Category: សង្គម និងសេដ្ឋកិច្ច

ផ្ទុះកំហឹង!! ហេង នរៈកក្កដា តបតជាមួយ ម៉ៃ សុគន្ធ យ៉ាងកប់ៗៗ
ថ្ងៃទី 7 ខែកញ្ញា ឆ្នាំមុននេះបន្ដិចតារាសម្ដែង ហេង នរៈកក្កដា បានចេញសារតបតទៅតារាចម្រៀង ម៉ៃ សុគន្ធ វិញតាមរយៈ Facebook ផ្ទាល់របស់លោកយ៉ាងក្ដៅៗតែម្ដង។
ការប្រតិកម្មតបតនេះ បើតាមរយៈ Facebook របស់ ហេង នរៈកក្កដា បានសរសេរចំណងជើងតបតទៅវិញថា ក្ដៅៗ ហុយៗ ទៀតហើយ តែហុយម្តងនេះដូចជាចង់ឆេះមិចទេ សូមទស្សនា Video ទាំងអស់គ្នា ហើយ Videoនេះផ្ញើជូនដល់បងប្រុសកំពូលទើសលើលោក ម៉ៃ សុគន្ធ Big Big តែម្តងបាទ..! Pls share now ឈ្លោះជាមួយអ្នកល្បីមិនឈ្លោះ មកឈ្លោះជាមួយខ្ញុំបង ខ្ញុំអត់មានល្បីអីទេបងអ៊ើយ..! Oh ខ្ញុំភ្លេច បងប្អូនទាំងអស់គ្នា កុំជេគាត់ឈឺៗពេកណា ទុកមុខទុកមាត់អោយគាត់ខ្លះផង “។
គួរបញ្ជាក់ផងដែរថា នៅក្នុងវីដេអូឡាយផ្ទាល់របស់តារារូបនេះវិញ បានបោះពាក្យសម្ដីថា ឱ្យ ម៉ៃ សុគន្ធ យ៉ាងកប់តែម្ដង លោកថា “ចង់ល្បីខុសរឿងម្លេះ រាល់ថ្ងៃនេះបងឯងគិតអី បានជាដើរឈ្លោះគេ ដើរទើសគេគ្រប់គ្នានេះ ឥឡូវមកដើរទើសខ្ញុំទៀត” ។ ដើម្បីឱ្យកាន់តែច្បាស់សូមមើលខាងក្រោមនេះ៖
September 7, 2017
FlexWash ម៉ាស៊ីនបោកខោអាវទ្វារ 3ដំបូងគេពី Samsung
ក្រោយបញ្ចេញនូវម៉ាស៊ីនបោកគក់សម្លៀកបំពាក់ AddWash បំពាក់ទ្វារ2 កាលពីឆ្នាំទៅរួចមក ពេលនេះក្រុមហ៊ុន Samsung បានធ្វើការណែនាំផលិតថ្មី FlexWash™ មានទ្វារ3 ដំបូងគេក្នុងពិភពអេឡិចត្រូនិក ព្រមជាមួយនឹងការបំពាក់មុខងារសម្ងួតក្រោយពេលដំណើរការរួចរាល់ទៀតផង។
ម៉ាស៊ីនបោកគក់ FlexWash™ មានទ្វារចំនួន3 និងមានកន្លែងបោកគក់ 2 កន្លែងផ្សេងគ្នានេះ អាចដំណើរការក្នុងពេលតែមួយ ដែលក្រុមហ៊ុនបង្កើតឡើងសម្រាប់តម្រូវទៅតាមប្រភេទនៃសម្លៀកបំពាក់ ដោយទ្វារខាងមុខធំអាចបោកបាន 21 គីឡួក្រាម អាចបោកសម្លៀកបំពាក់បានច្រើន ហើយវាអាចផ្ទុកទឹកបានចំនួន 5 ម៉ែត្រគុប ស្មើនឹង141.50 លីត្រ។
បន្ថែមពីលើទ្វារធំមួយនោះ វានៅមានកូនទ្វារតូចមួយទៀតដែលចំណុចពិសេសរបស់វាគឺ យើងអាចទម្លាក់សម្លៀកបំពាក់ប្រឡាក់បន្ថែមទៀតចូលទៅបានក្នុងករណីដែលលោកអ្នកភ្លេច ឬចង់ដាក់បោកបន្ថែម នៅពេលដែលម៉ាស៊ីនកំពុងដំណើរការ ដូចនឹងស៊េរី AddWash ដែរ។ ដោយឡែកទ្វារខាងលើ អាចបោកសម្លៀកបំពាក់ក្នុងចំនួនសមល្មមដែលវាផ្ទុកទឹកបានទំហំ 1 ម៉ែត្រគុបស្មើនឹង 28.31លីត្រ ឬអាចបោកបាន 3.5 គីឡួក្រាម។
