វល័ក្ខ - La Reine Media

ទំហំវិនិយោគកម្ពុជាចិនកើនឡើង 27%ក្នុងឆ្នាំ2017

ឯកឧត្តម ឈួន ដារ៉ា រដ្ឋលេខាធិការក្រសួងពាណិជ្ជកម្មមានប្រសាសន៍ថា ទំហំវិនិយោគកម្ពុជាចិននៅក្នុងឆ្នាំ2017កន្លងទៅនេះមានការកើនឡើងចំនួន 27% បើធៀបរយៈពេលពេញមួយឆ្នាំក្នុងឆ្នាំ2016។

នាឱកាសអញ្ជើញជាអធិបតីភាពក្នុងពិធីពិព័រណ៍ពាណិជ្ជកម្មកម្ពុជាចិននៅសាលសន្និសីទកោះពេជ្រ ឯកឧត្តមរដ្ឋលេខាធិការបានបញ្ជាក់ថា ប្រទេសចិនបានឈរលំដាប់លេខរៀងទី1 នៅកម្ពុជាកាលពីឆ្នាំ2017 ជាមួយទំហំទឹកប្រាក់វិនិយោគរហូតដល់ជិត 15ប៊ីលានដុល្លារអាមេរិក។

ឯកឧត្តមបានបន្ថែមទៀតថា ទំហំវិនិយោគចិនមកកម្ពុជាក្នុងឆ្នាំ2017 មានចំនួន 14,3ប៊ីលានដុល្លារអាមេរិក ឬស្មើ27% នៃទឹកប្រាក់វិនិយោគពីបរទេសសរុបដែលចំនួននេះ បានកើនឡើងស្ទើរពាក់កណ្ដាលបើធៀបនឹងឆ្នាំ2016 ដែលមានត្រឹមតែ 748លានដុល្លារអាមេរិកប៉ុណ្ណោះ។

ក្រៅពីកំណើនទឹកប្រាក់វិនិយោគហើយ ស្ថានភាពពាណិជ្ជកម្មទ្វេភាគីរវាងចិន និងកម្ពុជា នៅក្នុងឆ្នាំ2017 ក៏មានវឌ្ឍនភាពល្អប្រសើរផងដែរ។ បើតាមទិន្នន័យផ្លូវការបានបង្ហាញថា ពាណិជ្ជកម្មនៃប្រទេសទាំងពីរសម្រេចបានដល់ 5,790លានដុល្លារអាមេរិក ពោលគឺបានកើនឡើង21.7% បើប្រៀបធៀបនឹងឆ្នាំ2016។ ទន្ទឹមគ្នានេះ ភ្ញៀវទេសចរចិនដែលបានចូលមកកម្ពុជាកាលពីឆ្នាំ2017 មានចំនួន 1,210,000នាក់ គឺបានកើនឡើងជិត 46% បើធៀបនឹងឆ្នាំ2016ដូចគ្នា។

គួរបញ្ជាក់ថា គម្រោងភាគច្រើនដែលចិនដាក់ទុនវិនិយោគនៅកម្ពុជា ភាគច្រើនលើវិស័យសំណង់ កសិកម្ម ថាមពល ឧស្សាហកម្មកាត់ដេរ ធនាគារ និងហិរញ្ញវត្ថុ ទូរគមនាគមន៍ និងទេសចរណ៍ជាដើម៕

April 3, 2018

ព្រឹត្តិការណ៍សង្ក្រាន្តនៅ PPSEZ IDOL 2018 បង្កបរិយាកាសសប្បាយរីករាយដល់កម្មករ-កម្មការិនីប្រចាំឆ្នាំ

ការរៀបចំព្រឹត្តិការណ៍ប្រចាំឆ្នាំដ៏ធំមួយដើម្បីអបអរសាទរពិធីបុណ្យចូលឆ្នាំខ្មែរកាលថ្ងៃទី31ខែមីនា ឆ្នាំ2018 កន្លងទៅដែលមានឈ្មោះថា “សង្ក្រាន្ត PPSEZ IDOL 2018” មានការអញ្ជើញចូលរួមពីភ្ញៀវកិត្តិយសសំខាន់ៗជាច្រើន ដូចជាលោកជំទាវវេជ្ជ. អ៊ឹង កន្ថាផាវី រដ្ឋមន្ត្រីក្រសួងកិច្ចការនារី លោកជំទាវ ស៊ើង សរសុចិត្តា រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈជាតំណាងឯកឧត្តម អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ឯកអគ្គរដ្ឋទូតសហរដ្ឋអាមេរិក និងឯកអគ្គរាជទូតថៃប្រចាំនៅកម្ពុជា ព្រមទាំងសមាជិកនៃសមាគមសហគ្រិនស្ត្រីកម្ពុជាជាច្រើនរូបបានចូលរួមលើកទឹកចិត្តដល់ប្អូនៗកម្មករទាំងអស់ឱ្យមានភាពសប្បាយរីករាយនៅក្នុងព្រឹត្តិការណ៍ផងដែរ។

ក្នុងព្រឹត្តិការណ៏នេះមានបេក្ខជន-បេក្ខនារីចំនួន 10រូបដែលបានឆ្លងមកដល់វគ្គផ្តាច់ព្រ័ត្រក្នុងការប្រកួតប្រជែងសម្រស់ និងទេពកោសល្យពិសេសពីចំណោមក្រុមកម្មករ-កម្មការិនីជាច្រើនដែលកំពុងបម្រើការងារនៅក្នុងក្រុមហ៊ុននានាក្នុងតំបន់សេដ្ឋកិច្ចពិសេសភ្នំពេញដែលបានសម្តែងសមត្ថភាព និងទេពកោសល្យរបស់ខ្លួនយ៉ាងអស់ពីសមត្ថភាព។ នៅក្នុងព្រឹត្តិការណ៍នោះថែមទាំងមានការសម្តែងសិល្បៈរបាំបុរាណ របាំសហសម័យ ព្រមទាំងមានវត្ដមានតារាល្បីៗ ដូចជាលោក ព្រាប សុវត្ថិ អ្នកនាង ខាត់ សុឃីម និងក្រុមកំប្លែងនាយពែកមីដើម្បីចូលរួមបង្កបរិយាកាសដ៏សែនរីករាយទៀតផង។

លោកជំទាវឧកញ៉ា លីម ឈីវហូរ អគ្គនាយិកាក្រុមហ៊ុន ភ្នំពេញ PPSEZ ភីអិលស៊ីបានមានប្រសាសន៍ថា ក្រុមហ៊ុន ភ្នំពេញ PPSEZ បានរៀបចំមហាព្រឹត្តិការណ៍ដ៏ធំអស្ចារ្យបែបនេះជារៀងរាល់ឆ្នាំ គឺចាប់តាំងពីឆ្នាំ2014មកម្ល៉េះ ដោយទទួលជោគជ័យ និងមានការគាំទ្រយ៉ាងខ្លាំងពីសាធារណជន ជាពិសេសពីសំណាក់បងប្អូនកម្មករ-កម្មការិនីយើង ហើយលើកនេះគឺជាឆ្នាំទី5ហើយ។ ការរៀបចំកម្មវិធីនេះឡើង គឺជាការអបអរសាទរពិធីចូលឆ្នាំថ្មីប្រពៃណីខ្មែរនាខែមេសានេះ និងអបអរទិវាពលកម្មអន្តរជាតិថ្ងៃទី1 ឧសភា ឆ្នាំ2018 ក្រោមប្រធានបទ “ដើម្បីសន្តិភាព ស្ថិរភាព ការងារ និងមុខរបរ” ផងដែរ។

