Category: សង្គម និងសេដ្ឋកិច្ច

លោក Pochettino សង្ឃឹមថា បញ្ហារបួសរបស់ Kane មិនធ្ងន់ធ្ងរឡើយ ក្រោយផ្តួល Bournemouth
លោក Mauricio Pochettino សង្ឃឹមថា បញ្ហារបួសកជើងរបស់ខ្សែប្រយុទ្ធ Harry Kane មិនមានកម្រិតធ្ងន់ធ្ងរឡើយ ក្រោយពីតារាឆ្នើមរូបនេះត្រូវបានបង្ខំចិត្តប្តូរចេញក្នុងតង់ទី1 ក្នុងពេលក្រុមខ្លួនTottenham ទទួលជ័យជម្នះ ក្នុងលទ្ធផល 4-1 នៅលើទឹកដីក្រុម Bournemouth កាលពីថ្ងៃអាទិត្យ។
ខ្សែប្រយុទ្ធអន្តរជាតិអង់គ្លេស Kane នឹងត្រូវចូលទទួលការពិនិត្យសុខភាពនៅថ្ងៃចន្ទនេះ ក្រោយពីបានរងរបួសនៅកីឡដ្ឋាន Vitality។
ស្របពេលដែលលោក Gareth Southgate អ្នកចាត់ការទូទៅរបស់ក្រុមជម្រើសជាតិអង់គ្លេសនឹងត្រូវជ្រើសរើសសមាជិកក្រុមរបស់ខ្លួនសម្រាប់ការប្រកួតមិត្តភាពអន្តរជាតិជាមួយនឹងក្រុមជម្រើសជាតិហូឡង់ និងអ៊ីតាលី នៅមុនពេលក្រុម Spurs ត្រូវធ្វើការប្រកួតពាន FA Cup វគ្គ8ក្រុមចុងក្រោយជាមួយនឹងក្រុម Swansea នាសប្តាហ៍ក្រោយដែរ ដោយ Kane អាចនឹងប្រឈមមុខនឹងការអវត្តមានក្នុងរយៈពេលដ៏យូរមួយសម្រាប់ទាំងក្លិប និងប្រទេសរបស់គេ។ ទោះបីជាយ៉ាងណា លោក Pochettino គ្រូបង្វឹករបស់ក្រុម Spurs បានបញ្ជាក់ថា វាឆាប់ពេកហើយក្នុងការដឹងពីទំហំនៃបញ្ហារបួសនេះ ដែលជាការរងរបួសត្រង់ជង្គង់ដែល Kane ធ្លាប់បានជួបកាលពីលើកមុន។ នៅពេលដែលត្រូវបានចោទសួរអំពីស្ថានភាពរបស់ខ្សែប្រយុទ្ធដែលរកបានគ្រាប់បាល់ច្រើនជាងគេរបស់ក្របខ័ណ្ឌ Premier League រូបនេះ លោក Pochettino បានឆ្លើយថា៖ «យើងត្រូវតែរង់ចាំរហូតដល់ថ្ងៃស្អែកនេះ ពីព្រោះយើងត្រូវតែធ្វើការពិនិត្យមើលជង្គង់របស់គេ»។
គ្រូបង្វឹកសញ្ជាតិអាហ្សង់ទីនរូបនេះបានបន្ថែមទៀតថា៖ «ពិតណាស់ រូបគេបានរងរបួសដែលវាជាបញ្ហារបួសនៅត្រង់ជង្គង់ដូចដែលរូបគេធ្លាប់បានជួបប្រទះកាលពីលើកមុនដែរ។ ប៉ុន្តែ យើងសង្ឃឹមថា វាមិនមែនជាបញ្ហាធំឡើយ។ រូបគេមានអារម្មណ៍មិនស្រួលនៅត្រង់របួសនោះ នៅពេលដែលរូបគេរត់ និងឈឺរមួលត្រង់ជង្គង់ ដែលធ្វើឱ្យរូបគេមិនអាចលេងបន្តនៅលើទីលានបាន»៕
ប្រភពពី៖ Talksport

March 12, 2018
លោក Wenger ទទួលបានការជឿជាក់កាន់តែធំ នៅពេលដែល Arsenal លត់ Watford ចាស់ដៃ
លោក Arsene Wenger បានអះអាងថា ស្មារតីរបស់ក្រុម Arsenal បានជួយឱ្យពួកគេឆ្លងផុតដំណាក់កាលដ៏ជ្រួលច្របល់មួយ ក្រោយពីដណ្តើមបានជ័យជម្នះក្នុងលទ្ធផល 3-០ លើក្រុម Watford កាលពីថ្ងៃអាទិត្យ ដើម្បីកាត់បន្ថយសម្ពាធពីលោកគ្រូបង្វឹកដែលស្ថិតក្រោមការរិះគន់រូបនេះ។
