សង្គម និងសេដ្ឋកិច្ច - La Reine Media

ដល់ពេលដែលយុវជនត្រូវដឹងខ្លួនឯងហើយថាត្រូវរៀនផ្នែកអ្វីនៅថ្ងៃអនាគត

បន្ទាប់ពីបានដឹងលទ្ធផលនៃការប្រឡងមធ្យមសិក្សាទុតិយភូមិ នៅពេលនេះគឺដល់ពេលហើយដែលសិស្សទាំងអស់ត្រូវត្រៀមខ្លួន និងសម្រេចចិត្តឱ្យច្បាស់ពីទិសដៅអនាគតរបស់ខ្លួន តែនាពេលបច្ចុប្បន្ននេះ សិស្សជាច្រើនមិនទាន់រកឃើញនូវសក្តានុពលខ្លួនឯងពិតប្រាកដនៅឡើយ។

ដើម្បីដោះស្រាយបញ្ហាខាងលើនេះ ក្រុមការងារយុវជន អានន្ត ដែលមានការគាំទ្រពីក្រសួងអប់រំ យុវជន និងកីឡា និងសហភាពសហព័ន្ធកម្ពុជា បានបង្កើតកម្មវិធី «យុទ្ធសាស្ត្រក្នុងការជ្រើសរើសមុខជំនាញដែលត្រឹមត្រូវ និងឱកាសទទួលបានអាហារូបករណ៍ទៅសិក្សានៅបរទេស» ដើម្បីផ្តល់ឱកាសឱ្យយុវជនដែលមានបទពិសោធក្នុងការសិក្សា អាហារូបករណ៍ទៅបរទេស និងសហគ្រិនជោគជ័យជាច្រើននៅកម្ពុជាចែករំលែកនូវបទពិសោធដល់សិស្សដែលត្រៀមចូលមហាវិទ្យាល័យ។

លោក ម៉ៅ គង្គារ ប្រធានក្រុមយុវជនអានន្តដែលបានបង្កើតសិក្ខាសាលាដ៏ធំប្រចាំឆ្នាំនេះ បានលើកឡើងថា ការបង្កើតកម្មវិធីនេះ គឺក្នុងគោលបំណងជំរុញឱ្យសិស្សដែលទើបនឹងចប់មធ្យមសិក្សាទុតិយភូមិ គិតពិចារណាឱ្យបានល្អិតល្អន់ពីការជ្រើសរើសជំនាញសិក្សានៅមហាវិទ្យាល័យ។ ម្យ៉ាងវិញទៀត វាក៏ជាវេទិកាដែលបង្កើតឡើងនូវទម្លាប់នៃការចែករំលែកប្រកបដោយវិជ្ជមានពីបុគ្គលដែលទទួលបានបទពិសោធជីវិតច្រើន ទៅកាន់យុវជនជំនាន់ថ្មីរបស់កម្ពុជា។

វាគ្មិនដែលនឹងចូលរួមនៅក្នុងកម្មវិធីនេះ មានដូចជា៖

1. ងលី ស្ថាបនិកនៃសាលាឧកញ៉ាវេជ្ជបណ្ឌិត គួច ម៉េ AII & AIS
2. លោកស្រី ជា សុផល្លា ,នាយិកាក្រុមហ៊ុន Emerald ក្រុមហ៊ុនគ្រប់គ្រងអចលនទ្រព្យ ប្រធានសភាយុវពាណិជ្ជករអន្តរជាតិ អនុប្រធានសភាពាណិជ្ជកម្មខេត្តកំពុងស្ពឺ
សមាជិកក្រុមប្រឹក្សាភិបាលសមាគមសហគ្រិនវ័យក្មេងកម្ពុជា
3. ឧកញ៉ា ស្រ៊ាត មុំសុភា ស្ថាបនិករបស់ Sophiya Travel & Tour
4. លោកស្រី គង់ សូរីតា នាយិកាប្រតិបត្តិនៃ OCEAN Technology Co., Ltd
5. ឯកឧត្តមបណ្ឌិត ឯក មនោសែន សាកលវិទ្យាធិការនៃសាកលវិទ្យាល័យធនធានមនុស្ស
6. លោក ឃន ឈុនដារ៉ា ម្ចាស់ហាង KOI និង Tube Cafe
7. លោក សុខ សុភមង្គល សហស្ថាបនិក និងជាប្រធានប្រតិបត្តិ Codingate Leverage Information Technology Through Collective Genius
8. ងនៃសាកលវិទ្យាល័យបញ្ញាសាស្ត្រកម្ពុជា និងជាអ្នកនិពលោក កុល ផេង វឌ្ឍនា សាកលវិទ្យាធិការរ ន្ធសៀវភៅ Discover Your Greatness
9. លោកស្រី ឡាយ សុធានី ជាប្រធានប្រតិបត្តិនៃវិទ្យាស្ថានម្ហូបអាហារកម្ពុជា
10. លោក សោម សុធា ប្រធានផ្នែកបណ្តុះបណ្តាលធនធានមនុស្សក្រុមហ៊ុន Forval (Cambodia) Co., Ltd
11. លោកស្រី សាយ៉ា លីនដា គ្រូបង្វឹករបស់ The Perspectives Cambodia និងជាមន្ត្រីនៃមជ្ឈមណ្ឌលធនធានអាស៊ានកម្ពុជា និងកិច្ចសហប្រតិបត្តិការអន្តរជាតិនៃក្រសួងមុខងារសាធារណៈ
12. លោក យ៉ាន់ ឧត្តម ប្រធាន PUC Alumni និងជាប្រធានមជ្ឈមណ្ឌលសិក្សាអំពីអាស៊ាន (អតីតនិស្សិតទទួលបានអាហារូបករណ៍សិក្សានៅ សហរដ្ឋអាមេរិក)
13. កញ្ញា ដៀប ចាន់សុភា អតីតនិស្សិតទទួលបានអាហារូបករណ៍សិក្សានៅ ប្រទេសបារាំង និងកាណាដា
14. កញ្ញា ឡៅ ដានេ អតីតនិស្សិតទទួលបានអាហារូបករណ៍សិក្សានៅ Bridgewater State University, សហរដ្ឋអាមេរិក
15. លោក ឌុច ឡាលីន អតីតនិស្សិតទទួលបានអាហារូបករណ៍ទៅផ្លាស់ប្តូរបទពិសោធនៅ សហរដ្ឋអាមេរិក
16. លោក ហួ តុលា ស្ថាបនិករបស់កម្មវិធី The Perspectives Cambodia
17. លោក ហេង សុវណ្ណ ជ័យលាភីលេខ1នៃកម្មវិធីជើងឯកតស៊ូមតិដើម្បីតម្លាភាពឆ្នាំ2015 និងជាអ្នកសារព័ត៌មាននៃការសែតឡារ៉ែនពាណិជ្ជ
18. កញ្ញា អៀង លីនដា ជ័យលាភីលេខ1 កម្មវិធីអ្នកបន្តវេន និងជាប្រធានក្រុម LIFE Group
19. កញ្ញា ហង្ស ម៉ារីនី ម្ចាស់ហាង SM Memory Shop

