ប៉ុន្មាននាទីមុននេះបន្ដិច តារាសម្ដែង និងបង្ហាញម៉ូដ មាន សូនីតា បានបញ្ចេញម៉ូដសម្លៀកបំពាក់របស់ខ្លួននាឱកាសបុណ្យភ្ជុំបិណ្ឌខាងមុខនេះ ដែលមើលឃើញហើយពិតជាប្លែកម៉្យាងដែរ និងមានអារម្មណ៍ថា ហាក់បីដូចជាបានវិលត្រឡប់ទៅកាន់សម័យអតីតកាលក្នុងអំឡុងឆ្នាំ1990 ម្តងទៀតដូច្នោះដែរ។
គួបញ្ជាក់ផងដែរថា រូបភាព 3 ស្លឹកនៅលើ Facebook Page ដែលបង្ហាញពីការនិយមច្នៃម៉ូដប្លែកៗ និងស្រស់ស្អាតរបស់រាជិនីក្រមារូបនេះ ពិតជាប្លែកមិនធម្មតាមែន គឺមិនអាចមិនសរសើរបានឡើយ។
ដើម្បីកាន់តែជាក់ច្បាស់សូមទស្សនារូបខាងក្រោមនេះ
ភ្នំពេញ៖ សៀមរាបជាទីក្រុងសម្បូរទៅដោយប្រសាទបុរាណបន្សល់ពីដូនតាដែលអាចទាក់ទាញទេសចរមកទស្សនាបានច្រើនជាងគេក្នុងចំណោមតំបន់ដែលមានប្រាង្គប្រាសាទបុរាណនានានៅលើពិភពលោក។
ដោយយោងទៅលើសក្តានុពលក្នុងការទាក់ទាញទេសចរនេះ រដ្ឋាភិបាលបានសម្រេចដាក់បញ្ចូលទីក្រុងសៀមរាបជាបេក្ខភាពក្នុងយុទ្ធនាការប្រឡងប្រណាំងទីក្រុងទេសចរណ៍ស្អាតអាស៊ាន ឆ្នាំ2018មួយក្នុងចំណោមទីក្រុងស្អាតដទៃទៀតរបស់កម្ពុជា។
ផែនការនេះត្រូវបានលើកឡើងក្នុងកិច្ចប្រជុំការងារវិស័យទេសចរណ៍រដ្ឋ-ឯកជនកាលពីថ្ងៃទី04 ខែកញ្ញា ឆ្នាំ2017ម្សិលមិញ នៅសាលាខេត្តសៀមរាប ក្រោមអធិបតីភាពឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ ឯកឧត្តម ឃឹម ប៊ុនសុង អភិបាលខេត្តសៀមរាប និងឯកឧត្តម នូ ផល្លា ប្រធានក្រុមប្រឹក្សាខេត្ត និងមានការចូលរួមពីអាជ្ញាធរជាតិអប្សរា គ្រឹះស្ថានអង្គរ និងមន្ទីរជំនាញពាក់ព័ន្ធ នគរបាលទេសចរណ៍ ស្ថានកុងស៊ុលកូរ៉េប្រចាំខេត្តសៀមរាប ប្រតិបត្តិករទេសចរណ៍ មគ្គុទ្ទេសក៍ទេសចរណ៍យុវជន និងទេសចរជាតិ-អន្តរជាតិសរុបប្រមាណ 350នាក់។
កិច្ចប្រជុំនេះផ្តោតជាសំខាន់លើការដោះស្រាយនូវសំណូមពរ និងបញ្ហាប្រឈមនានារបស់ផ្នែកឯកជនក្នុងវិស័យទេសចរណ៍ ដោយផ្សារភ្ជាប់នូវកម្មវិធីផ្សព្វផ្សាយការប្រទ្បងប្រណាំងបង្គន់សាធារណៈកម្ពុជា ចលនាប្រទ្បងប្រណាំងទីក្រុងស្អាតទេសចរណ៍អាស៊ាន និងយុទ្ធនាការកម្ពុជាស្អាត Cambodia Clean-Up សម្រាប់ខេត្តសៀមរាបផងដែរ។
ខេត្តសៀមរាបត្រូវបានចាត់ទុកជាគោលដៅទេសចរណ៍វប្បធម៌ និងប្រវត្តិសាស្ត្រដែលទាក់ទាញទេសចរណ៍គ្រប់ជាតិសាសន៍មកកម្សាន្ត។ ជាក់ស្តែងក្នុងរយៈពេល7ខែ ឆ្នាំ2017 ខេត្តសៀមរាបទទួលបានទេសចរសរុប 3,783,724នាក់ កើនទ្បើង 11.94% ធៀបនឹងឆ្នាំ2016 ក្នុងនោះភ្ញៀវទេសចរជាតិមានចំនួន 2,367,696នាក់ កើនទ្បើង 11.97% និងភ្ញៀវទេសចរអន្តរជាតិចំនួន 1,416,028នាក់ កើនទ្បើង 11.99%។
ក្នុងឱកាសនោះដែរ ឯកឧត្តម ថោង ខុន បានឯកភាពដាក់ចេញកម្មវិធីការងារចាត់តាំងអនុវត្ត ដើម្បីបេក្ខភាពខេត្តសៀមរាប ជាបេក្ខភាពចលនាប្រទ្បងប្រណាំងទីក្រុងទេសចរណ៍ស្អាតអាស៊ាន 2018 មានដូចខាងក្រោម៖
1៖ បន្តពង្រឹងគុណភាពសេវាកម្មទេសចរណ៍ និងបដិសណ្ឋារកិច្ចល្អដល់ភ្ញៀវទេសចរ។
2៖ បន្តពង្រឹងការរៀបចំសណ្តាប់ធ្នាប់សាធារណៈ តាមគោលដៅទេសចរណ៍សំខាន់ ដោយទប់ស្កាត់ឲ្យបាននូវការប្រើប្រាស់ដីចំណីផ្លូវសម្រាប់ធ្វើអាជីវកម្ម ការចតម៉ូតូ រ៉ឺម៉ក រថយន្ត គ្មានសណ្តាប់ធ្នាប់ និងបន្តរៀបចំឲ្យមានផ្លូវដើរសម្រាប់ទេសចរឲ្យបានច្រើន ពិសេសពង្រឹងសណ្តាប់ធ្នាប់នៅតំបន់ផាប់ស្ទ្រីត។ ក្នុងនោះលោក ឃឹម ប៊ុនសុង បានដាក់ចេញនូវឱសានវាទត្រឹមដើមខែតុលា ឆ្នាំ2017 ឲ្យអាជីវកម្មទាំងអស់ដែលបំពានយកដីចំណីផ្លូវ ត្រូវរុះរើជាបន្ទាន់ និងដាច់ខាត និងទប់ស្កាត់ឲ្យបាននូវការរំខានដោយសំឡេងដែលបង្កផលប៉ះពាល់ដល់ប្រជាពលរដ្ឋ និងអាជីវកម្មដទៃទៀត ដោយចុះធ្វើការណែនាំដល់ទីតាំងផ្ទាល់ ក្នុងនោះរដ្ឋបាលខេត្តសៀមរាបនឹងចាត់វិធានការច្បាប់ចំពោះម្ចាស់មណ្ឌលកម្សាន្តទេសចរណ៍មនុស្សពេញវ័យ ដែលបន្តមិនគោរពតាមការណែនាំអប់រំកិច្ចសន្យា ដោយអាចឈានដល់ការបិទអាជីវកម្មតែម្តង។