លោកជំទាវ ស៊ើង សរសុចិត្តា បានមានប្រសាសន៍ថា នេះជាលើកទី5 ហើយដែលក្រុមហ៊ុនភ្នំពេញ PPSEZ ភីអិលស៊ី បានរៀបចំកម្មវិធីបែបនេះ ហើយលើកនេះកាន់តែមានលក្ខណៈទូលំទូលាយជាងមុន ដោយមានការចូលរួមពីអ្នកវិនិយោគក្នុងតំបន់សេដ្ឋកិច្ចពិសេសទូទាំងប្រទេស។ សំដៅបង្កបរិយាកាសសប្បាយរីករាយជូនបងប្អូនកម្មករ-កម្មការិនី ក្នុងឱកាសអបអរសាទរខួបអនុស្សាវរីយ៍លើកទី132 នៃទិវាពលកម្មអន្តរជាតិ 1ឧសភា ឆ្នាំ2018 ផងដែរ។ ក្មួយៗកម្មករ-កម្មការិនីដែលបានចូលរួមប្រកួតប្រជែង មិនត្រឹមតែមានរូបសម្ផស្សស្រស់ស្អាត និងមានសមត្ថភាពល្អខាងសិល្បៈផ្សេងៗប៉ុណ្ណោះទេ ប៉ុន្តែថែមទាំងយល់ដឹងច្បាស់ពីច្បាប់ការងារ ដែលនឹងជួយលើកស្ទួយដល់សិទិ្ធ និងផលប្រយោជន៍កម្មករនិយោជិតក្នុងវិស័យនេះ ហើយបានចូលរួមបំផុសឱ្យបងប្អូនកម្មករនិយោជិតរបស់យើងបានស្គាល់ពីតម្លៃការងាររបស់ខ្លួន និងកាន់តែស្រឡាញ់ការងាររបស់ខ្លួន សំដៅបង្កើនផលិតភាពការងារ និងទំនាក់ទំនងវិជ្ជាជីវៈជាមួយនិយោជក និងគោរពច្បាប់ការងារទាំងអស់គ្នាទៀតផង។

លោកជំទាវវេជ្ជ. អ៊ឹង កន្ថាផាវី រដ្ឋមន្ត្រីក្រសួងកិច្ចការនារីក៏បានមានប្រសាសន៍នៅក្នុងឱកាសនោះដែរថា កម្មវិធីនេះគឺដើម្បីលើកទឹកចិត្តក្មួយៗដែលបានបម្រើការងារនៅតំបន់សេដ្ឋកិច្ចពិសេសនេះឱ្យបានបង្ហាញស្នាដៃដែលបានធ្វើការងារ នឹងទេពកោសល្យ សមត្ថភាពរបស់ខ្លួន។ យើងអាចរៀបចំកម្មវិធីដ៏អស្ចារ្យនេះបាន គឺដោយសារមានសុខសន្តិភាពក្នុងប្រទេសជាតិ យើងអាចរកការងារធ្វើបានដូចមាននៅក្នុងតំបន់សេដ្ឋកិច្ចពិសេសដូចសព្វថ្ងៃនេះបាន គឺដោយសារមានសុខសន្តិភាពក្នុងប្រទេសយើង ដូច្នេះសូមបងប្អូន-ក្មួយៗខំប្រឹងធ្វើការងារឱ្យបានល្អដើម្បីទាក់ទាញអ្នកវិនិយោគចូលមកប្រទេសកម្ពុជាយើង បង្កើតការងារបានកាន់ច្រើនសម្រាប់បងប្អូនយើងបន្ថែមទៀត៕

April 3, 2018

លោក Pardew ចាកចេញពី West Brom ក្រោយពីក្លិបកាន់តែលិចលង់ដល់បាតតារាង

លោក Alan Pardew បានទទួលលទ្ធផលតបមកវិញសម្រាប់ការរងបរាជ័យក្នុងការប្រកួតក្របខ័ណ្ឌ Premier League ចំនួន 8លើកជាប់ៗគ្នាតាមរយៈការចាកចេញពីតំណែងក្នុងនាមជាអ្នកចាត់ការទូទៅរបស់ក្លិប West Bromwich Albion ដោយការព្រមព្រៀងគ្នាទាំងសងខាង កាលពីថ្ងៃចន្ទ។

គ្រូបង្វឹកវ័យ 56ឆ្នាំរូបនេះបានកាន់តំណែងក្នុងក្លិបនេះត្រឹមតែរយៈពេល 4ខែគត់ ក្រោយពីបានជំនួសកន្លែងរបស់លោក Tony Pulis ប៉ុន្តែមិនអាចជួយសង្គ្រោះជោគវាសនារបស់ក្លិបបានឡើយ ហើយលោកបានធ្វើឱ្យពួកគេស្ថិតនៅបាតតារាង ដោយដេញតាមពីក្រោយក្រុមស្ថិតក្នុងតំបន់សុវត្ថិភាពដល់ទៅ 10ពិន្ទុ ខណៈដែលនៅសល់ការប្រកួតត្រឹមតែ 6លើកទៀតប៉ុណ្ណោះនៅរដូវកាលនេះ។

ខណៈដែលគ្រូបង្វឹកជំនួយ John Carver ក៏នឹងចាកចេញដែរនោះ ក្លិប West Bromបានឱ្យដឹងនៅលើគេហទំព័ររបស់ខ្លួនថា៖ «West Bromwich Albion និងលោក Alan Pardew បានយល់ព្រមចែកផ្លូវគ្នា ក្រោយពីការពិភាក្សាផ្សេងៗរវាងភាគីទាំង 2រួចរាល់ហើយ»។ West Bromបានបន្ថែមទៀតថា៖ «ក្លិបសូមថ្លែងអំណរគុណដល់លោក Alan និងលោក John សម្រាប់ការខិតខំប្រឹងប្រែងរបស់ពួកគេ និងសូមជូនពរឱ្យអ្នកទាំងពីរជួបតែសំណាងល្អនៅថ្ងៃអនាគត»។ លោក Darren Moore គ្រូបង្វឹកនៃក្រុមឈុតធំ នឹងកាន់តំណែងបន្តរហូតទាល់តែមានការប្រកាសជាថ្មីណាមួយទៀត។

លោក Pardew អតីតអ្នកចាត់ការទូទៅរបស់ក្លិប Reading, Charlton Athletic, West Ham, Southampton, Newcastle United និង Crystal Palace ចូលកាន់តំណែងជំនួសលោក Pulis បានត្រឹមតែ 4ខែប៉ុណ្ណោះ៕

ប្រភពព័ត៌មាន៖ The Straits Times

April 3, 2018

ដាំមមាញលើដីជាង 30អា មួយថ្ងៃរកប្រាក់បានពី 20 ទៅ30ម៉ឺនរៀល

មមាញ គឺជារុក្ខជាតិអាហារមួយប្រភេទដែលប្រជាពលរដ្ឋខ្មែរយើងនិយមបេះយកដើមខ្ចីៗយកទៅធ្វើជាបន្លែជ្រក់ លាយជាមួយសណ្តែកបណ្តុះមានរសជាតិឆ្ងាញ់ពិសា ពិសេសញ៉ាំផ្ទាប់ជាមួយត្រីអាំង (ជាម្ហូបខ្មែរសុទ្ធ) ពិតជាមានឱជារសគួរឱ្យចង់ទទួលទានខ្លាំងណាស់។

កសិករដែលដាំដើមមមាញនៅភូមិក្បាលកោះ ឃុំកោះខ្សាច់ជន្លា ស្រុកស្អាង ខេត្តកណ្តាល គឺអ្នកស្រីឯក សៀកគីម បានឱ្យដឹងថា គ្រួសារគាត់បានប្រកបរបរដាំដើមមមាញលក់ អស់រយៈពេល 3ឆ្នាំមកហើយនៅលើផ្ទៃដី 50 គុណនឹង70ម៉ែត្រ។ ក្នុងមួយថ្ងៃអាចកាត់លក់បានចន្លោះពី20ម៉ឺនរៀល ទៅ30ម៉ឺនរៀល និងងាយស្រួលថែទាំជាងដំណាំដទៃទៀត ហើយថែមទាំងឆាប់ទទួលបានផលទៀតផង។