អ្នកសម្របសម្រួលកម្មវិធី៖
DJ ណាណា អ្នកកាន់កម្មវិធី(MC)
1. កញ្ញា រិទ្ធ សានីតា ជើងឯកវោហាសព្ទឆ្នើមនៃកម្មវិធី The Perspectives Cambodia រដូវកាលទី1 ដែលប្រធានបទរបស់គាត់និយាយអំពី ស្នេហា និង ការសិក្សា
2. លោក ស៊ិន កុសល គឺជាគ្រូបង្វឹកផ្នែកវោហាសព្ទ

September 15, 2017

លទ្ធផលអាហារូបករណ៍បង្ហាញថា អ្នកបាននិទ្ទេស E មិនតិចទេ ជាប់អាហារូបករណ៍

លទ្ធផលប្រឡងមធ្យមសិក្សាទុតិយភូមិនៅឆ្នាំនេះ ត្រូវបានប្រកាសជាផ្លូវការដោយក្រសួងអប់រំ យុវជន និងកីឡា ដែលក្នុងនោះបានបង្ហាញឱ្យឃើញថា សាកលវិទ្យាល័យរដ្ឋ និងឯកជនជាច្រើនបានផ្តល់អាហារូបករណ៍ដល់កម្រិតនិទ្ទេស C D និង E។

នៅក្នុងតារាងអាហារូបករណ៍ទាំងអស់នោះ ឃើញថា ភាគច្រើនសាកលវិទ្យាល័យឯកជន និងសាកលវិទ្យាល័យនៅតាមបណ្តាខេត្តធំៗមួយចំនួន បានផ្តល់ឱកាសអាហារូបករណ៍ដល់សិស្សដែលទទួលបាននិទ្ទេស E ដែលនៅក្នុងនោះមានដូចជា សាកលវិទ្យាល័យជាស៊ីមកំចាយមារនៅខេត្តព្រៃវែង សាកលវិទ្យាល័យស្វាយរៀង សាកលវិទ្យាល័យមានជ័យ សាកលវិទ្យាល័យហេងសំរិនត្បូងឃ្មុំ សាលាជាតិកសិកម្មកំពង់ចាម សាលាជាតិកសិកម្មព្រែកលាប វិទ្យាស្ថានជាតិសង្គមកិច្ច សាលាបច្ចេកវិទ្យាកំពង់ឈើទាល សាកលវិទ្យាល័យមេគង្គកម្ពុជា សាកលវិទ្យាល័យអាស៊ីអឺរ៉ុប សាកលវិទ្យាល័យគ្រប់គ្រង និងសេដ្ឋកិច្ច សាកលវិទ្យាល័យឌូវី និងគ្រឹះស្ថានអប់រំជាច្រើនទៀត។

លទ្ធផលនេះបានបង្ហាញឱ្យឃើញថា អ្នកដែលទទួលបាននិទ្ទេសមិនសូវខ្ពស់ ក៏អាចមានសិទ្ធក្នុងការទទួលបានអាហារូបករណ៍ដែរ ប្រសិនបើពួកគេហ៊ានធ្វើការប្រកួតប្រជែងដើម្បីអនាគតរបស់ខ្លួន។ នាពេលនេះ សាកលវិទ្យាល័យមួយចំនួន ក៏បានចេញសេចក្តីប្រកាសដើម្បីប្រឡងអាហារូបករណ៍សម្រាប់និស្សិតចូលរៀនសម្រាប់គ្រឹះស្ថានអប់រំរបស់ខ្លួនផងដែរ ហេតុនេះអ្នកដែលមិនទទួលបាននិទ្ទេសខ្ពស់ សូមកុំអស់សង្ឃឹម ហើយចាប់ផ្តើមចូលរួមប្រកួតប្រជែងដើម្បីទទួលបានឱកាសល្អជាច្រើនសម្រាប់ជីវិត៕

September 15, 2017

កម្ពុជាមានកត្តាល្អៗច្រើន ធ្វើឱ្យវិនិយោគិនបរទេសមានចំណាប់អារម្មណ៍

ភ្នំពេញ – របាយការណ៍ចេញដោយក្រុមប្រឹក្សាអភិវឌ្ឍន៍ហៅកាត់ថា CDC បានបញ្ជាក់ថា ការវិនិយោគផ្ទាល់ពីបរទេសមកកាន់ប្រទេសកម្ពុជានៅពាក់កណ្ដាលឆ្នាំ2017 មានទឹកប្រាក់វិនិយោគចំនួនជាង 2ពាន់លានដុល្លារអាមេរិកបានកើនឡើង17% បើធៀបរយៈពេលដូចគ្នាក្នុងឆ្នាំ2016ដែលមានចំនួនទឹកប្រាក់ត្រឹមតែជាង 1,789លានដុល្លារអាមេរិកប៉ុណ្ណោះ។