លោក Wenger កំពុងតែប្រយុទ្ធដើម្បីសង្គ្រោះការងាររបស់លោក ហើយការដណ្តើមបានជ័យជម្នះក្នុងលទ្ធផល 2-០ នៅលើទឹកដីក្រុម AC Milan ក្នុងការប្រកួតក្របខ័ណ្ឌ Europa League កាលពីថ្ងៃព្រហស្បតិ៍ បានជួយឱ្យគ្រូបង្វឹកសញ្ជាតិបារាំងរូបនេះ មានការធូរស្រាលពីការរិះគន់ឥតឈប់ឈរដែលលោកបានជួបប្រទះនៅក្នុងរដូវកាលនេះ។
ដើម្បីរក្សាភាពខ្លាំងរបស់ខ្លួនពីការដណ្តើមបានជ័យជម្នះក្នុងការប្រកួតវគ្គ 16ក្រុមចុងក្រោយ នាកីឡដ្ឋាន San Siro ក្រុមរបស់លោក Wenger បានបញ្ចប់ការរងបរាជ័យជាប់ៗគ្នាក្នុងការប្រកួតក្របខ័ណ្ឌ Premier League ត្រឹម 3ប្រកួត ក្រោយពីបានបង្ហាញពីទម្រង់លេងដ៏រឹងមាំនៅកីឡដ្ឋាន Emirates រួចមក។ គ្រាប់បាល់ស៊ុតបញ្ចូលទីពីសំណាក់កីឡាករ ShkodranMustafi, Pierre-EmerickAubameyang និង HenrikhMkhitaryan បានជួយឱ្យក្រុមរបស់លោក Wenger ដណ្តើមបានជ័យជម្នះក្នុងក្របខ័ណ្ឌលីកជាលើកទី1 ចាប់តាំងពីផ្តួលក្រុម Everton ក្នុងលទ្ធផល 5-1 កាលពីខែកុម្ភៈ។
លោក Wenger បានឱ្យដឹងថា៖ «យើងមានពេលវេលាដ៏ខកចិត្តមួយ ហើយអ្នកគាំទ្ររបស់យើងក៏បានរងគ្រោះដូចយើងផងដែរ។ ប៉ុន្តែ ការងាររបស់យើងគឺការបង្ហាញពីទម្រង់លេងឱ្យបានល្អ និងលេងប្រកបដោយភាពស៊ីចង្វាក់គ្នា ក៏ដូចជាធ្វើឱ្យអ្នកគាំទ្រជឿជាក់លើក្រុមរបស់យើងម្តងទៀតដែរ»៕
ប្រភពពី៖ Channel News Asia
March 12, 2018
អ្នកពូកែសន្សំឯកសារ ភាគច្រើន អាចបង្កើតស្នាដៃថ្មីដោយខ្លួនឯងបាន
នៅក្នុងដំណើរជីវិតនៃការសិក្សា មនុស្សម្នាក់ៗតែងតែចង់ក្លាយជាបុគ្គលដែលមានតម្លៃសម្រាប់មនុស្សទូទៅ ឬចង់ក្លាយជាមនុស្សដែលមានប្រយោជន៍សម្រាប់សាធារណជន។ ការបង្កើតស្នាដៃថ្មីលើការសិក្សាស្រាវជ្រាវ ឬការចងក្រងជាឯកសារសម្រាប់មនុស្សជំនាន់ថ្មីជារឿងសំខាន់មួយដែលរុញច្រានពួកគេឱ្យក្លាយជាមនុស្សដែលមានការទទួលស្គាល់ពីមនុស្សជុំវិញខ្លួន និងសង្គម។
លោកតាបណ្ឌិត កុល ផេង សាកលវិទ្យាធិការនៃសាកលវិទ្យាល័យបញ្ញាសាស្ត្រ បានលើកឡើងនៅក្នុងកម្មវិធីមាគ៌ាបុគ្គលឆ្នើមថា អ្នកសិក្សា ឬបុគ្គលដែលពូកែរក្សាទុកឯកសារសំខាន់ៗពីការរៀនសូត្រ គឺជាមនុស្សដែលអាចរកឃើញនូវប្រយោជន៍យ៉ាងច្រើនសម្រាប់ខ្លួនឯង។ អ្នកចូលចិត្តសន្សំឯកសារ ក៏ជាអ្នកដែលចូលចិត្តកត់ត្រានូវអ្វីដែលខ្លួនបានរៀនសូត្រទុកដែរ ហេតុនេះនៅពេលដែលពួកគេចងក្រងឯកសារសំខាន់ៗទាំងអស់នោះចូលគ្នា ពួកគេនឹងអាចបង្កើតស្នាដៃថ្មីមួយ ឬកម្រងឯកសារមួយសម្រាប់ជាការសិក្សារៀនសូត្រខ្លួនឯង និងសម្រាប់មនុស្សជាច្រើនផ្សេងទៀតដែលកំពុងត្រូវការប្រភពឯកសារសម្រាប់ស្រាវជ្រាវផងដែរ។