ចំណុចពិសេសមួយទៀត គឺម៉ាស៊ីន FlexWash™ មានដំណើរការស្ងាត់ ការបោកគក់រហ័ស សន្សំសំចៃភ្លើងបានច្រើន ការបោកសម្លៀកបំពាក់បានស្អាត និងស្ងួតល្អ ទោះបីជាមិនបានហាលថ្ងៃក៏ដោយ។ មួយវិញទៀត វាក៏មានបំពាក់បច្ចេកវិទ្យាបោកគក់ទំនើបៗចំនួន3 ដូចជា មុខងារបោកគក់បានយ៉ាងស្អាតដោយចំណាយពេលតិចជាងមួយម៉ោង (SuperSpeed™) មុខងារកម្ចាត់ស្នាមប្រទ្បាក់ដែលដិតជាប់ខ្លាំង (PowerFoam™) ប្រព័ន្ធរំញ័រមិនមានសំឡេងរំខាន (Vibration Reduction Technology) និងបច្ចេកវិទ្យា Digital Inverter Technology ដែលជួយឱ្យការប្រើប្រាស់បានយូរកាត់បន្ថយសំឡេងរំខាន និងអាចភ្ជាប់ជាមួយនឹងស្មាតហ្វូនដើម្បីតាមដានការដំណើរការ និងដាក់ពេលវេលាឱ្យម៉ាស៊ីនធ្វើការតាមរយៈទូរស័ព្ទពីគ្រប់ទីកន្លែង ហើយថែមទាំងមានការធានារហូតទៅដល់រយៈពេល10 ឆ្នាំទៀតផងទៅលើម៉ូទ័រ៕
វីដេអូ៖
https://www.youtube.com/watch?v=egVhTDZMyf0&feature=youtu.be
September 7, 2017
អ្នកវិនិយោគនឹងមិនទុកឱ្យអគារ Golden Tower 42 នៅជាប់គាំងដូច្នេះទេ
ភ្នំពេញ – គម្រោងអភិវឌ្ឍន៍ក្រោមទុនវិនិយោគ 240លានដុល្លារអាមេរិក Golden Tower 42 ដែលធ្លាប់តែទុកចោល រហូតគេគិតថា គម្រោងដ៍ធំដំបូងគេនៅក្នុងរាជធានីមួយនេះនឹងលែងដំណើរការ តែថ្មីៗនេះត្រូវបានមន្រី្ដជំនាញបញ្ជាក់ថា គេនឹងមិនទុកគម្រោងនេះឱ្យនៅជាប់គាំងបែបហ្នឹងទេ។
ពាក់ព័ន្ធគម្រោងនេះអគ្គនាយក និងជាប្រធានក្រុមប្រឹក្សាភិបាលនៃក្រុមហ៊ុន YONWOO CAMBODIA Co., Ltd. ដែលជាម្ចាស់គម្រោងមជ្ឈមណ្ឌលពាណិជ្ជកម្ម Gold Tower42 ក៏ធ្លាប់បានផ្ញើលិខិតផ្លូវការមួយដងជាពីរដងរួចមកហើយមកកាន់ទីស្ដីការក្រសួងរៀបចំដែនដី នគរូបនីយកម្ម និងសំណង់ដើម្បីស្នើសុំបន្តសាងសង់អគារនេះទ្បើងវិញនៅក្នុងខែកុម្ភៈ ឆ្នាំ2016 ប៉ុន្តែរហូតមកដល់ពេលនេះនៅតែមិនទាន់ឃើញមានដំណើរការអ្វីឡើយ។
ឯកឧត្ដម ឡៅ ទិព្វសីហា អនុរដ្ឋលេខាធិការនៃក្រសួងរៀបចំដែនដី នគរូបនីយកម្ម និងសំណង់ បានលើកឡើងថា គេមិនអាចទុកឱ្យគម្រោងដ៏ធំមួយនៅចំកណ្តាលរាជធានីភ្នំពេញស្ថិតនៅក្នុងស្ថានភាពបែបនោះទេ។ ឯកឧត្ដមបន្ដថា៖ «សូមបងប្អូនមេត្ដាជឿចុះ រឿងអគារ 42 ជាន់នេះគឺម្ចាស់គម្រោងនៅតែព្យាយាមខិតខំធ្វើឱ្យមានការអភិវឌ្ឍ អត់មានឈប់អ៊ីចឹងទេ ហើយក្រសួងក៏បានទទួលលិខិតរបស់ក្រុមហ៊ុនថា យ៉ាងនេះយ៉ាងនោះដែរ ប៉ុន្ដែយើងក៏បានធ្វើការឆ្លើយតបទៅវិញ ឱ្យក្រុមហ៊ុនធ្វើការអភិវឌ្ឍឆាប់ៗដើម្បីលើកកម្ពស់សោភ័ណភាពរាជធានីភ្នំពេញបន្ថែមទៀត»។
