វល័ក្ខ - La Reine Media

លោក Southgat ឈឺក្បាលលើការជ្រើសរើសក្រុមអង់គ្លេស ក្រោយផ្តួលកូស្តារីកា

លោក Gareth Southgate បានទទួលស្គាល់ថា លោក «មានការសម្រេចចិត្តដ៏លំបាក» ជាច្រើនដែលត្រូវធ្វើ ជុំវិញកាជ្រើសរើសទាំង 11នាក់ដំបូងរបស់លោកសម្រាប់ការប្រកួតបើកឆាកក្នុងពូលរបស់ក្រុមបាល់ទាត់ជម្រើសជាតិអង់គ្លេសក្នុងយុទ្ធនាការ World Cup ជាមួយនឹងក្រុមជម្រើសជាតិទុយនីស៊ី ក្នុងរយៈពេល 10ថ្ងៃទៀត ក្រោយពីក្រុមដែលមានការផ្លាស់ប្តូរកីឡាករច្រើនរបស់លោក បានបង្ហាញពីទម្រង់លេងដ៏គួរឱ្យទាក់ទាញនៅពេលប្រកួតជាមួយនឹងក្រុមកូស្តារីកា។

ខ្សែប្រយុទ្ធ Marcus Rashford និងខ្សែបម្រើ Ruben Loftus-Cheek បានបង្ហាញពីទម្រង់លេងដ៏គួរឱ្យទាក់ទាញក្នុងពេលយកឈ្នះលើក្រុមបាល់ទាត់ជម្រើសជាតិកូស្តារីកា ក្នុងលទ្ធផល 2-០ ក្នុងទីក្រុង Leeds កាលពីថ្ងៃព្រហស្បតិ៍ ដើម្បីផ្តល់ឱ្យអ្នកចាត់ការទូទៅរូបនេះមានហេតុផលជាច្រើនដែលត្រូវពិចារណា នៅមុនពេលការធ្វើដំណើររបស់ក្រុមអង់គ្លេសទៅកាន់យុទ្ធនាការ World Cup នៅថ្ងៃអង្គារសប្តាហ៍ក្រោយ។

លោក Southgate បានឱ្យដឹងថា៖ «ពិតណាស់ វាកាន់តែលំបាក។ មានការសម្រេចចិត្តធំៗជាច្រើនដែលត្រូវធ្វើ ប៉ុន្តែ ស្ថិតក្នុងវិធីដ៏ល្អមួយ។ ប្រសិនបើខ្ញុំគិតថា ខ្ញុំមិនមាននរណាម្នាក់ក្នុងការលេងក្នុងទីតាំងនេះ ឬក្នុងទីតាំងនោះ វានឹងក្លាយជាស្ថានភាពដ៏លំបាក។ យើងបានស្នើឱ្យកីឡាករផ្តល់ឱ្យយើងនូវការប្រជែងគ្នាសម្រាប់កៅអីផ្សេងៗ ហើយពួកគេធ្វើបាន។ យើងត្រូវការជម្រើសជាច្រើន»។

គ្រូបង្វឹករូបនេះបានប្រាប់បន្ថែមទៀតថា៖ «អ្វីដែលបានធ្វើឱ្យខ្ញុំរីករាយនោះគឺថា Marcus Rashford បានរីករាយនឹងកីឡាបាល់ទាត់របស់គេនៅរាត្រីនេះ។ រូបគេលេងបានយ៉ាងល្អ ជាមួយនឹងភាពមុតស្រួចយ៉ាងពិតប្រាកដ»៕

ប្រភពពី៖ The Guardian

June 8, 2018

គូលែនខ្មែរ ផ្លែច្រើន លក់បានតម្លៃខ្ពស់ខ្លាំងនៅលើទីផ្សារ

ដោយសង្កេតឃើញថាបច្ចុប្បន្នផ្លែគូលែនដែលដាក់លក់នៅលើទីផ្សារកម្ពុជា ភាគច្រើននាំចូលពីប្រទេសជិតខាងនោះ កសិករខ្មែរម្នាក់បានសម្រេចចិត្តចំណាយថវិកាជាច្រើនដើម្បីបង្កាត់ពូជគូលែនពីប្រទេសថៃ និងនាំចូលមកដាំនៅក្នុងប្រទេសកម្ពុជាហើយទទួលបានជោគជ័យក្នុងការដាំដុះ និងទទួលបានទិន្នផលល្អ ព្រមទាំងមានការគាំទ្រខ្លាំងនៅលើទីផ្សារទៀតផង។

លោក គីម សំអឿន ម្ចាស់ចម្ការគូលែនឈ្មោះ “ហាវ៉ៃខ្មែរ” មានទីតាំងនៅក្នុងភូមិស្រយ៉ង់ ឃុំស្រយ៉ង់ស្រុកគូលែន ខេត្តព្រះវិហារ បានមានប្រសាសន៍ថា លោកបានសម្រេចចិត្តចំណាយថវិកាជាច្រើនទិញចម្ការគូលែននៅឯប្រទេសថៃដើម្បីបង្កាត់ពូជសម្រាប់នាំចូលមកដាំដុះសាកល្បងនៅក្នុងប្រទេសកម្ពុជាកាលពីអំឡុង 2ឆ្នាំមុន។ ជាលើកដំបូងលោកបានយកមកដាំសាកល្បងត្រឹមតែ 50ដើមប៉ុណ្ណោះ ហើយមកទល់ពេលនេះវាបានហុចផលជាបណ្តើរៗហើយ “ដើមគូលែនយើងមិនមែនបណ្តុះគ្រាប់ដាំនោះទេ គឺយើងផ្សាំយកមែកពីដើមមុនៗដែលវាមានផ្លែស្រាប់ ដូច្នេះនៅពេលយើងផ្សាំបានហើយយកមកដាំពេលដល់រដូវវាផ្លែ គឺវាចាប់ផ្តើមផ្លែតែម្ដង គ្រាន់តែថាវាឱ្យផ្លែតិច ដោយសារតែដើមវានៅតូចនៅឡើយ។

លោកបន្តថា ចាប់ពីឆ្នាំទី1 ឬឆ្នាំទី2ឡើងទៅ វានឹងចាប់ផ្តើមហុចផលឱ្យជាបណ្តើរៗ ហើយផ្លែនឹងកាន់តែច្រើនឡើងពីមួយឆ្នាំទៅមួយឆ្នាំ លុះនៅពេលវាអាយុបាន5 ទៅ6ឆ្នាំ វានឹងចាប់ផ្តើមផ្លែពេញទំហឹង ដោយក្នុងមួយដើមហុចផលឱ្យក្នុងចន្លោះពី 70គីឡូក្រាម ទៅដល់300 ឬ400គីឡូក្រាមក្នុងមួយឆ្នាំក៏មាន អាស្រ័យលើការថែទាំរបស់ម្ចាស់ចម្ការ និងដើមល្អ ឬមិនល្អ។ ហើយសម្រាប់ការដាំសាកល្បងចំនួន 50ដើមដំបូងនោះ ឥឡូវយើងប្រមូលផលបានប្រមាណពី2 ទៅ3តោនក្នុងមួយឆ្នាំដោយមិនទាន់បានដាក់លក់នៅលើទីផ្សារនៅឡើយទេ គ្រាន់តែបេះចែកបងប្អូនពិសាសាកល្បង និងលក់រាយសម្រាប់ប្រជាពលរដ្ឋរស់នៅជិតខាងតែប៉ុណ្ណោះ។

ដោយសារវាមានឱជារសផ្អែមឆ្ងាញ់ជាប់មាត់នោះ ធ្វើឱ្យផ្លែរបស់វាលក់បានថ្លៃក្នុងមួយគីឡូក្រាមតម្លៃ 20,000រៀល មានប៉ុន្មានក៏គេទិញយកអស់ដែរ។ នេះគ្រាន់តែចែកចាយនៅក្នុងភូមិ-ឃុំប៉ុណ្ណោះ មិនមានលក់ឱ្យម៉ូយធំៗនៅតាមផ្សារ ឬនៅក្នុងទីក្រុងភ្នំពេញនៅឡើយទេ។

