វល័ក្ខ - La Reine Media

ឪពុកម្តាយក្នុងប្រទេសណាខ្លះដែលចំណាយ ច្រើនជាងគេក្នុងពិភពលោកលើការអប់រំកូន?

ការវិនិយោគលើការអប់រំសម្រាប់កុមារ គឺជារឿងសំខាន់បំផុតដែលអាណាព្យាបាលលើពិភពលោកយកចិត្តទុកដាក់បំផុត ព្រោះថា ការអប់រំជាចំណុចដែលមិនអាចខ្វះបានសម្រាប់អភិវឌ្ឍមនុស្សម្នាក់ៗ និងសង្គមទាំងមូល។ អាណាព្យាបាលខ្លះបានព្យាយាមគ្រប់លទ្ធភាពដើម្បីស្វែងរកគ្រឹះស្ថានសិក្សាល្អៗ និងប្រកបដោយប្រសិទ្ធភាពខ្ពស់សម្រាប់កូនតូចរបស់ពួកគាត់ បើទោះបីជាគាត់ត្រូវចំណាយថវិកាច្រើនខ្លាំងក៏ដោយ។

ខាងក្រោមនេះជាការស្រាវជ្រាវមួយដែលបង្ហាញដោយវេទិកាសេដ្ឋកិច្ចពិភពលោក អំពីតំបន់ដែលបានចំណាយធនធានលើការអប់រំច្រើនជាងគេលើពិភពលោក។ ចាប់ផ្តើមដំបូងពីទីក្រុងហុងកុង ដែលត្រូវបានគេរកឃើញថាជាតំបន់ដែលអាណាព្យាបាលត្រូវចំណាយលុយជាមធ្យម ច្រើនជាងគេបំផុតលើពិភពលោកដើម្បីវិនិយោគលើការអប់រំកូន។ បើតាមទិន្នន័យបានបញ្ជាក់ថា ជាមធ្យមសម្រាប់សិស្សម្នាក់ចាប់ពីថ្នាក់បឋមរហូតដល់សាកលវិទ្យាល័យ អាណាព្យាបាលត្រូវចំណាយលុយប្រហែលជាង 130,000ដុល្លារអាមេរិក។

បន្ទាប់មកទៀតគឺ សហភាពអារ៉ាប់ អេមីរ៉េត (United Arab Emirates: UEA) ដែលឪពុកម្តាយត្រូវចំណាយជាមធ្យមជិត 100,000ដុល្លារ ដើម្បីផ្គត់ផ្គង់កូនឱ្យបានចប់ការសិក្សាដល់ថ្នាក់ឧត្តមសិក្សា។ តាមពីក្រោយដោយប្រទេសសិង្ហបុរីដែលត្រូវចំណាយជាង 70,000ដុល្លារ។

ងាកទៅសហរដ្ឋអាមេរិកវិញ ជាប្រទេសជាប់លេខ6 ក្នុងចំណោមប្រទេសទាំង10 ដែលមានសាកលវិទ្យាល័យល្អបំផុតលើពិភពលោក និងអាណាព្យាបាលត្រូវចំណាយជាមធ្យមប្រមាណ 58,000ដុល្លារតាំងពីដើមដល់ចប់។ ចំនួននេះ គឺតិចជាងពាក់កណ្តាលសម្រាប់ការផ្គត់ផ្គង់លើការសិក្សានៅទីក្រុងហុងកុង។

យោងតាមការសិក្សាថ្មីៗនេះដោយស្ថាប័ន HSBCដែលជាក្រុមហ៊ុនបម្រើការផ្នែកធនាគារ និងហិរញ្ញវត្ថុដ៏ល្បីល្បាញបានបង្ហាញយ៉ាងច្បាស់ផងដែរពីទិន្នន័យដូចគ្នាដែលអាណាព្យាបាលក្នុងប្រទេសនីមួយៗបានចំណាយលើការសិក្សារបស់កូន។ ក្នុងនោះគេសង្កេតឃើញថា តាមការស្ទង់មតិ ប្រទេសបារាំងជាប្រទេសដែលចំណាយតិចជាងគេក្នុងចំណោមប្រទេសដែលចំណាយច្រើនបំផុតលើការសិក្សារបស់កូនទាំង 15លើពិភពលោក ជាមួយនឹងខ្ទង់ចំណាយត្រឹមតែ 16,000ដុល្លារប៉ុណ្ណោះសម្រាប់ចំណាយលើការសិក្សាចាប់ពីថ្នាក់បឋមដល់វិទ្យាល័យ។

តារាងបង្ហាញពីអត្រាចំណាយរបស់ឪពុកម្តាយនៅតាមបណ្តាប្រទេសមួយចំនួន

ចំនួននេះត្រូវបានគេមើលឃើញថា ប្រហាក់ប្រហែលនឹងប្រទេសសាមញ្ញមួយចំនួនដូចជា ឥណ្ឌា ឥណ្ឌូនេស៊ី និងអេហ្ស៊ីប ដែលអាណាព្យាបាលត្រូវចំណាយប្រាក់ប្រមាណជាង20,000ដុល្លារ។

ទោះជាយ៉ាងណាក៏ដោយ គេសង្កេតឃើញថា អាណាព្យាបាលបារាំងក៏មានទុទិដ្ឋិនិយមដែរចំពោះគំនិតអប់រំរបស់កូន។ មានអាណាព្យាបាល តិចជាង 42% មានទំនុកចិត្តថា អាចនាំអនាគតល្អឱ្យកូនរបស់ខ្លួនបាន ខណៈអាណាព្យាបាលលើពិភពលោកមានប្រមាណ 75% គិតបែបនេះ។

អាណាព្យាបាលដែលមានគំនិតទុទិដ្ឋិនិយមច្រើនជាងគេ គឺត្រូវបានគេរកឃើញថា នៅតំបន់អាស៊ី ជាពិសេសគឺនៅប្រទេសឥណ្ឌាដែលគេរកឃើញថា ម្នាក់ក្នុងចំណោម 9នាក់ ឬស្មើនឹង 87% នៃអាណាព្យាបាលមានគំនិតទុទិដ្ឋិនិយមចំពោះអនាគតកូនៗរបស់គាត់ ហើយ84% នៅប្រទេសចិនធ្លាប់ប្រាប់ថាមានអារម្មណ៍ដូចគ្នានេះដែរ។

ការរកឃើញមួយទៀតបានបង្ហាញថា អាណាព្យាបាលជាច្រើនគិតថាការអប់រំកូនៗគឺជាចំណុចអាទិភាព និងចម្បងបំផុត ខណៈអាណាព្យាបាលចំនួន87% លើពិភពលោកកំពុងតែជួយផ្តល់ជំនួយផ្នែកហិរញ្ញវត្ថុច្រើនបំផុតលើការអប់រំកូន។ ទាំងនេះរាប់បញ្ចូលទាំងការចំណាយលើថ្លៃសាលា សៀវភៅ ឯកសណ្ឋាន ការដឹកជញ្ជូន និងកន្លែងស្នាក់នៅ។ អាណាព្យាបាលជាច្រើនខំប្រឹងប្រែងកាន់តែខ្លាំងក្នុងការធានាថាគាត់អាចមានលទ្ធភាពក្នុងការវិនិយោគលើអនាគតរបស់កូន ហើយដើម្បីសម្រេចគោលដៅនេះគាត់សុខចិត្តកាត់ចំណាយជាច្រើនសម្រាប់ខ្លួនឯង ដូចជាចំណាយលើដំណើរកម្សាន្ត ចំណាយលើសកម្មភាពផ្ទាល់ខ្លួនមួយចំនួន និងការទិញរបស់របរផ្សេងៗដើម្បីទប់ទល់ជាមួយនឹងការអប់រំកូន៕

May 12, 2018

កម្មវិធី ABC Exceptional Night ជាមួយកញ្ញា មាស សុខសោភា

ភ្នំពេញ៖ កាលពីថ្ងៃពុធ ទី ០៩ ខែឧសភា ឆ្នាំ២០១៨ ស្រាបៀរ ABC អិចស្ត្រាស្តោត បានបន្តរៀបចំកម្មវិធី ABC EXCEPTIONAL NIGHT នៅក្លិប 2ND Night ដោយមានការអញ្ជើញចូលរួមពីតារាចម្រៀងដ៏ល្បីប្រចាំព្រះរាជាណាចក្រកម្ពុជា នាងជាតារាដែលមានមហិច្ឆតាដ៏ច្បាស់លាស់ និងភាពលះបង់សម្រាប់ការងាររបស់នាង ទាំងនេះជាយាន្តធ្វើឲ្យនាងក្លាយជាតារាដ៏សំខាន់ម្នាក់ក្នុងវិស័យសិល្បៈ។

នាងបានផ្តល់ជូនទៅអ្នកគាំទ្ររបស់នាងតាមរយៈជំនាញរបស់នាង នាងគឺជាតារាដែលល្បីដោយចំណុចល្អឯករបស់ខ្លួន ( Superstar Exceptional) កញ្ញា មាស សុខសោភា ។

កម្មវិធីរាត្រីដ៏ល្អឯក (ABC Exceptional Night) មិនត្រឹមតែមានការសម្តែងដ៏អស្ចារ្យរបស់កញ្ញា មាស សុខសោភា ជាតារាចម្រៀងដ៏ល្បីប្រចាំព្រះរាជាណាចក្រកម្ពុជា និងក្រុមតារាបង្ហាញម៉ូត ព្រមទាំងមានសកម្មភាពកម្សាន្តផ្សេងទៀត។ លើសពីនេះ អតិថិជនរបស់ស្រាបៀរ ABC អិចស្ត្រាស្តោត ក៏បានភ្លក់នូវរសជាតិដ៏ល្អឯកពីការលាយបញ្ជូលគ្នាជាស្រាក្រឡុក ABC អិចស្ត្រាស្តោត ពីសំណាក់អ្នកក្រឡុកស្រាដ៏ជំនាញ ។

កម្មវិធី ABC EXCEPTIONAL NIGHT គឺជាផ្នែកមួយនៃយុទ្ធនាការ “ជាឧត្តមភាពដ៏ល្អឯក” របស់ ស្រាបៀរ ABC អិចស្ត្រាស្តោត ដែលផ្តល់នូវអំណរសារទរដល់ប្រជាពលរដ្ឋកម្ពុជាដែលទទួលបានជោគជ័យដោយបានបង្ហាញពីចំណុចខ្លាំង ចំណេះដឹង និងសមិទ្ធផលរបស់ខ្លួននៅក្នុងវិស័យសិល្បៈ ពាណិជ្ជកម្ម និងការកសាងសហគមន៍។

ABC អិចស្ត្រាស្តោត នៅតែជាម៉ាកសញ្ញាស្រាបៀរទឹកខ្មៅលំដាប់ថ្នាក់អន្តរជាតិដែលឈានមុខគេគ្មានគូរបៀបនៅលើទីផ្សារ ស្រាបៀរទឹកខ្មៅគុណភាពខ្ពស់បំផុតនៅក្នុងប្រទេសកម្ពុជា ដែលអតិថិជនជ្រើសរើសយកមកទទួលទាន ”ក្រេបរសជាតិដ៏ល្អឯក” នៃស្រាបៀរទឹកខ្មៅ ដែលផលិតពីគ្រឿងផ្សំមានគុណភាពខ្ពស់បំផុត និងបានឈ្នះពានរង្វាន់ជាច្រើន ជាពិសេសកំពុងទទួលបានការគាំទ្រកាន់តែខ្លាំងឡើងពីស្រទាប់យុវវ័យ មជ្ឈដ្ឋានសិល្បករ និងពាណិជ្ជករលំដាប់ថ្នាក់ខ្ពស់។

កម្មវិធី ABC EXCEPTIONAL NIGHT នឹងបន្តប្រារព្ធធ្វើឡើងនៅទីតាំង Palm Container Pub ក្រុងសៀមរាប នៅថ្ងៃសុក្រ ទី ១១ ខែឧសភាខាងមុខនេះ ដោយមានការអញ្ជើញចូលរួមពីតារាចម្រៀងដ៏ល្បីនិងមានវ័យក្មេងដែលប្រកបដោយមហិច្ឆិតា អាចនិយាយបានថា គាត់តែងតែទទួលបានពិន្ទុលើសពី ១០១% នូវអ្វីដែលគាត់បានធ្វើ រាល់យុទ្ធនាការសុទ្ធតែសកម្ម និងលើកទឹកចិត្តឲ្យយុវវ័យសម្រេចនូវក្តីសុបិន្ត និងជឿជាក់លើខ្លួនឯង (Fierce Exceptional) គឺលោក នីកូ ។

សូមចូលរួមឲ្យបានច្រើនកុះករដើម្បីទទួលបានបទពិសោធន៍ដ៏ល្អឯកពី ABC អិចស្ត្រាស្តោត!