3៖ រៀបចំយុទ្ធសាស្ត្រ និងផែនការច្បាស់លាស់ក្នុងការគ្រប់គ្រងសំណល់រឹង ពិសេសយន្តការប្រមូលសំរាមក្នុងតំបន់ទីប្រជុំជន ផ្សារ និងតំបន់ដែលមានការឆ្លងកាត់ញឹកញាប់ និងបន្តគាំទ្រការពារ និងការគ្រប់គ្រងបរិស្ថាន និងសំរាមនៅតំបន់ចុងឃ្នាស និងភ្ជាប់តំបន់ទន្លេសាប។
4៖ បន្តពង្រឹង និងពង្រីកការសាងសង់បង្គន់សាធារណៈឲ្យបានគ្រប់គ្រាន់ ពិសេសតាមគោលដៅទេសចរណ៍សំខាន់ៗ ក្នុងខេត្តសៀមរាប យ៉ាងហោចឲ្យបានបង្គន់សាធារណៈកម្ពុជា 8-10កន្លែងទៀត ឲ្យស្របតាមស្តង់ដារបង្គន់សាធារណៈកម្ពុជា និងស្តង់ដារបង្គន់សាធារណៈអាស៊ាន ដោយជ្រើសទីតាំងឲ្យបានស្របនឹងចំនួនទេសចរដែលរួមជាមួយនឹងមជ្ឈមណ្ឌលព័ត៌មានទេសចរណ៍ ស្ថានីយចំណតរថយន្ត ឬមជ្ឈមណ្ឌលពាណិជកម្ម ឬនៅដាច់ដោយឡែក។
5៖ ពង្រឹងការគ្រប់គ្រងទេសចរណ៍ក្នុងតំបន់អង្គរឲ្យកាន់តែមានប្រសិទ្ធភាព និងគុណភាពខ្ពស់ ក្នុងនោះទប់ស្កាត់ក្មេងលក់ដូររំខានដល់ភ្ញៀវទេសចរដែលអាជ្ញាធរជាតិអប្សរា និងបន្តសហការជាមួយផ្នែកពាក់ព័ន្ធ និងមន្ទីរសង្គមកិច្ច និងអតីតយុវជន និងអង្គការនានា ដើម្បីរៀបចំ និងដាក់ចេញនូវវិធានការអប់រំ និងវិធានការរដ្ឋបាលជំនួសដោយការផ្តល់ការអប់រំដល់ក្មេងៗ និងមុខរបរជំនួសសម្រាប់ឱពុកម្តាយក្មេងៗនោះ។ បន្តគាំទ្រការអភិវឌ្ឍសហគមន៍ទេសចរណ៍នៅតំបន់បន្ទាយស្រី ដោយតម្រូវឲ្យមានការសហការគោរពអនុវត្តឲ្យបានត្រឹមត្រូវតាមការណែនាំរបស់អាជ្ញាធរអប្សរា និងកិច្ចសហការជាមួយស្ថាប័នជំនាញ ពិសេសមន្ទីរទេសចរណ៍ មន្ទីរបរិស្ថាន មន្ទីរកសិកម្ម មន្ទីរធនធានទឹក។ល។
6៖ ដើម្បីគាំទ្រលើការដោះស្រាយបញ្ហាប្រឈមនានា ដែលលើកទ្បើងដោយវិស័យឯកជនពាក់ព័ន្ធ និងសម្រាប់អនាម័យបរិស្ថាននៅក្រុងសៀមរាប អង្គប្រជុំបានឯកភាព និងគាំទ្រយុទ្ធនាការកម្ពុជាស្អាត Cambodia Clean-Up ដោយព្រមព្រៀងបង្កើតក្រុមការងារអចិន្ត្រៃយ៍រួមទាំងរដ្ឋបាលខេត្តសៀមរាប ផ្នែកឯកជន ភ្ញៀវទេសចរ យុវជនសហភាពសហព័ន្ធយុវជនកម្ពុជា ដើម្បីចាត់តាំងអភិវឌ្ឍឲ្យមានជាកម្មវិធីជាប្រចាំរៀងរាល់ចុងសប្តាហ៍។
7៖ ដើម្បីគាំទ្របេក្ខភាពទីក្រុងសៀមរាបក្នុងចលនាប្រទ្បងប្រណាំងទីក្រុងស្អាត រដ្ឋបាលថ្នាក់ក្រោមជាតិត្រូវបន្តគិតគូរ និងរៀបចំឲ្យមានបង្គន់សាធារណៈស្របតាមស្តង់ដារ កន្លែងហាត់ប្រាណ សួនច្បារ តំបន់បៃតងសម្រាប់ប្រជាពលរដ្ឋ ភ្ញៀវទេសចរ ចំណតរថយន្ត ផ្លូវថ្មើរជើង និងពង្រឹងយន្តការគ្រប់គ្រងការប្រមូលសំរាមក្នុងក្រុងសៀមរាបឲ្យកាន់តែមានប្រសិទ្ធភាព។
ឯកឧត្តម ថោង ខុន បានគូសបញ្ជាក់ថា ទន្ទឹមនឹងការគិតគូរដោយការពង្រឹងការគ្រប់គ្រងក្នុងក្រុងសៀមរាប និងតំបន់អង្គរឲ្យស្អាត និងបៃតងចាំបាច់ត្រូវធ្វើពិពិធកម្មផលិតផលទេសចរណ៍ឲ្យបានច្រើនថែមទៀត ពិសេសសហគមន៍ទេសចរណ៍ដែលមានសក្ដានុពលនៅតំបន់ជុំវិញខេត្តសៀមរាប ក្នុងនោះមានសហគមន៍ជ្រាវ សហគមន៍កំពង់ភ្លុក និងសហគមន៍បន្ទាយស្រី សហគមន៍ទេសចរណ៍ចុងឃ្នាសជាដើម និងគោលដៅអេកូទេសចរណ៍ព្រែកទាល់ ភ្នំគូលែន ដើម្បីបង្កើតជាផលិតផលទេសចរណ៍ថ្មីផ្តល់ជូនភ្ញៀវទេសចរ និងតាមរយៈសហគមន៍ទេសចរណ៍ និងគោលដៅទេសចរណ៍ថ្មីៗទាំងនោះ នឹងផ្តល់នូវអត្ថប្រយោជន៍ដល់ប្រជាពលរដ្ឋមូលដ្ឋាន កាត់បន្ថយភាពក្រីក្រ កាត់បន្ថយចំណាកស្រុក និងចូលរួមដល់កិច្ចការពារ អភិរក្សធនធានធម្មជាតិប្រកបដោយប្រសិទ្ធភាព៕