ជុំវិញលំហូរអ្នកវិនិយោគបរទេសមកកាន់កម្ពុជាកាន់តែច្រើននេះ ត្រូវបានលោកឧកញ៉ា សៀ រិទ្ធី ជាប្រធានក្រុមប្រឹក្សាភិបាល និងអគ្គនាយកក្រុមហ៊ុន World bridge group បញ្ជាក់ប្រាប់ថា កម្ពុជាជាប្រទេសមានអំណោយផលទាក់ទាញសម្រាប់ការវិនិយោគ ពិសេសការដាក់ចេញគោលនយោបាយដ៏ល្អរបស់រាជរដ្ឋាភិបាលក្នុងការទាក់ទាញអ្នកវិនិយោគ។

នាពាក់កណ្ដាលឆ្នាំ2017 ចិនត្រូវបានគេមើលឃើញថាជាប្រទេសមួយដែលបានបោះទុនវិនិយោគច្រើនជាងគេនៅក្នុងប្រទេសកម្ពុជាបើធៀបទៅនឹងប្រទេសសិង្ហបុរី កូរ៉េត្បូង ហុងកុង ចិនតៃវ៉ាន់ជាដើម ដែលមានទំហំទឹកប្រាក់ជាង1ពាន់លានដុល្លារអាមេរិក បើធៀបនឹងរយៈពេលដូចគ្នាដែលមានទឹកប្រាក់ត្រឹមតែជាង480លានដុលា្លរអាមេរិកប៉ុណ្ណោះ។ ប្រទេសទាំងនោះត្រូវបានគេមើលឃើញថា កំពុងតែផ្ដោតអារម្មណ៍ទៅលើការវិនិយោគលើវិស័យចំនួន4ដូចជាឧស្សាហកម្ម កសិកម្ម វិស័យសេវាកម្ម និងទេសចរណ៍។

ប្រធានក្រុមប្រឹក្សាភិបាល និងអគ្គនាយក World bridge group បញ្ជាក់ថា មូលហេតុកម្ពុជាកំពុងស្ថិតក្នុងក្រសែភ្នែកអ្នកវិនិយោគ គឺដោយសារតែកំណើន GDP និងស្ថិរភាពនយោបាយល្អ គួបផ្សំនឹងគោលនយោបាយសេដ្ឋកិច្ចដ៏ល្អផងដែរ។ លោកឧកញ៉ា សៀ រិទ្ធី បញ្ជាក់ប្រាប់ថា ស្ថិរភាពនយោបាយជារឿងសំខាន់ ប្រសិនបើស្ថិរភាពនយោបាយមិនល្អ ទោះបីជាប្រទេសនោះមានគោលនយោបាយផ្សេងៗល្អយ៉ាងណាក៏ដោយ ឬទីផ្សារធំប៉ុនណាក៏ដោយ ក៏គេមិនទៅដែរ។

គួរបញ្ជាក់ថា ចិនបានធ្វើការវិនិយោគទៅតំបន់សេដ្ឋកិច្ចពិសេសក្រុងព្រះសីហនុចំនួន 10គម្រោងដែលមានទំហំទឹកប្រាក់ប្រមាណ 310លានដុល្លារអាមេរិក ដែលផ្ដល់ការងារដល់ប្រជាពលរដ្ឋកម្ពុជាដល់ទៅ 16,180នាក់៕

September 15, 2017

ម៉ូដសំលៀកបំពាក់ប្រចាំខែ កញ្ញា លេខទី 112

September 15, 2017

ក្រុមហ៊ុនដឹកជញ្ជូនអ្នកដំណើរ 5 សន្យាមិនឡើងថ្លៃក្នុងឱកាសបុណ្យភ្ជុំបិណ្ឌ

ភ្នំពេញៈ ក្រុមហ៊ុនដឹកជញ្ជូនអ្នកដំណើរចំនួន 5ក្រុមហ៊ុន បានសន្យាជាមួយរដ្ឋមន្ត្រីក្រសួងសាធារណការ និងដឹកជញ្ជូនថា ពួកគេនឹងមិនដំឡើងថ្លៃសំបុត្ររថយន្តក្រុងក្នុងឱកាសថ្ងៃឈប់សម្រាកនាពិធីបុណ្យភ្ជុំបិណ្ឌសប្តាហ៍ក្រោយនេះឡើយ។

លោកទេសរដ្ឋមន្ត្រី ស៊ុន ចាន់ថុល និងជារដ្ឋមន្ត្រីក្រសួងសាធារណការ និងដឹកជញ្ជូនបានមានប្រសាសន៍ឲ្យដឹងកាលពីល្ងាចថ្ងៃម្សិលមិញថា រដ្ឋាភិបាលបានសំណូមពរដល់ក្រុមហ៊ុនដឹកអ្នកដំណើរទាំងអស់មិនត្រូវដំឡើងថ្លៃសំបុត្រធ្វើដំណើរឡើយ ព្រោះដើម្បីសំដៅធ្វើយ៉ាងណាជួយសម្រួលដល់ពលរដ្ឋក្នុងការធ្វើដំណើរទៅកាន់ស្រុកកំណើតជួបជុំគ្រួសារ និងសាច់ញាតិបងប្អូន។ លោកបន្តថា សម្រាប់ការប្តេជ្ញារបស់ក្រុមហ៊ុនខាងលើនេះ ប្រសិនបើមានក្រុមហ៊ុនណាបានប្តេជ្ញាថាមិនឡើងថ្លៃហើយ តែដល់ថ្ងៃនោះបែជាអនុវត្តផ្ទុយពីការប្ដេជ្ញាវិញនោះ សូមឲ្យប្រជាពលរដ្ឋរាយការណ៍បន្ទាន់មក ក្រសួងតាមរយៈបណ្តាញសង្គមក៏បាន ឬដោយផ្ទាល់នៅក្រសួងក៏បាន។ ឯកឧត្តម បានបញ្ជាក់ថា ៖

