វល័ក្ខ - La Reine Media

IMF បង្ហាញពី 10ប្រទេសដែលមានសេដ្ឋកិច្ចធំបំផុតក្នុងឆ្នាំ 2018

មូលនិធិរូបិយវត្ថុអន្តរជាតិ (International Monetary Fund=IMF) ថ្មីៗនេះបានបង្ហាញទិន្នន័យរបស់ខ្លួនស្តីពីទឹកប្រាក់ និងចំណាត់ថ្នាក់ប្រទេសដែលមានសេដ្ឋកិច្ចធំជាងគេទាំង10 លើពិភពលោកសម្រាប់ឆ្នាំ 2018នេះ ដែលវាជាទិន្នន័យដ៏មានសារៈសំខាន់មួយសម្រាប់ប្រជាជន និងស្ថាប័នពាណិជ្ជកម្មនានាលើពិភពលោក។

នៅក្នុងរបាយការណ៍ដែលដកស្រង់ដោយវេទិកាសេដ្ឋកិច្ចពិភពលោកបានបញ្ជាក់ថា ប្រទេសដែលឈរនៅលំដាប់ថ្នាក់លេខ1សម្រាប់ឆ្នាំ2018 នេះគឺ សហរដ្ឋអាមេរិក ដែលមានទឹកប្រាក់សរុបចំនួន 20.4ទ្រីលានដុល្លារដែលបានកើនឡើងពីចំនួន 19.4ទ្រីលានដុល្លារកាលពីឆ្នាំមុន។

ប្រទេសដែលឈរនៅលំដាប់ថ្នាក់លេខ2 នោះគឺប្រទេសចិន មានទំហំទឹកប្រាក់សរុបប្រមាណ14ទ្រីលានដុល្លារអាមេរិក ដែលបានកើនឡើងចំនួន 2ទ្រីលានដុល្លារ បើគិតក្នុងឆ្នាំ 2017 គឺមានចំនួនត្រឹមរង្វង់ 12ទ្រីលានដុល្លារប៉ុណ្ណោះ។ ប្រទេសដែលឈរនៅលំដាប់ថ្នាក់លេខ3 គឺប្រទេសជប៉ុនដែលមានទឹកប្រាក់ក្នុងវិស័យសេដ្ឋកិច្ចសរុបប្រមាណ 5.1ទ្រីលានដុល្លារអាមេរិក កើនឡើង 4.87ទ្រីលានដុល្លារកាលពីឆ្នាំ 2017។

ងាកមកទ្វីបអឺរ៉ុបវិញ មានប្រទេសចំនួន5 ដែលជាប់ឈ្មោះក្នុងចំណោមប្រទេសដែលមានសេដ្ឋកិច្ចធំជាងគេលើពិភពលោក ដែលក្នុងនោះប្រទេសអាល្លឺម៉ង់ បាននាំមុខគេក្នុងលេខរៀងទី4 ដោយមានទឹកប្រាក់សរុបប្រមាណ 4.2ទ្រីលានដុល្លារអាមេរិក និងតាមពីក្រោយដោយចក្រភពអង់គ្លេសក្នុងលេខរៀងទី5 ដែលមានទឹកប្រាក់សរុបក្នុងរង្វង់ 2.84ទ្រីលានដុល្លារអាមេរិក ហើយលេខរៀងទី6 គឺប្រទេសបារាំងក្នុងទំហំទឹកប្រាក់សរុបប្រមាណ 2.93ទ្រីលានដុល្លារអាមេរិក។

តាមពីក្រោយចក្រភពអង់គ្លេស និងបារាំង គឺប្រទេសនៅទ្វីបអាស៊ីវិញម្តង។ ឥណ្ឌានៅឆ្នាំនេះ បានឈរនៅលេខរៀងទី7 លើពិភពលោកដែលមានសេដ្ឋកិច្ចធំជាងគេ ក្នុងទំហំទឹកប្រាក់សរុបប្រមាណ 2.85ទ្រីលានដុល្លារ។ អុីតាលី បានឈរក្នុងលំដាប់ថ្នាក់សេដ្ឋកិច្ចធំទី8 ដែលមានទឹកប្រាក់សរុប 2.18ទ្រីលានដុល្លារអាមេរិក តាមជាប់កិតៗដោយប្រទេសប្រេស៊ីលដែលទំហំទឹកប្រាក់ក្នុងសេដ្ឋកិច្ចសរុបប្រមាណជាង 2.14ទ្រីលានដុល្លារ ខណៈដែលកាណាដាឈរលំដាប់ថ្នាក់លេខ 10 ជាមួយនឹងទឹកប្រាក់សរុប 1.8ទ្រីលានដុល្លារអាមេរិក។

យោងតាមទិន្នន័យខាងលើមានន័យថា សហរដ្ឋអាមេរិកជាប្រទេសដែលឈរនៅក្នុងលំដាប់ថ្នាក់ខ្ពស់ជាងគេ ហើយបើបូកសរុបចំនួនទឹកប្រាក់នៃប្រទេសចាប់ពីលេខ4 ដល់លេខ10 យើងឃើញថា មានចំនួនទឹកប្រាក់សរុបប្រមាណ 19.4ទ្រីលានដុល្លារអាមេរិកតែប៉ុណ្ណោះ ដែលចំនួននេះនៅតិចជាងសហរដ្ឋអាមេរិកតែម្នាក់ឯងផង។

ប្រសិនបើយើងមើលទៅលើសេដ្ឋកិច្ចពិភពលោកជារួមវិញ នៅឆ្នាំ2018 នេះយើងឃើញថាមានទំហំទឹកប្រាក់សរុបប្រមាណ 79.98ទ្រីលានដុល្លារ មានន័យថា ទំហំទឹកប្រាក់របស់សហរដ្ឋអាមេរិក គឺធំជាង 1/4 នៃសេដ្ឋកិច្ចពិភពលោក។ តែទោះជាយ៉ាងនេះក្តី បើយោងតាមការបង្ហាញនេះ ធនាគារពិភពលោកបានព្យាករទុកថា ចិន និងឥណ្ឌា អាចនឹងតាមទាន់សហរដ្ឋអាមេរិក ឬអាចមានសេដ្ឋកិច្ចធំជាងទៀតក៏ថាបានដែរ ព្រោះថា តាមការប៉ាន់ប្រមាណថា GDP របស់សហរដ្ឋអាមេរិកត្រូវបានគេរំពឹងទុកថា កើនឡើងប្រមាណត្រឹមចន្លោះ 17.9% ប៉ុណ្ណោះក្នុងចន្លោះឆ្នាំ2017 ដល់ឆ្នាំ2019 ប៉ុន្តែចិនគឺត្រូវបានគេវាយតម្លៃទុកថា អាចនឹងកើនឡើងដល់ទៅ 35.2%។

ចរន្តសេដ្ឋកិច្ចបច្ចេកវិទ្យារបស់ចិនគឺកំពុងតែមានការកក្រើកជាមួយនឹងកំណើនពីត្រឹមតែជាង 1% នៃទីផ្សារអាជីវកម្មអេឡិចត្រូនិក (e-commerce) របស់ពិភពលោកកាលពី 10ឆ្នាំមុន មកដល់ 42% នាពេលបច្ចុប្បន្ននេះ។ បើសិនជាប្រៀបធៀបជាមួយនឹងសហរដ្ឋអាមេរិក ចំណែកទីផ្សារគឺមានត្រឹមតែ 24% ប៉ុណ្ណោះនាពេលបច្ចុប្បន្ន ព្រោះវាបានធ្លាក់ចុះទៅវិញ ខណៈនៅឆ្នាំ 2005 នៅសហរដ្ឋអាមេរិកមានទីផ្សារអាជីវកម្មអេឡិចត្រូនិកដល់ទៅ 35%ឯណោះ។ យោងតាមរបាយការណ៍ដែលវិភាគដោយស្ថាប័នជំនាញ PwC បានបង្ហាញថា សេដ្ឋកិច្ចចិនអាចនឹងឡើងទៅស្មើអាមេរិកនៅឆ្នាំ2050៕

April 24, 2018

មជ្ឈមណ្ឌលបុប្ផាណា បង្កើតកម្មវិធីទូរស័ព្ទបង្ហាញពីប្រវត្តិខ្មែរក្រហម

នៅកម្ពុជា ថ្មីៗនេះមជ្ឈមណ្ឌល បុប្ផាណា បានសហការជាមួយនឹងដៃគូពាក់ព័ន្ធបង្កើតឡើងនូវកម្មវិធីទូរស័ព្ទដោយបញ្ចូលនូវសិល្បៈ និងអត្ថបទប្រវត្តិសាស្ត្រជាច្រើនប្រកបដោយគុណប្រយោជន៍សម្រាប់សាធារណជនខ្មែរ។

នៅថ្ងៃនេះអ្នកយកព័ត៌មាននៃកាសែតឡារ៉ែន ពាណិជ្ជ បានជួបសម្ភាសជាមួយលោក ជា សុភាព នាយកប្រតិបត្តិនៃមជ្ឈមណ្ឌលបុប្ផាណា ដែលលោកបានបង្ហាញពីព័ត៌មានលម្អិតពាក់ព័ន្ធនឹងកម្មវិធីដ៏មានសារៈសំខាន់នេះដូចខាងក្រោម។

ថ្មីៗនេះបុប្ផាណាទើបនឹងបង្កើតកម្មវិធីទូរស័ព្ទ (Mobile App) ដែលកំពុងស្ថិតក្នុងចំណាប់អារម្មណ៍របស់សាធារណជន។ តើ App នេះត្រូវបានបង្កើតឡើងក្នុងគោលបំណងអ្វីខ្លះ?

