វល័ក្ខ - La Reine Media

ខ្សែវីដេអូរបស់អង្គការ IOM X ដើម្បីអប់រំដល់ស្ត្រីកម្ពុជា អំពីការរៀបការដោយបង្ខំទៅប្រទេសចិន

ផ្អែកតាមការស្រាវជ្រាវរបស់អង្គការអន្តរជាតិទេសន្តរប្រវេសន៍ (IOM) បានបលើកឡើងថា ស្ត្រីវ័យក្មេងមកពីជនបទនៃប្រទេសកម្ពុជា ត្រូវបានគេជួញដូរដើម្បីរៀបការដោយបង្ខំនៅប្រទេសចិន។ អង្គការ IOM X បានចាក់បញ្ចាំងខ្សែវីដេអូលើកដំបូងមួយ ដើម្បីលើកកម្ពស់ការអនុវត្ត និងលើកទឹកចិត្តស្ត្រីកម្ពុជាវ័យក្មេង ឱ្យធ្វើការស្វែងរកព័ត៌មាន មុនពេលសម្រេចចិត្តរៀបការ ដើម្បីទៅរស់នៅក្រៅប្រទេស។

អង្គការ IOM X គឺជាយុទ្ធនាការរបស់អង្គការអន្តរជាតិទេសន្តរប្រវេសន៍ (IOM) និងទីភ្នាក់ងារសហរដ្ឋអាមេរិកដើម្បីការអភិវឌ្ឍអន្តរជាតិ (USAID) ដើម្បីទប់ស្កាត់អំពើជួញដូរមនុស្ស និងការកេងប្រវ័ញ្ច។ ការរៀបការដែលគេរៀបចំឱ្យនៅប្រទេសកម្ពុជា គឺជាការអនុវត្តដែលមានការទទួលស្គាល់ដោយសង្គម ជាពិសេសនៅតាមទីជនបទ ដូច្នេះហើយការរៀបការទៅប្រទេសចិន រៀបចំដោយមេខ្យល់ គឺមិនមែនជារឿងចម្លែកឡើយ។ មានស្ត្រីជាច្រើនទៅប្រទេសចិនដោយស្ម័គ្រចិត្ត ដោយសារតែការលួងលោមថា នឹងមានឱកាសរកលុយផ្ញើត្រឡប់មកផ្ទះវិញ។

ជារឿយៗ ស្ត្រីទាំងនោះ ជឿជាក់ថា ពួកគេមានសិទ្ធិក្នុងការជ្រើសរើសគូស្រករ និងបដិសេធអាពាហ៍ពិពាហ៍ ប្រសិនបើពួកគេមិនពេញចិត្ត។ មេខ្យល់ នឹងប្រាប់ដល់ស្ត្រីទាំងនោះថា ពួកគេនឹងអាចផ្ញើប្រាក់មកផ្ទះ ដោយសារការរៀបការជាមួយបុរសអ្នកមាន ឬអាចធ្វើការនៅប្រទេសចិនបាន។ បើទោះបីជាមានស្ត្រីជាច្រើនចំណាកស្រុកទៅចិនដើម្បីរៀបការ ហើយរីករាយនឹងជីវិតរបស់ពួកគេនៅទីនោះក៏ដោយ ប៉ុន្តែស្ត្រីមួយចំនួន ត្រូវបានបង្ខំឱ្យរៀបការជាមួយបុរស ដែលពួកគេមិនពេញចិត្ត។ ស្ត្រីជាច្រើន ក៏មិនបានដឹងដែរថា ដើម្បីអាចធ្វើការស្របច្បាប់នៅប្រទេសចិនបាន ពួកគេត្រូវចុះបញ្ជីអាពាហ៍ពិពាហ៍ស្របច្បាប់របស់ពួកគេ ហើយរស់នៅប្រទេសចិនបានរយៈពេល5ឆ្នាំជាមុនសិន។

ការពិតគឺមានភាពខុសគ្នាខ្លាំងណាស់ ទៅនឹងអ្វីដែលគេសន្យាជាមួយស្ត្រីវ័យក្មេងទាំងនោះ។ ពួកគេជារឿយៗ មិនមានជម្រើសថា ត្រូវរៀបការជាមួយអ្នកណាឡើយ ហើយជាទូទៅ ត្រូវបានគេលក់។ ថ្វីបើអ្នកអនុវត្តច្បាប់ នៅក្នុងប្រទេសចិន បានបន្តកិច្ចប្រឹងប្រែងក្នុងបំបាត់ការអនុវត្តបែបនេះក៏ដោយ ក៏នៅមានរបាយការណ៍ជាច្រើនអំពីស្ត្រី ដែលបានរៀបការទៅចិននោះ ប្រឈមនឹងការកេងប្រវ័ញ្ចផ្លូវភេទ ការរំលោភបំពាន ត្រូវបានគេបង្ខំឱ្យធ្វើការងារ ត្រូវបានគេដកហូតយកឯកសារអត្តសញ្ញាណ និងមិនទទួលបានសិទ្ធិជាមូលដ្ឋានមួយចំនួនរបស់ពួកគេផងដែរ។

អង្គការ IOM X ចាប់ដៃគូជាមួយមណ្ឌលព័ត៌មានស្ត្រី (WMC) ផលិតខ្សែភាពយន្តមួយឈ្មោះ «ការចំណាកស្រុកដោយជោគជ័យ»។ WMC គឺជាអង្គការក្រៅរដ្ឋាភិបាលផ្សព្វផ្សាយព័ត៌មានមួយ ដែលមិនរកប្រាក់ចំណេញប្រើប្រាស់ប្រព័ន្ធផ្សព្វផ្សាយ ជាមធ្យោបាយដើម្បីសម្រេចបាននូវសមធម៌យេនឌ័រនៅក្នុងប្រទេសកម្ពុជា ដោយឆ្លើយតបទៅនឹងបញ្ហាសង្គម សេដ្ឋកិច្ច នយោបាយ និងផ្លូវច្បាប់ ដែលពាក់ព័ន្ធនឹងស្ត្រី។

អង្គការ IOM ប្រចាំនៅកម្ពុជា រួមជាមួយនឹង WMC គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (NCCT) ក្រសួងការបរទេស និងសហប្រតិបត្តិការអន្តរជាតិ (MoFAIC) អង្គការ UN-ACT អង្គការ Winrock អង្គការជំនួយផ្នែកច្បាប់ដល់ស្ត្រី និងកុមារ LSCW និងអង្គការCCPCR នឹងរៀបចំកម្មវិធីវិទ្យុ ជាឈុតចំនួន 4លើក ដើម្បីលើកកម្ពស់ចំណេះដឹងអំពីហានិភ័យ នៃការចំណាកស្រុកតាមរយៈការរៀបការទៅប្រទេសចិន ចំណាកស្រុកដោយភាពវៃឆ្លាត របៀបនៃការរៀបចំឯកសារ ដើម្បីធ្វើចំណាកស្រុក និងបញ្ហាប្រឈមដែលស្ត្រី អាចជួបប្រទះនៅពេលធ្វើចំណាកស្រុកទៅក្រៅប្រទេស។

