វល័ក្ខ - La Reine Media

Apple សារភាពថា iPhone 7 និង 7 Plus ពិតជាមានបញ្ហាសំឡេងមែន

ក្រុមហ៊ុនបច្ចេកវិទ្យាដ៏ធំ និងល្បីល្បាញរបស់អាមេរិក Apple បានសារភាពថា iPhone 7 និង 7 Plus មួយចំនួនពិតជាកើតមានបញ្ហាសំឡេងនៅពេលកំពុងនិយាយ (Call) ពិតប្រាកដមែន ដែលបញ្ហានេះបានកើតមានឡើងដោយសារតែការប្រើ iOS11.3 ឬទាបជាងនេះ។

ការចេញមុខសារភាពនេះត្រូវបានធ្វើឡើងបន្ទាប់ពីសារព័ត៌មាន MacRumors បានចុះផ្សាយថា មានអ្នកប្រើប្រាស់ iPhone 7 និង 7 Plus មួយចំនួន កើតមានបញ្ហាសំឡេងនៅពេលសន្ទនា ទាំងការហៅជាសំឡេង ការហៅជាវីដេអូ ឬប្រើមុខងារ FaceTime ក្ដី។

ក្រុមហ៊ុន Apple បានណែនាំឱ្យអ្នកប្រើប្រាស់ដែលជួបបញ្ហាខាងលើនេះធ្វើការបិទចោលមុខងារ Bluetooth និងផ្ដាច់ចោលនូវការភ្ជាប់ជាមួយឧបករណ៍ផ្សេងៗ ដែលនេះជាដំណោះស្រាយដំបូង។

ប្រសិនបើនៅតែមិនអាចដោះស្រាយបានទៀត ក្រុមហ៊ុន Apple បានស្នើដល់អ្នកប្រើប្រាស់ទាំងអស់ឱ្យទៅកាន់ Apple Store ឬ Apple Care ដែលនៅជិតបំផុតដើម្បីឱ្យខាងបុគ្គលិកជំនាញដោះស្រាយជូន។

បើទោះបីជា Apple បានចេញមុខសារភាពក្ដី ប៉ុន្តែក្រុមហ៊ុនដ៏ធំមួយនេះមិនបានបង្ហើបឱ្យដឹងពីមូលហេតុដែលបង្កឱ្យមានបញ្ហានេះឡើយ ខណៈដែលអ្នកប្រើប្រាស់ជាច្រើនកំពុងរង់ចាំចម្លើយ៕

May 7, 2018

ការសិក្សាពេញមួយជីវិតជាចំណែកយ៉ាងសំខាន់សម្រាប់អភិវឌ្ឍខ្លួនឯង និងប្រទេសទាំងមូល

បើគិតពីសេដ្ឋកិច្ច កម្ពុជាជាប្រទេសដែលមានសក្តានុពលផ្នែកទីតាំងភូមិសាស្ត្រ និងលក្ខខណ្ឌធនធានមនុស្ស ព្រោះប្រទេសនេះស្ថិតនៅចំកណ្តាលនៃតំបន់អាស៊ានដែលមានប្រជាជនវ័យក្រោម 30ឆ្នាំចំនួន 2/3 ហើយប្រជាជនសកម្មមានដល់ទៅជាង 10លាននាក់ (ស្ថិតិរបស់គោលនយោបាយជាតិស្តីពី ការអប់រំបណ្តុះបណ្តាលបច្ចេកទេស និងវិជ្ជាជីវៈឆ្នាំ2017-2025)។ កត្តានេះជាចំណុចខ្លាំងដែលអ្នកវិនិយោគបរទេសសម្លឹងឃើញ ហើយក៏ចាប់អារម្មណ៍ខ្លាំងក្នុងការបណ្តាក់ទុនរកស៊ី តែទោះជាយ៉ាងនេះក្តី ក៏គេមើលឃើញថា កត្តាអប់រំគឺជាកត្តាប្រឈមមួយដែលធ្វើឱ្យធនធានមនុស្សដ៏ច្រើននេះមិនអាចបញ្ចេញអស់សមត្ថភាពក្នុងការបម្រើការងារ។

ថ្មីៗនេះក្រសួងអប់រំ យុវជន និងកីឡា បានសហការជាមួយនឹងអង្គការយូណេស្កូរៀបចំឱ្យមានសេចក្តីព្រាងគោលនយោបាយជាតិស្តីពីការសិក្សាពេញមួយជីវិត ដែលវាអាចនឹងផ្តល់ឱកាសល្អសម្រាប់ជាជំនួយដល់ប្រជាជនទូទៅឱ្យទទួលបានការសិក្សាលើជំនាញដែលសង្គមកំពុងត្រូវការ ដូចជាបច្ចេកវិទ្យា ជំនាញបច្ចេកទេស និងជំនាញសំខាន់ៗជាច្រើនផ្សេងទៀត។

រដ្ឋលេខាធិការក្រសួង អប់រំ យុវជន និងកីឡា ឯកឧត្តម ណាត ប៊ុនរឿន បានលើកឡើងថា គម្រោងរៀបចំគោលនយោបាយជាតិ ស្តីពីការសិក្សាពេញមួយជិវិតនេះមានសារៈសំខាន់ខ្លាំងណាស់សម្រាប់ប្រជាជនកម្ពុជា និងប្រទេសកម្ពុជាទាំងមូល ព្រោះវាជាផែនទីបង្ហាញផ្លូវមួយក្នុងការអភិវឌ្ឍវិស័យធនធានមនុស្សដែលជាផ្នែកដ៏មានសក្តានុពល ឬជាឆ្អឹងខ្នងនៃការអភិវឌ្ឍនៅកម្ពុជា។

កិច្ចប្រជុំពិគ្រោះយោបល់មួយដែលរៀបចំដោយក្រសួងអប់រំ យុវជន និងកីឡា

ឯកឧត្តម ណាត ប៊ុនរឿន បានមានប្រសាសន៍ថា ៖ “ដើម្បីសម្រេចលើគោលដៅដ៏មានសារៈសំខាន់នេះ គឺទាមទារឱ្យតំណាងក្រសួង ស្ថាប័ន និងដៃគូអភិវឌ្ឍន៍នានា ជួយពិនិត្យប្រឹក្សាយោបល់ឱ្យបានល្អិតល្អន់ ដើម្បីដាក់គំនិតយោបល់ និងទស្សនៈល្អៗទៅក្នុងគោលនយោបាយជាតិស្តីពីការសិក្សាពេញមួយជីវិតនេះឱ្យឆ្លើយតបបានជាមូលដ្ឋានសម្រាប់ការអភិវឌ្ឍសង្គម សេដ្ឋកិច្ចជាតិក៏ដូចជាការសម្រេចនូវគោលដៅអភិវឌ្ឍន៍ប្រកបដោយចីរភាពឆ្នាំ2030 ដូច្នោះដែរ។

