វល័ក្ខ - La Reine Media

Ronaldo រកបានគ្រាប់បាល់ដ៏អស្ចារ្យ ខណៈ Thiago សង្គ្រោះ Bayern

តារាឆ្នើម Cristiano Ronaldo បានស៊ុតបាល់បញ្ចូលទី 2គ្រាប់ ក្នុងនោះរាប់បញ្ចូលទាំងគ្រាប់បាល់ដ៏ល្អតាមរយៈការស៊ុតបករំលងក្បាលមួយគ្រាប់ផងដែរ ខណៈដែលក្រុម Real Madrid បានបោះជំហានយ៉ាងកៀកឆ្ពោះទៅកាន់វគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League កាលពីថ្ងៃអង្គារ តាមរយៈការផ្តួលក្រុមម្ចាស់ផ្ទះ Juventus 3-0 ក្នុងការប្រកួតជើងទី1 នៃវគ្គ 8ក្រុមចុងក្រោយ។

ស្របពេលជាមួយគ្នានេះ ក្រុម Bayern Munich ក៏បានបោះជំហានឆ្ពោះទៅកាន់វគ្គ 4ក្រុមចុងក្រោយនៃក្របខ័ណ្ឌ Champions Leagueផងដែរ ខណៈដែលគ្រាប់បាល់តែតបញ្ចូលទីរបស់ខ្សែបម្រើ Thiago Alcantara បានជួយឱ្យពួកគេទទួលជ័យជម្នះក្នុងលទ្ធផល 2-1 នៅលើទឹកដីក្រុម Sevilla កាលពីថ្ងៃអង្គារ ក្នុងការប្រកួតជើងទី1 នៃវគ្គ 8ក្រុមចុងក្រោយរបស់ពួកគេនៅលើទឹកដីក្រុមអេស្ប៉ាញ។

Ronaldo បានរកគ្រាប់បាល់បើកឆាកក្នុងទីក្រុង Turin ក្រោយពីលេងបានត្រឹមតែ 3នាទី និងបានបន្ថែមគ្រាប់បាល់ទី2 នៅនាទីទី64តាមរយៈការស៊ុតបាល់បករំលងក្បាលយ៉ាងល្អ ដើម្បីក្លាយជាកីឡាករដំបូងគេក្នុងការស៊ុតបាល់បញ្ចូលទី 10ប្រកួតជាប់ៗគ្នានៃក្របខ័ណ្ឌ Champions League និងដើម្បីជួយឱ្យរូបគេរកបានគ្រាប់បាល់សរុប 14គ្រាប់ក្នុងយុទ្ធនាការនៅរដូវកាលនេះ។ ខ្សែប្រយុទ្ធ Paulo Dybala របស់ Juventus បានរងពិន័យកាតក្រហមនៅនាទីទី66 នៅមុនពេល Ronaldo បានជួយឱ្យ Marcelo បំពេញជ័យជម្នះសម្រាប់ក្រុមខ្លួន និងជួយឱ្យ Real ស្ថិតក្នុងការគ្រប់គ្រងទាំងស្រុង មុននឹងឈានទៅកាន់ការប្រកួតជើងទី2 ក្នុងទីក្រុងម៉ាឌ្រីដ នាថ្ងៃទី11 ខែមេសា ខាងមុខនេះ៕

ប្រភពពី៖ Sky Sports

April 4, 2018

លោក Guardiola សន្យាបើកការវាយសម្រុកលើ Liverpool នៅរាត្រីនេះ

នៅថ្ងៃពុធនេះ លោក Pep Guardiola អ្នកចាត់ការទូទៅរបស់ក្រុម Manchester City បានសន្យាថា នឹងរក្សាការប្រើប្រាស់គោលការណ៍របស់លោក ដោយនឹងធ្វើការវាយសម្រុកលើក្រុម Liverpool ក្នុងការប្រកួតក្របខ័ណ្ឌ Champions League វគ្គ 8ក្រុមចុងក្រោយ ជើងទី1 របស់ពួកគេ បើទោះបីទទួលស្គាល់ថា លោកត្រូវលេងក្នុងក្រញាំដៃគូប្រជែងរបស់លោកក៏ដោយ។

Liverpool គឺជាក្រុមតែមួយគត់ដែលបានផ្តួលក្រុមខ្លាំង Man City ក្នុងក្របខ័ណ្ឌ Premier League ក្នុងរដូវកាលនេះ ក្រោយពីបានយកឈ្នះក្នុងលទ្ធផល 4-3 នាកីឡដ្ឋាន Anfield កាលពីខែមករា។ ខ្សែប្រយុទ្ធដ៏មុតស្រួចទាំង3 របស់ក្រុមម្ចាស់ផ្ទះដែលរួមមាន Mohamed Salah, Roberto Firmino និងSadio Mane សុទ្ធសឹងបានរកគ្រាប់បាល់បញ្ចូលទីទាំងអស់ ដោយទាំង3 នាក់នេះរកបានគ្រាប់បាល់សរុបដល់ទៅ៧៥គ្រាប់ឯណោះក្នុងរដូវកាលនេះ។

ប៉ុន្តែ ទោះបីជាយ៉ាងណា បច្ចេកទេសលេងប្រកបដោយការវាយសម្រុករបស់លោក Guardiola តែងបានទទួលជោគជ័យក្នុងរាល់ក្លិបដែលលោកបានដឹកនាំក្នុងអាជីពជាគ្រូបង្វឹករបស់លោក ពោលគឺចាប់ពីក្លិប Barcelona, Bayern Munich និងបច្ចុប្បន្នជាមួយនឹង Man City។