ទាំងក្រុមបាល់ទាត់ជម្រើសជាតិកម្ពុជា និងខ្សែប្រយុទ្ធឆ្នើមចាន់ វឌ្ឍនាការ សុទ្ធសឹងបានអំពាវនាវឲ្យអ្នកគាំទ្របង្ហាញពីភាពស្មោះត្រង់ និងបង្ហាញពីការគាំទ្រយ៉ាងពិតប្រាកដ នៅពេលជួបជាមួយនឹងក្រុមជម្រើសជាតិវៀតណាម ក្នុងការប្រកួតជម្រុះ Asian Cup ជុំទី3 ក្នុងពូល C នាពហុកីឡដ្ឋានជាតិអូឡាំពិក នៅពេលល្ងាចនេះ។
ក្រោយពីទទួលបានលទ្ធផលដ៏សែនខកចិត្តក្នុងយុទ្ធនាការស៊ីហ្គេមកាលពីពេលថ្មីៗនេះរួចមក លោក Leonardo Vitorino គ្រូបង្វឹកនៃក្រុមកម្ពុជាបានស្នើឲ្យអ្នកគាំទ្ររបស់ខ្លួនបង្ហាញភាពជាអ្នកកីឡា និងចូលរួមគាំទ្រដោយភាពស្មោះត្រង់។
គ្រូបង្វឹកសញ្ជាតិប្រេស៊ីលរូបនេះបានឲ្យដឹងក្នុងសន្និសីទសារព័ត៌មានមួយថា៖ «អ្នកគាំទ្រត្រូវបានបង្ហាញពីភាពស្មោះត្រង់របស់ខ្លួន និងមិនគួរប្រើប្រាស់កាយវិការមិនសមរម្យណាមួយឡើយ។ យើងត្រូវតែបង្ហាញពីការជឿជាក់លើក្រុមរបស់យើង»។ ប៉ុន្តែ ទាំងគ្រូបង្វឹកថ្មីរបស់វៀតណាម និងគ្រូបង្វឹករបស់កម្ពុជា សុទ្ធសឹងរំពឹងទុកថា ការប្រកួតនៅថ្ងៃអង្គារនេះ នឹងក្លាយជាការប្រកួតដ៏ស្វិតស្វាញមួយ ហើយក្រុមទាំងពីរត្រៀមលក្ខណៈរួចរាល់សម្រាប់ការប្រកួតដ៏តានតឹងមួយនេះ។
លោក Mai Duc Chung ដែលត្រូវបានតែងតាំងជាគ្រូបង្វឹកបណ្តោះអាសន្នរបស់វៀតណាម ជំនួសលោក Nguyen Huu Thang នោះ បានឲ្យដឹងថា៖ «យើងមិនអាចមើលស្រាលទៅលើក្រុមម្ចាស់ផ្ទះបានឡើយ ខណៈដែលកាលពីពេលថ្មីៗនេះ ពួកគេបានបង្ហាញភាពរឹងមាំរបស់ខ្លួន តាមរយៈការផ្តួលក្រុមជម្រើសជាតិអាហ្វហ្គានីស្ថាន លើទឹកដីខ្លួនឯង»។
ក្រុមជម្រើសជាតិកម្ពុជា នឹងឈានទៅកាន់ការប្រកួតនេះដោយការស្ថិតក្នុងចំណាត់ថ្នាក់លេខ2 ក្នុងពូល ដោយមាន3ពិន្ទុ ពី2ប្រកួត បន្ទាប់ពីបានយកឈ្នះលើក្រុមអាហ្វហ្គានីស្ថាន 1-០ កាលពីខែមិថុនា និងចាញ់ហ្ស៊កដានី 7-០ កាលពីថ្ងៃបើកឆាក។ ប៉ុន្តែ ក្រុមម្ចាស់ផ្ទះ នឹងឈានទៅកាន់ការប្រកួតនេះទាំងការជឿជាក់ ខណៈដែលតារាឆ្នើម វឌ្ឍនាការ ក៏ត្រៀមបង្ហាញខ្លួនផងដែរ។ ក្រោយពីបានស្នើសុំឲ្យអ្នកគាំទ្រចូលរួមទស្សនា ក៏ដូចជាបន្តគាំទ្រក្រុមកម្ពុជា វឌ្ឍនាការ បានឲ្យដឹងថា៖ «វៀតណាមជាក្រុមខ្លាំង ប៉ុន្តែខ្ញុំក៏បានត្រៀមលក្ខណៈសម្រាប់ការប្រកួតនេះរួចហើយដែរ»។
ក្រុមជម្រើសជាតិវៀតណាម នឹងឈានទៅកាន់ការប្រកួតនេះដោយមាន2ពិន្ទុ ពីការប្រកួត2លើក ក្រោយពីបានបញ្ចប់ក្នុងលទ្ធផលស្មើពេលជួបក្រុមខ្លាំងហ្ស៊កដានី និងអាហ្វហ្គានីស្ថាន។ ក្នុងការជួបគ្នាជាលើកចុងក្រោយរវាងក្រុមទាំងពីរកាលពីឆ្នាំ2016 វៀតណាមបានយកឈ្នះលើកម្ពុជា 2-1៕
តើអាណាព្យាបាល និងលោកឪពុកអ្នកម្តាយដឹងទេថា សភាពបរិស្ថានជុំវិញខ្លួនកូន សុទ្ធតែមានឥទ្ធិពលដែលហុចផលដល់ការចម្រើនធំធាត់របស់ក្មេងទាំងអស់ ដែលរឿងនេះគឺជារឿងដែលអាចកំណត់បានថា កូនតូចរបស់លោកអ្នកនឹងធំធាត់ឡើងក្លាយជាយុវជនដ៏ល្អដែរឬទេ? បើអ្នកណាចង់ឱ្យកូនៗធំធាត់ឡើងក្លាយជានុស្សល្អ និងមានអនាគតល្អស្រស់ស្រាយនោះ គួរឱ្យកូនតូចរបស់លោកអ្នកស្ថិតនៅឱ្យឆ្ងាយពីសភាពបរិស្ថានដូចខាងក្រោមនេះ។
1/ ការជេរស្តីបន្ទោស ទិតៀន
ការស្តីបន្ទោស ជេរបញ្ចោរ ទិតៀន អាចមានខ្លះដែរ ពេលដែលកូនធ្វើខុស តែបើសិនជាញឹកញាប់ជ្រុលពេកក៏ប្រហែលជាមិនល្អនោះទេ ព្រោះរឿងនោះនឹងធ្វើឱ្យកូនធំធាត់ឡើងក្លាយជាមនុស្សច្រងេងច្រងាង និងកើតមានអារម្មណ៍មិនចង់ធ្វើអំពើល្អនៅទីបំផុត ដូច្នេះវិធីដែលល្អបំផុត គឺព្យាយាមប្តូរពីការជេរស្តីបន្ទោសមកជាការនិយាយប្រាប់ ឬប្រដៅបែបស្រួលៗ ល្អៗ ដើម្បីឱ្យកូនបានយល់ និងបានទទួលដឹងថា ខ្លួនឯងធ្វើខុសវិញប្រសើរជាង។
