វល័ក្ខ - La Reine Media

ក្រុមហ៊ុនបច្ចេកវិទ្យា 5 ជាប់ឈ្មោះជាក្រុមហ៊ុនមានស្លាកសញ្ញាថ្លៃជាងគេបំផុត

កាលពីពេលថ្មីៗនេះ ទស្សនាវដ្ដីដ៏ល្បីល្បាញរបស់អាមេរិក Forbes បានបង្ហាញពីតារាងស្លាកសញ្ញាក្រុមហ៊ុនដែលមានតម្លៃថ្លៃជាងគេ (Most Valuable Brands) ទាំង 5 ក្នុងនោះក្រុមហ៊ុនដែលនាំមុខគេ គឺក្រុមហ៊ុនបច្ចេកវិទ្យាដ៏ធំរបស់អាមេរិក Apple។

យោងតាមការបង្ហាញរបស់ Forbes បានឱ្យដឹងថា 5 ក្រុមហ៊ុនដែលមានស្លាកសញ្ញាថ្លៃជាងគេបំផុតនោះសុទ្ធសឹងតែជាក្រុមហ៊ុនបច្ចេកវិទ្យា ដែលមាន Apple នាំមុខគេ និងបន្តបន្ទាប់មកទៀតមានដូចជា Google, Microsoft, Facebook និងក្រុមហ៊ុនលក់ទំនិញអនឡាញរបស់សហរដ្ឋអាមេរិក Amazonខណៈដែល Coca-Cola ដែលធ្លាប់តែនៅកំពូលតារាងនោះ នៅពេលនេះបានធ្លាក់ចេញពីតារាង Top 5 នេះហើយ។

Forbes បានគណនាថា ស្លាកសញ្ញាក្រុមហ៊ុន Apple នៅក្នុងឆ្នាំនេះមានតម្លៃ 182.8ពាន់លានដុល្លារអាមរិក ដោយបានកើនឡើង 8ភាគរយបើធៀបនឹងឆ្នាំមុន ចំណែក Google វិញមានតម្លៃ 132.1ពាន់លានដុល្លារអាមេរិក រីឯ Microsoft មានតម្លៃ 104.9ពាន់លានដុល្លារអាមេរិកខណៈដែល Facebook មានតម្លៃ 94.8ពាន់លានដុល្លារអាមេរិក និងចុងក្រោយ Amazon មានតម្លៃ 70.9ពាន់លានដុល្លារអាមេរិក៕

June 5, 2018

សិស្សពូកែនិទ្ទេស A ហេង គីមហុង បង្ហាញបទពិសោធត្រៀមប្រឡង

នៅក្នុងដំណាក់កាលនៃកំណែទម្រង់ប្រព័ន្ធអប់រំប៉ុន្មានឆ្នាំចុងក្រោយនេះ ការប្រឡងមធ្យមសិក្សាទុតិយភូមិចាប់ផ្តើមមានភាពសុក្រឹត ហើយកាន់តែមានភាពតឹងតែងឡើង ដែលអនុញ្ញាតឱ្យសិស្សពូកែៗអាចបញ្ចេញសមត្ថភាពប្រកបដោយភាពជឿជាក់ និងទទួលបានតម្លៃយ៉ាងខ្ពស់ចំពោះការខិតខំប្រឹងប្រែងរបស់ខ្លួន។ នៅឆ្នាំ2017 មានសិស្សមិនច្រើនពេកទេដែលទទួលបាននិទ្ទេស A ដែលជានិទ្ទេសសំខាន់មួយដែលអាចរុញច្រានសិស្សឱ្យទទួលបាននូវកិត្តិយស និងផលប្រយោជន៍ជាច្រើនទៀតសម្រាប់អនាគត រួមទាំងឱកាសទទួលបានអាហារូបករណ៍សំខាន់ៗទាំងក្នុង និងក្រៅប្រទេសទៀតផង។

នៅពេលនេះ អ្នកសារព័ត៌មាននៃកាសែត ឡារ៉ែន ពាណិជ្ជ បានធ្វើបទសម្ភាសជាមួយនឹងប្អូន ហេង គីមហុង អតីតសិស្សទទួលបាននិទ្ទេស A នៅឆ្នាំ2017 ដើម្បីចែករំលែកនូវបទពិសោធប្រឡងឱ្យទទួលបាននិទ្ទេសល្អ ដល់សិស្សានុសិស្សជាច្រើនទៀតដែលនឹងត្រូវប្រឡងមធ្យមសិក្សាទុតិយភូមិនៅពេលខាងមុខនេះ។

តើមុនប្រឡងបាក់ឌុបបេក្ខជនត្រូវត្រៀមអ្វីខ្លះ?

ចំណុចសំខាន់ដែលបេក្ខជនត្រូវត្រៀមគឺប្រមូលឯកសារទាំងឡាយណាដែលគិតថានឹងចេញនៅពេលប្រឡងមកអនុវត្ត និងអាន ព្រោះវិធីនៃការចេញវិញ្ញាសាប្រឡងគឺស្រដៀងៗគ្នា ហើយខុសគ្នាបន្តិចបន្តួចប៉ុណ្ណោះ។ មានលំហាត់ខ្លះគឺរក្សាវិធីគណនាដដែល គ្រាន់តែផ្លាស់ប្តូរលេខ ឬកែប្រធានតែបន្តិចបន្តួចប៉ុណ្ណោះ។

វិធីងាយៗក្នុងការស្វែងរកប្រភពឯកសារទាំងអស់នោះគឺ ប្រមូលលំហាត់ដែលគ្រូធ្លាប់បង្រៀនមកអនុវត្តឱ្យបានច្រើន រួមទាំងលំហាត់ដែលប្រមូលទិញពីសៀវភៅនៅទីផ្សារដែលមានប្រជុំពីវិញ្ញាសាចាស់ៗជារៀងរាល់ឆ្នាំ។ ចំពោះលំហាត់ដែលគ្រូបង្រៀន គឺភាគច្រើនជាលំហាត់ល្អៗ ហើយមានអត្រាខ្ពស់ក្នុងការចេញនៅពេលប្រឡង ព្រោះគ្រូបង្រៀនគាត់យល់ពីវិធីដែលគេដាក់លំហាត់ប្រឡងនិងដឹងពីល្បិចដែលភាគច្រើនគេចេញលើវិញ្ញាសា។

ចំពោះវិទ្យាសាស្ត្រពិត អាចមានបញ្ហាខ្លះលើមុខវិជ្ជាវិទ្យាសាស្ត្រសង្គម ឬភាសាខ្មែរ។ តើធ្វើយ៉ាងណាដើម្បីទទួលបានពិន្ទុខ្ពស់លើមុខវិជ្ជាទាំងអស់នេះខណៈត្រូវខំប្រឹងប្រែងផ្នែកគណិត ឬរូបវិទ្យាជាដើម?

តាមពិតមុខវិជ្ជា ដែលយើងរៀនគឺមានចរិត- លក្ខណៈខុសគ្នាដាច់ រវាងមុខវិជ្ជាវិទ្យាសាស្ត្រពិត និងវិទ្យាសាស្ត្រសង្គម។ ដើម្បីរក្សាតុល្យភាពនៃចំណេះដឹងលើផ្នែកទាំងពីរ សិស្សគួរយល់ដឹងពីម៉ោងដែលគួររៀន និងវិធីសាស្ត្ររៀន ដើម្បីងាយស្រួលបែងចែកពេលវេលារៀន។

ជាឧទាហរណ៍ មុខវិជ្ជាភាសាខ្មែរ យើងមិនត្រូវការអនុវត្តលំហាត់ដូចជាមុខវិជ្ជាវិទ្យាសាស្ត្រពិតនោះទេ តែយើងទាមទារឱ្យមានការអានច្រើន ដើម្បីឱ្យមានគំនិតច្រើនសម្រាប់សរសេរ។ បើចង់ពូកែខ្មែរ យើងគួរអានសៀវភៅ កាសែត ទស្សនាវដ្តី និងព្យាយាមតាមដានអត្ថបទល្អៗដែលពាក់ព័ន្ធនឹងអក្សរសិល្ប៍ ឬចំណេះដឹងពីការរស់នៅជាក់ស្តែងជាដើម ដើម្បីឱ្យមានគំនិតច្រើនសម្រាប់សរសេរនៅក្នុងអត្ថបទតែងសេចក្តី។ ការសិក្សាលើមុខវិជ្ជានេះគឺទាមទារឱ្យយើងពូកែដោះស្រាយបញ្ហា និងមានភាពឆ្លាតវៃក្នុងការពន្យល់ឱ្យបានច្រើនដើម្បីឱ្យសំណេររបស់យើងមានតម្លៃ និងទទួលបានពិន្ទុល្អ។

សម្រាប់ខ្ញុំ ភាគច្រើនខ្ញុំចូលចិត្តអាន ឬរៀនមុខវិជ្ជាវិទ្យាសាស្ត្រសង្គមនៅពេលជិតភ្លឺ ព្រោះម៉ោងនេះខួរក្បាលត្រជាក់ និងមានភាពស្ងប់ស្ងាត់ល្អ។ ចំណែកឯមុខវិជ្ជាវិទ្យាសាស្ត្រពិត ដូចជាគណិត រូបវិទ្យា គីមី ឬជីវៈវិញ ខ្ញុំតែងតែអនុវត្តលំហាត់ក្រោយពេលដែលខ្ញុំសល់ពេលពីការសិក្សានៅពេលល្ងាច ឬចន្លោះម៉ោងទំនេរផ្សេងៗ ព្រោះវាមិនត្រូវការផ្ចង់គំនិតខ្លាំងដូចភាសាខ្មែរនោះទេ។

ដើម្បីទទួលបានលទ្ធផលល្អ ចាំបាច់ត្រូវធ្វើលំហាត់រាល់ថ្ងៃ ហើយអានរាល់ថ្ងៃទៀត។ តើកត្តាទាំងអស់នេះអាចធ្វើឱ្យអ្នករៀនធុញទ្រាន់ ឬមានអារម្មណ៍ថាហត់ដែរឬទេ?