គោលបំណងសំខាន់នៃការផលិត App ដែលមានឈ្មោះថា ប្រវត្តិសាស្ត្រខ្មែរក្រហម ឬ Khmer Rouge History នេះគឺចង់អប់រំយុវជនជំនាន់ក្រោយឱ្យបានស្វែងយល់កាន់តែច្បាស់ពីប្រវត្តិសាស្ត្រពិតដែលកើតមានឡើងក្នុងសម័យខ្មែរក្រហម និងដើម្បីជួយដល់ក្រសួងអប់រំ យុវជន និងកីឡា លើកម្មវិធីអប់រំប្រវត្តិសាស្ត្រផងដែរ។

ក្រៅពីនេះ កម្មវិធីនេះក៏ជាការចែករំលែកប្រវត្តិសាស្ត្រជាក់ស្តែងទៅកាន់មនុស្សជាតិទាំងមូល ដើម្បីធ្វើឱ្យមនុស្សពីគ្រប់ជាតិសាសន៍អាចទទួលបានព័ត៌មានពីរបបខ្មែរក្រហម។ ម្យ៉ាងវិញទៀត យើងឃើញហើយថាមនុស្សចាស់សម័យមុននៅពេលដែលគាត់និយាយពីរបបខ្មែរក្រហមប្រាប់ក្មេងៗ ពួកគេអាចមិនសូវយកចិត្តទុកដាក់ស្តាប់ ដែលវាជាបញ្ហាមួយធ្វើឱ្យគាត់មិនសប្បាយចិត្ត ហេតុនេះនៅពេលដែលយើងបណ្តុះបណ្តាលឱ្យក្មេងៗជំនាន់ក្រោយបានយល់ដឹងពីរឿងរ៉ាវជាក់ស្តែងនានានៅក្នុងសម័យខ្មែរក្រហម មនុស្សចាស់ដែលមានការឈឺចាប់នៅសម័យនោះអាចនឹងមាន ការស្ងប់ចិត្តបានខ្លះ ដែលវាហាក់ដូចជាការផ្សះផ្សាផ្លូវចិត្តដល់ពួកគាត់មួយកម្រិតផងដែរ។ កម្មវិធីនេះត្រូវបានបង្កើតឡើងដោយមានការឧបត្ថម្ភ និងគាំទ្រពីសហភាពអឺរ៉ុប និងអង្គការ Rei Foundation Limited។

តើការបង្កើត App ស្តីពីប្រវត្តិសាស្ត្រខ្មែរក្រហមនេះ ត្រូវចំណាយពេលវេលា និងធនធានច្រើនប៉ុនណា?

ការបង្កើត App នេះគឺ នៅដំណាក់កាលទី1 យើងបង្កើតឡើងក្នុងរយៈពេល2ឆ្នាំ គឺចាប់ផ្តើមពីឆ្នាំ2016 ដល់ ឆ្នាំ2018។ ដំណាក់កាលនេះ ជាដំណាក់កាលក្នុងការបង្កើតឡើងនូវអត្ថបទ (content) និងវីដេអូសំខាន់ៗមួយចំនួន។ រយៈពេលនេះ ជារយៈពេលខ្លីតែយើងបានបង្កើតឡើងនូវសាច់រឿងជាច្រើន ព្រោះយើងមានអ្នកសរសេរ ដល់ទៅ 3រូប គឺលោក កែវ ឌួង ជាជនជាតិខ្មែរយើង ដែលបានបញ្ចប់ការសិក្សានៅប្រទេសថៃ ហើយគាត់បានបោះពុម្ពផ្សាយឯកសារច្រើនពាក់ព័ន្ធនឹងប្រវត្តិសាស្ត្រ និងជាមនុស្សម្នាក់ដែលស្រឡាញ់ការងារប្រវត្តិសាស្ត្រនេះ ជាអ្នកសរសេរ។

ចំពោះអ្នកដែលចូលរួមសំខាន់ 2រូបទៀត គឺលោកបណ្ឌិត ឌី ខាំបូលី ដែលគាត់ជាអ្នកនិពន្ធសៀវភៅប្រវត្តិសាស្ត្រកម្ពុជាប្រជាធិបតេយ្យ និងមួយរូបទៀតគឺអ្នកនិពន្ធ Anne Laure Porée ដែលគាត់មានស្នាដៃពាក់ព័ន្ធនឹងមន្ទីរស.21 ហើយគាត់បានសរសេរនិក្ខេបបទថ្នាក់បណ្ឌិតរបស់គាត់អំពីមន្ទីរ ស.21នេះ។

ក្រៅពីនោះទៀត យើងមានគណៈកម្មការពិនិត្យចំនួន 8រូប គឺលោក មួង សុផាត ដែលគាត់ជាអ្នកជំនាញនៃក្រសួងអប់រំយុវជន និងកីឡា លោកបណ្ឌិត វង់ សុធារ៉ា ដែលជាសាស្ត្រាចារ្យប្រវត្តិសាស្ត្រ និងជាប្រធានដេប៉ាតឺម៉ង់ប្រវត្តិសាស្ត្រនៃសាកលវិទ្យាល័យភូមិន្ទភ្នំពេញ លោកបណ្ឌិត ឃួន វិច្ឆិកា អគ្គនាយករងនៃអគ្គនាយកដ្ឋានអប់រំនៃក្រសួងអប់រំ លោក ឆាំង យុ ប្រធានមជ្ឈមណ្ឌលឯកសារកម្ពុជា លោក ប៉ាន់ រិទ្ធី សមិទ្ធករ និងជាផលិតករភាពយន្ត រួមជាមួយនឹងបណ្ឌិត Helen Jarvis ទីប្រឹក្សារាជរដ្ឋាភិបាល បណ្ឌិត អ៊ុក គ្រឹស្នាអតីតប្រធានមជ្ឈមណ្ឌលខេមរភាសា និងលោក គន្ធ សុធីរ អតីតមន្ត្រីផ្នែកច្បាប់នៃការិយាល័យមេធាវី។ លើសពីនេះទៅទៀត គឺមានការត្រួតពិនិត្យបន្ថែមពីលោក David Chandler ដើម្បីធានាថាអាចធ្វើឱ្យវាមានតម្លៃគ្រប់គ្រាន់សម្រាប់បង្ហាញទៅកាន់សាធារណជន។

រាល់ដង បើនិយាយពីខ្មែរក្រហមយើងឃើញថា មនុស្សគ្រប់គ្នានិយាយច្រើន ហើយមានឯកសារច្រើនផងដែរ តើកម្មវិធីថ្មីនេះមានអ្វីប្លែកដែលអ្នកមើលគួរតែចូលមើលដែរឬទេ?

ជាទូទៅ ខ្ញុំធ្លាប់ឆ្លងកាត់ការស្ទង់មតិជាមួយនឹងក្មេងៗមួយចំនួន គឺពួកគាត់ស្គាល់តែពីប៉ុល ពត ពីនួន ជា ឬ អៀង សារី ជាដើម តែនៅពេលដែលខ្ញុំសួរគាត់ឱ្យស៊ីជម្រៅ គឺគាត់មិនដឹងទេ។

អ្វីដែលយើងដាក់បញ្ចូលទៅក្នុង App នេះគឺយើងនិយាយពីរបៀបដែលខ្មែរក្រហមឡើងកាន់អំណាច របៀបនៃការតស៊ូ វិធីសាស្ត្រទំនាក់ទំនងរបស់ប៉ុល ពត ទិន្នន័យសំខាន់ៗ រួមទាំងវិធីសាស្ត្រក្នុងការបញ្ជ្រាបពីមនោគមន៍វិជ្ជារបស់ខ្មែរក្រហមដល់ប្រជាជន រហូតដល់មានប្រជាជនជាច្រើននៅសម័យនោះដើរតាមប៉ុល ពត។ យើងក៏និយាយពីទិដ្ឋភាពពេលដែលខ្មែរក្រហមចូលទីក្រុងភ្នំពេញ ការរស់នៅរបស់ប្រជាជនជាលក្ខណៈជីវិតឯកជនក្នុងសម័យខ្មែរក្រហម និងពីប្រភពព័ត៌មានដើមដែលយើងបានស្នើសុំពីមជ្ឈមណ្ឌលឯកសារកម្ពុជាដើម្បីបង្ហាញជូនសាធារណជនឱ្យកាន់តែច្បាស់។

អ្វីជាការរំពឹងទុកបន្ទាប់ពីប្រជាជនកម្ពុជាជាច្រើនចាប់ផ្តើមប្រើប្រាស់ App របស់បុប្ផាណានេះ? លោកមានមតិអ្វីដើម្បីផ្តាំផ្ញើដល់សាធារណជនដែរឬទេ?