លោកតាបណ្ឌិត កុល ផេង បានមានប្រសាសន៍ថា ៖ “អ្នករៀនដែលល្អ គេតែងតែកត់ទុកនូវអ្វីដែលគេបានឃើញ បានឮ ឬបានដឹងពីគ្រប់មជ្ឈដ្ឋាន។ ប្រភពចំណេះដឹងទាំងអស់នោះ នៅពេលដែលយើងកត់ទុកបានច្រើន វានឹងក្លាយជារបស់មានតម្លៃ។
អ្នកស្រាវជ្រាវ អ្នកនិពន្ធ និងរៀបរៀងសទ្ទានុក្រមពាក្យខ្មែរទំនើប លោក ឈិន សីហា បានលើកឡើងថា ការរក្សាទុកឯកសារគឺជារឿងសំខាន់ខ្លាំងណាស់សម្រាប់អ្នកសិក្សាស្រាវជ្រាវ ព្រោះថា នៅលើពិភពលោកយើងនេះមានឯកសារច្រើនរាប់មិនអស់ តែមិនប្រាកដថាឯកសារ មានតម្លៃទាំងអស់នោះទេ។ ហេតុនេះសម្រាប់អ្នកស្រាវជ្រាវគេតែងតែដកស្រង់យកចំណុចដែលគេត្រូវការទុកទាំងអស់ បន្ទាប់មកទើបគេចែកបណ្តុំឯកសារនោះជាប្រភេទទៅតាមជំនាញនីមួយៗ។
លោក ឈិន សីហា បាននិយាយថា៖ “ការបែងចែកប្រភពឯកសារជាផ្នែកៗឱ្យមានសណ្តាប់ធ្នាប់មានប្រយោជន៍ខ្លាំងណាស់ ព្រោះវាធ្វើឱ្យយើងមានភាពងាយស្រួលក្នុងការស្វែងរក និងយកមកអាន ហើយវាក៏អាចក្លាយជាប្រភពទុនសម្រាប់ចងក្រងឱ្យក្លាយជាបណ្តុំឯកសារសម្រាប់មនុស្សទូទៅផងដែរ។
លោក សីហា បានលើកឡើងផងដែរថា ឯកសារមួយចំនួនដែលយើងគិតថាល្អ យើងក៏ចាំបាច់ត្រូវរក្សាវាទុកផងដែរ ព្រោះថ្ងៃណាមួយវាអាចក្លាយជាទិន្នន័យ ឬចំណុចដែលត្រូវការជាក់ជាមិនខាន។ ម្យ៉ាងវិញទៀត ទិន្នន័យចាស់ៗដែលមាននៅក្នុងដៃអាចជាប្រភពយ៉ាងសំខាន់មួយក្នុងការធ្វើជាឯកសារយោង ភ័ស្តុតាង ឬអាចធ្វើជាប្រភពនៃឯកសារសម្រាប់ប្រៀបធៀបជាមួយនឹងស្ថានភាពជាក់ស្តែងដែលកើតមាននៅថ្ងៃណាមួយ។ គ្រប់ការវិភាគ និងការសរសេរចេញជាឯកសារថ្មី គឺត្រូវការបំផុតនូវឯកសារចាស់ៗដែលមាននៅក្នុងដៃ។
អ្នកសិក្សាដែលស្រឡាញ់ការស្រាវជ្រាវ លោក សោម ចន្ទសុធា បានលើកឡើងថា សម្រាប់លោកជាអ្នកតស៊ូមតិ លោកតែងតែស្វែងរកប្រភពជាច្រើនសម្រាប់ធ្វើជាអំណះអំណាងនៅពេលជជែកពិភាក្សា ហើយពេលខ្លះប្រសិនបើគ្មានប្រភពឯកសារច្រើនទេនោះ យើងអាចនឹងមានការលំបាកក្នុងការដកស្រង់យកប្រភពដែលគួរទុកចិត្តបាន ហើយមានការលំបាកក្នុងការស្វែងរកចំណុចគាំទ្រឱ្យបានទូលំទូលាយ។ ហេតុនេះលោកតែងតែរក្សាទុកនូវឯកសារទាំងអស់ដែលលោកបានជួបប្រសិនបើលោកគិតថា វាមានតម្លៃគ្រប់គ្រាន់សម្រាប់ការប្រើប្រាស់លើការនិយាយជាសាធារណៈ។
លោក សោម ចន្ទសុធា បាននិយាយថា៖ “មិនថាព្រឹត្តិបត្រព័ត៌មាន ឬប្រភពព័ត៌មានជា PDF នោះទេ ខ្ញុំតែងតែរក្សាទុកជានិច្ចនៅតាមផ្នែកសំខាន់ៗព្រោះជាចំណុចខ្លាំងដែលពេលខ្លះយើងមាន តែអ្នកដទៃទៀតមិនប្រាកដថាមាននោះទេ។
