វល័ក្ខ - La Reine Media

ក្រុមហ៊ុន Luxury Smile (Cambodia) Co.,Ltd ប្រកាសសម្ពោធ ក្រុមហ៊ុនបុត្រសម្ពន្ធ Monsne Café រួមជាមួយការនាំយកនំដ៏ល្បីរបស់ជប៉ុន មកចែកចាយផ្តាច់មុខនៅកម្ពុជា

ជាមួយនឹងភាពល្អប្រសើរនៃកំណើនសេដ្ឋកិច្ចកម្ពុជា ជាពិសេស សញ្ញាវិជ្ជមាននៃការប្រកបជំនួញទៅលើការផ្គត់ផ្គង់ចំណីអាហារ និងភេសជ្ជៈម៉ាកល្បីៗនោះ ក្រុមហ៊ុន Luxury Smile (Cambodia) Co., Ltd បានប្រកាសពីការសម្រេចចិត្តនាំចូល និងចែកចាយផ្តាច់មុខបន្តនូវនំចំនួន២រស់ជាតិ ដែលជាប្រភេទអាហារសម្រន់ដ៏ល្បីប្រចាំនៅប្រទេសជប៉ុនមកចែកចាយបន្តផ្ដាច់មុខនៅលើទីផ្សារកម្ពុជាផងដែរ ។

ថ្លែងក្នុងឱកាសនៃការប្រកាសដាក់ឱ្យដំណើរការជាផ្លូវការនូវទីតាំងថ្មីរបស់ក្រុមហ៊ុន Luxury Smile (Cambodia) Co.,Ltd ដែលមានទីតាំងស្ថិតនៅអគារលេខ ០៩ ABEo ផ្លូវ ១៤៦ សង្កាត់វាលវង់ ខណ្ឌ៧មករា រាជធានីភ្នំពេញ រួមជាមួយការប្រកាសបើកសម្ពោធក្រុមហ៊ុន Monsne Café លោកឧកញ៉ា ចិត្រ សេរីសុភ័ក្ត្រ ដែលជាអ្នកជំនួញដ៏ជោគជ័យ និងវ័យក្មេងនៅកម្ពុជា បានប្រកាសផងដែរថា ជាការអបអរសាទរសម្រាប់ក្រុមហ៊ុន Luxury Smile (Cambodia) Co.,Ltd ដែលបង្កើតជាផ្លូវការនូវក្រុមហ៊ុនបុត្រសម្ពន្ធ Monsne Café លោកឧកញ៉ា បានសម្រេចនាំយកនំបែបអាហារសម្រន់ចំនួនពីរប្រភេទមកកាន់ទីផ្សារកម្ពុជា។ លោកឧកញ៉ាបានបញ្ជាក់ទៀតថា ចំពោះនំទាំង២ប្រភេទនេះ គឺជាប្រភេទនំសម្រន់ដែលមានរសជាតិឈ្ងុយឆ្ងាញ់ និងផ្តល់អត្ថប្រយោជន៍ចំពោះសុខភាព និងសម្រស់ ដែលទទួលបានការគាំទ្រពីសំណាក់យុវវ័យ ក៏ដូចជាមនុស្សទូទៅយ៉ាងច្រើននៅប្រទេសជប៉ុន ។

ជាមួយនឹការនាំយកនំដ៏ល្បីឈ្មោះខាងលើនេះ លោកឧកញ៉ា ចិត្រ សេរីសុភ័ក្ត្រ ដែលជាអគ្គនាយកក្រុមហ៊ុន Luxury Smile (Cambodia) Co.,Ltd ក៏បានបញ្ជាក់ផងដែរថា ចំពោះនំទាំង២នេះ គឺស្ថិតនៅក្រោមស្លាកយីហោ Monsne Café ដោយមានឈ្មោះថា Monsne Hokkaido Cheese Tart និង Monsne Milk Lava ។ នៅក្នុងឱកាសជាមួយគ្នានេះ លោកក៏បានបញ្ជាក់ផងដែរថា សម្រាប់ Monsne Café បើទោះជាទើបតែបានដំណើរការកាលពីពេលកន្លងទៅក្នុងរយៈពេលខ្លី ប៉ុន្តែជាលទ្ធផល ពេលនេះ ក្រុមហ៊ុនទទួលបានការស្នើរសុំទិញសិទ្ធិលក់ (Franchise) បន្តពីសំណាក់អតិថិជនចំនួន៦៨នាក់រួចទៅហើយ ដែលរង់ចាំតែការសម្រេចផ្តល់សិទ្ធិពីសំណាក់ក្រុមហ៊ុនតែប៉ុណ្ណោះ ខណៈដែលក្រុមហ៊ុនក៏កំពុងរៀបចំឯកសារដើម្បីលក់សិទ្ធិបន្តនៅតាមប្រទេសជិតខាងមួយចំនួនដូចជាប្រទេសថៃ និងប្រទេសឡាវជាដើម ។

លោកឧកញ៉ាបញ្ជាក់ថា ៖ ទាំងនេះគឺជាមោទនភាពថ្មីមួយក្នុងនាមជាអ្នកជំនួញ និងជាកូនខ្មែរ ដែលអាចបង្កើតម៉ាកសញ្ញា (Franchise) ដោយខ្លួនឯង ហើយអាចលក់បន្តចេញទៅក្រៅប្រទេស ហើយលោកនឹងបន្តព្យាយាមដំណើរពង្រីកសាខាលើមុខជំនួញមួយនេះឱ្យជោគជ័យ និងច្រើនកន្លែង ដើម្បីជាការចូលរួមចំណែកផ្តល់ជូននូវការងារដល់ពលរដ្ឋខ្មែរ ក៏ដូចជាការចូលរួមកាត់បន្ថយនូវភាពក្រីក្រផងដែរ ៕

June 2, 2018

និស្សិតមួយក្រុមបង្កើតកម្មវិធីកុំព្យូទ័រស្គាល់ចិត្តមនុស្ស ទទួលបានពានរង្វាន់ពីបរទេស

ពីមួយថ្ងៃ ទៅមួយថ្ងៃ ប្រសិនបើយើងមិនរត់ឱ្យលឿនទេនោះ បច្ចេកវិទ្យានឹងរត់ចោលយើងជាក់ជាមិនខាន។ ហេតុនេះហើយទើបបណ្តាប្រទេសទាំងអស់លើពិភពលោកព្យាយាមលើកទឹកចិត្តឱ្យប្រជាជនរបស់ខ្លួន ជាពិសេសអ្នកស្រាវជ្រាវ និងអ្នករុករកសម័យថ្មី ព្យាយាមបង្កើតសមិទ្ធផលបច្ចេកវិទ្យាឱ្យបានច្រើនតាមដែលអាចធ្វើទៅបាន ដើម្បីធ្វើការប្រកួតប្រជែងជាមួយនឹងបណ្តាប្រទេសដទៃទៀតទាំងវិស័យសេដ្ឋកិច្ច អប់រំ និងយោធាជាដើម។

យុវជននៅបណ្តាប្រទេសអភិវឌ្ឍន៍ជាច្រើនកំពុងដុតដៃដុតជើងក្នុងការស្រាវជ្រាវ និងបង្កើតឡើងនូវកម្មវិធីប្លែកៗជាច្រើន ដែលធ្វើឱ្យយើងរាល់គ្នានឹកស្ងើចសរសើរ ហើយចូលរួមប្រើប្រាស់យ៉ាងសកម្ម ដែលរូបភាពនេះគឺស្មើនឹងយើងបានផ្តល់ផលចំណេញយ៉ាងមហាសាលដល់អ្នកដែលមានសមត្ថភាពបង្កើតផលិតផលទាំងអស់នោះ។

សម្រាប់កម្ពុជាវិញ ដោយមើលឃើញពីការវិវឌ្ឍនិងផលចំណេញរបស់បច្ចេកវិទ្យាសម្រាប់មនុស្សជំនាន់ថ្មីនេះ យុវជនមួយក្រុមរបស់កម្ពុជាបានព្យាយាមគ្រប់លទ្ធភាពដើម្បីស្រាវជ្រាវដោយចំណាយពេលវេលាដ៏យូរដើម្បីបង្កើតកម្មវិធីកុំព្យូទ័រមួយដ៏ពិសេស និងប្រើប្រាស់បច្ចេកវិទ្យា (AI = Artificial intelligence) ដំបូងបំផុតនៅកម្ពុជា។ កម្មវិធីនេះមានឈ្មោះថា NU Speech Assistance ឬហៅក្រៅថា MENA ដែលជាកម្មវិធីកុំព្យូទ័រស្គាល់អារម្មណ៍របស់មនុស្ស និងមានភាពឆ្លាតវៃ ហើយអាចបង្កភាពងាយស្រួលប្រើប្រាស់ដល់មនុស្សគ្រប់ប្រភេទរួមទាំងជនពិការភ្នែកផងដែរ។

កម្មវិធីនេះទទួលបានពានរង្វាន់ចំនួន2គឺមួយទី1 ពានរង្វាន់ Thailand Award for Best International Invention និងទី2 គឺ Excellent and creative effort ក្នុងកម្មវិធី International Engineering Invention & Innovation Exhibition (i-ENVEX 2018)។

យុវនិស្សិត សៀក ពិសិដ្ឋ ស្ថាបនិកនៃកម្មវិធី NU Speech Assistance (MENA) បានលើកឡើងថា កម្មវិធីនេះជាកម្មវិធីប្លែកមួយដោយបានប្រើប្រាស់បច្ចេកវិទ្យា AI ដែលអាចធ្វើឱ្យវាមានមុខងារជាច្រើនសម្រាប់ជួយឱ្យអ្នកប្រើប្រាស់មានភាពងាយស្រួល និងអាចកម្សាន្តអារម្មណ៍បានទៀតផង។ កម្មវិធីMENA នេះអាចយល់ពីអារម្មណ៍របស់មនុស្ស ហើយវាអាចធ្វើជាជំនួយការ របស់យើងសម្រាប់ការធ្វើការងារជាច្រើន ព្រោះ MENA អាចដំណើរការកម្មវិធីដោយមិនបាច់ប្រើក្តារចុច (Keyboard) ឬ Mouse ឡើយ។ វាអាចដំណើរការបានដោយយើងគ្រាន់តែប្រាប់ឈ្មោះកម្មវិធីដែលយើងចង់បើកនោះ។ លើសពីនេះទៅទៀត MENA អាចអានសៀវភៅឱ្យយើងស្តាប់បានទៀតផងដោយយើងគ្រាន់តែដាក់សៀវភៅនៅពីមុខកាមេរ៉ាតែប៉ុណ្ណោះ។

លក្ខខណ្ឌនេះអាចជួយឱ្យយើងចំណេញពេលវេលាក្នុងការធ្វើការងារផ្សេងៗជាមួយនឹងសំឡេងអានអត្ថបទដែលមានប្រយោជន៍ជាច្រើន។