តាមពិតទៅ ប្រសិនបើមានទម្លាប់រៀនរាល់ថ្ងៃវាមិនធ្វើឱ្យយើងធុញ ឬខ្ជិលនោះទេ ខ្លាចតែរៀនខានៗទើបធ្វើឱ្យយើងធុញ។ ការរៀនប្រសិនបើយើងដឹងខ្លួនឯងច្បាស់ពីពេលដែលត្រូវអាន និងពេលដែលត្រូវធ្វើលំហាត់ យើងនឹងមានភាពរីករាយជាមួយវា ហើយយើងអាចធ្វើវារាល់ថ្ងៃដោយមិននឿយហត់ ឬធុញទ្រាន់នោះទេ។ ពេលខ្លះ នៅពេលដែលយើងទម្លាប់ធ្វើបែបនេះរាល់ថ្ងៃហើយវានឹងធ្វើឱ្យយើងមានអារម្មណ៍ថាអផ្សុកនៅពេលដែលយើងមិនបានធ្វើលំហាត់។

ការរៀនចាំបាច់ត្រូវធ្វើឱ្យស្មើគ្នារាល់ថ្ងៃ អានរាល់ថ្ងៃ និងធ្វើលំហាត់រាល់ថ្ងៃ ដើម្បីរក្សានូវកំណើននៃភាពខ្លាំងលើមុខវិជ្ជាដែលយើងកំពុងរៀនទាំងអស់នោះ កុំឱ្យធ្លាក់ដៃ។ នៅពេលដែលយើងបានធ្វើវារាល់ថ្ងៃ យើងនឹងមានអារម្មណ៍ថា វានឹងទៅមុខលឿន ហើយមិនចាំបាច់បង្ខំខ្លាំងពេកនៅពេលជិតប្រឡងនោះទេ ព្រោះប្រសិនបើយើងមិនរក្សាលំនឹងក្នុងការសិក្សា ហើយចាំតែខំប្រឹងរៀនពេលជិតប្រឡងនោះ យើងនឹងមិនអាចទទួលបានលទ្ធផលល្អនោះទេ ព្រោះគ្មានអ្នកណាអាចចាប់បាននូវមេរៀនម្តង 7 ឬ 10មុខក្នុងរយៈពេលខ្លីនោះទេ។

មនុស្សពូកែប៉ុនណាក៏ដោយ ជិតប្រឡងតែងតែត្រៀម និងខំខ្លាំងជាងមុន។ តើអ្នកត្រៀមប្រឡងបាក់ឌុបគួរចាប់ផ្តើមត្រៀមឱ្យបានខ្លាំងក្លាក្នុងរយៈពេលប៉ុន្មានថ្ងៃ ហើយត្រូវរៀបចំខ្លួនបែបណាដើម្បីឱ្យមានប្រសិទ្ធភាព?

សម្រាប់ខ្ញុំ ខ្ញុំត្រៀមខ្លួនមុនប្រឡងមួយខែ។ នៅក្នុងដំណាក់កាលនេះ មិនមែនជាដំណាក់កាលសម្រុករៀននោះទេ តែវាជាដំណាក់កាលនៃការរំឭកមេរៀនចាស់ៗដែលយើងធ្លាប់រៀន។ មុនប្រឡងប្រសិនបើយើងបានខំពេញមួយឆ្នាំហើយ យើងនឹងមានភាពងាយស្រួលនៅថ្ងៃប្រឡង មិនខំប្រញឹកពេក និងមិនធ្វើឱ្យយើងមានការភ័យខ្លាច។

ចំពោះមេរៀនវិទ្យាសាស្ត្រសង្គមវិញ យើងគួរចំណាយពេលសង្ខេបមេរៀននោះទៅជាសំណួរខ្លីៗដើម្បីងាយស្រួលចាំ ឬគ្រាន់តែសម្រួចសមត្ថភាពកុំឱ្យភ្លេចតែប៉ុណ្ណោះ។ នៅពេលដែលយើងមានទំនុកចិត្តច្បាស់លាស់លើការខិតខំប្រឹងយូរអង្វែងរបស់យើងហើយ យើងនឹងមិនមានភាពភ័យខ្លាចនៅថ្ងៃប្រឡងឡើយ។

នៅថ្ងៃប្រឡង តើបេក្ខជនគួរត្រៀមខ្លួនបែបណាខ្លះដើម្បីអនុវត្តលំហាត់ ឬសរសេរឱ្យបានល្អ?

ពេលវេលានេះ ជាពេលវេលាដែលត្រូវសម្រាក ព្រោះថាបើយើងរៀបចំខ្លួនបានល្អក្នុងរយៈពេលវែងហើយ យើងគួរតែស្វែងរកពេលសម្រាកឱ្យបានគ្រប់គ្រាន់ដើម្បីទុកកម្លាំងប្រឡង និងធ្វើឱ្យខួរក្បាលស្រឡះល្អសម្រាប់អនុវត្តលំហាត់ ឬសរសេរឱ្យបានល្អ។ មានអ្នកខ្លះគេងមិនគ្រប់គ្រាន់ នឹងធ្វើឱ្យគាត់ងាយនឹងភ័យ ហើយអារម្មណ៍មិនល្អអាចធ្វើឱ្យគាត់ភ្លេចមេរៀនដែលខំប្រឹងប្រែងនោះអស់ក៏មានដែរ។

គេថា អ្នកនិទ្ទេស A ចាំបាច់ត្រូវតែមានអក្សរស្អាតទើបអាចទទួលបានពិន្ទុល្អៗគ្រប់មុខវិជ្ជា។ តើរឿងនេះពិតឬទេ? ហើយបេក្ខជនប្រឡងគួរធ្វើបែបណា?

តាមពិតទៅមិនមែនអ្នកនិទ្ទេស A សុទ្ធតែអក្សរស្អាតនោះទេ ហើយអ្នកអក្សរមិនស្អាតក៏មិនគួរអស់សង្ឃឹមដែរ។ អ្វីដែលសំខាន់គឺព្យាយាមសរសេរឱ្យច្បាស់ល្អ និងធ្វើយ៉ាងណាឱ្យគេអានដាច់ ហើយមានរបៀបរៀបរយជាការស្រេច។

តើ គីមហុង មានសារអ្វីសម្រាប់ជម្រាបទៅសិស្សានុសិស្សដែលត្រៀមប្រឡងមធ្យមសិក្សាទុតិយភូមិនៅពេលខាងមុខនេះដែរឬទេ?

ខ្ញុំគ្រាន់តែចង់ប្រាប់សិស្សទាំងអស់ថា កុំមានការភិតភ័យច្រើនពេកពីការប្រឡង ព្រោះនៅពេលបច្ចុប្បន្ននេះប្រព័ន្ធអប់រំគឺមានការកែលម្អច្រើនណាស់ ហេតុនេះប្រសិនបើយើងមានការខិតខំប្រឹងប្រែងពិតប្រាកដនោះ យើងនឹងជាប់ ហើយគ្មានឧបសគ្គអ្វីដែលរាំងស្ទះដល់ការខិតខំប្រឹងប្រែងរបស់យើងនោះទេ។ ដើម្បីធានាថាការប្រឡងទទួលបានលទ្ធផលល្អ គឺសូមត្រៀមខ្លួនឱ្យបានល្អ ហើយរក្សានូវលំនឹងសម្រាប់ការសិក្សាដោយឧស្សាហ៍អនុវត្តជាប្រចាំទាំងមុខវិជ្ជាវិទ្យាសាស្ត្រពិត និងវិទ្យាសាស្ត្រសង្គម៕

June 5, 2018

ប្រទេសកូរ៉េខាងត្បូងចង់វិនិយោគលើវិស័យទេសចរណ៍នៅតំបន់ប្រាសាទសំបូរព្រៃគុក

បន្ទាប់ពីប្រាសាទសំបូរព្រៃគុក ក្នុងខេត្តកំពង់ធំ ត្រូវបានដាក់ចូលក្នុងបញ្ជីបេតិកភណ្ឌពិភពលោករួចមក ក្រុមអ្នកវិនិយោគជនជាតិកូរ៉េ បានសម្លឹងឃើញឱកាសវិនិយោគនៅទីនោះដើម្បីប្រែក្លាយតំបន់ព្រៃស្រោងដែលធ្លាប់តែស្ងាត់ជ្រងំឱ្យប្រែក្លាយទៅជាតំបន់ទេសចរណ៍ដ៏មានសក្តានុពលមួយទៀត នៅក្នុងខេត្តនោះ។

ក្នុងជំនួបជាមួយឯកឧត្តម ថោង ខុន រដ្ឋមន្ត្រីក្រសួងទេសចរណ៍កាលពីសប្តាហ៍មុននេះ លោក លី ហ៊ី យុក អគ្គលេខាធិការថ្មីនៃមជ្ឈមណ្ឌលអាស៊ាន-កូរ៉េ (AKC) បានមានប្រសាសន៍ថា អ្នកវិនិយោគកូរ៉េបានសម្លឹងឃើញឱកាសវិនិយោគលើឱកាសវិនិយោគលើវិស័យទេសចរណ៍នៅខេត្តកំពង់ធំ ពិសេសគឺតំបន់ប្រាសាទសំបូរព្រៃគុក ដើម្បីរួមចំណែកទាក់ទាញភ្ញៀវទេសចរកូរ៉េឱ្យមកទស្សនាកម្ពុជាកាន់តែច្រើនថែមទៀត។