លោក សុធា បានលើកឡើងផងដែរថា ប្រភពព័ត៌មានពិតជាសំខាន់ខ្លាំងណាស់ សម្រាប់មនុស្សគ្រប់គ្នា ព្រោះកាលណាយើងមានព័ត៌មានច្បាស់លាស់ យើងអាចមានមូលដ្ឋាននៃគំនិតល្អក្នុងការប្រើប្រាស់តាមគ្រប់លក្ខខណ្ឌ៕
March 12, 2018
10 សំណួរធ្វើឱ្យអ្នកគាំទ្របទបែកស្លុយចត់បាយ
ក្តីបារម្ភ និងអាណិតដល់សិល្បៈខ្មែរបុរាណ តារាចម្រៀង ខាត់ សុឃីម បានបញ្ចេញស្នាដៃបទចម្រៀងថ្មីដើម្បីក្រើនរំលឹកដល់ទស្សនិកជនពិសេសក្មេងៗជំនាន់ក្រោយឲ្យចាប់អារម្មណ៍និងបទចម្រៀងបុរាណនិងប្រជាប្រិយខ្មែរផង។ នាងក៏បានបង្ហញអារម្មណ៍ឈឺចាប់ខ្លាំងក្រោយពីស្នាដៃបទចម្រៀងបុរាណ និងប្រពៃណីមិនត្រូវបានគេយកចិត្តទុកដាក់ដូចបទសម័យ។ បទចម្រៀងបែបបែកស្លុយថ្មីៗជាច្រើនពីគ្រប់ផលិតកម្មបានចាប់ផ្តើមសម្រុកចេញផ្សព្វផ្សាយជាបណ្តើរៗហើយមុនពេលចូលឆ្នាំថ្មីប្រពៃណីខ្មែរខិតជិតមកដល់។
ទន្ទឹងគ្នានឹងចេញរបស់អ្នកនាង ខាត់ សុឃីម បទ ” រងា ” ប្រភពពីអ្នកគាំទ្រសិល្បៈបុរាណខ្មែរ និងបទប្រពៃណីខ្មែរ បានពន្លះអ្នកគាំទ្របទចម្រៀងប្រភេទបែកស្លុយនៅក្នុងរដូវកាលចូលឆ្នាំប្រពៃណីខ្មែរនោះ ដោយបានចោទជាសំណួរទាំង 10 និងអង្វរកឱ្យកូនខ្មែរព្យាយាមប្រើវិចារណញ្ញាណឡើងវិញ ដែលសំណួរទាំងនោះមានដូចខាងក្រោមនេះ៖
ខ្ញុំ [Mike Mike]មានរឿងចង់សុំពីបងប្អូនដែលជាជនជាតិខ្មែរ នឹងមានឈាមជ័រជាជនខ្មែរយើងទាំងអស់គ្នា ខ្ញុំសុំតែ 1000Share ទេជួយ ស៊ែសិល្បះបុរាណខ្មែរយើងអោយល្បីម្ដងមើល បានអត់ បានទេ? ។
បទ#រងា [ បងស្រី ខាត់ សុឃីម]
ខ្ញុំឆ្ងល់ ខ្ញុំសុំសួរបងប្អូនតាមត្រង់តែម្ដងថា៖
១.តើបងប្អូនទាំងគ្នាឈប់គាំទ្រសិល្បះបុរាណខ្មែរហើយតើមែនទេ?
២. ហេតុអ្វីបងប្អូនមិនងាកមកគាំទ្រសិល្បះបុរាណអោយបានច្រើនដូចបទបែកស្លុយទៅ ម៉េចធ្វើមិនបានចឹង?
៣. តើនៅចង់ស្ដាប់បទ នឹងចង្វាក់ រាំវង់ សារ៉ាវ៉ាន់ ឡាំលាវ បឡាំ បន្តទៀតទេ?
៤. តើបងប្អូនក្នុងបណ្ដាញសង្គមទាំងអស់គ្នាចេះឈឺចាប់អត់នៅពេលឃើញសិល្បះបុរាណខ្មែរដែលមានវ័យចំណាស់ យូរលង់ណាស់មកហើយ លេងមានអ្នកគាំទ្រដូចសម័យមុន?
៥. មានអារម្មណ៍បែបណាដែរនៅពេលឃើញចម្រៀងបរទេសវាយលុកខ្លាំងនៅលើទីផ្សារខ្លាំងជាងសិល្បះខេមរា?
៦.សួរថា ចេះឈឺចាប់អត់នៅពេលដែលបានឃើញជនជាតិគេពូកែខ្វាយខ្វល់នឹងចូលរួមថែរក្សាសិល្បះរបស់គេអោយពិភពលោកស្គាល់ជាង សិល្បះយើង?
៧. ហេតុអ្វីចូលចិត្តវប្បធម៌ បែកស្លុយខ្លាំងម្លេះ ?
