គ្រប់ក្រុមហ៊ុន សហគ្រាស ឬខ្សែចង្វាក់ផលិតកម្មទាំងអស់តែងត្រូវការជាចាំបាច់នូវវត្តមាន និងការចូលរួមយ៉ាងសស្រាក់សស្រាំអំពីបុគ្គលិកដែលសកម្មៗ ដែលជាផ្នែកមួយដ៏សំខាន់ក្នុងការបង្កើតជាសមិទ្ធផលរួមរបស់ស្ថាប័ន។ មានបុគ្គលិកខ្លាំងគឺជាអ្វីដែលម្ចាស់ក្រុមហ៊ុនត្រូវការ តែការក្លាយខ្លួនជាមនុស្សខ្លាំងក៏ជាចំណុចដែលបុគ្គលិកទាំងឡាយត្រូវតែធ្វើផងដែរ ដើម្បីបង្ហាញពីការអភិវឌ្ឍជីវិតការងារ និងការរស់នៅ។
ពាក់ព័ន្ធនឹងបញ្ហានេះនាយកក្រុមហ៊ុន Anussa Event planer បានលើកឡើងថា អ្វីៗគ្រប់យ៉ាងនៅលើពិភពលោកយើងនេះ គឺជាប្រព័ន្ធនៃការបង់ថ្លៃ ប្រសិនបើយើងចង់ឱ្យគេផ្តល់តម្លៃមកយើងលុះត្រាតែយើងផ្តល់ឱ្យគេវិញនូវអ្វីដែលគេត្រូវការ។ ការបណ្តុះបណ្តាលសមត្ថភាពខ្លួនឯងឱ្យក្លាយជាមនុស្សខ្លាំងដែលគេត្រូវការ គឺជាវិធីសាស្ត្រល្អមួយដើម្បីទទួលបានផលប្រយោជន៍ច្រើនសម្រាប់ខ្លួនឯង។ ជាគន្លឹះដែលសហគ្រិនខាងលើលើកឡើងគឺធ្វើរឿងទាំងឡាយណាដែលមនុស្សដទៃមិនចង់ធ្វើ អាចជំរុញយើងឱ្យក្លាយជាមនុស្សដែលមានតម្លៃ ព្រោះថា អ្នកដែលអាចធ្វើរឿងដែលគេធ្វើមិនបាន គឺជាមនុស្សពិសេស។
លោក សេង ពិសិដ្ឋ បាននិយាយថា ៖ “ធ្វើការ-ងារដែលលំបាក ធ្វើការងារដែលគេខ្ជិលធ្វើ និងធ្វើការងារដែលមនុស្សដទៃកម្រនឹងធ្វើបាន គឺជារឿងល្អបំផុតក្នុងការជំរុញឱ្យយើងក្លាយជាមនុស្សសំខាន់ក្នុងស្ថាប័នមួយ។ លោក សេង ពិសិដ្ឋ បានលើកឡើងផងដែរថាការធ្វើការងារអ្វីក៏ដោយ ឱ្យតែមានការតាំងចិត្ត ហើយខិតខំប្រឹងប្រែងដោយកត្តាជំរុញ និងមានការតស៊ូក្នុងភាពជាអ្នកដែលធ្វើនូវរឿងដែលមានប្រយោជន៍ ហើយខុសពីគេ យើងនឹងអាចក្លាយជាមនុស្សម្នាក់ដែលឡើងតំណែង ឡើងប្រាក់ខែ ឬទទួលបានឱកាសក្នុងការលើកទឹកចិត្តច្រើនជាងគេព្រោះថា យើងបានផ្តល់ឱកាសសម្រាប់ខ្លួនឯង និងបង្កើនប្រសិទ្ធភាពការងារបានល្អសម្រាប់ស្ថាប័ន។
ពាក់ព័ន្ធនឹងបញ្ហានេះ សហគ្រិនវ័យក្មេង លោកឆាក់ សុជាតិ បានលើកឡើងថា ដើម្បីជំរុញបុគ្គលិកឱ្យមានការតស៊ូ លុះត្រាតែមានការអភិវឌ្ឍផ្នត់គំនិតរបស់បុគ្គលិកនោះផ្ទាល់តែម្តង ព្រោះថា នៅពេលដែលបុគ្គលិកធ្វើការងារដើម្បីតែប្រាក់ខែ ឬគាត់គិតថា គាត់ធ្វើការងាររាល់ថ្ងៃ ម្ចាស់ក្រុមហ៊ុនចំណេញពីគាត់ច្រើន ហើយខំធ្វើគ្រប់យ៉ាងដើម្បីតែផលប្រយោជន៍ផ្ទាល់ខ្លួន នោះគាត់នឹងខាតបង់ទៅវិញទេ។ ការធ្វើការងារនៅក្នុងក្រុមហ៊ុនមួយ គឺជាការពឹងផ្អែកលើគ្នាទៅវិញទៅមក ម្ចាស់ក្រុមហ៊ុនត្រូវការបុគ្គលិកខ្លាំង តែបុគ្គលិកក៏ត្រូវការស្ថាប័នដើម្បីអភិវឌ្ឍខ្លួនដែរ។
លោក ឆាក់ សុជាតិ បាននិយាយថា ៖ “បុគ្គលិកដែលមានការតស៊ូតែងតែចេះមើលឃើញពីចំណុចវិជ្ជមានរបស់ស្ថាប័ន និងស្ថានភាពដែលខ្លួនឯងកំពុងស្ថិតនៅ ព្រោះថា ស្ថិតក្នុងកាលៈទេសៈដែលគាត់នៅជាបុគ្គលិក គាត់បានមើលឃើញពីឱកាសក្នុងការអភិវឌ្ឍបានយ៉ាងល្អ។ គាត់អាចគិតថា កន្លែងការងារ គឺជាកន្លែងរៀនសូត្រដ៏ល្អបំផុត ដែលផ្តល់ឱ្យគាត់ទាំងចំណេះដឹង ឱកាសឡើងតំណែង និងប្រាក់ចំណូលថែមទៀតផង។