«កាលពីថ្ងៃម្សិលមិញ មានក្រុមហ៊ុនដឹកជញ្ជូនអ្នកដំណើរចំនួន 5ក្នុងចំណោម 7ក្រុមហ៊ុនបានចូលរួមកិច្ចប្រជុំ ជាមួយក្រសួងសាធារណការ និងដឹកជញ្ជូន ដោយតំណាងក្រុមហ៊ុនទាំងនោះបានប្តេជ្ញាថា នឹងមិនដំឡើងថ្លៃសំបុត្រធ្វើដំណើរឡើយ»។

ជារៀងរាល់ឆ្នាំ មុនពេលដល់រដូវបុណ្យទានសំខាន់ៗរដ្ឋាភិបាលកម្ពុជាតែងធ្វើការអំពាវនាវដល់ម្ចាស់ក្រុមហ៊ុនដឹកជញ្ជូនអ្នកដំណើរ ក៏ដូចជារថយន្តឈ្នួល (តាក់ស៊ី) ទាំងអស់ មិនត្រូវឆ្លៀតឱកាសដំឡើងថ្លៃទេ ប៉ុន្តែការអំពាវនាវទាំងនេះហាក់មិនមានប្រសិទ្ធភាពទាល់តែសោះ(សូមបញ្ជាក់ថា ទាល់តែសោះ!) ដែលអ្នកជំនាញមួយចំនួនលើកឡើងថា ដើម្បីឱ្យការអំពាវនាវនេះឲ្យមានប្រសិទ្ធភាព វាទាមទារឲ្យសាមីក្រសួងត្រូវតែអនុវត្តច្បាប់ឲ្យបានតឹងរ៉ឹង។

ប៉ុន្តែអ្នកជំនាញក្នុងវិស័យទេសចរណ៍លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជាបានថ្លែងថា ការដំឡើងតម្លៃសំបុត្រ និងសេវាកម្មម្ហូបអាហារនានាក្នុងឱកាសបុណ្យទានបានក្លាយជាប្រពៃណីទៅហើយនៅកម្ពុជា ដែលទាមទារឲ្យមានការព្រមាន និងចាត់វិធានការឱ្យបានច្បាស់លាស់ចំពោះបញ្ហានេះ៕

September 15, 2017

លំហូរវិនិយោគផ្ទាល់ពីបរទេសក្នុងវិស័យធនាគារមានកំណើនជិត 90%

ភ្នំពេញ៖ កម្ពុជាត្រូវបានគេមើលឃើញថា ជាប្រទេសមួយស្ថិតនៅក្នុងក្រសែភ្នែកអ្នកវិនិយោគបរទេសដែលមានសក្តានុពលទៅលើការវិនិយោគលើគ្រប់វិស័យ ជាក់ស្តែងនៅក្នុងឆមាសទី1 ដើមឆ្នាំ2017នេះ លំហូរវិនិយោគផ្ទាល់បរទេសក្នុងវិស័យធនាគារមានកំណើនប្រមាណជាជិត90%ឯណោះ។

ក្នុងជំនួបផ្លូវការជាមួយលោក Mathew Fox នាយកប្រតិបត្តិនៃធនាគារអភិវឌ្ឍន៍អាស៊ី(ADB) កាលពីម្សិលមិញនេះ ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជាមានប្រសាសន៍ថា ដោយសារកម្ពុជាមានស្ថិរភាពនយោបាយ និងសុខសន្តិភាពពេញលេញដែលជាកត្តាដ៏សំខាន់ក្នុងការជំរុញឱ្យកម្ពុជាសម្រេចបានអត្រាកំណើនសេដ្ឋកិច្ចខ្ពស់នារយៈពេលជាងពីរទសវត្សរ៍ចុងក្រោយនេះ។

នៅឆ្នាំ2017នេះ កម្ពុជារំពឹងថា នឹងសម្រេចបានកំណើនសេដ្ឋកិច្ចរឹងមាំក្នុងអត្រា 7% ជាមួយនឹងស្ថិរភាពម៉ាក្រូសេដ្ឋកិច្ចដោយអត្រាអតិផរណាមានកម្រិតទាបសមស្របត្រឹម 2.3%។ ឯកឧត្តមមានប្រសាសន៍ថា «ក្នុងឆមាសទី1 ឆ្នាំ2017នេះ លំហូរវិនិយោគផ្ទាល់ពីបរទេសក្នុងវិស័យធនាគារមានកំណើនប្រមាណ 89% ខណៈឥណទានមានកំណើនសមស្របប្រមាណ 16%។ បរិយាប័ន្នហិរញ្ញវត្ថុដែលវាស់ដោយអត្រាប្រជាជនពេញវ័យកំពុងប្រើប្រាស់សេវាហិរញ្ញវត្ថុធៀបនឹងប្រជាជនពេញវ័យសរុបបានកើនដល់អត្រាប្រមាណ 55%»។

ក្រោមជំនួយបច្ចេកទេសរបស់ ADB កាលពីខែមិថុនា ឆ្នាំ2017កន្លងទៅរាជរដ្ឋាភិបាលបានសម្ពោធជាផ្លូវការនូវយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ2016-2025។ ផ្អែកតាមផែនការសកម្មភាពដែលមានចែងក្នុងយុទ្ធសាស្ត្រនេះ ធនាគារជាតិនៃកម្ពុជាសម្រេចបានការងារជាច្រើនដូចជា ការធ្វើឱ្យប្រសើរឡើងនូវជំនឿទុកចិត្ត និងអន្តរការិយកម្មហិរញ្ញវត្ថុការរក្សាស្ថិរភាពវិស័យហិរញ្ញវត្ថុ ការជំរុញអភិបាលកិច្ចល្អរបស់គ្រឹះស្ថានធនាគារ និងហិរញ្ញវត្ថុ និងការធ្វើឱ្យប្រសើរឡើងនូវប្រសិទ្ធភាព និងមុខងាររបស់ធនាគារជាតិនៃកម្ពុជា។