ចំពោះព័ត៌មានបន្ថែមអំពីកម្មវិធីពិសេសនេះ ចូលទៅកាន់គេហទំព័រផ្លូវការ៖https://www.facebook.com/ABC.ExtraStoutCambodia/

សូមរីករាយទទួលទាន ABC អិចស្ត្រាស្តោត ដោយការទទួលខុសត្រូវ!!!

May 11, 2018

ស្រាបៀរថៃហ្គ័រប្រគល់រង្វាន់ជ័យមង្គលលើកទី1 ជូនគូស្វាមីភរិយាថ្មី ក្នុងកម្មវិធីអាពាហ៍ពិពាហ៍ស្រាបៀរថៃហ្គ័រ ឆ្នាំ 2018

ភ្នំពេញ៖ កាលពីថ្ងៃទី ៩ ខែឧសភា ឆ្នាំ២០១៨ ស្រាបៀរថៃហ្គ័របានរៀបចំកម្មវិធីប្រគល់រង្វាន់ជ័យមង្គលលើកទី១ជូនដល់គូស្វាមីភរិយាថ្មីចំនួនប្រាំគូ ដែលបានឈ្នះរង្វាន់ពីកម្មវិធីអាពាហ៍ពិពាហ៍របស់ស្រាបៀរថៃហ្គ័រ ឆ្នាំ ២០១៨ ដែលបានធ្វើការចាប់រង្វាន់លើកទី១ កាលពីថ្ងៃទី ៨ ខែមេសា ឆ្នាំ ២០១៨ នៅស្ថានីយទូរទស្សន៍ PNN។

កម្មវិធីប្រគល់រង្វាន់នេះបានប្រារព្ធធ្វើឡើងនៅរោងចក្រនៃក្រុមហ៊ុនផលិតស្រាបៀរកម្ពុជា (CBL) ដោយមានការអញ្ជើញចូលរួមពីថ្នាក់ដឹកនាំក្រុមហ៊ុនស្រាបៀរថៃហ្គ័រ ក្រុមការងារស្រាបៀរថៃហ្គ័រ គូស្វាមីភរិយាថ្មីចំនួនប្រាំគូ ភ្ញៀវកិត្តិយស និងអ្នកសារព័ត៌មានជាច្រើន។ ការប្រគល់រង្វាន់លើកទីមួយក្នុងកម្មវិធីអាពាហ៍ពិពាហ៍ឆ្នាំ ២០១៨របស់ស្រាបៀរថៃហ្គ័រគឺរង្វាន់ដំណើរកម្សាន្តក្រេបចន្ទទឹកឃ្មុំនៅប្រទេសជប៉ុនជាមួយនឹងទឹកប្រាក់ ១៥០០ ដុល្លារ ចំនួនប្រាំរង្វាន់។

លោក តាំង ម៉េងត្រី និងលោកស្រី ចាន់ ស៊ីនិតា ដែលជាគូស្វាមីភរិយាថ្មីមួយគូក្នុងចំណោមចំនួនប្រាំគូ ដែលបានឈ្នះរង្វាន់ធំពីកម្មវិធីអាពាហ៍ពិពាហ៍របស់ស្រាបៀរថៃហ្គ័របានមានប្រសាសន៍ថា ពួកគាត់មានអារម្មណ៍រំភើបយ៉ាងខ្លាំងនៅពេលដឹងថាខ្លូនត្រូវរង្វាន់ធំពីស្រាបៀរថៃហ្គ័រ ហើយពួកគាត់បានបញ្ជាក់ថា ស្រាបៀរថៃហ្គ័រពិតជាបានប្រគល់រង្វាន់ជូនពួកគាត់ និងគូស្វាមីភរិយាថ្មីទាំងអស់ដែលបានត្រូវរង្វាន់ពីកម្មវិធីអាពាហ៍ពិពាហ៍របស់ស្រាបៀរថៃហ្គ័រ។ ជាពិសេសពួកគាត់បានផ្តាំផ្ញើអ្នកមានបំណងចង់រៀបការ សូមកុំភ្លេចជាវស្រាបៀរថៃហ្គ័រពីព្រោះស្រាបៀរថៃហ្គ័រជាស្រាបៀរមានគុណភាពខ្ពស់លំដាប់ថ្នាក់អន្តរជាតិ ព្រមទាំងអាចមានឱកាសឈ្នះរង្វាន់ពិសេសជាច្រើនសន្ធឹកសន្ធាប់ទៀតផង។

គួររម្លឹកផងដែរថា ថៃហ្គ័រគឺជាស្រាបៀរដែលមានគុណភាពខ្ពស់លំដាប់ថ្នាក់អន្តរជាតិមានលក់ច្រើនជាង ៧០ ប្រទេសដែលកំពុងទទួលបានការគាំទ្រកាន់តែខ្លាំងឡើងជារៀងរាល់ថ្ងៃពីអតិថិជនទាំងនៅលើទីផ្សារកម្ពុជា និង ពិភពលោក ហើយជាពិសេសជាស្រាបៀរដែលស័ក្ត័សមបំផុត សម្រាប់ ទទួលភ្ញៀវក្នុងពិធីអាពាហ៍ពិពាហ៍ និងកម្មវិធីផ្សេង។ សម្រាប់ឆ្នាំ ២០១៨ នេះ អតិថិជនដែលជាវស្រាបៀរ ថៃហ្គ័រកំប៉ុង ឬ ដបចាប់ពី ២៥ ដល់ ៤៩ កេស នឹងទទួលបានសៀវភៅកត់ចំណងដៃ និងប៊ិច ចំនួន ១ ឈុត គូប៉ុងផ្សងសំណាងចំនួន ១ សន្លឹក និងអាវរងាគូស្នេហ៍ចំនួន ១ ឈុត។ រាល់ការជាវចាប់ពី ៥០ ដល់ ៧៤ កេស នឹងទទួលបានសៀវភៅកត់ចំណងដៃ និងប៊ិចចំនួន ២ ឈុត គូប៉ុងផ្សងសំណាងចំនួន ២ សន្លឹក និងកាបូបធ្វើដំណើរចំនួន ។ រាល់ការជាវចាប់ពី ៧៥ កេសឡើងទៅ នឹងទទួលបានសៀវភៅកត់ចំណងដៃ និងប៊ិចចំនួន ២ ឈុត គូប៉ុងផ្សងសំណាងចំនួន ៣ សន្លឹក និងកាបូបធ្វើដំណើរចំនួន ។ ជាពិសេសរាល់ការជាវស្រាបៀរ Tiger Crystal ចំនួន ២៥ កេសឡើងទៅ នឹងទទួលបានស្រាបៀរ Tiger Crystal ចំនួន ១ កេស បន្ថែមពីលើរង្វាន់ដែលបានផ្តល់ជូន។

ឆ្លុះបញ្ចាំងភាពអស្ចារ្យនៃអាពាហ៍ពិពាហ៍របស់អ្នកជាមួយស្រាបៀរថៃហ្គ័រ និងមានឱកាសឈ្នះដំណើរកម្សាន្តក្រេបចន្ទទឹកឃ្មុំនៅប្រទេសជប៉ុន ជាមួយបទពិសោធន៍ដ៏រំភើបរីករាយនៃការជិះស្គីទឹកកក រួមជាមួយទឹកប្រាក់១,៥០០ដុល្លារ ចំនួន១៥ រង្វាន់។ កម្មវិធីនេះចាប់ផ្តើមពីថ្ងៃនេះរហូតដល់ថ្ងៃទី ៣០ ខែ កញ្ញា ឆ្នាំ២០១។

ចំពោះព័ត៌មានលម្អិតអំពីកម្មវិធីពិសេសនេះ សូមទំនាក់ទំនង៖ 011 222 400 / 011 333 500៕

ពិសាដោយការទទួលខុសត្រូវ!!!

May 11, 2018

បានរកឃើញក្រុមជ័យលាភីនៃកម្មវិធីកីឡាបាល់ទះឆ្នេរខ្សាច់អន្តរជាតិដំបូងបង្អស់របស់ស្រាបៀរអាន់ឆ័រ

ភ្នំពេញ៖ ព្រឹត្តិការណ៍កីឡាបាល់ទះឆ្នេរខ្សាច់អន្តរជាតិដំបូងបង្អស់របស់ស្រាបៀរអាន់ឆ័រដែលមានឈ្មោះថា International Beach Volleyball 2-Star FIVB World Tour បានឈានដំណាក់កាលចុងក្រោយដ៏រំភើបរីករាយក្រៃលែងបំផុតកាលពីថ្ងៃទីអាទិត្យទី ៦ ខែឧសភា នៅមុខសាលមហោស្រពកោះពេជ្រ ដោយមានការចូលរួមទស្សនាពីមិត្តអ្នកគាំទ្ររាប់ពាន់នាក់។

បន្ទាប់ពីការប្រកួតយ៉ាងខ្លាំងក្លាដែលបានកើតឡើងចាប់ពីថ្ងៃទី ៤ ដល់ថ្ងៃទី ៦ ខែឧសភា រវាងក្រុមកីឡាករអន្តរជាតិចំនួន ២៩ ក្រុមមកពីបណ្តាប្រទេស ១៧ ប្រទេសដូចជា អូស្ត្រាលី កាណាដា ដាណឺម៉ាក អាល្លឺម៉ង់ ក្រិក ជប៉ុន ណូវែលហ្សីឡង់ រុស្ស៊ី ស៊ុយអែដ និងបណ្តាប្រទេសជាច្រើនទៀត គេបានរកឃើញក្រុមជ័យលាភក្នុងវគ្គផ្តាច់ព្រ័ត្រគឺក្រុមជើងឯកបានទៅលើក្រុមកីឡាការិនីមកពីប្រទេស អាល្លឺម៉ង់ ទទួលបានមេដាយមាស។ ក្រុមជើងឯករងបានទៅលើក្រុមកីឡាការិនីមកពីប្រទេសជប៉ុន ទទួលបានមេដាយប្រាក់ និងក្រុមចំណាត់ថ្នាក់លេខ ៣ បានទៅលើក្រុមកីឡាការិនីមកពីប្រទេសរុស្សី ដែលទទួលបានមេដាយសំរឹទ្ធ។

ក្រុមទទួលជ័យលាភីទាំងបីក្រុមនេះមានសិទ្ធិលេងសម្រាប់វគ្គផ្តាច់ព្រ័ត្រក្នុងក្របខ័ណ្ឌ FIVB World Tour ក្នុងព្រឹត្តិការណ៍កីឡាអូឡាំពិចដើម្បីឈានរកទៅជើងឯកពិភពលោក។

បន្ទាប់ពីកម្មវិធីប្រកួតនេះ មានការប្រគុំតន្ត្រីរបស់ស្រាបៀរអាន់ឆ័រដោយមានការអញ្ជើញចូលរួមពីតារាល្បីល្បាញអន្តរជាតិ កញ្ញា ភាមា (Pia Mia) កំពូលតារាចម្រៀងស្រីដ៏ល្បីប្រចាំសហរដ្ឋអាមេរិក ព្រមទាំងតារាល្បីៗប្រចាំព្រះរាជាណាចកម្ពុជាជាច្រើនរូបមានដូចជា កញ្ញា ឱក សុគន្ធកញ្ញា លោក ខេមរៈ សេរីមន្ត លោក នីកូ លោក ឆន សុវណ្ណរាជ អ្នកនាង សុគន្ធ នីសា អ្នកនាង សុខ ស្រីនាង កញ្ញា ទេព បូព្រឹក្ស កញ្ញា សួស វីហ្សា អ្នកនាង ពេជ្រ សោភា កញ្ញា វី ឌីណែត លោក ស្តិប (Step) លោក ជី ដេវីត។