៨. ធ្លាប់មានអារម្មណ៍នឹងការតាំងចិត្តថា នឹងចង់ថែក្សាវប្បធម៌ជាតិនឹងសិល្បះបុរាណខ្មែរឬទេបងប្អូន?
៩.ចេះឈឺចាប់ដែរឬអត់នៅពេលឃើញបទចម្រៀងសិល្បះបុរាណយើងមិនសូវមានអ្នកគាំទ្រ ហើយម្នាក់ៗងាកទៅរកតែបទបែកស្លុយបែបនឹង? មានឈឺចិត្តខ្លះទេ?
១០. ចុងក្រោយមិនសុំអ្វីទេ គឺសុំសំណូមពរបងប្អូនមិនថា ចាស់ ឬក្មេងបងប្អូន យុវវ័យទាំងអស់ សូមចែករំលែកនឹងជួយផ្សព្វផ្សាយនឹងជួយគាំទ្រ សិល្បះបុរាណខ្មែរយើងអោយបានច្រើនកុះករឡើងវិញ តើសុំប៉ុណ្ណឹងបានដែរឬអត់?
ពីខ្ញុំ៚ [Officials Mike Mike]
[ខ្ញុំស្រឡាញ់សិល្បះបុរាណខ្មែរ]
March 10, 2018
មិននឹកស្មានបវរកញ្ញាឯកកម្ពុជា ប៊ី សុធារី កាលពីនៅកុមារី មានសម្រស់បែបនេះសោះ..
ដូចដែរអ្នកគាំទ្រទាំងអស់គ្នាបានស្គាលនារីដំបូងតំណាងឱ្យប្រទេសកម្ពុជាចេញទៅប្រកួតបង្អួតសម្រស់នៅក្នុងកម្មវិធីប្រលងបវរកញ្ញាលំដាប់ថ្នាក់ពិភពលោក Miss Universe 2017 នៅលើទឹកដីសហរដ្ឋអាមេរិកកាលពីពេលកន្លងមកនេះ គឺនាង ប៊ី សុធារី ដែលនាងមានរូបឆោមលោមស្រស់ល្អឯកស័ក្ដសមជានារីខ្មែរ ទាំងកម្ពស់ខ្ពស់មិនចាញ់បរទេសឡើយ។
នៅពេលនេះ គេហទំព័រឡារ៉ែន សូមបង្វែរអារម្មណ៍របស់ប្រិយមិត្តទាំងអស់គ្នាមកស្គាល់អតីតកាលរបស់នាងវិញម្ដង កាលជាកុមារីម្នាក់នោះ បវរកញ្ញាឯកកម្ពុជា ប៊ី សុធារី ក៏ស្រស់ស្អាតមិនធម្មតាដែរ ពោលគឺនាងមានសាច់ឈាមទ្រលុកទ្រលន់ និង ឃ្យូតគួរឱ្យស្រឡាញ់ណាស់ ។ ដើម្បីឱ្យដឹងថា បវរកញ្ញាឯកកម្ពុជា ប៊ី សុធារី កាលពីនៅកុមារីមានភាពគួរឱ្យក្នាញ់ និងស្រឡាញ់ប៉ុនណា សូមទស្សនារូបថតខាងក្រោមនេះ ៖
March 10, 2018
ម៉ៃ សុគន្ធ ស្ងើចសរសើរអ្នកនាង ខាត់ សុឃីម ដាស់អារម្មណ៍យុវវ័យកូនខ្មែរតាមរយៈបទ ” រងា “
តាមរយៈបណ្ដាញទំនាក់ទំនងសង្គមហ្វេសនៅពេលថ្មីៗនេះ បានឱ្យឃើញថា តារាចម្រៀងស្រីល្បីឈ្មោះខាងផ្នែកសិល្បៈបុរាណទាំងគ្រួសារគឺ អ្នកនាង ខាត់ សុឃីម បានបញ្ចេញបទចម្រៀងដាស់តឿនអារម្មណ៍មិត្តយុវវ័យសម័យថ្មីនេះ តាមរយៈបទមានចំណងជើងថា ” រងា ” ដែលជាបទមួយនេះស្ដែងឱ្យដឹងពីការទុកចោលមិនយកចិត្តទុកដាក់ចំពោះសិល្បៈបុរាណខ្មែរ ហើយនាំគ្នាសប្បាយជាមួយតែសិល្បៈបរទេសនិយម ភ្លេចកេរ្ដិ៍ដូនតា។ ហើយបទនោះទៀតសោទ គេក៏សង្កេតឃើញថា បង្ហោះមិនទាន់បានមួយថ្ងៃផង បងប្អូនមិត្តយុវវ័យខ្មែរគ្រប់រូបគាំទ្រយ៉ាងខ្លាំង និងពោលពាក្យសរសើរការនិពន្ធបទភ្លេង និងទំនុកច្រៀងបានយ៉ាងល្អឯក។