លទ្ធផលទទួលបានជាផ្លែផ្កានេះ ក៏មានការរួមចំណែកពីធនាគារអភិវឌ្ឍន៍អាស៊ី(ADB)ដែលតែងតែចូលរួមគាំទ្រ និងផ្តល់ជំនួយបច្ចេកទេសមកធនាគារជាតិនៃកម្ពុជា ក្នុងការអភិវឌ្ឍវិស័យហិរញ្ញវត្ថុ និងការកសាងសមត្ថភាពជំនាញរបស់មន្ត្រីបុគ្គលិកតាមរយៈអាហារូបករណ៍កិច្ចប្រជុំ សិក្ខាសាលា វគ្គបណ្តុះបណ្តាលនានាទាំងក្នុងក្របខ័ណ្ឌទ្វេភាគី និងសមាហរណកម្មសេវាហិរញ្ញវត្ថុអាស៊ាន។

ក្នុងឱកាសនោះដែរលោក Mathew Fox នាយកប្រតិបត្តិនៃធនាគារអភិវឌ្ឍន៍អាស៊ី ADB បានកោតសរសើរចំពោះកិច្ចខិតខំប្រឹងប្រែងរបស់ធនាគារជាតិនៃកម្ពុជា ក៏ដូចជារាជរដ្ឋាភិបាលកម្ពុជាក្នុងការអភិវឌ្ឍសេដ្ឋកិច្ចឱ្យមានការរីកចម្រើនជាលំដាប់។ លោកថា «ADB ប្តេជ្ញាបន្តគាំទ្រធនាគារជាតិនៃកម្ពុជា និងរាជរដ្ឋាភិបាលកម្ពុជាដើម្បីរួមចំណែកអភិវឌ្ឍសេដ្ឋកិច្ចប្រកបដោយចីរភាព»៕

September 15, 2017

មន្ទីរកសិកម្មខេត្តកណ្តាលប្រាថ្នាផ្គត់ផ្គង់បន្លែគ្មានជាតិគីមីទូទាំងប្រទេស

ភ្នំពេញៈ ប្រធានមន្ទីរកសិកម្មខេត្តកណ្តាលបានបង្ហាញពីមហិច្ឆតាចង់ប្រែក្លាយខេត្តកណ្តាលជាខេត្តផលិតបន្លែសរីរាង្គ ឬបន្លែគ្មានជាតិគីមីសម្រាប់ចែកចាយទូទាំងប្រទេស ដោយសារខេត្តនេះមានសក្តានុពលខាងការដាំបន្លែ។

លោក ប៊ុនទួន ស៊ីម៉ូណា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកណ្តាលបានថ្លែងឲ្យដឹងតាមទូរស័ព្ទនាព្រឹកថ្ងៃទី15 កញ្ញានេះថា មន្ទីរកំពុងរៀបចំការងារនេះដោយបានជួបប្រជុំជាមួយស្ថានទូតជប៉ុនចំនួន2ដងរួចមកហើយ និងត្រូវជួបពិភាក្សាជាមួយសភាពាណិជ្ជកម្មដើម្បីសុំការគាំទ្រលើគម្រោងនេះ ប៉ុន្តែភាគីជប៉ុនបានគាំទ្រគម្រោងនេះរួចហើយ។ លោកបន្តថា មហិច្ឆតារបស់លោកចង់ប្រែក្លាយខេត្តកណ្តាលឱ្យទៅជាខេត្តដែលមានសក្តានុពលខាងការផលិតបន្លែ ជាគោលដៅនៃការផលិតបន្លែសរីរាង្គដ៏ធំមួយ ដែលអាចផ្គត់ផ្គង់ទូទាំងប្រទេស និងបម្រើឲ្យការនាំចេញនាពេលអនាគត។

លោកបន្តថា “ខ្ញុំចង់ឲ្យមន្ទីរកសិកម្មខេត្តកណ្តាលក្លាយជាមន្ទីរគំរូមួយក្នុងក្របខ័ណ្ឌទូទាំងប្រទេស និងចង់ឱ្យក្លាយជាកន្លែងផលិតបន្លែសុវត្ថិភាពសម្រាប់ផ្គត់ផ្គង់ចូលទីផ្សារ ព្រោះបន្លែចរាចរលើទីផ្សារបច្ចុប្បន្ន មិនមានសុវត្ថិភាពនោះទេ។

គម្រោងខាងលើនេះ បានទទួលការគាំទ្រពីស្ថានទូតជប៉ុន ក្រុមហ៊ុន Hayashida Japan Agriculture Co., Ltd រដ្ឋាភិបាល និងសភាពាណិជ្ជកម្មកម្ពុជាផងដែរ។

ទោះជាយ៉ាងណាលោក ប៊ុនទួន ស៊ីម៉ូណា មិនបានបញ្ជាក់ឲ្យដឹងពីដើមទុនដែលត្រូវវិនិយោគក្នុងគម្រោងនេះទេ ប៉ុន្តែលោកបញ្ជាក់ថា ភាគីជប៉ុនបានគាំទ្រគម្រោងនេះរួចហើយ រង់ចាំតែការងារបច្ចេកទេស ការរៀបចំនិតិវិធី និងពេលវេលាចាប់ផ្តើមអនុវត្តប៉ុណ្ណោះ។

លោកឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជាបានថ្លែងឲ្យដឹងថា រដ្ឋាភិបាល និងសភាពាណិជ្ជកម្មគាំទ្រគម្រោងនេះ ជាគម្រោងដែលនឹងអនុវត្តជាជំហានដំបូងដោយមន្ទីរកសិកម្មខេត្តកណ្តាល ដែលជប៉ុនមានបច្ចេកទេសក្នុងការត្រួតពិនិត្យបន្លែដើម្បីរកសារធាតុគីមីដែលមានផលប៉ះពាល់ដល់សុខភាពជាមុនៗបន្លែទាំងនោះត្រូវដាក់ចូលឲ្យចរាចរលើទីផ្សារ។ លោកឧកញ៉ាបន្តថា កិច្ចការនេះប្រសិនជាទទួលបានជោគជ័យយើងនឹងពង្រីកការនាំចេញទៅក្រៅប្រទេសបន្ថែមទៀត និងនៅពេលប្រព័ន្ធត្រួតពិនិត្យនេះដំណើរការ និងកម្ពុជាមានលទ្ធភាពក្នុងការនាំចេញមិនខាន។