អ្នកស្រីបញ្ជាក់ថា ដាំដើមមមាញមិនសូវជាមានសត្វល្អិតមកយាយីនោះទេ គ្រាន់តែប្រើជីអាចម៌គោរោយលើថ្នាលពេលដាំដំបូង ហើយស្រោចទឹកឱ្យបានជាប់ជាប្រចាំ ត្រឹមតែរយៈពេល1ខែប៉ុណ្ណោះ ដើមមមាញនឹងផ្តល់ផលអាចច្រូតបាន មានម៉ូយមកទទួលទិញដល់ចម្ការ ឬយកទៅបោះឱ្យម៉ូយនៅផ្សារនាគមាសក្នុងក្រុងភ្នំពេញក៏បាន។

ចំពោះវិធីសាស្ត្រដាំដុះ មុនដំបូងគេគ្រាន់តែភ្ជួរដីហាលចោលមួយសប្តាហ៍ ដើម្បីឱ្យដីបានឆ្អិនល្អ សម្លាប់មេរោគ និងកុំឱ្យស្មៅដុះច្រើន រួចហើយគេលើកជាថ្នាល ចន្លោះមួយម៉ែត្រពីរងមួយទៅរងមួយទៀត បន្ទាប់មកទើបយកចំបើងទៅក្រាលពីលើស្តើងៗដើម្បីការពារឱ្យដីរក្សាសំណើមបានយូរ រួចទើបយកគ្រាប់មមាញទៅរោយពីលើថ្នាល ហើយស្រោចទឹកព្រឹក-ល្ងាច។ រយៈពេល 3ថ្ងៃគ្រាប់មមាញនឹងដុះពន្លកចេញស្លឹកពីរ បន្ទាប់ពីនោះមិនបាច់ស្រោចទឹកជាប្រចាំទេ ត្រូវស្រោចទឹកមួយថ្ងៃរំលងមួយថ្ងៃ ដោយមិនបាច់ថែទាំបាញ់ថ្នាំសម្លាប់សត្វល្អិតនោះទេ ព្រោះដើមមមាញមិនមានពពួកដង្កូវ ឬសត្វល្អិតផ្សេងៗមកយាយីច្រើនទេ ហើយត្រឹមតែមួយខែដើមមមាញក៏នឹងលូតលាស់ធំឡើង និងអាចកាត់យកទៅលក់បានហើយ។

អ្នកស្រីបន្ថែមថា ក្នុងទំហំដី 50ម៉ែត្រគុណនឹង 70ម៉ែត្រ គ្រួសារគាត់អាចច្រូតលក់បានចន្លោះពី200គីឡូក្រាម ទៅ300គីឡូក្រាមក្នុងមួយថ្ងៃ ដោយលក់ក្នុងតម្លៃ1,000រៀល ទៅ1,200រៀលក្នុងមួយគីឡូក្រាម ទៅតាមការកុម្ម៉ងទិញរបស់ម៉ូយ។ ដើមមមាញមិនមែនច្រូតលក់តែមួយដងហើយអស់នោះទេ ពេលច្រូតម្តងរួចហើយ ត្រូវស្រោចទឹកថែទាំដាក់ជីឡើងវិញម្តងទៀត ពេលនោះដើមមមាញនឹងបែកមែកលូតលាស់សាជាថ្មី និងអាចកាត់លក់បានទៀត។

ពោលគឺកាត់វិលជុំនៅលើផ្ទៃដីទំហំ 50គុណនឹង70ម៉ែត្រនេះ គេអាចកាត់មួយថ្ងៃខានមួយថ្ងៃបាន ប៉ុន្តែទោះយ៉ាងណាវាមានអាយុកាលត្រឹមតែពីរខែប៉ុណ្ណោះ ព្រោះពេលនោះដើមមមាញនឹងចាស់ លែងឱ្យផល តែគេអាចទុកឱ្យវាចេញផ្លែទុកធ្វើពូជបន្ត ឬយកគ្រាប់លក់បន្តបាន ដែលជាទូទៅគ្រាប់មមាញមួយគីឡូក្រាម មានតម្លៃពី 6ទៅ7ម៉ឺនរៀល។

ទោះយ៉ាងណា ក្រោយពីមមាញចាស់ដើម គេអាចភ្ជួរដីហាលចោលសាជាថ្មី ដើម្បីដាំវាឡើងវិញម្ដងទៀត ដោយប្រើរយៈពេលត្រឹមតែ1ខែដូចមុន ដើមមមាញថ្មីនឹងឱ្យហុចផលអាចកាត់លក់បានបន្តទៀតហើយ ឯតម្លៃទៀតសោតក៏នៅនឹងមិនសូវប្រែប្រួលទេ ពោលគឺនៅត្រឹម1,000រៀល ទៅ1,200រៀលក្នុងមួយគីឡូក្រាមរហូត ដោយសារតែមិនសូវមានអ្នកដាំច្រើន៕

April 3, 2018

ឥណ្ឌូណេស៊ី គំរាមបិទ Facebook បើសិនព័ត៌មានអ្នកប្រើប្រាស់ត្រូវបានរំលោភបំពាន និងបែកធ្លាយ

ហ្សាការតា៖ រដ្ឋមន្ត្រីទូរគមនាគមន៍ និងទំនាក់ទំនងឥណ្ឌូណេស៊ី លោក Rudiantara បានគំរាមបិទបណ្ដាញទំនាក់ទំនងសង្គមយក្ស Facebook ចោល បើសិនទិន្នន័យ ឬព័ត៌មានឯកជនរបស់អ្នកប្រើប្រាស់នៅក្នុងប្រទេសឥណ្ឌូណេស៊ី ត្រូវបានរំលោភបំពាន និងបែកធ្លាយ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters ចេញផ្សាយនៅព្រឹកថ្ងៃទី03 ខែមេសា ឆ្នាំ2018។

នៅក្នុងកិច្ចសម្ភាសន៍ជាមួយស្ថានីយទូរទស្សន៍ Bloomberg លោក Rudiantara បាននិយាយថា «ប្រសិនបើខ្ញុំតម្រូវឱ្យបិទ (Facebook) នោះខ្ញុំនឹងធ្វើវា»។ លោកបានបញ្ជាក់បន្ថែមទៀតថា «ខ្ញុំបានបិតកម្មវិធី Telegram ដូច្នេះខ្ញុំគ្មានអ្វីស្ទាក់ស្ទើក្នុងការបិទ (Facebook) នោះទេ»។

រដ្ឋមន្ត្រីជាន់ខ្ពស់រូបនេះ បានឱ្យដឹងទៀតថា ប្រសិនបើខ្លួនទទួលបានព័ត៌មានថា ទិន្នន័យនៃអ្នកប្រើប្រាស់ Facebook នៅឥណ្ឌូណេស៊ី ត្រូវបានរំលោភបំពាន នោះលោកនឹសម្រេចចិត្តបិទ Facebook។

គួរបញ្ជាក់ថា ថ្មីៗនេះ Facebook បានទទួលរងការចោទប្រកាន់ ថាបានអនុញ្ញាតឱ្យមានការលូកដៃចូលយកព័ត៌មានសម្ងាត់របស់អ្នកប្រើប្រាស់ប្រមាណជាង ៥០លាននាក់ ដែលទើបត្រូវបានបែកធ្លាយកាលពីខែមុននេះ ជាពិសេស លោក Mark Zuckerberg សហបិតាស្ថាបនិក និងនាយកប្រតិបត្តិ ក៏កំពុងប្រឈមមុខនឹងការឡើងស្រាយបំភ្លឺ មុខសភាអាមេរិក និងអង់គ្លេស ព្រមទាំងបានសុំទោសដល់ពិភពលោកទាំងមូលថែមទៀត ហើយក្រោយពីបែកធ្លាយព័ត៌មាននេះ បានធ្វើឱ្យ Facebook ខាតបង់ប្រាក់រាប់ពាន់លានដុល្លារ ក្នុងតម្លៃជាភាគហ៊ុន៕