បើតាមឯកឧត្តមរដ្ឋលេខាធិការ ការកសាងធនធានមនុស្សនៅកម្ពុជាមានសារៈសំខាន់ខ្លាំងណាស់សម្រាប់សេដ្ឋកិច្ចកម្ពុជា ព្រោះការអភិវឌ្ឍមូលធនមនុស្សជាផ្នែកយ៉ាងសំខាន់មួយដែលទ្រទ្រង់ដល់ការអភិវឌ្ឍសេដ្ឋកិច្ចជាតិ និងជំរុញឱ្យប្រទេសកម្ពុជាអាចសម្រេចនូវគោលដៅរបស់ខ្លួនក្នុងការប្រែក្លាយពីប្រទេសមានចំណូលមធ្យមកម្រិតទាប ទៅជាប្រទេសដែលមានចំណូលមធ្យមកម្រិតខ្ពស់។ លើសពីនេះទៅទៀត ការកសាងចំណេះដឹងរបស់ប្រជាជនជាផ្នែកមួយមិនអាចខ្វះបានដែលអាចជំរុញឱ្យប្រជាជនទាំងអស់មានសមត្ថភាពប្រកួតប្រជែងខ្ពស់ក្នុងទីផ្សារការងារដែលពោរពេញដោយការប្រកួតប្រជែង និងទាមទារភាពច្នៃប្រឌិតខ្ពស់។

អនុប្រធានគណៈកម្មការខ្លឹមសារនៃគោលនយោបាយជាតិស្តីពីការសិក្សាពេញមួយជីវិត លោកកួច គូលំអ បានលើកឡើងថា គោលនយោបាយនេះមានសារៈសំខាន់ខ្លាំងណាស់សម្រាប់កម្ពុជា ព្រោះវាគ្របដណ្តប់លើមនុស្សគ្រប់វ័យចាប់តាំងពីកុមារចាប់កំណើតរហូតដល់ស្លាប់ទៅវិញ។ យើងចង់ឱ្យប្រជាជនរៀនពេញមួយជីវិត ដោយការជំរុញឱ្យយុវជនយើងក្លាយជាអ្នកមានជំនាញច្បាស់លាស់ មានគុណធម៌ និងធ្វើឱ្យពួកគាត់ក្លាយជាពលរដ្ឋសកលស្របតាមតម្រូវការសង្គម និងនិន្នាការវិវឌ្ឍន៍របស់ពិភពលោក។

លោក កួច គូលំអ បាននិយាយថា ៖ “ចំណុចសំខាន់ដែលគម្រោងនេះមានផងដែរនោះគឺធ្វើយ៉ាងណាឱ្យប្រជាជនកម្ពុជាមានសមត្ថភាពឆ្លើយតបជាមួយនឹងបរិបទ ទីផ្សារការងារដើម្បីលើកកម្ពស់គុណភាពជីវិតក្នុងការរស់នៅ។

គួរបញ្ជាក់ផងដែរថា ថ្មីៗនេះក្រសួងអប់រំដែលជាផ្នែកយ៉ាងសំខាន់ក្នុងការជំរុញប្រទេសកម្ពុជាឱ្យសម្រេចគោលដៅរបស់ខ្លួននៅក្នុងឆ្នាំ 2030ដែលក្នុងនោះ ស្ថាប័នមួយនេះបានបង្កើតនូវផែនការសកម្មភាពជាច្រើនដែលមានដូចជា ការពង្រឹង គុណភាពផ្នែកវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ការបង្កើតផែនការអភិវឌ្ឍន៍ និងគ្រប់គ្រងធនធានមនុស្សនៅកម្រិតមធ្យមសិក្សាសម្រាប់បម្រើដល់គោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ 2015 – 2025 និងផែនការសកម្មភាពសំខាន់ៗជាច្រើនទៀតផងដែរ៕

May 7, 2018

សមាគម និងមន្ត្រីនិយាយខុសគ្នាពីបញ្ហាជ្រូកនាំចូល

ការនាំជ្រូកចូលពីប្រទេសជិតខាង (ប្រទេសថៃ និងវៀតណាម)មកកម្ពុជាបានក្លាយជាប្រធានបទមួយដែលធ្វើឱ្យសមាគមអ្នកចិញ្ចឹមសត្វកម្ពុជា (CLRA)បានសម្តែងនូវក្តីព្រួយបារម្ភ និងបានស្នើសុំទៅក្រសួងកសិកម្មឱ្យជួយចាត់វិធានការដោះស្រាយលើបញ្ហានេះ។

លោកបណ្ឌិត សេន សុវណ្ណ ប្រតិភូរាជរដ្ឋាភិបាលទទួលបន្ទុកអគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្ម រុក្ខាប្រមាញ់ និងនេសាទបានផ្តល់បទសម្ភាសថា៖ “សម្រាប់បញ្ហានេះនាយកដ្ឋានធ្លាប់បានជួបប្រជុំជាមួយសមាគមនេះដោយបានពន្យល់ពីគោលការណ៍អង្គការពាណិជ្ជកម្មពិភពលោក និងគោលនយោបាយរដ្ឋាភិបាលពេលបច្ចុប្បន្នទៅគាត់ឱ្យយល់ពីបញ្ហានេះរួចហើយ។

លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា (CLRA) បានបញ្ជាក់ប្រាប់តាមទូរស័ព្ទថាបញ្ហានាំជ្រូកចូលនេះសមាគមចង់ឱ្យក្រសួងទប់ស្កាត់ការនាំចូលដ៏គំហុកនេះ ព្រោះវាធ្វើឱ្យមានបញ្ហាដល់កសិករដែលចិញ្ចឹមជ្រូកនៅកម្ពុជា។

លោកបានឱ្យដឹងថា តម្លៃបានធ្លាក់ចុះ និងការបង្ខំលក់ចេញជ្រូករស់របស់កសិករក្នុងស្រុក ដោយសារពួកឈ្មួញសម្រុកនាំជ្រូករស់ពីប្រទេសវៀតណាមចូលមកក្នុងមួយថ្ងៃប្រហែលជាង3,000ក្បាល(បើតាមលោករដ្ឋមន្ត្រីកសិកម្មថា ការនាំចូលមានត្រឹមតែជាង 1,000ក្បាលប៉ុណ្ណោះ)។