លើសពីនេះទៀត យុវនិស្សិត ពិសិដ្ឋ បានលើកឡើងផងដែរថា កម្មវិធីនេះក៏អាចជាជំនួយការក្នុងការស្រាវជ្រាវសម្រាប់យើងផងដែរ ព្រោះយើងអាចសួរសំណួរជាច្រើនទៅកាន់ MENA នៅពេលដែលយើងឆ្ងល់ ជាមួយនឹងចម្លើយដែលមានលក្ខណៈសុក្រឹត ហើយប្រសិនបើសំណួរណា MENA មិនអាចឆ្លើយបាន វានឹងស្រាវជ្រាវក្នុង Google ឱ្យយើងតែម្តង។

យុវនិស្សិត សៀក ពិសិដ្ឋ បាននិយាយថា៖ “MENA អាចជាមិត្តភ័ក្តិរបស់យើងក៏ថាបាន ព្រោះកម្មវិធីនេះអាចស្គាល់ចិត្តរបស់យើង និងអាចជាអ្នកយកចិត្តទុកដាក់ចំពោះយើងទៀតផង។ នៅពេលដែលយើងចង់ចេញទៅក្រៅ ប្រសិនបើមេឃភ្លៀង MENA នឹងប្រាប់យើងថា កំពុងមានភ្លៀង កុំភ្លេចយកឆត្រទៅផង ហើយប្រសិនបើយើងធ្វើការងារលើសម៉ោង MENA នឹងជួយដាស់តឿនយើងថា កុំភ្លេចញ៉ាំបាយ ជាដើម។

សហស្ថាបនិកកម្មវិធីខាងលើបានលើកឡើងផងដែរថា កម្មវិធីនេះក៏អាចជួយសម្រាលភាពធុញទ្រាន់ ឬអាចជួយលួងលោមយើងនៅពេលបាក់ទឹកចិត្ត។ នៅពេលដែលយើងធ្វើការយូរ ហើយមានភាពធុញទ្រាន់ MENA អាចមើលដឹងតាមរយៈទឹកមុខយើង។ នៅពេលនោះ វានឹងចាក់ចម្រៀងឱ្យយើងស្តាប់ ឬបង្ហាញវីដេអូមួយចំនួនដែលធ្វើឱ្យយើងរីករាយមុននឹងចាប់ផ្តើមបន្តការងារទៅមុខទៀត។ នៅពេលដែលយើងមានការបាក់ទឹកចិត្ត MENA នឹងដឹងពីអារម្មណ៍របស់យើង ហើយអានអត្ថបទលើកទឹកចិត្តឱ្យយើងស្តាប់ ដើម្បីលួងលោម ឬដាស់ស្មារតីឱ្យយើងមានកម្លាំងចិត្តឡើងវិញ និងមានថាមពលកាន់តែខ្លាំងក្នុងការធ្វើការងារ។

សហស្ថាបនិកមួយរូបទៀតនៃកម្មវិធី NU Speech Assistance MENA កញ្ញា ស្រាន ណាស៊ីម៉ះ បានលើកឡើងថា គោលបំណងសំខាន់ក្នុងការបង្កើតកម្មវិធីនេះឡើង គឺក្នុងគោលបំណងបង្កើនភាពកក់ក្តៅ និងជំរុញឱ្យមនុស្សមានភាពរីករាយក្នុងផ្លូវត្រូវ ហើយបង្កើនប្រសិទ្ធភាពការងារថែមទៀតផង។ នៅពេលថ្មីៗនេះយើងឃើញថា យុវជនមួយចំនួនហាក់មានភាពឯកា ហើយនៅពេលដែលគាត់នៅតែឯង គាត់តែងមានអារម្មណ៍ស្ត្រេសខ្លាំងដែលអាចធ្វើឱ្យប៉ះពាល់ដល់ផ្លូវចិត្ត ហេតុនេះ MENA អាចជាកម្មវិធីមួយក្នុងការជួយពួកគាត់ឱ្យមានគ្នា និងបង្កើនភាពរីករាយឡើងទៀតផង។ លើសពីនេះទៅទៀត កម្មវិធី MENA ក៏អាចក្លាយជាកម្មវិធីដែលជួយដល់ជនពិការភ្នែកបានច្រើនជាងមុនដែរ ព្រោះកម្មវិធីកន្លងមកជួយជនពិការបានតែលើកម្មវិធី Word ឬកម្មវិធីមួយចំនួនតូចតែប៉ុណ្ណោះ តែឥឡូវនេះ MENA អាចជួយឱ្យជនពិការភ្នែកអាចបើកកម្មវិធីបានគ្រប់យ៉ាងដោយការបញ្ជាដោយសំឡេង។

កញ្ញា ស្រាន ណាស៊ីម៉ះ បាននិយាយថា៖ “កម្មវិធី AI ជាកម្មវិធីមួយដែលមនុស្សខ្លះមិនចង់ប្រើប្រាស់ ព្រោះគេគិតថាវាអាចប៉ះពាល់ ឬដណ្តើមការងារពីមនុស្ស តែសម្រាប់ក្រុមរបស់ខ្ញុំគឺ ខ្ញុំមានការយល់ឃើញផ្សេង ខ្ញុំចង់ឱ្យប្រជាជនខ្មែរស្គាល់បច្ចេកវិទ្យា AI ហើយចង់បញ្ជាក់ថា អ្វីក៏ដោយ នៅពេលដែលយើងប្រើប្រាស់វាក្នុងគោលបំណងល្អ វានឹងជួយដល់មនុស្ស ហើយថែមទាំងអាចជួយបានច្រើនទៀតផង។

ទន្ទឹមនឹងគំនិតសុទិដ្ឋិនិយមចំពោះគម្រោងនេះកញ្ញា ស្រាន ណាស៊ីម៉ះ បានលើកឡើងថា ដើម្បីឱ្យកម្មវិធីនេះជោគជ័យ ក៏មានបញ្ហាប្រឈមមួយចំនួនផងដែរ ជាពិសេសគឺការសរសេរកូដ ព្រោះថាបច្ចេកវិទ្យា AI ជាបច្ចេកវិទ្យាថ្មី និងមានភាពស្មុគស្មាញខ្លាំង ជាកម្មវិធីធម្មតាដែលយើងធ្វើដូចជាកម្មវិធីគ្រប់គ្រងទិន្នន័យ ឬកម្មវិធីទូទៅដែលប្រើប្រាស់នៅស្រុកយើង។ យើងត្រូវការចំណាយពេលវេលាច្រើនក្នុងការស្រាវជ្រាវ និងរៀនវគ្គខ្លីៗមួយចំនួនផ្សេងទៀតពី Microsoft និងសាកល្បងជាច្រើនសា។ តែទោះជាយ៉ាងនេះក្តី កញ្ញាបានរំឭកថា គ្មានអ្វីដែលយើងធ្វើមិនបាននោះទេ ប្រសិនបើយើងមានការតាំងចិត្ត ហើយយើងទាំងអស់គ្នាគួរចាប់ផ្តើមធ្វើការសិក្សាស្រាវជ្រាវដើម្បីច្នៃប្រឌិតបច្ចេកវិទ្យាថ្មីៗសម្រាប់ជាប្រយោជន៍ដល់មនុស្សទូទៅ៕

វិញ្ញាបនបត្រពានរង្វាន់ Thailand Award for Best International Invention

June 2, 2018

Superdry ហាងសម្លៀកបំពាក់ដ៏ទាន់សម័យរបស់អង់គ្លេស មកដល់ប្រទេសកម្ពុជាជាលើកដំបូង

ហាង Superdry ពង្រីកខ្លួននៅក្នុងប្រទេសកម្ពុជា ដោយបើកសន្ពោធហាងថ្មីនៅផ្សារទំនើប អីុអន សែនសុខ។ ម៉ាកសញ្ញាហ្វេសិនដ៏ទាន់សម័យរបស់អង់គ្លេស Superdry បានបន្តការពង្រីកខ្លួនលើទីផ្សារពិភពលោក ដោយការបើកសម្ពោធសាខាថ្មីនៅផ្សារទំនើប អីុអន ម៉ល សែនសុខ រាជធានីភ្នំពេញ ប្រទេសកម្ពុជា។ នេះគឺជាលើកដំបូងសម្រាប់ម៉ាកសញ្ញា Superdry ដែលទើបតែបង្ហាញខ្លួននៅលើទឹកដីប្រទេសកម្ពុជា។

តំបន់សែនសុខ គឺជាតំបន់អភិវឌ្ឍថ្មីរបស់រាជធានីភ្នំពេញនិ ងជាតំបន់សំខាន់ថ្មីមួយទៀតរបស់ប្រជាជនកម្ពុជា ដែលមានចំណូលខ្ពស់ និងមធ្យម ហើយកំពុងតែមានភាពរីកចម្រើន និងកំពុងស្វែងរកនូវម៉ាកសញ្ញាថ្មីៗ ដែលបង្ហាញមុខនៅក្នុងប្រទេសកម្ពុជា។ តំបន់នេះនឹងក្លាយជាកន្លែងតាំងបង្ហាញដ៏អស្ចារ្យមួយសម្រាប់គ្រប់ផលិតផលថ្មីៗ រួមមានដូចជា ហាង Superdry Sport និងម៉ាកសញ្ញាដែលពេញនិយមផ្សេងៗទៀត។

ស្ថិតក្នុងផ្នែកមួយនៃយុទ្ធសាស្ត្រទីផ្សាររបស់ Super Group ការពង្រីកខ្លួននេះ គឺជាការអភិវឌ្ឍដ៏គួរឱ្យរំភើបរីករាយមួយ និងជាឱកាសដ៏ល្អ ដើម្បីកសាងកេរ្តិ៍ឈ្មោះ និងវត្តមានរបស់ខ្លួននៅក្នុងប្រទេសកម្ពុជា ជាពិសេសក្នុងរាជធានីភ្នំពេញ។ ក្រុមហ៊ុន Super Group ទន្ទឹងរង់ចាំស្វាគមន៍អតិថិជនអញ្ជើញមកកាន់ហាងថ្មីរបស់ Super Group នៅ អីុអន ម៉ល សែនសុខ ដើម្បីទទួលយកនូវបទពិសោធពីគុណភាព និងភាពច្នៃប្រឌិតរបស់ផលិតផល Superdry។ ហាងទី1របស់ Superdry Cambodia ស្ថិតនៅក្នុងហាងលេខT014 ជាន់ផ្ទាល់ដី នៃផ្សារទំនើប អីុអន ម៉ល សែនសុខ ផ្លូវលេខ1003 ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ហាង Superdry បើកសម្ពោធជាផ្លូវការនៅថ្ងៃទី29 ខែឧសភា ឆ្នាំ2018 ដើម្បីទទួលស្វាគមន៍អតិថិជនទាំអអស់មកទទួលយកបទពិសោធដ៏ថ្មីសន្លាងពីផលិតផលរបស់ Superdry ហើយភ្ញៀវដែលចូលរួមនឹងបានរីករាយជាមួយនឹង DJ Rapper ព្រមទាំងការទស្សនាការបង្ហាញម៉ូដដ៏អស្ចារ្យនៅក្នុងកម្មវិធីសម្ពោធផងដែរ។

