សង្គម និងសេដ្ឋកិច្ច - La Reine Media

ងាយៗ ដើម្បីផ្ទេរទិន្នន័យពីទូរស័ព្ទ iPhone ចាស់ទៅកាន់ iPhone 7 តាមរយៈ iCloud

និយាយពីរឿងផ្ទេរទិន្នន័យរវាងទូរស័ព្ទ iPhone វិញ អ្នកប្រើប្រាស់មួយចំនួននៅតែជួបបញ្ហា ដោយអ្នកខ្លះនៅតែទៅរកអ្នកជំនាញ ឬតាមហាងឱ្យគេជួយ ពេលដែលខ្លួនប្ដូរទូរស័ព្ទថ្មី បើទោះបីជាក្រុមហ៊ុន Apple បានផ្ដល់នូវជម្រើសនៃការផ្ទេរទិន្នន័យជាច្រើនឱ្យហើយក៏ដោយ។

សម្រាប់ថ្ងៃនេះ ឡារ៉ែន សូមលើកពីវិធីសាស្ដ្រមួយ ដែលធ្វើឱ្យប្រិយមិត្តទាំងអស់គ្នាមានភាពងាយស្រួលក្នុងការផ្ទេរទិន្នន័យ ពីទូរស័ព្ទ iPhone ចាស់ទៅ iPhone 7 តាមរយៈប្រព័ន្ធ iCloud ដែលផ្ដល់សុវត្ថិភាពខ្ពស់។
ដោយនៅលើទូរស័ព្ទ iPhone ចាស់លោកអ្នកត្រូវ៖

បើកដំណើរការ Wi-Fi លើទូរស័ព្ទ iPhone ស៊េរីចាស់
បន្ទាប់មក សូមចូលទៅកាន់ Settings
បន្ទាប់មកទៀត ចុចលើ iCloud
ចុចលើ Backup
ចុចលើ Backup Now
ពេលដែលការ Backup ត្រូវបានបញ្ចប់ សូមបិទទូរស័ព្ទ iPhone ចោល
ដោះស៊ីមចេញពីទូរស័ព្ទ iPhone ចាស់ ហើយដាក់ចូលទូរស័ព្ទថ្មី

លើទូរស័ព្ទ iPhone 7

ដាក់ស៊ីមចូលក្នុងទូរស័ព្ទ iPhone 7
បើកទូរស័ព្ទឡើង
Slide to Set Up
ជ្រើសរើសភាសា និងភ្ជាប់ទៅកាន់ Wi-Fi
ជ្រើសរើស Select from iCloud Backup
Sign In ចូលទៅកាន់គណនី iCloud
ចុចលើ Next
យល់ព្រមទៅនឹង Terms and Conditions ហើយចុចលើ Confirm
ជ្រើសរើស Backup
វាយបញ្ចូល Password របស់ iCloud ប្រសិនបើវាទាមទារ

ក្រោយបញ្ជប់តាមការកំណត់បញ្ជាទាំងនេះ ហើយលោកអ្នកនឹងទទួលបានឯកសារ រួមនឹងទិន្នន័យទាំងអស់ដែលមានលើទូរស័ព្ទ iPhone ចាស់ ដែលបានធ្វើការ Backup ដោយលោកអ្នកមិនចាំបាច់ ដោតខ្សែ Copy ឬប្រើកម្មវិធី iTuneទៀតទេ៕

September 11, 2017

អគ្គនាយកដ្ឋានពន្ធដារប្រមូលពន្ធបាន 1,414លានដុល្លារ

ភ្នំពេញៈ នាយកដ្ឋានពន្ធដារ បានធ្វើការប្រមូលចំណូលពន្ធ-អាករគ្រប់ប្រភេទបានចំនួនជាង1,414លានដុល្លារអាមេរិកក្នុងរយៈពេល8ខែឆ្នាំនេះ ស្មើជាង82ភាគរយនៃផែនការប្រចាំឆ្នាំ។

ប្រតិភូរាជរដ្ឋាភិបាល និងជាអគ្គនាយកនៃអគ្គនាយកដ្ឋានពន្ធដារលោកគង់ វិបុល បានលើកឡើងនៅក្នុងកិច្ចប្រជុំបូកសរុបការងារប្រមូលចំណូលពន្ធប្រចាំខែសីហានាព្រឹកថ្ងៃទី11 កញ្ញានេះថា ដោយមានការខិតខំប្រឹងប្រែងរបស់មន្ត្រីពន្ធដារគ្រប់លំដាប់ថ្នាក់នៅក្នុងការប្រមូលចំណូលពន្ធ ជាលទ្ធផលសម្រាប់ខែសីហា ឆ្នាំ2017នេះចំណូលពន្ធ-អាករគ្រប់ប្រភេទដែលអគ្គនាយកដ្ឋានពន្ធដារប្រមូលបានមានចំនួនជាង515ពាន់លានរៀល ស្មើនឹងប្រមាណជាង128លានដុល្លារអាមេរិក ប៉ុន្តែបើគិតរយៈពេល8ខែ ឆ្នាំ2017 ចំណូលពន្ធ-អាករដែលប្រមូលបានមានចំនួនជាង5,657ពាន់លានរៀល ត្រូវជាង1,414លានដុល្លារអាមេរិក។

ជាមួយគ្នានេះលោក គង់ វិបុល បានផ្តល់ការណែនាំបន្ថែមដល់គ្រប់អង្គភាពឱ្យបន្តខិតខំពង្រឹងការអនុវត្តច្បាប់ វិន័យការងារ និងត្រូវមានភាពទន់ភ្លន់ម៉ឺងម៉ាត់ក្នុងការឆ្លើយតបទៅកាន់អ្នកជាប់ពន្ធ ធ្វើយ៉ាងណាឱ្យអ្នកជាប់ពន្ធសប្បាយចិត្ត មិនសម្តែងការរអ៊ូរទាំ និងផ្តល់កិច្ចសហការល្អក្នុងការបង់ពន្ធជូនរដ្ឋ។