សូមជម្រាបថា នេះជាព្រឹត្តិការណ៍កីឡាបាល់ទះឆ្នេរខ្សាច់អន្ដរជាតិលើកទីមួយដែលប្រារព្ធឡើងនៅក្នុងព្រះរាជាណាចកម្ពុជាដែលរៀបចំឡើងដោយស្រាបៀរអាន់ឆ័រក្រោមកិច្ចសហការជាមួយនឹងសហព័ន្ធកីឡាបាល់ទះអន្តរជាតិ (FIVB) ក្រសួងអប់រំយុវជន និងកីឡា និងសហព័ន្ធកីឡាបាល់ទះកម្ពុជា។ កម្មវិធី International Beach Volleyball 2-Star FIVB World Tour គឺជាផ្នែកមួយនៃកម្មវិធី Anchor International Beach Volleyball Carnival 2018 របស់ស្រាបៀរអាន់ឆ័រដែលបានចាប់ផ្តើមពីថ្ងៃទី ២៤ ខែមីនារហូតដល់ថ្ងៃទី ២៧ ខែឧសភា ឆ្នាំ ២០១៨ នៅខេត្តក្រុងធំចំនួនប្រាំបីរួមមានខេត្តកំពង់ស្ពឺ ព្រះសីហនុ បន្ទាយមានជ័យ បាត់ដំបង កំពង់ចាម រាជធានីភ្នំពេញ រតនគិរី និងសៀមរាប។

ចំពោះព័ត៌មានលម្អិតអំពីព្រឹត្តិការណ៍កីឡាបាល់ទះឆ្នេរខ្សាច់អន្តរជាតិនេះ សូមចូលមើលទំព័រហេ្វសបុករបស់ស្រាបៀរអាន់ឆ័រ៖ https://www.facebook.com/AnchorBeerKH/ ។

ពិសាស្រាបៀរអាន់ឆ័ដោយការទទួលខុសត្រូវ

May 11, 2018

តម្លៃដីមាត់សមុទ្រ ខេត្តព្រះសីហនុអាចនឹងឡើងថ្លៃដូចនៅក្រុងភ្នំពេញដែរ

ស្របពេលដែលវិនិយោគិនបរទេសចូលមកបណ្តាក់ទុនកាន់តែច្រើនឡើងៗ នៅខេត្តព្រះសីហនុ បានធ្វើឱ្យតម្លៃដីនៅជាប់មាត់សមុទ្រក្នុងខេត្តព្រះសីហនុឡើងថ្លៃខ្ពស់ឡើងៗយ៉ាងមិនគួរឱ្យជឿ។ ជាក់ស្តែងតម្លៃដីក្នុងខេត្តព្រះសីហនុនៅតំបន់ខ្លះបានឡើងថ្លៃជិតប្រហែលនឹងតម្លៃដីនៅតំបន់ទួលគោកក្នុង ក្រុងភ្នំពេញដែរ ហើយនៅពេលឆាប់ៗខាងមុខនេះវាអាចនឹងកើនឡើងដូចតម្លៃដីនៅតំបន់បឹងកេងកងដែរ។

លោកជំទាវ លុក សុវណ្ណា អគ្គនាយិកាក្រុមហ៊ុន KH Niron Investment ដែលជាក្រុមហ៊ុនទិញលក់អចលនទ្រព្យដ៏មានសក្តានុពលមួយបានមានប្រសាសន៍ថា កាលពីដើមឆ្នាំ2015 ក្រុមហ៊ុនលោកជំទាវបានទិញដីនៅចង្កេះភ្នំមួយកន្លែងនៅម្តុំ CT ដែលមានចម្ងាយប្រមាណជា 3គីឡូម៉ែត្រពីកំពង់ផែសមុទ្រហើយក្រោយពីវិនិយោគលើដីនោះរួចមក ក្រុមហ៊ុនបានបើកគម្រោងពុះដីឡូត៍លក់ក្នុងមួយឡូត៍មានទំហំ5 x 25ម៉ែត្រដែលមានតម្លៃត្រឹមតែ 20,000ដុល្លារប៉ុណ្ណោះ ហើយបានបញ្ចប់ការលក់នៅដើមឆ្នាំ2017 ប៉ុន្តែរហូតមកទល់បច្ចុប្បន្នដីនៅតំបន់នោះឡើងថ្លៃ100%តែម្តង ពោលគឺក្នុងមួយឡូត៍តម្លៃដល់ទៅ 40,000ដុល្លារឯណោះ។ តែយ៉ាងណាក៏ក្រុមហ៊ុនមានការរីករាយដែរ ខណៈដែលអតិថិជនបានមកទិញដីសម្រាប់វិនិយោគជាមួយក្រុមហ៊ុនទទួលបានផលចំណេញច្រើនដូច្នេះ។

ជាមួយគ្នានេះលោក ហ៊ឹម សីហា ប្រធាននាយកដ្ឋានស្រាវជ្រាវក្រុមហ៊ុន Vtrust Appraisal មានប្រសាសន៍ថា តម្លៃដីនៅខេត្តព្រះសីហនុនៅតែមានសក្តានុពលទៅថ្ងៃអនាគត ដោយសារវិនិយោគិនចិនបន្តចូលមកបណ្តាក់ទុនសាងសង់សំណង់អគារលំនៅឋាន និងអគារខ្ពស់ៗនៅទីនោះកាន់តែច្រើនឡើងៗ “តម្លៃដីនៅខេត្តព្រះសីហនុមិនអាចចុះថ្លៃនោះទេ ទោះជាសេដ្ឋកិច្ចប្រែប្រួលយ៉ាងណាក៏ដោយ ហើយបើសេដ្ឋកិច្ចធ្លាក់ចុះក៏មិនចុះថ្លៃដែរ យ៉ាងច្រើនគ្រាន់តែនៅទ្រឹងមួយរយៈប៉ុណ្ណោះ។

លោកបន្តថា កាលពីប៉ុន្មានឆ្នាំកន្លងទៅអគារចាស់ៗដែលត្រូវគេបោះបង់ចោលនៅលើភ្នំ សឹងតែមិនមានមនុស្សហ៊ានចូលទៅមើលផង ឥឡូវត្រូវបានគេជួសជុលដាក់លក់ ឬជួលបានថ្លៃខ្ពស់កប់ពពកស្ទើរមិនគួរឱ្យជឿទៀតផង ចំណែកបុរីនៅតំបន់ទឹកឈូ ឆា្ងយពីឆ្នេរសមុទ្រ 3ទៅ5គីឡូម៉ែត្រដែលធ្លាប់តែស្ងាត់ជ្រងំ ធ្វើហើយទុកចោលមិនមានមនុស្សចូលទៅនៅផងនោះ ឥឡូវនេះស្រាប់តែមានអតិថិជនចូលទៅជួលនៅ និងជួលក្នុងតម្លៃថ្លៃទៀតផង។

ហើយដីនោះនៅឯនាយសមុទ្រ កាលពីមុនមិនមានមនុស្សទៅលេងទេ តែឥឡូវត្រូវបានក្រុមហ៊ុនបរទេសមួយចំនួនទៅបណ្តាក់ទុននៅទីនោះបង្កើតជារមណីយដ្ឋាន ភោជនីយដ្ឋាន ផ្ទះសំណាក់ Bangalow សម្រាប់ស្នាក់នៅលើដែនកោះ ក្លាយជាកន្លែងទេសចរណ៍ដ៏មានសក្តានុពលទាក់ទាញភ្ញៀវទេសចរខ្មែរ និងបរទេសធ្វើដំណើរឆ្លងទឹកទៅកម្សាន្តកាន់តែច្រើនឡើង។ វាប្រៀបដូចមនុស្សឈឺធ្ងន់ធ្លាប់តែដេកមួយកន្លែង ឥឡូវស្រាប់តែអាចដើររួចរស់រានមានជីវិតក្លាយជាដង្ហើមសេដ្ឋកិច្ចជាតិទៀតផង។

ចំណែកលោកឧកញ៉ា ចេង ខេង អគ្គនាយកក្រុមហ៊ុន CPL មានប្រសាសន៍ទទួលស្គាល់ថា ខេត្តព្រះសីហនុ គឺជាខេត្តមួយក្នុងចំណោមខេត្តឯទៀតដែលមានសក្តានុពលខ្លាំងក្នុងវិស័យអចលនទ្រព្យនេះ។ សក្តានុពលគឺនៅត្រង់ថា ខេត្តព្រះសីហនុគឺជាខេត្តមួយក្នុងចំណោមខេត្តចំនួន3 នៅក្នុងប្រទេសកម្ពុជាដែលមានព្រលានយន្តហោះដឹកអ្នកដំណើរតាមផ្លូវអាកាស មានកំពង់ផែទឹកជ្រៅដែលអាចដឹកទំនិញធុនធ្ងន់ឆ្លងកាត់ពីប្រទេសមួយទៅប្រទេសមួយ មានតំបន់សេដ្ឋកិច្ចពិសេសធំជាងគេ មានផ្លូវរថភ្លើងហើយអ្វីដែលពិសេសនោះ គឺរដ្ឋាភិបាលគ្រោងនឹងសាងសង់ផ្លូវល្បឿនលឿនពីទីក្រុងភ្នំពេញទៅខេត្តព្រះសីហនុដែលមានចម្ងាយតិចជាង 200គីឡូម៉ែត្រនាពេលឆាប់ៗនេះទៀតផង។

អ្វីដែលធ្វើឱ្យអតិថិជនទទួលបានផលចំណេញគឺថា ដីនៅតំបន់មាត់សមុទ្រខេត្តព្រះសីហនុនេះនឹងនៅតែបន្តឡើងថ្លៃទៀតនាពេលខាងមុខ ដោយសារតែជនបរទេសសម្លឹងឃើញ និងបានចូលមកបោះទុនវិនិយោគកាន់តែច្រើនឡើងៗនារយៈពេលចុងក្រោយនេះ ពិសេសជនជាតិចិនតែម្តងដែលធ្វើឱ្យតម្លៃដីកាលពីឆ្នាំមុនមានតម្លៃត្រឹមតែ500 ឬ600ដុល្លារក្នុងម៉ែត្រការ៉េនោះ បច្ចុប្បន្នឡើងថ្លៃដល់ 1,500 ឬ2,000ដុល្លារក្នុង1ម៉ែត្រការ៉េ ស្មើនឹងដីក្នុងតំបន់ទួលគោកក្នុងក្រុងភ្នំពេញដែរ ហើយថា តម្លៃដីនៅទីនោះនឹងកាន់តែឡើងថ្លៃថែមទៀតដូចតំបន់បឹងកេងកងដែរ នៅពេលបរទេសវិនិយោគសាងសង់គម្រោងអគារធំៗនៅទីនោះ។

គួរបញ្ជាក់ថា បច្ចុប្បន្នការផ្គត់ផ្គង់អគារស្នាក់នៅ ឬជួលនៅខេត្តជាប់មាត់សមុទ្រនេះនៅតែមានចំនួនតិចជាងតម្រូវការប្រើប្រាស់ ពិសេសនៅពេលចុងសប្តាហ៍ ឬថ្ងៃបុណ្យទានផ្សេងៗ ផ្ទះសំណាក់ ឬសណ្ឋាគារនៅតំបន់នោះនឹងឡើងថ្លៃខ្លាំង ហើយពេលខ្លះថែមទាំងរកជួលស្នាក់នៅមិនបានទៀតផង។ លោកបញ្ជាក់ដូច្នេះថា “ពីមុនតម្លៃផ្ទះសំណាក់ ឬសណ្ឋាគារមានតម្លៃចន្លោះត្រឹមក្រោម 10ដុល្លារទៅដល់ 20ដុល្លារប៉ុណ្ណោះ ប៉ុន្តែបច្ចុប្បន្នបន្ទប់ស្នាក់នៅដែលអន់បំផុតក៏មានតម្លៃពី 70ទៅ 80ដុល្លារដែរក្នុងមួយយប់ ហើយជួនកាលរកបន្ទប់ស្នាក់នៅមិនបានទៀតផង ប្រសិនបើមិនបានកក់មុននោះ”៕