លោកបន្តថា បច្ចុប្បន្នលោកដាំបានប្រមាណជា 3,000ដើមហើយនៅលើផ្ទៃដីប្រហែលជិត 20ហិកតា និងកំពុងតែពង្រីកបន្ថែមទៀតផង ដោយមួយថ្ងៃអាចដាំបានចន្លោះពី50 ទៅ100ដើម ដើម្បីឱ្យគ្រប់តាមផែនការនៅលើផ្ទៃដីដាំដុះចំនួន 150ហិកតានៅក្នុងខេត្តព្រះវិហារសម្រាប់ទុកចែកចាយទិន្នផលរបស់វានៅលើទីផ្សារផង និងបង្កាត់ពូជទុកលក់បន្តជូនទៅអតិថិជននៅតាមបណ្តាខេត្តផ្សេងៗទៀតផង។ ហើយបច្ចុប្បន្នមានគ្រួសារអ្នកធូរធារមួយចំនួនបានមកទិញពូជពីចម្ការរបស់លោកយកទៅដាំបន្តនៅតាមបណ្តាខេត្តផ្សេងខ្លះៗហើយ ដោយអ្នកខ្លះកុម្ម៉ង់ទិញ 2,000ដើម អ្នកខ្លះ1,000ដើម ឬ100 ទៅ200ដើមក៏មានដែរ។ សម្រាប់ពូជដែលគេលក់នៅក្នុងប្រទេសថៃដំបូងឡើយ តម្លៃមួយដើមស្មើនឹង 15ដុល្លារ ប៉ុន្តែសម្រាប់ពូជដែលលក់ចេញនៅកម្ពុជាយើងវិញ មិនថ្លៃដូចនៅប្រទេសថៃទេ។

សម្រាប់បច្ចេកទេសដាំដុះវិញ គេមិនបណ្តុះចេញពីគ្រាប់ដូចដំណាំមួយចំនួនទៀតឡើយ ពោលគឺកសិករគ្រាន់តែផ្សាំមែកដែលល្អៗទុករយៈពេល 3ខែ រួចកាត់យកមកដាក់ក្នុងថង់ដែលដីនៅក្នុងថង់នោះត្រូវតែមានជីជាតិល្អ និងរក្សាទុករយៈពេល 3ខែទៀតដើម្បីឱ្យកូនគូលែនចេញឫសបានល្អ ទើបយកទៅដាក់ដាំនៅក្នុងរណ្តៅទំហំ 40សង់ទីម៉ែត្រ 4ជ្រុង និងដាក់ដាំចន្លោះឆ្ងាយពីគ្នា 5ម៉ែត្រក្នុងមួយដើមៗ ឬចន្លោះ10ម៉ែត្រមួយក៏រឹតតែល្អ ព្រោះបើដាំចម្ងាយពីគ្នា 5ម៉ែត្រមួយ នៅពេលដើមគូលែនអាយុបាន 10ឆ្នាំ ដើមវាធំខ្លាំង ដែលតម្រូវឱ្យគេកាប់ដើមមួយៗចោលវិញ តែបើដាំចម្ងាយពីគ្នា 10ម៉ែត្រមួយដើម គេមិនបាច់កាប់ដើមចោលខ្លះទេ ទោះជាមែកធំក៏វាមិនទើសគ្នា និងចង្អៀតដីដែរ។

មុននឹងចាប់ផ្តើមដាំកសិករគួរភ្ជួរដីហាលចោលជាមុនដើម្បីឱ្យស្មៅងាប់អស់ក៏បាន ឬមិនបាច់ភ្ជួរដីមុនក៏បាន គ្រាន់តែលំបាកថែទាំស្មៅនៅពេលក្រោយតែប៉ុណ្ណោះ។ បន្ទាប់មកគេត្រូវកាប់រណ្តៅទំហំ 40សង់ទីម៉ែត្រ 4ជ្រុង ហើយយកកូនគូលែនដែលផ្សាំហើយនោះមកដាក់ដាំ (កុំភ្លេចដកថង់ចេញផង)ហើយក្នុងរណ្តៅនោះមិនចាំបាច់ក្រាលជីទេ គ្រាន់តែយកដីផុសៗមកដាក់ចូល ហើយមិនចាំបាច់សង្កត់ឱ្យដីនោះហាប់ណែនឡើយ តែត្រូវយកឈើមួយដើមមកដោតក្បែរកូនដើមគូលែននោះ និងចងជាប់គ្នា ដើម្បីកុំឱ្យត្រូវខ្យល់បក់បោកដួល រួចមើលថែទាំជាប្រចាំ បើខែវស្សាមិនបាច់ស្រោចទឹកទេ តែបើខែប្រាំងវិញត្រូវស្រោចទឹកមួយថ្ងៃម្ដង ឬ2ថ្ងៃម្តងបើកូនធំ ស្រោចទឹកមួយសប្តាហ៍ម្ដងក៏បានដែរ។

រហូតដល់2ខែ នៅពេលដែលកូនគូលេនចាក់ឫសលូតលាស់បានល្អហើយ គេត្រូវដាក់ជីដោយវាស់ដីចេញពីគល់មួយចំអាមជុំវិញ ហើយកាយដីរោយជីជុំវិញដើមនោះរួចកប់ដីចោលទៅវិញ ហើយស្រោចទឹកបន្តទៀត វានឹងលូតលាស់ល្អមិនខាន។ តែកសិករត្រូវចេះពីរបៀបតុបតែងដើម មានន័យថា នៅពេលដើមគូលែនធំឡើង អាយុបាន 2ឆ្នាំ វាចាប់ផ្តើមបែកមែកសាខាលូតកម្ពស់ប្រហែលជាជាង 2ម៉ែត្រ បើមើលឃើញថា មែកណាមិនសូវល្អ គេត្រូវកាត់វាចោលខ្លះ ដើម្បីកុំឱ្យវាលូតកម្ពស់ឡើងខ្លាំងពេកពិបាកថែទាំ និងពិបាកប្រមូលផល។ ម្យ៉ាងទៀតពេលដែលយើងកាត់មែកដែលមិនល្អចោល គឺវាអាចស្រូបយកជីជាតិទៅចិញ្ចឹមមែកល្អៗដែលយើងទុកទាំងប៉ុន្មានឱ្យវាលូតលាស់បានល្អ បានលឿន ឆាប់ផ្តល់ផល និងផ្តល់ផលបានកាន់តែច្រើនឡើងទៀតផង៕

June 7, 2018

Man Utd ចុះហត្ថលេខាជាមួយ Dalot មកពី Porto ក្នុងតម្លៃខ្លួន 19លានអឺរ៉ូ

ក្លិបបិសាចក្រហម Manchester United បានបំពេញការចុះហត្ថលេខាជាមួយនឹងខ្សែការពារ DiogoDalot មកពីក្លិប Porto កាលពីថ្ងៃពុធ។ ខ្សែការពារកណ្តាលវ័យ 19ឆ្នាំរូបនេះ ដែលត្រូវបានគេយល់ឃើញថា បានផ្ទេរក្នុងតម្លៃខ្លួន 19លានអឺរ៉ូ (ស្មើនឹង 26លានដុល្លារអាមេរិក) នោះ បានទទួលការពិនិត្យសុខភាពជាមួយនឹងក្លិប Man United រួចហើយកាលពីថ្ងៃអង្គារ។

Dalot បានចុះហត្ថលេខារយៈពេល 5ឆ្នាំ ជាមួយនឹងជម្រើសក្នុងការបន្តរយៈពេល 1ឆ្នាំទៀត និងក្លាយជាកីឡាករចំណូលថ្មីទី2 របស់លោក Jose Mourinho នារដូវក្តៅនេះ ក្រោយពីខ្សែការពារអន្តរជាតិអង់គ្លេស Fred បានចូលរួមក្នុងតម្លៃខ្លួន 50លានផោន (ស្មើនឹង 67លានដុល្លារអាមេរិក)។

Dalotបានឱ្យដឹងថា៖ «ការចូលរួមជាមួយនឹងក្លិប Manchester United គឺជាឱកាសដែលមិនគួរឱ្យជឿមួយសម្រាប់ខ្ញុំ។ ខ្ញុំបានធ្វើការអភិវឌ្ឍចេញពីក្រុមយុវជនរបស់ Porto ហើយខ្ញុំពិតជាថ្លែងអំណរគុណដល់រាល់អ្វីៗទាំងអស់ដែលពួកគេបានធ្វើចំពោះខ្ញុំ។ ប៉ុន្តែឱកាសក្នុងការចូលរួមជាមួយនឹងក្លិបដ៏ធំបំផុតក្នុងពិភពលោកនេះ គឺជាឱកាសដែលខ្ញុំមិនអាចច្រានចោលបានឡើយ»។