ក្រោយបញ្ចប់ជំនួបពិភាក្សានោះ ឯកឧត្តមរដ្ឋមន្ត្រីបានឱ្យដឹងថា ភ្ញៀវទេសចរកូរ៉េបានមកទស្សនាកម្ពុជាមានជាង 30ម៉ឺននាក់នៅឆ្នាំ2017 ហើយបើតាមការសង្កេតឃើញគោលដៅសំខាន់បំផុតរបស់ទេសចរកូរ៉េ គឺតំបន់សៀមរាប-អង្គរ។ ជាមួយគ្នានោះទេសចរកូរ៉េក៏កំពុងចាប់អារម្មណ៍លើការទស្សនាតំបន់ប្រាសាទសំបូរព្រៃគុកនៃខេត្តកំពង់ធំផងដែរ។ ដោយមើលឃើញពីនិន្នាការរបស់ទេសចរកូរ៉េដែលកំពុងតែកើនឡើង ដូច្នេះហើយទើបមជ្ឈមណ្ឌលអាស៊ាន-កូរ៉េបាននាំមកនូវដំណឹងពិសេសមួយថា អ្នកវិនិយោគកូរ៉េកំពុងសម្លឹងមើលឱកាសវិនិយោគលើវិស័យទេសចរណ៍នៅកម្ពុជា ពិសេសតំបន់ប្រាសាទសំបូរព្រៃគុក ខេត្តកំពង់ធំនេះតែម្ដង។

ឆ្លើយតបនឹងការលើកឡើងដែលស្របនឹងគោលបំណងរបស់កម្ពុជាដែរនោះ ឯកឧត្តមរដ្ឋមន្ត្រីបានថ្លែងបញ្ជាក់នូវការស្វាគមន៍ និងបានស្នើដល់ភាគីកូរ៉េឱ្យបន្តជួយអភិវឌ្ឍវិស័យទេសចរណ៍កម្ពុជាពិសេសនៅខេត្តកំពង់ធំផ្ទាល់តែម្ដង ពីព្រោះខេត្តមួយនេះស្របនឹងខ្សែផលូវទស្សនកិច្ចរបស់ភ្ញៀវទេសចរនានាដែលធ្វើដំណើរចេញពីរាជធានីភ្នំពេញឆ្ពោះទៅខេត្តសៀមរាប-អង្គរ ពោលគឺមុននឹងទៅដល់ខេត្តសៀមរាប ភ្ញៀវទេសចរត្រូវឆ្លងកាត់ខេត្តកំពង់ធំសិន ដែលទីនោះមានតំបន់ប្រាសាទសំបូរព្រៃគុក ជាសម្បត្តិបេតិកភណ្ឌពិភពលោកដ៏ល្អល្អះមួយសម្រាប់ទាក់ទាញភ្ញៀវទេសចរ។

ឯកឧត្តមរដ្ឋមន្ត្រីបានបង្ហើបប្រាប់ភាគីកូរ៉េថាចំពោះខេត្តកំពង់ធំ អ្នកវិនិយោគអាចបង្កើតសណ្ឋាគារថ្មីៗ អាចបង្កើតទីលានវាយកូនហ្គោលដ៏ធំមួយ និងវិនិយោគលើការបង្កើតផលិតផលទេសចរណ៍ថ្មីៗបន្ថែមទៀតបាន។ ម្យ៉ាងទៀតដោយសារតែអ្នកទេសចរកូរ៉េភាគច្រើនចូលចិត្តទេសចរណ៍បែបវប្បធម៌ និងធម្មជាតិផងនោះ អ្នកវិនិយោគអាចបង្កើត ឬជួយអភិវឌ្ឍសហគមន៍នានានៅក្នុងខេត្តមួយនេះ ពិសេសគឺនៅតំបន់ប្រាសាទសំបូរព្រៃគុកតែម្ដង ដូចជាការជួយធ្វើផ្លូវទៅកាន់សហគមន៍ ការបណ្ដុះបណ្ដាលប្រជាសហគមន៍ឱ្យយល់ដឹងពីវិស័យទេសចរណ៍ជាដើម។ល។

លោក អាង គឹមអ៊ាង នាយកគ្រប់គ្រងក្រុមហ៊ុនមហានគរទេសចរណ៍ និងជាអ្នកមានស្រុកកំណើតនៅទីនោះផង បានមានប្រសាសន៍គាំទ្រដល់វិនិយោគិនបរទេសទាំងឡាយណា ដែលមានបំណងចូលរួមអភិវឌ្ឍន៍វិស័យទេសចរណ៍នៅកម្ពុជា ប៉ុន្តែធ្វើយ៉ាងណាសូមឱ្យការអភិវឌ្ឍវិស័យទេសចរណ៍នេះជួយដល់កំណើនសេដ្ឋកិច្ចជាតិ និងសេដ្ឋកិច្ចប្រជាពលរដ្ឋនៅតំបន់នោះផង។

លោកថា អ្វីដែលធ្វើឱ្យប្រាសាទសំបូរព្រៃគុកទាក់ទាញភ្ញៀវទេសចរជាតិ និងអន្តរជាតិចូលមកទស្សនាកម្សាន្តកាន់តែច្រើនឡើងៗ គឺដោយសារក្រុមប្រាសាទទាំងនោះជាអតីតរាជធានីខ្មែរ ដែលមានផ្ទះប្រជាពលរដ្ឋប្រមាណជា 20,000ខ្នងបង្កើតបានជាមជ្ឈមណ្ឌលសម្រាប់បណ្តុះបណ្តាលធន-ធានមនុស្សសំខាន់មួយសម្រាប់ចូលរួមកសាងប្រាសាទអង្គវត្តកាលពីសម័យនោះ។

លើសពីនេះ ប្រាសាទសំបូរព្រៃគុកមានអាយុកាលមុនប្រាសាទអង្គវត្តក្នុងរង្វង់ប្រហែលជា 200ឆ្នាំ ដែលសាងសង់ឡើងដោយថ្មឆ្អិន ថ្មភក់ និងថ្មបាយក្រៀម ហើយអ្វីដែលពិសេសនោះគឺបច្ចេកទេសកសាងប្រាសាទរបស់បុព្វបុរសខ្មែរដែលធ្វើឱ្យថ្មរឹងមាំមានអាយុកាលជាច្រើនសតវត្សរ៍ បានបន្សល់ទុកដល់កូនខ្មែរជំនាន់ក្រោយៗរហូតមកទល់បច្ចុប្បន្ន៕

June 5, 2018

ធនាគារពិភពលោក៖ “កំណើនសេដ្ឋកិច្ចខ្ពស់នៅកម្ពុជា នៅតែបន្តកើតមាន”

ធនាគារពិភពលោក (World Bank) បានចេញរបាយការណ៍ព្យាករថ្មីមួយឱ្យដឹងថា កំណើនសេដ្ឋកិច្ចខ្ពស់របស់កម្ពុជានឹងនៅតែបន្តរក្សាភាពស្វាហាប់ទៅមុខ ហើយត្រូវបានព្យាករទុកថានឹងកើនល្បឿនបន្តិចរហូតដល់ទៅ 6.9ភាគរយ ក្នុងឆ្នាំ2018ដោយសារតែការស្ទុះងើបឡើងវិញក្នុងវិស័យនាំចេញវាយនភ័ណ្ឌ និងសម្លៀកបំពាក់ អមដោយការងើបឡើងរបស់វិស័យទេសចរណ៍ និងកសិកម្មផងដែរ។

យោងតាមរបាយការណ៍បច្ចុប្បន្នភាពសេដ្ឋកិច្ចកម្ពុជា ( Cambodia Economic Update ) ដែលត្រូវបានសម្ពោធនៅខែឧសភា ឆ្នាំ2018នេះបង្ហាញថា ការចំណាយកាន់តែច្រើនឡើងរបស់រដ្ឋាភិបាល និងលក្ខខណ្ឌសេដ្ឋកិច្ចពិភពលោកមានអំណោយផល ក្នុងនោះរួមមានតម្រូវការយ៉ាងស្វាហាប់នៅក្នុងបណ្តាសេដ្ឋកិច្ចប្រទេសជឿនលឿនផង សុទ្ធតែជាកត្តាដែលត្រូវបានគេរំពឹងទុកថាជាមូលដ្ឋានទ្រទ្រង់ធ្វើឱ្យកម្ពុជាបន្តទទួលបានកំណើនសេដ្ឋកិច្ចខ្ពស់។

ប៉ុន្តែយ៉ាងណាក៏ដោយ ហានិភ័យក៏នៅតែបន្តមានដែរ ដែលក្នុងនោះរួមមានការបាត់បង់បន្តិចម្តងៗនូវភាពប្រកួតប្រជែងក្នុងការនាំចេញដោយសារតែការកើនឡើងយ៉ាងរហ័សនូវបៀវត្សរ៍របស់កម្មករ ពំនូនគរនៃភាពងាយរងគ្រោះដែលមានមកជាយូរមកហើយនៅក្នុងកំណើននៃវិស័យអចលនទ្រព្យ និងសំណង់ ភាពមិនច្បាស់លាស់ដែលអាចកើតមានជុំវិញការបោះឆ្នោត ភាពញ័ររញ្ជួយម្តងម្កាលបណ្តាលមកពីការគាំពារនិយម និងភាពតានតឹងខ្លាំងឡើងនៅក្នុងវិវាទពាណិជ្ជកម្មរវាងប្រទេសដែលមានជំនួញធំៗក្នុងពិភពលោក។