លោកឧកញ៉ាបន្តថា តាមព័ត៌មានដែលលោកទទួលបានគឺ ភាគីជប៉ុនបានផ្តល់ទុន20លានដុល្លាររួចហើយ ដើម្បីអនុវត្តគម្រោងនេះ ប៉ុន្តែរហូតមកទល់ពេលនេះ ការវិវឌ្ឍនៃគម្រោងនេះជាក់លាក់ ឬយ៉ាងណាលោកមិនមានព័ត៌មានលម្អិតនោះទេ៕

September 15, 2017

ម្ចាស់ផ្ទះ Arsenal វាយបកយកឈ្នះក្រុមភ្ញៀវមកពីអាល្លឺម៉ង់ 3-1

ការស៊ុតបាល់បញ្ចូលទីចំនួន3គ្រាប់ក្នុងតង់ទី2 បានជួយឱ្យក្រុមម្ចាស់ផ្ទះ Arsenal វាយបកយកឈ្នះក្រុមភ្ញៀវមកពីអាល្លឺម៉ង់ Cologne ក្នុងលទ្ធផល 3-1។

ការប្រកួតបើកឆាកក្នុងពូល H នៃពានរង្វាន់លំដាប់ទី2 របស់អឺរ៉ុប Europa League ដែលរៀបចំឡើងក្នុងកីឡដ្ឋាន Emirates Stadium ត្រូវបានពន្យារពេល1ម៉ោង បន្ទាប់ពីកើតមានបញ្ហាដែលបង្កឡើងដោយក្រុមអ្នកគាំទ្ររបស់ក្រុម Cologne ខណៈប៉ូលីសបានបញ្ជាក់ថា មានមនុស្សចំនួន4នាក់ត្រូវបានចាប់ខ្លួន។

គ្រាប់បាល់ទី1 ក្នុងការប្រកួតនោះបានកើតឡើងពីការទាត់ពីចម្ងាយ36.5ម៉ែត្រពីសំណាក់ខ្សែប្រយុទ្ធសញ្ជាតិកូឡំប៊ី Jhon Cordoba ក្នុងនាទីទី9 រំលងលើក្បាលអ្នកចាំទី David Ospina របស់ Arsenal។

ទោះបីជាយ៉ាងណា ក្រុមម្ចាស់ផ្ទះ Arsenal បានខិតខំពង្រឹកការលេងរបស់ខ្លួនយ៉ាងខ្លាំង រហូតអាចរកគ្រាប់បាល់តាមស្មើវិញ បន្ទាប់ពីចូលលេងតង់ទី2 បាន4នាទីពីសំណាក់កីឡាករបម្រុង Sead Kolasinac។ ខ្សែប្រយុទ្ធអន្តរជាតិឈីលី Alexis Sanchez រកបាន1គ្រាប់បន្ថែមក្នុងនាទីទី69 មុនពេលខ្សែការពារ Hector Bellerin បន្ថែមគ្រាប់ទី3 ក្នុងនាទីទី82 ដើម្បីបញ្ចប់ក្នុងលទ្ធផល 3-1។

Hector Bellerin បាននិយាយបន្ទាប់ពីការប្រកួតថា៖”យើងបានធ្វើការវាយបកដើម្បីទទួលជ័យជម្នះដ៏អស្ចារ្យ។ ក្រុមយើងនឹងខិតខំហ្វឹកហាត់បន្ថែមទៀត ដើម្បីប្រកួតជាមួយក្រុមជើងខ្លាំងតោខៀវ Chelsea ក្នុងក្របខណ្ឌ English Premier League នាថ្ងៃអាទិត្យចុងសប្តាហ៍នេះ។

ក្រុមដែលដឹកនាំដោយគ្រូបង្វឹកសញ្ជាតិបារាំង លោក Arsene Wenger នេះនឹងត្រូវប្រកួតបន្ទាប់ក្នុងក្របខណ្ឌ Europa League ដោយជួបជាមួយក្រុមពីប្រទេសបេឡារូស BATE។

ក្នុងការប្រកួតក្របខណ្ឌ Europa League កាលពីរាត្រីថ្ងៃព្រហស្បតិ៍នេះផងដែរ ម្ចាស់ផ្ទះអ៊ីតាលី Atalanta ដែលទើបមានឱកាសត្រឡប់ក្នុងលេងក្នុងពានរង្វាន់អឺរ៉ុបឡើងវិញបន្ទាប់ពីអាក់ខានរយៈពេល26ឆ្នាំ នោះ បានធ្វើរឿងដ៏គួរឱ្យភ្ញាក់ផ្អើលមួយ តាមរយៈការយកឈ្នះក្រុមជើងខ្លាំងរបស់អង់គ្លេស Everton ក្នុងលទ្ធផល 3-0៕

លទ្ធផលគូផ្សេងៗទៀតក្នុងការប្រកួតក្របខណ្ឌ Europa League

Slavia Prague (CZE) 1 Maccabi Tel Aviv (ISR) 0
Villarreal (ESP) 3 Astana (KAZ) 1
Young Boys (SUI) 1 Partizan Belgrade (SRB) 1
Dynamo Kiev (UKR) 3 Skenderbeu (ALB) 1
Istanbul Basaksehir (TUR) 0 Ludogorets (BUL) 0
Hoffenheim (GER) 1 Braga (POR) 2

Rijeka (CRO) 1 AEK Athens (GRE) 2
Austria Vienna (AUT) 1 AC Milan (ITA) 5
Apollon Limassol (CYP) 1 Lyon (FRA) 1
Copenhagen (DEN) 0 Lokomotiv Moscow (RUS) 0
Zlin (CZE) 0 Sheriff Tiraspol (MDA) 0