លោកបានបញ្ជាក់ថា៖ “តម្លៃជ្រូករស់ដែលឈ្មួញលក់ចេញក្នុងទីផ្សារកម្ពុជាមានតម្លៃ 7,500រៀល ទៅ8,000រៀលទាបជាងតម្លៃជ្រូកក្នុងស្រុក ខណៈអាជីវករអ្នកកាប់ជ្រូកវិញចូលចិត្តទិញជ្រូកមកពីវៀតណាមជាងជ្រូកចិញ្ចឹមក្នុងស្រុក ដោយសារទទួលបានប្រាក់ចំណេញច្រើនជាង។ ពោលគឺថ្លៃដើមជ្រូករស់ក្នុងស្រុករបស់កសិករមានតម្លៃរហូតដល់ 8,000រៀលរួចទៅហើយដែលតម្លៃនេះវាស្មើ ឬខ្ពស់ជាងតម្លៃជ្រូកដែលនាំចូលពីប្រទេសវៀតណាម។

លោកបណ្ឌិត សេន សុវណ្ណ បានឱ្យដឹងដែរថារដ្ឋាភិបាលមានទិសដៅច្បាស់លាស់ យើងកំពុងតែធ្វើឱ្យសាច់ជ្រូកចុះថ្លៃជាបណ្តើរ។ កាលពីឆ្នាំមុនសាច់ជ្រូកមួយគីឡូថ្លៃ 18,000រៀល ឥឡូវមួយគីឡូថ្លៃត្រឹមតែ 15,000រៀលទេ ហើយមានគុណភាពទៀត នេះគឺជាប្រសិទ្ធភាពនៃការចាត់វិធានការ។ លោកបានបន្តថា ការដែលសមាគមមួយបានសម្ដែងការព្រួយបារម្ភក្នុងការចិញ្ចឹមជ្រូក ជារឿងរបស់គាត់ដែលចង់ឱ្យរដ្ឋជួយ តែខាងរដ្ឋាភិបាលក៏មាននាយកដ្ឋានដែលទទួលការងារនេះ ដូចជាបណ្ដុះបណ្តាលក្នុងការចិញ្ចឹមថែទាំជាប្រចាំតាមបទដ្ឋានបច្ចេកទេសផងដែរ។ លោកបណ្ឌិតបញ្ជាក់ថា បើតាមតួលេខការចិញ្ចឹមជ្រូកឆ្នាំនេះគឺមានកំណើន 3.5ភាគរយក្នុងចំណោមសត្វចិញ្ចឹមដទៃដែលមានកំណើនដូចគ្នា។

ឯលោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាវិញបានឱ្យដឹងថា ការដែលសមាគមចង់ឱ្យក្រសួងមានវិធានការទប់ស្កាត់ការនាំចូលសត្វជ្រូកនេះ គឺវាអាចជួយកសិករមិនឱ្យបាត់បង់មុខរបរ និងកសិដ្ឋាន ឬបោះបង់ការចិញ្ចឹមជ្រូកដែលជាមុខរបរជួយផ្គត់ផ្គង់ជីវភាពរបស់ពួកគាត់។ លោកមិនមែនចង់ឱ្យរដ្ឋាភិបាលបិទការនាំចូលជ្រូកនោះទេ ព្រោះការផ្គត់ផ្គង់ជ្រូកក្នុងស្រុកនៅមិនទាន់បំពេញតម្រូវការគ្រប់នៅឡើយទេ។

លោកបានឱ្យដឹងបន្ថែមទៀតថា ការផ្គត់ផ្គង់ក្នុងស្រុកមានត្រឹមតែប្រមាណ70ភាគរយទេ ដូច្នេះយើងចង់ឱ្យក្រសួងកសិកម្មកំណត់ថា តើត្រូវនាំចូលជ្រូកចំនួនប៉ុន្មានក្បាលដើម្បីបំពេញបង្គ្រប់លើចំនួន20 ទៅ30ភាគរយដែលយើងត្រូវការនោះ ប៉ុន្តែការនាំចូលបច្ចុប្បន្ន វាច្រើនរហូតដល់ទៅ50 ទៅ60ភាគរយឯណោះ។

ដូច្នេះរដ្ឋាភិបាលដែលមានក្រសួងកសិកម្មជាសេនាធិការនោះត្រូវតែធ្វើឱ្យមានតម្លាភាពក្នុងការនាំចូលជ្រូក និងកំណត់បរិមាណនាំចូល មិនអាចបើកទូលាយធ្វើឱ្យស្លាប់ទីផ្សារអ្នកចិញ្ចឹមជ្រូកក្នុងស្រុកនោះទេ។ មិនតែប៉ុណ្ណោះបរិមាណជ្រូកពីវៀតណាមចូលទីផ្សារកម្ពុជាថែមទាំងហាក់ដូចជាពិបាកគ្រប់គ្រងទៀតផង ដោយសារតែការនាំចូលតាមច្រករបៀងដែលជាច្រកនាំចូលពីវៀតណាមមកកម្ពុជានោះមានច្រើនពេក។

លោកបណ្ឌិត សេន សុវណ្ណ ប្រតិភូរាជរដ្ឋាភិបាលទទួលបន្ទុកអគ្គនាយកដ្ឋានសុខភាពសត្វ បានបញ្ជាក់មកវិញដែរថា ចំពោះបញ្ហាកសិដ្ឋានមួយចំនួនដែលត្រូវបិទនោះ ឯកឧត្តមរដ្ឋមន្ត្រីកសិកម្មក៏បានបញ្ជាក់ហើយថា“កសិដ្ឋានខ្លះពុំមានការចិញ្ចឹមតាមបទដ្ឋានបច្ចេកទេសត្រឹមត្រូវ ទើបត្រូវដួលរលំដោយខ្លួនឯង។ ស្រុកណាក៏គេនាំចូលដែរ វាជាការធ្វើពាណិជ្ជកម្ម កម្ពុជាកំពុងតែរីកចម្រើនបែរជាចង់ឱ្យកម្ពុជាដើរផ្លូវខុស រឿងនេះថៃក៏ចង់ដកកូតាក្នុងការធ្វើពាណិជ្ជកម្មដែរ ដោយសារចង់បិទការនាំជ្រូកពីប្រទេសគេគឺដោយសារតែសម្តីសមាគម។ ដូច្នេះរឿងអ្វីក៏ដោយគេត្រូវសិក្សាឱ្យបានច្បាស់លាស់សិន ព័ត៌មានអ្វីក៏ដោយត្រូវតែឆ្លុះបញ្ចាំងនូវការពិតផង។