លោកស្រី អុិនហ្គូណា ដូប្រាចា នាយិកាគ្រប់គ្រងធនាគារពិភពលោកប្រចាំប្រទេសកម្ពុជាបានមានប្រសាសន៍ថា “ដើម្បីរក្សាឱ្យបានកំណើនសេដ្ឋកិច្ចរឹងមាំ ប្រទេសកម្ពុជាសំខាន់ណាស់ ត្រូវវិនិយោគថែមទៀតទៅលើវិស័យអប់រំ និងបណ្តុះបណ្តាលជំនាញហើយស្របពេលគ្នានោះដែរ ត្រូវប្រឹងរកដំណោះស្រាយដល់ឧបសគ្គនានាដែលធុរកិច្ចធុនតូច និងមធ្យមកំពុងជួបប្រទះ។ ការវិនិយោគទៅលើមនុស្សជាជម្រើសដ៏ប្រសើរបំផុតសម្រាប់ឈានទៅកាន់អនាគតមួយកាន់តែចម្រុងចម្រើន។

របាយការណ៍នេះបានធ្វើការកត់សម្គាល់ថា ប្រទេសកម្ពុជាអាចធ្វើឱ្យកំណើនសេដ្ឋកិច្ចកាន់តែមានភាពចម្រុះជាងមុន និងបង្កើតការងារបានកាន់តែច្រើនថែមទៀត តាមរយៈការកាត់បន្ថយចំណាយរបស់ក្រុមហ៊ុនទៅលើដំណើរការបំពេញបែបបទបង្កើតក្រុមហ៊ុន ទៅលើផ្នែកប្រតិបត្តិការ និងទៅលើការធ្វើហិរញ្ញប្បទាន។ របាយការណ៍នេះក៏បានផ្តល់ផងដែរនូវអនុសាសន៍ឱ្យប្រទេសកម្ពុជាធ្វើការតាមឃ្លាំមើលឱ្យបានដិតដល់ទៅលើដំណើរស្ទុះឡើងនៅក្នុងវិស័យសំណង់ និងអចលនទ្រព្យ ដោយរៀបចំឱ្យមានគោលនយោបាយប្រុងប្រយ័ត្នជាលក្ខណៈម៉ាក្រូ ដែលនឹងជួយបន្ថយវិសាលភាពរបស់សកម្មភាពដែលកេងយកចំណេញនៅក្នុងវិស័យទាំងនេះ។

ចំណែកការមកដល់របស់ភ្ញៀវទេសចរបានកើនដល់ទៅ 11.8ភាគរយ នៅក្នុងឆ្នាំ2017 ប្រៀបទៅនឹងកំណើន 5ភាគរយនៅក្នុងឆ្នាំ2016 ដោយសារលទ្ធផលនៃកិច្ចខិតខំរបស់អាជ្ញាធររដ្ឋាភិបាលក្នុងការធ្វើឱ្យមានការហោះហើរកាន់តែច្រើនមកពីក្នុងតំបន់ រួមទាំងពីប្រទេសចិនផងដែរ ដែលជាទីផ្សារសំខាន់មួយសម្រាប់វិស័យទេសចរណ៍។ វិស័យកសិកម្មក៏មានការស្ទុះឡើងដែរ ជាមួយនឹងការពង្រីកផ្ទៃដីធ្វើស្រូវ និងចម្ការកៅស៊ូ និងការងើបឡើងវិញបន្តិចម្តងៗរបស់តម្លៃកសិផល។

លោកបណ្ឌិត ម៉ី កល្យាណ ប្រធានក្រុមប្រឹក្សាភិបាលវិទ្យាស្ថានសិក្សាដើម្បីការអភិវឌ្ឍបានមានប្រសាសន៍ឱ្យដឹងថា សេដ្ឋកិច្ចកម្ពុជាត្រូវពឹងផ្អែកលើកត្តាពីរយ៉ាង គឺកត្តាខាងក្រៅ និងកត្តាខាងក្នុង ដែលជាមូលដ្ឋានចាំបាច់មិនអាចខ្វះបាន។ កត្តាខាងក្រៅគឺត្រូវពឹងផ្អែកលើការនាំចេញ ដែលជាមូលដ្ឋានសំខាន់ក្នុងការអភិវឌ្ឍសេដ្ឋកិច្ចរបស់ខ្លួន និងពង្រីកសក្តានុពលសេដ្ឋកិច្ចរបស់ប្រទេស។ ចំណែកកត្តាខាងក្នុង គឺជាកត្តាមិនអាចខ្វះបានដែលកម្ពុជាត្រូវពឹងផ្អែកលើមូលដ្ឋានខ្លួនឯង តាមរយៈការពង្រឹងធនធានមនុស្ស និងបច្ចេកទេស ដើម្បីពង្រឹងនូវធនធានមនុស្សតាមរយៈការប្រើប្រាស់ជំនាញ ហើយទទួលបានចំណូលកាន់តែច្រើនសម្រាប់ប្រជាជន។

គួរបញ្ជាក់ថា រដ្ឋាភិបាលកម្ពុជាបានដាក់ចេញនូវគោលនយោបាយអភិវឌ្ឍន៍វិស័យឧស្សាហកម្មឆ្នាំ2015-2025 ដើម្បីពង្រឹងមូលដ្ឋាន និងពង្រីកសក្តានុពលសេដ្ឋកិច្ចរបស់ខ្លួនដោយផ្លាស់ប្តូរនិន្នាការពីកម្លាំងពលកម្មសុទ្ធសាធ ទៅប្រើប្រាស់កម្លាំងពលកម្មជំនាញទើបធ្វើឱ្យសេដ្ឋកិច្ចជាតិ និងសេដ្ឋកិច្ចប្រជាជនកម្ពុជាមានការរីកចម្រើនកាន់តែមានល្បឿនខ្លាំងឡើង៕

June 4, 2018

និយាយពាក្យជូនពរទៅកាន់ Idol ពេជ្រ សោភា អាចនឹងមានសំណាងបានរង្វាន់ធំ

នៅសល់តែប៉ុន្មានថ្ងៃទៀតប៉ុណ្ណោះនឹងដល់ថ្ងៃខួបកំណើតរបស់កំពូលតារាចម្រៀង ពេជ្រ សោភាហើយ។ ជាតារាចំរៀងដែលជាទីពេញនិយមមួយរូប យើងសង្កេតឃើញមានការចូលរួមអបអរនិងជូនពរជាច្រើនពីសំណាក់អ្នកគាំទ្រ ក្នុងនោះក៏មានក្រុមដែលជាដៃគូសហការណ៍របស់អ្នកនាងផងដែងនោះគឺក្រុមហ៊ុនទូរស័ព្ទដៃ OPPO។

គួររំលឹកផងដែរថា បើគិតមកទល់ពេលនេះ កំពូលតារាចម្រៀង ពេជ្រ សោភាបានសហការណ៍ជាមួយនឹងក្រុមហ៊ុន OPPO ក្នុងការធ្វើជាអគ្គរាជទូតសុច្ឆន្ទៈ មានរយៈពេល២ឆ្នាំហើយ។ ហើយយើងអាចសង្កេតឃើញថាក្រុមហ៊ុនទូរស័ព្ទដៃមួយនេះគឺទទួលបាននូវការស្គាល់និងពេញនិយមជាខ្លាំងពីសំណាក់អតិថិជននាពេលបច្ចុប្បន្ន។

តាមរយៈរូបភាពជូនពរមួយនោះ ក្រុមហ៊ុន OPPO បានធ្វើការអំពាវនាវដល់បណ្តារអ្នកគាំទ្ររបស់ទូរស័ព្ទ OPPO ក៏ដូចជាអ្នកគាំទ្ររបស់អ្នកនាង ពេជ្រ សោភាទាំងឡាយឲ្យចូលរួមសរសេរពាក្យពេជន៍ជូនពរដែលខ្លួនចង់និយាយទៅកាន់អ្នកនាង។ ស្របពេលជាមួយគ្នានេះដែរ អ្នកដែលចូលរួមសរសេរពាក្យជូនពរនៅលើផេកហ្វេសប៊ុករបស់ OPPO នោះនឹងអាចមានឱកាសឈ្នះនូវទូរស័ព្ទដៃស៊េរីថ្មីគឺ OPPO R15 Pro។

នេះពិតជាឱកាសពិសេសមែនទែនដែល OPPO រៀបចំកម្មវិធីនេះឡើងដើម្បីជូនពរដល់តារាតំណាងរបស់ខ្លួន ហើយកាន់តែពិសេសនោះការលើកទឹកចិត្តដោយរង្វាន់ OPPO R15 Proនេះតែម្តង។ OPPO R15 Pro គឺជាម៉ូដែលសំខាន់ស៊េរីខ្ពស់របស់ OPPO ដែលលក់ដាច់ខ្លាំងនៅប្រទេសចិនក៏ដូចជាប្រទេសមួយចំនួនទៀតនៅតំបន់អាស៊ីអាគ្នេយ៍ផងដែរ។ បច្ចុប្បន្នមិនទាន់មានវត្តមាននៅទីផ្សារប្រទេសកម្ពុជាយើងនៅឡើយទេ តែបើតាមការ Post រូបភាពក្នុងផេករបស់ OPPO កម្ពុជា វានឹងមកដល់ក្នុងពេលឆាប់ៗនេះ។