April 3, 2018

សម្ពាធកំពុងកើតមានលើ Real និងលោក Zidane ពេលប៉ះ Juventus រាត្រីនេះ

សម្ពាធផ្សេងៗ នឹងត្រូវកើតមានឡើងចំពោះលោក Zinedine Zidane ម្តងទៀត នៅពេលដែលក្រុម Real Madrid របស់លោកត្រូវធ្វើដំណើរទៅកាន់ទីក្រុង Turin ក្នុងការប្រកួតដ៏សំខាន់នៅរាត្រីថ្ងៃអង្គារនេះ។ លោក Zidane បាននិយាយកាលពីសប្តាហ៍មុនថា លោកចង់បន្តដឹកនាំក្លិប Real ប៉ុន្តែ បច្ចុប្បន្នបំណងរបស់លោកនឹងត្រូវអាស្រ័យទៅលើការប្រកួតក្របខ័ណ្ឌ Champions League របស់ក្រុមដ៏ធំមួយនេះ ជាមួយនឹងក្រុម Juventus។

Real នឹងត្រូវប៉ះជាមួយអតីតក្លិបរបស់លោក Zidane ក្នុងការប្រកួតជើងទី1 នៃវគ្គ 8ក្រុមចុងក្រោយនារាត្រីនេះ ដោយដឹងថា រដូវកាលរបស់ពួកគេ និងអនាគតរបស់គ្រូបង្វឹកសញ្ជាតិបារាំងរូបនេះ នឹងស្ថិតលើការឈានទៅដល់វគ្គពាក់កណ្តាលផ្តាច់ព្រ័ត្រឬក៏អត់។ ការមានឱកាសយ៉ាងស្តួចស្តើងក្នុងការការពារពានក្របខ័ណ្ឌ La Liga រួមទាំងការធ្លាក់ចេញពីពាន Copa del Rey មានន័យថា បច្ចុប្បន្ន ពួកគេនៅសល់ត្រឹមតែ 1យុទ្ធនាការទៀតប៉ុណ្ណោះក្នុងការប្រជែងដណ្តើមពាននៅរដូវកាលនេះ។

ប៉ុន្តែ ទោះបីជាយ៉ាងណា ក្រុម Real កំពុងតែស្ថិតក្នុងទម្រង់លេងយ៉ាងល្អនាពេលថ្មីៗនេះ។ Real ដណ្តើមបានជ័យជម្នះ 10លើក ក្នុងចំណោមការប្រកួត 11លើកចុងក្រោយរបស់ពួកគេ ក្នុងនោះរាប់បញ្ចូលទាំងការយកឈ្នះលើក្រុម PSG ផងដែរ។ ពួកគេបានស៊ុតបាល់បញ្ចូលទី 36គ្រាប់ក្នុងការប្រកួតទាំង 11លើកនោះ ដែលមានន័យថា ជាមធ្យមពួកគេរកបាន 3គ្រាប់ក្នុងមួយប្រកួត។ ខ្សែប្រយុទ្ធ Lucas Vazquez បានឱ្យដឹងថា៖ «ការប្រកួតនេះកើតចំពេលដ៏ល្អសម្រាប់យើង។

យើងកំពុងតែស្ថិតក្នុងទម្រង់លេងយ៉ាងល្អក្នុងរយៈពេលប៉ុន្មានខែចុងក្រោយនេះ ដោយយើងបានលេងកាន់តែល្អ រកបានគ្រាប់បាល់កាន់តែច្រើន។ វាជាពេលវេលាដ៏ល្អមួយ ហើយបច្ចុប្បន្ន យើងត្រូវតែដណ្តើមយកប្រៀបក្នុងការប្រកួតនេះ»។ ការប្រកួតនេះនឹងចាប់ផ្តើមនៅម៉ោង1:45ទៀបភ្លឺ៕

ប្រភពពី៖ Sport24

April 3, 2018

មុនចូលឆ្នាំខ្មែរអ្នកភ្នំពេញនឹងបានធ្វើដំណើរតាមផ្លូវទឹកហើយ

ដើម្បីផ្តល់ភាពងាយស្រួលក្នុងការធ្វើដំណើរ និងកាត់បន្ថយការកកស្ទះចរាចរណ៍ ក៏ដូចជាការចំណាយពេលវេលាយូរក្នុងការធ្វើដំណើរក្នុងទីក្រុង ក្រសួងសាធារណការ និងដឹកជញ្ជូន គ្រោងនឹងដាក់ឱ្យដំណើរការកាណូតដឹកជញ្ជូនអ្នកដំណើរក្នុងក្រុងតាមផ្លូវទឹកនៅមុនឱកាសបុណ្យចូលឆ្នាំខ្មែរប៉ុន្មានថ្ងៃខាងមុខទៀតនេះហើយ។

តាមការប្រកាសរបស់ក្រសួងកាលពីសប្តាហ៍មុន បានឱ្យដឹងថា នាវាដឹកជញ្ជូនអ្នកដំណើរតាមផ្លូវទឹកពីព្រែកព្នៅទៅក្រុងតាខ្មៅដែលគ្រោងដាក់ឱ្យដំណើរការនាពេលឆាប់ៗនេះបានសម្រេច 95%ហើយ គិតត្រឹមចុងសប្តាហ៍មុននេះ។

លោក ចាន់ តារា អគ្គនាយកនៃអគ្គនាយកដ្ឋានដឹកជញ្ជូននៃក្រសួងសាធារណការ និងដឹកជញ្ជូន បានថ្លែងគូសបញ្ជាក់ប្រាប់ឱ្យដឹងនាថ្មីៗនេះថា ក្រុមការងារកំពុងតែសាងសង់ចំណតកំពង់ផែទាំង 5ទីតាំងដំណាលៗគ្នាដើម្បីឱ្យសម្រេចបានទៅតាមផែនការនៃការគ្រោងទុកដែលបានកំណត់ថានឹងដាក់ឱ្យដំណើរការមុនពេលពិធីបុណ្យចូលឆ្នាំខ្មែរមកដល់។

ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងកាលពីពេលថ្មីៗនេះថា រាជរដ្ឋាភិបាលកម្ពុជាគ្រោងដាក់ឱ្យដំណើរការសេវាដឹកអ្នកដំណើរទៅមកព្រែកព្នៅ-ភ្នំពេញ-តាខ្មៅ នៅថ្ងៃទី6 ខែមេសា ខាងមុខនេះ ដែលជាប្រវត្តិសាស្ត្រលើកដំបូង របស់កម្ពុជាដើម្បីចូលរួមចំណែកកាត់បន្ថយការកកស្ទះចរាចរណ៍តាមផ្លូវគោក និងបង្កើនសុវត្ថិភាពចរាចរណ៍ដល់អ្នកធ្វើដំណើរចូល-ចេញ និងឆ្លងកាត់រាជធានីភ្នំពេញជារៀងរាល់ថ្ងៃ។

លោកបន្តថា ការដាក់ឱ្យដំណើរការលើកដំបូងនៅថ្ងៃទី6 ខែមេសា ឆ្នាំ2018 ខាងមុខនេះ នឹងមានកាណូតដឹកអ្នកដំណើរចំនួន 3គ្រឿង ក្នុងនោះ 2គ្រឿងជាកាណូតរបស់ក្រុមហ៊ុន Royal Express Boat ដែលអាចផ្ទុកអ្នកដំណើរបាន 60នាក់ និង3គ្រឿងទៀតជាកាណូតរបស់កំពង់ផែស្វយ័តភ្នំពេញដែលកំពុងសាងសង់ដែលអាចផ្ទុកអ្នកដំណើរបាន 54នាក់ និងមានបំពាក់ដោយម៉ាស៊ីនត្រជាក់ និងពោងសុវត្ថិភាព។