ជាការពិត ដើម្បីស្តារបញ្ហាតម្លៃជ្រូកនេះឱ្យល្អឡើងវិញ កសិករត្រូវតែសិក្សាលើថ្លៃដើមនៃការចិញ្ចឹមជ្រូក ព្រោះការផលិតរបស់យើងនៅប្រើដើមទុនខ្ពស់ មិនអាចប្រកូតប្រជែងជាមួយប្រទេសក្បែរខាងបានទេ។ ដោយសារតែកសិករខ្មែរយើងនៅពិបាកក្នុងការធ្វើឱ្យថ្លៃដើមធ្លាក់ចុះទាបបាន ព្រោះតម្លៃទឹក-ភ្លើង និងសេវាដឹកជញ្ចូនក្នុងស្រុកមានតម្លៃខ្ពស់ពេកបើធៀបនឹងប្រទេសជិតខាងកម្ពុជា៕

May 6, 2018

កាសែតឡារ៉ែន ពាណិជ្ជ លេខ 125

[easy_media_download url=”https://www.lareine.com.kh/wp-content/uploads/2018/05/LRPN_125-Final-For-Web.pdf” force_dl=”1″]

May 5, 2018

ការលក់ស្មាតហ្វូននៅក្នុងប្រទេសចិនធ្លាក់ចុះ 21% នៅត្រីមាសដើមឆ្នាំ2018

យោងតាមរបាយការណ៍ថ្មីមួយបានឱ្យដឹងថា ការលក់ស្មាតហ្វូននៅក្នុងទីផ្សារប្រទេសចិននៅត្រីមាសទី1 ដើមឆ្នាំ2018 បានធ្លាក់ចុះខ្លាំងដែលនាំឱ្យ Apple បាត់បង់តំណែងលេខ4 មកនៅលេខ5។ នេះបើយោងតាមការចេញផ្សាយរបស់សារព័ត៌មាន CNBC។

របាយការណ៍ស្រាវជ្រាវរបស់ក្រុមហ៊ុនវិភាគឯករាជ្យ Canalys បានឱ្យដឹងថា ការលក់ស្មាតហ្វូននៅក្នុងប្រទេសចិន នៅត្រីមាសទី1 បានធ្លាក់ចុះ 21% ដោយមានចំនួនលក់បានត្រឹមតែ 91លានគ្រឿងប៉ុណ្ណោះ។ អ្វីដែលគេចាប់អារម្មណ៍នៅក្នុងត្រីមាសទី1 នេះគឺការលក់ស្មាតហ្វូនរបស់ក្រុមហ៊ុនយីហោក្នុងស្រុក Xiaomi បានកើនឡើងខ្លាំងរហូតរុញច្រាន Apple ឱ្យមកនៅលេខរៀងទី5 ចំណែក Xiaomi ទៅនៅលេខរៀងទី4 វិញ ក្នុងតារាងក្រុមហ៊ុនដែលលក់ស្មាតហ្វូនបានច្រើនជាងគេ។

ជាមួយគ្នានោះផងដែរ គេសង្កេតឃើញថា ការលក់ស្មាតហ្វូនរបស់ក្រុមហ៊ុន Huawei មានការកើនឡើង 2ភាគរយ ប៉ុន្តែក្រុមហ៊ុនមួយនេះ នៅតែស្ថិតក្នុងកំពូលតារាងដដែល។

នៅក្នុងរបាយការណ៍ក៏បានបញ្ជាក់ឱ្យដឹងផងដែរថា ស្មាតហ្វូនដែលលក់ដាច់ជាងគេនៅក្នុងត្រីមាសទី1 នោះគឺស្មាតហ្វូនដែលមានតម្លៃប្រមាណ150ដុល្លារអាមេរិក ដែលស្មើនឹង 90%នៃស្មាតហ្វូនដែលបានលក់៕

May 5, 2018

វិស័យសេវាកម្មនឹងបន្តកំណើនល្អរហូតដល់ឆ្នាំខាងមុខ

របាយការណ៍របស់ក្រសួងសេដ្ឋកិច្ចបានបង្ហាញថា វិស័យសេវាកម្មនឹងបន្តកំណើនល្អប្រសើរក្នុងរង្វង់ 7ភាគរយសម្រាប់ឆ្នាំ2018នេះ និងឆ្នាំ2019ខាងមុខ។ នេះបើយោងតាមការព្យាកររបស់ក្រសួងសេដ្ឋកិច្ច និងហិរញ្ញវត្ថុ។ យោងតាមឯកសារសមិទ្ធកម្ម និងទស្សនវិស័យរបស់អគ្គនាយកដ្ឋានគោលនយោបាយនៃក្រសួងសេដ្ឋកិច្ច និងហិរញ្ញវត្ថុបានបង្ហាញឱ្យដឹងថា៖ វិស័យសេវាកម្មត្រូវបានព្យាករថាទោះជាសម្រេចបានកំណើនល្អប្រសើរក្តី ក៏វិស័យនេះនឹងមានការថមថយចុះបន្តិចបន្តួចធៀបទៅនឹងឆ្នាំ2017 ដែលស្ថិតក្នុងរង្វង់តម្លៃប៉ាន់ស្មានប្រមាណ 7,1ភាគរយ។

នៅក្នុងផ្នែកសេវាកម្ម វិស័យសំខាន់ៗទាំង3 រួមមាន វិស័យទេសចរណ៍ ការលក់ដុំ-លក់រាយ ការដឹកជញ្ជូន និងទូរគមនាគមន៍ រួមជាមួយវិស័យអចលនទ្រព្យ ត្រូវបានរំពឹងទុកក្នុងកំណើនល្អប្រសើរ ក្នុងនោះវិស័យទេសចរណ៍នឹងបន្តងើបឡើង ក្នុងអត្រាកំណើន 4.5ភាគរយក្នុងឆ្នាំ2018 ហើយនឹងបន្តងើបឡើងកាន់តែល្អថែមទៀតក្នុងរង្វង់ 4.7ភាគរយក្នុងឆ្នាំ2019 ដោយសារកំណើនខ្ពស់នៃចំនួនភ្ញៀវទេសចរអន្តរជាតិ ជាពិសេសទេសចរណ៍នៅក្នុងតំបន់អាស៊ី រួមជាមួយការខិតខំប្រឹងប្រែងរបស់រាជរដ្ឋាភិបាល ការលើកទឹកចិត្តជំរុញឱ្យមានការបើកជើងហោះហើរត្រង់ និងការដាក់ចេញនូវគោលនយោបាយនានា។