គ្រូបង្វឹកសញ្ជាតិអេស្ប៉ាញរូបនេះជឿជាក់ថា បច្ចេកទេសលេងបែបវាយសម្រុក គឺជាមធ្យោបាយដ៏ល្អបំផុតសម្រាប់ Man City ក្នុងការឈានទៅវគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League ជាលើកទី2 របស់ពួកគេ ប៉ុន្តែជាលើកទី8 ក្នុងចំណោម 9រដូវកាលរបស់លោកក្នុងនាមជាគ្រូបង្វឹក។ លោក Guardiola បាននិយាយកាលពីថ្ងៃអង្គារថា៖ «ខ្ញុំដឹងថា របៀបដែលយើងលេងគឺល្អសម្រាប់ Liverpool ពីព្រោះពួកគេជាក្រុមមួយដែលវាយសម្រុកបែបនេះ មិនដូចក្រុមផ្សេងក្នុងពិភពលោកឡើយ ជាពិសេស Mane, Salah, Firmino ដែលសុទ្ធតែជាខ្សែប្រយុទ្ធឆ្នើមទាំងអស់»។ គ្រូបង្វឹករូបនេះបានបន្ថែមទៀតថា៖ «ប៉ុន្តែ មធ្យោបាយដ៏ល្អបំផុតក្នុងការឈ្នះ គឺត្រូវធ្វើតាមរបៀបដែលយើងបានធ្វើចាប់តាំងពីយើងស្ថិតនៅទីនេះ»។ ការប្រកួតនេះនឹងចាប់ផ្តើមនៅម៉ោង1:45ទៀបភ្លឺ៕

ប្រភពព័ត៌មាន៖ Sky Sports

April 4, 2018

ពូជស្តៅខុសរដូវ ដាំម្តងប្រមូលផលបានរាល់ថ្ងៃ

តាមធម្មតាដើមស្តៅខ្មែរយើងផ្តល់ផលពេលលាស់ស្លឹកខ្ចី(ត្រួយ) និងចេញផ្កាបានតែម្តងប៉ុណ្ណោះក្នុងមួយឆ្នាំ ប៉ុន្តែសម្រាប់ស្តៅខុសរដូវនេះវិញ ដាំតែម្តងចំណាយពេលប្រហែលតែមួយឆ្នាំ វានឹងហុចផលឱ្យបេះលក់បានរាល់ថ្ងៃ។

លោក ឆន សុភក្តី អ្នកលក់កូនឈើនៅកសិដ្ឋានបណ្តុះកូនឈើខេត្តពោធិ៍សាត់មានប្រសាសន៍ថា ពូជស្តៅខុសរដូវនេះត្រូវបាននាំចូលពីប្រទេសថៃដែលទើបយកមកចែកចាយលក់ដល់កសិករនៅប្រទេសកម្ពុជាយើងបានជាងមួយឆ្នាំប៉ុណ្ណោះ ហើយមានការគាំទ្រច្រើនពីកសិករនៅតាមបណ្តាខេត្តផ្សេងៗដូចជាខេត្តកំពង់ចាម កំពង់ធំ និងកំពង់ស្ពឺជាដើម។

លោកថា ស្តៅខុសរដូវមានតម្លៃមួយដើម 2ដុល្លារហើយបើកសិករទិញកាន់តែច្រើននឹងលក់បញ្ចុះតម្លៃថែមទៀត និងដឹកជញ្ជូនដោយឥតគិតថ្ងៃទៅដល់ទីកន្លែង និងថែមទាំងជួយប្រាប់ពីវិធីសាស្ត្រដាំដុះ និងថែទាំដើម្បីឱ្យស្តៅឆាប់ធំលូតលាស់ និងឆាប់បានប្រមូលផលកាន់តែលឿនសម្រាប់រកប្រាក់ចំណេញត្រឡប់មកវិញទៀតផង។

ចំពោះវិធីសាស្ត្រដាំដុះ គេដាំចន្លោះពីគុម្ពមួយទៅគុម្ពមួយប្រវែង 5ម៉ែត្របួនជ្រុង ហើយសម្រាប់ រណ្តៅនីមួយៗ គេត្រូវជីកទៅក្រោមជម្រៅ 4 សង់ទីម៉ែត្រ និងមានទំហំ 4 សង់ទីម៉ែត្រជារាងការ៉េបួនជ្រុងដូចគ្នា។ មុននឹងជីករណ្តៅគេត្រូវភ្ជួរដីហាលចោលរយៈពេលមួយសប្តាហ៍ ដើម្បីសម្លាប់មេរោគនិងសម្លាប់ស្មៅមួយចំនួនដើម្បីកុំឱ្យវាបឺតយកជីជាតិចេញពីដើមស្តៅ ហើយក្រោយពីភ្ជួរដីរួច គេជីករណ្តៅហាលទុកចោលរយៈពេលមួយសប្តាហ៍ដូចគ្នាទើបយកកូនទៅដាក់ដាំ ដោយយកជីលាយជាមួយដីទៅដាក់នៅតាមរណ្តៅនីមួយៗ រួចទើបស្រោចទឹក។

លោកបានបញ្ជាក់ដូច្នេះទៀតថា “នៅពេលមុនពេលដាំ គេត្រូវយកជីអាចម៍គោ 30ភាគរយទៅលាយជាមួយដី ហើយបើគ្មានជីធម្មជាតិទេ គេគ្រាន់តែយកជីគីមីទៅលាយជាមួយដី រួចដាក់ដាំកូនស្តៅ ហើយសឹមយកទឹកទៅស្រោចតាមក្រោយជាការស្រេច។

ក្រោយពីដាំរួច គេត្រូវមើលថែដោយដាក់ជីមួយខែម្តង និងត្រូវបូមទឹកដាក់ក្នុងចម្ការមួយសប្តាហ៍ពីរទៅបីដងចំពោះរដូវប្រាំង ប៉ុន្តែសម្រាប់រដូវវស្សាវិញ បើមានភ្លៀងធ្លាក់ច្រើនមិនបាច់ស្រោចទឹកទេ គឺដើមស្តៅអាចលូតលាស់បានដោយខ្លួនឯង។