ជាការរំពឹងទុក គឺយើងចង់ឃើញមានការផ្លាស់ប្តូរឥរិយាបថជាវិជ្ជមានចំពោះក្រុមគ្រួសារខ្មែរ ដែលធ្លាប់ឆ្លងកាត់សម័យខ្មែរក្រហម និងចង់ឱ្យយុវជនយល់ដឹងកាន់តែច្បាស់ពីសម័យខ្មែរក្រហម ឬរបបប្រល័យពូជសាសន៍កុំឱ្យកើតមានប្រវត្តិសាស្ត្រច្រំដែល ព្រោះយើងធ្លាប់បានឃើញហើយថា ប្រវត្តិសាស្ត្រនៃការកាប់សម្លាប់រង្គាលត្រូវបានកើតឡើងម្តងរួចមកហើយនៅក្នុងសម័យសង្គ្រាមលោកលើកទី2 ដោយមេដឹកនាំល្មោភសង្គ្រាម អាដូហ្វ ហ៊ីត្លែ តែក្រោយមកទៀតវាបានកើតឡើងបន្តបន្ទាប់ស្រដៀងគ្នានេះនៅលើពិភពលោក គឺនៅក្នុងប្រទេសកម្ពុជា

ហេតុនេះសង្ឃឹមថា យើងព្យាយាមរៀនពីវា ហើយទប់ស្កាត់កុំឱ្យវាកើតឡើងបន្តទៀត។ ដើម្បីជំរុញសកម្មភាពនេះឱ្យជោគជ័យ គឺយើងទាំងអស់គ្នាអាចចូលរួមបានតាមរយៈការទាញយក (download) App នេះឱ្យបានច្រើន ហើយបន្តស្វែងយល់ និងផ្សព្វផ្សាយឱ្យកាន់តែទូលំទូលាយ៕

April 24, 2018

កម្មវិធី ABC Exceptional Night ជាមួយលោក ដួង វីរះសិទ្ធ

រាជធានីភ្នំពេញ៖ កាលពីថ្ងៃសុក្រ ទី 20 ខែមេសា ឆ្នាំ2018 ស្រាបៀរ ABC អិចស្ត្រាស្តោត បានបន្តរៀបចំកម្មវិធី ABC EXCEPTIONAL NIGHT នៅ The Storm Pub & Restaurant ដោយមានការអញ្ជើញចូលរួមពីសំណាក់តារាចម្រៀងដែលជាម្ចាស់ជ័យលាភី ដែលមានទេពកោសល្យពិតប្រាកដ ក្នុងកម្មវិធី I Am The Singer ឆ្នាំ 2016 ហើយគាត់បានវិវត្តន៍កេរ្តិ៍ឈ្មោះរបស់គាត់ជាតារាវ័យក្មេងដែលជាទីត្រូវការបំផុតមួយក្នុងចំណោមតារាវ័យក្មេងដទៃទៀត លោកគឺជាតារាដែលមានចំណុចល្អឯកដែលរះយ៉ាងត្រចះត្រចង់ (Rising Exceptional) លោក ដួង វីរះសិទ្ធ ។

កម្មវិធីរាត្រីដ៏ល្អឯក (ABC Exceptional Night) មិនត្រឹមតែមានវត្តមាន តារាចម្រៀងដែលចូលរួម ផ្តល់ភាពសប្បាយរីករាយក៏ដូចជាបង្ហាញពីភាពល្អឯកប៉ុណ្ណោះទេ អតិថិជនរបស់ស្រាបៀរ ABC អិចស្ត្រាស្តោត និងអតិថិជនរបស់ The Storm Pub & Restaurant ក៏បានភ្លក់នូវរសជាតិដ៏ល្អឯកពីការលាយបញ្ជូលគ្នាជាស្រាក្រឡុក ABC អិចស្ត្រាស្តោត ពីសំណាក់អ្នកក្រឡុកស្រាដ៏ជំនាញ ។

កម្មវិធី ABC EXCEPTIONAL NIGHT គឺជាផ្នែកមួយនៃយុទ្ធនាការ “ជាឧត្តមភាពដ៏ល្អឯក” របស់ ស្រាបៀរ ABC អិចស្ត្រាស្តោត ដែលផ្តល់នូវអំណរសារទរដល់ប្រជាពលរដ្ឋកម្ពុជាដែលទទួលបានជោគជ័យដោយបានបង្ហាញពីចំណុចខ្លាំង ចំណេះដឹង និងសមិទ្ធផលរបស់ខ្លួននៅក្នុងវិស័យសិល្បៈ ពាណិជ្ជកម្ម និងការកសាងសហគមន៍។

ABC អិចស្ត្រាស្តោត នៅតែជាម៉ាកសញ្ញាស្រាបៀរទឹកខ្មៅលំដាប់ថ្នាក់អន្តរជាតិដែលឈានមុខគេគ្មានគូរបៀបនៅលើទីផ្សារ ស្រាបៀរទឹកខ្មៅគុណភាពខ្ពស់បំផុតនៅក្នុងប្រទេសកម្ពុជា ដែលអតិថិជនជ្រើសរើសយកមកទទួលទាន”ក្រេបរសជាតិដ៏ល្អឯក”នៃស្រាបៀរទឹកខ្មៅ ដែលផលិតពីគ្រឿងផ្សំមានគុណភាពខ្ពស់បំផុត និងបានឈ្នះពានរង្វាន់ជាច្រើន ជាពិសេសកំពុងទទួលបានការគាំទ្រកាន់តែខ្លាំងឡើងពីស្រទាប់យុវវ័យ មជ្ឈដ្ឋានសិល្បករ និងពាណិជ្ជករលំដាប់ថ្នាក់ខ្ពស់។

កម្មវិធី ABC EXCEPTIONAL NIGHT នឹងបន្តប្រារព្ធធ្វើឡើងនៅទីតាំង ភូមិគ្រឹះអង្គរ នៅថ្ងៃពុធ ទី ២៥ ខែមេសាខាងមុខនេះ ដោយមានការអញ្ជើញចូលរួមសម្តែងពីតារាចម្រៀងដ៏ល្បីនិងមានវ័យក្មេងដែលប្រកបដោយមហិច្ឆិតា អាចនិយាយបានថាគាត់តែងតែទទួលបានពិន្ទុលើសពី 101% នូវអ្វីដែលគាត់បានធ្វើ រាល់យុទ្ធនាការសុទ្ធតែសកម្មនិងលើកទឹកចិត្តឲ្យយុវវ័យសម្រេចនូវក្តីសុបិន្តនិងជឿជាក់លើខ្លួនឯង គឺលោក នីកូ។

សូមចូលរួមឲ្យបានច្រើនកុះករដើម្បីទទួលបានបទពិសោធន៍ដ៏ល្អឯកពី ABC អិចស្ត្រាស្តោត!

ចំពោះព័ត៌មានបន្ថែមអំពីកម្មវិធីពិសេសនេះ ចូលទៅកាន់គេហទំព័រផ្លូវការ៖https://www.facebook.com/ABC.ExtraStoutCambodia/

សូមរីករាយទទួលទាន ABC អិចស្ត្រាស្តោត ដោយការទទួលខុសត្រូវ។

April 24, 2018

លោក Klopp ជំរុញឱ្យ Liverpool ផ្តល់ការស្វាគមន៍យ៉ាងកក់ក្តៅដល់ Roma នៅរាត្រីនេះ

លោក Jurgen Klopp បានបញ្ចេញសារមួយដើម្បីជំរុញឱ្យអ្នកគាំទ្ររបស់ក្រុម Liverpool ទទួលក្រុម Roma ជាភ្ញៀវ និងបង្ហាញ «ពីភាពល្អឥតខ្ចោះរបស់យើងទៅកាន់ពិភពលោក» នៅពេលដែលក្រុមទាំង2ជួបគ្នាក្នុងការប្រកួតក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រ ជើងទី1 នៅរាត្រីនេះ។

ក្រុមប្រឹក្សារបស់ក្លិប Liverpool ក៏កំពុងតែបង្ហាញពីការធ្វើបដិសណ្ឋារកិច្ចរបស់ខ្លួនផងដែរ តាមរយៈការដាក់តាំងសញ្ញាដែលសរសេរថា «Benvenuti a Liverpool» ក្នុងពណ៌របស់ក្រុម Roma ជុំវិញទីក្រុង និងបានជួលក្រុមតន្ត្រីមួយក្រុម ដើម្បីប្រគំស្វាគមន៍អ្នកគាំទ្រអ៊ីតាលីចំនួន 1,000នាក់ដែលត្រូវបានរំពឹងទុកថា នឹងឆ្លងកាត់តាមរយៈអាកាសយានដ្ឋាន John Lennon Airport នៅថ្ងៃព្រឹកថ្ងៃអង្គារនេះ។