កម្មវិធីវិទ្យុទាំង 4លើកនេះ នឹងធ្វើឡើងរៀងរាល់ថ្ងៃព្រហស្បត៍ ចាប់ពីម៉ោង 2:10-3:00រសៀល នៅវិទ្យុស្ត្រីកម្ពុជា FM102 ចាប់ពីថ្ងៃទី 5 ដល់ថ្ងៃទី 26ខែមេសាទៅ។ កម្មវិធីវិទ្យុនេះ នឹងចាក់ផ្សាយ ឡើងវិញរៀងរាល់ថ្ងៃច័ន្ទចាប់ពីម៉ោង 4:10 ដល់ 4:35នាទីរសៀល ចាប់ពីថ្ងៃទី9 មេសា ហើយបញ្ចប់នៅថ្ងៃទី 30 មេសា។ វិទ្យុ វាយោ VAYO FM នឹងធ្វើការចាក់ផ្សាយនូវការចម្លងកម្មវិធីផ្សាយផងដែរនេះនៅថ្ងៃទី 17, 18, 20, 21, 22និងថ្ងៃទី 30ចាប់ពីម៉ោង 4:10នាទី រសៀល។ ខ្សែវីដេអូនឹងចាក់បញ្ចាំងតាមទូរទស្សន៍ PNN នៅថ្ងៃទី 5 ដល់ 6មេសា ចាប់ពីម៉ោង 7:50 ដល់ 8:00 យប់ និងនៅទូរទស្សន៍ MyTVនៅថ្ងៃទី 7 ដល់ 8មេសា ចាប់ពីម៉ោង 9:10 ដល់9:20 នាទីព្រឹក។

លើសពីនេះទៅទៀត ក្រុមការងាររបស់ WMC នឹងធ្វើដំណើរចុះទៅ ភូមិតាអុង ឃុំតាអុង ស្រុកចំការលើ ខេត្តកំពង់ចាម ចាប់ពីថ្ងៃទី 23 ដល់26ខែមេសា ដើម្បីចាក់បញ្ចាំងខ្សែវីដេអូនេះទៅដល់សហគមន៍ក្នុងភូមិនោះ។

ដើម្បីទស្សនាខ្សែភាពយន្តនេះ សូមចូលទៅកាន់គេហទំព័រ៖

April 6, 2018

ស្រាបៀរថៃហ្គ័រនឹងចាប់ឆ្នោតលើកទី 1 ជូនគូស្វាមីភរិយាថ្មីនៅចុងសប្តាហ៍នេះ

ភ្នំពេញ៖ នៅថ្ងៃទី 8 ខែមេសា ឆ្នាំ2018 ខាងមុខនេះ ស្រាបៀរថៃហ្គ័រ (Tiger Beer)នឹងរៀបចំកម្មវិធីចាប់រង្វាន់ជ័យមង្គលលើកទី1 នៅស្ថានីយទូរទស្សន៍ PNN ដែលផ្សាផ្ទាល់ នៅវេលាម៉ោង 8យប់-10យប់ ដោយមានការចូលរួមសម្តែងកម្សាន្តសប្បាយរីករាយពីតារាចម្រៀងល្បីឈ្មោះប្រចាំព្រះរាជាណាចក្រកម្ពុជាជាច្រើនរូបដូចជា៖ ក្រុម Mustache Band កញ្ញា ប៉ាច គីមមួយ កញ្ញា បាន មុន្នីល័ក្ខ និង លោក ហង្ស សុវណ្ណារិទិ្ធ។ ដើម្បីផ្តល់រង្វាន់ជូនដល់គូស្វាមីភរិយាថ្មីទាំងអស់ដែលបានជាវស្រាបៀរថៃហ្គ័រក្នុងកម្មវិធីអាពាហ៍ពិពាហ៍របស់ស្រាបៀរថៃហ្គ័រ ឆ្នាំ2018 ។

កម្មវិធីនេះធ្វើឡើងសម្រាប់តែអតិថិជនដែលបានជាវស្រាបៀរថៃហ្គ័រសម្រាប់កម្មវិធីអាពាហ៍ពិពាហ៍របស់ខ្លួន។ សម្រាប់ការចាប់រង្វាន់លើកទីមួយនេះ ស្រាបៀរថៃហ្គ័រនឹងប្រគល់រង្វាន់សម្រាប់គូស្វាមីរិយាថ្មីចំនួនប្រាំគូគឺ៖ រង្វាន់ដំណើរកម្សាន្តក្រេបចន្ទទឹកឃ្មុំនៅប្រទេសជប៉ុនជាមួយនឹងទឹកប្រាក់ 1500ដុល្លារ ចំនួនប្រាំរង្វាន់។

តើគូស្វាមីភរិយារូបណាខ្លះដែលជាម្ចាស់រង្វាន់ទាំងនេះ? កុំភ្លេចចូលរួមទស្សនា និងតាមដានទាំងអស់គ្នា!!!
ឆ្លុះបញ្ចាំងភាពអស្ចារ្យនៃអាពាហ៍ពិពាហ៍របស់ជាមួយស្រាបៀរថៃហ្គ័រ។
ពិសាស្រាបៀរថៃហ្គ័រដោយការទទួលខុសត្រូវ!!!

April 6, 2018

តើកសិកម្មកម្ពុជាផ្តោតលើប្រភេទបន្លែ និងដំណាំអ្វីខ្លះ?

តាមរបាយការណ៍ស្រាវជ្រាវរបស់អង្គការជាតិ និងអន្តរជាតិបានបង្ហាញថា ក្នុងមួយថ្ងៃកម្ពុជាត្រូវការបន្លែប្រមាណជា 400តោន និងត្រូវការជាង 1សែនតោនក្នុង1ឆ្នាំដើម្បីផ្គត់ផ្គង់នៅលើទីផ្សាររបស់ខ្លួន ក្នុងនោះមាន 55%ជាបន្លែនាំចូលពីក្រៅប្រទេស ដូច្នេះសួរថា តើបច្ចុប្បន្នកម្ពុជាមានសក្តានុពលដាំដុះបន្លែអ្វីខ្លះសម្រាប់ផ្គត់ផ្គង់ទីផ្សារនៅក្នុងស្រុក?

លោក នាង ថៃ ប្រធានគ្រប់គ្រងទូទៅនៃចម្ការសរីរាង្គពិកនិក មានប្រសាសន៍ថា បច្ចុប្បន្នកសិដ្ឋានរបស់លោកមានទីតាំងពីរធំៗដែលដាំដុះបន្លែសរីរាង្គសម្រាប់ផ្គត់ផ្គត់នៅលើទីផ្សារ ដែលទី1.ស្ថិតនៅរមណីយដ្ឋានពិកនិកផ្ទាល់ ដែលដាំដុះនៅលើផ្ទៃដីប្រមាណជាជិត 6ហិកតាដែលភាគច្រើនដាំបន្លែស្លឹក ដូចជាស្ពៃ សាលាដ ខាត់ណា ត្រកួន ស្លឹកគ្រៃជាដើម ដែលមានចំនួនសរុប 12ប្រភេទ និងប្រភេទបន្លែយកផ្លែ មានដូចជាត្រសក់ ត្រឡាច ល្ពៅ ននោងម្នាស់ រួមទាំងបន្លែផ្សេងៗទៀតរហូតដល់ 20ប្រភេទ។

និងទី2.ក្រៅពីតំបន់ពិកនិក កសិដ្ឋានខាងលើក៏បានពង្រីកការដាំដុះទៅដល់តំបន់ស្រែអំបិលនៅលើផ្ទៃប្រមាណជា 40ហិកតាផ្សេងៗទៀត ដែលមានដាំប្រភេទបន្លែ-ផ្លែឈើផ្សេងៗ ដូចជា ត្រប់ប៉េងប៉ោះ ប្រពាយ ឃ្លោក-ត្រឡាច និងននោងជាដើម និងបន្លែយកមើមដូចជា ឆៃថាវ ដំឡូងជ្វា ដំឡូងមី រំដេង ខ្ញី រមៀត ហើយបច្ចុប្បន្នកសិដ្ឋានរបស់លោកកំពុងសហការជាមួយកសិករនៅក្នុងខេត្តមណ្ឌលគិរី និងរតនគិរី ដើម្បីដាំបន្លែផ្សេងទៀតដូចជាការ៉ុត និងឆៃថាវជាដើម ដោយសារនៅទីតាំងនោះដីមាននីវ៉ូទឹកខ្ពស់ មានខ្យល់ត្រជាក់ អំណោយផលខាងផ្នែកដំណាំហូបមើម ដូចជាការ៉ុត និងឆៃថាវ ដោយទទួលបានទិន្នផលខ្ពស់ និងមានរសជាតិផ្អែមឆ្ងាញ់ទៀតផង។