ការដាំស្តៅ គេមិនបាច់ប្រើថ្នាំសម្លាប់សត្វល្អិតនោះទេ ដោយសារតែត្រួយ និងផ្ការបស់វាមានរសជាតិល្វីងអាចបណ្តេញសត្វល្អិតចង្រៃមិនឱ្យមកជិតបាន ហើយគេក៏មិនចាំបាច់បាញ់អ័រម៉ូន ឱ្យឆាប់ចេញផ្កានាំឱ្យប៉ះពាល់សុខភាពអ្នកទទួលទានដែរ គ្រាន់តែដាក់ជីមួយខែម្តង និងស្រោចទឹកជាប្រចាំប៉ុណ្ណោះ ដើមស្តៅនឹងលូតលាស់រាល់ថ្ងៃ ចេញត្រួយចេញផ្កាអាចបេះវិលជុំដែលធ្វើឱ្យកសិករអាចប្រមូលផលយកទៅលក់បានគ្រប់រដូវ និងប្រមូលលុយបានរាល់ថ្ងៃតែម្តង៕

April 4, 2018

ការស្រាវជ្រាវរកឃើញថា មនុស្សលេងសើចច្រើន ភាគច្រើនជាមនុស្សឆ្លាត

ការសន្និដ្ឋានរបស់ Albert Einstein បានឱ្យដឹងថាដើម្បីឱ្យមានចិត្តស្រឡះល្អ និងមានថាមពលដ៏អស្ចារ្យនោះ គឺត្រូវធ្វើខ្លួនឱ្យរីករាយដូចកូនក្មេង។ ចាប់ផ្តើមពីសេចក្ដីសន្និដ្ឋានខាងលើនេះ មានស្ថាប័នស្រាវជ្រាវមួយបានចាប់ផ្តើមធ្វើការសាកល្បងសិក្សាកាន់តែសីុជម្រៅឡើងពីភាពរីករាយ ឬចរិតកំប្លែងលេងរបស់មនុស្សជាមួយនឹងភាពវៃឆ្លាត របស់ពួកគេក្នុងការគិតលើបញ្ហានានា។

តាមការស្រាវជ្រាវនៅក្នុងប្រទេសអូទ្រីស កាលពីពេលថ្មីៗនេះបានរកឃើញថា មនុស្សដែលចូលចិត្តកំប្លែង ឬលេងសើចច្រើន ភាគច្រើនជាមនុស្សដែលមានកម្រិតនៃភាពវៃឆ្លាត (IQs) ខ្ពស់ជាងមនុស្សដែលមិនសូវលេងសើចឬមិនសូវមានភាពរីករាយក្នុងជីវិត។ របាយការណ៍នៃការស្រាវជ្រាវបានបង្ហាញជាភ័ស្តុតាងថា ដើម្បីធ្វើឱ្យមនុស្សមានគំនិតសប្បាយរីករាយបាន គឺត្រូវមានភាពឆ្លាតវៃនិងសមត្ថភាពក្នុងការគិតយ៉ាងវិជ្ជមានជាមុនសិនបន្ទាប់មកពួកគេនឹងបញ្ចេញសកម្មភាព ប្រកបដោយភាពរស់រវើក ហើយធ្វើការងារបានលឿន និងមិនចេះនឿយហត់។ ពួកគេបានបង្ហាញពីលទ្ធផលនៃការវិភាគផងដែរថា មនុស្សកំប្លែងក៏មានភាពវៃឆ្លាតផ្នែកការដោះស្រាយបញ្ហាយ៉ាងពិត-ប្រាកដដែរ (verbal and non-verbal intelligence)។

ក្រៅពីនេះ បុគ្គលដែលមានភាពឆ្លាតវៃទាំងអស់នោះក៏មានលក្ខណៈពិសេសមួយផ្សេងទៀតផងដែរ គឺមនុស្សគ្រប់គ្នាចូលចិត្តទាក់ទងជាមួយគាត់ ព្រោះការសិក្សាស្រាវជ្រាវបានបង្ហាញភ័ស្តុតាងឱ្យឃើញយ៉ាងច្បាស់ថា អ្នកដែលមានអារម្មណ៍រីករាយពីខាងក្នុងមិនត្រឹមតែមាន IQ ខ្ពស់ប៉ុណ្ណោះទេ តែពួកគេថែមទាំងមានកម្រិតភាពឆ្លាតវៃខាងអារម្មណ៍ (Emotional intelligence, EQ) និងទទួលពិន្ទុល្អផ្នែកទំនាក់ទំនងថែមទៀតផង។

មិនថា ពួកគេជានារី ឬបុរសនោះទេ បុគ្គលដែលមានអារម្មណ៍រីករាយច្រើន តែងតែទទួលបានពិន្ទុខ្ពស់នៅពេលដែលពួកគេបង្ហាញខ្លួនជាសាធារណៈ ឬទទួលបានការចាប់អារម្មណ៍ច្រើននៅក្នុងការទំនាក់ទំនង ដែលគេអាចក្លាយជាដៃគូល្អសម្រាប់រយៈពេលយូរអង្វែងលើរាល់ការងារសំខាន់ៗ ក៏ដូចជាអាជីវកម្មជាដើម។