ការខិតខំព្យាយាមនេះ គឺត្រូវបានធ្វើឡើងដើម្បីផ្លាស់ប្តូរបទពិសោធនៃក្របខ័ណ្ឌអឺរ៉ុប នៅខាងក្រៅកីឡដ្ឋាន Anfield ក្រោយពីការជួបឧប្បត្តិហេតុទៅលើរថយន្តក្រុងរបស់ក្រុម Man City កាលពីពេលកន្លងមក។ ប៉ុន្តែ នៅក្នុងខាងក្នុងកីឡដ្ឋាន Liverpool វិញ ពួកគេចង់បានបង្ហាញពីការស្រេកឃ្លានដូចគ្នា ទាំងពីនាក់គាំទ្រ និងកីឡាករ។ លោក Klopp បានឱ្យុដឹងកាលពីថ្ងៃចន្ទថា៖ «នៅក្នុងកីឡដ្ឋាន សូមធ្វើឱ្យបានល្អម្តងទៀត។

នៅខាងក្រៅកីឡដ្ឋាន សូមបង្ហាញពីការគោរពដែលយើងត្រូវតែបង្ហាញ។ នេះគឺជាកីឡាបាល់ទាត់ដ៏អស្ចារ្យ ជាគ្រួសារកីឡាបាល់ទាត់ដ៏អស្ចារ្យមួយ មានភាពល្បីល្បាញសម្រាប់បរិយាកាសដ៏អស្ចារ្យទូទាំងពិភពលោក ហេតុនេះ យើងមិនចាំបាច់គប់អ្វីទៅលើរថយន្តក្រុងរបស់ក្រុមជាគូប្រជែងឡើយ»។ Liverpool បានកម្តៅសាច់ដុំសម្រាប់ការប្រកួតនៅរាត្រីនេះ តាមរយៈការបញ្ចប់ក្នុងលទ្ធផលស្មើ 2-2 នៅលើទឹកដីក្រុម West Brom កាលពីថ្ងៃសៅរ៍ ខណៈដែល Salah បានស៊ុតបាល់បញ្ចូលទី 1គ្រាប់។

ក្រុម Roma ក៏នឹងឈានទៅកាន់ការប្រកួតនេះទាំងការជឿជាក់ផងដែរ ក្រោយពីបានផ្តួលក្រុម SPAL 3-០ ក្នុងការប្រកួតក្របខ័ណ្ឌ Serie A កាលពីចុងសប្តាហ៍ថ្មីៗនេះ។ ការប្រកួតនេះនឹងចាប់ផ្តើមនៅម៉ោង 1:45ទៀបភ្លឺ៕

ប្រភពពី៖ The Guardian

April 24, 2018

ពិធីចុះអនុស្សរណៈយោគយល់រវាងធនាគារ PPCBank និង Diners Club International

កាលពីថ្ងៃទី23 ខែសីហា ឆ្នាំ2018 នៅសណ្ឋាគារ សូហ្វ៊ីថែលភ្នំពេញ ធនាគារ PPCBank ដែលជាធនាគារពាណិជ្ជមួយនៅក្នុងប្រទេសកម្ពុជាបានប្រារព្ធពិធីចុះហត្ថលេខាលើអនុស្សរណៈយោគយល់គ្នាជាមួយ Diners Club International ដែលជាក្រុមហ៊ុនបុត្រសម្ព័ន្ធទាំងស្រុងរបស់ Discover Financial Services ហើយក៏ជាសមាជិករបស់ Discover Global Network មួយដែរ។

អនុស្សរណៈនេះធ្វើឡើងក្នុងគោលបំណងផ្តល់សិទ្ធិឱ្យធនាគារ PPCBank ផ្តាច់មុខក្នុងការចេញកាតរបស់ Diners Club International ក្នុងប្រទេសកម្ពុជា ដោយសារធនាគារបានមើលឃើញពីការរីកចម្រើននៃវិស័យសេដ្ឋកិច្ច ក៏ដូចជាជីវភាពរបស់ប្រជាជនកម្ពុជាព្រមទាំងកំណើននៃតម្រូវការរបស់ពួកគេចំពោះវិស័យធនាគារ។

លោក Shin ប្រធានប្រតិបត្តិធនាគារ PPCBank បានលើកឡើងថា ធនាគារនឹងរង់ចាំពិភាក្សាជាមួយដៃគូសហការគឺ Diners Club International ដើម្បីផ្តល់ជូននូវផលិតផលដែលមានកិត្តិនាមនេះដល់ប្រជាជនកម្ពុជាដើម្បីបំពេញ និងជំរុញព្រំដែននៃតម្រូវការផលិតផលដែលមានស្តង់ដារខ្ពស់ ហើយក៏ជាផ្នែកមួយដែលអាចជំរុញសង្គមកម្ពុជាឱ្យចូលរួមក្នុងការធ្វើសមាហរណកម្មសកលឱ្យទាន់ពេលផងដែរ។

ក្នុងនោះដែរ Diners Club International និងធនាគារ PPCBank បានសម្រេចការផ្តល់ជូននូវការបើកទូលាយសម្រាប់ប្រជាជនកម្ពុជាក្នុងការប្រើប្រាស់កាតពាណិជ្ជកម្មដែលកំពុងតែមានការពេញនិយម ជាមួយនឹងអត្ថប្រយោជន៍ជាច្រើនពី Diners Club International រួមមាន ការចូលក្នុងកន្លែងសម្រាកលម្ហែរបស់ Diners Club នៅក្នុងព្រលានយន្តហោះជាច្រើនជាង 800កន្លែងទូទាំងពិភពលោក ការទទួលទានអាហារ ការធ្វើដំណើរ ការកម្សាន្ត និងទិញទំនិញនៅតាមហាងជាច្រើនជាង 50ប្រទេស ព្រមទាំងកញ្ចប់ដែលចំណេញប្រាក់សម្រាប់ការទិញអីវ៉ាន់តាមអ៊ីនធើណិតទៀតផង។

គួរបញ្ជាក់ផងដែរថា ធនាគារ PPCBank ត្រូវបានទទួលស្គាល់ថា ជាធនាគារពាណិជ្ជមួយដែលរីកចម្រើនយ៉ាងរហ័ស មិនត្រឹមតែទ្រព្យសរុបមួយផ្នែកនោះទេ តែចំនួនអតិថិជនក៏មានការកើនឡើងជាលំដាប់ផងដែរ។ ដើរតួនាទីជាធនាគារនៅក្នុងយុគសម័យដែលធ្វើប្រតិបត្តិការតាមបែបឌីជីថល និងការផ្តោតសំខាន់លើសេវាអតិថិជនក្រៅពីការដាក់ឱ្យប្រើប្រាស់នូវកម្មវិធីធនាគារចល័ត ប្រព័ន្ធគ្រប់គ្រងសហគ្រាស និងប្រព័ន្ធបេឡាករចល័តសម្រាប់ការពិគ្រោះយោបល់ ធនាគារ PPCBank ក្នុងគោលបំណងធ្វើបដិរូបកម្មដើម្បីផ្តល់ជូននូវបទពិសោធថ្មីរបស់ធនាគារដល់អតិថិជនរបស់ខ្លួន រួមនឹងសេវាកម្មដែលមានស្តង់ដារខ្ពស់ចំពោះអតិថិជនដែលមានទ្រព្យសម្បត្តិច្រើន។ ក្នុងនោះដែរ ធនាគារ PPCBank មានការគាំទ្រពេញលេញពី JB Financial Group ដែលជាក្រុមហ៊ុនមានបទពិសោធជាច្រើនឆ្នាំលើជំនាញក្នុងការគ្រប់គ្រងជំនួញប័ណ្ណសកល អស់រយៈពេលជាច្រើនឆ្នាំដោយមានទ្រព្យសកម្មសរុបជិត 50ពាន់លានដុល្លារសហរដ្ឋអាមេរិក៕

April 24, 2018

រដ្ឋាភិបាលចាប់ផ្តើមងាកចំណាប់អារម្មណ៍មកអភិវឌ្ឍដែនកោះ

ទេសចរណ៍ជាវិស័យសំខាន់មួយសម្រាប់សេដ្ឋកិច្ចកម្ពុជា ដែលបច្ចុប្បន្ននេះរាជរដ្ឋាភិបាលកម្ពុជាកំពុងយកចិត្តទុកដាក់ក្នុងការអភិវឌ្ឍ និងជំរុញឱ្យមានការគិតគូរកាន់តែខ្លាំង។ នាពេលកន្លងទៅ ចរន្តថ្មីៗជាច្រើនបានក្លាយជាសញ្ញាវិជ្ជមានសម្រាប់វិស័យទេសចរណ៍ ព្រោះថា សណ្ឋាគារប្រណីតជាច្រើនបានរីកដុះដាលឡើង ស្របពេលដែលជើងហោះហើរ និងប្រព័ន្ធទូរគមនាគមន៍ត្រូវបានតភ្ជាប់ដែលធ្វើឱ្យងាយស្រួលដល់ភ្ញៀវទេសចរ ដែលចង់ធ្វើដំណើរកម្សាន្តទៅគ្រប់ទីកន្លែងនៅកម្ពុជា ដោយរាប់បញ្ចូលទាំងដែនកោះផងដែរ។