May 11, 2018

ឯកឧត្តម វេង សាខុន៖ “វិស័យកសិកម្មនៅតែសំខាន់សម្រាប់សេដ្ឋកិច្ចកម្ពុជា”

កសិកម្ម នៅតែដើរតួនាទីយ៉ាងសំខាន់សម្រាប់សេដ្ឋកិច្ចកម្ពុជា បើទោះបីជាបច្ចុប្បន្ននេះកម្ពុជាបានប្រែខ្លួនពីប្រទេសកសិកម្មទៅជាប្រទេសឧស្សាហកម្មក៏ដោយ តែជាទូទៅយើងសង្កេតឃើញថា ផ្ទៃដីភាគច្រើនជាតំបន់កសិកម្ម ហើយប្រជាជនភាគច្រើនក៏ជាកសិករផងដែរនៅតាមមូលដ្ឋាន។

ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ បានលើកឡើងថា ការវិវឌ្ឍនៃសេដ្ឋកិច្ចពិភពលោក គឺបានកើតឡើងប្រកបដោយភាពឆាប់រហ័សនៅឆ្នាំ 2017កន្លងទៅនេះ ខណៈកំណើនសេដ្ឋកិច្ចពិភពលោកមានប្រហែលជា 3.7% ចំណែកឯតំបន់អាស៊ានមានកំណើន 5.3%ស្របពេលដែលកម្ពុជាអាចរក្សាបាននូវកំណើនខ្ពស់តាមរយៈការអភិវឌ្ឍលើវិស័យកសិកម្ម ឧស្សាហកម្ម ទេសចរណ៍ និងសេវាកម្មជាច្រើនទៀត។

ក្នុងនោះវិស័យកសិកម្មបានចូលរួមចំណែកប្រមាណ 24.9% នៃផលិតផលក្នុងស្រុកសរុបឆ្នាំ2017 ខណៈសេវាកម្មបានចូលរួមចំណែកប្រមាណ 32.9% និងវិស័យសេវាកម្មបានចូលរួមចំណែកប្រមាណ 42.2%។

ឯកឧត្តម វេង សាខុន បានមានប្រសាសន៍ថា៖ “នាពេលបច្ចុប្បន្ននេះ វិស័យកសិកម្មមានការប្រែប្រួលពីចន្លោះ33.6% ទៅ24.9% ចាប់ពីឆ្នាំ2013 ដល់ឆ្នាំ2017 ដែលវា មានការភ្ជាប់គ្នាជាមួយនឹងកំណើននៃវិស័យឧស្សាហកម្ម សំណង់ និងវិស័យសេវាកម្ម។

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានលើកឡើងផងដែរថា បើពិនិត្យលើតម្លៃបន្ថែមសរុប គិតតាមតម្លៃបច្ចុប្បន្ននៃវិស័យកសិកម្ម (GVA)គឺមានការកើនឡើងជារៀងរាល់ឆ្នាំ។ នៅឆ្នាំ2017កន្លងទៅការរួមចំណែកនៃអនុវិស័យក្នុងផលិតផលក្នុងស្រុកសរុប រួមមាន ផ្នែកដំណាំចំនួន58.5% ផ្នែកផលិតកម្មសត្វ 11.2% ផ្នែកជលផល 23.5% និងផ្នែកព្រៃឈើ 6.8%។

ជាការកត់សម្គាល់ផលិតកម្មដំណាំ និងជលផល គឺជាកម្លាំងចលករនាំមុខក្នុងផលិតកម្មកសិកម្ម រីឯផលិតកម្មសត្វ គឺជាមុខព្រួញសំខាន់មួយទៀត ក្នុងការផ្គត់ផ្គង់តម្រូវការក្នុងស្រុក និងនាំចេញ ដែលផ្នែកនេះត្រូវជំរុញអភិវឌ្ឍន៍ឱ្យបានខ្លាំងក្លាផងដែរ។ ជារួម បើតាមការវាយតម្លៃយើងឃើញថា វិស័យកសិកម្មមានការកើនឡើងក្នុងរយៈពេល 3ឆ្នាំកន្លងមកនេះគឺពី 0.2% នៅឆ្នាំ2015 ដល់ជិត2% (1.79%) នៅឆ្នាំ2017-2018នេះ។

ចំពោះផ្ទៃដីដាំដុះវិញ ទិន្នផលស្រូវសម្រេចបាន 3.21លានហិកតា កើនឡើង 2.83% បើធៀបនឹងឆ្នាំ 2016 ហើយផ្ទៃដីប្រមូលផលមានចំនួន 3.19លានហិកតា ក្នុងនោះស្រូវវស្សាមាន2.64 លានហិកតា និងស្រូវរដូវប្រាំងមាន 0.55លានហិកតា។ ទិន្នផលស្រូវគិតជាមធ្យមទាំងប្រាំង និងវស្សាបានកើនដល់ 3.295តោនក្នុងមួយហិកតា ក្នុងនោះទិន្នផលស្រូវវស្សាទទួលបានប្រមាណ 3.052តោនក្នុងមួយហិកតា និងទិន្នផលស្រូវរដូវប្រាំងទទួលបាន 4.47តោនក្នុងមួយហិកតា។

បរិមាណផលស្រូវបានកើនឡើងពី 9.39លានតោន នៅឆ្នាំ2013 ដល់ប្រមាណ10.51លានតោននៅឆ្នាំ2017-2018នេះ ក្នុងនោះបរិមាណផលស្រូវវស្សាទទួលបានចំនួន 8.062លានតោន និងបរិមាណផលស្រូវរដូវប្រាំងទទួលបាន 2.45លានតោន ពោលគឺកើនប្រហែល 5.61%ធៀបនឹងឆ្នាំ2016 ធ្វើឱ្យអតិរេកស្រូវមានចំនួន 5.6លានតោន គិតជាអង្ករស្មើនឹង 3.56លានតោន គឺកើនប្រមាណ 8.6% ធៀបនឹងឆ្នាំ2016។ ការប្រើប្រាស់គ្រឿងយន្ដសម្រាប់ផលិតកម្មកសិកម្មជំនួសកម្លាំងអូសទាញដោយគោ-ក្របីនោះគឺមានការកើនឡើងរហូតដល់ 94.42%(ឆ្នាំមុន92.20%)។

ចំណែកឯផលិតកម្មដំណាំរួមផ្សំ និងឧស្សាហកម្ម ពិនិត្យជារួមឃើញថា បរិមាណផលផលិតកម្មបានកើនពី10.54លានតោន នៅឆ្នាំ2013 ដល់ប្រមាណ16.38លានតោននៅឆ្នាំ2017 (កំណើនជាមធ្យមក្នុងរយៈពេល 5ឆ្នាំកន្លងមកនេះមានប្រមាណ 2.35%)។

ការនាំចេញផលិតផលកសិកម្មសរុបបានកើនឡើងពី 4.7លានតោននៅឆ្នាំ2016 ដល់ 5.13លានតោននៅឆ្នាំ2017។ បរិមាណ អង្ករនាំចេញក្នុងឆ្នាំ2017 ក្នុងក្របខ័ណ្ឌនៃច្រកចេញចូលតែមួយសម្រេចបានចំនួន 635,697តោន កើនឡើង 17.30%ធៀបនឹងឆ្នាំ2016 ក្នុងនោះ ប្រភេទអង្ករក្រអូបមានចំនួន 61.99% អង្ករសគ្រប់ប្រភេទមានចំនួន 24.64% និងអង្ករចំហុយមានចំនួន13.37% ដែលបាននាំចេញដោយក្រុមហ៊ុនចំនួន84 ទៅកាន់ទិសដៅ 63ប្រទេសនៅលើសកលលោក។

ចំពោះផលិតកម្មដំណាំកៅស៊ូធម្មជាតិកាលពីឆ្នាំ2017កន្លងទៅ ផ្ទៃដីកៅស៊ូសរុបមានចំនួន 436,340ហិកតា ក្នុងនោះក្រុមហ៊ុនកៅស៊ូកសិឧស្សាហកម្មមានសមាមាត្រចំនួន 64.22% និងកៅស៊ូគ្រួសារមានចំនួន 35.78% បើធៀបទៅនឹងឆ្នាំ2016 សម្ទុះនៃការដាំដុះកៅស៊ូមានការកើនឡើងប្រមាណ 0.83%។ ការនាំចេញកៅស៊ូ សម្រេចបានចំនួន 188832តោន សើ្មនឹងទឹកប្រាក់ប្រមាណ 299លានដុល្លារអាមេរិក បើធៀបនឹងឆ្នាំ2016 គឺកើនឡើង 30.14%។

ការចិញ្ចឹមសត្វ ក៏ជាផ្នែកមួយសំខាន់នៃសូចនាករគោលដៅដែលសម្រេចបានកំណើន1.54% ផងដែរ បើធៀបនឹងឆ្នាំ2016។ ចំនួនសត្វសរុបបានកើនពី 42.18លានក្បាលនៅឆ្នាំ2016 ដល់ 42.83លានក្បាលនៅឆ្នាំ2017 ក្នុងនោះគោកើនឡើង 1.76% ក្របីថយចុះ 2.84% ជ្រូកកើនឡើង 3.49% និងបក្សីកើនឡើង 1.43%។

ជាការកត់សម្គាល់កន្លងមក ស្ទើរតែគ្រប់គ្រួសារកសិករបានចិញ្ចឹមសត្វក្នុងគោលបំណងផ្គត់ផ្គង់តម្រូវការចាំបាច់ក្នុងគ្រួសារ និងប្រើប្រាស់ជាកម្លាំងអូសទាញ។ ប៉ុន្តែការចិញ្ចឹមក្នុងគោលបំណងបែបនេះបានផ្លាស់ប្តូរបន្តិចម្តងៗ ដោយបានប្តូរបែបផែនផលិតកម្មសម្រាប់តែតម្រូវការក្នុងគ្រួសារទៅជាការចិញ្ចឹមសម្រាប់ធ្វើពាណិជ្ជកម្ម។ ក្នុងឆ្នាំ2017កន្លងទៅ ការចិញ្ចឹមជ្រូកជាលក្ខណៈពាណិជ្ជកម្មមានចំនួន 742,771ក្បាលបានកើន 24% បើប្រៀបធៀបនឹងឆ្នាំ2016កន្លងទៅ៕

May 11, 2018

វីដេអូខ្លី “ឈ្លក់ទឹកម៉ាស៊ីន” តែន័យអប់រំ

ភ្នំពេញ៖ ខ្សែវីដេអូអប់រំខ្នាតខ្លី ឆ្លុះបញ្ចាំងអំពីបុរសម្នាក់ រៀនចប់ថ្នាក់មហាវិទ្យាល័យភ្លាម ទទួលបានការងារ និងប្រាក់បៀវត្សរ៍ខ្ពស់ ក្នុងចំណោមមិត្តភក្តិរបស់គេ។ ដោយសារតែភាពអំណួតរបស់ខ្លួនធ្វើឲ្យបុរសនោះឈ្លក់វង្វេងជាមួយនឹងការប្រើប្រាស់សម្ភារនិយម ដើរលេងចាយវាយមិនចេះគិត រហូតធ្លាក់ខ្លួនមានបំណុលច្រើន។

ប៉ុន្តែដោយសារតែគាត់ជាមនុស្សឆ្លាត និងមានក្តីស្រមៃកសាងគ្រួសារតូចមួយដែលមានសុភមង្គល គាត់ក៏រៀនសន្សំប្រាក់ នៅទីបំផុតក្តីស្រមៃរបស់គាត់ក្លាយជាការពិត៕

May 11, 2018

ប្រវត្តិហាងកាហ្វេល្បី ដាក់តាំងដោយរទេះ នង្គ័លដែលម្ចាស់ធ្លាប់ប្រើកាលពីអាយុ 7ឆ្នាំ

ផ្តើមចេញពីកុមារភាពជាក្មេងជនបទ លោក ម៉ៅ វិបុល ជាម្ចាស់ហាងកាហ្វេដ៏ល្បីមួយដែលបង្កើតឡើងដោយគំនិតច្នៃប្រឌិត មានរចនាប័ទ្មនៃការតុបតែងបែបខ្មែរព្រោះលោកជាកូនកសិករមានបេះដូងស្រឡាញ់អ្វីដែលជារបស់ខ្មែរយើង។

គេសង្កេតឃើញថា នៅតាមសាខានៃហាងកាហ្វេនីមួយៗរបស់លោកសុទ្ធតែបានដាក់តាំងនូវរទេះនង្គ័លដែលវាមានអត្ថន័យដ៏ធំធេងសម្រាប់រូបលោក ព្រោះវាជាអនុស្សាវរីយ៍ដែលលោកធ្លាប់ប្រើកាលពីអាយុ 7ឆ្នាំ។

តើនៅពីក្រោយភាពជោគជ័យរបស់ហាងកាហ្វេ Brewhouse ដែលមនុស្សគ្រប់គ្នាធ្លាប់បានស្គាល់ និងសរសើរមិនដាច់ពីមាត់ពីស្នាដៃនៃរសជាតិអាហារនោះមានបង្កប់នូវការតស៊ូ និងឧបសគ្គអ្វីខ្លះ?