ជាមួយគ្នានេះកសិដ្ឋានក៏បានដាំដើមឈើហូបផ្លែជាច្រើនប្រភេទទៀតដែរ ដូចជា ពុទ្រា ខ្នុរ ផ្លែ Passion ចេក ត្របែក ជម្ពូ ស្ពឺ ម្កាក់ ស្វាយ និងម្នាស់សម្រាប់ផ្គត់ផ្គង់នៅតំបន់ទេសចរណ៍ពិកនិកផ្ទាល់និងមួយចំនួនទៀតយកមកផ្គត់ផ្គង់នៅទីផ្សារសរីរាង្គក្នុងរាជធានីភ្នំពេញ ដូចជាផ្សារសហករណ៍សរីរាង្គខ្មែរ ផ្សារឡាក់គី និង Star Mart មួយចំនួនទៀត។ លោកថា ទោះបីបន្លែសរីរាង្គមានការគាំទ្រកាន់តែច្រើនឡើងៗ ពីប្រជាពលរដ្ឋខ្មែរក៏ដោយ ក៏ប៉ុន្តែសម្រាប់ពលរដ្ឋដែលមានជីវភាពក្រោមមធ្យមមិនសូវមានការយល់ដឹងពីអត្ថប្រយោជន៍របស់បន្លែសរីរាង្គនៅឡើយ ហើយតែងនិយាយថា បន្លែនេះថ្លៃជាងបន្លែនៅលើទីផ្សារ ដែលភាគច្រើននៃបន្លែទាំងនោះ គឺនាំចូលពីក្រៅប្រទេស។

លោកបញ្ជាក់ថា “ពលរដ្ឋដែលមានការយល់ដឹងពីអត្ថប្រយោជន៍របស់បន្លែសរីរាង្គនេះ ភាគច្រើនជាប្រជាពលរដ្ឋដែលមានជីវភាពលើមធ្យម ដោយពួកគាត់គិតថា បន្លែសរីរាង្គមានអត្ថប្រយោជន៍ច្រើនចំពោះសុខភាព ចំណែកពលរដ្ឋមានជីវភាពទាបក្រោមមធ្យម មិនសូវគិតគូរពីអត្ថប្រយោជន៍បន្លែសរីរាង្គ និងមិនសូវគិតពីរឿងសុខភាពប៉ុន្មានឡើយ ហើយចូលចិត្តទិញបន្លែនៅតាមផ្សារដែលមានតម្លៃទាបជាងបន្លែសរីរាង្គ ដែលជាហេតុធ្វើឱ្យមានបញ្ហាប្រឈមនឹងសុខភាព នៅថ្ងៃអនាគត។

ចំណែកលោក សម វិទូ នាយកប្រតិបត្តិមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា មានប្រសាសន៍ថា បច្ចុប្បន្នកម្ពុជាមានបន្លែនាំចូលគ្រប់ប្រភេទពីប្រទេសជិតខាងរាប់មិនអស់ទេ ច្រើនមុខណាស់ ពិសេសនាំចូលពីប្រទេសវៀតណាម និងប្រទេសថៃ ដែលមានចំនួនជាង 55% បើធៀបជាមួយបន្លែផលិតក្នុងស្រុក ដោយសារកសិករកម្ពុជាមិនសូវមានបច្ចេកទេសដាំដុះបានផលល្អដូចប្រទេសជិតខាងទាំងនោះ ពិសេសថ្លៃដើមនៃការផលិតក៏មានតម្លៃខ្ពស់ជាងប្រទេសជិតខាងដែរ ដូចជាជី និងប្រេងសាំងជាដើម ដែលជាហេតុធ្វើឱ្យរបរកសិកម្មរបស់កសិករមិនសូវទទួលបានផលចំណេញ និងមិនអាចប្រកួតប្រជែងតម្លៃ ជាមួយបន្លែនាំចូលបាន។

ដើម្បីចូលរួមលើកកម្ពស់វិស័យកសិកម្មក្នុងស្រុកក៏ដួចជាលើកកម្ពស់សុខភាពប្រជាពលរដ្ឋខ្មែរ មជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជាបានសហការជាមួយកសិករ នៅតាមបណ្តាខេត្តមានសក្តានុពលផ្សេងៗ ដើម្បីបណ្តុះបណ្តាល និងផ្តល់បច្ចេកទេសជូនពួកគាត់ឱ្យដាំបន្លែសរីរាង្គ និងចិញ្ចឹមសត្វតាមបទដ្ឋានស្តង់ដារបច្ចេកទេសសរីរាង្គសម្រាប់ផ្គត់ផ្គង់នៅលើទីផ្សារ និងនាំចេញទៅក្រៅប្រទេសទៀតផង។

នៅខេត្តតាកែវ កំពង់ស្ពឺ កំពង់ឆ្នាំង មានសក្តានុពលក្នុងការដាំបន្លែយកស្លឹក ដូចជា ស្ពៃ ខាត់ណា សាឡាដ ត្រកួន ជាដើម ចំណែកខេត្តកោះកុង មណ្ឌលគិរី រតនគិរី មានសក្តានុពលក្នុងការដាំដើមឈើហូបផ្លែមានដូចជា ល្ហុង ទៀបបារាំង ប៊័រ និងផ្លែ Passion ជាដើម។ ឯខេត្តព្រៃវែង ប៉ៃលិន បាត់ដំបង មានសក្តានុពលផ្នែកបន្លែពពួកគ្រឿងទេស ដូចជា រំដេង រមៀត ខ្ជាយ ហើយខេត្តកំពង់ចាម តាកែវ សម្បូរកសិករចិញ្ចឹមសត្វយកសាច់ដូចជា ជ្រូក មាន់ ទា ការផលិតត្រីងៀត ត្រីឆ្អើរ សាច់ក្រក និងខេត្តដែលសម្បូរស្រូវជាងគេ មានបាត់ដំបង តាកែវ កំពង់ស្ពឺ កំពត និងព្រៃវែង ដោយបច្ចុប្បន្នបានផ្គត់ផ្គង់នៅលើទីផ្សារក្នុងស្រុក និងបាននាំចេញទៅក្រៅប្រទេស ដូចជាសហរដ្ឋអាមេរិក អឺរ៉ុប ហុងកុង និងវៀតណាមជាដើម។

មជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជាបានសហការជាមួយកសិករបង្កើតជាសហគមន៍ផលិតកម្មប្រមាណជាង 100សហគមន៍នៅតាមបណ្តាខេត្តផ្សេងៗដែលមានប្រជាជនសរុប 2,500នាក់ដើម្បីដាំដុះបន្លែសរីរាង្គ សម្រាប់ប្រកួតប្រជែងជាមួយបន្លែនាំចូលដែលគេគិតថា មិនមានសុវត្ថិភាពសម្រាប់សុខភាព។ លោកថា ដើម្បីប្រកួតប្រជែងជាមួយបន្លែនាំចូលបាន កសិករមានតែដាំបន្លែសរីរាង្គប៉ុណ្ណោះ ដើម្បីទាញយកចំណែកទីផ្សារព្រោះថា ពលរដ្ឋខ្មែរបច្ចុប្បន្នក៏ចូលចិត្តទទួលទានបន្លែសរីរាង្គច្រើនណាស់ដែរ៕