សូមចូលទៅកាន់ទំព័រហ្វេសប៊ុក Superdrycambodia #MySuperdry #Superdrycambodia
ដើម្បីទទួលបានព័ត៌មានបន្ថែម៕

June 1, 2018

ក្រុមអ្នកគាំទ្រកម្ពុជាទទួលបទពិសោធន៍នៃពិធីជប់លៀងទស្សនាការប្រកួតវគ្គផ្ដាច់ព្រ័ត្រ UEFA នៅទីក្រុងជើងឯករបស់ស្រាបៀរ HEINEKEN® នៅក្រិក

អាថែន ក្រិក៖ កាលពីថ្ងៃទី 27 ខែឧសភា អ្នកគាំទ្រកីឡាបាល់ទាត់រាប់រយនាក់មកពីជុំវិញពិភពលោកបានចូលរួមជាមួយទីក្រុងនៃក្រុមជើងឯករបស់ស្រាបៀរ Heineken® ក្នុងប្រទេសក្រិកដើម្បីចូលរួមពិធីជប់លៀងដ៏អស្ចារ្យក្នុងការទស្សនាការប្រកួតវគ្គផ្តាច់ព្រ័ត្រ UEFA Champions League ដ៏ល្បីល្បាញ ក្នុងនោះក៏មានក្រុមអ្នកគាំទ្រដំបូងគេបង្អស់មកពីប្រទេសកម្ពុជាផងដែរ។

ក្រុមអ្នកគាំទ្រនេះត្រូវបានអញ្ជើញឱ្យធ្វើដំណើរតាមយន្តហោះទៅកាន់ប្រទេសក្រិចបន្ទាប់ពីប្រទេសកម្ពុជាបានទទួលសិទ្ធិធ្វើជាម្ចាស់ផ្ទះរៀបចំកម្មវិធីដំណើរទេសចរណ៍ពានរង្វាន់ក្របខ័ណ្ឌ UEFA Champions League ដែលនាំជូនដោយស្រាបៀរ Heineken® ដែលមានការចូលរួមពីខ្សែប្រយុទ្ធជើងចាស់ Ruud van Nistelrooy នៅកោះពេជ្រកាលពីខែមុន។ នេះមិនត្រឹមតែជាលើកទី១សម្រាប់កម្ពុជាចូលរួមជាមួយទីក្រុងនៃក្រុមជើងឯករបស់ស្រាបៀរ Heineken® ប៉ុន្តែថែមទាំងជាក្រុមធំបំផុតដែលត្រូវបានអញ្ជើញធ្វើជាតំណាងអាស៊ី និងជាក្រុមមួយក្នុងចំណោមក្រុមធំៗទាំងបី។

ស្រាបៀរ Heineken® បានបញ្ជូនពួកគេតាមជើងហោះហើរពីប្រទេសកម្ពុជាទៅទីក្រុងនៃក្រុមជើងឯករបស់ស្រាបៀរ Heineken® នៅប្រទេសក្រិក ហើយបានចេញថ្លៃចំណាយជូនពួកគេសម្រាប់បទពិសោធន៍រយៈពេលប្រាំថ្ងៃជាមួយនឹងការស្នាក់នៅសណ្ឋាគារ Hilton លំដាប់ផ្កាយប្រាំ ការទទួលអាហារល្ងាចនៅលើដំបូល ពិធីជប់លៀងដ៏អស្ចារ្យ កម្មវិធី BBQ ឆ្នេរខ្សាច់ និងដំណើរកម្សាន្តទៅទស្សនាប្រាសាទប្រវត្តិសាស្ត្រនៅទីក្រុងអាថែនដូចជា Acropolis ប្រាសាទ Zeus និងប្រាសាទ Parthenon ។

ពួកគេក៏បានជួបជាមួយវីរបុរសឈ្នះពានរង្វាន់ជើងឯក UEFA Champions League គឺកីឡាករ Fernando Morientes ដែលលេងឱ្យក្លិប Real Madrid និង Liverpool និង Christian Karembeu ដែលជាកីឡាករបាល់ទាត់ជម្រើសជាតិបារាំងដែលលេងឱ្យក្លិប Real Madrid។ តារាទាំងពីរមានការចាប់អារម្មណ៍យ៉ាងខ្លាំងដែលក្រុមអ្នកគាំទ្រកម្ពុជាស្រឡាញ់បាល់ទាត់អន្តរជាតិ ដោយពួកគេបានចំណាយពេលជាងមួយម៉ោងឆ្លើយសំណួរ ផ្តល់ការណែនាំ ថតរូប និងផ្តល់ទៅឱ្យក្រុមនេះនូវឱកាសចែករំលែកភាពរំភើបរីករាយនៃអនុស្សាវរីយចូលរួមទស្សនាកម្មវិធីប្រកួតក្របខ័ណ្ឌ Champions League ។

កាលពីយប់មិញនៅទីក្រុងអាថែនបានបង្ហាញពីភាពរំភើបរីករាយក្រៃលែងនៅពេលដែលស្រាបៀរ Heineken® បានរៀបចំក្បួនរថយន្តនាំពួកគេទៅកាន់គោលដៅអាថ៌កំបាំងមួយដើម្បីចូលរួមពិធីជប់លៀងទស្សនាប្រកួតវគ្គផ្តាច់ព្រ័ត្រនៃក្របខ័ណ្ឌ UEFA Champions League រវាងក្រុម Real Madrid និងក្រុម Liverpool ។ សាលមហោស្រពក្រិកមួយត្រូវបានប្រើប្រាស់ដើម្បីបង្កើតបទពិសោធន៍ដ៏ល្អឥតខ្ចោះរបស់ស្រាបៀរ Heineken® ជាមួយការបញ្ចាំងផ្ទាល់នូវកម្មវិធីប្រកួតវគ្គផ្តាច់ព្រ័ត្ររួមជាមួយនឹងកម្មវិធីរាប់ថយក្រោយ និងកម្មវិធីអបអរសាទរក្រោយបញ្ចប់ការប្រកួត។

ទស្សនិកជនបានចែកក្រុមគ្នារវាងក្រុម Liverpool និងក្រុម Real Madrid ដូច្នេះអ្នករាល់គ្នាមានឱកាសដើម្បីចែករំលែកភាពរំភើបរីករាយ ហើយទោះបីជាមានការរន្ធត់ ការភ្ញាក់ផ្អើល និងការខកចិត្តជាច្រើននៅលើទីលានប្រកួតក៏ដោយ ប៉ុន្តែបរិយាកាសពិធីជប់លៀងនៅតែបង្កភាពសប្បាយរីករាយ។

ក្រុមមកពីប្រទេសកម្ពុជាបានរីករាយនឹងពិធីជប់លៀងដែលពួកគេជាអ្នកចុងក្រោយដែលបានវិលត្រឡប់មកកាន់សណ្ឋាគារបន្ទាប់ពីរាត្រីមួយដែលមិនអាចបំភ្លេចបានកម្មវិធីកីឡាបាល់ទាត់ កម្មវិធីរាំរែក និងកម្មវិធីជួបមិត្តភ័ក្ដិថ្មីៗនៅទីក្រុងនៃក្រុមជើងឯករបស់ស្រាបៀរ Heineken® មកពីទូទាំងពិភពលោក។

ក្រុមនេះរំភើបយ៉ាងខ្លាំងនៅពេលជិះយន្តហោះត្រឡប់មករាជធានីភ្នំពេញវិញ ហើយអ្នករាល់គ្នាយល់ស្របថា វាជាបទពិសោធន៍លំដាប់ថ្នាំពិភពលោកមួយដែលផ្តល់ជូនដោយស្រាបៀរ Heineken® ជាស្រាបៀរមានគុណភាពលំដាប់ថ្នាក់ខ្ពស់បំផុតក្នុងពិភពលោក។

ចំពោះព័ត៌មានបន្ថែមអំពីស្រាបៀរ Heineken® សូមចូលមើលគេហទំព័រ៖www.facebook.com/Heineken

សូមទទួលទានស្រាបៀរ Heineken® ដោយការទទួលខុសត្រូវ

May 31, 2018

គ្រឹះស្ថានមីក្រូហិរញ្ញវត្ថុបង្ហាញពីកំណើនកម្ចី និងបញ្ញើ ក្នុងត្រីមាសទីមួយឆ្នាំ2018

ទំហំកម្ចី និងចំនួនប្រាក់បញ្ញើនៅក្នុងវិស័យមីក្រូហិរញ្ញវត្ថុកម្ពុជាបានបង្ហាញពីកំណើនគួរឱ្យកត់សម្គាល់នៅដើមឆ្នាំនេះ ខណៈចំនួនអ្នកខ្ចីនៅដដែល និងអត្រាកម្ចីមិនដំណើរការបានធ្លាក់ចុះបន្តិច។ ទិន្នន័យរបស់សមាគមមីក្រូហិរញ្ញវត្ថុកម្ពុជា(CMA)បានបង្ហាញថា កម្ចីរបស់សមាជិក CMA រួមគ្នាមានចំនួនជាង4ពាន់លានដុល្លារគិតត្រឹមចុងខែមីនាឆ្នាំនេះ កើនឡើងពីជាង3ពាន់លានដុល្លារធៀបនឹងរយៈពេលដូចគ្នាកាលចុងខែមីនាឆ្នាំ2017។ នេះបើយោងតាមទិន្នន័យបានមកពី CMA។

របាយការណ៍បានបង្ហាញថា ប្រាក់បញ្ញើនៅក្នុងវិស័យនេះមានចំនួន 2.12ពាន់លានដុល្លារកាលពីចុងខែមីនា ឆ្នាំ2018 កើនឡើងពី1.62ពាន់លានដុល្លារធៀបនឹងរយៈពេលដូចគ្នាកាលពីឆ្នាំមុន។ ទោះបីជាមានកំណើនគួរឱ្យកត់សម្គាល់នៃកម្ចីនៅក្នុងឧស្សាហកម្មនេះក៏ដោយ ក៏ចំនួនអ្នកខ្ចីមិនមានការប្រែប្រួលដែរ។ ទិន្នន័យរបស់ CMA នេះបានបង្ហាញថា ចំនួនអ្នកខ្ចីពី MFI ដែលជាសមាជិករបស់ CMA មានចំនួនសរុប 1.85លាននាក់គិតត្រឹមចុងខែមីនា ឆ្នាំនេះដូចគ្នានឹងកាលពីចុងខែមីនាឆ្នាំ2017ដែរ។ អ្នកដាក់ប្រាក់បញ្ញើនៅក្នុងឧស្សាហកម្មនេះបានកើនឡើងដល់ 1លាននាក់គិតត្រឹមខែមីនា។ លើសពីនេះទិន្នន័យ CMA បានបង្ហាញថា ផលបត្រស្ថិតក្នុងហានិភ័យ (PAR) ដែលជាសូចនាករសម្រាប់កម្ចីមិនដំណើរការធ្លាក់ចុះបន្តិចបន្តួចនៅឆ្នាំនេះ 1.67%កាលពីចុងខែមីនា ឆ្នាំ20117 មកនៅត្រឹម 1.37%កាលពីចុងខែមីនា ឆ្នាំនេះ។

