ដើម្បីផ្តល់ភាពងាយស្រួលដល់ប្រជាពលរដ្ឋក្នុងការទទួលបានសេវារដ្ឋបាលសាធារណៈឆាប់រហ័ស កាត់បន្ថយការចំណាយពេលវេលា និងសោហ៊ុយ រដ្ឋាភិបាលគ្រោងដាក់ឱ្យដំណើរការសេវារដ្ឋបាលសាធារណៈតាមប្រព័ន្ធអនឡាញ (Online)នៅតាមការិយាល័យច្រកចេញ-ចូលតែមួយនៅតាមបណ្ដាខេត្ត-ក្រុង ស្រុក-ខណ្ឌគោលដៅមួយចំនួនដើម្បីធ្វើការសាកល្បងប្រើប្រាស់ នៅពេលឆាប់ៗនេះ។
លោក ជា សេរីវឌ្ឍ ទីប្រឹក្សាថ្នាក់ជាតិលើការអភិវឌ្ឍប្រព័ន្ធ Online ដែលបាននិងកំពុងជួយគាំទ្រដល់នាយកដ្ឋានមុខងារ និងធនធាននៃអគ្គនាយកដ្ឋានរដ្ឋបាលក្នុងការបង្កើតប្រព័ន្ធសេវា Online សម្រាប់ការិយាល័យច្រកចេញចូលតែមួយបានបញ្ជាក់ថា លោកត្រូវធ្វើការសិក្សាអំពីស្ថានភាពបច្ចុប្បន្នរបស់រដ្ឋបាលថ្នាក់ជាតិ និងរដ្ឋបាលថ្នាក់ក្រោមជាតិ ព្រមទាំងប្រជាពលរដ្ឋក្នុងប្រទេសកម្ពុជាលើការប្រើប្រាស់បច្ចេកវិទ្យាព័ត៌មានវិទ្យាដើម្បីទទួលយកនូវការផ្តល់សេវាកម្មតាមប្រព័ន្ធទំនើប (Modernization) ដូចប្រទេសជឿនលឿនផ្សេងៗទៀតដែរ។
លោកបន្តថា លោកត្រូវសិក្សាលើគម្រោងនេះក្នុងរយៈពេល3ខែ មុននឹងដាក់ចេញនូវជម្រើសនានាដែលសមស្របសម្រាប់ក្រសួងមហាផ្ទៃក្នុងការបង្កើតប្រព័ន្ធទំនើប (ប្រព័ន្ធផ្តល់សេវាកម្មOnline) ដើម្បីផ្តល់សេវាជូនប្រជាពលរដ្ឋឱ្យកាន់តែឆាប់រហ័ស កាត់បន្ថយការចំណាយពេលវេលា និងសោហ៊ុយក្នុងការធ្វើដំណើរមកទទួលសេវាសាធារណៈរបស់ប្រជាពលរដ្ឋ។
លោក ពុជ វណ្ណៈ អាជីវកររស់នៅក្រុងតាខ្មៅបានសម្តែងការសាទរទៅនឹងរដ្ឋាភិបាលដែលត្រៀមផ្តល់សេវាកម្មរដ្ឋបាលសាធារណៈតាមប្រព័ន្ធអនឡាញនៅការិយាល័យនៃច្រកចេញ-ចូលតែមួយនេះ។ លោកនិយាយថា តាមរយៈសេវាកម្មអនឡាញខាងលើពលរដ្ឋនឹងទទួលបានអត្ថប្រយោជន៍ជាច្រើន ដូចជាមិនចំណាយក្រៅផ្លូវការ ចំណេញពេលវេលាក្នុងការបំពេញសំណុំបែបបទផ្សេងៗដោយផ្ទាល់នៅលើទូរសព្ទដៃ រួមទាំងចំណេញថវិកាក្នុងការធ្វើដំណើរជាដើមផង ដោយពលរដ្ឋគ្រាន់តែបំពេញសំណុំបែបបទ និងបញ្ជូនឯកសារតាមប្រព័ន្ធ Online និងបង់ប្រាក់ទៅតាមក្រុមហ៊ុនដៃគូសហការណាមួយជាការស្រេច។