លោក សុជាតិ បានលើកឡើងផងដែរថា ជាធម្មតាមនុស្សណាម្នាក់ដែលអាចមានចិត្តតស៊ូបាន លុះត្រាតែមានកម្លាំងជំរុញ និងមានការលើកទឹកចិត្ត ហើយកម្លាំងជំរុញនឹងអាចកើតមានឡើងនៅពេលដែលយើងអភិវឌ្ឍខ្លួនឯងក្នុងភាពវិជ្ជមាន។ ជាឧទាហរណ៍ ប្រសិនបើយើងមើលឃើញពីចំណុចវិជ្ជមាន ហើយគិតថាក្រុមហ៊ុនដែលយើងធ្វើការងារនោះដូចជាកម្មសិទ្ធរបស់យើងផ្ទាល់ យើងនឹងខិតខំប្រឹងប្រែងគ្រប់បែបយ៉ាងដោយមិនខ្លាចនឿយហត់ដើម្បីឱ្យក្រុមហ៊ុនមួយនោះរីកចម្រើន នៅពេលនោះយើងក៏នឹងទទួលបានការទុកចិត្តពីថ្នាក់ដឹកនាំក្រុមហ៊ុន ដែលកត្តាទាំងអស់នេះនឹងជំរុញយើងឱ្យមានការតស៊ូកាន់តែខ្លាំងឡើង។
ស្របជាមួយគ្នានេះដែរ ប្រធានផ្នែកគ្រប់គ្រងបច្ចេកទេសក្នុងក្រុមហ៊ុនមួយ លោក លី សុភា បានលើកឡើងថា ការគេចចេញពីការងារច្រើន មិនមែនជារឿងត្រឹមត្រូវសម្រាប់បុគ្គលិកម្នាក់ៗនោះទេ ព្រោះថា ចំណុចនេះអាចធ្វើឱ្យគេបាត់បង់ឱកាសក្នុងការធ្វើការងារធំៗទៅវិញទេ។ នៅពេលដែលស្ថាប័នតម្រូវឱ្យយើងទទួលភារកិច្ចណាមួយដែលយើងគិតថាវាធ្ងន់សម្រាប់យើង ជាទូទៅ យើងម្នាក់ៗអាចនឹងគិតថា វាជាបន្ទុកដែលធ្វើឱ្យយើងមិនសប្បាយចិត្ត តែសម្រាប់អ្នកដែលមានគំនិតតស៊ូ គេគិតផ្ទុយពីនេះទៅវិញ។ បុគ្គលិកដែលមានគំនិតតស៊ូក្នុងការងារ គេបែរជាគិតថា វាជាឱកាសល្អសម្រាប់ឱ្យរូបគេបានសាកល្បងហ្វឹកហាត់ខ្លួនឯងដើម្បីទទួលខុសត្រូវលើការងារដែលខ្លួនមិនធ្លាប់បានធ្វើពីមុនមក។
លោក លី សុភា បាននិយាយថា ៖ “មនុស្សជាច្រើនគិតថា ការដែលគ្រាន់តែធ្វើការងារបច្ចុប្បន្នឱ្យល្អ គឺជារឿងល្អបំផុតហើយសម្រាប់ជីវិតការងារ តែសម្រាប់មនុស្សមួយចំនួនដែលអាចវិវឌ្ឍខ្លួនលឿននៅក្នុងស្ថាប័ន គេបែរជារង់ចាំមើលឱកាសក្នុងការបន្ថែមការងារសំខាន់សម្រាប់ខ្លួនឯងទៅវិញ ព្រោះនៅពេលដែលគេទទួលខុសត្រូវលើការងារកាន់តែច្រើន គេក៏នឹងមានឱកាសកាន់តែធំសម្រាប់ខ្លួនឯងផងដែរ។
លោក សុភា បានលើកឡើងផងដែរថា ជាទូទៅអ្នកធ្វើការងារតែងតែចង់បានការឡើងតំណែង ឬអាចមិនសូវជាសប្បាយចិត្តប៉ុន្មានឡើយនៅពេលដែលថ្នាក់លើមិនបានជំរុញខ្លួនឱ្យឡើងតំណែង ឬយកអ្នកថ្មីមកគ្រប់គ្រងពួកគាត់ខណៈដែលពួកគាត់ជាបុគ្គលិកចាស់។ ការពិតពេលខ្លះអ្នកគ្រប់គ្រងពិតជាចង់ជំរុញបុគ្គលិកចាស់ៗ ឱ្យមានឱកាសច្រើនដែរ តែអ្វីដែលសំខាន់នោះ គឺគាត់ក៏មើលពីសមត្ថភាពក្នុងការគ្រប់គ្រងរបស់បុគ្គលិកទាំងនោះផងដែរប្រសិនបើការងារសំខាន់ៗមួយចំនួនដែលពេលខ្លះថ្នាក់លើចង់ឱ្យគាត់ជួយ តែគាត់បែរជាមិនទទួលយក ឬធ្វើមិនកើត គាត់ក៏មិនអាចក្តោបក្តាប់ ឬទទួលបានឱកាសល្អនោះដើម្បីបានការដំឡើងតំណែង និងប្រាក់ខែបានដែរ៕