នៅព្រឹកថ្ងៃទី23 ម្សិលមិញនេះ រដ្ឋាភិបាលកម្ពុជាបានមើលឃើញពីការអភិវឌ្ឍកោះរ៉ុង ដែលមានសណ្ឋាគារប្រណីតលំដាប់ផ្កាយ5 រួមទាំងការចាប់ផ្តើមរៀបចំនូវហេដ្ឋារចនាសម្ព័ន្ធយ៉ាងល្អដែលអាចបង្ហាញពីសក្តានុពលដែនកោះរបស់កម្ពុជាកាន់តែខ្លាំងទៅដល់ភ្ញៀវទេសចរជាតិ និងអន្តរជាតិ។ ស្របពេលជាមួយគ្នានេះដែរ ប្រមុខរាជរដ្ឋាភិបាលកម្ពុជា បានដាក់បញ្ជាឱ្យធ្វើការដកហូតនូវកោះប្រមាណ 30កោះនៅក្នុងដែនសមុទ្រ ពីក្រុមហ៊ុនវិនិយោគមួយចំនួនត្រឡប់មកវិញ ដោយសារតែវិនិយោគិនទាំងនោះមិនបានអនុវត្តតាមគម្រោងវិនិយោគ ត្រឹមត្រូវដើម្បីដាក់ឱ្យធ្វើការវិនិយោគជាថ្មីប្រកបដោយប្រសិទ្ធភាព។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍ថា៖ «បណ្ដាកោះរបស់យើងមួយចំនួនប្រៀបបាននឹងសត្វដំរីផើមទាំងអស់ បើគិតតាមរយៈពេលនៃការដែលយើងចាប់ផ្ដើមធ្វើការផ្ដល់ឱកាសសម្រាប់ការវិនិយោគឱ្យទៅក្រុមហ៊ុននានានោះ មានប្រហែលជា ៣០កោះ ដែលយើងត្រូវដកហូតត្រឡប់មកវិញ ដោយសារតែពួកគេមិនបានធ្វើអ្វីទាំងអស់។ ដូច្នេះខ្ញុំបានផ្ដល់យោបល់ឱ្យក្រុមប្រឹក្សាអភិវឌ្ឍន៍កម្ពុជាធ្វើការពិនិត្យដើម្បីដកហូតកោះទាំងនោះត្រឡប់មកវិញ ហើយរៀបចំឱ្យមានការវិនិយោគសាជាថ្មី»។

សម្តេចនាយករដ្ឋមន្ត្រីបានបន្ថែមផងដែរថា រដ្ឋាភិបាលនឹងមិនទុកកោះរបស់កម្ពុជាឱ្យស្ថិតក្នុងស្ថានភាពគ្មានការគ្រប់គ្រងដូចសព្វថ្ងៃ ដែលអ្នកបានសិទ្ធិវិនិយោគគិតតែពីដើរលក់គម្រោងបន្តនោះទេ។ កោះមួយចំនូននៅក្នុងដែនសមុទ្រដែលបានចុះហេតុលេខាវិនិយោគច្រើនឆ្នាំ ហើយមិនទាន់បានអនុវត្តមិនអាចអនុញ្ញាតឱ្យនៅបន្តទៀតនោះទេ។ នេះជាស្ថានភាពពិតប្រាកដដែលត្រូវសើរើពិនិត្យមើលដូចជាករណីកោះទន្សាយក្នុងខេត្តកំពត ជាដើម ត្រូវដកយកមកវិញ ព្រោះត្រូវដល់ពេលវេលាឱ្យទៅអ្នកវិនិយោគដែលមានលុយពិតប្រាកដតែមិនមានកន្លែងវិនិយោគហើយ ព្រោះដោយសារតែអ្នកមិនមានលុយវិនិយោគកំពុងតែមានសិទ្ធិកាន់កាប់ទីតាំងទាំងនោះ៕

April 24, 2018

ការផ្លាស់ប្តូរទម្លាប់នៃការដាក់ពាក្យធ្វើការងាររបស់បុគ្គលិកក្នុងក្រុមហ៊ុនឯកជន

នាពេលថ្មីៗនេះ ដោយសារតែកម្ពុជាបានសម្រួលឱ្យអ្នកវិនិយោគកាន់តែមានភាពងាយស្រួល និងមានឱកាសបង្កើតសហគ្រាសពាណិជ្ជកម្មរបស់ខ្លួនបានយ៉ាងទូលំទូលាយនៅកម្ពុជា ធ្វើឱ្យចំនួនក្រុមហ៊ុនឯកជននានា ទាំងជាតិ និងអន្តជាតិបានកើនឡើងជារៀងរាល់ថ្ងៃ ដែលចរន្តនេះបានធ្វើឱ្យប្រព័ន្ធនៃការធ្វើការ ក៏ដូចជាការដាក់ពាក្យធ្វើការរបស់បុគ្គលិកមានការផ្លាស់ប្តូរទៅតាមនោះដែរ។

អគ្គនាយកក្រុមហ៊ុន Aplus Consulting លោក ស គីណាល់ បានលើកឡើងថា ពាក់ព័ន្ធនឹងការប្រែប្រួលនៃរបៀបក្នុងការដាក់ពាក្យ ក៏ដូចជាចំនួននៃការដាក់ពាក្យ គឺវាពិតជាមាន តែការប្រែប្រួលនោះមានភាពវិជ្ជមាន ឬអវិជ្ជមាន គឺអាស្រ័យលើប្រភេទនៃក្រុមហ៊ុននីមួយ។ នៅពេលបច្ចុប្បន្ននេះ មានក្រុមហ៊ុនខ្លះទទួលបានអ្នកដាក់ពាក្យច្រើន ខណៈក្រុមហ៊ុនមួយចំនួនទៀតខ្វះអ្នកដាក់ពាក្យ ដែលបញ្ហានេះអាចមកពីកត្តាមួយចំនួនដូចជាកត្តាអ្នកដាក់ពាក្យ កត្តាក្រុមហ៊ុន និងកត្តាប្រកួតប្រជែងនៃទីផ្សារការងារជាដើម។

លោក ស គីណាល់ បាននិយាយថា ៖ “នាពេលបច្ចុប្បន្ននេះ បុគ្គលិកខ្លះគាត់ចូលចិត្តដាក់ពាក្យចំកន្លែងដែលគាត់ត្រូវការតែម្តងព្រោះគាត់មិនចង់ដាក់ពាក្យឱ្យតែបានការងារធ្វើសិន ដូចកាលពីមុននោះទេ ហើយពេលខ្លះបុគ្គលិក គឺសម្រុកដាក់ពាក្យលើក្រុមហ៊ុនមួយចំនួនដែលមានការទាក់ទាញខ្លាំង ដែលធ្វើឱ្យក្រុមហ៊ុនមួយចំនួនទៀត ដែលមិនសូវបានធ្វើការផ្សព្វផ្សាយរកផ្នែកធនធានមនុស្សត្រូវខ្វះអ្នកដាក់ពាក្យ។

អ្នកជំនាញធនធានមនុស្សខាងលើបានលើកឡើងផងដែរថា ក្រៅពីការដាក់ពាក្យដោយផ្ទាល់ហើយ អ្នកដាក់ពាក្យធ្វើការងារជាច្រើននាពេលបច្ចុប្បន្ន បានបង្វែរទៅដាក់ពាក្យតាមរយៈក្រុមហ៊ុនធនធានមនុស្សវិញម្តង ព្រោះថា ការដាក់ពាក្យតាមរយៈក្រុមហ៊ុនធនធានមនុស្សមានភាពងាយស្រួល ហើយអាចធ្វើឱ្យគាត់ឆាប់ទទួលបានការងារដែលត្រូវនឹងសមត្ថភាពរបស់គាត់។ មូលហេតុដែលគាត់ចូលចិត្តដាក់ពាក្យបែបនេះគឺទី1 នៅក្រុមហ៊ុនធនធានមនុស្សមានអ្នកជំនាញដែលអាចជួយណែនាំ និងសម្រួលដល់បេក្ខជនមុនពេលដែលឯកសាររបស់គាត់ត្រូវបានបញ្ជូនទៅក្រុមហ៊ុនដែលត្រូវការជ្រើសរើសបុគ្គលិក។

ម្យ៉ាងវិញទៀត នៅពេលដែលអ្នកដាក់ពាក្យគាត់ដាក់ពាក្យដោយខ្លួនឯងទៅក្រុមហ៊ុនដែលគាត់ចង់ធ្វើការ គាត់ត្រូវតែដាក់ពាក្យច្រើនដងដើម្បីបានទៅដល់ច្រើនក្រុមហ៊ុន តែប្រសិនបើគាត់ដាក់ពាក្យតាមក្រុមហ៊ុនធនធានមនុស្សវិញ ក្រុមហ៊ុនគេនឹងជួយដាក់ពាក្យឱ្យគាត់បានដល់ទៅ10 ឬ20ក្រុមហ៊ុនឯណោះក្នុងពេលតែមួយ។