FCSB (ROU) 3 Viktoria Plzen (CZE) 0
Hapoel Beer Sheva (ISR) 2 Lugano (SUI) 1
Red Star Belgrade (SRB) 1 BATE Borisov (BLR) 1
Vitoria Guimaraes (POR) 1 Salzburg (AUT) 1
Marseille (FRA) 1 Konyaspor (TUR) 0

Hertha Berlin (GER) 0 Athletic Bilbao (ESP) 0
Zorya (UKR) 0 Ostersund (SWE) 2
Vitesse Arnhem (NED) 2 Lazio (ITA) 3
Zulte Waregem (BEL) 1 Nice (FRA) 5
Real Sociedad (ESP) 4 Rosenborg (NOR) 0
Vardar (MKD) 0 Zenit (RUS) 5

September 15, 2017

វិស័យឯកជនគួរសហការជាមួយរដ្ឋដើម្បីអនុវត្តចង្វាក់ផលិតកម្មខ្លួនឱ្យមានស្ថេរភាព

ភ្នំពេញ៖ លោកស្រី Claire Van der Vaeren អ្នកសម្របសម្រួលនៃអង្គការសហប្រជាជាតិនៅកម្ពុជា និងជាអ្នកសម្របសម្រួលជាមួយដៃគូអភិវឌ្ឍន៍ និងជាមួយតំណាងដៃគូអភិវឌ្ឍន៍មួយចំនួនទៀត រួមមានតំណាងស្ថានទូតអាល្លឺម៉ង់ ADB និង UNIDO បានជំរុញឱ្យមានការយកចិត្តទុកដាក់សហការគ្នារវាងរដ្ឋ និងវិស័យឯកជនដើម្បីអនុវត្តគម្រោងអាទិភាពនានាទាក់ទងវិស័យ ឧស្សាហកម្ម និងវិស័យសហគ្រាសធុនតូច និងមធ្យម (SME) នៅកម្ពុជា។

នៅក្នុងជំនួបជាមួយឯកឧត្តម ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម កាលពីម្សិលមិញនេះ លោកស្រី Claire Van der Vaeren អ្នកសម្របសម្រួលនៃអង្គការសហប្រជាជាតិនៅកម្ពុជាបានលើកឡើងពីសារៈសំខាន់នៃគោលដៅអភិវឌ្ឍន៍ប្រកបដោយនិរន្តរភាព (SDG) របស់អង្គការសហប្រជាជាតិដល់ឆ្នាំ 2030 ដែលប្រទេសជាសមាជិកទាំងអស់ត្រូវមានកិច្ចខិតខំប្រឹងប្រែងក្នុងការអនុវត្តឱ្យបានសម្រេចតាមគោលដៅដែលបានកំណត់។ លោកស្រីបញ្ជាក់ថា «គោលនយោបាយអភិវឌ្ឍន៍វិស័យឧស្សាហកម្ម (IDP)ដែលជាត្រីវិស័យដ៏សំខាន់ក្នុងការតម្រង់ទិសការអភិវឌ្ឍវិស័យឧស្សាហកម្មប្រកបដោយចីរភាព»។

ពាក់ព័ន្ធករណីនេះឯកឧត្តមទេសរដ្ឋមន្ត្រី ចម ប្រសិទ្ធ បានចាត់ទុកដៃគូអភិវឌ្ឍន៍មានសារៈសំខាន់សម្រាប់រួមចំណែកការអភិវឌ្ឍនៅកម្ពុជា។ ជាពិសេស នៅពេលថ្មីៗនេះកម្ពុជាត្រូវបានអង្គការ UNIDO ជ្រើសរើសជាប្រទេសចូលក្នុងសមាជិកអនុវត្តកម្មវិធីភាពជាដៃគូប្រចាំប្រទេស(PCP) ដែលកម្មវិធីនេះឆ្លើយតបជាវិជ្ជមានទៅលើគោលនយោបាយអភិវឌ្ឍន៍វិស័យឧស្សាហកម្មពីឆ្នាំ 2015-2025 ។ ឯកឧត្តមទេសរដ្ឋមន្ត្រីបានបន្តថា បច្ចុប្បន្នរាជរដ្ឋាភិបាលមានក្រុមការងាររវាងរាជរដ្ឋាភិបាល និងវិស័យឯកជនតាមវិស័យនីមួយៗដើម្បីដោះស្រាយបញ្ហាប្រឈមទាំងឡាយជាមួយវិស័យឯកជន។ ក៏ប៉ុន្តែក្រុមការងារមិនមានដៃគូអភិវឌ្ឍន៍ចូលរួមទេ ចំណុចនេះ ឯកឧត្តមទេសរដ្ឋមន្ត្រីបានផ្តល់សារៈសំខាន់ទៅលើការចូលរួមរបស់ដៃគូអភិវឌ្ឍន៍ដូច្នេះថា «ការប្រមូលផ្តុំឧស្សាហកម្ម ជាពិសេសសហគ្រាសធុនតូច និងមធ្យម ដែលនៅរប៉ាត់ រប៉ាយឱ្យចូលក្រោមច្បាប់ តាមរយៈសមាគម សម្ព័ន្ធ ឬសហព័ន្ធ ជាការចាំបាច់ដើម្បីពង្រឹងវិស័យនេះ ដែលបានដើរតួសំខាន់ក្នុងសរសៃឈាមសេដ្ឋកិច្ចជាតិ»

ជាចុងក្រោយ ដៃគូសន្ទនាបានឯកភាពបង្កើតនូវចំណុចទំនាក់ទំនង (FocusPoint) រវាងក្រសួងនិងដៃគូអភិវឌ្ឍន៍ដើម្បីពិភាក្សា និងផ្លាស់ប្តូរឯកសារគ្នាទៅវិញទៅមកក្នុងគោលដៅជំរុញប្រសិទ្ធភាព និងជោគជ័យលើការងារអនុវត្តគម្រោង៕