បទដែលកំពុងតែចាក់ដោយអារម្មណ៍យុវវ័យមួយនេះ ត្រូវបានតារាប្រុសដែលមានរហ័សនាមជាបិតាកំពូលទើសគឺលោក ម៉ៃ សុគន្ធ ក៏បានស្ងើចសរសើរ និងគាំទ្រយ៉ាងពេញទំហឹងចំពោះស្នាដៃផលិតរបស់អ្នកនាង ខាត់ សុឃីម ផងដែរ។ លោកបានសរសេរសារគាំទ្រនៅលើហ្វេសប៊ុកថា «ពិតជា រងារ មែន មួយបទនេះ សិល្បៈបុរាណខ្មែរកំពុងរងារ កណ្តោចកណ្តែង គ្រប់ស្ថានីយ៍ទូទស្សន៍ សឹងតែមានតែ បទស្ទាវ កម្មវិធីស្ទាវ យុវវ័យស្លុយ បាត់អស់ហើយ កម្មវិធី សំរាប់មនុស្សវ័យកណ្ដាល ចុះឯណាទៅពាក្យស្រឡាញ់វប្បធម៌បុរាណខ្មែរ (បើសិល្បៈបុរាណយើង យើងមិនព្រមថែរក្សា និង ផ្សព្វផ្សាយផង ចឹងទុកអោយគេយកទៅផ្សព្វផ្សាយជំនួសទៅ ) ។
សួរថា បើTV មួយៗ សំរុកតែអារម្មណ៍ ស្ទាវ ចឹង មនុស្សវ័យកណ្តាល តើគាត់ត្រូវតែញាក់ញ័ររត់តាមស្ទាវស្លុយមែន!! ប្រើបានតែពេលរបស់នៅល្អ ដល់ចាស់ទៅ ទុកដូចឆ្កែកំបែកក្បាល ! សូមសរសើរអ្នកនាង ខាត់ សុឃីម ដោយស្មោះ រងារ ពិតជា រងារខ្លាំងណាស់ សួរថាសិល្បៈចាស់ តើគាត់ត្រូវធ្វើអី បើគ្មានកម្មវិធីសំរាប់គាត់ផង ខាត់ សុឃីម »។
ចង់ដឹងថា បទចម្រៀង “រងា ” មួយបទនេះរណ្ដំទ័យាលោកអ្នកប៉ុណ្ណានោះ សូមទស្សនា និងស្ដាប់ខាងក្រោមនេះ ៖
March 10, 2018
នៅ សូនីតា និយាយពីរឿងជាភរិយាលោក ខេមរៈ សិរីមន្ដ
នៅពេលថ្មីកន្លងទៅនេះ មហាជនបានសង្ស័យចំពោះព័ត៌មានខ្សឹបខ្សៀវមួយ ដែលរូបថតមួយសន្លឹករបស់តារាស្រី នៅ សូនីតា និងលោក ខេមរៈ សិរីមន្ដ បានឈរក្រសោបកូនប្រុសពីរនាក់នោះ ធ្វើឱ្យមហាជនលោកសង្ស័យថា តារាស្រីរូបជាភរិយាស្ងាត់ៗរបស់តារាប្រុស ខេមរៈ សិរីមន្ដ។ ហើយមានមួយចំនួនទៀតបានបញ្ចេញមតិថា លោក ខេមរៈ សិរីមន្ដ មានប្រពន្ធនឹងកូនហើយ តាមការពិតគឺជាតារាស្រីរូបនេះសោះ។
តែយ៉ាងណាក៏ដោយ បន្ទាប់ពីលេចឡើងនូវព័ត៌មាននេះភ្លាម តារាស្រីសាច់សខ្ចីរូបនេះ បានចេញការបកស្រាយនៅលើបណ្ដាញទំនាក់ទំនងសង្គមហ្វេសខ្លួន ដោយអះអាងថា នាងបានអញ្ចើញឱ្យសម្ដែង MV ចម្រៀងថ្មីរបស់លោក ខេមរៈ សិរីមន្ដ មានចំណងជើងថា «គ្មានអ្នកណាល្អជាងប្រពន្ធ»។ នៅក្នុងសារនោះ នាងសរសេរថា ៖ « អរគុណដែលបានចុះផ្សាយ ទាំងអស់នេះគឺជាកម្រងរូបថតដែលនាងខ្ញុំបានចូលរួមសម្តែងក្នុងបទ គ្មានអ្នកណាល្អជាងប្រពន្ធ របស់បង ខេមរះសិរីមន្ត ហើយនឹងត្រៀមចេញ MV ឆាប់ៗ ។ មានគ្រប់រូបភាពពីជីវិតប្តីប្រពន្ធ ដែលឆ្លុះបញ្ចាំងពីតថភាពនៃសង្គម»៕
March 9, 2018
ករុណា ពេជ្រ សោកស្ដាយមិនបាននៅរួមកម្មពិធីសូត្រមន្ដលើករាសី និងផ្ដុំធាតុជូនឪពុក