ការប្រមូលពន្ធដែលបានកើនឡើងនេះ ជាផ្នែកមួយនៃការធ្វើកំណែទម្រង់ស៊ីជម្រៅរបស់រាជរដ្ឋាភិបាលក្នុងអាណត្តិការងារទី5នេះដែលធ្វើឲ្យរដ្ឋាភិបាលមានលទ្ធភាពក្នុងការដំឡើងប្រាក់ខែជូនមន្ត្រីរាជការ កងកម្លាំងប្រដាប់អាវុធនានា។

លោកបណ្ឌិត ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិបានថ្លែងថា ការប្រមូលពន្ធរបស់អគ្គនាយកដ្ឋានពន្ធដារមានភាពល្អប្រសើរ ដោយឆ្លុះបញ្ចាំងតាមរយៈការប្រមូលពន្ធកើនឡើងនាប៉ុន្មានឆ្នាំចុងក្រោយនេះ។ប៉ុន្តែការងារប្រមូលពន្ធជួបការលំបាក និងប្រឈមមុខនឹងបញ្ហាច្រើនដែលទាមទារឲ្យមានការធ្វើការងារប្រកបដោយឆន្ទៈ និងមានការដុតដៃដុតជើង។

លោកបន្តថា “ការប្រមូលពន្ធបច្ចុប្បន្នមិនទាន់ឆ្លើយតបនឹងអ្វីដែលយើងចង់បាននៅឡើយទេ ព្រោះយើងអាចប្រមូលពន្ធបានច្រើនជាងនេះ។

លោក គង់ វិបុល បានទទួលស្គាល់ថា ការងារប្រមូលពន្ធពិតជាជួបការលំបាកដែលទាមទារឲ្យមានកំណែទម្រង់លើធនធានមនុស្ស និងការកែប្រែឥរិយាបថមន្ត្រីពន្ធដារឲ្យធ្វើការងារប្រកបដោយឆន្ទៈខ្ពស់ ទើបការងារប្រមូលពន្ធបានទទួលលទ្ធផលល្អ ប៉ុន្តែការផ្លាស់ប្តូរឥរិយាបថមន្ត្រីជាការងារដ៏លំបាកមួយ ព្រោះមន្ត្រីខ្លះយើងមិនអាចប៉ះពាល់បាន៕

September 11, 2017

អ្នកធ្លាក់បាក់ឌុបក៏អាចថ្កុំថ្កើងបានដែរ បើដឹងពីវិធីពិចារណាសម្រាប់ជីវិត

ប្រឡងធ្លាក់ជារឿងដែលមនុស្សគ្រប់គ្នាមិនចង់ជួប តែមនុស្សមួយចំនួនដែលជួបស្ថានភាពនេះបែរជាក្លាយជាមនុស្សដែលពោរពេញទៅដោយបទពិសោធជីវិត និងមានការតស៊ូខ្លាំងជាងមនុស្សធម្មតា ប្រសិនបើគេចេះកែប្រែកំហុស ហើយស្គាល់ពីខ្លួនឯងច្បាស់។ សម្រាប់អ្នកធ្លាក់បាក់ឌុបក៏ដូចគ្នាដែរ តាមពិតទៅជីវិតមនុស្សម្នាក់ៗមិនអាចជោគជ័យរហូតនោះទេ ហើយការធ្លាក់មួយឆ្នាំក៏មិនបង្ហាញឱ្យឃើញថា យើងនឹងទទួលបរាជ័យមួយជីវិតនោះដែរ។

លោក គីម ដារ៉ា ស្ថាបនិកគ្រឹះស្ថានអប់រំ Start Up Cambodia បានលើកឡើងថា លទ្ធផលបាក់ឌុបគ្រាន់តែជាជោគជ័យបឋមមួយប៉ុណ្ណោះ ព្រោះថា វាគ្រាន់តែជាដំណាក់កាលនៃការចាប់ផ្តើមជីវិតសម្រាប់ត្រៀមចូលឧត្តមសិក្សា ឬត្រៀមចាប់អាជីពណាមួយតែប៉ុណ្ណោះ។ សម្រាប់ជីវិត គឺនៅមានដំណាក់កាលជាច្រើនបន្តទៀតដែលត្រូវជម្នះ និងត្រូវសិក្សា។

លោក គីម ដារ៉ា បាននិយាយថា៖ «សម្រាប់អ្នកធ្លាក់បាក់ឌុប សូមគិតឡើងវិញ។ អនាគតមិនមែនសម្រេចតែក្នុងរយៈពេលមួយថ្ងៃនោះទេគឺនៅមានពេលវេលាច្រើនទៀតដែលត្រូវឆ្លងកាត់ ហេតុនេះការរៀនឡើងវិញមួយឆ្នាំទៀតក៏មិនប៉ះពាល់ធ្ងន់ធ្ងរដែរ ព្រោះអ្នកខ្លះជាប់បាក់ឌុបរាប់ឆ្នាំក៏ជីវិតមិនទាន់មានផ្លែផ្កាអ្វីដែរ តែអ្នកខ្លះទៀតទើបនឹងជាប់ ឬទើបនឹងបញ្ចប់ការសិក្សាជំនាន់ក្រោយបែរជាជោគជ័យជាងក៏មាន»។