2/ ថែទាំថ្នាក់ថ្នមជ្រុលពេក
ការចិញ្ចឹមកូនដោយការថ្នាកថ្នមជ្រុលហួសហេតុពេក គឺជាការបំផ្លាញកូនដោយមិនដឹងខ្លួន ព្រោះការធ្វើបែបនោះនឹងធ្វើឱ្យគេធំធាត់ឡើងក្លាយជាមនុស្សអាត្មានិយម គិតតែពីចិត្តខ្លួនឯង និងចូលចិត្តតែភាពងាយស្រួលសប្បាយហួសហេតុ វានឹងចូលទំនងដែលថា ធ្ងន់មិនប្រឹង តឹងមិនស៊ូ ដែលវានឹងហុចផលមិនល្អដល់ការរស់នៅក្នុងសង្គមមិនតិចតួចឡើយ។ ដូច្នេះ ទោះជាលោកអ្នកស្រឡាញ់ និងបារម្ភកូនខ្លាំងប៉ុនណាក៏ដោយ ក៏គួរតែបង្ហាត់បង្រៀនគេឱ្យចេះធ្វើអ្វីដោយខ្លួនឯងខ្លះ មិនមែនគិតតែពីធ្វើឱ្យគ្រប់យ៉ាង រហូតដល់គេមិនអាចធ្វើអ្វីបានសោះនោះឡើយ។
3/ ការជេរដាក់ទំនាយ
មិនមានកូនណាម្នាក់ចង់ឮការជេរដាក់ទំនាយ ឬដាក់បណ្តាសាពីឪពុកម្តាយឡើយ ទោះជាការនិយាយនោះមិនមែនជាការតាំងចិត្តក៏ដោយ ព្រោះនៅពេលដែលនិយាយចេញទៅហើយ ក្មេងៗនឹងចាំជាប់ក្នុងចិត្តនឹងធ្វើឱ្យគេធំធាត់ឡើងក្លាយជាមនុស្សអាក្រក់បាន។ ដូច្នេះហើយ ក្នុងការបង្ហាត់បង្រៀនកូន ឪពុកម្តាយចូរកុំប្រើអារម្មណ៍ កំហឹង ឬភ្លេចខ្លួននិយាយពាក្យដាក់ទំនាយ ឬដាក់បណ្តាសាកូនឱ្យសោះ។
4/ ការធ្វើត្រាប់តាម
ការធ្វើត្រាប់តាម ទោះវាគ្រាន់តែជាការបន្លំលេងបែបសប្បាយៗក៏ដោយ តែវាក៏អាចហុចផលប៉ះពាល់នៅពេលកូនតូចធំធាត់ឡើងបានដូចគ្នា ដែលនឹងធ្វើឱ្យគេក្លាយជាមនុស្សអៀនខ្មាសច្រើន និងពិបាកក្នុងការចូលរួមសង្គមជាមួយអ្នកដទៃ។ ដូច្នេះបើឪពុកម្តាយមិនចង់ឱ្យកូនក្លាយជាមនុស្សដែលបិុនអៀនខ្មាសជ្រុលហួសហេតុនោះ ចូរកុំបណ្តោយឱ្យកូនស្ថិតនៅក្នុងកណ្តាលការត្រូវធ្វើត្រាប់ចំអកយ៉ាងដាច់ខាត។
5/ ការខ្វះហេតុផល
កណ្តាលបរិស្ថានជុំវិញខ្លួនដែលខ្វះនូវហេតុផល ម្នាក់ៗប្រកាន់យកតែគំនិតខ្លួនឯងជាធំ ច្រើនតែធ្វើឱ្យកុមារធំធាត់ឡើងក្លាយជាមនុស្សឆាប់ខឹងមួម៉ៅ និងគ្មានហេតុផលបានដូចគ្នា ហើយដោយភាពជាមនុស្សឆាប់ខឹងមួម៉ៅនេះនឹងហុចផលអាក្រក់ដល់ការរស់នៅនាពេលអនាគតរបស់ពួកគេយ៉ាងខ្លាំង។ ដូច្នេះដើម្បីឱ្យកូនធំធាត់ឡើងយ៉ាងមានប្រសិទ្ធភាព និងគុណភាពល្អបំផុតនោះ ឪពុកម្តាយត្រូវតែចាប់ផ្តើមពីការធ្វើឱ្យខ្លួនឯងជាមនុស្សមានហេតុផលឱ្យកូនៗមើលជាគំរូជាមុនសិនទើបជាការល្អប្រសើរបំផុត។
តាមរយៈទាំង5ចំណុចដែល ឡារ៉ែន បានរៀបរាប់មក សុទ្ធតែជាសភាពបរិស្ថានជុំវិញខ្លួនដែលសាងនូវទម្លាប់ និងនិស្ស័យមិនល្អដល់កូនតូចនៅពេលដែលគេធំធាត់ឡើងបានទាំងអស់ ហើយរឿងទាំងអស់នេះភាគច្រើនគឺកើតចេញឪពុកម្តាយទាំងអស់ ដូច្នេះដើម្បីឱ្យកូនៗធំធាត់ឡើងយ៉ាងមានគុណភាពល្អបំផុតនោះ ចូរកុំភ្លេចខ្លួនសាងសភាពបរិស្ថានទាំងអស់នេះឡើងមកធ្វើបាបកូនៗឱ្យសោះ៕
ក្រុមបាល់ទាត់ជម្រើសជាតិអង់គ្លេស បានសង្គ្រោះការភិតភ័យមួយ ខណៈដែលពួកគេបានធ្វើការវាយបកពីការដេញតាមពីក្រោយ1គ្រាប់ ដើម្បីផ្តួលក្រុមជម្រើសជាតិស្លូវ៉ាគី ក្នុងលទ្ធផល 2-1 នាកីឡដ្ឋាន Wembley កាលពីថ្ងៃចន្ទ និងដើម្បីបោះជំហានចូលទៅកាន់តែកៀកក្នុងការឈ្នះកៅអីទៅកាន់ព្រឹត្តិការណ៍ World Cup នៅឆ្នាំក្រោយ ក្នុងប្រទេសរុស្ស៊ី។
កីឡាករ Stanislav Lobotka បានដណ្តើមយកប្រៀបលើការធ្វេសប្រហែសរបស់ក្រុមអង់គ្លេសដើម្បីជួយឲ្យក្រុមជម្រើសជាតិស្លូវ៉ាគី មានគ្រាប់បាល់នាំមុខមុន1គ្រាប់ក្រោយពីលេងបានត្រឹមតែ3នាទី មុននឹងក្រុមអង់គ្លេសរបស់លោក Gareth Southgate បានបើកការវាយសម្រុកយ៉ាងខ្លាំងតបតវិញ។
ក្រោយមកខ្សែការពារ Eric Dier រកបានគ្រាប់បាល់តាមស្មើវិញនៅចុងតង់ទី1 ខណៈខ្សែប្រយុទ្ធវ័យក្មេង Marcus Rashford បានខ្ជះខ្ជាយឱកាសជាច្រើន ប៉ុន្តែបានរកគ្រាប់បាល់ឈ្នះឲ្យក្រុមអង់គ្លេសនាំមុខ5ពិន្ទុដាច់នៅលើកំពូលតារាងនៃពូល F ខណៈដែលនៅសល់ការប្រកួតត្រឹមតែ2លើកទៀតប៉ុណ្ណោះ។