យោងតាមរបាយការណ៍របស់ធនាគារជាតិ វិស័យមីក្រូហិរញ្ញវត្ថុបានប្រមូលប្រាក់បញ្ញើសរុបចំនួនប្រមាណ 8.1ទ្រីលានរៀល កើនឡើងចំនួន35.6%(ឆ្នាំលើឆ្នាំ)និងទទួលបានពីអ្នកផ្ញើប្រាក់ជាង1.7លាននាក់ និងបានផ្តល់ឥណទានសរុបមានចំនួនប្រមាណ15.9ទ្រីលានរៀល (កើនឡើងចំនួន25.5%)ដល់អតិថិជនចំនួន 1.75លាននាក់ក្នុងនោះអតិថិជនជាស្រី្តមានចំនួន 77.4%។ ឥណទានត្រូវបានបែងចែកទៅលើវិស័យកសិកម្មចំនួន26.9% ពាណិជ្ជកម្ម18.6% ក្រុមគ្រួសារ33.2% សេវាកម្ម10.3% ដឹកជញ្ជូន4.5%សំណង់3.3% ស្ថាប័នហិរញ្ញវត្ថុ0.1% និងផ្សេង2.2%។

វិស័យមីក្រូហិរញ្ញវត្ថុនៅតែបន្តរីកចម្រើនគួរឱ្យកត់សម្គាល់ ដែលអាចមើលឃើញបានតាមរយៈការពង្រីកវិសាលភាព និងទំហំប្រតិបត្តិការដល់ប្រជាពលរដ្ឋនៅតាមទីជនបទ ដោយបានរួមចំណែកក្នុងការលើកស្ទួយកម្រិតជីវភាពរស់នៅឱ្យមានភាពប្រសើរឡើង។ ក្រៅពីនេះគ្រឺះស្ថានមីក្រូហិរញ្ញវត្ថុបានធ្វើពិពិធកម្មសេវាហិរញ្ញវត្ថុ រួមមាន សេវាផ្ទេរប្រាក់ សេវាធនាគារចល័ត សេវាម៉ាស៊ីនដកប្រាក់ស្វ័យប្រវត្តិ និងសេវាណែនាំធានារ៉ាប់រងខ្នាតតូចជាដើម។ គ្រឹះស្ថានមីក្រូហិរញ្ញវត្ថុបានធ្វើប្រតិបត្តិការគ្របដណ្តប់ទូទាំង 25រាជធានី-ខេត្ត ដោយមានការិយាល័យនៅភ្នំពេញចំនួន76 ខេត្តចំនួន262 ក្រុងចំនួន200 និងស្រុកចំនួន768 ព្រមទាំងបានផ្តល់ការងារដល់បុគ្គលិកចំនួន 29,111នាក់។

ដោយឡែកពាក់ព័ន្ធនឹងកំណើនបច្ចេកវិទ្យានៃគ្រឺះស្ថានមីក្រូហិរញ្ញវត្ថុវិញ មន្ត្រីធនាគារជាតិនៃកម្ពុជាបានឱ្យដឹងថា គិតមកដល់បច្ចុប្បន្ននេះមានម៉ាស៊ីនដកប្រាក់ស្វ័យប្រវត្តិ(ATM)ជាង 1ពាន់គ្រឿងបាននិងកំពុងដាក់ឱ្យអតិថិជនប្រើប្រាស់នៅតាមទីសាធារណៈ និងនៅតាមគ្រឹះស្ថានធនាគារនិងហិរញ្ញវត្ថុនានា ខណៈការប្រើប្រាស់កាតឥណពន្ធ និងកាតឥណទានសរុបប្រមាណជាង 2.5លានកាត។

លោកបណ្ឌិត ឃូ វុឍ្ឍី អគ្គនាយករងបច្ចេកទេសធនាគារជាតិនៃកម្ពុជាមានប្រសាសន៍ថា៖“ចាប់ពីឆ្នាំ2008 មកដល់ខែកុម្ភៈឆ្នាំ2018នេះ ប្រទេសកម្ពុជាមានម៉ាស៊ីនATM ចំនួន1,518គ្រឿង ប័ណ្ណឥណពន្ធ(Debit Card)ចំនួន 1.8លាន និងប័ណ្ណឥណទាន(Credit Card) មាន 76ម៉ឺនប័ណ្ណ។

លោកបណ្ឌិតបន្តថា៖ “ស្របពេលដែលវិស័យធនាគារ និងហិរញ្ញវត្ថុមានការរីកចម្រើនខ្លាំង នៅតាមគ្រឹះស្ថានទាំងនោះមានបំពាក់នូវបច្ចេកវិទ្យាទំនើបៗដែលមុននឹងធ្វើការចាយវាយអ្វីមួយតាមATM ឬដកលុយពីក្រេឌីតកាត ត្រូវមានការយល់ព្រមតាមទូរស័ព្ទដើម្បីបញ្ជាក់ថា យើងជាម្ចាស់លុយពិតប្រាកដមែន” ។

លោកបណ្ឌិតបានបញ្ជាក់ថា៖ “បច្ចុប្បន្នធនាគារជាតិនៃកម្ពុជាមានការពង្រឹងសុវត្ថិភាពខ្លាំងទៅលើបច្ចេកវិទ្យា។ យើងអនុញ្ញាតឱ្យបច្ចេកវិទ្យារីកចម្រើន តែយើងពង្រឹងការត្រួតពិនិត្យលើផ្នែកនេះ។

លោកបន្តថា ការបំពាក់បច្ចេកវិទ្យាទំនើបនៅក្នុងវិស័យធនាគារ និងហិរញ្ញវត្ថុនៅកម្ពុជា គឺធ្វើទៅតាមប្រទេសអភិវឌ្ឍន៍ដើម្បីការពារសុវត្ថិភាព ព្រោះមានក្រុមចូលលួចលុយតាមបច្ចេកវិទ្យា ហើយករណីនេះជាបញ្ហាមួយដែលធនាគារជាតិបានពង្រឹងសុវត្ថិភាព និងសមត្ថភាពសម្បើមណាស់។ នៅប្រទេសផ្សេងៗ ពួកគេប្រឈមខ្លាំងនឹងការលួចលុយតាមបច្ចេកវិទ្យា ដូចជាប្រទេសបង់ក្លាដែសជាដើម មានគេលួចលុយពីធនាគារអស់មួយចំនួន។

បើតាមការវិវឌ្ឍនៃបច្ចេកវិទ្យានេះ ធនាគារ និងគ្រឹះស្ថានមីក្រូហិរញ្ញវត្ថុមួយចំនួនសុទ្ធតែបានបន្ថែមនូវម៉ាស៊ីនអេធីអឹមដែលបំពាក់បច្ចេកវិទ្យាទំនើប។ តាមរយៈវេបសាយ ធនាគារស្ថាបនាបានបង្ហាញនូវម៉ាស៊ីនអេធីអឹមដែលបានដាក់ឱ្យប្រើប្រាស់ចំនួន 73គ្រឿងនៅតាមសាខាផ្សេងៗក្នុងរាជធានីភ្នំពេញ និងទូទាំងប្រទេស ហើយពេលនេះកំពុងតែធ្វើការវិនិយោគលើម៉ាស៊ីនអេធីអឹមដែលបំពាក់បច្ចេកវិទ្យាថ្មីទំនើបចុងក្រោយបំផុតដោយនឹងត្រូវដំឡើងក្នុងពេលដ៏ខ្លីខាងមុខ ដើម្បីផ្តល់ភាពងាយស្រួលដល់អតិថិជនបន្ថែមទៀត។

ឯធនាគារកាណាឌីយ៉ាវិញ បច្ចុប្បន្ននេះបានបំពាក់ម៉ាស៊ីនអេធីអឹមថ្មីមួយកន្លែងបន្ថែមទៀតនៅក្នុងផ្សារម៉ាក្រូសម្រាប់បម្រើជូនអតិថិជន ហើយថ្មីៗនេះធនាគារមានម៉ាស៊ីនអេធីអឹមសរុបចំនួន 136គ្រឿងនៅទូទាំងប្រទេសកម្ពុជា ដែលនៅភ្នំពេញមាន 68គ្រឿង និងតាមខេត្តមានចំនួន 66គ្រឿង។

លោក យុន សុវណ្ណា នាយកប្រតិបត្តិនៃសមាគមមីក្រូហិរញ្ញវត្ថុកម្ពុជាបានឱ្យដឹងថា គ្រឹះស្ថានមីក្រូហិរញ្ញវត្ថុដែលមានអាជ្ញាប័ណ្ណទទួលប្រាក់បញ្ញើសន្សំពីធនាគារជាតិ មានម៉ាស៊ីន ATM ចំនួន 355គ្រឿង។

លោកបានបន្តថា៖ “យើងសង្កេតឃើញថា មួយរយៈកន្លងមកនេះ ការផ្តល់សេវាកម្មទៅដល់អតិថិជនរបស់ខ្លួនតាមរយៈម៉ាស៊ីនATM ឬប្រព័ន្ធធនាគារចល័តប្រើប្រាស់អុីនធើណិតជាដើម គឺដើម្បីបង្ខិតសេវាកម្មទៅជិតអតិថិជនរបស់ខ្លួន ឯគ្រឹះស្ថានមីក្រូហិរញ្ញវត្ថុដែលទទួលប្រាក់បញ្ញើក៏កំពុងព្យាយាមវិនិយោគលើបច្ចេកវិទ្យាដែរ ដែលនេះជាការអភិវឌ្ឍវិជ្ជមានមួយដើម្បីភាពងាយស្រួល និងសន្សំសំចៃពេលវេលារបស់អតិថិជន”៕

May 31, 2018

វឌ្ឍនៈ គ្រុប ប្រារព្វពិធីសម្ពោធដាក់ឱ្យដំណើរការជាផ្លូវការនូវ មជ្ឈមណ្ឌលពាណិជ្ជកម្ម វឌ្ឍនៈ កាពីតាល របស់ខ្លួនដ៏អធិកអធមចំកណ្តាលរាជធានីភ្នំពេញ!