អ្នកអប់រំខាងលើបានលើកឡើងផងដែរថា ធ្លាក់ ឬជាប់មិនសំខាន់ពេកទេ អ្វីដែលសំខាន់គឺដឹងឱ្យច្បាស់ថាខ្លួនឯងចង់ធ្វើអ្វីនៅថ្ងៃអនាគត។ ប្រសិនបើចង់សិក្សាជំនាញខ្ពស់ៗដែលត្រូវការទ្រឹស្តីច្រើន យើងគួររៀនមួយឆ្នាំទៀត តែប្រសិនបើចង់រៀនជំនាញដែលត្រូវអនុវត្តច្រើន យើងគួរចាប់ផ្តើមរៀនជំនាញតែម្តង។ យើងគួរគិតមើលពីជីវិតរបស់អ្នកស្រាវជ្រាវធំៗ ដើម្បីជោគជ័យ គាត់ត្រូវបរាជ័យ ឬចំណាយពេលរាប់ឆ្នាំ ហេតុនេះការដែលយើងខកមួយឆ្នាំ គឺមិនមែនជាចំណុចដែលត្រូវសោកសៅពេកនោះទេ។

បង្ហាញលើចំណុចស្រដៀងគ្នានេះដែរលោក សាស្ត្រាចារ្យ ព្រើន សុវង្ស បានលើកឡើងថា ប្អូនៗដែលធ្លាក់បាក់ឌុបគួរបើចិត្តឱ្យទូលាយដើម្បីគេចចេញពីភាពសោកសៅដោយទទួលយកការលើកទឹកចិត្តពីមនុស្សដែលនៅជុំវិញខ្លួន ហើយកុំឱ្យជីវិតធ្លាក់ទៅក្នុងភាពទុក្ខសោក តាមពិតទៅការធ្លាក់មួយឆ្នាំ មិនមែនជារឿងធ្ងន់ធ្ងរ ឬជារឿងដែលគួរឱ្យខ្លាចពេកនោះទេ។ សូមកុំបោះបង់ការខិតខំប្រឹងប្រែងចោល ព្រោះបើបោះបង់ទឹកចិត្តជាអ្នករៀនសូត្រចោល យើងនឹងធ្លាក់រហូត។

លោកសាស្ត្រាចារ្យ ព្រើន សុវង្ស បាននិយាយថា៖ «គ្មានបុគ្គលណា កើតមកជោគជ័យដោយគ្មានការខិតខំប្រឹងប្រែងនោះទេ។ យើងបានខិតខំរហូតដល់ទៅ 12ឆ្នាំ ការប្រឡងមិនមែនជាឧបសគ្គទេឱ្យតែប្អូនៗមិនបោះបង់ការខិតខំប្រឹងប្រែង ថ្ងៃណាមួយនឹងទទួលបានជោគជ័យជាក់ជាមិនខាន»។

លោកសាស្ត្រាចារ្យ បានលើកឡើងផងដែរថា ប្អូនៗដែលមិនទាន់ជោគជ័យក្នុងការប្រឡងបាក់ឌុប កុំបាក់ទឹកចិត្តឱ្យសោះ ព្រោះបុគ្គលជោគជ័យក្នុងលោកនេះ ពួកគាត់សុទ្ធតែធ្លាប់បរាជ័យរាប់មិនអស់ ហេតុនេះការបរាជ័យម្តងមិនរាប់ថាជាគ្រោះធំទេ ព្រោះជីវិតត្រូវប្រឈមជាមួយនឹងបញ្ហាជាច្រើន ដែលត្រូវការភាពរឹងមាំទៅជម្នះ៕

September 11, 2017

លោក សួស យ៉ារ៉ា៖ អ្វីដែលសំខាន់គឺត្រូវពង្រឹងវិជ្ជាជីវៈយុវជនកម្ពុជា

ភ្នំពេញៈ មន្ត្រីជាន់ខ្ពស់រដ្ឋាភិបាលបានថ្លែងថា បច្ចុប្បន្នកម្ពុជាមានច្បាប់ល្អ មានសុខសន្តិភាព អ្វីដែលនៅសល់គឺត្រូវពង្រឹងយុវជនយើងឲ្យមានចំណេះដឹងវិជ្ជាជីវៈល្អ ដើម្បីឆ្លើយតបតាមនិន្នាការអភិវឌ្ឍន៍វិស័យឧស្សាហកម្ម។

លោក សួស យ៉ារ៉ា អ្នកនាំពាក្យគណបក្សប្រជាជនកម្ពុជាបានថ្លែងក្នុងពេលចូលរួមក្នុងពិធីបើកដំណើរការសមាគមពាណិជ្ជកម្មចិននៅកម្ពុជាកាលពីចុងសប្តាហ៍មុនថា ឥឡូវច្បាប់យើងមានហើយ គោលនយោបាយអភិវឌ្ឍន៍ជាតិក៏មានរួចហើយ តែយុវជនយើងក្នុងរយៈពេល1 ឬ2ឆ្នាំខាងមុខអាចចាប់យកជំនា ញរបៀបណាដើម្បីទទួលបានផលប្រយោជន៍ពីការអភិវឌ្ឍឧស្សាហកម្មតាមតំបន់ ព្រោះបើយុវជនមានជំនាញហើយគាត់នឹងលែងនិយាយពីប្រាក់ខែអប្បបរមាហើយ។ យុវជន (គាត់) នឹងនិយាយពីផលិតភាពរបស់គាត់ថា តើអាចប្រកួតប្រជែងជាមួយប្រទេសក្នុងតំបន់ ឬអត់? នៅពេលនោះចំណូលរបស់ពួកគាត់នឹងកើនឡើងជាស្វ័យប្រវត្តិ។

លោកបន្តថា “រដ្ឋាភិបាលកំពុងពង្រឹងខ្លួនឯងក្នុងការក្លាយជារដ្ឋសង្គមកិច្ច។ រដ្ឋសង្គមកិច្ច គឺជារដ្ឋដែលផ្តោតទៅលើសុខមាលភាពយុវជន និងប្រជាជនរបស់យើង។ លោកបន្តថា “ដូចសម្តេចតេជោលោកបានប្រកាសហើយថា ចាប់ពីឆ្នាំ2018ទៅ ស្ត្រីដែលប្រសូត្របុត្រនឹងទទួលបានការឧបត្ថម្ភធន100ដុល្លារ ដើម្បីផ្តល់សុខមាលភាពដល់កម្មករ កម្មការិនី។