Dalot បានបន្ថែមទៀតថា៖ «ខ្ញុំពិតជារំភើបណាស់ក្នុងការធ្វើការជាមួយនឹងលោក Jose Mourinhoនិងរៀនរាល់អ្វីៗទាំងអស់ដែលខ្ញុំអាចពីគ្រូបង្វឹកដ៏ជោគជ័យម្នាក់នេះ។ ខ្ញុំកំពុងតែសម្លឹងឆ្ពោះទៅមុខ ទៅកាន់ការលេងរួមជាមួយនឹងកីឡាករដ៏អស្ចារ្យជាច្រើនក្នុងក្រុមនេះ»។ លោក Mourinho បានឱ្យដឹងក្នុងសេចក្តីថ្លែងការណ៍មួយរបស់ Man United ថា៖ «Diogo គឺជាខ្សែការពារវ័យក្មេងពោរពេញដោយទេពកោសល្យម្នាក់ ដែលមានរាល់គុណភាពទាំងអស់ក្នុងការក្លាយជាកីឡាករដ៏អស្ចារ្យម្នាក់សម្រាប់ក្លិបរបស់គេ»៕

ប្រភពពី៖ Sky Sports

June 7, 2018

Lukaku រកបានគ្រាប់បាល់ ខណៈបែលហ្ស៊ិក យកឈ្នះលើ អេហ្ស៊ីប យ៉ាងងាយ

ក្រុមបាល់ទាត់ជម្រើសជាតិបែលហ្ស៊ិកដែលបានឈ្នះសិទ្ធិទៅ World Cup ដែរនោះ បានផ្តួលក្រុមជម្រើសជាតិអេហ្ស៊ីបយ៉ាងងាយស្រួលក្នុងលទ្ធផល 3-០ ក្នុងទីក្រុង Brussels កាលពីថ្ងៃពុធ។

ជាមួយនឹងការប្រើប្រាស់ខ្សែការពារតែ 3នាក់ ក្រុមជម្រើសជាតិបែលហ្ស៊ិក ដែលកំពុងតែស្ថិតក្នុងពូល G រួមជាមួយនឹងក្រុមបាល់ទាត់ជម្រើសជាតិអង់គ្លេសដែរនោះ បានបង្ហាញពីទម្រង់លេងប្រកបដោយភាពមុតស្រួចនៅពេលបញ្ចប់ការប្រកួតក្នុងលទ្ធផលស្មើ ០-០ ជាមួយនឹងក្រុមជម្រើសជាតិព័រទុយហ្គាល់ កាលពីថ្ងៃសៅរ៍។

ខ្សែប្រយុទ្ធ Romelu Lukaku ដែលត្រូវបានដាក់ឱ្យចូលលេងក្នុងជម្រើសដំបូងជំនួសខ្សែប្រយុទ្ធ MichyBatshuayi នោះ បានជួយឱ្យក្រុមម្ចាស់ផ្ទះមានគ្រាប់បាល់នាំមុខមុននៅនាទីទី27 ក្រោយពីអ្នកចាំទី Essam El-Hadary វ័យ 45ឆ្នាំរបស់អេហ្ស៊ីប បានចាប់បាល់ក្រឡកចេញពីដៃពីការស៊ុតរបស់កីឡាករ Eden Hazard។

បន្ទាប់មក Hazard បានជួយឱ្យក្រុមខ្លួនមានគ្រាប់បាល់នាំមុខ 2-០ ក្នុងរយៈពេល 11នាទីក្រោយមក ក្រោយពីកីឡាករ Yannick Carrasco បានបញ្ជូនបាល់ចូលក្នុងប្រអប់គ្រោះថ្នាក់យ៉ាងល្អ នៅមុនពេល Batshuayi ដែលចូលជំនួស Lukaku បានជួយឱ្យ MarouaneFellaini រកបានគ្រាប់បាល់ទី3 ដើម្បីបំពេញឱ្យការមិនស្គាល់ឈ្នះសោះជាលើកទី6 សម្រាប់ក្រុមជម្រើសជាតិអេហ្ស៊ីប ដែលបានអវត្តមានតារាឆ្នើម Mohamed Salah។ Hazard បានឱ្យដឹងបន្ទាប់ពីការប្រកួតថា៖ «វាជារឿងដ៏ល្អក្នុងការបន្ថែមភាពស៊ីចង្វាក់គ្នាក្នុងការប្រកួតនេះ ដើម្បីបង្កើតឱកាសជាច្រើន និងរកបានគ្រាប់បាល់បញ្ចូលទី»។

ប្រភពពី៖ The Guardian

June 7, 2018

ជ្រោយចង្វារកំពុងក្លាយជាបណ្តុំសំណង់អគារដ៏សម្បូរបែប

ដោយមានអំណោយផលពីធម្មជាតិ ស្ថិតនៅតាមដងទន្ល ជាដីជ្រោយដែលមានទន្លេនៅសងខាង និងនៅក្បែរទន្លេរមេគង្គដ៏ធំ មានទេសភាពស្រស់បំព្រង និងខ្យល់អាកាសស្រស់ស្អាតបរិសុទ្ធផងនោះបានធ្វើឱ្យទឹកដីជ្រោយចង្វារក្លាយជាតំបន់មួយដែលប្រមូលផ្ដុំទៅដោយសំណង់អគារប្រណីតៗដ៏សម្បូរបែបមិនចាញ់តំបន់បឹងកេងកងឡើយ ទាំងសំណង់លំនៅឋានជាលក្ខណៈគ្រួសារ សំណង់លំនៅឋានទំនើបៗនៅក្នុងបុរី និងសំណង់ខុនដូ-អាផាតមិនខ្ពស់ៗជាច្រើន។

លោកឧកញ៉ា នួន រិទ្ធី អគ្គនាយកក្រុមហ៊ុន Khmer Foundation Appraisal បានលើកឡើងថា វាជារឿងធម្មតាទេ នៅពេលដែលតំបន់ក្នុងទីក្រុងភ្នំពេញមានការកើនឡើងនូវចំនួនអគារធំៗច្រើន ដូចជាសំណង់អគារខុនដូ-អាផាតមិន និងសំណង់លំនៅឋានផងនោះ វាធ្វើឱ្យតំបន់ដែលស្ថិតនៅជាប់ទីក្រុងក្លាយជាមុខសញ្ញាក្នុងការអភិវឌ្ឍ និងមានតម្រូវការខ្ពស់ជាបន្ទាប់។ ជាក់ស្ដែងដូចជាតំបន់ជ្រោយចង្វារជាដើម ពីមុនមានភាពទូលាយស្រឡះល្ហល្ហេវ ប៉ុន្តែបច្ចុប្បន្ននេះទីនោះបានក្លាយទៅជាតំបន់ដ៏មានសក្ដានុពល ជាពិសេសលើផ្នែកសំណង់លំនៅឋានដែលជំរុញឱ្យតម្លៃដីមានការកើនឡើងខ្ពស់។

លោកឧកញ៉ាបានបន្ថែមទៀតថា កាលពីប៉ុន្មានឆ្នាំមុន ដីនៅជាប់ផ្លូវធំក្នុងតំបន់ជ្រោយចង្វារមានតម្លៃទាបនៅឡើយ ពោលគឺប្រមាណជា1,000 ទៅ1,500ដុល្លារប៉ុណ្ណោះក្នុងមួយម៉ែត្រការ៉េ ប៉ុន្តែឥឡូវបានកើនឡើងខ្ពស់រហូតដល់2,500 ទៅដល់ 3,500ដុល្លារឯណោះក្នុងមួយម៉ែត្រការ៉េ។

លោកឧកញ៉ាបានបន្តទៀតថា ប្រសិនបើបរិយាកាសសេដ្ឋកិច្ចកម្ពុជានៅតែមានភាពល្អប្រសើរដូចជាពេលបច្ចុប្បន្ននេះ មិនយូរទៀតទេតំបន់ជ្រោយចង្វារនឹងក្លាយជាតំបន់ពិសេសមួយដែលអំណោយផលលើវិស័យសំណង់លំនៅដ្ឋានសម្រាប់ការរស់នៅ ក៏ដូចជាមជ្ឈមណ្ឌលពាណិជ្ជកម្មផ្សេងៗដែលនឹងធ្វើឱ្យកើតមានវត្តមានរបស់អគារធំៗ និងខ្ពស់ៗមិនក្រោម15 ទៅ20ជាន់ជាច្រើនប្រៀបដូចជាតំបន់កៅលូនដែលស្ថិតនៅជ្រោយម្ខាងនៃទីក្រុងហុងកុងដូច្នោះដែរ។