លោក ស គីណាល់ បានបង្ហាញផងដែរថា បើងាកមកកត្តាក្រុមហ៊ុនវិញ គឺមានរឿងសំខាន់ៗចំនួន2 គឺទី1ក្រុមហ៊ុនដែលមិនទាន់គិតគូរពីបរិស្ថាន និងលក្ខខណ្ឌការងារឱ្យបានល្អដើម្បីទាក់ទាញបុគ្គលិក និងទី2 គឺស្ថាប័នដែលមានលក្ខខណ្ឌ និងបរិស្ថានល្អប្រសើរហើយ។ ចំពោះក្រុមហ៊ុនដែលមិនទាន់មានបរិស្ថានល្អ គឺក្រុមហ៊ុនជាលក្ខណៈគ្រួសារ ដែលគួរតែព្យាយាមបង្កើតឱ្យមានបរិស្ថានការងារល្អដើម្បីកសាងកេរ្តិ៍ឈ្មោះ និងដើម្បីឱ្យបុគ្គលិកពេញចិត្តធ្វើការងារជាមុនសិន។

សម្រាប់ក្រុមហ៊ុនដែលមានបរិស្ថានការងារល្អហើយ គាត់ចាំបាច់ត្រូវធ្វើការផ្សព្វផ្សាយឱ្យបានទូលំទូលាយពីលក្ខខណ្ឌល្អប្រសើរដែលគាត់មាន ទៅកាន់សាធារណជនឱ្យបានដឹង ដើម្បីជំរុញចំណាប់អា-រម្មណ៍របស់បុគ្គលិកជំនាញដែលគាត់ត្រូវការឱ្យគេចង់ដាក់ពាក្យធ្វើការងារ។

អ្នកជំនាញរូបនេះ បានសង្កត់ធ្ងន់ផងដែរថា នាពេលបច្ចុប្បន្ននេះក្រុមហ៊ុនស្តង់ដារជាច្រើនចាប់ផ្តើមកើតឡើងនៅកម្ពុជា ហេតុនេះបុគ្គលិកកម្ពុជាក៏បានមើលឃើញពីលក្ខខណ្ឌល្អប្រសើរមួយចំនួនដែលពួកគាត់ចាប់អារម្មណ៍ ហើយនាំគ្នាដាក់ពាក្យច្រើនទៅក្រុមហ៊ុនស្តង់ដារ និងលែងសូវដាក់ពាក្យទៅក្រុមហ៊ុនជាលក្ខណៈគ្រួសារ។ ត្រង់ចំណុចនេះ លោកចង់ឱ្យក្រុមហ៊ុនឯកជននានាគួរព្យាយាមកែសម្រួលខ្លួនឯងឱ្យមានលក្ខខណ្ឌល្អប្រសើរឡើង។

បង្ហាញលើចំណុចនេះដែរ លោក សាន្ត ច័ន្ទកុម្ភៈ នាយកបណ្តុះបណ្តាលនៃវិទ្យាស្ថានហិរញ្ញវត្ថុកម្ពុជា បានលើកឡើងថា នាពេលបច្ចុប្បន្ននេះបុគ្គលិកមួយចំនួនមិនសូវដាក់ពាក្យធ្វើការងារនៅក្នុងក្រុមហ៊ុនមួយចំនួន ដោយសារតែពេលខ្លះគាត់ផ្តោតលើប្រាក់ខែ ខណៈអ្នកខ្លះទៀតផ្តោតលើអាជីពនាពេលអនាគត។

បុគ្គលិកមួយចំនួនធំចាប់អារម្មណ៍ដាក់ពាក្យធ្វើការងារដោយផ្តោតលើប្រាក់ខែ ហេតុនេះស្ថាប័នណាដែលផ្តល់ប្រាក់ខែតិចដល់គាត់ គឺគាត់មិនចង់ដាក់ពាក្យធ្វើនោះទេ តែបុគ្គលិកមិនច្រើនប៉ុន្មាននោះទេដែលធ្វើការងារដើម្បីអនាគតនៃអាជីពច្រើនជាងប្រាក់ខែ តែគាត់ក៏ស្វែងរកស្ថាប័នណាដែលគាត់គិតថាអាចជួយជំរុញគាត់ឱ្យឆ្ពោះទៅរកគោលដៅរបស់គាត់ដែរ។ ហេតុនេះបើចង់ទាក់ទាញបុគ្គលិកធ្វើការងារឱ្យបានច្រើន ម្ចាស់អាជីវកម្មគួរបង្ហាញឱ្យបានច្បាស់លាស់ពីឱកាស និងអ្វីដែលយើងនឹងផ្តល់ឱ្យបុគ្គលិកឱ្យបានច្រើន មិនមែនបង្ហាញតែអ្វីដែលក្រុមហ៊ុនត្រូវការពីបុគ្គលិកនោះទេ។

លោក សាន្ត ច័ន្ទកុម្ភៈ បាននិយាយថា ៖ “បុគ្គលិកមួយចំនួនដែលចូលចិត្តដាក់ពាក្យធ្វើការងារតាមគ្នា មិនដាក់ពាក្យធ្វើការងារដោយផ្ទាល់ទៅក្រុមហ៊ុនដែលកំពុងជ្រើសរើសបុគ្គលិកទេ ដោយសារពេលខ្លះគាត់មិនទុកចិត្តក្រុមហ៊ុនដែលកំពុងប្រកាសនោះទេ ហើយអ្នកខ្លះទៀតគឺគាត់មិនបានដឹងព័ត៌មានច្បាស់លាស់ពីស្ថាប័ន ដែលកំពុងប្រកាសដែលធ្វើឱ្យគាត់ត្រូវស្វែងរកកន្លែងណាដែលគាត់ទុកចិត្ត និងមានអ្នកស្គាល់គ្នាកំពុងធ្វើការនៅទីនោះស្រាប់។

អ្នកគ្រប់គ្រងស្ថាប័នខាងលើ បានលើកឡើងផងដែរថា កេរ្តិ៍ឈ្មោះរបស់ក្រុមហ៊ុនក៏ជាផ្នែកសំខាន់មួយផងដែរ ព្រោះអាចប៉ះពាល់ដល់ការជ្រើសរើសបុគ្គលិក ព្រោះថា នៅពេលដែលក្រុមហ៊ុនមានឈ្មោះល្អ នោះព័ត៌មានល្អៗនឹងបង្កើតជាទំនុកចិត្តដល់មនុស្សទូទៅ ដែលអាចធ្វើឱ្យក្រុមហ៊ុននោះក្លាយជាចំណុចចាប់អារម្មណ៍របស់អ្នកដាក់ពាក្យធ្វើការងារ៕

April 24, 2018

ដំណឹងល្អ! អាមេរិកបន្តកូតានាំចេញទំនិញឱ្យកម្ពុជាទៀតហើយ

ក្នុងការលើកកម្ពស់ជីវភាពពលរដ្ឋខ្មែរ និងសេដ្ឋកិច្ចកម្ពុជាឱ្យកាន់តែប្រសើរឡើង រដ្ឋាភិបាលសហរដ្ឋអាមេរិកបានចុះហត្ថលេខាថ្មីមួយទៀត ដើម្បីបន្តឡើងវិញនៃប្រព័ន្ធអនុគ្រោះពន្ធចាប់ពីថ្ងៃទី1 ខែមករា ឆ្នាំ2018 រហូតដល់ថ្ងៃទី31 ខែធ្នូ ឆ្នាំ2020បន្តទៀត។

លោក Donald Trump ប្រធានាធិបតីសហរដ្ឋអាមេរិក កាលពីថ្ងៃទី23 ខែមិនាកន្លងទៅបានចុះហត្ថលេខាលើច្បាប់មួយដើម្បីបន្តឡើងវិញនូវការផ្តល់ប្រព័ន្ធពន្ធអនុគ្រោះទូទៅ ដែលនឹងចូលជាធរមានចាប់ពីថ្ងៃទី22 ខែមេសា ឆ្នាំ2018 ម្សិលមិញនេះតទៅ ហើយចំពោះអ្នកដែលបាននាំទំនិញចូលទៅសហរដ្ឋអាមេរិក គិតចាប់ពីថ្ងៃទី1 ខែមករា ឆ្នាំ2018 អាចមកស្នើដកប្រាក់ពន្ធដែលបានបង់រួចមកវិញបានតាមការជូនដំណឹងរបស់តំណាងពាណិជ្ជកម្មសហរដ្ឋអាមេរិក (USTR)។

យោងតាមការណែនាំរបស់អង្គភាពគយ និងការពារព្រំដែនសហរដ្ឋអាមេរិកបានបញ្ជាក់ថា រាល់ពាណិជ្ជករទាំងអស់ដែលប្រើ Special Program Indicator(SPI) កូដ (A= All Developing Beneficiary Countries) នឹងត្រូវទទួលប្រាក់ពន្ធដែលបានបង់ត្រឡប់មកវិញដោយស្វ័យប្រវត្តិ។ ដោយឡែកចំពោះពាណិជ្ជករនាំផលិតផលចូលទៅសហរដ្ឋអាមេរិកដែលមិនប្រើ SPI កូដ(A) អាចស្នើពន្ធមកវិញបាន តាមរយៈ US Customs and Border Protection (CBP) ដោយត្រូវដាក់ពាក្យស្នើសុំដោយខ្លួនឯង។