លោក សួស យ៉ារ៉ា បានបន្តថា កម្ពុជាបានពង្រឹងច្បាប់របស់យើងឲ្យបានល្អស្របនឹងច្បាប់របស់តំបន់ យើងបានបញ្ចូលប្រព័ន្ធនៃសេដ្ឋកិច្ចរបស់យើងចូលក្នុងតំបន់អាស៊ាន និងចូលជាសមាជិកអង្គការសុខភាពពិភពលោក និងអ្វីដែលត្រូវគិតគឺគោលនយោបាយផ្លូវសូត្ររបស់ប្រទេសចិនថា អាចជួយអ្វីយើងបានខ្លះ អ៊ីចឹងរដ្ឋាភិបាលរបស់យើងក៏បានវិនិយោគ និងក្លាយជាសមាជិកធនាគារអភិវ ឌ្ឍន៍ហេដ្ឋារចនាសម្ព័ន្ធអាស៊ី (AIIB)ជាដើម។

នៅក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ2015-2025 ដែលបានប្រកាសដាក់ឲ្យប្រើប្រាស់កាលពីខែតុលា ឆ្នាំ2015 រដ្ឋាភិបាលបានដាក់ចេញនូវគោលនយោបាយសំខាន់ៗមួយចំនួន ដូចជាការអភិវឌ្ឍហេដ្ឋារចនាសម្ព័ន្ធ ការបញ្ចុះតម្លៃអគ្គិសនី ការបណ្តុះបណ្តាលធនធានមនុស្ស ដើម្បីប្រែក្លាយកម្ពុជាចេញពីប្រទេសដែលប្រើប្រាស់អតិពលកម្ម ទៅជាប្រទេសដែលប្រើប្រាស់កម្លាំងពលកម្មមានជំនាញ៕

September 11, 2017

កាន់តែក្ដៅឡើងហើយ! អ្នកគាំទ្រប្រតិកម្មរិះគន់តារាចម្រៀងខ្មែរ ឈ្លោះគ្នាហូរហែអ៊ីចឹង គិតថាល្អឬ?

កន្លងមកមានសារព័ត៌មានក្នុងស្រុកមួយបានចេញផ្សាយថា “បទមួយ របស់ខ្មែរមួយជីវិត និងពន្លឺ រួមទាំងតារា6ដួងទៀតនោះបានដៀលត្មះតារាកូពីចំៗតែម្តង” នៅក្នុងនោះខ្លឹមសារទាំងស្រុងបានរៀបរាប់ថា តារាចម្រៀងខ្មែរមួយជីវិត និង លោកកៅ ពន្លឺ ដែលជាតារាចម្រៀងក្នុងក្រុមក្មេងខ្មែរ បានចេញបទចម្រៀងមួយបទរួមគ្នា ដោយក្នុងនោះក៏មានតារាចម្រៀង6ដួងផងដែរនោះបានច្រៀងដៀលត្មះកប់ៗទៅលើតារាចម្រៀងកូពី និង រ៉េបឡប់ៗ។

រហូតមកទល់ពេលនេះ ការមិនពេញចិត្តរបស់អ្នកគាំទ្រចម្រៀងខ្មែរ ដែលទើបតែទទួលបានការគាំទ្រចំពោះស្នាដៃនិពន្ធថ្មីមិនទាន់បានយូរប៉ុន្មានផង ស្រាប់តែនាំគ្នានិន្ទាគ្នា រិះគន់ និងជេរគ្នាទៅវិញទៅមកតាមរយៈបទចម្រៀងយ៉ាងកប់ៗពេញមាត់តែម្ដង។ ការមិនពេញចិត្តនេះ Facebook មួយដែលមានឈ្មោះថា Chalite Rapper បានបញ្ចេញមតិនៅលើ Facebook Page AjathomNokorReach ថា «ឈ្លោះហែកហួរគ្នាអ៊ីចឹង គិតថាល្អឬ? គួរប្រជែងគ្នាដោយការទាញយកប្រជាប្រិយភាពវិញទើបត្រឹមត្រូវ មិនមែនប្រជែងគ្នាដោយការដៀមដាមគ្នាអ៊ីចឹងទេ»។

មិនតែប៉ុណ្ណោះមានគណនីមួយទៀតដែលមានឈ្មោះថា Ski Kimsang បាននិយាយថា «ខ្មែរជេរខ្មែរ ល្អស្អី ឃើញគេល្បីមិនបាន ខ្មែរ Rapperស្អី ជេរគេ ជេរឯងក្នុងរង្វង់សិល្បៈដូចគ្នាបានស្អីមកវិញ? ដាក់ឈ្មោះខ្មែរមួយជីវិត តែកុំមើលចរិតវិញ យ៉ាប់9! ។ ខ្ញុំគិតថា អស់លោកមានចំណុចខ្លាំង និងល្អ ប៉ុន្តែដល់ពេលលោកចេញបទដៀមដាម ជេរគេ វាធ្វើឱ្យចំណុចខ្លាំងរបស់អស់លោកធ្លាក់ចុះ ។ បើបទចម្រៀងរបស់លោកពីរោះមែន ប្រាកដជាមានការគាំទ្រខ្លាំង ដូចជាបទបុណ្យភូមិ ប្រជាជនខ្មែរបានយកទៅចាក់រាំកម្សាន្តទូទាំងប្រទេសខ្មែរ និងនៅប្រទេសក្រៅមួយចំនួនទៀត ។ ខ្មែរជេរខ្មែរមួយជីវិត»។ រីឯគណនីយ Mesa Love LyMa មួយនេះវិញបានបញ្ជាក់ថា «មួយបទនេះបាញ់ g-devit ម៉ាទំហឹងហ្មង»។