ជាក់ស្តែងថ្មីៗនេះក៏មានគម្រោងខុនដូ Residences Bel Air ដែលមានលក្ខណៈទំនើបស្តង់ដារបែបបារាំងកម្ពស់ 18ជាន់ត្រៀមសាងសង់ក្រោមការបណ្តាក់ទុនរូមគ្នារវាងអ្នកវិនិយោគជនជាតិខ្មែរ និងបរទេសសង់នៅតំបន់ជ្រោយចង្វារបែរមុខទៅទន្លេមេគង្គនេះផងដែរ។ លោក ជា ឡាយឃាងអគ្គនាយក ខុនដូ Residences Bel Air បានមានប្រសាសន៍យល់ស្របទៅនឹងការលើកឡើងរបស់អ្នកជំនាញខាងលើថា ហេតុផលដែលជំរុញឱ្យរូបលោកបោះទុនជាច្រើនលានដុល្លារលើការសាងសង់អគារខុនដូ Residences Bel Air ព្រោះជ្រោយ-ចង្វារជាតំបន់មួយដែលមានសក្ដានុពល។

ក្រៅពីមានភាពអំណោយផលពីធម្មជាតិនូវខ្យល់អាកាសត្រជាក់បរិសុទ្ធស្ថិតនៅទិសខាងកើតឆៀងខាងជើងអមដោយដងទន្លេព័ទ្ធជុំវិញ ជ្រោយចង្វារក៏ជាតំបន់ ដែលជិតងាយស្រួលធ្វើដំណើរមកកាន់កណ្តាលរាជធានីភ្នំពេញ។ លោកបានបន្តថា សម្រាប់ប្រជាជនកម្ពុជាបច្ចុប្បន្នចាប់ផ្តើមមានទំនោរក្នុងការរស់នៅបែបអគារសហកម្មសិទ្ធិជាបណ្តើរៗដែរ ហើយ និងរឿងដែលពួកគាត់តែងមានការបារម្ភគឺសុវត្ថិភាពនៃអគ្គិភ័យព្រោះវាជាការរស់នៅលើខុនដូដ៏ខ្ពស់មួយ ហេតុដូច្នេះទើបលោកមានការប្រុងប្រយ័ត្ន និងយកចិត្តទុកដាក់ខ្ពស់បំផុតលើបច្ចេកទេសនៃការសាងសង់ ដោយមានប្រព័ន្ធការពារសុវត្ថិភាព និងបំពាក់ដោយឧបករណ៍ការពារអគ្គិភ័យដ៏ទំនើបប្រកបដោយភាពជឿជាក់ ធ្វើយ៉ាងណាធានាបាននូវសុវត្ថិភាពខ្ពស់ដល់អ្នករស់នៅលើខុនដូរបស់លោក។

ចំណែកលោក ច្រឹក សុខនីម អគ្គនាយកក្រុមហ៊ុន Century 21 MEKONG បានមានប្រសាសន៍ស្រដៀងគ្នានឹងលោក ជា ឡាយឃាង ដែរថា តំបន់ជ្រោយចង្វារជាតំបន់អភិវឌ្ឍន៍ទី2 បន្ទាប់ពីតំបន់ភ្នំពេញថ្មី(ប៉ែកពាយព្យរាជធានីភ្នំពេញ) ដែលអ្នកវិនិយោគធំៗកំពុងនាំគ្នាសម្លឹងបែរទិសទៅអភិវឌ្ឍនៅទីនោះម្ដង ដោយសារតែទីតាំងខាងលើមានភាពអំណោយផលពីធម្មជាតិលើការរស់នៅ មានដងទន្លេសងខាងដែលផ្តល់នូវភាពស្រស់ស្រាយបរិសុទ្ធ មានផ្លូវធំៗ មានស្ពានឆ្លងកាត់ច្រើន និងមានទីតាំងភូមិសាស្ត្រនៅជិតទីតាំងសំខាន់ៗរបស់រាជធានីភ្នំពេញច្រើនជាងគេក្នុងចំណោមតំបន់ជាយក្រុងទាំង4ទិស ដូចជាផ្លូវជាតិលេខ1 ផ្លូវជាតិលេខ2 លេខ3 លេខ4 និងផ្លូវជាតិលេខ5។

លោកថា ក្រៅពីសំណង់លំនៅឋានរស់នៅបែបស៊ីវិល័យសម័យទំនើបហើយ តំបន់ជ្រោយចង្វារនឹងក្លាយជាមជ្ឈមណ្ឌលពាណិជ្ជកម្ម និងផ្សារទំនើបដ៏សម្បូរបែប ខណៈដែលអ្នកវិនិយោគធំៗពិសេសក្រុមហ៊ុន OCIC បាននិងកំពុងត្រៀមអភិវឌ្ឍសំណង់ពិសេសៗ អគារខ្ពស់ៗ នៅទីនោះបន្ថែមទៀត។

គួរបញ្ជាក់ថា ចាប់តាំងពីតំបន់គល់ស្ពានជ្រោយ-ចង្វារឆ្ពោះទៅទិសខាងកើតតាមបណ្តោយផ្លូវជាតិលេខ 6A សំណង់គ្រប់ប្រភេទបានលេចចេញរូបរាងព្រោងព្រាត ដែលក្នុងនោះរួមមានដូចជា បុរីសុភមង្គល បុរី The Mekong Royal បុរីប៉េងហួត បុរីអរគីដេវីឡា និងបុរី The Flora ជាដើម៕

June 7, 2018

Man Utd ធ្វើឱ្យ Fred ក្លាយជាកីឡាករចំណូលថ្មីមុនគេរបស់ខ្លួននៅរដូវក្តៅនេះ

ក្លិប Manchester United បានឈានដល់ការព្រមព្រៀងគ្នាមួយជាមួយនឹងក្លិប Shakhtar Donetsk ដើម្បីចុះហត្ថលេខាជាមួយនឹងខ្សែបម្រើអន្តរជាតិប្រេស៊ីល Fred ក្នុងតម្លៃខ្លួនប្រមាណជា 52លានផោន (ស្មើនឹង 69លានដុល្លារអាមេរិក)។

Man United បានប្រកាសពីព័ត៌មាននេះ ក្នុងសេចក្តីថ្លែងការណ៍ដ៏ខ្លីមួយនៅលើគេហទំព័រផ្ទាល់ខ្លួនរបស់ពួកគេតាមរយៈការបញ្ជាក់ថា៖ «ក្លិប Manchester United ពិតជារីករាយណាស់ក្នុងការប្រាប់ថា យើងបានឈានដល់ការព្រមព្រៀងគ្នាជាមួយនឹងក្លិប Shakhtar Donetsk សម្រាប់ការផ្ទេរ Frederico Rodrigues de Paula Santos (Fred)។ ការប្រកាសបន្ថែមទៀតនឹងត្រូវធ្វើឡើងក្នុងពេលឆាប់ៗនេះ។

Fred បានចូលលេងក្នុងពេលក្រុមជម្រើសជាតិប្រេស៊ីល បានយកឈ្នះលើក្រុមជម្រើសជាតិក្រូអាស៊ី 2-0 ក្នុងការប្រកួតមិត្តភាពនាកីឡដ្ឋាន Anfield កាលពីថ្ងៃអាទិត្យ ប៉ុន្តែនៅតែមានភាពខ្មាស់អៀនទៅលើអនាគតរបស់គេ នៅពេលដែលត្រូវបានចោទសួរដោយបណ្តាញសារព័ត៌មានប្រេស៊ីលក្រោយពីការប្រកួតនេះ។

កីឡាករវ័យ 25ឆ្នាំរូបនេះ ដែលបានចូលរួមជាមួយនឹងក្លិប Shakhtar ដោយចេញពីក្លិប Inter Milan កាលពីឆ្នាំ2013 ត្រូវបានបញ្ចូលឈ្មោះក្នុងក្រុមជម្រើសជាតិប្រេស៊ីល សម្រាប់យុទ្ធនាការ World Cup ក្នុងប្រទេសរុស្ស៊ី។

រូបគេនឹងក្លាយជាកីឡាករចំណូលថ្មីដំបូងគេនៅរដូវក្តៅនេះ របស់លោក Jose Mourinho អ្នកចាត់ការទូទៅរបស់ Man United ដែលក៏កំពុងតែស្ថិតយ៉ាងប្រកៀកក្នុងការបំពេញការផ្ទេរខ្សែការពារ DiogoDalot ពីក្លិប Porot ផងដែរ៕