April 6, 2018

កង្វះឯកសារស្រាវជ្រាវ ជាបញ្ហារាំងស្ទះដល់ដំណើរការបង្កើតស្នាដៃថ្មីៗ

អ្នកស្រាវជ្រាវជាច្រើននៅកម្ពុជា រួមទាំងនិស្សិតមួយចំនួនផង បានលើកឡើងនូវបញ្ហារួមមួយ គឺកង្វះឯកសារសម្រាប់ស្រាវជ្រាវ ហើយកត្តាទាំងអស់នេះបានរាំងស្ទះដល់ដំណើរនៃការបង្កើតស្នាដៃថ្មីៗរួមទាំងការបង្កើតនូវគំហើញមួយចំនួនទាំងផ្នែកវិទ្យាសាស្ត្រសង្គម និងវិទ្យាសាស្ត្រពិត។

សហស្ថាបនិកនៃបណ្ណាល័យបញ្ញវន្ត លោក សុខ ឡាក់ បានលើកឡើងថា អ្នកស្រាវជ្រាវជាច្រើននៅកម្ពុជាពិតជាមានបញ្ហាលំបាក ហើយផ្នែកដែលកំពុងមានបញ្ហាប្រឈមច្រើននោះគឺលើជំនាញវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM)។ ផ្នែកមួយទៀតដែលកំពុងមានបញ្ហាប្រឈមដែរនោះ គឺពាក់ព័ន្ធនឹងជំនាញភាសាខ្មែរ។ ដើម្បីជាដំណោះស្រាយបញ្ហាទាំងអស់នេះ លោកបានផ្តល់យោបល់ថា គួរតែធ្វើយ៉ាងណាឱ្យបណ្ណាល័យដំណើរការបានល្អ ដែលមានសមត្ថភាពគ្រប់គ្រាន់ក្នុងការគ្រប់គ្រងឯកសារ ប្រឹក្សាយោបល់លើឯកសារ ព្រមទាំងអាចផ្តល់សេវាកម្មបណ្ណាល័យឱ្យឆ្លើយតបនឹងតម្រូវការអភិវឌ្ឍន៍ធនធានមនុស្ស។ លើសពីនេះទៅទៀត ភាគីពាក់ព័ន្ធទាំងអស់គួរចូលរួមដើម្បីធ្វើការផ្សព្វផ្សាយឱ្យបានយល់ដឹងកាន់តែច្បាស់ពីតម្លៃរបស់បណ្ណាល័យ។

លោក សុខ ឡាក់ និយាយថា៖ “នៅកម្ពុជាមានចំនួនបណ្ណាល័យច្រើនណាស់ តែមានបណ្ណាល័យខ្លះមានតែឈ្មោះ ហើយមិនបានបើកឱ្យដំណើរការនោះទេ ចំណែកឯបណ្ណាល័យ មួយចំនួនទៀត មានឯកសារច្រើនតែមិនបានប្រើប្រាស់អស់លទ្ធភាពនូវសេវាកម្មបណ្ណាល័យដែលកត្តានេះធ្វើឱ្យអ្នកសិក្សាស្រាវជ្រាវនៅតែមានការលំបាកក្នុងការស្វែងរកឯកសារដដែល។

បើតាមលោកសុខ ឡាក់ បណ្ណាល័យជាប្រភពនៃឯកសារទាំងអស់ និងជាកន្លែងដែលសំខាន់បំផុតសម្រាប់អ្នកស្រាវជ្រាវ ទាំងការស្វែងរកឯកសារស្រាវជ្រាវ និងការបញ្ចេញនូវឯកសាររបស់ខ្លួនជាសាធារណៈ។ ប្រសិនបើបណ្ណាល័យត្រូវបានយកចិត្តទុកដាក់ ហើយត្រូវបានគេផ្តល់តម្លៃគ្រប់គ្រាន់ អ្នកស្រាវជ្រាវជាច្រើននឹងមានកម្លាំងចិត្តក្នុងការខិតខំស្រាវជ្រាវ ហើយបង្កើតស្នាដៃថ្មី ដើម្បីដាក់បង្ហាញស្នាដៃរបស់ខ្លួននៅតាមបណ្ណាល័យ ដែលចរន្តនេះធ្វើឱ្យឯកសារកាន់តែសម្បូរបែបឡើង ហើយអ្នកស្រាវជ្រាវជំនាន់ក្រោយៗទៀតកាន់តែមានភាពងាយស្រួល។

អ្នកនិពន្ធ និងជាអ្នកបោះពុម្ពផ្សាយឯកសារស្រាវជ្រាវជាច្រើននៅកម្ពុជា លោក ឈិន សីហាបានលើកឡើងថា អ្នកស្រាវជ្រាវនាពេលបច្ចុប្បន្ននេះមានការលំបាកគួរសម ហើយបញ្ហាទាំងអស់នេះគឺមកពីខ្វះអ្នកស្រាវជ្រាវ និងអ្នកសរសេរលើប្រធានបទសំខាន់ៗជាច្រើនដែលជាតម្រូវការរបស់ប្រជាជននៅក្នុងប្រទេស។ មានឯកសារខ្លះត្រូវស្វែងរកពីឯកសារបរទេសមកវិញ ហើយឯកសារខ្លះទៀតបានបាត់បង់ដោយសារតែអ្នកស្រាវជ្រាវ ជំនាន់មុនៗបានត្រឹមតែចងក្រងមើលសម្រាប់ខ្លួនឯងដោយមិនបានបោះពុម្ពផ្សាយជាសាធារណៈជាដើម។

លោក ឈិន សីហា បាននិយាយថា៖ “ជាដំណោះស្រាយដើម្បីធ្វើយ៉ាងណាឱ្យមានឯកសារសម្បូរបែបឡើងវិញនៅក្នុងប្រទេសរបស់យើង គឺយើងគួរបង្កើនគុណភាពអប់រំដោយបណ្តុះបណ្តាលអ្នកសរសេរ បង្កើតមូលនិធិជួយអ្នកសរសេរ និងបោះពុម្ពផ្សាយ។

លោក ឈិន សីហា បានលើកឡើងបន្តទៀតថា ការធ្វើបែបនេះគឺជាវិធីសាស្ត្រល្អមួយក្នុងការជំរុញឱ្យមានការលើកទឹកចិត្តឱ្យបានច្រើនដល់អ្នកដែលបានខិតខំប្រឹងប្រែងចងក្រងឯកសារថ្មី។ ក្រៅពីនេះអ្នកដែលមានស្នាដៃកន្លងមកគួរបង្កើតក្រុមប្រឹក្សាអ្នកនិពន្ធ និងស្រាវជ្រាវ ដើម្បីផ្តល់កិត្តិយសថ្នាក់ជាតិជូនដល់អ្នកនិពន្ធ អ្នកស្រាវជ្រាវ និងអ្នករៀបរៀងជាដើមឱ្យមានទឹកចិត្តកាន់តែខ្លាំងក្នុងការបន្តខិតខំប្រឹងប្រែងបង្កើតស្នាដៃថ្មីៗ សម្រាប់ដោះស្រាយបញ្ហានានានៅក្នុងសង្គម៕

April 6, 2018

ភាពរីកចម្រើននៃវិស័យធនាគារ និងផ្នែកឥណទានគេហដ្ឋាន ជួយឲ្យអតិថិជនទទួលបានគេហដ្ឋានផ្ទាល់ខ្លួន