ស្របពេលជាមួយគ្នានេះដែរ ខ្សែប្រយុទ្ធ Timo Werner បានស៊ុតបាល់បញ្ចូលទី2គ្រាប់ ក្នុងពេលក្រុមជម្រើសជាតិអាល្លឺម៉ង់លត់ក្រុមជម្រើសជាតិន័រវែសយ៉ាងចាស់ដៃក្នុងលទ្ធផល 6-០ ក្នុងទីក្រុង Stuttgart ដើម្បីធ្វើឲ្យក្រុមម្ចាស់ជើងឯកពិភពលោករបស់លោក Joachim Loew បានកត់ត្រាជ័យជម្នះ8លើកពីការប្រកួតទាំង8លើកក្នុងការប្រកួតក្នុងពូល C។
ប៉ុន្តែ ស្របពេលដែលក្រុមមានចំណាត់ថ្នាក់លេខ2 អៀរឡង់ខាងជើងបានផ្តួលក្រុមជម្រើសជាតិសាធារណរដ្ឋឆែក ក្នុងលទ្ធផល 2-០ ក្នុងទីក្រុង Belfast ក្រុមជម្រើសជាតិអាល្លឺម៉ង់នឹងត្រូវតែរង់ចាំរហូតដល់ការប្រកួតបន្ទាប់ ពោលគឺការប្រកួតនៅលើទឹកដីក្រុមជម្រើសជាតិអៀរឡង់ខាងជើង នាថ្ងៃទី5 ខែតុលាខាងមុខ ដើម្បីការឈ្នះកៅអីជាស្វ័យប្រវត្តិទៅកាន់ប្រទេសរុស្ស៊ី។
លោក Loew គ្រូបង្វឹករបស់អាល្លឺម៉ង់ បានឲ្យដឹងថា៖ «នោះគឺជាការបង្ហាញពីទម្រង់លេងយ៉ាងល្អនៃកីឡាបាល់ទាត់របស់យើង»៕
ប្រភពពី៖ BBC
រោងចក្រផលិតស៊ីម៉ងត៍ដ៏ធំបំពាក់ដោយបច្ចេកវិទ្យាកម្រិតខ្ពស់បំផុតនៅតំបន់អាស៊ីអាគ្នេយ៍របស់កម្ពុជា នឹងបើកដំណើរការផលិតជាលើកដំបូងរបស់ខ្លួននៅខែវិច្ឆិកា ឆ្នាំ 2017។ នេះបើតាមការប្រកាសរបស់ក្រុមហ៊ុន ជីបម៉ុង អ៊ិនស៊ី ស៊ីមេន ខបភើរេសិន ក្នុងយុទ្ធនាការធ្វើតេស្ដគុណភាពនៃស៊ីម៉ងត៍ កាលពីព្រឹកថ្ងៃទី 04 ខែកញ្ញា ម្សិលមិញ។
លោក ឧកញ៉ា លាង ម៉េង អគ្គនាយក ក្រុមហ៊ុន ជីបម៉ុង អ៊ិនស៊ី ស៊ីមេន ខបភើរេសិន បានឱ្យដឹងថា ក្រុមហ៊ុនលោក កំពុងតែរៀបចំបើកដំណើរការរោងចក្រស៊ីម៉ងត៍ថ្មី ដ៏ទំនើបបំផុត ដែលមានទីតាំងស្ថិតនៅក្នុងស្រុកទូកមាស ខេត្តកំពត ជាមួយនឹងការចំណាយទុនទឹកប្រាក់ ចំនួន 262 លានដុល្លាអាមេរិក ដែលនឹងចាប់ផ្តើមដំណើរការចាប់ពី ខែវិច្ឆិកាឆ្នាំ 2017 នេះតទៅ។ រោងចក្រស៊ីម៉ងត៍របស់ក្រុមហ៊ុន ជីបម៉ុង អ៊ិនស៊ី ស៊ីមេន នេះនឹងក្លាយជារោងចក្រស៊ីម៉ងត៍ដែលធំជាងគេ និងទំនើបបំផុតដោយប្រើបច្ចេកវិទ្យាកម្រិតខ្ពស់បំផុតនៅតំបន់អាស៊ីអាគ្នេយ៍។ អតិថិជននឹងទទួលបានផលិតផលស៊ីម៉ងត៍ពីវត្ថុធាតុដើមដែលមានគុណភាពខ្ពស់បំផុតជាមួយនឹងប្រព័ន្ធគ្រប់គ្រងបច្ចេកវិទ្យាចុងក្រោយបង្អស់។
លោកឧកញ៉ាបន្ដថា ការវិនិយោគដ៏ធំរួមមួយនេះបានចាប់ផ្តើមឡើងនៅចុងឆ្នាំ 2015 ដោយក្រុមហ៊ុនជីបម៉ុង អ៊ិនស៊ី ស៊ីមេន ខបភើរេសិន បានច្របាច់បញ្ចូលគ្នារវាងទីផ្សារក្នុងស្រុក និងការចែកចាយទីផ្សាររបស់ក្រុមហ៊ុន ជីបម៉ុងគ្រុបកម្ពុជា ជាមួយនឹងក្រុមហ៊ុន ស៊ីម៉ងត៍ស្យាម របស់ថៃដែលជាអ្នកជំនាញ ខាងវិស័យសាងសង់ ជាច្រើនទសវត្សរ៍មកហើយ។ ការវិនិយោគរួមនេះ ផ្តល់ជំហរដ៏រឹងមាំបំផុតក្នុងការកំណត់នូវតម្រូវការ និងការចង់បានរបស់អតិថិជនដៃគូ ដែលជាជាងសំណង់ និងអ្នកសាងសង់ផ្ទះគ្រប់រូបនៅក្នុងទីផ្សារកម្ពុជា ដ៏គួរឱ្យចាប់អារម្មណ៍មួយនេះ។
លោកមានប្រសាសន៍ថា៖ «យើងចង់ឱ្យប្រជាជនកម្ពុជាបានស្គាល់កាន់តែច្បាស់ក៏ដូចជាធ្វើ ជាសាក្សីនូវគុណភាពដ៏រឹងមាំនៃស៊ីម៉ងត៍ដែលផលិតនៅក្នុងទឹកដីកម្ពុជា ស៊ីម៉ងត៍របស់យើងមានគុណភាពល្អមិនចាញ់ផលិតផលនាំចូលពីបរទេសដែរ។ វាជាស៊ីម៉ងត៍ដ៏រឹងមាំបំផុតមួយក្នុងស្រុកដែលជាទីមោទនភាពរបស់ប្រជាជនកម្ពុជាគ្រប់រូប »។