នៅក្នុងផ្នែកចិត្តវិទ្យា គេប្រើប្រាស់ភាពវិជ្ជមាននៃគំនិតរីករាយដើម្បីជំរុញមនុស្សឱ្យមានទំនាក់ទំនងល្អ ហើយបង្កើតភាពខ្លាំងនៅក្នុងអារម្មណ៍ដើម្បីលើកទឹកចិត្តឱ្យពួកគេក្លាយជាមនុស្សដែលមានសក្តានុពលលើគ្រប់ការងារ ទាំងផ្នែកឯកជន និងការធ្វើការងារជាក្រុម។ អ្នកជំនាញបានរកឃើញផងដែរថា មនុស្សដែលអាចរកឃើញនូវការងារដែលមានភាពសប្បាយរីករាយច្រើន ភាគច្រើនជាអ្នកដែលអាចរកឃើញសេចក្តីសុខយ៉ាងពិតប្រាកដ ហើយមិនចូលចិត្តធ្វើការងារទាំងឡាយណាដែលគេមិនស្រឡាញ់ ឬការងារបែបមានសម្ពាធនោះទេ ព្រោះគេអាចឆាប់ធុញទ្រាន់។ ភាគច្រើនគេជាមនុស្សដែលស្វែងរកសេចក្តីសុខ និងបន្តអភិវឌ្ឍលើផ្លូវដែលគេពេញចិត្ត ដោយមិនបង្ខំចិត្តធ្វើរឿងសាំញ៉ាំដើម្បីតែលុយកាក់ ឬមុខមាត់នោះទេ៕

April 4, 2018

ប្រទេស ឆែក ផ្តល់ទឹកប្រាក់ជាង 7លានដុល្លារជួយអភិវឌ្ឍវិស័យ 3នៅកម្ពុជា

ក្នុងគោលដៅដើម្បីជួយអភិវឌ្ឍប្រទេសកម្ពុជាឱ្យកាន់តែមានការរីកចម្រើនឡើង ក្រុមប្រឹក្សាអភិវឌ្ឍន៍កម្ពុជាបានចុះអនុស្សរណៈយោគយល់គ្នាមួយ ជាមួយរដ្ឋាភិបាលសាធារណរដ្ឋ ឆែក ដើម្បីជួយអភិវឌ្ឍវិស័យសំខាន់ៗចំនួន3 នៅកម្ពុជា។

ថ្លែងក្នុងកិច្ចប្រជុំអន្តរក្រសួង ក្នុងកិច្ចពិភាក្សាលើសេចក្តីព្រាងអនុស្សរណៈយោគយល់ស្តីពីកិច្ចសហប្រតិបត្តិការអភិវឌ្ឍន៍ និងកម្មវិធីកិច្ចសហប្រតិបត្តិការអភិវឌ្ឍន៍ទេ្វភាគីឆ្នាំ2018-2023 រវាងរាជរដ្ឋាភិបាលកម្ពុជា និងរដ្ឋាភិបាលសាធារណរដ្ឋ ឆែក ឯកឧត្តម ឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជាបានមានប្រសាសន៍ថា រដ្ឋាភិបាលសាធារណរដ្ឋ ឆែក បានបន្តជ្រើសយកប្រទេសកម្ពុជាជាប្រទេសអាទិភាពតែមួយគត់ក្នុងទី្វបអាស៊ី។

ឯកឧត្តមបន្តថា ដើម្បីអនុវត្តកម្មវិធីកិច្ចសហប្រតិបត្តិការអភិវឌ្ឍន៍ទ្វេភាគីរវាងរាជរដ្ឋាភិបាលកម្ពុជា និងរដ្ឋាភិបាលសាធារណរដ្ឋ ឆែក សម្រាប់រយៈពេល5 ឆ្នាំ (2018-2023) ផ្តោតលើវិស័យអាទិភាពចំនួន 3 គឺ៖

វិស័យអប់រំ និងបណ្តុះបណ្តាលវិជ្ជាជីវៈ
វិស័យសុខាភិបាល

និង3. វិស័យទឹកសា្អត និងអនាម័យ ដែលអាទិភាពទាំង3នេះបានប្រមូលផ្តុំអនុវត្តនៅខេត្តកំពង់ឆ្នាំងទាំងអស់។

គួរបញ្ជាក់ដែរថា ហិរញ្ញប្បទានដែលគ្រោងផ្តល់ដោយរដ្ឋាភិបាលសាធារណរដ្ឋ ឆែក មានប្រមាណ 1.5លានដុលា្លរអាមេរិកក្នុងមួយឆ្នាំ៕

April 3, 2018

សន្និសីទសារព័ត៌មានស្តីពីកម្មវិធីដំណើរទេសចរណ៍ពានរង្វាន់ UEFA CHAMPIONS LEAGUE 2018 ជាមួយកីឡាបាល់ទាត់អន្តរជាតិ RUUD VAN NISTELROOY

ភ្នំពេញ៖ នៅថ្ងៃទី 3 ខែមេសា សន្និសីទសារព័ត៌មានមួយបានរៀបចំឡើងដើម្បីឧទ្ទេសនាមតារាបាល់ទាត់អន្តរជាតិលោក Ruud van Nistelrooy អតីតៈខ្សែប្រយុទ្ធរបស់ក្រុម Manchester United និងក្រុម Real Madrid ដែលកាន់តួនាទីជាទូតសុឆន្ទៈប្រចាំកម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League 2018 ដែលនាំជូនដោយស្រាបៀរ Heineken®។

លោក Roland Bala នាយកគ្រប់គ្រងនៃក្រុមហ៊ុនស្រាបៀរ Heineken ប្រចាំប្រទេសកម្ពុជា លោកម៉ៃ តុលា អគ្គលេខាធិការស្តីទីនៃសហព័ន្ធកីឡាបាល់ទាត់កម្ពុជា (FFC) ឯកឧត្តម ស៊ាន បូរ៉ាត រដ្ឋលេខាធិការនៃក្រសួងអប់រំយុវជននិងកីឡា បានចូលរួមជាអធិបតីភាពនៃអង្គសន្និសីទសារព័ត៌មាននេះ ហើយបានស្វាគមន៍លោក Ruud van Nistelrooy មកកាន់ព្រះរាជាណាចក្រកម្ពុជា។