លក្ខណៈពិសេសៗរបស់ OPPO R15 Pro មានដូចជា៖ ជាប្រភេទទូរស័ព្ទ Full Screen ដែលមានអេក្រង់ទំហំ6.28អ៊ិញ កាមេរ៉ាមុខទំហំ 20MP កាមេរ៉ាក្រោយភ្លោះមានទំហំ 20MP+16MP មានRAM ទំហំ 6GB និងអង្គផ្ទុកទិន្នន័យទំហំ 128GB។ វាប្រើប្រាស់នូវ Chipset: Qualcomm SDM660 Snapdragon 660 និង CPU: Octa-core (4×2.2 GHz Kryo 260 & 4×1.8 GHz Kryo 260) ចំនែកឯកំលាំងថ្មវិញមានទំហំ3430mAh ហើយថែមទាំងបំពាក់មកជាមួយនូវបច្ចេកវិទ្យាសាកថ្មរហ័ស VOOC។ ចំពោះតម្លៃវិញ យើងអាចប៉ាន់ប្រមាណថាវាអាចនឹងមានតម្លៃចាប់ពី៦០០ដុល្លារ ដល់៨០០ដុលា្លរបើលក់នៅក្នុងប្រទេសកម្ពុជាយើង។

ដូច្នេះសូមកុំភ្លេចណា សម្រាប់អ្នកដែលនិយមគាំទ្រកំពូលតារាចំរៀង ពេជ្រ សោភា សូមចូលទៅកាន់ផេកហ្វេសប៊ុកផ្លូវការណ៍របស់OPPOដើម្បីទទួលបាននូវពត៌មានលម្អិតអំពីការចូលរួមធ្វើការជូនពរទាំងអស់គ្នា ហើយលោកអ្នកអាចនឹងជាអ្នកមានសំណាងក្នុងការឈ្នះរង្វាន់ OPPO R15 Pro ផងដែរ៕

June 4, 2018

Fred នឹងពិនិត្យសុខភាពជាមួយ Man Utd ថ្ងៃចន្ទនេះ មុនផ្ទេរចូលក្នុងតម្លៃ 53លានផោន

Fred ត្រូវបានរំពឹងទុកថា នឹងបំពេញការផ្ទេររបស់គេក្នុងតម្លៃខ្លួន 53លានផោន (ស្មើនឹង 71លានដុល្លារអាមេរិក) ទៅកាន់ក្លិប Manchester United ក្នុងរយៈពេល 24ម៉ោងទៀត ក្រោយពីរូបគេបានចាកចេញពីជំរំហ្វឹកហាត់របស់ក្រុមជម្រើសជាតិប្រេស៊ីល ដើម្បីទទួលការពិនិត្យសុខភាពនៅថ្ងៃចន្ទនេះ។

ខ្សែបម្រើរបស់ក្លិប Shakthar Donetsk រូបនេះ ដែលបានចូលលេងក្នុងនាមជាកីឡាករបម្រុងក្នុងពេលក្រុមខ្លួនទទួលជ័យជម្នះ 2-០ លើក្រុមជម្រើសជាតិក្រូអាស៊ី កាលពីថ្ងៃអាទិត្យនោះ នឹងក្លាយជាកីឡាករចំណូលថ្មីដំបូងគេរបស់លោក Jose Mourinho នារដូវក្តៅនេះ។

កីឡាករវ័យ 25ឆ្នាំរូបនេះ បានស្ថិតក្នុងការពិភាក្សាផ្សេងៗ ជាមួយនឹងក្លិបមានមូលដ្ឋាននៅកីឡដ្ឋាន Old Trafford មួយនេះ ក្រោយពីការផ្ទេរទៅកាន់ក្លិប Man City កាលពីខែមករាមុននេះទទួលបរាជ័យ ហើយលោក Tite គ្រូបង្វឹកនៃក្រុមជម្រើសជាតិប្រេស៊ីល ចង់ឱ្យការផ្ទេរនេះ ត្រូវបានបំពេញនៅមុនពេលយុទ្ធនាការ World Cup។

លោក Titeបានឱ្យដឹងថា៖ « វាមិនអាចជៀសរួច ដែលពេលនៅ ឡើងកើត ករណីនេះ ពួកគេនឹងមកជួបយើង ហើយការណែនាំរបស់យើងទៅកាន់ពួកគេគឺថា ដោះស្រាយបញ្ហានេះឱ្យ បានឆាប់តាមដែលអាច ហេតុនេះ អារម្មណ៍របស់អ្នកនឹងស្ថិតនៅជាមួយនឹងយើង ហើយនិងផ្តោតលើក្រុមជម្រើសជាតិ»។

Fred បានចូលរួមជាមួយនឹងក្លិប Shakhtar ដោយចេញពីក្លិបប្រេស៊ីល Internacional កាលពីឆ្នាំ2013ហើយចាប់តាំងពីពេលនោះមកបានបង្ហាញខ្លួនច្រើនជាង 150លើកសម្រាប់ក្លិបរបស់អ៊ុយក្រែនមួយនេះ៕

ប្រភពពី៖ Daily Mail

June 4, 2018

Neymar រកបានគ្រាប់បាល់ដ៏ល្អនៅថ្ងៃវិលពីរបួស ជួយប្រេស៊ីល ផ្តួលក្រូអាស៊ី

ខ្សែប្រយុទ្ធ Neymar បានស៊ុតបាល់បញ្ចូលទីនៅថ្ងៃនៃការវិលចូលលេងជាថ្មីឡើងវិញ ក្រោយពីអវត្តមានអស់រយៈពេល 3ខែដោយសារតែបញ្ហារបួស ខណៈដែលក្រុមបាល់ទាត់ជម្រើសជាតិប្រេស៊ីល បានកម្តៅសាច់ដុំសម្រាប់យុទ្ធនាការ World Cup ជាមួយនឹងជ័យជម្នះក្នុងលទ្ធផល 2-០ លើក្រុមជម្រើសជាតិក្រូអាស៊ី នាកីឡដ្ឋាន Anfield កាលពីថ្ងៃអាទិត្យ។

កីឡាករមានតម្លៃខ្លួនខ្ពស់ជាងគេបំផុតក្នុងពិភពលោករូបនេះ បានអវត្តមានតាំងពីថ្ងៃទី25 ខែកុម្ភៈ ដែលនៅពេលនោះរូបគេបានបាក់ឆ្អឹងប្រអប់ជើង និងរបួសកជើង ក្នុងពេលលេងឱ្យក្រុម Paris St Germain ក្នុងការប្រកួតក្របខ័ណ្ឌលីករបស់បារាំងជាមួយនឹងក្រុម Olympique de Marseille។ Neymar អតីតតារាឆ្នើមរបស់ក្លិប Barcelona ដែលជាកីឡាករដ៏សំខាន់សម្រាប់ប្រេស៊ីលក្នុងការប្រជែងពាន World Cup នៅរុស្ស៊ី បានចូលលេងក្នុងនាមជាកីឡាករបម្រុងក្នុងតង់ទី2 និងបានបង្ហាញពីទម្រង់លេងយ៉ាងល្អដើម្បីជួយឱ្យក្រុមខ្លួនឈ្នះការប្រកួតនេះនៅនាទីទី69។

Neymar ត្រូវការរយៈពេលត្រឹមតែ 23នាទីប៉ុណ្ណោះដើម្បីបង្ហាញពីសារៈសំខាន់ដែលរូបគេមានទៅលើក្តីសង្ឃឹមរបស់ប្រេស៊ីលក្នុងការប្រជែងពាន World Cup ជាលើកទី6 របស់ពួកគេ។ កីឡាករបម្រុងម្នាក់ទៀត Roberto Firmino បានផ្តល់ការរីករាយដល់អ្នកគាំទ្ររបស់ក្រុម Liverpool នាកីឡដ្ឋាន Anfield តាមរយៈការរកគ្រាប់បាល់ទី2 នៅជិតពេលបញ្ចប់ការប្រកួត ដោយការស៊ុតបាល់បញ្ចូលទីយ៉ាងល្អក្នុងប្រអប់គ្រោះថ្នាក់។

លោក Titeគ្រូបង្វឹករបស់ក្រុមជម្រើសជាតិប្រេស៊ីល បានឱ្យដឹងថា៖ ខ្ញុំពិតជារីករាយណាស់ជាមួយនឹងការបង្ហាញពីទម្រង់លេងយ៉ាងល្អនេះ៕

ប្រភពពី៖ Sport24

June 4, 2018

កាសែតឡារ៉ែន ពាណិជ្ជ លេខ 128

[easy_media_download url=”https://www.lareine.com.kh/wp-content/uploads/2018/06/LRPN_128-Final-For-Web.pdf” force_dl=”1″]

June 2, 2018

ពូជស្រូវថ្មី 2ប្រភេទនឹងបង្ហាញទិន្នផល-គុណភាពពិតប្រាកដនៅចុងឆ្នាំនេះ

វិស័យកសិកម្មរបស់កម្ពុជាមានការរីកចម្រើនគួរឱ្យកត់សម្គាល់ ដែលការរីកចម្រើននៃវិស័យនេះបានរួមចំណែកធ្វើឱ្យមានការរីកចម្រើនដល់សេដ្ឋកិច្ចជារួមនៅកម្ពុជានាពេលបច្ចុប្បន្ន។ “យើងមានមោទនភាពចំពោះវិស័យកសិកម្មរបស់យើងដែលក្នុងឆ្នាំ 2017 – 2018 នេះទទួលបានលទ្ធផលល្អប្រសើរដែលក្នុងនោះលទ្ធផលស្រូវសរុបប្រមាណ 10លាន 5ម៉ឺន 2ពាន់តោន កើនឡើង 5.7% និងមានអតិរេកស្រូវជាង 5លាន 5សែន 6ម៉ឺនតោន និងវារីវប្បកម្មកើនឡើងប្រមាណ20% ធៀបនឹងឆ្នាំមុន ដែលនេះជាជោគជ័យមួយដ៏ធំសម្រាប់កម្ពុជា។ នេះជាប្រសាសន៍របស់ថ្នាក់ដឹកនាំកម្ពុជាលើវិស័យកសិកម្ម។