ចាប់ពីខែវិចិ្ឆកានេះតទៅ ប្រជាជនកម្ពុជាអាចចូលរួមធ្វើជាសាក្សីនៃគុណភាពដ៏រឹងមាំរបស់ស៊ីម៉ងត៍ ដែលផលិតក្នុងស្រុកបានហើយ។ ក្រុមការងាររបស់ក្រុមហ៊ុនជីបម៉ុងនឹងធ្វើដំណើរជុំវិញទីក្រុងភ្នំពេញ និងតាមបណ្តាលខេត្តមួយចំនួនក្នុងព្រះរាជាណាចក្រកម្ពុជា ចាប់ពីថ្ងៃទី 4 ខែកញ្ញា រហូតដល់ខែតុលា ឆ្នាំ 2017 ដើម្បីឱ្យអ្នកប្រើប្រាស់យល់កាន់តែច្បាស់នូវគុណភាពនៃស៊ីម៉ងត៍ដែលជាផលិតក្នុងស្រុកមួយនេះ។
នៅថ្ងៃទី 6 និងទី 7 ខែកញ្ញា នេះក្រុមការងារជំនាញរបស់ក្រុមហ៊ុន ជីបម៉ុង នឹងបន្តធ្វើដំណើរទៅជួបប្រជាជនកម្ពុជា នៅផ្សារអូឬស្សី និងផ្សារអូឡាំពិក ដោយមានការផ្តល់នូវព័ត៌មានពីផលិតផលថ្មីៗ ការលេងល្បែងកម្សាន្តដើម្បីយករង្វាន់ ព្រមទាំងកម្មវិធីសប្បាយៗជាច្រើនទៀត។ ប្រជាជនកម្ពុជាអាចចូលរួមពិសោធន៍គុណភាពស៊ីម៉ងត៍របស់កម្ពុជា ជាមួយក្រុមអ្នកជំនាញ និងការបង្ហាញនូវបច្ចេកទេសក្នុងការបូកស៊ីម៉ងត៍ឱ្យបានរលោងស្អាតហើយធានាគុណភាពកាន់តែជាប់បានយូរ៕
ក្រោយទទួលបានការគាំទ្រច្រើនពីសំណាក់អ្នកប្រើប្រាស់កម្ពុជា ក្រុមហ៊ុន Audi Cambodia កាលពីព្រឹកថ្ងៃទី4 ខែកញ្ញា ឆ្នាំ2017 នេះ បានធ្វើការណែនាំនូវរថយន្ត Audi Q5 ជំនាន់ទី 2 ដែលជារថយន្ត SUV ប្រភេទស្ព័រ និងមានការរចនាផ្ទៃខាងក្នុងយ៉ាងស្រស់ស្អាត ជាមួយនឹងកម្មវិធីកំណត់ប្រកបដោយបច្ចេកវិទ្យាខ្ពស់ Quattro។
ចំពោះរថយន្ត Audi Q5 ស៊េរីឆ្នាំ 2018 នេះ មាន 2 ប្រភេទ Sport និង Design lines បំពាក់នូវម៉ាស៊ីនចំនួន 4 ទំហំ 2.0 L TFSI និងប្រើនូវបច្ចេកវិទ្យា Quattro ដែលផ្ដល់នូវសុវត្ថិភាព និងបង្កលក្ខណៈងាយស្រួលដល់ការបើកបរ។ រថយន្តSUV ថ្មីនេះ ត្រូវបានបង្កើតឡើងជាមួយរូបរាងកាន់តែប្រណីត ស្ទើរតែដូចនឹងAudi Q7 ឆ្នាំ 2017 និងប្លែកពីរថយន្ត Audi Q5 កាលពីឆ្នាំទៅ ហើយមានលក្ខណៈស្រស់ស្អាតនៅពេលបើកបរលើដងផ្លូវ។
តាមការបញ្ជាក់ពីលោក Antoine Jeanson នាយកផ្នែកប្រតិបត្តិការនៃក្រុមហ៊ុន Audi Cambodia បានមានប្រសាសន៍ឱ្យដឹងថា រថយន្ត Audi Q5 2.0 TFSI Quattroត្រូវបានក្រុមហ៊ុនគិតគូរជាពិសេសសម្រាប់ស្ថានភាពផ្លូវនៅប្រទេសកម្ពុជា។ ដោយបច្ចេកវិទ្យា Quattroជាបច្ចេកវិទ្យាដ៏ទំនើបបំផុតពីក្រុមហ៊ុន Audi ដោយកង់រថយន្តទាំង 4 ដំណើរការព្រមគ្នា ប៉ុន្ដែវានឹងធ្វើកាផ្ដាច់ប៉ុងក្រោយចេញមួយ នៅពេលណាដែលមិនចាំបាច់ហើយនៅពេលចាំបាច់ វាអាចភ្ជាប់ឡើងវិញបានភ្លាមៗដែរ។ ក្នុងនោះ វាក៏មានមុខងារគ្រប់គ្រងស្ថានភាពផ្លូវ ប្រសិនបើកង់ណាមួយជាប់ផុង ឬរអិល Quattro នឹងបញ្ឈប់កង់នោះមិនឱ្យវិល ដោយឱ្យកង់ 3 ទៀតដំណើរការតែប៉ុណ្ណោះ។ ចំណុចនេះ វាធ្វើឱ្យរថយន្តមិនឃ្លោង ឬវៀចចេញពីផ្លូវឡើយ។
លោកបន្ដថា រថយន្ដ Audi Q5 ក៏មានបំពាក់ភ្លើង LED និងភ្លើងស៊ីញ៉ូបត់គ្រប់ម៉ូដស៊េរីថ្មី មាន Sensor សម្គាល់ពន្លឺ/ភ្លើង និងមុខងារបញ្ចេញពន្លឺយ៉ាងពិសេស សម្រាប់ការបត់ធម្មតា ការបត់លើផ្លូវកោង ផ្លូវមមាញឹក និងផ្លូវដែលមានអាកាសធាតុមិនល្អ។ ដោយឡែកចំពោះកម្លាំងម៉ាស៊ីន វាមានសម្ទុះពី 0 ទៅ 100 គម ក្នុងរយៈពេលត្រឹមតែ 6.3 វិនាទី។ មានកម្លាំងបញ្ចេញ 185 kW ស្មើនឹង 252 សេះ និងស៊ីសាំងត្រឹមតែ 6.8 លីត្រប៉ុណ្ណោះក្នុង 100 គ.ម។
បើប្រៀបធៀបជាមួយនឹងម៉ូដែលមុនៗ រថយន្ត Q5 ថ្មីទាំងអស់បានពង្រីកទំហំរបស់ខ្លួនដែលមានប្រវែង 4.66 ម៉ែត្រ ទទឹង 1.89 ម៉ែត្រ និងកម្ពស់ 1.66 ម៉ែត្រ និងមានគម្លាតពីកង់មុខទៅកង់ក្រោយប្រវែង 2.82 ម៉ែត្រ។ Audi បានកាត់បន្ថយទម្ងន់រថយន្ត 125 គីឡូក្រាមចេញ ឱ្យនៅសល់តែ 1,720 គីឡូក្រាមប៉ុណ្ណោះ។ Audi Q5 ឥឡូវមានតួរថយន្តស្រាលនៅគ្រប់ផ្នែករបស់ខ្លួន ហើយតួរបស់រថយន្តធ្វើឡើងអំពីដែកថែបដ៏រឹងមាំ និង ដែកអាលុយមីញ៉ូមដ៏ពិសេស។