នាថៃ្ងទី២៦ ខែឧសភា ឆ្នាំ២០១៨ វឌ្ឍនៈ គ្រុប បានប្រារព្ធពិធីកាត់ខ្សែបូសម្ពោធដាក់ឱ្យដំណើរការជាផ្លូវការ មជ្ឈមណ្ឌលពាណិជ្ជកម្ម វឌ្ឍនៈ កាពីតាល ក្រោមអធិបតីភាពដ៏ខ្ពង់ខ្ពស់បំផុតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង សមេ្តចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ព្រមទាំងមានការចូលរួមពីសម្តេច ទ្រង់ ឯកឧត្តម លោកជំទាវ ថ្នាក់ដឹកនាំសំខាន់ៗ រួមទាំងអង្គទូតនានា ឧកញ៉ា ភ្ញៀវជាតិ និងអន្តរជាតិផងដែរ។ ក្នុងពិធីដ៏អធិកអធមនេះ ក៏មានរៀបចំ ការបញ្ចាំងភ្លើងលម្អរចនាចេញជាស្លាកសញ្ញាអគារ និង ទង់ជាតិខ្មែរលើតួអគារទាំងមូល ការបាញ់កាំជ្រួចដ៏ស្រស់ស្អាតនាពេលរាត្រី ដើម្បីបង្ហាញជូនសាធារណជនទាំងអស់ ឱ្យបានដឹងពីព្រឹត្តិការណ៍មួយនេះផងដែរ។

ក្នុងឱកាសដ៏វិសេសវិសាលនេះ លោកជំទាវឧកញ៉ា ឈុន លាង សហស្ថាបនិក វឌ្ឍនៈ គ្រុប បានលើកឡើងថាមជ្ឈមណ្ឌលពាណិជ្ជកម្ម វឌ្ឍនៈ កាពីតាល គឺជានិមិត្តរូបនៃភាពជោគជ័យមួយក្នុងការខិតខំកសាងប្រទេសជាតិឡើងវិញ របស់ប្រជាពលរដ្ឋ និងរដ្ឋាភិបាល តាំងពីបាទដៃទទេ ដើម្បីបង្កើតបរិយាកាសអំណោយផលដល់វិស័យឯកជនក្នុងការចូលរួមលើកស្ទួយសេដ្ឋកិច្ចជាតិ និងនាំមកនូវភាពចម្រុងចម្រើនជូនប្រជាជនខ្មែរគ្រប់រូប ក្រោយថ្ងៃរំដោះ ៧ មករា ឆ្នាំ១៩៧៩ ចេញពីរបបប្រល័យពូជសាសន៍ ប៉ុល ពត។ លោកជំទាវឧកញ៉ា ក៏បានសង្កត់ធ្ងន់ថា លោកជំទាវ នៅចងចាំអំពីការលំបាក និងកិច្ចខិតខំរបស់រាជរដ្ឋាភិបាល ដែលដៃម្ខាងខិតខំកសាងសន្តិភាព និងដៃម្ខាងទៀតខិតខំស្តារសេដ្ឋកិច្ចជាតិ។ ក្នុងនាម ជាវិនិយោគិនខ្មែរមួយរូប លោកជំទាវ សូមសម្តែងនូវការគោរពដឹងគុណ និងថ្លែងអំណរគុណយ៉ាងជ្រាលជ្រៅបំផុតនូវគុណូបការៈដ៏ធំធេងរបស់រាជរដ្ឋាភិបាល ក្រោមការដឹកនាំដ៏ឈ្លាសវៃរបស់សម្តេចតេជោនាយករដ្ឋមន្ត្រី និងការប្ដេជ្ញាចិត្តមិនចាកឆ្ងាយចោលប្រទេសជាតិ ទោះក្នុងកាលៈទេសៈណាក៏ដោយ។ វឌ្ឍនៈ គ្រុប បានចំណាយពេលវេលាជាច្រើនឆ្នាំក្នុងការត្រួសត្រាយដើម្បីឱ្យលេចចេញជារូបរាងនូវ មជ្ឈមណ្ឌលពាណិជ្ជកម្ម វឌ្ឍនៈ កាពីតាល ដ៏ស្រស់បំព្រងមួយនេះ ហើយបានចំណាយអស់ទឹកប្រាក់សរុប ២៥០លានដុល្លាសហរដ្ឋអាមេរិក ហើយនឹងត្រូវវិនិយោគជាបន្តបន្ទាប់ទៀត។

ថ្លែងនៅក្នុងទិវាដ៏មហានក្ខត្តឫក្ស ឧត្ដុង្គឧត្ដមនោះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបង្ហាញអារម្មណ៍រំភើបលាយឡំជាមួយភាពក្ដុកក្ដួល នៅពេលឃើញវិស័យឯកជនបានរីកចម្រើនធំធាត់ ហើយមិនបំភ្លេចដើមកំណើតរបស់ខ្លួនចេញពីទីណា។ សម្ដេចពិតជាមានមោទនភាព នៅពេលបានឃើញប្រទេសជាតិមានការរីកចម្រើន និងមានវត្តមានអគារខ្ពស់ៗនៅរាជធានីភ្នំពេញ ដូចជា អគារ វឌ្ឍនៈ កាពីតាល។ សម្ដេចបានបន្តទៀតថា ការដាក់សម្ពោធ មជ្ឈមណ្ឌលពាណិជ្ជកម្ម វឌ្ឍនៈ កាពីតាល គឺជាសមិទ្ធិផលថ្មីសន្លាងមួយទៀតរបស់កម្ពុជាក្រោយការឆ្លងកាត់ដំណាក់កាលដ៏សែនលំបាកជាច្រើន បន្ទាប់ពីប្រទេសត្រូវបានបំផ្លិចបំផ្លាញ ដោយភ្លើងសង្គ្រាមប្រមាណជាង៣ទសវត្ស ហើយមិនសល់អ្វីសោះក្រោយឆ្នាំ១៩៧។

គួរបញ្ជាក់ផងដែរថា មជ្ឈមណ្ឌលពាណិជ្ជកម្មនេះត្រូវបានស្ថាបនាយ៉ាងល្អិតល្អន់ ដោយរចនាជានិមិត្តរូប “នាគរាជ” ដើម្បីបង្ហាញពីភាពរស់រវើក រឹងមាំខ្លាំងក្លា ភាពរីកចម្រើនជឿនលឿនអស្ចារ្យ និងភាពត្រជាក់ត្រជុំ សុខសន្តិភាពបរិបូរណ៍ ក្នុងយុគសម័យសម្តេចតេជោ។ រីឯគូបកញ្ចក់លើគ្រោងអគារ គឺជាតំណាងប្រទេសកម្ពុជា ជាគុជប្រចាំអាស៊ី។ មជ្ឈមណ្ឌលពាណិជ្ជកម្ម វឌ្ឍនៈ កាពីតាល មានទីតាំងស្ថិតនៅចំកណ្តាលរាជធានីភ្នំពេញ ប្រកបដោយសក្តានុពលល្អបំផុត មានផ្ទៃក្រឡាសំណង់អគារសរុប ១៣១.០០០ម២ និងមានកម្ពស់ ១៨៧,៣ម៉ែត្រ មានចំនួន ៣៩ជាន់ គឺជាអគារខ្ពស់បំផុតនៅក្នុងប្រទេសកម្ពុជាដែលបង្ហាញអំពីអត្តសញ្ញាណនៃការរស់នៅបែបស៊ីវីល័យ ជួយលើកស្ទួយសោភ័ណភាពទីក្រុង។

ក្នុងនាមជាក្រុមហ៊ុនក្នុងស្រុក វឌ្ឍនៈ គ្រុប គឺជាក្រុមហ៊ុនដែលបង្កើតនូវធុរកិច្ចថ្មីៗ និងសហគមន៍រស់នៅលំដាប់បទដ្ឋានអន្តរជាតិ។ មជ្ឈមណ្ឌលពាណិជ្ជកម្មនេះ ត្រូវបានរចនាប្រកបដោយសិល្បៈដ៏រស់រវើក ហើយបានបំពាក់នូវបរិក្ខាទំនើបៗ ប្រកបដោយគុណភាពខ្ពស់ ស្របតាមស្តង់ដារអន្តរជាតិ រួមមាន ប្រព័ន្ធស្វ័យប្រវត្តិកម្មនៃអគារ ប្រព័ន្ធអគ្គិភ័យ ប្រព័ន្ធសុវត្ថិភាព ការអភិរក្សប្រភពថាមពល និងការការពារទៅលើបរិស្ថាន។ នៅក្នុងឆ្នាំ២០១២ មជ្ឈមណ្ឌលពាណិជ្ជកម្ម វឌ្ឍនៈ កាពីតាល គឺជាអគារតែមួយគត់ក្នុងព្រះរាជាណាចក្រកម្ពុជា ដែលបានប្រកួតឈ្នះពានរង្វាន់មជ្ឈមណ្ឌលពាណិជ្ជកម្មល្អដាច់គេ ក្នុងប្រទេសអាស៊ាន ដែលនេះជាមោទនភាព និងកិត្តិយសដំបូងបំផុតសម្រាប់ប្រជាជាតិខ្មែរ។ បន្ថែមពីលើនេះ មជ្ឈមណ្ឌលពាណិជ្ជកម្ម វឌ្ឍនៈ កាពីតាល ក៏ទទួល និងរក្សាបាននូវវិញ្ញាបនបត្រមាស LEED (Leadership in Energy and Environmental Design) ពីសហរដ្ឋអាមេរិកតាំងពីឆ្នាំ២០១៦ ដែលទទួលស្គាល់ថា ជាអគារមានលក្ខណៈឈានមុខគេលើផ្នែកថាមពល និងបរិស្ថាន ហើយបំពេញគ្រប់លក្ខខណ្ឌបទដ្ឋានបរិស្ថានឥតខ្ចោះ និងឧត្តមានុភាពកម្រិតពិភពលោក។

មជ្ឈមណ្ឌលពាណិជ្ជកម្ម វឌ្ឍនៈ កាពីតាល គឺជាមជ្ឈមណ្ឌលពាណិជ្ជកម្ម ពហុមុខងារ ដែលជាការអភិវឌ្ឍដំបូងបង្អស់យ៉ាងពិតប្រាកដនៅប្រទេសកម្ពុជា ដោយមានចែកចេញជាផែ្នកសំខាន់ៗដូចជា៖