កុមារភាព និងការអប់រំលោក ម៉ៅ វិបុល បានកើតក្នុងឆ្នាំ1984 នៅក្នុងឃុំចំប៉ា ស្រុកព្រៃកប្បាស ខេត្តតាកែវ ក្នុងគ្រួសារដែលមានឪពុកម្តាយជាអ្នកធ្វើស្រែចម្ការ ហើយការប្រមូលផលរាល់ឆ្នាំ គឺគ្រប់សម្រាប់តែការទទួលទានតែប៉ុណ្ណោះ មិនមានសល់អ្វីច្រើននោះទេ។

ក្នុងវ័យប្រហែល 7ឆ្នាំ ដែលកាលនោះកុមារាវិបុល ក្រៅតែពីទៅរៀនហើយ នៅមានការងារប្រចាំថ្ងៃមួយទៀត គឺឃ្វាលគោ។ ថ្ងៃមួយគាត់បានឃើញបងប្រុសជីដូនមួយរបស់គាត់មកពីទីក្រុងភ្នំពេញមានម៉ូតូធំ(អាត្រៃ)ជិៈយ៉ាងសង្ហា គាត់ចាប់ផ្តើមមានអារម្មណ៍ប្លែក ហើយក៏សួរទៅបងប្រុសរបស់គាត់ថា បងធ្វើការនៅភ្នំពេញបានប្រាក់ខែប៉ុន្មាន? បងគាត់ឆ្លើយថា ប្រាក់ខែ150ដុល្លារ។ គាត់ក៏ចាប់ផ្តើមអង្គុយគិតថា បងប្រុសរបស់ខ្ញុំតែម្នាក់ឯងរកបានមួយខែ 150ដុល្លារ បើប្រៀបធៀបមកគ្រួសាររបស់ខ្ញុំដែលមានសមាជិក 7-8 នាក់វិញ ធ្វើស្រែពេញ1ឆ្នាំ ហើយបើសិនកុំយកស្រូវដែលធ្វើបាននោះមកហូប តែទុកសម្រាប់លក់វិញ បានចំណូលប្រហែលតែ 300ដុល្លារប៉ុណ្ណោះ។

គិតទៅបានចំណូលត្រឹមស្មើបងប្រុសខ្ញុំធ្វើការតែ 2ខែប៉ុណ្ណោះ ខ្ញុំក៏ចាប់ផ្តើមមានផ្នត់គំនិតថ្មី និងតាំងចិត្តថាខ្ញុំអត់នៅស្រុកស្រែទេ។ កូនចិត្តនេះបានធ្វើឱ្យគាត់ចងចាំក្នុងខួរក្បាល ខណៈខ្លួនឯងមិនទាន់ទាំងដឹងផងថា តើអាចធ្វើអ្វីបាន និងតាមវិធីណានៅឡើយ។ គាត់បានចាប់ផ្តើមខិតខំរៀនសូត្រ ព្រោះគាត់មានក្តីស្រមៃចង់មកធ្វើការនៅភ្នំពេញ។ ដល់វ័យចូលអនុវិទ្យាល័យ យុវជនម៉ៅ វិបុល បានចាប់ផ្តើមចូលរៀននៅវិទ្យាល័យ ហេង សំរិន ព្រៃល្វា ដែលមានចម្ងាយប្រហែលជាង 5គីឡូម៉ែត្រពីផ្ទះ ដោយជិះកង់ទៅមកជារៀងរាល់ថ្ងៃ។

ពីមួយថ្ងៃទៅមួយថ្ងៃ ការខិតខំប្រឹងប្រែងចេះតែទទួលបានលទ្ធផលល្អប្រសើរច្រើន ហើយមុខវិជ្ជាដែលគាត់រៀនពូកែនៅពេលនោះ គឺមុខវិជ្ជាវិទ្យាសាស្ត្រពិត (គណិតវិទ្យា រូបវិទ្យា និងគីមីវិទ្យាជាដើម) តែគាត់មិនសូវពូកែខ្លាំងលើមុខវិជ្ជាវិទ្យាសាស្ត្រសង្គមនោះទេ។ ពេលវេលាសម្រាប់ការសិក្សានៅថ្នាក់មធ្យមសិក្សាហាក់មិនយូរប៉ុន្មានឡើយ។ ភ្លេចៗខ្លួនលោកបានបញ្ចប់ការសិក្សាថ្នាក់វិទ្យាល័យ។

កាលនោះ អ៊ំប្រុសរបស់គាត់ជានាយកសាលា នៅពេលដែលឃើញគាត់រៀនពូកែខាងវិទ្យាសាស្ត្រពិត អ៊ំប្រុសរបស់គាត់បានផ្តល់យោបល់ថា ឱ្យគាត់ចូលធ្វើជាគ្រូបង្រៀន បើគាត់ក្លាយជាគ្រូបង្រៀនគាត់នឹងអាចបង្រៀនកួរបាន ហើយជីវភាពក៏នឹងធូរធារតាមហ្នឹងដែរ តែខុសពីអ្វីដែលអ៊ំប្រុសគាត់រំពឹង យុវជនវិបុល បានមើលឃើញពីគោលដៅរបស់ខ្លួនសំខាន់ជាងអ្វីៗទាំងអស់។ ទឹកចិត្តដ៏មុតមាំនេះបានជំរុញឱ្យគាត់មានសេចក្តីក្លាហានក្នុងការសុំគ្រួសាររបស់គាត់មកភ្នំពេញ។

ពេលនោះ គាត់សម្លឹងឃើញសាលាតិចណូ(វិទ្យាស្ថានបច្ចេកវិទ្យាកម្ពុជា)ជាសាលាល្អមួយសម្រាប់គាត់ក្នុងការកសាងអនាគត ព្រោះគាត់ជាអ្នកដែលមានទេពកោសល្យផ្នែកវិទ្យាសាស្ត្រពិត។

ជាលទ្ធផលគាប់ប្រសើរ លោកបានប្រឡងជាប់ 2សាកលវិទ្យាល័យ គឺសាលាកសិកម្ម និងសាលាពាណិជ្ជសាស្ត្រ ចំណែកឯសាលាតិចណូវិញ គឺលោកជាប់បម្រុងលេខរៀងទី3។ គេនិយាយថា “ក្តីប្រាថ្នាមុតមាំ អាចធ្វើឱ្យទេវតារំភើបចិត្ត” ប្រហែលជាអាចត្រូវសម្រាប់ជីវិតរបស់និស្សិតក្រីក្រដែលពោរពេញដោយក្តីប្រាថ្នាយ៉ាងមុតមាំនៅពេលនោះ។

ទោះបីជាគាត់ជានិស្សិតបម្រុងក្ដី ក៏គាត់នៅតែរង់ចាំឱកាសសម្រាប់ខ្លួនដដែលហើយទីបំផុតសំណាងល្អក៏រត់មករកគាត់មែន គឺនិស្សិតដែលបានប្រឡងជាប់មួយចំនួនសម្រេចចិត្តបោះបង់ ដែលអាចធ្វើឱ្យគាត់បានក្លាយជានិស្សិតពេញសិទ្ធិរបស់វិទ្យាស្ថានបច្ចេកវិទ្យាកម្ពុជា។

ជីវិតសិក្សានៅមហាវិទ្យាល័យ

ក្តីស្រមៃរបស់មនុស្សមិនមែនចេះតែសម្រេចបានងាយៗនោះទេ ហើយសំណាងល្អក៏មិនចេះតែកើតឡើងផ្ទួនៗគ្នាដែរ វាស្រដៀងគ្នាទៅនឹងខ្សែជីវិតរបស់និស្សិត ម៉ៅ វិបុល នៅពេលនោះដែរ។ ក្តីស្រមៃដែលគាត់ស្រឡាញ់ពិតប្រាកដ គឺសិក្សាផ្នែកសំណង់តែដោយសារតែគាត់មិនអាចប្រឡងជាប់ផ្នែកសំណង់ គាត់ក៏សម្រេចចិត្តជ្រើសយកជំនាញផ្នែកគីមីចំណីអាហារវិញ។

ការជ្រើសរើសជំនាញផ្នែកគីមីចំណីអាហារនេះ ក្រោយមកបានក្លាយជាវិថីយ៉ាងត្រចះត្រចង់របស់លោកទៅវិញ ព្រោះក្រោយពេលសិក្សាបានមួយរយៈទើបលោកដឹងថា ជំនាញផ្នែកចំណីអាហារនេះក៏ជាជំនាញមួយដែលលោកស្រឡាញ់ និងអាចអភិវឌ្ឍខ្លួនបានល្អដែរ។ លោកមានបញ្ហាភាសាមិនសូវខ្លាំង ហើយនៅសាលាតិចណូ គេប្រើភាសាអង់គ្លេស និងបារាំងច្រើន បានធ្វើឱ្យលោកខិតខំប្រឹងប្រែងរហូតដល់មានបញ្ហាខួរក្បាលភ្លេចភ្លាំងច្រើន។

ដោយជីវភាពក្រីក្រគាត់មិនមានលទ្ធភាពក្នុងការទិញថ្នាំព្យាបាលនោះទេ ហេតុនេះនៅថ្ងៃមួយគាត់បានអានទស្សនាវដ្តីឃើញថា មើមរមៀតអាចព្យាបាលបញ្ហាភ្លេចភ្លាំងបាន ហេតុនេះគាត់ក៏បានទាក់ទងទៅម្តាយរបស់គាត់ឱ្យទិញរមៀតមកឱ្យគាត់។ គាត់ទទួលទានរមៀតអស់ប្រហែលជាជិត 40គីឡូក្រាម ដែលធ្វើឱ្យដៃ មាត់ និងធ្មេញរបស់គាត់ប្រឡាក់សុទ្ធតែពណ៌របស់រមៀត។

លោក ម៉ៅ វិបុល បានរំឭកថា៖ “កាលណោះ មានអ្នកខ្លះមើលងាយខ្ញុំ តែខ្ញុំមិនខឹងទេ ខ្ញុំបានតាំងចិត្តថា ថ្ងៃនេះគេមើលងាយខ្ញុំសិនចុះ ព្រោះមកពីគេមានឡានជិៈ ហើយខ្ញុំជិះកង់ តែ10ឆ្នាំក្រោយ ខ្ញុំនឹងមានឡានជិៈហើយបើអ្នកឯងមិនមានឡានជិះទេ នោះអ្នកឯងនឹងអន់ជាងខ្ញុំវិញម្តងហើយ។