ករណីនេះក្រសួងពាណិជ្ជកម្មបានជំរុញទៅដល់ពាណិជ្ជករនាំផលិតផលចូលទៅកាន់សហរដ្ឋអាមេរិកដែលមានបំណងដាក់ពាក្យស្នើសុំដកប្រាក់បង់ពន្ធត្រឡប់មកវិញតាមរយៈការធ្វើប្រតិសកម្មចំពោះការបន្តឡើងវិញនៃប្រព័ន្ធអនុគ្រោះពន្ធទូទៅ(GSP) ត្រូវចាត់ចែងឱ្យបានមុនថ្ងៃទី19 ខែកញ្ញា 2018នេះ៕

April 24, 2018

ក្រុមហ៊ុនយក្សចិនដាក់ទុនជាង 10លានដុល្លារ កែច្នៃអាហារនាំចេញពីកម្ពុជា

ដោយសម្លឹងឃើញសក្តានុពលនៃវិស័យកសិកម្មនៅកម្ពុជា ក្រុមហ៊ុនដ៏ធំមួយរបស់ចិនបានបោះទុនវិនិយោគក្នុងទឹកប្រាក់ជាង 10លានដុល្លារអាមេរិកដើម្បីសាងសង់រោងចក្រកែច្នៃម្ហូបអាហារសម្រាប់នាំចេញទៅលក់នៅទីផ្សាររបស់ខ្លួន។

ថ្លែងក្នុងពិធីចុះអនុស្សរណៈយោគយល់គ្នាជាមួយក្រសួងកសិកម្ម រុក្ខាប្រមាញ់ និងនេសាទ កាលពីសប្តាហ៍មុន លោក Wong Yung នាយកក្រុមហ៊ុន Tain Jin Trade Free Zone របស់ប្រទេសចិនបានមានប្រសាសន៍ថា ក្រុមហ៊ុននេះបានដាក់ទុនវិនិយោគជាង 10លានដុល្លារអាមេរិកដើម្បីសាងសង់ហេដ្ឋារចនាសម័ន្ធរោងចក្រ ដូចជាបន្ទប់ក្លាស្សេ និងបង្កកផលិតផល (បន្លែ ផ្លែឈើ ត្រី សាច់) បន្ទប់កែច្នៃឃ្លាំងស្តុក អគាររដ្ឋបាល និងហាងសម្រាប់ជួល និងលក់ផលិតផលបោះដុំលើផ្ទៃដី4ហិកតា ស្ថិតនៅក្នុងសង្កាត់ក្រាំងធ្នុង ខណ្ឌសែនសុខ រាជធានីភ្នំពេញ។

លោកមានប្រសាសន៍ថា ក្នុងជំនួបដំបូងនេះ គឺក្រុមហ៊ុនចង់សិក្សាឱ្យបានស៊ីជម្រៅពីយន្តការនៃការនាំចេញកសិផលកម្ពុជាទៅកាន់ប្រទេសចិនថា តើមានលក្ខណៈងាយស្រួល រលូន និងលឿនយ៉ាងណា និងធ្វើយ៉ាងណាដើម្បីឆ្លើយតបឱ្យបានសមស្របទៅនឹងសេចក្តីត្រូវការរបស់ទីផ្សារប្រទេសចិន គឺទាំងបរិមាណ គុណភាព សុវត្ថិភាព ពេលវេលានិងតម្លៃ ដែលទាំងអស់នេះហើយ គឺជាដើមហេតុដែលក្រុមហ៊ុន Tain Jin Trade Free Zone មានបំណងសហការជាមួយក្រុមហ៊ុន Hun Ty ដើម្បីសហការវិនិយោគឱ្យកាន់តែបានឆាប់រហ័ស និងមានសក្តានុពលកាន់តែខ្លាំងឡើងក្នុងការនាំបន្លែត្រីសាច់ពីកម្ពុជានៅកាន់ទីផ្សារប្រទេសចិន។

លោក Wong Yung មានប្រសាសន៍បញ្ជាក់បន្ថែមថា “ប្រទេសកម្ពុជាមានសក្តានុពលលើវិស័យកសិកម្ម ហើយបច្ចុប្បន្នប្រទេសចិនកំពុងតែមានបញ្ហាពាណិជ្ជកម្មជាមួយសហរដ្ឋអាមេរិក ដែលនេះជាឱកាសមាសរបស់កម្ពុជាដើម្បីពង្រឹង និងពង្រីកទីផ្សារកសិផលជាមួយមហាមិត្តចិន។ ឆ្លៀតក្នុងឱកាសនេះក្រុមហ៊ុនមានបំណងធ្វើការវិនិយោគដោយបង្កើតជាសួនឧស្សាហកម្មកែច្នៃផលិតផលកសិកម្មនៅឯខេត្តព្រះសីហនុដើម្បីប្រមូលទិញកសិផលរបស់កសិករខ្មែរសម្រាប់កែច្នៃ និងនាំចេញដើម្បីបំពេញតម្រូវការទីផ្សាររបស់ប្រទេសចិនដោយត្រង់ ពិសេសផលិតផលត្រី អង្ករ និងផ្លែស្វាយជាដើម ដោយលោករំពឹង និងជឿជាក់ថា តាមរយៈការដោះដូរផលិតផលកសិកម្មរវាងប្រទេសទាំងពីរនឹងធ្វើឱ្យកិច្ចសហប្រតិបត្តិការចំណងសាមគ្គីភាព និងមិត្តភាពជាប្រពៃណីដ៏យូរលង់រវាងប្រទេសទាំងពីរកាន់តែត្រូវបានពង្រឹង និងពង្រីកបានយ៉ាងល្អប្រសើរ ហើយក៏ជាផ្នែកមួយក្នុងការលើកកម្ពស់កសិកម្មរបស់កសិករកម្ពុជាផងដែរ។

ឯកឧត្តម វេង សាខុន បានសម្តែងការកោតសរសើរចំពោះក្រុមហ៊ុនដែលបានជ្រើសរើសយកប្រទេសកម្ពុជាធ្វើជាដៃគូវិនិយោគលើវិស័យកសិកម្ម ពិសេសការកែច្នៃកសិផលសម្រាប់នាំចេញដែលនេះជាគន្លឹះមួយយ៉ាងសំខាន់ក្នុងការនាំផលិតផលកសិកម្មកម្ពុជាទៅកាន់ទីផ្សារចិន សមស្របតាមគោលនយោបាយរបស់រាជរដ្ឋាភិបាលក្នុងការជំរុញការកែច្នៃកសិផលឱ្យអស់ពីលទ្ធភាព។

ឯកឧត្តមក៏បានលើកឡើងដែរថា “ពីមុនកម្ពុជាជាប្រទេសផលិតផលិតផលកសិកម្មដើម្បីតែផ្គត់ផ្គង់សន្តិសុខស្បៀងក្នុងប្រទេសប៉ុណ្ណោះ ប៉ុន្តែនាពេលបច្ចុប្បន្ន កម្ពុជាត្រូវការផលិតដើម្បីធ្វើការកែច្នៃក្នុងស្រុករួចនាំចេញ។ នេះជាចលករដ៏សំខាន់មួយសម្រាប់ការនាំចេញ ដែលអាចជួយជំរុញកំណើនសេដ្ឋកិច្ចជាតិយ៉ាងល្អប្រសើរ ពិសេសចំណូលក្នុងគ្រួសារ ការកាត់បន្ថយភាពក្រីក្រ និងការធ្វើចំណាកស្រុក ហើយក៏ជាឆន្ទៈដ៏ចាំបាច់មួយរបស់រាជរដ្ឋាភិបាលដែលត្រូវធ្វើយ៉ាងណាឱ្យកម្ពុជាក្លាយជាប្រទេសមានចំណូលមធ្យមកម្រិតខ្ពស់នៅក្នុងឆ្នាំ2030។

លោក សម វិទូ នាយកប្រតិបត្តិអង្គការសេដាកមានប្រសាសន៍គាំទ្រលើគម្រោងវិនិយោគរបស់ក្រុមហ៊ុនខាងលើដែលជាចំណែកមួយដ៏សំខាន់ក្នុងការពង្រីកការដាំដុះ និងលើកកម្ពស់ផលិតផលកសិកផលកម្ពុជាក្នុងការនាំចេញទៅកាន់ទីផ្សារក្រៅប្រទេស។ លោកបញ្ជាក់បន្ថែមថា “ទោះជាក្រុមហ៊ុនទទួលបានដីសម្បទានពីរដ្ឋក៏ដោយ ក៏អាចផ្តល់ការងារដល់ពលរដ្ឋខ្មែរបានដែរ ប៉ុន្តែបើសិនជាក្រុមហ៊ុនសហការជាមួយកសិករទិញផលិតផលកសិកម្មពីកសិករវិញនោះ នឹងជួយឱ្យសេដ្ឋកិច្ចគ្រួសារកសិករកាន់តែប្រសើរថែមទៀត។