គួរបញ្ជាក់ផងដែរថា ការនិន្ទារបស់សិល្បករខ្មែរដែលបានវាយប្រហារគ្នាតាមរយៈបទចម្រៀងនេះ បានធ្វើឱ្យមហាជនខ្មែរបញ្ចេញមតិថា ជាការបន្ទាបតម្លៃសិល្បៈខ្មែរ និងជាការបំផ្លាញសីលធម៌ខ្មែរ ដែលធ្លាប់តែមានការកោតសរសើរពីមុនមក៕

September 11, 2017

ជា សុជាតិ ៖ សញ្ញាបត្របាក់ឌុបមិនអាចបញ្ជាក់ពីអនាគតបានទេ

ប៉ុន្មានម៉ោងមុននេះបន្ដិច តារាចម្រៀង Original Song លោក ជា សុជាតិ ដែលជាសមាជិកក្រុមចម្រៀង ក្មេងខ្មែរ បានបង្ហោះសារខ្លីតែមានន័យល ើកទឹកចិត្តដល់ប្អូនៗ ដែលប្រឡងជាប់ និងធ្លាក់បាក់ឌុបថា « ចំណាំ ៖ ក្រដាសមួយសន្លឹកនេះមិនអាចបញ្ជាក់ពីអនាគតរបស់អ្នកថា នឹងក្លាយជាអ្វីបាននោះទេ។ N E V E R G I V E U P »។

គួរបញ្ជាក់ផងដែរថា អ្វីដែលកាន់តែធ្វើឱ្យមហាជនភ្ញាក់ផ្អើលទៀតនេះគឺ ជា សុជាតិ បានប្រឡងជាប់សញ្ញាបត្រមធ្យមសិក្សាទុតិយភូមិ កាលពីឆ្នាំ 2013 បាននិទ្ទេស B និងមានលំដាប់ពិន្ទុសរុប 97.010 ផងដែរ៕

September 11, 2017

មិនទាន់បង្ហាញខ្លួនផង ស្រោម iPhone 8 មានលក់នៅផ្សារ Aeon Mall ទៅហើយ

ខណៈដែលក្រុមហ៊ុន Apple ត្រៀមធ្វើព្រឹត្តិការណ៍បង្ហាញផលិតផលថ្មីនៅថ្ងៃទី12 ខែកញ្ញា ដែលគេជឿជាក់ថា ក្រុមហ៊ុននឹងធ្វើការបង្ហាញទូរស័ព្ទ iPhone 8 បំពាក់កាមេរ៉ាភ្លោះនោះ ពេលនេះហាងលក់គ្រឿងតុបតែងទូរស័ព្ទមួយនៅផ្សារទំនើប Aeon Mall ភ្នំពេញ បែរជាមានដាក់លក់ស្រោមទូរស័ព្ទនេះមុនបាត់ទៅហើយ។

តាមការឱ្យដឹងពីបុគ្គលិកផ្នែកលក់នៅហាង Baseus Cambodia ដែលមានទីតាំងនៅផ្សារទំនើប Aeon Mall បានឱ្យដឹងថា ស្រោមដែលមានលក់នោះ ជាស្រោមសម្រាប់ប្រើជាមួយនឹងទូរស័ព្ទ iPhone 8 ដែល Apple ត្រៀមបង្ហាញនៅថ្ងៃស្អែក។ ក្រៅពីស្រោមហើយ ខាងហាងក៏មានលក់ដូចជា Screen ការពារអេក្រង់មុខ-ក្រោយ និង Screen ការពារកាមេរ៉ាទៀតផង។

បុគ្គលិកខាងលើឱ្យដឹងថា៖«ខ្ញុំមិនដឹងច្បាស់ថា វាយ៉ាងណាដែរ ប៉ុន្តែខាងលើគេឱ្យយកអីវ៉ាន់មកតាំងលក់ និងវាអាចមានរាងអ៊ីចឹងដែរហើយបង ព្រោះក្រុមហ៊ុនខ្ញុំមិនមែនចេះតែផលិតមកលក់ទេ បើមិនច្បាស់ការនោះ»។

បុគ្គលិកផ្នែកលក់ខាងលើបានឱ្យដឹងទៀតថា ក្រោយដាក់តាំងលក់បានប៉ុន្មានថ្ងៃ មានអតិថិជនជាច្រើនបានមកសួរនាំរឿងនេះ ព្រោះថា ពួកគាត់មិនទាន់បានឃើញរូបរាង iPhone 8 នោះថា យ៉ាងណានៅឡើយ។

សូមរំឭកដែរថា Apple នឹងជ្រើសរើសយកកន្លែងចាស់ក្នុង Cupertino រដ្ឋ California ជាកន្លែងដែលលោក Steve Jobs បង្ហាញទូរស័ព្ទ iPhone ជាលើកដំបូងកាលពីឆ្នាំ 2007។ តាមការរំពឹងទុក Apple នឹងបង្ហាញទូរស័ព្ទជំនាន់ថ្មី iPhone 8 សម្រាប់ខួប10ឆ្នាំ ដែលនឹងបំពាក់អេក្រង់ Bezeless ប្រភេទ AMOLED និងបច្ចេកវិទ្យារូបភាព 3D-sensing imaging ជាមួយនឹងពណ៌ខៀវស្រស់ និងពណ៌ទឹកក្រូចបែកមាស។ ក្រៅពីនេះក្រុមហ៊ុនក៏នឹងអាចបង្ហាញបច្ចេកវិទ្យាសាកថ្មឥតខ្សែ Wireless Charging ទូរទស្សន៍ 4K Apple TV នាឡិកាឆ្លាតវៃ Apple Watch ដែលបំពាក់នូវប្រព័ន្ធ LTE ផងដែរ៕