អំឡុងពេលរៀននៅសាលាតិចណូនោះ លោកក៏ទទួលបានការជួយជ្រោមជ្រែងផងដែរពីបងប្អូន និងសាច់ញាតិមួយចំនួនដែលជួយឧបត្ថម្ភគាំទ្រដោយផ្តល់ផ្ទះឱ្យស្នាក់នៅ និងធនធានខ្លះៗសម្រាប់ឱ្យលោកខ្ចីបង់សាលារហូតដល់លោកបានបញ្ចប់សាកលវិទ្យាល័យ។

លោក ម៉ៅ វិបុល ថតរូបជាមួយភរិយា ក្នុងថ្ងៃបុណ្យនៃក្ដីស្រឡាញ់

ជីវិតការងារ និងការអភិវឌ្ឍអាជីព

ក្រោយភ្លៀង មេឃនឹងស្រឡះ បន្ទាប់ពីបានតស៊ូនឹងភាពលំបាកអស់រយៈពេលប៉ុន្មានឆ្នាំនៅមហាវិទ្យាល័យរួចមក លោកវិបុលបានចាប់ផ្តើមចូលបម្រើការងារជាអ្នកជំនាញមន្ទីរពិសោធន៍ នៅក្នុងអង្គការក្រៅរដ្ឋាភិបាលមួយនៅចន្លោះឆ្នាំ2005ដល់ឆ្នាំ2008។

ក្នុងអំឡុងពេលនោះ លោកទទួលបានប្រាក់ខែជាង 200ដុល្លារនិងប្រាក់ឧបត្ថម្ភផ្សេងៗទៀតដែលសរុបទៅប្រហែលជាជិត 400ដុល្លារដែលសម័យនោះចំនួននេះ គឺច្រើនហើយសម្រាប់អ្នកធ្វើការងារទូទៅ។ លោកគិតថា ការធ្វើការនៅអង្គការវាមិនសូវមានការអភិវឌ្ឍខ្លាំងដូចនៅក្រុមហ៊ុនឯកជននោះទេ ក្រោយមកលោកក៏សម្រេចចិត្តផ្លាស់ប្តូរមកធ្វើការនៅក្រុមហ៊ុនឯកជនវិញម្ដង។

លោកបានចូលបម្រើការងារនៅក្នុងក្រុមហ៊ុនបណ្តាញទូរស័ព្ទ Qb (ប្រព័ន្ធ 013) ផ្នែកទំនាក់ទំនងព័ត៌មានតាមទូរស័ព្ទ (Call Center)។ នៅពេលនោះព្យុះភ្លៀងបានបោកបក់ចូលមកក្នុងជីវិតរបស់លោកសាជាថ្មីម្តងទៀត។

ដោយសារបទពិសោធនៅអង្គការមិនពាក់ព័ន្ធគ្នានឹងការងារដែលលោកធ្វើនៅក្រុមហ៊ុនឯកជននោះ ទើបធ្វើឱ្យពេលចូលធ្វើការដំបូង គេឱ្យប្រាក់ខែតែជាង 100ដុល្លារប៉ុណ្ណោះ។ លោកវិបុលត្រូវរងការលំបាកខ្លាំងលើជីវភាពរស់នៅ ហើយពេលនោះប្អូនរបស់លោកក៏ត្រូវឡើងមកសិក្សានៅមហាវិទ្យាល័យដែរ។

អំឡុងពេលធ្វើការងារនៅពេលនោះ លោកទើបតែចូលធ្វើការបានមួយសប្តាហ៍ក៏ត្រូវនាយកប្រតិបត្តិ (CEO)ក្រុមហ៊ុនហៅទៅព្រមាន ដែលនេះជារឿងមួយធ្វើឱ្យលោកចងចាំមិនភ្លេចអំពីការងារបម្រើសេវាកម្មដល់អតិថិជន។ លោកជាអ្នករៀនពូកែខាងវិទ្យាសាស្ត្រពិតធ្លាប់តែ 2បូក2 ស្មើ4 ដល់ពេលបម្រើសេវាកម្មជូនអតិថិជន ពេលអតិថិជនមានបញ្ហា លោកមិនបានគិតដល់ការពន្យល់ដែលត្រូវបត់បែនតាមអតិថិជននីមួយៗឡើយ។ ពេលនោះភ្ញៀវមិនយល់ហើយបានស្តីឱ្យលោក ហើយលោកក៏បានឈ្លោះជាមួយភ្ញៀវវិញតែម្តង។

ទោះជាស្ថិតក្នុងស្ថានភាពបែបនេះក្តី លោកវិបុលនៅតែមានឱកាសបន្តការងារ ហើយព្យាយាមរៀនសូត្រពីបទពិសោធរហូតដល់បានឡើងតំណែងក្លាយជាមេក្រុមផ្នែកលក់នៅក្នុងរយៈពេលតែប៉ុន្មានខែតែប៉ុណ្ណោះ។ ចាប់ពីពេលនោះមក លោកបានយល់ដឹងច្រើនពីការងារគ្រប់គ្រង។ ក្រោយមកទៀត ដោយមើលឃើញពីឱកាសក្នុងការអភិវឌ្ឍខ្លួនឯង នៅឆ្នាំ2013 លោកវិបុល បានប្តូរទៅធ្វើជានាយកគ្រប់គ្រងទូទៅក្នុងរោងចក្រមួយកន្លែងនៅបែកចាន។

នៅឆ្នាំនោះជាឆ្នាំដែលក្នុងសង្គមរបស់យើងសម្បូរទៅដោយបាតុកម្មរវាងកម្មករ និងថៅកែ តែសំណាងល្អដែរដែលរោងចក្ររបស់លោកគ្រប់គ្រង មិនមានបញ្ហាអ្វីឡើយ តែអ្វីដែលជាបញ្ហាប្រឈមរបស់លោក គឺបញ្ហាគ្រួសារទៅវិញ ព្រោះការងារនៅរោងចក្រឆ្ងាយពីផ្ទះពេក និងត្រូវការចំណាយពេលច្រើនក្នុងការងារកំដរភ្ញៀវមកពីក្រៅប្រទេស។ លោកក៏សម្រេចចិត្តផ្លាស់ប្តូរការងារមកធ្វើការនៅក្រុមហ៊ុន Smart ក្នុងតំណែងជា Head Of Modern Trade and Event Sale ដែលជាតំណែងសំខាន់មួយក្នុងក្រុមហ៊ុន។

លោក ម៉ៅ វិបុល ថតរូបជាមួយភរិយា និងកូនស្រីនៅមុខហាងកាហ្វេ Brew House

នេះជាដំណាក់កាលមួយដែរដែលលោកត្រូវរៀនសូត្រពីបទពិសោធថ្មីៗជាមួយនឹងចៅហ្វាយដែលជាជនជាតិបរទេសដែលមានការដឹកនាំបែបម៉ឺងម៉ាត់ប្លែកថ្មីមួយផ្សេងទៀត ព្រោះកាលពីនៅរោងចក្រលោកបានធ្វើការងារជាមួយចៅហ្វាយដែលស្និទ្ធស្នាលដូចជាបងប្អូន។ ធ្វើការបានយូរបន្តិច ការងាររបស់លោកតម្រូវឱ្យដើរច្រើនដូចជាការងារមុនដដែល ហេតុនេះលោកនៅតែមានបញ្ហាគ្រួសារ ដែលធ្វើឱ្យលោកសម្រេចចិត្តបោះបង់ចោលការងារប្រាក់ខែរាប់ពាន់មកធ្វើអាជីវកម្មផ្ទាល់ខ្លួនវិញ។

ការចាប់ផ្តើមអាជីវកម្មផ្ទាល់ខ្លួន

លោកបានសិក្សាពីអាជីវកម្មហាងកាហ្វេ និងភោជនីយដ្ឋាន ដោយសារតែភរិយារបស់លោកជាអ្នកស្គាល់គ្នាជាមួយនឹងលោកឧកញ៉ា គួច ម៉េងលី ហើយក៏បានចរចាទិញហាងកាហ្វេនេះក្នុងនាមជាអ្នកទិញសិទ្ធិអាជីវកម្ម (Franchise) ពេលនោះលោកឧកញ៉ា គួច ម៉េងលី ក៏ចង់លក់ហាងកាហ្វេនេះដែរ ព្រោះគាត់រវល់ច្រើនជាមួយសាលារៀន និងមន្ទីរពេទ្យ។

លោកវិបុលក៏សម្រេចចិត្តមកអង្គុយសង្កេតមើលក្នុងហាងកាហ្វេនេះរយៈពេល10ថ្ងៃ តាំងពីព្រឹកដល់ល្ងាច បន្ទាប់មកគាត់ក៏សម្រេចចិត្តទិញហាងកាហ្វេនេះ ដោយលក់ផ្ទះដែលម្តាយក្មេកចែកឱ្យ រួមទាំងលុយកាក់មួយចំនួនបានប្រមាណជិត 40ម៉ឺនដុល្លារជាដើមទុនដើម្បីធ្វើអាជីវកម្មហាងកាហ្វេមួយនេះ។

ស្ថានភាពជាក់ស្តែងមិនដូចអ្វីដែលលោកបានគិតនោះទេក្រោយពេលដែលលោកចាប់ផ្តើមដំណើរការហាងកាហ្វេនេះ ដោយសារខែដំបូងៗត្រូវខាតអស់មួយខែជិត 2ម៉ឺនដុល្លារ ព្រោះគ្រាន់តែថ្លៃភ្លើងខែដំបូងអស់ជាង 4,000ដុល្លារ។ ពេលនោះលោកស្ថិតក្នុងស្ថានភាពលំបាកខ្លាំង ពីរនាក់ប្តីប្រពន្ធខ្វាយខ្វល់គេងមិនលក់តែងជជែកពិភាក្សាគ្នារកដំណោះស្រាយរាល់យប់ ពេលខ្លះ1យប់គេងបានតែត្រឹមតែ2-3ម៉ោងប៉ុណ្ណោះ ព្រោះត្រូវគិតគូររកវិធីស្តារអាជីវកម្មនេះឡើងវិញ។

ដោយសារលោកបានគិតគ្នាថា ត្រូវតែលូកឱ្យជ្រៅក្នុងអាជីវកម្មមួយនេះ ទើបធ្វើឱ្យលោកសម្រេចផ្អាកអាជីវកម្មនេះ1ខែដើម្បីជួសជុលហាង ដោយធ្វើការសាងសង់ជាន់ទីមួយបន្ថែមទៀត ហើយរើផ្ទះពីស្ទឹងមានជ័យមកស្នាក់នៅក្នុងហាងតែម្តង ងាយស្រួលមើលការខុសត្រូវ និងចាត់ចែងផ្ទាល់ដើម្បីងាយស្វែងយល់ពីការខាតចំណេញឱ្យបានច្បាស់លាស់។ លោកបានចាប់ផ្តើមប្រឡូកការងារដោយផ្ទាល់ជាមួយបុគ្គលិកទាំងការបម្រើអតិថិជន ទាំងការងារចុងភៅ ក៏ដូចជាការគ្រប់គ្រងជាដើម។

លោកសង្កេតឃើញថា ភ្ញៀវបរទេសភាគច្រើនចំណាយតិចតួចជាមធ្យមត្រឹម 3ដុល្លាក្នុងមួយនាក់ខណៈភ្ញៀវខ្មែរ1នាក់ចំណាយអស់ 6-7ដុល្លារលោកក៏សម្រេចចិត្តផ្លាស់ប្តូរមុខម្ហូប និងធ្វើការរចនាតុបតែងក្នុងហាងជាលក្ខណៈខ្មែរដោយបានយករទេះនង្គ័លពីស្រុកកំណើតដែលលោកធ្លាប់ប្រើពេលលោកអាយុ 7ឆ្នាំមកជួលជុលដាក់តាំងក្នុងហាងព្រោះវាជាអនុស្សាវរីយ៍ និងមានអត្ថន័យដ៏ធំធេងសម្រាប់រូបលោក។

