងភូមិព្រែកសំរោង ភូមិព្រែកខ្សេវ ភូមិព្រែកឡុង និងភូមិព្រែកថីក្នុងឃុំរកាខ្ពស់ ស្រុកស្អាង ខេត្តកណ្តាលនៅមានរបរបន្ទាប់បន្សំមួយទៀត គឺស៊ីឈ្នួលកាត់ព្រុយខោអាវថ្មីៗពីរោងចក្រដែលក្នុងមួយខែអាចទទួលបានកម្រៃបន្ថែមប្រមាណ100 ទៅ150ដុល្លារផងដែរក្នុងមួយខែ។

អ្នកស្រី នួន សុខនាង នៅភូមិព្រែកខ្សេវបានប្រាប់ឱ្យដឹងថា អ្នកស្រីមានរបរលក់នំគ្រក់ ហើយក្រៅពីការងារលក់ដូរ និងដាំស្លរហើយ អ្នកស្រីនៅមានរបរមួយផ្សេងទៀត គឺទទួលខោអាវទើបដេរហើយថ្មីៗពីរោងចក្រយកមកកាត់ព្រុយនៅឯផ្ទះ ដែលមួយខែៗអាចរកចំណូលបន្ថែមបានប្រមាណជាង100ដុល្លារ ហើយខាងរោងចក្រគេដឹកយកមកឱ្យដល់ផ្ទះទៀតផង។ លុះធ្វើរួចរាល់ហើយ គ្រាន់តែទូរស័ព្ទប្រាប់គេ ខាងរោងចក្រនឹងមកដឹកយកទៅវិញ និងយកថ្មីទៀតមកឱ្យធ្វើបន្ត។ ការងារនេះមិនលំបាកណាស់ណាទេ និងថែមទាំងអាចជួយបន្ថែមចំណូលឱ្យមានជីវភាពកាន់តែប្រសើរឡើងទៀតផង។

ចំណែកលោកយាយ មុំ សុខ អាយុ75ឆ្នាំ រស់នៅភូមិព្រែកឡុង ក៏បានមានប្រសាសន៍ដែរថា សព្វថ្ងៃបានការងារកាត់ព្រុយខោអាវរោងចក្រនេះហើយដែលជួយឱ្យគាត់រកកម្រៃបានសម្រាប់ធ្វើបុណ្យដាក់ទានទៅវត្តវ៉ា ហើយក៏មិនហត់នឿយដែរ ព្រោះចាំតែអង្គុយកាត់នៅផ្ទះប៉ុណ្ណោះ។ គេដឹកយកមកឱ្យដល់កន្លែង ហើយដល់ខែគេយកលុយមកទូទាត់ឱ្យដល់ផ្ទះទៀតដែលធ្វើឱ្យគាត់អាចជួយមើលថែទាំចៅ និងចាំផ្ទះបានទៀតផង សរុបទៅគឺបានរបរនេះហើយដែលផ្តល់នូវចំណូលប្រចាំខែមិនចាំបាច់សុំ ឬចាំកូនឱ្យប្រាក់ចាយនោះ។

មេការម្នាក់នៅរោងចក្រយ៉ុងវ៉ា នៅក្នុងឃុំរកាខ្ពស់ក្នុងចំណោមរោងចក្រចំនួនទាំង10 អ្នកនាង ម៉ែន ស្រីទូច ក៏បានប្រាប់ឱ្យដឹងដែរថា ដោយសារនៅក្នុងរោងចក្រមានការខ្វះខាតកម្មករ ទើបយើងបានដឹកសម្លៀកបំពាក់ដេររួចយកទៅឱ្យបងប្អូនជួយកាត់ព្រុយនៅតាមផ្ទះ ដើម្បីជួយបង្កើនចង្វាក់ការងារក្នុងរោងចក្រឱ្យបានទាន់ពេលវេលា។

លោក សុខ ប៊ុនថន ជំទប់ទី1ឃុំរកាខ្ពស់បានមានប្រសាសន៍ថា នៅទូទាំងឃុំមានភូមិចំនួន7 មានប្រជាពលរដ្ឋចំនួន 2,895គ្រួសារ និងមានចំនួនមនុស្សសរុប13,149 នាក់ ហើយមានរោងចក្រកាត់ដេរចំនួន10 មានកម្មករកម្មការិនីចំនួន2,410នាក់ ហើយភូមិដែលប្រជាពលរដ្ឋទទួលយកសម្លៀកបំពាក់ពីរោងចក្រទៅកាត់ព្រុយនោះមានចំនួន4ភូមិ រួមមានភូមិ ព្រែកឡុង ភូមិព្រែកសំរោង ភូមិព្រែកខ្សេវ និងភូមិព្រែកថី។ ការងារនេះវាមិនត្រឹមតែផ្តល់នូ វចំណូលដល់បងប្អូនដែលជាស្ត្រីមេផ្ទះនោះទេ វាថែមទាំងជួយកាត់បន្ថយល្បែងស៊ីសងនៅក្នុងមូលដ្ឋានទៀតផង ព្រោះពួកគាត់មានការងារធ្វើ ដូច្នេះគ្មានពេលទំនេរទៅលេងល្បែងស៊ីសងនោះឡើយ។ ចុងក្រោយលោកក៏សូមអំពាវនាវទៅដល់បងប្អូនដែលកំពុងធ្វើចំណាកស្រុកទាំងប្រថុយប្រថាននោះ គួរតែគិតគូរឡើងវិញ ព្រោះក្នុងភូមិឃុំរបស់យើងក៏អាចរកប្រាក់ចំណូលបានដែរ និងដែលសំខាន់គឺកំពុងខ្វះខាតកម្លាំងពលកម្ម៕