ជាមួយកាណូត 3គ្រឿងជាជំហានដំបូងនេះនឹងធ្វើចរាចរផ្តល់សេវាដឹកអ្នកដំណើរដោយចេញដំណើរពីព្រែកព្នៅឆ្ពោះទៅក្រុងតាខ្មៅដែលមានចម្ងាយផ្លូវសរុបប្រមាណ 25គីឡូម៉ែត្រ និងចំណាយពេលវេលាធ្វើដំណើរជាមធ្យម 34នាទី មានចំណតផែចំនួន5 រួមមានចំណតផែព្រែកព្នៅ ទីលានប្រជាធិបតេយ្យថ្មី ផ្សាររាត្រី កោះពេជ្រ និងក្រុងតាខ្មៅ។

ឯកឧត្តមសង្ឃឹមថា ការដឹកជញ្ជូនអ្នកដំណើរក្នុងទីក្រុងតាមផ្លូវទឹកនេះនឹងបានចូលរួមចំណែកយ៉ាងសំខាន់ក្នុងដំណោះស្រាយការកកស្ទះ និងកាត់បន្ថយគ្រោះថ្នាក់ចរាចរណ៍ ព្រមទាំងធ្វើឱ្យចំណេញពេលវេលាក្នុងការធ្វើដំណើររបស់ប្រជាពលរដ្ឋទៀតផង៕

April 3, 2018

អគារស្នាក់នៅសហកម្មសិទ្ធិ Residences Bel air ស្ដងដារបែបបារាំងបង្ហាញខ្លួនលើកដំបូងនៅកម្ពុជា

Residences Bel Air គឺជាគម្រោងសំណង់អគាររស់នៅសហកម្មសិទ្ធិដែលមានសលក្ខណៈខុសប្លែកស្រស់ស្អាតទំនើបជាងបណ្តាខុនដូ និងអាផាតមិន ដែលមាន និងកំពុងដំណើរនៅក្នុងប្រទេសកម្ពុជានាពេលបច្ចុប្បន្ននេះ។ Residences Bel Air ដែលបានប្រារព្វពិធីប្រកាសដាក់លក់ជាផ្លូវការណ៍នៅភោជនីយដ្ឋានទំនើប Hearth Rock Cafe ស្ថិតនៅក្នុងអគារមណ្ឌលពាណិជ្ជកម្ម Exchange Square ក្រោមការចូលរួមពីសំណាក់បណ្តាអ្នកវិនិយោគផ្នែកអចលនទ្រព្យ ក៏ដូចជាអតិថិជនលំដាប់អភិជន ជាតិ-អន្តរជាតិ ព្រមទាំងបណ្តាអ្នកសារព័ត៌មានជាច្រើននាក់ កាលពីរាត្រីថ្ងៃទី31 ខែមីនា ឆ្នាំ2018កន្លងទៅនេះ មានកម្ពស់18 ជាន់ ស្មើនឹង 82 Units ក្រោមការបណ្តាក់ទុនវិនិយោគរួមគ្នារវាងអ្នកវិនិយោគជាជាតិខ្មែរ និងជនជាតិបរទេស សរុបចំនួន 8 លានដុល្លារសហរដ្ឋអាមេរិក ។

លោក ជា ឡាយឃាង អគ្គនាយក Residences Bel Air បានលើកឡើងថា អគារលំនៅដ្ឋានសហកម្មសិទ្ធិដែលមានលក្ខណៈស្អាតទំនើបតាមបែបបារាំងមួយនេះ នឹងត្រូវចំណាយពេលលើដំណើរការសាងសង់រយៈពេល 30ខែ (2ឆ្នាំកន្លះ) នៅលើទឹកដីដែលកំពុងមានការអភិវឌ្ឍយ៉ាងសកម្មនាតំបន់ជ្រោយចង្វារ ខណ្ឌជ្រោយចង្វារ ស្ថិតនៅទិសខាងកើត ឈាងខាងជើង រាជធានីភ្នំពេញ ដែលមានពន្លឺភ្លឺគ្រប់គ្រាន់ ខ្យល់អាកាសល្អបរិសុទ្ធ បក់ផាត់ពីដងទន្លេមេគង្គ និងដៃទន្លេសាបដែលនៅអមតួអគារទាំងមូល ក្រោមការរចនាប្លង់ពីសំណាក់កំពូលអ្នកជំនាញផ្នែកឌីហ្សាញ់ជនជាតិបារាំង រួមជាមួយនឹងគំនិតច្នៃប្រឌិតរបស់អ្នកជំនាញឌីហ្សាញ និងសាង់ជនជាតិកូរ៉េផងដែរ ។

ដោយឡែកសម្រាប់ ទីធ្លានៅក្នុង Units នីមួយៗ មានទំហំចាប់ពី 42 ម៉ែត្រការ៉េ រហូតដល់ 196 ម៉ែត្រការ៉េ ដោយមានការបែងចែកចេញជាទីកន្លែងសម្រាប់ទទួលភ្ញៀវ កន្លែងទទួលទានដំណេក ទីធ្លាលំហែរអារម្មណ៍ យ៉ាងប្រណីត ក្រោមការបំពាក់សម្ភារៈប្រើប្រាស់ទំនើបនាសម័យចុងក្រោយ ជាមួយនឹងតម្លៃចាប់ពី 8ម៉ឺនដុល្លារ ឡើងទៅ ជាមួយនឹងជម្រើសជាច្រើនសម្រាប់ការទិញធ្វើជាកម្មសិទ្ធិ ដោយមិនមានអត្រាការប្រាក់នោះឡើយ ។

កញ្ញា រ៉េត មេត្តា (Mercy) នាយកផ្នែកលក់ និងទីផ្សារ បានលើកឡើងផងដែរថា ៖ «Residences Bel Air ថ្វីត្បិតតែទើបតែចាប់ផ្តើមប្រកាសលក់ប៉ុន្តែយើងទទួលបានការកក់ទុកពីបណ្តាភ្ញៀវជាតិ និងអន្តរជាតិមួយចំនួនហើយដែលភាគច្រើនពួកគាត់សុទ្ធតែជាអ្នកហដែលធ្លាប់បានរស់នៅ និងបានដឹងច្បាស់ពីគុណតម្លៃនៃប្រភេទលំនៅដ្ឋានសហកម្មសិទ្ធិដែលមានលក្ខណៈតាមបែបបារាំងទំនើប ។

ជាមួយគ្នានេះក៏មានអ្នកវិនិយោគផ្នែកអចលនទ្រព្យក្នុងស្រុកមួយចំនួនទៀតផងដែរ ដែលបានកក់ទុកក្នុងគោលបំណងវិនិយោគបន្តទទួលភាគលាភនៅថ្ងៃខាងមុខ។ កញ្ញា មេត្តា បានបន្តទៀតថា ៖ «ជាការពិតណាស់ បច្ចុប្បន្ននេះនៅកម្ពុជា ដែលជាប្រទេសកំពុងមានការអភិវឌ្ឍយ៉ាងខ្លាំងជាពិសេសលើវិស័យអចលនទ្រព្យពិតជាមានការរីកចម្រើន ជាពិសេសលើវិស័យសំណង់ និងអគារស្នាក់នៅបែបទំនើប និងសហកម្មសិទ្ធិតែម្ដង ។

ប៉ុន្តែ ចំពោះ Residences Bel Air ហាក់មិនមានអ្វីដែលព្រួយបារម្ភពាក់ព័ន្ធទៅនឹងដំណើរការលក់នៅលើទីផ្សារមួយនេះឡើយ។ ភាពជឿជាក់របស់យើងក៏ព្រោះតែ Residences Bel Air មានភាពល្អខុសប្លែកពីបណ្តាសំណង់អគារទាំងអស់នោះ ខុសទាំងរូបភាពខាងក្រៅនៃការរចនាដ៏គួរឱ្យទាក់ទាញ ផ្តល់នូវផាសុកភាពខ្ពស់ក្នុងពេលស្នាក់នៅ មានប្រព័ន្ធការពារសុវត្ថិភាពដែលបំពាក់ដោយឧបករណ៍បញ្ចៀសហានីភ័យដ៏ទំនើបប្រកបដោយភាពជឿជាក់ ជាពិសេសស្ថិតនៅតំបន់អភិវឌ្ឍកម្រិតផ្កាយ5»៕