ភ្នំពេញ៖ ការទិញគេហដ្ឋានផ្ទាល់ខ្លួន គឺជាការសម្រេចចិត្តសំខាន់បំផុតមួយ នៅក្នុងជីវិត។ ក្នុងប្រទេសកម្ពុជា ការអភិវឌ្ឍសំណង់លំនៅស្ថាន មានកំណើនខ្ពស់គួរឲ្យកត់សម្គាល់។ ជាមួយគ្នានេះដែរ យើងសង្កេតឃើញថា សន្ទុះកើនឡើង នៃការស្វែងរកឥណទានគេហដ្ឋាន ពីស្ថាប័នហិរញ្ញវត្ថុ ក្នុងចំណោមប្រជាពលរដ្ឋខ្មែរ ជាពិសេសគ្រួសារវ័យកណ្តាល មានកម្រិតមួយខ្ពស់ផងដែរ។ ផ្អែកតាមស្ថិតិទិន្នន័យរបស់ធនាគារជាតិ គិតត្រឹមខែតុលា ឆ្នាំ២០១៧ ចំនួនទឹកប្រាក់នៃឥណទានគេហដ្ឋាន ក្នុងចំណោមធនាគារពាណិជ្ជ និងធនាគារឯកទេស មានចំនួនជាង ៦ ៣០០ ប៊ីលានរៀល ឬប្រហែលនឹង ១ ៥៧៥ លានដុល្លារអាមេរិក ដែលកើនឡើងប្រមាណ ៤២% បើធៀបនឹងឆ្នាំ២០១៦។

អត្រាកំណើន ប្រកបដោយភាពវិជ្ជមាន នៃឥណទានគេហដ្ឋាននេះ បានជម្រុញឲ្យមានភាពប្រកួតប្រជែងកាន់តែខ្ពស់ និងសម្បូរបែប ក្នុងវិស័យធនាគារ ដើម្បីបំពេញតម្រូវការអតិថិជន នៅលើទីផ្សារបច្ចុប្បន្ន។ សព្វថ្ងៃនេះ អត្រាការប្រាក់ និងរយៈពេលនៃឥណទាន ក្នុងប្រទេសកម្ពុជា គឺប្រហាក់ប្រហែលទៅនឹងទីផ្សារ ក្នុងតំបន់អាស៊ានផងដែរ។ ធនាគារ ស៊ីអាយអិមប៊ី ក្នុងប្រទេសកម្ពុជា តែងតែឈានមុខគេ លើការផ្តល់ផលិតផល ប្រកបដោយភាពច្នៃប្រឌិត។ កាលពីឆ្នាំមុន ធនាគារបានសម្ពោធគម្រោង HomePro ដែលជាផលិតផលឥណទានគេហដ្ឋានបំដូងតែមួយគត់ ភ្ជាប់មកជាមួយនឹងការធានារ៉ាប់រងអាយុជីវិត តម្លៃរហូតដល់ ៥០ ០០០ដុល្លារអាមេរិក ដោយឥតគិតថ្លៃ។

លោកស្រីហេង ធីតា នាយិកាសេវាកម្មហិរញ្ញវត្ថុបុគ្គល របស់ធនាគារ ស៊ីអាយអិមប៊ី បានឲ្យដឹងថា៖ «នៅធនាគារ ស៊ីអាយអិមប៊ី ការបំពេញតម្រូវការចាំបាច់របស់អតិថិជន គឺជាអាទិភាពចម្បងបំផុតរបស់យើង។ យើងជឿជាក់ថា គម្រោង HomePro ផ្តល់នូវអត្ថប្រយោជន៍ខ្ពស់ ដែលរួមបញ្ចូលគ្នានូវឥណទានគេហដ្ឋានដ៏ល្អប្រសើរ និងការធានារ៉ាប់រងអាយុជីវិតដ៏មានតម្លៃ។ ធនាគារ ស៊ីអាយអិមប៊ី គឺធនាគារដំបូងគេបង្អស់ ក្នុងប្រទេសកម្ពុជា ដែលផ្តល់ជូនដោយឥតគិតថ្លៃ នូវសេវាធានារ៉ាប់អាយុជីវិត សម្រាប់អតិថិជនផ្នែកឥណទានគេហដ្ឋាន ដើម្បីការពារអនាគតអតិថិជន និងក្រុមគ្រួសាររបស់ពួកគេ។ ដូច្នេះពួកគេនឹងមានអារម្មណ៍ថា ទទួលបានសុវត្ថិភាពខ្ពស់ ពេលដែលសហការជាមួយធនាគារ ស៊ីអាយអិមប៊ី»។

ក្រៅពីការផ្តល់ជូននូវអត្រាការប្រាក់ទាបត្រឹមតែ ៧,៩៩% និងរយៈពេលឥណទានរហូតដល់ ២០ឆ្នាំ ធនាគារ ស៊ីអាយអិមប៊ី ក៏បានសហការជាមួយនឹងក្រុមហ៊ុនអភិវឌ្ឍន៍លំនៅស្ថាន និងបុរីធំៗ ដើម្បីនាំយកលក្ខខណ្ឌពិសេស ទៅដល់អតិថិជនផងដែរ។ ការចាប់ដៃគូជាយុទ្ធសាស្ត្រនេះ ជួយឲ្យបុរី និងអតិថិជន ទទួលបានអត្ថប្រយោជន៍ ពីដំណើរការទិញលក់គេហដ្ឋាន។ សម្រាប់ផែនការអនាគត ធនាគារ ស៊ីអាយអិមប៊ី នឹងពង្រីកកិច្ចសហការ ជាមួយនឹងក្រុមហ៊ុនអភិវឌ្ឍន៍លំនៅស្ថាន និងគម្រោងបុរីធំៗ នៅក្នុងប្រទេសកម្ពុជា ដើម្បីផ្តល់នូវជម្រើសកាន់តែសម្បូរបែប ជាមួយនឹងគុណភាពគេហដ្ឋានតាមស្តង់ដារ ដែលអតិថិជនចង់បាន។

ក្នុងឆ្នាំ២០១៨នេះ ផលិតផលឥណទានគេហដ្ឋាន ក្នុងវិស័យធនាគារ មានការរំពឹងទុកថា នឹងមានការប្រកួតកាន់តែខ្ពស់ ស្របទៅនឹងកំណើនទីផ្សាររបស់អតិថិជន។ ដូច្នេះធនាគារ CIMB នឹងបន្តរក្សាភាពឈានមុខគេ នៅលើទីផ្សារ សម្រាប់តម្រូវការហិរញ្ញវត្ថុ ដោយផ្តោតសំខាន់អំពីតម្រូវរបស់អតិថិជនជាអាទិភាព ទៅលើការអភិវឌ្ឍផលិតផលឥណទានគេហដ្ឋាន ដោយផ្តល់នូវអត្ថប្រយោជន៍ និងលក្ខខណ្ឌអនុគ្រោះខ្ពស់ ប្រកបដោយភាពច្នៃប្រឌិត៕

April 6, 2018

RUUD VAN NISTELROOY ដង្ហែពាន UEFA CHAMPIONS LEAGUE 2018 និងជួបអ្នកគាំទ្រ

ភ្នំពេញ៖ កាលពីយប់មិញថ្ងៃទី៣ខែមេសាឆ្នាំ2018 លោក Ruud van Nistelrooy ដែលជាអតីតៈ ខ្សែប្រយុទ្ធ របស់ក្រុម Manchester United និងក្រុម Real Madridបានធ្វើការដង្ហែពាន UEFA Champions League 2018 និងជួបអ្នកគាំទ្រ រាប់ពាន់នាក់នៅ ស៊ីតធីហល កោះពេជ្ររាជធានីភ្នំពេញដែលនាំមកជូនដោយស្រាបៀរ Heineken ។

វត្តមានរបស់កំពូកីឡាករបាល់ទាត់លោក Ruud van Nistelrooy នៅរាត្រីយប់មិញនេះ បានធ្វើឲ្យមានការភ្ញាក់ផ្អើរដល់អ្នកគាំទ្ររបស់ខ្លួនជាខ្លាំងដោយ លោកមានស្នាមញញឹម និងរួសរាយរាក់ទាក់យ៉ាងខ្លាំងទៅកាន់អ្នកគាំទ្ររបស់លោក ដោយអ្នកគាំទ្រតរបស់លោក គិតថាលោក ជាមនុស្សម្នាក់ដែលគួរស្រលាញ់បំផុតហើយលោក ក៏បានផ្ដល់កិតកតិ្តយក ថតរួបអនុស្សាវរីយ៍ជាមួយអ្នកគាំទ្ររបស់លោកផងដែរ។