ឯកឧត្តម វ៉ាត់ ចំរើន អនុអគ្គលេខាធិការនៃក្រសួងទេសចរណ៍ និងជាអគ្គលេខាធិការនៃគណៈកម្មាធិការជាតិអូឡាំពិកក៏បានចូលរួមក្នុងពិធីស្វាគមន៍នេះផងដែរ។

ជាផ្នែកមួយនៃយុទ្ធនាការទូទាំងពិភពលោក កម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League 2018 ដែលនាំជូនដោយស្រាបៀរ Heineken® ធ្វើឡើងនៅប្រទេសកម្ពុជាចាប់ពីថ្ងៃទី 2 ដល់ថ្ងៃទី 4 ខែមេសា ឆ្នាំ 2018 ។ សម្រាប់រយៈពេលបីថ្ងៃ ក្រុមអ្នកគាំទ្រមានឱកាសដ៏កម្រក្នុងការថតរូបជាមួយនឹងពានរង្វាន់ដ៏ល្បីល្បាញនេះ ជួបផ្ទាល់ជាមួយ Ruud van Nistelrooy និងទទួលបទពិសោធន៍ដ៏រំភើបនៃដំណើរទស្សនកិច្ចនេះ។

លោក Ruud van Nistelrooy ត្រូវបានចាត់ទុកថាជាកីឡាករដ៏ឆ្នើមបំផុតម្នាក់ក្នុងជំនាន់របស់គាត់ដោយស៊ុតបញ្ចូលទីបាន 150គ្រាប់ក្នុង 219 ប្រកួតសម្រាប់ក្រុម Manchester United និងជាកីឡាករស៊ុតបញ្ចូលទីច្រើនជាងគេក្នុងកំណត់ត្រាបាល់ទាត់អឺរ៉ុបរបស់ក្លិប និងជាកីឡាករស៊ុតបាល់បញ្ចូលទីច្រើនជាងគេបីសម័យកាលក្នុងក្របខ័ណ្ឌ UEFA Champions League ។ លោក Ruud van Nistelrooy មានទំនាក់ទំនងជាប្រវត្តិសាស្ត្រជាមួយនឹងក្របខ័ណ្ឌ UEFA Champions League និងដើរតួយ៉ាងសំខាន់ជំនួសស្រាបៀរ Heineken® ក្នុងការបង្ហាញនូវមហិច្ឆិតានិងចំណាប់អារម្មណ៍ខ្លាំងចំពោះកម្មវិធីប្រកួតនេះ។

តារាបាល់ទាត់រូបនេះមានអារម្មណ៍រំភើបរីករាយខ្លាំងណាស់ចំពោះដំណើរទស្សនកិច្ចនៅព្រះរាជាណាចក្រកម្ពុជា ជាពិសេសឱកាសជួបជាមួយអ្នកគាំទ្រ និងកីឡាករបាល់ទាត់កម្ពុជា ដោយកីឡាករកម្ពុជាមួយចំនួននឹងមានឱកាសចូលរួមក្នុងវគ្គបង្វឹកពិសេសជាមួយលោក Ruud van Nistelrooy ។

លោក Roland Bala នាយកគ្រប់គ្រងនៃក្រុមហ៊ុនស្រាបៀរ Heineken ប្រចាំប្រទេសកម្ពុជា បានសម្តែងនូវភាពរីករាយយ៉ាងខ្លាំងចំពោះដំណើរទស្សនកិច្ចនៅកម្ពុជា ដោយមានប្រសាសន៍ថា៖ “ស្រាបៀរ Heineken®មានកិត្តិយសយ៉ាងក្រៃលែងក្នុងការនាំកម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League មកកាន់ប្រទេសកម្ពុជា។

នេះគឺជាបទពិសោធន៍វិសេសវិសាលមួយសម្រាប់អ្នកគាំទ្រកម្ពុជាចំពោះក្របខ័ណ្ឌ UEFA Champions League ដើម្បីបានឃើញផ្ទាល់នូវពានរង្វាន់ដ៏ល្បីល្បាញនេះ ហើយនិងជួបផ្ទាល់ជាមួយ Ruud van Nistelrooy។ គោលបំណងរបស់យើងគឺធ្វើឲ្យអ្នកគាំទ្រដែលមិនមានឱកាសអាចទទួលបាននូវបទពិសោធន៍រំភើបរីករាយ និងអារម្មណ៍រំជើបរំជួលចំពោះការប្រកួតក្របខ័ណ្ឌ UEFA Champions League ។ យើងក៏ចង់លើកស្ទួយវិស័យកីឡាបាល់ទាត់របស់កម្ពុជានៅលើឆាកអន្តរជាតិ”

ចំពោះព័ត៌មានលម្អិតបន្ថែមអំពីកម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League ដែលនាំជូនដោយស្រាបៀរ Heineken® នៅកម្ពុជា សូមចូលមើលគេហទំព័រ៖ www.facebook.com/Heineken

សូមរីករាយទទួលទានស្រាបៀរ Heineken ដោយទទួលខុសត្រូវ

April 3, 2018

វិធីសាស្ត្របង្កើនភាពរីករាយក្នុងការរៀន និងធ្វើឱ្យយើងរៀនពូកែ

អ្នកសិក្សាមួយចំនួនហាក់កំពុងមានការយល់ច្រឡំថា អ្នកដែលខំរៀនទាំងអស់សុទ្ធតែជាអ្នករៀនចេះ ឬសុទ្ធតែជាអ្នកដែលជោគជ័យក្នុងការសិក្សា តែស្ថានភាពពិតគឺអាចខុសស្រឡះពីការគិត ព្រោះមានអ្នកខំរៀនមួយចំនួនបែរជាជោគជ័យតិចជាងអ្នកដែលមើលទៅមិនសូវខំក៏មាន។ បញ្ហាទាំងអស់នេះ អាចកើតឡើងពីវិធីសាស្ត្រក្នុងការគិត និងអនុវត្តសម្រាប់ទទួលបានភាពល្អប្រសើរក្នុងជីវិតសិក្សា។