ប្រភពពី៖ Daily Mail

June 6, 2018

រុស្ស៊ី សម្លឹងរកមើលការធ្វើឱ្យបាល់ទាត់ស្ថិតក្នុងទីតាំងនាំមុខគេនៅ World Cup

ប្រទេសឯកោរុស្ស៊ី នឹងត្រូវបើកទ្វារចំហ ដើម្បីរៀបចំយុទ្ធនាការ World Cup ក្នុងរយៈពេល 1សប្តាហ៍ទៀត ក្រោមការតុបតែងរចនាប្រកបដោយភាពស្រស់បំព្រង និងល្អប្រណីត ដើម្បីធ្វើឱ្យប្រទេសម្ចាស់ផ្ទះមួយនេះ ចាកចេញពីភាពត្រជាក់។

ការអបអរសាទររយៈពេល 1ខែពេញនៃកីឡាដ៏មានប្រជាប្រិយភាពបំផុតរបស់ពិភពលោកមួយនេះ អាចនឹងត្រូវរំខានដោយការបារម្ភអំពីការរើសអើងជាតិសាសន៍ និងអំពើហិង្សាផ្សេងៗ ក៏ដូចជាជម្លោះផ្នែកការទូតដែរ។ ប៉ុន្តែ លោក Vladimir Putin មិនមានភាពស្រពេចស្រពិលក្នុងការបង្កើតឱ្យមានព្រឹត្តិការណ៍ដ៏ធំបំផុត និងរំភើបបំផុត ដែលរុស្ស៊ីមិនធ្លាប់បានឃើញនេះឡើយ ចាប់តាំងពីព្រឹត្តិការណ៍អូឡាំពិករដូវក្តៅ ក្នុងទីក្រុងម៉ូស្គូ កាលពីឆ្នាំ1980ម្ដងរួចមក។

កីឡដ្ឋានចំនួន12 ក្នុងទីក្រុង11 ជាប់តំបន់អឺរ៉ុប ក្នុងប្រទេសដ៏ធំជាងគេបំផុតក្នុងពិភពលោក កំពុងត្រៀមលក្ខណៈរួចរាល់ហើយ ក្រោយពីបំពេញការលាបពណ៌ជាលើកចុងក្រោយរបស់ខ្លួនរួចរាល់។ តារាឆ្នើមៗជាច្រើនចាប់ពីខ្សែប្រយុទ្ធអន្តរជាតិប្រេស៊ីល Neymar រហូតដល់ Lionel Messi របស់អាហ្សង់ទីន និង Cristiano Ronaldo របស់ព័រទុយហ្គាល់ សុទ្ធសឹងកំពុងតែត្រៀមធ្វើការប្រជែងគ្នាដើម្បីទទួលបានសិទ្ធិលើកពានឈ្មោះថា Jules Rimet Trophy នាថ្ងៃទី15 ខែកក្កដា។

ស្ទើរតែគ្រប់មនុស្ស នៅក្នុងពិភពលោក បានចាប់អារម្មណ៍ទៅលើយុទ្ធនាការ World Cup ចុងក្រោយគេ ក្នុងប្រទេសប្រេស៊ីល កាលពីឆ្នាំ2014។ ក្នុងយុទ្ធនាការនោះ ក្រុមម្ចាស់ផ្ទះ បានចាញ់ទាំងអាម៉ាស់ក្នុងលទ្ធផល 7-1 ក្រោមស្នាដៃក្រុមជម្រើសជាតិអាល្លឺម៉ង់ ក្នុងវគ្គពាក់កណ្តាលផ្តាច់ព្រ័ត្រ តែនៅពេលដែលត្រូវបានស្នើឱ្យជ្រើសរើសក្រុមដែលអាចឈ្នះពាននៅឆ្នាំនេះ លោក Putin បានឆ្លើយថា៖ «ក្រុមម្ចាស់ផ្ទះ»៕

ប្រភពពី៖ Channel News Asia

June 6, 2018

រ៉ូបូតបូមធូលីរបស់ LG មិនត្រឹមតែបូមធូលីប៉ុណ្ណោះទេវាក៏អាចការពារផ្ទះបានផងដែរ

លោក Kobi Ozer ដែលរស់នៅទីក្រុង Holon នៃប្រទេសអុីស្រាអែល, ខណៈដែលគាត់កំពុងធ្វើការនៅក្នុង ការិយាល័យរបស់គាត់គឺគាត់ទទួលបានដំណឹងនៅក្នុងទូរស័ព្ទដៃរបស់គាត់ពីប្រភពដែលមិនគួរអោយជឿមួយ គឺម៉ាស៊ីនបោសសំអាតរបស់គាត់។ នៅពេលដែលលោក Ozer គាត់បើកកម្មវិធី LG SmartThinQ™ ទើបគាត់ដឹងថារ៉ូបូតបូមធូលីរបស់គាត់បានផ្ញើររូបភាពអ្នកលួចចូលទៅក្នុងផ្ទះរបស់គាត់។ HOM-BOT មានមុខងារពិសេសការពារផ្ទះ ដែលមានកាមេរ៉ាចាប់សកម្មភាព ដែលមិនប្រក្រតីនៅពេលដែលមាននរណាម្នាក់លួចចូលទៅក្នុងផ្ទះ។

HOM-BOT Wi-Fi របស់ LG គឺរ៉ូបូតបូមធូលីដែលមានមុខងារពិសេសបញ្ជាពីចំងាយ និងមុខងារចាប់សកម្មភាពដែលវាដំណើរការជាមួយកម្មវិធី SmartThinQ។ ជាមួយនឹងភាពឆ្លាតវៃរបស់កម្មវិធី DeepThinQ ™ AI រ៉ូបូតបូមធូលីប្រើឧបករណ៍ចាប់សញ្ញាឆ្លាតវៃរបស់ខ្លួនដើម្បីចៀសវាងការប៉ះទង្គិចជាមួយគ្រឿងសង្ហារឹមនិងមើលឃើញក្នុងផ្ទះជាមួយកាមេរ៉ារបស់វាដើម្បីធានាថាវាគ្រប់ដណ្តប់ គ្រប់ជ្រុងនិងរន្ធតូចៗទាំងអស់និងមិនបន្សល់ធូលីនិងកំទេចផ្សេងៗទៀតឡើយ។

មុខងារ Home-View និង Home-Guard គឺជាលក្ខណៈពិសេសនៃសុវត្ថិភាពផ្ទះដែលបានបង្កើតឡើងនៅក្នុង HOM-BOT ដើម្បីតាមដាននិងផ្តល់ការជូនដំណឹងនៅក្នុងហេតុការណ៍នៃការលួចចូលឬការឈ្លានពាន។ មុខងារ Home-View អនុញ្ញាតឱ្យម្ចាស់ផ្ទះប្រើប្រាស់កាមេរ៉ានៅក្នុងម៉ាស៊ីនបូមធូលីដើម្បីមើលផ្ទៃខាងក្នុងផ្ទះរបស់ពួកគេពីចម្ងាយតាមរយៈស្មាតហ្វូនរបស់ពួកគេ។ មុខងារ Home-Guard បំពេញបន្ថែម មុខងារ Home-View ដោយតាមដានសកម្មភាពនៅផ្ទះជានិច្ចតាមរយៈឧបករណ៍ចាប់សញ្ញារបស់ខ្លួននិងបញ្ជូនរូបភាពចំនួនប្រាំបន្តគ្នាទៅកម្មវិធី Smart ThinQ នៅពេលដែលវារកឃើញសកម្មភាពមិនប្រក្រតីណាមួយ។

សុវត្ថិភាពផ្ទះត្រូវបានរីកលូតលាស់នៅក្នុងចំណោមអ្នកប្រើប្រាស់និងហេតុផលដ៏សំខាន់ម្ចាស់ផ្ទះដែលមានចំណាប់អារម្មណ៍ធ្វើឱ្យផ្ទះរបស់ពួកគេឆ្លាតវៃជាងមុន។ ខណៈពេលដែល HOM-BOT របស់ក្រុមហ៊ុន LG អាចគ្រាន់តែជាម៉ាស៊ីនសម្អាតធូលីមួយមានភាពឆ្លាតវៃគ្រប់គ្រាន់ដើម្បីដឹងនៅពេលដែលមានអ្វីមួយកើតឡើងខុសប្រក្រតី។ នៅពេលដែលវាផ្តល់ដំណឹងលោក Ozer បានទូរស័ព្ទទៅប៉ូលីសនិងអ្នកជិតខាងរបស់គាត់។ ចោរគាស់ផ្ទះទំនងជាគេចខ្លួនបន្ទាប់ពី HOM-BOT បានបញ្ចេញពន្លឺរបស់វា។ សំណាងល្អគ្មានរបស់អ្វីដែលនៅក្នុងផ្ទះបាត់បង់ឬខូចខាតសោះឡើយ៕