អមជាមួយវត្តមានរបស់លោក Ruud van Nistelrooy ស្រាបៀរ Heineken ក៏បានអញ្ជើញតារាចម្រៀងល្បីៗ ដែលប្រចាំព្រះរាជាណាចក្រកម្ពុជា មានដូចជា៖វត្តមានលោក ជីដេវីត កញ្ញាទេព បូព្រឹត្យ ប្រុសឡា និងកញ្ញាឡូរ៉ាម៉មដែលជាតារាចម្រៀងកូនកាត់អាមេរិក ដើម្បីចូលរួមច្រៀងកំដរអារម្មណភ្ញៀវកិត្តិយកជាតិនិងអន្តរជាតិនៅក្នុងរាត្រីនោះផងដែរ។

ក្នុងឱកាសនោះដែរលោក Ruud van Nistelrooy បានមានប្រសាសន៍ថាខ្ញុំ ចង់ទៅលេងឯខេត្ត សៀមរាបខ្លាំងណាស់ ព្រោះខេត្តនេះសម្បូរទៅដោយប្រាងប្រាសាទជាច្រើន ដែលសុទ្ធសឹងតែ ជាប្រាសាទ ដែលមានកេរិ៍ឈ្មោះល្បី នៅទូទាំងសាកលលោក ជាពិសេសខ្ញុំចង់ទៅលេងប្រាសាទអង្គរវត្តខ្លាំងណាស់។

សូមរំលឹកថា កម្មវិធីដំណើរទេសចរណ៍ រយៈពេលបីថ្ងៃ ត្រូវបានរៀបចំឡើង ដោយស្រាបៀរ Heineken ហើយកម្មវិធីនេះ នឹងជំរុញផ្តល់ឲ្យអ្នកគាំទ្រ ទូទាំងពិភពលោក នូវឱកាសផ្ទាល់ ក្នុងការចូលរួម ទទួលបានភាពរំភើបរីករាយ នៃការទស្សនាការប្រកួតនេះ តាមរយៈយុទ្ធនាការ របស់ស្រាបៀរ Heineken ដែលមានឈ្មោះថា “ចែករំលែកភាពរំភើបរីករាយ ចែករំលែកពានរង្វាន់”៕

April 6, 2018

ABC EXTRA STOUT បើកយុទ្ធនាការថ្មី “ជាឧត្តមភាពដ៏ល្អឯក”

ភ្នំពេញ៖ កាលពីថ្ងៃទី 5 ខែមេសា ឆ្នាំ 2018 នៅសណ្ឋាគារសូហ្វីតែល ក្រុមហ៊ុនផលិតស្រាបៀរកម្ពុជា (CBL) បានរៀបចំពិធីប្រកាសបើកយុទ្ធការរបស់ ABC Extra Stout ដែលមានឈ្មោះថា “ជាឧត្តមភាពដ៏ល្អឯក” ។

ភ្ញៀវកិត្តិយសពិសេសរួមមានពាណិជ្ជករលំដាប់ថ្នាក់ខ្ពស់ តារាល្បីៗ តារាបង្ហាញម៉ូត ដៃគូពាណិជ្ជកម្មររបស់ CBLនិងអ្នកសារព័ត៌មានសំខាន់ៗ បានអញ្ជើញចូលរួមក្នុងកម្មវិធីពិសេសនេះនាពេលរាត្រី ដែលពោរពេញទៅដោយបទពិសោធន៍ដ៏ល្អឯកក្នុងការកម្សាន្តសប្បាយ ។

ការសម្តែងរបស់លោកខេមរៈ សេរីមន្ត អ្នកនាងពេជ្រ សោភា និងអ្នកសម្តែងសៀកលោក Sovid ព្រមទាំងការសម្តែងរបាំស្រមោលបានផ្តល់ភាពភ្ញាក់ផ្អើលយ៉ាងខ្លាំងដល់ទស្សនិកជន។ ទស្សនិកជនក៏បានទស្សនាយ៉ាងជក់ចិត្តនូវកម្មវិធីក្រឡុកស្រាដែលបានបង្ហាញណែនាំពីស្រាក្រឡុកថ្មីបួនប្រភេទជាមួយនឹង ABC Extra Stout ដែលបានជួយ “បើកវាំងននអាថ៌កំបាំង” នៃកម្មវិធីនេះ។ កម្មវិធីរាត្រីនេះក៏បានបង្ហាញពីការសម្តែងការដើរម៉ូតលំដាប់ថ្នាក់ខ្ពស់ក្នុងកិច្ចសហការរបស់ ABC ជាមួយម៉ាកសញ្ញាអ្នកច្នៃម៉ូត Queen Victoria។

ក្នុងឱកាសពិសេសនេះ លោក Roland Bala នាយកគ្រប់គ្រងនៃក្រុមហ៊ុន CBL បានមានប្រសាសន៍ពន្យល់ពីខ្លឹមសារនៃពិធីប្រកាសនេះឲ្យដឹងថា៖ “មនុស្សសម័យបច្ចុប្បន្ននេះ ឱ្យតម្លៃទៅលើមនុស្សដោយសារអត្តចរិត និងសីលធម៌រស់នៅក្នុងជីវិត។ ដូច្នេះ យុទ្ធនាការថ្មីរបស់ ABC គឺផ្តោតលើការនាំផ្លូវមនុស្សគ្រប់គ្នាឆ្ពោះទៅរកភាពជោគជ័យ និងឧត្តមភាពដ៏ល្អឯកជាមួយគ្នា។ នេះជាហេតុផលដែលយើងបានសម្រេចចិត្តប្រើសត្វតោ ABC ដើម្បីធ្វើជានិមិត្តរូបនៃកិត្តិយស និងអត្តចរិតរបស់បុរស ABC ប្រកបដោយឧត្តមភាពដ៏ល្អឯក”

សត្វតោ ABC ត្រូវបានបញ្ចេញតាមរយៈរបាំសម្តែងតថភាពជាក់ស្តែង ដែលមិនធា្លប់បានសម្តែងពីមុន។ ដូចសត្វតោអញ្ចឹង បុរស ABC គឺជាអ្នកដឹកនាំដ៏មហស្ចារ្យ និងចេះជំរុញលើកទឹកចិត្តគេ។ កម្មវិធីពិសេសនេះក៏បានបញ្ចេញស្ពតពាណិជ្ជកម្មថ្មីចុងក្រោយបំផុតរបស់ ABC ។ ស្ពតនេះផ្តោតលើខ្លឹមសារចម្បងអំពីការវិវឌ្ឍនៃភាពជោគជ័យតាមរយៈការបង្ហាញពី “បុរស ABC សម័យទំនើប” ដែលបានឆ្លងកាត់ការប្រែកាយយ៉ាងមហស្ចារ្យទៅជាសត្វតោជានិមិត្តសញ្ញានៃម៉ាកយីហោនេះ ដែលដឹកនាំមនុស្សឆ្ពោះទៅរកឧត្តមភាពដ៏ល្អឯក តាមរយៈភាពទាក់ទាញចំពោះលក្ខណៈសម្បត្តិរបស់បុរស ABC។ ស្ពតនេះក៏ធ្វើការស្វែងយល់ផងដែរពីអភិជនភាព ភាពជាអ្នកដឹកនាំ និងបំណងប្រាថ្នាចង់បានឧត្តមភាពដ៏មហស្ចារ្យដោយរក្សាបាននូវសេចក្តីថ្លៃថ្នូរ និងការគោរពចំពោះអ្នកដទៃ។