កញ្ញា ឡាំ សុវណ្ណី និស្សិតដែលទទួលបាននិទ្ទេស A រាល់ឆ្នាំ និងជានិស្សិតដែលបានជាប់អាហារូបករណ៍ទៅសិក្សានៅប្រទេសថៃ បានលើកឡើងថា លក្ខណសម្បត្តិរបស់និស្សិតពូកែមានច្រើនណាស់ ហើយខុសប្លែកគ្នាទៅតាមជំនាញ និងវិធីសាស្ត្ររៀងៗខ្លួន។ សម្រាប់អ្នករៀនពូកែភាគច្រើនជាអ្នកដែលមានវិធីសាស្ត្ររៀនច្បាស់លាស់ មិនមែនខំដោយគ្មានគោលគំនិតនោះទេ។ ចំណុចសំខាន់ទី1 សម្រាប់អ្នករៀនពូកែ គឺគេជ្រើសរើសយកមុខវិជ្ជាត្រឹមត្រូវ ហើយមុខវិជ្ជាទាំងអស់នោះជាមុខវិជ្ជាដែលគេស្រឡាញ់ពេញចិត្តពិតប្រាកដ។

កាលណាមនុស្សសិក្សាលើមុខវិជ្ជាដែលគេមិនស្រឡាញ់ ទោះបីជាខិតខំរៀនខ្លាំងក៏មានការលំបាកដែរ ព្រោះចិត្តយើងមិនចង់ ហេតុនេះកាន់តែជម្នះខ្លួនឯង កាន់តែមានអារម្មណ៍ថាធុញទ្រាន់ តែប្រសិនបើយើងជ្រើសរើសចំមុខវិជ្ជាដែលខ្លួនស្រឡាញ់វិញ យើងនឹងអាចរៀនដោយមិនធុញទ្រាន់ ហើយក៏ឆាប់យល់ច្បាស់ដែរ ព្រោះយើងមានទេពកោសល្យពីកំណើតស្រាប់ទៅហើយ។

កញ្ញា ឡាំ សុវណ្ណី បាននិយាយថា៖ “ចំណុចសំខាន់មួយទៀតដែលធ្វើឱ្យអ្នកខំរៀនមួយចំនួនមិនសូវទទួលបានលទ្ធផលល្អ គឺការធ្វើដោយគ្មានផែនការ។ នៅពេលដែលយើងរៀនអ្វីមួយដោយគ្មានផែនការ និងការស្រាវជ្រាវច្បាស់លាស់ វានឹងធ្វើឱ្យយើងពិបាកយល់ ហើយមេរៀនទាំងអស់នោះ នឹងគរច្រើនឡើងៗ រហូតដល់យើងមិនដឹងថាត្រូវចាប់ផ្តើមពីណាទៅណា បញ្ហានេះ អាចនឹងធ្វើឱ្យសិស្សទាំងអស់នោះមិនអាចអនុវត្តបានល្អនៅពេលប្រឡង បើទោះបីជាខំអាន ឬមើលច្រើនដងយ៉ាងណាក៏ដោយ។

និស្សិតឆ្នើមខាងលើ បានលើកឡើងផងដែរថា ការកំណត់ផែនការច្បាស់លាស់សម្រាប់សិក្សាគឺជារឿងសំខាន់ណាស់ ព្រោះថា នៅក្នុងអំឡុងពេលសិក្សា យើងចាំបាច់ត្រូវតែដឹងឱ្យបានច្បាស់ជាមុនថា យើងនឹងត្រូវរៀនពីអ្វីខ្លះ ហើយរាល់មេរៀនទាំងអស់នោះត្រូវតែស្រាវជ្រាវឱ្យបានច្បាស់លាស់មុនដល់ម៉ោងសិក្សា។ នៅពេលដែលយើងស្រាវជ្រាវបានមុន យើងនឹងមានសំណួរជាច្រើនដែលអាចសួរនៅក្នុងម៉ោងរៀន ហើយក្រោយពេលសួរអស់ហើយ យើងនឹងអាចដឹងពីហេតុផលនៃមេរៀន ហើយចងចាំដោយមិនបាច់ខំប្រឹងដាច់យប់ដើម្បីរត់តាមមេរៀនដែលចេះតែទៅមុខរាល់ថ្ងៃនោះទេ។

ចំណុចសំខាន់មួយទៀតដែលត្រូវដឹងនោះគឺ ការជឿជាក់ខ្លួនឯង។ អ្នករៀនដែលពូកែ ភាគច្រើនជាអ្នកដែលមានទំនុកចិត្តលើខ្លួនឯង មានភាពច្បាស់លាស់ពីហេតុផលនៃមេរៀនត្រឹមត្រូវ ហើយមិនងាយប្រែប្រួលទៅតាមស្ថានការណ៍ណាមួយ ឬទៅតាមគេនោះទេ។ ខុសគ្នាស្រឡះពីអ្នកដែលរៀនមិនសូវពូកែ ពេលខ្លះខំប្រឹងប្រែងអានចាំមាត់ តែងាយនឹងជឿតាមអ្នកផ្សេងដែលមើលទៅពូកែជាង បើទោះបីជាអ្នកនោះពេលខ្លះធ្វើខុសក៏ដោយ។