អនុរដ្ឋលេខាធិការបានបន្តទៀតថា អគារខ្ពស់ៗមួយចំនួននៅក្នុងរាជធានីភ្នំពេញក៏ត្រូវជាប់គាំងដែរព្រោះអគារមួយចំនួនត្រូវការកែតម្រូវប្លង់។ គម្រោងខ្លះទៀតត្រូវបានម្ចាស់ស្វែងរកដៃគូថ្មី អគារខ្លះទៀតពាក់ព័ន្ធផ្លូវច្បាប់។ អ៊ីចឹងហើយទើបធ្វើឱ្យអ្នកវិនិយោគទាំងក្នុងស្រុក និងក្រៅស្រុកត្រូវតែសិក្សាឱ្យច្បាស់លាស់ទើបគេដំណើរការទៅមុខទៀត។ ទោះជាយ៉ាងនេះក្ដី គម្រោង Gold Tower42 ដែលទុកចោលរាប់ឆ្នាំនេះ គេពុំទាន់បានដឹងច្បាស់ពីមូលហេតុនៃការផ្អាកការសាងសង់នៅឡើយទេ។
ឯកឧត្ដម ឡៅ ទិព្វសីហា បញ្ជាក់ថា មិនអាចបញ្ជាក់ពីឧបសគ្គដែលធ្វើឱ្យក្រុមហ៊ុនត្រូវបានផ្អាកដំណើរការនេះឡើយ ប៉ុន្ដែឯកឧត្ដម រំពឹងថា ដំណើរការអភិវឌ្ឍន៍គម្រោងនឹងកើតឡើងនៅឆ្នាំក្រោយ។
ទោះជាគម្រោងនេះត្រូវទុកចោលរាប់ឆ្នាំមិនទាន់ដំណើរការទៀតក៏ដោយ ក៏ត្រូវបានឯកឧត្ដម ឡៅ ទិព្វសីហា បញ្ជាក់ថា គម្រោងនេះក៏មានក្រុមហ៊ុនថែទាំសោភ័ណភាព និងគុណភាពនៃសំណង់អគារទាំងមូលឱ្យរក្សាបានភាពយូរអង្វែងដែរដោយមិនទុកឱ្យវាទ្រុឌទ្រោមទៅតាមពេលវេលានោះឡើយ។ គម្រោង Gold Tower42 ជាអតីតគម្រោងអគារខ្ពស់ជាងគេនៅរាជធានីភ្នំពេញ ដែលបានផ្អាកការសាងសង់នៅចុងឆ្នាំ 2008 និងបានចាប់ផ្តើមឡើងវិញនៅឆ្នាំ 2010 ដែលបានសាងសង់រហូតដល់ជាន់ទី32 និងបន្ទាប់មកក៏បានផ្អាករហូតមកទល់ពេលនេះ៕
September 7, 2017
ឈុតរតន៍រំដួលរបស់ រំដួលលិចទឹក កក្រើកកម្មវីធីធំមួយនៅភ្នំពេញ
តាមរយៈ Facebook Page រំដួលលិចទឹក បានឱ្យដឹងថា កម្មវិធី មួយម៉ឺនអាល័យ លើកទី2 ជាកម្មវិធីធំមួយដើម្បីចូលរួមអភិរក្សខ្សែភាពយន្តខ្សែពីជំនាន់ដើមដែលជាមរតកមានតម្លៃរបស់ខ្មែរ និងជាកម្មវិធីស្នាដៃ និងសិល្បៈលើកទី 5 ក្រោមប្រធានបទ «គាំទ្រល្ខោនខោលខ្មែរ»។
ជាការចូលរួមចំណែកមួយដែរ កញ្ញា រំដួលលិចទឹក បានបញ្ចេញចំណាប់អារម្មណ៍ថា “នាងខ្ញុំពិតជាមានក្តីរំភើបពេកក្រៃ សម្រាប់ការផ្តល់កិត្តិយសឱ្យរូបនាងខ្ញុំបានចូលរួមសម្តែងក៏ដូចជាបង្ហាញស្នាដៃសិល្បៈដែលច្នៃប្រឌិតចេញពីស្លឹកទ្រាំង និងស្លឺកត្នោតខ្មែរ”។