September 1, 2017

ស្ថាបត្យករ និងនិស្សិតដែលសិក្សាលើជំនាញនេះមិនគួរមើលរំលង «វេទិកាស្ថាបត្យកម្ម» ឡើយ

ភ្នំពេញ – ទោះជាបច្ចុប្បន្នវិស័យសំណង់នៅកម្ពុជាកំពុងតែរីកចម្រើន និងបោះជំហានទៅមុខយ៉ាងលឿនក៏ដោយ ក៏នៅមានអ្នកជំនាញមួយចំនួនលើកឡើងដែរថា វិស័យមួយនេះនៅមានចំណុចខ្វះខាតខ្លះ និងទាមទារឱ្យមានការសិក្សាស្វែងយល់ដើម្បីបង្កើនពុទ្ធិ និងពង្រឹងសមត្ថភាពបន្ថែមទៀត។

ថ្លែងនៅក្នុងកម្មវិធីសន្និសីទស្ដីពីការតាំងពិព័រណ៍វិស័យសំណង់ Cambuild2017 ឯកឧត្ដមភឿង សោភ័ណ្ឌ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានលើកឡើងថា បច្ចុប្បន្នវិស័យសំណង់មានការរីកដុះដាលគ្រប់កន្លែងដែលនាំមកនូវការងារសម្រាប់ប្រជាជនកម្ពុជា និងចូលរួមកាត់បន្ថយភាពក្រីក្រ។ ឯកឧត្ដមបញ្ជាក់ថា៖«ដូច្នេះយើងចង់ពង្រឹងសមត្ថភាពទៅដល់ស្ថាបត្យករ វិស្វករដែលធ្វើការបម្រើខាងវិស័យនេះឱ្យយល់ដឹងអំពីវឌ្ឍនភាពខាងវិស័យនេះ។ ក្នុងន័យនេះមិនមែនមានន័យថា កម្ពុជាដើរមិនទាន់ប្រទេសគេនោះទេ យើងដើរទាន់គេដែរ ប៉ុន្ដែយើងចង់រក្សាឱ្យបាននូវការអភិរក្ស និងអភិវឌ្ឍន៍តម្លៃស្ថាបត្យកម្មខ្មែរ និងរក្សាឱ្យបានផលប្រយោជន៍គ្រប់ជ្រុងជ្រោយដើម្បីឱ្យយើងអភិវឌ្ឍទៅឆ្ពោះទៅរកការរីកចម្រើន»។

គួរបញ្ជាក់ថា សំណង់ជាវិស័យអាទិភាពទី3ក្នុងការជំរុញសេដ្ឋកិច្ចជាតិឱ្យរក្សាកំណើនបាន7%និងតាមរយៈវិស័យមួយនេះយើងអាចផ្ដល់ការងារដល់ប្រជាជនទូទាំងប្រទេសក្នុងរង្វង់20ម៉ឺននាក់។

ឯកឧត្ដមភឿង សោភ័ណ្ឌ បន្ដថា មូលហេតុនេះហើយដែលនាំឱ្យយើងត្រូវតែបង្កើត «វេទិកាស្ថាបត្យកម្ម» នេះឡើងដើម្បីពង្រឹងសមត្ថភាពស្ថាបត្យករ វិស្វករ និងអ្នករកស៊ីក្នុងវិស័យសំណង់ អចនទ្រព្យ លំនៅឋាន ឱ្យរក្សាបាននូវអ្វីដែលជាអត្ដសញ្ញាណជាតិផង ទំនើបកម្មផងដើម្បីធ្វើយ៉ាងណាឱ្យកាន់តែមានភាពរីកចម្រើនបន្ថែមទៀត។ ឯកឧត្ដមបន្ដថា ប្រសិនបើប្រទេសកម្ពុជាអាចរក្សាបានស្ថាបត្យកម្មខ្មែរបែបទំនើប ប្រទេសកម្ពុជានឹងទទួលបានលំហូរភ្ញៀវទេសចរកាន់តែច្រើនដែរ ព្រោះយើងអាចដឹងបានតាមរយៈចំណង់ចំណូលចិត្ដរបស់ភ្ញៀវទេសចរដែលមកទស្សនានៅកម្ពុជា គឺចង់ឃើញប្រាសាទបុរាណដែលជាស្នាដៃស្ថាបត្យករខ្មែរពីបុរាណហ្នឹងឯង។