កាន់តែអស្ចារ្យយ៉ាងខ្លាំងលើការបន្ថែមភាពរឹងមាំលើចំណុចផ្ទេរកម្លាំងពីប្រព័ន្ធហ្រ្វាំង និងម៉ាស៊ីន ទៅតួរថយន្តដែលធ្វើឱ្យការចាប់ហ្រ្វាំងប្រកបដោយ ឌីណាមិក និងរស់រវើក។ Q5 នៅតែស្ថិតក្នុងចំណាត់ថ្នាក់កំពូលលើឌីណាមិកខ្យល់របស់ខ្លួនក្នុងកម្រិត 0.30 ដែលមានដំបូលធ្វើឡើងជាលក្ខណៈឌីណាមិកខ្យល់។ សំឡេងខ្សល់គឺមានកម្រិតទាប ហើយកម្រិតរំញ័រខ្ពស់។ រថយន្ត SUV ស៊េរីថ្មីរបស់ Audi មិនបង្កឱ្យមានសំឡេងរំខាន ហើយធ្វើឱ្យអ្នកបើកបរ និងអ្នកដំណើរមានផាសុកភាពក្នុងការធ្វើដំណើរ។
លោក Antoine Jeanson ជានាយកផ្នែកប្រតិបត្តិការនៅកម្ពុជា បានមានប្រសាសន៍ថា “ត្រឹមតែពីរបីខែ ក្រោយការចាប់ផ្ដើមនៅទូទាំងពិភពលោករថយន្ដ Audi Q5 ស៊េរីថ្មីនេះ បានមកដល់ប្រទេសកម្ពុជាដើម្បីបន្តភាពជោគជ័យ Audi quattroនៅទីនេះ” និងបានគូសបញ្ជាក់ថា “យើងផ្ដល់ជូនតាមការសន្យារបស់យើងដើម្បីនាំយកម៉ូដែលចុងក្រោយរបស់ Audi ឱ្យបានកាន់តែឆាប់មកជូនអតិថិជននៅកម្ពុជា”។
រថយន្ត Audi Q5 នាំមកជាមួយនូវប្រព័ន្ធសំឡេង Audi។ ប្រព័ន្ធសំឡេង Bang & Olufsen ដែលមានសំឡេង 3D ដែលល្អប្លែកដាច់ពីគេ គឺជាប្រភពប្រព័ន្ធសំឡេងស្តង់ដារនៅក្នុងរថយន្ដប្រភេទ Sport និង Design lines ។ រថយន្ដ Audi Q5 ស៊េរីថ្មីបានមកដល់ទីក្រុងភ្នំពេញ នៅខែកញ្ញា ឆ្នាំ2017 ។ Audi Q5 នឹងផ្ដល់ជូនការធានារយៈពេលពីរឆ្នាំដោយមិនកំណត់រយៈចម្ងាយបើកបរ។ តម្លៃលក់របស់ Q5 2.0 TFSI Quattro ស៊េរីថ្មីនេះគឺមានតម្លៃចាប់ពី 89,800.00 ដុល្លារ៕
មិនបាច់ថ្លែងទេ ព្រោះនាង Veronica Shiu ពិតជាមានសម្រស់ស្រស់ផូរផង់ ប្រកបដោយកែវភ្នែកស្រទន់ និងទឹកមុខបង្កប់ភាពស្លូតបូត ដែលស្តែងចេញុយ៉ាងច្បាស់ពេលនាងបានទទួលមហាជោគជ័យក្នុងការគ្រងមកុដរាជិនីកំពូលសម្រស់ប្រចាំទីក្រុងហុងកុង ហើយអ្វីដែលធ្វើឲ្យអ្នកតាមដានគ្រប់គ្នាកាន់តែរំភើប និងមានមោទនភាពចំពោះរូបនាងទៀតនោះ គឺគ្រាន់តែចេញរូបភាពឈ្នះពានរង្វាន់ដ៏ធំធេងនេះភ្លាម នាងក៏បានថ្លែងអំណរគុណចំពោះប្រព័ន្ធបោះឆ្នោតថ្មីមួយ ដែលបានផ្តល់ភាពយុត្តិធម៌ពិតៗដល់ការប្រកួត។
ក្នុងចំណោមអ្នកបោះឆ្នោតទាំងអស់ចំនួនជាង 2០០,០០០ សំឡេង នាង Shiu តែម្នាក់ឯងទទួលបានរហូតដល់ទៅ 156,០០០សំឡេងទៅហើយ។ នាង Shiu វ័យ 24ឆ្នាំរូបនេះ ពិតជារីករាយខ្លាំងណាស់ ចំពោះលទ្ធផលដែលប្រកបដោយភាពយុត្តិធម៌ដែលទទួលបានពីប្រព័ន្ធបោះឆ្នោតជ្រើសរើសបែបថ្មីនេះគឺ «មនុស្សម្នាក់ ឆ្លោតមួយសន្លឹក ឬមួយសំឡេង» ដែលមានន័យថា អ្នកគាំទ្រម្នាក់អាចបោះឆ្នោតបានតែមួយសំឡេងប៉ុណ្ណោះ។
គួរបញ្ជាក់ផងដែរថា ជោគជ័យរបស់នាងកើតមានឡើងក្រោយពីគណៈកម្មការទាំងអស់ធ្វើការជ្រើសរើសបានបវរកញ្ញា7រូបចុងក្រោយ ក្នុងចំណោម ១០រូប ដើម្បីទទួលការបោះឆ្នោតគាំទ្រផ្តាច់ព្រ័ត្រតាមប្រព័ន្ធថ្មីពីប្រិយមិត្តនៅហុងកុងងឡាយ៕
ការវាយដំ ការស្តីបន្ទោស និងសកម្មភាពគំរាមកំហែង ជាទម្លាប់មិនល្អមួយដែលមនុស្សជំនាន់មុនតែងតែប្រើប្រាស់ដើម្បីអប់រំកូនៗ ឬគ្រូប្រើសម្រាប់ដាក់ទោសដល់សិស្សដើម្បីដាក់សម្ពាធឱ្យពួកគេខំរៀនជាដើម។
សកម្មភាពទាំងអស់នេះត្រូវបានអ្នកអប់រំភាគច្រើនមើលឃើញថា អាចបណ្តាលឱ្យប៉ះពាល់ធ្ងន់ធ្ងរដល់ការអភិវឌ្ឍខួរក្បាលរបស់សិស្ស ឬអាចធ្វើឱ្យពួកគេបាក់ស្មារតី មិនហ៊ានប្រឈមជាមួយនឹងបញ្ហា ហើយមិនចង់ទៅរៀន។ ផ្តើមចេញពីការប្រើប្រាស់ហិង្សា ក្មេងតូចៗក៏អាចក្លាយជាមនុស្សដែលចូលចិត្តប្រើហិង្សាដើម្បីដោះស្រាយបញ្ហាផងដែរនៅថ្ងៃអនាគត។