និស្សិតកំពុងសិក្សានៅប្រទេសជប៉ុន និងជាអតីតសិស្សពូកែទូទាំងប្រទេសផ្នែករូបវិទ្យា លោកសុខ ពិសី បានលើកឡើងថា ការរៀនពេលខ្លះមិនលំបាកខ្លាំងពេកនោះទេ ប្រសិនបើយើងឧស្សាហ៍អនុវត្តតាមដំណាក់កាល។ ការដែលយើងមានភាពឈឺក្បាលខ្លាំងលើលំហាត់លំបាកៗ ភាគច្រើន មកពីយើងមិនបានចាប់ផ្តើមពីដំណាក់កាលដំបូងៗឬមើលងាយលំហាត់តូច។ ពេលខ្លះលំហាត់លំបាកៗហើយមានភាពស៊ីជម្រៅ ឬក្បួនច្រើន ភាគច្រើនគេប្រមូលផ្តុំប្រភេទក្បួនតូចៗបញ្ចូលគ្នា ហើយបង្កើតជាលំហាត់ធំតែប៉ុណ្ណោះ ប្រសិនបើយើងតាមទាន់គ្រប់ដំណាក់កាលឱ្យជាប់ យើងនឹងអាចធ្វើវាបានដោយងាយ។

លោក សុខ ពិសី បាននិយាយថា៖ “ការតាមដាននិងស្វែងយល់ពីឫសគល់នៃមេរៀននីមួយៗ ជាវិធីល្អមួយសម្រាប់អ្នកខំរៀន ព្រោះថា នៅពេលដែលយើងយល់មកពីក្នុងសាលាហើយ យើងអាចចំណាយពេលនៅផ្ទះច្រើនដើម្បីអនុវត្ត ហើយមិនចាំបាច់ត្រូវខំអាន ឬមើលលំហាត់ច្រើនពេកនោះទេ។

និស្សិតពូកែខាងលើបានលើកឡើងផងដែរថា នៅពេលយើងមានវិធីឆ្លាតវៃក្នុងការរៀនហើយ យើងនឹងអាចសល់ពេលច្រើនក្នុងការគិត ឬធ្វើអ្វីៗជាច្រើនផ្សេងទៀតដែលផ្តល់ផលវិជ្ជមានសម្រាប់ការសិក្សា។ ហេតុនេះប្រសិនបើយើងចង់ចំណាយពេលឱ្យមានប្រយោជន៍ ហើយអាចចងចាំបានល្អ ការផ្តោតអារម្មណ៍នៅក្នុងម៉ោងរៀន និងព្យាយាមដោះស្រាយនូវចម្ងល់ដែលជាមន្ទិល ហើយលំបាកដោះស្រាយ យើងនឹងអាចរៀនដោយភាពសប្បាយរីករាយ ហើយមិនលំបាកស្មុគស្មាញពេកនោះទេ៕

April 3, 2018

ពានរង្វាន់អចលនទ្រព្យនាំមកនូវសន្ទុះថ្មីដល់វិស័យសំណង់ និងវិស័យអចលនទ្រព្យនៅកម្ពុជា

វាគឺជាភាពជោគជ័យដ៏ធំធេងមួយសម្រាប់ពានរង្វាន់ប្រចាំឆ្នាំលើកទីបីរបស់ PropertyGuru Cambodia Property Awards ឆ្នាំ2018 ដែលបាននាំមកជូនដោយក្រុមហ៊ុន KHI បានប្រារព្ធធ្វើឡើងនៅថ្ងៃទី16 ខែមីនាកន្លងទៅនេះនៅរាជធានីភ្នំពេញ ដែលប្រព្រឹត្តទៅនៅសណ្ឋាគារលំដាប់ផ្កាយប្រាំ Sofitel Phnom Penh Phokeethra ដោយមានការចូលរួមពីភ្ញៀវជាតិ និងអន្តរជាតិយ៉ាងច្រើនកុះករ។ បើយើងធ្វើការប្រៀបធៀបរវាងព្រឹត្តិការណ៍ពានរង្វាន់អចលនទ្រព្យ កម្ពុជា កាលពីឆ្នាំមុន ជាមួយនឹងព្រឹត្តិការណ៍ពានរង្វាន់អចលនទ្រព្យ កម្ពុជា លើកទីបីនៅក្នុងឆ្នាំ2018នេះ ឃើញថា មានការរីកចម្រើនជាខ្លាំង ទាំងចំនួនភ្ញៀវដែលមកចូលរួមនៅក្នុងកម្មវិធី ដែលមានទាំងភ្ញៀវជាតិ និងភ្ញៀវអន្តរជាតិនៅក្នុងវិស័យអចលនទ្រព្យ ហើយចំពោះចំនួនពានរង្វាន់ក៏មានការកើនឡើងផងដែរ ដែលកាលពីឆ្នាំកន្លងទៅពានរង្វាន់អចលនទ្រព្យកម្ពុជា មានត្រឹមតែ12ពានរង្វាន់តែប៉ុណ្ណោះ ចំណែកនៅក្នុងឆ្នាំ2018នេះ ពានរង្វាន់បានកើនទាំងរហូតដល់26ពានរង្វាន់ផ្សេងៗគ្នា និងត្រូវបានទទួលស្គាល់ និងវាយតម្លៃដោយគណៈកម្មាធិការឯករាជ្យសម្រាប់ការអភិវឌ្ឍ ការរចនា និងការអនុវត្តន៍អាជីវកម្មល្អឥតខ្ចោះ។ ចំណែកក្រុមហ៊ុនដែលមានសិទ្ធិចូលរួមនៅក្នុងកម្មវិធីនេះ ត្រូវបានជ្រើសរើស និងសម្រិតសម្រាំងជាខ្លាំង គឺមានតែក្រុមហ៊ុនជាង50ប៉ុណ្ណោះ ដែលមានសិទ្ធិចូលរួមប្រកួតនៅក្នុងចំណោមក្រុមហ៊ុនដែលបានដាក់ពាក្យយ៉ាងច្រើន (ចំនួនក្រុមហ៊ុនដែលបានដាក់ពាក្យគឺកើនឡើងទ្វេដង បើប្រៀបធៀបនឹងឆ្នាំមុន)។ ចំណុចវិជ្ជមានទាំងអស់នេះហើយ ដែលឆ្លុះបញ្ចាំងឱ្យឃើញថា វិស័យសំណង់ និងអចលនទ្រព្យនៅកម្ពុជាគឺកំពុងមានការរីកចម្រើន និងមានការចាប់អារម្មណ៍ពីសំណាក់បណ្តាវិនិយោគិននានាទាំងនៅក្នុងស្រុក នៅក្នុងតំបន់ និងនៅជំុវិញពិភពលោក។