លោកបណ្ឌិត ចាប សុថារិទ្ធ អ្នកស្រាវជ្រាវជាន់ខ្ពស់ និងជាក្រុមប្រឹក្សាភិបាលនៃវិទ្យាស្ថានសហប្រតិបត្តិការអន្តរជាតិ និងសន្តិភាព(CICP)បានបញ្ជាក់ប្រាប់តាមទូរស័ព្ទថា៖ ជាការពិតណាស់វិស័យសេវាកម្មនេះពិតជាបានជួយដល់ការរីកចម្រើនដល់សេដ្ឋកិច្ចជាតិមែន។ គិតចាំពីឆ្នាំ2009 រហូតដល់ឆ្នាំ2012 វិស័យសេវាកម្មតែងតែមានការកើនឡើងជានិច្ច។ លោកបានបន្តថា អនុវិស័យនៃវិស័យសេវាកម្ម វិស័យទេសចរណ៏ដែលរួមមានដូចជាសេវាកម្មសណ្ឋាគារ ភោជនីយដ្ឋាន សេវាកម្មដឹកជញ្ជូនជាដើម រួមជាមួយនឹងធនាគារ ដែលសុទ្ធតែផ្តល់ប្រាក់ចំណូលដោយផ្ទាល់ចូលក្នុងកញ្ចប់ថវិកាជាតិ។

តែទោះជាយ៉ាងណា ការធ្វើពិពិធកម្មផលិតផល និងគោលដៅទេសចរណ៍ ព្រមទាំងការទាក់ទាញភ្ញៀវ នៅតែជាការចាំបាច់ និងបន្ទាន់ ដើម្បីសំដៅធានាចីរភាពកំណើននៃវិស័យនេះ ក្នុងការបន្តតួនាទីជាជន្ទល់សំខាន់មួយសម្រាប់ទ្រទ្រង់សេដ្ឋកិច្ចជាតិ។

ឯកសារដដែលបានបន្តថា ចំណែកវិស័យលក់ដុំ-រាយត្រូវបានព្យាករថា នឹងមានកំណើនរឹងមាំក្នុងអត្រា 7,2ភាគរយក្នុងឆ្នាំ2018 និង 7,3ភាគរយនៅក្នុងឆ្នាំ2019 ដែលកំណើននេះ នឹងឡើងខ្ពស់ជាងឆ្នាំ2017 ដែលមានត្រឹម 6,9ភាគរយ។ ជាក់ស្តែងនៅក្នុងរយៈពេលប៉ុន្មានឆ្នាំមកនេះ ការប្រើប្រាស់ទំនិញក្នុងស្រុកត្រូវបានវាយតម្លៃថា មានសម្ទុះខ្លាំង ហើយនិន្នាការនេះ នឹងនៅតែបន្តទៅមុខទៀត ព្រោះបច្ចុប្បន្នប្រជាជនមានប្រាក់ចំណូលមធ្យមបានកើនឡើង ដែលបានផ្លាស់ប្តូរឥរិយាបថក្នុងការចាយវាយមានច្រើនជាងមុនទៀតផង។

ដោយឡែកវិស័យអចលនទ្រព្យត្រូវបានរំពឹងថា នឹងនៅតែមានកំណើនតិចតួចក្នុងរង្វង់ 8.5ភាគរយ ក្នុងឆ្នាំ2018 និងឆ្នាំ2019 គឺមានការធ្លាក់ចុះបន្តិចបន្តួចបើប្រៀបធៀបទៅឆ្នាំ2017។ ចំណែកវិស័យការដឹកជញ្ជូន និងទូរគមនាគមន៍ក៏ត្រូវបានរំពឹងថា នឹងនៅបន្តមានកំណើនរឹងមាំក្នុងរង្វង់ 7.3ភាគរយក្នុងឆ្នាំ2018 និង7.5ភាគរយនៅក្នុងឆ្នាំ2019បើប្រៀបធៀបទៅឆ្នាំ2017 ដែលស្ថិតក្នុងអត្រាកំណើន 9.2ភាគរយ។ ចំណែកវិស័យដឹកជញ្ជូននឹងបន្តកំណើន ហើយកំណើននៃវិស័យនេះ នឹងត្រូវជំរុញដោយគម្រោងអភិវឌ្ឍន៍ហេដ្ឋារចនាសម្ព័ន្ធ ដូចជា ការបើកផ្លូវរថភ្លើងថ្មី (ភ្នំពេញ-ប៉ោយប៉ែត) ការពង្រីកព្រលានយន្តហោះ និងកំពង់ផែនានា ព្រមទាំងការធ្វើឱ្យប្រសើរឡើងនៃប្រព័ន្ធឡូជីស្ទិក ដែលនឹងជួយប៉ះប៉ូវដល់កំណើនយឺតនៃការនាំចេញផលិតផលនានាផងដែរ។

តាមរយៈធនាគារអភិវឌ្ឍន៍អាស៊ី (ADB)បានឱ្យដឹងថា កម្ពុជាជាប្រទេសមួយដែលគេបានស្រាវជ្រាវឃើញថា៖ វិស័យសេវាកម្មបានជួយបង្កើនប្រាក់ចំណូលប្រមាណជា 40ភាគរយនៃផលិតផលក្នុងស្រុកសរុប GDP កាលពីឆ្នាំ2013។

ធនាគារ ADB បានឱ្យដឹងទៀតថា គ្រាន់តែសេវាដឹកជញ្ជូន និងទេសចរណ៍បានបង្កើតការងារដល់ប្រជាជនបានជាង 1លាន 8សែននាក់ក្នុងឆ្នាំ2012 ឬស្មើនឹងជាង 22ភាគរយនៃចំនួននិយោជិតទាំងអស់ក្នុងប្រទេស។ ក្នុងឆ្នាំ2013 ចំនួនអ្នកធ្វើការក្នុងវិស័យសេវាកម្មបានកើនរហូតដល់ 1លាន9សែននាក់។ គេក៏រំពឹងថា នៅឆ្នាំ2023 និយោជិតដែលបម្រើការងារសេវាកម្មនឹងមានចំនូន 2លាន 6សែននាក់។

លោកបណ្ឌិត ចាប សុថារិទ្ធ បានគូសបញ្ជាក់ថា៖ “មកដល់បច្ចុប្បន្នវិស័យសេវាកម្មបានផ្តល់ប្រាក់ចំណូលដោយផ្ទាល់ចូលក្នុងកញ្ចប់ថវិកាជាតិប្រមាណ 50%ដែលជាចំណែកមួយដ៏ធំក្នុងការរួមចំណែកដល់ការជំរុញដល់កំណើនសេដ្ឋកិច្ចជាតិ”៕