តារាបង្ហាញម៉ូដរូបនេះបានបញ្ជាក់បន្ថែមថា “ឈុតនេះមានឈ្មោះថា រតន៍រំដួល ជាតំណាងឱ្យឈ្មោះ រំដួលលិចទឹកនេះតែម្តង ជាពិសេសឈុតនេះគឺមានការចូលរួមច្នៃដោយបងប្រុស អ៊ិត សុទ្ធា និងនាងខ្ញុំផ្ទាល់ដៃ។ ជាចុងក្រោយខ្ញុំម្ចាស់ នាងខ្ញុំសូមលើកម្រាមដៃដប់ សូមក្រាបថ្វាយអំណរព្រះគុណយ៉ាងជ្រាលជ្រៅបំផុតថ្វាយដល់ ព្រះអង្គម្ចាស់ក្សត្រីយ៍សម្តេចព្រះរាម នរោត្តម បុប្ផាទេវី ដែលទ្រង់សព្វព្រះហឬទ័យ ហើយយាងមកសួរសុខទុក្ខ និងទ្រង់បានព្រះប្រទានក្តីសរសើរដល់រូបខ្ញុំម្ចាស់ដោយផ្ទាល់ ខ្ញុំម្ចាស់ពិតជាមានក្តីរំភើបឥតឧបមា”៕

September 7, 2017
Song Joong Ki ដឹកដៃ ហាន់ ជីអ៊ុន ទៅថត Pre Wedding នៅអាមេរិក
នៅថ្ងៃទី7 ខែកញ្ញា ឆ្នាំ 2017 សារព័ត៌មានកូរ៉េបានចេញផ្សាយឱ្យដឹងថា តារាសម្ដែង Song Joong Ki និង Song HyeKyo (ហៅ ហាន់ ជីអ៊ុន) បានធ្វើដំណើរទៅកាន់សហរដ្ឋអាមេរិកក្នុងការថតកម្រងរូបថតត្រៀមអាពាហ៍ពិពាហ៍នៅព្រលានយន្ដហោះ និងក្នុងទីក្រុង Los Angeles។
គួររំឭកផងដែរថា កាលពីថ្ងៃទី3 ខែកញ្ញា ឆ្នាំ2017 គូស្នេហ៍មួយគូនេះបានហោះហើរទៅកាន់ទីក្រុង San Francisco នៃរដ្ឋ California ម្ដងរួចមកហើយដើម្បីប្រកាសទីតាំង និងកាលបរិច្ឆេទថ្ងៃរៀបការនៅក្នុងអំឡុងខែតុលាខាងមុខនេះ។ បើតាមប្រភពស្និទ្ធជាមួយតារាពីរដួងនេះបានប្រាប់សារព័ត៌មានកូរ៉េថា ពួកគេទាំងពីរបានធ្វើដំណើរជាមួយក្រុមផាត់មុខ និងជាងថតរូបល្បីឈ្មោះ Hong Jang Hyun។
គួរបញ្ជាក់ផងដែរថា អ្នកជំនាញថតរូបល្បីឈ្មោះលំដាប់អន្តរជាតិ Hong Jang Hyun ធ្លាប់បានថតរូបឱ្យគូស្នេហ៍តារាពីរគូរួចមកហើយគឺ Bae Yong Joon ជាមួយ Park Soo Jin និងគូ Lee Hyori ជាមួយ Lee Sang Soon៕
September 7, 2017
ជំនន់ទំនាក់ទំនងអាចធ្វើឱ្យមនុស្សមានបញ្ហា តែយើងអាចទប់ស្កាត់បាន
ការទំនាក់ទំនងជារឿងសំខាន់សម្រាប់មនុស្ស ជាពិសេសគឺអ្នករកស៊ីដែលត្រូវការជាចាំបាច់ដើម្បីផ្តល់ឱ្យ និងទាញយកផលប្រយោជន៍ពីដៃគូអាជីវកម្ម និងអតិថិជនរបស់ខ្លួន។
ទោះជាការទំនាក់ទំនងមានសារៈសំខាន់យ៉ាងណាក៏ដោយ តែជាទូទៅវាក៏ផ្តល់នូវផលអវិជ្ជមានមកកាន់មនុស្សផងដែរ ប្រសិនបើមនុស្សម្នាក់មានទំនាក់ទំនងជាមួយនឹងមនុស្សប្រភេទផ្សេងគ្នាច្រើនឡើងៗ ព្រោះដើម្បីរក្សាទំនាក់ទំនងយើងត្រូវកាត់បន្ថយពេលវេលាផ្ទាល់ខ្លួន និងគ្រួសារ ដែលវាអាចធ្វើឱ្យជីវិតមានបញ្ហាបាន។
លោក សោម សម្បត្តិ នាយកប្រតិបត្តិនៃសហគ្រាសផលិតថ្នាំពណ៌ជាតិ Cam-Paint បានលើកឡើងថា នៅពេលដែលទំនាក់ទំនងជាមួយមនុស្សកាន់តែកើនឡើង វានឹងក្លាយជាជំនន់នៃទំនាក់ទំនង ហើយរឿងនេះអាចប៉ះពាល់ដល់ជីវិតប្រចាំថ្ងៃរបស់យើង។ ហេតុនេះយើងត្រូវមានវិធានការដើម្បីដោះស្រាយវា។ កត្តាសំខាន់ដែលត្រូវធ្វើគឺ ត្រូវបែងចែកប្រភេទនៃការទំនាក់ទំនងឱ្យបានច្បាស់លាស់ ហើយកំណត់ពីជំពូកមនុស្សដែលត្រូវទាក់ទងដោយផ្ទាល់ និងមនុស្សដែលត្រូវទាក់ទងដោយប្រយោល។