ជាមួយនឹងមោទនភាពនេះ វិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជានៃក្រសួងកសិកម្ម រុក្ខា ប្រមាញ់ និងនេសាទ (CADI) បានផ្តល់នូវពូជស្រូវថ្មីដ៏ល្អមួយប្រភេទឈ្មោះ “ផ្កាមាលតី”សម្រាប់ចែកចាយបន្តទៅដល់កសិករដើម្បីយកទៅដាំសាកល្បងនៅក្នុងរដូវវស្សាឆ្នាំនេះដើម្បីធ្វើការប្រៀបធៀបទិន្នផលជាមួយពូជស្រូវផ្សេងទៀតនាពេលអនាគត។

ប្រធានវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជាបានអះអាងថា មន្ត្រីជំនាញរបស់ក្រសួងគ្រោងនឹងចុះទៅផ្សព្វផ្សាយពីប្រភេទពូជស្រូវផ្កាមាលតីនេះជូនដល់ប្រជាកសិករនាចុងខែឧសភានេះដើម្បីបង្ហាញពីបច្ចេកទេសដាំដុះ និងអត្ថប្រយោជន៍ពីប្រភេទពូជស្រូវដែលទើបនឹងរកឃើញនេះ។

លោកបណ្ឌិត អ៊ុក ម៉ាការា ប្រធានវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជាបានបញ្ជាក់ឱ្យដឹងថា តាមគម្រោងក្នុងឆ្នាំ 2018នេះ ក្រសួងកសិកម្មនឹងផ្តល់ពូជស្រូវថ្មីប្រភេទផ្កាមាលតីនេះជូនកសិករសម្រាប់ធ្វើការដាំដុះសាកល្បងចំនួន 50គ្រួសារតាមរយៈស្រែបង្ហាញជាង 50ហិកតា ប៉ុន្តែប្រសិនបើកសិករណាចាប់អារម្មណ៍ចង់ដាំដុះពូជស្រូវប្រភេទថ្មីនេះ អាចមកទាក់ទងនៅវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា ឬតាមមន្ទីរកសិកម្មនៅតាមបណ្តាខេត្តនានាបាន។

លោកបណ្ឌិតបានបន្តថា ពូជស្រូវផ្កាមាលតីដែលបង្កាត់បញ្ចូលគ្នារវាងស្រូវផ្ការំដួល និងខា3 នេះ ជាពូជស្រូវក្រអូបប្រណីតដែលធន់ជាមធ្យមនឹងភាពរាំងស្ងួត ទឹកជំនន់ និងការដួលដើម ព្រមទាំងទទួលបានបរិមាណទិន្នផលខ្ពស់ពីជាង 3តោន ទៅដល់ 6តោនក្នុងមួយហិកតា ទៅតាមប្រភេទដី ឬទឹកគ្រប់គ្រាន់។ លោកបណ្ឌិតបានពន្យល់ថា ពូជស្រូវថ្មីនេះមានក្លិនក្រអូបឈ្ងុយដូចផ្ការំដួល ហើយគ្រាប់អង្កររលោងភ្លឺដែលគេរំពឹងថា នឹងទទួលបានតម្រូវការទីផ្សារខ្ពស់ផងដែរ។

សូមបញ្ជាក់ថា កាលពីឆ្នាំ2017 ក្រុមអ្នកស្រាវជ្រាវកសិកម្មបានចាប់ផ្តើមធ្វើការពិសោធស្រាវជ្រាវដើម្បីបន្សុទ្ធពូជស្រូវថ្មី អម្បូរពូជស្រូវសែនក្រអូបដែលឆ្លើយតបទៅនឹងតម្រូវការទីផ្សារក្នុងស្រុក និងការនាំចេញទៅក្រៅប្រទេស។ ក្រុមកសិករចំនួន 28សហគមន៍នៅទូទាំងប្រទេសបានចាប់ផ្តើមសាបពូជស្រូវថ្មីនៅលើដីស្រែរបស់ខ្លួនដើម្បីពិសោធជាបឋមនូវសែស្រឡាយស្រូវសែនក្រអូបចំនួន 3ពូជ បន្ទាប់ពីវិទ្យាស្ថានខាងលើបានសម្រិតសម្រាំងជាង 2ឆ្នាំរួចមក។ វាជាប្រភេទស្រូវដែលមិនប្រកាន់រដូវដាំដុះឡើយ ដោយប្រជាកសិករអាចធ្វើការដាំដុះបាន2 ទៅ3ដងក្នុង 1ឆ្នាំ និងទទួលបានទិន្នផលខ្ពស់ចន្លោះពី 5.5 ទៅ 6តោនក្នុង 1ហិកតា។ ពូជស្រូវសែស្រឡាយថ្មីសែនក្រអូបនេះអាចនឹងទទួលផលនៅចុងឆ្នាំ 2018ខាងមុខ ហើយវាអាចជាប្រភេទស្រូវថ្មីមួយដែលមានតម្រូវការខ្ពស់ក្នុងទីផ្សារ។

នៅកម្ពុជាសព្វថ្ងៃ មានពូជស្រូវសំខាន់ៗដែលកសិករកំពុងដាំដុះរហូតដល់ជាង 500ពូជខុសៗគ្នា ប៉ុន្តែបច្ចុប្បន្ននេះពូជស្រូវផ្ការំដួល ជាប្រភេទពូជដែលកសិករពេញនិយមដាំច្រើនជាងគេ ព្រោះវាមានគុណភាពល្អ ក្រអូបឈ្ងុយឆ្ងាញ់ គ្រាប់រលូន ដែលបានជាប់ចំណាត់ថ្នាក់លេខ1 ជាអង្ករល្អបំផុតនៅលើពិភពលោក។ តែជាអកុសលចំណាត់ថ្នាក់លេខ1 របស់អង្ករកម្ពុជាបានត្រូវបាត់បង់ដោយអ្នកជំនាញមិនទាន់រកមូលហេតុឃើញនៅឡើយ តែជំនួសមកវិញនូវស្រូវពូជថ្មីៗដែលកំពុងតែស្វែងរកការគាំទ្រ និងទីផ្សារ។

ដោយឡែកនៅដើមខែឧសភានេះ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខា ប្រមាញ់និងនេសាទបានឱ្យដឹងថា កម្ពុជាមានបំណងយកពូជស្រូវមួយប្រភេទទៀត គឺស្រូវគ្រាប់កន្តុល (TropicalJaponica) មកដាំនៅក្នុងប្រទេស ក្រោយពីបានពិសោធហើយឃើញថា ពូជស្រូវប្រភេទនេះអំណោយផលជាមួយនឹងដី និងអាកាសធាតុនៅកម្ពុជា។ ថ្លែងនៅក្នុងសិក្ខាសាលាពិគ្រោះយោបល់ និងផ្សព្វផ្សាយគម្រោងវិនិយោគដាំដំណាំស្រូវប្រភេទគ្រាប់កន្តុលនៅកម្ពុជា រដ្ឋមន្ត្រីក្រសួងកសិកម្មបានបញ្ជាក់ថា ពូជស្រូវគ្រាប់កន្តុលតំបន់ត្រូពិក (Japonica) នេះត្រូវបានធ្វើការពិសោធលើការដាំដុះនៅក្នងទឹកដីខេត្តកំពង់ស្ពឺរួចហើយ ឃើញថាទទួលបានទិន្នផលស្រូវខ្ពស់ប្រមាណពី 5 ទៅ 6តោនក្នុង 1ហិកតា។

លោកមានប្រសាសន៍ថា គម្រោងវិនិយោគលើដំណាំស្រូវមួយនេះ មានផែនការសហការជាមួយកសិករដើម្បីដាំដុះលើផ្ទៃដី 20ម៉ឺនហិកតាក្នុងគោលបំណងបង្កើនទិន្នផលស្រូវសម្រាប់ផលិតអង្ករនាំចេញទៅកាន់ប្រទេសចិនដែលមានតម្រូវការលើអង្ករប្រភេទនេះខ្ពស់។ លោកបានបន្តថា មជ្ឈមណ្ឌលស្រាវជ្រាវពូជស្រូវ និងកែច្នៃអង្ករទំនើបហ៊ូណាន ពីប្រទេសចិនមានគម្រោងសាងសង់រោងចក្រ និងឃ្លាំងស្តុកស្រូវដ៏ទំនើបមួយដើម្បីកែច្នៃអង្ករប្រកបដោយគុណភាពខ្ពស់ស្របតាមស្តង់ដារអន្តរជាតិសម្រាប់ការនាំចេញអង្ករដែលផលិតបានទៅកាន់ទីផ្សារនៅក្នុងតំបន់អាស៊ី។

បើតាមការអះអាងពីវិទ្យាស្ថានស្រាវជ្រាវកសិកម្មបានឱ្យដឹងថា ចំពោះពូជស្រូវកន្តុលមកពីចិនវិញ ខាងវិទ្យាស្ថានយើងមិនធ្លាប់បានធ្វើការសាកល្បងនៅឡើយ តែខាងវិទ្យាស្ថានធ្លាប់បានអះអាងពីពូជស្រូវផ្កាមាលតី ជាពូជដែលបង្កាត់ចេញពីពូជផ្ការំដួលដោយធ្វើឱ្យមានភាពធន់ទ្រាំនឹងភាពរីងស្ងួត និងដួលដើម ហើយមានគុណភាពអង្ករល្អដូចផ្ការំដួល ដូច្នេះចំពោះទីផ្សារវិញ គឺច្បាស់ជាមិនមានបញ្ហាទេ។