មានអាណាព្យាបាលជាច្រើនគិតថា គ្មានវិធីណាផ្សេងក្រៅពីការប្រើអំពើហិង្សានោះទេ ដើម្បីអប់រំកូន តែតាមពិតទៅមានវិធីសាស្ត្រជាច្រើន ដែលក្នុងនោះការដាក់ពិន័យតាមបែបវិជ្ជមាន ក៏ជាវិធីសំខាន់មួយដែលអាចជួយឱ្យក្មេងទទួលបានការផ្លាស់ប្តូរប្រកបដោយភាពវិជ្ជមាន។ ការដាក់ពិន័យដោយវិជ្ជមាននេះ ត្រូវបានក្រសួងអប់រំ យុវជន និងកីឡា បានសហការជាមួយនឹងអង្គការ UNICEF នៅកម្ពុជា ធ្វើការបណ្តុះបណ្តាលដល់គ្រូនៅសាលាបឋមសិក្សាចំនួន 172 នៅកម្ពុជា ក៏ដូចជាបណ្តុះបណ្តាលដល់នាយកសាលាផងដែរ។
យោងតាមការបង្ហាញរបស់ UNICEF បានឱ្យដឹងថា វគ្គបណ្តុះបណ្តាលនេះបានជួយឱ្យគ្រូនៅសាលាបឋមសិក្សាយល់ពីអត្ថន័យនៃអំពើហិង្សា និងពីផលប៉ះពាល់របស់វាលើសុខុមាលភាពកុមារទាំងក្នុងរយៈពេលខ្លី និងរយៈពេលវែង។ គ្រូក៏បានចាប់ផ្តើមប្រើប្រាស់វិធីសាស្ត្រនេះ ដើម្បីដាក់វិន័យលើសិស្ស និងគ្រប់គ្រងថ្នាក់រៀនតាមបែបវិជ្ជមាន ជំនួសឲ្យការប្រើប្រាស់អំពើហិង្សា ហើយគោលវិធីបែបនេះបានជួយបង្កើតនូវទំនាក់ទំនងកាន់តែល្អរវាងសិស្ស និងគ្រូផងដែរ។ ឧទាហរណ៍ សិស្ស និងគ្រូចេះបង្កើតបទបញ្ជាផ្ទៃក្នុងរួមគ្នាសម្រាប់ថ្នាក់រៀន ដែលកំណត់យ៉ាងច្បាស់ពីឥរិយាបថ ដែលចាត់ទុកថា សមស្រប និងមិនសមស្របនៅក្នុងថ្នាក់រៀន។ សិស្សច្រើនតែអនុវត្តទៅតាមបទបញ្ជាផ្ទៃក្នុងនេះ នៅពេលដែលពួកគេមានឱកាសចូលរួមយ៉ាងសកម្ម ក្នុងការរៀបចំការបង្កើតបទបញ្ជាផ្ទៃក្នុងទាំងនេះជាមួយនឹងគ្រូៗរបស់ពួកគេ៕
ភ្នំពេញៈ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈលោក អ៊ិត សំហេង បានថ្លែងថា វិវាទការងារក្នុងឆមាសទី1ឆ្នាំនេះមានចំនួន70ករណី ប៉ុន្តែដោះស្រាយបានចំនួនតិចតួចប៉ុណ្ណោះ។
លោករដ្ឋមន្ត្រីបានមានប្រសាសន៍ឲ្យដឹងក្នុងពិធីសិក្ខាសាលាពិគ្រោះយោបល់ត្រីភាគីស្តីពីសេចក្តីព្រាងច្បាប់ ស្តីពីនីតិវិធីជម្រះក្តី វិវាទការងារ នៅព្រឹកថ្ងៃទី4 ខែកញ្ញា ឆ្នាំ2017នេះថា ក្នុងឆមាសទី1 ឆ្នាំ2017 នាយកដ្ឋានវិវាទការងារ បានដោះស្រាយវិវាទបុគ្គលចំនួន70ករណី ដោះស្រាយបាន6ករណី មិនទាន់ដោះស្រាយបានចំនួន56ករណី និងមោឃៈចំនួន8ករណី និងដោះស្រាយវិវាទការងាររួមចំនួន15ករណី ដោះស្រាយបាន3ករណី និងមិនទាន់ដោះស្រាយបានចំនួន12ករណី។ ប៉ុន្តែយ៉ាងណាក៏ដោយ ការដោះស្រាយវិវាទការងារបានជួបប្រទះនូវបញ្ហាប្រឈមមួយចំនួនដែលត្រូវដោះស្រាយបន្ថែម ក្នុងនោះគឺបញ្ហាប្រឈមនឹងប្រព័ន្ធដោះស្រាយវិវាទការងារបច្ចុប្បន្នរបស់កម្ពុជា។
ទាក់ទងនឹងច្បាប់ថ្មីមួយដែលរៀបចំដោយក្រសួងការងារ និងអង្គការអន្តរជាតិខាងការងារ (ILO) លោក អ៊ិត សំហេង បានបញ្ជាក់ថា ច្បាប់នេះនឹងធានាក្នុងការផ្តល់យុត្តិធម៌លើបណ្តឹងការងារគ្រប់ប្រភេទដើម្បីការពារសិទ្ធិ និងផលប្រយោជន៍ស្របច្បាប់របស់ជនទាំងឡាយណាដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ និងធានាសុខដុមនីយកម្មក្នុងទំនាក់ទំនងវិជ្ជាជីវៈ បរិយាកាសល្អសម្រាប់ការវិនិយោគ និងបង្កើតការងារ។
លោក Alain Pelce អ្នកជំនាញការជាន់ខ្ពស់ផ្នែកច្បាប់ស្តីពីការងារនៃអង្គការអន្តរជាតិខាងការងារបានមានប្រសាសន៍ឲ្យដឹងផងដែរថា ច្បាប់នេះគឺជាលិខិតបទដ្ឋានគតិយុត្តថ្មីមួយទៀតដែលបង្កើតឲ្យមានជាប្រព័ន្ធដោះស្រាយវិវាទការងារមួយពេញលេញដែលរួមមានទាំងការជំនុំជម្រះរឿងក្តីការងារដោយតុលាការងារ ហើយការរៀបចំតាក់តែងសេចក្តីព្រាងច្បាប់នេះ គឺជាសមិទ្ធផលថ្មីមួយដែលនឹងរួមចំណែកក្នុងការពង្រឹងនីតិរដ្ឋ ការធានានូវភាពសុខដុមរមនានៃទំនាក់ទំនងវិជ្ជាជីវៈ ក៏ដូចជារួមចំណែកក្នុងការដោះស្រាយវិវាទការងារឲ្យកាន់ តែមានប្រសិទ្ធភាពបន្ថែមផងដែរ៕