វីដេអូ៖

September 11, 2017

កម្ពុជានឹងក្លាយជានំមួយដ៏ឆ្ងាញ់សម្រាប់អ្នកវិនិយោគលើវិស័យសំណង់

ភ្នំពេញ – ខណៈកម្ពុជាត្រូវបានគេចាត់ទុកជាកូនខ្លានៅអាស៊ីមួយដែរនោះ ថ្មីៗនេះមន្ដ្រីជំនាញនៃក្រសួងរៀបចំដែនដី នគរូបនីយកម្ម និងសំណង់បានបង្ហាញពីទស្សនវិស័យថា នាពេលអនាគតឆាប់ៗប្រទេសមួយនេះនឹងក្លាយជានំដ៏ឆ្ងាញ់សម្រាប់ការវិនិយោគបរទេសលើវិស័យសំណង់។

ឯកឧត្ដម ភឿង សោភ័ណ្ឌ រដ្ឋលេខាធិការនៃក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ថា បច្ចុប្បន្នវិស័យសំណង់កំពុងតែមានការរីកចម្រើនដែលទាមទារឱ្យស្ថាបត្យករត្រូវប្រឹងប្រែងរៀនសូត្របង្កើនពុទ្ធិដើម្បីប្រកួតប្រជែងគំនិតគ្នាធ្វើយ៉ាងណាឱ្យសំណង់ដែលផុសឡើងប្រកប ដោយគំនិតច្នៃប្រឌិត និងជាការទាក់ទាញអ្នកវិនិយោគ អ្នកទេសចរជាដើម។

ឯកឧត្ដមភឿង សោភ័ណ្ឌ បញ្ជាក់ថា៖ «ទៅថ្ងៃក្រោយកម្ពុជានឹងក្លាយទៅជានំមួយដែលស្ថាបត្យករ វិស្វករ បរទេសគេចង់មកវិនិយោគនៅទីនេះ គឺជានំមួយដែលគេចង់បាន ព្រោះប្រទេសយើងមានសុខសន្ដិភាព សន្ដិសុខសណ្ដាប់ធ្នាប់ សុវត្ថិភាពសង្គម ស្ថិរភាពនយោបាយ ព្រមទាំងមានច្បាប់លើកទឹកចិត្ដដល់អ្នកវិនិយោគទៀតផង។ ពិសេសនោះ គឺកម្ពុជាពុំធ្លាប់ទទួលរងពីគ្រោះធម្មជាតិរញ្ជួយដី ឬក៏ខ្យល់ព្យុះធំៗឡើយ»។

ចំណុចដែលកម្ពុជាពុំធ្លាប់ទទួលរងគ្រោះធម្មជាតិនេះត្រូវបានឯកឧត្ដមភឿង សោភ័ណ្ឌ ចាត់ទុកថា កម្ពុជាជាប្រទេសមានភ័ព្វសំណាងជាងគេបើធៀបទៅប្រទេសនានាដែលមានការអភិវឌ្ឍលើវិស័យសំណង់ដូចគ្នានេះដែលវាជាចំចំណុចពិសេសមួយក្នុងការទាក់ទាញអ្នកអភិវឌ្ឍន៍ឱ្យមកបោះទុនវិនិយោគលើសំណង់អគារខ្ពស់ៗផងដែរ។ រដ្ឋលេខាធិការនៃក្រសួងរៀបចំដែនដីនគរូបនីយកម្ម និងសំណង់ បន្ដទៀតថា យោងតាមព័ត៌មានដែលទទួលបានបច្ចុប្បន្នមានក្រុមហ៊ុនវិនិយោគធំៗលើពិភពលោក ពិសេសនៅតំបន់អាស៊ានកំពុងតែសម្លឹងមករកកម្ពុជា។

គួរបញ្ជាក់ថា គិតត្រឹមរយៈពេល7ខែនៅដើមឆ្នាំ2017នេះ ទំហំទឹកប្រាក់វិនិយោគលើវិស័យសំណង់មានតម្លៃជិត4ពាន់លានដុល្លារ និងបានផ្ដល់ការងារជូនប្រជាជនកម្ពុជាពាក់ព័ន្ធលើវិស័យនេះនៅក្នុងទីក្រុងភ្នំពេញប្រមាណ2ម៉ឺននាក់ និងទូទាំងប្រទេសក្នុងរង្វង់20ម៉ឺននាក់៕

September 11, 2017

Coach The Voice Thailand និងអាជីពលក់ងៀតត្រីកន្ត្រប់

គឺត្រូវតែធ្វើបែបហ្នឹងហើយ ទោះជាអាជីពអ្វីក៏ដោយ ឱ្យតែជាអាជីពដែលសុចរិតមិនបង្កភាពក្ដៅក្រហាយដល់អ្នកដទៃ អាចចិញ្ចឹមជីវិតខ្លួនឯងបាន នោះគឺជាអាជីពដែលមានកិត្តិយសពិតប្រាកដហើយ។

គួរឱ្យស្ងើចសរសើរខ្លាំងបំផុតសម្រាប់រាជិនីសំឡេងក្រអួននៅក្នុងពិភពសិល្បៈចម្រៀងថៃ គឺអ្នកនាង ជេននីហ្វើរ ឃីម ជាតារាស្រីសំឡេងខ្ពស់ដែលមានអ្នកគាំទ្រច្រើន ហើយដែលនរណាៗក៏ស្គាល់អ្នកនាងដែរនោះ នៅពេលថ្មីៗនេះ ចែឃីម យើងបានបង្ហោះរូបភាព និងឃ្លីបវីដេអូនៅលើបណ្ដាញទំនាក់ទំនងសង្គម អ៊ីនស្តាក្រាម ដែលបង្ហាញឱ្យឃើញពីជីវិតរស់នៅបែបសាមញ្ញ ជាអ្នកលក់ត្រីកន្ត្រប់ងៀតនៅខាងមុខផ្ទះ។