យុទ្ធនាការ “ជាឧត្តមភាពដ៏ល្អឯក” គឺជាផ្នែកមួយនៃចក្ខុវិស័យអភិវឌ្ឍឲ្យរីកចម្រើនសម្រាប់ ABC Extra Stout ដែលបន្តផ្តល់ការគាំទ្រ និងអំណរសារទរដល់ប្រជាពលរដ្ឋកម្ពុជាដែលទទួលបានជោគជ័យដោយបានបង្ហាញពីចំណុចខ្លាំង ចំណេះវិជ្ជា និងសមិទ្ធផលរបស់ខ្លួននៅក្នុងវិស័យសិល្បៈ ពាណិជ្ជកម្ម និងការកសាងសហគមន៍។

ABC Extra Stout នៅតែជាម៉ាកសញ្ញាស្រាបៀរទឹកខ្មៅលំដាប់ថ្នាក់អន្តរជាតិដែលឈានមុខគេគ្មានគូបៀបនៅលើទីផ្សារស្រាបៀរទឹកខ្មៅគុណភាពខ្ពស់បំផុតនៅក្នុងប្រទេសកម្ពុជា ដែលអតិថិជនជ្រើសរើសយកមកទទួលទាន ”ក្រេបរសជាតិដ៏ល្អឯក” នៃស្រាបៀរទឹកខ្មៅ ដែលផលិតពីគ្រឿងផ្សំមានគុណភាពខ្ពស់បំផុត និងដែលបានឈ្នះពានរង្វាន់ជាច្រើន។

ដើម្បីស្វែងយល់បន្ថែមអំពីយុទ្ធនាការ “ជាឧត្តមភាពដ៏ល្អឯក” សូមចូលទៅកាន់គេហទំព័រ៖
www.facebook.com/ABC.ExtraStoutCambodia/
សូមរីករាយទទួលទាន ABC Extra Stout ដោយការទទួលខុសត្រូវ

April 6, 2018

UNDP និងក្រុមហ៊ុន Green Leader ចុះកិច្ចព្រមព្រៀងអភិវឌ្ឍន៍ដំឡូងមីនៅកម្ពុជា

លោក Nick Beresford នាយកប្រចាំប្រទេសកម្ពុជានៃកម្មវិធីអភិវឌ្ឍន៍សហប្រជាជាតិ (UNDP) បានចុះអនុស្សរណៈយោគយល់គ្នាជាមួយលោក Tse Michael Nam នាយកប្រតិបតិ្តក្រុមហ៊ុន Green Leader Holdings GroupLimited ដើម្បីធានាដល់ការលើកកម្ពស់ជីវភាពកសិករប្រកបដោយនិរន្តរភាព។

ពិធីចុះអនុស្សរណៈយោគយល់គ្នាខាងលើនេះ ធ្វើឡើងនៅទីស្តីការក្រសួងពាណិជ្ជកម្មកាលពីដើមសប្តាហ៍នេះ ក្រោមអធិបតីភាពឯកឧត្តមប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងមានការចូលពីតំណាងក្រុមហ៊ុនឯកជនជាច្រើននាក់។

ឯកឧត្តម ប៉ាន សូរស័ក្តិ បានគូសបញ្ជាក់បង្ហាញពីការខឹតខំប្រឹងប្រែងរបស់ក្រសួងពាណិជ្ជកម្មក្នុងការធ្វើឱ្យប្រសើរឡើងនូវជីវភាពរស់នៅរបស់ប្រជាកសិករតាមរយៈការបណ្កុះបណ្តាលបច្ចេកទេស និងការធ្វើពិពិធកម្មទីផ្សារថ្មីៗសម្រាប់វិស័យកសិកម្មកម្ពុជា។

រោងចក្រ Green Leader ទីមួយត្រូវបានធ្វើពិធីបញ្ចុះបឋមសិលាកាលពីចុងសប្តាហ៍មុន នៅស្រុកស្នួល (ខេត្តក្រចេះ) ដែលនេះបានបង្ហាញពីការប្តេជ្ញាយ៉ាងរឹងមាំរបស់ក្រុមហ៊ុនចំពោះរាជរដ្ឋាភិបាលកម្ពុជាក្នុងការរួមចំណែកអភិវឌ្ឍវិស័យឧស្សាហកម្មដំឡូងមី។ ហើយអនុស្សរណៈយោគយល់រវាង UNDP និងរោងចក្រ Green Leader នឹងរួមចំណែកជួយលើកកម្ពស់វិស័យដំឡូងមីរបស់កម្ពុជា ព្រមទាំងបង្កើតឱកាសការងារ និងប្រាក់ចំណូលបន្ថែមទៀតជូនប្រជាពលរដ្ឋទៀតផង។

សូមបញ្ជាក់ថា អនុស្សរណៈយោគយល់ដែលបានចុះហត្ថលេខាថ្ងៃនេះ គឺជាកិច្ចព្រមព្រៀងសហប្រតិបត្តិការរវាងអង្គការ UNDP និងវិស័យឯកជនដើម្បីធានាបាននិរន្តរភាពនៃការអភិវឌ្ឍនៅក្នុងឆ្នាំ 2030។ អនុស្សរណៈនេះផ្តោតលើចំណុចសំខាន់ចំនួនបី រួមមាន៖
1.បង្កើនផលិតភាពរបស់កសិករដំឡូងមីខ្នាតតូច តាមរយៈការផ្ទេរសមត្ថភាព និងប្រើប្រាស់បច្ចេកវិទ្យាដើម្បីឱ្យមានប្រព័ន្ធផលិតកម្មជានិរន្តរភាព។

2.ធ្វើឱ្យគុណភាពកាន់តែល្អប្រសើរ និងបង្កើនទំនុកចិត្តលើការផ្គត់ផ្គង់តាមរយៈការពង្រឹងសមាគមកសិករដំឡូងមី និងសមត្ថភាពលើកិច្ចសហប្រតិបត្តិការដោយការជំរុញឱ្យមានគំរូកសិកម្មកិច្ចសន្យា។

និង3. ជំរុញការស្រាវជ្រាវ និងអភិវឌ្ឍន៍លើអេតាណុល (bio-ethanol) និងទស្សនៈដើម្បីជំរុញគោលនយោបាយជាតិឥន្ធនៈ (bio-fuel)៕

April 6, 2018

Arsenal លត់ CSKA Moscow ចាស់ដៃ ដើម្បីខិតកាន់តែកៀកទៅវគ្គ 14ក្រុមចុងក្រោយ

ក្រុម Arsenal បានបង្ហាញពីទម្រង់លេងយ៉ាងល្អ ខណៈដែលពួកគេបានស៊ុតបាល់បញ្ចូលទីដល់ទៅ 4គ្រាប់ក្នុងពេលផ្តួលក្រុមជើងខ្លាំងរុស្ស៊ី CSKA Moscow ក្នុងលទ្ធផល 4-1 ក្នុងការប្រកួតជើងទី1 នៃក្របខ័ណ្ឌ Europa League វគ្គ 8ក្រុមចុងក្រោយ នាកីឡដ្ឋាន Emirates កាលពីថ្ងៃព្រហស្បតិ៍។

ក្រុម Arsenal បានបញ្ចប់ភាពស្រពេចស្រពិលយ៉ាងឆាប់រហ័សក្នុងការប្រកួតនៅលើទីលាន ខណៈដែល Ramsey និង Alexandre Lacazette សុទ្ធសឹងបានស៊ុតបាល់បញ្ចូលទី 2គ្រាប់ដូចគ្នាក្នុងតង់ទី1 ដើម្បីបញ្ចប់ក្តីសង្ឃឹមរបស់ CSKA ក្នុងការប្រកួតនេះ។