April 3, 2018

ចង់សង់ផ្ទះល្វែងលក់ ត្រូវដឹងពីនីតិវិធីក្នុងការដាក់ពាក្យស្នើសុំអាជ្ញាប័ណ្ណជាមុន

គម្រោងសង់លំនៅឋាន ឬផ្ទះល្វែងលក់បានរីកដុះដាលព្រោងព្រាតនៅតាមតំបន់ជាយក្រុងក្នុងរយៈពេលប៉ុន្មានឆ្នាំចុងក្រោយនេះ។ ហើយដើម្បីឱ្យសំណង់លំនៅឋានរបស់លោកអ្នក ដំណើរការទៅដោយស្របច្បាប់ និងផ្តល់ទំនុកចិត្តច្បាស់លាស់ជាមុននោះ តើអ្នកវិនិយោគគួរអនុវត្តនីតិវិធីតាមផ្លូវច្បាប់ដូចម្តេចខ្លះ?

គណៈអធិបតី និងភ្ញៀវកិតិ្តយសថតរូបអនុស្សាវរីយ៍នៅក្នុងកម្មវិធី “ការកាន់កាប់អចលនវត្ថុនៅកម្ពុជាដោយស្របច្បាប់”រៀបចំឡើងដោយ CVEA

លោកស្រី អ៊ុយ ច័ន្ទនិមល អនុប្រធាននាយកដ្ឋានគ្រប់គ្រងអាជីវកម្មអចលនវត្ថុ បញ្ចាំ និងប្រាតិភោគដោយអនុប្បទាននៃអគ្គនាយកដ្ឋានឧស្សាហកម្មហិរញ្ញវត្ថុនៃក្រសួងសេដ្ឋកិច្ច និងហិរញ្ញវត្ថុបានលើកឡើងថា ចំពោះអាជីវកម្មអភិវឌ្ឍន៍លំនៅឋាន ដែលមានទំហំចាប់ពី 4ល្វែង (សម្រាប់ផ្ទះល្វែង) ឬ3ភូមិគ្រឹះ(សម្រាប់ផ្ទះវីឡា) ឬ4យូនីត(Unit)ឡើងទៅ(សម្រាប់អាផាតមិន ឬខុនដូ)ត្រូវមានអាជ្ញាប័ណ្ណអភិវឌ្ឍន៍លំនៅឋានពីក្រសួងសេដ្ឋកិច្ចជាមុន។

ចំពោះអាជ្ញាប័ណ្ណអាជីវកម្មអភិវឌ្ឍន៍លំនៅឋាននេះមាន 2ប្រភេទ៖ ប្រភេទទី1. គឺការប្រើដើមទុនផ្ទាល់ខ្លួន ឬប្រើប្រាក់កម្ចីពីគ្រឹះស្ថានហិរញ្ញវត្ថុដើម្បីអភិវឌ្ឍលំនៅឋាន និងអាចលក់បាននៅពេលបញ្ចប់គម្រោងជាស្ថាពរ។ និងប្រភេទទី2. គឺប្រើដើមទុនផ្ទាល់ ឬខ្ចីពីគ្រឹះស្ថានហិរញ្ញវត្ថុនានា ឬដើមទុនដែលបានមកពីការលក់ដើម្បីអភិវឌ្ឍលំនៅឋានបណ្តើរៗ និងអាចធ្វើការលក់បានជាបណ្តើរៗដែរ។ ហើយអាជ្ញាប័ណ្ណមួយ គឺសម្រាប់តែទីតាំងមួយប៉ុណ្ណោះ។

ចំណែកថ្លៃអាជ្ញាប័ណ្ណសំណង់ផ្ទះល្វែងមួយល្វែងត្រូវបង់10ម៉ឺនរៀល ភូមិគ្រឹះភ្លោះ(ជញ្ជាំងជាប់គ្នា)ត្រូវបង់10ម៉ឺនរៀលក្នុងមួយភូមិគ្រឹះ ភូមិគ្រឹះទោលត្រូវបង់20ម៉ឺនរៀលក្នុងមួយភូមិគ្រឹះ សំណង់អគារស្នាក់នៅរួមមានបន្ទប់គេង1 ឬ2ត្រូវបង់10ម៉ឺនរៀលក្នុងមួយយូនីត ហើយសំណង់អគារស្នាក់នៅរួមមាន 3បន្ទប់គេងឡើងទៅត្រូវបង់20ម៉ឺនរៀលក្នុងមួយបន្ទប់។ សម្រាប់លក្ខខណ្ឌនៃការដាក់ពាក្យអាចជានីតិបុគ្គលដែលមានដើមទុនចុះបញ្ជីអប្បបរមាតិចបំផុត 2ពាន់លានរៀលឡើងទៅ និងត្រូវបំពេញលក្ខខណ្ឌមួយចំនួនទៀតដូចជា៖

1.ការបើកគណនីអភិវឌ្ឍន៍លំនៅឋាន (អាជ្ញាប័ណ្ណប្រភេទ2)។

2.មានលិខិតបញ្ជាក់ដើមទុន និងប្រភពទុនច្បាស់លាស់។

3.មានប្រាក់តម្កល់ធានាអាជីវកម្ម 2%នៃដើមទុនវិនិយោគ។

4.មានផែនការអាជីវកម្មលម្អិតទៅតាមរយៈពេលនៃគម្រោង។

5.អ្នកឈរឈ្មោះអាជ្ញាប័ណ្ណជាប្រធានក្រុមប្រឹក្សាភិបាលនៃក្រុមហ៊ុន។

6.មានធានារ៉ាប់រងលើភារៈទទួលខុសត្រូវការដ្ឋាន។

សម្រាប់កិច្ចដំណើរការអាជីវកម្មអភិវឌ្ឍន៍លំនៅឋាន អ្នកសាងសង់ត្រូវមានកាតព្វកិច្ច ប្រកាសប្រាប់អ្នកទិញក្នុងករណីដីជួល ឬជាប់បន្ទុក ហើយត្រូវទទួលខុសត្រូវចំពោះលំនៅឋានដែលបានលក់ដែលត្រូវអនុវត្តទៅតាមកិច្ចសន្យា អនុវត្តទៅតាមកាលវិភាគបង់ប្រាក់ និងផ្តល់របាយការណ៍ឱ្យបានទៀងទាត់ ដូចដែលមានចែងក្នុងប្រកាសលេខ 965សហវ.ប្រក ស្តីពីការគ្រប់គ្រងអាជីវកម្មអភិវឌ្ឍន៍លំនៅឋាន។ អាជ្ញាប័ណ្ណនេះក៏អាចនឹងត្រូវបានដកហូតមកវិញដែរ ក្នុងករណី៖

1.មិនបានចាប់ផ្តើមគម្រោងក្នុងរយៈពេល 3ខែ។

2.មិនបានបញ្ចប់គម្រោងតាមកាលកំណត់ ឬក្រោយពីពន្យារពេលច្រើនដង។

3.មិនបានអនុវត្តតាមខ្លឹមសារនៃសេចក្ដីប្រកាសនិងលិខិតបទដ្ឋានផ្សេងៗទៀត។

4.កាន់កាប់បញ្ជីគណនីមិនបានត្រឹមត្រូវ។

5.មិនបានបង់ពន្ធប៉ាតង់ និងមិនបានបំពេញកាតព្វកិច្ចពន្ធដារត្រឹមត្រូវ។

5.ក្ស័យធន ឬសោធនភាព ឬប្រព្រឹត្តល្មើសក្នុងការធ្វើអាជីវកម្មដែលធ្វើឱ្យប៉ះពាល់ដល់ផលប្រយោជន៍សាធារណៈ។