នៅក្នុងឃ្លីបវីដេអូ ចែឃីមបានពោលថា “គ្រប់អាជីពដែលសុចរិត… មិនត្រូវឱ្យទំនេរដៃ និងពឹងផ្អែកលើវាសនានោះទេ…គឺវាសុទ្ធតែហុចតម្លៃឱ្យខ្លួនយើងទាំងអស់… ទិញងៀតត្រីកន្ត្រប់ទេចា៎ស ? “។

គួរបញ្ជាក់ផងដែរថា តារាស្រីរូបនេះពិតជាបានធ្វើឱ្យមហាជនភ្ញាក់ផ្អើល និងនឹកស្មានមិនដល់មែន៕

September 11, 2017

ខេត្ដសៀមរាបកំពុងត្រៀមខ្លួនប្រទ្បងទីក្រុងទេសចរណ៍ស្អាតអាស៊ាន 2018

ភ្នំពេញ – ដើម្បីជំរុញឱ្យក្រុងសៀមរាបក្លាយជាបេក្ខភាពចលនាប្រទ្បងប្រណាំងទីក្រុងទេសចរណ៍ស្អាតអាស៊ាន2018 ក្រសួងទេសចរណ៍ និងស្ថាប័នពាក់ព័ន្ធបានដាក់ចេញផែនការ7ចំណុច។

ជាមួយគ្នានេះ ក្រសួងទេសចរណ៍បានឯកភាពដាក់ចេញកម្មវិធីការងារចាត់តាំងអនុវត្តដូចខាងក្រោម៖

បន្តពង្រឹងគុណភាពសេវាកម្មទេសចរណ៍ និងបដិសណ្ឋារកិច្ចល្អដល់ភ្ញៀវទេសចរ។
បន្តពង្រឹងការរៀបចំសណ្តាប់ធ្នាប់សាធារណៈ តាមគោលដៅទេសចរណ៍សំខាន់ ទប់ស្កាត់ឲ្យបាននូវការប្រើប្រាស់ដីចំណីផ្លូវសម្រាប់ធ្វើអាជីវកម្ម ការចតម៉ូតូ រ៉ឺម៉ក រថយន្ត គ្មានសណ្តាប់ធ្នាប់ និងបន្តរៀបចំឲ្យមានផ្លូវដើរសម្រាប់ទេសចរឲ្យបានច្រើន។ ពង្រឹងសណ្តាប់ធ្នាប់នៅតំបន់ផាប់ស្ទ្រីត។
រៀបចំយុទ្ធសាស្ត្រ និងផែនការច្បាស់លាស់ក្នុងការគ្រប់គ្រងសំណល់រឹង ពិសេសយន្តការប្រមូលសំរាមក្នុងតំបន់ទីប្រជុំជន ផ្សារ និងតំបន់ដែលមានការឆ្លងកាត់ញឹកញាប់ និងបន្តគាំទ្រការពារ និងការគ្រប់គ្រងបរិស្ថាន និងសំរាមនៅតំបន់ចុងឃ្នាស និងភ្ជាប់តំបន់ទន្លេសាប។
បន្តពង្រឹង និងពង្រីកការសាងសង់បង្គន់សាធារណៈឲ្យបានគ្រប់គ្រាន់ ពិសេសតាមគោលដៅទេសចរណ៍សំខាន់ៗ ក្នុងខេត្តសៀមរាប យ៉ាងហោចឲ្យបានបង្គន់សាធារណៈកម្ពុជា 8-10 កន្លែងទៀត ឲ្យស្របតាមស្តង់ដារបង្គន់សាធារណៈកម្ពុជា និងស្តង់ដារបង្គន់សាធារណៈអាស៊ាន ដោយជ្រើសរើសទីតាំងឲ្យបានស្របនឹងចំនួនទេសចរ ដែលរួមជាមួយនឹងមជ្ឈមណ្ឌលព័ត៌មានទេសចរណ៍ ស្ថានីយចំណតរថយន្ត ឬមជ្ឈមណ្ឌលពាណិជកម្ម ឬនៅដាច់ដោយឡែក។
ពង្រឹងការគ្រប់គ្រងទេសចរណ៍ក្នុងតំបន់អង្គរឲ្យកាន់តែមានប្រសិទ្ធភាព និងគុណភាពខ្ពស់ ក្នុងនោះទប់ស្កាត់ក្មេងលក់ដូររំខានដល់ភ្ញៀវទេសចរដែលអាជ្ញាធរជាតិអប្សរា និងបន្តសហការជាមួយផ្នែកពាក់ព័ន្ធ និងមន្ទីរសង្គមកិច្ច និងអតីតយុវជន និងអង្គការនានា ដើម្បីរៀបចំ និងដាក់ចេញនូវវិធានការអប់រំ និងវិធានការរដ្ឋបាលជំនួសដោយការផ្តល់ការអប់រំដល់ក្មេងៗ និងមុខរបរជំនួសសម្រាប់ឱពុកម្តាយក្មេង។ បន្តគាំទ្រការអភិវឌ្ឍសហគមន៍ទេសចរណ៍នៅតំបន់បន្ទាយស្រី ដោយតម្រូវឲ្យមានការសហការគោរពអនុវត្តឲ្យបានត្រឹមត្រូវតាមការណែនាំរបស់អាជ្ញាធរអប្សារា និងកិច្ចសហការជាមួយស្ថាប័នជំនាញ ពិសេសមន្ទីរទេសចរណ៍ មន្ទីរបរិស្ថាន មន្ទីរកសិកម្ម មន្ទីរធនធានទឹក។ល។
ដើម្បីគាំទ្រលើការដោះស្រាយបញ្ហាប្រឈមនានា ដែលលើកទ្បើងដោយវិស័យឯកជនពាក់ព័ន្ធ និងសម្រាប់អនាម័យបរិស្ថាននៅក្រុងសៀមរាប អង្គប្រជុំបានឯកភាព និងគាំទ្រយុទ្ធនាការកម្ពុជាស្អាត Cambodia Clean-Up ដោយព្រមព្រៀងបង្កើតក្រុមការងារអចិន្ត្រៃយ៍រួមទាំងរដ្ឋបាលខេត្តសៀមរាប ផ្នែកឯកជន ភ្ញៀវទេសចរ យុវជនសហភាពសហព័ន្ធយុវជនកម្ពុជា ដើម្បីចាត់តាំងអភិវឌ្ឍឲ្យមានជាកម្មវិធីជាប្រចាំរៀងរាល់ចុងសប្តាហ៍។
ដើម្បីគាំទ្របេក្ខភាពសៀមរាបក្នុងចលនាប្រទ្បងប្រណាំងទីក្រុងស្អាត រដ្ឋបាលថ្នាក់ក្រោមជាតិបន្តគិតគូរ និងរៀបចំឲ្យមានបង្គន់សាធារណៈស្របតាមស្តង់ដារ កន្លែងហាត់ប្រាណ សួនច្បារ តំបន់បៃតង សម្រាប់ប្រជាពលរដ្ឋ ភ្ញៀវទេសចរ ចំណតរថយន្ត ផ្លូវថ្មើរជើង និងពង្រឹងយន្តការគ្រប់គ្រងការប្រមូលសំរាមក្នុងក្រុងសៀមរាបឲ្យកាន់តែមានប្រសិទ្ធភាព។