លោក សោម សម្បត្តិ បាននិយាយថា៖ «មនុស្សម្នាក់អាចមានទាក់ទងមនុស្សច្រើនបាន តែអាចស្និទ្ធជាមួយមនុស្សក្នុងចំនួនតិចតួចល្មមបានហើយ ព្រោះជីវិតយើងគ្មានចន្លោះសម្រាប់ដាក់មនុស្សច្រើនពេកនោះទេ»។
បើតាមលោក សោម សម្បត្តិ អ្នកដែលពូកែទំនាក់ទំនង ហើយមិនមានបញ្ហាដល់ជីវិតត្រូវចេះមើលកាលៈទេសៈ ហើយក៏ជាអ្នកដែលមានភាពប៉ិនប្រសប់។ យើងត្រូវមើលឱ្យឃើញពីពពួកមនុស្សប្រមាណ 20% ដែលមានឥទ្ធិពលដល់អាជីវកម្ម 80% ហើយធ្វើការទាក់ទងដោយផ្ទាល់ ព្រោះគាត់ជាផ្នែកសំខាន់មិនអាចខ្វះបាន តែចំពោះមនុស្ស 80% ទៀតដែលមានឥទ្ធិពលសម្រាប់អាជីវកម្មត្រឹមតែ 20% វិញ គឺយើងអាចធ្វើការទំនាក់ទំនងដោយប្រយោល ដូចជាការទុកតួនាទីឱ្យអ្នកគ្រប់គ្រងបន្តបន្ទាប់ចាត់ចែងដោយយកចិត្តទុកដាក់ទៅតាមការទទួលខុសត្រូវរៀងៗខ្លួន ព្រោះមនុស្សម្នាក់មិនអាចមើលបុគ្គលិកគ្រប់គ្នាដល់ទៅរាប់រយ រាប់ពាន់អ្នកនោះទេ៕
September 7, 2017
ញាប់ញ័រ!! CL បញ្ចេញស្ទីលអត់ពាក់អាវក្នុង
កាលពីថ្ងៃទី5 ខែកញ្ញា តារាចម្រៀង CL ជាអតីតសមាជិកក្រុមចម្រៀងស្រី 2NE1 បានធ្វើឲ្យអ្នកដែលចូលរួមទស្សនានៅក្នុងកម្មវិធីនាទីក្រុង ហុងកុង ទាំងអស់ផ្តោតអារម្មណ៍យ៉ាងខ្លាំងទៅលើរូបនាង ខណៈដែលតារាស្រីរូបនេះបានបង្ហាញម៉ូដអាវដែលមិនមានអាវទ្រនាប់ធ្វើឱ្យលេចចេញក្បាលសុដន់។ នេះបើតាមប្រភពព័ត៌មាន kenh14 ដែលបានចេញផ្សាយកាលពីប៉ុន្មានម៉ោងមុននេះ។
ការបង្ហាញស្ទីលថ្មីរបស់នាង CL លើកនេះ មើលទៅហាក់ដូចជាស្ត្រីមានវ័យចំណាស់ 40 ឆ្នាំប្លាយ សូម្បីតែការផាត់មុខ និងម៉ូដសក់របស់នាងនៅក្នុងថ្ងៃកម្មវិធីធំនោះក៏មើលទៅប្លែកដែរ។ គួរបញ្ជាក់ផងដែរថា ក្រៅពីការបង្ហាញឈុតព័ណ៌ស្លាបកំភេមនេះហើយ តារាស្រីរូបនេះបានតាំងចិត្តយ៉ាងមុតមាំក្នុងការប្រកាសប្រាប់ពីព័ត៌មានលម្អិតថា នាងបានក្លាយជាតារាចម្រៀងអាមេរិកាំងហើយ៕
September 7, 2017
ធនាគារ CIMB បើកសម្ពោធសាខាថ្មី1ទៀតដើម្បីផ្តល់សេវាកម្មឱ្យកាន់តែងាយស្រួល
ភ្នំពេញ៖ ធនាគារស៊ីអាយអឹមប៊ី ភីអិលស៊ី បានសហការជាមួយធនាគារជាតិនៃកម្ពុជា បើកសម្ពោធសាខាថ្មីរបស់ខ្លួនមួយបន្ថែមទៀតដែលជាសាខាទី13នៅសង្កាត់ទឹកថ្លា ខណ្ឌសែនសុខ រាជធានីភ្នំពេញដើម្បីបម្រើសេវាកម្មជូនអតិថិជនឱ្យបានកាន់តែល្អប្រសើរ។