6.លទ្ធផលនៃសវនកម្មមានភាពខុសគ្នារវាងរបាយការណ៍ប្រចាំខែ និងប្រចាំឆមាស របាយការណ៍ហិរញ្ញវត្ថុប្រចាំឆ្នាំ និងរបាយការណ៍ដកសាច់ប្រាក់ពីគណនីអភិវឌ្ឍន៍លំនៅឋាន។

និង7.ប្រព្រឹត្តបទល្មើសព្រហ្មទណ្ឌ ឬអំពើល្មើសច្បាប់ណាមួយ។

លោកស្រីបានបញ្ជាក់បន្ថែមថា ការលក់ឬទិញលំនៅឋាន គឹត្រូវមានលិខិតអនុញ្ញាតសាងសង់ មានអាជ្ញាប័ណ្ណពីក្រសួង បានបញ្ចប់ការសាងសង់ជាស្ថាពរ មានលិខិតបិទការដ្ឋាន និងមានការវាយតម្លៃពីមន្ត្រីជំនាញនាយកដ្ឋានដែលនេះសម្រាប់អាជ្ញាប័ណ្ណប្រភេទ1 និងសម្រាប់អាជ្ញាប័ណ្ណប្រភេទ2 គឺតម្រូវឱ្យមានលិខិតអនុញ្ញាតសាងសង់ មានអាជ្ញាប័ណ្ណពីក្រសួងដូចគ្នា។ ក្នុងករណីមានអាជ្ញាប័ណ្ណតែមិនទាន់មានលិខិតអនុញ្ញាតសាងសង់អាចទទួលលុយកក់បាន 1% នៃតម្លៃលំនៅឋានដែលត្រូវលក់។ ប្រាក់កក់នេះត្រូវទុកក្នុងគណនីអភិវឌ្ឍន៍លំនៅឋាន ក្នុងករណីមិនទទួលបានលិខិតអនុញ្ញាតកសាងទេ ត្រូវសងប្រាក់កក់នេះទៅអ្នកទិញវិញ បើមិនអនុវត្តតាម ត្រូវផាកពិន័យជាប្រាក់ 1លានរៀលក្នុងមួយថ្ងៃ សម្រាប់រយៈពេល 30ថ្ងៃដំបូង។ ករណីមិនរាងចាល ទឹកប្រាក់ផាកពិន័យត្រូវគុណទ្វេដងក្នុង 1ថ្ងៃ ដូចមានចែងក្នុងប្រកាស41នៃប្រកាសនេះ។

រីឯប្រាក់តម្កល់នៃអាជីវកម្មក្នុងអាជ្ញាប័ណ្ណប្រភេទ1 មិនត្រូវឱ្យប្រើគណនីអភិវឌ្ឍន៍លំនៅឋាន និងដាក់ប្រាក់តម្កល់ធានាអាជីវកម្មទេ ហើយសម្រាប់អាជ្ញាប័ណ្ណប្រភេទ2 ត្រូវបើកគណនីអភិវឌ្ឍន៍លំនៅឋាន និងដាក់ប្រាក់តម្កល់ធានាអាជីវកម្ម2%។ ប្រាក់តម្កល់នេះអាចដកវិញបានលុះត្រាតែបញ្ចប់គម្រោងជាស្ថាពរ។ សម្រាប់លំនៅឋានគំរូ ក្រុមហ៊ុនត្រូវរៀបចំឱ្យបានរួចរាល់មុននឹងធ្វើការប្រកាសលក់លំនៅឋាន។

គណនីលំនៅឋានក្រុមហ៊ុនប្រភេទ2 ត្រូវបើកគណនីលំនៅឋាន ដើម្បីដាក់ប្រាក់អ្នកទិញគ្រប់ប្រភេទទៅក្នុងគណនី ហើយការដកប្រាក់ត្រូវតែមានសមាមាត្រទៅនឹងទំហំសំណង់ និងត្រូវមានការបញ្ជាក់ពីវិស្វករក្រុមហ៊ុនពីរភាគរយដែលធ្វើបាន។ ករណីនេះក្រសួងក៏មានសិទ្ធិបង្កើតគណនីអភិវឌ្ឍន៍លំនៅឋាន ក្នុងករណីពិនិត្យឃើញថាក្រុមហ៊ុនពុំមានលទ្ធភាពសាងសង់ ឬករណីប្រធានសក្តិ។

ក្រុមហ៊ុនសំណង់ផ្ទះល្វែងអាចត្រូវមានទោសពិន័យក្នុងករណី៖

1.ប្រកបអាជីវកម្មគ្មានអាជ្ញាប័ណ្ណ ត្រូវពិន័យ 100លានរៀល។

2.ផ្សព្វផ្សាយពាណិជ្ជកម្មមិនអនុលោមតាមប្រកាសនេះ ត្រូវពិន័យ 1លានរៀលក្នុងមួយថ្ងៃ។

3.ប្រើប្រាស់គណនីអភិវឌ្ឍន៍លំនៅឋានមិនបានត្រឹមត្រូវ ត្រូវពិន័យ 10លានរៀល (សម្រាប់ក្រុមហ៊ុនអភិវឌ្ឍន៍លំនៅឋានប្រភេទ2)។

4.ខកខានក្នុងការផ្តល់របាយការណ៍តាមការកំណត់ដូចមានចែងក្នុងប្រកាសនេះ ត្រូវពិន័យ 50ម៉ឺនរៀលក្នុងមួយថ្ងៃ។

5.មិនបន្ត ឬយឺតយ៉ាវក្នុងការបន្តសុពលភាពប្រាក់តម្កល់ធានាអាជីវកម្ម ត្រូវពិន័យ 50ម៉ឺនរៀលក្នុងមួយថ្ងៃ។

6.ដកប្រាក់តម្កល់ធានាអាជីវកម្ម ដោយគ្មានការអនុញ្ញាតពីក្រសួង ត្រូវពិន័យចំនួនទ្វេដងនៃប្រាក់តម្កល់។

7.សាងសង់លំនៅឋានលើសចំនួនដែលមានចែងក្នុងអាជ្ញាប័ណ្ណពិន័យ 2លានរៀលផងដែរ។

ករណីមានការស្រពេចស្រពិលណាមួយ ម្ចាស់គម្រោងអាចសាកសួរព័ត៌មានបន្ថែមនៅច្រកចេញចូលតែមួយនៃក្រសួងសេដ្ឋកិច្ច និងហិរញ្ញវត្ថុបាន៕

April 2, 2018

ក្រុមហ៊ុនផលិតឱសថដ៏ធំនៅតៃវ៉ាន់ នឹងមកបង្ហាញវត្តមាននៅកម្ពុជា

ជាមួយនឹងការព្យាករសម្រាប់ឆ្នាំ2018 ដែលកម្ពុជាអាចរក្សាបានកំណើនសេដ្ឋកិច្ចក្នុងរង្វង់ 6,9% ក្រោមការទទួលបានលំហូរវិនិយោគលើគ្រប់វិស័យ ជាពិសេស វិស័យអចលនទ្រព្យ ដែលឈរនៅលំដាប់ទីមួយនោះ នៅអំឡុងខែឧសភា ឆ្នាំ2018 ឆាប់ៗខាងមុខនេះ ក្រុមហ៊ុនផលិតឱសថNang Kuang Pharmaceutical Co.,Ltd ដែលមានរោងចក្រផ្ទាល់ខ្លួនដ៏ធំមួយ និងល្បីឈ្មោះនៅ តៃវ៉ាន់ បានសម្លឹងឃើញពីភាពវិជ្ជមានលើការវិនិយោគមកកាន់ប្រទេសដែលកំពុងអភិវឌ្ឍន៍មួយនេះ។ នេះបើយោងតាមការបង្ហើបប្រាប់ឱ្យដឹងពីសំណាក់លោក ឧកញ៉ា ចិត្រ សេរីសុភ័ក្ត្រ អគ្គនាយកក្រុមហ៊ុន Luxury Smile Cambodia Co., Ltd ដែលជាអ្នកនាំយកក្រុមហ៊ុនផលិតឱសថមួយនេះមកកាន់ប្រទេសកម្ពុជា។