September 15, 2017

វិធីបណ្តុះទម្លាប់ហាត់ប្រាណដល់កូន

ក្នុងយុគសម័យដែលអ្នកណាៗក៏ភ្ញាក់រឭករឿងការហាត់ប្រាណដែរនោះ ឪពុកម្តាយក៏ត្រូវការឱ្យកូនលេងកីឡាដែរ តែពេលខ្លះវាជារឿងពិបាកខ្លាំងណាស់ក្នុងការជំរុញឱ្យក្មេងៗងាកខ្សែភ្នែកចេញពីអេក្រង់ទូរទស្សន៍ ឬហ្គេម ហើយបែរទៅមើលអ្វីផ្សេងនោះ ដូច្នេះទោះជាឪពុកម្តាយដឹងច្បាស់ពីគុណប្រយោជន៍របស់កីឡាក៏ដោយ តែក៏មិនអាចធ្វើបានដូចចិត្តដែរ ដោយសារតែកូនៗរឹងទទឹងចំពោះបំណងល្អរបស់ឪពុកម្តាយ។

ឧទាហរណ៍ដែលយើងមើលឃើញច្បាស់ញឹកញាប់នោះគឺ ក្មេងស្រែកយំមិនព្រមរៀនហែលទឹក ឬឈ្លោះជាមួយប៉ាម៉ាក់ពេលត្រូវបង្ខំឱ្យហាត់ប្រាណជាដើម។ បើអ្នកមានបញ្ហាដូចដែលបានរៀបរាប់ក្នុងសេចក្តីផ្តើមខាងលើនោះ សូមសាកល្បងធ្វើតាមពាក្យណែនាំដូចតទៅ ៖

1/ ធ្វើខ្លួនជាគំរូដ៏ល្អ៖ ក្មេងនឹងប្រតិបត្តិតាមគំរូឪពុកម្តាយច្រើនជាងពាក្យជំរុញបង្ខំ ឬអង្វរ ដូច្នេះបើចង់ឱ្យកូនហាត់ប្រាណអ្នកគួរធ្វើជាអ្នកប្រតិបត្តិឱ្យកូនបានឃើញជាមុនសិន។

2/ ហាត់ប្រាណបែបសប្បាយ៖ ការហាត់ប្រាណគួរតែជារឿងសប្បាយរីករាយ មិនថាតែការហាត់ប្រាណលើកដៃលើកជើងធម្មតា ហាត់ហែលទឹក ឬរត់ក៏ដោយ កុំឱ្យមានការបង្ខំចិត្ត ឬធ្វើឱ្យក្លាយជារឿងដែលគួរឱ្យធុញទ្រាន់ឱ្យសោះ។

3/ ផ្តល់រង្វាន់៖ ប្រើការជំរុញដោយរង្វាន់ដ៏សមរម្យដែលពាក់ព៏ន្ធនឹងកិច្ចការងារកីឡា ដូចជា ទិញខោកីឡាថ្មីឱ្យសម្រាប់រត់ ឬអាវបាល់ទាត់ពិភពលោកឱ្យជារង្វាន់នៅពេលកូនធ្វើបានតាមគោលដៅ។

4/ ត្រូវចេះអត់ធ្មត់៖ កុំទៅតូចចិត្តតូចថ្លើមអី បើកូនមិនចាប់អារម្មណ៍ ឬសម្តែងអាការធុញទ្រាន់ចំពោះ “របស់ល្អ” ដែលយើងព្យាយាមប្រគល់ឱ្យ ព្រោះយ៉ាងណាក្មេងនៅតែជាក្មេងហ្នឹងឯង ទើបជារឿងដែលយើងត្រូវប្រើក្តីអត់ធន់ក្នុងការបណ្តុះនិស្ស័យស្រឡាញ់ការហាត់ប្រាណដល់គេ។

5/ ហាត់ប្រាណរួមគ្នា៖ ហាត់ប្រាណរួមគ្នាទាំងគ្រួសារ ដែលមានផលល្អក្នុងការជួយរឹតចំណងសម្ពន្ធភាពក្នុងក្រុមគ្រួសារ និងជួយកាត់បន្ថយចន្លោះរវាងវ័យបានទៀតផង។

6/ ហាត់ប្រាណមិនមែនការយកចាញ់ឈ្នះគ្នា៖ កុំទៅសង្កត់ធ្ងន់លើរឿងការប្រកួតយកចាញ់ឈ្នះ ព្រោះក្មេងម្នាក់ៗមានសមត្ថភាពខាងកីឡា ខុសប្លែកពីគ្នា តែគ្រប់គ្នាគួរបានទទួលការបំផុសឱ្យហាត់ប្រាណ ទោះជារត់មកដល់ទីមុនគេ ឬទីម្ភៃក៏ដោយ។

7/ រៀបចំផែនការរយៈពេលវែង៖ មិនមែនលោកអ្នកត្រូវការត្រឹមតែចង់អួតអ្នកដទៃថា មានកូនប្រុសអាយុ10ឆ្នាំជាអ្នកកីឡារត់ប្រណាំងនោះទេ តែគួររៀបផែនការឱ្យគេចាប់អារម្មណ៍ចេះថែរក្សាសុខភាព និងភាពរឹងប៉ឹងរបស់រាងកាយអស់មួយជីវិត។

8/ កុំប្រៀបធៀបកូនជាមួយក្មេងដទៃ៖ ឈប់ប្រៀបធៀបកូនរបស់អ្នកជាមួយក្មេងដទៃទៀត ព្រោះវាមានតែធ្វើឱ្យគេអន់ចិត្តលែងចង់ធ្វើអ្វីទាំងអស់។

ឡារ៉ែន ជឿថា ពាក្យណែនាំទាំង 8ចំណុចខាងលើនេះប្រហែលជាអាចជួយឪពុកម្តាយ ឬអាណាព្យាបាលក្នុងការបណ្តុះទម្លាប់និស្ស័យដល់កូនក្មួយបានខ្លះមិនខាន៕

September 15, 2017

Category: សង្គម និងសេដ្ឋកិច្ច