June 6, 2018

ការអនុគ្រោះឱ្យបង់ពន្ធប្រថាប់ត្រាតែ1ដងចុងក្រោយលើការផ្ទេរកម្មសិទ្ធិអចលនទ្រព្យ កំណត់ត្រឹមចុងឆ្នាំ2018

ដើម្បីជួយសម្រួលដល់ប្រជាពលរដ្ឋក្នុងការបង់ពន្ធប្រថាប់ត្រាលើការកាត់ប្លង់ដីដែលកន្លងមកមានភាពស្មុគស្មាញក្នុងការសើរើអំពីការបង់ពន្ធប្រថាប់ត្រានោះ រាជរដ្ឋាភិបាលតាមរយៈសាលារាជធានីភ្នំពេញបានអនុញ្ញាតឱ្យប្រជាពលរដ្ឋទៅបង់ពន្ធប្រថាប់ត្រានេះតែមួយដង (មិនបាច់សើរើ) នៅត្រឹមថ្នាក់ខណ្ឌ ដោយទុករយៈពេលឱ្យរហូតមុនដំណាច់ឆ្នាំ2018។

ឯកឧត្តម ឃួង ស្រេង អភិបាលរាជធានីភ្នំពេញបានសរសេរនៅលើទំព័រហេ្វសប៊ុកផ្ទាល់ខ្លួនរបស់លោកថា ដោយពិនិត្យឃើញពីការលំបាករបស់បងប្អូនប្រជាពលរដ្ឋ និងដើម្បីជួយសម្រួលដល់ម្ចាស់កម្មសិទ្ធិអចលនទ្រព្យចុងក្រោយគេដែលពុំមានលទ្ធភាពបង់ពន្ធប្រថាប់ត្រាច្រើនដងគ្រប់ដំណាក់កាលនៃការផ្ទេរកម្មសិទ្ធិអចលនទ្រព្យ សម្តេចតេជោនាយករដ្ឋមន្ត្រីបាន ឯកភាព និងអនុញ្ញាតជាគោលការណ៍ដើម្បីបន្តផ្តល់ការអនុគ្រោះឱ្យម្ចាស់កម្មសិទ្ធិអចលនទ្រព្យចុងក្រោយគេបង់ពន្ធប្រថាប់ត្រាតែមួយដងលើការផ្ទេរកម្មសិទ្ធិអចលនទ្រព្យដែលកន្លងមកធ្លាប់បានផ្ទេរបន្តដៃគ្នាពីម្នាក់មកម្នាក់ច្រើនដងនោះនៅត្រឹមថ្នាក់សង្កាត់-ខណ្ឌ ហើយកំណត់សុពលភាពនៃការអនុវត្តការងារនេះត្រឹមថ្ងៃទី31 ខែធ្នូ ឆ្នាំ2018តែប៉ុណ្ណោះ។

ជាមួយគ្នានេះលោក ម៉េត មាសភក្តី អ្នកនាំពាក្យសាលារាជធានីភ្នំពេញមានប្រសាសន៍ថា កាលពីឆ្នាំ 2016កន្លងទៅ រាជរដ្ឋាភិបាលធ្លាប់បានអនុគ្រោះដល់ប្រជាពលរដ្ឋជាម្ចាស់កម្មសិទ្ធិអចលនទ្រព្យបង់ពន្ធប្រថាប់ត្រាតែមួយលើកចុងក្រោយនៅត្រឹមថ្នាក់សង្កាត់-ខណ្ឌនេះម្តងរួចមកហើយ ហើយបច្ចុប្បន្នដោយសង្កេតឃើញថា ប្រជាពលរដ្ឋមួយចំនួននៅរាជធានីភ្នំពេញ នៅមិនទាន់បានកាត់ប្លង់ និងបង់ពន្ធប្រថាប់ត្រានៅឡើយ ទើបរាជរដ្ឋាភិបាលបានអនុញ្ញាតជាគោលការណ៍អនុគ្រោះឱ្យប្រជាពលរដ្ឋទៅបង់ពន្ធប្រថាប់ត្រានេះឱ្យបានគ្រប់គ្នានៅមុនដំណាច់ឆ្នាំ2018នេះកុំឱ្យខកខាន។

ឯកឧត្តម ឃួង ស្រេង (ឆ្វេង) អភិបាលរាជធានីភ្នំពេញ ក្នុងកិច្ចប្រជុំ

លោកថា បើសិនជាប្រជាពលរដ្ឋដែលជាម្ចាស់កម្មសិទ្ធិអចលនទ្រព្យណាម្នាក់ខកខានមិនបានកាត់ប្លង់ និងបង់ពន្ធប្រថាប់ត្រាឱ្យបានមុនកាលកំណត់ គឺដំណាច់ឆ្នាំ2018នេះទេ គេនឹងជួបការលំបាកដោយត្រូវសើរើពីម្ចាស់ដើមដំបូង ដែលមានន័យថា បើសិនប្លង់ដីមួយកន្លែងមានអ្នកទិញ-លក់តៗគ្នាចំនួន 3លើក នោះម្ចាស់កម្មសិទ្ធិអចលនទ្រព្យចុងក្រោយគេនឹងត្រូវបង់ទាំង 3លើកនោះឡើងវិញ ទើបអាចកាត់ប្លង់ទទួលស្គាល់តាមផ្លូវច្បាប់បាន។ តែយ៉ាងណាលោកមិនបានប្រាប់ឱ្យដឹងអំពីនីតិវិធីនៃការបង់ពន្ធប្រថាប់ត្រាលើកនេះឡើយ ដោយលោកលើកឡើងថា នេះជាការងារបច្ចេកទេស។

លោក សេង ចន្ថា ម្ចាស់អចលនទ្រព្យមួយកន្លែងនៅក្នុងខណ្ឌដង្កោបានមានប្រសាសន៍ សាទរទៅនឹងចំណាត់ការរបស់រាជរដ្ឋាភិបាលដែលបានប្រកាសឱ្យប្រជាពលរដ្ឋបង់ពន្ធប្រថាប់ត្រាតែមួយលើកចុងក្រោយនៅត្រឹមថ្នាក់សង្កាត់ និងខណ្ឌនេះ។

លោកថា លោកបានទិញដីមួយប្លង់មានទំហំ 5ម៉ែត្រគុណនឹង25ម៉ែត្រ នៅក្នុងសង្កាត់ទៀន ខណ្ឌដង្កោ រាជធានីភ្នំពេញ នៅមិនទាន់បានកាត់ប្លង់ និងបង់ពន្ធប្រថាប់ត្រានៅថ្នាក់ក្រសួងនៅឡើយ ពោលគឺបានកាត់ឈ្មោះនៅត្រឹមថ្នាក់ភូមិ និងសង្កាត់តែប៉ុណ្ណោះ ហើយបើសិនជារដ្ឋាភិបាលអនុគ្រោះបែបនេះ លោកនឹងរកពេលទំនេរណាមួយទៅបង់ពន្ធប្រថាប់ត្រានេះឱ្យបានទាន់ពេលវេលាមិនឱ្យខកខានឡើយ។

លោកថា កាលពីឆ្នាំ2013 គ្រួសារលោកបានទិញដីមួយប្លង់នៅជិតផ្សារទួលពង្រ ដោយកាត់ឈ្មោះត្រឹមថ្នាក់សង្កាត់តែប៉ុណ្ណោះ ហើយកន្លងទៅប៉ុន្មានឆ្នាំក្រោយមកលោកមានបំណងលក់ដីនោះទៅឱ្យអ្នកទិញបន្ទាប់ទៀត ប៉ុន្តែថ្នាក់សង្កាត់មិនហ៊ានចុះហត្ថលេខាទទួលស្គាល់ការទិញ-លក់ដីនោះឡើយ ដោយសារតែមិនបានបង់ពន្ធប្រថាប់ត្រាកាត់ឈ្មោះពីម្ចាស់ដើមមក ដែលធ្វើឱ្យការងារទិញ-លក់ដីនោះជួបការលំបាក និងស្មុគស្មាញជាខ្លាំង ដោយត្រូវតម្រូវឱ្យរកម្ចាស់ដើម និងម្ចាស់បន្ទាប់មកកាត់ឈ្មោះបង់ពន្ធប្រថាប់ត្រាជាមុនទើបអាចលក់បន្តទៀតបាន។