ថ្លែងក្នុងពិធីសម្ពោធនេះលោក ប៊ុន យីន ប្រធាននាយកប្រតិបត្តិនៃធនាគារស៊ីអាយអឹមប៊ី ភីអិលស៊ីមានប្រសាសន៍ថា ធនាគារស៊ីអាយអឹមប៊ីសម្រេចបានជោគជ័យក្នុងការកសាងនូវគ្រឹះស្ថានមួយដែលពោរពេញដោយបុគ្គលិកក្នុងស្រុកដ៍មានទេពកោសល្យចំនួន 99.70% គឺជាជនជាតិខ្មែរ គិតចាប់ពីគណៈគ្រប់គ្រងជាន់ខ្ពស់រហូតដល់បុគ្គលិកទូទៅ។
ការប្តេជ្ញាចិត្តចំពោះគោលដៅយូរអង្វែងរបស់ធនាគារក្នុងការរួមចំណែកលើកកម្ពស់សមត្ថភាពផ្នែកធនាគាររបស់បុគ្គលិកជនជាតិខ្មែរ គឺស្ថិតនៅជាអាទិភាពចម្បងដ៍សំខាន់បំផុត ហើយយើងសង្ឃឹមជឿជាក់ថា អាចដើរតួនាទីយ៉ាងសំខាន់ក្នុងការកសាងអ្នកជំនាញផ្នែកធនាគារជំនាន់ក្រោយនៅក្នុងប្រទេស។
លោកបន្តថា ស៊ីអាយអឹមប៊ី ក៍ជាផ្នែកមួយនៃការទទួលខុសត្រូវសង្គមតាមរយៈការជួយត្រឡប់ទៅដល់សហគមន៍ដែលយើងបានប្រកបអាជីវកម្ម ក្នុងនោះធនាគារ ស៊ីអាយអឹមប៊ី បានរៀបចំយ៉ាងជោគជ័យនូវគម្រោង «សុខភាពល្អជាមួយស៊ីអាយអឹមប៊ី» នៅតាមសាលារៀនដាច់ស្រយាល ដែលជួបការលំបាកដើម្បីលើកកម្ពស់សារៈសំខាន់នៃជីវិតរស់នៅប្រកបដោយសុខភាពល្អសម្រាប់ឧត្តមភាពការសិក្សានាពេលអនាគត។ ក្រៅពីនេះយើងបានលើកទឹកចិត្តដល់និស្សិតកម្ពុជាផងដែរក្នុងការដាក់ពាក្យសម្រាប់កម្មវិធីអាហារូបករណ៍តំបន់អាស៊ានរបស់ស៊ីអាយអឹមប៊ី និងមានមោទនភាពក្រៃលែងដែលនិស្សិតរបស់កម្ពុជាមួយរូប ត្រូវបានជ្រើសរើសជាមួយនឹងនិស្សិត15 រូបទៀតមកពីអាស៊ានក្នុងនាមជានិស្សិតជយលាភីអាហារូបករណ៍តំបន់អាស៊ានរបស់ស៊ីអាយអឹមប៊ីសម្រាប់ការសិក្សានៅសាកលវិទ្យាល័យក្នុងប្រទេសកាណាដា។
ផ្អែកលើកំណើនអតិថិជន រួមនឹងសក្តានុពលនៃការរីកចម្រើនសេដ្ឋកិច្ចរបស់កម្ពុជា យើងបានប្តេជ្ញាចិត្តយ៉ាងមុតមាំក្នុងការជួយអតិថិជនឱ្យទទួលបានអត្ថប្រយោជន៍នេះដើម្បីភាពជោគជ័យក្នុងអាជីវកម្មរបស់ខ្លួន «ការបើកសម្ពោធសាខាទឹកថ្លាថ្មីរបស់យើងគឺដើម្បីឈានឱ្យកាន់តែជិត ហើយអាចផ្តល់នូវសេវាកម្មកាន់តែល្អប្រសើរ និងការរីកចម្រើនស្ថិតស្ថេរយូរអង្វែង»។
