ការទំនាក់ទំនងជាផ្នែកមួយដ៏សំខាន់ក្នុងជីវិតប្រចាំថ្ងៃរបស់មនុស្សម្នាក់ៗ ព្រោះថា ទំនាក់ទំនងមានឥទ្ធិពលលើគ្រប់ផ្នែកនៃការរស់នៅទាំងក្នុងគ្រួសារ ក្នុងក្រុមហ៊ុន ឬក្នុងស្ថាប័នដែលយើងធ្វើការ និងក្នុងសង្គម។
ជាទូទៅ គេមើលឃើញថា អ្នកដែលពូកែទំនាក់ទំនង គឺជាមនុស្សដែលពូកែនិយាយ ឬពូកែក្នុងការបង្ហាញអារម្មណ៍យល់ចិត្តដល់មនុស្សដទៃ ព្រមទាំងចេះទាញយកប្រយោជន៍ពីការជួយគ្នាទៅវិញទៅមករវាងខ្លួនគាត់ផ្ទាល់ និងមនុស្សដទៃទៀតផង។ ការមើលឃើញនេះ បានធ្វើឱ្យមនុស្សមួយចំនួនដែលមិនសូវពូកែនិយាយ (មិនសូវមាត់ មិនសូវក) ពីកំណើតហាក់មិនមានទឹកចិត្តក្នុងការទំនាក់ទំនង ព្រោះគាត់អាចគិតថា គាត់មិនពូកែនិយាយប្រហែលជាមិនអាចបង្កើតទំនាក់ទំនងល្អបាននោះទេ តែតាមពិតទៅ អ្វីដែលគាត់គិតនោះមិនប្រាកដថា ត្រឹមត្រូវទេ ព្រោះអ្នកពូកែទំនាក់ទំនងជាច្រើនបានលើកឡើងថា អ្នកមិនពូកែនិយាយក៏អាចពូកែទំនាក់ទំនងដែរ។
លោក សោម សម្បត្តិ នាយកប្រតិបត្តិនៃសហគ្រាសផលិតថ្នាំពណ៌ជាតិ Cam-Paint បានលើកឡើងថា ការទំនាក់ទំនងមិនប្រាកដថា ត្រូវនិយាយច្រើននោះទេ ព្រោះអ្នកទំនាក់ទំនងត្រូវការការបង្ហាញអារម្មណ៍ពិតទៅកាន់មនុស្សដែលយើងចង់ទាក់ទង ហេតុនេះចំណុចសំខាន់គឺការបង្ហាញភាពស្មោះត្រង់ទៅកាន់មនុស្សដទៃ។ ការបង្ហាញភាពស្មោះត្រង់ មិនមែនប្រាកដថា ត្រូវនិយាយច្រើននោះទេ តែត្រូវការសកម្មភាព និងការយកចិត្តទុកដាក់ទៅកាន់អ្នកដែលយើងចង់ទាក់ទងច្រើនជាង។
លោក សោម សម្បត្តិ បានមានប្រសាសន៍ថា៖ «ការទំនាក់ទំនងចាំបាច់បំផុតត្រូវការភាពស្មោះត្រង់។ ដូចជាអ្នកលក់ម្នាក់ ប្រសិនបើគ្មានផលិតផលល្អដើម្បីលក់ទេនោះ ទោះបីជាគាត់ពូកែនិយាយមើលទៅទំនងប៉ុនណាក៏ថ្ងៃក្រោយគេនឹងដឹងពីភាពពិត ហើយដាច់ទំនាក់ទំនងជាក់ជាមិនខាន តែប្រសិនបើអ្នកលក់ម្នាក់ទៀតមិនសូវពូកែនិយាយ តែគាត់មានភាពស្មោះត្រង់ ហើយមានការតស៊ូខ្ពស់ ដោយយកចិត្តទុកដាក់ខ្ពស់ដល់អតិថិជនគាត់នឹងអាចរក្សាទំនាក់ទំនងបានល្អ និងបានយូរ ព្រោះមនុស្សស្គាល់គ្នាយូរប្រាកដជាស្គាល់ចិត្ត ហើយមិនបាច់និយាយច្រើននោះទេ។ អ្វីដែលគេនិយាយគឺរឿងសាច់ការសុទ្ធតែម្តង»។
ស្រដៀងគ្នានេះដែរលោកឧកញ៉ា ជា ដែន អគ្គនាយករងសមាគមអ្នកទីផ្សារកម្ពុជាបានលើកឡើងថា ការទំនាក់ទំនងមានវិធីជាច្រើន មិនមែនគ្រាន់តែត្រូវប្រើសំដីនោះទេ។ ការបង្ហាញសកម្មភាព ការបង្ហាញទឹកមុខ និងការធ្វើរឿងរ៉ាវជាច្រើនទៀតសុទ្ធតែជាផ្នែកនៃទំនាក់ទំនង។
លោកឧកញ៉ា ជា ដែន បាននិយាយថា៖ «ការទំនាក់ទំនងមិនប្រាកដថា ត្រូវទាក់ទងដោយសំដីនោះទេ តែត្រូវការយកបេះដូងទៅទាក់ទង។ នៅកាលៈទេសៈខ្លះការចេះគួរសម និងសកម្មភាពយល់ចិត្ត ក៏ដូចជាការឱ្យតម្លៃដល់អ្នកដែលយើងចង់ទាក់ទងសុទ្ធតែ ជាអ្វីដែលយើងអាចធ្វើទៅបានសម្រាប់ការទំនាក់ទំនង»។
បង្ហាញលើចំណុចនេះដែរ លោក ហង្ស ព្រីនយ៉ា ស្ថាបនិកនៃពាណិជ្ជករឈានមុខបានលើកឡើងថា ក្រៅពីនិយាយ យើងអាចធ្វើការទំនាក់ទំនងដោយការសរសេរ Email ដើម្បីទាក់ទងទៅអ្នកដែលយើងចង់ទំនាក់ទំនង រួមទាំងវិធីជាច្រើនផ្សេងទៀតដែលសុទ្ធតែអាចឱ្យយើងបង្កើតចំណងទំនាក់ទំនងបានល្អ។
លោក ព្រីនយ៉ា បានលើកឡើងផងដែរថា ពេលខ្លះយើងត្រូវចេះប្តូរវិធីសាស្ត្រក្នុងការទំនាក់ទំនង ប្រសិនបើមិនពូកែនិយាយ យើងអាចពូកែសរសេរ ហើយការហ្វឹកហាត់សរសេរនេះ ក៏អាចធ្វើឱ្យមនុស្សណាម្នាក់យល់ពីយើង និងរក្សាទំនាក់ទំនងបានល្អផងដែរ ប្រសិនបើយើងមានភាពស្មោះត្រង់នៅក្នុងការទាក់ទងជាមួយនឹងគេ៕