ខាងវិទ្យាស្ថានក៏បានឱ្យដឹងដែរថា៖ “ពូជស្រូវផ្កាមាលតីនេះ មិនទាន់ចែកចាយជូនកសិករទេក្នុងឆ្នាំនេះ ព្រោះកំពុងពង្រីកគ្រាប់ពូជសម្រាប់ផ្សព្វផ្សាយឆ្នាំក្រោយ ក៏ប៉ុន្តែកសិករមួយចំនួននៅខេត្តតាកែវ ព្រៃវែង និងពោធិ៍សាត់ដែលសាកល្បងកាលពីឆ្នាំទៅគាត់អាចពង្រីកការដាំដុះបាន។

បើយោងតាមការបញ្ជាក់ពីអ្នកជំនាញកសិកម្ម អង្គការ សេដាក បានឱ្យដឹងថា ចំពោះពូជស្រូវកន្តុល (TropicalJaponica) នេះ ជាពូជត្រូវការត្រជាក់ ជាពូជស្រូវស្រាលដែលអាចទទួលបានទិន្នផលពី 7-8តោនក្នុង1ហិកតា។ ការនាំមកកម្ពុជាគឺ គេចង់បានការពង្រីកទីផ្សារទៅកាន់ប្រទេសក្នុងតំបន់។ សេដាក ក៏ធ្លាប់បានដឹងពីការសាកល្បងពូជស្រូវកន្តុលនេះនៅខេត្តបាត់ដំបងដែរ តែកាលនោះមិនទទួលបានទិន្នផលខ្ពស់ទេ គឺបានត្រឹមតែ3 ទៅ 3,5ប៉ុណ្ណោះក្នុង 1ហិកតា។

លោក សម វិទូ នាយកប្រតិបត្តិអង្គការ សេដាក បានមានប្រសាសន៍ឱ្យដឹងថា ប្រសិនបើពូជស្រូវថ្មីគឺពូជស្រូវផ្កាមាលតី និងពូជស្រូវកន្តុលទាំងពីរនេះប្រជែងគ្នាក្នុងទីផ្សារ លោកយល់ថា ការដណ្តើមទីផ្សារគេត្រូវការមើលទៅលើខ្នាត ទំហំ ក្លិន រសជាតិហើយពូជទាំងពីរនេះជាពូជថ្មី ត្រូវការបង្ហាញឱ្យមជ្ឈដ្ឋានអ្នកប្រើប្រាស់ឱ្យគេបានស្គាល់សិន។

ចំពោះពូជស្រូវផ្កាមាលតីត្រូវការឱ្យមជ្ឈដ្ឋានអ្នកប្រើប្រាស់ស្គាល់ពីគុណភាពសិនថា តើអាចមានគុណតម្លៃដូចប្រភេទស្រូវល្បីចាស់ៗ ដូចជាផ្កាម្លិះ រំដួល រំដេងដែរឬទេ? ព្រោះពូជទាំងនោះពុំទាន់ដណ្តើមទីផ្សារបាននៅឡើយ។

លោកពន្យល់ថា បើប្រៀបធៀបទៅ រសជាតិនៃអង្កររបស់ពូជស្រូវពូជទាំងពីរនេះ ខុសគ្នាតែបន្តិចទេ ដោយផ្កាមាលតីមានភាពរឹងជាង ខុសពីពូជស្រូវកន្តុលដែលមានភាពទន់ជាង តែបើដាក់លក់ក្នុងទីផ្សារពូជស្រូវកន្តុលអាចថ្លៃជាង ព្រោះទាក់ទងទៅនឹងការផលិត ដោយសារសីតុណ្ហភាពមិនអាចដូចពូជក្នុងស្រុកទេ។ ម្យ៉ាងការផលិតមានតម្លៃថ្លៃ ទិន្នផលវិញក៏មិនទាន់ខ្ពស់់។ លោកបន្តថា សូម្បីតែម៉ាស៊ីនកិនស្រូវក៏គេមានលក្ខណៈផ្សេងដោយឡែកដែរ មិនអាចប្រើម៉ាស៊ីនកិនស្រូវក្នុងស្រុកបានទេ។

ដូច្នេះបើចំណាយក្នុងការផលិតខ្ពស់ តម្លៃលក់ក៏ខ្ពស់ដែរ។ តែបើគេដាំពូជស្រូវកន្តុលនេះបានក្នុងទិន្នផលល្អ វេចខ្ចប់ក្នុងលក្ខណៈមួយដែលតម្រូវតាមផ្សារទំនើប មិនមែនទីផ្សារសាមញ្ញនោះ គេអាចនាំចេញទៅប្រទេសជិតខាងក្នុងតំបន់បាន៕

June 2, 2018

មុនចាប់ផ្តើមអាជីវកម្ម អ្នកគួរមានទំនាក់ទំនងជាមួយអតិថិជនគោលដៅជាមុនសិន

ការបង្កើតអាជីវកម្មមួយមិនមែនជាការលំបាកនោះទេ ប៉ុន្តែការលំបាកគឺ ធ្វើយ៉ាងណាដើម្បីឱ្យអាជីវកម្មដំណើរការទៅមុខបានរហូត មិនមានឈប់ឬបញ្ចប់កណ្ដាលទីនោះឡើយ ហើយដើម្បីឱ្យអាជីវកម្មដំណើរការទៅមុខបានជោគជ័យ លុះត្រាតែអ្នកជំនួញបង្កើតអតិថិជនគោលដៅជាមុន ដែលនេះជាការលើកឡើងរបស់លោក ឆាក់ សុជាតិ អ្នកជំនួញវ័យក្មេងម្នាក់នៅកម្ពុជា។

លោក ឆាក់ សុជាតិ ដែលជាអគ្គនាយកក្រុមហ៊ុន Three Natural Life មានប្រសាសន៍ថាបច្ចុប្បន្នលោកមានសម្ព័ន្ធក្រុមហ៊ុនចំនួន4 នៅក្នុងដៃ ដោយក្រុមហ៊ុនទាំងនោះមានដូចជា ក្រុមហ៊ុនផលិតសាប៊ូម៉ាក Dr. Natural ក្រុមហ៊ុនផលិតទឹកសុទ្ធ ក្រុមហ៊ុនផលិតប្រេងឆា និងស្ករស ជាដើមដែលផលិតផលទាំងនេះកំពុងមានការគាំទ្រខ្លាំងពីសំណាក់អតិថិជននៅទូទាំងប្រទេសកម្ពុជា។

ពិសេសក្រុមហ៊ុនផលិតទឹកសុទ្ធដែលចំណាយទុនប្រមាណជា 5លានដុល្លារសាងសង់ឡើង បច្ចុប្បន្នផលិត និងផ្គត់ផ្គង់នៅលើទីផ្សារមិនគ្រប់ទៀតផង ហើយកំពុងពិចារណាសហការជាមួយវិនិយោគិនបរទេសដើម្បីបោះទុនវិនិយោគបន្ថែមសម្រាប់ពង្រីកអាជីវកម្ម នេះឱ្យកាន់តែធំបំពេញតម្រូវការអតិថិជនឱ្យបានគ្រប់គ្រាន់ ចំណែកផលិតផលដទៃទៀតទន្ទឹមគ្នានោះក៏កំពុងមានការគាំទ្រច្រើនគួរសមពីអតិថិជនដែរ។

លោកថា មុននឹងសម្រេចចិត្តបង្កើតក្រុមហ៊ុននេះឡើង លោកមិនមែនធ្វើទៅតាមក្តីស្រមៃ ឬតាមការស្រឡាញ់ ឬធ្វើទៅតាមការនឹកឃើញនោះទេ ពោលគឺមុននឹងបង្កើត លោកបានសិក្សាពីទីផ្សារធ្វើផែនការច្បាស់លាស់ និងទំនាក់ទំនងជាមួយអតិថិជនគោលដៅបានជាច្រើន ហើយ ដូចជាទំនាក់ទំនងនៅក្នុងសិក្ខាសាលា ការតាំងពិព័ណ៍ពាណិជ្ជកម្ម ការចូលរួមកម្មវិធីផ្សេងៗ និងទំនាក់ទំនងសង្គមខាងក្រៅទៀតផង “មុននឹងចាប់ផ្តើម ខ្ញុំមានទំនាក់ទំនងជាមួយអតិថិជនគោលដៅរបស់ខ្ញុំបានប្រហែល 30 ទៅ40%រួចទៅហើយ។ បងដឹងទេ? សម្រាប់ផលិតផលមួយបើសិនមានអតិថិជនគាំទ្រពី10 ទៅ20%រួចហើយនោះ វានឹងដើរទៅមុខដោយរលូនចុះចំណែកខ្ញុំដែលបានទំនាក់ទំនង30 ទៅ40%នៃអតិថិជនគោលដៅរួចហើយនោះ វាប្រាកដណាស់ថា ទំនិញខ្ញុំប្រាកដជាទទួលបានជោគជ័យនៅលើទីផ្សារមិនខាន។

លោកបានប្រាប់ឱ្យដឹងថា សម្រាប់អតិថិជនដែលលក់ផលិតផលទាំងប៉ុន្មានមុខខាងលើនេះ គឺមាននៅពាសពេញប្រទេស នៅទីណាក៏ជាអតិថិជនរបស់យើងដែរ ដូច្នេះពេលដើរទៅណាមកណាត្រូវបង្កើតទំនាក់ទំនង (Build Connection) ជាប់ជាប្រចាំ ប៉ុន្តែយើងត្រូវតែមើលដែរថា តើមនុស្សប្រភេទណាដែលជាអតិថិជនគោលដៅពិតប្រាកដរបស់យើង “ខ្ញុំឧទាហរណ៍ថា យើងបង្កើតគម្រោងលក់អចលនទ្រព្យ ដីធ្លី ផ្ទះល្វែង ឬផ្ទះវីឡាជាដើម ហើយបើយើងទៅទំនាក់ទំនងជាមួយសិស្ស-និស្សិត ឬប្រជាជនតាមទីជនបទ សួរថា តើពួកគាត់មានប្រាក់ទិញផលិតផលអចលនទ្រព្យរបស់យើងដែរឬទេ?