តាមរយៈបណ្ដាញទំនាក់ទំនងសង្គមហ្វេសប៊ុករបស់លោក ករុណា ពេជ្រ នៅពេលថ្មីៗនេះ បានបង្ហោះសារសោកស្ដាយ ដែលលោកមិនបាននៅរួមពិធីសូត្រមន្ដលើករាសី និងផ្ដុំធាតុជូនឪពុករបស់លោក នៅពេលដែលកន្លងមក តារាប្រុសរូបបានយកចិត្តទុកដាក់ថែទាំជំងឺរបស់ឪពុកមិនដាច់ពីមួយជំហ៊ាន ទាំងនៅក្នុងមន្ទីពេទ្យ និងមកថែរក្សាជំងឺនៅផ្ទះក្ដី។
លោក ករុណា ពេជ្រ បានបង្ហោះសារសោកស្ដាយថា « ថ្ងៃនេះ កូន និងបងប្អូន កូនក្មួយរបស់ប៉ា បានរៀបពិធីសូត្រមន្ត លើករាសីនិងផ្គុំធាតុជូនប៉ាហើយ…. តែកូនមិនបាននៅចប់កម្មវិធី តែកូនបានត្រឹមតែអុជធូប បួងសួង គោរពអញ្ជើញទេវតា វត្ថុសក្កិសិទ្ធ គ្រប់ទិសទី កុងម៉ា ជីដូន ជីតា ញាតិការ 7 សណ្តាន ចូលរួម ដឹងឮ ដើម្បីបើកពិធីនេះ តែប៉ុណ្ណោះ។ ហើយកូននឹងសង្ឃឹមថា ប៉ា នឹងឆាប់ជាដឹងខ្លួន បានឃើញពីដំណើរជីវិតកូនបន្តទៀត ណា…. កូនទៅសៀមរាបហើយណា ប៉ា..។ អរគុណ សេចក្តីស្រលាញ់ អ៊ុំ បងប្អូន ក្មួយ និង ចែ ទាំងអស់ ដែលបានចូលរួម និង បន្តពិធីនេះ..»។
គួររំឭកផងដែរថា តារាប្រុសកត្តញ្ញូចំពោះឪពុករូបនេះ កន្លងមកបានបង្ហោះរូបភាពឱ្យឃើញពីសកម្មភាពដែលលោកបានមើលថែទាំឪពុកយ៉ាងកក់ក្ដៅ និងជាពិសេស លោកបាននាំឪពុកលោក ធ្វើលំហាត់ប្រាណរាល់ពេលព្រឹកព្រលឹមថែមទៀតផងដែរ៕
March 9, 2018
ខេម រំឭកគុណបុណ្យលោក យូ ឌីស្កូ មិនអាចបំភ្លេចបានរហូតដល់សព្វថ្ងៃ
តាមរយៈបណ្ដាញទំនាក់ទំនងសង្គមហ្វេសប៊ុកនៅថ្ងៃទី 9 ខែមីនា ឆ្នាំ 2018 នេះ បានឱ្យដឹងថា តារាចម្រៀងប្រុសប្រចាំផលិតកម្ម ថោន គឺលោក ខេម បានចូលរួមជាមួយសមាគមសិល្បៈស័្មគ្រចិត្តជួយសង្គម ក្នុងការស្វែងរកមូលនិធិពីសប្បុរសជនទាំងឡាយ ដើម្បីជួយឧបត្ថម្ភការព្យាបាលជំងឺរបស់លោក យូ ឌីស្កូ ដែលកំពុងតែស្ថិតនៅក្នុងស្ថានភាពធ្ងន់ធ្ងន់។ លោក ខេម បានរៀបរាប់ពីប្រវត្តិជូជត់កាលពីឆ្នាំ 2007 នៅពេលរូបលោកទើបតែប្រឡងកម្មវិធីចម្រៀង Boy Band ជាប់ថ្មីៗ ហើយនៅពេលនោះផងដែរ ជាអកុសល លោកបានជួបគ្រោះថ្នាក់ចរាចរណ៍នៅម្ដុំស្ពានអាកាសក្បាលថ្នល់ ខណ្ឌ ច្បារអំពៅ។
តារាចម្រៀងស្អករូបនេះ បានពោលពាក្យរៀបរាប់ទាំងអារម្មណ៍ក្ដុកក្តួត ប្រាប់ដល់មហាជន និងអំពាវនាវថា ៖ « កាលជាប់ជ័យលាភីដំបូងៗ ជីវភាពខ្ញុំពិតជាលំបាកណាស់ ខ្ញុំជួបប្រទះគ្រោះថ្នាក់ចរាចរណ៍ តែនៅពេលនោះ មានបងប្រុស យូ ឌីស្កូ បានទិញអាហារ និងមកសួរសុខទុក្ខខ្ញុំ មើលថែខ្ញុំផងដែរ។ ខ្ញុំទំពាអាហារមិនកើតទេ ទើបានជាគាត់បានទិញម៉ាស៊ីនទឹកក្រឡុក ដើម្បីឱ្យកិនក្រឡុកអាហារហូបបាន។ ទៀតសោទ ខណៈនោះ ខ្ញុំមិនទាន់មានកេរ្ដ៍ឈ្មោះល្បីល្បាញអ្វីឡើយ តែខ្ញុំពិតជារំភើប និងដឹងគុណបងប្រុសបំផុត ដែលបានជួយរូបខ្ញុំរហូតមក មិនអាចបំភ្លេចបាន »។