លទ្ធផលនេះមានន័យថា ក្រុម Arsenal នឹងឈានទៅកាន់ការប្រកួតជើងទី2 នៅលើទឹកដីរបស់ក្រុម CSKA នៅសប្តាហ៍ក្រោយ ប្រកបដោយភាពជឿជាក់ ខណៈដែលពួកគេកំពុងតែស្ថិតយ៉ាងប្រកៀកទៅវគ្គ 4ក្រុមចុងក្រោយ។ ស្របពេលដែលការប្រជែងដណ្តើមចំណាត់ថ្នាក់កំពូលទាំង4 នៅលើតារាងក្របខ័ណ្ឌ Premier League ស្ថិតក្នុងភាពស្តួចស្តើង ហេតុនេះការឈ្នះពាន Europa League គឺជាផ្លូវតែមួយគត់សម្រាប់ពួកគេក្នុងការឈ្នះកៅអីទៅលេងក្នុងក្របខ័ណ្ឌ Champions League នារដូវកាលក្រោយ។

លោក Arsene Wengerគ្រូបង្វឹករបស់ក្រុម Arsenal បានឱ្យដឹងថា៖ «វាពិតជាការប្រកួតតង់ទី1 ដ៏ពិសេសមួយដែលត្រូវបានលេងក្នុងកម្រិតដ៏ខ្ពស់មួយ ប៉ុន្តែមិនមែនជាការប្រកួតប្រកបដោយសុវត្ថិភាពសម្រាប់ខ្ញុំឡើយ ពីព្រោះពួកគេហាក់បានបង្ហាញពីទម្រង់លេងដ៏មានគ្រោះថ្នាក់»៕

ប្រភពពី៖ The Sun

April 6, 2018

សំណង់លំនៅឋានកើនឡើងខ្លាំងកាលពីឆ្នាំ 2017

ទោះបីជាវិស័យសំណង់នៅកម្ពុជាមានការកើនឡើងខ្លាំងក្នុងរយៈពេលជាង 10ឆ្នាំចុងក្រោយនេះក៏ដោយ ក៏គេមើលឃើញថា វិស័យនេះនៅតែបន្តកើនឡើងជាលំដាប់តទៅទៀតដោយសារតម្រូវការរបស់ប្រជាជនក្នុងស្រុកនៅមានច្រើន។

ឯកឧត្តមទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងដែនដី នគរូបនីយកម្ម និងសំណង់ បានលើកឡើងថា នៅក្នុងឆ្នាំ2017កន្លងទៅនេះកម្ពុជាមានលំនៅឋានសំណង់ផ្ទះល្វែងនៅតាមបុរីនានាប្រមាណជាង 52ម៉ឺនខ្នង កើនឡើងរហូតដល់1637% បើធៀបនឹងឆ្នាំ2016ដែលមានចំនួនត្រឹមតែជាង3ម៉ឺនលំនៅឋានតែប៉ុណ្ណោះ។

ឯកឧត្តមមានប្រសាសន៍ថា ដោយផ្អែកលើកំណើនសេដ្ឋកិច្ចថេរ7% ក្នុងរយៈពេលជាង 2ទសវត្សរ៍ចុងក្រោយ និងដោយចំណូលប្រចាំឆ្នាំ (GDP)របស់ប្រជាពលរដ្ឋមានការកើនឡើងជាលំដាប់បានធ្វើឱ្យតម្រូវការនៃការទិញលំនៅឋាននៅតែបន្តកើនឡើងក្នុងរយៈពេលប៉ុន្មានឆ្នាំទៅមុខទៀត។

យោងតាមរបាយការណ៍ក្រសួងសេដ្ឋកិច្ច និងហិរញ្ញវត្ថុបានឱ្យដឹងថា ទំហំសេដ្ឋកិច្ចជាតិ (ផ.ស.ស.តាមថ្លៃបច្ចុប្បន្ន) បានកើនឡើងពី 61,326,928លានរៀល ឬសមមូលនឹងប្រមាណជាង 15,237លានដុល្លារអាមេរិកក្នុងឆ្នាំ 2013 ដល់ 89,509,422លានរៀល ឬសមមូលនឹងប្រមាណជាង 22,172 លានដុល្លារអាមេរិក ក្នុងឆ្នាំ 2017 ហើយនឹងបន្តឡើងដល់ 99,116,041លានរៀល ឬសមមូលនឹងប្រមាណជាង 24,552 លានដុល្លារ នៅឆ្នាំ 2018។

ចំណូលមនុស្សម្នាក់ធៀបនឹង ផ.ស.ស. បានកើនឡើងពី 1,042ដុល្លារអាមេរិក ក្នុងឆ្នាំ2013 ដល់ប្រមាណ 1,435 ដុល្លារអាមេរិកក្នុងឆ្នាំ 2017 ហើយនឹងបន្តឡើងដល់ប្រមាណ 1,568 ដុល្លារអាមេរិកនៅឆ្នាំ 2018នេះ ខណៈដែលអត្រាប្តូរប្រាក់ស្ថិតក្នុងរង្វង់ 4,050រៀល ក្នុងមួយដុល្លារអាមេរិក។

ប្រការនេះជាកត្តាដែលធ្វើឱ្យសំណង់ផ្ទះល្វែងនៅតែបន្តកើនឡើងដែលបើគិតត្រឹម 2030 ខាងមុខ ត្រូវបានគេព្យាករឃើញថា កម្ពុជានៅត្រូវការលំនៅឋានប្រមាណ 80ម៉ឺនខ្នងបន្ថែមទៀតដើម្បីឆ្លើយតបនឹងកំណើនប្រជាសាស្ត្រ និងការរីកចម្រើននៃសេដ្ឋកិច្ចសង្គម។

ជាមួយគ្នានេះ លោក ហ៊ឹម សីហា នាយកផ្នែកស្រាវជ្រាវក្រុមហ៊ុន Vtrust បានមានប្រសាសន៍ថា ខេត្តដែលមានសក្តានុពលខ្លាំងជាងគេ គឺខេត្តកណ្តាលដែលជាខេត្តនៅជាប់នឹងរាជធានីភ្នំពេញមានគម្រោងសាងសង់រហូតដល់ 8,900ខ្នងក្នុងឆ្នាំ2017។

ទី2.គឺក្រុងប៉ោយប៉ែត ខេត្តបន្ទាយមានជ័យមានការកើនឡើងរហូតដល់ 5,400ខ្នង។
ទី3.បាត់ដំបង មាន3,800ខ្នង។
ទី4.សៀមរាបមាន 3,500ខ្នង ដែលភាគច្រើនស្ថិតនៅក្នុងអំឡុងការសាងសង់។

លោកថា អ្វីដែលធ្វើឱ្យសំណង់លំនៅឋានមានការកើនឡើងខ្លាំងនោះ គឺដោយសារតម្រូវការរស់នៅក្នុងផ្ទះផ្ទាល់ខ្លួនរបស់ប្រជាពលរដ្ឋ ជាពិសេសពលរដ្ឋដែលធ្វើចំណាកស្រុកពីបណ្តាខេត្តមករស់នៅបំពេញការងារ និងរកស៊ីប្រកបរបរផ្សេងៗនៅក្នុងក្រុងភ្នំពេញ ហើយនិងកំណើនកើនឡើងនៃគូស្រករវ័យក្មេង។

តាមការសិក្សាស្រាវជ្រាវខាងលើបង្ហាញថា ក្នុងឆ្នាំ2018នេះ អគារសំណង់ផ្ទះល្វែងនៅតែមានសញ្ញានៃការរីកចម្រើន បើទោះបីជាឆ្នាំដែលមានការបោះឆ្នោតអាណត្តិថ្មីចូលមកដល់ក៏ដោយ៕

April 5, 2018

Author: វល័ក្ខ