ជាទូទៅការផ្ទេរកម្មសិទ្ធិអចលនវត្ថុត្រូវបានចែកជាពីរ គឺការផ្ទេរកម្មសិទ្ធិអចលនវត្ថុប្លង់ទន់ និងប្លង់រឹង។ ចំពោះការផ្ទេរសិទ្ធិលើអចលនវត្ថុដែលមានប្លង់ទន់ តាមធម្មតាធ្វើឡើងតាមរយៈសេចក្តីបញ្ជាក់លើលិខិតផ្ទេរសិទ្ធិពីសំណាក់អាជ្ញាធរមូលដ្ឋានចាប់ពីកម្រិតរដ្ឋបាលថ្នាក់ភូមិ ឬឃុំ/សង្កាត់ ឬអាចរហូតដល់ស្រុក/ខណ្ឌ។ ជាទូទៅដំណើរការផ្ទេរសិទ្ធិបែបនេះមានលក្ខណៈងាយស្រួល ឆាប់រហ័ស ប៉ុន្តែបច្ចុប្បន្នការផ្ទេរសិទ្ធិប្លង់ទន់ក៏តម្រូវឱ្យបង់ពន្ធប្រថាប់ត្រា 4% ផងដែរ។

ចំណែកអចលនវត្ថុដែលមានប្លង់រឹងវិញ គូភាគីអាចតាក់តែងកិច្ចសន្យាដែលមានចែងអំពីលក្ខខណ្ឌសិទ្ធិ និងកាតព្វកិច្ចរបស់គូភាគីយ៉ាងលម្អិត រាប់បញ្ចូលទាំងដំណាក់កាលបង់ប្រាក់ថ្លៃទិញអចលនវត្ថុដោយអនុលោមទៅតាមដំណាក់កាលនៃការចាត់ចែងផ្ទេរសិទ្ធិ។ ក៏ប៉ុន្តែកិច្ចសន្យាបែបនេះគ្រាន់តែជាឯកសារនៃការព្រមព្រៀងគ្នាជាលក្ខណៈឯកជនរវាងគូភាគីតែប៉ុណ្ណោះ ដោយមិនអាចយកទៅចាត់ចែងផ្ទេរកម្មសិទ្ធិបានឡើយ។ ដើម្បីចាត់ចែងផ្ទេរសិទ្ធិលើអចលនវត្ថុបាន គូភាគីត្រូវបំពេញបែបបទលើលិខិតយថាភូតរបស់រដ្ឋបាលសុរិយោដីនិងផ្តិតស្នាមមេដៃនៅចំពោះមុខមន្ត្រីមានសមត្ថកិច្ច។

ឯកសារគាំទ្រដែលត្រូវការនៅក្នុងដំណើរការផ្ទេរសិទ្ធិនេះ រួមមានជាអាទិ៍ អត្តសញ្ញាណប័ណ្ណសញ្ជាតិខ្មែរ ឬលិខិតបញ្ជាក់អត្តសញ្ញាណណាមួយផ្សេងទៀតក៏បានដែលអាជ្ញាធរសុរិយោដីអាចទទួលយកបាន ហើយក្នុងករណីដែលភាគីណាមួយជានីតិបុគ្គលក្រុមហ៊ុន ម្ចាស់ហ៊ុនត្រូវធ្វើលិខិតប្រគល់សិទ្ធិដើម្បីអនុញ្ញាតឱ្យអ្នកតំណាងជារូបវ័ន្តបុគ្គលបំពេញកិច្ចក្នុងនាមនីតិបុគ្គលដែលអាចតម្រូវឱ្យមានការបញ្ជាក់ពីមេធាវី និង/ឬពីអាជ្ញាធរឃុំ/សង្កាត់។

នៅពេលមន្ត្រីសុរិយោដីបំពេញនីតិវិធី និងបែបបទក្នុងដែនសមត្ថកិច្ចរបស់ខ្លួនរួចហើយ ច្បាប់តម្រូវឱ្យបង់ពន្ធប្រថាប់ត្រាលើការផ្ទេរសិទ្ធិលើអចលនវត្ថុ (ដែលបច្ចុប្បន្នអត្រាពន្ធគឺ 4%នៃតម្លៃអចលនវត្ថុដែលវាយតម្លៃដោយអាជ្ញាធរពន្ធដារ)។ ក្រោយពីបានបង់ពន្ធត្រឹមត្រូវរួចរាល់ហើយ អាជ្ញាធរសុរិយោដីនឹងបញ្ចប់នីតិវិធីនៃការផ្ទេរសិទ្ធិ ដោយធ្វើការចុះបញ្ជីការផ្ទេរនេះក្នុងកំណត់ត្រាផ្លូវការ និងចារនិទ្ទេសន៍សម្គាល់ការផ្ទេរសិទ្ធិនៅលើឯកសារប័ណ្ណកម្មសិទ្ធិ ជាការបញ្ចប់ដំណើរការផ្ទេរសិទ្ធិជាផ្លូវការ និងដោយស្របច្បាប់៕

June 6, 2018

ចង់ទិញផ្ទះបង់រំលស់គួរតែពិនិត្យទៅលើចំណុចអ្វីខ្លះដើម្បីកុំឱ្យខាតបង់ធ្ងន់ធ្ងរ?

និន្នាការនៃការទិញផ្ទះបង់រំលស់កំពុងមានភាពពេញនិយមនៅលើទីផ្សារអចលនទ្រព្យក្នុងប្រទេសកម្ពុជា ដោយសារតែប្រជាពលរដ្ឋយល់ថា ការរស់នៅលើផ្ទះបង់រំលស់ ទោះជាត្រូវចំណាយខ្ពស់ជាងផ្ទះជួលពិតមែន ប៉ុន្តែពេលបង់ប្រចាំខែយូរៗទៅ នឹងក្លាយជាកម្មសិទ្ធិផ្ទាល់ខ្លួន ចំណែកផ្ទះជួលទោះជាបង់យូរយ៉ាងណាក៏នៅតែជាកម្មសិទ្ធិរបស់គេដដែល។

ចំពោះការបង់រំលស់នៅតាមបុរីលំនៅឋានមួយចំនួន តម្រូវឱ្យអតិថិជនបង់ចន្លោះពី 20%ទៅ30%នៃតម្លៃផ្ទះសរុបជាមុនសិន ហើយអាចបង់រំលស់បន្តជាមួយធនាគារបាន ចំណែកបុរីមួយចំនួនផ្តល់លទ្ធភាពអនុញ្ញាតឱ្យអតិថិជន អាចបង់រំលស់100% ដោយមិនចាំបាច់មានប្រាក់កក់ជាមុននោះទេ ប៉ុន្តែត្រូវបង់ប្រាក់ប្រចាំខែខ្ពស់ និងមានរយៈពេលវែងទៀតផង។

លោក រិន លាងហ៊ត់ ជាអ្នកធ្វើការក្នុងក្រុមហ៊ុនឯកជនមួយដែលបានទិញផ្ទះល្វែងមួយកន្លែងនៅជិតសាកលវិទ្យាល័យកសិកម្មចំការដូង ក្នុងខណ្ឌដង្កោ រាជធានីភ្នំពេញ មានប្រសាសន៍ថា ក្រោយពីរៀបអាពាហ៍ពិពាហ៍រួច គ្រួសាររបស់លោកបានជួលផ្ទះគេនៅ នៅជិតវត្តសន្សំកុសល សង្កាត់បឹងទំពុន ក្នុងតម្លៃ180ដុល្លារក្នុងមួយខែ លុះទទួលបានព័ត៌មានថា មានផ្ទះលក់បង់រំលស់ដោយមិនបាច់មានប្រាក់ដើមកក់ គ្រួសារលោកបានពិភាក្សាគ្នាពីចំណូល រួចហើយក៏សម្រេចចិត្តទិញផ្ទះបង់រំលស់ក្នុងមួយខែប្រមាណជា 600ដុល្លារ ក្នុងរយៈពេល 17ឆ្នាំដោយគ្មានប្រាក់កក់ដំបូង ក្នុងអត្រាការប្រាក់ 12%ក្នុងមួយឆ្នាំ។