ជាមួយគ្នានេះដែរ លោក រ័ត្ន សុវណ្ណរនៈ តំណាងធនាគារជាតិនៃកម្ពុជាមានប្រសាសន៍ថា ជាមួយនឹងកំណើនសេដ្ឋកិច្ច7% ជារៀងរាល់ឆ្នាំបានធ្វើឱ្យវិស័យធនាគារមានការរីកលូតលាស់ឆាប់រហ័សដែលធ្វើឱ្យទ្រព្យសកម្មក្នុងវិស័យធនាគារកើនឡើង 20% ស្មើនឹង125%នៃផលិតផលក្នុងស្រុកសរុប ចំណែកប្រាក់បញ្ញើបានកើនឡើង22% ស្មើនឹង74% នៃផលិតផល ក្នុងស្រុកសរុប រីឯឥណទានកើនឡើងប្រមាណជា18% បើធៀបនឹងរយៈពេលដូចគ្នាក្នុងឆ្នាំ2016។ ដោយឡែកចំពោះស្ថានភាពហិរញ្ញវត្ថុរបស់ធនាគារស៊ីអាយអឹមប៊ី ភីអិលស៊ី ក៏កំពុងមានភាពល្អប្រសើរផងដែរតាមរយៈកំណើននៃទ្រព្យសកម្ម កំណើនឥណទាន និងកំណើនប្រាក់ចំណេញរបស់ខ្លួន៕
September 7, 2017
កម្ពុជាចុះអនុស្សរណៈយោគយល់គ្នាជាមួយចិនពង្រឹងលើវិស័យកម្មសិទ្ធិបញ្ញា
ភ្នំពេញ៖ ក្នុងការពង្រឹងវិស័យកម្មសិទ្ធិបញ្ញា និងការកសាងម៉ាកយីហោ ក្រសួងពាណិជ្ជកម្ពុជាបានចុះអនុស្សារណៈយោគយល់គ្នា (MoU) ជាមួយរដ្ឋបាលជាតិឧស្សាហកម្ម និងពាណិជ្ជកម្មនៃសាធារណរដ្ឋប្រជាមានិតចិន។
ពិធីនេះប្រព្រឹត្តទៅក្រោមគណៈអធិបតីភាពឯកឧត្តម អ៊ុក ប្រជា រដ្ឋលេខាធិការក្រសួងពាណិជ្ជកម្ម និងឯកឧត្តម ម៉ា ហ្សិងគី (Ma Zhengqi) អនុរដ្ឋមន្ត្រីនៃរដ្ឋបាលជាតិឧស្សាហកម្ម និងពាណិជ្ជកម្មនៃសាធារណរដ្ឋប្រជាមានិតចិនក្នុងគោលបំណងនៃការផ្តួចផ្តើមឱ្យមានការពង្រឹង និងពង្រីកកិច្ចសហប្រតិបត្តិការឱ្យបានកាន់តែទូលំទូលាយដោយឈរលើមូលដ្ឋានស្មើភាព និងផ្តល់ប្រយោជន៍ឱ្យគ្នាទៅវិញទៅមកលើវិស័យម៉ាក និងម៉ាកសម្គាល់ភូមិសាស្ត្រទំនិញ ព្រមទាំងជំរុញការកសាងម៉ាកកាន់តែច្រើននៅក្នុងប្រទេសកម្ពុជា និងចិន។
អនុស្សរណៈនេះក៏មានគោលបំណងធ្វើឱ្យប្រសើរឡើងនូវការអនុវត្តកម្មសិទ្ធិបញ្ញាតាមរយៈការគាំពារផលប្រយោជន៍អ្នកប្រើប្រាស់ និងផលិតករឱ្យកាន់តែមានប្រសិទ្ធភាព ខណៈពេលដែលប្រទេសកម្ពុជាត្រូវបានគេមើលឃើញថា មានភាពទន់ខ្សោយនៅឡើយចំពោះការទប់ស្កាត់ការលួចបន្លំ។
តាមរយៈអនុស្សរណៈនេះដែរ ប្រទេសទាំងពីរនឹងធ្វើការចែករំលែកលិខិតបទដ្ឋានគតិយុត្តពាក់ព័ន្ធកម្មសិទ្ធិបញ្ញា ព្រមទាំងធ្វើទស្សនកិច្ចសិក្សាពីគ្នាទៅវិញទៅមកដើម្បីដកស្រង់បទពិសោធនៅលើវិស័យកម្មសិទិ្ធបញ្ញា និងការពង្រឹងកិច្ចការពារម៉ាកពាណិជ្ជកម្ម។
លើសពីនេះប្រទេសចិនក៏នឹងជួយបណ្តុះបណ្តាលធនធានមនុស្សលើផ្នែកត្រួតពិនិត្យម៉ាកដល់ប្រទេសកម្ពុជា និងជួយជំរុញឱ្យមានការតាំងពិព័រណ៍ផលិតផលខ្មែរក៏ដូចជាការកសាងម៉ាកយីហោរបស់កម្ពុជានៅលើទីផ្សារអន្តរជាតិបន្ថែមទៀត៕
September 7, 2017
រោងចក្រផលិតអគ្គិសនីពីពន្លឺព្រះអាទិត្យដំបូងគេរបស់កម្ពុជា លេចចេញជារូបរាងហើយ