May 5, 2018

Barca សង្ឃឹមអាចរក្សាការមិនស្គាល់ចាញ់ក្នុង La Liga ពេលប៉ះ Real ថ្ងៃអាទិត្យនេះ

ខ្សែការពារ Lucas Digne របស់ក្រុម Barcelona បានទទួលស្គាល់ថា រូបគេ និងមិត្តរួមក្រុមរបស់គេ សង្ឃឹមថា អាចគេចផុតពីការបោះបង់កំណត់ត្រានៃការមិនស្គាល់ចាញ់ក្នុងក្របខ័ណ្ឌ La Ligaនៅពេលប៉ះក្រុម Real Madrid នៅថ្ងៃអាទិត្យនេះ។

ក្រុម Barca នៅសល់ត្រឹមតែ 4ប្រកួតទៀតប៉ុណ្ណោះពីការរក្សាការមិនស្គាល់ចាញ់សោះក្នុងក្របខ័ណ្ឌ La Liga នៅរដូវកាលនេះ ប៉ុន្តែ នៅចុងសប្តាហ៍នេះ ពួកគេនឹងធ្វើជាម្ចាស់ផ្ទះទទួលក្រុមកំពុងតែឡើងទម្រង់លេងខ្លាំង Real ខណៈដែលពួកគេក៏រងនូវការស្រែកចំអកឱ្យផងដែរ ដោយសារតែការធ្លាក់ចេញពីក្របខ័ណ្ឌ Champions League បើទោះបីបានឈ្នះពាន2 ហើយក៏ដោយ។

ការប្រកួតដែលមានឈ្មោះថា Clasico នាកីឡដ្ឋាន Camp Nou មួយនេះ ប្រហែលជាមិនសំខាន់ចំពោះការប្រជែងចំណាត់ថ្នាក់នៅលើតារាងឡើយ ប៉ុន្តែភាពជោគជ័យរបស់ក្រុម Real ក្នុងក្របខ័ណ្ឌអឺរ៉ុប កំពុងតែបាំងបិទជ័យជម្នះរបស់ក្រុម Barcelona ក្នុងការប្រកួតក្របខ័ណ្ឌលីក។ Digne បានបញ្ជាក់ថា ការបញ្ចប់ក្នុងយុទ្ធនាការមួយដែលមិនស្គាល់ចាញ់សោះ បច្ចុប្បន្នក្លាយជាកូនសោដ៏សំខាន់មួយ។ Digne បានឱ្យដឹងថា៖ «វាបង្ហាញពីភាពរឹងមាំ វាបង្ហាញពីការងារដ៏លំបាកដែលក្រុមក្នុងពូលទាំងអស់ព្យាយាមធ្វើនៅរដូវកាលទាំងមូលនេះ។ វាពិតជាសមិទ្ធផលដ៏ធំ។

ពិតណាស់ នេះគឺជាកំណត់ត្រាមួយដែលក្រុមនេះចង់បានពេលបច្ចុប្បន្ន។ វាពិតជាសំខាន់ណាស់សម្រាប់យើង ហើយយើងនឹងព្យាយាមឱ្យអស់សមត្ថភាពក្នុងការរក្សាកំណត់ត្រានេះ»។ ក្រុម Barca ក៏នៅតែមានអារម្មណ៍ផងដែរថា ពួកគេនៅតែមានការខកចិត្តសម្រាប់ការធ្លាក់ចេញរបស់ពួកគេពីការប្រកួតក្របខ័ណ្ឌ Champions League នៅពេលប្រកួតជាមួយនឹងក្រុម Roma បើទោះបីឈ្នះពានក្នុងស្រុក2 នៅរដូវកាលនេះហើយក៏ដោយ។ ការប្រកួតនេះនឹងចាប់ផ្តើមនៅម៉ោង1:45ទៀបភ្លឺ៕

ប្រភពពី៖ Sport24

May 5, 2018

ព្រឹត្តិការណ៍ LG InnoFest Asia 2018 បង្ហាញនូវបច្ចេកវិទ្យា AI ដែលបញ្ជាដោយសំឡេង

ក្រុមហ៊ុន LG Electronics បានប្រារព្ធពិធី LG InnoFest Asia ប្រចាំឆ្នាំ 2018 ដែលប្រព្រឹត្តិនៅ LG Electronics Arena នៅថ្ងៃទី 25 ខែមេសា និងមានការអញ្ជើញចូលរួមដោយដៃគូអាជីវកម្មនៅអាស៊ី។ ប្រធានគ្រប់គ្រងនៃក្រុមហ៊ុន LG Electronics អាស៊ីប៉ាស៊ីភិច បានមានប្រសាសន៍ថា “LG អេឡិចត្រូនិច គឺជាមជ្ឈមណ្ឌលស្រាវជ្រាវ និងអភិវឌ្ឍន៍ធំបំផុតនៅក្នុងប្រទេសកូរ៉េខាងត្បូង។ វាក្លាយជាមជ្ឈមណ្ឌលអភិវឌ្ឍន៍ និងការច្នៃប្រឌិតនូវផលិតផលទំនើបៗចុងក្រោយគេបង្អស់នៅក្នុងទីផ្សារអាស៊ី ដែលមានការប្រកួតប្រជែងខ្ពស់ ដូចជាក្រុមហ៊ុនល្បីផ្សេងៗនៃប្រទេសចិន និងប្រទេសជប៉ុន។ ដូច្នេះហើយក្រុមហ៊ុន LG នឹងផ្តោតសំខាន់ទៅលើការអភិវឌ្ឍន៍ផលិតផលដែលមានគុណភាពខ្ពស់ ដើម្បីអាចប្រកួតប្រជែងនិងក្លាយជាអ្នកនាំទីផ្សារអាស៊ីធំជាងគេ។

ដោយឡែក ទូរទស្សន៍ LG OLED TV និងផលិតផលទូរទស្សន៍ផ្សេង នឹងត្រូវបានផ្អែកលើបច្ចេកវិទ្យា AI(artificial intelligence) ដែលបង្កើតឡើងដោយ LG ដែលឈ្មោះថា ThinQ នៅក្នុងផលិតផលទាំងនេះ។ អ្នកនឹងឃើញវានៅលើទីផ្សារចាប់ពីពេលនេះតទៅ។