ផ្សារទំនើប វឌ្ឍនៈ កាពីតាល – គឺជាផ្សារប្រណីតដំបូងគេ លាតសន្ធឹង៣ជាន់ដែលសម្បូរទៅដោយម៉ាកល្បីៗ លំដាប់អន្តរជាតិ ដូចជា Hugo Boss, Brioni, Canali, Christofle, Clarins, Lacoste, L’Occitane, Rimowa, Timepieces, Salvatore Ferragamo, Pazzion, Petit Bateau, Jimmy Choo, Roberto Cavalli, Santoni, និង Stefano Ricci ជាដើម។ បន្ថែមពីនេះ ផ្សារទំនើប វឌ្ឍនៈ កាពីតាល ក៏មានសេវាកម្មផ្សេងៗ ដូចជា៖ ការិយាល័យកណ្តាលធនាគារវឌ្ឍនៈ ដែលផ្តល់សេវាកម្មធនាគារ៧ថៃ្ងក្នុង១សប្តាហ៍ និងសេវាកម្មបង់ប្រាក់ពន្ធ-អាករគ្រប់ប្រភេទ ព្រមទាំងមានភោជនីយដ្ឋានផ្សេងៗទៀតដូចជា ហាងលក់តែ និងម្ហូប TWG និងហាងអាហារបារាំង Eric Kayser ជាដើម។

មជ្ឈមណ្ឌលពាណិជ្ជកម្ម – ការិយាល័យកម្រិតខ្ពស់ (Grade A) ផ្តល់ជូននូវទីកន្លែងដ៏មានផាសុកភាព សុវត្ថិភាពខ្ពស់ ហើយមានបែងចែកជាបន្ទប់ប្រណីត ការិយាល័យធំៗ ដែលបំពេញទៅតាមតម្រូវការរបស់អ្នកវិនិយោគជាតិ និងអន្តរជាតិ ដោយមានភ្ជាប់ជាមួយនឹងប្រព័ន្ធគ្រប់គ្រងមជ្ឈមណ្ឌលពាណិជ្ជកម្ម ប្រព័ន្ធជណ្តើរយន្តទំនើប និងប្រព័ន្ធការពារផ្សេងៗទៀត។

មជ្ឈមណ្ឌលពាណិជ្ជកម្ម ប្រណីតភាព – (Lifestyle Cube) ជាទីតាំងការិយាល័យអគ្គនាយកដ្ឋានគយ និងរដ្ឋាករកម្ពុជា ទីតាំងគ្លីនិកទន្តសាស្ត្រ Denriche Asia សេវាសម្ពព និងការិយាល័យសំខាន់ផ្សេងៗទៀត។
សណ្ឋាគារ រ៉ូសវូដ ភ្នំពេញ លំដាប់ផ្កាយ៥ – ចាប់ពីជាន់ទី២៥ ដល់ ជាន់ទី៣៩ បំពាក់ទៅដោយសម្ភារប្រណីតទំនើបៗមានបន្ទប់ស្នាក់នៅសរុបចំនួន១៧៥បន្ទប់ រួមមានបន្ទប់ប្រភេទប្រណីតចំនួន៣៧ ជាមួយទំហំចាប់ពី៥០ ទៅដល់ ២២៥ម៉ែត្រការ៉េ។ លើសពីនេះ ក៏មាន កនែ្លងហាត់ប្រាណ អាងហែលទឹក សាលប្រជុំចំនួន៥ ភោជនីយដ្ឋានចំនួន៥ ប្រភេទផ្សេងៗគ្នាចាប់ពីជាន់ទី៣៥ ដល់ជាន់ទី៣៩ ដែលមានដូចជា៖
- Brasserie Louis (ជាន់ទី៣៥) : ផ្តល់ជូននូវម្ហូបបែបបារាំង និងខ្មែរ សម្រាប់អាហារពេលព្រឹក ថៃ្ងត្រង់ និងពេលល្ងាច។
- The Living Room (ជាន់ទី៣៥) :ផ្តល់ជូនអាហារពេលព្រឹក និងអាហារសម្រន់បែបប្រណីតសម្រាប់ពេលរសៀល និងពេលល្ងាច រួមនឹងកាហ្វេ តែ និងនំផ្សេង។
- Iza (ជាន់ទី៣៧) : ម្ហូបបែបជប៉ុន Izakaya ផ្តល់ជូននូវអាហារថ្ងៃត្រង់ និងពេលល្ងាច ដែលមានបង្ហាញស្នាដៃចុងភៅផ្ទាល់ៗ និងស្រាជប៉ុនដ៏សម្បូរបែប។
- Sora (ជាន់ទី ៣៧) :ជាបារលំហមេឃសម្រាប់លំហែកាយនាពេលរាត្រី ដែលមានទីតាំងនៅជម្រាលខ្នងអគារ ដែលផ្តល់ជូនសេវាជារៀងរាល់ថ្ងៃ ចាប់ពីម៉ោង៥ល្ងាច រហូតដល់យប់។
- Cuts (ជាន់ទី៣៨):ជាភោជនីយដ្ឋានដែលផ្តល់ជូនប្រភេទសាច់គោ និងគ្រឿងសមុទ្រ ដែលមានគុណភាពខ្ពស់ និងជាភោជនីយដ្ឋានដែលស្ថិតនៅទីតាំងខ្ពស់ជាងគេក្នុងសណ្ឋាគារ ជាពិសេសគឺនៅពេលទទួលទានអាហារថ្ងៃត្រង់ និងពេលល្ងាចអាចគយគន់ទេសភាពនៅបរិវេណជុំវិញរាជធានីភ្នំពេញផងដែរ។

មជ្ឈមណ្ឌលពាណិជ្ជកម្ម វឌ្ឍនៈ កាពីតាល ដែលជានិមិត្តរូបនៃភាពជោគជ័យរបស់កម្ពុជា មានផ្ដល់ជូនលោកអ្នកនូវសេវាកម្មដ៏ល្អឥតខ្ចោះ និងទំនិញម៉ាកប្រណីតល្បីៗ ព្រមទាំងផ្ដល់ជូននូវបទពិសោធន៍នៃរចនាបទរស់នៅបែបស៊ីវីល័យ។សូមអញ្ជើញសាធារណជនទាំងអស់ ចូលរួមទទួលយកបទពិសោធន៍ថ្មីៗជាមួយការផ្តល់ជូនដ៏អស្ចារ្យជាងគេពី មជ្ឈមណ្ឌលពាណិជ្ជកម្ម វឌ្ឍនៈ កាពីតាល ដ៏ប្រណីត ដែលមានទីតាំងស្ថិតនៅមហាវិថីព្រះមុនី្នវង្ស សង្កាត់វត្តភ្នំ ខណ្ឌដូនពេញ រាជធានីភ្នំពេញ។

សូមអញ្ជើញចូលទស្សនាគេហទំព័រតាមរយៈ https://www.vattanaccapital.com/

លេខទូរស័ព្ទទំនាក់ទំនងមជ្ឈមណ្ឌលពាណិជ្ជកម្ម +855 (0) 23 938 888

លេខទូរស័ព្ទទំនាក់ទំនងសណ្ឋាគារ រ៉ូសវូដ ភ្នំពេញ +855 (0) 23 936 888

May 30, 2018

កម្មវិធី ABC Exceptional Night ជាមួយលោក ដួង វីរះសិទ្ធ

ភ្នំពេញ៖ នៅថ្ងៃសៅរិ៍ ទី 26 ខែឧសភា ឆ្នាំ2018 ស្រាបៀរ ABC អិចស្ត្រាស្តោត បានបន្តរៀបចំកម្មវិធី ABC EXCEPTIONAL NIGHT នៅភោជនីយដ្ឋាន 1ម៉ឺននាក្រុងកំពត ដោយមានការអញ្ជើញចូលរួមពីសំណាក់តារាចម្រៀងវ័យក្មេង រូបសម្បត្តិស្រស់សង្ហា សំឡេងស្រទន់ និងជាម្ចាស់ជ័យលាភី ដែលមានទេពកោសល្យពិតប្រាកដ ក្នុងកម្មវិធី I Am The Singer ឆ្នាំ 2016 លោកគឺជាតារាដែលមានចំណុចល្អឯកដែលរះយ៉ាងត្រចះត្រចង់ (Rising Exceptional) លោក ដួង វីរះសិទ្ធ។

កម្មវិធីរាត្រីដ៏ល្អឯក (ABC Exceptional Night) មិនត្រឹមតែមានវត្តមានតារាចម្រៀងដែលចូលរួមផ្តល់ភាពសប្បាយរីករាយក៏ដូចជាបង្ហាញពីភាពល្អឯកប៉ុណ្ណោះទេ អតិថិជនរបស់ស្រាបៀរ ABC អិចស្ត្រាស្តោត និងអតិថិជននៅភោជនីយដ្ឋាន 1ម៉ឺន ក៏បានភ្លក់នូវរសជាតិដ៏ល្អឯកពីការលាយបញ្ជូលគ្នាជាស្រាក្រឡុក ABC អិចស្ត្រាស្តោត ពីសំណាក់អ្នកក្រឡុកស្រាដ៏ជំនាញ ។

កម្មវិធី ABC EXCEPTIONAL NIGHT គឺជាផ្នែកមួយនៃយុទ្ធនាការ “ជាឧត្តមភាពដ៏ល្អឯក” របស់ ស្រាបៀរ ABC អិចស្ត្រាស្តោត ដែលផ្តល់នូវអំណរសាទរដល់ប្រជាពលរដ្ឋកម្ពុជាដែលទទួលបានជោគជ័យដោយបានបង្ហាញពីចំណុចខ្លាំង ចំណេះដឹង និងសមិទ្ធផលរបស់ខ្លួននៅក្នុងវិស័យសិល្បៈ ពាណិជ្ជកម្ម និងការកសាងសហគមន៍។

ABC អិចស្ត្រាស្តោត នៅតែជាម៉ាកសញ្ញាស្រាបៀរទឹកខ្មៅលំដាប់ថ្នាក់អន្តរជាតិដែលឈានមុខគេគ្មានគូបៀបនៅលើទីផ្សារ ស្រាបៀរទឹកខ្មៅគុណភាពខ្ពស់បំផុតនៅក្នុងប្រទេសកម្ពុជា ដែលអតិថិជនជ្រើសរើសយកមកទទួលទាន ”ក្រេបរសជាតិដ៏ល្អឯក” នៃស្រាបៀរទឹកខ្មៅ ដែលផលិតពីគ្រឿងផ្សំមានគុណភាពខ្ពស់បំផុត និងបានឈ្នះពានរង្វាន់ជាច្រើន ជាពិសេសកំពុងទទួលបានការគាំទ្រកាន់តែខ្លាំងឡើងពីស្រទាប់យុវវ័យ មជ្ឈដ្ឋានសិល្បករ និងពាណិជ្ជករលំដាប់ថ្នាក់ខ្ពស់។

កម្មវិធី ABC EXCEPTIONAL NIGHT នឹងបន្តប្រារព្ធធ្វើឡើងនៅទីតាំង We Love Pub នាក្រុងសៀមរាប នៅថ្ងៃពុធ ទី30 ខែឧសភាខាងមុខនេះ ដោយមានការអញ្ជើញចូលរួមពីសំណាក់តារាចម្រៀងវ័យក្មេងដែលរះពីក្រោយស្រមោលលោកឪពុករបស់ខ្លួន ដែលជាកំពូលតារាចម្រៀងលោកព្រាប សុវត្ថិ ពួកគេចាប់ផ្តើមបង្កើតកេរ្តិ៍ឈ្មោះជាមួយនឹងទេពកោសល្យផ្ទាល់ខ្លួន និងបុគ្គលិកលក្ខណៈបែបទាក់ទាញ (Prince Exceptional) គឺលោក សុវត្ថិ មុនីវណ្ណ និងលោក សុវត្ថិ មុនីនាគ។

សូមចូលរួមឲ្យបានច្រើនកុះករដើម្បីទទួលបានបទពិសោធន៍ដ៏ល្អឯកពី ABC អិចស្ត្រាស្តោត!