មានប្រសាសន៍ប្រាប់អ្នកយកព័ត៌មានប្រចាំកាសែត “ឡារ៉ែន ពាណិជ្ជ”កាលពីពេលកន្លងទៅថ្មីៗនេះ លោកឧកញ៉ា ចិត្រ សេរីសុភ័ក្ត្រ បានលើកឡើងថា ចំពោះក្រុមហ៊ុនផលិតឱសថ Nang Kuang Pharmaceutical Co.,Ltd គឺជាក្រុមហ៊ុនដែលមានកេរ្តិ៍ឈ្មោះល្បីល្បាញនៅក្នុងប្រទេសតៃវ៉ាន់ជាច្រើនឆ្នាំមកហើយ ដោយបានទទួលស្គាល់ពីស្ថាប័នកំពូលរបស់វិស័យសុខាភិបាលប្រចាំតំបន់ ជាមួយនឹងការចរាចរយ៉ាងទូលំទូលាយនៅតាមបណ្តាប្រទេសជឿនលឿនមួយចំនួន ដូចជា សហរដ្ឋអាមេរិក ជប៉ុន សិង្ហបុរី ម៉ាឡេស៊ី និងនៅតាមបណ្តាប្រទេសប៉ែកអឺរ៉ុបមួយចំនួនទៀត ហើយកម្ពុជាក៏ជាប្រទេសមួយដែលទទួលស្គាល់ និងគាំទ្រផលិតផលផ្នែកវិស័យសុខាភិបាលរបស់ក្រុមហ៊ុនមួយនេះផងដែរ ដែលក្នុងនោះក្រៅពីផលិតផលឱសថហើយ នៅមានគ្រឿងបរិក្ខារពេទ្យ ក៏ដូចជាផលិតផលពាក់ព័ន្ធនឹងផ្នែកសម្ផស្សជាដើមផងដែរ។

លោកឧកញ៉ា ចិត្រ សេរីសុភ័ក្ត្រ បានបញ្ជាក់យ៉ាងដូច្នេះថា ៖ “វាជាមោទនភាពមួយរបស់កម្ពុជាដែលមានក្រុមហ៊ុនធំៗ និងល្បីឈ្មោះនៅបរទេស ងាកមកចាប់អារម្មណ៍បោះទុនវិនិយោគ និងចាប់ជាដៃគូជំនួញរួមគ្នា។ ចំពោះក្រុមហ៊ុន Nang Kuang Pharmaceutical Co.,Ltd ដែលមានចង្វាក់ផលិតកម្មផ្តោតទៅលើការផលិតផលិតផលសុខាភិបាល និងមានទីតាំងរោងចក្រផ្ទាល់ខ្លួននៅតៃវ៉ាន់មួយនេះ ត្រូវបានបង្កើតឡើងតាំងពីអំឡុងឆ្នាំ1963 ក្រោមកិច្ចដំណើរការយ៉ាងសកម្ម ប្រើប្រាស់បច្ចេកវិទ្យារបស់ជប៉ុន និងមានលទ្ធភាពអាចរកបានចំណូលប្រមាណ1800លានតៃវ៉ាន់ ស្មើនឹងប្រមាណ50លានដុល្លារសហរដ្ឋអាមេរិក ក្នុងមួយឆ្នាំ និងមានបុគ្គលិកប្រមាណជិត 800នាក់។ អ្វីដែលជាលក្ខណៈពិសេស និងភាពលេចធ្លោរបស់ក្រុមហ៊ុនមួយនេះ គឺភាពជំនាញមានបទពិសោធខ្ពស់ លើការផលិតឱសថទូទៅ ជាពិសេសអាចស្រាវជ្រាវ និងផលិតថ្នាំបង្ការជាច្រើនប្រភេទប្រកបដោយប្រសិទ្ធភាព ដែលក្នុងនោះរួមមានដូចជា ថ្នាំបង្ការជំងឺមហារីក, ជំងឺរលាកស្រោមខួរ, ថ្នាំបង្ការជំងឺថ្លើម, បង្ការជំងឺផ្តាសាយ និងប្រតិកម្មចាញ់អាកាសធាតុ ជាដើម។

ដោយឡែកពាក់ព័ន្ធទៅនឹងការបោះជំហានចូលមកវិនិយោគនៅកម្ពុជាក្នុងពេលដ៏ខ្លីឆាប់ៗខាងមុខនេះ ត្រូវបានលោកឧកញ៉ា ចិត្រ សេរីសុភ័ក្ត្រ ដែលជាអគ្គនាយកក្រុមហ៊ុន Luxury Smile Cambodia Co., Ltd និងជាអគ្គនាយកគ្រប់គ្រងក្រុមហ៊ុន Nang Kuang Pharmaceutical Cambodia Co.,Ltd ប្រចាំនៅកម្ពុជា បានបង្ហើបប្រាប់ថា ជាមួយនឹងការសម្រេចបោះទុននៅកម្ពុជានាពេលខាងមុខនេះ អ្នកតំណាងក្រុមហ៊ុនប្រចាំនៅប្រទេសតៃវ៉ាន់ រួមជាមួយនឹងអ្នកតំណាងក្រុមហ៊ុននៅប្រទេសកម្ពុជា ក្រោមវត្តមានរបស់លោកឧកញ៉ាផ្ទាល់ លោកជំទាវ សាស៊ីតាន់ ឡៅរ៉ូពីនយោ (SasitanLaorojpinyo) លោក Chen Li Shien លោក Alan Chen លោក Eric Tan Choon លោក Teoh Boon Heng លោក Kong Sovath លោកវេជ្ជបណ្ឌិត ChhanVannak នឹងបង្កើតសកម្មភាពយុទ្ធនាការសប្បុរសធម៌ ចុះផ្សព្វផ្សាយពីបញ្ហាថែទាំសុខភាព រួមជាមួយការផ្តល់ជូននូវថ្នាំបង្ការជំងឺមួយចំនួនដោយឥតគិតថ្លៃ ទៅដល់បណ្តាប្រជាពលរដ្ឋកម្ពុជា ដែលស្ថិតតាមបណ្តាខេត្តក្រុងនានាផងដែរ ដោយផ្តើមចេញពី រាជធានីភ្នំពេញ ខេត្តកំពង់ចាម ត្បូងឃ្មុំ បាត់ដំបង និងខេត្តតាកែវ។

សូមបញ្ជាក់ផងដែរថា បច្ចុប្បន្ន លោកឧកញ៉ា ចិត្រ សេរីសុភ័ក្ត្រ គឺជាអ្នកជំនួញវ័យក្មេងនៅកម្ពុជាដែលមានក្រុមហ៊ុនចំនួន9 នៅក្នុងដៃ រួមមានក្រុមហ៊ុន ៖ Monsne Café Cambodia, Chicken Bucket Cambodia, Maya Cosmic Cambodia , Maya Cosmic Health and Beauty center, Firdo Cambodia , CSS Real Estate, LLC, និងក្រុមហ៊ុន MohaSerey Pawnshop ដែលទាំងអស់នេះ ស្ថិតនៅក្រោមក្រុមហ៊ុន CSS Development Group Co.,Ltd រួមជាមួយនឹងក្រុមហ៊ុន Nang Kuang Pharmaceutical CambodiaCo.,Ltd ដែលនឹងចាប់ដំណើរការក្នុងពេលឆាប់ៗខាងមុខនេះ៕

April 2, 2018

Author: វល័ក្ខ