ក្រុមហ៊ុន LG នឹងផ្តោតលើទីផ្សារឌីជីថលបន្ថែមទៀត។ តាមរយៈក្រុមទីផ្សារឌីជីថល និង ការសហការជាមួយក្រុមហ៊ុនទិន្នន័យអន្តរជាតិសំខាន់ៗ គឺដើម្បីផ្តល់ព័ត៌មានអំពីលក្ខណៈរបស់អតិថិជន និងការធ្វើផែនការទីផ្សារតាមរយៈ សិល្បករ និងតារាចម្រៀងកូរ៉េ ដើម្បីផ្តល់ព័ត៌មានផលិតផលថ្មីដល់អតិថិជននិងបង្កើនការយល់ដឹងដល់ពួកគេ។

លោក សេងចេលី នាយកគ្រប់គ្រងក្រុមហ៊ុន LG Electronics (Thailand) បាននិយាយថានៅក្នុងប្រទេសថៃនាឆ្នាំនេះ ក្រុមហ៊ុន LG នឹងវិនិយោគលើការផ្សព្វផ្សាយយីហោ ដើម្បីឈានទៅដល់អតិថិជនកាន់តែច្រើន និងបង្ហាញអំពីបច្ចេកវិទ្យា AI ថ្មីនេះទៅកាន់អតិថិជនបន្តិចម្តង។

លោក នីផុន វ៉ុងសេងអារុនស៊ី នាយកទីផ្សារក្រុមហ៊ុនអេឡិចត្រូនិច LG Electronics (Thailand) បាននិយាយថានៅឆ្នាំនេះនឹងឃើញផលិតផលរបស់ក្រុមហ៊ុន LG ថ្មីនេះ ដែលនឹងចាប់ផ្តើមនៅក្នុងប្រទេសថៃក្នុងអំឡុងខែ 6 រួមមានដូចជាទូរទស្សន៍ LG OLED ជាមួយនឹងបច្ចេកវិទ្យា (ThinQ) ដើម្បីពង្រីកបន្ទាត់ទៅផលិតផលផ្សេងទៀតនៅឆ្នាំក្រោយ ហើយក៏មានការផ្សព្វផ្សាយ និងប្រ៉ូម៉ូសិនសម្រាប់ការប្រកួតបាល់ទាត់ពិភពលោក ដែលជាពេលវេលាដ៏ល្អសម្រាប់ការលក់ទូរទស្សន៍។

នៅឯព្រឹត្តិការណ៍ LG InnoFest Asia 2018 ក្រុមហ៊ុន LG បានណែនាំផលិតផលដែលមានបច្ចេកវិទ្យា AI ដែលផ្តល់នៅភាពឆ្លាតវៃក្នុងផ្ទះ និងការត្រួតពិនិត្យសម្លេងតាមរយៈឧបករណ៍បញ្ជាពីចម្ងាយ នៅក្នុងបន្ទប់ទទួលភ្ញៀវ បន្ទប់បោកគក់ និងបន្ទប់ទឹក ដែលរួមមានឧបករណ៍ប្រើប្រាស់ដូចជា ទូរទស្សន៍ ទូរទឹកកក ម៉ាស៊ីនត្រជាក់ ម៉ាស៊ីនបោកគក់ ដែលអាចប្រើបានជាមួយកម្មវិធីថ្នាក់ពិភពលោកបានដូចជា Amazon Alexa និង GoogleAssistant។ ឧទាហណ៍ LG OLED TV ដែលបញ្ជាដោយសម្លេងសម្រាប់ការគ្រប់គ្រង ស្វែងរកប៉ុស្តិ៍ដែលពេញនិយមតាមរយៈទូរស័ព្ទ LG V30S^ThinQ និង LG ThinQ ជាដើម៕

May 5, 2018

ព្រឹត្តិការណ៍ Anchor international Beach Volleyball 2-Star FIVB World Tour 2018

ភ្នំពេញ៖ នៅថ្ងៃសុក្រ ទី4 ខែឧសភា 2018 ដែលជាព្រឹត្តការណ៍ប្រកួតបាល់ទះលើឆ្នេរខ្សាច់អន្តរជាតិ Anchor International Beach Volleyball 2-Star FIVB World Tour 2018 ដែលនាំមកដោយស្រាបៀរអាន់ឆ័រ បានមកដល់រាជធានីភ្នំពេញ ដោយបានបង្ហាញវត្តមានលើកដំបូងនៅកម្ពុជា ដែលជាឧកាស ក្នុងការអភិវឌ្ឍវិស័យបាល់ទះលើឆ្នេរខ្សាច់នៅកម្ពុជា និងជាវេទិកាមួយសម្រាប់យុវវ័យដែលស្រលាញ់កីឡាបាល់ទះ អាចបញ្ចេញសមត្ថភាពរបស់ខ្លួន ព្រមទាំងផ្លាស់ប្ដូរបទពិសោធន៍របស់ខ្លួនជាមួយគូរប្រកួតខ្លាំងៗដទៃទៀតមកពីបរទេសផងដែរ។

ព្រឹត្តិការណ៍ Anchor International Beach Volleyball 2-Star FIVB World Tour បានចាប់ផ្តើមតាំងពីថ្ងៃទី២៤ មីនា គ្រោងនឹងបញ្ចប់នៅថ្ងៃទី 6 ឧសភា ឆ្នាំ2018 នេះ ដោយធ្វើតាមបណ្តាខេត្តចំនួនន7 រួមមាន កំពង់ស្ពឺ ព្រះសីហនុ បន្ទាយមានជ័យ សៀមរាប បាត់ដំបង កំពង់ចាម ខណៈដែរមណ្ឌលចុងក្រោយរាជធានីភ្នំពេញនេះនឹងធ្វើការប្រកួតរយៈពេល៣ថ្ងៃ គឺចាប់ពីថ្ងៃទី 04, 05, 06 ខែឧសភា ឆ្នាំ2018 នេះដែលមានទីតាំងនៅកោះពេជ្យ រាជធានីភ្នំពេញ ចាប់ប្រកួតពីម៉ោង 9ព្រឹក ដល់ 5ល្ងាច។

ព្រឹត្តិការណ៍នេះ មានក្រុមដាក់ពាក្យចូលរួមសរុបរហូតដល់ទៅ 29ក្រុម ដែលមកពី17ប្រទេសដូចជាអូស្ត្រាលី កាណាដា ដាណឺម៉ាក អាល្លឺម៉ង់ ក្រិក ជប៉ុន ណូវែលហ្សីឡង់ រុស្ស៊ីស៊ុយអែដ និងបណ្តាប្រទេសជាច្រើនទៀត។

រីករាយស្រស់ថ្លា ចាប់ផ្តើមជាមួយស្រាបៀរ អាន់ឆ័រ!