ពានរង្វាន់នេះមានសារៈសំខាន់ណាស់ក្នុងការជំរុញឱ្យមានការរីកចម្រើនក្នុងវិស័យសំណង់ និងវិស័យអចលនទ្រព្យនៅក្នុងព្រះរាជាណាចក្រកម្ពុជា ហើយការប្រកួតប្រជែងនេះក៏ជួយទាក់ទាញវិនិយោគិនពីបណ្តាប្រទេសរីកចម្រើនក្នុងវិស័យអចលនទ្រព្យឱ្យមកកាន់ប្រទេសកម្ពុជាកាន់តែច្រើនឡើង។ ភាពជោគជ័យនៃកម្មវិធីពានរង្វាន់ PropertyGuru Cambodia Property Awards ឆ្នាំ2018នេះ បានបង្ហាញយ៉ាងច្បាស់ថា វិស័យសំណង់ និងអចលនទ្រព្យ គឺជាសសរស្តម្ភដ៏សំខាន់មួយដែលគាំទ្រដល់កំណើនសេដ្ឋកិច្ចជាតិ។

កម្មវិធីពានរង្វាន់អចលនទ្រព្យ កម្ពុជា លើកទីបីនៅក្នុងឆ្នាំ2018នេះ គឺទទួលបាននូវភាពជោគជ័យ និងមានភាពរីកចម្រើនគួរជាទីមោទនៈក្រៃលែង ដូច្នេះសូមរងចាំតាមដានថា តើកម្មវិធីពានរង្វាន់អចលនទ្រព្យ កម្ពុជា នៅឆ្នាំបន្ទាប់ នាឆ្នាំ2019ខាងមុននេះ នឹងមានភាពរីកចម្រើន និងមានអ្នកគាំទ្រខ្លាំងដល់កម្រិតណាជាបន្តទៀត៕

(សម្រាប់ព័ត៌មានបន្ថែមសូមចូលទៅកាន់គេហទំព័រ PropertyGuruGroup.com)

April 3, 2018

ដើម្បីអបអរសាទរពិធីបុណ្យចូលឆ្នាំថ្មី ធនាគារជាតិ ប្រកាសទទួលប្ដូរក្រដាសប្រាក់រៀល ចាស់ ទក់ និងរហែក

ភ្នំពេញ៖ ធនាគារជាតិនៃកម្ពុជា មានសេចក្ដីសោមនស្សរីករាយ សូមជម្រាបជូនដំណឹង ស្ដីអំពី «យុទ្ធនាការស្រលាញ់ប្រាក់រៀល» ដល់សាធារណជនទាំងអស់ ឱ្យបានជ្រាបថា សម្រាប់អ្នកដែលមានក្រដាសប្រាក់រៀល ចាស់ ទក់ និងរហែក អាចដូរយកក្រដាសប្រាក់រៀលថ្មីវិញបាន គ្រប់សាខាធនាគារជាតិ រាជធានី-ខេត្ត រៀងរាល់ម៉ោងធ្វើការ ចាប់ពីថ្ងៃទី 09 ដល់ថ្ងៃទី13 ខែមេសា ឆ្នាំ 2018 ដែលយុទ្ធនាការនេះ ធ្វើឡើងដើម្បីអបអរសាទរពិធីបុណ្យចូលឆ្នាំប្រពៃណីខ្មែរ៕

April 3, 2018

សាលារាជធានីភ្នំពេញ ជូនដំណឹង កែសម្រួលខ្សែរត់ និងទីតាំងចំណតរថយន្ដក្រុងសម្រាប់ដឹកពលរដ្ឋដោយឥតគិតថ្លៃ ទៅតាមបណ្ដាខេត្តក្នុងឱកាសបុណ្យចូលឆ្នាំ

ភ្នំពេញ៖ នៅថ្ងៃទី03 ខែមេសា ឆ្នាំ2018 នេះ រដ្ឋបាលរាជធានីភ្នំពេញ បានចេញសេចក្ដីជូនដំណឹងជាផ្លូវការ ស្ដីអំពីការកែសម្រួលខ្សែរត់ និងទីតាំងចំណតរថយន្ដក្រុង របស់រដ្ឋាករស្វយ័តដឹកជញ្ជូនសាធារណៈរថយន្ដក្រុង រាជធានីភ្នំពេញ ដែលត្រូវដឹកជញ្ជូនប្រជាពលរដ្ឋពីភ្នំពេញ ទៅតាមបណ្ដាខេត្តនានា ក្នុងឱកាសបុណ្យចូលឆ្នាំប្រពៃណីជាតិខ្មែរខាងមុខនេះ ដោយគិតបង់ប្រាក់។

សូមអានសេចក្ដីជូនដំណឹងដូចខាងក្រោម៖

April 3, 2018

Author: វល័ក្ខ