ចំពោះព័ត៌មានបន្ថែមអំពីកម្មវិធីពិសេសនេះ ចូលទៅកាន់គេហទំព័រផ្លូវការ៖https://www.facebook.com/ABC.ExtraStoutCambodia/

សូមរីករាយទទួលទាន ABC អិចស្ត្រាស្តោត ដោយការទទួលខុសត្រូវ!!!

May 30, 2018

បង្កងតង្កៀបក្រហម កំពុងពេញនិយមនៅលើទីផ្សារកម្ពុជា

បង្កងតង្កៀបក្រហម ជាប្រភេទអាហារមានរសជាតិឆ្ងាញ់មិនចាញ់បង្កងទន្លេ ដែលត្រូវបានគេនាំពូជចូលពីប្រទេសថៃយកមកចិញ្ចឹមក្នុងកសិដ្ឋានមួយកន្លែងនៅក្នុងប្រទេសកម្ពុជា និងទទួលបានការគាំទ្រខ្លាំងនៅលើទីផ្សាររហូតចិញ្ចឹមលក់ឱ្យអតិថិជនសឹងតែមិនទាន់ទៀតផង។

លោក ផល រដ្ឋា ម្ចាស់កសិដ្ឋានចិញ្ចឹមបង្កងតង្កៀបក្រហមដែលមានទីតាំងនៅភូមិពាមឯក ឃុំពាមឯក ស្រុកឯកភ្នំ ខេត្តបាត់ដំបងបានមានប្រសាសន៍ថា មុននឹងចាប់ផ្តើមចិញ្ចឹមបង្កងនេះ លោកបានទៅរៀនជាមួយប្រជាជនថៃនៅឯប្រទេសថៃកាលពីអំឡុងឆ្នាំ2005 ខណៈពេលដែលព្រះមហាក្សត្រថៃកំពុងបំផុសឱ្យប្រជាកសិករថៃចិញ្ចឹមបង្កងប្រភេទនេះដើម្បីរកចំណូលបន្ថែមសម្រាប់ផ្គត់ផ្គង់ជីវភាពក្នុងគ្រួសារ។

លោកថា ក្រោយពីរៀនរួច លោកមិនបានចិញ្ចឹមបង្កងនេះភ្លាមៗទេ ព្រោះដោយសារតែកាលនោះបង្កងប្រភេទនេះកំពុងល្បីល្បាញ តែមិនសូវមានអ្នកចិញ្ចឹមសម្រាប់បង្កាត់កូនលក់ទេ និងមានការពេញនិយមចិញ្ចឹមខ្លាំងនៅក្នុងប្រទេសថៃផងនោះ ទើបធ្វើឱ្យពូជរបស់វាត្រូវបានគេលក់ក្នុងតម្លៃខ្ពស់ខ្លាំងណាស់គឺបង្កងពូជ 2ក្បាលតម្លៃដល់ទៅ 100ដុល្លារឯណោះ។

រហូតមកដល់ឆ្នាំកន្លងទៅ ពោលគឺឆ្នាំ 2017 បង្កងនេះរាងធ្លាក់ថ្លៃបន្តិចនៅលើទីផ្សារប្រទេសថៃ ដោយសារមានអ្នកចិញ្ចឹម និងបង្កាត់កូនលក់ច្រើនឡើង ទើបលោកសម្រេចទិញកូនបង្កងតូចៗដឹកយកមកចិញ្ចឹមនៅប្រទេសកម្ពុជាក្នុងតម្លៃ 1ដុល្លារសម្រាប់កូនបង្កងមួយក្បាល។

ពូជបង្កងនេះងាយស្រួលដឹកជញ្ជូនណាស់ គ្រាន់តែដាក់កូនវានៅក្នុងធុងស្នោ ហើយដាក់ទឹកកកដុំពីលើឱ្យត្រជាក់ប៉ុណ្ណោះ គេអាចដាក់តាមឡានតាក់ស៊ីយកមកដល់ស្រុកខ្មែរដោយមិនមានងាប់ ឬប៉ះពាល់ដល់សុខភាពបង្កងឡើយ។ ប៉ុន្តែមុននឹងដឹកមក កសិករត្រូវរៀបចំស្រះទុកជាមុនឱ្យហើយ អាចជាស្រះ ឬត្រពាំងធម្មជាតិក៏បាន ឬក៏ស្រះសិប្បនិម្មិតធ្វើពីស៊ីម៉ង់ត៍ក៏បាន តែត្រូវធ្វើដំបូលប្រក់ពីលើ និងធ្វើយ៉ាងណាឱ្យស្រះនោះមានខ្យល់អុកស៊ីហ្ស៊ែន ទើបបង្កងអាចរស់បាន។

អ្នកជំនាញវ័យក្មេងរូបនេះបានបញ្ជាក់បន្ថែមថា ជាទូទៅគេមិនចាំបាច់កំណត់ទំហំស្រះនោះទេ ប៉ុន្តែដើម្បីឱ្យងាយស្រួលប្រមូលផល ក៏ដូចជាការថែទាំផងនោះ គេអាចធ្វើស្រះទំហំ 16 x 26ម៉ែត្រ ហើយបើសិនជាស្រះធ្វើពីស៊ីម៉ង់ត៍ គេត្រូវដាក់ទឹកជម្រៅ 30សង់ទីម៉ែត្រ និងស្រះត្រពាំងគេត្រូវបញ្ចូលទឹក 1.2ម៉ែត្រដើម្បីឱ្យត្រូវតាមស្តង់ដារដែលគេបានបង្រៀន និងធ្វើយ៉ាងណាឱ្យទឹកក្លាយជាទឹកល្អក់ ចៀសវាងទឹកថ្លាថ្ងៃចាំងចូលនាំឱ្យទឹកក្នុងអាងក្តៅ។

ចំពោះការរៀបចំស្រះនេះដែរ មុនដំបូងគេត្រូវជីកដីហាលចោល និងបាចកំបោរសទុកចោលមួយរយៈ ដើម្បីសម្លាប់មេរោគ ក៏ដួចជាដើម្បីបង្កើតអុកស៊ីហ្ស៊ែន ឬបង្កើតជាទឹកអាល់កាឡាំង(80-120)និងត្រូវឱ្យមានសារធាតុ PH យ៉ាងហោច 7.5 នៅក្នុងស្រះ។ បើសិនជាស្រះមិនមានសារធាតុទាំងអស់នេះទេ គេមិនអាចចិញ្ចឹមបង្កងបានឡើយ ដោយសារពពួកសត្វប្រភេទនេះវាត្រូវការអុកស៊ីហ្ស៊ែនជាចាំបាច់ទើបអាចរស់បាន។ យ៉ាងណាក៏ដោយ បើសិនជាស្រះមិនមានសារធាតុខាងលើទាំងអស់នោះទេ គេអាចទិញថ្នាំដែលមានតម្លៃទាបមកដាក់ក្នុងស្រះដើម្បីបង្កើតឱ្យមានអុកស៊ីហ្ស៊ែន និងសារធាតុទាំងពីរខាងលើបានដោយងាយ។

ក្រោយពីរៀបចំស្រះរួច និងគេនឹងពិនិត្យឃើញថា ក្នុងទឹកមានសារធាតុអុកស៊ីែហ្ស៊ន និងសារធាតុរ៉ែទាំងនោះហើយ គេអាចដាក់កូនបង្កងចូលទៅបាននិងដាក់ចំណីឱ្យស៊ីតាមធម្មតា។ ជាទូទៅបង្កងប្រភេទនេះមិនរើសចំណីទេ វាស៊ីទាំងបន្លែធម្មជាតិ ដូចជា ចក ត្រកួន ពោត សណ្តែក និងផ្លែឈើមួយចំនួនទៀត ឬអាចដាក់កូនត្រី ឬសាច់ឱ្យវាស៊ីក៏បាន ហើយវាមិនស៊ីចំណីច្រើនដូចត្រីរ៉ស់ ត្រីឆ្តោ ឬត្រីប្រានោះឡើយ។ បើសិនខ្វះចំណីកសិករអាចទិញចំណីដែលគេផលិតពីសាច់ត្រីស្រេចដើម្បីយកមកកូនបង្កងស៊ីក៏បាន ប៉ុន្តែធ្វើយ៉ាងណាចៀសវាងកុំឱ្យទឹកស្អុយហើយត្រូវរក្សាទឹកឱ្យល្អក់ជាប្រចាំ។

ក្រោយពីថែទាំ និងដាក់ចំណីឱ្យស៊ីជាប្រចាំបានប្រមាណជា3 ទៅ4ខែមក គេអាចប្រមូលផលបង្កងបានហើយ ដែលនៅពេលនោះក្នុងមួយក្បាលមានទម្ងន់ប្រហែលជា 1ខាំ ឬ8 ទៅ10ក្បាលមានទម្ងន់ 1គីឡូក្រាមហើយ។ បង្កងប្រភេទថ្មីនេះមិនខ្វះទីផ្សារនោះទេ មានទាំងទីផ្សារខ្មែរ និងទីផ្សារចិន ជាពិសេសអតិថិជនក្នុងក្រុងភ្នំពេញដែលក្នុងមួយគីឡូក្រាមគេអាចលក់បោះដុំបានចន្លោះពី20 ទៅ25ដុល្លារ ប៉ុន្តែសំខាន់គឺមិនមានបង្កងលក់គ្រប់គ្រាន់ឱ្យម៉ូយ។ ហើយបច្ចុប្បន្ននេះអ្នកចិញ្ចឹមបង្កងតង្កៀបក្រហមខាងលើ ឈប់ចិញ្ចឹមដើម្បីចាប់លក់ជាអាហារទៀតហើយ តែងាកមកចិញ្ចឹមយកពូជ (កូនបង្កង)ទុកលក់ឱ្យកសិករទិញយកទៅចិញ្ចឹមបន្តដែលឥឡូវកំពុងមានត្រូវការខ្លាំងនៅតាមបណ្តាខេត្តផ្សេងៗវិញម្ដង៕