រោងចក្រផលិតអគ្គិសនីទាញចេញពីពន្លឺព្រះអាទិត្យនៅខេត្តស្វាយរៀងដ៏ធំដំបូងគេរបស់កម្ពុជា ក្រោមការវិនិយោគរបស់ក្រុមហ៊ុន Sunseap Group ប្រទេសសិង្ហបុរីបានលេចចេញជារូបរាងហើយកាលពីដើមខែកញ្ញា ឆ្នាំ 2017នេះ។
ឧទ្យានថាមពលពន្លឺព្រះអាទិត្យនេះ ធ្វើឡើងលើផ្ទៃដី 21 ហិកតាដោយចំណាយទឹកប្រាក់អស់ប្រមាណ 14 លានដុល្លារ និងអាចផលិតថាមពលបានក្នុងទំហំ 10 មេហ្គាវ៉ាត់ (MK) បានចាប់ផ្តើមដំណើរការហើយនៅទីក្រុងបាវិត ខេត្តស្វាយរៀង ហើយនឹងបង្កើនថាមពលបន្ថែមនៅឆ្នាំក្រោយ។ គម្រោងមួយនេះ បានកើតឡើងក្រោយពីមានការគាំទ្រពីធនាគារអភិវឌ្ឍន៍អាស៊ីក្នុងការផ្តល់ប្រាក់កម្ចីជាទឹកប្រាក់ 9,2 លានអឺរ៉ូដល់ក្រុមហ៊ុន Sunseap Group ដែលមានមូលដ្ឋាននៅប្រទេសសិង្ហបុរី។
កញ្ចប់ហិរញ្ញប្បទានដែលត្រូវបានផ្តល់ដោយនាយកដ្ឋានប្រតិបត្តិការវិស័យឯកជនរបស់ធនាគារអភិវឌ្ឍន៍អាស៊ីរួមបញ្ចូលទាំងការផ្តល់សហហិរញ្ញប្បទានពីស្ថាប័នហិរញ្ញវត្ថុវិស័យឯកជនតាមរយៈកម្មវិធីឥណទានខ្នាតតូចបំផុតរបស់ ADB និងកម្ចីសម្បទានពីមូលនិធិអាកាសធាតុកាណាដាសម្រាប់វិស័យឯកជននៅអាស៊ី (CFPS) ។ កម្ចីរបស់ CFPS មានសារៈសំខាន់ក្នុងការជួយដល់អ្នកឧបត្ថម្ភដើម្បីជម្នះនូវហានិភ័យនៃការផ្លាស់ប្តូរដើមដំបូង និងបុព្វលាភចំណាយដែលត្រូវបានផ្សារភ្ជាប់ជាមួយនឹងគម្រោងទីមួយនៃប្រភេទនេះ។
ឯកឧត្តម កែវ រតនៈ ប្រតិភូរាជរដ្ឋាភិបាលទទួលបន្ទុកជាអគ្គនាយកអគ្គិសនីកម្ពុជា បានប្រាប់សារព័ត៌មានក្នុងស្រុកមួយក្នុងដំណើរចុះពិនិត្យដំណើការនៃគម្រោងឧទ្យានថាមពលនោះឱ្យដឹងថា រោងចក្រថាមពលពន្លឺព្រះអាទិត្យនេះ គឺជាគម្រោងថាមពលស្អាតមិនប៉ះពាល់ដល់បរិស្ថាន ហើយគម្រោងនេះបង្ហាញឱ្យឃើញនូវការបោះជំហានថ្មីមួយទៀតរបស់ប្រទេសកម្ពុជាក្នុងការទាញថាមពលអគ្គិសនីពីធម្មជាតិ បន្ទាប់ពីការទាញថាមពលពីវារីអគ្គិសនី។
ឯកឧត្តមក៏បានបញ្ជាក់ផងដែរថា គម្រោងនេះជាចំណែកមួយនៅក្នុងគោលនយោបាយពង្រីកថាមពល របស់រាជរដ្ឋាភិបាលកម្ពុជា ក្រោមការដឹកនាំដោយសម្តេចអគ្គមហាសេនាបតីតេជោ ហ៊ុន សែន ដែលមានទិសដៅតែមួយគឺ ធ្វើយ៉ាងណាឱ្យប្រជាជនគ្រប់ភូមិទាំងអស់នៅក្នុងប្រទេសកម្ពុជាមានភ្លើងអគ្គិសនីប្រើប្រាស់ឱ្យបានកាន់តែឆាប់។ ក្រុម Sunseap នឹងធ្វើការលក់ថាមពលទៅឱ្យអគ្គិសនីកម្ពុជាក្នុងតម្លៃទាប ក្នុងរយះពេល 20 ឆ្នាំ ហើយបន្ទាប់ពីជោគជ័យ អគ្គិសនីកម្ពុជានឹងសិក្សាគម្រោងឧទ្យានថាមពលពន្លឺព្រះអាទិត្យធំមួយទៀត ដែលមានទីតាំងនៅក្បែរៗរាជធានីភ្នំពេញវិញម្ដង៕
September 7, 2017