លោកបន្ដថា កន្លងទៅលោកបានចូលរួមចំណែកជួយបងប្រុស យូ ឌីស្កូ ម្ដងរួចមកហើយ នៅពេលនេះ ក៏បានបន្ដជួយទៀត និងបានអំពាវនាវដល់បងប្អូនខ្មែរនៅក្នុងស្រុក និងបរទេស ព្រមទាំងសិល្បករទាំងអស់ សូមឱ្យជួយឧបត្ថម្ភដល់បងប្រុស និងធ្វើបុណ្យដោយការសង្គ្រោះ ព្យាបាលជំងឺរបស់បងប្រុសសិល្បៈកររៀមច្បងរូបនេះផងដែរ៕
March 9, 2018
Mark Zuckerberg ទទួលបានលុយជិត 500លានដុល្លារពីការលក់ហ៊ុន Facebook
សហស្ថាបនិក និងជានាយកប្រតិបត្តិបណ្ដាញទំនាក់ទំនងសង្គមធំជាងគេ លើពិភពលោក Facebook Inc លោក Mark Zuckerberg ត្រូវបានគេដឹងថា ថ្មីៗនេះបានលក់ភាគហ៊ុន Facebook ផ្ទាល់ខ្លួនយ៉ាងច្រើនសន្ធឹកដើម្បីយកលុយទៅទំនុកបម្រុងក្នុងការវិនិយោគលើក្រុមហ៊ុនថ្មីមួយទៀត។ នេះបើយោងតាមការចេញផ្សាយរបស់សារព័ត៌មាន Reuters។
តាមការចុះផ្សាយរបស់ Reuters បានឱ្យដឹងថា កាលពីខែកុម្ភៈ កន្លងទៅនេះកំពូលមហាសេដ្ឋីវ័យក្មេង Mark Zuckerberg បានលក់ភាគហ៊ុនរបស់ខ្លួនចំនួន 2ដង ដោយលើកទី1លក់ចំនួន 685,000ហ៊ុន ដោយទទួលបានប្រាក់ចំនួន 125.4លានដុល្លារអាមេរិក និងលើកទី2 លក់ 2.7លានហ៊ុនថែមទៀតដោយសរុបទាំងពីរលើកទទួលបានប្រាក់ 482.2លានដុល្លារអាមេរិក។
លុយដែលបានពីការលក់ភាគហ៊ុនទាំងពីរលើកនេះ មិនត្រូវបានលោក Mark Zuckerberg បញ្ជាក់ថា យកទៅធ្វើអ្វីនោះទេ ប៉ុន្តែខាងក្រុមអ្នកឃ្លាំមើលបានលើកឡើងថា លុយទាំងអស់នោះ គឺ Mark Zuckerberg យកទៅវិនិយោគបន្ថែមទៅលើក្រុមហ៊ុន Chan Zuckerberg Initiative ដែលបង្កើតឡើងដោយលោកជាមួយនឹងភរិយា ហើយក្រុមហ៊ុនមួយនេះ គឺផ្ដោតសំខាន់លើការអភិវឌ្ឍផ្នែកវិទ្យាសាស្ត្រអប់រំ និងវិស្វកម្ម។
កាលពីខែកញ្ញា ឆ្នាំ2017 លោក Mark Zuckerberg បានប្រកាសថា លោកនឹងលក់ភាគហ៊ុនដែលមាននៅក្នុងបណ្ដាញសង្គម Facebook ចន្លោះពី 35 ទៅ 75លានហ៊ុន នៅក្នុងរយៈពេល 18ខែបន្ទាប់ ដែលតាមការប៉ាន់ប្រមាណអាចប្រមូលប្រាក់បានរហូតដល់ 13ពាន់លានដុល្លារអាមេរិក។
គួរបញ្ជាក់ដែរថា លោក Mark Zuckerberg គឺជាបុគ្គលតែម្នាក់គត់ ដែលមានភាគហ៊ុន Facebook ច្រើនជាងគេ ដោយកាលពីឆ្នាំ2016 លោកបានលក់ភាគហ៊ុនដោយទទួលបានលុយ 1.6ពាន់លានដុល្លារអាមេរិកម្ដងរួចមកហើយ៕
March 9, 2018