«វេទិកាស្ថាបត្យកម្ម»នឹងត្រូវធ្វើឡើងនៅថ្ងៃដំបូងនៃកម្មវិធីពិព័រណ៍វិស័យសំណង់Cambuild2017 ដែលនឹងប្រព្រឹត្ដទៅនៅថ្ងៃទី7-9 ខែកញ្ញា ឆ្នាំ2017នៅសាលកោះពេជ្រ។ ក្នុងនោះក៏មានក្រុមហ៊ុនជាង300ក្រុមហ៊ុនចូលរួមដោយនាំមកនូវផលិតផលដែលជាបច្ចេកវិទ្យាថ្មីៗចុងក្រោយបង្អស់មកតាំងបង្ហាញដោយផលិតផលទាំងនោះមានមកពីប្រទេសចិន ចិនតៃវ៉ាន់ សិង្ហបុរី ម៉ាឡេស៊ី វៀតណាម អ៊ីតាលី ជាដើម។

រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ប្រាប់ទៀតថា នៅក្នុងវេទិកាស្ថាបត្យកម្មនេះនឹងមានស្ថាបត្យករកំពូលៗមកពីប្រទេសសិង្ហបុរី ថៃ ភូមា ឡាវ និងកម្ពុជា មកចូលរួមបង្ហាញនូវបទពិសោធល្អៗរបស់ពួកគាត់មកចែកជូនដល់ស្ថាបត្យករកម្ពុជា ក៏ដូចជានិស្សិតដែលសិក្សាលើជំនាញនេះឱ្យយល់កាន់តែច្បាស់ពីការអភិវឌ្ឍ និងគំនិតច្នៃប្រឌិតនានា។

ជាមួយគ្នានេះឯកឧត្ដមភឿង សោភ័ណ្ឌ ក៏បានក្រើនរំឭកដល់សិស្សនិស្សិតទាំងអស់គួរតែមកចូលរួមក្នុងវេទិកាសាធារណៈមួយនេះដោយពុំត្រូវមើលរំលងឡើយ ព្រោះវេទិកានេះនឹងផ្ដល់ពុទ្ធិ និងបទសោធថ្មីៗជាច្រើន។ ម្យ៉ាងវេទិកាស្ថាបត្យកម្មនេះជាកម្មវិធីដែលបានរៀបចំជាលើកដំបូងទៀតផង៕

September 1, 2017

មាស សុខសោភា លេងម៉ូដឃើញអាវក្នុងមូលក្លំ (មានវីដេអូ)

បើតាមរយៈបណ្ដាញសង្គម អ៊ីនស្តាក្រាម របស់កំពូលតារាចម្រៀងស្រី មាស សុខសោភា ដែលបានបង្ហោះវីដេអូសកម្មភាពថតបទចម្រៀងថ្មីពេលក្រៅឆាកនោះ បានធ្វើឱ្យមហាជន(ពិសេសប្រុសៗ)ទប់ទឹកមាត់សឹងមិនបាន។

តាមរយៈវីដេអូដែលមានរយៈពេលមិនដល់ 1 នាទីផងនោះ គេឃើញតារាស្រីរូបនេះបានពាក់អាវធ្វើពីស្បៃដ៏ស្ដើងពណ៌ទឹកក្រូច ដែលអាចមើលឃើញឆ្លុះទៅដល់អាវទ្រនាប់ខាងក្នុងពណ៌ទឹកសមុទ្រដ៏មូលក្លំបានយ៉ាងច្បាស់។ ជាការពិតណាស់ ជាទូទៅមហាជនគ្រប់គ្នាតែងសម្គាល់មើលថា វីដេអូចម្រៀងរបស់នាងនីមួយៗ គឺពិតជាប្លែកទៅតាមអត្ថន័យបទចម្រៀង ដែលមានបទខ្លះ នាងបានត្រូវតុបតែងខ្លួនបែបសាមញ្ញ ចំណែកឯបទខ្លះទៀតវិញ នាងក៏តែងខ្លួនបែបទាន់សម័យជាដើម។

ដើម្បីឱ្យកាន់តែជាក់ច្បាស់ថា តើតារាស្រីដែលអាចចម្រៀងបទភាសាអង់គ្លេសពីរោះរូបនេះសិចស៊ីដល់កម្រិតណានោះ សូមទស្សនាវីដេអូខាងក្រោមនេះ៖

#throwbackthursday #camtraxmusic #cubanlink
A post shared by Meas Soksophea-Official (@meassoksophea_official) on Aug 31, 2017 at 12:31am PDT

September 1, 2017

Category: សង្គម និងសេដ្ឋកិច្ច