ដូច្នេះអតិថិជនរបស់យើងគឺ អ្នកធ្វើការរាជការ អ្នកធ្វើការងារឯកជន ឬអ្នកជំនួញជាដើម អ៊ីចឹងមុននឹងចាប់ផ្តើមអាជីវកម្មអ្វីមួយត្រូវសម្លឹងមើលអតិថិជនគោលដៅឱ្យចំៗ ចៀសវាងការបរាជ័យ។

លោកបន្តថា ក្រៅតែពីទំនាក់ទំនងក្នុងការងារ លោកក៏តែងព្យាយាមធ្វើការទំនាក់ទំនងជាមួយសង្គមខាងក្រៅឱ្យបានកាន់តែច្រើនតាមដែលអាចធ្វើទៅបានផងដែរ ទោះជាពេលខ្លះគេមិនចាប់អារម្មណ៍ជាមួយយើងក៏ដោយ ក៏យើងនៅតែរកវិធីសាស្ត្រនិយាយជាមួយគេដោយស្និទ្ធស្នាលឱ្យបាន។

ត្រង់ចំណុចនេះលោកបានលើកឡើងតាមរយៈបទពិសោធផ្ទាល់ខ្លួនថាថ្ងៃមួយ ថ្ងៃដែលមិត្តភ័ក្តិរបស់លោករៀបការគឺជាថ្ងៃដែលលោកត្រូវឡើងយន្តហោះទៅបំពេញការងារនៅក្រៅប្រទេសដែរប៉ុន្តែយ៉ាងណាក៏លោកបានឆ្លៀតពេលទៅមុនម៉ោងទៅចងដៃជូនពរមិត្តភ័ក្តិឱ្យបានមួយភ្លែតក៏គ្នាអស់ចិត្តដែរ។ រឿងមួយទៀត អតីតបុគ្គលិករបស់លោកម្នាក់ ដែលឈប់ធ្វើការយូរឆ្នាំមកហើយ បានមកអញ្ជើញការនៅឯខេត្តឆ្ងាយ ក៏លោកមិនបោះបង់ចោលដែរ លោកសុខចិត្តចំណាយប្រាក់ចាក់សាំងរថយន្តធ្វើដំណើរតែម្នាក់ឯងកាត់ពីខេត្តមួយទៅខេត្តមួយដើម្បីបានចូលរួមមង្គលការរបស់អតីតបុគ្គលិកម្នាក់នោះ លើកទឹកចិត្តដល់អ្នកដែលគេធ្លាប់ធ្វើការឱ្យយើង ដែលគេធ្លាប់ជួយឱ្យក្រុមហ៊ុនយើងដំណើរការបានរហូតមកទល់បច្ចុប្បន្ន។

ងាកមកមើលទីផ្សារបច្ចុប្បន្នវិញ មិនខ្វះទេអ្នកជំនួញបរាជ័យ ពោលគឺក្នុងចំណោមអ្នកបង្កើតក្រុមហ៊ុនចំនួន 100នាក់ មានចន្លោះពី50 ទៅ80%ហើយដែលបរាជ័យ ដោយសារពួកគាត់បង្កើតឡើងដោយមិនបានរៀបចំគម្រោងផែនការឱ្យច្បាស់ និងមិនបានបង្កើតអតិថិជនគោលដៅជាមុន។ ដោយពួកគេទាំងនោះ ភាគច្រើនជាអ្នកមានលុយ មិនចូលចិត្តធ្វើការឱ្យគេ បង្កើតក្រុមហ៊ុនទៅតាមការនឹកឃើញ ទៅតាមការស្រឡាញ់ ដើម្បីឱ្យគ្រាន់តែមានការងារធ្វើបំបាត់ការអផ្សុកតែប៉ុណ្ណោះ អារម្មណ៍បែបនេះនៅពេលធ្វើយូរៗទៅនឹងធុញ ហើយនឹងឆាប់បោះបង់ចោលមិនខាន។

លោក ឆាក់ សុជាតិ អគ្គនាយកក្រុមហ៊ុន Three Natural Life

សម្រាប់បទពិសោធផ្ទាល់របស់សហគ្រិនវ័យក្មេងរូបនេះ ដើមឡើយលោកកើតចេញពីគ្រួសារក្រីក្រនៅជនបទមួយ ដោយសារតែស្ថានភាពគ្រួសារជួបការលំបាក ជាប់បំណុលធនាគារដោះស្រាយមិនចេញ ក៏ដាច់ចិត្តធ្វើដំណើរមកភ្នំពេញ រៀនបណ្តើររកការងារធ្វើបណ្តើរ មុនដំបូងធ្វើការនៅក្នុងស្ថាប័នសារព័ត៌មានមួយដែលមានប្រាក់ខែ 200ដុល្លារ។ លុះធ្វើការយូរទៅក្រុមហ៊ុនមានទំនុកចិត្តក៏លក់ភាគហ៊ុនចំនួន 3%មកឱ្យក្នុងទឹកប្រាក់ 2ពាន់ដុល្លារ។

កាលណោះដោយសារឃើញសក្តានុពលនៃវិស័យសារព័ត៌មាន លោកក៏បានសម្រេចចិត្តទិញទាំងមិនមានលុយនៅជាប់ខ្លូនមួយរៀលសោះ។ នៅពេលទិញ លោកបានសុំប្រធានបង់ពាក់កណ្តាលសិន (ស្មើនឹង1,000ដុល្លារ) លុះដល់ប្រធានយល់ព្រម លោកក៏ដាច់ចិត្តទៅខ្ចីលុយមិត្តភ័ក្តិរបស់បងប្រុសរបស់លោកមកទិញភាគហ៊ុននោះ។ ក្រោយមកលោកក៏បានលក់ភាគហ៊ុននោះបន្ត ដោយចំណេញបានប្រាក់មួយចំនួនធំ ទើបចាប់ផ្តើមចេញទៅរកស៊ីផ្ទាល់ខ្លួន ធ្វើរោងចក្រផលិតប្រេងឆា ស្ករសលក់នៅតាមទីផ្សារនានា លុះមានការគាំទ្រច្រើនហើយ ក៏បានសហការជាមួយអ្នកវិនិយោគបរទេសសាងសង់ក្រុមហ៊ុនផលិតសាប៊ូ និងក្រុមហ៊ុនផលិតទឹកសុទ្ធឡើង ចែកចាយបន្ថែមទៀតនៅលើទីផ្សារហើយបច្ចុប្បន្នក៏កំពុងពង្រីកទុនបន្ថែមដើម្បីឱ្យរោងចក្រនេះមានសមត្ថភាពផលិតបានកាន់តែច្រើនឡើងៗ ហើយក៏កំពុងសម្លឹងមើលការវិនិយោគលើវិស័យអចលនទ្រព្យទៀតផងដែរ។

អ្វីដែលជំរុញឱ្យក្រុមហ៊ុនទទួលបានជោគជ័យជាបន្តបន្ទាប់ និងពុំមានការបរាជ័យបែបនេះគឺមុននឹងឈានជើងចូលប្រឡូកក្នុងវិស័យជំនួញ យុវជនឆាក់ សុជាតិ បានខិតខំសិក្សាជំនាញផ្សេងៗជាច្រើនដើម្បីធ្វើជាធាតុផ្សំសម្រាប់ឱ្យអាជីវកម្មជោគជ័យ ឬហៅថា គ្រឿងផ្សំដើម្បីឱ្យសម្លឆ្ងាញ់។ គ្រឿងផ្សំអាជីវកម្មជោគជ័យទាំងនោះគឺ ជំនាញកុំព្យូទ័រ ជំនាញគ្រប់គ្រងធនធានមនុស្ស ជំនាញគ្រប់គ្រងហិរញ្ញវត្ថុ ទីផ្សារ និងជំនាញគួបផ្សំមួយចំនួនទៀតដែលជាតម្រូវការជាក់ស្តែង ក្នុងការដឹកនាំក្រុមហ៊ុនឆ្ពោះទៅរកគោលដៅជោគជ័យ។

តាមរយៈបទពិសោធនេះ លោកបានផ្តាំផ្ញើទៅដល់អតិថិជនទាំងអស់ថា ធ្វើជាមនុស្សត្រូវមានគោលដៅមួយច្បាស់លាស់ ហើយបើចង់ធ្វើជាអ្នកជំនួញត្រូវខំរៀនជំនាញឱ្យបានច្បាស់លាស់ ហើយសម្លឹងរកឱ្យឃើញនូវអ្វីដែលជាតម្រូវការពិតប្រាកដក្នុងទីផ្សារសិក្សាឱ្យបានច្បាស់លាស់ ពីផលិតផលរបស់ខ្លួន និងត្រូវចេះបង្កើតទំនាក់ទំនងឱ្យបានច្រើនជាមុនតាមដែលអាចធ្វើបាន ទើបអាជីវកម្មដែលបង្កើតឡើងនោះទទួលបានជោគជ័យ ប្រសើរជាងការបង្កើតតាមការនឹកឃើញ ឬបង្កើតឡើងតាមចិត្តចង់ទាំងប្រថុយប្រថាន ដែលអាជីវកម្មប្រភេទនេះជួនកាលដំណើរការទៅជោគជ័យ និងជួនកាលមិនជោគជ័យក៏បាន។ ក្រុមហ៊ុនបែបនេះគឺមានឱកាស និងមានហានិភ័យនៅទន្ទឹមគ្នាជានិច្ច៕

June 2, 2018

Author: វល័ក្ខ