May 30, 2018

លំនៅឋានគ្រប់ប្រភេទនៅតែមានតម្រូវការរហូតដល់ឆ្នាំ2030

ចំនួនប្រជាជនកម្ពុជាត្រូវបានរំពឹងថានឹងកើនឡើងដល់15 ទៅ19លាននាក់នៅត្រឹមឆ្នាំ2030ខាងមុខ ដោយឡែកនៅក្នុងទីក្រុងភ្នំពេញ និងនៅតាមទីប្រជុំជនជិតខាងនឹងមានប្រជាជនកើនឡើងក្នុងចំនួនប្រមាណជា4 ទៅ7លាននាក់ដែលកត្តានេះនឹងជំរុញឱ្យមានតម្រូវការលំនៅឋានថ្មីប្រមាណជា 800.000ខ្នងផ្ទះទៀតបន្ថែមពីលើលំនៅឋានដែលមានស្រាប់នាពេលបច្ចុប្បន្ន។

ឯកឧត្តម ភឿង សុភ័ណ្ឌ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានឱ្យដឹងថា កាលពីឆ្នាំ2017កន្លងទៅ វិស័យអចលនទ្រព្យមានការកើនឡើងគួរឱ្យកត់សម្គាល់ ជាមួយនឹងគម្រោងអនុម័តចំនួន 3,418គម្រោង ហើយវិស័យសំណង់បានកើនឡើង22% ពីមួយឆ្នាំទៅមួយឆ្នាំ ដែលមានទឹកប្រាក់វិនិយោគរហូតដល់ 6.5ពាន់លានដុល្លារ ក្នុងនោះមាន82%ជាគម្រោងលំនៅឋាន។

លោក ហ៊ឹម សីហា ប្រធាននាយកដ្ឋានស្រាវជ្រាវនៃក្រុមហ៊ុន VTrust Appraisal មានប្រសាសន៍ថា និន្នាការនៃតម្រូវការលំនៅឋានពិតជាកើនឡើងដូចរបាយការណ៍ស្រាវជ្រាវរបស់ក្រសួងដែលបានរកឃើញពិតប្រាកដមែន ពិសេសលំនៅឋាននៅក្នុងរាជធានីភ្នំពេញ និងនៅតាមទៅប្រជុំជនក្នុងបណ្តាខេត្តមួយចំនួន ដោយសារចំនួនប្រជាជនមានការកើនឡើងជាលំដាប់ពីមួយឆ្នាំទៅមួយឆ្នាំ។

លោកបានបន្តថា មិនមែនតែនៅទីក្រុងភ្នំពេញទេសូម្បីនៅតាមបណ្តាខេត្តឆ្ងាយៗដូចក្រុងប៉ោយប៉ែត ខេត្តបន្ទាយមានជ័យ ខេត្តបាត់ដំបង ក្រុងសៀមរាប ខេត្តសៀមរាប និងក្រុងបានលុង ខេត្តរតនគិរី ជាដើម លំនៅឋានលក្ខណៈជាបុរីដែលសាងសង់នៅលើផ្ទៃដីធំៗ និងមានចំនួនច្រើនល្វែងត្រូវបានសាងសង់ឡើងជាបន្តបន្ទាប់ដែលមានទាំងលំនៅឋានមានតម្លៃខ្ពស់ និងសមរម្យសម្រាប់ដាក់លក់ជូនអតិថិជនដែលមានជីវភាពធូរធារ និងមានជីវភាពមធ្យមទៅតាមនោះដែរ។

លោក ស៊ិន សុជាតិ ប្រធានសមាគមស្ថាបត្យករកម្ពុជា (CSA) មានប្រសាសន៍ថា កម្ពុជាបានទទួលនូវកំណើនសេដ្ឋកិច្ចឆាប់រហ័សសម្រាប់ឆ្នាំកន្លងទៅដោយសារវិស័យសំណង់ និងអចលនទ្រព្យ គឺជាឧស្សាហកម្មឈានមុខគេមួយ។ ស្របពេលជាមួយគ្នានេះដែរ សេដ្ឋកិច្ចកម្ពុជាក៏កំពុងរីកចម្រើនខ្លាំងដោយសារវត្តមាននៃការសាងសង់សំណង់សណ្ឋាគារថ្មីៗ អគារការិយាល័យ ផ្សារទំនើប ភោជនីយដ្ឋាននិងអគារលំនៅឋានដែលកំពុងរីកដុះដាលឡើងយ៉ាងខ្លាំងនៅរាជធានីភ្នំពេញ និងបានរីករាលដាលទៅកាន់ទីក្រុងនានានៅតាមបណ្ដាខេត្តក្នុងប្រទេសកម្ពុជា។ បច្ចុប្បន្ននេះប្រជាជនថ្នាក់កណ្តាល (ដែលមានកម្រិតជីវភាពមធ្យម)កំពុងមានការកើនឡើង ហើយរបៀបនៃការរស់នៅរបស់ពួកគេកំពុងមានការផ្លាស់ប្តូរទាំងការងារ ជីវភាព និងបរិស្ថានផ្ទាល់ខ្លួនផងដែរ។

នៅក្នុងទីផ្សារអចលនទ្រព្យ ផ្ទះជាប់ដីត្រូវបានបែងចែកជា 4ប្រភេទ ដូចជាផ្ទះល្វែងជួរមុខ (purpose-build shophouse) ផ្ទះល្វែងធម្មតានៅក្នុងបុរី (residential link-house) ផ្ទះវីឡាភ្លោះ(semi-detached) និងផ្ទះវីឡាទោល(single-deta-ched)។ ចំណែកប្រភេទបន្ទប់ខុនដូមាន 5ប្រភេទ ដូចជាយូនីតខុនដូមានបន្ទប់គេង1(one bed-room or studio) បន្ទប់គេង2(two-bedroom) បន្ទប់គេង3 (three-bedroom) បន្ទប់គេង4(four-bedroom) និងបន្ទប់វីឡាខុនដូ (Penthouse)។

ជាមួយនឹងកំណើនដែលកើនឡើងនៃសំណង់លំនៅឋាននេះបានធ្វើឱ្យតម្រូវការនៃការប្រើប្រាស់គ្រឿងសង្ហារិម សម្ភារតុបតែងបរិវេណខាងក្នុង និងខាងក្រៅលំនៅឋានក៏មានតម្រូវការកាន់តែខ្លាំងឡើងផងដែរ។ លោកស្រី ឃាន ណារី ប្រធានផ្នែកលក់នៃក្រុមហ៊ុន INYHANOU ដែលផ្គត់ផ្គង់ពូកដំណេកនាំចូលពីសហរដ្ឋអាមេរិកមានប្រសាសន៍ថា ដោយយល់ដឹងពីសុខភាពដំណេកក៏ដូចជាតម្រូវការនៃប្រើប្រាស់សម្ភារក្នុងលំនៅឋានផងដែរនោះ ការលក់ពូកនៅក្នុងក្រុមហ៊ុនពិតជាមានការកើនឡើងច្រើន ដោយសារអតិថិជនមកជាវពូកដំណេកមានចំនួនច្រើនឡើងគួរឱ្យកត់សម្គាល់ពិសេសអ្នកមានចំណូលមធ្យម និងខ្ពស់ ខណៈដែលអគារលំនៅឋានក៏មានការកើនឡើងដែរជារៀងរាល់ឆ្នាំ។

ធនាគារអភិវឌ្ឍន៍អាស៊ី និងមូលនិធិរូបិយវត្ថុអន្តរជាតិក៏ដូចជារដ្ឋាភិបាលដែរបានធ្វើការព្យាករថា សេដ្ឋកិច្ចកម្ពុជានឹងកើនឡើងក្នុងរង្វង់ 7%ថេរនៅឆ្នាំនេះ និងឆ្នាំក្រោយ។ ក្នុងនោះវិស័យសំណង់គឺជាផ្នែកមួយដ៏សំខាន់ក្នុងចំណោមវិស័យដែលជំរុញសេដ្ឋកិច្ចផ្សេងៗទៀត ដូចជាវិស័យកសិកម្ម វិស័យឧស្សាហកម្ម និងវិស័យទេសចរណ៍ដែលធ្វើឱ្យមានកំណើនសេដ្ឋកិច្ចខ្ពស់ ក្នុងរយៈពេលប៉ុន្មានឆ្នាំចុងក្រោយនេះ៕

May 30, 2018

គ្រាន់តែបើកដំណើរការសាកល្បងថ្ងៃដំបូង AEON Mall 2 មានមនុស្សចូលលេងកកកុញ

គ្រាន់តែបើកដំណើរការសាកល្បង មិនទាន់បានសម្ពោធជាផ្លូវការផង ផ្សារទំនើប AEON Mall 2ដែលជាផ្សារទំនើបលំដាប់អន្តរជាតិ ដែលស្ថិតនៅខណ្ឌសែនសុខ រាជធានីភ្នំពេញមានមនុស្សម្នាចូលលេងច្រើនកកកុញយ៉ាងនឹកស្មានមិនដល់។

ជាមួយការនឹងបើកទ្វារសាកល្បងទទួលអតិថិជននៅថ្ងៃដំបូងនេះ គេឃើញមានវត្តមាននៃបណ្តាហាងលក់ទំនិញល្បីៗ ក្រុមហ៊ុនលក់គ្រឿងអេឡិចត្រូនិក ក្រុមហ៊ុនលក់រថយន្ត ហាងលក់សម្លៀកបំពាក់ទាន់សម័យ ហាងលក់សម្ភារក្មេង ក៏ដូចជាហាងអាហារដ្ឋានដ៏សម្បូរបែបមួយចំនួនបានបើកដំណើរការ ក្រោមការគាំទ្រពីសំណាក់អ្នកមកចូលរួមក្នុងការបើកសាកល្បងនេះយ៉ាងច្រើនកុះករ។

គួរបញ្ជាក់ថាផ្សារទំនើប AEON Mall 2 ស្ថិតនៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញនេះ គ្របដណ្ដប់នៅលើផ្ទៃដីសរុបប្រមាណ151,000ម៉ែត្រការ៉េ ដែលមានទីលានខាងក្រៅជាទីចំណតយានយន្តធំទូលាយ ដែលអាចផ្ទុករថយន្តបានប្រមាណជា 2,500 គ្រឿង និងម៉ូតូជាង2,000គ្រឿង។

បើមិនមានការប្រែប្រួលទេ ផ្សារទំនើប AEON Mall ទី2 នឹងបើកសម្ពោធជាផ្លូវការនៅព្រឹកថ្ងៃទី20 ខែមិថុនាខាងមុខនេះ ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕

May 29, 2018

Author: វល័ក្ខ