លោកបានលើកឡើងពីការខាតធ្ងន់ធ្ងរក្នុងខែទី1 ដែលបណ្តាលមកពីរឿងធំ3 គឺទី1 ដោយសារហាងនេះលោកទិញពីគេ លោកមិនបានដឹងពីការតប្រព័ន្ធទឹក-ភ្លើងផ្សេងៗឡើយ ចំណែកបុគ្គលិកវិញបើកភ្លើងធ្វើយ៉ាងណាឱ្យភ្លឺពេញហាង និងម៉ាស៊ីនត្រជាក់គ្រប់កន្លែងដោយគ្មានការសន្សំសំចៃ។ ទី2វាជាខែដំបូងការគ្រប់គ្រងមិនបានដិតដល់ បុគ្គលិកកុម្ម៉ង់ទិញសម្ភារ និងគ្រឿងគ្រៅសម្រាប់ធ្វើម្ហូបផ្សេងៗ យើងទិញឱ្យគាត់រហូតដោយមិនបានដឹងថា តើពួកគេប្រើអស់ ឬមិនអស់ ឬខ្ជះខ្ជាយគ្រប់មុខយ៉ាងណានោះឡើយ។ ទី3បញ្ហាធនធានមនុស្សគ្រប់ផ្នែកមិនមានលក្ខណៈស្តង់ដារ ការបម្រើសេវាកម្មមិនបានដិតដល់ធ្វើឱ្យប៉ះពាល់ដល់អារម្មណ៍ភ្ញៀវជាដើម។

លោកបានចាប់ផ្តើមចូលមកកាន់ការងារដោយពិនិត្យមើលគ្រប់ផ្នែក រើចោលប្រព័ន្ធភ្លើងចាស់ៗរៀបចំតថ្មីឡើងវិញ ពិនិត្យមើលធនធានមនុស្សដោយលោកជាអ្នកបង្ហាត់ និងបណ្តុះបណ្តាលផ្ទាល់ទៅតាមផ្នែកនីមួយៗ ប្រាប់ពីវប្បធម៌នៃការធ្វើការងារ ទស្សនវិស័យរបស់ហាងជាដើម។ល។ ចំណែកបុគ្គលិកជាន់ខ្ពស់លោកពិនិត្យមើលភាគច្រើនទៅលើអត្តចរិត ភាពស្មោះត្រង់ និងការតាំងចិត្តធ្វើការងារ ដោយលោកចាប់ផ្តើមបញ្ជ្រាបអំពីទិសដៅវែងឆ្ងាយរបស់ពួកគាត់ទៅជាមួយហាង។

ចូលដល់ខែទី5 លោកចាប់ផ្តើមដឹងពីវិធីសាស្ត្រក្នុងការបង្វិលលុយ។ លោកថា ក្នុងហាងកាហ្វេលុយចូលរាល់ថ្ងៃ ប្រសិនបើមិនចេះរៀបចំទុកដាក់ទេ ចុងខែដឹងតែរកលុយបើប្រាក់ខែឱ្យបុគ្គលិកមិនបានឡើយ។ អ៊ីចឹងយើងត្រូវដឹងថា លុយកញ្ចប់ណាត្រូវទុក លុយកញ្ចប់ណាត្រូវបង់ឱ្យខាងណាមុនដែលជាការចំណាយចំបាច់។ នៅខែទី7 ទើបហាងរបស់លោកឈប់ខាត។

ពាក់ព័ន្ធនឹងអារម្មណ៍របស់លោកនៅពេលជួបបញ្ហាលើកដំបូង លោកនិយាយថា លោកជឿលើកត្តាផ្លូវចិត្តព្រោះលោកពិតជាមានការតក់ស្លុតណាស់ចំពោះស្ថានភាពខាតធ្ងន់ធ្ងរ ដែលលោកបាននិយាយថា ប្រសិនបើអ្នកខ្លះអាចនឹងបោះបង់ចោលបាត់ទៅហើយផងក៏មិនដឹង តែដោយសារកម្លាំងចិត្តមួយដែលជំរុញឱ្យលោកត្រូវតែក្រោកឈរជម្នះគ្រប់ឧបសគ្គទាំងឡាយដោយមិនរាថយ ព្រោះពេលលោកសម្រេចចិត្តបើកអាជីវកម្មមួយនេះ លោកបានបោះបង់ចោលការងារដែលមានប្រាក់ខែរាប់ពាន់ដុល្លារ មិនតែប៉ុណ្ណោះសូម្បីតែសាច់ញាតិ រួមទាំងមិត្តភ័ក្តិជិតស្និទ្ធមួយចំនួនគ្មានអ្នកណាគាំទ្រលោកទេ មានតែភរិយា ម្តាយក្មេក និងម្តាយមីងរបស់លោកប៉ុណ្ណោះដែលបានគាំទ្រ និងជួយជ្រោមជ្រែងពេលលោកជួបស្ថានភាពលំបាកនេះ។

លោកថា មនុស្សគ្រប់គ្នាដែលមិនគាំទ្រលោក គេនឹងចំអកឱ្យលោកប្រសិនបើអាជីវកម្មមួយនេះបរាជ័យ ដូច្នេះហើយទើបធ្វើឱ្យលោកដាក់ជីវិតជាមួយវាដោយសន្យានឹងខ្លួនឯងថា វាមិនអាចដួលបានទេនិងបើទើបទោះជាលោកគេងបានត្រឹមតែ 2-3ម៉ោងក្នុងមួយយប់ក៏ដោយ ក៏លោកត្រូវតែក្រោកឡើងបន្តការងារដោយមិនខ្លាចនឿយហត់ឡើយ ទោះបីជាឈឺក៏នៅតែមានកម្លាំងធ្វើដែរ នោះគឺកម្លាំងចិត្តហ្នឹងឯង ហើយខំរិះគិត ដើរក៏គិត អង្គុយក៏គិត រិះរកគ្រប់វិធីដើម្បីអភិវឌ្ឍវាឱ្យដំណើរការទៅមុខបាន។

លោក ម៉ៅ វិបុល ថតរូបជុំគ្នាជាមួយបុគ្គលិកក្នុងថ្ងៃភ្ជុំបិណ្ឌ

ទីបំផុតរយៈពេលជាងកន្លះឆ្នាំក្រោយទើបលោកបានឈរជើងជាប់ និងបន្តអភិវឌ្ឍរហូតដល់ទទួលបានប្រាក់ចំណេញ ក្លាយជាហាងកាហ្វេមួយដែលមានប្រជាប្រិយភាពក្នុងដួងចិត្តយុវវ័យ និងប្រជាជនខ្មែរ។

ជាចុងក្រោយលោកសូមផ្តាំផ្ញើទៅដល់យុវជនទាំងឡាយដែលចូលចិត្តចូលរួមស្តាប់ក្នុងសិក្ខាសាលាផ្សេងៗមេត្តាយល់ឱ្យបានច្បាស់ពីគំនិតរបស់វាគ្មិនដែលបានធ្វើការចែករំលែក។ សូមកុំគិតថា ការចែករំលែកមួយចំនួនតាមបទពិសោធរបស់គេ យើងមើលឃើញគេជោគជ័យ យើងចង់ធ្វើតាម មិនប្រាកដថាជោគជ័យដូចគេនោះទេ ឧទាហរណ៍មហាសេដ្ឋីលើពិភពលោកគេរៀនអត់ចប់អត់មានសញ្ញាបត្រ យើងបែរជាចង់ឈប់រៀនតាមគេដើម្បីក្លាយជាមហាសេដ្ឋីដូចគេដែរនោះ គឺមិនអាចទៅរួចឡើយ គេរៀនអត់ចប់ អត់បានសញ្ញាបត្រមែន តែគេអានសៀវភៅចប់រាប់សិបក្បាលគេមានចំណុចល្អៗជាច្រើនផ្សេងទៀតដែលយើងអត់មាន ដូច្នេះយើងត្រូវស្តាប់ ដោយការត្រិះរិះ វិភាគនិងពិចារណា និងខិតខំប្រឹងសិក្សារៀនសូត្រឱ្យបានខ្ពង់ខ្ពស់។

ជាចុងក្រោយសូមយុវជន ក៏ដូចជាប្រជាជនទាំងអស់មេត្តាជួយគាំទ្រដល់ម៉ាកសញ្ញាក្នុងស្រុក ដើម្បីលើកទឹកចិត្តដល់អាជីវកររបស់យើងឱ្យមានកម្លាំងចិត្តក្នុងការចូលរួមប្រកួតប្រជែងជាមួយអាជីវកម្មបរទេស៕

May 10, 2018

ក្រុមហ៊ុន LG ប្រកាសផលិតផលទូរទស្សន៍ស៊េរីថ្មី 2018 ជាប់ជញ្ចាំងដ៏ល្អប្រណិត

ក្រុមហ៊ុន LG បង្ហាញស៊េរីទូរទស្សន៏ឆ្នាំ 2018 របស់ខ្លួនជាមួយនឹងម៉ូឌែល OLED និង SUPER UHD ថ្មីដែលប្រកបដោយភាពច្នៃប្រឌិតដែលបង្ហាញពីការប្តេជ្ញាចិត្តរបស់ខ្លួនក្នុងការដឹកនាំទីផ្សារទូរទស្សន៍ដែលមានគុណភាពខ្ពស់ទូទាំងពិភពលោក។ នៅក្នុងព្រឹត្តិការណ៍នៅទីក្រុងសេអ៊ូលក្រុមហ៊ុន LG បានណែនាំផលិតផលទូរទស្សន៍ថ្មីដែលមានបច្ចេកវិទ្យា ThinQ® និង (AI) និងបច្ចេកវិទ្យា α (Alpha) ដ៏ទំនើបដែលនឹងនាំមុខក្នុងការពង្រឹងជំហររបស់ក្រុមហ៊ុន LG នៅក្នុងទីផ្សារទូរទស្សន៍ស៊េរីទំនើបនៅលើពិភពលោក។ ទីផ្សារសម្រាប់ទូរទស្សន៍ OLED TVs បានព្យាករណ៏ថានឹងមានការលក់ចំនួន 2,5 លានគ្រឿងនៅឆ្នាំនេះ ពីចំនួន 1,6 លានគ្រឿងក្នុងឆ្នាំ 2017 ។

ក្រុមហ៊ុន LG កំពុងតែកសាងនូវកេរ្តិ៍ឈ្មោះរបស់ខ្លួនជាអ្នកត្រួសត្រាយផ្លូវនៃបច្ចេកវិទ្យាអេក្រង់ OLED ដ៏ធំដែលមានគំរូទូរទស្សន៍ OLEDដែលមានបច្ចេកវិទ្យា(AI) ចំនួន 10 ម៉ូដែលសម្រាប់ឆ្នាំ 2018 ដែលរួមមាន W8, G8, E8, C8 និង B8 ។ ម៉ូដែលនីមួយៗមានការរចនាជាច្រើន រូបភាពនៅលើកញ្ចក់ (ម៉ូដែល 77 / 65W8) ទៅអេក្រង់កញ្ចក់តែមួយ (ម៉ូដែល 65G8) រូបភាពនៅលើកញ្ចក់ (ម៉ូដែល 65 / 55E8) និងការរចនាអេក្រង់ភាពយន្ត (ម៉ូដែល 77/65 / 55C8 និង 65 / 55B8) ។ អេក្រង់ទំហំចាប់ពី 55 អ៊ីញដល់ 77 អ៊ីញជាមួយទូរទស្សន៍ SUPER UHD ចំនួន 9 ដែលអាចប្រើប្រាស់ជាមួយបច្ចេកវិទ្យា AI (ម៉ូដែល SK95, SK85 និង SK80) ដែលមានទំហំចាប់ពី 49 ដល់ 75 អ៊ីញ ។