ឯកឧត្តម ថោង ខុន រដ្ឋមន្ដ្រីក្រសួងទេសចរណ៍ បានលើកឡើងថា ទន្ទឹមនឹងការពង្រឹងការគ្រប់គ្រងក្នុងក្រុងសៀមរាប និងតំបន់អង្គរឲ្យស្អាត និងបៃតង ចាំបាច់ត្រូវធ្វើពិពិធកម្មផលិតផលទេសចរណ៍ឲ្យបានច្រើនថែមទៀត ពិសេសសហគមន៍ទេសចរណ៍ដែលមានសក្ដានុពលនៅតំបន់ជុំវិញខេត្តសៀមរាប។ ក្នុងនោះមានសហគមន៍ជ្រាវ សហគមន៍កំពង់ភ្លុក និងសហគមន៍បន្ទាយស្រី សហគមន៍ទេសចរណ៍ចុងឃ្នាសជាដើម និងគោលដៅអេកូទេសចរណ៍ព្រែកទាល់ ភ្នំគូលែន ដើម្បីបង្កើតជាផលិតផលទេសចរណ៍ថ្មីផ្តល់ជូនភ្ញៀវទេសចរ តាមរយៈសហគមន៍ទេសចរណ៍ និងគោលដៅទេសចរណ៍ថ្មីៗទាំងនោះ នឹងផ្តល់នូវអត្ថប្រយោជន៍ដល់ប្រជាពលរដ្ឋមូលដ្ឋាន កាត់បន្ថយភាពក្រីក្រ កាត់បន្ថយចំណាកស្រុក និងចូលរួមដល់កិច្ចការពារ អភិរក្សធនធានធម្មជាតិប្រកបដោយប្រសិទ្ធភាព។

ខេត្តសៀមរាបត្រូវបានចាត់ទុកជាគោលដៅទេសចរណ៍វប្បធម៌ និងប្រវត្តិសាស្ត្រដែលទាក់ទាញទេសចរគ្រប់ជាតិសាសន៍មកកម្សាន្ត។ ជាក់ស្តែង ក្នុងរយៈពេល7ខែ ឆ្នាំ2017ខេត្តសៀមរាបទទួលបានទេសចរសរុប 3,783 ,724នាក់ កើនទ្បើង 11.94% ធៀបនឹងឆ្នាំ2016 ក្នុងនោះភ្ញៀវទេសចរជាតិមានចំនួន2, 367,696នាក់ កើនទ្បើង11.97% និងភ្ញៀវទេសចរអន្តរជាតិចំនួន 1,416,028នាក់ កើនទ្បើង 11.99%។

លោក ឃឹម ប៊ុនសុង អភិបាលខេត្តសៀមរាបបានដាក់ចេញនូវឱសានវាទត្រឹមដើមខែតុលា ឆ្នាំ2017 ឲ្យអាជីវកម្មទាំងអស់ដែលបំពានយកដីចំណីផ្លូវ ត្រូវរុះរើជាបន្ទាន់ និងដាច់ខាត និងទប់ស្កាត់ឲ្យបាននូវការរំខានដោយសំឡេងដែលបង្កផលប៉ះពាល់ដល់ប្រជាពលរដ្ឋ និងអាជីវកម្មដទៃទៀតដោយចុះធ្វើការណែនាំដល់ទីតាំងផ្ទាល់ ក្នុងនោះរដ្ឋបាលខេត្តសៀមរាបនឹងចាត់វិធានការច្បាប់ ចំពោះម្ចាស់មណ្ឌលកម្សាន្តទេសចរណ៍មនុស្សពេញវ័យ ដែលបន្តមិនគោរពតាមការណែនាំអប់រំកិច្ចសន្យា ដោយអាចឈានដល់ការបិទអាជីវកម្មតែម្តង៕

September 11, 2017

Category: សង្គម និងសេដ្ឋកិច្ច