លោក សន ជ័យ ជាប្រធានអង្គការសម្ព័ន្ធគណនេយ្យភាពសង្គមកម្ពុជាមានប្រសាសន៍ថា ការចុះបញ្ជីតាមប្រព័ន្ធអនឡាញបានផ្តល់ភាពងាយស្រួលយ៉ាងខ្លាំង ខណៈដែលវិស័យបច្ចេកវិទ្យាព័ត៌មានមានការរីកចម្រើនខ្លាំង ព្រោះវាផ្តល់ភាពងាយស្រួលទី1. ប្រជាពលរដ្ឋមិនចាំបាច់ចំណាយពេលវេលាទៅបំពេញសំណុំបែបបទនៅការិយាល័យច្រកចេញ-ចូលតែមួយ។ ទី2.កាត់បន្ថយនូវការចំណាយក្រៅផ្លូវការផ្សេង។ ទី3.ប្រព័ន្ធនេះផ្តល់ជាគំរូល្អសម្រាប់ធានាបាននូវតម្លាភាពក្នុងការផ្តល់សេវានេះឱ្យបានឆាប់រហ័ស។
យ៉ាងណាក៏ដោយ ប្រជាពលរដ្ឋនៅតាមតំបន់ដាច់ស្រយាល ឬពលរដ្ឋដែលមានវ័យចំណាស់ មួយចំនួន ពួកគាត់មិនចេះប្រើទូរស័ព្ទស្មាតហ្វូនទំនើបៗឡើយ ធ្វើឱ្យមិនអាចចុះបញ្ជីស្នើសុំ លិខិតរដ្ឋបាលសាធារណៈតាមប្រព័ន្ធអនឡាញនេះបាន។ ករណីនេះលោក សន ជ័យ បានស្នើសុំដល់រដ្ឋាភិបាលត្រូវធ្វើយ៉ាងណាពង្រឹងការងារផ្តល់សេវារដ្ឋបាលសាធារណៈនៅការិយាល័យច្រកចេញ-ចូលតែមួយធ្វើយ៉ាងណាផ្តល់សេវាជូនពលរដ្ឋប្រកបដោយតម្លាភាព និងបានឆាប់រហ័សឆ្លើយតបនឹងតម្រូវ-ការដែលប្រជាពលរដ្ឋចង់បាន។
សូមបញ្ជាក់ថា រាជរដ្ឋាភិបាលកម្ពុជាតាមរយៈក្រសួងមហាផ្ទៃបានបង្កើត និងដាក់ឱ្យដំណើរការនូវការិយាល័យច្រកចេញ-ចូលតែមួយដើម្បីផ្តល់សេវាជូនប្រជាពលរដ្ឋបាន40ខេត្ត-ក្រុង ស្រុក-ខណ្ឌគោលដៅរួចហើយ។ សម្រាប់ឆ្នាំ2017- 2018នេះ ក្រសួងបាននិងកំពុងពង្រីកតាមស្រុកគោលដៅចំនួន10បន្ថែមទៀត។ លើសពីនេះទៀត ថ្មីៗនេះរាជរដ្ឋាភិបាលកម្ពុជាបានដាក់ចេញអនុក្រឹត្យស្តីពីការបង្កើតយន្តការច្រកចេញ-ចូលតែមួយសម្រាប់ការផ្តល់សេវារដ្ឋបាលថ្នាក់ក្រោមជាតិដើម្បីប្រមូលផ្តុំការផ្តល់សេវារដ្ឋបាលលើវិស័យនានានៅកន្លែងតែមួយ លើកកម្ពស់គុណភាព ប្រសិទ្ធភាព តម្លាភាពគណនេយ្យភាព បង្កលក្ខណៈងាយស្រួល និងឆ្លើយតបទាន់ពេលវេលាទៅនឹងតម្រូវការរបស់ប្រជាពលរដ្ឋ។
ទន្ទឹមនឹងនេះ រាជរដ្ឋាភិបាលតាមរយៈក្រសួងមហាផ្ទៃក៏បាននិងកំពុងពិនិត្យមើលជម្រើសនានាដើម្បីធ្វើការផ្តល់សេវាកម្មមួយចំនួនតាមប្រព័ន្ធទំនើប (ផ្តល់សេវាប្រព័ន្ធ Online) នៅតាមការិយាល័យច្រកចេញ-ចូលតែមួយដើម្បីជំរុញការផ្តល់សេវារដ្ឋបាលឱ្យកាន់តែប្រសើរ និងងាយស្រួលសម្រាប់ប្រជាពលរដ្ឋនៅក្នុងខេត្ត-ក្រុង ស្រុក-ខណ្ឌគោលដៅមួយចំនួនដែលរួមមានខណ្ឌពោធិ៍សែនជ័យ ខណ្ឌសែនសុខនៃរាជធានីភ្នំពេញ ក្រុងតាខ្មៅខេត្តកណ្តាល ក្រុងបាត់ដំបង និងស្រុកបវេលខេត្តបាត់ដំបង ក្នុងគោលបំណងដើម្បីរៀបចំជាជម្រើសនានានៃការផ្តល់សេវារដ្ឋបាលរបស់ការិយាល័យច្រកចេញ-ចូលតែមួយតាមប្រព័ន្ធ Online៕