លោកថា ដោយសារចំណូលគ្រួសារអាចមានលទ្ធភាពទើបលោកហ៊ានបង់រំលស់ដូច្នេះ ដោយយកប្រាក់ខែខ្លួនមួយចំនួនធំមកបង់ សល់បន្តិចបន្តួចបូកជាមួយចំណូលពីការរកស៊ីរបស់ភរិយាទុកសម្រាប់ចាយវាយទៅតាមតម្រូវការផ្សេងៗប្រចាំថ្ងៃ។

ទោះយ៉ាងណាលោកនិយាយថា ក្រោយពីទិញផ្ទះល្វែងក្នុងបុរីមក លោកបានផ្លាស់ទីលំនៅឆ្ងាយជាងមុន ដែលហាក់ទទួលបន្ទុកក្នុងគ្រួសារធ្ងន់ជាងជួលផ្ទះគេនៅ តែចេះតែស៊ូទ្រាំទៅដើម្បីមានលំនៅឋានផ្ទាល់ខ្លួនសម្រាប់រស់នៅដូចគេដូចឯង។ លោកបានគិតថា គួរតែសន្សំប្រាក់ឱ្យបានប្រមាណជា 20,000ដុល្លារដើម្បីបង់ថ្លៃ 30%ទៅឱ្យម្ចាស់បុរីហើយកាត់ប្លង់ចេញពីបុរីយកទៅតម្កល់នៅធនាគារដើម្បីអាចខ្ចីប្រាក់យកទៅបង់ផ្តាច់ឱ្យបុរី ព្រោះខ្ចីប្រាក់ពីគ្រឹះស្ថានមីក្រូហិរញ្ញវត្ថុ ឬធនាគារ មានអត្រាការប្រាក់ទាបជាងការបង់ផ្ទាល់ជាមួយម្ចាស់បុរី។

ជាការពិតណាស់អ្នកទិញផ្ទះបង់រំលស់នៅក្នុងគម្រោងលំនៅឋានឯកជននានា ពិតជាចង់បង់រំលស់ជាមួយធនាគារ ឬគ្រឹះស្ថានមីក្រូហិរញ្ញវត្ថុប្រាកដមែន ដើម្បីទទួលបានអត្រាការប្រាក់ទាបត្រឹមតែ7% ឬ9%ប៉ុណ្ណោះក្នុងមួយឆ្នាំ ជាការជួយសម្រួលដល់ការចំណាយក្នុងបន្ទុកគ្រួសារ ប៉ុន្តែបញ្ហាវាស្ថិតនៅត្រង់ថា តើអ្នកទិញមានប្រាក់ដើម 30%សម្រាប់បង់ក្នុងដំណាក់កាលដំបូងដែរទេ? ដើម្បីឱ្យស្របតាមតម្រូវការ និងលក្ខខណ្ឌទាមទាររបស់ធនាគារនោះ?

បុគ្គលិកគណនេយ្យក្នុងបុរីមួយបាននិយាយក្នុងលក្ខខណ្ឌមិនបញ្ចេញឈ្មោះថា សម្រាប់គម្រោងបុរីលំនៅឋានរបស់ខ្លួនមិនមានការយល់ទាស់អ្វីទេ បើសិនជាអតិថិជនមានលទ្ធភាព បង់ប្រាក់ដើម 30%មកឱ្យបុរី ហើយមានថវិកាសម្រាប់កាត់ប្លង់នោះ បុរីលំនៅឋាននឹងរៀបចំឯកសារជូនអតិថិជន ដោយមិនមានការរួញរា ឬស្ទាក់ស្ទើរអ្វីឡើយ ដើម្បីជួយសម្រួលដល់អតិថិជនឱ្យមានលក្ខខណ្ឌងាយស្រួលក្នុងការបង់ផ្តាច់ ព្រោះថា ក្នុងគម្រោងបុរីគឺចង់បានតែអតិថិជនមានប្រាក់គ្រប់ចំនួនមកទិញផ្តាច់មិនចាំបាច់បង់រំលស់ដើម្បីឱ្យក្រុមហ៊ុនប្រមូលទុនយកទៅពង្រីកការវិនិយោគ សាងសង់លំនៅឋានសម្រាប់លក់ឱ្យអតិថិជនបន្តទៀត។

លោក ណុប សូនី ប្រធានផ្នែកឥណទាននៃគ្រឹះស្ថានមីក្រូហិរញ្ញវត្ថុ ធីប៊ីប៊ី(ខេមបូឌា) ភីអិលស៊ី (TBB (CAMBODIA) MICROFINANCE INSTITUTION PLC) របស់ចិនតៃវ៉ាន់ដែលមានការិយាល័យតំណាងនៅក្នុងក្រុងភ្នំពេញ មានប្រសាសន៍ថា ការបង់រំលស់ជាមួយធនាគារ ឬគ្រឹះស្ថានមីក្រូហិរញ្ញវត្ថុពិតជាទទួលបានអត្រាការប្រាក់ទាបជាងការបង់រំលស់ជាមួយបុរីផ្ទាល់ពិតប្រាកដមែន បើសិនជាអតិថិជនមានទ្រព្យបញ្ចាំ(ប្លង់ផ្ទះ) ដែលមានតម្លៃចាប់ពី 30,000ដុល្លារឡើងទៅ។

លោកថា សម្រាប់គ្រឹះស្ថានមីក្រូហិរញ្ញវត្ថុរបស់លោកអាចផ្តល់កម្ចីដែលមានទឹកប្រាក់ច្រើនចន្លោះពី30,000ដុល្លារ ទៅដល់ 500,000ដុល្លារក្នុងអត្រាការប្រាក់ត្រឹមតែ 7%ទៅ 10%ប៉ុណ្ណោះក្នុងមួយឆ្នាំ ដែលមានការប្រាក់ទាបជាងបង់ផ្ទាល់ជាមួយបុរីដែលខាងបុរីជាទូទៅតម្រូវឱ្យអតិថិជនបង់រំលស់ជាមួយអត្រាការប្រាក់ 12%ក្នុងមួយឆ្នាំ។

ជាទូទៅការរកកម្ចីពីធនាគារដើម្បីទិញផ្ទះ អតិថិជនគួរតែសិក្សាឱ្យបានលម្អិតពីធនាគារ ឬគ្រឹះស្ថានមីក្រូហិរញ្ញវត្ថុនីមួយៗ ព្រោះសព្វថ្ងៃមានធនាគារ និងគ្រឹះស្ថានមីក្រូហិរញ្ញវត្ថុជាច្រើនដែលផ្តល់កម្ចីជូនក្នុងលក្ខខណ្ឌខុសៗគ្នា ធនាគារ ឬគ្រឹះស្ថានមីក្រូហិរញ្ញវត្ថុមួយចំនួនផ្តល់ជូននូវកម្ចីដល់អតិថិជនដោយផ្តោតតែលើកម្ចីសម្រាប់បើកអាជីវកម្មដែលមានរយៈពេលខ្ចីពី 5-10ឆ្នាំ និងមានអត្រាការប្រាក់ខ្ពស់ចន្លោះពី10%-12%។

ចំណែកឯធនាគារ ឬគ្រឹះស្ថានមីក្រូហិរញ្ញវត្ថុមួយចំនួនទៀតផ្តល់កម្ចីផ្តោតលើការទិញផ្ទះដោយអាចផ្តល់ជូនចន្លោះពី50%-80%នៃតម្លៃ អចលនទ្រព្យ(ផ្ទះ) អាស្រ័យលើទីតាំងរបស់អចលនទ្រព្យនោះ ហើយផ្តល់ជូននូវរយៈពេលសងត្រឡប់វែងពី15-25ឆ្នាំ និងអត្រាការប្រាក់ទាបចន្លោះពី6%-10%។ ប្រសិនបើអតិថិជនមិនបានសិក្សាលម្អិតលើកម្ចីរបស់ធនាគារ ឬគ្រឹះស្ថានមីក្រូហិរញ្ញវត្ថុពីលក្ខខណ្ឌ និងប្រភេទនៃកម្ចីនីមួយៗទេនោះ ការខ្ចីប្រាក់ទិញផ្ទះក្តីឬបើកអាជីវកម្មក្តី លោកអ្នកអាចប្រឈមនឹងការខាតបង់លើអត្រាការប្រាក់ខ្ពស់ ក៏ដូចជារយៈពេលសង់ត្រឡប់លឿនពេកដែលធ្វើឱ្យយើងពិបាកនឹងបង់សង៕

June 5, 2018

Author: វល័ក្ខ