ជាមួយបច្ចេកវិទ្យា (Alpha) 9 ដ៏ឆ្លាតវៃរបស់ក្រុមហ៊ុន LG ធ្វើអោយទូរទស្សន៍ជាច្រើនម៉ូដែលដូចជា W8, G8, E8 and C8 OLED ឈានមុខគេនៅលើទីផ្សារ ។ ទស្សនិកជននឹងទទួលបានការបង្ហាញរូបភាពកាន់តែច្បាស់និងពណ៍ដូចពិតៗដែលអាចមើលឃើញបានពីគ្រប់ជ្រុងទាំងអស់។ ពណ៍ខ្មៅដឹតច្បាស់ល្អជានិមិត្ត សញ្ញានៃទូរទស្សន៍ OLED របស់ក្រុមហ៊ុន LG ។ ជាមួយប្រព័ន្ធសម្លេង Dolby Atmos និងកម្រិតរូបភាពដ៏ច្បាល់ល្អ ។ ទូទស្សន៏ LG និងផ្តល់បទពិសោធន៍ទស្សនាដល់អតិថិជនយ៉ាងជក់ចិត្ត។

ទូរទស្សន៍ជាប់ជញ្ចាំង LG UHD ស៊េរីថ្មីឆ្នាំ 2018 ដែលអាចប្រើបច្ចេកវិទ្យា(AI) ដំណើរការដោយ (Alpha) 7 របស់ LG ដែលជាឧបករណ៍ដំណើរការដ៏មានឥទ្ធិពលដូចគ្នាដែលបានរកឃើញនៅក្នុងស៊េរី B8 ។ រួមបញ្ចូលគ្នាជាមួយបច្ចេកវិទ្យា Nano Cell និង FALD backlighting ទូរទស្សន៍ SuperAHD TVs ដែលអាចប្រើជាមួយយបច្ចេកវិទ្យា AI ផ្តល់ជូននូវរូបភាព LCD កម្រិតខ្ពស់បំផុត។

គុណភាពដែលមិនធ្លាប់មានពីមុនជាមួយពណ៏ខ្មៅកាន់តែដិត, ការបង្ហាញរូបភាពកាន់តែច្បាស់, ធ្វើអោយស្រមោលមើលកាន់តែច្បាស់និងពណ៌ដូចពិតៗមើលឃើញពីចំងាយឆ្ងាយ។ ដើម្បីបំពេញបន្ថែមបទពិសោធមើលដែលបានធ្វើឱ្យប្រសើរឡើងទូរទស្សន៍ SUPER UHD ថ្មីក៏ Support ជាមួយប្រព័ន្ធសម្លេង Dolby Atmos ដើម្បីអោយសំលេងស្តាប់កាន់តែពិរោះ។

ជាមួយនឹងមុខងារ AI ដែលបានបង្កប់នៅខាងក្នុងស្រាប់, អ្នកមើលទូរទស្សន៍ LG អាចនិយាយដោយផ្ទាល់ទៅក្នុងឧបករណ៍បញ្ជាពីចម្ងាយដើម្បីរីករាយនឹងមុខងារពិសេសដែលងាយស្រួលបំផុតនៃបច្ចេកវិទ្យាVoice assistant ទំនើបចុងក្រោយបំផុត។ បច្ចេកវិទ្យានេះត្រូវបានសម្រេចដោយប្រើប្រាស់ប្រព័ន្ធកែច្នៃភាសាប្រើប្រាស់ប្រចាំថ្ងៃ(NLP) ទៅជាការបញ្ជាដោយប្រើចរន្តឆ្លាតវៃនិងការតភ្ជាប់ដោយផ្អែកទៅលើ platform របស់ក្រុមហ៊ុន LG ។

សេវាគាំទ្រទូរទស្សន៍ដែលបានបើកដំណើរការដោយ ThinQ® AI របស់ LG ដោយផ្អែកលើមគ្គុទ្ទេសន៍អេឡិចត្រូនិច (EPG) ដើម្បីផ្តល់ព័ត៌មានទាន់ពេលវេលានិងកំណត់ទីតាំងដែលផ្តល់ជូនមាតិកាដែលចង់បាន។ អ្នកទស្សនាអាចនិយាយថា “ស្វែងរកបទភ្លេងរបស់ភាពយន្តនេះ” ឬ “បិទទូរទស្សន៍នៅពេលកម្មវិធីនេះចប់” ដោយគ្មានការនិយាយពីចំណងជើងកម្មវិធីឬការបញ្ជាក់ពេលវេលាឡើយ។

បច្ចេកវិទ្យាα (Alpha) 9 របស់ LG ធ្វើអោយផលិតផលទូរទស្សន៍ OLED TV ឈានមុខគេនៅលើទីផ្សារ។ អ្នកទស្សនានិងទទួលបាននូវបទពិសោធន៍កាន់តែប្រសើរបន្ថែមទៀត។ ទូរទស្សន៍ SUPER UHD TVs ជាមួយបច្ចេកវិទ្យា LG Nano Cell ធ្វើអោយ (FALD) ដើម្បីផ្តល់ជូននូវពណ៌ខ្មៅកាន់តែខ្លាំង និងពណ៌កាន់តែប្រសើរថែមទៀតដែលមើលច្បាស់ពិត។

រូបភាពដែលមានគុណភាពល្អឥតខ្ចោះ

បច្ចេកវិទ្យា α (Alpha) 9 ថ្មីបំផុតរបស់ក្រុមហ៊ុន LG ផ្តល់នូវរូបភាពពិតជាមួយនឹងពណ៌ដ៏សម្បូរបែប។ ការច្នៃប្រឌិតស្នូលនៃ Processor គឺដំណើរការ 4 ជំហានកាត់បន្ថយសំលេងរំខានទ្វេដង។

មុខងាររបស់ Processor ក៏ជួយធ្វើអោយពណ៍របស់ទូរទស្សន៍កាន់តែប្រសើរឡើងដែលផ្តល់ជូននូវ ពណ៍ដែលកាន់តែដូចនិងរូបភាពពិតជាក់ស្តែង។ បច្ចេកវិទ្យា (Alpha) 9 បង្កើតឡើងដើម្បីទ្រទ្រង់នូវកម្មវិធី (HFR) ដើម្បីផលិតនូវរូបភាពដែលមានចលនាកាន់តែរលូននិងច្បាស់ល្អរូបភាពក្នុងកម្រិត 120 frames ក្នុងមួយវិនាទី។ ជាមួយនិងបច្ចេកវិទ្យាដ៏ទំនើបរបស់ LG OLED TVs 2018 វាអាចបញ្ចាំង កម្មវិធីណា មួយក៏បានជាមួយនិងកម្រិតគុណភាពខ្ពស់បំផុតនិងទស្សនីយភាពដ៏អស្ចារ្យ។

បទពិសោធន៍ភាពយន្តកម្រិត HDR

ទូរទស្សន៍ LG OLED 2018 និងទូរទស្សន៍ SUPER UHD មានលក្ខណះពិសេសគឺភាពយន្តកម្រិត HDR ដែលផ្តល់ជូននូវបទពិសោធន៍ភាពយន្តតាមគេហដ្ឋានយ៉ាងពិតប្រាកដគ្រប់ម៉ូដែលដែល Support ជាមួយមុខងារ HDR កម្រិតខ្ពស់៕

May 9, 2018

សួនច្បារចំនួន2 និងវិទ្យាល័យចំនួន3 ត្រូវបានដាក់ឱ្យប្រើ Public Wi-Fi ឥតគិតថ្លៃ

សូនច្បារ 2កន្លែងក្នុងរាជធានីភ្នំពេញ និងវិទ្យាល័យចំនួន 3ទីតាំងផ្សេងទៀតត្រូវបានក្រសួងប្រៃសណីយ៍ និងទូរគមនាគមន៍សម្ពោធដាក់ឱ្យដំណើរការប្រព័ន្ធ Public Wi-Fi ដែលមានល្បឿនលឿនកម្រិត 1Gps ដោយឥតគិតថ្លៃ ចាប់ពីថ្ងៃទី9 ខែឧសភា ឆ្នាំ2018 នេះតទៅ។

ឯកឧត្តម ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានមានប្រសាសន៍ថា គម្រោង Public Wi-Fi នេះធ្វើឡើងក្រោមកិច្ចសហប្រតិបត្តិការជាមួយនឹងសាជីវកម្មទូរគមនាគមន៍កូរ៉េ(KT) នៃសាធារណរដ្ឋកូរ៉េដោយភាគីកូរ៉េបានផ្ដល់ជូននូវជំនួយឥតសំណងសម្រាប់គម្រោង Public WiFi និង Digital Connectivity for School ដោយធ្វើការដំឡើងនៅក្នុងទីតាំងចំនួន5 គឺ៖1. សួនច្បារសម្ដេចហ៊ុន សែន។ 2.សួនច្បារមុខព្រះបរមរាជវាំង។ 3.វិទ្យាល័យហ៊ុន សែន កំពង់លែង ស្រុកកំពង់លែង ខេត្តកំពង់ឆ្នាំង។ 4. វិទ្យាល័យហ៊ុន សែន ទួលខ្ពស់ ស្រុកទឹកផុស ខេត្តកំពង់ឆ្នាំង។ 5.វិទ្យាល័យអ៊ីវ៉ាស្រង់ កំពង់លែង ស្រុកគងពិសី ខេត្តកំពង់ស្ពឺ។

ក្នុងនោះដែរឧបករណ៍បច្ចេកទេសប្រព័ន្ធ Public Wi-Fi ចំនួន 2កន្លែងនៅសួនច្បារសម្ដេចហ៊ុន សែន និងសួនច្បារមុខព្រះបរមរាជវាំងត្រូវបានដំឡើងរួចរាល់ហើយជាមួយនឹងល្បឿន 1Gps (1ហ្សីហ្គាប៊ីតក្នុងមួយវិនាទី)។ដោយឡែក 3ទីតាំងទៀតដែលជាគម្រោងសម្រាប់សាលារៀនកំពុងស្ថិតក្នុងដំណើរការដំឡើងដែលអាចនឹងដាក់ឱ្យដំណើរការក្នុងពេលឆាប់ៗនេះដែរ។

សម្រាប់ប្រព័ន្ធ Public Wi-Fi នៅទីតាំងសួនច្បារខាងលើនឹងអនុញ្ញាតឱ្យប្រជាពលរដ្ឋទូទៅក៏ដូចជាភ្ញៀវជាតិ និងអន្តរជាតិអាចប្រើប្រាស់អ៊ីនធើណិតបានដោយឥតគិតថ្លៃក្នុងល្បឿនលឿនសម្រាប់ការកម្សាន្ត និងការសិក្សារបស់សិស្សានុសិស្ស។ ដោយឡែក 3ទីតាំងទៀតដែលនៅតាមបណ្ដាខេត្តធ្វើឡើងឱ្យស្របតាមកំណែទម្រង់ស៊ីជម្រៅលើវិស័យអប់រំតាមរយៈការបង្កើតសាលារៀនជំនាន់ថ្មី (NGS) ដែលជាគំរូអភិវឌ្ឍន៍ថ្មីក្នុងប្រព័ន្ធអប់រំសាធារណៈដែលនាំទៅដល់ការបង្កើតសាលារៀនសាធារណៈស្វយ័តទទួលបានការវិនិយោគខ្ពស់ផ្សារភ្ជាប់ស្តង់ដារថ្មីមានគណនេយ្យភាព និងអភិបាលកិច្ចល្អព្រមទាំងស្តងដារវិជ្ជាជីវៈសម្រាប់ការសិក្សាក្នុងសតវត្សទី21 ដែលជាសម័យបច្ចេកវិទ្យាទំនើប និងជឿនលឿន។

តាមរយៈការផ្ដល់នូវសេវាអ៊ីនធើណិតល្បឿនលឿននេះ លោកគ្រូ-អ្នកគ្រូ និងសិស្សានុសិស្សត្រូវបានបំពេញតម្រូវការក្នុងការសិក្សាស្រាវជ្រាវនូវចំណេះដឹងថ្មីៗដែលមានប្រយោជន៍ដល់ការអភិវឌ្ឍសង្គមជាតិ៕

May 9, 2018

Author: វល័ក្ខ