ករណីនេះលោកបានស្នើដល់មន្ត្រីជំនាញរដ្ឋាភិបាលឱ្យបង្កើតសហគមន៍ចងក្រងបណ្តុំកសិករឱ្យបានកាន់តែច្រើន សម្រាប់ពង្រីកការដាំដុះ និងចិញ្ចឹមសត្វផ្សេងៗប្រកបដោយសក្តានុពលក្នុងការផ្គត់ផ្គង់ឱ្យបានប្រសើរទៅដល់ក្រុមហ៊ុន។

យ៉ាងណាក៏ដោយលោកបានបញ្ជាក់ថា សម្រាប់ខេត្តព្រះសីហនុគឺមានសក្តានុពលខ្លាំងទៅលើដំណាំកសិកម្មស្រូវតែប៉ុណ្ណោះ ពិសេសនៅក្នុងខណ្ឌព្រៃនប់ ហើយបើក្រុមហ៊ុនចង់បានកសិផលបន្លែ ផ្លែ ឈើ និងត្រីសាច់ផ្សេងៗគួរសហការជាមួយកសិករក្នុងខេត្តកំពតថែមទៀត៕

April 23, 2018

ជប៉ុនសន្យាកៀងគរអ្នកវិនិយោគរបស់ខ្លួនមកកម្ពុជាឱ្យកាន់តែច្រើន

ដោយមើលឃើញពីសក្តានុពលវិនិយោគនៅកម្ពុជា ពិសេសការលើកលែងពន្ធក្នុងការនាំទំនិញចេញទៅទីផ្សារក្រៅប្រទេស អង្គការ JETRO ជប៉ុនដែលដើរតួជាអ្នកសម្របសម្រួលការងារសម្រាប់អ្នកវិនិយោគរបស់ខ្លួនទៅបណ្តាក់ទុននៅប្រទេសផ្សេងៗបានសន្យាថានឹងនាំអ្នកវិនិយោគជប៉ុនមកកម្ពុជាឱ្យកាន់តែច្រើនថែមទៀត។

ក្នុងជំនួបពិភាក្សាការងារជាមួយឯកឧត្ដមបណ្ឌិតសភាចារ្យ អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកាលពីសប្តាហ៍មុននេះ លោក Masashi KANO ប្រធានតំណាងអង្គការពាណិជ្ជកម្មក្រៅស្រុកជប៉ុនប្រចាំនៅកម្ពុជាបានបញ្ជាក់ថា បច្ចុប្បន្នមានវិនិយោគិនជប៉ុនថ្មីៗមួយចំនួនបាននឹងកំពុងពិភាក្សាលម្អិតជាមួយអង្គការ JETRO ប្រចាំនៅកម្ពុជាអំពីឱកាសវិនិយោគនៅកម្ពុជា ហើយលោកសន្យាថា នឹងព្យាយាមពន្យល់ផ្សព្វផ្សាយ អំពីឱកាសវិនិយោគនៅកម្ពុជាដើម្បីទាក់ទាញវិនិយោគិនជប៉ុនទាំងនោះឱ្យមកបណ្តាក់ទុននៅកម្ពុជាឱ្យកាន់តែច្រើននិងប្រកបដោយភាពជឿជាក់។

លោកបានបន្ថែមថា “ទឡ្ហីករណ៍ទាំងនេះ បានជំរុញលំហូរវិនិយោគពីក្រៅប្រទេសមកកម្ពុជានឹងបានរុញសេដ្ឋកិច្ចកម្ពុជាឱ្យកាន់តែមានសម្ទុះខ្លាំងក្លាថែមទៀត។ លោក Masashi KANO ប្រធានតំណាងអង្គការពាណិជ្ជកម្មក្រៅ ស្រុក ជប៉ុន លើកឡើងបន្តថា វិនិយោគិនជប៉ុនបានចាត់ទុកប្រទេសកម្ពុជាជាប្រទេសដែលមានទីផ្សារបើកចំហខ្លាំង និងមានបរិយាកាសវិនិយោគអំណោយផលច្រើន ដែលជាកត្តាជំរុញ និងលើកទឹកចិត្តវិនិយោគិន បរទេសទាំងអស់មិនថាតែជប៉ុនឱ្យមកបណ្តាក់ទុនបន្ថែមនៅកម្ពុជា។

ក្នុងជំនួបនោះដែរ ឯកឧត្តមបណ្ឌិតសភាចារ្យអូន ព័ន្ធមុនីរ័ត្ន បានសម្តែងនូវការស្វាគមន៍ និងកោតសរសើរចំពោះលោក Masashi KANO ដែលបានខិតខំប្រឹងប្រែងទាំងកម្លាំងកាយ និងកម្លាំងចិត្តក្នុងការជួយទាក់ទាញវិនិយោគិនដែលមានសក្តានុពលខ្ពស់របស់ជប៉ុនឱ្យមកបណ្តាក់ទុនជាបន្តបន្ទាប់នៅកម្ពុជា។ ឯកឧត្តមបណ្ឌិតសភាចារ្យបានបញ្ជាក់ថា ដើម្បីទាក់ទាញវិនិយោគិនបរទេសឱ្យកាន់តែមានទំនុកចិត្តមកបណ្តាក់ទុននៅកម្ពុជាបន្ថែមលើគោលនយោបាយនៃការអនុគ្រោះ និងគាំពារវិនិយោគពីបរទេសដែលកំពុងអនុវត្តក្នុងពេលបច្ចុប្បន្ន។

បច្ចុប្បន្ន កម្ពុជាបាននិងកំពុងខិតខំកែទម្រង់ និងរៀបចំនូវបរិយាកាសធុរកិច្ចអំណោយផល ចំពោះវិនិយោគគិនបរទេសទាំងអស់ រួមមានការលើកទឹកចិត្តបន្ថែមទៀត និងបង្កលក្ខណៈ ឱ្យវិនិយោគិនបរទេសគ្រប់រូបឱ្យមកបណ្តាក់ទុននៅកម្ពុជាប្រកបដោយភាពទុកចិត្ត និងមានសុវត្ថិភាពស្របពេលដែលប្រទេសកម្ពុជា កំពុងមានសុខសន្តិភាពពេញលេញ។

សូមបញ្ជាក់ថា ប្រធានតំណាង អង្គការពាណិជ្ជកម្មក្រៅស្រុកជប៉ុន JETRO គឺជា អង្គភាពមួយស្ថិតក្រោមចំណុះក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន ដែលត្រូវបានបង្កើតឡើងក្នុងឆ្នាំ1958។ អង្គការ JETRO មានបណ្តាញការិយាល័យចំនួន74 នៅក្នុងប្រទេសចំនួន55លើពិភពលោក និងមានការិយាល័យចំនួន44 នៅក្នុងប្រទេសជប៉ុន។

តាមរយៈបណ្តាញរបស់ខ្លួនដែលមាននៅស្ទើរតែពាសពេញពិភពលោក អង្គការ JETRO បានចូលរួមចំណែកក្នុងការពង្រីកពាណិជ្ជកម្ម និងការវិនិយោគរវាងប្រទេសជប៉ុន និងប្រទេសដទៃទៀតនៅលើសកលលោក។

គួរបញ្ជាក់ផងដែរថា ការិយាល័យ JETRO នៅព្រះរាជាណាចក្រកម្ពុជា ត្រូវបានបង្កើតឡើងនៅក្នុងឆ្នាំ2010 ដែលបានធ្វើការសម្របសម្រួល និងទាក់ទាញក្រុមហ៊ុនដែលមានសក្តានុពលខ្ពស់របស់ជប៉ុនមួយចំនួនដូចជាក្រុមហ៊ុន Mineabea ដែលបានផ្តល់ការងារដល់ពលរដ្ឋជាច្រើនរយនាក់ ស្ថិតក្នុងតំបន់សេដ្ឋកិច្ចពិសេសក្រុងភ្នំពេញ និងការបើកដំណើរការផ្សារទំនើបខ្នាតយក្ស AEON ឱ្យមកបណ្តាក់ទុននៅកម្ពុជាជាបន្តបន្ទាប់។

បច្ចុប្បន្នក្រុមហ៊ុនទាំងពីរ កំពុងដំណើការផលិតទំនិញ និងដាក់លក់ទំនិញសម្បូរបែប ដែលជាផ្នែកមួយជួយដល់កំណើនសេដ្ឋកិច្ចជាតិ និងផ្តល់ការងារដល់ពលរដ្ឋខ្មែរ បានច្រើនពាន់នាក់។

គួរបញ្ជាក់ផងដែរ ក្រៅពីជំរុញឱ្យអ្នកវិនិយោគចូលមកបណ្តាក់ទុនវិនិយោគនៅកម្ពុជា រដ្ឋាភិបាលជប៉ុនក៏បានផ្តល់ឱកាសដល់ពលរដ្ឋខ្មែរ ឱ្យទៅធ្វើការនៅប្រទេសខ្លួន ដើម្បីឱ្យពួកគេអាចមានឱកាសធ្វើការបានប្រាក់ខែខ្ពស់សម្រាប់ជួយសេដ្ឋកិច្ចគ្រួសារខ្លួន ឱ្យកាន់តែប្រសើរឡើងផងដែរ៕

April 23, 2018

Author: វល័ក្ខ