ចំពោះព័ត៌មានលម្អិតអំពីព្រឹត្តិការណ៍កីឡាបាល់ទះឆ្នេរខ្សាច់អន្តរជាតិនេះ សូមចូលមើលទំព័រហេ្វសបុករបស់ស្រាបៀរអាន់ឆ័រ៖ https://www.facebook.com/AnchorBeerKH/ ។

ពិសាស្រាបៀរអាន់ឆ័ដោយការទទួលខុសត្រូវ!!!

May 5, 2018

បុគ្គលិកក្រុមហ៊ុន CBL ចុះជួយកែលម្អសោភ័ណ្ឌភាពវិទ្យាល័យព្រែកឯក

ភ្នំពេញ៖ ថ្មីៗនេះ បុគ្គលិកក្រុមហ៊ុនផលិតស្រាបៀរកម្ពុជា (CBL) ដែលមានផលិតស្រាបៀរដូចជា Heineken, Tiger, Tiger Crystal, ABC Extra Stout, Anchor, Gold Crown និង Gold Crown Stout បានចុះជួយកែលម្អសោភ័ណ្ឌភាពនៃអគារសិក្សាទ្រុឌទ្រោមមួយខ្នងទៀត ជូនសាលាវិទ្យាល័យព្រែកដែលមានទីតាំងស្ថិតនៅសង្កាត់ព្រែកឯក ខ័ណ្ឌច្បារអំពៅ រាជធានីភ្នំពេញ។

សកម្មភាពនេះបានដឹកនាំដោយលោក Roland Bala នាយកគ្រប់គ្រង និងបុគ្គលិកនៃក្រុមហ៊ុន CBL និងមានការចូលរួមគាំទ្រពី លោកអ៊ុំ សារី ប្រធានការិយាល័យអប់រំខ័ណ្ឌច្បារអំពៅ លោក ប៉ាង វិសុទ្ធ នាយកវិទ្យាល័យព្រែកឯង ព្រមទាំងលោកគ្រូអ្នកគ្រូ សិស្សានុសិស្សនៃវិទ្យាល័យព្រែកឯកជាច្រើន។

ក្នុងឱកាសដ៏ពិសេសនេះ លោក ប៉ាង វិសុទ្ធ នាយកសាលាវិទ្យាល័យព្រែកឯក ក៏បានថ្លែងអំណរគុណយ៉ាងជ្រាលជ្រៅដល់លោកអគ្គនាយកក្រុមហ៊ុនព្រមទាំងសហការីទាំងអស់ ដែលបានចំណាយថវិកា រួមទាំងកម្លាំងកាយចិត្ត ជួយដល់សាលាឱ្យមានការរីកចំរើន ជាពិសេសបានប្រែក្លាយបន្ទប់ថ្នាក់រៀននីមួយទៅជាទីកន្លែងមានបរិយាកាសល្អគួរចង់សិក្សា ដោយឆ្នាំនេះបានធ្វើការលាបថ្នាំថ្មីនៃអគារសិក្សាមួយខ្នងទៀតដែលមាន 5បន្ទប់ ព្រមទាំងសាងសង់ផ្លូវប៉េតុងប្រវែង 45ម៉ែត្រ សាងសង់ផ្លូវជុំវិញអគារ និងជួសជុលបន្ទប់ទឹកផងដែរ។

ជាមួយគ្នានោះដែរ លោក Roland Bala នាយកគ្រប់គ្រងនៃក្រុមហ៊ុន CBL បានមានប្រសាសន៍ថា នេះជាឆ្នាំទី៥ ដែលបុគ្គលិកក្រុមហ៊ុនរបស់យើងបានចំណាយពេលចុងសប្តាហ៏ចូលរួម កម្មវិធីកែលម្អសោភ័ណ្ឌភាពនៃអគារសិក្សាសម្រាប់សិស្សានុសិស្សរបស់យើង។ យុវជនថ្ងៃនេះ ជា អនាគតអ្នកដឹកនាំនាពេលខាងមុខ ដូច្នេះពូកគាត់ត្រូវត្រៀមខ្លួនឲ្យល្អសម្រាប់ការសិក្សារៀនសូត្រ។

ប្អូនស្រី សំរេច មេត្តា តំណាងសិស្សនុសិស្សនៃសាលាវិទ្យាល័យព្រែកឯក ក៏បានថ្លែងអំណរគុណដល់ក្រុមហ៊ុន ហើយប្តេជ្ញាចិត្តចូលរួមថែទាំអគារសិក្សានិងសមិទ្ធិផលនានា ព្រមទាំងប្តេជ្ញាចិត្តខិតខំរៀនសូត្រដើម្បីប្រឡងឲ្យជាប់សញ្ញាប័ត្រមធ្យមសិក្សាទុតយភូមិនាពេលខាងមុន។

គួររម្លឹកផងដែរថា គម្រោងកែលម្អសាលាវិទ្យាល័យព្រែកឯងរបស់ក្រុមហ៊ុនផលិតស្រាបៀរកម្ពុជា (CBL) មានរយៈពេលពីរឆ្នាំ ដែលផ្តល់អត្ថប្រយោជន៏ដល់សិស្សានុសិស្សប្រមាណ ១៩០០នាក់ ដោយផ្តោតជាចម្បងលើការជួលជុលកែលម្អអគារសិក្សាចំនួនពីរខ្នង ជួលជុលកែលម្អបន្ទប់សិក្សាកុំព្យូទ័រមួយបន្ទប់ព្រមទាំងបំពាក់កុំព្យូទ័រនិងម៉ាស៊ីនព្រីន ដាក់ប្រព័ន្ធបណ្តាញលូទឹកដើម្បីបញ្ជៀសទឹកជន់នៅពេលភ្លៀងធ្លាក់ កសាងផ្លូវដើរពីអគារមួយទៅអគារមួយទៀត និងជួលជុលបន្ទប់ទឹកផងដែរ។

ក្រុមហ៊ុន CBL ដែលជាក្រុមហ៊ុនផលិតស្រាបៀរគុណភាពលំដាប់ពិភពលោកដូចជា Heineken, Tiger, Tiger Crystal, ABC Extra Stout, Anchor, Gold Crown និង Gold Crown Stout តែងតែចូលរួមរាល់សកម្មភាពនានាក្នុងការអភិវឌ្ឍសហគមន៍ និងផ្ដោតការយកចិត្ដទុកដាក់ជាពិសេសលើការប្រព្រឹត្ដខ្លួនជាសហគ្រាសមួយដែលមានស្មារតីទទួលខុសត្រូវខ្ពស់ចំពោះសង្គមជាតិ៕

May 4, 2018

Author: វល័ក្ខ